\id 2CO - Kuot NT [kto] -Papua New Guinea 2001 (DBL 2014) 
\h 2 Korin 
\toc1 Lama narain babam la omirong Paulo me mai ekelesiap onim Korin 
\toc2 2 Korin 
\toc3 2 Ko 
\mt1 Lama narain babam la omirong Paulo me mai ekelesiap onim Korin  
\c 1  
\p
\v 1 Maun ekelesiap onim Korin, Turuo Paulo, turuo non Apostolo ang Karisito Iesu. Na kan ang Morowa, touabu Apostolo. Turuo ga ekelesia papa ruang Timoti la omirong urio babam ga osagaing me miun ekelesiap la maionama Korin ga inamaniap am Morowa onim na provins Akaia.  
\v 2 Naing aime Morowa Ira buang, ga Ila Kakani Iesu Karisito, litie la eba lialang ubonuvarap ga malina miun.   
\s1 Morowa la ume maidang dalap pa na tara la betmeng giginanimup ira pa  
\p
\v 3 Ovienbuong bonim a Morowa. Irie Ira ang Ila Kakani buang Iesu Karisito. Ga irie ira migat a tavuk o ubonuvarap, irie la ume maidang dalap ma inamaniap la memaning giginanimup.  
\v 4 Eva, maidangong Morowa dalap pa, na tara la man betmeng mirier giginanimup ira pa. Ga met iriro tavuk, pakosarong ga puopang meba maidangpang gat dalap ma non inamaniap la memaning non ara giginanimup. Ga eba puopang meba maidangpang dalap ma at tavuk la maidangong Morowa dalap pa.  
\v 5 Karisito la uavio giginanim ga ngitngit. Are gat to, pava la pavio giginanim ga ngitngit me bonim a. Aret tie, ga maidangong Karisito dalap pa. Ga iriro tavuk o uidang ma dalap la dakong na ninimiap pang ira Karisito.  
\v 6 Leba paving giginanim kirat, okosarpang gare ro meba maidangang Morowa dalap mi, ga eba gat milagiang. Ga leba maidangang dalap pa, tie irie la eba maidangieng dalap mi gat ga eba mionang teteiliat. Eva, maidangong Morowa dalap mi gare ro meba dusming maranit ga miaving ngitngit garet la pame pavio.  
\v 7 Ga uanpala un nagan eba dusming maranit na tara la mibolaieng giginanim. Memani, bira mime miavio ngitngit ga pava, are ratmat ga eba mairorotang Morowa dalap mi ga pava.   
\p
\v 8 Ekelesiap papap tuam, omirpang urio ties me miun. Memani, paga ina onagiming urio giginanim la betieng ira pa na provins Esia. Giginanim ula kakanu migat la betieng ira pa, ga okurupinieng kukunim pang. Are ratmat ga agatpang eba tale puopang meba pemung.  
\v 9 Migat ara! Osainpang giginanim gare migana la osainong na la la tiesong ara ias namo eba aving. Pa urio giginanim la betieng ira pa meba tale agatpang iro kukunim pang kan ga eba pemung. Karuk. Akosarong Morowa ira pa gare ro meba naganpang it iro kukunim ang Morowa la puoong meba ina emum inamaniap la mevara ra.  
\v 10-11 Eva, miriro giginanimup mila kakanim la namo pamenamung ga paving, pa ina paralieong Morowa ga eba palagiang gat. Ga naganpang maranit ira Morowa ga auanpala meba palagiang gat tubiat. Eva, eba akosarang Morowa itmat paga leba man marikmeng me ai me palam. Migat, marikming gare tie, ga eba aptang Morowa marikming ga paagaulie. Ga papot ma inamaniap eba meptang ties aime Morowa la paralieong uluo giginanim, ga eba meivang temaieng aime Morowa.   
\s1 Man muana ga tale muo magimaong Paulo ekelesiap onim Korin?  
\p
\v 12 Tie, dalap pa la osainmeng uro ties la paramo la migat o, ga tevienpang me irie paga: Mirie pagap la makosarpang ira ma inamaniap onim na uro kimanam, apouluan tavuk ila babai ga tavuk ila migat. Eva, tale opouluan agat pang onim na uro kimanam ga masingpala inamaniap. Karuk. Ubonuvarap it ang Morowa la paagaalie ga okosarpang gare tie. Ga ira mi, busit akosarpang iriro tavuk na tara la ubipang ga mimi inamaniap onim Korin.  
\v 13-14 Tie, babap la tume mamirtung me miun, mamirtung na tavuk la karuk ma tiesiap ba la kagomeri una. Karuk. Pagap la mamirtung la uakap ga mamit it muap ma. Na irio tara la tale maset tomit, ga pagap la tuga misingtala ma. Pa tubiat eba maset tomira ga pagap la misingtuala ma. Are ratmat ga tubiat na la leba ina ana Karisito meba mavuvuoang inamaniap na ties, eba temiba ga miaving bonim tuo me nakap. Eva, eba teraba gat ga tavim bop mi me nakap.   
\p
\v 15-16 Nagantung maranit gare ro, la temiba me tavuk le akosartang, ga me mirio tiesiap la tuaramam ara. Agattung eba ka lake tala migimarang Korin ga tula bat na provins Masedonia. Ga tubiat eba inagat orouluan urio alang ga ina migimarang a lama narain tara. Met irio muana, eba ina togimaming a lama narain tara ga eba betieng tenubap ula kakanu migat na dalap mi. Ga malonim o urio, eba toagamilie ga eba inagat tosagaming me na provins Iudaia.  
\v 17 Miptang, na tara la tiestung tuga eba okosartang gare rie, atabo miga tiestung agarit, a? Na tara la tiestung me paga la tuga akosartang, atabo agatming tumet ties agarit gare teip onim na kimanam, ga tugama “Eva” ga “Karuk” iat, a? Tale kan migat.  
\v 18 Ties ang Morowa la migat o atatan makin. Are ratmat ga mipalo, ties pang migat na tara la ties pang: Tale pava gare migana la ugama, “Eva”, na nanam a pa uraio “agat ula kiro” na dalap a. Karuk kan migat!   
\p
\v 19 Memani, Poi ang Morowa, Karisito la tale ugama “Eva” ga “Karuk” iat. Ira irie Karisito, turuo ga Sailas ga Timoti la paramo bais ula muru aime kabirana mi. Ume ouluan agat ang Morowa ga ume keula busit aime Morowa.  
\v 20 Migat ara, memani mavuoong Karisito mirier midaiap am Morowa. Are ratmat ga na tara la papto ties ang Morowa, peivo “Amen” na bonim a Karisito ga pavio bonim a Morowa me nakap.  
\v 21 Ga Morowa kan la ume pangangas ga mimi, ga betbuong namurit dalap ga Karisito ga dusbuong maranit. Ga buiteong bubuo am kan.  
\v 22 Uabua mida ang ira buo meba betbuong gare inamaniap am kan. Businguala irie kan la ouluan mida ang. Ga uabua gat Muranama Ila Babai na dalap buo. Irio Muranama Ila Babai la are natauan nap o ugiginara ula kanu la namo alang Morowa buun tubiat. Aret tie ga eba gat alam mirier non pagap buun.   
\p
\v 23 Tie, oit Morowa agat tung. Are ratmat ga leba tokarabi ba, tie eba ovaikang Morowa kakarabunim tung ga eba omeira inamaniap. Pa Tale kan tokarabi. Tulo o migat. Tale gat ina tuna me Korin, memani tale tuga talang giginanim ba miun.  
\v 24 Tara la tiestung gare ro, tale kan tuga miralava a mani le nagan ming ira a. Karuk. Pa paga miagapalie meba temiba. Memani, tira dusming maranit un nagan ming.   
\c 2  
\p
\v 1 Are ratmat ga tuburio ra ties na dalap tuo gare ro: Tala kan tula Korin ga teiam dalap mi ga giginam ba kabuat.  
\v 2 Memani, mimit la puoming meba tokosarming ga teraba. Pa mimi kan la tale puoming meba makosarming dalap tuo ga teraba. Memani, turuo la tiiam dalap mi ga giginam.  
\v 3 Are ratmat ga tale tula mi tinan. Memani, na agat tung, leba tala mi ga magimarang kiribasiap mim, eba giginam ba dalap tuo me milam. Are ratmat ga lake omirtung urio babam me miun gare rie ga agattung eba tala mii tubiat ga agimarang tavuk ming le goirala ga teraba aime. Eva, tira tara la temeba dalap tuo, mimi gat la mionama maset ga temiba.  
\v 4 Migat, tara la omirtung babam me miun, mitara kadiktung ga dalap tuo la miavio giginanim ula kakanu migat, ga toiop gat nulibap. Pa tale omirtung urio babam meba talang giginanim miun. Karuk. Omirtung meba mira gare ro, “Mitara narung me milam ga tualam dalap tuo kan maset miun”.   
\s1 Maulo Paulo meba miavaiang tavuk ang migana la okosarong kiribas  
\p
\v 5 Tie, leba migana ba la ualo giginanim maun noba, tale ualo giginanim toun. Karuk. Makosarong dalap ma non mi ga giginam kirat. Pa miptang, tale kan tiestung ga tugama mikosarong mimir ganam ga giginam dalap mi. Memani, tale kan tuga talang giginanim aun migana la akosarong tavuk ila kire.  
\v 6 Apugutmiara irio migana kabirana mi ga masingmiala papot ma inamaniap a man tavuk ila kire la okosarong. Atabo urie la puoieng ira a.  
\v 7 Are ratmat ga temaieng le miavaiang kirinim ang ga maidangming dalap a. Ebun noba giginanim ula kakanu la aduieng migat irio migana.  
\v 8 Are ratmat ga mimariktung. Ina alagiming ga asingmiala la na ming migat aime.  
\v 9 Omirtung urio babam me miun. Memani, tuga tameram dalap mi eba omiuluo ties tung ga makosarming mirier pagap o karuk.  
