\id ACT - Kuot NT [kto] -Papua New Guinea 2001 (DBL 2014) 
\h Apostolop 
\toc1 Ubiap maiam Apostolop 
\toc2 Apostolop 
\toc3 Ap 
\mt1 Ubiap maiam Apostolop  
\c 1  
\p
\v 1-2 Tie, ‘la ula muru’ me noun Tiofilas,  
\p Na natauan babam la omirtung me noun tinan, norulo ma mirier pagap ganam la makosarong Iesu ga ma mirier tiesiap ganam la masinguala teip ga magaulap ma lake kan ga betong mai Apostolop la mavuvuoong, ga iro ngangas ang Muranam Ila Babai la maulo ma man ubiap meba makosarmeng. Ga tubiat la alagiong Morowa me na panbinim. Norulo ma mirier pagap ganam na natauan babam tung.   
\s1 Ugama Iesu, “Eba asagaang Mamo Muranama ang ga eba muong”  
\p
\v 3 Tie, iriro Iesu, irie la uavio ngitngit ga uvara, ga tubiat la ina inim. Ga makosarong papot ma pagap, meba meira miriro Apostolop maset la ina inim. Puoieng ira ma 40 ma lap, la betong mai ga masinguala o inamon ang Morowa.  
\v 4-5 Pa o non la la man unama ga man parakong ga Apostolop, ga maulo gare ro, “Pa eba ka auanmila Muranama Ila Babai meba muong ga onang ga mimi, are tinan la mirulo na Babam ula muru la omirong Luka eba asagaang Mamo ruang Muranama Ila Babai meba muong onang ga mimi. Miptang, miuave ra Ioanes o burunam. Pa eba, tale papot ma lap tubiat, ga eba miavareng Muranama Ila Babai. Met iriro muana, buat kakalaitming ga omiolaing pianam ula kakanu Ierusalem. Karuk.” Maulo Iesu gare ro.   
\p
\v 6 Urie, temaiara Apostolop ga mela nakap bo kavinama Oliva ga nebolameng ga Iesu. Ga amarikmeng gare ro, “Ila Kani, atabo na iruo tara eba betnang gare orong pang ga eba ina nemung gat kantri buong Israelip?”  
\v 7 Pa upulo Iesu ties maiong are ro: “Mamo kan irie la uabua man tara ga o man la la namo makosarang miruo ubiap ganam meba oagaalie Israel. Are ratmat ga iruo la tale paga meba amira.  
\v 8 Pa iriro paga la eba amira, na tara Muranama Ila Babai la eba muong ga eba onang ga mimi, tie eba alang kukunim miun. Ga eba mila ga baisming o urio ties tung me maun teip ga magaulap la maionama na pianam Ierusalem ga na mirier napup ganam na provins Iudaia ga na provins Samaria ga ila puoieng na mirier napup o urio kimanam.”   
\s1 Iesu la ula nakap na panbinim  
\p
\v 9 Urie, tiesong ara Iesu o urio ties ga ula nakap na tara Apostolop la man agimameng ka. Ga agagemaiieng uvau ga tale gat puomeng meba agimameng.  
\v 10 Iesu la ula ra nakap, pa Apostolop la man dusmeng ka ga man umei maranit me na panbinim. Tie, talet kagat narain teipien la limanim burap mila pasokmeng la dusliong ga mirie.  
\v 11 Ga ligama, “O mimi teip onim na provins Galili, are mani ga man dusming togo ga man umi me nakap na panbinim? Titot la agimaming ara Iesu la miulai ga ula nakap. At iruo tavuk la agimaming titot, tubiat iruot Iesu la agimaming la eba ina terigiang garet tiro la ula nakap.”   
\s1 Avuvuomeng non migana meba aigorala Iudas  
\p
\v 12 Urie, Apostolop la amaiolai kavinama Oliva ga ina terigimeng me Ierusalem. Iruo kavinama la kagarat it u Ierusalem, puoong it gare namurit kilometa.  
\v 13 Mela betmeng Ierusalem ga mela na luguan la mime maionama ana. Ga mela nakap na iruo kabin la mime maionama ana la ut nakap. Pa bop ma Apostolop la are ro: Petro meiva Simon ga Ioanes ga Iemes ga Andru ga Filip irie ga Tomas, ga Batolomaio ga Mataio ga non Iemes, irie poi ang Alfias, ga non Iudas irie poi ang non Iemes ga non Simon. Aime iriro Simon, irie non ma a gar Selot.\f + \fr 1:13 \ft Tinan la nekaromela ga Gavaman onim Rom ga namo akiraraang.\f*  
\v 14 Miruo teip ganam la nebolameng ma namurit dalap ma ga iat man okosarmeng marik. Non magaulap ga Maria gat, urie naga ang Iesu ga papap am Iesu, mirie gat la marikmeng iat ga mirie.   
\p
\v 15 Urie, o non la teip ga magaulap la mime nagan ira Iesu, uvas ma la igamaro 120 la man nebolameng. Na iriro tara, teuara Petro ga dusong kabirana ma ga ugama,  
\v 16-17 “Ekelesiap papap tuam, titot tuga tiestang aime Iudas Iskariot. Tie, Iesu la avuvuong meba betang gare migana ang o usingnualap gare pava. Ga ume iat ubi ga pava. Pa iruo migana la masinguala teip o alang meba umaiaring a Iesu. Pa iriro tavuk ang la tale akosarong agarit. Karuk. Pa tinan la akosarong Muranama Ila Babai Devit ga ovaikong non ties aime Iudas Iskariot ga urio ties la omirmeng na Babam ula puaru. Ga titot urio ties ang Devit la betieng ara migat gare ro.”  
\v 18 (Pa iruo migana Iudas la maula miruo kakepup gare uniap a iruo tavuk ila kire la akosarong, ga osauong non nap o kimanam. Ga tubiat la ulum bo urio kimanam ga fukong karima a, ga puana a gane la urukong na kimanam.  
\v 19 Ga mirier teip ga magaulap onim Ierusalem la mepto ties la ugamani ga uvara Iudas ga meiva irio nap o kimanam Akeldama. Muana o uriro bonim la are ro: Nap o kimanam la iura olabuan.)   
\p
\v 20 Maulo gat Petro gare ro, “Migat, non Sam la omirong Devit na Babam ula puaru la tiesieng gare ro,  
\q1 ‘Luguan ang la eba ot agarit ga tala kan unama migana ba ana.’ \rq Sam 69:25\rq*  
\p Pa non sasang la tiesieng gare ro,  
\q1 ‘Me ubi ang gare migana ila uke, noba migana la eba arang ga ubiang.’ \rq Sam 109:8\rq*   
\p
\v 21-22 “Are ratmat ga titot le obuluan uriro ties ga avuobuong migana ba kabirana ma teip la mime menum ga bubuo, na tara gat Iesu la man unum tapmat ga bubuo. Ga opuara Ioanes la uavariam inamaniap o burunam ga muio puoieng la uvara Ila Kakani Iesu ga ina teuara ga ula na panbinim. Eva, kabirana ma miruo teip, eba avuobuong migana ba meba aigorala Iudas, meba ubiang ga pava ga baispang a Iesu la uvara ga migat kan la ina teuara ga titot la inim.”  
\v 23 Tie, tiesong Petro are ro, ga omeuluan urio ties ga levuomeng narain teipien: Irie Iosep, meiva Basabas, pa non la bonim a Iastus. Pa non gat migana la bonim a Mataias.  
\v 24-25 Urie, okosarmeng Apostolop marik gare ro, “O Ila Kakani, anit ara Iudas la ume uavio urio ubi la oulai ga ula na urie pianam ula kiro la oranganung meba maionang inamaniap mila kiram una. Eva, manit ara dalap ma inamaniap ganam. Are ratmat ga pasingnala, aga lie litiro teipien le avuvuoang meba aigorala Iudas ga ubiang ga pava gare Apostolop.  
\v 26 Urie, marikmeng are ro ga legomeng tadasipien la maiot bop lie ira lie, meba betang auang tadas ga maiabung kaguma ira aga la eba arang urio ubi. Tie, betong tadas ang Mataias, are ratmat ga dusong ga mirie 11 ma Apostolop.   
\c 2  
\s1 Muranama Ila Babai la muo na la o Pentikos  
\p
\v 1 Urie, Iudaiap la memaning non la ula kanu o lotu la meivo Pentikos.\f + \fr 2:1 \ft Urio la maiong la mime magat paparakiap mila neim la piram na ubiap maiam. Are ratmat na urio la la mime lotu me ai Morowa ga mime meivo temaieng me aun.\f* Urio la o Pentikos la betieng ga ekelesiap la naganmeng ira a Iesu la nebolameng it na namurit luguan tie Ierusalem  
\v 2 Na tara la man maionama tie, talet kagat ga maio non alaga gare ifif ula mamaranu na panbinim. Ga abodakieng irie luguan gane la maionama ana.  
\v 3 Ga agimameng paga la are malobip o kit la betong, ga mela tapmat ga maiot bo mirier ekelesiap am Iesu ganam.  
\v 4 Ga dakong Muranama Ila Babai na dalap ma ga uke me agat maiong ga pupmaiaro ties ma non ara non ara tiesiap onim na non pialap la tale mameit.   
\p
\v 5 Pa na irie tara, papot ma inamaniap onim Israel la naganmeng ira Morowa ga maionama ma papot ma karaip na non ara non ara pialap na uro kimanam, titot la mumaio ga maionama Ierusalem.  
\v 6 Mirie inamaniap la mepto urio alaga ula kanu, ga mumaio nebolameng meba agimameng man paga la betong. Pa meptam mirie ganam narit narit la maiaramam non ara tiesiap maiam kan la tiesmeng ekelesiap am Iesu ma, ga tedifmeng kan maset.  
\v 7 Tedifmeng kan maset ga megama, “Teivuo! Miruo inamaniap la makosarmeng non ara non ara tiesiap, mirie ganam la inamaniap it onim na provins Galili? Eva, mabit it.  
\v 8 Pa are mani ga tiesmeng ma tiesiap onim lakuan buong migat ga pava ganam narit narit la paptam la tiesmeng.  
\v 9 Bubuo inamaniap onim na non ara non ara kantrip: Non buo la mirie onim na kantri Patia, pa non buo onim na kantri Midia, pa non buo onim na kantri Ilam, pa non buo onim na kantri Mesopotamia, pa non buo onim na provins Iudaia, pa non buo onim na provins Kapadosia, pa non buo onim na provins Pontas, pa non buo onim na provins Esia.  
\v 10-11 Pa non buo la mirie onim na provins Frisia, pa non buo la mirie onim na provins Pamfilia, pa non buo la mirie onim na kantri Isip, pa non buo la mirie onim na nap o provins Libia, urie la iot kagarat u taun Sairini. Pa non buo la mirie onim na ailan Krit, pa non buo la mirie onim na kantri Arebia. Pa mirie non buo onim Rom: Non gar ma mirie la Iudaiap migat. Pa non gar ma mirie la tale onim Israel, pa mime mameuluan tavukup onim Iudaia gare Iudaiap. Pa are mani ga miruo inamaniap titot la tiesmeng ma tiesiap buam ga titot la buptam?”  
\v 12 Man tiesmeng are ro ga turupmaiaba ga agatmeng papot. Pa mirie la man nemarikmeng tapmat ga megama, “Muana a iruo tavuk la are mani?”  
\v 13 Pa mirie la fugaumeng ira ma miruo inamaniap am Iesu ga megama, “Miruo inamaniap la tapmaio a wain ila nei ga menmeng.”   
\s1 Petro la baisong  
\p
\v 14 Urie, dusong Petro ga mirie 11 ma Apostolop ga tiesong maranit gare ro: “O mimi, inamaniap onim Iudaia ga mimi ganam non inamaniap la mime maionama togo Ierusalem, paga titot la betong irie la narung meba amira muana a. Eva, minavam kigip mi ga miptang ties tung.  
\v 15 Atabo agatming la miga tappo a wain ila nei ga ngongpang? Pa tale ngongpang. Karuk. Titot it la gamialat o muabarit parabira. Pa bubuo onim Iudaia la tale bume tapbu a wain parabira. Karuk.  
\v 16 Iruo paga la agimaming ga mipta titot, irie la betong gare la tiesong Morowa na nanam a unuli Ioel tinan ga ugama,   
\q1
\v 17 “Morowa la tiesong ga ugama, ‘Na la lagorang, eba talang Muranama ruo maun inamaniap ganam gare la ouruktung burunam. Are ratmat ga lop mila teip ga lop mila magaulap mim eba baismeng ma tiesiap tuam gare unulip ma pagap la eba betmeng tubiat. Ga kubap mim la eba magimameng pagap gare kikiritniapup. Ga laipakip mim la eba durimeng ga magimameng kikiritniapup.  
\v 18 Migat, eba talang kukunim ang Muranama ruo maun teip ga magaulap tuam o ubi agarit. Ga eba tiesmeng o unuli ma tiesiap tuam ma pagap la eba betmeng tubiat.  
\v 19-20 Ga na la ula kanu ang Ila Kakani la eba muiong, eba makosartang pagap o kukunim nakap na panbinim ga eba makosartang kagup na kimanam, are kaguma o urie la. Ga eba betang olabuan ga kit ga bonat ula kanu na kimanam. Ga eba betieng arubu ira efan, ga ulang la eba betang ga taktogi ba gare olabuan.  
\v 21 Na irie tara lagorang, inamaniap ganam la eba marikmeng me ai Ila Kakani meba maagaalie, ga eba ina malagiang ga maionang maset.’ \rq Ioel 2:28-32\rq*   
\p
\v 22 “Are ratmat ga mimi inamaniap onim Israel, miptang urio ties tung. Tuga miralava a Iesu onim Nasaret. Iriro migana, mimi kan la amit la angangasong Morowa meba makosarang pagap o turupnuabap ga pagap o kukunim ga kagup onim na panbinim. Ga a iriro tavuk, misinguala irie kan la asagaong Morowa ga muo.  
\v 23 Tinan migat, Morowa la mait ara tavukup mim, ga tavuk irie kan la namo akosarang. Ga uaira Iudas ga uabua iruo migana Iesu na kilalap mi. Ga miabua na kilalap ma inamaniap la tale ameit tavuk ang Morowa. Ga akibumei iro maiogun. Ana iruo tavuk la minamua ga uvara.  
\v 24 Pa nuvarap la tale kan puoieng meba uiaring a. Karuk. Morowa la oduratong ngitngit ula kiro o nuvarap ga imua Iesu ga titot la inim.  
\v 25 Memani, tinan la tiesong Devit aime gare ro,  
\q1 ‘Iriro Ila Kakani, irie la unama kagarat toi busit na kilan a lamige ruang. Ga ualo ngangas toun, are ratmat ga karuk kan a paga ba, la puoong meba togisgisang tapmat.  
\v 26-27 Me iriro muana, tume teruba ga tivo temaieng me aun Morowa. Migat, eba tale anolaing muranama ruo ga ot na pianam maiong inamaniap o nuvarap. Ga eba tale nairam neip a migana nuang Ila Babai o ubi ga maiot agarit na una meba isam ba. Karuk. Are ratmat ga nagantung na neip tuo eba makosarnang pagap mila murum ira ruo.  
\v 28 Tosingnuala ra o  
\q1 alang la ila betieng na ninimiap la iot maset atatan makin, are ratmat ga eba dakieng tenubap tung maset na irap nuo.’ \rq Sam 16:8-11\rq*   
\p
\v 29 Tie, inagat maulo Petro gare ro, “Papap pam, eba baistang uakap aime ea buang Devit: Irie la tiesong gare rie ga uvara ra ga memuam neip a na una Ierusalem. Ga iruo una ang la man ut ka, kabirana buo ga muio puoieng titot ga bubuo ganam la abit iruo.  
\v 30 Are ratmat ga paga la tiesong Devit a, la tale aime irie kan. Karuk. Tiesong aime Karisito. Iriro Devit, irie la unuli, ga okosarong Morowa mida ula mamaranu me aun ga ugama, ‘Migat tatuan, tubiat eba tabung kaguma ira a noba ma eap nuam meba irie ba orong onim Israel are ba nunuo.’  
\v 31 Eva, Devit irie la ait iruo paga la eba akosarang Morowa tubiat ga ovaikang uro ait a Karisito la eba aving ga eba ina gat emung ga umirong gare ro, ‘Morowa la tale kan uaira Karisito meba onang na pianam maiong inamaniap la mevara, ga tale isam neip a.’  
\v 32 Iriro Karisito, irie Iesu. Uvara pa Morowa la ina imua na una. Ga pava ganam la agimapang la inim ga baispang o urio ties.  
\v 33 Aime irie Iesu, Morowa la uabua ra nakap ga unama na kilan a ila lamige. Ga Mamo la uala iruo Muranama Ila Babai aun Iesu, ga titot la ourukong kukunim a iruo Muranama are tinan la midaong. Are ratmat ga betong iruo paga ira pa titot ga agimaming ga mipta.  
\v 34 Aime Devit, irie la tale kan ula ga neip a na panbinim gare Iesu la ula nakap. Pa tiesong gare ro,  
\q1 “‘Morowa la aulo Ila Kakani ruang Iesu gare ro,  
\v 35 Nonang na kilan ila lamige ruang, puoieng la eba tabum karorap nuam meba maionang nopat.’ \rq Sam 110:1\rq*   
\p
\v 36 “Are ratmat ga mimi garip ganam onim Israel, omira maset ties tung la migat o. Iriro Iesu la asopming iro maiogun, Morowa la apuoong irie gare Ila Kakani ga irie Karisito.”   
\s1 Muranama Ila Babai la marigiong dalap ma papot teip ga magaulap  
\p
\v 37 Urie, teip ga magaulap la mepto ties ang Petro ga osainmeng urio ties la are sakmes la mavureong migat dalap ma. Ga amelo Petro ga non Apostolop, ga megama, “O papap pam, eba akosarpang mani meba tale pakiraraang Morowa?”  
\v 38 Pa maulo Petro gare ro, “Mialam ibup mi narit narit ira ma tavukup mim mila kiram ga marigiming dalap mi me aun Morowa. Ga omila nuvietiap iro bonim a Iesu Karisito. Leba okosarming gare ro, tie eba maduratang Morowa mirie kirinimup mim ga eba alang Muranam Ila Babai ang miun.  
\v 39 Ume iriro mida, Morowa Ila Kakani buang irie la midaong meba alang Muranama Ila Babai miun ga maun lop mim ga maun inamaniap gat la mavuvuoong ga mamarikong. Ga eba alang uriro mida miun ga maun inamaniap gat la maionama kakaliat.”  
\v 40 Petro la man masinguala teip ga magaulap ma non gat tiesiap ga imum agarip maiang gare ro, “Iriro gar ma inamaniap titot, la mime makosar non ara non ara tavukup mila kiram la eba makiraraang Morowa. Are ratmat ga buat makosarming tavukup mila kiram ga ebun mikiram ga mirie! Karuk kan. Leba are ba rie, eba milagiang Morowa kabirana a iruo gar ma inamaniap mila kiram!”  
\v 41 Tie, teip ga magaulap la maiario ties ang Petro ga omela nuvietiap. Na urie la, uvas ma teip ga magaulap la maiobu na gar ma teip ga magaulap la naganmeng ira a Iesu la puomeng gare 3,000 ma inamaniap.   
\s1 Tavuk ila muri maiang teip mila neim mila naganmeng ira Iesu  
\p
\v 42 Urie, mirie teip ga magaulap la mamaranim la mepto ties maiong Apostolop, ga nebolameng un namurit dalap ga opakomela purun ga iat marikmeng.  
\v 43 Ga Morowa la ualo kukunim maun Apostolop ga makosarmeng papot ma pagap o kukunim ga kagup onim na panbinim. Are ratmat ga mirier teip ga magaulap ganam la magimameng ga merau migat.  
\v 44 Ga teip ga magaulap la naganmeng ira Iesu la mime nebola iat, ga pagap maiam narit narit la tale mime mabuga namo maiam kan. Karuk. Leba kages ang migana ba a paga ba kabirana ma, eva noba ma leba agamelie ga mavuotmeng pagap maiam me aun.  
\v 45 Ga napup ma kimabip maiam kan narit narit, ga non gat pagap maiam, miruo la masagameng gat ga mamela kakepup ga mime mavuot miruo kakepup me maun teip ga magaulap la kagesmeng o parak ga non pagap.  
\v 46 Ga iat maionama un namurit dalap ga na mirier lap ganam la mime nebola na luguan ila kani o lotu ga mime lotu iat. Ga mime iat ovuot purun na luguap maiam ganam. Ga mime kan iat parak un tenubap ga namurit dalap.  
\v 47 Ga busit la mime ovien bonim a Morowa, ga teip ga magaulap ganam la murum dalap ma maime. Ira irio tavuk, ma mirier lap ganam Ila Kakani la ume malagi papot ma teip ga magaulap. Are ratmat ga okosarong uvas ma teip ga magaulap la naganmeng ira Iesu la man kakanu migat.   
\c 3  
\s1 Migana la kiran kibapien a la ina mumuri  
\p
\v 1 Urie, o non bit na 3 muabari na tara o lotu ga marik me ai Morowa, Petro ga Ioanes la lila nakap na luguan ila kani o lotu.  
\v 2 Pa na iriet tara non teip la maiavia non migana ga mumaio tie. Iruo migana la kiran kibapien a. Tinan kan la avarangeieng naga ang ga betong gare tie. Are ratmat ga ma mirier lap ganam non inamaniap la mime maiavia ga muo na luguan ila kani o lotu ga mime maiabua ga unama kagarat ai iruo tabuna o kudat a luguan ila kani o lotu, irie la mime meiva a ‘tabuna ila mumuri’. Are ratmat ga ume maika teip ga magaulap la mime maiobu na iruo tabuna meba agameing kakep o pagap ba.   
\p
\v 3 Urie, na tara Petro ga Ioanes la namo lila liobung na pianam o lotu, irio migana la legimaong ga lemarikong ga ugama, “Toagamalie ga malang paga ba toun.”  
\v 4 Tie, dusong Petro ga Ioanes ga agimaliong maranit. Ga ugama Petro, “Naptang! Igimanang!”  
\v 5 Tiesong gare ro, are ratmat ga irio migana la agatong la namo ga ebar lialang paga ba aun ga legimaong.  
\v 6 Pa ugama Petro, “Tale mating kakep. Pa mating non paga la tuga talang noun. Na bonim a Iesu Karisito, irie migana onim na taun Nasaret, norulo: ‘Tenara ga dusnang ga namung!’”  
\v 7 Tie, tiesong Petro are ratmat ga uat a kilan ila lamige a iruo migana ga agaulie ga dusong. Pa talet kagat ga mamaranin kibapien a ga dadebip lie kibapien a iruo migana.  
\v 8 Ga dusong ga unum. Ga na tara la irie ga Apostolopien la mela maiobu na pianam o lotu, man unum ga tekoong ga man ovienong bonim a Morowa.  
\v 9 Pa inamaniap ganam la agimameng irio migana la man unum ga man avienong Morowa.  
\v 10 Ga arakimeng ga megama, “Teivuo! Iruot i migana busit la ume unama kagarat ai tubuna la meiva a ‘tabuna ila muri’ o urio kudat ga ume buika ma kakepup meba agambing! Pa titot are mani ga kibapien a iruo migana la ina ra murun ga unum?” Tiesmeng gare ro ga turupmiaba ga mitara agatmeng papot aime paga la betong ira a.   
\s1 Petro la baisong na luguan ila kani o lotu  
\p
\v 11 Urie, iruo migana la tale naong meba aliolaing ga man uat a Petro ga Ioanes, ga mirie naien la menum ga mela. Ga papot ma teip ga magaulap la ibirmeng ga mumaio nebolameng kagarat ai iruo veranda na pianam o lotu, la mime meiva veranda ang Solomon. Man magimameng ga kirat turupmaiaba.  
\v 12 Pa Petro la agimaong iruo tavuk maiang ga maulo gare ro, “O mimi inamaniap onim Israel, are mani ga man agimaming maranit iruo migana ga turupmiaba aime? Memani ga man pagimaming maranit? Ebun mimama ga imaning kan kukunim ula kanu, ga tavuk ila muri ga amuriraing iruo migana ga ina unum! Karuk kan migat! Pa Iesu, iriet la amuriraong.  
\v 13-15 Iriro Iesu, irie migana o ubi ang Morowa, ga migana ila babai ga ila puvuvui. Pa mialam ibup mi ira a ga miabua na kilalap ma karorap am meba anamung Pilato ga aving. Pa miulo Pilato, ‘Eva, eba aviktang meba ala’, pa amilo, ‘Karuk, irie la eba aving.’ Pa amilo Pilato, ‘Aviknang Barabas, irie la unamuam teip ga magaulap meba ala lavie.’ Akosarming gare rie ga minamua Ila Kani la ume ualo ninimiap la iot maset atatan makin. Pa Morowa ang Abraham ga Aisak ga Iakop, ga Morowa maiang eap buam la imua kabirana ma inamaniap mila mevara. Are ratmat ga ira irio tavuk la ina imua Morowa na una, agimaing ara. Are ratmat ga baising me miun. Titot la ualo bonim ula kanu aun Iesu.  
\v 16 Ga naganing ira irie Iesu la amaning kukunim ula kanu. Amuriraong iruo migana la amit maset, memani naganing iro bonim a Iesu ga uriet la angangasieng iruo migana, ga ina mumuri maset na irap mi ganam.”   
\p
\v 17 Ga ina maulo Petro gare ro, “Pa mimi papap tuam, ga teip mim mila uke, tale maset amit Iesu la irie Karisito. Are ratmat ga makosarming miruo tavukup mila kiram ira a.  
\v 18 Pa ira tavuk la akosarong Iesu Karisito, tinan migat la maulo Morowa mirier unulip ganam a leba aving papot ngitngit ga eba aving ga baismeng o urio ties. Ga ira ma miruo tavukup mim mila kiram, Morowa la okosarong urio ties maiong unulip ga iario parak.  
\v 19 Are ratmat ga mialam ibup mi ira ma tavukup mim ganam mila kiram ga marigiming dalap mi me ai Morowa. Ga eba oduratang kirinim ming gano ga mamuriraang Morowa muranap mi.  
\v 20 Ga eba gat alang Ila Kakani ngangas ula nou miun. Tie eba asagaang Iesu Karisito ga eba muong mi. Iruo migana la avuvuoong Morowa meba miagaalie.   
\p
\v 21 “Pa titot la man unama ka na panbinim, ga auanula tara la avuvuoong Morowa meba ina mavuvutaling pagap ganam meba ina temameng. Ga na iruo tara Iesu leba ina terigiang. Ira a iruo tara tubiat leba betang, tiralo kan migat Morowa la ualo agat maun unulip am ga baismeng a.  
\v 22 Tinan la maulo Moses Israelip aime Iesu gare ro, ‘Morowa Ila Kakani ming, eba avuvuoang papa ba ming ga akosarang meba betang unuli gare kan turuo. Are ratmat ga mamiuluo mirier tiesiap ganam leba makosarang me miun.  
\v 23 Leba aga teip ga magaulap ba la tale ga meptang ties ang ga ameuluo iriro unuli, tie eba anamum Morowa ga eba meving.’  
\v 24 Pa unuli Samuel ga non unulip ganam la betmeng malonim a Samuel, la man baismeng a iruo tara titot ma miruo pagap ganam, la betmeng ara ga magimabuong.  
\v 25 Iro bais maiong unulip la baismeng o, tiesmeng me milam. Memani, mimi eap maiam unulip migat ga midaong Morowa na irap a Abraham meba miagaalie ga aulo gare ro, ‘Ira ea nuang, eba malaminaistang mirier garip ganam onim na kimanam.’  
\v 26 Are ratmat ga imua Morowa iruo migana o ubi ang, ga asagaong ga muo mi lake, meba milaminaisang mimi ganam narit narit ga meba mamiolaing tavukup mim mila kiram ka.” Maulo Petro gare ro.   
\c 4  
\s1 Miabua Petro ga Ioanes na luguan o arubu  
\p
\v 1-2 Tie, na tara Petro ga Ioanes la man dusliong na meiva veranda ang Solomon, man baisliong ka maun teip ga magaulap a Iesu la uvara ra ga ina teuara ga inim. Ga masingliala gat ma teip mila mevara ga eba ina temaiara tubiat gare Iesu. Na tara la man tiesliong ka, miridaip mila kakanim ga non teip mila maiabu begat la umiale bo irio luguan ila kani o lotu ga Sadukaiop, la mela iat ga betmeng tie ga mepto ties liong ga kiram dalap ma aime Petro ga Ioanes.  
\v 3 Ga teip mila maiabu begat la umaiat lie ga iruo migana tinan la kiran kibapien a. Pa kagarat ara la namo naminila muabari ga tale puoong tara meba miabungan na ties. Are ratmat ga maiabuan it na luguan o arubu, meba ka duriliong, tie kalup eba okosarmeng ties.  
\v 4 Pa papot ma teip ga magaulap la mepto ra ties liong ga naganmeng ira Iesu. Ga uvas ma teip ga magaulap la iaba me nakap puoieng gare 5,000.   
\s1 Teip mila kakanim la namo lebunakmeng narain Apostolopien  
\p
\v 5 Urie, na tara la betieng ara muabari, kaunselip ga teip mila uke onim Iudaia ga teip o usingnualap o maimai la nebolameng na taun Ierusalem.  
\v 6 Ga miridai ila uke Anas ga Kaiafas ga Ioanes ga Aleksanda ga mirie gat teip ganam o butamat ang, miridai ila uke la nebolameng ga mirie.  
\v 7 Ga mamarikmeng teip mila maiabu begat meba alagimeng Petro ga Ioanes. Tie, mulio ga dusliong na irap ma miruo teip mila uke. Urie, non migana ila uke la lake lemarikong liruo Apostolopien gare ro, “Iriro paga timoi la aidangmang, maro kukunim ang aga, o mevo bonim a aga, ga akosarmang irie paga?”  
\v 8 Migana ila uke la tiesong ara gare ro, ga kukunim ang Muranama Ila Babai la dakong na dalap a Petro ga maulo gare ro, “O mimi teip mila kakanim ga mimi teip mila uke onim Israel, miptang!  
\v 9 Timoi la akosaring maset non migana la kiran kibapien a. Atabo titot la miga imarikming a iriro paga? Atabo miga amira aga la ualo urio kukunim iun ga akosaring maset iruo migana?  
\v 10 Tie, leba mima imarikming a iruo paga, eva titot mimi le mira maset gare ro: Pa Morowa la ina imua ga inim. Na bonim it a ga iruo migana la ina mumuri ga dusong togo na irap mi. Iesu Karisito, migana onim na taun Nasaret, irie la asapming iro maiogun ga uvara.  
\v 11 Babam ula puaru la okosarieng ties o uvuvuo ga tiesieng a non tadas gare ro,  
\q1 “Mimi etumariap la akosarming luguan ga apugutmiara iruo tadas la agatming miga kire ga agoming it. Pa tubiat iruo tadas la betong gare natauan tadas meba angangasang luguan.” \rq Sam 118:22\rq*  
\p Iruo tadas la irie kan Iesu.  
\v 12 Miptang: Iesu iriet narit la puoong meba ina bulagiang, meba obula ninimiap la iot maset atatan makin. Ga na mirie napup ganam na kimanam la tale kan uabua Morowa migana ba la puoong meba ina buagalie. Karuk kan migat! Pa Iesu iriet talamet.” Petro la tiesong gare ro.   
\p
\v 13 Urie, teip mila uke la ameit Petro ga Ioanes la litiet teipien agarit ga tale kan lionama na usingnualap ba. Pa legimameng la tale lirau meba tiesliong o ties ula mamaranu me maun teip mila uke. Karuk. Are ratmat ga agimameng iruo tavuk liang ga turupmaiaba ga agatmeng papot. Ga lenagimeng tinan la lime linum ga Iesu.  
\v 14 Ga agimameng iruo migana tinan la kiran kibapien a, pa titot la mumurun ara ga dusong ga lirie. Are ratmat ga tale puomeng meba mepulang ties liong ga tiesmeng lime namo kakarabun. Karuk.  
\v 15 Are ratmat ga mamelo teip mila maiabu begat, ga alagimeng Petro ga Ioanes ga irie migana ga meura na irie kabin ang kaunsel. Ga man makosarmeng papot ma tiesiap ga tiesmeng gare ro,  
\v 16 “Ira lie litiro teipien, eba akosarbuong mani? Lebit, la akosarliong iruo paga ila kani o turupnuabap. Ga teip ga magaulap ganam onim Ierusalem la ameit ara iruo paga. Are ratmat ga tale kan puobuong meba bumama lirie la tiesliong o kakarabunim. Karuk.  
\v 17 Pa ebun ila uro ties na napup tapmat ga teip ga magaulap ganam onim Iudaia la mepto. Eva mumuru meba lebulava buat gat livo bonim a Iesu ga baisliong o uriro ties me maun teip ga magaulap. Ga lebulava gare ro, ‘Leba ina baismang gare ro, eva eba omala uniap ula kiro.’”  
\v 18 Tie, masagameng teip mila miabu begat, ga mela lelagimeng ga mulio. Ga maialo ties ula mamaranu ga lebunakmeng gare ro, “Buat gat baismang o masingmala inamaniap o bonim a Iesu!”  
\v 19 Pa Petro ga Ioanes la lipulo ties maiong gare ro, “Miga man tavuk la puvuvui na irap a Morowa? Eba oiuluan ties ang Morowa o eba oiuluan ties ming? Mimi kan la eba ovuvuoming.  
\v 20-22 Pa tale puoieng meba mapamuing nanamup ii. Eba iaramang ties ma pagap ganam la magimaing ga iptam.” Are ratmat ga teip mila uke la tale memaning alang meba lekirarameng. Memani, iruo migana la makurupin ara 40 ma karaip am la akosarliong paga o turupnuabap ira a ga ina muri. Ga teip ga magaulap ganam la agatmeng aime iruo paga la akosarong Morowa ga man ovienmeng bonim a. Are ratmat ga maialam non tiesiap mila mamaranim liun, ga lemiolai ga mela.   
\s1 Inamaniap mila naganmeng la marikmeng me ai Morowa meba mangangasang  
\p
\v 23 Urie, Petro ga Ioanes la maiairan ara ga ina terigiliong me ai gar liang. Ga man mavaikliong mirier tiesiap ganam la tiesmeng miridaip mila kanim ga teip mila uke lime.  
\v 24 Mepto urio ties ga giginam dalap ma. Are ratmat ga mirie ganam la narit dalap ma ga okosarmeng marik me ai Morowa gare ro, “O Ila Kakani, okosarnung panbinim ga kimanam ga pirom, ga mirier pagap ganam la maionama mana.  
\v 25 Tinan kan migat la nuala Muranama nuang aun orong Devit, irie ea pang ga migana nuang o ubi. Ga Muranama nuo la ovaikong ties nung na nanam a Devit, ga tiesong gare ro,  
\q1 ‘Memani ga kantrip na uro kimanam ga teip ga magaulap la mitara papamnam dalap ma, ga agatmeng agarit ga makosarmeng tavukup mila kiram?   
\q1
\v 26 Orongup onim na kimanam gano ga gavamanip mila kakanim gat la mumaio nebolameng ga urangameng me nekaronulap. Eva, mirie teip mila uke ganam la namo meiniang Morowa ga Karisito ang.’ \rq Sam 2:1-2\rq*   
\p
\v 27 “Migat, urio ties ang orong Devit la iario ra parak. Ira Iesu, niva Mesaia la avuonung ara. Pa na urio taun Ierusalem, orong Herot Antipas ga Pontias Pilato la nebolaliong ga garip la tale onim Israel ga garip onim Israel gat. Ga namo iat menamung Iesu, irie migana ila babai nuang o ubi ga uvara.  
\v 28 Ga namo makosarmeng non ara non ara tavukup meba okirarameng ubi nung. Pa nunuo kan la nuke me agat maiong, ga omeuluan it urio alang tinan la oagatnung ara ga tiesnung leba betieng.  
\v 29 O Ila Kani, titot la manit la mime okosar ties ula mamaranu me palam meba pabunakmeng meba tale baispang a Iesu. Are ratmat ga oagatnang urio ga pangangasnang pava inamaniap nuam o ubi, meba tale paraung maime. Karuk. Pakosarnang meba opala maset ties nung ga baispang maset o.  
\v 30 Ga nabung kilalap nuo mabuo teip mila tafameng ga mamuriranang ga makosarnang kagup onim na panbinim ga pagap o kukunim na bonim a Iesu, migana nuang ila babai o ubi.”  
\v 31 Okosarmeng ara uriro marik gare ro, ga na iriro tara iruo luguan la nebolameng ana la gisgisong. Ga kukunim ang Muranama Ila Babai la dakong na dalap ma, ga tale merau me bais o ties ang Morowa. Karuk. Baismeng o maranit migat.   
