\id 2TI - Kuot NT [kto] -Papua New Guinea 2001 (DBL 2014) 
\h 2 Timoti 
\toc1 Lama narain babam la omirong Paulo me ai Timoti 
\toc2 2 Timoti 
\toc3 2 Ti 
\mt1 Lama narain babam la omirong Paulo me ai Timoti  
\c 1  
\p
\v 1 Turuo Paulo, turuo Apostolo ang Karisito Iesu. Morowa la tiesong ara namo alang ninimiap bun teip ga magaulap iro ubi ang Karisito Iesu la okosarong. Are ratmat ga toiteong ga bettung migana o usingnualap meba taramang uriro Bais ula muru.  
\v 2 Timoti, nunuo poi ruang migat ira Morowa, ga omirtung uriro babam ga osagarung ga ila noi. Narung me Morowa mamo ga Ila Kakani buang Karisito Iesu leba lialang ubonuvarap ga kadik ga malum noun.   
\s1 Buat mulibuba ume bais ula mumuru  
\p
\v 3 Tinan, gar ma eap tuam la mime ameuluan tavuk ang Morowa ga mime maiavio bonim a me nakap. Are ratmat ga turuo gat la tume aruluan na dalap tuo, ga tume agasangen iriro tavuk la tume aruluan ga okosartung ubi ang puvut. Na arubu ga na ileng la tume marik me ai Morowa meba noagaalie. Na iriro tara agattung me nulam, ga tume tivo temaieng me ai Morowa, memani, nume agat migat aime ga nume anouluan tavuk ang.  
\v 4 Tara la mariktung me ai Morowa, agat tung gat me tara la norulai ga meriva kup na irap nuo ga melum. Are ratmat ga tuga ina nokimarang meba teraba migat.  
\v 5 Tivo temaieng me ai Morowa na tara la agattung ume nagan, memani, urie u nagan migat. Tale kan kakarabu. Nagan la are tiro la iot ka un ea nung Lois, ga tubiat la iot gat un naga nung Iunis. Ga orit migat uriro nagan la iot gat noun.  
\v 6 Uriro nagan la iot migat noun, are ratmat ga tuga ovavaragastang agat nung me uriro kamniap, kukunim ang Morowa le iot noun. Na urie la la tuabua kilan tuo nobuo ga marik tung me ai Morowa me nulam. Are ratmat ga nemung uriro kukunim urie kamniap ang Morowa na ninimiap nung are migana la ume ofu kit ga ime teara ga kakanu.  
\v 7 Nemung uriro kamniap ga okosarnang ubi la nouabu Morowa iro. Memani, iriro Muranama Ila Babai ang Morowa ira buang la uala bun irie la tale kan puoong meba buairang meba buraung. Karuk. Ume busuvarong o kukunim ang meba okosarbuong ubi ang, ga eba mabobuving inamaniap ga nabuong maset me inamaniap ga maset ubualeng bo dalap ga agat buong kan.  
\v 8 Are ratmat ga buat mulinuba le naramang uriro bais ula muru ang Ila Kakani buang. Tunama na luguan o arubu, memani, tuaramo bais ula muru ang Ila Kakani. Are ratmat ga tala kan mulinuba ira ruo karuk. Narung me kukunim ang Morowa le uranganang ume meba naving uriet giginanim o ubi ga naramang bais ula muru.  
\v 9 Morowa la inagat bulagiong ga bumarikong ga bukosarong meba betbuong teip ga magaulap am kan. Tale kan agatong me tavuk ila muri la akosarbuong ga ina bulagiong ga buiteong meba betbuong teip ga magaulap am. Karuk. Irie kan la agatong ga okosarong uriro. Tinan kan na tara la tale ka okosarong Morowa kimanam, agatong me ubi Karisito Iesu la namo okosarang ga me uriro ubonuvarap ang me bulam ga bukosarong ga betbuong teip ga magaulap am.  