\v 10 Miptang, leba miavaiang kiribas ang migana ba me irie tavuk la okosarong, tie turuo gat la eba tavaiang. Leba paga ba isik la tuavaia, tiestung gare ro na bonim a Karisito eba miagaralie.  
\v 11 Akosartung gare tiruo, memani ebun burana Satan ga bukiraraang. Abit ara man tavuk la ume akosar Satan.   
\s1 Unama Paulo Troas ga namo aptam tiesiap ba aime Taitas  
\p
\v 12 Tie, tara la bettung na taun Troas meba ovaiktang bais ula mumuru ang Karisito, unavo Ila Kakani alang tung meba okosartang urio ubi.  
\v 13 Pa dalap tuo la tale maiot teiliat. Karuk. Memani, ekelesia papa ruang Taitas la tale toulo mi, are ratmat ga tale muo togimaong togo Troas ga kadiktung migat me nunamap ming. Are ratmat ga marulai ekelesiap papap tuam onim Troas ga tula bettung na provins Masedonia.   
\s1 Pava gare kukuf ula mamaguieng ang Karisito  
\p
\v 14 Pa titot tivo temaieng me aun Morowa. Memani, mirier taraiap la ume pauala tapmat meba makurupeling mirier danunumiap ga pagap mila kiram. Eva, panum tapmat meba baispang o bais ula muru ang Karisito na mirier napup ganam ga are kukuf ula mamaguieng la betieng ga iavio ifif me na mirier napup.  
\v 15 Migat ara, pava la kapana gare bonat la ime ialo kukuf ula muru la uaro Karisito ga ualo kamniap aun Morowa. Urio kukuf la ime ila kabirana ma inamaniap la naganmeng ira Karisito ga maionama na alang me na panbinim. Ga ime ila gat kabirana ma inamaniap la tale naganmeng ga maionama na alang me na iou gat.  
\v 16 Me irie gar la unama na alang me na iou, urio kukuf la are kukuf o nuvarap, memani tale mepto bais pang. Pa irio gar la unama na alang me na panbinim pava la are kukuf ieng ninimiap, memani omela bais pang. Pa aga la puoong migat meba okosarang urio ubi? Karuk a noba, pa pavat.  
\v 17 Pava la tale kapana gare papot ma teip o usingnuala o kakarabunim la mela tapmat ga maiaramo ties ang Morowa meba meranam kakepup maiam non inamaniap. Pa paro kan urio ubi na kilalap a Morowa kan. Are ratmat ga na irap a Morowa ga Karisito, pame mavaik migat tiesiap la ualam paun.   
\c 3  
\s1 Teip o ubi a mida ula nou  
\p
\v 1 Tie, atabo agatming la tiespang gare tie meba inagat tesingpala a paga pava teip mila murum, a? O atabo agatming eba mimarikpang meba omirming babam meba masingiala inamaniap la pava teip mila murum, a? Tala kan okosarpang gare ro are non teip la mime okosar.  
\v 2 Memani, mimi kan la are babam pang la omirpang na dalap pa. Ga mirier inamaniap la omeit ara uro babam ga obasmeng.  
\v 3 Mimi la are mulinim me ubi pang la man paramo bais ula mumuru. Eva, mime masingmiala o ninimiap ming la kaina gare non babam Karisito kan la omirong. Eva, Tale omirong urio babam a ink o omirong ira ma tadasip. Karuk. Muranama a Morowa la amaning ninimiap irie la omirong urio na dalap mi inamaniap.   
\p
\v 4 Tiespang gare ro, muana la duspang maranit na iro paga la akosarong Karisito ga apet maset iriro la migat na irap a Morowa.  
\v 5 Migat, na kukunim pang kan, tale kan puopang it meba akosarpang paga ba. Karuk. Are ratmat ga tala kan tiespang ga pamama, “Okosarpang non ubi.” Karuk. Memani, Morowa narit la ume pangangas meba okosarpang ubi.  
\v 6 Morowa kan la pakosarong meba puopang ga betpang teip o ubi o urio mida ula nou ula kanu. Urio mida la tale kaina gare maimai ang Moses. Karuk. Paga ila nei Muranama Ila Babai la uala. Maimai ang Moses la buvureieng meba buving atatan makin, memani tale puobuong meba mavuobuong mirier maimaiap ganam. Pa Muranama Ila Babai la ualo ninimiap buun.   
\p
\v 7-8 Tinan la omirong Moses urio maimai ula tatalu ira tadas. Ga ubi ang iro maimai la ime busingiala ebat buving atatan makin. Ga na tara la uala Morowa irio maimai aun Moses, ualo gat lalabie ang aun Moses, ga mitara ilabie pava a. Pa tubiat it inar karuk ume urio lalabie. Pa merau inamaniap onim Israel ga tale puomeng meba ogimameng pava a Moses. Tie, la ubi ang iro maimai la uavio nuvarap, la betieng ga lalabie ang Morowa, tie ubi ang Muranama Ila Babai la betieng ga lalabie ula kakanu migat ang Morowa.  
\v 9 Migat, iro maimai la ume buabu na ties la betong ga lalabie ang Morowa. Pa urio mida ula nou la bume buavio meba betbuong na tavuk ila puvuvui, la betieng ga lalabie ula kakanu migat ang Morowa.  
\v 10 Irio maimai tinan inamaniap onim Israel la agatmeng paga ila kakani gare lalabie ang Morowa, la betong ara garet paga agarit. Memani, irie mida ila nei la betong ga busingiala o lalabie ula kakanu migat ang Morowa.  
\v 11 Eva, irio maimai onim tinan la ut it a tara ila papoi, betong ga lalabie ang Morowa. Pa irio mida ila nei la eba ot atatan makin, la betong ga lalabie ila kakani migat ang Morowa.   
\p
\v 12 Eva, auanpala un nagan iriro paga la eba ot atatan makin ga Morowa. Are ratmat ga tale kan mulipaba me utmat bais ula mumuru, ga man baispang o maranit.  
\v 13 Opet betieng bais ula mumuru uakap maset. Are ratmat ga tale kan akosarpang tavuk are Moses la akosarong. Uraio pava a la ilabie a nap a buruma meba tale agimameng inamaniap onim Israel pava a. Irio lalabie la ulabie kirat it ga ina kakalait pikong. Pa tale kan paraio ties ba o bais ula mumuru. Karuk.  
\v 14 Pa libonmeng ara dalap ma inamaniap onim Israel tinan, ga tale ameit muana o urio mida ula tatalu na maimai ang Moses. Titot gat, inamaniap onim Israel la tale ameit muana o urio maimai gare ualu agat maiong a nap a buruma. Eva, leba nagameng ira Karisito, tie eba anavam Morowa agarip maiam ga eba amira migat muana o maimai gare apugutuara Morowa nap a buruma na agarip maiam.  
\v 15 Migat! Mirier taraiap puoieng titot, inamaniap onim Israel la mime ovas maimai ang Moses, pa dalap ma la libonmeng ga tale ameit man paga Morowa la namo masingala o urie maimai.  
\v 16 Pa leba migana ba la marigiong dalap a me ai Ila Kakani, tie eba avikang iro nap a buruma ga unavam dalap a ga eba aera Ila Kakani irie aga.  
\v 17 Miptang, Ila Kakani, irie Muranama Ila Babai. Ga leba ot Muranama ang Ila Kakani na dalap a migana ba, tale gat amaning kiribas meba auluan maimai ang Moses.  
\v 18 Ga bubuo la tale kan bume buraiam pavap buo gare Moses. Karuk. Pa ninimiap buong la ime avuoieng lalabie ang Morowa, are tilagum la asinguala paga. Are ratmat ga mirier taraiap la bume obula lalabie ang Ila Kakani, ga tavuk buang la betong gare tavuk ila puvuvui ang Ila Kakani. Ga lalabie buong la man kakani ra. Ga lalabie buong la betong aun Ila Kakani, irie la Muranama.   
\c 4  
\s1 Ubi maiong Apostolop la ialo ileng na arubu  
\p
\v 1 Tie, Morowa la kadikong me palam ga ualo urio ubi paun meba baispang o bais ula mumuru. Are ratmat ga tale kan pame palala iro uriro ubi. Karuk.  
\v 2 Pa agopang ara tavuk la pame akosar iro kagonuriap ga mulinubap. Ga tale oigorpala ties ang Morowa. Karuk. Pa pame ovaik ties migat ang Morowa me maun inamaniap, ga mepto ra. Met iriro tavuk, ga masingpala pamumurum, ga eba oagatmeng ubi ula mumuru la okosarpang na irap a Morowa.  
\v 3 Ga urio bais ula mumuru la pame ovaik, leba kagoiring, tie kagoiri na dalap ma teip la namot saikmeng na iou.  
\v 4 Mirie inamaniap la tale naganmeng ira Morowa ga morowa o kakarabunim onim na uro kimanam la obunakong agat maiong mirio inamaniap ga tale naganmeng. Are ratmat ga lalabie o bais ula mumuru la tale puoieng meba iobung na agarip ga dalap ma, ga tale naganmeng ira Karisito, irie la kauna gare muranama a Morowa.  
\v 5 Eva, mirulo o uro ties, memani, tale pame teparama kan. Karuk. Pame ties gare ro, Iesu, irie Ila Kakani pang, ga betpang teip mim o ubi meba paving bonim a Iesu me nakap.  
\v 6 Memani, Morowa tinan la okosarong urio kimanam ga ugama, “Kabirana o arubu, eba betieng ileng.” Irio kan Morowa la ulabie na dalap a meba bira maset lalabie ang Morowa la ulabie na pava a Karisito.   
\p
\v 7 Pa pavat teip agarit gare koi o kimanam. Pa la uriro bais ula muru maset la ut ira ma neip pa, la eba masinguala inamaniap o uriro kukunim o bais ula mumuru la paramo, uriet la ang Morowa, pa pava la karuk.  
\v 8 Na mirier napup, giginanim la ime betieng ira pa, pa tale kan pakiraraieng. Papot ma pagap la mime onomein agat pang, pa agat pang la tale kan arot fafanatieng.  
