\id COL - Uare 
\h Kolose 
\toc3 Kolose 
\toc2 Kolose 
\toc1 Kolose Ekalesia Azaḡa Mazao Pauloꞌa Mirihiro 
\mt1 Kolose Ekalesia Azaḡa Mazao Pauloꞌa Mirihiro  
\c 1  
\p
\v 1 Eḡe Pauloꞌa emeḡe nabudi Timoteo teite fefa ꞌadi miriheꞌohe. Eꞌe Badiꞌaꞌa madu, Keriso Iesu veize apostolo gauḡano ohohiro.  
\v 2 Fefa ꞌadiꞌe Kolose neḡano radiuꞌeteꞌe Badiꞌa mone raꞌeteꞌe zu Keriso gauo hubehune gaueꞌeteꞌe azaḡa veize miriheꞌohe. Badiꞌa, emeḡe mamaꞌa manohuga zu zama roḡeḡa zenoꞌi!   
\s1 Pauloꞌa manoḡa tauḡi raꞌohe zu kurauꞌohe  
\p
\v 3 Eme zae veize iḡaiḡa kurauꞌetene, Badiꞌa, emeḡe Zuhiꞌa Boro Iesu Keriso Moga mazao manoḡa tauḡi raꞌohe.  
\v 4 Mazaḡa zaeꞌa Keriso Iesu mazao fieꞌeteꞌe zu Badiꞌa mone raꞌeteꞌe azaḡa niduꞌa zamaradu danazꞌeteꞌe igiro ꞌahine.  
\v 5 Zaeꞌa ꞌougeꞌetaꞌaꞌe Badiꞌaꞌa zae veize eꞌe naeḡa adureo ruhiniroteꞌe mae ḡihiniꞌuma ꞌahine. Zaꞌe hari manoḡa ḡoeꞌa huga ḡadaheḡano igiroteꞌanoꞌo, Badiꞌaꞌa eꞌe naeḡa ruhine tiro. Ebu izidi zuni zaꞌe eꞌe zamareꞌohe.  
\v 6 Eꞌe hariḡa manoḡaniꞌa zae mazao feuriro. Zaꞌe Keriso mazao fieꞌeteꞌe azaḡa sauꞌaze Badiꞌaꞌa rae modeꞌeteꞌe hariḡa huga igiro. Eꞌe madaḡanonoꞌo onao izidi, zaeꞌa ḡaboneze ḡihuneꞌeteꞌe teige, haba niduꞌa zamaḡano hari manoḡaniꞌa vaze zamao gauadu, ḡaboneze ḡihuneꞌohe, ebu hari manoḡa mae ḡihineꞌeteꞌe azaḡaniꞌa ḡeharuꞌohe.   
\p
\v 7 Zaꞌe Epafaraꞌa hari manoḡa ihoziro. Aniꞌe emeḡe teite gaueꞌeteꞌe zu emeḡe zamarone. Aniꞌe Keriso veize iḡaiḡa gaueꞌenaꞌa emeḡe danafeꞌohe.  
\v 8 Ebu aniꞌe zaeꞌa vaze zamaradu danazeꞌeteꞌe meꞌodofiro. vaze danazoga veize, vine Zaḡoḡaniꞌa inaraḡa ziniro.   
\p
\v 9 Eꞌanoꞌo, emeḡeꞌa zae hari ꞌouge igiroteꞌe madaḡanonoꞌo onao izidi, emeꞌe hubehune zae veize iḡaiḡa kurauꞌohe, ebu Badiꞌa ahiḡe umineꞌohe; Vine Zaḡoḡa hina aniꞌa zama huhuzaḡa zu edeḡa zenadu Badiꞌaꞌa uraꞌeteꞌe gauḡa zaeꞌa hugahune ederiꞌuma.  
\v 10 Eme ꞌahige kurauꞌohe; Zaeꞌa Zuhiꞌa Boro ibio ani gubaneꞌenaꞌa, zu Badiꞌa ubuḡa reifine zaeꞌa nagini haḡaeꞌeteꞌea Badiꞌaꞌa zaꞌe manoḡa reifine, zu zaeꞌa haḡai manoḡa niduꞌa faifaine haḡaifine, zu Badiꞌa borofe edere onamifine.   
\p
\v 11 Ebu eme ahiḡe kurauꞌohe; Badiꞌa gigiꞌa inaraḡa ḡonaga ꞌoꞌoꞌa hina zaeꞌa inarifine, ebu eꞌe inaraḡa hina zaeꞌa mene ḡarihe maḡunifine, zu aduganiꞌa onaiteꞌea, zaeꞌa edau gigarafine, ebu zae zamao matuꞌuꞌa iriꞌavoga.  