\s1 Inamaniap mila naganmeng ira Iesu la narit dalap ma  
\p
\v 32 Tie, teip ga magaulap mila naganmeng ira Iesu la namurit it dalap ma ga iat memaning namurit agat Ga karuk a migana ba la ume agat me pagap am ga amama, “Miruo pagap la tuam it narit.” Karuk. Tesainmeng namo pagap maiam ganam narit narit, mirie la iat it pagap maiam.  
\v 33 Apostolop la baismeng gare ro, “Iesu Ila Kakani, irie la ina gat teuara.” Ga ties maiong la ame kukunim ula kakanu. Ga ourukong Morowa ubonuvarap ang ula kakanu mabuo teip ga magaulap.  
\v 34 Ga kabirana ma teip mila naganmeng ira Iesu, karuk a migana ba la kagesong o parak ga noba pagap. Karuk. Memani, teip ga magaulap mila memanim kimabip ga luguap, mirie la mime masaga miruo me maun non inamaniap. Ga mime mamela kakepup pat miruo ga mumaio.  
\v 35 Ga maiabuam na kilalap ma Apostolop. Ga Apostolop la mime mavuot miruo kakepup me maun teip ga magaulap narit narit la kagesmeng ma pagap.   
\p
\v 36-37 Tie, non migana, bonim a Iosep la osagaong non kimanam ang aun non migana ga maula kakepup upat urio kimanam ga ula ualam mirie kakepup na kilalap ma Apostolop. Irie la onim na gar maiang Livaip. Naga ang la avarangeieng na ailan Saipras. Pa Apostolop la abopmaiala o non bonim ga mime meiva a Banabas. Muana o urio bonim la are ro: “Migana la ume mangangas dalap ma inamaniap.”   
\c 5  
\s1 Ananaias ga Sapaira  
\p
\v 1 Urie, kabirana ma miruo ekelesiap la ame non migana gat la unama, bonim a Ananaias. Irie ga magabun ang Sapaira la limaning non nap o kimanam la iot. Ga Ananaias la osagaong urio nap o kimanam aun non migana ga maula kakepup upat.  
\v 2 Pa litiro uon la iat tiesliong ga namurit dalap lie meba abugaliong non nap ma miruo kakepup ga liraiam ga maiot namo liam kan. Tie, Ananaias la uara non nap ma miriro kakepup ga ula mai Apostolop ga uabuam na kilalap ma.  
\v 3 Pa na kukunim ang Muranama Ila Babai, arakiong Petro ga ugama, “Ananaias, memani ga onouluan agat ang Satan, ga osaganung urio nap o kimanam ga nuraia non nap ma miruo kakepup, a? Memani ga okosarnung kakarabunim ira Muranama Ila Babai ga nuraiam mirier non kakepup?  
\v 4 Naptang. Lake la tale ka osaganung urio nap o kimanam, tie iot gare kimanam nung kan. Ga tubiat na tara la osaganung urio kimanam ga onula ra uniap upat, eva, miruo kakepup la nuam kan ga puonung it meba mavuotnang meba mela makosarnang noba ubiap ma. Pa memani ga onula urio agat ga akosarnung iruo tavuk ila kire? Naptang, iro uriro kakarabunim la okosarnung, tale kan okosarnung it ira migana ba. Karuk. Eva, okosarnung urio kakarabunim ira Morowa.” Tiesong Petro gare ro.  
\v 5 Urie, upto Ananaias urio ties ga ulum bo kimanam ga uvara. Ga mepto inamaniap ties aime Ananaias, ga mirie ganam la mitara merau.  
\v 6 Ga kubap la maionama na urio nebonulap, la temaiara ga mialuam neip a Ananaias ma burap, ga maiavia me lavie ga mela memua na una.   
\p
\v 7 Pa naien ma napup o muabari la aipmeng ara ga inabun muio betieng magabun ang Ananaias na urio nebola. Pa tale kan ait iruo paga la betong ira a lai iang.  
\v 8 Tie, oulo Petro ga ugama, “Lai nuang la muo uabuam miro kakepup miro le magimanang. Pa tuga nomariktang: Osagamang nap o kimanam meng ga mamala kakepup upat. Atabo puomeng it gare miruo, a?” Pa igama magabun, “Migat, puomeng it gare tie.”  
\v 9 Pa oulo Petro, “Are mani ga iat tiesmang ga namurit dalap me meba akarabutmala Muranama ang Ila kani? Naptang! Teip la miaviam ara neip a lai nuang ga mela memuam na una, mitmat la betmeng ara lavie na tabuna. Ga urangameng gat meba miavim neip nuo ga mela lavie.”  
\v 10 Tiesong Petro gare ratmat, pa talet kagat ga ilum urio magabun bo kimanam ga ivara mai kibap a Petro. Ga mumaio kubap ga ogimameng la ivara ra. Ga maiavio ga mela un lavie, ga memu na una kagarat ai una ang lai iang.  
\v 11 Tie, teip ga magaulap ganam la mime nagan ira Iesu ga teip ga magaulap ganam la mepta iruo paga la betong ira lie uon ga mirier ganam la merau maset.   
\s1 Apostolop la mamurirameng papot ma inamaniap mila tafameng  
\p
\v 12 Ga Apostolop la makosarmeng kagup onim na panbinim ga pagap o kukunim kabirana ma teip ga magaulap. Are ratmat ga teip ga magaulap la mime nagan ira Iesu, busit la mime maionama un namurit dalap ga mime nebola bo veranda ang Solomon na luguan o lotu.  
\v 13 Pa non inamaniap la merau maime teip mila uke maiam Iudaia ga tale ga mela mai, are ratmat ga tale kan nebolameng ga Apostolop. Pa mirier teip ga magaulap onim Ierusalem la mime mavien bop ma inamaniap mila naganmeng ira Iesu.  
\v 14 Pa papot ma teip ga magaulap kan la naganmeng ira Iesu, irie Ila kani, la mumaio okanirmeng uvas ma inamaniap la naganmeng ira Iesu. Talet teip it. Karuk. Papot ma magaulap gat la mumaio.  
\v 15 Met iriro, malagimeng papot ma teip mila tafameng ga mela mai Apostolop meba mamurirameng. Are ratmat ga papot ma teip ga magaulap la malagimeng ga miura me lavie na luguan. Ga mime maduri bo lalabiep, o bo kavarip na taralap o alang. Okosarmeng gare ro, memani agatmeng na tara la unum Petro na alang, eba abum kilalap a mabuo teip mila tafameng. Pa non inamaniap la nameng it ume lauburien a Petro leba ila mabuo neip ma inamaniap mila tafameng ga eba ina mumurum ba.  
\v 16 Ga papot ma teip ga magaulap onim na pialap ganam la maionama tapmat kagarat u Ierusalem, mirie gat la mime maiaviam inamaniap maiam mila tafameng ga mumaio mai Apostolop. Ga malagimeng gat non teip ga magaulap muranap mila kiram la mime makirara ga mumaio mai. Ga Apostolop la mamurirameng miriro teip ga magaulap ganam, ga mirier ganam la ina mumurum gat.   
\s1 Angelo la malagiong Apostolop me lavie na luguan o arubu  
\p
\v 17 Are ratmat ga miridai ila uke ga gar ma Sadukaiop la mime agamelie, la mitara kiram dalap ma me Apostolop.  
\v 18 Are ratmat ga umaiat ma Apostolop ga maiabuam na luguan ila kani o arubu.  
\v 19 Pa na urie arubu non angelo ang Ila Kani la muo unava tabuna a luguan o arubu ga malagiong me lavie. Ga ugama,  
\v 20 “Mila na luguan ila kani o lotu ga dusming tie ga baisming me maun teip ga magaulap. Mamilava ma mirier tiesiap o ninimiap ula nou migat la ualo Morowa miun.”  
\v 21 Ga mepto ra Apostolop urio ties ang angelo, ga parabirat namur mela na luguan ila kani o lotu, ga man baismeng me maun teip ga magaulap.  
\p Tie, miridai ila uke ga migap am la temaiara ga mamarikmeng mirier kaunselip ganam ga teip mila kanim ganam onim Israel meba mumaiong nebolameng. Are ratmat ga masagameng non teip mila maiabu begat ga mela na luguan o arubu meba malagimeng Apostolop ga mumaiong.  
\v 22 Are ratmat ga mela betmeng na luguan o arubu, pa tale magimameng Apostolop la maionama. Ga ina terigimeng ga mamelo gare ro,  
\v 23 “Pala ga agimapang paga gare ro, Tabup ganam a luguan o arubu la meuluam maranit ga mangingitmeng maset. Ga teip mila maiabu begat la mime umaiale na luguan o arubu la man dusmeng na mirie tabup ganam ga umaiale. Pa na tara la panava tabuna a iruo kabin timoi la pabuam miruo inamaniap ana, karuk kan a migana ba la unama!”  
\v 24 Migana ila uke me teip mila maiabu begat la uale bo luguan o lotu, irie ga miridaip mila kanim la mepto urio ties ga turupmaiaba ga megama, “Mani leba betang tubiat a iro paga?”  
\v 25 Pa non migana la betong ga maulo gare ro, “Miruo teip timoi la miabuam na luguan o arubu, titot la dusmeng na kudat a luguan o lotu ga man baismeng me maun teip ga magaulap.”  
\v 26 Tie, migana ila uke maiang teip la maiabu begat la ume uale bo luguan ila kani o lotu la malagiong non teip mila maiabu begat, ga mela malagimeng Apostolop ga mumaio. Pa tale mavismeng kilalap ma o tale meranam. Karuk. Memani, merau me teip ga magaulap la ebun mavuremeng ma tadasip ga menamuam.   
\s1 Apostolop la tale kan merau me bais  
\p
\v 27 Tie, teip mila maiabu begat la malagimeng ara Apostolop ga mumaio, ga dusmeng na irap ma kaunselip. Ga miridai ila uke la maulo,  
\v 28 Tiespang maranit me milam, “Baraba masingmiala teip ga magaulap o uriro bonim a Iesu. Pa obodakming ara Ierusalem o ties ming o usingnualap. Pa miga pavureming o ties la panamua iriro migana ga uvara.”  
\v 29 Pa Petro ga non Apostolop la mepulo ties gare ro, “Babun oguekbuong ties ang Morowa ga obuluan ties maiong inamaniap. Karuk kan migat. Busit le man obuluan it ties ang Morowa.  
\v 30 Miptang, mimi la umiat a Iesu ga asopming iro maiogun ga minamua ga uvara. Pa Morowa maiang eap buam la ina imua na una.  
\v 31 Pa Morowa la alagiong me nakap, ga umua na kilan a ila lamige ga uavio bonim ula kanu ga kauna gare orong Ila Kani meba malagiang inamaniap. Ana iruo tavuk, Morowa la unavo alang buong Israelip ganam meba bualam ibup buo ira ma tavukup buam mila kiram ganam, ga eba oduratang kirinim buong.  
\v 32 Ira ma miruo pagap ganam, la magimapang ga paptam ara, are ratmat ga pame bais ma. Pa tale kan pava talamet. Karuk. Iriro muranama Ila Babai la Morowa kan la ume uala maun teip ga magaulap ganam la omeuluan ties ang, irie gat la baisong.”   
\s1 Tiesong Gameliel me mai Apostolop a tavuk ila muri  
\p
\v 33 Tie, Apostolop la tiesmeng are ratmat, pa teip mila kanim la mepto urio ties ga dalap ma la kiram migat, ga namo menamum Apostolop meba meving.  
\v 34 Pa kabirana ma miruo teip mila kanim, non Parasaio, bonim a Gameliel la dusong ga namo ties ang. Irie migana o usingnualap la ume masinguala inamaniap o maimai ang Moses. Ga ame bonim ula kanu kabirana ma Iudaiap ganam. Ga maulo teip mila maiabu begat meba malagimeng Apostolop ga mela lavie ga mauanmela kaunselip meba ka tiesmeng.  
\v 35 Ga maulo non teip mila kanim gare ro, “O mimi teip onim Israel, miptang man paga la miga akosarming ira ma miruo teip, mumuru meba ka agatming maset ga akosarming.  
\v 36 Omit ara, tinan it Tiudas la teuara ga ugama, ‘Turuo migana ila kani, mating kaguma.’ Are ratmat ga 400 ma teip la namo ameuluan. Pa na tara la menamua teip o danunumiap onim Rom ga uvara, tie teip la ameuluan la igomeng tapmat, ga ubi maiong la pagat agarit.  
\v 37 Tie, tubiat na tara gavaman onim Rom la man mamirong bop ma teip ga magaulap ganam ga man mavasmeng, ga na irie tara non migana onim na provins Galili, bonim a Iudaias, la unama. Teuara ga uranam papot ma inamaniap ga mela ameuluan ga nekaromela ga gavaman onim Rom. Pa na tara la menamua teip o danunumiap onim Rom ga uvara, teip ganam la ameuluan Iudaias la temaiara ga igomeng tapmat, ga ubi maiong la pagat agarit.  
\v 38-39 Are ratmat ga leba okosarmeng miruo teip uriro ubi ma agarip maiam inamaniap gare Tiudas ga Iudaias, tie ubi maiong la ebat betieng gare ba paga agarit. Pa la Morowa kan la imuam agarip maiam meba okosarmeng urio ubi, eva tale kan puoming migat meba obunakming urio ubi. Ebun man neminam ga Morowa! Are ratmat ga titot tuga miralava gare ro, Mumuru le tesugaming maluo mirio teip ga miairam it le maionang.” Maulo Gameliel gare ro.   
\s1 Tevurusmeng Apostolop meba maiaving ngitngit ga mulinubap me bonim a Iesu  
\p
\v 40 Tie, teip mila kanim la omeuluan it ties ang ga teip mila maiabu begat la malagimeng Apostolop ga inagat maiobu. Na tara la mumaio ra, teip mila kanim la mamarikmeng teip mila maiabu begat meba maisikmeng. Maisikmeng ara, ga maranit tiesmeng teip mila kanim me ira ma Apostolop, “Buat gat baisming o bonim a Iesu.” Tie, mabunakmeng gare ro ga meairam ga mela.  
\v 41 Pa temeba ga man menum ga mela. Ga amaiolai Apostolop irie nap la nebolameng kaunselip ga miura me lavie. Are ratmat ga na tara la melar Apostolop, man tiesmeng a Morowa la magatong la puomeng meba maiaving ngitngit ga mulinubap na bonim a Iesu.  
\v 42 Pa tale kan omaiolai urio ubi o bais. Karuk. Na mirier lap ganam, mime mela na luguan ila kani o lotu ga na non luguap tapmat maiam teip, ga man masingmaiala teip ga magaulap ga baismeng la uakap ga megama, “Iesu irie Karisito, migana la ume malagi inamaniap.”   
\c 6  
\s1 Mavuvuomeng 7 ma teip meba magamelie Apostolop  
\p
\v 1 Tie, na irie tara, uvas ma inamaniap la naganmeng ira Iesu la iaba migat. Non Iudaiap kabirana ma mirie, la omeit ties onim Grik, ga non ma mirie la omeit ties onim Iudaia. Pa mirie ekelesiap onim Grik la nemenam o ties ga ekelesiap onim Iudaia, memani na mirier lap ganam la mime magamilie teip ga magaulap la kagesmeng o parak ga non pagap, pa tale kan mime magamilie magaulap pam la mevara ra laip maiam.  
\v 2 Urio ties la betieng ga 12 ma Apostolop la mepto ga mamarikmeng teip ga magaulap ganam mila naganmeng ira Iesu, ga mumaio nebolameng. Ga Apostolop la tiesmeng gare ro, “Ubi pang la ubi o bais o ties ang Morowa. Are ratmat ga tale mumuru le opolaing ubi o bais o ties ang Morowa ga ubipang maranit meba mavuotpang pagap me ira ma teip ga magaulap mila baim.  
\v 3 Are ratmat ga ekelesiap papap tuam, narung meba maisinming gamura ba ma teip kabirana mi. Eva, mirie la ame bop ga memaning agat ula muru ga kukunim ang Muranama Ila Babai la dakieng na dalap ma. Tie, leba mavaikming bop ma miriro gamura ma teip pai, ga eba pabung kaguma ira ma meba umaialeng iro urio ubi meba magamelie teip ga magaulap mila baim.  
\v 4 Leba are ba rie, tie pava kan Apostolop la eba ubipang maranit iro marik ga bais o ties ang Morowa me maun teip ga magaulap. Ebat okosarpang uriot ubi.”   
\p
\v 5 Tie, miruo ekelesiap ganam la mepto urio ties ga tevurusmeng ume. Ga avuomeng Stiven ga Filip ga Prokoras ga Naikena ga Taimas ga Pamenas ga Nikolas. Nikolas, irie migana onim na taun Antiok. Tinan la ume auluan tavuk maiang Iudaiap ga betong migana onim Iudaia, tubiat la naganong ira Iesu. Pa Stiven, irie la naganong maranit ira Iesu ga kukunim ang Muranama Ila Babai la dakieng na dalap a.  
\v 6 Tie, mavuomeng miruo 7 ma teip ga mamelo ga dusmeng na gar na irap ma Apostolop. Ga maiabuam Apostolop kilalap ma bo bugabip ma ga okosarmeng marik me ai Morowa meba maagaalie miruo teip o ubi mila neim.  
\v 7 Urie, uriro ties ang Morowa, urie la ila betieng tapmat mai teip ga magaulap. Ga uvas ma teip ga magaulap onim Ierusalem la naganmeng ira Iesu, la man iaba maset me nakap. Ga papot ma miridaip mila kanim gat la mepto urio ties ang Morowa ga naganmeng ira Iesu irie Karisito.   
\s1 Iudaiap la maiabua Stiven na ties  
\p
\v 8 Urie, Ira irie migana Stiven, dakieng ubonuvarap ang Morowa ga kukunim ang na dalap a. Ga makosarong papaluaip ma pagap o kukunim ga kagup onim na panbinim kabirana ma teip ga magaulap.  
\v 9 Pa non teip onim Iudaia la tale tevurusmeng aime Stiven. Ira ma miriro teip, meiva inamaniap gare ‘tinan la teip o ubi pa titot la mavikmeng ga menum na agat maiong’. Miriro teip la mimet nebolameng na luguan maiang o usingnualap ga ameira tavuk maiang Iudaiap. Ga mime mumaio na non ara napup na kimanam: Mirie onim na taun Sairini ieng kantri Libia ga taun Aleksandria ieng kantri Isip ga provins Silisia ga provins Esia. Mirie teip la temaiara ga nemenam o ties ga Stiven.  
\v 10 Pa miruo teip la tale puomeng meba okurupmeling ties ang Stiven. Memani, Muranama Ila Babai la ualo agat ula mumuru aun Stiven ga agaulie ga uke me ties ang.  
\v 11 Are ratmat ga marauraumeng tigit non teip ga mamarikmeng meba tiesmeng o kakarabunim gare ro, “Papta Stiven la baisong ma tiesiap mila kiram migat ga ofugauong bonim a Moses ga bonim a Morowa.”  
\v 12 Ga mela tapmat ga tiesmeng gare ro. Tie, papot ma teip ga magaulap la mepto urio ties. Ga teip mila meke ga teip o usingnualap o maimai, mirie gat la mepto. Ga agatmeng migat iro urio kakarabunim, ga kiram dalap ma me Stiven. Are ratmat ga papot ma teip la mela ga umaiat a Stiven maranit ga merana ga mela na nap o nebola maiang kaunselip.  
\v 13-14 Ga na urio nebola non inamaniap la marangameng tiesiap o kakarabunim, dusmeng ga avuremeng Stiven ma miruo tiesiap o kakarabunim. Tiesmeng gare ro: “Papta iruo migana la tiesong, ‘Iesu onim Nasaret irie la eba okirara ang urio taun o lotu ga maigorala tavukup ganam la ualam Moses buun tinan meba mabuuluan.’ Met iriro tavuk, iruo migana la ume okosar ties ula kiro ga ume oguekong kirat bonim o urio pianam ula babau ga urio maimai ang Moses gat.”  
\v 15 Tiesmeng miruo teip o kakarabunim gare ro, ga kaunselip ganam la maionama na urio nebola la agimameng Stiven maranit, namo meptang eba apulang gare mani uriro ties, ga ogimameng pava a la ilabie are pava a angelo.   
\c 7  
\s1 Stiven la baisong mai teip mila kakanim  
\p
\v 1 Tie, miridai ila uke la amarikong Stiven ga ugama, “Iro urio ties la novuremeng o, atabo tiesmeng migat o karuk, a?”  
\v 2 Amarikong gare ro pa upulo Stiven ga ugama, “Mimi papap tuam ga mimi irap tuam, miptang. Tinan ea buang Abraham la unama na kimanam Mesopotamia ga tale kan ula na taun Haran. Morowa la amaning kukunim gano ga lalabie ila kani la betong ai Abraham.  
\v 3 Ga aulo Morowa Abraham gare ro, ‘Onolaing urio kimanam nung ga butamat nung ga nala na urio kimanam la eba nosingtala.’  
\v 4 Tie, tiesong Morowa gare ro, are ratmat ga oulai Abraham kimanam ang gar ma Kaldiap ga ula na taun Haran ga unama tie. Pa tubiat na tara la uvara ra ira ang Abraham, alagiong Morowa ga muo unama na urio kimanam ieng Iudaia, titot la mime mionama una.  
\v 5 Pa na irie tara la tale ka uala Morowa tatak it nap ba o kimanam aun Abraham, meba kimanam ba ang migat. Karuk kan migat. Ga na iriro tara la tale ka amaning Abraham poi. Pa uaramo Morowa ties o mida ga aulo Abraham gare ro, ‘Tubiat eba talang urio kimanam noun, ga urio leba kimanam ba nung migat. Ga leba naving, eva eba iot urio kimanam maiong garip maiam eap nuam.’  
\v 6 Morowa la aulo Abraham gat gare ro, ‘Gar ma eap nuam tubiat leba mela ga maionang na kantri maiong non garip ga eba betmeng gare teip mila kibangam. Ga mirie non garip la eba makirarameng ga eba ila puoieng ira ma 400 ma karaip ga ebat man ubimeng gare inamaniap o ubi agarit ga eba tale omela uniap.  
\v 7 Pa tubiat la eba tabum miruo inamaniap na ties la makosarmeng miriro inamaniap ga betmeng gare inamaniap o ubi agarit.’ Ga tubiat gar ma lop mim la eba omaiolaing urie kantri ga eba mumaiong lotumeng me toi na urio pianam.  
\v 8 Ga aulo Morowa Abraham meba akasauang gare kaguma o mida ila kani la namo alang Morowa aun. Ga tubiat la betong poi ang Abraham, bonim a Aisak, ga na gamin o la Abraham la akasauong Aisak. Ga tubiat Aisak la betong ira ang Iakop. Ga Iakop la betong ira maiang manaburuan ga narain ma eap buam onim Israel.   
\p
\v 9 “Tie, ira Iosep kabirana ma miruo 12 ma eap nuam, ira ang la naong maset aime, are ratmat ga papap am mila kakanim la kiram dalap ma maset aime. Are ratmat ga asagameng maun non teip o uniap ma pagap. Ga miruo teip la alagimeng me na kantri Isip. Pa Morowa la unama ga Iosep ga man uale abuo.  
\v 10 Eva, papot o giginanim la betieng ira, pa Morowa la agaulie Iosep iro urio giginanim ga unama maset. Ga ualo Morowa agat ula muru aun Iosep ga ume akosar tavuk ila mumuri. Are ratmat ga orong onim na kantri Isip, meiva Fero la mitara naong aime ga uabua kaguma ira Iosep ga betong natauan gavaman la ume uale bo kantri Isip, ga ume uale mabuo pagap ganam na luguan ang orong.   
\p
\v 11 “Urie, tubiat abage ula kanu la betieng na mirie ra napup ganam na kantri Isip ga una kantri Kenan, ga teip ga magaulap la maiavio giginanim ula kanu migat. Ga eap buam la man osinmeng parak, pa karuk o parak.  
\v 12 Pa Iakop la upto urio ties la namo ame parak la iot na kantri Isip. Ga masagaong eap buam ga mela namara Isip ga mela osaumeng parak.  
\v 13 Ga tubiat la no ra urio parak, urie inagat mela Isip a lama narain tara. Na iruo tara la maulo bat Iosep papap am mila kanim a la irie tatak papa maiang. Ga Fero irie gat la mait bat numeilup am Iosep.  
\v 14 Tie, osagaong Iosep ties ga ila na kantri Kenan ga marikong aime mamo ang ga mirier numeilup am ganam meba mumaiong na kantri Isip. Uvas ma miruo teip ga magaulap la puoieng gare 75.  
\v 15-16 Are ratmat ga Iakop ga numeilup am la mumaio na kantri Isip. Ga man unama ka Iakop tie ga tubiat bat ga uvara. Ga maiavia tongan me na pianam Sekem onim Israel ga memua na una tie. Isik una la ut na pianam Sekem, irie la ut na kimanam maiong garip onim Hemo, pa asouong Abraham irio nap o kimanam maun lop am. Ga tubiat miruo 12 ma eap buam Israel, mirie gat la man maionama ka Isip ga tubiat la mevara ga memuam na iruo una.   
\p
\v 17 “Tie, tiesong Stiven are ratmat ga ina olaklagarong ties, ga ugama, ‘Tinan Morowa la okosarong ties o mida me aun Abraham. Ga tubiat la aipmeng ara papot ma karaip ga mulinim o urio ties o mida la kagarat ara la namo betieng, ga gar onim Israel la mitara papaluaip ga kakani migat, pa papot ma la man maionama ka na kantri Isip.  
\v 18 Ga na iriet tara, non migana la tale ait Iosep la betong gare orong onim Isip.  
\v 19 Ga iruo orong la tale kan uale maset mabuo eap buam ga namo makiraraang migat. Ga uabu maimai ula mamaranu ga maulo Israelip meba magomeng tatak lop maiam meba meving.   
\p
\v 20 “Urie, na iriet tara la avarangeieng non magabun tatak kulot, bonim a Moses. Irie kulot ila mumuri maset na irap a Morowa. Pa mamo ang ga naga ang la uliale abuo na luguan liang, puoieng ira ma naien ma ulangip.  
\v 21 Pa tale uliale tigit abuo a tara ila laklage na luguan liang. Are ratmat ga alagieng naga ang ga iabua lavie. Pa poi ang Fero ula magabun la alagieng ga uiale abuo gare poi iang migat.  
\v 22 Ga na tara la man kakani ra Moses, asingmaiala ma mirier agarip mila murum onim na kantri Isip, ga irie migana ila ngangasong o ties ga ubi.   
\p
\v 23 “Urie, tubiat la amaning ara Moses 40 ma karaip ga man agatong gare ro: ‘Tuga tala magimarang migap tuam, mirie inamaniap onim Israel.’  
\v 24 Ga ula lavie, pa agimaong non migana onim Isip la avitong non migana onim Israel ga man akiraraong kan maset. Are ratmat ga ula Moses ga agaulie iruo migana onim Israel ga upula iruo tavuk ila kire me aun iruo migana onim Isip ga unamua ga uvara.  
\v 25 Na irire tara agatong Moses gare ro, ‘Agimameng ara inamaniap onim Israel tavuk tuang, ga eba agatmeng Morowa la naong meba ina malagiang na kilan tuo.’ Agatong Moses are ratmat, pa tale arakimeng iruo paga.   
\p
\v 26 “Urie, kalup la ina unum ga ula ga leup teipien onim Israel la man nelinam. Ga namo leratang iro danunumiap meba betliong un namurit dalap. Are ratmat ga ugama, ‘Maptang! Mamet namurit olabuan! Memani ga man nekaromala ga man tekiraramang kan?’  
\v 27 Pa iruo migana la man akiraraong migan ang la aduong Moses me kakaliat. Ga ulo me ira Moses gare ro, ‘Aga la noabu meba nake me palam gare migana ila uke, ga Ias meba avuvutnaling tavuk pang?  
\v 28 Timoi la nunamua migana onim Isip ga uvara. Ga aret tiruo titot la nuga ina tonanamung meba taving, a?’  
\v 29 Pa upto Moses urio ties ga mitara urau ga oulai kantri Isip ga igoong ga ula unama gare migana ila kibange na kantri Midian. Unama na irie nap ga magiong. Urie, tubiat la levarangaieng kuala ang narain kulen.”   
\p
\v 30 “Urie, 40 ma karaip la aipmeng ara, ga ula betong na kimanam la karuk ma inamaniap, kagarat ai pugama Sinai. Ga agimaong non angelo la unama tapma na kit la betieng iro kuguom la ame sisirip la suameng.  
\v 31 Pa ogimaong Moses urio kit ga turupuaba ga agatong papot me iruo paga la betong. Ga namo maset agimaang man paga la betong iro uro kuguom. Are ratmat ga unum ga ula kagarat, tie upta nivunama a Ila Kani la tiesong.  
\v 32 Turuo Morowa maiang eap nuam. Turuo Morowa ang Abraham ga ang Aisak ga ang Iakop. ‘Tiesong Ila Kani are ratmat ga didirong Moses ga urau meba ogimaang.’  
\v 33 Urie, aulo Ila Kani Moses gare ro, ‘Urio kimanam titot la dusnung ubuo, turuo gat la tunama, are ratmat ga uro kimanam la puaru. Are ratmat ga maviknang kibap nuo ga nabum toma.  
\v 34 Naptang! Ira ma inamaniap tuam, magimarung ara la mime makirara na kantri Isip. Ga tupto ra nulibap maiong, ga ngitngit la mime maiavio. Are ratmat ga terunie ga muruo lourup meba ina malagirang na miruo giginanimup, meba maionang maset. Are ratmat ga naptang, titot tuga nosagarang, meba ina teriginang me na kantri Isip.’   
\p
\v 35 “Tie, iriro Moses, tinan la maialam Israelip ibup ma ira a ga megama, ‘Aga la noabu meba nunuo ba le nake me palam gare migana ila uke, ga Ias meba avuvutnaling tavuk pang?’ Pa agatong Morowa, ‘Iruot Moses la eba betang migana ila uke maiang Israelip ga eba ina malagiang una giginanim la ialo kantri Isip maun ga mela na pianam la man maionama eap maiam tinan.’ Are ratmat ga asagaong Morowa angelo ga betong na urio kuguom la ame sisirip la suameng, ga upta Moses Morowa la man tiesong aime. Ana iruo tavuk, ualo Morowa urio ubi aun Moses.  
\v 36 Are ratmat ga ina terigiong Moses ga ula na kantri Isip ga makosarong non ara pagap o kukunim ga kagup onim na panbinim. Ga ana iruo tavuk la malagiong eap buam ga omaiolai kantri Isip ga mumaio. Ga man makosarong Moses non pagap o kukunim ga kagup onim na panbinim na tara la menum na Pirom Ula Taktogu ga man menum tapmat na kimanam la karuk ma inamaniap una, muio puoieng ira ma 40 ma karaip.   
\p
\v 37 “Tie, iruo Moses, iriet tubiat la aulo gar onim Israel gare ro, ‘Tinan la touabu Morowa ga turuo unuli ming, ga aret tiruo tubiat eba abung kaguma ira a noba migana kabirana ma papap mim meba irie ba unuli maiang gare kan turuo.’  
\v 38 Tubiat nebolameng eap buam na kimanam la karuk ma inamaniap una, ga irirot Moses la unama ga mirie. Ga ula nakap bo kavinama Sinai ga ualo angelo ties aun. Ualo ties ang Morowa, uriro ties ang Morowa la ame ninimiap ga irie la ualo urie ties buun.   
\p
\v 39 “Pa eap buam la tale kan nameng meba omeuluan ties ang. Karuk. Oguekmeng ties ang ga marigimeng agarip maiam ga nameng maset meba ina terigimeng me na kantri Isip.  
\v 40 Are ratmat ga na tara la man unama ka Moses bo kavinama, amelo Eron, ‘Naptang, iruo Moses, papa nuang la bulagiong ga obulai kantri Isip ga mubuo, irie la ula nakap bo kavinama Sinai ga man paga la betong ira a, iruo la tale abit. Are ratmat ga akosarbuong morowa ba o kakarabunim, meba ake me bulam ga terigibuong me na kantri Isip.’  
\v 41 Urie, ouluan Eron ties maiong ga akosarmeng non paga gare uniap a non bulmakau ila kubama, ga meiva iruo paga namo irie morowa maiang. Ga maialo kamniap ula kanu aun iruo paga la akosarmeng ma kilalap ma ga man temeba aime ga lotumeng me ai.  
\v 42 Are ratmat ga ualo Morowa ibunam a ira ma ga uairam ga lotumeng me mai pagap na panbinim gare efan ga ulang ga maralaip ga non gat pagap. Ira iruo tavuk maiang eap buam, umir maiong unulip na Babam ula puaru la tiesieng gare ro,  
\q1 “‘O mimi gar onim Israel, na tara la maionama ma 40 ma karaip na kimanam la karuk ma inamaniap, minamuam papot ma nganeip ga makosarming non ara non ara kamniapup. Pa tale kan okosarming urio kamniap me toun. Karuk kan migat.  
\v 43 Ga merilia luguan a Sel ang morowa o kakarabunim, meiva Molok ga muranama o marala, urie morowa o kakarabunim Refan. Liruo li muranapien la lekosarming meba lotuming me li. Met iriro muana, eba mipukugtara na pianam ming, ga eba mila mionang kakaliat maset na kimanam kagarat u kantri Babilon ga eba mila mionang na napup tomat.’ \rq Amos 5:25-27\rq*   
\p
\v 44 “Tie, aulo Ila Kani Moses, ‘Neriling luguan ila kani o lotu a sel gare ro.’ Ga asinguala a Muranama a ga aulo a tavuk o ukosar a iruo luguan a sel. Ga ira iruo tavuk la ameuluan Muranama ang Ila Kani ga merilia iruo luguan a sel. Na iriro luguan a sel la ame mirikbuom ma 10 ma maimaiap am Moses, na tara la maionama eap buam na kimanam la karuk ma inamaniap una.  
\v 45 Pa eap buam la akosarmeng iruo luguan a Sel, la mevara ra. Ga lop maiam miruo eap buam la amela iruo luguan ila kani o lotu a buruma na kilalap ma. Ga Morowa la man uke maime eap buam ga man makalameng non garip ma inamaniap ga tubiat Iosua la uke maime ga malagiong ga mumaio una urio kimanam. Na irie tara la maiavia iruo luguan a sel ga muo puoong na tara ang orong Devit.  
\v 46 Tie, iriro orong Devit la abouvara Morowa. Are ratmat ga amarikong Devit Morowa meba airang ga akosarang luguan ba ang Morowa ang Iakop meba onang ana.  
\v 47 Pa irie kan la tale akosarong. Karuk. Pa tubiat poi ang Devit, orong Solomon la akosarong luguan ang Morowa.  
\v 48 Pa luguan la akosarmeng inamaniap, Morowa nakap migat la tale kan ume unama ana. Karuk. Are unuli Aisaia la tiesong na Babam ula puaru gare ro,   
\q1
\v 49-50 “‘Ila kani la ugama, “Panbinim ga kimanam ga mirier pagap ganam, turuo kan la makosartung. Panbinim, urie nunamap tung la tunama una. Pa kimanam, urie pianam tung la tuabuam kibap tuo nakap ubuo. Tie, miga akosarming man luguan meba tonang ana? Uriro pianam la puoieng ira  
\q1 ruo meba tonang, karuk kan a migana ba la puoong meba akosarang nap ba tuang me aganuliap.’” \rq Aisaia 66:1-2\rq*   
\p
\v 51 Tie, maulo Stiven kaunselip gare ro, “Ila Kani la tiesong gare ro, pa mitara naming aime iro luguan. Atabo agatming la miga tume ties kirat aime iruo luguan ila kani o lotu, are ratmat ga tomiabu na ties? Mitara mime pringesnges! Tale mime mialam ibup mi ira tavuk ila kire gare teip la tale ameit Ila Kani! Ga kigip mi la tale nameng meba meptang ties ang Morowa! Busit la mime nekaromila ga Muranama Ila Babai! Migat ara, mime akosar iruo tavuk garet tie la mime akosar eap mim.  
\v 52 Man unuli tinan la unama ga tale kan akosarmeng eap mim tavuk ba ila kire ira a? Mirier unulip ganam! Mime menamuam non unulip kabirana ma la mime ties a Migana ila puvuvui ang Morowa la eba muong. Ga tubiat na tara iruo Migana ila puvui la muo, mialam ibup mi ira a ga minamua ga uvara.  
\v 53 Miptang! Ira mi, Morowa la maulo angelop ga maialo maimai ang miun, pa mimi kan la tale omiuluo urio maimai.”   
\s1 Avuremeng Stiven ma tadasip ga uvara  
\p
\v 54 Urie, tiesong ara Stiven gare ro ga miruo kaunselip la mepto ties ang ga papamnam dalap ma kan kirat. Ga man agimameng ga mangararekmeng logip ma.  
\v 55 Pa kukunim ang Muranama Ila Babai la dakieng na dalap a Stiven, ga man ui maranit me na panbinim ga agimaong Morowa la amaning urier kukunim gano ga lalabie ula kanu. Eva, agimaong Iesu la dusong na kilan ila lamige ang Morowa.  