\v 10 Pa titot na iriro tara, Karisito Iesu, migana la ina bulagiong, la betong ara la uakap. Pa me uriro ubi la ume okosar me bulam, ubonuvarap ang Morowa la betieng la uakap. Karisito Iesu la ituamu ngagasieng nuvarap, memani, tara la buvara, muranap buo la tala kan kiribasmeng. Karuk. Pa avaikong paga gare ro: Leba buptang bais ang ula muru ga naganbuong iro, eba obula ninimiap la iot atatan makin.  
\v 11 Morowa la touabu gare Apostolo. Memani, naong me rulam le okosartang ubi gare migana la ume uaramo bais ula muru.  
\v 12 Are ratmat ga tuavio uriro giginanim ga tume tunama na luguan o arubu. Pa tale kan muliruba la tunama na luguan o arubu ga tuavio uriro giginanim. Karuk! Memani, arit ara iriro migana Karisito Iesu la nagantung ira a. Ga agat tung puoong meba ualeng maset bo uriro ubi o ties o bais ula muru la uabu na kilan tuo ga eba iot uriro ubi maset ga ila puoieng na la tubiat leba ina muong.  
\v 13 Onouluan uriro ties ula puvuvu la nupto na nanam tuo. Uriro ties la are muranama la nosinguala a tavuk ila muri meba masingnala teip ga magaulap. Tara la nuaramo uriro ties, tie nagannang maranit ira Karisito Iesu ga nanang aime ga nalam dalap nuo aun ga na irie tavuk le maset naring urie ties.  
\v 14 Unaleng maset bo uriro bais ula muru la uabu Morowa na kilan nuo. Baraba nuaira migana ba le okiraraang o oigorala uriro. Karuk! Iriro Muranama Ila Babai ang Morowa la unama tapma na dalap nuo, eba nobugokang ga ualeng maset bo uriro ubi.  
\v 15 Nira mirier teip ga magaulap onim na provins Esia la memaning mulinubap ga namor tomaiolaing. Fiselas ga Hermosenis gat la limaning mulinubap ga toliolai ra.  
\v 16 Pa mariktung me ai Morowa meba aboaving ga abung ugiginara ang ga ila bo Onesiporo ga numeilup am. Memani, Onesiporo la makosarong dalap tuo ga temeba. Tale kan muliuba me rulam la tunama na luguan o arubu.  
\v 17 Karuk! Na irie tara la muo Rom ga okosarong ubi ula mamaranu la man toisinong ga tubiat la toup.  
\v 18 Nunuo kan la anit maset la toagaulie Onesiporo na tara la tunama na taun Efeso. Narung meba mariktang ma ai Morowa meba aboaving na urie la o ties ula kanu ang Morowa.   
\c 2  
\s1 Dusnang maranit are migana o danunumiap ang Iesu  
\p
\v 1 Tie, Timoti nunuo gare poi ruang na ubi ang Morowa, mirier lap le nairang Morowa meba man ongangasang ninimiap o nunumiap nung na ubonuvarap ang Karisito Iesu.  
\v 2 Ga mirier tiesiap ganam la nuptam la rume tuaramam kabirana ma inamaniap, miriro le naram ga naramam mai non ara teip la mime maset umaiale ga puomeng meba masingmaiala non ara inamaniap gat.  
\v 3 Dusnang maranit ga turuo ga teiaving giginanim me Karisito Iesu are migana o danunumiap o ami la dusong maranit.  
\v 4 Betnang gare ba migana o danunumiap. Migana o danunumiap la naong meba ake me amip ga naong me ubi la ume okosar, tie tale gat uario noba ubi. Karuk. Are ratmat ga onouluan ubi la ualo Ila Kakani noun ga buat nuairam noba pagap le nomeranang.  
\v 5 Betnang gare migana la ibirong na nekotarek. Migana la ibirong na nekotarek la ouluan maimai o nekotarek. Leba karuk ba, tie tale puoong meba oala uniap. Are ratmat ga nunuo kan le maset omamaliennang ninimiap nung ga onouluan uriro ubi la ualo Ila Kakani na kilan nuo, ga tubiat eba alang uniap noun.  