\v 12 Ebu eme hena ahiḡe kurauꞌohe; Zaeꞌa Badiꞌa, emeḡe Mama mazao manoḡa tauḡi rouga. Badiꞌa ani, ane mone raꞌeteꞌe azaḡaniꞌa Badiꞌa haba agaḡa zamaḡano radiuꞌenaꞌa meꞌuma manohugaḡa, zae zuni zeḡe teite meifine, ibitoziniro.  
\v 13 Aꞌe Badiꞌaꞌa uzaboonoꞌo emeḡe mae vaḡifiro, ebu ane ubuga zamaroneḡaniꞌa zuhiꞌaniꞌeteꞌe zamaḡano ohofiro.  
\v 14 Ebu Badiꞌa ani Keriso ru hina emeḡe ḡabofiro, ebu emeḡe sauꞌa niduꞌa rae modiro.   
\s1 Kerisoꞌe hitaga hune  
\p
\v 15 Eme Badiꞌaꞌe horonoga mene idaḡa, rehano Iesu Kerisoꞌe Badiꞌa iraḡa fureneꞌohe. Iesu Kerisoꞌe, ḡau niduꞌa ize izema fureranogano Badiꞌa teite radiunu, ebu ḡau niduꞌaꞌe ani ꞌuꞌuḡano.  
\v 16 Mazaḡa Kerisonoꞌo Badiꞌa ḡau niduꞌa haḡairo, adure zu rahao radiuꞌeteꞌe ḡauḡa, horoneꞌeteꞌe zu horonoga mene idaḡa ḡauḡa haḡairo. Badiꞌaꞌa vine zuhiꞌaḡa, tuḡure viga inaraḡa ebu ḡau inaraḡa niduꞌa Kerisonoꞌo zu Keriso veize haḡairo.  
\v 17 Kerisoꞌe ḡau niduꞌa ize izema fureranogano aniꞌe ꞌeꞌe radiunu, ebu aniꞌa ḡau niduꞌa radiu onameꞌeteꞌe zu ḡau niduꞌa gaue tiburuꞌeteꞌe haḡairo.  
\v 18 Keriso ani ekalesia vadiga, ebu ekalesiaꞌe ani ahiri. Ḡadaheḡanoꞌe ḡau niduꞌa ani mazaonoꞌo fureraro, ebu aniꞌe runeonoꞌo ḡabodiꞌuma azaḡa boꞌaḡano aneꞌa ibite ḡabodiro. Aꞌe ḡau niduꞌa aneꞌa zuhiꞌanoga veize.  
\v 19 Mazaḡa Badiꞌa aniꞌe ane urao Keriso zamaḡano radiꞌuma reiro. Ebu eꞌanoꞌo Kerisoꞌa Badiꞌa haḡai furenehuniꞌuma.  
\v 20 Ebu Badiꞌaꞌa ane urao vaze zu ḡau niduꞌa Keriso teite bare tibuniꞌuma reiro. Ebu Badiꞌa zu ḡau niduꞌa boꞌaḡano zama roḡeḡa veize Kerisoꞌa satauroo ruḡa soniroteꞌeanoꞌo, adure zu rahao radiuꞌeteꞌe ḡauḡa niduꞌa, ibiteꞌe Badiꞌa mazao fararo rehano, Keriso teite bare tibuziro.   
\p
\v 21 Zaꞌe ibitebone Badiꞌa mazaonoꞌo fararo, ebu zaꞌe haḡai sauꞌa haḡaidoteꞌe uꞌano, za zamaꞌe agireḡa radu, Badiꞌa mazaonoꞌo fararo.  
\v 22 Rehano Kerisoꞌa ane ahirio satauroo rudaroteꞌe uꞌano, izidi zaꞌe Badiꞌaꞌa ane teite bare tibuziro, zaꞌe ane zamao ohozadu, ane ubumao zaꞌe duduḡa, ebu toragani oꞌoꞌa reifine. Vazeꞌa Badiꞌa zamao zaꞌe veꞌoreha rae mene reꞌuma.  
\v 23 Zaeꞌa hubehune Badiꞌa mazao fie onameꞌenaꞌa edau gigaraune, zu hari manoḡa zamaḡano, ḡabone manoḡa meꞌuma reiroteꞌe ḡoeꞌa zaeꞌa obone giganine, zaꞌe Badiꞌa ubumao duduḡa reꞌuma. Eꞌe hariḡa manoḡaꞌe haba niduꞌa zamaḡano harame onaeha. Ebu eḡe, Pauloꞌe Badiꞌaꞌa hari manoḡa harameꞌeteꞌe gauḡano ohohiro.   
