\id COL - Kuot NT [kto] -Papua New Guinea 2001 (DBL 2014) 
\h Kolosi 
\toc1 Babam la omirong Paulo me mai ekelesiap onim Kolosi 
\toc2 Kolosi 
\toc3 Kl 
\mt1 Babam la omirong Paulo me mai ekelesiap onim Kolosi  
\c 1  
\p
\v 1 Turuo Paulo, non Apostolo ang Karisito Iesu. Iro agat kan ang, Morowa la toiteong gare Apostolo ang Iesu Karisito, ga tume tuaramo bais ula muru.  
\v 2 Turuo ga Timoti, papa ruang, ii la omiring urio babam me miun ekelesiap, mimi papap ira Karisito onim na taun Kolosi. Mariking me ai Morowa Mamo buang irie la eba miboaving ga malina le ot na dalap mi busit.   
\s1 Ivo Paulo temaieng me nagan maiong ekelesiap onim Kolosi  
\p
\v 3 Tie, mirier taraiap la ime marik me milam, ga ime busit ivo temaieng me aun Morowa, irie Ira ang Ila Kakani buang Iesu Karisito.  
\v 4 Memani, ipto ra ties o nagan ming ira Karisito Iesu ga na ming maime inamaniap am Morowa.  
\v 5-6 Mime na ga nagan gare rie, memani mauanmila pagap la marangameng meba mikameng Morowa ma la maiot na panbinim. Tinan la mipto uriro ties migat o bais ula mumuru, na tara la betieng mi. Urio bais ula mumuru, man puaro o natauan la la mipto ga omit uakap ubonuvarap ang Morowa la betieng ga kakanu ga man lopiat o parak a tavuk ila mumuri kabirana mi. Are gat to, uriro bais ula muru la baismeng me maun mirier inamaniap na uro kimanam, ga betieng ga kakanu ga man lopiat o parak a tavuk ila mumuri.  
\v 7 Eva, amit ara Epafras la betong ira mi ga misinguala o bais ula mumuru. Iriro Epafras, irie la migan ing o uriro ubi ang Karisito ga mitara naing aime. Ga irie la man okosarong ubi ang Karisito na dalap a. Are ratmat ga ula mi arakin ii ga misinguala meba miagailie iro ubi ang Karisito.  
\v 8 Ga terigiong me ii ga iulo o uriro ait la mime akosar tavuk o na migat me inamaniap am Morowa iro kukunim ang Muranama Ila Babai.   
\s1 Marikong Paulo maime ekelesiap onim Kolosi  
\p
\v 9 Tie, papto utmat ait a tavuk ming o na. Are ratmat ga o urie kan natauan la la papto, teiara ga man mariking meba miagailie Morowa. Ime marik gare ro, Eba misuvaraang Muranama Ila Babai o agat ang ula muru ga unirap ga puoming meba oarakiming maset agat ang Morowa.  
\v 10 Leba okosarming gare tiro, eba akosarming tavuk maiang inamaniap am Morowa ga tavuk la teuba Morowa aime. Ga puoming meba makosarming mirier ubiap mila murum ga eba lopmaiaring parakiap. Ga eba maset amira Morowa ga urio unirap gat la eba betieng ga man kakanu ba.  
\v 11 Ga Morowa kan la eba mingangasang o non ara non ara kukunim ang, ga iro kukunim ang ula kakanu migat, puoming meba dusming maranit ga tala kan tesugaming iro giginanim ula kanu. Karuk. Pa man temibat la miavio giginanim.  
\v 12 Ga eba mimama temaieng me aun Morowa Mamo buang. Iriro Morowa Mamo buang, irie la mikosarong ga amiuluan tavuk ila mumuri ga puoming meba mamila pagap tinan la midaong ma meba alam maun inamaniap am la maionama na lalabie ang.  
\v 13 Eva, ina bulagiong iro ngangas ieng arubu ang Satan ga buuabu una butamat ang Poi ang, irie la mitara naong aime.  
\v 14 Iro kan ubi ang, Poi ang Morowa la ina busauong ga mapugutuara kirinimup buam.   