\v 6 Betnang gare ba migana la ulio ubi. Eva, ume mageis ana tara la ulio ubi, pa irie kan la lake uaro parak me non inamaniap. Are ratmat leba okosarnang ubi ula kakanu me Ila Kakani Karisito Iesu, eba alam pagap mila murum noun.  
\v 7 Agatnang maset me uriro ties la tuaramo. Memani, leba okosarnang gare riro, Ila Kakani la eba abung uakap na agatnung ga eba anera muana o uriro ties.  
\v 8 Mar mirie lap man agatnang me ubi la okosarong Karisito Iesu ga uriro la eba noagailie ga eba dusnang maranit ga navim mirier giginanimup. Iesu irie a gar ang Orong Devit, pa tale kan uakap ira meba avim giginanimup. Karuk. Uvara ga ina imua Morowa ga ina inim gat. Uriro bais ula muru la tume tuaramo mai teip ga magaulap.  
\v 9 Agatnang gat me rulam ga dusnang maranit ga navim mirier giginanimup. Tuaramo uriro bais ula muru ga met uriro ga mime toagat inamaniap namo turuo migana ila kire, ga mime maialam non ara giginanimup toun, ga tomaiabu na luguan o arubu are migana o pula ga danunumiap. Pa bais o ties ang Morowa tale kan puoieng meba ionang na luguan o arubu karuk.  
\v 10 Are ratmat ga teruba meba tavim mirier giginanimup la mime bet ira ruo. Tuaviam mirier giginanimup meba maagaralie teip ga magaulap la maiteong Morowa am, ga narung gat le maiarang uriro ninimiap la iot aun Karisito Iesu ga eba malagiang ga maionang maset ga irie na panbinim mar mirie lap.  
\v 11 Dusnang maranit ga navim mirier giginanimup, memani, uriro ties la migat o la igama: Leba buving migat ga Iesu ga pagap onim na kimanam, eva eba bimung ga bunang ga irie.  
\v 12 Leba dusbuong maranit ga buavim mirier giginanimup, tie eba gat bubuo ba orong ga irie. Leba bualam ibup buo ira a, irie gat la eba alang ibunam a ira buo.  
\v 13 Leba bumama buga abuluan, pa tale obuluan ties buong, tie, irie kan la ume ouluan ties ang, eba bukosarang maset. Memani, tale kan puoong meba oigorala ties ang. Karuk.   
\s1 Migana o ubi la amaning bonim na irap a Morowa  
\p
\v 14 Mirier lap le man nemung agat maiong inamaniap ga masingnala meba oagatmeng uriro ties la tualor noun. Ga tiesnang maranit me ira ma na irap a Morowa. Eva, tiesnang gare ro: Buat neminam o ties, ties o nebuknulap o non ara non ara ties o maimai o ties maiong tatimup a non ara non ara gar ma numeilup. Karuk! Iriro tavuk maiang inamaniap a migana o usingnualap la daunam o ties, ties o bukbuk la tale kan puoieng meba aagailie noba migana meba aouluan Morowa. Karuk! Iriro tavuk la umet okirara agat maiong inamaniap la mime mepto uriro ties.  
\v 15 Ubinang maranit meba betnang migana ila muri o ubi ga eba naang Morowa me ubi nung. Betnang gare migana ila muri o ubi la tale muliuba me ubi ang, memani, Morowa la nogimaong la nuaramo ties ang ula puvuvu.  
\v 16 Tale naong me uriro ties agarit. Memani, uriro ties la are tiro la mime maiaramo inamaniap la ime iranam inamaniap ga mimer mela kakaliat uluo alang ga maialam ibupma ira Morowa.  
\v 17 Uriro ties agarit la are buok ula kakanu la ime iom napup ma neip ma inamaniap. Aimenias ga Failitas litie a iriro gar la maiaramo uriro ties ula kiro.  
\v 18 Miriro inamaniap lare tiro la pasanmeng ga okabanmeng ties migat ga mime gat ties gare ro, Morowa la imuam ara ekelesiap ga tala gat ina temaiara. Are ratmat ga uriro ties la ime mafulut agariap maiam non teip ga magaulap ga ime kiribas agat maiong.  