\s1 Pauloꞌa Ekalesia Veize Gauiro  
\p
\v 24 Izidi ꞌada eꞌe, zae mazao hari manoḡa haramiroteꞌe uꞌano aduga hideꞌeteꞌe moneo matuꞌeꞌohe. Ebu Kerisoꞌa aduga hidiroteꞌe teiḡe, eḡe zuni eḡe ahiri hina eꞌe aduḡaḡa hideꞌeteꞌe mene rihoneꞌohe. Eꞌe haḡaiḡaꞌe Keriso ahiriꞌe ekalesia azaḡa veize.  
\v 25 Eꞌe Badiꞌaꞌa ekalesia azaḡa tuḡure gauḡano ohohiro. Aꞌe zae mazao, Badiꞌa ane ḡoere ihozoga veize  
\v 26 Uꞌuru radiuꞌeteꞌe ḡauḡa ꞌaꞌaꞌe amahi hune azaḡa mazao Badiꞌaꞌa mene rae fureniro, rehano izidi ane mone raꞌeteꞌe azaḡa mazao fureneꞌohe.  
\v 27 Badiꞌa ani, ibite mene rae fureniroteꞌe uꞌuru radiroteꞌe ḡauḡa manoḡa ꞌaꞌaꞌe, Iuda mene azaḡa boꞌaḡano Badiꞌa inahe meiroteꞌe azaḡa mazao rae fureniꞌuma reiro. Eꞌe uꞌuru radiroꞌeteꞌe ḡauḡaꞌe Keriso. Aniꞌe zae zamao radiuꞌohe, eꞌanoꞌo Badiꞌaꞌe manoḡa hune uꞌano zae zuni manoḡa hune reꞌuma.   
\p
\v 28 Ebu emeꞌe edeḡafe niduꞌa hina iraduguzenaꞌa, zu ihozeꞌenaꞌa, vaze niduꞌa mazao Keriso hariḡa harameꞌohe, mazaḡa emeḡe uraꞌe emeḡeꞌa danazadu vaze niduꞌaꞌa Badiꞌa zama faifairu edereꞌenaꞌa, ane ibio daꞌo onameꞌenaꞌa duduḡa vazeḡa radu, Keriso ane zamao ohoziꞌuma.  
\v 29 ꞌOuge haḡaeꞌeteꞌe veize eḡe zamao inare gauꞌetaꞌe Keriso gigiꞌaḡa hina inare gauꞌeꞌohe.   
\c 2  
\p
\v 1 Eḡeꞌa ꞌadi raꞌetaꞌaꞌe, e ura za ederoꞌi! Eḡeꞌa zae, zu Laodikea neḡa azaḡa, ebu ize mene horohateꞌe azaḡa niduꞌa danazoga veize inareꞌohe.  
\v 2 E ura zeꞌa inaratitoga zu zamarotiteꞌenaꞌa tiburanoga. Ebu e ura zeꞌa Badiꞌa uꞌuru ḡauḡa edere hunoga. Uꞌuru ḡauḡa aꞌe Keriso.  
\v 3 Ebu Keriso mazao buꞌu Badiꞌaꞌa uꞌuru tidoteꞌe zamaroneḡa boro bagaḡa ederiꞌuma.  
\v 4 Eḡeꞌa ꞌadi raꞌetaꞌaꞌe, vazeꞌa zamaguhi ḡoeꞌa hina mene soꞌozifine.  
\v 5 Ḡianoꞌi! Eꞌe zae teite mene radiuꞌe rehano, eḡe zamaꞌe zae mazao radiuꞌohe. Eꞌanoꞌo zaeꞌa haḡai manoḡano radiuꞌeteꞌe zu zaeꞌa Keriso mazao fie gigaruꞌeteꞌe ederadu, matuꞌeꞌohe.   
\s1 Keriso Mazao e Ḡabone Iziga  
\p
\v 6 Eꞌanoꞌo Keriso Iesuꞌe Zuhiꞌa Boro radu zaꞌe mae ḡihiniro ꞌahine, ani teite tiburu radiuꞌenoꞌi!  