\s1 Tavuk ang Karisito ga ubi ang  
\p
\v 15 Tie, iriro Poi ang Morowa, irie la kauna gare uniap a Morowa la tale puobuong meba agimabuong ma irap buo. Ga irie la natauanong migat kabirana ma mirier pagap la makosarong Morowa.  
\v 16 Memani, na tara la aulo Morowa Iesu meba makosarang mirier pagap ganam, tie makosarong pagap na panbinim ga na kimanam, ga pagap la puobuong meba magimabuong ga pagap la tale puobuong meba magimabuong. Ga irie gat la makosarong non ara non ara angelop ganam la memanim bop. Eva, irie la makosarong mirier pagap ganam ma kilalap a ga mirier pagap ganam la am kan.  
\v 17 Pa iriro Poi ang Morowa, Iesu Karisito la unama tiralo kan ga uke me miriro pagap ganam. Ga ume uale mabuo mirier pagap ganam ga mirier pagap ganam la mime maionama maset na pialap maiam la maiot.  
\v 18 Iriro Iesu, irie la bugam ma ekelesiap, pa ekelesiap la neip a. Irie kan irie la muana o lotu. Irie la natauan migana la ina teuara kabirana ma inamaniap la mevara, ga eba onang ga ake me pagap ganam ga ualeng mabuo.  
\v 19 Memani, Morowa kan la teuba me mirier pagap am ganam mila mumurum le maiot aun Iesu Karisito, ga irie kan la obodakong urio ninimiap ga agat ula muru ga ngangas.  
\v 20 Ga naong meba makosarang mirie pagap ganam onim na kimanam ga onim na panbinim meba nemiganmeng ga irie. Are ratmat ga ira olabuan a Karisito la uriva iro maiogun, Morowa la adukong tavuk buang o nekaronulap.   
\p
\v 21 Tinan la mime akosar tavuk ila kire ga mionama kakaliat auluo Morowa. Are ratmat ga nekaromila maset ga irie na dalap mi.  
\v 22 Pa Iesu Karisito la uvara ra iro maiogun, ga na iruo tavuk la mikosarong Morowa meba nemiganming ga irie titot. Okosarong gare tiruo meba milagiang ga eba mumiong ai, ga eba mibabaim ba ga mipuvuvum ba ga karuk o kiribas ba ming na irap a.  
\v 23 Tie, leba man okilivaming nagan ga man dusming maranit ubuo bais ula muru, tie utmat la eba betieng gare ro. Are ratmat ga babun miurana paga ba ga eba omiolaing urio bais ula mumuru la ouanmila un nagan meba ina milagiang Karisito na la lagorang. Karuk. Uriro bais ula muru, urie la baismeng o me maun mirier inamaniap ganam la maionama na kimanam. Pa turuo Paulo la bettung gat migana o ubi la tume bais o urio bais ula mumuru. Ga paramo gat mai inamaniap ganam la maionama na kimanam, are ratmat ga mipto.   
\s1 Magaulie Paulo inamaniap onim Kolosi  
\p
\v 24 Tie, titot la tunama na luguan o arubu ga teruba la tuavio ngitngit meba miagaralie: Ga man tuavio ira ma neip tuo meba intamung ngitngit ang Karisito. Uriro ngitngit ang Karisito, urie la tale ka no. Karuk. Pa man iot ka. Are ratmat ga tuga opuorang urio ngitngit la toiteong Karisito meba maagaralie neip a, mimi ekelesiap o lotu.  
\v 25 Orula ra uriro ubi meba miagaralie mimi ekelesiap. Memani, Morowa kan la tovuvuoong meba okosartang ubi ang o agat ang. Are ratmat ga tuga opuorang meba baistang o bais ula muru ang Morowa me miun.  
\v 26 Ma mirie ra lap tinan urio ties la iot ga kagoiri ga garip ganam la tale omeit. Pa titot ovaikong bat Morowa urio ties ga betieng la uakap mai inamaniap am.  
\v 27 Morowa la naong meba masingala inamaniap am meba omeira, urio ties ula kagoiri la mumuru maset ga puoieng meba malaminaisieng maset teip ga magaulap ganam la tale onim Israel. Urio ties ula kagoiri, urie la unama Karisito ga mimi, ga auanmila un nagan meba ina milagiang ga mila mionang ga Karisito na lalabie ula kanu na panbinim.  