\v 19 Pa ties ang Morowa la eba betieng gare tie la tiesong. Inamaniap la mime ameuluan Morowa la kamena gare labinama ila mamarani la urilia ga uavia luguan. Pa me iriro labinama, omirong Morowa non ties gare ro, “Ila Kakani la mait maset teip ga magaulap am”, pa aga la karuk. “Aga la megama mirie am Morowa ga uale Morowa mabuo, tie iriro gar la maialam ibup ma ira tavuk ila tale puvuvui.”  
\v 20 Na luguan Ila Kakani, non ara non ara koip ma pagap la maiot. Mirie la makosarmeng a gol ga silva pa mirie ga makosarmeng ma kuop o kimanam. Iriro koi la akosarmeng a gol ga silva la mime maiaram miriro me ubi ula muru. Mime nebola na parak ula kakanu. Pa koi la akosarmeng o kuguom o kimanam. Mime maiara me non ara non ara ubiap.  
\v 21 Are ratmat ga inamaniap la mime mapugutmaiara tavukup mila kiram na dalap ma o ninimiap maiong ga babaim, tie kamena gare koi a gol ga silva la maiara ga makosarmeng ubiap mila murum o parak o nebola. Morowa leba aram miriro teip ga magaulap are tiro ga okosarmeng ubi ang ga mumuru. Eva, eba urangameng meba okosarmeng ubi ula muru.  
\v 22 Tie, nunuo Timoti, nuga betnang gare ba koi ila muri ang Morowa meba ubi ang a, tie nobabai ba maset me mirie tavukup la mime maiot na dalap ma kubap la mime na maime. Ubinang maranit ga anouluan tavuk ila puvuvui, ga nagannang migat ira Morowa, tie tavuk me na maset me non teip ga magaulap, ga tavuk me dalap la maiot teiliat, ga akosarnang iriro ga non teip ga magaulap la memanim dalap mila babaim la mime marik me ai Morowa meba maagaalie ga ameuluan.  
\v 23 Nalang ibunam nuo ira ma teip la mime mameuluan non ara tiesiap mila kiram. Tale kan mime omeuluan uriro ties ula muru la bume buaramo. Baraba nume ties ga mirie. Memani, uriro ties lare tiro la ime avaik tavuk o nebuknulap.  
\v 24 Aga migana la ume okosar ubi ang Ila Kakani, tala kan betong gare migana o bukbuk o danunumiap o upuke ga non teip. Karuk. Akosarang tavuk ma dalap la maiot teiliat irama mirier teip. Irie gat le betang gare ba migana ila muri o usingnualap ga ainiang pringesnges ang.  
\v 25 Ga airam inamaniap la akirarameng ga ubi ang teiliat irama ga mavuvuttaling agarip maiam inamaniap la mime oguek ties ang. Okosarang gare tiro. Ga eba maigorala Morowa ga atabo eba marikimeng dalap ma ga eba omeira ties migat ga eba omeuluan.  
\v 26 Ga eba amiolaing tavuk are ubianama la ume uabua karorama ga ume uranam ga ume makirara. Karorama la ume maladan ga mavanaong meba omeuluan agat ang. Pa leba omeira ties migat, eba ina maset betieng agat maiong ga eba amiolaing ubianama ang karorama.   
\c 3  
\s1 Na tara lagorang, papot ma tavukup mila kiram la eba betmeng  
\p
\v 1 Anera maset iriro paga. Na tara kagarat leba ina muong Iesu, teip mila kiram la eba makosarmeng papot ma giginanimup ga eba betmeng ga eba makirarameng teip ga magaulap la namo ameuluan tavuk ila muri.  
\v 2 Eba mageismeng migat, teip mila kiram a tavuk o na maime kan ga eba nameng maset me kakepup. Eba maiavim bop ma me nakap, ga eba tiesmeng kirat me irama non inamaniap, ga apukemeng Morowa. Eba tale meptang ties maiong mamop ga nagap maiam, ga tala kan temeba ga meivo temaieng me teip la akosarmeng tavuk ila muri ira ma ga tala kan ameuluan tavuk ila puvuvui.  