\v 56 Ga ugama, “Miptang! Ogimarung panbinim la inava ga Migana migat ang Morowa la dusong na kilan ila lamige ang Morowa!”  
\v 57 Tiesong Stiven gare ro, ga miruo teip la tale iga meptang urio ties ang. Are ratmat ga kukupmeng maranit ga maialuam kigip ma. Ga mirie ganam la iat temaiara ga ibirmeng ga mela umaiat a Stiven.  
\v 58 Ga merana me lavie na taun, ga meiniam sakerip maiam mirie teip la alagimeng na ties meba avuremeng ma tadasip ga maiabuam kagarat mai kibap a non kubama, bonim a Sol. Ga man avuremeng bat ma tadasip.  
\v 59 Pa na tara la man avuremeng ka miruo teip Stiven ma tadasip, okosarong marik gare ro, “Ila Kakani Iesu, anala muranama ruo.”  
\v 60 Tiesong gare ro ga lekofong dadebipien a me na kimanam ga marikong maranit gare ro, “Ila Kakani, baraba nupulo uriro kirinim maiong.” Tie, tiesong it Stiven gare tiro ga uvara.   
\c 8  
\p
\v 1-2 Na irie tara, magimaong Sol la menamua Stiven ga uvara. Tie, iruo kubama la namurit dalap a ga mirie. Pa non ekelesiap am Iesu la maiavia tongan Stiven ga mela memua na una ga mitara meliba aime.  
\s1 Sol la man makiraraong teip mila naganmeng ira Iesu  
\p Urie, na uriet la, giginanim ula kanu la teiara ga betieng na taun Ierusalem ga maiop teip ga magaulap la naganmeng ira Iesu. Karorap am Iesu la makirarameng kan inamaniap mila naganmeng ira Iesu. Are ratmat ga ekelesiap am Iesu la igomeng ga mela tomat na mirie napup ganam na provins Iudaia ga na provins Samaria. Pa Apostolop la man maionama kan tie Ierusalem.  
\v 3 Tie, Sol la mitara mamarani la man makiraraong inamaniap la naganmeng ira Iesu. Are ratmat ga ume ula uobu na mirie luguap ganam narit narit ga malagiong teip ga magaulap ga ula uabuam na luguan o arubu.   
\s1 Filip la ualo bais ula muru maun Samariap  
\p
\v 4 Urie, miruo ekelesiap am Iesu la igomeng ara ga melar tapmat na mirier napup ganam ga man baismeng o bais ula muru, na pialap la maionama mana.  
\v 5 Tie, Filip la ula na non taun la iot na provins Samaria ga baisong o ties mai teip ga magaulap ga maulo a Iesu irie Karisito la ina malagiong teip ga magaulap.  
\v 6 Papot ma teip ga magaulap la mepto ties ang Filip ga magimameng non ara kagup onim na panbinim la makosarong. Are ratmat ga iruo gar ma teip ga magaulap la menavam kigip ma maset ga man mepto ties ang Filip.  
\v 7 Urie, papot ma teip ga magaulap la ame muranap mila kiram la maiot mana. Are ratmat ga tiesong Filip maranit ga makalaong ga miruo muranap mila kiram la kukupmeng kan kirat ga mamaiolai teip ga magaulap ga igomeng. Ga papot ma teip ga magaulap la memanim kilalap ga kibap are la mevara ra, o kibap ma la kiram, la ina gat mamuriraong.  
\v 8 Are tiruo ga na urio taun teip ga magaulap la tevurusmeng migat.   
\s1 Simon, migana o sanga  
\p
\v 9 Tie, una urio taun la iot na provins Samaria la unama non migana, bonim a Simon. Irie la buat makosarong non ara non ara tavukup o kakarabunim gare sanga, are ratmat ga teip ga magaulap ganam onim na provins Samaria la mime turupmiaba ga maialo bonim ula kanu aun. Ga irie kan la ume tevien gare ro, “Turuo migana ila kakani migat.”  
\v 10 Pa inamaniap la ame bop ga teip ga magaulap la tale memaning bop, miruo teip ga magaulap ganam la mime ties gare ro, “Iriro migana, irie la amaning non kukunim ula kanu, meivo kukunim ang Morowa.” Teip ga magaulap la mime ties gare ro ga mime omeuluan ties ang.  
\v 11 A tara ila laklage, ume akosarong Simon iruo tavuk o kakarabunim ga mime turupmaiaba aime, are ratmat ga mime omeuluan ties ang.  
\v 12 Pa muo Filip ga baisong o bais ula muru a Morowa la namo ualeng maset mabuo teip ga magaulap ganam. Ga baisong a Iesu, irie Karisito. Filip la baisong o urio ties me maun teip ga magaulap na urie taun, ga naganmeng iro urio ties. Ga papot ma teip ga magaulap gat la naganmeng ira Iesu, ga uavariam Filip.  
\v 13 Urie, Simon gat la naganong iro urio bais ang Filip. Are ratmat ga oula nuvietiap ga ume busit auluan Filip. Ga ume magima kagup onim na panbinim ga pagap o turupnuabap la ume makosar Filip ga ume turupuaba maset.   
\p
\v 14 Tie, Apostolop la maionama Ierusalem la mepto urio ties la omela ra Samariap ties ang Morowa, ga ait a iruo la ula betong na taun Ierusalem. Are tatmat ga asagameng Petro ga Ioanes, ga lila mai miruo Samariap.  
\v 15-16 Lila ga betliong na provins Samaria, pa lipto uriro ties la namo karuk kan a migana ba la aula Muranama Ila Babai kabirana ma miruo teip mila naganmeng ira Iesu. Karuk. Pa omelat nuvietiap na bonim a Iesu Ila Kani. Are ratmat ga Petro ga Ioanes la okosarliong marik me ai Morowa meba alang Muranama ang maun.  
\v 17 Tie, Apostolopien la liabuam kilalap lie bo bugabip ma miriro inamaniap ga amela Muranama Ila Babai.   
\p
\v 18 Urie, Simon la legimaong Apostolopien la akosarliong iruo tavuk o unuabuap ma kilalap bo bugabip ma, ga amela Muranama Ila Babai. Ga ula uaram kakepup ga namo alam liun.  
\v 19 Ga muo li ga ugama, “Non ara kukunim la iot meun. Are ratmat ga eba talam mirio kakepup meun ga eba malang urie kukunim toun. Ga leba tama tabung kilan tuo bo bugam a migana ba, eva eba aala gat Muranama Ila Babai.”  
\v 20 Pa Petro la upulo ties ang ga ugama, “Pagap la ume ualam Morowa agarit maun inamaniap, miruo la agatnung ga nuga mauneng ma kakepup, a? Eva miruo kakepup la eba mela saikmeng na iou o kit ga nunuo!  
\v 21 Miriro dalap nuo, mirie la tale puvuvum na irap a Morowa. Are ratmat ga tale kan puonung meba nonang na ubi ang Morowa la okosarpang. Karuk kan migat!  
\v 22-23 Magimarung papot ma dalap mila kiram la dakmeng ira nuo. Ga tavuk ila kakorikong la novisong maranit migat. Are ratmat ga oigornala agat nung ga anolaing iruo tavuk ila kire. Ga mariknang me ai Ila Kani meba oduratang kirinim ieng urio agat ula kiro la iot na dalap nuo.”  
\v 24 Aulo Petro gare ro ga ugama Simon lime, “Toagamalie ga okosarmang marik me ai Ila Kani meba tale betang iruo paga ila kire ira ruo la tomalo a ga tokiraraang.”   
\p
\v 25 Tie, Apostolopien la baisliong mai teip ga magaulap o ties ang Ila Kani. Na tara la no ra urio ubi, ina terigiliong me Ierusalem. Ga na alang la man bais liong o bais ula muru na papot ma pialap na provins Samaria.   
\s1 Filip la ualo unuavariap aun migana ila uke onim na kantri Itiopia  
\p
\v 26 Urie, tubiat non angelo ang Ila Kani la aulo Filip gare ro, “Tenara ga nala na nap o Saut ga nala betnang na urie alang la oiolai taun Ierusalem ga ila betieng todang na taun Gasa.” Urio alang, la iba me na nap o kimanam la karuk ma inamaniap.  
\v 27 Tiesong ara angelo gare ro, tie teuara Filip ga ula betong na urie alang, ga agimaong iruo migana onim na kantri Itiopia. Irie migana ila kani na gavaman ga ume gat uale mabuo kakepup ganam ga non pagap iam Kandesi, urie orong ula magabun maiong kantri Itiopia. Urie, la orong ula magabun Kandesi. Iruo migana, irie migana la apakapmeiara ga ait tavuk maiang Iudaiap ga naganong ira Morowa. Are ratmat ga ula na taun Ierusalem me lotu ga namor ina terigiang me na kantri ang.  
\v 28 Ga na tara la unama iruo migana onim Itiopia bo karis, man uario babam la omirong unuli Aisaia tinan ga man ovasong.  
\v 29 Are ratmat ga aulo Muranama Ila Babai Filip gare ro, “Nala anoping irobu karis, ga namung kagarat ai.”   
\p
\v 30-33 Urie, ibirong Filip me kagarat ai karis. Ga upta iruo migana la man ovasong ties ang unuli Aisaia. Irio nap o ties ang unli Aisaia la man avasong la are ro,  
\q1 “Iruo migana, iriro la alagimeng teip meba menamung ga aving, garet la alagimeng sipsip na pianam meba menamung ga aving. Pa man pamuieng it nanam a gare sipsip la maiovam teip kavurup a. Maiabua na ties ga meinia kan migat ga okosarmeng ties o kakarabunim ira a ga oitmaiamu ninimiap ang, ga tale gat unama na kimanam. Are  
\q1 ratmat ga karuk kan a migana ba la eba oauluan.” \rq Aisaia 53:7-8\rq*  
\p Are ratmat ga upto Filip uriro ties ga amarikong iruo migana onim Itiopia ga ugama, “O migana ila kani, atabo anit muana o urie ties la man ovasnung, a?” Pa ugama irio migana, “Karuk. Pa la karuk a migana ba la puoong meba tosingala a muana o urio ties, are mani ga puorung meba orera.” Are ratmat ga amarikong Filip meba ala nakap bo karis ga onang ga irie.   
\p
\v 34 Tie, iruo migana onim na kantri Itiopia la amarikong Filip ga ugama, “Urio ties ang unuli, tiesieng aime aga ga okosarong urio ties? Atabo tiesieng kan aime, o atabo tiesieng aime non kan migana?”  
\v 35 Are ratmat ga ovaikong Filip muana o urio ties, puaro iro urio ties ang Aisaia la tiesieng aime Iesu.  
\v 36-37 Man tiesliong, urie muor betong karis kagarat u non kin. Pa ugama iruo migana ila kani, “Ogimanang! Kin urobu! Titot la tuga orala nuvietiap. Atabo onoun paga ba alang ga eba tale orala nuvietiap? Karuk.”  
\v 38 Are ratmat ga migana ila kani la aulo migana o ubi ga adusong hos. Ga Filip ga iruo migana ila kani onim Itiopia la telinie bo karis ga lila lourup na kin. Ga uavaria Filip.  
\v 39 Urie, oliolai kin ga lila nakap. Pa talet kagat ga Muranama ang Ila Kakani la alagiong Filip ga ula na non nap. Ga iruo migana ila kani la tale gat agimaong Filip. Pa teuba maset ga ouluan urie alang ga ula lakuan ang.  
\v 40 Pa iriro Filip, alagiong Muranama Ila Babai ga ula betong na taun Asdot. Ga ula na mirie taunup ga man baisong o bais ula mumuru aime Iesu ga ila puoieng na taun Sisaria.   
\c 9  
\s1 Iesu la amarikong Sol ga ualo ubi aun  
\p
\v 1 Urie, na tara la man baisong o bais ula mumuru na Provins Samaria, iruo Sol la man nekaroula ga miruo teip ga magaulap la mime nagan ira Iesu. Ga man tiesong maranit meba makiraraang ga anamum ga meving. Are ratmat ga ula aup miridai ila uke.  
\v 2 Ga amarikong miridai ila uke meba mamirang babap ba me maun teip mila uke na luguap o usingnualap maiam Iudaiap la maionama na taun Damaskas. Tie, keula ra ga mamirong miridai ila uke babap ga ualam aun Sol. Babap la mamirong gare ro, ‘Leba maoping Sol teip o magaulap ba la ameuluan tavuk ang Iesu, eva eba umaiaring ma ga malagiang me Ierusalem.’   
\p
\v 3 Urie, man menum ga mela betmeng kagarat u taun Damaskas. Ga kakalait it non lalabie ula mamaranu la maio na panbinim ga ilabie abuo Sol na urie alang la unum una.  
\v 4 Ga ulum Sol me bo kimanam. Ga upta non nivunama la tiesong gare ro, “Sol! Sol! Memani ga man tokiraranung?”  
\v 5 Tie, amarikong Sol ga ugama, “O Ila Kakani, nunuo aga?” Pa iruo nivunama la ugama, “Turuo Iesu la busit man tokiraranung.  
\v 6 Are ratmat ga titot la tenara ga nala una taun. Ga tie, eba noalava non migana o ubi leba okosarnang.”  
\v 7 Mirie teip la man menum ga Sol la mepta iruo nivunama la tiesong, pa tale kan agimameng migana ba. Are ratmat ga fufulutieng agat maiong ga pamumeng it nanamup ma ga man dusmeng tie.  
\v 8 Tie, teuara Sol na pianam la ulum ga namo ui tapmat. Pa pikmeng ara irap a ga tale puomeng meba agimaang paga ba. Ga urie umaiat teip a kilan a ga alagimeng me na taun Damaskas ga unama tie.  
\v 9 Pa tale kan agimaong Sol paga ba, ga tale kan parakong ga tale kan tapu o burunam, ila puoieng ira ma naien ma lap.   
\s1 Iesu la aulo Ananaias meba ala aagaalie Sol  
\p
\v 10 Urie, na taun Damaskas, unama non migana la naganong ira Iesu, bonim a Ananaias. Pa na kikiritniap la betong Ila Kakani ai ga ugama, “Ananaias.” Pa upulo Ananaias, “Ila Kakani, turuo to.”  
\v 11 Tie, aulo Ila Kakani gare ro, “Non migana onim na taun Tarsas, bonim a Sol la man unama na luguan ang Iudaias. Titot la man unama ga man marikong. Are ratmat ga tenara ga nala onouluo urio alang, meivo ‘alang ula puvuvui’ ga anoping.  
\v 12 Una kikiritniap la agimaong paga gare ro, Non migana la bonim a Ananaias la muo ga uabuam kilalap a bo bugam a ga puoong bat meba ina ueng ga magimaang pagap.”  
\v 13 Aulo Ila Kani gare ro ga ugama Ananaias, “O Ila Kakani, papot ma teip ga magaulap la tomelo a irio migana. Irie la ume makosar non ara non ara tavukup mila kiram ira ma teip ga magaulap nuam Ierusalem.  
\v 14 Ga teip mila kanim o bais la maiala kaguma aun ga asagameng me na taun Damaskas, meba umaiaring ma inamaniap la mime lotu ga nagan ira nuo.”   
\p
\v 15-16 Pa aulo Ila Kakani gare ro, “Iriro migana, irie la avuvuorung ara tinan meba okosarang ubi rung. Eba ala mai inamaniap la tale onim Israel ga mai orongup, ga mai Iudaiap gat, ga eba baisang mai o bonim tuo. Eva, eba asingtala ma papot ma giginanimup la eba betmeng ira a, memani eba ouuluan ties tung. Are ratmat ga nala ga analava gare la norulo ra.”  
\v 17 Are ratmat ga ula Ananaias uobu na irie luguan la unama Sol. Ga agimaong Sol ga uabuam kilalap a bo bugam a ga ugama, “O papa ruang Sol, Ila Kakani Iesu tinan la betong noi na tara la nunum na alang, la naong meba ina murun ba irapien nuo, meba ina magimanang pagap. Ga naong me kukunim ang Muranama Ila Babai meba dakieng na dalap nuo. Are ratmat ga titot la tosagaong ga muruo.”  
\v 18 Tie tiesong Ananaias are ratmat ga talet kagat paga gare pibap a abuluma la lekugula irapien a Sol, la kakalait it lilum me lourup. Ga irapien a la ina gat mumurun ga ina bat magimaong pagap. Ga teuara Sol ga uaro unuavariap aun Ananaias.  
\v 19 Tie, tubiat parakong Sol, ga ina bat terigiieng kukunim ang Sol.  
\s1 Sol la baisong o bais ula muru na taun Damaskas  
\p Urie, Sol la man unama ga nepapaong ga non ekelesiap la mime maionama na taun Damaskas, muio puoieng ira ma papaluaip ma lap.  
\v 20 Na irie tara, kakalait it puaro ga ula tapmat na luguap o usingnualap. Ga baisong ga ugama, “Iesu irie Poi ang Morowa.”  
\v 21 Tiesong gare ro pa teip ga magaulap ganam la mepto urio ties ang ga turupmaiaba ga megama, “Iruot i migana la man makiraraong teip ga magaulap la mime lotu me ai iruo migana Iesu tinan na taun Ierusalem. Eva, mauot tiruo na taun Damaskas meba uaring ma teip ga magaulap a iruo gar ga malagiang me na taun Ierusalem ga alam na kilalap ma miridaip mila kanim. Pa are mani ga titot la aigorula migat tavuk ang?”  
\v 22 Pa Morowa la mitara ualo kukunim ula kanu aun Sol ga ume ties a Iesu irie Karisito. Ga maset avaikong muana o urio ties. Ga karuk kan ma Iudaiap ba la puomeng meba meniang urio ties ang.   
\s1 Nekaromela Iudaiap ga Sol ga igoong  
\p
\v 23 Urie, papaluaip ma lap la aipmeng ara, tie paseimeng ga meburio Iudaiap ties meba menamung Sol ga aving.  
\v 24 Pa tubiat non migana la aulo Sol o urio ties maiong. Ga na ilengiap ga arubuap miruo Iudaiap la man umiale maset mabuo mirier tabup ganam o kudat ma tadasip la okurmeng urio taun, meba menamung Sol ga aving.  
\v 25 Pa o non arubu, non lop am o usingnualap la mime ameuluan Sol la maiabua na non kein ila kani ga ovismeng iagur ula laklago ira iruo kein ga alagimeng me lavie na lu o urio kudat a tadas ga meinia me lourup na kimanam. Urie, oulai Sol taun Damaskas ga ula.   
\s1 Terigiong Sol me na taun Ierusalem  
\p
\v 26 Urie, betong Sol na taun Ierusalem ga naong meba nebolaang ga teip ga magaulap la naganmeng ira Iesu. Pa agatmeng namo ga tale ka naganong migat ira Iesu, are ratmat ga merau aime.  
\v 27 Pa Banabas la alagiong ga ula mai Apostolop ga ovaikong ait a Sol gare ro, Ila Kakani la betong ai Sol na alang la ila na taun Damaskus, ga agimaong Sol, ga Ila Kakani la tiesong ga irie. Ga Sol la tale kan urau la man ovaikong ties uakap memai mirier teip ga magaulap na bonim a Iesu. Karuk.  
\v 28 Are ratmat ga alagimeng Apostolop Sol, ga unama ga mirie. Ula tapmat na taun Ierusalem ga mamarani la man baisong o bais ula muru o bonim a Ila Kakani.  
\v 29 Pa maionama non Iudaiap tie la tale maset omeit ties onim Hibru. Karuk. Pa omeit it ties onim Grik. Miruo inamaniap la man tiesmeng ga Sol, ga man neunam o ties ga mirie. Are ratmat ga man oisinmeng alang ba meba menamung Sol ga aving.  
\v 30 Pa non teip la naganmeng ira Iesu la omeit urio ga alagimeng Sol ga ula todang na taun Sisaria. Ga tubiat maiabua bo sip ga asagameng ga ula na taun Tarsas.   
\p
\v 31 Are ratmat ga na iruo tara, dusmeng maranit lotup na mirier napup ganam na miruo naien ma provinsip: Iudaia ga Galili ga Samaria. Are ratmat ga teip ga magaulap mila naganmeng ira Iesu la maionama maset un malina ga omeuluan ties ang Iesu Ila Kakani. Ga Muranama Ila Babai la mangangasong dalap ma ga nagan maiong la betieng ga mamaranu ga uvas ma ekelesiap la iaba me nakap.   
\s1 Petro la amumuriraong non migana la bonim a Ainias  
\p
\v 32 Urie, Petro la unum ga ula na mirier napup ganam ga o non la, ula gat todang na taun Lida ga unama ga teip mila naganmeng ira Iesu.  
\v 33 Na urie pianam la agimaong non migana, bonim a Ainias. Kilalap ga kibap a iruo migana la mevara ra, ga umet duri bo labun, muio puoieng ira ma gamin ma karaip.  
\v 34 Agimaong Petro Ainias ga aulo gare ro, “Ainias, titot Iesu Karisito la mamumuriraong ara maset neip nuo. Are ratmat ga tenara ga dusnang ga nunuo kan le olukunnang labun o duri.” Tiesong Petro gare ro ga kakalait it teuara Ainias ga maset bat dusong.  
\v 35 Ga mirier inamaniap la mime maionama na taun Lida ga pianam Saron, la agimameng Ainias la unum bat maset ga naganmeng ira Iesu Ila Kakani.   
\s1 Okosarong Petro marik ga ina inim Tabita  
\p
\v 36 Urie, na taun Iopa, non magabun la naganieng ira Iesu la ionama, bonim o Tabita. O ties onim Grik la mime meivo Dokas. Urio magabun la ime makosar papot ma tavukup mila mumurum, ga busit la ime magailie teip ga magaulap mila baim.  
\v 37 Pa na irie tara Petro la unama na taun Lida, ga non tafa la oiop Dokas ga ivara. Pa ameuluan magaulap tavuk onim Iudaia ga obabaurameng tongan ga maiavario ga menam burap iro. Ga maiavio Dokas ga mela maiabu na non kabin la ut nakap na irie luguan.  
\v 38 Tie, taun Lida urie la iot it kagarat u taun Iopa, ga ekelesiap am Iesu onim Iopa la ameit ara Petro la unama Lida. Are ratmat ga lesagameng non teipien ga lila ai ga amarikliong, “Kakalaitnang it ga munang ga ii. Buat uanula.”  
\v 39 Urie, teuara Petro ga ula ga lirie. Betong ara ga alagimeng me na irie kabin la ut nakap. Pa magaulap la mevara laip maiam, mirie ganam la mumaio dusmeng kagarat ai Petro ga man meliba. Ga asingmaiala Petro ma sakerip ga burap Dokas la ime masigit, na tara la man inim ka.  
\v 40 Urie, masagaong Petro teip ga magaulap ganam ga meura me lavie, ga makofong dadebip a ga okosarong marik. Na tara la okosarong ara marik, tie terigiong ga ogimaong magabun ga ugama, “Tabita, tenara.” Tiesong are tie ga ivanam magabun irap o ga agimaieng Petro ga teiara ga ionama.  
\v 41 Ga uaria Petro kilan o ga oagaulie ga teiara ga dusieng. Ga mamarikong Petro non ekelesiap am Iesu ga misik magaulap la mevara ra laip maiam na irie luguan. Ga masinguala Petro o Dokas la inar inim gat.  
\v 42 Urie, ait a irio paga ila kani la betong ga ula tapmat, ga mirier teip ga magaulap onim na taun Iopa la mepta. Ga papot ma la naganmeng ira Ila Kakani.  
\v 43 Pa man unama ka Petro tie Iopa ma papaluaip ma lap na luguan ang non migana la ume maranga papakip ma mamanip me ukosar ma non ara pagap. Bonim a irio migana Simon.   
\c 10  
\s1 Amarikong Konilias Petro  
\p
\v 1 Urie, non migana la bonim a Konilias, irie la ume unama na taun Sisaria. Irie migana la uke me 100 ma teip o danunumiap ana iruo gar la meiva Itali.  
\v 2 Ume nagan ira Morowa ga ume auluan tavuk ila puvuvui. Ga numeilup am ga teip am o ubi gat la mime okosar garet tie. Ga ume busit mabouvara Konilias Iudaiap mila baim ga ume ualam pagap maun. Ga ume busit marik me ai Morowa.  
\v 3 O non la, na tara la man marikong are naien o muabari, tie na kikiritniap la agimaong Konilias uakap maset non angelo ang Morowa la muo ai ga aulo “Konilias.”  
\v 4 Ga maranit man agimaong Konilias ga mitara urau migat ga ugama, “O Ila Kakani, nanung me mani?” Pa angelo la aulo, “Mirier marikiap nuam ganam la uptam ara Morowa. Ga mirier tavukup nuam la nume mabonuvara teip ga magaulap mila baim, la maula ra Morowa gare lavang. Ga tale ume noave, are ratmat ga tosagaong ga muruo noi titot.  
\v 5 Naong meba masaganang teip ba meba mela na taun Iopa ga amaioping non migana bonim a Simon ga alagimeng ga muong noi. Non bonim a iruo migana Petro.  
\v 6 Irie migana la unama na luguan ang non migana la bonim a Simon irie la ume maranga papakip ma bulumakaup. Pa luguan ang la dusong labinim kagarat ara u pirom.”   
\p
\v 7 Urie, aulo angelo Konilias gare ro ga ula. Tie, lemarikong Konilias narain teipien angan o ubi ga non migana o danunumiap meba mumaiong ai. Iruo migana o danunumiap irie gat la nagan ong ira Morowa ga ume busit unama ga Konilias ga ume agaulie ira ma ubiap am.  
\v 8 Urie, maulo Konilias ma miruo pagap la betmeng ira a ga masagaong ga mela na taun Iopa.   
\s1 Ila Kani la aulo Petro na kikiritniap  
\p
\v 9 Urie, menum ga mela ga durimeng na alang. Ga parabira namur la temaiara ga menum ga mela betmeng kagarat u taun Iopa. Are 12 o muabari. Ga anat irie tara, la namo okosarang Petro marik, are ratmat ga ula nakap na luguan ga unama ga okosarong marik.  
\v 10 Pa tafaong Petro me parak ga namo parakang. Tie, na tara la man orangameng parak, naong Ila Kani meba asingala a non paga ga ulum Petro na kikiritniap.  
\v 11 Na kikiritniap, ogimaong panbinim la inava ga non paga ila kani la muo lourup. Iruo la are buruma ila kani, ga maiaria nagala ma sikurup a ga meinia me lourup na kimanam.  
\v 12 Ana iruo buruma, ame mirier nganeip ganam ga mirier kagokup ga lagualep ga non ara kobengip la maiot.  
\v 13 Ga upta Petro non nivunama la tiesong gare ro, “Petro, tenara ga nanamum ga nom.” Iruo nivunama la tiesong gare ro.  
\v 14 Pa ugama Petro, “O Ila Kakani, tale kan puorung migat! Meba tom miriro pagap, la tiesieng maimai ang Moses gare ro, namo tale kan babaim ga kiram na irap a Morowa. Are ratmat ga tale kan tume tum miruo pagap gare tiro. Karuk kan migat!”  
\v 15 Pa iruo nivunama la ina gat tiesong ga ugama, “Pagap la ivam Morowa namo babaim, miruo pagap la buat nivam nuga papalim ga kiram.”  
\v 16 Urie, urio ties la betieng ma naien ma taraiap ga uptam ara. Pa na tara urio ties la no, kakalait it iriro paga are buruma ila kani la inagat alagimeng ga una me na panbinim.   
\p
\v 17 Urie, magimaong ara Petro miruo pagap ganam ga man agatong papot. Ga irie kan la tiesong gare ro, “Man muana a irio paga titot la agimarung na kikiritniap?” Anat irie tara, miruo naien ma teip la masagaong Konilias la mumaio, ga betmeng na taun Iopa. Man aisinmeng luguan ang Simon, urie betmeng bat ai tabuna a luguan ang.  
\v 18 Ga man mamarikmeng teip gare ro, “Atabo Simon, non bonim a Petro, irie la unama togo o karuk?”  
\v 19 Pa na tara la man agatong ka Petro me iruo paga la agimaong, tie Muranama Ila Babai la aulo gare ro, “Naptang. Naien ma teip la man noisinmeng, miro la betmeng ara.  
\v 20 Tie, tenara ga nala lourup ga magimanang. Ira ma mirio teip, turuo kan la masagarung meba nogimameng ga mumaio. Are ratmat ga na tara la nomarikmeng meba nala ga mirie, nalat ga mirie. Buat agatnung papot. Karuk.”  
\v 21 Urie, teunie Petro me lourup ga ula maup miruo naien ma teip, ga ugama, “Iruot migana la man aisinming, turuot tiruo. Memani ga man toisinming ga mumio to?”  
\v 22 Pa megama, “Non migana bonim a Konilias, irie la pasagaong ga mupo. Irie la uke me 100 ma inamaniap o danunumiap na ami onim na kantri Rom. Irie migana ila puvuvui ga ume ouluan ties ang Morowa. Ga garip onim Iudaia ganam la mime meiva irie migana ila muri. Pa non angelo ila babai la muo aup ga aulo meba marikang me nulam meba nala na luguan ang. Naong Konilias meba tiesnang ga eba aptang ties nung.”  
\v 23 Amelo gare ro, tie malagiong Petro ga maiobu na luguan ang ga durimeng ga irie o urie arubu.  
\s1 Petro la ula na luguan ang Konilias  
\p Parabira ga teuara ga ula ga mirie. Ga non gat teip mila naganmeng ira a Iesu onim na taun Iopa mirie gat la mela ga mirie.  
\v 24 Man menum ga mela ga durimeng na alang o namurit arubu. Tie, kalup parabira mela betmeng na taun Sisaria, ga man mauanula Konilias meba namuk la eba terigimeng mirie teip la mela na taun Iopa. Are ratmat ga marikong maime numeilup am ga migap am ga mumaio ga nebolameng ga iat auanmela Petro.   
\p
\v 25 Urie, muo betong Petro ga namo obung na luguan, pa ula abolaong Konilias ga makofong dadebip a me lourup na kimanam mai kibap a Petro.  
\v 26 Pa uabuam Petro kilalap a ga uat a kilan a Konilias ga ugama, “Tenara! Turuo gat la turuot migana, karunat gare nunuo.”  
\v 27 Ga man tiesong ka Petro ga irie ga lila liobu, ga magimaong Petro papot ma teip ga magaulap la nebolameng.  
\v 28 Ga maulo Petro ga ugama, “Amit tavuk pang la pabunakong paua Iudaiap meba tale nemiganpang ga teip la tale onim Israel o pala kagarat mai gat. Urio maimai la mamaranu migat ira pa. Pa titot Morowa la tosinguala ga toulo gare ro, Tala kan pevam teip la tale onim Israel gare teip mila papalim o teip mila kiram.  
\v 29 Are ratmat ga tale oguektung ties ming. Karuk. Tupto urio marik ming ga kakalait teruara ga muruo. Tie, titot tuga mimariktang, ‘Memani ga marikming me rulam ga muruo to?’”   
\p
\v 30 Pa upulo Konilias ties ang ga ugama, “Non ara paga la betong ira ruo ga titot la aipmeng ara naien ma lap. Nabit na lama naien o muabari, la are kan iruo tara titot, na tara la tunama na luguan tuang ga man okosartung marik me ai Morowa, tie agimarung non migana la dusong na irap tuo ga burap am la mitara ililakmeng.  
\v 31 Tie, ugama, ‘Konilias, mirier marikiap nuam ganam la ume uptam Morowa. Ga inamaniap mila baim, la nume mabonuvara ga nume okosar ula muru ira ma, iruo tavuk nuang la ume agima Morowa.  
\v 32 Ga naong meba masaganang teip ba meba mela na taun Iopa ga amarikmeng non migana bonim a Simon ga alagimeng me toi. Non gat bonim a irie migana Petro. Irie migana onim na non pianam, pa muo ga unama na luguan ang non migana la bonim a gat Simon. Pa iruo Simon na taun Iopa la ume maranga papakip ma mamanip. Pa luguan ang la dusong labinim kagarat ara u pirom.’  
\v 33 Are ratmat ga kakalait masagarung miruo teip ga mela noi. Tie, nupto ties tung ga munuo to, are ratmat ga tivo temaieng me nulam. Eva, pava ganam la nebolapang to na irap a Morowa meba paptam tiesiap ganam la noulo Ila Kakani ma ga naong meba panalava ma. Are ratmat ga panalava.” Tiesong Konilias are ro.   
\p
\v 34 Pa tiesong Petro gare ro, “Migat ara, titot la arit Morowa la tale kan agatong me bonim ula kanu ga gar ila kani ang migana, pa amaning namurit alang meba osingala ubonuvarap ang mai mirier inamaniap ganam.  
\v 35 Ume na maime garip ma teip ga magaulap la mime omeuluan ties ang ga mime akosar tavuk ila puvuvui na irap a.  
\v 36 Omit bais ula muru la osagaong Morowa ga muio paun gar onim Israel. Iro bais ula muru, asagaong Morowa Iesu Karisito ga muo mai teip ga magaulap na uro kimanam meba mionang un malina ga Morowa. Ga iriro Iesu Karisito, irie Ila Kakani maiang mirier inamaniap ganam onim na kimanam.  
\v 37 Mimi kan la mira, tinan la baisong Ioanes o ties me unuavariap, na irie tara uriro bais ula muru la puiara Galili. Ga tubiat ila betieng na mirier napup ganam na provins Iudaia.  
\v 38 Ga amit Morowa irie la aurupong Muranama Ila Babai ga kukunim ang bo Iesu, irie migana onim na taun Nasaret. Ga unama Morowa ga irie, are ratmat ga ula Iesu na mirier pialap ganam tapmat ga man maagaulie teip ga magaulap ga mamuriraong mirier inamaniap ganam la makiraraong Satan maset.  
\v 39 “Ga ira ma mirier ubiap la makosarong Iesu na mirie napup ganam na kantri pang Israel, ga na taun Ierusalem, eva magimapang miruo pagap ganam ma irap pa ga paptam ma kigip pa. Pa alagimeng iruo migana ga asopmeng iro maiogun ga uvara.  
\v 40 Pa na lama naien o la Morowa la ina imua irio migana Iesu ga inim. Ga akosarong Morowa ga betong na irap ma non teip ga magaulap.  
\v 41 Pa tale akosarong meba betang mai mirie Iudaiap ganam. Karuk. Pa akosarong meba betang pai, muana la pavuvuoong ara tinan meba baispang o ties ang ga tubiat eba parakpang ga tapo ga Iesu, na tara la eba ina teara.  
\v 42 Ira iruo Iesu, Morowa la avuvuoong ara meba irie ba ias meba okosarang ties a tavuk maiang mirie inamaniap la ame ninimiap, ga mirie inamaniap mila mevara ra. Ga paulo Iesu meba baispang a irie kan la irie ias.  
\v 43 Ira iruo Iesu, mirier unulip ganam onim tinan la man ovaikmeng ties a iruot migana ga tiesmeng gare ro, Leba naganang migana ba iro urio bonim a iruo migana, eva eba oduratang Morowa kirinim ang.”   
\s1 Garip la tale onim Israel gat la amela Muranama Ila Babai  
\p
\v 44 Tie, na tara la man tiesong ka Petro, na iruo tara, Muranama Ila Babai la muo lourup mabuo teip ga magaulap la man mepto ties ang Petro.  
\v 45-46 Ga mirie ganam la pumaiaro bais ma non ara non ara tiesiap ga ovienmeng bonim a Morowa. Ga teip a gar Iudaia mila naganmeng la mumaio ga Petro na taun Iopa la turupmaiaba kirat, ga megama, “Teivuo! Morowa la asagaong Muranama Ila Babai ga ourukong urio kukunim mabuo miruo garip la tale onim Israel!” Tie, ugama Petro,  
\v 47 “Migat, titot uala Morowa Muranama Ila Babai maun miruo teip ga magaulap, garet tinan la uala buun. Are ratmat ga aga la puoong meba obunakang alang maiong meba tale omela unuavariap? Karuk kan a noba!” Tiesong Petro gare ro.  
\v 48 Ga maulo meba omela nuvietiap na bonim a Iesu Karisito. Omela ra nuvietiap ga amelo Petro, “Man nonang ka ga pava.” Amarikmeng gare ro ga man unama ka Petro ga mirie, puoieng ira ma non lap.   
\c 11  
\s1 Petro la uala ait ang maun inamaniap am Iesu na Ierusalem  
\p
\v 1 Urie, Apostolop ga non ekelesiap la man maionama tapmat na provins Iudaia la mepto ties ma non teip ga magaulap onim na non garip la omela gat ties ang Morowa.  
\v 2 Are ratmat ga ina terigiong Petro me toma Ierusalem. Na irie tara, non teip mila naganmeng ira Iesu la man maiaria ka maranit tavuk o kasau la abukmela.  