\v 28 Are ratmat ga pame bais o ties ang Karisito me maun mirier garip ma inamaniap. Ga mapalo meba maset temamalienmeng meba tale okosarmeng kiribas. Ga masingpala ma agarip ganam mila mumurum meba maset omeuluan ties ang Morowa. Paga marie muana la napang meba mirie ba ekelesiap mila mamaranim migat na irap a Morowa, meba betmeng ga mumurum ba maset gare Karisito na irap a Morowa.  
\v 29 Met iriro muana, tume okosar ubi maranit ga tuavio uro ngitngit ula kanu na neip tuo. Ga na tara la okosartung gare ro, Karisito kan la ualo urio kukunim toun, ga tume ubi o urio kukunim gano.   
\c 2  
\s1 Naganbuong maranit ga oguekbuong ties o kakarabunim  
\p
\v 1 Tie, narung meba amira irio paga: Mitara ubirung maranit meba miagaaralie mimi ekelesiap onim Kolosi ga inamaniap onim na taun Laodisia ga mirier inamaniap ganam la tale ka ogimameng pava ruo.  
\v 2 Okosartung ubi ula mamaranu meba mangangasieng dalap mi, ga eba mimaning namurit dalap a tavuk o na migat me ekelesiap papap mim. Tume okosar ubi ula mamaranu migat ga utmat la eba ongangasieng agat ming ga eba amira muana migat o urio ties la kagouri ang Morowa, irie Karisito.  
\v 3 Ira iriro Karisito, dakong o urio agat ga unirap ang Morowa are kakepup ga pagap mila murum la dakmeng na beng. Ga irie kan leba miagaalie maset meba mamira mirio pagap am Morowa.  
\v 4 Tuaramo urio ties miun, memani, tale narung meba mumaiong teip ba ga mivanameng ma tiesiap o rourou ga ebun mamiuluan non ara non ara tiesiap la tale am Karisito.  
\v 5 Memani, titot la tale tunama ga mimi. Pa ira muranama ruo, are la tunama ga mimi. Ga mitara teruba me milam la maset man akosarming tavuk ila puvuvui ga naganming maranit ira a Karisito.   
\s1 Parepbuong migat ira a Karisito ga eba obula ninimiap la iot atatan makin  
\p
\v 6 Are ratmat ga amila ra Karisito Iesu ga betong Ila Kakani ming. Are ratmat ga parepming ira a Karisito ga amiuluan tavuk ang.  
\v 7 Ga dusming maranit gare igulup o kuguom la mime maiario maranit kimanam ga dusieng maranit kuguom are luguan la dusong maranit nakap abuo labinama. Ga naganming maranit iro bais ula mumuru la misingpala o, ga man mivang temaieng me aun Morowa ma mirier lap ganam me pagap ganam la ualam miun.   
\p
\v 8 Tie, maset temamalienming. Ebun miaramo teip ties ba agarit ga mivanameng o ties o kakarabunim la namo meba naganming iro ga omiuluan. Teip are ro la mime ameuluan tavuk maiang eap ga agat maiong muranap ga agat it maiong inamaniap onim na uro kimanam. Pa tale mime omeuluan ties ang Karisito. Karuk.  
\v 9 Are ratmat ga man temamalienming maset. Memani, iriro Karisito, irie la Morowa pa betong gare migana ga unama na uro kimanam. Are ratmat ga ninimiap ga agat ula muru ga kukunim gano ang Morowa la dakieng ira Karisito.  
\v 10 Ga ira Karisito iriet talamet la ualo Morowa ninimiap ga agat ula muru ga kukunim gano aun, are ratmat ga ninimiap ming la dakieng migat. Ga iriro Karisito, irie la uke maime mirier muranap mila meke ga non muranap la memaning ngangas.   
\p
\v 11 Tie, na tara la parepming ira Karisito, apugutuara ra tavuk ming ila tatali. Pa tale akosarong iriro tavuk o kasau ira ma neip mi. Karuk. Pa eva, akosarong na dalap mi.  