\v 3 Eba tale nameng maime migap maiam ga tale nameng me olabuap ma ga namurit gar maiang, ga tala kan namurit dalap ma ga non teip. Karuk. Ebat man nebukmela! Eba man tiesmeng tigit tapmat, ga tala kan mime omamalien maset agat ma neip ma. Eba man makirarameng inamaniap tapmat, ga eba nekaromela ga tavuk ila mumuri.  
\v 4 Eba maiabum papap maiam na kilalap ma karorap, ga eba mameuluan kakalait agariap maiam mila ngongang. Ga eba kan teagatmeng mirie teip mila Kakanim, ga eba nameng maset me tenubap ma neip ma, ga tala kan nameng me Morowa.  
\v 5 Eba lotumeng ga eba memama, “Pame opauluan agat maiong ekelesiap”. Pa na dalap ma kan, mime maialam ibupma iro kukunim a tavuk ang Morowa la maigorula teip ga magaulap. Talienang me miriro teip lare tiro! Eva, manolaing teip lare tiro.  
\v 6 Memani, mirie mi kabirana ma la mime pasei maset ga mime maiobu na luguap maiam teip ga magaulap o lotu ga mavanameng magaulap mila tale memaning agat ula muru, ga naganmeng magaulap ties maiong. Magaulap lare tiro la memanim papot ma kirinimup a tavuk ila kire, ga maiaira tavuk ma neip ga uke maime. Ga ogasangenmeng giginanim na dalap ma a iriro tavuk la ameuluan, ga temaiara dalap ma ga meranam tapmat.  
\v 7 Ga mime mameuluan non ara tiesiap pa tale kan puomeng meba omeuluan ties migat.  
\v 8 Kamena gare Ianes ga Iambres la nekarolila ga ties ang Moses.\f + \fr 3:8 \ft Narain teipien onim Isip la man ononolin ubi ang Moses na tara la ula agimaong Fero. Makosarliong non pagap o uvuvuo are Morowa la makosarong na kilalap a Moses.\f* Nekarolila ga ties migat. Man agatmeng me non ara pagap mila kiram ga ualo Morowa ibunam a irama. Memani, tale kan naganmeng migat me uro ties.  
\v 9 Pa iriro tavuk la mime maladan teip ga mime ameuluan la tale kan puoong meba betang ga kakani ba. Karuk! Eba ameira teip ga magaulap tavuk o bangut la akosarmeng ga maialam ibupma gare teip ga magaulap onim Isip la agimameng tavuk ang Ianes ga Iambres ga ameit tavuk liang o bangut.   
\s1 Naring maranit ties ang Morowa  
\p
\v 10 Pa nunuo Timoti, buat kakanu agatnung gare mirie. Karuk. Nunuo kan la nunama ga turuo ga manit tara mirier tiesiap ganam la tume tuaramam, ga anit paga la tume akosar. Ga manit dalap tuo la nagantung maranit ira Morowa ga mangangastung dalap tuo ga dustung maranit me paga ila kire la namo bettang ira ruo. Ga tale kakalait papamnam dalap tuo me teip mila kiram. Karuk. Narung maset maime.  
\v 11 Manit ara mirier tavukup ganam mila kiram la makosarmeng inamaniap ira ruo, ga mirier ngitngiriap la tuaviam na pianam Antiok ga Aikoniam ga Listra. Manit mirie non giginanimup la maialam toun pa tuaviam it. Mirie lap la mime maialam giginanimup toun ga tokirarameng. Pa Ila Kakani la ina okalaong uriro giginanim ga ila touluo ga ina tunama maset.  
\v 12 Eva, uriro ties la migat o. Mirier inamaniap ganam la namo parepmeng ira Karisito Iesu ga ameuluan tavuk ang Morowa, eba makirarameng karorap.  
\v 13 Ga are gat to, inamaniap mila kiram la eba akosarmeng tavuk ila kire maset. Eva, ga unulip o kakarabunim la eba mavanameng inamaniap. Ga karorama gat la eba mavanaang unulip o kakarabunim ga tavuk maiang la eba kire ba namur.  