\v 9 Mime pakala teip tapmat meba akosarmeng tavuk ila kire ira pa, pa tale kan paulai Morowa. Mime pamenam ga pakirarameng, pa tale kan pavara.  
\v 10 Ma mirier lap, namo panamurmeng gare Iesu la anamurmeng. Pa tale kan pavara. Utmat la masinguala inamaniap, Iesu gat la man inim ka na neip pa ga man pagaulie.  
\v 11 Eva, pame okosarpang ubi ang Iesu, ga ma mirier lap la peinim na uro kimanam, mime oisin inamaniap alang meba pamenamung ga paving. Pa tale ka pavara, ga utmat la masingiala mirier inamaniap, Iesu la ut ma na miro neip pa onim it na kimanam la eba tale maiot busit gare sospen o kimanam.  
\v 12 Migat, pame paramo bais ula mumuru pa oisinmeng inamaniap alang meba pamenamung ga paving. Pa omila ninimiap la iot atatan makin o bais ula muru la paramo me miun.   
\p
\v 13 Babam o punuarap na Babam ula puaru la tiesieng gare ro,  
\q1 “Nagantung ira Morowa. Are ratmat ga marulo inamaniap o ties ang.” \rq Sam 6:10\rq*  
\p Pava gat la pamaning namurit nagan gare irio migana. Are ratmat ga pame paramo ties ang Ila Kakani.  
\v 14 Peira, imua Morowa Ila Kakani Iesu na una. Are ratmat ga eba gat paemung ga ponang ga Iesu, ga eba iat bulagiang me na panbinim ga bunang ai.  
\v 15 Miptang, mirio giginanimup la betmeng ira pa meba miagamelie. Met iriro tavuk, ubonuvarap ang Morowa la betieng ga kakanu ga ialuam papot ma inamaniap ga naganmeng ira a. Me uriro tavuk, eba maialang inamaniap “temaieng” maiong ula kakanu me aun Morowa ga ovienmeng bonim a.   
\p
\v 16 Are ratmat ga tale kan pame palala la man okosarpang ubi ang Morowa. Karuk. Migat, neip pa la palalameng ga tubiat eba kiram ba. Pa tie, ninimiap la uabu Morowa na dalap pa la nou ma mirier lap narit narit.  
\v 17 Are ro: Mirier giginanimup la man pakirarameng, maiot it a tara ila papoi. Pa irio paga la parangaong meba apala lalabie ila kani la ut atatan makin. Ga eba makotarekieng migat mirier giginanimup titot la betmeng ira pa.  
\v 18 Eva, tale kan paburio agat me mirier pagap la puopang meba magimapang ma irap pa. Karuk. Pa pame agat maranit me mirier pagap la puopang meba magimapang ma irap pa. Memani, pagap la puobuong meba magimabuong ma irap buo, eba kiram ba kakalait. Pa pagap la tale puobuong meba magimabuong ma irap buo, eba maiot atatan makin.   
\c 5  
\s1 Obuluan na ang Morowa na ninimiap buong  
\p
\v 1 Tie, paburio agat pang me pagap la maiot atatan makin. Memani, abira gare ro, Neip pa la are luguan onim na uro kimanam. Tubiat, miriro neip la ponama mana, eba kiram ba ga meving. Pa amanim Morowa non neip ga namo alam paun. Mirio neip Morowa kan la makosarong ira pa ga maiot na panbinim, ga mirio neip la eba maiot atatan makin.  
\v 2 Migat, palalabuong ma mirio neip la bunama maun to na uro kimanam. Are ratmat ga mitara kadikbuong migat meba buaram mirio neip buo mila neim la maiot atatan makin ga tebualung ma gare migana la teualu a buruma ila nei.  
\v 3 Ga nabuong meba tebualung gare ro. Memani, leba tebualung, eba bunang na neip mila neim onim na panbinim ga tale bunarum gare teip la namot saikmeng. Karuk.  
\v 4 Eva, tara la bunama ma na neip onim na uro kimanam, bume osainbuong giginanim ga mime meliba dalap buo. Muana la sueibuong, pa tale are la buga mabulaing mirio neip onim na kimanam. Karuk. Pa buga buaram mirio neip onim na panbinim ga tebualung ma gare buruma la bualuam neip buo a. Me iriro tavuk, eba magobuong miriro neip mila tatalim la eba saikmeng, ga omela ninimiap migat.  
\v 5 Morowa kan la parangaong me urio ninimiap. Ga uala Muranama Ila Babai paun kauna gare ties o mida ang, la namo alam miriro pagap tubiat.   
\p
\v 6 Are ratmat ga man paga leba ama betang, tala kan parau aime. Pira, miriro neip la kamena gare luguan la ponama ana titot na uro kimanam. Pa na irie tara, tale ponama ga Ila Kakani na pianam ang.  
\v 7 Eva, bira miriro pagap kan eba betmeng migat. Memani, tale kan magimapang ma irap pa, pa naganpang eba pamanim neip mila neim onim na panbinim.  
\v 8 Are ratmat ga tale kan parau me nuvarap. Memani, pira leba paving ga mapolaing mirio neip, eba ponang ga Ila Kakani na urie pianam ang migat.  
\v 9 Are ratmat ga leba ponang tapma na neip pa, o ponang lavie ma neip pa, man ubipang maranit meba makosarpang mirier tavukup la naong Ila Kakani maime.  
\v 10 Memani, bira tubiat bubuor ganam la eba dusbuong na ties ang Karisito, ga eba mavuvuoang mirier pagap la makosarbuong. Ga leba akosarbuong tavuk ila mumuri na tara la bunama mana miriro neip onim na kimanam, o leba akosarbuong tavuk ila kire, bubuor iat ganam narit narit la eba obula kamniap puoieng ira tavuk la akosarbuong.   
\s1 Ubimeng Apostolop meba magamelie inamaniap meba memaning narit dalap ga Morowa  
\p
\v 11 Tie, pira tubiat bubuor ganam eba dusbuong na ties ang Karisito ga okosarpang ubi ang Iesu. Memani, parau aime Ila Kani. Are ratmat ga peimu agat maiong meba omeira inamaniap la uakap la pava man teip na irap a Morowa.  
\v 12 Agatming la miga paga tesingpala pava teip mila murum na irap mi? Karuk. Paga miagapalie meba mira ga mipulang puvut ties mai inamaniap la magimameng tavukup agarit ga tiesmeng ma, pa tale agatmeng maset me pagap la maiot na dalap ma. Are ratmat ga umirpang me mii meba tevienming kan ira pa ga pavienming ga mipulang ties ula puvuvu mai mirie inamaniap.  
\v 13 Leba bangutpang, tie bangutpang meba okosarpang ubi ang Ila Kakani. Pa leba agat pang la uakap, tie okosarpang ubi gare tiro meba miagailie ga omiuluan maset ties ang Ila Kakani.  
\v 14 Makosarpang gare ro, memani na ang Karisito la ime painim meba okosarpang ubi. Memani, non migana la buagaulie ganam ga uvara ra, ga tale gat bunama upat kirinim. Iriro tavuk la are bubuor ganam la buvara ga irie.  
\v 15 Eva, uvara ra Karisito meba maagaalie mirier inamaniap. Are ratmat ga inamaniap la omela ninimiap mila neim, buat meinim ira ma kan ga obuluan na buong na tara la bunama na uro kimanam. Karuk. Pa mumuru le meimung ira Karisito irie la uvara ra meba buagaulie ga inar inim   
\p
\v 16 Tie, titot la pava ra ekelesiap. Are ratmat ga tale gat avuvuopang migana ma non ara agarip maiam inamaniap onim na kimanam. Karuk. Migat, tinan la apouluan tavuk onim na uro kimanam ga avuvuopang migana. Eva, pagamariet a Karisito. Pa titot apet irie aga, ga tale gat ina pagamarie.  
\v 17 Are ratmat ga leba parepang migana ba ira Karisito, tie akosarong Morowa ga betong migana ila nei migat. Miptang maset, titot tavuk ila tatali la karuk ara aime, pa betong ara tavuk ila nei!  
\v 18 Morowa kan la irie muana ma mirio pagap. Tinan la pava karorap am, pa iro ubi la okosarong Karisito, pagaulie Morowa ga namurit dalap pa ga irie. Ga ualo urio ubi paun meba magapalie mirie non inamaniap meba namurit ba ma dalap ma ga irie.  
\v 19 Muana o ties pang la igamaro: Morowa la ubiong ana Karisito, ga man makosarong mirier teip ga amiolai tavuk maiang karorap ga namurit dalap ma ga irie. Tale gat agatong me mirier tavukup ganam mila kiram la makosarmeng. Pa ualo uro ubi paun meba baispang urio bais ula muru meba makosarang ga betmeng namurit dalap ma ga mirie.   
\p
\v 20 Karisito, irie la are orong la pasagaong me mi. Are ratmat ga opuopang nanam a Karisito ga mimarikpang maranit, are Morowa kan la bumarikong meba mamarikbuong mirier teip ga mumaiong ai. Are ratmat ga pame paramo ties ang kan orong me maun mirier inamaniap. Are gat to, mimarikpang maranit na bonim a, mumuru le amiolaing tavuk ang karorama ga namurit ba ma dalap mi ga Morowa.  
\v 21 Miptang, Karisito la tale kan ume okosar kirinim. Karuk kan migat. Pa upamuam Morowa mirier kirinimup buam abuo, ga uaviam gare migana o kirinim migat. Okosarong gare tiro meba betbuong namurit dalap ga Karisito, ga eba bat bunang gare inamaniap mila puvuvum am Morowa.   
\c 6  
\s1 Maiavio Apostolop papot o giginanim iro urio ubi  
\p
\v 1 Tie, pava la pame iat ubi ga Morowa, are ratmat ga mimarikpang maranit gare ro, Ebun miairo ubonuvarap ang Morowa agarit.  