\v 12 Uala iriro tavuk o nuvietiap buun meba akosarang tavuk ila muri o kasau na agat ang. Muana a iriro tavuk o nuvietiap, la are mivara ra ga Karisito. Ga miumu Morowa ga Karisito na tara la naganming iro ubi ang Morowa la imua Karisito na una.   
\p
\v 13 Tie, mimi inamaniap la tale onim Iudaia. Are ratmat ga tinan la tale omit maimai ang Moses ga mime makosar non ara non ara tavukup mila kiram ga kiribasiap mim la maiot na ninimiap ming. Met iriro tavuk ming, mimi la are la mivara ra na irap a Morowa. Pa na tara la imua Morowa Iesu, tie miimu gat ga mapugutuara mirier kiribasiap mim.  
\v 14 Ga opugutuara gat babam la omirmeng maimai una. Urio umir la nekaroila ga bubuo ga buvisieng meba dusbuong na ties. Pa apugutuara Morowa itmat paga ga asapong gane bo maiogun, na irie tara la uvara Iesu Karisito iro maiogun.  
\v 15 Ga opugutuara kukunim maiong mirier muranap mila uke ga mirie non muranap la memaning kukunim. Ga iro ubi la okosarong Karisito iro maiogun, Morowa la makurupin ga okosarong ubi maiong gare paga agarit na irap ma inamaniap ganam.   
\s1 Baraba mamiuluan tavukup maiam inamaniap onim na kimanam  
\p
\v 16 Are ratmat ga buat miairam teip meba mivuvuomeng a tavuk o parak ga tapnuap, o me uriro la ula kanu o lotu la mime omiuluan ma mirier karaip, o me nebola ga parak a ulang ila nei, o na la o sabat ma mirier wikip.  
\v 17 Iriro tavuk o tapnuap ga parak ga non ara non ara nebola, mirie la muranap it ma pagap migat la namo betmeng. Pa miriro pagap migat, mirie la mapop ira Karisito.  
\v 18 Tie, ame non teip la mime kakarabum ga memama tekapirmeng na irap ma inamaniap ga lotumeng me mai angelop. Nameng meba tiesmeng ma pagap la magimameng na kikiritniap, ga omeuluan it agat onim na uro kimanam ga man mamaranim meba makanirmeng tiesiap maiam, meba mamiuluan. Are ratmat ga buat miairam miriro teip meba ovugutmaiara uniap ming ula muru me tavukup mila murum.  
\v 19 Pa mirie teip la tale nemela ira Karisito ga omeuluan ties ang. Karuk. Iriro Karisito, irie la are bugam ma neip a, pa bubuo la kabuna are neip a. Are ratmat ga nebula ira a, pa non ekelesiap la are kilalap, pa mirie non ekelesiap la are kibap ga eba teagabulie kan kabirana buo. Me iriro tavuk, eba man kakanim ba neip buo iro kukunim ang Morowa.   
\p
\v 20 Tie, mivara ra ga Karisito, ga tale gat mionama upat ties o usingnualap onim na uro kimanam. Tie, memani ga miga mimung gare ba mimi la inamaniap onim na kimanam, a? Pa memani ga miga temiabung mapat maimaiap la tiesmeng gare ro,  
\v 21 “Buat nuaria paga ba, buat nu non parak ba, ga buat paong kilan nuo ira paga ba.”  
\v 22 Pa miriro maimaiap la eba tale lopmaiaring parak pa tubiat la ebat ina nam ba. Memani, teip it la makosarmeng mirio maimaiap ga busingmaiala ma. Pa tale maimai ang Morowa. Karuk.  
\v 23 Migat, mirio maimaiap la ofulutmeng agat maiong ga man agatmeng gare ro, “Eva, teuba Morowa me itmat tavuk. Are ratmat ga mumuru le kan tekapirbuong na irap a ga lotubuong na tavuk ila babai.” Are ratmat ga namo iniam kan ga akosarmeng tavuk ila kire na neip ma ga lotumeng o agat maiong kan. Pa irio paga la tale puoong meba maagaalie ga eba abunakmeng tavuk o na me neip onim na uro kimanam. Karuk kan migat.   