\v 14 Pa nunuo Timoti, naring maranit uriro ties la nuaro ga nagannung iro. Memani, panit ara pava inamaniap la nosingpala o uriro ties.  
\v 15 Are ratmat ga anit ara iriro paga. Tinan la nunuo ka kulot ila kakapi, ime nosingiala naga nung o Babam ula puaru ga man nuaro ka uriro agat na Babam ula puaru. Onit uriro babam la puoieng meba ialang agat ula muru noun ga eba ina nolagiang Morowa. Memani, muana la nagan nung ira Karisito Iesu.  
\v 16 Tinan Muranama a Morowa la ina imu agat na dalap ma inamaniap ga omirmeng ties ang na babam ula puaru onim tinan. Are ratmat ga urie umir gano la iot na uriro babam la mumuru ga ialo agat bun o ties migat. Ga busingiala o kirinim buong, ga maset okosarieng ninimiap buong, ga pasingiala o kirinim pang ga avuvuttin tavuk buang, ga pasingiala a tavuk ila puvuvui.  
\v 17 Eva, Morowa la okosarong uriro, memani, inamaniap la mime okosar ubi ang Morowa, memaning kukunim meba mameuluan mirier pagap ganam la naong Morowa meba makosarmeng, memaning kukunim, memani, Morowa la marangaong ara me ties ang, ga eba makosarmeng mirier non ara ubiap mila mumurum.   
\c 4  
\s1 Naramang migat ties ang Morowa  
\p
\v 1 Tubiat Karisito Iesu la eba ina muong ga eba onang ga Orong ang ga ualeng bo mirier teip ga magaulap ganam. Ga eba gat ameram mirier inamaniap la meinim ga mirier inamaniap mila mevara. Agattung me uriro gare Morowa mamo ga Karisito Iesu la togimaliong ga tiestung maranit me nulam gare ro,  
\v 2 Naramang ties ang Morowa. Eva, agatnang me iriro paga leba betang ga naramang ties ang Morowa. Leba urangameng inamaniap meba meptang ties o tale urangameng, nairam, mirier lap le ubinang maranit le man naramang ties ang. Ties nung le mavureieng dalap ma meba imum meba marigimeng dalap ma ga omaiolaing kirinim maiong. Ga nemum dalap ma meba ameuluan tavuk ila puvuvui. Masingnala gare tie, pa buat mavaiknung dalap nuo mila papamnam ira ma. Karuk. Ubinang teiliat ga masingnala maset.  
\v 3 Namamarie ga man okosarnang gare ro. Memani, tubiat eba tale nameng inamaniap meba meptang ties ula puvuvu. Karuk. Eba kan omeuluan agat maiong ga okosarmeng kirinim. Are ratmat ga eba malagimeng papot ma teip o usingnualap la mime miaramam non ara tiesiap o kakarabunim, eva iriro gar ma teip ga magaulap la temeba meba meptam.  
\v 4 Eva, eba maialam ibupma iro ties migat, ga menavam kigip ma ga alongmeng meba meptang non ara gas agarit.  
\v 5 Pa nunuo kan la buat okosarnung gare tiro. Karuk! Omamalienang maset agatnung, ga dusnang maranit ga navim non ara giginanimup la mumaio ira nuo. Nunuo gare migana o ubi ang Morowa ga naramang bais ula muru mai mirier teip ga magaulap ga makosarnang migat ubiap nuam meba maaganalie inamaniap.   
\s1 Titot la namor noba ubi rung  
\p
\v 6 Eva, manouluan migat tiesiap la norulo ma, memani, tara o nuvarap tung la muor kagarat tiro. Onit ara, inamaniap la mime auruk wain ga maialo kamniap aun Morowa. Aret tiro olabuan tuo la namor urukang. Ga tara ruang o nuvarap la muo ra.  
\v 7 Tuaramo bais ula muru mai teip ga magaulap ga ubirung maranit meba okosartang uriro ubi. Marouluan mirier pagap la mavuoong Morowa me roun meba makosartang. Karuna gare migana la ibirong na nekotarek ula muru, ga titot la bettung ara bo gar. Ga tuario ra uriro ties ang Morowa la naganbuong iro.  