\v 2 Memani, ulo Morowa na Babam ula puaru:  
\q1 “Tupto nulibap ming ga miagarulie na tara la avuorung. Ga miagarulie na irie tara la avuorung meba ina milagirang.” \rq Aisaia 49:6\rq*  
\p Miptang! Titot it tara la namo maagaalie Morowa inamaniap. Eva, tirot titot la namo ina malagiang Morowa inamaniap.   
\p
\v 3 Pava la tale napang aime migana ba le tiesang kirat ga obunakang ubi pang me bais ula muru. Karuk. Pa paga masingpala ma tavukup mila puvuvum na ninimiap pang meba tale puomeng meba meniaang ubi pang.  
\v 4 Pa man ubi la okosarpang, urie la masingiala pava teip migat o ubi am Morowa. Tavuk pang ila mumuri me maun mirier teip ganam la are ro: Pame dus maranit migat me non ara non ara giginanimup la mime betmeng ira pa, ga me mirie pagap la mime okosar ula kiro ira pa, ga me pagap la mime pakirara.  
\v 5 Non gat paga, paisikmeng ga pamaiabu na luguan o arubu. Mime pakala karorap ga maiaramo ties ula kiro me irap pa. Pame okosar ubi ula mamaranu, ga tale kan pame maset duri. Ga non taraiap tale kan pamaning parak.  
\v 6 Pa pame apouluan tavuk ila babai la karuk o kiribas ba ira a, ga opet migat bais ang Morowa. Pame dus upat giginanim. Pame maagapalie inamaniap ga nepasakopang ga mirie. Ga ume pabodakong Muranama Ila Babai ga pagaulie. Non gat paga, pame akosar migat tavuk o na me inamaniap. Talet na nanamup pa. Karuk. Pa maagapalie migat.  
\v 7 Pame paramo ties migat. Ga pame okosar ubi o ngangas ang Morowa. Pame paria tavuk ila puvuvui, are kor o danunumiap la paria maranit na kilalap pa meba nepanamung.  
\v 8 Non teip la mime mavien bop pa. Mirie la mime meiniam bop pa. Mirie la mime miaramo ties ula kiro malonimup pa, pa mirie la mime mamelo non teip namo akosarpang tavuk ila mumuri. Pa pame paramo ties migat, pa agatmeng mirie namo pava teip o kakarabunim.  
\v 9 Agatmeng non teip namo pavat teip agarit, ga agatmeng mirie namo pava la teip mila kanim. Kapana gare migana la namo aving na kilalap ma karorap, pa man peinim ka. Eva, namo pakirarameng, pa tale kan pamenam ga paving.  
\v 10 Pame magasangen papot ma giginanimup, pa mitmat la tale puomeng meba meiniang tenubap pang. Tale pariam papaluaip ma pagap onim na uro kimanam, pa pame magampe inamaniap ma pagap la makotarekmeng pagap onim na uro kimanam. Eva, tale kan pariam pagap ba na uro kimanam, pa pamanim mirier pagap ganam.   
\p
\v 11 Pasogop pam onim Korin. Miptang, ties pang la uakap me miun. Menapam mirier pagap na ninimiap pang uakap, ga tale paraio agat pang me milam. Karuk.  
\v 12 Tale mabunakpang dalap pa me milam. Karuk. Napang maset me milam. Pa mimi kan la mabunakming dalap mi, ga tale narit dalap buo.  
\v 13 Are ratmat ga tiestung me ira mi gare mamo la maunoong lop am: Mimi gat la minapam mirier pagap na ninimiap ming are pava la panapam mirier pagap na ninimiap pang.   
\s1 Bubuo ekelesiap la buat bunum ga parepbuong ira ma teip la tale naganmeng ira Iesu  
\p
\v 14 Tie, mimi ekelesiap, buat minum iat ga parepming ira ma inamaniap la tale naganmeng ira Iesu. Karuk. Memani, mime mameuluan non ara tavukup. Miptang, tavuk ila puvuvui ga tavuk ila kire, tale kan nevuoliong are lalabie ga arubu la tale kan iat nevuoliong. Tala kan ara!  
\v 15 Are gat to, atabo Karisito la puoong meba nepapaang ga Satan, a? Tala kan migat! Are ratmat ga ekelesiap ga inamaniap la tale naganmeng ira Iesu, tale memaning namurit agat ga namurit tavuk la mime akosar. Karuk.  
\v 16 Are mani ga eba iat bupamung luguan ila babai ang Morowa ga luguap maiam morowap o kakarabunim, a? Tala kan migat. Pa bira bubuo kan la luguan o lotu ang Morowa la inim. Are tinan la ulo Morowa tinan gare ro,  
\q1 “Eba tonang ga mirie ga eba tamung kabirana ma. Ga eba turuo ba Morowa maiang, ga eba mirie ba inamaniap tuam.” \rq Livai 26:11-12, Ieremia 32:3, Esekiel 37:27\rq*   
\p
\v 17 Are ratmat ga maulo Ila Kani inamaniap am:  
\q1 “Mamiolaing inamaniap la tale tomeit, ga buat amiuluan tavuk maiang. Ga dusming kakaliat uluo kirinim la mime okosar. Are ratmat ga eba teraba ga eba mirairang ga eba mionang ga turuo.  
\v 18 Ga eba turuo ba Mamo ming, ga eba mimi ba lop tuam. Ila Kakani, irie muana o urier ngangas gano. Irie kan la tiesong gare ratmat.” \rq 2 Samuel 7:14, 7:8, Ieremia 31:9\rq*   
\c 7  
\p
\v 1 Pasogop pam migat, ualam Morowa mirio midaiap buun. Are ratmat ga buvaiam mirier kirinimup ganam la bume makosar ira ma neip buo ga ira ma agarip buam. Eva, eba bubabaim ba migat. Ga buraung aime Morowa ga abuluan migat tavuk ila babai ma mirier lap ganam.   
\s1 Ekelesiap onim Korin la mialam ibup ma iro kirinim ga teuba Paulo migat maime  
\p
\v 2 Tie, mimarikpang meba mimanim dalap mi la uakap! Tale kan akosarpang tavuk ila kire ira migana ba kabirana mi. Tale kan akirarapang migana ba kabirana mi meba alaming. Tale kan avanapang migana ba ga paranam pagap am. Karuk.  
\v 3 Tale kan tuaramo uriro ties meba mivurepang o ties. Karuk. Memani, tiespang ara tinan gare ro, Napang maset me milam. Are ratmat ga leba miving, eba paving ga mimi. Pa leba mimung, eba gat pemung ga mimi.  
\v 4 Mating nagan ira mi, are ratmat ga tale kan turaio ties ba me milam. Na tara la tiestung me milam, tume teruba me milam ga tuaviam bop mi me nakap me tavuk la amiuluan. Me mirier giginanimup la betmeng ira pa, tume agat me milam. Ga itmat la makosarong dalap tuo ga maiot teteiliat, ga dakieng tenubap na dalap tuo.   
\p
\v 5 Memani? Muana, na tara la betpang na provins Masedonia, tale puopang meba aagapalie maset. Memani, non ara giginanimup la betmeng ira pa. Non gat paga, non inamaniap la meinio ties pang ga nenananpala o ties ga mirie. Pa parau ga giginam dalap pa.  
\v 6 Pa na irio tara, Morowa la ume mairorot dalap ma inamaniap mila merau, asagaong Taitas me pai ga maidangong gat dalap pa ga ponama teteiliat na tara la agimapang.  
\v 7 Na tara la betong Taitas pai, maionama bat dalap tuo teteiliat. Talet iriro, pa na tara la paulo mimi la mairorotming dalap a, urio la mairorotieng dalap pa. Toulo Taitas la miga maset togimaming, ga meliba dalap mi me kiribasiap mim la makosarming tinan, ga mitara agatming meba narit ba ma dalap mi ga turuo. Are ratmat ga mitara teruba.   
\p
\v 8 Migat, tinan la giginam dalap tuo. Memani, urio babam tung la ialo giginanim miun. Pa titot la karuk, memani orit urio giginanim la eba rot iot a tara ila papoi.  
\v 9 Titot la teruba, tale teruba me giginanimup mim. Karuk. Teruba me urio giginanim la mikosarieng ga marigimeng dalap mi. Tira, Morowa kan la ualo urio giginanim miun, are ratmat ga tale kan arot mikiraraieng ties pang. Karuk.  
\v 10 Memani ga tiestung gare tiro? Muana, na tara dalap mila giginam la ume ualam Morowa, urio la ime makosarieng teip ga marigimeng dalap ma, at irio tavuk ga ina ume malagi Morowa. Pa giginam ma dalap ma teip onim na kimanam, la tala maagailie meba marigimeng dalap ma ga naganmeng ira Morowa. Karuk. Pa urio la ime ialo nuvarap maun.  
\v 11 Tie, agimaming man paga la alagiong Morowa na ninimiap ming o urie giginanim: Imu urie giginanim agat ming meba masingmiala la tale akosarming tavuk ila kire. Ga temaiara dalap mi kirat meba nekaromela ga tavukup mila kiram. Ga mirau migat me noba tavukup mila kiram la namo betmeng. Eva, miga togimaming ga mimamaranim meba akosarming tavuk ila puvuvui. Are ratmat ga mimamaranim ba meba airorotming irio migana la okosarong kirinim. Tie, ira ma mirier pagap la makosarming meba oirorotming urio ties, tavuk ming la pasinguala tale mimaning kiribas.   
\p
\v 12 Are ratmat ga tinan la omirtung urio babam me miun. Pa tale omirtung urio babam meba agattang me irio migana la okosarong kiribas. Ga tale agattung aime irie non migana la okosarong irie migana kiribas ira a. Karuk. Muana ga omirtung urio babam la are ro: Le kan misingtala na ming kan maset me palam ga omiuluan ties pang na irap a Morowa.  
\v 13 Met iriro tavuk, maidangong Morowa dalap pa ga ponama teteiliat. Non gat paga, dakieng tenubap ula kakanu migat na dalap pa! Memani, paulo Taitas a gas a tavuk ila muri la akosarming ira a, ga kadik ang la aiolai ga auup malina muranama a.  