\c 3  
\s1 Tavukup mila babaim na irap a Morowa  
\p
\v 1 Pa inar buinim Morowa ga Karisito. Are ratmat ga man ubiming maranit meba mamila pagap onim na panbinim. Na urie pianam, la unama Karisito gare orong na kilan ila lamige ang Morowa.  
\v 2 Mirier taraiap le man agatming maime pagap onim na panbinim. Ebun it man agatming maime tavukup mila kiram la man mamiuluan inamaniap onim na kimanam.  
\v 3 Memani, na tara la naganming ira Karisito, mivara ra iro maiogun ga tale gat amiuluan tavuk onim na uro kimanam. Karuk. Ga urio ninimiap ula nou la kagoiri ira Karisito ga parepming ira Morowa. Are ratmat ga tale puoieng meba ogimameng.  
\v 4 Pa tubiat, na tara la eba betang Karisito, irie muana o ninimiap buong, la uakap na irap ma inamaniap, tie mimi gat la eba betming ga irie ira lalabie ila kani ang Morowa.   
\s1 Betbuong inamaniap mila neim ira Karisito  
\p
\v 5 Are ratmat ga minamuam ga mevara mirier tavukup onim na uro kimanam la maiot na dalap mi. Miriro tavukup la are ro: Tavuk o sadak ga tavuk ila papali ga tavuk o na ma neip. Ga tavuk o tebuk, ga mudurut me pagap maiam non teip. Uriro mudurut me pagap maiam non teip, urie la aret tavuk o lotu me mai morowap o kakarabunim na irap a Morowa.  
\v 6 Buat okosarming gare rie. Karuk. Memani, eba bukbukang Morowa ga alang uniap ula kiro maun mirier teip ganam la mime akosar tavuk are tiro.  
\v 7 Tinan na tara la tale ka naganming ira Karisito, tie mimi gat la mime makosar mitmat tavukup.  
\v 8 Pa titot mimi le mapugutmiara mirier tavukup ganam mila kiram. La are ro: Tavuk o mukmukanim ga non teip, tavuk o bukbuk ga tavuk o ukirara ma non teip, ga ties o fugau ira Ila Kani, ga ties ula papalu meba miniam non teip. Mimi le mapugutmiara miriro tavukup ganam.  
\v 9-10 Buat makarabutmiala non ekelesiap papap mim. Memani, opugutmiara ra ninimiap ming ula tatalu iat ga mirier tavukup iam mila kiram. Ga mino ra urio ninimiap ula nou gare la minam burap ira ma neip mi. Ga uriro ninimiap ula nou la ume okosar Morowa urio ninimiap ming gare uniap ang kan, meba amira Morowa maset.  
\v 11 Na urio ninimiap ula nou, leba mimi ba Iudaiap o teip la tale onim Iudaia, utmat la pagat agarit. Ga leba amiuluan tavuk o kasau o karuk, ga leba mimaning unirap ula muru o karuk, o kamina gare teip o ubi agarit o teip mila uke, mitmat gat la pagap it agarit. Pa narit it paga la kakani, iro la ugamaro: Karisito, irie la uke me mirier pagap ganam, ga unama na dalap ma mirier ekeleisap ganam.   
\s1 Buarang tavuk o na migat me mirier non ara inamaniap  
\p
\v 12 Tie, Morowa la miteong ara gare inamaniap am, ga mitara naong me milam. Are ratmat ga mamiuluan mitmat tavukup gare ro, Minang tavuk o kadik ga tavuk ila muri o uaganuliap ma non teip ga tavuk o tekapir ga tavuk o uteteiliat upat unualeap ming, ga tavuk o uteteiliat ira ma teip la akosarmeng tavuk ila kire ira mi.  
\v 13 Pa leba noba migana kabirana mi la amaning ties ira noba ekelesia la okosarong kiribas ira a, tie buat upula irie tavuk ila kire. Karuk. Pa avaiang irie tavuk ang are Ila Kakani la uvaio kirinim ang. Are gat tie, mimi gat le amiuluan iriet tavuk.  
\v 14 Tavuk o na migat me inamaniap la makurupin mirier tavukup ganam ga ume mavuvuo tavukup ganam mila mumurum ga mavisieng na dalap mi ganam.   