\v 7 Ebu ire taiganiꞌa rahao kame gigaruꞌeteꞌe teige, Keriso mazao kame gigaranadu, ane zamareꞌenaꞌa farau onamoꞌi! Ebu Epafaraꞌa Badiꞌa ḡoere ihozidoteꞌe teige obone giganoꞌi! Ebu Badiꞌa mazao iḡaiḡa manoḡa tauḡi roꞌi!  
\v 8 Vaze ḡoere faine ḡianoꞌi! Hena, zeḡeꞌa tutuze veꞌoziꞌuma. Zeꞌe Badiꞌa edeḡa zu vazeꞌa nouge nouge radiuꞌeteꞌe edeḡa niduꞌa raha adi ibiḡano ihoziꞌuma. Zeḡe ḡoereꞌe huga ꞌoꞌoꞌa zu ḡuriro ḡoeꞌa. Ḡoere aꞌe Kerisoonoꞌo mene onaeꞌohe, rehano amahi azaḡa edeḡanonoꞌo zu haba ꞌadi vineḡanonoꞌo.  
\v 9 Ḡianoꞌi! Mazaḡa Badiꞌa ḡabone zu haḡai niduꞌaꞌe Keriso zamaḡano iriꞌave radiuꞌohe. Kerisoꞌe vaze reirotene aniꞌe ize Badiꞌa, eꞌanoꞌo zaꞌe Keriso zamaḡano Badiꞌa haḡai niduꞌa horoneꞌohe.  
\v 10 Ebu zaꞌe Keriso teite tibuziro zu ani mazaonoꞌo haḡai ꞌadi niduꞌa meiro. Vine sauꞌa zuhiꞌaḡa, zuhiꞌa niduꞌa zu ḡau niduꞌaꞌe Keriso ꞌuꞌuḡano radiuꞌohe.  
\v 11 Iuda azaḡaꞌe, Badiꞌa mone raꞌetene, vaze ꞌevore hina ahiri ogaḡa variꞌe modadu iḡuri haḡaeꞌohe. Eꞌe teige zaꞌe, Keriso mone reirotene, Kerisoꞌa zamaroneze sauꞌa zu ḡaboneze sauꞌa variꞌe modeꞌenaꞌa, zamazeo iḡuri haḡairo.  
\v 12 Eꞌe hugaꞌe, zaeꞌa Badiꞌa ni mae ḡihinadu bapatizo meiroteꞌe zamaḡano, Keriso teite ḡuriro, ebu Keriso ane teite bare ḡabode iḡuniro. Mazaḡa Badiꞌaꞌa Keriso runeonoꞌo bare ḡaboniroteꞌe gigiꞌaḡa mazao zaeꞌa firo ꞌahine.  
\v 13 Ebu ibite vinezeꞌe rudanoga zu Badiꞌa mazaonoꞌo faraunu. U eꞌe madaḡanoꞌe, zae ḡabone sauꞌaꞌe ize mene variꞌe modiro. Rehano ꞌouge ize haḡairoteꞌea, Badiꞌaꞌa zaꞌe Keriso teite bare ḡaboziro. Ebu emeḡe sauꞌa niduꞌa rae modiro.  
\v 14 Ebu Badiꞌaꞌe Emeḡe haḡai sauꞌa uꞌano emeḡe ꞌuteꞌeteꞌe Iuda azaḡa goro ḡoeꞌaꞌe niduꞌa madu, Keriso teite satauroniro. ꞌOuge haḡaeꞌenaꞌa, Badiꞌaꞌe goro ḡoeꞌa niduꞌa ꞌuiro.  
\v 15 Ebu ꞌouge haḡaeꞌenaꞌa, Badiꞌaꞌa vine sauꞌa zuhiꞌaḡa zu zuhuꞌa inaraze mae buno ziniro. Mazaḡa goro ḡoeꞌa ꞌuiro ꞌahine, Sataniꞌa eꞌe ḡoeꞌa hina emeḡe ꞌutoga mene idaḡa. Ebu Keriso satauroniroteꞌe zamaḡano, vine niduꞌa Kerisoꞌa roꞌaze hauḡiroteꞌe, Badiꞌaꞌa hunio fureniro.   
\p
\v 16 Eanoꞌo, zaeꞌa aueꞌeteꞌe zu gageꞌeteꞌe moneo ga muri muiḡa, bato iziḡa muiḡa zu Iuda azaḡa Bana Madaḡa uꞌano, vaze ꞌahoganiꞌa zae veꞌoḡa rae zoitene gararozenoꞌi!  