\v 3 Megama, “Nula na luguap maiam non teip la tale makasaumeng ga paraknung ga mirie! Akosarnung iruo tavuk la tale mumuri!”  
\v 4 Pa upuaro Petro ties ang ga maulo ma mirier pagap la betmeng ira a. Tiesong gare ro,  
\v 5 “Tula na non taun Iopa ga tunama tie. Ga o non la, na tara la man mariktung, tulum na non kikiritniap. Na kikiritniap, ogimarung panbinim la inava ga non paga ila kani la muo lourup. Iruo la are buruma ila kani, ga maiariam nagala ma sikurup a ga meinia me lourup na kimanam.  
\v 6 Pa uri ana irio buruma, ga magimarung mirier nganeip ganam ga mirier kagokup ga lagualep ga non ara kobengip la maiot.  
\v 7 Ga tupta non nivunama la tiesong gare ro, ‘Petro, tenara ga nanamum ga nom.’  
\v 8 Pa kerula gare ro, ‘O Ila Kakani, eva, tale kan puorung! Irama miriro pagap, tiesieng maimai ang Moses gare ro, namo tale babaim ga kiram na irap a Morowa. Are ratmat ga tale kan tume tum miruo pagap gare tiro. Karuk kan migat!’  
\v 9 Pa iruo nivunama la ina gat tiesong ga ugama, ‘Pagap la ivam Morowa la namo babaim, miruo pagap la buat nivam ga namama papalim ga kiram.’  
\v 10 Tie, urio ties la betieng ma naien ma taraiap ga tupto ra. Pa na tara la nora urio ties, kakalait it paga are buruma ila kani la ina gat alagimeng ga una me na panbinim.   
\p
\v 11 “Pa anat irie tara, naien ma teip la mumaio betmeng na irie luguan la tunama ana. Non migana la ume unama na taun Sisaria la naong meba tolagimeng ga tala ai, are ratmat ga masagaong ga mumaio toi.  
\v 12 Ga toulo Muranama Ila Babai gare ro, ‘Nalat ga mirie. Buat agatnung papot. Karuk.’ Ga miruo gunamur ma papap gat la mela ga turuo, ga pala pobu na luguan ang iruo migana.  
\v 13 Ga iruo migana la paulo a iruo paga ga tiesong gare ro, ‘Tunama na luguan ga agimarung non angelo la dusong kagarat toi. Ga ugama, “Masaganang teip ba meba mela na taun Iopa ga amaioping non migana bonim a Simon ga alagimeng ga muong noi. Non bonim a iruo migana la Petro.  
\v 14 Ga eba baisang me noun ma tiesiap ba, ga me uriro ties eba ina malagiang Morowa gar nuang.” Toulo Angelo gare ro ga titot la munuo ra.’   
\p
\v 15 “Urie, irie migana la paulo gare ro ga puruaro la baistung. Nat irie tara, kukunim ang Muranama Ila Babai la muio lourup ga iot mabuo garet tinan la muio urio kukunim lourup ga iot bubuo na la ula kanu o pentikos.  
\v 16 Na irie tara la betong irie paga ira ma ga man agattung me urio ties tinan la buulo Ila Kakani tiesong gare ro, ‘Ioanes o unuavariap la uavariam teip ga magaulap o burunam pa tubiat la eba avaream Morowa a Muranama Ila Babai.’  
\v 17 Migat, titot gat la uala Morowa Muranama Ila Babai maun miruo teip ga magaulap, garet tinan la uala buun na tara la naganbuong ira Iesu. Ga urio uniap la iat it nepuoieng la ualo ra Morowa maun gat. Are ratmat ga turuo aga la puorung meba onoraling alang ang Morowa? Tale puorung. Karuk kan migat!”  
\v 18 Urie, mepto teip uriro ties ang Petro ga agatmeng ties ang la migat o. Ga maiavio bonim a Morowa ga tiesmeng gare ro, “Titot la bira Morowa la uairam non garip la tale onim Israel ga marigimeng dalap ma ga omela ninimiap la iot maset atatan makin.”   
\s1 Teip ga magaulap onim Antiok la naganmeng ira Iesu  
\p
\v 19 Urie, non Iudaiap mila uke tinan la menamua Stiven ga uvara ga makirarameng gat papot ma non gat teip mila naganmeng ira Iesu. Are ratmat ga na irie tara ga ila poieng ma non lap, papot ma mirie la omaiolai taun Ierusalem ga mela tapmat ga maionama na non ara non ara pialap. Mirie la mela na provins Finisia, pa mirie la mela na ailan Saipras, pa mirie mi la mela na taun Antiok na provins Siria. Ga man baismeng it o bais ula muru me mai Iudaiap talamet.  
\v 20 Pa mirie non teip mila naganmeng ira Iesu la mirie teip onim na ailan Saipras na provins Sairini. Eva miruo teip la mela maionama na taun Antiok. Ga baismeng gat me maun teip ga magaulap onim Grik. Baismeng o bais ula muru a Ila Kakani Iesu.  
\v 21 Ga kukunim ang Ila Kakani la ionama ga mirie, are ratmat ga papot ma teip ga magaulap la naganmeng iro bais ula muru. Ga marigimeng dalap ma ga betmeng mirie teip ga magaulap am Ila Kakani.   
\p
\v 22 Urie, mirie teip mila naganmeng ira Iesu na taun Ierusalem la mepta irie ait. Ga asagameng Banabas ga ula na taun Antiok.  
\v 23 Ula betong ga ogimaong gare ro, Morowa la mitara mabouvara ga mime omeuluan migat ties ang. Are ratmat ga teuba Banabas. Ga ongangasong nagan maiong teip ga magaulap ganam ga maulo meba parepmeng dalap ma ira Ila Kani ga omeuluan busit ties ang.  
\v 24 Ira iruo migana Banabas, irie migana ila muri ga kukunim ang Muranama Ila Babai la dakieng na dalap a. Ga masinguala Banabas o bais ula muru ga papot ma inamaniap la naganmeng ira Ila Kani.   
\p
\v 25 Urie, ula Banabas na taun Tarsas meba aoping Sol.  
\v 26 Ga na tara la aup Sol ga alagiong me na taun Antiok. Ga lionama iat tie, ila puoieng iro namurit karanim. Ga nebolaliong ga inamaniap la naganmeng ira Iesu ga asingliala gar ila kani ma teip ga magaulap o bais ula muru. Tie, na urie taun Antiok, pumaiaro non inamaniap meba meivam inamaniap mila naganmeng ira Iesu, mirie ‘Kristenip’ a natauan tara.   
\p
\v 27 Urie, na irie tara, non unulip la omiolai taun Ierusalem ga mela na taun Antiok.  
\v 28 Pa kabirana ma, non unuli la bonim a Agabas. Ualo Muranama Ila Babai non ties aun, ga teuara ga tiesong, ugama, “Miptang, talet kagat ga eba betieng abage ula kanu na mirie napup ganam la maionama apat gavaman onim Rom.” Ga tubiat na tara orong Klodias la uale bo pialap ganam la maionama apat gavaman onim Rom, na irie tara urio abage ula kanu la eba betieng.  
\v 29 Ga ekelesiap onim na taun Antiok la mepta Agabas la uaramo urio abage ula kanu la eba betieng, ga man agatmeng maime kristenip onim na provins Iudaia leba omela giginanim ula kanu migat. Are ratmat ga kristenip onim Antiok la meburio ties meba iat mepamum kakepup ba, ga tubiat eba masagameng meba magamelie ekelesiap na provins Iudaia. Tie, teip la memaning papot ma kakepup la maiabuam papot ma kakepup pa teip la memaning it tatak kakepup la maiabuam it tatak kakepup.  
\v 30 Tie, maialam miruo kakepup aun Banabas ga Sol. Ga malila ga lila mai teip mila uke maiam ekelesiap onim na provins Iudaia ga lialam maun.   
\c 12  
\s1 Orong Herot Agripa la makiraraong ekelesiap  
\p
\v 1 Urie, na irie tara, orong Herot Agripa la masagaong teip am o danunumiap meba umaiaring ma non ekelesiap ga makirarameng.  
\v 2 Tie, umaiat ma ekelesiap ga maulo Herot teip am o danunumiap ga menamua Iemes o apos ga uvara. Iriro Iemes, irie papa ang Ioanes.   
\p
\v 3 Urie, orong Herot la mait Iudaiap la nameng me iruo tavuk ang. Are ratmat ga maulo teip o danunumiap meba umaiaring a Petro ga alagimeng ga maiabung na luguan o arubu. Iruo paga la betong na la ula kanu o lotu la maio Iudaiap purun la karuk o is.  
\v 4 Pa orong la naong ka lake meba onang Petro na luguan o arubu. Ga tubiat leba no ba Pasova, urie, eba bat abung Petro na ties ga menamung ga aving na irap ma Iudaiap. Are ratmat ga aulo orong migana ila uke o danunumiap meba maiteang 16 ma teip o danunumiap meba umaialeng maset abuo Petro, meba tale aolaing luguan o arubu ga igoang. Kabirana ma miruo 16 ma teip o danunumiap, nagala ma ba ka la eba lake umaialeng abuo. Ga tubiat leba ne ba tara maiang, tie eba inabun maigormela non nagala ma ga umiale abuo.  
\v 5 Met iruo tavuk, unama Petro na luguan o arubu. Ga busit man marikmeng ekelesiap me ai Morowa meba agaalie.   
\s1 Angelo la alagiong Petro na luguan o arubu  
\p
\v 6 Tie, na urie arubu, orong Herot la tiesong maime Iudaiap meba urangameng, memani kalup eba maiabung Petro na ties. Are ratmat ga duriong Petro kabirana lie narain teipien o danunumiap na luguan o arubu. Ga lavie ma mirie tabup ganam a luguan o arubu la ame teipien o danunumiap la dusliong ga man uliale. Na nunamap ang Petro, non ankap la avismeng ira kilan a ga kilan a migana o danunumiap, pa non ankap la avismeng ira non kilan a ga mela avismeng ira kilan a non migana o danunumiap.  
\v 7 Pa kabirana migat o arubu, angelo ang Ila Kakani la muo ga dusong na irie tatak kabin la duriong Petro ga lirie teipien o danunumiap. Ga betieng lalabie ga dakieng na irie kabin. Urie, adudulakong angelo Petro ga aulo ga ugama, “Tenara kakalait!” Ga na tara la teuara Petro, tie pikliong ankapupien ira lie kilalapien a. Ga teuara Petro ga dusong.  
\v 8 Ga ugama angelo aime, “Ovisnang kanam nung ga nabum kibap nuo.” Urie, ouluan Petro ties ang. Tie, teuara angelo ga aulo, “Naba na saket nuang ga tonouluo.”  
\v 9 Are ratmat ga uabua Petro saket ang ga auluan ga ula. Pa ira ma miruo pagap ganam la makosarong angelo, tale mait maset Petro. Karuk. Man agatong la namo ga ogimaong ara kikiritniap.  
\v 10 Tie, akabanliong natauan nap la ame teipien o danunumiap la man uliale. Ga akabanliong gat lama narain nap la ame teip o danunumiap la man umaiale. Ga betliong na tabuna a luguan o arubu la ui me na pianam ula kanu. Iruo tabuna, irie la akosarmeng ma ailip, are ratmat ga karuk kan a migana ba la puoong meba igoang na luguan o arubu ga ala. Pa na tara la betliong na irie tabuna, tabuna kan la unava, ga liura me lavie ga betliong na tatak alang. Oliuluan urie alang ga lila rot kirat, pa na iriet tara aulai angelo Petro ga ula ga karuk kan aime.  
\v 11 Tie, uakap bat na agat ang Petro ga tiesong gare ro, “Titot la tira bat maset, iruo paga la tale kikiritniap. Karuk. Migat ara, Iudaiap la man temeba ga man uanmela meba tokiraraang Herot. Are ratmat ga asagaong Ila Kakani angelo ang ga tourana na kilan a orong Herot!”   
\s1 Ina terigiong Petro me mai migap am  
\p
\v 12 Urie, ait bat iruo paga, are ratmat ga ula na luguan iang Maria, urie naga ang Ioanes. Pa non bonim a iruo Ioanes la Marko. Ga ana irie luguan papot ma teip ga magaulap la mumaio nebolameng ga man okosarmeng marik.  
\v 13 Urie, muo Petro dusong na tabuna a irie luguan ga man bakbakong ira tabuna. Pa non magabun o ubi, bonim o Roda, la ipta ga muio ai tabuna ga marikieng gare ro, “Nunuo aga?”  
\v 14 Pa upulo Petro ties ieng. Ga arakiieng Roda nivunama a Petro ga dalap o la mitara temeba, pa tale kan agatieng meba inavang tabuna. Karuk. Ina ibirieng ga iobu ga mailo, “Petro, irie la terigiong ara ga man dusong na tabuna!”  
\v 15 Tiesieng Roda gare ro, pa megama, “bangutnung, a?” Tiesmeng are ro, pa mamaranu kan Roda ga man tiesieng gare ro, “Karuk. Migat ara itma la man dusong.” Pa megama, “Tie, atabo angelo ang iri.”  
\v 16 Urie, ina gat bakbakong Petro ira a tabuna o kudat. Tie, ina gat mepta pa namo menava tabuna pa agimameng ga turupmaiaba kan maset.  
\v 17 Pa teuara Petro ga mabunakong a kilan a meba mapamumeng nanamup ma. Ga maulo a, “Ila Kakani la avugutuara na luguan o arubu ga alagiong ga muo. Ga mamarikong meba amelava Iemes ga papap am a irio paga la betong.” Ga maulai ga ula na non pianam.\f + \fr 12:17 \ft Ira irie Iemes, irie papa ang Iesu ga migana ila uke me lotu na taun Ierusalem.\f*   
\p
\v 18 Urie, mirie teip o danunumiap la umaiale abuo Petro la meinim parabira pa tale gat agimameng. Are ratmat ga man umi tapmat na luguan o arubu pa tale amaiop. Are tapmat ga agatmeng papot ga giginam dalap ma kan migat.  
\v 19 Pa orong Herot la upto ra ait a Petro la igoong ara. Are ratmat ga maulo papot ma teip o danunumiap meba aisinmeng. Pa tale amaiop. Are ratmat ga maulo Herot teip mila uke o danunumiap meba umaiaring ma miruo teip o danunumiap la umaiale abuo Petro ga mamarikmeng lagum la unama. Pa leba tale ameira, tie menamum ga meving. Ga tubiat, Herot la oulai provins Iudaia ga ula todang na taun Sisaria ga unama tie.   
\s1 Herot la uvara ra  
\p
\v 20 Tie, tinan la betieng nebuknulap kabirana a orong Herot ga teip ga magaulap onim na taun Taia ga taun Saidon. Lirie pialapien lila kakanin la liot na provins Siria. Are ratmat ga Agripa la tale orong maiang. Pa na uriro provins Siria la kagesmeng o parak ga mime mumaio ga masou papot ma paparakiap na kantri Israel. Ga tubiat la betieng urio nebuknulap, tie papamnam dalap a Herot migat maime ga tiesong gare ro, “Inamaniap onim Taia ga Saidon la buat gat oumi parak na kantri buong Israel.” Irie la tiesong are ratmat, ga inamaniap onim Taia ga Saidon la memaning giginanim ula kanu, ga teip mila uke liangan litiro pialapien lila kanin la nebolameng ga mumaio amaiop Herot. Lake ka aroroumeng migana ila kani o ubi ang orong, bonim a Blastas, ga maagaulie la tiesong ga orong. Are ratmat ga mela amarikmeng Herot meba maboaving ga eba bat ot malina kabirana a orong Herot ga inamaniap onim na litie taunupien.   
\p
\v 21 Urie, ovuoong orong Herot non la ga uba mana sasaip am. Tie, ula unama nakap bo luaga ang orong ga uaramo ties ula kanu me maun teip ga magaulap.  
\v 22 Are ratmat ga mepto teip ga magaulap urio ties ga kukupmeng maranit ga megama: “Urio ties la tale ties ang migana ba. Karuk. Irie nivunama a non morowa.”  
\v 23 Urie, upto Herot ties maiong pa tale iga ovien ang bonim a Morowa, are ratmat ga tale kan inio urie ties maiong. Are ratmat ga talet kagat muo angelo ang Ila Kani ga avitong Herot ga betieng tafa ula kanu ira a. Ga papot ma mogup mila kapim la maiom neip a ga uvara.   
\p
\v 24 Pa busit ekelesiap la mime bais o ties ang Morowa, ga urio ties la ila na mirier napup ganam.   
\p
\v 25 Urie, Banabas ga Sol la lila na taun Ierusalem ga itliamu ra ubi liong ga ina terigiliong me na taun Antiok. Ga na tara la terigiliong, alagiliong gat Ioanes, non bonim a Marko.   
\c 13  
\s1 Avuoong Muranama Ila Babai Banabas ga Sol meba lesagaang ga lila mai inamaniap la tale onim Israel  
\p
\v 1 Urie, na taun Antiok, papot ma teip ga magaulap la naganmeng ira Iesu ga betmeng kristenip. Pa kabirana ma miruo ekelesiap, maionama gat teip o unuli ga teip o usingnualap la mime maset masingmiala inamaniap a tavuk ang Morowa. Bop ma miruo teip o ubi la are ro: Banabas ga Simon meiva ‘pupulum neip’, ga Lusias, migana onim na taun Sairini ga Sol. Irio migana Manaen, na tara la kakapi ka iat sisiong ga orong Herot, irie orong maiang inamaniap onim na provins Galili ga iat kakanin.  
\v 2 Tie, o non la la ofenmeng parak ga lotumeng me ai Ila Kakani, Muranam Ila Babai la maulo gare ro, “Miptang, avuvuoming Banabas ga Sol meba okosarliong ubi rung. Are ratmat ga lekosarming meba talienliong ga okosarliong urio ubi la tualo liun meba okosarliong.”  
\v 3 Are ratmat ga fenmeng me parak ga okosarmeng marik, ga maiabuam kilalap ma libuo ga lesagameng ga lila.   
\s1 Okosarliong ubi o lotu na ailan Saipras  
\p
\v 4 Urie, lirio naraen teipien, aleuluan Muranama Ila Babai ga lake ka lila na taun Selusia. Tubiat la tegoliong bo sip ga lila betliong na ailan Saipras.  
\v 5 Ga na tara la lila na taun Salamis na non nap a iruo ailan, tie lila na luguap o usingnualap maiang Iudaiap ga baisliong o ties ang Morowa. Na irie tara, unama Ioanes, meiva Marko ga litie ga leagaulie.  
\v 6 Tubiat, omaiolai urio taun Salamis ga mela na taun Pefos, non nap a iruo ailan. Pa na urio pianam, non migana onim Iudaia la ume okosar sanga, ga ume mavana teip ga magaulap o ties o unuli. Bonim a iruo migana, Ba-Iesu.  
\v 7 Ume unama ga natauan gavaman onim na ailan Saipras. Iruo gavaman la bonim a Sesias Paulus ga agat ang la uakap. Are ratmat ga namo aptang urio ties ang Morowa ga marikong aime Banabas ga Sol ga lila ai.  
\v 8 Pa iruo Ba-Iesu la nekaroula ga litie teipien ga man inio ties liong, memani tale naong meba naganang natauan gavaman iro ties ang Morowa. Non bonim a Ba-Iesu la meiva Elimas ga muana o uriro bonim, irie migana o sanga o ties onim Grik.  
\v 9 Pa kukunim ang Muranama Ila Babai la dakieng na dalap a Sol, meiva Paulo ga man agimaong maranit Elimas.  
\v 10 Tie, aulo maranit gare ro, “Nunuo poi ang Satan! Tavukup o kakarabunim ga mirier tavukup mila kiram ganam la dakmeng na dalap nuo. Nume nekaronula ga tavukup mila puvuvum ga nume makirara mirier alangip mila puvuvum am Ila Kakani. Atabo tale ga anolaing iruo tavuk?  
\v 11 Are ratmat ga naptang! Titot eba alang Ila Kakani uniap ula kiro noun. Eba makosarang irap nuo ga eba sapsapmeng, ga eba tale puonang meba agimanang lalabie a efan ga eba ila puoieng ira ma non lap tubiat.” Tiesong Paulo gare ro, are ratmat ga talet kagat paga gare uvau ga arubu la lialuam irap a, ga tale gat puoong meba agimaang paga ba. Tie, man ui tapmat ga man marikong me teip meba miarim kilalap a ga asingmaiala o alang.  
\v 12 Urie, Sesias Paulus la agimaong iruo paga la betong ga turupuaba me urio bais ula mumuru la tiesliong a Ila Kani. Are ratmat ga naganong ira Ila Kakani.   
\s1 Inamaniap onim Pisidia la lekalameng Apostolopien  
\p
\v 13 Urie, Paulo ga migapien angan la omaiolai taun Pefos ga tegomeng bo non sip ga mela na taun Pega na provins Pamfilia. Pa Ioanes, meiva Marko la leulai tie ga ina terigiong me Ierusalem.  
\v 14 Tie oulai Paulo ga Banabas na taun Pega ga linum ga betliong na pianam ula kakanu Antiok na provins Pisidia. Ga na la o sabat, lila na luguan o usingnualap maiang Iudaiap ga lionama.  
\v 15 Pa teip mila uke me luguan o usingnualap maiang Iudaiap la mavasmeng non tiesiap la maiot na babam ang Moses ga non tiesiap la maiot na babam maiong unulip. Ga na tara la no uvas na Babam ula puaru, asagameng non migana ga ula leulo gare ro, “Leba mame ba papapien pangan ga mamaning ties meba mangangasmang dalap ma teip ga magaulap, tie mumong ga maramang.”   
\p
\v 16 Are ratmat ga teuara Paulo ga dusong ga aratugusong kilan a me nakap ga atitirong pa teip ga magaulap la mapamumeng nanamup ma ga maionama ga alongmeng. Tie, ugama, “O mimi teip onim Israel, ga mimi non teip la tale onim Israel pa mime omiuluan ties ang Morowa ga mime lotu me ai, mimi ganam le miptang!  
\v 17 Tinan Morowa maiang garip onim Israel la mavuoong eap buam ga makosarong meba betmeng gare garip am. Ga tubiat na tara la omaiolai lakuan maiong ga mela maionama na kantri Isip gare teip mila kibangam, mangangasong Morowa ga betong gar ila kani ma teip ga magaulap. Ga iro kukunim ang ula kanu la malagiong inamaniap onim Israel na kantri Isip ga omaiolaing ga mela na pianam maiong.  
\v 18 Ga na tara la menum na pianam la karuk ma inamaniap una, mime makosar tavukup mila kiram, puoieng ira ma 40 ma karaip. Ga giginam dalap a Morowa, ga tale maulai pa ume maset uale mabuo.  
\v 19 Pa na tara la mela na kantri Kenan, makiraraong gamura ma garip ma inamaniap na uriro kantri ga ualo urie kimanam maun inamaniap onim Israel. Miruo ubiap ganam la betmeng, na karaip gare 450.  
\v 20 Tie, miruo la nam ara, tie tubiat Morowa la mavuoong non teip ga uabua kaguma ira ma meba umaialeng mabuo inamaniap onim Israel, muio puoieng na tara ang unuli Samuel.  
\v 21 Pa ana irie tara Israelip la nameng migat aime orong ba meba ualeng mabuo. Are ratmat ga avuoong Morowa Sol ga uabua ga unama gare orong maiang Israelip. Sol la irie poi ang Kis, irie migana onim na gar ang Beniamin. Ga uale mabuo Israelip gare orong maiang, muio puoieng gare 40 ma karaip.  
\v 22 Pa tubiat la makosarong orong Sol tavukup mila kiram. Are ratmat ga Morowa la apukutuara Sol ga uabua Devit meba irie ba orong. Ira iruo Devit, tiesong Morowa gare ro, ‘Agimarung Devit, poi ang Iesi ga teruba maset aime tavuk ang. Irirot migana, irie la eba maset mauluan agarip tuam ganam ga itamum maset.’  
\v 23 Ga uabu ties o mida tinan ga ugama, ‘Kabirana ma garip maiam eap am orong Devit, eba tabung kaguma ira non migana meba ina malagiang Israelip ga makosar ang maset.’ Tie, tubiat la ovaikong mulinim o urio ties. Morowa la uala ra iruo migana la eba ina bulagiang Israelip, Irie Iesu.  
\v 24 Na tara la tale ka puaro Iesu ubi ang uakap kabirana buo, Ioanes la man baisong ara me mai garip onim Israel. Ugama, ‘Mialam ibup mi ira ma tavukup mim mila kiram ga marigiming dalap mi me ai Morowa. Ga omila nuvietiap.’  
\v 25 Pa na tara la namo no ba urio ubi la ualo Morowa aun Ioanes, maulo Ioanes gare ro, ‘Tiesong Morowa a iruo migana leba muong, pa agatming la miga tiesong toime, a? Pa tale turuo irie migana. Karuk migat! Pa miptang! Non migana la eba auluan me rulam. Tale puorung meba okosartang tatak ubi ba agarit meba agaralie. Karuk kan maset!’ Tiesong Ioanes are ratmat.   
\p
\v 26 “Are ratmat ga mimi papap tuam ganam, mimi inamaniap onim na gar ang Abraham, ga mimi teip la tale onim Israel la mime mipto ties ang Morowa ga lotuming me ai, mimi ganam le miptang! Iro urio ties la asagaong Morowa iruo migana ga muo meba ina bulagiang, iruo ait la muo bui ga bupta ra.  
\v 27 Pa teip onim Ierusalem ga teip maiam mila meke la tale ameit irio migana ga tale arakimeng Iesu irie aga. Mirie la mime ovas ties maiong unulip na Babam ula puaru ma mirier lap o aganuliap, pa tale omeit maset muana o uriro ties. Are ratmat ga maiabua Iesu na ties ga avuremeng o ties meba aving. A nat iruo tavuk, mirie kan la ovuomeng ties maiong unulip ga iario mulinim.  
\v 28 Tale kan omaiop kirinim ba la okosarong Iesu, puoieng meba menamung ga aving. Pa amarikmeng maranit primia Pilato ga keula meba menamung Iesu ga aving.  
\v 29 Are ratmat ga asopmeng iro maiogun ga uvara. Ga tubiat la avikmeng iro maiogun ga meinia me lourup ga mela memua na una. Met iriro tavuk, betmeng migat mirier tiesiap ganam maiam unulip la mamirmeng aime Iesu tinan.  
\v 30 Pa ina gat imua Morowa na una ga inim.  
\v 31 Tie, tubiat papot ma lap la tevaikong Iesu mai inamaniap la menum tinan ga irie na provins Galili ga mela toma Ierusalem. Are ratmat ga titot la man baismeng gat o ties a Iesu me buun Israelip.  
\v 32 Ii gat la ovaiking ties o mida tinan la okosarong Morowa me maun eap buam.  
\v 33 Ga imua Iesu na una meba opuoang urio ties o mida la ovaikong ara me buun gar ma eap maiam onim tinan. Uro ties la tiesong Morowa aime Iesu, umirmeng na lama narain Sam na Babam ula puaru gare ro,  
\q1 “‘Nunuo Poi ruang. Titot la bettung gare Ira nuang.’ \rq Sam 2:7\rq*   
\p
\v 34 “Tie, Morowa la ina imua Iesu na una meba tale isam ba neip a. Karuk kan! Met iriro, umirmeng na Babam Ula Puaru gare ro,  
\q1 “‘Eba akosartang tavuk ila mumuri ira mi ga eva, eba talang ugiginara miun, gare tinan la okosartung ties o mida me aun Devit.’ \rq Aisaia 55:3\rq*  
\p Leba tale are ba rie, tie tala kan midaong Morowa meba tale aving migana ba.   
\p
\v 35 “Are ratmat ga iro non ties maime neip a Iesu la tala kan isam, umirmeng na non Sam gare ro,  
\q1 “‘Neip a migana ila babai o ubi la tala kan nuairam agarit na una meba isam ba.’ \rq Sam 16:10\rq*   
\p
\v 36 “Ira irio Devit, na tara la man inim ka, ouluan ties ang Morowa ga uario ubi o unuleap bo teip ga magaulap am. Ga tubiat irie la uvara ga maiabuam neip a na una kaunat gare neip maiam eap am, ga isam neip a.  
\v 37 Pa iriro Iesu, irie la ina imua Morowa na una, neip a la tale kan isam.  
\v 38 Are ratmat ga mimi papap tuam, paramo ties me miun gare ro, “Leba migana ba la naganong ira iruo migana Iesu, eva, eba oduratang Morowa urie kirinim ang. Are ratmat ga titot la asagaong Morowa iruo ait ga muo mi.  
\v 39 Miptang, maimai ang Moses la tale puoieng meba oduratieng kirinim ming, meba mimi ba teip mila puvuvum na irap a Morowa. Karuk migat. Pa leba naganming ira irio migana Iesu, eva eba oduratang Morowa kirinim ming gano, ga eba mievang teip mila puvuvum.  
\v 40-41 Umirong non unuli na Babam ula puaru gare ro,  
\q1 “‘Mimi inamaniap la mime oguek ties, miptang! Titot la eba akosartang non ara paga ga eba  
\q1 betang kabirana mi. Ga leba agimaang migana ba iruo paga la akosartung ga mialava a irio paga, tie agatming ka irio paga la are ties o kakarabunim. Are ratmat ga eba agimaming tubiat ga turupmiaba ga mila na iou.’ \rq Habakuk 1:5\rq*  
\p “Are ratmat ga temamalienming maset meba tale betang iriro paga ira mi.”  
\v 42 Urie, Paulo ga Banabas la teliara ga liura me lavie na luguan o usingnualap, ga lemelo gare ro, “O urian non la o sabat, eba ina gat mumang ga baismang o urie ties meba ina mepaptang.”  
\v 43 Ga na tara la no nebola, man lemeuluan papot ma Iudaiap ga teip la tale onim Israel la ameuluan tavuk o lotu maiang Iudaiap. Non ma la mirie Iudaiap pa non ma la tale Iudaiap, mirie la man lemeuluan. Paulo ga Banabas la man paseiliong ga mirie ga mangangasliong dalap ma meba maiaring maranit ubonuvarap ang Morowa.   
\p
\v 44 Urie, na tara la betieng la o sabat, namurit wik tubiat na taun Antiok, karagat it mirie teip ga magaulap ganam onim na urie pianam la mumaio nebolameng meba meptang ties ang Ila Kani.  
\v 45 Pa tara la agimameng Iudaiap iriro gar ila kani ma teip ga magaulap, kiram dalap ma maset. Ga man oguekmeng ties ang Paulo ga man opukemeng.  
\v 46 Pa Paulo ga Banabas la tale kan lirau maime, pa tiesliong maranit me ira ma gare ro, “Lake la baising o ties ang Morowa me miun Iudaiap, pa oguekming urio ties, gare mimi kan la tiesming, ‘Tale napang meba parang ninimiap la iot atatan makin.’ Are ratmat ga miptang, titot eba gat tale baising o ties me miun. Pa ebat baising o ties ang Morowa me maun non garip la tale onim Israel.  
\v 47 Memani, tiesong Ila Kani aime migana ang o ubi gare ro,  
\q1 “‘Eba nokosartang ga eba betnang gare ba lalabie maiang mirier kantrip, ga eba maganalie teip ga magaulap onim na mirier napup ganam o kimanam, ga eba ina malagirang.’” \rq Aisaia 49:6\rq*   
\p
\v 48 Tie, tiesliong are ro ga teip ga magaulap la tale mirie onim Iudaia la mepto urio ties ga temeba maset me ties ang Ila Kakani ga ovienmeng bonim a. Ga mirier teip ga magaulap ganam la maiteong Morowa meba omela ninimiap ula iot maset atatan makin, miruo teip ga magaulap la naganmeng iro ties ang Ila Kakani.  
\v 49 Ga baismeng o ties ang Morowa ga ila tomat na mirier napup na irio distrik.  
\v 50 Pa Iudaiap la man mimuam dalap ma teip mila uke na uro pianam ga magaulap la memanim bop mila kakanim la mime ameuluan tavuk o lotu. Are ratmat ga miruo teip ga magaulap la man akirarameng Paulo ga Banabas ga lekalameng na urio distrik.  
\v 51 Urie, teliara ga abalila kanauri o kimanam na kibap lie na irap ma teip ga magaulap meba meira mirie kan la memaning sik me irio tavuk maiang. Ga oliolai urie taun Antiok ga lila na taun Aikoniam.  
\v 52 Pa Muranama Ila Babai la dakong ira ma teip ga magaulap onim na provins Pisidia la naganmeng ira Iesu, ga temeba kan maset.   
\c 14  
\s1 Paulo ga Banabas la baisliong na pianam ula kanu Aikoniam  
\p
\v 1 Urie, Paulo ga Banabas la lila betliong ga liobu na luguan o usingnualap maiang Iudaiap onim Aikoniam gare tie la lime okosar. Ga baisliong maranit o ties ang Ila Kani. Are ratmat ga papot ma teip ga magaulap onim Iudaia ga Grik la naganmeng maranit ira Ila Kani.  
\v 2 Pa non Iudaiap la oguekmeng ties ang Ila Kakani ga man mavuremeng dalap ma non teip ga magaulap la tale onim Israel meba nekaromela ga ekelesiap.  
\v 3 Pa met iriro muana, Apostolopien la lionama a tara ila laklage na taun Aikoniam ga tale lirau ume nekaronulap maiong. Karuk. Mamaranin la man baisliong o ties o ubonuvarap ang Ila Kakani. Ga Ila Kakani la ualo kukunim ang kan liun, ga puoliong meba makosarliong non ara non ara kagup ga pagap o turupnuabap ga masingliala o ubonuvarap ang Ila Kakani urie la migat o.  
\v 4 Are ratmat ga teip ga magaulap onim na urie taun la netaratmeng me na narain garipien. Mirie la narit dalap ma ga Iudaiap pa mirie la narit dalap ma ga Apostolopien.  
\v 5 Pa non garip la tale onim Israel ga non Iudaiap ga teip mila uke la temaiara ga namo lekirarameng Apostolopien. Ga namo levuremeng ma tadasip ga menamungan, ga living.   
\s1 Paulo ga Banabas la baisliong na pianam ula kanu Listra  
\p
\v 6 Pa lipto ties maiong la namo lekirarameng. Are ratmat ga igoliong me na taun Listra ga na taun Debi na provins Likonia. Ga lila gat mana mirie pialap ganam la maiot tapmat kagarat li litiro pialapien.  
\v 7 Ga baisliong o bais ula muru ang Iesu me mai teip ga magaulap.  
\v 8 Pa na taun Listra, non migana la unama, kibapien a la kiran, na tara la avarangeieng naga ang. Are ratmat ga tale kan ume dus o unum, pa umet unama tie.  
\v 9 Pa o non la papot ma teip ga magaulap la nebolameng, ga baisong Paulo me mai. Tie, iruo migana la kiran kibapien a, la man unama tie ga man upto ties ang Paulo. Pa maranit ui Paulo ga agimaong iruo migana la naganong ira Iesu, are ratmat ga puoong meba lemuriraang Iesu kibapien a.  
\v 10 Are ratmat ga tiesong Paulo maranit, ugama, “Tenara ga puvut dusnang lie kibapien nuo!” Tie, iruo migana la tekoong ga teuara ga unum.   
\p
\v 11 Urie, irio paga la akosarong Paulo ga papot ma teip ga magaulap la agimameng ga kukupmeng maranit o ties onim lakuan maiong Likoniap ga tiesmeng gare ro, “Teivuo, morowap la betmeng gare migana ga mumaio lourup ga maionama kabirana buo.”  
\v 12 Pa teip ga magaulap la agatmeng Banabas la nepuoong gare muranama a natauan morowa maiang are ratmat ga meiva Sus. Pa agatmeng Paulo la nepuoong gare natauan migana o bais, are ratmat ga meiva Hemis.   
\p
\v 13-14 Urie, luguan ila kani o lotu ang morowa o kakarabunim Sus, irie la dusong lavie o urie taun. Ga miridai la ume uale bo luguan ila kani o lotu, irie ga inamaniap na urio pianam la mela maiaviam bulmakaup ga guriep mila mumurum ga mumaio kagarat a tabuna o urie taun. Memani, iruo unuli ga mirie inamaniap la namo Paulo ga Banabas la lirie morowapien. Are ratmat ga nameng meba menamum bulamakaup meba meburungan bo kit ga okosarmeng kamniap me liun. Pa Apostolopien, Banabas ga Paulo, la liptam non inamaniap la man mamelo non inamaniap la namo eba okosarmeng kamniap me liun. Are ratmat ga turupliaba migat, ga kikisliong migat meba meivangan o uriro bonim a morowa. Are ratmat ga akosarliong tavuk maiang Iudaiap ga magiritliong burap liam. Ga ibirliong ga lila kabirana ma teip ga magaulap ga dusliong ga kupliong maranit.  