\p
\v 15 Tie, miairang malina ang Karisito meba ake me ninimiap ming ga ualeng mabuo dalap mi. Are ratmat ga miaram miro dalap o uteteiliat meba meke me agarip mim ga me mirier pagap la makosarming. Memani, miteong Morowa meba iat nemipama gare namurit neip ga eba iat mionang un malina. Ga mimi le mialang temaieng me aun Morowa me mirier pagap ganam.  
\v 16 Ga ties ang Karisito le dakieng migat na dalap mi meba masingmiala non ekelesiap papap, ga mairorotming ma non ara agarip mila murum kabirana mi. Ga pumiara ma sasangip o lotu ga sasangip la imuam Muranama ang na dalap mi. Pumiara ma sasangip na Babam ula tatalu ga sasangip o lotu ga sasangip am Muranama, mirio pagap leba oagamelie ties ang Karisito la iot migat na dalap mi. Ga na tara la miaram sasangip, mumuru le mivang “temaieng” na dalap mi me aun Morowa.  
\v 17 Ga ira ma mirier pagap ganam la makosarming iro ties ga iro ubi, amiuluan tavuk maiang inamaniap am Ila Kakani Iesu. Ga mialang “temaieng” aun Morowa me mirier pagap ganam ira Iesu.   
\s1 Inamaniap mila magimeng ga lop maiam  
\p
\v 18 Tie, mimi kualap, mionang mapat laip mim ga omiuluan ties maiong. Memani, mimi am Ila Kakani ga iriro tavuk la puvuvui na irap a Morowa.  
\v 19 Ga mimi teip, naming maset me kualap mim, ga umialeng maset mabuo. Pa buat akosarming tavuk ila kire ga eba giginam ba dalap ma.  
\v 20 Pa mimi lop, miptang ties maiong irap mim ga nagap mim ga omiuluan urio ties maiong. Leba amiuluan itmat tavuk, eva eba teaba Ila Kakani me milam.  
\v 21 Pa mimi irap maiam lop, buat miniam lop mim ga mabukmila. Karuk. Memani, ebun kiram dalap ma me milam.  
\v 22 Pa mimi teip o ubi agarit maiam non teip, mimi kan le omiuluan ties maiong mirie teip mim mila kanim. Pa buat it omiluan ties maiong, na tara la migimameng ga mivienmeng me ubi ming ula muru. Karuk. Pa miraung aime Ila Kani ga okosarming ubi meba maagamilie teip mim mila kanim na dalap mila murum.  
\v 23 Ga miriro ubiap ganam la makosarming, ubiming maranit meba makosarming. Tale are la makosarming ubiap me maun inamaniap. Karuk. Pa makosarming ubiap me aun Ila Kani.  
\v 24 Mimi le akosarming tavuk gare ro, memani tubiat eba alang Ila Kakani uniap ula muru miun. Urio uniap, irie paga ila mumuri la midaong Morowa meba alang maun inamaniap am. Onagiming, mimi teip o ubi ang Karisito ga iriet narit la okosarming ubi apat.  
\v 25 Pa aga migana la akosarong tavuk ila kire, eba oala uniap ula kiro me irie tavuk ang la kire. Memani, Ila Kani la tale agatong me bop ma inamaniap gare teip o ubi agarit o teip la maionama na agat maiong kan.   
\c 4  
\p
\v 1 Mimi teip mila uke, mimi gat le akosarming tavuk ila puvuvui ga tavuk ila muri ira ma teip mim o ubi. Memani, mimi gat la mimaning migana ila kani ituan na panbinim.   
\s1 Tavuk o marik maranit ga agat ula muru me maun inamaniap la tale naganmeng ira Iesu  
\p
\v 2 Tie, umiaring maranit ira tavuk o marik. Ga na tara la marikming me ai Morowa, maset temamalienming ga mivang temaieng me aun Morowa.  
\v 3 Marikming gat me ai Morowa meba paagaalie ga eba anavang alang me palam meba baispang o ties ang Karisito. Uriro ties, urie la kagoiri tinan, pa ovaikpang ara titot mai inamaniap. Eva, tume bais o uriro ties la kagoiri ang Karisito, are ratmat ga tomaiabu na luguan o arubu.  