\v 17 Mene! Iuda azaḡa goro ḡoeꞌa zu muiḡa ꞌuḡuḡaꞌe Badiꞌaꞌa rae tiroteꞌe ḡauḡa manoḡa emege rifiuma vineḡa isoḡa. Rehano izidi ḡau manoḡa aꞌe fureraneha. Eꞌe ḡauḡa hugaꞌe Keriso.  
\v 18 Ḡurireꞌenaꞌa nize mae ovoeꞌeteꞌe zu tuḡure viga mazao kurauꞌeteꞌe azaḡa ḡoere ago egoꞌi! Zeꞌe za tutuze veꞌozihi raꞌohe. Zeꞌe tuḡure viga horoneha raꞌenaꞌa, nize mae iteꞌenaꞌa ḡoeriꞌuma, rehano ze zamaꞌe mene Badiꞌa mazaonoꞌo, ebu ze ꞌane zeꞌe nize boro azaḡa reꞌuma.  
\v 19 Zeꞌe Keriso mene hegoteꞌohe. Keriso ani ekalesia vadiga, ekalesia azaḡaꞌe ane ahiꞌa. Aꞌuꞌa zu viniga hina tibuzetene ahiri niduꞌa gigazeꞌohe. Ebu Badiꞌaꞌa ekalesia ibitoziniꞌenaꞌa inariꞌuma.   
\p
\v 20 Zaꞌe Keriso teite rudauꞌetene, raha ꞌadi vineḡa zuhiꞌaḡaonoꞌo mae buzeꞌohe. Rehano zaꞌe nougadu ize raha azaḡa haḡaio radiuꞌeteꞌe teige zeḡe ḡoere igiꞌohe?  
\v 21 Ze ꞌahige raꞌohe, “Ago obone toꞌi! Ago au nuroꞌi! Ago obone nuroꞌi!”  
\v 22 ꞌAhiguḡa goro ḡoeꞌaꞌe vaze mazaonoꞌo onaeꞌohe. Eꞌe goro ḡoeꞌaꞌe mene faḡa haḡaeꞌohe zu dauḡeꞌohe.  
\v 23 Goro ḡoeꞌa ꞌuguḡaꞌe edeḡa boro ḡoeꞌa iraḡa, rehano hugaꞌe oꞌoꞌa. Zeꞌa kuru veize zeḡe bare inahiroteꞌe ḡauḡaꞌe vaze mazaꞌonoꞌo zu zeꞌe ḡurireꞌenaꞌa nize ufeta mae ovoiꞌuma, ga ahirize sausauneꞌetaꞌe Badiꞌa matuo hafine. Rehano goro ḡoeꞌa ꞌuguḡaꞌe gigiꞌaḡa oꞌoꞌa ꞌahine, zamarone sauꞌa mae vaḡiniꞌuma moneo mene danazeꞌohe.   
\c 3  
\s1 Ḡabone izigano radiuꞌeteꞌe  
\p
\v 1 Goro ḡoeꞌa ꞌuguḡaꞌe gigiꞌaḡa oꞌoꞌa. Eꞌanoꞌo ḡabone ḡauḡa adureo radiuꞌeteꞌe daꞌo zamare borofeꞌenaꞌa vaḡoꞌi! Mazaḡa zaꞌe Keriso teite ḡabozadu, ḡabone iziga meiro. Ebu Keriso ani adureo Badiꞌa edaꞌe moneo inaraḡeta radiuꞌohe.  
\v 2 Eꞌanoꞌo adure ḡauḡa daꞌo zamaroꞌi! U raha ꞌadi ḡauḡaꞌe ago zamaroꞌi!  
\v 3 Mazaḡa zaꞌe ibiꞌa haḡaiḡa sauꞌa modiro, ebu zaꞌe Badiꞌa ꞌevore zamaḡano Keriso teite tiburu radiuꞌohe. Badiꞌa aḡuꞌa azaḡaꞌe eꞌe ederoga mene idaḡa.  
\v 4 Kerisoꞌe ḡabone iziga ziniꞌeteꞌe vazeḡa. Keriso aneꞌa bare onaiꞌuma madaḡano, zae zuni ani teite agaḡa manoḡano edaꞌuma.   
\p
\v 5 Eꞌanoꞌo zaꞌe ahiriꞌa urateꞌeteꞌe haḡaiḡa niduꞌa mae mode hauḡoꞌi! Aꞌe ubuma ḡezo, zamarone toraga, ahiri uꞌuteꞌeteꞌe zamare borofeꞌeteꞌe, ḡau mae buroga urateꞌeteꞌe. Ebu ḡau ḡehaḡa ago urate rudanoꞌi, mazaḡa ꞌuguḡa vazeḡaꞌe ire emoga\f + \fr 3:5 \ft Ire hina vaze haḡadu Badiꞌa teiḡe ane mazao kurauꞌohe.\f* mazao kurauꞌeteꞌe heuḡa.  