\v 14 Tinan, tuaviam bop mi me nakap na tara la man gastung ga Taitas. Ga na tara la ula mii, asinguala tavuk ming o ties tung la migat o. Are ratmat ga tale kan mulipaba me tiesiap la paviam bop mi. Karuk. Memani, asingmiala Taitas o ties tung la migat o are mirier taraiap la pame paramo ties migat me miun.  
\v 15 Me nuraiap ula kanu maset, alagiming Taitas ga mipto ties ang. Ga mamiuluan mirier pagap la miulo meba makosarming. Eva, inagat agatong Taitas me mitmat ga mitara naong me milam.  
\v 16 Teruba titot. Memani, nagantung migat, eba bat makosarming tavukup mila puvuvum.   
\c 8  
\s1 Tieong Paulo me kamniap la namo osagaang me maun ekelesiap onim Iudaia  
\p
\v 1 Ekelesiap papap tuam, paga palang ait me miun o ubonuvarap la ualo Morowa maun ekelesiap la maionama na provins Masedonia.  
\v 2 Giginanim ula kakanu la betieng ira ma ga urio giginanim, ga urio giginanim la imeram migat dalap ma, pa memaning tenubap ula kakanu. Na irie tara tale memanim papot ma pagap ga baim maset. Pa agatmeng me non ekelesiap ga mepamuam papot ma kakepup ga non pagap maiam meba magamelie non inamaniap am Morowa.  
\v 3 Avaiktung tavuk maiang mi ga mirulo: Mepamuam mirio kakepup ga non pagap maiam meba mealam maun miriro inamaniap am Morowa. Eva, mealam un tenubap ga okurupmein kukunim maiong gano.  
\v 4 Pameka ga mamaranim meba kepala meba iat ubimeng ga non inamaniap ga mepamum kakepup ba meba magamelie inamaniap am Morowa na provins Iudaia.  
\v 5 Tinan la agatpang gare ro eba mialam kakepup ba meba magamelie non inamaniap am Morowa onim Iudaia. Pa tale okosarmeng gare tiro. Karuk. Lake midameng meba omeuluan agat ang Morowa me mirier pagap ganam. Ga tubiat pamelo bat meba mamiuluan mirier tiesiap la mapalo ma.  
\v 6 Are ratmat ga amarikpang Taitas maranit meba ala mii ga miagaalie ga itamung urio ubi. Memani, tinan la ula betong Taitas mi ga imuam agarip mim meba mipamum kakepup ga osingmiala ubonuvarap ming me maun non inamaniap am Morowa.  
\v 7 Mirier pagap la mime makosar ma tavukup la murum migat: Mime nagan maranit ira Morowa, ga ovaikming urie nagan ming ula mamaranu. Mimaning papot o agat ula muru ga mimaning na ula kakanu migat meba okosarming ubi ang Morowa. Ga mime na migat me palam. Are gat to, akosarming gat tavuk ila mumuri maset me urio kamniap o ubonuvarap gat.   
\p
\v 8 Miptang, tale tulo meba mipamum kakepup ba ga mialam. Karuk. Muana a tavuk maiang inamaniap onim na provins Masedonia, urie la tugat tamerang agat ming, meba orera urie ubonuvarap ming la migat o.  
\v 9 Omit ara ubonuvarap ang Ila Kakani buang Iesu Karisito. Uariam papot ma pagap, pa maulai miriro pagap ga betong gare migana ila bai meba miaagalie, ga miaram papot ma pagap la namo alam Morowa miun.   
\p
\v 10-11 Tie, me urio ties o kamniap, tuga ovaiktang agat tung meba maset oagaralie agat ming. Are ratmat ga mirulo gare ro, Itmiamung uro ubi. Memani, mimi la pumiaro urio ubi o unan karanim ga naming meba man omiuluan. Eva, titot le okosarming urio ubi ga itmiamung. Temiba ga itmiamung urio ubi are tinan la temiba ga pumiaro. Mialam namik ma pagap ga kakepup la manim, mialam it.  
\v 12 Leba naming migat meba mialam pagap ga kakepup, tie naong Morowa me itmat tavuk ming. Tale agatong meba mialam pagap la tale mimanim. Karuk. Eba teaba me kamniap la miga mialang ma pagap la mimanim ma.   
\p
\v 13 Tale narung meba tabung giginanim mibuo meba maagamilie mikmigap mim onim Iudaia. Karuk. Narung me milam meba iat nevuoming ma pagap:  
\v 14-15 Titot a iro tara, mimanim papot ma pagap. Are ratmat ga puoming meba maagamilie ekelesiap na provins Iudaia ga eba iat nevuoming ma pagap. Are gat to, tubiat leba kagesming ma pagap, pa mirie la memanim papot ma pagap, tie eba nevuoming iat ma pagap. Leba okosarming garet tiro, nunumiap buong la eba nepuoieng gare Babam ula puaru la ilo gare ro,  
\q1 “Inamaniap la mamela papot ma upaubip a mana, la tale maset memanim. Pa inamaniap la omela tatak it parak, eba tale kagesmeng o parak.” \rq Exodus 16:18\rq*   
\s1 Tavuk me unualeap ubuo kamniap na lotu  
\p
\v 16 Tie, tivo “temaieng” me ai Morowa la imu agat ang Taitas ga amaning namurit agat gare pava. Memani, irie gat la naong maset meba miagaalie.  
\v 17 Are ratmat ga ugama “eva” na tara la amarikpang meba ala migimaang. Migat, irie kan la man agatong meba ala, ga urangaong meba pamarikang la eba pama kepala aime. Tie, eba ala mi.  
\v 18 Asagapang gat non ekelesia papa pang ga ula ga Taitas. Irio papa la ume uaramo o bais ula mumuru ga amaning bonim ula kanu na mirier luguap o lotu togo.  
\v 19 Non gat paga, ekelesiap togo la aitemeng meba amung ga pava ga eba pagaalie o urio ubi o nuaviap o kamniap. Okosarpang iat urio ubi ga irie meba ovienpang bonim a Ila Kakani, ga masingpala ekelesiap la napang migat meba magapalie.  
\v 20 Tale napang aime migana ba meba aramang ties ba ula kiro me tavuk pang la pame upale ubuo urio kamniap la maialo inamaniap un tenubap. Are ratmat ga temamalienpang migat me uro ubi ga asagapang irio papa ga upama ga Taitas.  
\v 21 Memani, paga temamalienpang meba akosarpang tavuk ila mumuri na irap a Morowa, ga na irap ma inamaniap gat.   
\p
\v 22 Ga asagapang gat non ekelesia papa pang ga ula ga litie. Papaluaip ma taraiap la pamero agat ang me milam na non ara ubiap, pa agimapang la mitara mamarani ga makosarong mirio ubiap. Ga naganong maranit ira mi meba akosarming tavuk ila mumuri ga mipamum mirio kakepup me kamniap. Are ratmat ga mitara mamarani meba leagalie me urio ubi.  
\v 23 Amit ara Taitas, irie pasogo ruang la iat ubiing meba miagailie. Pa ira lie litio papapien pangan, litie teipien o ubi o lotu migat ga lime asingliala tavuk liang ila puvuvui na ninimiap liong. Ga non inamaniap la mime ovien bonim a Karisito ira tavuk liang.  
\v 24 Are ratmat ga maset malagiming ga masingmiala o na ming ga umialeng maset mabuo. Non gat paga, masingmiala la tale kan pame mivien agarit. Are ratmat ga ekelesiap togo la eba meptang irio tavuk ming ila muri ga eba mira maset la naming maime ekelesiap papap na mirier pialap.   
\c 9  
\s1 Ties me urio kamniap, urie la eba magailie ekelesiap  
\p
\v 1 Tie, omit ara o urio kamniap la paga palang meba maagaalie ekelesiap onim Iudaia. Are ratmat ga tala kan omirtung ties ba ula laklago me uritmat.  
\v 2 Memani, marit ara dalap mi la temaiara meba okosarming urio ubi, ga mirier taraiap tume mavientung bop mi na irap ma Masedoniap, marulo gare ro, “O unan karanim urangameng ara ekelesiap na taun Korin na provins Akaia meba pumaiarang urio ubi.” Tie, mepto urio ties me milam la mimamaranim meba okosarming urio ubi, ga urio gat la imuam papot ma Masedoniap meba okosarmeng.  
\v 3 Pa tale narung me uriro ties la paramo meba mavienieng bop mi ga betieng gare ba ties agarit. Karuk. Narung meba urangaming aret tie la marulo. Are ratmat ga masagarung naien ma ekelesiap papap ga mela mi.  
\v 4 Memani, turau ebun betieng ubi ming gare ro, Na tara noba ekelesiap onim Masedonia la eba mela ga turuo ga migimapang, la tale orangaming urio kamniap ga eba mulimiba maset. Ga eba muliruba gat, memani tume mavien bop mi.  
\v 5 Are ratmat ga masagarung miriro papap meba meke me rulam ga mela migimameng, ga lake orangameng urio kamniap la mirulo meba osagaming. Ga met iriro tavuk, urio kamniap eba terangaieng gare kamniap migat la eba mialang un tenubap, ga eba tale are ba paga la paga paranang miun.   
\p
\v 6 Tie, me ubi meba maagamilie ekelesiap papap mim, agatming maset ume uriro ties: “Migana la ulio tatak paparak, ebat arang tatak parak. Pa migana la ulio papot o paparak, eba arang papot o paparak.”  
\v 7 Mimi ganam narit narit le lake maset agatming na dalap mi kan, ga omiuluan it urio agat ga mialang kamniap. Ebun giginam dalap a migana ba ga eba alang kamniap. Ga ebun amaranmela inamaniap meba alang kamniap. Irio tavuk la tale mumuri na irap a Morowa. Memani, naong Morowa maime inamaniap le maialang kamniap un tenubap.  
\v 8 Ga puoong Morowa meba alam mirier pagap ganam miun o ubonuvarap ang. Ga eba mimanim papot ma pagap meba makosarming ubiap mila mumurum ga maagailie gat mirie non inamaniap gat mirier lap ganam.  