\v 4 Marikming me rulam meba puorang it uakap meba ovaiktang urio ties, aret tie la naong Morowa meba ovaiktang.   
\p
\v 5 Tara la mionama ga inamaniap la tale naganmeng ira Iesu, mamiuluan agarip mila mumurum ga makosarming it tavukup mila puvuvum ira ma are la akosarong Karisito ira ma inamaniap na tara la unama na kimanam. Ga terangaming maset ma mirier taraiap ganam meba man baisming o bais ula muru me maun.  
\v 6 Ga na tara la paseiming ga mirie, tie miaramam it tiesiap o ubonuvarap la mime magamelie inamaniap ma mirier taraiap ganam. Me iriro tavuk, eba maset puoming meba mipulang umarik maiong, na tara la mimarikmeng me man muana a paga ba.   
\s1 Ties lagorang  
\p
\v 7 Tie, eba mialava Tikikas la tunama gare mani togo. Iriro Tikikas, irie papa buang migat ga ume okosar maranit ubi me aun Ila Kani na dalap a ga migan buang o ubi migat ang Ila Kakani.  
\v 8 Asagarung ga muo tie mi meba mialava o nunamap pang la are mani togo ga eba mira uakap, ga me iriro tavuk la eba iat mangangaspang dalap mi.  
\v 9 Asagarung Onesimus ga iat ula ga Tikikas. Iriro Onesimus, irie la ume okosar ubi maranit me aun Ila Kani na dalap a. Irie la ekelesia papa buang, ga napang aime maset. Ga irie la namurit ekelesia kabirana ma inamaniap la mumaio mii tie na lotu Kolosi. Eba mialava ma mirier pagap ganam la betmeng togo.   
\p
\v 10 Tie, miralava a Aristakas la unama na luguan o arubu ga turuo, irie la osagaong “la ula muru” me miun. Ga Marko, talau ang Banabas, irie gat la osagaong “la ula muru” me miun. Osagarung uriro ties me miun, memani na tara la eba betang mi, tie alagiming ga umialeng maset abuo.  
\v 11 Ga Iesu la meiva Iastus, irie gat la ivo “la ula muru” me miun. Kabirana ma teip onim Iudaia, miruot naien ma teip la mime ubi ga turuo meba oagapalie iat inamon ang Morowa. Ga na tara la betieng giginanim ira ruo, mangangasmeng dalap tuo ga toagamelie maset.  
\v 12 Ga Epafras irie gat la osagaong “la ula muru” me miun. Iriro Epafras, irie la namurit ekelesia kabirana ma inamaniap la mumaio mii tie na lotu Kolosi. Ma mirier taraiap la ume marik maranit me ai Morowa meba naganming maranit ga maset mamira mirier agarip am ga makosarming mirier tavukup ganam la naong Morowa maime.  
\v 13 Arit ara ga avaiktung migat gare tiruo: Mitara ubiong ga man miagaalie, ga maagaalie teip ga magaulap onim Laodisia ga Irapolis gat.  
\v 14 Pa Luka ga Demas la osagaliong “la ula muru” me miun. Iriro Luka, la irie umakmager ga mitara napang aime.  
\v 15 Narung meba mialang “la ula muru” rung maun papap ga loup tuam la maionama na taun Laodisia. Ga osagaming gat “la ula muru” rung un ekelesia lou rung Nimfa ga ekelesiap la mime nebola na luguan iang.   
\p
\v 16 Tara la ovasming urio babam, eba osagaming ga ila maun ekelesiap onim Laodisia meba gat ovasmeng. Ga babam la omirtung ga osagarung me ekelesiap onim Laodisia, mirie gat le ovasmeng.  
\v 17 Pa mimi le amilava Arkipus gare ro, “Maset itnamung urio ubi la nuaro ra aun Ila Kakani.”   
\p
\v 18 Turuo Paulo, turuo kan la omirtung urio babam a kilan tuo la osagarung urio “la ula muru” me miun. Agatming me rulam la man tunama ka na luguan o arubu. Ubonuvarap ang Morowa le iot ga mimi.