\v 6 Eꞌe guḡa haḡaiḡa uꞌano Badiꞌaꞌe zamaḡa ḡugine runadu, eꞌe naeḡa ziniꞌuma.  
\v 7 Zae zuni ibite ꞌuguḡa haḡaiḡa haḡaeꞌeteꞌe azaḡa teite tiburu radiudo, ebu ꞌuguḡa haḡaiḡa haḡaido.  
\v 8 Rehano izidi zaꞌe, maḡunu, zama ḡugi, vaze sausauneꞌeteꞌe, vaze ni sausaune ḡoereꞌeteꞌe, ꞌuguḡa haḡaiḡa niduꞌa modoꞌi! Ebu ufire ḡoea zae hebeonoꞌo ago roꞌi!  
\v 9 Ebu vaze teite ago ḡurirotitoꞌi, mazaḡa zaꞌe sauꞌa haḡaoga urateꞌeteꞌe zamaroneḡa zu ibite raha ꞌada haḡairoteꞌe haḡaiḡa modiro,  
\v 10 ebu vaze iziga reiro. Badiꞌa ani, aneꞌa vaze haḡairoteꞌe iraḡa idunaḡano, zae izifeꞌohe, zaeꞌa Badiꞌa faifairu ederifine.  
\v 11 Badiꞌaꞌa ḡabone iziga rifiroteꞌe moneo, emeꞌe ꞌahige mene reꞌuma: Giriki azaḡa ga Iuda azaḡa, ahiꞌrio iḡuri haḡairoteꞌe azaḡa ga iḡuri mene haḡairoteꞌe azaḡa, guniꞌa azaḡa ga Sikute azaḡa\f + \fr 3:11 \ft Sikute habaꞌano radiueteꞌe guniꞌa azaḡa\f*, ḡuꞌa teige gauꞌeteꞌe azaḡa ga bohaꞌa azaḡa. ꞌOuge emeꞌe emeḡeꞌa bare avoavo mene rae reꞌuma. Rehano emeḡe niduꞌa Keriso mone raꞌeteꞌe daꞌo zamare borofiꞌuma. Kerisoꞌe emeḡe niduꞌa zamao radiuꞌohe.   
\p
\v 12 Eꞌanoꞌo Badiꞌaꞌa ane mone raꞌeteꞌe azaḡa zu aneꞌa zamare borofeꞌeteꞌe azaḡa, zaꞌe, Badiꞌaꞌa ane veize meiro ꞌahine, vaze vetuḡazeadu danazoꞌi! Haḡai manoḡa vaze mazao haḡaoꞌi! Ḡaeꞌa ḡae bare niḡo mae ovoroꞌi! Roḡeru radoꞌi! Ago ḡarihe maḡunoꞌi!  
\v 13 Vazeꞌa zae mazao haḡai sauꞌa haḡaoꞌidene, ago maḡunoꞌi, ebu Zuhiꞌa boroꞌa zae sauꞌa rae modiroteꞌe teige zeḡe sauꞌa zuni rae modoꞌi!  
\v 14 Ebu haḡai manoḡa ꞌadi niduꞌa roꞌanoga ḡauḡaꞌe zamarone. Zaꞌe vaze teite zamarotitoꞌi! Zamarotitine, zae niduꞌa tibura onaiꞌuma.   
\p
\v 15 Badiꞌaꞌa zaꞌe Keriso ahiri radu uniho manoḡano radifine huze nuꞌoziro. Eꞌanoꞌo Keriso zama roḡeḡaniꞌa zae zama ibitozenoꞌi! Ebu iḡaiḡa Badiꞌa mazao manoḡa tauḡi roꞌi!  
\v 16 Keriso ḡoere hina zamaze iriꞌvaꞌonoꞌi! Faifairu zamareꞌenaꞌa ihotitoꞌi ebu iradugutitoꞌi! Zae zamao Badiꞌa mazao manoḡa tauḡi radu, Salamo badaḡa, kuru badaḡa zu Vine Zaḡoḡaniꞌa ziniꞌeteꞌe badaḡa moꞌi!  
\v 17 Ebu nagini ḡoeroꞌidene, ga nagini haḡaoꞌidene, Zuhiꞌa Boro Iesu niḡano ḡau niduꞌa haḡaoꞌi! Ebu ane niḡano Badiꞌa, emeḡe Mama mazao manoḡa tauḡi roꞌi!   