\v 15 Ligama, “O mimi teip ga magaulap, memani ga okosarming gare rie? Ii la teipien it gare mimi! Muiot meba ovaiking bais ula muru ang Morowa me miun meba mialam ibup mi ira ma miruo morowap ganam o kakarabunim, ga terigiming me ai Morowa migat. Memani, iriet namurit Morowa la ame ninimiap la iot maset atatan makin ga okosarong panbinim ga kimanam ga pirom ga mirie pagap ganam la maiot mana.  
\v 16 Eva, tinan la uairam garip ma teip ga magaulap ga mameuluan tavukup maiam na nunamap maiong. Migat tinan la uairam ga okosarmeng gare tie.  
\v 17 Pa tale kan teuri Morowa. Karuk. Man tevaikong mai inamaniap meba ameira irie la unama busit, ga ume makosar tavukup mila mumurum ira mi. Ume uala afarat na panbinim ga ume makosar parakiap meba piram ba na tara maiang. Met iriro tavuk, ume ualam papot ma paparakiap miun ga mavurarong dalap mi o tenubap.”  
\v 18 Paulo ga Banabas la tiesliong gare ro, pa teip ga magaulap la mitara mamaranim la namo maialang kamniap me liun. Are ratmat ga man tiesliong maranit maime, tie tubiat meairo urie agat maiong ga tale gat namo maialang kamniap liun.   
\p
\v 19 Urie, na tara la lionama ka na taun Listra, non Iudaiap onim na taun Antiok na provins Pisidia ga non Iudaiap onim na taun Aikoniam, la mumaio betmeng na taun Listra. Ga mavuremeng dalap ma papot ma inamaniap onim na urie pianam meba nekaromela ga Paulo ga Banabas. Tie, na tara la agimameng Paulo, avuremeng ma tadasip ga menamua, ga ulum ga ut lourup. Are ratmat ga agatmeng namo ga uvara ra, urie merana me lavie na taun ga maiaira tie ga mela.  
\v 20 Pa na tara la mumaio dusmeng ekelesiap ga akurmeng, teuara Paulo ga dusong ga mena me na urie pianam ga mela durimeng tie. Tie, kalup parabira Paulo ga Banabas la oliolai taun Listra ga lila na taun Debi.   
\s1 Ina terigiong Paulo ga Banabas me Antiok na provins Siria  
\p
\v 21 Urie, na taun Debi baisliong Apostolopien o bais ula muru ga papot ma teip ga magaulap la naganmeng ira Iesu. Ga tubiat ina terigiliong me na taun Listra ga taun Aikoniam ga na taun Antiok na provins Pisidia.  
\v 22 Na tara la lila na miruo pialap, man mangangasliong dalap ma ekelesiap ga tiesliong gare ro, “Papot ma giginanimup la eba betmeng ira buo ga eba buavim miruo giginanimup ganam, pa tubiat eba ina bulagiang Morowa ga ualeng bubuo na inamon ang. Are ratmat ga dusming maranit iro nagan ira Iesu.”  
\v 23 Ga mana lotup na miruo pialap ganam narit narit, Apostolopien la liabua kaguma ira ma teip mila uke. Are ratmat ga na tara la fenmeng me parak ga okosarmeng marik me ai Ila Kani liabuam na kilalap a Ila Kakani meba mangangasang miruo teip mila uke ga eba ualeng mabuo.   
\p
\v 24 Tie, lila kabirana o provins Pisidia, ga lila betliong na provins Pamfilia.  
\v 25 Ga na urie provins, baisliong o ties ang Morowa mai teip ga magaulap na taun Pega. Ga tubiat lila na taun Atelia.  
\v 26 Pa na urie taun, osauliong sip, ga iavian sip ga lila, ga lila, liva labinim na provins Siria, na taun Selusia. Urie, oliolai sip ga oliuluan alang ga linum me toruan nakap ga lila betliong na taun Antiok na provins Siria. Tinan ekelesiap onim na urio taun Antiok la maiabuan liruo teipien o ubi na kilalap a Morowa ga lesagameng meba okosarliong ubi ang. Okosarliong ara urio ubi, tie titot inar terigiliong me na urie pianam.   
\p
\v 27 Urie, terigiliong ara ga mamarikliong ekelesiap ga nebolameng. Ga malilo ma mirier ubiap la makosarong Morowa na kilalap lie ga are mani ga unavam Morowa dalap ma teip ga magaulap la tale onim Israel, ga naganmeng ira Iesu.  
\v 28 Ga man lionama ka ga miruo ekelesiap onim na taun Antiok, muio puoieng ira ma papot ma lap.   
\c 15  
\s1 Teip mila uke o lotu la nebolameng Ierusalem  
\p
\v 1 Na irio tara, non inamaniap onim na provins Iudaia la mumaio betmeng na taun Antiok na provins Siria. Ga man masingmaiala ekelesiap la gare ro, “Maimai ang Moses urie la busingiala a tavuk o kasau. Pa leba tale omiuluo urio maimai ga tale mikasaumeng, eva tale puoong Morowa meba ina milagiang.”  
\v 2 Urie, giginam dalap a Paulo ga Banabas me urio usingnualap maiong, ga tiesliong o danunumiap ga mirie meba ovuvutliling ties. Are ratmat ga ekelesiap onim na taun Antiok la nebolameng ga avuvuomeng Paulo ga Banabas meba mela na taun Ierusalem ga mamarikliong Apostolop ga teip mila uke o urio ties o danunumiap. Tiesmeng are ratmat ga maiabua Paulo ga Banabas ga non inamaniap gat.  
\v 3 Ekelesiap onim na taun Antiok la masagameng miruo teip ga mela. Mela kabirana o provins Fenisia ga Samaria na alang la ila Ierusalem. Pa mangangasliong dalap ma ga mamelo gare ro, “Papot ma inamaniap la tale onim Israel la marigimeng dalap ma me ai Ila Kakani, ga naganmeng ira a.” Tie, mepto ekelesiap uriro ties ga tevurusmeng migat.  
\v 4 Urie, mela ga betmeng na taun Ierusalem. Ga malagimeng maset ekelesiap onim Ierusalem ga Apostolop ga teip mila uke ga akosarmeng tavuk ila muri ira ma. Ga tubiat Paulo ga Banabas la malilo ma mirier ubiap la makosarong Morowa na kilalap lie.  
\v 5 Pa non ekelesiap a gar maiang Parasaiop la temaiara ga tiesmeng maranit gare ro, “Leba non ba migana la tale onim Israel pa naganong ira Iesu, tie mumuru le akasaumeng ga mauluan maimaiap ganam am Moses.”   
\p
\v 6 Ga liruo narain agaripien la liot kabirana ma ekelesiap, are ratmat ga Apostolop ga teip mila uke la nebolameng ga man ovuvutmaiara uriro giginanim.  
\v 7 Man mavaikmeng papot ma agarip ga papot ma tiesiap, pa karuk kan ma namurit dalap la betong ira ma. Are ratmat ga teuara Petro ga dusong ga maulo gare ro, “O mimi papap tuam, tinan la tovuvuoong Morowa kabirana mi ga ualo ubi toun. Ga tuptuaro ubi o uruo bais ula muru me maun non teip ga magaulap la tale onim Israel gare Konilias ga numeilup am, meba meptang urio ties ga naganmeng ira Iesu.  
\v 8 Pa Morowa la ume ogima agat maiong ga uala Muranama Ila Babai maun, aret tinan la uala Muranama buun. Are ratmat ga pasinguala Morowa la naong maime gat.  
\v 9 Me iriro tavuk ang, bira bubuo ga mirie la tale non ara na irap a Morowa. Karuk. Ume bubouvara bubuo teip mila kiram ga namo oduratang kirinim buong meba bubabaim ba na irap a. Aret tie, leba non migana la tale onim Israel, pa naganong ira Iesu, tie eba oduratang kirinim ang ga babai ba na irap a.  
\v 10 Pa iruo tavuk o unuluap o maimai gano ang Moses, urie la mitara gigino, gare tadas ila kani. Pa tinan eap buam la namo mimerang meba maiaving urio giginanim ula kanu, pa tale puomeng meba maiaving. Tie, memani ga titot la miga miabung urio giginanim ula kanu nakap bo barap ma ekelesiap la tale onim Israel ga mamilo meba maiaving? Ana iruo tavuk atabo miga mimerang Morowa, a?  
\v 11 Buat okosarbuong gare tie. Karuk migat! Obit, urio ubonuvarap it ang Iesu Karisito la ina bulagiieng bubuo gar onim Iudaia. Ga uriot ubonuvarap la ime malagi teip ga magaulap gat la tale onim Israel.” Tiesong Petro gare ro.   
\p
\v 12 Tie, miruo inamaniap la tale kan pakmeng nanamup ma, tara la mepta Banabas ga Paulo. Ga malilo a Morowa la makosarong kagup onim na panbinim ga pagap o turupnuabap kabirana ma non garip la tale onim Israel.  
\v 13 Tie, na tara la oitliamu ra ties liong, tie ina bun tiesong Iemes, irie papa ila kapi ang Ila Kani Iesu, tiesong gare ro, “O mimi papap tuam, miptang ties tung.  
\v 14 Petro la miulo ra are mani ga ina malagiong Morowa non garip la tale onim Israel na natauan tara ga makosarmeng meba betmeng gare gar ang migat.  
\v 15 Pa ties gat maiong unulip onim tinan la nepuoieng it gare ties ang Simon. Umirmeng na Babam ula puaru gare ro,   
\q1
\v 16 “‘Ila Kakani la tiesong gare ro, “Tubiat, eba ina oidangtang urio inamon ang Devit la kiro ra. Eba mavuvuttaling napup maiam pagap ganam la kiribasmeng ara, ga eba teraling uriro inamon ga eba ina dusieng maset.  
\v 17 Eba okosartang gare ro ga eba man tomaioping inamaniap onim Israel la makalameng ga inamaniap gat la tale onim Israel ga eba betmeng inamaniap tuam.’ \rq Amos 9:11-12\rq*   
\p
\v 18 “Migat, ira ma miriro midaiap la makosarong Ila Kani, tiralo kan la tiesong Morowa ma miriro pagap.’  
\v 19 Aret tie ga eba miralava o agat tung: Buat buabu giginanim mabuo miriro ekelesiap la tale onim Israel. Karuk.  
\v 20 Pa mumuru le omirbuong babam ba me maun ga mabulava gare ro, ‘Buat miom ma pagap la akosarmeng teip lavang ma memai morowap o kakarabunim, memani miriro la papalim na irap a Morowa. Ga buat akosarming tavuk o sadak. Ga buat miom nganeip la meburiam kakongup ma ga mevara. Ga buat miom olabuap ma nganeip.’ Omirbuong urio ties me maun.  
\v 21 Memani, tiralo kan ga puoieng titot, ame non teip la mime osingmaiala maimai ang Moses na mirier pialap ganam. Ga ma mirier lap o sabat la mime ovas ties ang tapma na luguan o usingnualap maiang Iudaiap. Are ratmat ga omeit ara maset.” Tiesong Iemes gare ro.   
\s1 Babam la ila maun ekelesiap la tale onim Israel  
\p
\v 22 Tie, Apostolop ga teip mila uke ga ekelesiap ganam onim Ierusalem la meburio ties meba levuvuomeng narain ba teipien kabirana ma ga lesagameng me Antiok ga Paulo ga Banabas. Are ratmat ga maiabua kaguma ira Iudaias, non bonim a Basabas. Ga maiabua gat kaguma ira Sailas. Liruo teipien la teipien lila like maime ekelesiap.  
\v 23 Ga omirmeng non babam ga maialo maun mirie teip la namo mela na taun Antiok Tiesieng uriro babam gare ro,  
\p “Pava Apostolop ga teip mila uke la osagapang ‘la ula muru’ me miun papap pam la tale onim Israel: Ekelesiap onim Antiok ga ekelesiap onim na non napup na provins Siria, ga ekelesiap onim na provins Silisia gat.  
\v 24 Papto non ties gare ro, Tinan non teip onim na gar pang la mela mi ga tiesmeng ma non tiesiap. Pa miruo tiesiap la makirarameng dalap mi, ga mimiop papot ma giginanimup na agarip mim. Pa tale kan masagapang ga mela mi. Karuk. Mirie kan la mela ga okosarmeng gare tie.  
\v 25 Are ratmat ga namurit dalap pa ga paburio ties me iruo paga ga pabua kaguma ira lie narain papapien pangan ga lesagapang me tie mi Banabas ga Paulo la mitara pame na maset lime.  
\v 26 Eva, lime ubi maranit meba ovienmeng teip ga magaulap ganam bonim a Iesu Karisito Ila Kakani buang. Are ratmat ga lekirarameng ga kagarat meba living. Pa tale lime lirau me karorap. Karuk. Busit la lime bais o bais ula muru a Iesu.  
\v 27 Are ratmat ga eba asaga pang Iudaias ga Sailas ga eba muliong mi, ga eba angangasliong muana o uriro babam na nanamup lie ga eba mira maset.  
\v 28 Tie, Muranama Ila Babai la unama ga pava ga paburio ties meba tale palang giginanim ula kanu miun. Karuk.  
\v 29 Pa buat miom nganeip la akosarmeg teip lavang me mai morowap o kakarabunim, iriro tavuk la papali na irap a Morowa. Ga buat miom olabuop ma nganeip. Ga buat miom nganeip la meburiam kakongup ma ga mevara. Ga buat makosarming non ara non ara tavukup o sadak. Leba tale makosarming miriro tavukup gare tiro, tie eba mionang maset na irap a Morowa.”   
\p
\v 30 Urie, ekelesiap onim Ierusalem la masagameng mirio nagala ma teip ga mela betmeng na taun Antiok na provins Siria. Ga mamarikmeng ekelesiap meba nebolameng ga mirie, urie maialo urio babam maun.  
\v 31 Ga teip ga magaulap la ovasmeng ga temeba la maiaro urio ties ula muru meba mangangasieng dalap ma.  
\v 32 Iudas ga Sailas la lirie unulipien. Are ratmat ga man baisliong ma papot ma tiesiap me maun ekelesiap ga man mangangasliong dalap ma.  
\v 33-34 Tie, lionama a tara ila laklage kirat, ga tubiat ekelesiap onim Antiok la legiginarameng o ties a malina ga lesagameng ga ina terigiliong me mai inamaniap onim Ierusalem. Pa oigorula Sailas agat ang ga tale ula ga mirie.  
\v 35 Pa Paulo ga Banabas la lionama Antiok. Ga man ubiliong ga papot ma teip o ubi. Ga iat man masingliala teip ga magaulap ga baisliong o bais ula mumuru a Ila Kakani Iesu Karisito.   
\s1 Paulo ga Banabas la neunliala  
\p
\v 36 Urie, aipmeng ara non lap, tie teuara Paulo ga aulo Banabas gare ro, “Ina terigibing me na mirie pialap tinan la bila mana ga man baisbing o ties ang Ila Kakani, ga magimabing papap ga loup bim na miriro pialap meba mabira titot nunamap maiong la are mani.”  
\v 37 Tie, aulo ra Paulo Banabas, are ratmat ga namo alagiang Banabas Ioanes Marko meba lila ga irie.  
\v 38 Iro migana Ioanes, irie la leulai na provins Pamfilia ga ina terigiong me Ierusalem. Ga tale ituamu ubi ga litie. Are ratmat ga tale kan teuba Paulo meba alagiliong ga lila ga irie. Karuk.  
\v 39 Pa nevureliong o ties kirat ga neunliala. Are ratmat ga Banabas la alagiong Marko, ga lila todang na taun Selusia ga tegoliong bo non obinam ga lila na ailan Saipras. Ga man mangangasliong ekelesiap.  
\v 40 Pa Paulo la alagiong Sailas. Ga na tara la namo lila, ekelesiap onim Antiok la marikmeng me ai Morowa meba leboaving ga lesagameng ga lila.  
\v 41 Ga linum mana papot pialap na provins Siria ga na provins Silisia, ga man mangangasliong dalap ma ekelesiap onim na mirier pialap ganam.   
\c 16  
\s1 Alagiong Paulo Timoti ga lila  
\p
\v 1 Urie, Paulo ga Sailas la lila betliong na taun Debi ga na taun Listra. Pa tie Listra non ekelesia ila migana la unama, bonim a Timoti. Naga ang la urie onim Iudaia ga urie gat la ekelesia ieng. Pa mamo ang Timoti, la irie onim Grik.  
\v 2 Pa ekelesiap onim Listara ga onim Aikoniam la mime ties gare ro, “Timoti la irie ekelesia ila mumuri.”  
\v 3 Paulo la upto urio gas a Timoti ga naong aime meba ala ga irie. Pa Iudaiap onim na irie nap la ameit mamo ang Timoti irie onim Grik ga tale kan akasauong poi ang. Pa Paulo la tale naong me Iudaiap meba kiram ba dalap ma lime ga maialam ibup ma iro bais ula muru. Are ratmat ga alagiong Paulo Timoti ga akasauong. Tie, tubiat ula bat Timoti ga Paulo ga Sailas.  
\v 4 Mela betmeng na papot ma pialap mila kanim ga maialo ties maun ekelesiap. Uriro ties la meburio tinan ga Apostolop ga teip mila meke onim Ierusalem, meba omeuluan.  
\v 5 Are ratmat ga nagan maiong ekelesiap la mamaranu ira Ila Kakani. Ga ma mirier lap ganam papot ma teip ga magaulap gat la man mepto ties ang Iesu, aret tie ga uvas ma ekalesiap la man iaba me nakap ma mirie lap.   
\s1 Agimaong Paulo migana onim Masedonia na kikiritniap  
\p
\v 6 Urie, Paulo ga Sailas ga Timoti la namo mela baismeng mai teip ga magaulap onim na provins Esia. Pa Muranama Ila Babai la mabunakong. Are ratmat ga menum ga mela na provins Frisia ga provins Galesia.  
\v 7 Ga mela todang na taralap o provins Misia. Ga namo mela na provins Bitinia. Pa Muranama a Iesu la tale uairam meba mela na irie nap.  
\v 8 Are ratmat ga ina menum ga mela na provins Misia ga mela betmeng na taun Troas.\f + \fr 16:8 \ft Ga na irie tara Lukas gat la unama na taun Troas. Ga na tara la betmeng ga nebolaong ga mirie.\f*  
\v 9 Ga na tara la maionama tie, urie arubu agimaong Paulo non paga na kikiritniap. Agimaong non migana onim Masedonia la dusong ga amarikong Paulo ga ugama, “Paulo, orupnaba pirom ga munang na provins Masedonia ga paganalie!”  
\v 10 Agimaong ara Paulo iruo paga ga paulo a. Tie, kakalait oisinpang sip ba ga pala na provins Masedonia. Memani, pira Morowa la pamarikong meba pala baispang o bais ula mumuru ang Iesu me maun inamaniap onim na provins Masedonia.   
\s1 Lidia onim na taun Filipai la naganieng ira Iesu  
\p
\v 11 Urie, tegopang bo non sip ga okabanpang taun Troas ga pala arakin a ailan Samotreas ga duripang tie. Tie, kalup parabira, ina paiap sip ga pala betpang na taun Neapolis.  
\v 12 Tie, opolai urie pianam ga panum ga pala betpang na taun Filipai. Uriro pianam la urie taun ula kanu na provins Masedonia. Tinan, masagaong gavaman non teip onim Rom ga mime umaiale ubuo uriro pianam. Ga ponama una urio pianam, muio puoieng ira ma non lap.  
\v 13 Na la o sabat, pala peura na tabuna o kudat o urio taun ga pala todang na taralap o pirom meba apoping nap la mime marik Iudaiap me ai Morowa. Pala na irie nap ga magimapang non magaulap la nebolameng ga man maionama. Tie, ponama ga tiespang ga mirie.  
\v 14 Pa kabirana ma mirio magaulap, non magabun la ionama, bonim o Lidia. Uriro magabun, urie la onim na taun Taiataira, pa muio ga ionama na pianam Filipai ga ime okosar butamat ieng o usaga ma burap mila taktogim. Ime ipto ties ang Morowa ga lotuieng me ai. Tie, na tara la baisong Paulo o bais ula muru ang Ila Kakani, unavam Ila Kakani dalap o ga oira muana o uriro ties ang Paulo.  
\v 15 Are ratmat ga Lidia ga numeilup iam la naganmeng migat iro bais ula muru ang Ila Kakani, are ratmat ga omela nuvietiap. Tie, pailo Lidia gare ro, “Leba agatming turuo la nagantung migat ira Ila Kakani, tie mumiong ga mionang na luguan tuang.” Tiesieng ga mamaranu ira pa meba opouluo ties ieng, are ratmat ga pala ponama na luguan iang.   
\s1 Paulo ga Sailas la maiabuan na luguan o arubu  
\p
\v 16 Urie, o non la la panum ga pala na pianam o marik la mime marik Iudaiap ira Morowa, ga obolapang non magabun na alang. Urio la magabun o ubi maiong non teip ga ame non muranama la ut una, ga ime mavaik pagap la eba betmeng tubiat. Are ratmat ga teip mila uke iam urio magabun la mime mamela papot ma kakepup iro ubi la ime okosar urio magabun.  
\v 17 Tie, pagimaieng urio magabun ga man paiuluan la man panum. Ga man marikieng gare ro, “Miruo teip la mirie teip o ubi am Morowa nakap migat, ga mime mimelo a Morowa la orangaong alang meba ina milagiang.”  
\v 18 Ime ties urio magabun gare ro ma papot ma lap. Tie, giginam dalap a Paulo migat aime tavuk iang, ga terigiong ga aulo iruo muranama ila kire gare ro, “Na bonim a Iesu Karisito ga iro kukunim ang norulo, onolaing urio magabun ga nala!” Tiesong gare ro, tie talet kagat ga oulai muranama ila kire urio magabun.   
\p
\v 19 Urie, teip mila uke iam urio magabun la ogimameng alang maiong o unulap ma kakepup la karuk ara ume. Are ratmat ga umaiat a Paulo ga Sailas ga meranan me mai teip mila uke na pianam o nebola meba maiabungan na ties.  
\v 20 Ga lelagimeng ga maialan maun iasip la umaiale ubuo ties na uriro pianam ga mamelo gare ro, “Liruo teipien onim Iudaia la man makosarliong kirinimup ira ma inamaniap na pianam buong ula kanu.  
\v 21 Ga lime masingliala teip ga magaulap ma non ara non ara tavukup la tale puomeng me bulam bubuo onim Rom meba mabuluan ga akosarbuong.”  
\v 22 Tiesmeng gare ro ga papot ma inamaniap la levuremeng o ties. Urie, mamelo iasip teip maiam la maiabua begat meba meiniam sasaip liam ga leisikmeng o karanam.  
\v 23 Leisikmeng kan kirat, ga maiabuan na luguan o arubu. Ga maialo ties ula mamaranu aun migana ila uale na luguan o arubu, meba ualeng maset libuo.  
\v 24 Tie, uptam miruo tiesiap mila mamaranim ga lelagiong ga ula uabuan na non kabin la ut tatang kan migat na luguan o arubu meba tale igoliong. Ga mavisong maranit kibap lie ma ankapup la makosarmeng ma palangip meba manemealing kibap ga maioluam maset ma senip.   
\p
\v 25 Urie, kabirana o arubu, Paulo ga Sailas la man okosarliong marik ga man puliara ma sasangip ga avienliong Morowa. Pa non teip la maionama na luguan o arubu la meptam nivunap lie.  
\v 26 Pa talet kagat ga betong murale ila kani. Ga magisgisong labinap a irio luguan o arubu ga tubiat it kirat ga menava tabup a luguan o arubu. Ga pikmeng mirie senip ga ankapup la mavismeng kilalap ma mirier teip na iriro luguan o arubu.  
\v 27 Na irire tara migana la uale abuo luguan o arubu la teuara ga magimaong mirier tabup a luguan o arubu la menava. Ga agatong namo ga iat ara igomeng teip ganam la maionama na luguan o arubu. Are ratmat ga mitara urau ga urano bainat ang ga namo kan teanamung.  
\v 28 Pa agimaong Paulo ga kupong maranit ga ugama, “Buat kan tekiraranung! Karuk. Pava ganam la iat it ponama to!”   
\p
\v 29 Urie, migana la uale abuo luguan o arubu la upta nivunama a Paulo ga marikong maime teip meba mumaiong un lalabie ba. Pa irie la ibirong me na luguan o arubu ga ula ai Paulo ga Sailas. Mitara urau ga didirong ga lekofong dadebipien a me lourup na kimanam kagarat mai kibap a Paulo ga Sailas.  
\v 30 Tie, teuara ga lelagiong ga lila lavie ga lemarikong gare ro, “O, mame teipien lila kakanin, eba okosartang mani meba ina tolagiang Morowa?”  
\v 31 Tie, alilo, “Nagannang maranit ira Ila Kani buang Iesu, ga eba ina nolagiang Morowa. Ga leba gat naganmeng numeulup nuam ira a, tie mirie gat la eba ina malagiang Morowa.”  
\v 32 Ga baisliong o ties ang Ila Kakani me aun ga me maun numeilup am ganam.  
\v 33 Ga tie kan kabirana o arubu, iro migana ila uke o unualeap bo luguan o arubu la lelagiong ga magosong buokup liam. Ga irie ga numeilup am ganam la omela nuvietiap.  
\v 34 Ga lelagiong me na luguan ang, ga ualo parak liun. Ga irie ga numeilup am la tevurusmeng maset, memani titot la naganmeng bat ira Morowa.   
\s1 Iasip la lemelo Apostolopien meba lila  
\p
\v 35 Urie, parabira masagameng iasip teip la maiabua begat ga mumaio, ga amelo migana la uale abuo luguan o arubu gare ro, ‘Eba nairangan litio teipien ga lila.’  
\v 36 Tiesmeng gare ro, urie ula ga aulo Paulo, “Osagameng iasip ties meba meviktang ga mala. Are ratmat ga mala un malina.”  
\v 37 Pa aulo Paulo gare ro, “Karuk. Memani, ii la teipien onim Rom. Timoi la tale maset mepto ties ing ga tale omeit maset man kiribas la okosaring. Pa isikmeng agarit na irap ma teip ga magaulap ga imaiabu na luguan o arubu. Pa titot atabo namot kagomering ga isagameng ga ila, a? Tale puoieng migat! Mirie kan le mumaiong ga ilagimeng me lavie.”  
\v 38 Tie, mepto teip la maiabu begat ties ang ga temiara ga mela mamelo iasip. Pa tara la mepto iasip ties a Paulo ga Sailas la litie teipien migat onim Rom, tie mitara merau.  
\v 39 Are ratmat ga mumaio iasip na luguan o arubu ga maialo ties o kadik liun ga man mamadinmeng dalap lie, ga lelagimeng me lavie. Ga lemelo meba oliolaing urio pianam ga lila.  
\v 40 Tie, aliolai luguan o arubu ga lila na luguan iang Lidia. Ga magimaliong teip la naganmeng ira Iesu ga mangangasliong dalap ma o non ties. Tie, tubiat oliolai taun Filipai ga lila.   
\c 17  
\s1 Paulo ga Sailas ga Timoti la mela ubimeng na taun Tesalonaika  
\p
\v 1 Urie, Paulo ga Sailas ga Timoti la menum ga mela betmeng na taun Amfipolis. Tie omaiolai urie pianam ga mela betmeng na taun Apolonia. Ga omaiolai urie pianam ga mela betmeng na taun Tesalonaika. Na urie pianam, ut non luguan o usingnualap maiang Iudaiap.  
\v 2-3 Na tavuk ang Paulo la ume busit akosar, uobu me tapma na iro luguan o usingnualap ga man masinguala teip ga magaulap ma tiesiap a Iesu irie Karisito. Ga man mavaikong muap ma ga ties ang la betieng la uakap gare ro, “Ira Karisito, avuoong Morowa ga tiesong a la eba muong ga aving ngitngit ga aving, ga tubiat eba ina emung. Ga mulinim ma miruo tiesiap ganam am Morowa la betmeng ara ira Iesu, titot la mirulo ma.” Ga man masinguala Paulo gare ro muio puoieng ira ma naien ma lap o aganuliap.  
\v 4 Tie, non Iudaiap kabirana ma la mepto ga naganmeng iro ties ang Paulo la migat o ga lemeuluan. Ga gar ila kakani ma teip ga magaulap onim Grik la mime lotu me ai Morowa, mirie la lemeuluan gat. Ga papot gat ma magaulap la memanim bop mila kakanim, mirie gat la mepto ties ang Paulo ga lemeuluan.   
\p
\v 5 Pa non Iudaiap la magimameng papot ma inamaniap la lemeuluan ga kiram dalap ma migat. Are ratmat ga mela malagimeng non teip mila kiram na pianam o nebola ga mepamuam papot ma teip, ga temaiara ga ofufulutmeng agat maiong teip ga magaulap onim na uro pianam. Ga mela na luguan ang non migana bonim a Ieson, meba umaiaring a Paulo ga Sailas meba lelagimeng me na ties.  
\v 6 Pa tale kan lemaiop na luguan. Karuk. Are ratmat ga mela alagimeng Ieson ga non teip la naganmeng ira a Iesu ga umaiat ma ga meranam me maun teip mila uke na uriro pianam. Ga kupmeng maranit gare ro, “Mirio teip la mime akosar tavuk ila kire na kimanam gano, miruo teip titot la betmeng ga maionama togo.  
\v 7 Pa iruo migana Ieson la malagiong ga maionama na luguan ang, ga ume uale mabuo. Eva miruo teip ganam la mime meinio maimai ang orong Kaisar. Ga mime bais o ties ang non orong, meivo bonim a Iesu.”  
\v 8 Ga inamaniap la nebolameng tie ga teip mila uke onim na urie pianam la mepto urio ties o kakarabunim, ga papamnam dalap ma me Ieson.  
\v 9 Pa gavamanip la amelo Ieson ga mirier teip la naganmeng ira Iesu gare ro, “Magamilie miruo teip ga buat gat okosarming. Are ratmat ga mimi ganam narit narit le mialam kakepup aun gavaman ga tubiat buat gat akosarming iriro tavuk.” Tie, maialam kakepup ga miairam ga mela.   
\s1 Paulo ga Sailas la lila na taun Beria  
\p
\v 10 Urie, betieng ara arubu, tie teip mila naganmeng ira Iesu la asagameng Paulo ga Sailas ga lila na taun Beria. Ga na tara la betliong ara na taun Beria, lila na luguan o usingnualap maiang Iudaiap.  
\v 11 Pa Iudaiap onim na urie pianam Beria la tale kamena gare Iudaiap onim na taun Tesalonaika. Karuk. Na tara la baisliong o bais ula muru ang Iesu, tale oguekmeng o mepto agarit. Pa nameng migat meba omeira urio ties la migat o, o karuk. Are ratmat ga mirier lap ganam la mime ovas ties na Babam ula puaru.  
\v 12 Are ratmat ga papot ma Iudaiap la naganmeng ira Iesu irie Karisito. Ga kabirana ma Grikip, papot ma magaulap la ame bop ga papot ma teip gat la naganmeng ira Iesu.   
\p
\v 13 Pa tubiat Iudaiap onim Tesalonaika la ameit Paulo la man baisong o ties ang Morowa me maun inamaniap na taun Beria. Are ratmat ga mumaio na urie pianam ga man ofufulutmeng agat maiong teip ga magaulap onim Beria.  
\v 14 Tie, akosarmeng gare tiro, tie kakalait asagameng ekelesiap Paulo me todang labinim. Pa Sailas ga Timoti la man lionama ka tie Beria.  
\v 15 Pa mirie teip la alagimeng Paulo me na alang, ga ila puoieng la betmeng na taun Atens, ga tubiat ina terigimeng me Beria. Tie, maiavio ties ang Paulo ga mela amelo Sailas ga Timoti are ro: “Kakalait mumang tobolamang.”   
\s1 Paulo la ula na taun Atens  
\p
\v 16 Tie, na tara Paulo la man auanula Sailas ga Timoti tie Atens, unum me na taun ga magimaong non ara non ara morowap maiam o kakarabunim.\f + \fr 17:16 \ft Makosarmeng papot ma tadasip mila kanim la makasimmeng ga makosarmeng uniap maiam morowap.\f* Are ratmat ga kiram dalap a me miruo pagap.  
\v 17 Are ratmat ga ula uobu na luguan o usingnualap maiang Iudaiap. Ga man tiesong ga Iudaiap ga Grikip la mime lotu me ai Morowa ga masinguala. Pa ma mirier lap ganam la ume ula na pianam o nebola gare sune ga ume ties ga teip la mime mumaio maionama na urio nebola ga ume masinguala o ties ang Iesu.  
\v 18 Ga na tara la man masinguala o bais ula muru ang Iesu la uvara ga inagat inim, non teip o agat a gar la meiva Epikurian ga a gar la meiva Stoik la man damenam o ties ga irie. Pa non teip la mepto ties ang ga tiesmeng gare ro, “Iruo migana ila buat tiesong tapmat la namo mani le aramang?” Pa non teip la tiesmeng gare ro, “Atabo namo aramang ties ma morowap onim na non pialap.”  
\v 19 Ga namo omeira maset urio ties ang Paulo, are ratmat ga alagimeng ga mela na non nap la meiva Ariopagas.\f + \fr 17:19 \ft Urie, pianam o nebola maiong teip mila uke la memaning agat ula muru la mime nebola una.\f* Ga amelo Paulo gare ro, “Urio ties titot la baisnung o ga papto, urie la non ara migat ga usingnualap gat nung ula nou paun.  
\v 20 Are ratmat ga paga apera maset muana o urio ties la nou la nume nuaramo me maun teip ga magaulap. Panalava.”  
\v 21 (Migat, ira ma mirier inamaniap ganam onim Atens, ga inamaniap onim na non napup la mime mumaio ga maionama na pianam Atens, la man maionama pa tale gat mime akosarmeng paga ba. Karuk. Pa mime na migat meba meptang tiesiap ma non ara agarip mila neim, ga mime ties kabirana ma kan ma non ara tiesiap la mime meptam.)   
\s1 Paulo la tiesong a Morowa migat la tale ameit  
\p
\v 22-23 Urie, teuara Paulo ga dusong kabirana ma Ariopagasip ga tiesong gare ro, “O teip onim Atens, tunum tapmat na pianam ming ga magimarung pagap la mime lotu me mai. Ga ogimarung labun o lavang la omirmeng ties ubuo gare ro, ‘Urio labun a lavang la ang non morowa la tale apet.’ Met iriro tavuk ming, migimarung la mitara mimamaranim migat la mime okosar lotu me mai morowap mim. Are ratmat ga titot la tuga miralava a Morowa migat la tale amit.  
\v 24 Morowa la okosarong panbinim ga kimanam ga mirier pagap ganam la meinim kabirana lie, iruo Morowa iriet namurit la ume uale bo miruo pagap ganam. Are ratmat ga tale kan ume unama na luguap o lotu la makosarmeng teip ma kilalap ma. Karuk.  
\v 25 Ga irie la tale kan ume kagesong a paga ba la akosarbuong ma kilalap buo meba agabulie. Karuk migat! Pa irie kan la ume ualo ninimiap ga ifif la bume obula, ga mirier pagap ganam.  
\v 26 Tiralo migat irie la akosarong migana ga iruo migana irie natauan ea buang bubuo inamaniap ganam. Ira iriro namurit migana, irie la makosarong mirier garip ma teip ga magaulap ga betmeng. Ga uabuam ga maionama na mirier ra napup ganam o kimanam. Irie kan la avuoong tara maiang meba maionang, ga irie la uabua gar o kimanam maiong.  
\v 27 Pa tale kan unama kakaliat buluo narit narit. Karuk. Unamat kagarat bui inamaniap, memani naong meba mumaiong teip ga magaulap ai ga ameira migat.  
\v 28 Migat, bume obula ninimiap aun ga iriet la ume ualo ngangas bun ga binim. Ovastung non ties la omirmeng non teip mim o agat ula muru gare ro, ‘Bubuo la lop am Morowa.’  
\v 29 Migat, bubuo lop am Morowa, are ratmat ga buat agatbuong gare ro, Morowa la kauna gare gol ga silva ga tadas la bume makosar ma kilalap ga o agat buong kan. Morowa la nevuoong gare miruo pagap. Karuk migat!  
\v 30 Tie, na inan tara la tale maset abit Morowa ga makosarbuong papot ma kirinimup, pa irie la kadikong me bulam. Are ratmat ga tale ualo giginanim bun. Pa titot Morowa la osagaong ties ang ga muio bun bubuo inamaniap onim na mirier napup ganam ga tiesong gare ro, ‘Mialam ibup mi ira ma tavukup mim mila kiram, ga marigiming dalap mi.’  
\v 31 Memani, ovuoong ara non la meba abum teip ga magaulap na ties na tavuk ang ila puvuvui. Ga uabua kaguma ira non migana ga irie migana la eba avuoang tavuk maiang teip ga magaulap ganam onim na kimanam. Tie, Morowa la naong me bulam ganam meba abira maset irie la aga migat. Are ratmat ga ina imua Morowa meba masingala iriet la irie Ias.” Maulo Paulo gare ro.   