\v 9 Are la ilo non Sam me irio tavuk gare ro,  
\q1 “Irio migana la ualam papot ma pagap maun inamaniap mila baim, are migana la magoong kabop tapmat na ubi. Tavuk ang ila puvuvui la ut maset atatan makin.” \rq Sam 112:9\rq*   
\p
\v 10 Tie, Morowa la ume ualam kabop ga paparakiap maun inamaniap, irie la eba gat alam papot ma tarap meba makosarming tavukup mim mila puvuvum ga eba mibodakang maset a tavuk ila puvuvui.  
\v 11 Eva, eba alam Morowa papaluaip ma pagap miun, ga puoming meba mialam papaluaip ma pagap maun ekelesiap papap. Pa leba okosarming gare tiro, tie eba paving urio kamniap me maun ekelesiap onim Iudaia, ga papot ma inamaniap la eba meivang temaieng me aun Morowa me ubi la okosarbuong.  
\v 12 Migat, urio ubi la okosarming ga mialo kamniap, la eba magailie non ekelesiap la kagesmeng. Ga non gat paga, irio tavuk la eba makosarang ga eba maset meivang temaieng me aun Morowa.  
\v 13 Uriro ubi la okosarming meba magailie ekelesiap papap, busingiala gare ro, Mime nagan iro bais ula muru ang Karisito ga mime omiuluan maset ties ang ga mime magamilie mirie gat non ekelesiap. Are ratmat ga eba ovienmeng bonim a Morowa. Ga tara la omela ekelesiap onim Iudaia uro kamniap, meira la mialo kamniap meba gat magamilie mirie non teip, meba gat ovienmeng bonim a Morowa.  
\v 14 Ga eba marikmeng me ai Morowa meba milaminaisang. Eva, eba omeira la dakming migat o ubonuvarap ang Morowa. Are ratmat ga eba parepmeng dalap ma ira mi.  
\v 15 Bualang temaieng ula kakanu aun Morowa me urio kamniap ang, Iesu Karisito. Memani, kamniap la ualo Morowa buun, urie la mitara kakanu, are ratmat ga tale puobuong meba buaramang ma nanamup buo.   
\c 10  
\s1 Uinio Paulo ties ula kiro maiong teip la namo meiniang ubi ang  
\p
\v 1 Tie, turuo Paulo, tuga avuvuttaling non paga la tokiraraong kirat. Tuptam non teip kabirana mi la tiesmeng me rulam gare ro, “Tara la unama ga pava, ume ties teteiliat ga ume kan tekapir. Pa na tara la unama kakaliat, ume ualam tiesiap mila mamaranim paun na babap la mamirong.” Are ratmat ga tuga mimariktang maranit a tavuk o malina ga tavuk o tekapir are Karisito la ugamarie.  
\v 2 Mimariktung meba tale tokosarming ga tiestang maranit na tara la eba tala migimarang. Migat, puorung meba okosartang gare tie ira ma mirio inamaniap la mime tovure o ties agarit ga megama aruluan tavuk maiang inamaniap onim na uro kimanam. Pa tale ga akosartang ira mi. Karuk.  
\v 3 Migat kan, bume bunama na uro kimanam. Pa iro urio danunumiap la okosarpang meba peiniang Satan, tale dapanam ma pagap onim na uro kimanam. Karuk.  
\v 4 Korup ganam o danunumiap la pariam, tale korup onim na uro kimanam. Karuk. Memaning kukunim ang Morowa, ga puomeng meba makofmeng kudarabip am karorama.  
\v 5 Pame peiniam mirier non ara agarip ga tiesiap o kakarabunim la mime obunakmeng alang maiong teip la namo ameira Morowa. Ga pame pariam mirier agarip agarit maiam teip ga pabuam upat unualeap ang Karisito, ga makosarpang agarip maiam meba omeuluan.  
\v 6 Miptang, urangapang ara meba makakaupang me teip la mime oguek ties ang Morowa, ga eba papulang uniap ula kiro ira ma. Pa eba miuanpala puoieng leba miptang ties pang ga omiuluan ties ang.   
\p
\v 7 Buat magimaming agarit pavap ma inamaniap. Pa maset agatming me dalap ma. Leba agat ang migana ba irie kan la migana migat ang Karisito, tie eba maset agatang na dalap a pava gat la pava teip migat am Karisito, gare irie kan.  
\v 8 Ila Kakani la toiteong meba ongangastang nagan ming, pa tale meba mikiraraieng. Are ratmat ga leba tevientang kan maset ga tamama “mating kaguma ila kakani la uala Ila Kakani toun”, eba tale muliraba me utmat.  
\v 9 Pa tale narung meba agatming turuo migana la tume mamirtung babap meba mitaraung.  
\v 10 Mirulo gare ro, memani non teip la mime tiesmeng me rulam gare ro, “Babap am Paulo la memanim non ara non ara tiesiap mila ngangasmeng, pa na tara irie kan la betong ga baisong pai, tale kan maset tiesong ga agimapang tale kan amaning ngangas migat.”  
\v 11 Pa teip lare tiro le maset ameira iriro paga: Tiro la ponama kakaliat ga omirpang urio babam me miun. Pa tubiat eba mupang ponang ga mimi, ga eba akosarpang tavuk ila ngangasong la nevuoong gare urio ties la omirpang na urio babam.   
\p
\v 12 Eba tale pamama nevuopang gare mirie non teip la mime mavien kan bop ma. Ga tale puopang meba pamama, tavuk pang la nevuoong gare tavuk maiang. Karuk. Mirio teip la mime avuvuo tavuk maiang iro uvuvuo kan maiong it ga mime nevuvuo kabirana mi kan. Met iriro tavuk maiang, bira mirie la tale kan memaning agat ula muru migat.  
\v 13 Pa ira pa kan, tale ga tevienpang agarit. Karuk. Mavienpang it bop pa me mirier ubiap la ualam Morowa paun meba makosarpang. Uriro ubi la ovuvuoong Morowa ga ovuotong me ira pa meba pala miagapalie, mimi inamaniap onim Korin.  
\v 14 Eva, tala kan orupaba uriro uvuvuo la ualo Morowa paun. Karuk. Pa ualo Morowa uriro ubi paun meba miagapalie. Are ratmat ga tara la mupo na pianam Korin, paramo bais ula mumuru ang Karisito me miun.  
\v 15 Tale kan pame tevien na ubi la okosarmeng non teip na pianam la tale oiteong Morowa meba okosarpang ubi una. Karuk. Pa napang migat gare ro, Eba mamaranu ba nagan ming, ga ubi la puparo kabirana mi la eba sikieng ga kakanu ba maset.  
\v 16 Memani, eba baispang o uro bais ula mumuru na mirie pialap la maiot toma malonimup mi. Eba tale pala na pialap non teip la ubimeng ara mana ga mavienpang agarit bop pa me ubi mirie non teip la okosarmeng ara.  
\v 17 Tiesong Morowa na babam ang Ieremia gare ro, “Migana ba la namo ovienang bonim a kan, tie tevienang it ira Ila Kakani la makosarong pagap mila kakanim me bulam.”   
\p
\v 18 Are ratmat ga okosarpang garet tie. Memani, leba migana ba la tevienong kan, eba tale amaning bonim na irap a Morowa. Karuk. Pa Morowa kan leba avienang migana, tie iriot migana la eba oala bonim ula kanu migat.   
\c 11  
\s1 Uaramo Paulo ties me apostolop o kakarabunim la mionama Korin  
\p
\v 1 Tie, narung titot meba tiestang gare migana la bangutong ga eba ovientang bonim tuo. Pa buat palalaming me urio ties tung.  
\v 2 Memani, mitara narung me milam gare Morowa la mitara naong maime inamaniap ga namo maiteang meba mirie ba kan am. Narung me milam meba amiuluan Iesu Karisito. Tuga milagirang me ai Karisito meba betming inamaniap am, gare mamo la namo olagiang poi iang ula magabun me aun migana la aitemeng meba magiliong. Are ratmat ga narung meba mibabaim ba migat gare kubebun la tale ka durieng ga migana ba.  
\v 3 Pa anagirung Satan la mitara ait tavuk o kakarabunim ga tiralo la ovanaong Iva. Ebun betang irie ira mi ga mivanameng noba, ga ebun fulutieng agat ming me tavuk ila mumuri ga tavuk ila puvuvui. Ga ebun tale amiuluan Karisito. Turau me mirio pagap.   
\p
\v 4 Mirulo gare ro, memani, mime nagan kakalait ira a tavuk o kakarabunim. Ga mime miairam non teip la mime betmeng mi ga miaram non tiesiap aime Iesu la tale kan paramam. Non gat paga, miaramo ties aime muranama, tale irio Muranama Ila Babai tinan la miara ra. Ga maiaramo bais ula muru la tale nepuoieng ga ties pang. Pa miomira ga omiuluan uriro non ara bais. Pa tale urio bais ang Iesu la miunopang o.  
\v 5 Na agat tung, tale rot teruana me lourup me mirio teip la temeiva “Natauan Apostolop”.  
\v 6 Migat, tale kan tume maset tuaramo ties, pa agat tung me bais ula mumuru la makurupin. Na mirier tavukup, pame misingpala la uakap o urio agat. Are ratmat ga maset omira uriro agat pang la migat o.   
\p
\v 7 Tara la tula ga mirulo o bais ula mumuru, atabo mirika ma kakepup ba meba okosartang urio ubi? Karuk kan. Teruabu kan me lourup ga mivientung. At irio tavuk, atabo okosartung kirinim, a? Karuk.  
\v 8 Narung meba mira: Tuaram kakepup ga pagap maun non inamaniap onim na non ara luguap o lotu meba okosartang urio ubi kabirana mi. Met irio tavuk la akosartung, are migana la ume mapula agarit pagap maiam inamaniap.  
\v 9 Are ratmat ga na tara la tunama ga mimi ga kagestung ma pagap, tale kan tualo giginanim tung aun migana ba kabirana mi. Karuk. Ekelesiap onim na provins Masedonia la mumaio Korin, ga mavuomeng pagap la kagestung ma. Ga me pagap, tale tualo giginanim miun. Ga eba tale taranang paga ba miun meba toagaalie.  