\s1 Goro ḡoeꞌa Keriso mone raꞌeteꞌe azaḡa veize raꞌohe  
\p
\v 18 Roḡae, ohozeze ḡoere egoꞌi, mazaḡa ꞌougine, Zuhiꞌa Boro moneo raꞌeteꞌe roḡaeḡaniꞌa haḡaiꞌuma haḡaiḡa haḡaeꞌohe.  
\v 19 Ohoze, inudeze zamaroꞌi, ebu ago sausau zoꞌi!  
\v 20 Tahiꞌa komeꞌa komeꞌa, zaꞌe iḡaiḡa viꞌu mogo ḡoere niduꞌa egoꞌi, mazaḡa zaꞌe ꞌouge haḡaine, Zuhiꞌa Boroꞌe matuꞌiꞌuma.  
\v 21 Nanu, mama, tahiꞌaze zamaze ago adufoꞌi! ꞌOugine, zamazeꞌa vetuḡaraꞌuma zu inarazeꞌa ovoiꞌuma.   
\p
\v 22 Tuḡure azaḡa, ḡuꞌa teige gauꞌeteꞌe azaḡa, zae gau niduꞌa zamaḡano, zuhiꞌaze tuḡureze ego zenoꞌi! Zeꞌe raha ꞌada daꞌo zuhiꞌaziꞌe rehano, ego zenoꞌi! Ebu zuhiꞌazeꞌa horozadu matuꞌoga veize radu ago zamare gauoꞌi! Rehano, Zuhiꞌa Boro rihoneꞌenaꞌa zae zuhiꞌa veize hube hune gauoꞌi!  
\v 23 Ebu nagini gauḡa zae zuhiꞌa veize haḡaoꞌidene, zamaze niduꞌa hanadu Zuhiꞌa Boro veize gaueꞌeteꞌe teige haḡaoꞌi! Zaꞌe vaze veize daꞌo mene gaueꞌe rehano, Zuhiꞌa Boro veize borofe gaueꞌohe.  
\v 24 Mazaḡa ḡianoꞌi! Za edeḡa, Badiꞌa mone raꞌeteꞌe azaḡa ziniꞌuma reiroteꞌe ḡauḡaꞌe, zaeꞌa gaueꞌeteꞌe naeḡa haḡaeꞌohe radu, Zuhiꞌa Boroꞌa ziniꞌuma. Eꞌanoꞌo zaeꞌa ꞌouge zae zuhiꞌa veize haḡaeꞌetaꞌaꞌe, Zuhiꞌa Boro Keriso veize gaueꞌohe.  
\v 25 Ḡianoꞌi! Badiꞌaꞌe nize boro ga nize zuhuꞌa rehano, vazeꞌa haḡai sauꞌa haḡaetene, eꞌe naeḡa ziniꞌuma.   
\c 4  
\p
\v 1 Zuhiꞌa azaḡa, zae tuḡure azaḡaꞌe haḡai duduḡano daꞌo zuhiꞌazoꞌi, ebu vaze nu daꞌo ago faizoꞌi, rehano niduꞌa faizoꞌi! Mazaḡa za mene ꞌougine, zae Zuhiꞌa, adureo radiuꞌeteꞌeꞌa, haḡaize ḡianadu eꞌe naeḡa ziniꞌuma.   
\s1 Inara Ḡoea Kuru moneo  
\p
\v 2 Zaꞌe iḡaiḡa kurauꞌenoꞌi! Zamazeꞌe raꞌaneꞌenaꞌa bohanadu, Badiꞌa mazao manoḡa tauḡi raꞌenaꞌa kuranoꞌi!  
\v 3 Ebu emeḡe veize zuni kuranoꞌi, emeḡeꞌa Badiꞌa ḡoere haramiꞌuma ibiḡa aneꞌa haḡaifine. ꞌOugine, Keriso hariḡa Badiꞌaꞌa ane zamao ibite obonetiroteꞌe emeḡeꞌa harame fureniꞌuma. Eꞌe Keriso hariḡa harameꞌeteꞌe uꞌano ḡuꞌano ohohiro ꞌahine, za ꞌouge umizeꞌohe.  
\v 4 Ebu Badiꞌaꞌa gau ꞌadi iniroteꞌe idunaḡano Keriso hariḡa eḡeꞌa doḡoꞌani rae furenifine kuranoꞌi!   