\p
\v 32 Urie, mepto urio ties aime migana la ina teuara na una. Pa non teip kabirana ma la opukemeng ties ang Paulo ga megama, “Irio migana la man tiesong o kakarabunim.” Pa non teip la megama, “Tubiat o noba non la, eba ina nopaptang leba ina baisnang a iriro paga.”  
\v 33 Tie, maulai Paulo ga ula.  
\v 34 Pa non teip ga magaulap la agatmeng me ties ang la migat o ga nemiganmeng ga naganmeng ira Iesu. Kabirana ma, ame non migana la bonim a Daionisias, irie a gar ma mirio teip mila uke me Ariopagas, ga non magabun, bonim o Damaris ga non teip ga magaulap gat.   
\c 18  
\s1 Paulo la ula na taun Korin  
\p
\v 1 Urie, tubiat oulai Paulo taun Atens ga ula na taun Korin ga unama tie.  
\v 2 Pa na urie pianam la unama migana onim Iudaia, bonim a Akuila. Nebolaong Paulo ga irie ga nemigan liong. Naga ang la avarangeieng na provins Pontas. Ga tubiat ula na kantri Itali ga unama na taun Rom. Pa tubiat orong Klodias la tiesong maranit maime Iudaiap ganam meba omaiolaing taun Rom ga mela. Are ratmat Akuila ga kuala ang, bonim o Prisila la oliolai Rom ga mulio lionama Korin. Tale kan lionama a tara ba ila laklage ga a irie tara la betong Paulo na urie taun. Ga ula Paulo na luguan liang ga tiesong ga lirie.  
\v 3 Tie, Akuila ga Prisila la lime okosar butamat o ukosar ma luguap a sel ma papakip ma mamanip. Ga Paulo gat la ume okosar urio ubi.  
\v 4 Ma mirier lap o sabat, ume ula Paulo na luguan o usingnualap maiang Iudaiap, ga ume masinguala Iudaiap ga Grikip ga ubiong maranit ga man oagaulie agat maiong meba naganmeng ira Iesu.   
\p
\v 5 Na irie tara, Sailas ga Timoti la oliolai provins Masedonia ga mulio na taun Korin. Pa Paulo la oulai urio ubi ang o butamat, ga ma mirier lap ganam mamarani la man baisong. Mamarani la man ovaikong ties mai Iudaiap gare ro, “Migat, Iesu, irie Karisito.” Tiesong Paulo gare ro.  
\v 6 Pa Iudaiap la man nekaromela ga irie ga man oguekmeng ties ang. Pa maulo Paulo gare ro, “Tale kan mime mipto ties ang Morowa la man baistung o, are ratmat ga tubiat na tara la eba betieng giginanim ira mi na la lagorang, tie urie kiribas la ming kan, pa tale tung.” Ga na tavuk maiang Iudaiap, abaula kanauri la iot ira ma sasaip am meba masingala a tavuk ila kire la akosarmeng mirie kan.  
\v 7 Ga maulai miruo Iudaiap ga ula na luguan ang non migana bonim a Tisias Iastas, ga unama ga irie. Pa tale irie Iudaia, pa ume lotu me ai Morowa ga luguan ang la dusong kagarat it ai luguan o usingnualap maiang Iudaiap.  
\v 8 Pa non migana ila uke la ume uale na luguan o usingnualap maiang Iudaiap, bonim a Krispas. Irie ga numeulup am la naganmeng ira Iesu, are ratmat ga papot ma mirie non inamaniap onim na taun Korin la mepto ties ang Paulo ga naganmeng ira Ila Kakani Iesu. Ga miruo inamaniap la omela nuvietiap.  
\v 9-10 Tie, o non arubu, na kikiritniap, agimaong Paulo Ila Kakani la aulo gare ro, “Naptang! Papot ma inamaniap onim na urio taun la inamaniap tuam. Are ratmat ga tubiat eba meptang bais ula muru ga eba naganmeng ira ruo. Ga karuk kan a migana ba la puoong meba no anamung ga ama nokiraraang. Pa turuo kan la tunama ga nunuo, are ratmat ga buat nurau le baisnang o uro bais ula muru ga buat pamuieng nanam nuo. Karuk. Man baisnang it.”  
\v 11 Ila Kakani la aulo Paulo gare ratmat, ga man baisong o ties ang Morowa me maun inamaniap na taun Korin, muio puoieng iro namurit karanim ga gunamur ma ulangip.   
\p
\v 12 Urie, na tara la betong Galio gare natauan gavaman na provins Akaia, iat temaiara Iudaiap ga nekaromela ga Paulo un namurit agat. Are ratmat ga mela umaiat a ga alagimeng ga ula na ties.  
\v 13 Ga tiesmeng gare ro, “Iruo migana la ume masinguala inamaniap meba ameuluo non tavuk ila nei o lotu me ai Morowa ga maulo meba tale omeuluan maimai pang.”  
\v 14 Tie, urangaong Paulo meba apulang ties maiong, pa teuara Galio ga maulo Iudaiap gare ro, “O mimi Iudaiap, leba tiesming aime migana ba la orupuaba maimai ang gavaman ga okosarong kirinim ula kiro migat, eva urie ties gare tiro la puorung meba taptang ga ovuvutaling maset.  
\v 15 Pa titot la naming it la miga man neminamung o ties ma non ara tiesiap ga bop ga maimaiap mim kan, tie mimi kan le avuvutmiling iruo paga la are tiruo. Tale narung meba avuvutaling paga ba gare ro.”  
\v 16 Tiesong ara Galio are tiruo, tie maulo teip mila maiabu begat, ga makalameng Iudaiap ga meura na luguan o ties ga mela lavie.  
\v 17 Pa kagarat ai tabuna a luguan o ties, mirie teip ganam la umaiat a non migana ila uke la ume uale bo luguan o usingnualap maiang Iudaiap, bonim a Sostenis ga man avitmeng. Magimaong Galio la avitmeng pa tale kan akosarong paga ba ira ma. Karuk. Uairam it.   
\s1 Ina terigiong Paulo me na taun Antiok na provins Siria  
\p
\v 18 Urie, unama Paulo na urio taun Korin ma papot ma lap, urie tubiat la maulai ekelesiap na uriro pianam ga ula na taun Senkria. Na irie tara la unama Paulo na uriro taun, uvam kavurup o bugam a, memani, tinan la okosarong non mida ga Morowa.\f + \fr 18:18 \ft Nazirite\f* Tie, tegoong bo non sip la namo ila na distrik Siria. Pa Prisila ga lai iang a Akuila la lila ga irie.  
\v 19-21 Mela betmeng na taun Efeso. Ga Paulo kan la uobu me na luguan o usingnualap maiang Iudaiap ga man tiesong ga mirie o bais ula muru aime Iesu. Pa mitara nameng aime Paulo meba onang a tara ba ila laklage ga mirie, are ratmat ga man marikmeng maranit aime. Pa tale ouluan urie ties maiong. Pa na tara la namo maulaing, maulo gare ro, “Leba naang Morowa, tie eba ina terigirang me mi tubiat.” Ga oulai Paulo Prisila ga lai iang Akuila na urio taun Efeso ga tegoong bo sip ga oulai uriro pianam ga ula.  
\v 22 Tie, tubiat ila iva sip na taun Sisaria, tie teunie Paulo ga unum ga ula betong na taun Ierusalem. Ga ualo ‘la ula muru’ maun ekelesiap. Tubiat la ula na taun Antiok na provins Siria.  
\v 23 Unama Paulo ma non lap tie na taun Antiok, urie unum ga ula na napup o provins Galesia ga Frisia. Ga ula betong na mirier pialap ganam narit narit ga magimaong ekelesiap ga mangangasong dalap ma meba maranit naganmeng ira Iesu.   
\s1 Prisila ga Akuila la asingliala Apolos na taun Efeso  
\p
\v 24 Tie, na tara la man okosarong Paulo ubi ang, na irie tara non Iudaia la ula betong na taun Efeso. Bonim a Apolos, migana onim na taun Aleksandria na kantri Isip. Amaning papot o uniraiap ga mait maset tiesiap am Morowa na Babam ula puaru.  
\v 25 Ga asingmaiala a tavuk ang Ila Kakani, ga dalap a la mamaranim ga ume maset masinguala teip ga magaulap a Iesu. Pa irie la oit it nuvietiap ang Ioanes.  
\v 26 Tie, ume ula na luguan ila kani o lotu maiang Iudaiap ga tale kan ume urau maime teip. Karuk. Ume maset bais me mai. Ga Prisila ga lai iang a Akuila la lipto ties ang Apolos ga alagiliong me na luguan liang, ga asingliala uakap a tavuk ang Morowa. Ga upto Apolos urio ties ga maset bat oit.   
\p
\v 27 Tubiat la namo ala Apolos na provins Akaia, ga ekelesiap onim Efesas la man mangangasmeng dalap a meba ala. Are ratmat ga omirmeng babam me maun ekelesiap onim na provins Akaia ga mamelo meba alagimeng. Ga na tara la betong Apolos Akaia, eva maagaulie inamaniap mila naganmeng ira Iesu o ubonuvarap ang Morowa.  
\v 28 Memani, irie la mamarani migat ga man daunam o ties meba meiniam tiesiap o bangut la makosarmeng Iudaiap la tale naganmeng ira Iesu, ga uaramo ties na Babam ula puaru meba masingala la uakap gare ro, “Iesu irie migana la uabua Morowa kaguma ira meba ina malagiang teip ga magaulap am.”   
\c 19  
\s1 Paulo la ula na taun Efeso  
\p
\v 1 Tie, na tara Apolos la man unama ka na taun Korin, na irie tara la man ubiong Paulo toruan na provins Galesia ga provins Frisia. Ga tubiat ula todang ga betong na taun Efeso. Pa na urie pianam la man tiesong gat ga non inamaniap la naganmeng ira Karisito.  
\v 2 Ga mamarikong gare ro, “Tara la naganming ira Iesu, ga na irie tara atabo amila Muranama Ila Babai o karuk?” Tiesong Paulo gare ro. Pa megama, “Karuk. Tale kan papto ties ba a Muranama Ila Babai.”  
\v 3 Pa ugama Paulo, “Tie, omila man unuavariap?” Pa megama, “Iro unuavariap, Ioanes la uavariam teip ga magaulap, uriot unuavariap la opala.”  
\v 4 Tie, ugama Paulo, “Ioanes, irie la ualo unuavariap maun teip ga magaulap la maialam ibup ma irama tavukup maiam ganam mila kiram ga marigimeng dalap ma me ai Morowa. Urie, tiesong gare ro, ‘Pa migana la uluan me rulam tubiat, irie le naganming migat ira.’ Eva, iruo migana la tiesong Ioanes aime la iriet Iesu.”  
\v 5 Are ratmat ga mepto mirie ekelesiap urio ties ga tubiat omela nuvietiap na bonim a Ila Kakani Iesu.  
\v 6 Ga uabuam Paulo kilalap a bo bugobip ma ga marikong, ga muo Muranama Ila Babai mabuo, ga pumaiaro ties ma non ara non ara tiesiap ga tiesmeng o ties o unuli.  
\v 7 Tie, uvas ma miruo teip la puomeng gare 12.   
\p
\v 8 Urie, ula Paulo na luguan o usingnualap maiang Iudaiap ga tale urau meba tiesang ga teip. Ga man masinguala ga maagaulie meba naganmeng iro inamon ang Morowa. Okosarong Paulo gare ro ila puoieng ira ma naien ma ulangip.  
\v 9 Pa non Iudaiap la mabunakmeng dalap ma ga tale omeuluan ties ang Paulo. Tie, man makosarmeng tiesiap mila kiram me ira tavuk ang Ila Kakani na irap ma teip ga magaulap. Are ratmat ga maulai Paulo ga malagiong teip ga magaulap la naganmeng ira Iesu ga mela na luguan ila kani la meiva Tiranas. Tie, ume ties ga teip ga magaulap la mumaio na iruo luguan ga ume masinguala a tavuk ang Ila Kakani.  
\v 10 Ume okosar gare tiro, ila puoieng ira lie narain karaipien. Are ratmat ga miruo Iudaiap ga Grikip ganam la mime maionama na provins Esia la mepto ra ties ang Ila Kakani.  
\v 11 Are ratmat ga non ara non ara pagap o turupnuabap mila kanim la makosarong Morowa na kilalap a Paulo la non ara migat.  
\v 12 Tie, teip ga magaulap la mime maiaram napup it ma burap ga maiabuam irama neip a Paulo o burap la magusong o mageis a ga mime mela maiabuam ira ma neip ma teip mila tafameng, tie tafa maiong la ime no. Okosarmeng gare ro maun inamaniap gat la ame muranap mila kiram, tie muranap mila kiram la mime mamiolai ga mela.   
\s1 Gas maiong lop am Seva  
\p
\v 13-14 Urie, non Iudaiap la mela na napup ga okosarmeng butamat la mime makala muranap mila kiram ira ma teip ga magaulap. Ga mirie la nameng meba makalameng muranap mila kiram ira ma teip ga magaulap la mime meivo bonim a Iesu Ila Kakani. Pa gamura ma lop am non miridai ila kakani maiang Iudaiap, bonim a Seva, la mime okosar gare ro gat. Ga mime mamelo muranap mila kiram gare ro, “Na bonim a iruo Iesu la ume bais Paulo a, norulo, ‘Tenara ga nala!’”  
\v 15 Pa o non la, na nanam a muranama ila kire la upulo ties maiong lop am Seva ga maulo gare ro, “Iruo Iesu la arit. Ga Paulo gat la arit. Pa mimi kan, mimi aga?”  
\v 16 Ga irio migana la ut muranama ila kire ira a, la tegoong ira ma, ga mavitong ga makurupin migat. Tie, mavitong neip ma migat ga iura olabuan ira ma ga magiritong burap maiam. Are ratmat ga amaiolai irio luguan ga igomeng maun naru neip.   
\p
\v 17 Tie, na tara mirier Iudaiap ga Grikip ganam la maionama Efeso la mepto ties a irio paga la betong, nuraiap ula kanu la betieng ira ma. Ga maiavio bonim a Ila Kani Iesu.  
\v 18 Na irie tara, papot ma teip ga magaulap la naganmeng ira Iesu la mavaikmeng tavukup maiam mila kiram na irap ma inamaniap.  
\v 19 Ga papot ma teip ga magaulap la mime okosar sanga ga malira ga non gat pagap, la mepamuam babap maiam la ame tiesiap ma tavukup o ukosar ma miruo pagap, ga masuammeng na kit na irap ma teip ga magaulap ganam. Tie, ovasmeng uniap ma miruo babap, puomeng gare 50,000 ma kakepup a silva gare 50,000 Kinap.  
\v 20 Na iruo tavuk, ties ang Ila Kakani la mamaranu ga dakieng na mirier napup ganam ga papot ma inamaniap la naganmeng ira Ila Kani.   
\p
\v 21 Urie, miruo pagap ganam la nam ara, tie teuara Paulo ga namo amung me na provins Masedonia ga provins Akaia, ga tubiat eba ala na taun Ierusalem. Urie, tiesong gare ro, “Eba tamung ga tala magimarang miruo pialap ganam, ga tubiat eba gat tala Rom.”  
\v 22 Tie, lesagaong teipien angan la lime agalilie, Timoti ga Irastas ga like me na provins Masedonia. Pa Paulo kan la man unama ka ma non lap na provins Esia.   
\s1 Giginanim ula kanu la betieng na taun Efesas  
\p
\v 23 A irie tara la unama Paulo na taun Efeso, non inamaniap onim na uriro pianam la nekaromela me tavuk ang Ila Kani ga giginanim ula kanu la betieng.  
\v 24 Are ro: Non migana bonim a Dimitrias la ume makosar non ara pagap a silva. Ame butamat o ukosar ma tatak muranap o morowa ula magabun Atemis ga luguan ila kani o lotu iang ga mime masau teip ga magaulap. Met uriro butamat, irie ga teip am o uro ubi la mime mamela kakepup mila kanim.  
\v 25 O non la, marikong maime teip la mime ubi iat ga teip la mime makosar miruo butamariap meba nebolameng. Tie maulo Dimitrias gare ro, “Teip, mira uniap buong ula muru la ime bet iro urio butamat la bume okosar.  
\v 26 Pa iruo migana Paulo la muo ro ga maulo inamaniap gare ro, ‘uniap a morowa la akosarong migana ma kilalap a, iruo muranama la tale irie morowa migat.’ Paulo la ume ties gare ratmat ga man urano agat maiong teip ga magaulap, ga omeuluo ties ang. Pa talet okosarong urio ties gare ro togo Efeso. Karuk. Eva, baisong o urio ties me mai mirier teip ga magaulap onim na provins Esia ga mepto, ga mime ameuluo. Mimi kan la mime agima iruo tavuk ang ga mime mipto urio ties.  
\v 27 Are ratmat ga leba tale abunakbuong iruo tavuk, eva tale kagat ga eba memama teip ga magaulap ubi buong la aret ubi agarit. Pa talet irio talamet. Karuk. Atabo eba agatmeng luguan iang morowa ula magabun Atemis irie gat la ebat paga ba agarit. Onagiming tinan teip ga magaulap ganam onim na provins Esia ga onim na urie kimanam gano la mime lotu me u urio morowa ula magabun. Pa titot la bonim o urio magabun Atemis la oagatmeng inamaniap garet paga agarit.  
\v 28 Urie, tiesong Dimitrias gare ro, ga miruo teip la papamnam dalap ma migat ga kukupmeng maranit gare ro, “Atemis buong onim Efeso, urie la kakanu!”  
\v 29 Man kukupmeng maranit gare ro, ga alaga ula kanu la betieng na urie pianam. Tie, umaiat lie migapien angan Paulo onim na provins Masedonia ga meranan ga ibirmeng un namurit agat ga kakalait mela na nap o nebonulap. Boplie litie migapien angan Paulo la Gaius ga Aristakas. Litie la mulio ga Paulo na taun Efeso.  
\v 30 Pa Paulo la upto urie ties a iruo paga ga namo ala kabirana ma teip ga magaulap ga leagaalie, meba tale lekirarameng. Pa teip o usingnualap la abunakmeng meba tale ala.  
\v 31 Pa non teip mila kanim na gavaman onim na provins Esia la nemiganmeng ga Paulo, mirie gat la osagameng ties ga amelo, “Buat nula ga nuobu na urio pianam o nebonulap!”  
\v 32 Pa mirie non teip la kukupmeng me non kan muana ga mirie gat non teip la kukupmeng me non kan muana. Are ratmat ga fufulutieng agat maiong teip ga magaulap la nebolameng tie. Ga papot ma mirie teip ga magaulap la tale ameit man muana ga nebolameng.  
\v 33 Tie, non Iudaiap la nameng aime non ias, bonim a Aleksanda meba ovaikang ties ang Paulo mai teip ga magaulap. Are ratmat ga adadomela ga ula kagarat ai nap o dus. Ga naong Aleksanda me teip ga magaulap meba mapamumeng nanamup ma meba ties ang. Are ratmat ga uaviam kilalap a me nakap ga man maloong.”  
\v 34 Pa teip ga magaulap la agimameng ga ameit, irie Iudaia. Are ratmat ga iat kukupmeng maranit na namurit nivunama gare ro, “Atemis buong onim Efeso, urie la kakanu!” Okosarmeng it urio namurit marik, ila puoieng ira lie narain napupien o muabari.   
\p
\v 35 Tie non migana ila kani onim na urio pianam la magaong teip ga magaulap ga ugama, “O mimi inamaniap onim na taun Efeso, miptang! Bubuot inamaniap la bume ubuale na luguan o lotu iang morowa ula magabun Atemis. Ga iruo muranama iang Atemis, tinan la oulai panbinim ga muo na kimanam, ga buabua na luguan ila kani o lotu ga bume ubuale abuo. Ga ameit mirier inamaniap ganam na uro kimanam.  
\v 36 Are ratmat ga karuk kan a migana ba la eba amama urio ties la ties o kakarabum. Are ratmat ga buat kakalaitming ga miga akosarming tavuk ba, pa mionang it teteiliat ga agatming maset.  
\v 37 Miptang, liruo teipien la lelagiming me ro, tale kan apulaliong paga ba na luguan. Ga tale kan lime fugau iro urio morowa ula magabun buong. Pa lelagiming it agarit me ro.  
\v 38 Pa Dimitrias ga teip am o ubi tie leba memaning muana ba o ties me noba teip meba madusmeng na ties, tie eba malagimeng ga mela mai iasip ga eba ovuvutmeling ties maiong.  
\v 39 Pa leba mimanim noba gat tiesiap, tie eba omiuluan maimai onim na uro pianam. Ga tubiat eba nebolameng teip mila uke ga mavuvutmiling na tara kan o nebonulap.  
\v 40 Are ratmat ga iriro tavuk titot la mumio ga nebolaming ga man kupming tapmat, irie la karuk kan a muana ba ga atabo eba bumarikang gavaman onim Rom a muana a iruo paga. Tie, eba bupulang ties ang gare ba mani?” Tiesong gare ro.  
\v 41 Tie, maulo teip ga magaulap meba netaratmeng na urie nebola ga mela tapmat.   
\c 20  
\s1 Unum Paulo ga ula Masedonia ga Akaia  
\p
\v 1 Urie, no ra urio kukup ula kanu. Ga tubiat la mamarikong Paulo ekelesiap meba mumaiong nebolameng. Ga man masinguala ga mangangasong dalap ma. Ga maulai na taun Efeso ga ula na provins Masedonia.  
\v 2 Na tara la ula betong na mirier napup ganam na provins Masedonia, baisong maranit ga man mangangasong dalap ma ekelesiap. Ga tubiat ula ga betong na Kantri Grik.  
\v 3 Ga na irie nap, unama ma naien ma ulangip. Pa tubiat na tara la namo ina tegoang bo non sip meba terigiang ga ala na provins Siria, tie upto non ties la meburio non Iudaiap ga namo eba menamung ga aving. Pa Paulo la oit ara urio agat maiong, are ratmat ga oigorula agat ang. Ga naong meba amung na alang ga ala betang na provins Masedonia ga tubiat eba bat terigiang me na provins Siria.  
\v 4 Pa non teip mila naganmeng ira Karisito la menum ga mela ga irie, bop ma la are ro: Sopata irie poi ang Pirus onim na taun Beria, ga Aristakas irie ga Sekandas, lirie onim na taun Tesalonaika, ga Gaius onim na taun Debi, ga teipien onim na provins Esia, Tikikas ga Trofimas. Ga Timoti irie gat la ula ga mirie.  
\v 5 Miruo gamura ma teip la imaiolai ga meke me na taun Troas ga man iuanmela turuo Lukas ga Paulo.  
\v 6 Tie, malonim o urie wik ula kanu maiong Iudaiap la maio purun la karuk o is una, oiolai taun Filipai ga tegoing bo sip ga ila. Ga tubiat la aipmeng ara muanam ma lap, ga urie ila bat beting na taun Troas ga nebolaing ga miruo gamura ma teip. Ga ponama na taun Troas puoieng ira ma gamura ma lap.   
\s1 Paulo la ula na taun Troas  
\p
\v 7 Urie, na sade nebolapang ga ekelesiap meba iat onagipang nuvarap ang Iesu ga opakoula purun ga parakpang. Ga baisong Paulo mai miruo ekelesiap onim na taun Troas. Muana kalup la namo oolaing taun ga ala. Are ratmat ga o urie arubu la mitara olaklagarong bais, ila puoieng kabirana o arubu.  
\v 8 Pa isik kabin la nebolapang ana, la ame naien ma napup o nunamap: nakap ga kabirana ga lourup. Pa pava la ponama na irio kabin la ut nakap. Ga papot ma lamup la melabie ana.  
\v 9 Tie, non kubama, bonim a Iutikus la man unama ai tabuna o ifif ga man upto ties ang Paulo. Pa palalaong ga namo duriang. Pa man baisong Paulo ga mitara olaklagarong bais, are ratmat ga aipong Iutikus na duri ga ulum me lourup na kimanam. Ga kakalait temeinie non teip me lourup ga umaiat a, pa uvara ra.  
\v 10 Tie, Paulo gat la uinie me lourup, ga ut abuo irio kubama ga uat a. Ga maulo teip ga magaulap gare ro, “Buat giginam dalap mi. Ninimiap ang la man iot ka.”  
\v 11 Tiesong gare ro ga ina terigiong me nakap na irie kabin ga opakoula purun ga parakong. Ga man tiesong ga mirie, ila puoieng parabira ga urie teuara ga ula.  
\v 12 Pa iruo kubama Iutikus la ina ra mumuri ga alagimeng ga ula na luguan ang. Ga megama teip ga magaulap, “Iruo kubama la uvara ra, pa inagat inim.” Ga dalap ma la mumurum maset.   
\s1 Oulai Paulo taun Troas ga ula na taun Miletus  
\p
\v 13 Tiesong Paulo gare ro, “Ebat tamung na alang ga tala na taun Asos ga tubiat eba tegorang bo sip tie. Pa mimi la eba mike ga mila todang labinim ga betming Asos, ga eba tegorang tie bo sip ga iat bula.” Tiesong Paulo gare ratmat ga opouluan ties ang ga pala.  
\v 14 Ga tubiat pala betpang na taun Asos, tie Paulo gat la betong ga iat tegopang bo sip ga pala na taun Mitilini.  
\v 15 Tie, opolai pianam ula kanu Mitilini ga betpang kagarat ai ailan Kios o non la are kalup parabira. Tie, kalup la tubiat ina tepara ga pala piva na Ailan Samos. Tie, kalup tepara ga pala betpang na pianam ula kanu Militus.  
\v 16 Pa Paulo la uburio ra agat ang meba kakalait betpang Rom, ga tubiat eba bat betieng la ula kanu o Pentikos. Are ratmat ga tale naong meba onang ma papot ma lap na provins Esia ga ponang tie. Karuk. Aret tiro ga okabanpang taun Efeso.   
\s1 Ualo Paulo ioko maun teip mila uke o lotu Efeso  
\p
\v 17 Urie, pala betpang na pianam Miletus ga kakalait osagaong Paulo ties me na taun Efesas ga mamarikong teip maiam mila uke o lotu meba mumaiong agimameng.  
\v 18 Ga mumaio ga betmeng ai. Tie, maulo Paulo gare ro, “Mimi la mira ra tinan la muruo bettung na provins Esia ga tuptuaro ubi kabirana mi. Ga mira gat a man tavuk la tume akosar kabirana mi ma mirier lap ganam, na urie natauan la ga muio puoieng titot.  
\v 19 Tume tekapir ga tuliba meba ubirang, memani tume okosar ubi ang Ila Kani, na tara Iudaiap la man maisinmeng non ara non ara alangip meba maialang giginanim ula kanu toun ga okirarameng ubi rung.  
\v 20 Ga busit la man ovaiktung bais ula muru ga man misingtuala man pagap meba miagamelie. Tume okosar gare ro na taraiap o nebonulap maiong papot ma teip ga magaulap ga na luguap gat mim ganam narit narit.  
\v 21 Ga tume gat bais mai Iudaiap ga Grikip ga tiestung gare ro, mialam ibup mi ira ma tavukup mim ganam mila kiram ga marigiming dalap mi me ai Morowa. Ga naganming ira Ila Kani Iesu.”  
\v 22 “Tie, titot la tourana Muranama Ila Babai meba tala na taun Ierusalem. Pa tale arit man paga la eba betang tubiat ira ruo tie Ierusalem.  
\v 23 Pa na tara la tunum na mirier pialap ganam, toulo Muranama Ila Babai gare ro, ‘Na taun Ierusalem, eba umaiaring nuo ga novismeng o iagur ga eba nomaiabung na luguan o arubu ga eba gat betmeng papot ma noba giginanimup ira nuo.’  
\v 24 Pa tale turau maime. Karuk. Memani, tuga okurupteling uriro nekotarek ga ointamung urio ubi la orula aun Ila Kakani Iesu. Ga tale ga tomamarani ba le uraring o ninimiap tung meba ointamung uro ubi o bais ula muru o ubonuvarap ang Morowa. Karuk.  
\v 25 Papap tuam, tinan la man tunama ka kabirana mi ga man baistung o ties aime Morowa la uale mabuo inamaniap am. Pa orit tubiat mimi ganam la eba gat tale puoming meba togimaming. Karuk.  
\v 26-27 Are ratmat ga titot tuga tiestang la uakap me miun. Tale kan tume turau meba baistang o bais ula muru. Karuk. Tume tomamarani ga misingtuala ma mirier agarip am Morowa. Are ratmat ga aga migana kabirana mi leba ama saikang, urio la tale kiribas tung.  
\v 28 Are ratmat ga umialeng maset mabuo tavukup mim. Memani, mivuvuoong Muranama Ila Babai meba betming gare ba teip o unualeap mabuo sipsipup am Morowa la masauong a olabuan kan a ga maionama gare lotu ang migat. Are ratmat ga umialeng maset mabuo.  
\v 29 Tira na tara la eba mirolaing ga tala, tubiat non teip la eba mumaiong ga okirarameng nagan ming gare suvailap la mumaio ga makirarameng sipsipup.  
\v 30 Ga kabirana mi ekelesiap, eba temaiara non teip ga eba oigormela ties ang Morowa, ga meranam agarip mim meba amiuluan iruo tavuk maiang o kakarabunim.  
\v 31 Are ratmat ga temamalien ming maset ma mirier taraiap. Na tara la tunama ma naien ma karaip, na arubuap ga na ilengiap man ubirung maranit ga man misingtuala, memani tale narung meba saikming. Buat mivaio agat me tavuk la akosartung. Kaurk.  
\v 32 Eva, titot la miruabu na kilalap a Morowa, ga irie la eba ualeng mibuo. Ga narung meba onagiming ties o ubonuvarap ang. Leba iot uriro ties ang na dalap mi ga kakanu ba, tie eba mangangasieng dalap mi ga eba dusming maranit. Ga eba miaram pagap mila murum gat la midaong Morowa la namo eba alam buun inamaniap am.   
\p
\v 33 “Tie, mira la tale temaiara dalap tuo me silva o gol o buruma ba ang noba migana. Karuk.  
\v 34 Mira gat la tume kan okosar ubi ma kilalap tuo ga iro urie ubi la tume orula kakep. Ga mira tara la tume kages ma non pagap ga migap tuam, tume masou ma miriro kakepup.  
\v 35 Tie, misingtuala a tavuk tuang meba amiuluan. Are ratmat ga ubiming maranit meba maagamilie teip ga magaulap la tale memaning ngangas. Ga urio ties la ualo kan Ila Kakani Iesu buun, urie le man oagatming busit. Tiesong gare ro, ‘Eba iot ugiginara ang Morowa abuo migana la naong meba alam pagap aun noba non migana. Pa tale teuba Morowa aime migana la naong meba maala pagap.’”   
\p
\v 36 Urie, okosarong ara Paulo urio ties ga makofong dadebip a me lourup ga okosarmeng miriro teip mila uke marik.  
\v 37 Na tara la no ra marik, tie agilivammeng Paulo ga masekmeng kilalap ma ga irie ga mirie ganam la meliba.  
\v 38 Mitara kadikmeng aime Paulo, memani, maulo gare ro, ‘Tubiat mimir ganam la eba gat tale puoming meba togimaming.’ Tie, tubiat alagimeng ga mela maiala bo sip ga maialo ioko aun.   
\c 21  
\s1 Tegoong Paulo bo sip ga ula Ierusalem  
\p
\v 1 Urie, mapolai teip mila uke ga tegopang bo sip ga pala. Ibrieng sip arakin a irie ailan Kos. Betpang ga duripang tie. Parabira la pala na ailan Ros, ga ina pala betpang na taun Patara na provins Lisia.  
\v 2 Pa na urie pianam Patara, ogimapang urie non sip la namo ila na provins Fenisia. Ga tegopang bo urie sip ga palagieng ga pala.  
\v 3 Pala ga agimapang ailan Saipras. Tie, akabanpang ailan Saipras, irie la ut na kilan ila avaong, urie pala betpang na taun Taia. Na urio taun la meiniam teip papot ma pagap la eba iniam sip me lourup. Are ratmat ga tepeinie me lourup.  
\v 4 Tie, pala mapop ekelesiap ga ponama ga mirie puoieng ira ma gamura ma lap. Na irie tara Muranama Ila Babai la maulo miruo ekelesiap gare ro eba betieng giginanim ula kanu ira Paulo Ierusalem. Are ratmat ga man amelo Paulo, megama, “O kadik, buat nula na taun Ierusalem!” Pa tale omeuluan ties maiong.  
\v 5 Pa na tara la namo opolaing uriro taun Taia ga pala Ierusalem, opolai pianam ga panum ga pala. Tie, miruo ekelesiap ga magaulap maiam ga lop maiam la palagimeng me lavie na uriro taun ga pamaiala tapma malonim o pianam. Ga pava ganam la makofpang dadebip ma kibap pa labinim ga iat okosarpang marik.  
\v 6 Tie, pava ganam la palo ties ‘ioko’ me maun ga tegopang bo sip, pa ekelesiap onim na taun Taia la ina terigimeng me na pialap maiam.   
\p
\v 7 Urie, ina gat tegopang bo sip ga pala betpang na taun Tolames. Pala piva ga mapop teip la naganmeng ira Iesu ga palo ‘la ula muru’ maun ga duripang o namurit arubu ga mirie.  
\v 8 Parabira la opolai uriro taun Tolames ga pala betpang Sisaria. Tie, pala na luguan ang Filip ga ponama. Iriro Filip,\f + \fr 21:8 \ft Gamura ma dikanip.\f* irie non migana kabirana ma gamura ma teip tinan la mavuvuomeng Apostolop meba maagamelie ga ume bais o ties ang Morowa me maun teip ga magaulap. Irie ma non gamura ma teip la mime magamelie Apostolop na Ierusalem.  
\v 9 Irie la amanim nagala ma lop mila magaulap la tale kan magimeng. Ga mime maiaramo ties gare unuli, memani ualo Morowa uriro kamniap maun.   
\p
\v 10 Tie, ponama ma non lap. Pa non unuli onim na provins Iudaia la muo betong na taun Sisaria ga muo paup. Bonim a Agabas.  
\v 11 Muo ga uaro kanam ang Paulo ga mavisong kilalap ga kibap kan a o urie kanam. Ga ugama, “Muranama Ila Babai la tiesong gare ro, ‘Mamo iang urio kanam la eba ala betang na taun Ierusalem ga eba avismeng teip ga eba maiabung na kilalap ma teip la tale onim Israel.’” Tiesong Agabas gare ro.  
\v 12 Tie, papto urio ties, ga pava ga ekelesiap na urie pianam Sisaria la man pamamaranim ga apalo Paulo gare ro, “Buat nula na taun Ierusalem.”  
\v 13 Pa ugama Paulo, “Memani ga man miliba kirat ga miga makiraraming dalap tuo? Urangarung ara meba tala na taun Ierusalem, meba tomiabung na luguan o arubu. Pa talet uriro talamet. Karuk. Eva, urangarung gat meba mema tomenamung ga taving tie Ierusalem me bonim a Ila Kani Iesu.”  
\v 14 Ga tale naong meba oauluan agat pang are ratmat ga tale gat tiespang maranit. Pa tiespang it gare ro, “Agat kan ang Ila Kakani, leba ima iaring parak.”  
\v 15 Non lap la aipmeng ara, ga urie marangapang pagap meba pala na taun Ierusalem.  
\v 16 Ga non gat teip la naganmeng ira Iesu onim na taun Sisaria la mela ga pava. Ga palagimeng ga mela pamiala na luguan ang non migana, meiva Nason meba ponang tie. Irie migana onim na ailan Saipras, eva tara ila laklage la naganong ira Iesu.   
\s1 Ula betong Paulo Ierusalem  
\p
\v 17 Urie, panum ga pala betpang na taun Ierusalem, tie teip mila naganmeng ira Iesu la temeba kan maset ga palagimeng.  
\v 18 Tie duripang ga ila parabira, Paulo ga pava la pala na luguan ang migana ila uke Iemes ga agimapang. Ga non teip mila uke, mirie gat la mumaio ga iat nebolapang.  
\v 19 Ga ualo Paulo ‘la ula muru’ maun ga maulo maset ma mirier pagap la makosarong Morowa na kilalap a kabirana ma teip ga magaulap la tale onim Israel.  
\v 20 Tie, teip mila uke la mepto ra ties ang Paulo ga ovienmeng bonim a Morowa. Ga amelo Paulo gare ro, “O papa pang, titot manit papot ma Iudaiap la naganmeng ira a Iesu irie Karisito. Ga manit gat miruo teip ganam la mitara mamaranim ga man omeuluan maimai ang Moses. Urio gat la onit.  
\v 21 Pa paptam non teip la pamelo nuo gare ro, ‘Paulo la ume masinguala Iudaiap la maionama kabirana ma garip la tale onim Israel, namo eba maialam ibup ma iro maimai ang Moses. Paulo la ume ties, “Buat makasauming lop mim. Ga buat gat mamiuluan tavukup onim tinan.” ’  
\v 22 Eba meptang ties nuo la munuo ra. Are ratmat ga eba akosarbuong mani?  