\v 10 Iot ties migat ang Karisito na dalap tuo. Are ratmat ga tiestung migat gare ro, Mana mirier napup iam Akaia, karuk kan a migana ba la puoong meba onoaling alang tung meba ovienmeng inamaniap bonim tuo me irio tavuk la man baistung o bais ula mumuru me maun inamaniap. Karuk.  
\v 11 Memani ga tuaro kamniap maiong ekelesiap onim na provins Masedonia, pa tale tuaro kamniap ming? Atabo agatming miga tale narung me milam ga okosartung gare tiro, a? Miptang, maset toit Morowa la narung maset me milam.   
\p
\v 12 Tie, muana ga man akosartung iriro la are tiro. Non teip la man oisinmeng alang meba kan mavienmeng bop ma, ga namo kamena gare pava Apostolop na irap ma inamaniap. Man obunaktung urio alang maime. Are ratmat ga ebat man ubirang gare tiro ga eba tale taranam kakepup mim.  
\v 13 Miptang, mirio teip la tale mirie Apostolop migat. Karuk. Kakarabim it. Mime kakarabum ma ubiap la makosarmeng ga aigormela tavuk maiang meba marouroumeng inamaniap meba agatmeng ga namoma, “Mirie Apostolop migat am Karisito.”  
\v 14 Pa mabit ara, memani ga mime okosar gare tiro. Memani, Satan kan la ume teigorula ga ume mavana inamaniap meba agatmeng gare ro, “Irie non angelo ang Morowa la muo ga lalabie!”  
\v 15 Are gat to, teip am gat Satan o ubi leba mema aigormela tavuk maiang ga kamena gare teip o ubi a tavuk ila puvuvui. Buat turupbuaba. Tubiat Morowa eba mavuvuoang ga eba omela uniap ula kiro la puoieng migat me mirio tavukup la makosarmeng.   
\s1 Uavio Paulo papot o giginanim me ubi Apostolo  
\p
\v 16 Titot tuga ka taramang ties ula bangutieng gare lake la tiestung. Pa buat agatming turuo migana ila ngongang. Leba agatming gare ro, tie tomiairang meba rot ovientang bonim tuo gare memiaira misik non Apostolop o kakarabunim la mime megamarie.  
\v 17 Inagat, tiestung ga ovientung bonim tuo gare migana ila ngongong la ugamarie. Tale orouluan agat ang ila kakani ga mirulo gare tiro. Karuk.  
\v 18 Papot ma teip la mime mavien bop ma a tavuk la mime amiuluan teip onim na kimanam. Are ratmat ga turuo gat la tuga ovientang kan bonim tuo na iriro tavuk.  
\v 19 Mimi garip la mimaning agarip mila mumurum migat, are ratmat ga mime miairam teip mila bangutang meba mialang ties ula fulutieng miun.  
\v 20 Tie, leba tale naming ume, puorung meba miralava gare ro. Memani, leba miaranang migana ba meba mila okosarming ubi ang, o leba itamum mirier pagap mim, o leba mivanaang meba aram non pagap, o leba miduang me lourup gare teip agarit, o leba mavadunang munap mi, tie mimet miaira meba okosarang gare kan tie la naong.  
\v 21 Pa na tara la ponama ga mimi, tale kan akosarpang tavuk ba gare rie. Karuk. Me iriro tavuk pang ila muri, atabo agatming turuo migana la tale amaning kukunim ga tale puorung meba akosartang tavuk gare tavuk maiang? Kadik, titot la giginam dalap tuo, memani tinan la tale kan mirulo ma tiesiap ba mila mamaranim are mirie la mime mimelo. Miptang, mime mavien bop ma kan, are ratmat ga turuo gat la eba ovientang bonim tuo kan. Pa leba okosartang gare ro, tie eba agatming turuo gare migana la bangutieng agat ang.  
\v 22 Melo namoma mirie teip onim Ebraio, a? Turuo gat la turuo Ebraio! Melo namoma mirie teip onim Israel, a? Eva, turuo gat la turuo onim Israel! Melo namoma mirie gar ma eap am Abraham, a? Turuo gat gare tie!  
\v 23 Melo namoma mirie teip o ubi am Karisito, a? Makuruptin o ubi ang Karisito. Mirulo, makuruptin ma papot ma tavukup gare ro, mitara tume ubi maranit. Papot ba kan ma taraiap la tomaiabu na luguan o arubu. Papot ba kan ma taraiap migat la toisikmeng o iagur. Papot ma taraiap la kagarat meba taving.  
\v 24 Migat, naien ma manaburualap ga gamiala ma taraiap la toisikmeng Iudaiap o iagur ga namo taving. Ga itmat paga la betong ira ruo puoong ira ma muanam ma taraiap ganam.  
\v 25 Naien ma taraiap la orula karanam aun gavaman onim Rom. Non tara, tobalemeng ma tadasip meba taving ga naien ma taraiap la kiro obinam la tegorung ubuo ga man kagairung na pirom o namurit arubu ga namurit ileng.  
\v 26 Ga papot ma taraiap la man tunum tapmat na alangip meba baistang o bais ula mumuru. Non lap tunum na danuorabip ga toiariva danuot ga namo saiktang. Non lap mabolarung teip o pula ga namo tokirarameng. Non lap gar maiang Iudaiap la namo tokirarameng. Non lap namo tokirarameng non garip la tale onim Iudaia. Eva, namo iourang na taun, ga namo iourang na nap la karuk a migana ba ana. Non lap la namo iourang na pirom. Non lap la namo iourang na kilalap ma non teip la kakarabum ga namoma mirie “ekelesiap”.  
\v 27 Non gat paga, tume ubi maranit ga mageistung. Papot ma lap tume ubi na arubu ga tale kan tume duri. Papot ma lap la tale kan tume parak ga tume orurama me tapnuap. Papot ma lap la tume tafa me parak ga ogasangentung susugun ga kagestung ma burap. [Pa mirie teip la mime mavien bop ma la tale kan mime ubi maranit ga makirarameng neip ma gare turuo.]  
\v 28 Mirulo ra, mirier giginanimup la mime tomaiop. Pa talet mirio, pa non gat pagap misik. Mirier lap ganam tume agat maranit meba maset uraleng mabuo ekelesiap maiam mirier luguap o lotu ganam. Ga mitmat la maiabu giginanim ula kakanu migat tobuo.  
\v 29 Na tara nagan maiong non ekelesiap la tale mamaranu, osaintung ngitngit me mitmat. Na tara noba non paga la urano agat maiong non ekelesiap ga okosarmeng kiribas, mitara tume bukbuk me iriro paga ga giginam dalap. Tale mamit miriro? Eva, mamit maset.   
\p
\v 30 Tie, tale tevientung gare mirie non apostolop o kakarabunim la mime mavien bop ma. Pa leba tevientang kan, tie eba tevientang me rulam la tale mating kukunim.  
\v 31 Tiestung o migat. Ga Morowa, irie Mamo ang Ila Kakani Iesu, irie le ovienbuong bonim a ma mirier lap, irie kan la toit la tale tokakarabi.  
\v 32 Tinan la tunama Damaskas. Kiap ang orong Aretas la adusong non migana o unualeap na tabuna o urio taun meba umaiaring tuo ga tomaiabung na luguan o arubu.  
\v 33 Pa non ekelesiap la tomaiabu na kein ila kakani, ga na tabuna o ifif o kur na urio taun, tomeinie ga tinie tapma lavie. Are ratmat ga igorung auluo kilan a kiap. Atabo utmat la tosingiala turuo migana la amaning kukunim ula kanu, a? Karuk kan migat.   
\c 12  
\s1 Na kikiritniap aulo Morowa Paulo ma papot ma tiesiap  
\p
\v 1 Tie, arit tavuk o tevien la tale puoong meba maagaalie inamaniap la tomit turuo Apostolo. Pa tale gat mating noba alang meba misingtala a irio paga. Are ratmat ga titot tuga ovientang bonim tuo ga eba miralava ma non kikiritniapup ga tiesiap la mavaikong Ila Kakani toi:  
\v 2 Arit non ekelesia la alagiong Morowa me nakap na lama naien panbinim ang Morowa nakap 14 ma karaip tinan. Atabo unama na neip a, o maulai neip a, tale tira. Morowa kan la oit.\f + \fr 12:2 \ft F Iudaiap la agatmeng namoma ame naien ma panbinimup. Natauan panbinim urio la puobuong meba ogimabuong ma irap buo. Lama narain urie pianam maiong muranap mila kiram la maionama una. Lama naien panbinim urie pianam la unama Morowa una.\f*  
\v 3-4 Tira Morowa la alagiong irio migana me na panbinim. Unama mana neip o maulai neip, tale arit. Morowat la ait. Pa na panbinim, upto non ara ties la tale puomeng teip meba maiaramang ma tiesiap maiam inamaniap. Tiesiap la utpam la mitara babaim ga tale kan puoong non ba migana meba mavaikang maset.  
\v 5 Are ratmat ga tuga ovientang bonim a irio migana, pa tala kan tevientung. Leba tama tevientang, tie eba ovientang bonim tuo, muana la tale mating kukunim ira ruo.   
\p
\v 6 Pa leba tama tevientang me paga la agimarung na panbinim, eba tale turuo ba migana o bangut. Karuk. Memani, tiestung migat me irie paga la agimarung. Pa tala kan tevientung. Memani, turau ebun upto migana ba urio ties ga amama turuo migana ila kani. Narung mimi le agimaming tavuk la akosartung, ga miptang ties la tuaramo. Ga met iriro tavuk, eba toarakiming turuo man migana.   
\p
\v 7 Eva, miriro pagap la tosinguala Morowa ma, mirie la mitara kakanim migat. Are ratmat ga tale naong Morowa meba maset tekanirtang ga tamama turuo migana ila kani. Karuk. Are ratmat ga uairo non tafa ga betieng ira ruo. Urio tafa la tokiraraieng gare non tainam la masikieng neip tuo. Urio tafa la kaina gare migana o ubi ang Satan la ume muo tovitong ga ume gat toinie, meba tale tekanirtang.  