\p
\v 5 Mada manoḡa hidoꞌidene Keriso aḡuꞌa azaḡa danazoga veize faine zamare haḡaoꞌi!  
\v 6 Ebu zeḡe teite ḡoeroꞌidene, iḡaiḡa ḡoere iniga hina namize ḡorezoꞌi! ꞌOugine za ze teite ḡoretitine faine naenaeziꞌuma.   
\s1 Ḡonaga Ḡoea  
\p
\v 7-8 Eꞌe zae uꞌa Tukiko tuḡuneꞌohe. Aniꞌe emeḡe nego zu emeḡe zamarone. Ebu anie ekalesia azaḡa faifairu danazeꞌeteꞌe vazeḡa, zu Zuhiꞌa Boro tuḡure haḡaeꞌenaꞌa eḡe teite gaueꞌohe. Aniꞌe ꞌadama eḡeꞌa nouge nouge radiuꞌeteꞌe edemaziꞌuma, zaeꞌa eꞌe ederadu inarifine.  
\v 9 Onesimo zuni ani teite tuḡune amiꞌuma. Aniꞌe emeḡe nego zu emeḡe zamarone. Ebu aniꞌe hubehune Badiꞌa zamareꞌohe, zuni aniꞌe zae nabudi ꞌahoga. Zeꞌe emeḡeꞌa nouge nouge radiuꞌeteꞌe niduꞌa edemaziꞌuma.   
\p
\v 10 Eḡe teite ḡuꞌano radiuꞌeteꞌe vazeḡa ꞌahoga, niḡa Arisitakoꞌa zae veize uhiu tuḡureꞌohe. Banabasi nabuga, Mareko zuni uhiu tuḡureꞌohe. Aneꞌa amiꞌuma ḡoeꞌa eḡeꞌa ibite tuḡuriro. Eꞌanoꞌo ani amoꞌidene, faine mae ḡihinoꞌi!  
\v 11 Vaze ꞌahoga niḡa Iesu, ane zuni uhiu tuḡureꞌohe. Niḡa ꞌahogaꞌe Iusto rae huneꞌohe. Badiꞌaꞌa vaze zama ibito zenoga veize eḡe teite gaueꞌeteꞌe azaḡa boꞌaḡano zeḡe uḡidu ahi daꞌoꞌe Iuda azaḡa. Ze iḡaiḡa eḡe danaheꞌetene zamaheꞌa matueꞌohe.   
\p
\v 12 Zae nabudi ꞌahoga, Epafara, aniꞌe Keriso Iesu tuḡure vazeḡa. Ani zuni uhiu tuḡureꞌohe. Ani zae veize kurauꞌetene, iḡaiḡa inare kurauꞌohe, Badiꞌaꞌa zae mazao urateꞌeteꞌe ḡauḡa niduꞌa edere hauḡadu, edau gigaranoga veize.  
\v 13 Eꞌa ani horoninutene, aniꞌe hubehune zae ebu Laodikea zu Hierapoli neḡa azaḡa veize inare haḡueꞌohe.  
\v 14 Emeḡe nego zu emeḡe zamorone, doketa vazeḡa niḡa Luka ebu Demaꞌa uhiu tuḡureꞌohe.  
\v 15 Izidi eḡeꞌa uhiu tuḡureꞌeteꞌe ḡoeꞌa Laodikea neḡano Badiꞌa mone raꞌeteꞌe azaḡa zenoꞌi ebu roḡae ꞌahoga, niḡa Numufa zu ane neo kurauꞌeteꞌe azaḡa veize zuni zenoꞌi.   
\p
\v 16 Fefa ꞌadi vaze ꞌahoganiꞌa zae mazao meꞌode hauḡoꞌidene, hena, Laodikea ekalesiaḡa veize tuḡuroꞌi, zeḡe kuru neḡano meꞌode furenoga. Ebu zaꞌe, hena, Laodikea ekalesia veize eḡeꞌa tuḡuriroteꞌe fefaḡa madu meꞌodoꞌi!   
\p
\v 17 Ebu Arekipo ninaꞌa, “Zuhiꞌa Boroꞌa haroteꞌe gauḡa haḡae hauḡoꞌi!”, rae noꞌi!   
\p
\v 18 Eḡe Pauloꞌa uhiu ḡoeꞌa ꞌadi eḡe ꞌevore hina mirineꞌohe. Eḡeꞌa Keriso hari manoḡa uꞌano ḡuꞌano radiuꞌeteꞌe zamaroꞌi, ebu kuranoꞌi! Badiꞌa manohuganiꞌa zae teite radiuꞌenoꞌi!