\v 23 Tie, paga nopalava a non tavuk la napang meba anouluan. Pamanim nagala ma teip, mirie la akosarmeng non ‘mida’ me aun Morowa.  
\v 24 Malaginang miruo teip ga mimi ganam le amiuluan tavuk maiang Iudaiap o tebabaura. Non gat paga, okosarming kamniap ga miopam kavurup na bugabip mi. Leba okosarming gare ro, tie eba omeira inamaniap ganam ties ula kiro me nulam la tale migat pa nume maset onouluan maimai.  
\v 25 Me ekelesiap la tale mirie onim Israel, paburio ties ga osagabuong ara babam tinan me maun ga mabulo gare ro, ‘Buat miom pagap la akosarmeng teip lavang me mai morowap o kakarabunim. Ga buat akosarming iriro tavuk o sadak. Ga buat miom nganeip la meburiam kakongup ma ga mevara. Ga buat miom olabuop ma nganeip.’”  
\v 26 Are ratmat ga malagiong miruo teip. Ga kalup Paulo ga mirie la ameuluan irie tavuk meba tekosarmeng kan ga iat babaum ba. Tie, ula na luguan ila kani o lotu ga maulo miridaip o man la leba betmeng ga babaim ba, ga o man la la eba mumaiong ga maialang kamniap maiong narit narit.   
\s1 Umaiat Iudaiap a Paulo na luguan ila kani o lotu  
\p
\v 27 Urie, miruo gamura ma lap o tebabaura la namo ra nam ba. Tie, mumaio non Iudaiap onim na provins Esia ga agimameng Paulo la unama tapma na luguan Ila Kani o lotu. Ga meiam dalap ma teip ga magaulap ganam ga bukbukmeng aime ga nebukmela ga Paulo ga umaiat a.  
\v 28 Ga kukupmeng maranit gare ro, “Mimi inamaniap onim Israel. Paagamilie! Iruo migana la ume maulo inamaniap na mirier pialap ganam meba meiniang gar buang ga maimai ang Moses ga luguan gat ila kani o lotu. Pa talet akosarong iruo tavuk. Karuk. Malagiong Grikip ga mumaio tapma na penbut a luguan ila kani o lotu ga apalirmeng na irap a Morowa.”  
\v 29 Miaramo urio ties, memani, tinan la agimameng Trofimus onim na taun Efeso la unama na taun ga Paulo, ga agatmeng namo ga alagiong ara Paulo ga muo uobu na penbut a luguan ila kani o lotu.  
\v 30 Are ratmat ga papot ma teip onim Ierusalem la mepto urio ties ga kiram dalap ma. Ga ibirmeng tapmat ga mumaio nebolameng ga umaiat a Paulo ga merana me lavie auluo luguan ila kani o lotu. Talet kagat ga melum tabup ganam a luguan ila kani o lotu.  
\v 31 Urie, teip la umaiat a Paulo la nameng meba menamung ga aving. Ga man avitmeng. Na irie tara, natauan migana o danunumiap onim Rom la upto ties gare ro, “Inamaniap ganam onim na taun Ierusalem la papamnam dalap ma ga man kupmeng tapmat.”  
\v 32 Tiesmeng gare ro ga natauan migana o danunumiap onim Rom la kakalait marikong maime non teip mila kanim maiam 100 ma teip o danunumiap ga non teip o danunumiap. Tie ibirmeng ga mela todang mai mirie inamaniap la nebolameng. Pa miruo Iudaiap la agimameng natauan migana o danunumiap onim Rom ga teip gat o danunumiap ga tale gat avitmeng Paulo.  
\v 33 Tie, natauan migana o danunumiap onim Rom la ula kagarat mai ga tiesong, ga teip o danunumiap la umaiat a Paulo ga avismeng lie narain senipien. Ga mamarikong teip gare ro, “Iruo migana la irie aga? Ga akosarong man paga?”  
\v 34 Mamarikong gare ro pa non teip kabirana a iruo gar la man kupmeng ga man tiesmeng a non kan muana, pa mirie non teip la man kukupmeng ga man tiesmeng a non kan muana. Are ratmat ga natauan migana o danunumiap onim Rom la tale puoong meba aptang maset muana o ties maiong. Are ratmat ga maulo teip o danunumiap ga alagimeng Paulo me na luguan maiang teip o danunumiap.  
\v 35 Alagimeng ga muo kagarat ai lata a iruo luguan pa iruo gar ila kani ma Iudaiap la man mameuluan ga mela. Nameng kan meba menamung Paulo ga aving. Are ratmat ga teip o danunumiap la umaiat a Paulo ga maiavia me nakap bo lata.  
\v 36 Memani, gar ila kakani ma inamaniap la mameuluan ga man kupmeng maranit gare ro, “Bunamung ga aving. Bunamung ga aving!”   
\p
\v 37 Urie, na tara teip o danunumiap la namo alagimeng Paulo me na luguan maiang, tie aulo Paulo iriro natauan migana o danunumiap o ties onim Grik gare ro, “Atabo eba ka noralava o non ties?” Ga ugama migana ila uke o danunumiap, “Onit gat ties onim Grik, a?  
\v 38 Teivuo! Tinan aro kan, non migana onim na kantri Isip, irie la malagiong 4,000 ma teip la mime damenam ga mela na nap la karuk ma inamaniap meba nemenamung ga teip o danunumiap am gavaman onim Rom. Atabo tale nunuo migana onim tie, a?”  
\v 39 Pa Paulo la aulo ga ugama, “Turuo migana onim na gar Iudaia. Pianam tung migat urie taun Tarsas na provins Silisia. Are ratmat ga urio pianam tung la tale kakapio, pa kakanu puoieng meba imaning bonim ula kanu. Tie, tonairang meba maralava mirie inamaniap.”  
\v 40 Tie, keula natauan migana o danunumiap onim Rom me urio umarik, ga dusong Paulo nakap bo irie lata ga namo ties ang. Urie, uavia kilan a me nakap ga aloong meba mapamumeng teip ga magaulap nanamup ma. Tie, pupuaro bais o ties onim Ebraio, urie ties maiong Iudaiap.   
\c 22  
\p
\v 1 “O mimi papap tuam ga irap tuam, titot la tuga tapulang ties ming, meba mamira muap ma mirie ra tavukup ganam la tume makosar. Tale kan okosartung kiribas ba. Are ratmat ga miptang maset!”  
\v 2 Pupuaro Paulo ties ang o ties onim Ebraio ga tale gat melo pa tigit it man maionamat.  
\v 3 Tie, tiesong Paulo gare ro, “Turuo migana a gar onim Iudaia. Naga rung la tovarangeieng na taun Tarsas na provins Silisia. Pa na tara la tokakapi, tolagimeng ga muruo ro ga tunama na urio taun ga tokakani una. Ga migana o usingnualap Gamaliel la tosinguala maset meba marouluan maimaiap ganam maiam eap buam. Pa tume tomamarani migat meba arouluan iruo tavuk ang Morowa garet titot mimi ganam la mimamaranim migat la man amiuluo.  
\v 4 Are ratmat ga man makirararung garip la naganmeng ira Iesu, ga omeuluan urio alang. Man maisintung mirio teip ga mavistung kilalap ma ma iagurup ga malagirung ga tuabuam na luguan o arubu. Non lap la tume tomamarani meba menamum ga meving.  
\v 5 Ira iruo tavuk tuang, miridai ila uke ga kaunselip ganam la ameit, ga puomeng meba mimelava a. Maialam babap toun la mamirmeng me maun garip buam la maionama Damaskas meba toagamelie. Na uriro taun, tuga maroping inamaniap la naganmeng ira Iesu ga malagirang meba mumaiong Ierusalem, meba makirarameng teip mila kakanim. Ga tunum ga teip ga pala na taun Damaskas.   
\s1 Tevaikong Paulo la marigiong Iesu dalap a  
\p
\v 6 “Urie, man panum ga pala. Tie, mupo ra kagarat u taun Damaskas. Ga efan la dusong ara kabirana. Urie, talet kagat ga non lalabie ula kakanu la maio na panbinim ga ilabie maranit me nakap tobuo.  
\v 7 Urie, tulum me na kimanam ga tupta non nivunama la toulo gare ro, ‘Sol! Sol! Memani ga man tokiraranung?’  
\v 8 Iruo nivunama la tiesong gare ro, pa amariktung, ‘O Ila Kakani, nunuo aga?’ Pa ugama, ‘Turuo Iesu. Turuo migana onim na taun Nasaret, busit la nume tokirara.’  
\v 9 Pa teip la man menum ga turuo la agimameng irio lalabie, pa irio nivunama la man tupta, la tale kan mepta maset.  
\v 10 Pa tugama, ‘O Ila Kakani, nuga mani le akosartang?’ Pa ugama Ila Kakani, Tenara ga nala na taun Damaskas. Na irie nap non migana la eba noalava ma mirier ubiap ganam la narung meba makosarnang. Tiesong Ila Kakani gare ro.  
\v 11 Pa irio lalabie la mavureieng irap tuo la mitara mamarani, ga tale kan puorung meba magimarang pagap ba. Are ratmat ga miruo teip la man menum ga turuo la umaiat lie kilalapien tuo ga tolagimeng me na taun Damaskas.  
\v 12 Pa na urie pianam Damaskas, non migana la unama, bonim a Ananaias. Mamarani migat la man mauluan maimaiap ganam am Moses ga mirier Iudaiap ganam la maionama na urie pianam la mime ovien bonim a.  
\v 13 Muo toup Ananaias ga dusong kagarat toi ga ugama, ‘Papa ruang Sol, ina uneng!’ Tiesong gare ro, tie talet kagat ga inara puorung meba ureng.  
\v 14 Ga inagat ugama, ‘Morowa maiang eap buam la novuoong meba onera maset agat ang kan. Are ratmat ga agimanung Iesu, irie migana ila puvuvui migat ga nupto urio ties la uaramo na nanam a kan. Tinan la novuoong ara Morowa, ga titot mulinim o la betieng ara.  
\v 15 Are ratmat ga miruo pagap ganam la magimanung ga nuptam, tiesnang ma me maun teip ga magaulap ganam.  
\v 16 Tie, mani la ina man auanula? Tenara ga okosarnang marik, ga onala nuvietiap na bonim a Ila Kani, meba mapukutara mirier kirinimup nuam ga nam.’ Toulo Ananaias gare ro ga oruluan ties ang.   
\s1 Tosagaong Iesu me mai non garip la tale onim Israel  
\p
\v 17 “Urie, tubiat ina terigirung me na taun Ierusalem. Pa o non la la tula na luguan ila kani o lotu. Ga na tara la okosartung marik, agimarung non paga gare kikiritniap.  
\v 18 Tie agimarung Ila Kakani ga toulo gare ro, ‘Tenara kakalait ga onolaing Iesusalem ga nala. Pa leba naramang ties tung mai inamaniap onim na urio pianam, tala kan nomepta.”  
\v 19 Pa tugama, ‘O Ila Kakani, tinan la tula mana mirier luguap o usingnualap ga tuabuam mirier inamaniap ganam la naganmeng ira nuo na luguan o arubu ga maisiktung.  
\v 20 Non gat paga, tinan na tara Stiven irie migana nuang o ubi la man baisong o ties nung, tie avuremeng ma tadasip ga menamua ga uvara, na irie tara turuo gat la tunama ga mirie un narit dalap me iruo tavuk la akosarmeng. Ga uruale mabuo mirie sakerip maiam teip la man avuremeng Stiven ma tadasip ga uvara. Eva, teip ga magaulap onim na taun Ierusalem la mameit miruo tavukup tuam.’  
\v 21 Tiestung gare ro pa ugama, ‘Tuga nosagarang me kakaliat meba baisnang o ties tung me maun teip ga magaulap la tale onim Israel. Tie, nala!’ Toulo Ila Kakani gare ro.”   
\s1 Ila uke maime teip o danunumiap la uale bo Paulo  
\p
\v 22 Urie, na tara la mepta Iudaiap Paulo la tiesong me maun inamaniap la tale mirie onim Israel, na irie tara tale gat nameng meba meptang ties ang. Are ratmat ga kukupmeng mamaranit gare ro, “Teanamurang ga aving. Iruo migana la are tiruo la buat gat it unama na uro kimanam. Tale puoong meba emung. Karuk migat!”  
\v 23 Man agatmeng miruo inamaniap la namo fugauong Paulo kikirat aime Morowa, are ratmat ga bukbukmeng maset. Ga kukupmeng maranit ga malomeng sakerip maiam ga magomeng tapmat ga agomeng kanauri me nakap.  
\v 24 Are ratmat ga maulo natauan migana o danunumiap teip onim Rom meba alagimeng Paulo me na luguan maiang teip o danunumiap. Ga natauan maiang teip o danunumiap la maulo meba aisikmeng ga amarikmeng a muana o urio kiribas. Memani, namo maset oera, man muana ga kukuim dalap ma teip ga magaulap ga mamarautmela aime Paulo.  
\v 25 Are ratmat ga alagimeng teip o danunumiap me na luguan maiang ga levismeng kilalapien a ga kibapien a Paulo o iagur. Tie, teuara Paulo ga amarikong migana ila uke maiang 100 ma teip o danunumiap la man dusong kagarat ai, ga ugama, “Turuo migana onim na kantri Rom. Atabo mumuru ira mi meba aisikming agarit migana migat onim Rom, na tara la tale amit irie la kiribasong o karuk, a?”  
\v 26 Upto ila uke maiang 100 ma teip o danunumiap urio ties ga ula aulo natauan migana o danunumiap gare ro, “Iruo migana la irie migana migat onim Rom! Pa nanung meba akosarpang man paga ira a titot?”  
\v 27 Tie, muo natauan migana o danunumiap ai Paulo ga aulo gare ro, “Tonalava. Nunuo migana migat onim Rom, a?” Pa ugama Paulo, “migat.”  
\v 28 Urie, upto upmat ties ang Paulo ga ugama, “Turuo la tuabuam papot ma kakepup meba turuo ba migana migat onim Rom.” Pa ugama Paulo, “Pa turuo la tovarangeieng kan naga rung, ga tunama gare migana migat onim na kantri Rom.”  
\v 29 Tiesong Paulo gare ro, ga miruo teip o danunumiap la urangameng meba aisikmeng la kakalait it tesugameng. Ga na tara natauan migana maiang teip o danunumiap la ait ara Paulo irie migana onim Rom, tie irie gat la urau. Memani, maulo teip am ga avismeng ma senip mila mamaranim.   
\p
\v 30 Urie, durimeng ga ila parabira, tie natauan migana o danunumiap la namoe aera maset, man agatmaiong Iudaiap aime Paulo ga man kiribas migat la okosarong. Are ratmat ga maulo teip am meba mavikmeng senip la avismeng Paulo ma, ga osagaong ties ga ila mai miridaip mila kanim ga me mai kaunselip ganam onim Iudaia, meba mumaiong nebolameng. Ga alagiong Paulo ga muo lourup ga dusong na irap ma.   
\c 23  
\s1 Baisong Paulo a Iesu me maun kaunselip  
\p
\v 1 Tie, Paulo la magimaong maranit miruo kaunselip ga ugama, “O mimi papap tuam, na tara la tunum na irap a Morowa, agat tung la maset tovaikieng la tale kan tume akosar tavuk ba ila kire na irap a Morowa. Karuk. Busit la tume akosar tavuk ila puvuvui, muio puoieng titot.”  
\v 2 Tiesong Paulo gare ro, pa miridai ila uke Ananaias la maulo teip la dusmeng kagarat ai Paulo ga ugama, “Opadunming nanam a!”  
\v 3 Pa upulo Paulo ties ang gare ro, “Nunuo migana o kakarabunim! Eba novadunang Morowa! Nunama tie meba onouluan maimai ga tonabung na ties, pa nunuo kan la nume oguek maimai ga manulo meba tovitmeng! Nunuo gare kur ula kiro la ame bilibuom ula muru una.”  
\v 4 Pa teip la dusmeng kagarat ai Paulo la amelo, megama, “Atabo nunuo la nuga akarannang ira miridai ang Morowa ila uke? Tale mumuri iruo tavuk nuang! Karuk.”  
\v 5 Pa ugama Paulo, “Papap tuam, tale arit iruo migana la irie miridai ila kani, memani umirmeng na Babam ula puaru gare ro, ‘Buat tiesming kikirat aime migana ba ming ila uke.’ Arit ara iriro maimai ga tume aruluan.”  
\v 6-8 Na irie tara, magimaong Paulo non teip la mirie Parasaiop pa non teip la mirie Sadukaiop kabirana ma miruo kaunselip. Parasaiop, mirie la naganmeng leba aving migana ba, eba ina teara. Ga naganmeng la ame angelop ga muranap. Pa Sadukaiop, mirie la tale naganmeng gare tiro. Are tiro ga litiro agaripien la liot kabirana ma kaunselip. Are ratmat ga kukupong Paulo maranit ga ugama, “O mimi papap tuam, turuo non Parasaio! Ga mamo ruang ga eap tuam la mirie gat Parasaiop! Pa nagantung migat gare ro, Migana la uvara ra, tubiat eba ina teara. Ga man auantula ga tume bais o urio ties. Ga iruot i muana ga titot la tomiabu gare ro na ties!” Tie, na tara la mepto urio ties ang Paulo, betieng nebuknulap kabirana ma Parasaiop ga Sadukaiop, ga man nemenam o ties. Ga kaunselip la nevuotmeng me na narain napupien.  
\v 9 Ga man kukupmeng maranit ga tiesmeng papot kabirana ma. Tie, non Parasaiop, mirie teip o usingnualap o maimai ang Moses, la temaiara ga tiesmeng maranit, megama, “Tale ogimapang kiribas ba la iot ira iruo migana. Ebun muranama o angelo ba la man tiesong me aun?”  
\v 10 Tie, ila ra kakanu nebuknulap, Are ratmat ga urau natauan ofisa o danunumiap namo ebun neulirana narain garipien a Paulo, ga agat ong ebun makirarameng neip a. Are ratmat ga marikong me non teip o danunumiap meba mela ga apugutmaiara Paulo na kilalap ma Iudaiap. Are ratmat ga tiesmeng teip o danunumiap meba alagimeng kabirana ma teip ga ina ala na iruo luguan maiang teip o danunumiap.  
\v 11 Urie, na urie arubu, muo Ila Kakani ga dusong kagarat ai Paulo ga aulo gare ro, “Buat nurau! Karuk. Dusnang maranit. Baisnung ara maranit o bonim tuo togo na pianam Ierusalem. Met irie tavuk, baisnang gat o bonim tuo na kantri Rom.”   
\s1 Non Iudaiap la meburio ties meba menamung Paulo ga aving  
\p
\v 12-13 Urie, parabira, 40 ma Iudaiap la nebolameng ga meburio ties meba menamung Paulo ga aving. Ga namurit dalap ma ga okosarmeng urio ties o mida ga tiesmeng gare ro, “Leba ka tale bunamung Paulo ga aving, tie buat ka lake parakbuong ga tapbu.”  
\v 14 Ga mela mirio teip mai miridaip mila kanim ga teip mila uke ga mamelo gare ro, “Okosarpang ara mida na irap a Morowa gare ro, ‘Leba ka tale bunamung Paulo ga aving, tie buat ka parakbuong ga tapbu.’  
\v 15 Are ratmat ga titot mimi ga kaunselip ganam le osagaming ties me aun natauan migana o danunumiap onim Rom ga amilava gare ro, Pa pava la eba ponang ga orangapang non alang la are ro: Tara leba ama betang Paulo togo, tie eba panamung ga aving.” Tiesmeng gare ro.  
\v 16 Pa talau ang Paulo la upto utmat ties. Urie, ula na iruo luguan maiang teip o danunumiap ga uobu ga aulo Paulo o uriro ties.  
\v 17 Tie, amarikong Paulo migana ila uke maiang 100 ma teip o danunumiap ga aulo gare ro, “Iruo kubama la upto non ties ga namo ovaikang urio ties me aun migana ila uke o danunumiap. Are ratmat ga alaginang ga ala ai natauan migana o danunumiap.”  
\v 18 Tie, iruo migana la alagiong irio kubama ga ula ai natauan migana o danunumiap ga aulo, “Paulo, irie migana la unama na luguan o arubu, la tomarikong ga toulo meba murang ga talang iruo kubama noi. Namo noalava o non ties.” Tiesong migana o danunumiap are tiro.  
\v 19 Tie, uaria natauan migana o danunumiap kilan a iruo kubama ga alagiong me na non nap ga liriet la lionama. Tie, amarikong irio kubama gare ro “Nuga tonalava o man ties?”  
\v 20 Pa upulo kubama ties ga ugama, “Kaunselip onim Iudaia la namurit dalap ma ga meburio ties meba nomelava gare ro, ‘Paga apeira maset muana ma tiesiap am Paulo. Are ratmat ga napang meba alagiming ga muong to na nap o nebonulap.’  
\v 21 Pa buat onouluan ties maiong. Karuk. Naptang! 40 ma teip la okosarmeng ara mida ula mamaranu na irap a Morowa ga megama, ‘Leba ka tale bunamung Paulo ga aving, tie buat ka parakbuong ga tapbu.’ Miruo teip la urangameng ara ga man uanmela. Pa leba manalava mirie teip o danunumiap meba alagimeng Paulo ga ala todang mai, eva eba menamung ga aving.”  
\v 22 Are ratmat ga ugama natauan ofisa, “Tie, nala. Pa urio ties la ovaiknung toi, buat anulo migana ba o.”   
\s1 Natauan migana o danunumiap onim Rom la asagaong Paulo ga ula na taun Sisaria  
\p
\v 23-24 Urie, teuara natauan migana o danunumiap onim Rom ga lemarikong narain teipien la uliale libuo narain garipien o danunumiap ga leulo gare ro, “Mala malagimang 200 ma teip o danunumiap la mime menum ma kibap, ga 70 ma teip o danunumiap la mime maionama bo osup, ga 200 ma teip o danunumiap la mime maiariam sakmesip. Tie, mamalava meba marangameng pagap me nunumiap. Ga titot na arubu o gamiala o muabari, eba mimung ga mila na taun Sisaria. Ga mimi le umialeng maset abuo Paulo ga alagiming ga ala ai primia Feliks la uale ubuo provins Iudaia. Tale mumuru le betieng giginanim ba ira iruo migana, are ratmat ga arangaming gat hos ba ang Paulo.”   
\p
\v 25 Ga omirong gat non babam la ilo gare ro.   
\p
\v 26 “O primia Feliks, turuo Klodias Lisias la omirtung urio babam ga osagarung me noun. Malina le iot na dalap nuo.  
\v 27 Iruo migana la alagimeng teip o danunumiap ga muo noi, umaiat Iudaiap a ga avitmeng, ga kagarat eba menamung ga aving. Pa tupto ties a la irie migana migat onim Rom. Are ratmat turuo ga non teip o danunumiap la parana na kilalap ma Iudaiap.  
\v 28 Eva, tiesmeng aime namo irie migana ila kire, pa tuga arera muana o urio ties maiong, are ratmat ga alagirung ga ula todang mai kaunselip.  
\v 29 Tie, tuptam la maiaramam non tiesiap o maimai maiong, ga avuremeng o ties met iriro muana. Pa tale kan okosarong kirinim ba puoieng meba bunamung ga aving, ga buabung na luguan o arubu. Karuk.  
\v 30 Pa tubiat la tupto ties ma non teip la nekaromela migat ga iruo migana ga namo eba auanmela na alang meba menamung ga aving. Aret tiro ga kakalait asagarung me noi. Ga marulo miruo teip gat meba mela na luguan nuang o ties ga ovaikmeng urie ties aime na irap nuo.”   
\p
\v 31 Are ratmat ga teip o danunumiap la omeuluan ties ang natauan migana o danunumiap. Tie, na arubu la alagimeng Paulo ga mela miala na taun Antipatris.  
\v 32 Parabira ra, non teip o danunumiap la mime menum la ina terigimeng me na luguan maiang teip o danunumiap na taun Ierusalem. Pa teip o danunumiap la mime maionama bo osup, la alagimeng Paulo me na pianam Sisaria.  
\v 33 Tie, mela ga maialo babam aun primia Feliks ga alagimeng gat Paulo ga muo dusong na irap a.  
\v 34 Tie, ovasong gavaman babam ga amarikong Paulo ga amarikong gare ro, “Nunuo migana onim na man provins?” Amarikong gare ro, pa ugama Paulo, “Turuo migana onim na provins Silisia.”  
\v 35 Ga tiesong gavaman ila uke gare ro, “Tie, nonang to. Pa tara la eba mumaiong betmeng teip la novuremeng o ties, tie eba taptang ties nung.” Ga irie la ugama, “Miabung Paulo na luguan o arubu na luguan ang Herot. Tubiat leba mumaiong betmeng teip la nomaiabung na ties, urie eba bat taptang ties nung.” Tiesong gare ro ga aulo non migana o danunumiap meba alagiang Paulo ga ala abung na non kabin na luguan ila kani ang Orong Herot ga umialeng abuo.\f + \fr 23:35 \ft Iruo luguan tinan la luguan ang natauan orong ila kani Herot, pa tubiat la maiabua kaguma ira iruo luguan gare ang ara gavaman ila uke.\f*   
\c 24  
\s1 Teip mila uke onim Ierusalem la maiabua Paulo na ties  
\p
\v 1 Urie, aipmeng ara muanam ma lap. Ga miridai ila uke Ananaias ga non teip mila uke la mumaio betmeng na taun Sisaria. Ga non migana la muo ga mirie, bonim a Tetalas. Irio migana la ait maset tavuk o ukosar o ties, ga eba dus ang leke ma teip mila kanim ga eba ties ang. Tie, miruo teip la betmeng ga avuremeng Paulo o ties ga amelo Feliks, primia onim Rom ga megama, “Paga pabung iruo migana Paulo na ties.”  
\v 2 Feliks la amarikong Paulo. Ga na tara la muo, tie upuaro Tetalas ties ga ugama, “O Feliks, nunuo migana ila uke la mumuri, nume unuale maset pabuo, are ratmat ga danunumiap ga non gat pagap mila kiram la tale gat mime bet ira pa a tara ila laklage. Ga busit la nume magat non giginanimup tinan la mime maiot na iruo kantri pang, ga nume ubi maranit ga nume mavuvutnin miruo giginanimup.  
\v 3 Pava ganam la apet ara iruo tavuk nuang. Are ratmat ga tevuruspang migat ga palo temaieng me noun.  
\v 4 Pa tale ga taramang ties ga laklago ba ga talang giginanim noun. Karuk. Pa na tavuk nuang ila muri, temaieng le naptang urio tiespang ula papou.   
\p
\v 5 “Eva, iruo migana la kire maset, irie muana o tafa ula kiro. Ume makosar tavukup mila kiram ga ume imu nebuknulap ga danunumiap kabirana ma Iudaiap ganam la maionama tapmat na kimanam gano. Ga irie migana ila kani ang iruo gar ma teip ga magaulap la kabanmeng ira gar pang ga maionama mirie kan na non gar. Iruo la irie migana ila uke maiang teip mila kiram, meiva ‘gar onim Nasaret’, mirie la naganmeng ira Iesu.  
\v 6-7 Ga me tavuk ang ila kire migat, alagiong non migana la tale onim Israel ga liobu na luguan ila kani o lotu ga apaliraong luguan pang ila kani o lotu. Are ratmat ga alagipang me togo.  
\v 8 Titot nunuo kan leba amariknang, tie ga eba manera miruo tavukup mila kiram la ume makosar ga muana migat la avurepang o ties.” Tiesong Tetalas gare ro.  
\v 9 Pa non Iudaiap la mumaio ga irie, mirie gat la agamelie Tetalas ga ongangasmeng ties ang. Tiesmeng ga megama, “Miruo tiesiap ganam la migat it ma.”   
\s1 Paulo la tiesong me ai primia Feliks  
\p
\v 10 Urie, Feliks la urangaong meba aptang ties ang Paulo ga odilikong bugam a me ira. Ga urie upuaro Paulo la ties ong, ga ugama, “O primia Feliks, nunama gare ias iang urio kantri Iudaia, ga muio puoieng ira ma papot karaip. Ga norit la mavuvutnin ara papot ma giginanimup na ties. Are ratmat ga tevurustung meba ovaiktang ties tung, meba maset onera tale makosartung tavukup ba mila kiram. Karuk kan.  
\v 11 Tale kan tunama a tara ba ila laklage na taun Ierusalem. Karuk. Tunamat ma manaburuan ga narain ma lap meba loturang ira Morowa na luguan ila kani o lotu. Are ratmat ga leba mamariknang inamaniap, eva ebat nomelava gare ro.  
\v 12 Pa miruo teip la man tovuremeng o ties, mirie la tale kan togimameng la darunam o ties ga noba migana na luguan ila kani o lotu. Ga tale kan timuam dalap ma inamaniap ba meba okosarmeng alaga mana luguap o usingnualap, o na non napup na taun. Karuk kan migat.  
\v 13 Are ratmat ga tiesiap ganam titot la tovuremeng ma, mirie la tale kan migat ma. Tale memaning alang meba avaikmeng muana ma miriro tiesiap maiam la migat ga eba manera.   
\p
\v 14 “Pa tuga ovaiktang non ties tung noi. Iriro tavuk la mime meiva Iudaiap, ‘tavuk maiang non garip’, iriro la iriet tavuk la ila nei o lotu me ai Morowa ga tume aruluan migat. Eva, met iruo tavuk la tume lotu me ai Morowa maiang eap pam onim Iudaia. Ga nagantung migat ira ma tiesiap ganam la maiot na maimai ang Moses ga tiesiap ganam la maiot na umir maiong unulip.  
\v 15 Pa miruo teip la naganmeng gare ro, Bubuo inamaniap ganam leba buving, ga tubiat bubuo ganam leba ina tebuara gare teip mila puvuvum ga teip mila tale puvuvum. Pa turuo gat la nagantung gare rie ga man auantula irie tara ang Morowa leba ina buemung.  
\v 16 Are ratmat ga tume busit amamalien tung tavuk tuang ga agat tung la ovaikieng migat la tale okosartung kiribas ba na irap a Morowa ga na irap ma teip ga magaulap gat.   
\p
\v 17 “Tie, tinan la orulai Ierusalem ga tula na non pialap ga tunama ma non karaip. Ga tubiat la tupto ties ma migap tuam la kagesmeng o parak, ga tuga maagaralie. Are ratmat ga tuaviam kakepup ga non pagap ga muruo na taun Ierusalem ga tualam maun. Ga tuga talang kamniap aun Morowa gat.  
\v 18 Are ratmat ga akosartung ara tavuk o tebabaura migat na irap a Morowa. Pa tula ana luguan ila kani o lotu ga man okosartung kamniap, ga togimameng teip ga magaulap. Na irie tara, tale tunama ga papot ma teip ga magaulap. Karuk. Man tunamat teteiliat ga tale kan akosartung tavuk ba ila kire tie.  
\v 19 Pa non Iudaiap onim na provins Esia la mumaio ga umaiat tuo. Pa leba ogimameng non teip ga magaulap kiribas ba la okosartung, tie mumuru le mumaiong to ga dusmeng na irap nuo ga tomaiabung na ties.  
\v 20 Leba karuk ba, tie mamariknang mirio teip togo la ogimameng man kiribas la omaiop ira ruo na tara la dustung na irap ma kaunselip maiam na Ierusalem ga tuaramo ties me maun, eba nomelava o.  
\v 21 Turuo kan la tale orit kirinim ba rung. Pa titot la oagat tung non ties la okosartung. La are ro: Dustung na irap ma kaunselip ga kukup tung maranit ga tugama, ‘Leba aving migana ba, tie eba ina teara tubiat. Iruot i muana ga tomaiabu na ties ga dustung na irap mi.’” Tiesong Paulo gare ro.   
\p
\v 22 Urie, primia Feliks la maset ara ait ara tavuk maiang teip mila naganmeng ira Iesu. Ga oituamu ka urio ties ga ina osirong la ieng ties meba ina ila. Ga tiesong gare ro, “Tubiat eba muong migana ila uke Lisias Ierusalem, ga eba ovuvutaling urio ties ming.”  
\v 23 Ga aulo migana ila uke ma 100 ma teip o danunumiap, ugama, “Umialeng maset abuo Paulo, pa buat mialo giginanim ba aun. Leba mema tiesmeng migap am ga irie ga agamelie ma noba pagap, eva buat mabunakming.”   
\s1 Paulo la unama lie narain karaipien na luguan o arubu  
\p
\v 24 Urie, non lap la aipmeng ara, tie muo Feliks ga kuala ang o Darusila, magabun a gar onim Iudaia. Ga asagaong Feliks non migana ga ula alagiong Paulo ga muo ai. Tie, amarikong Feliks Paulo aime tavuk o nagan ira Iesu. Ga man asinguala a iriro tavuk o nagan.  
\v 25 Ga tiesong Paulo a tavuk ila puvuvui, ga a tavuk ang migana le maset ualeng ubuo ninimiap ang kan, ga a tavuk ang Morowa la eba buabung na ties timat tubiat. Pa upta Feliks mirio tiesiap ga merau dalap a. Are ratmat ga aulo Paulo gare ro, “Puoong ara itmat tara. Name nala, pa tubiat eba ina mating tara, tie eba mariktang me nulam ga ina taptang urie ties.” Aulo gare ro ga terigiong Paulo me na kabin ang na luguan o arubu.  
\v 26 Tie, agatong Feliks gare ro, “Leba onang Paulo na luguan o arubu a tara ila laklage, atabo eba alam papot ba ma kakepup toun meba aviktang ga ala.” Are ratmat ga papot ma taraiap la ume marik aime Paulo ga lime ties iat. Pa tale ualam Paulo kakepup ba aun. Karuk.  
\v 27 Pa Feliks la naong maime Iudaiap meba mumurum ba dalap ma aime, are ratmat ga uaira Paulo ga unama na luguan o arubu. Are ratmat ga Paulo la man unama ka na luguan o arubu, muio puoieng ira lie narain karaipien. Tie, tubiat Posias Festas la muo ga aigorula Feliks gare primia.   
\c 25  
\s1 Paulo la marikong aime Kaisar meba aptang ties ang  
\p
\v 1 Urie, uaro Festas urio ubi gare primia na distrik Iudaia ga unama ma naien ma lap la aipmeng ara. Ga oulai taun Sisaria ga ula unama toruan na taun Ierusalem.  
\v 2 Pa miridaip mila kakanim ga teip mila kakanim la meke onim Iudaia la mumaio ai ga avuremeng o ties meba maiabung Paulo na ties.  
\v 3 Pa mirie la tiesmeng ara kabirana ma ga meburio ties meba menamung Paulo ga aving. Are ratmat ga amelo Festas gare ro, “Paganalie ga asaganang Paulo meba muong Ierusalem. Eba mavuvutbuling tiesiap” Tiesmeng gare ro, memani, marangameng ara teip meba kagomering na alang ga menamung Paulo ga aving.  
\v 4 Upto Festas urio ties maiong ga maulo gare ro, “Unama Paulo na luguan o arubu Sisaria. Tatak it tara ga turuo kan la eba tala todang na taun Sisaria.  
\v 5 Are ratmat ga teip mim mila uke la eba mela todang ga turuo. Pa leba okosarang iruo migana kirinim, tie eba miabung na ties.”   
\p
\v 6 Urie, ina ka unama Festas na taun Ierusalem puoieng ira ma gamin o manaburuan ma lap, ga tubiat ula bat todang na taun Sisaria. Duriong ga ila parabira, tie ula na luguan o ties ga unama bo luaga ang ias ga maulo teip o danunumiap meba mela alagimeng Paulo ga muong.  
\v 7 Ga dusong Paulo na ties, tie Iudaiap onim na taun Ierusalem la mumaio ga akurmeng ga man avuremeng ma tiesiap mila giginam. Pa tale puomeng meba mavaikmeng muap ma miruo tiesiap, ga tale agatong Festas ties maiong la migat o.  
\v 8 Tie, upulo Paulo ties meba teagaalie gare ro, “Tale kan oruptuaba maimai maiong Iudaiap ga tale kan akosartung tavuk ba ila kire na luguan ila kani o lotu, ga tale kan okosartung kirinim ba ira Kaisar. Karuk kan migat.”  
\v 9 Pa Festas la namo makosarang Iudaiap meba tevurusmeng aime. Are ratmat ga amarikong Paulo, “Atabo nanung meba nala na ties Ierusalem? Leba are ba rie, tie eba taptang urie ties nung Ierusalem.”  
\v 10 Pa ugama Paulo, “Nunuo kan la tonit ara, tale kan okosartung kiribas ba ira ma Iudaiap. Iruo luguan o ties titot la dustung ana, irie luguan o ties ang orong ila kani Kaisar.  