\v 8 Eva, karuna gare migana la ibirong ga okurupin nekotarek ga oula uniap. Arouluan tavuk migat ga arit Ila Kakani leba toevang migana ila puvuvui. Ila Kakani la kauna gare masistret ila puvuvui pa na urie la la eba ina terigiang ga ameram inamaniap, eba tarang uriro uniap la man uario la namo tung. Uriro uniap la urie ninimiap ula iot mar mirie lap ganam. Eba tale alang toun tonamurit it. Karuk. Eba alang maun mirier inamaniap ganam la mitara nameng meba agimameng la eba ina terigiang.   
\s1 Non napup o ties  
\p
\v 9 Kakalait tenara ga munang toi.  
\v 10 Memani, Demas la mitara naong me tavuk onim na kimanam, ga toulai ra ga ula na pianam Tesalonaika. Pa Kresens la ula okosarong ubi na provins Galatia pa Taitas la ula okosarong ubi na provins Dalmesia.  
\v 11 Luka talamet la unama ga turuo ga okosarong ubi. Are ratmat ga na tara leba munang tie alaginang Marko ga munang ga irie. Memani, muana la ume toagaulie maset me uriro ubi.  
\v 12 O migat, asagarung ara Tikikas ga ular na taun Efeso, are ratmat ga narung me nulam le kakalait munang.  
\v 13 Tubiat leba nama munang, eba narang irie buruma ila laklage la arulai tie na taun Troas na luguan ang Kepas. Narung gat me mirie babap la maiot na luguan ang le naram ga munang nalam. Ga temamaliennang maset meba tale navaiang agat me miriro babap la makosarmeng inamaniap ma neip ma sipsipup. Narung le naram gat miriro ga munang maun.  
\v 14 Temamaliennang me Aleksanda, migana o ukosar a savalau ain, memani, mitara tokiraraong. Tubiat Ila Kakani la eba apulang uniap ira puoieng ira tavuk la akosarong.  
\v 15 Eva, amamaliennang iriro migana. Babun ama oboonang ties nung are rie la ume mabounama tiesiap pam. Memani, tale naong me ties ang Ila Kakani la bume buaramo.  
\v 16 Natauan tara la dustung na ties ga tupulo ties ang Masistret, karuk kan a migana ba la dusong ga turuo ga toagaulie me unupulap o ties. Karuk kan. Mirier inamaniap ganam la merau ga tomaiolai. Mariktung me ai Morowa meba tale o agat ang uriro kirinim la okosarmeng ira ruo.  
\v 17 Pa Ila Kakani la muo ga dusong ga turuo ga tongangasong. Are ratmat ga puorung migat meba taramang bais ula muru mai mirier garip la tale onim Isarael me uriro ties la mepto. Pa Morowa la toagaulie ga toralieong na uriro ties ula kakanu. Ga toralieong Morowa auluo logima a laion.  
\v 18 Are ratmat ga arit Ila Kakani la eba tovukutara mauluan mirier pagap mila kiram la namo makosarmeng inamaniap ira ruo, ga eba tolagiang ga tala na inamon ang la ionama na panbinim. Buaving bonim a me nakap mar mirie lap. Amen.  
\v 19 Naving uro ties tung ula muru ga ila u Prisila ga Akuila, ga me mai numeilup am Onesiforas.  
\v 20 Erastus la unama ka na taun Korin. Pa Toropimo la tafaong ga arulai la unama na taun Miletus.  
\v 21 Are ratmat ga narung meba kakalait munang titot. Babun auanula tara a afarat ga ifif ula kakanu ga eba onomain uriro alang nung. Ubulo ga Puden ga Linus ga Kalaudia ga mirier ekelesiap papap la maionama togo la osagameng “la ula muru”.  
\v 22 Narung meba onang Muranama ang Ila Kakani ga nunuo ga noagaalie ga nongangas ang. Ga ubonuvarap ang Morowa le ionang ga mimi ekelesiap ganam.