\v 8 Naien ma taraiap la tume tika maranit me ai Ila Kakani meba opugutara urio tafa ira ruo.  
\v 9 Pa tale opugutuara Ila Kakani, pa toulo gare ro, “Ubonuvarap tung la puoieng ira nuo. Memani, kukunim tung la ime bet ga dakieng migat ira migana la tale amaning kukunim”. Tiesong Ila Kani gare ro, are ratmat ga titot la eba kan maset teraba ga tevientang ga eba tonang gare migana la tale amaning kukunim. Eba tonang gare tiro meba iot kukunim ang Karisito ira ruo.  
\v 10 Are ratmat ga me urio ubi ang Karisito, eba teruba na tara la tale mating kukunim, ga maialam inamaniap ibup ma ira ruo, ga betmeng non ara giginanimup ira ruo, ga tokirarameng teip ga tomaiop kiribasiap. Memani, tara la tale mating kukunim, tie na irie kan tara inagat ualo Karisito kukunim toun.   
\s1 Namo ongangasang Paulo nagan maiong ekelesiap onim Korin  
\p
\v 11 Tie, tuaramo uro ties gare migana la fufulutieng kan agat ang gano. Pa mimi kan la tominim ga tuaramo urio ties. Puoming meba tovienming me tavuk tuang ila mumuri, pa tale tovienming gare rie. Are ratmat ga turuo kan la tevaiktung. Migat, turuo la tale migana la amaning bonim ula kanu, pa tale kan tokurupmein maset teip la meivam “Natauan Apostolop”. Karuk.  
\v 12 Kaguma ruang meba misingala la turuo Apostolo migat la gare ro, Na tara la tunama kabirana mi, dustung maranit ga makosartung papot ma pagap: Makosartung kagup onim na panbinim ga pagap o turupnuabap ira mi. Ga non gat pagap la makosartung meba ogimameng inamaniap kukunim ang Morowa.  
\v 13 Pa kadik, talet akosartung irie namurit tavuk ira mi. Ga tale turanam kakepup ga pagap mim meba okosartang ubi ma. Migat, ira ma kamniapup, mamariktung ekelesiap onim na non luguap o lotu tapmat, pa tale kan mimariktung. Kadik migat! Miavaiang urio kiribas tung.   
\p
\v 14 Tie, urangarung titot meba tala mi a lama naien tara. Pa na tara la eba tala mi, eba tale taranam kakepup mim. Karuk. Memani, tale narung meba taram pagap mim ga talang giginanim miun. Karuk. Narung meba milagirang ga miagaralie. Miptang, lop la tale memaning ubi o usin o parak ga mepamung pagap meba magaming irap ga nagap maiam. Karuk. Irap ga nagap miriet le memaning ubi meba mepamum pagap ga magamelie lop maiam.  
\v 15 Are ratmat ga narung maset la tuga magorang mirier pagap tuam, ga ogorang gat ninimiap tung meba miagaralie. Eba okosartang gare tiro un tenubap. Eva, tume na maset me milam gare ro, ga atabo utmat la mikosarieng ga mialam arot kirat dalap mi toun? Karuk.  
\v 16 Pa non mi la mime ties kirat aime tavuk tuang gare ro, “Migat, tale uaram pagap buam na uakap. Pa mitara maset ait tavuk o urourou, ga a tavuk o kakarabunim ga ume uranam pagap buam.”  
\v 17 Are mani? Masagarung teip ga mumaio mi, ga atabo mivanarung ga mapularung pagap mim na kilan a noba ma, a? Karuk.  
\v 18 Amariktung maranit Taitas ga ula migimaong ga non gat ekelesia papa. Atabo liaram noba non kakepup miun, a? Karuk. Atabo tale akosarpang namurit tavuk ga opouluan kukunim ang irio narit it Muranama Ila Babai, a? Atabo tale narit dalap pa me urio ubi la okosarpang, a? Temaieng le maset agatming!   
\p
\v 19 Tie, na tara la mavasming mirio tiesiap ganam, atabo agatming miga mamirpang meba obunakpang ties ming ga ovuvutpaling ties pang na irap mi. Buat agatming gare tie. Memani, pava la betpang namurit dalap ga Karisito, ga paramo urio ties na irap a Morowa. Pasogop tuam migat, makosarpang mirier pagap ganam meba ongangaspang nagan ming.  
\v 20 Memani, turau rot kirat na tara la tula mi, ebun tale agimarung tavuk ming gare tie la tuga agimarang ga ebun tale togimaming gare tie la miga togimaming. Turau, memani ebun magimarung non ara non ara tavukup la maiot kabirana mi gare ro: Tavuk o nenananulap ga kiram dalap me non papap ga tavuk o bukbuk ga tavuk o netarat ga ties tigit ga tavuk o pringesnges ga tavuk o ufulut ma mirier ubiap.  
\v 21 Ebun tula mi ga Morowa ruang la eba ina tomuliaba gat na irap mi. Ga mirie teip ga magaulap tinan la mime okosar kirinim, ga tale ga marigimeng dalap ma ga maialam ibup ma ira tavuk ila papali ga tavuk o sadak ga tavuk ma dalap la temaiara me ukosar a tavuk ila kire. Turau me ubi rung la ebun paga agarit ga giginam dalap tuo.   
\c 13  
\s1 Ekelesiap onim Korin la maset umialeng me nagan maiong  
\p
\v 1 Tie, tuga tala migimarang a lama naien tara. Ga na tara la eba tala mi, eba akosartang non tavuk ira ma mirie inamaniap la mime makosar tavukup mila kiram. Eba orouluan Babam ula puaru la ilo gare ro,  
\q1 “Leba narain ba o naien ba ma teip la tiesmeng la agimameng non migana la okosarong kirinim, tie puobuong meba maset ovuvutbuling ties.”   
\p
\v 2 Miptang, mimi inamaniap la okosarmeng kirinim tinan ga mimi gat non inamaniap. Lama narain tara la tunama ga mimi, mirulo ra maranit a man tavuk la tuga akosartang ira mi. Ga titot gat la tunama kakaliat miuluo, ga inagat mirulo maranit gare ro, leba ina tana meba migimarang, eba tale tairam agarit inamaniap la mime okosar kirinim. Karuk. Eba ovaiktang kirinim maiong ga eba makalarang na lotu.  
\v 3 Eba okosartang gare ro, muana la mimaning narain agaripien ga migama uaramo Karisito ties na nanam tuo o karuk. Eva, tale malubeong Karisito kabirana mi. Karuk. Eba osingala migat kukunim ang ira mi meba mavuvutaling kirinimup mim ga mipupuvum ba.  
\v 4 Migat, tinan betong it Karisito gare migana la tale amaning ngangas ga osakmeng tainam ira iro maiogun, ga uvara. Pa titot la karuk. Iro kan ngangas ula kakanu ang Morowa ga inagat inim Iesu. Are gat to, pava la pareppang ira Karisito, pava gat la tale pamaning ngangas. Pa iro ngangas ang Morowa, pava gat la peinim ga Karisito. Are ratmat ga eba ubipang o urio ngangas meba mingangaspang.   
\p
\v 5 Tie, mirier taraiap, ovuoming nagan ming ira Karisito la mamaranu o karuk. Atabo tale mira, Iesu Karisito la unama na dalap mi? Leba tale onang ga mimi, tie tale naganming migat ira a.  
\v 6 Ga nagantung meba parakiming la pame dus maranit na iro nagan ira Karisito.  
\v 7 Ga pame marik me ai Morowa meba miagaalie ga eba tale akosarming tavuk ba ila kire. Pa tale kan marikpang meba pagimaming la pame dus maranit iro nagan ira Karisito ga uriro la iario parak ula kanu iro ubi pang ira Morowa. Karuk. Pa leba agatmeng non inamaniap la namo palum na uro uvuvuo, tie tale agatpang papot me urio. Karuk. Memani, agatpang papot me nunumiap ming ga marikpang meba makosarming it tavukup mila puvuvum.  
\v 8 Tiestung gare ro, memani tale puopang meba akosarpang paga ba meba peiniang ties migat la pamarikong Morowa meba baispang o. Karuk. Puopang it meba oagapalie urio ties migat.  
\v 9 Are ratmat ga na tara la mimaning kukunim pa pava la tale pamaning kukunim, tie man tepaba me uro kukunim ming ga marikpang me ai Morowa meba mikosarang meba dusming maranit iro nagan migat ga tale makosarming kirinimup ba.  
\v 10 Itmat i muana ga omirtung urio babam na tara la tunama kakaliat miuluo. Memani, narung meba ka lake ovuvutmiling ninimiap ming. Are ratmat ga na tara la eba tala bettang mi, tala kan mivurerung maranit o ties a kaguma la uala Ila Kani toun. Iriro kaguma la uala toun meba ongangasang nagan ming, pa tale meba mikiraraang.   
\s1 Tiesiap lagorang  
\p
\v 11 Ekelesiap papap tuam, titot la tuga itamung ties ga tualo ioko miun. Man ubiming maranit meba mipuvuvum ba ga tale mimaning kiribasiap na irap a Morowa. Miptang ties tung, miaring uriet namurit dalap ga nepapaming aun malina. Ga Morowa la ume na maime mirier inamaniap ga ume maagaulie dalap ma ga maiot teteiliat, irie kan la eba onang ga mimi. Na tavuk buang inamaniap am Morowa, mimir ganam narit narit le obakming kaos ga non papap mim.  
\v 12 Mirier inamaniap am Morowa la maionama to, la osagameng “la ula muru” me miun.  
\v 13 Mariktung ira Ila Kakani Iesu Karisito meba alang ubonuvarap miun, ga eba maset na ang Morowa me milam, ga Muranama Ila Babai la eba parepang na dalap mi mimir ganam ga eba mikosarang meba mionang na namurit dalap.