\v 11 Are ratmat ga eba amariktang orong ila kani Kaisar meba ovuvutaling ties tung. Pa leba migat ba la okosartung noba kiribas, tie puoieng it meba tomenamung ga taving. Pa miruo papot tiesiap ganam la mime tovure ma karuk kan a muana ba ma ga tale kan migat, tie tale puonung meba onouluo agat maiong Iudaiap ga tonabung na kilalap ma. Mariktung aime orong ila kani Kaisar meba ovuvutaling urio ties.”  
\v 12 Paulo la tiesong gare ro, tie malagiong Festas kaunselip am o maimai la mime agamelie o ukosar o ties, ga miriet la mela ka tiesmeng kirat na non kabin ga ina terigimeng. Tie, aulo Festas Paulo, namoma, “Mariknung ara aime Kaisar meba aptang ties nung, are ratmat ga eba nosagarang, ga eba nala ai Kaisar.” Tiesong Festas gare ro, ga ituamu urio ties.   
\s1 Aulo Festas orong Agripa a Paulo  
\p
\v 13 Urie, aipmeng ara non lap, tubiat orong Agripa ga lou ang Benaisi la mulio na taun Sisaria meba lialang ‘la ula muru’ aun Festas.  
\v 14 Lionama na taun Sisaria ma papot ma lap. Are ratmat ga aulo Festas orong o gas ang Paulo. Tiesong gare ro, “Non migana, isik tinan la uabua Feliks na luguan o arubu ga man uaira isik ka.  
\v 15 Tie, muruo ga aigortula Feliks ga tula toruan na taun Ierusalem ga tunama ma non lap. Pa miridaip mila kanim ga teip mila uke onim Iudaia la mumaio toi ga avuremeng Paulo o ties ga tomarikmeng eba tamama amaning kiribas, meba tabung iruo migana na ties.  
\v 16 Pa marulo gare ro, tugama, ‘Pava onim Rom la tale pamaning tavuk meba palang giginanim aun migana ba agarit. Migana la amaning ties, eba dusang na irap ma teip la miabua na ties, ga eba bualang tara aun meba apulang ties maiong a man paga la maiabua na ties aime.’  
\v 17 Are ratmat ga na tara la ina terigirung me togo Sisaria, tie mumaio mirie Iudaiap ga turuo ga durimeng togo Sisaria. Pa parabira ra, tula tunama na luguan o ties ga marulo teip o danunumiap meba alagimeng irie migana ga muong.  
\v 18 Pa teip la maiabua na ties la dusmeng, ga man tiesmeng. Pa agat tung la tuga ebat tiesmeng aime ma tavukup mila kiram la makosarong. Pa karuk.  
\v 19 Tiesmeng it a tavuk maiang Iudaiap la mime lotu me ai Morowa maiang. Pa uriro ties la ume masinguala Paulo papot teip ga magaulap a non tavuk o lotu, teip mila uke la tale narit dalap ma ga irie me urio ties. Karuk. Papamnam dalap ma migat me urio ties ang. Pa Paulo la ume ugama, ‘Iesu la ina teuara na una ga inim.’ Tiesiap are tiruo la muana o urio nebuknulap.  
\v 20 Tuga aroping muana o urie ties. Pa tale kan puorung meba orera ties maiong la migat o karuk. Are ratmat ga obunaktung ties maiong ga amariktung Paulo, ‘Atabo nanung meba nala na ties Ierusalem? Leba are ba rie, tie eba taptang urie ties nung Ierusalem.’  
\v 21 Pa tiesong ga ugama, ‘Mariktung aime orong ila kani Kaisar meba ovuvutaling urio ties. Eva, eba ka man tonang na luguan o arubu ga auantala tara ruang meba tala ai Kaisar. Irie la tiesong gare ro, ga marulo teip o danunumiap meba man umialeng abuo, ila puoieng na irie tara leba asagarang ga ala ai Kaisar.’”  
\v 22 Pa Agripa la aulo Festas gare ro, “Turuo gat la tuga taptang ties ang iruo migana.” Tiesong gare ro, pa ugama Festas, “Temaieng! Kalup la eba naptang gat.”   
\p
\v 23 Parabira ra, tie Agripa ga Benaisi, lou ang la linam non ara non ara sasaip mila murum ga linum ga lila na luguan ila kani meba liptang ties ang Paulo. Pa tubiat teip mila uke maiam teip o danunumiap onim Rom ga teip mila uke onim na urie taun la maiobu gat ga mela maionama. Ga tiesong Festas maime teip o danunumiap meba mela alagimeng Paulo ga muong.  
\v 24 Tie, teuara Festas ga ugama, “O orong Agripa ga mimi ganam teip la maionama togo ga pava, miptang uro ties tung! Na taun Ierusalem ga togo gat, mirier inamaniap ganam onim na gar Iudaia la mumaio tomaiop ga meivo bonim a iruo migana, titot la agimaming. Eva, kupmeng ga megama, ‘Iruo migana le aving. Tale puoong meba emung. Karuk migat!’ Tiesmeng gare ro.  
\v 25 Pa tale tupto ties a tavuk ba ila kire migat la akosarong, meba kerala aime meba aving. Karuk. Pa iruo migana kan la marikong me orong ila kani Kaisar meba aptang ties ang ga ovuvutaling. Are ratmat ga agattung meba asagarang me ai Kaisar, orong ila kani onim Rom.  
\v 26-27 Pa tale puorung meba omirtang ties a man paga la asagarung iruo migana me aun Kaisar, orong onim Rom. Agattung tale mumuru meba asagarang non migana la marikong aime Kaisar meba ovuvutaling ties ang, na tara la tale arit muana o man ties. Are ratmat ga orong Agripa, marulo teip o danunumiap, ga alagimeng iruo migana ga muo dusong to na irap nuo, ga na irap mi ganam. Bubuo ganam leba buptang ties ang. Narung eba buptang muana migat o urio ties, meba omirtang na babam ga osagarang ga ila.” Tiesong Festas gare ro.   
\c 26  
\p
\v 1 Urie, orong Agripa la aulo Paulo gare ro, “Tie, ovaiknang kan ties nung.” Ga avuvuriraong Paulo kilan a ga ugama.  
\v 2 “O orong Agripa, tiesiap ganam la mime tovure Iudaiap ma, mirie la tale migat. Are ratmat ga teruba migat meba dustang na irap nuo titot ga ovaiktang urio ties meba teagaralie.  
\v 3 Eva, teruba migat, memani manit maset tavukup pam pava Iudaiap, ga pagap gat la pame dapanam o ties maime. Are ratmat ga narung meba nonang teteiliat ga naptam mirier tiesiap tuam ganam.   
\p
\v 4 “Mirier Iudaiap ganam la mira la tovarangeieng naga rung lagum ga tunama la tokakapi na pianam tung migat kabirana ma garip tuam ga tubiat la muruo tunama na taun Ierusalem. Are ratmat ga irama mirier tavukup ganam la tume makosar ma mirie ra lap ganam, Iudaiap ganam la mameit.  
\v 5 Tara ila laklage la tomeit. Ga leba nameng, eva mirie kan la puomeng meba tovaikmeng turuo la tunama na gar maiang Parasaiop. Kabirana ma tuvugup pam Iudaiap la pame opouluan ties ang Morowa, tavuk maiang Parasaiop la akurupin tavuk maiang mirie non Iudaiap ga man ameuluo tavuk ila mamarani.  
\v 6 Memani, titot dustung to ga tomaiabu na ties? Tie, muana la nagantung ga auantula Morowa eba akosarang paga meba betang migat gare tinan la midaong me maun eap pam.  
\v 7 Me mulinim o urio mida, na arubuap ga na ilengiap, pava ganam 12 ma garip onim Israel la pamamaranim iro lotu me ai Morowa meba betieng migat mulinim o urio mida. O orong Agripa, tume bais o uriro mulinim la midaong Morowa o tinan, pa titot la betieng ara migat. Met iriro muana, tovuremeng Iudaiap o ties. Uriro mulinim la betieng migat na tara la teuara Iesu na una.  
\v 8 Pa mimi teip ga magaulap, are mani ga tale naganming ira Morowa la puoong meba emum teip mila mevara?  
\v 9 Tinan turuo kan la agat tung la tuga makosartang mirier pagap ganam meba teiniang bonim a Iesu onim Nasaret.  
\v 10 Akosartung iruo paga na taun Ierusalem. Tula mai miridaip mila kanim ga arula iruo kaguma maun, ga tuabuam papot ma teip ga magaulap la naganmeng ira Iesu na luguan o arubu. Ga na tara la narit dalap ma teip mila meke ga kemela meba menamum ga meving, turuo gat la kerula meba meving.  
\v 11 Ga tume malagi teip mila miabu begat, ga pame pala tapmat na luguap ganam o usingnualap ga pame upat ma teip ga magaulap la naganmeng ira Iesu irie Ila Kakani. Tume makirara kirat meba tiesmeng kikirat aime Iesu. Ga papamnam dalap tuo migat aime iruo gar ma inamaniap la naganmeng ira Iesu. Pa mirie mi la mela ga maionama na non pialap mila kanim. Are ratmat ga man maisintung ga tula na non taunup ga na non provinsip ga tume makirara kan maset.   
\s1 Gasong Paulo naganong gare mani ira Iesu  
\p
\v 12 “Urie, na tara la man okosartung gare tie, o non la tula mai miridaip mila meke, tie maiala kaguma toun. Ga tosagameng ga tula na taun Damaskas meba makirararang inamaniap la naganmeng ira Iesu.  
\v 13 Man panum ga pala tie o manaburuan ga narain o muabari migat. Ogimarung non lalabie ula mamaranu migat la maio na panbinim. Urio lalabie la kakanu ga okurupin migat lalabie a efan la muio lourup tobuo ga bo teip la menum ga turuo.  
\v 14 Are ratmat ga pava ganam la palum na kimanam, ga tupta non nivunama a non migana la tiesong o ties onim Arameik ga tiesong gare ro, ‘Sol! Sol! Memani ga man tokiraranung? Me iriro tavuk nuang, man nualo kan ngitngit noun.’  
\v 15 Tiesong are ro, urie tugama, ‘Ila Kakani, nunuo aga?’ Pa Ila Kakani la ugama, ‘Turuo, irie migana busit la nume akirara. Turuo Iesu.’  
\v 16 Tie, titot le tenara ga dusnang meba naptang ties tung! Narung meba nunuo ba migana tuang o ubi, iruot i muana ga bettung noi. Paga la agimanung ara titot, ga paga tubiat leba nosingtala a, mirie ganam le manalava teip ga magaulap ma tubiat.  
\v 17-18 Tuga nosagarang meba nala mai inamaniap onim Israel ga mai inamaniap la tale onim Israel. Narung meba nanavam irap ma meba amiolaing tavuk o arubu ga mumaiong mionang na lalabie. Migat, narung meba mialam ibup ma ira ma tavukup am Satan ga terigimeng me ai Morowa. Leba are ba tie, eva eba madurattang kirinimup maiam ganam ga eba tapamum iat ga teip mila naganmeng ira ruo ga eba betmeng inamaniap mila puvuvum. Pa na tara la nume okosar uriro ubi, ga Iudaiap ga teip la tale onim Iudaia la namo nomenamung ga naving. Pa eba maset uraleng nobuo ga tale kan puomeng meba nomenamung ga naving.’ Toulo Iesu gare ro.   
\p
\v 19 “O orong Agripa, miruo pagap ganam la mamaio na panbinim ga mumaio lourup ga magimarung ga tuptam, tale tualo ibunam tuo ira ma. Karuk.  
\v 20 Oruluo ties ang Iesu ga okosartung ubi. Lake la tula na taun Damaskas ga baistung me mai Iudaiap. Ga okosartung it gare rie na taun Ierusalem ga mana gat pialap ganam maiam Iudaiap, ga kabirana ma inamaniap la tale onim Israel gat. Na miruo pialap ganam la baistung ga marulo gare ro, ‘Mialam ibup mi ira ma tavukup mim ganam mila kiram ga masingmiala tavukup mila murum meba mameira la marigiming migat dalap mi ga mila ai Morowa.’  
\v 21 Tume okosar urio ubi, iruot i muana la togimameng Iudaiap na luguan Ila Kani o lotu ga umait tuo ga namo tomenamung ga taving.  
\v 22 Pa Morowa la maset toagaulie ga man uale tobuo ga muio puoieng titot. Are ratmat ga busit man baistung o ties ang me maun teip agarit ga teip mila kanim gat. Pa tale tume bais o ties ula nou. Karuk. Tume bais o ties tinan kan unulip ga Moses gat la omela aun Morowa ga tiesmeng ma pagap tubiat leba betmeng.  
\v 23 Urio umir la iot na Babam ula puaru la tiesieng gare ro, ‘Eba oala Karisito ngitngit ga eba aving. Ga tubiat eba betang natauan migana kabirana ma inamaniap la mevara, ga eba emung migat. Ga eba baisang o lalabie me maun Israelip ga non garip la tale onim Israel gat la man maionama na arubu.’”   
\s1 Baisong Paulo me aun orong Agripa meba naganang ira Iesu  
\p
\v 24 Tie, na tara la man ovaikong Paulo uriro ties la ina teuara Iesu kabirana ma teip la mevara ra, tie Festas la maranit kupong ga ugama, “Paulo, bangutnung! Mitara onula papot o unirap, ga urie unirap la okiraraieng agat nung ga fufulutieng ties nung!”  
\v 25 Pa ugama Paulo, “O primia Festas, tale banguttung. Karuk. Urio ties la okosartung, urie la migat o ga ame agat ula muru.  
\v 26 Migat, me iriro paga la teuara Iesu kabirana ma inamaniap mila mevara ga non pagap la makosarong, mirie la tale betmeng na nap ila kagouri. Karuk. Muana o urio ties, orong la maset oit ga oira gat a mani la tiestung a. Are ratmat ga tale turau meba ovaiktang ties tung na irap mi.  
\v 27 Orong Agripa, atabo nagannung ira ma tiesiap maiam unulip? Eva, tira ra nunuo la nagananung ira ma.” Tiesong Paulo gare ro.  
\v 28 Pa ugama Agripa, “Baisnung o urie ties ga tupto. Tie, atabo okosarnung it urie ubi o bais a tatak it tara meba bettang gare ba migana la naganong ira Iesu, a?”  
\v 29 Pa ugama Paulo, “Laklage tara o tatak it tara, irie paga ila kani. Migat. Pa mimi ga mirie non teip ga magaulap gat titot la mipto ties tung, mariktung me ai Morowa meba miagaalie mimi ganam, meba betming ga kamina gare turuo la nagantung ira Iesu. Pa titot la tunama na luguan o arubu, urie la tale narung me milam gat meba mionang gare ro. Karuk.” Tiesong Paulo gare ro.   
\p
\v 30 Tie, orong ga primia Festas ga Benaisi ga non teip ga magaulap la maionama ga mirie, la temiara ga dusmeng.  
\v 31 Ga mela lavie ga man tiesmeng, gare ro, “Iruo migana la tale kan akosarong tavuk ba ila kire meba puoieng le menamung ga aving, o meba maiabung na luguan o arubu.”  
\v 32 Tie, aulo Agripa Festas ga ugama, “Lama tale marikang aime Kaisar meba aptang ties ang, tie puonung it meba aviknang iruo migana ga ala agarit.”   
\c 27  
\s1 Namo ala Paulo Rom ga tegoong bo sip  
\p
\v 1 Urie, Festas la uabua Paulo na kilalap a non migana, bonim a Iulias meba asagaang ga ala na kantri Itali. Iriro migana la uale mabuo 100 ma teip o danunumiap kabirana a gar meiva ‘gar ila kani ma teip o danunumiap am Kaisar’. Na irie tara, maiabua Paulo ga mirie non teip la maionama na luguan o arubu na kilan a iriro Iulias. Tie, malagiong Iulias ga namo tegomeng bo sip la eba ibirieng ga ila toruan na kantri Itali. Ga pava gat la eba apoluan ga pala ga irie.  
\v 2 Tie, na taun Sisaria la man ponama ka, ogimapang non sip urie la maio na taun Adramitum na provins Esia. Ga papto uriro sip la ibirieng tapmat labinim na provins Esia. Ga tegopang bo non sip ga pala. Na irie tara, Aristakus onim na taun Tesalonaika na provins Masedonia irie la ula ga pava. Tie, teiara sip ga pala.   
\p
\v 3 Pala ga pala, kalup parabira la betpang na taun Saidon, pa Iulias la akosarong tavuk ila mumuri ira Paulo. Ga keula aime Paulo meba ala magimaang migap am ga parakang maun.  
\v 4 Tie, tubiat la opolai Saidon ga ifif ula mamaranu la mitara pailafieng. Are ratmat ga pala akabanpang nap a ailan Saipras na kilan ila kaiarong memani, ana iruo nap la karuk o ifif ula kanu.  
\v 5 Paia irio nap o pirom la iot na taralapien lie provinsipien Silisia ga Pamfilia. Ga pala ga pala betpang na taun Maira na provins Lisia.  
\v 6 Tie, ogimaong Iulias non sip onim na taun Aleksandria la muio ga namo ila na kantri Itali. Are ratmat ga pauala meba tegopang bo uriro sip, ga tegopang ga pala.  
\v 7 Tie, opolai taun Maira, pa ifif la betieng maranit ga pabunakieng kirat. Are ratmat ga man ibirieng it sip teteiliat ma papot ma lap. Urie, tubiat la mupo betpang kagarat u taun Naidas. Ga na uriro pianam, tiespang meba pala Rom. Pa titot urio ifif la mitara mamaranu ga pailafieng. Are ratmat ga ina terigipang ga pala kagarat ai ailan Krit, logima a Salmone.  
\v 8 Ga akabanpang irio ailan ga onoun bat ifif. Pa teip la mime ubi bo sip la mitara mamaranim iro ubi ga tubiat la pala betpang na non ailan la meiva bonim a ‘taun la ui maset la iot kagarat u labinim’. Ut kagarat it u taun Lasea.   
\p
\v 9 Urie, nam ara papot ma lap. Ga la ula kanu maiong Iudaiap la ofenmeng parak urie gat la no ra. Pa na iruo tara, ifif la mitara kiro migat, ga puoieng meba saikieng sip. Are ratmat ga ovaikong Paulo agat ang mai teip mila umiale bo sip.  
\v 10 Tiesong gare ro, “O mimi teip, leba ina bula gat, tie giginanim ula kanu la eba buioping ga bukiraraieng. Papot pagap la eba saikmeng. Talet tiestung me sip ga non pagap la eba saikmeng. Karuk. Eba gat betieng papot giginanim iro ninimiap buong.” Tiesong Paulo gare ro.  
\v 11-12 Pa urio taun la tale mumuru maset meba ionang sip una ga kagoiring ume ifif la mamaranu. Are ratmat ga papot ma teip o ubi bo sip la tiesmeng ga megama, “Mumuru le abulaing irio ailan ga bula. Leba puobuong, tie eba bula betbuong Finiks ga bunang na urio pianam na tara o ifif ula kakanu.” Finiks, irie non ailan la ut na saut a pugama Krit, ga irie la ui me na nap la namila muabari. Papot ma teip la tiesmeng gare ro, are ratmat ga migana ila uke maiang 100 ma teip o danunumiap onim Rom la ouluan ties liong migana ila uke bo sip ga ira iang uriro sip, pa meinio ties ang Paulo.   
\s1 Ifif ula kanu la teiara  
\p
\v 13 Urie, na tara la namo pala, tatak ifif la teiara la betieng na saut pa tale kan mamaranu. Are ratmat ga agatmeng namo ga ebar puomeng meba ibirmeng me Finiks. Are ratmat ga merana anka me nakap, ga ibirmeng ga mela kagarat migat oi vuor a ailan Krit ga man mela.  
\v 14 Pa talet kagat ga teiara non ifif ula mamaranu migat, meivo Iurakilo ga muio lourup pabuo. Urio ifif, la maio bo kavilap na ailan Krit.  
\v 15 Ga ogisgisieng sip maranit migat. Pa teip la mime ubi bo sip la tale puomeng meba sitiameng sip meba ibirieng arakin o ifif. Karuk migat. Are ratmat ga pairo ifif ga man oiraragieng sip pang ga ila.  
\v 16 Tie, pala betpang na non nap a tatak ailan, bonim a Koda. Na irie nap, pamamaranim migat ga paranam dingip o ninimiap ga mumaio nakap bo sip. Miriro dingip, teip o ubi bo sip la mime mavis maranit iro sip.  
\v 17 Urie, na tara la mumaio dingip nakap bo sip, tie maiaram iagurup mila mamaranim la laklagam ga magomeng me upat sip ga ovismeng maranit meba ongangasmeng sip. Ga ame vuor la iot kabirana o pirom kagarat u Afrika. Are ratmat ga merau ebun ibirieng sip ga ila dusieng iro urio ubiem ga agomeng anka meba tale oirarakmeng boulup sip. Ga oirakieng ifif sip pang ga ila tapmat.  
\v 18 Pa na arubu, ifif ga boulup la mitara pairakmeng. Tie, parabira, teip o ubi bo sip la man magomeng non pagap me todang na pirom.  
\v 19 Urie, o lama naien la, maiaram pagap o sip ga magomeng me na pirom.  
\v 20 Na tara la ponama bo sip na pirom, ifif ga pirom la mitara musliong. Are ratmat ga tale kan pame agima efan ga maralaip, muio puoieng ira ma papot lap. Tie, tale gat agatpang ume ifif ga boulup meba nan ba, ga ponang maset. Karuk. Agatpang it namo saikpang.   
\s1 Man mangangasong Paulo dalap ma teip bo sip  
\p
\v 21 Urie, mirier teip la tale maset parakmeng, muio puomeng ira ma papot lap. Are ratmat ga ula dusong Paulo kabirana ma ga tiesong ga ugama, “O mimi teip, la omiuluan tiestung ga tale amiolai ailan Krit, eva, eba tale betieng uriro giginanim ula kanu la betieng ira buo titot ga saikmeng pagap ganam.   
\p
\v 22 Pa titot la tuga miralava. Dalap mi le maiot teteiliat, memani tala kan saikong migana ba kabirana mi. Karuk. Sip it la eba saikieng.  
\v 23 Miptang, Tume lotu me ai iruo Morowa. Eva turuo migana ang o ubi. Ga o uta arubu, muo Angelo ang Morowa ga dusong kagarat toi ga toulo.  
\v 24 Ga ugama, ‘Paulo, buat nurau! Migat ara eba nala, ga dusnang na irap a orong ila kani Kaisar. Pa naptang! Teip la maionama ga nunuo bo urio sip, mirie ganam leba ualeng Morowa mabuo, ga mirie gat leba maionang maset.’ Angelo la tiesong gare ro.  
\v 25 Are ratmat ga mimi teip, buat mirau. Karuk. Memani, nagantung ira Morowa eba makosarang pagap ganam ga betmeng gare tie la toulo.  
\v 26 Pa eba buiaving pirom ga bula betbuong na non ailan ga eba kiro ba sip.” Maulo Paulo gare ro.   
\p
\v 27 Urie, apolai ra ailan Krit ga pala ga pala puoieng leba nan ba narain wikipien. Na irie tara, man kagaiieng sip ga ila tapmat kabirana o pirom Edria. Pa kabirana o arubu, teip o ubi bo sip la ogasangenmeng namo ga betpang ara kagarat u labinim.  
\v 28 Are ratmat ga maiaro iagur ula laklago meba osangameng pirom, meba omeira la naminila ga namuk ma sangaip. Osangameng ga omeit laira ira 37 ma meta. Ga ina rot ila sip, ga ina osangameng ga omeit la ira 27 metala iot na irie nap.  
\v 29 Are ratmat ga parau maime boulup la ebun ogomeng sip nakap bo vuor. Are ratmat ga bo komaniem o sip la magomeng nagala ma ankap me lourup. Ga man marikmeng ga man uanmela meba kakalait parabira ba.  
\v 30 Pa na irie tara, teip la mime ubi bo sip la namo omaioping alang ba meba omiolaing sip ga mela. Are ratmat ga meinio obinam ula kapio me lourup na pirom meba igomeng ga mela. Pa kakarabim ga megama eba mela magomeng non ankap leike o sip.  
\v 31 Pa Paulo la aulo migana ila uke o danunumiap ga teip am o danunumiap gare ro, “Leba mimaiolaing mirio teip o ubi bo sip, eva eba saikming.”  
\v 32 Are ratmat ga teip o danunumiap la okiripmeng iagur o dingi ga maiairo ga kagaieng ga ila.   
\p
\v 33 Urie, uanpala meba parabira ba. Pa Paulo la man maulo maranit teip ganam meba parakmeng. Tiesong gare ro, “Tara ila laklage neip mi la tale maionama maset. Tale parakmeng puoieng ira ma 14 ma lap ga muio puoieng titot.  
\v 34 Are ratmat ga mirulo ra, le miom parakiap ba meba mimamaranim ba. Miptang, tale puoming meba mikiram ba. Karuk. Mimi ganam la ebat mimumurum ba.”  
\v 35 Tiesong Paulo gare ro, ga uaro purun ga ivo temaieng me aun Morowa na irap ma. Ga opagoula ga puaro la man u.  
\v 36 Are ratmat ga mirier teip ganam la teteiliat maiot dalap ma ga mirie gat la parakmeng.  
\v 37 Uvas ma teip ganam la maionama bo sip, la puomeng gare 276.  
\v 38 Parakmeng ga utmeng ara ga narien. Urie, nameng meba tale gigino ba sip maset, are ratmat ga agomeng wit gane me lourup na pirom.   
\s1 Kiro sip na non ailan  
\p
\v 39 Urie, betieng parabira, ga teip o ubi bo sip la ogimameng ubiem labinim ula muru. Pa tale oarakimeng man nap o kimanam. Are ratmat ga tiesmeng ga meburio ties meba okosarmeng sip meba ibirieng ga ila iva labinim ga ionang tie.  
\v 40 Are ratmat ga maulo migana ila uke me sip ga mela marangameng pagap, meba ila sip. Tie, makiripmeng iagurup ma nagala ma ankap la maiot na pirom. Are ratmat ga ovikmeng iagur ira stia ga arangameng stia meba okosarang ubi. Pa mirier teip la urangameng meba agibumeng non sel na nap leke. Are ratmat ga ailafieng ifif sel ga ibirieng sip ga ila na ubiem.  
\v 41 Pa iaba sip bo non nap o ubiem la iot kabirana o pirom, ga dusieng iro. Nanam o sip la dusieng maranit na ubiem ga tale puoieng meba ibirieng. Ga boulup la man fukmeng me ira komaniem o sip ga ma paragenieng.  
\v 42 Pa teip o danunumiap la tale nameng me noba teip la maionama na luguan o arubu le igomeng. Are ratmat ga tiesmeng ara meba menamum tiep mila maionama na luguan o arubu ga meving ganam.  
\v 43 Pa migana ila uke maiam 100 ma teip o danunumiap la naong aime Paulo meba emung. Are ratmat ga manoun meba miairam teip mila maionama na luguan o arubu ga buat menamuam. Tie maulo gare ro, “Teip la puomeng meba kagaimeng, tegoming me lourup na pirom ga kagaiming ga lake mila betming labinim.  
\v 44 Pa mirie non teip la tale puomeng meba kagaimeng, miaram palangip o non pagap o sip. Ga miarim ga kagaiming mabuo me labinim.” Migana ila uke o danunumiap la tiesong gare ro. Urie, pava ganam la iat pala betpang labinim. Karuk kan a migana ba la saikong. Karuk. Pava ganam la iat pamurum.   
\c 28  
\s1 Ailan Malta  
\p
\v 1 Urie, maset pala betpang na ubiem, ga onagipang bonim a iruo ailan la meiva Malta.  
\v 2 Ga inamaniap onim na urie pianam la akosarmeng tavuk ila muri ira pa. Tie ulum afarat ga betieng susugun urie temaiara ga okosarmeng kit, ga palagimeng ganam ga pala peit u kit.  
\v 3 Pa Paulo la man upamuam lap ga uaviam ga muo uabuam na kit. Pa non kagok ula kiro la iot na lap la osainieng kit la papamno ga akaratieng kilan a Paulo maranit ga man sapieng.  
\v 4 Pa teip ga magaulap onim bo ailand la ogimameng urie kagok la akaratieng kilan a Paulo ga man sapieng ira a kilan a. Ga man tiesmeng gare ro: “Migat ara, iruo migana la ume unamuam teip ga mevara! Ga puoong migat meba aving, pa tale kan saikong na pirom. Are ratmat ga Morowa ila puvuvui la tale naong meba emung.”  
\v 5 Pa Paulo la asekong kilan a ga uiaira kagok ga ila ilum na kit. Ga tale kan betieng giginanim o paga ba ira Paulo. Mumurit ga man unama.  
\v 6 Pa teip ga magaulap la agatmeng, eba ut ang kilan a, o talet kagat eba alaming ga aving. Are ratmat ga man agimameng ga uanmela a tara ila laklage, pa tale agimameng paga ba ila kire la betong ira a. Tie, arigieng agat maiong ga megama, “Teivuo! Atabo irie non morowa!” Tiesmeng gare ro.   
\s1 Mamuriraong Paulo papot teip mila tafameng  
\p
\v 7 Urie, ame non migana ila uke abuo irio ailan Malta. Bonim a Publius. Irie la unama kagarat na irie nap la man ponama ana ga amaning taun. Tie, iruo migana la naong meba mupang ga ponang ga irie. Are ratmat ga pala ga uale maset pabuo muio puoieng ira ma naien ma lap.  
\v 8 Na tara la man ponama na luguan ang Publius, mamo ang Publius la aiop tafa ula kiro ga man duriong it. Papamnam neip a, ga man uona a olabuan o pipirik. Tie, upto Paulo ties a mamo ang Publius ga alagiong Publius Paulo ga lila ai. Ga uabuam kilalap a abuo ga okosarong marik. Urie, talet kagat ga no tafa ang.  
\v 9 Okosarong Paulo gare ro, ga ties o ubi ang la ila tapmat. Are ratmat ga inamaniap la tafameng onim na irie ailan la mumaio betmeng ai Paulo. Ga irie la mamuriraong ga inagat mumurum.  
\v 10-11 Are ratmat ga tevurusmeng ga makosarmeng papot ma tavukup mila mumurum ira pa. Pa pirom ula kiro la tale kakalait no. Are ratmat ga man ponama ka na ailan Molta ga muio puoieng ira ma naien ma ulangip.  
\s1 Betong Paulo Rom  
\p Ga tubiat ogimapang non sip onim na taun Aleksandria na kantri Isip la man ionama na iriro tara o ifif ula mamaranu ga man auanila tara ila muri meba ila Rom. Na komaniem o urio sip la lemirmeng muranapien lie kasanganipien angan morowa, meivan Kestos ga Polaks. Tie, na tara la betong ara tara ila muri ga namo ila urio sip, inamaniap onim na iriro ailan Malta la maialam pagap ganam la kagespang ma, ga maiabuam bo sip. Tie, tegopang ubuo ga pala.  
\v 12 Pala betpang na taun Sirakius ga ponama puoieng ira ma naien ma lap.  
\v 13 Urie, tubiat opolai urie pianam, pala ga betpang na taun Regium na kantri Itali. Ga duripang tie, ga ogasangen pang ifif parabira la teiara na nap o saut, ga opolai urie pianam ga kakalait ibirieng sip, ga pala ga pala betpang na non taun Pitiolai na kantri Itali o lama narain la.  
\v 14 Na urio taun, mabolapang non teip la naganmeng ira Iesu. Ga nameng meba palagimeng me na luguan maiang, are ratmat ga ponama ga mirie ila puoieng ira ma gamura ma lap. Ga tubiat opolai urie pianam ga panum ga pala na taun Rom.  
\v 15 Na tara la mepto ekelesiap onim Rom ties la namo betpang, urie mumaio ga pabolameng na alang. Tie, nebolapang ga mirie na sune ang Apius ga na pianam la meivo ‘Naien ma luguap o duri’. Magimaong Paulo ga avienong Morowa, ga dalap a la omela kukunim.  
\v 16 Tie, pala pobu na taun Rom pa gavaman la tale uabua Paulo na luguan o arubu. Karuk. Sirong aime Paulo meba kan onang talamet na non luguan ba ang, ga non migana o danunumiap la eba ualeng abuo.   
\s1 Baisong Paulo mai teip mila uke onim Iudaia  
\p
\v 17 Urie, aipmeng naien ma lap ga tubiat mamarikong teip mila uke onim Israel la mime maionama Rom meba mumaiong nebolameng ga irie. Tie, maulo Paulo gare ro, “O mimi, papap tuam onim Israel, tale kan akosartung tavuk ba ang karorama ana gar buang. Ga tavuk maiang eap buam la maiala buun, irie gat la tale kan tunia ga irie. Karuk. Pa Ierusalem, tomaiabu na luguan o arubu ga non nap a gar buang la umaiat tuo ga tomaiabu na kilalap ma teip onim Rom.  
\v 18 Pa teip onim Rom la mepto ties tung ga tale kan puomeng meba omaioping kirinim ba rung meba tomenamung ga taving. Karuk. Are ratmat ga namo tomaiairang meba tala.  
\v 19 Pa Iudaiap la oguekmeng urio ties. Are tiruo ga ogimarung it namurit alang ga oruluan. Ga mariktung aime Kaisar meba ovuvutaling ties tung. Pa tale agattung meba tabung gar tuang na ties. Karuk migat.  
\v 20 Are ratmat ga muruo bettung to ga mimariktung meba mumiong ga amira maset tavuk tuang. Tinan Morowa la okosarong ties o mida me buun gar onim Israel ga ugama, ‘Tubiat eba ina temum teip mila mevara.’ Tiesong Morowa gare ro, ga nagantung maranit urio ties o mida ga auantula, ga tume bais o. Iriot i muana ga tovismeng a sen ga tomaiabu na luguan o arubu.” Tiesong Paulo gare ro.   
\p
\v 21 Pa teip mila uke onim Iudaia la amelo gare ro, “Karuk kan a migana ba onim na provins Iudaia la omirong babam ba ga osagaang meba paalava nuo. Ga karuk kan a papa ba la muo ga ovaikang tatak ties ba a tavuk ila kire la akosarnung o novuremeng o ties. Karuk.  
\v 22 Pa mapet Iudaiap na mirier pialap ganam la mime maiaramo ties ula kiro ira irio gar ila nei ang Iesu. Are ratmat ga paga kan nopaptang le naramang agat nung.” Tiesmeng gare ro.   
\p
\v 23 Urie, ovuomeng non la o nebola ga mela. Ga tubiat na tara la betieng urio la, papot ma teip la mumaio ai Paulo na irie luguan la unama ana. Maio parabira ga ila puoieng nabit, la man baisong Paulo o ties me inamon ang Morowa me maun ga mavaikong non tisiap la maiot na maimai ang Moses ga na babam maiong unulip. Met iriro tavuk, man imu agat maiong teip ga magaulap meba naganmeng ira Iesu.  
\v 24 Pa non teip mila uke la osainmeng ties ang Paulo la migat o. Pa non teip la tale naganmeng iro ties ang Paulo.  
\v 25 Tale narit dalap ma me urie ties, ga temaiara ga namo mela. Pa lake la maulo Paulo o non ties ula lagorang la ilo gare ro, “Tinan Muranama Ila Babai la uabu non ties na dalap a unuli Aisaia, ga baisong o urio ties me maun eap mim, ga urio ties la migat o! Aulo Aisaia gare ro,   
\q1
\v 26-27 “‘Nala ai iruo gar ma teip ga magaulap ga manalava gare ro, “Agat maiong miruo teip ga magaulap la libonieng ara, ga kigip ma la palalameng ara o numirap o ties, ga madurimeng ara irap ma. Are ratmat ga menavam kigip ma ganam ga meptang ties, pa eba tale mamira muap ma tiesiap. Eba man uming, pa tale puoming meba arakiming paga ba. Tie, leba tale are ba rie, arakimeng paga ba ma irap ma ga meptang ties ma kigip ma ga ameira muana o urie ties, ga eba marigimeng dalap ma ga ina terigimeng me toi, ga ina maset mamumurirarang.’” \rq Aisaia 6:9-10\rq*   
\p
\v 28-29 “Pa mimi gat la mime oguek uriro ties ang Muranama Ila Babai garet eap mim. Are ratmat ga eba maset mira urio bais ula mumuru la eba ina malagiieng teip ga magaulap, osagaong Morowa ga ila mai teip ga magaulap la tale onim Israel ga eba maset meptang urio bais!”   
\p
\v 30 Urie, Paulo la ume asau non luguan me aun ira ang luguan ga man unama na iriro luguan, muio puoieng ira lie narain karaipien. Ga ume malagi teip ga magaulap la mime mumaio ga agimameng ga ume akosarong tavuk ila mumuri ira ma.  
\v 31 Ga na tara la ume bais o inamon ang Morowa, ga masinguala a Iesu Karisito, man baisong ga tale kan ume urau maime teip ga magaulap. Karuk. Man baisong pa karuk kan a migana ba la obunakong ties ang. Karuk.