\id 2TH - Uare \h Tesalonika Vesu \toc3 Tesalonika Vesu \toc2 Tesalonika Vesu \toc1 Tesalonika Ekalesia Azaḡa Mazao Pauloꞌa Vesu Mirihiro \mt1 Tesalonika Ekalesia Azaḡa Mazao Pauloꞌa Vesu Mirihiro \c 1 \p \v 1 Eḡe, Paulo zu Silasi ebu Timoteoꞌa Tesalonika neḡa ekalesiaḡa azaḡa veize fefa ꞌadi miriheꞌohe. Zaꞌe, Badiꞌa emeḡe Mama zu Zuhiꞌa Boro Iesu Keriso moneo raꞌeteꞌe azaḡa. \v 2 Eme ꞌahige rae zihi: Badiꞌa emeḡe Mama zu Zuhiꞌa Boro Iesu Kerisoꞌa manoḡa zu zama roḡeḡa ziniꞌenoꞌi! \s1 Iesu Kerisoꞌa bare onaiꞌuma, ebu ane ane haḡai naeḡa ziniꞌuma \p \v 3 Nego nabudi, eme zae uꞌano iḡaiḡa Badiꞌa mazao manoḡa tauḡi raꞌohe. Eme ꞌouge haḡaeꞌetaꞌaꞌe manoḡa. Mazaḡa zaꞌa Badiꞌa mazao fieꞌetaꞌaꞌe bororu onameꞌohe, ebu zaꞌa zamarotiteꞌetaꞌa zuni bororuꞌohe. \v 4 Eꞌanoꞌo neḡa neḡano Badiꞌa mazao fieꞌeteꞌe ekalesiaḡa azaḡa mazao, harize meꞌodeꞌenaꞌa niguzeꞌohe. Zaeꞌa, Badiꞌa mazao fieꞌeteꞌe uꞌano, vazeꞌa agireziꞌeteꞌe, zu aduga boro zamaḡano, rehano zaꞌe zamaze oboneteadu Badiꞌa mazao fie gigaruꞌohe, rae ziꞌohe. \p \v 5 ꞌUguḡa haḡaiḡaniꞌa zae mazao fureruꞌetaꞌaꞌe, Badiꞌaꞌa mada ḡonagano ane ane haḡai naeḡa idane ziniꞌuma. Ebu Badiꞌaꞌa ibitofieteꞌe haba'a diuḡogaꞌe idaḡa rae reꞌuma veize, zaꞌe aduga madaḡano ꞌouge edau gigaraunu. \v 6 Badiꞌaꞌa haḡaeꞌeteꞌe haḡaiḡaꞌe niduꞌa duduḡa. Eꞌanoꞌo zae sausauzeꞌeteꞌe azaḡaꞌe Badiꞌaꞌa eꞌe naeḡa ziniꞌuma, \v 7 u zae, aduga hideꞌeteꞌe azaḡaꞌe, Badiꞌaꞌa ahiri oheneꞌeteꞌe manoḡa ziniꞌuma, ebu emeḡe zuni rifiꞌuma. Eꞌe haḡaiḡaꞌe, Zuhiꞌa Boro Iesuꞌa inara aneruḡa ḡehaḡa teite zu ire roga duhuḡa teite adureonoꞌo fureraꞌuma madaḡano, Badiꞌaꞌa haḡaiꞌuma. \p \v 8 Badiꞌa ni mae ḡihinoga mene urateꞌeteꞌe azaḡa zu, emeḡe Zuhiꞌa Boro Iesu hari manoḡa igi modeꞌeteꞌe azaḡaꞌe, Badiꞌaꞌa eꞌe sauꞌaḡa naeḡa ziniꞌuma. \v 9 Eꞌe naeḡaꞌe radiu tuḡutuḡu gigiꞌaḡa ziniꞌuma. Zeꞌe Zuhiꞌa Boro radone habaꞌanonoꞌo enoziꞌuma, zuni ane inaraḡa boro bagaḡaonoꞌo mae vaḡiziꞌuma. \v 10 Eꞌe haḡaiḡaꞌe Zuhiꞌa Boroꞌa bare onaiꞌuma madaḡano fureraꞌuma. Ebu Badiꞌa mone raꞌeteꞌe azaḡaniꞌa Zuhiꞌa Boro niguniꞌuma, ebu Iesu ni mae ḡihiniroteꞌe azaḡaꞌe ane agaḡa horonadu zaguzagaꞌuma. Zaꞌe emeḡeꞌa Iesu hariḡa meꞌodo ziniroteꞌe mae ḡihiniro ꞌahine, zae zuni zeḡe teite eꞌea radiuꞌenaꞌa Zuhiꞌa Boro horoniꞌuma. \p \v 11 Eꞌanoꞌo eme eꞌe zamaradu, zae veize iḡaiḡa kurauꞌohe, Badiꞌa ani ꞌahige rae rouga veize: Zaꞌe ane ibio radiuꞌetaꞌaꞌe idaḡa ra reifine. Ebu aneꞌa inaraḡa zenadu, zaeꞌa haḡai manoḡa niduꞌa haḡaihi raꞌeteꞌe, zu Badiꞌa mazao fieꞌeteꞌe uꞌano haḡai manoḡa niduꞌa haḡaoꞌi! \v 12 Emeḡeꞌa ꞌouge kurauꞌetaꞌaꞌe, emeḡe Badiꞌa zu Zuhiꞌa Boro Iesu Kerisoꞌa manoḡa ziniꞌeteꞌe uꞌano, vaze vazeꞌa zae haḡai manoḡa horonadu, emeḡe Zuhiꞌa Boro Iesu nigunifine, zu zae haḡai uꞌano zae zuni Iesuꞌa niguzifine. \c 2 \s1 Zuhiꞌa Boro ꞌizema onaogano, vaze sauꞌa huneꞌa fureraꞌuma \p \v 1 Nego nabudi, emeḡe Zuhiꞌa Boro Iesuꞌa bare onaiteꞌe zu emeḡe nuꞌofadu Iesu teite hidiꞌuma moneo ꞌahige ziꞌohe: \v 2 Zuhiꞌa Boroꞌa onaiꞌuma madaḡa ꞌai feureha reiteꞌe ḡoeꞌa egoꞌidene, zamaze ago koukouroꞌi zu ago adunoꞌi! Vaze ꞌahoganiꞌa Vine Zaḡoḡaniꞌa eꞌe ḡoeꞌaꞌe rae inare reiteꞌe ga, vazeꞌa haramiroteꞌe ga, emeḡeꞌa tuḡuriroteꞌe fefaḡa zamaḡano touga rae reiteꞌe zuni ago egoꞌi! \v 3 Zaꞌe eꞌeguḡa ḡuriroḡa ḡoeꞌaꞌe ago hune zu egoꞌi! Mazaḡa Zuhiꞌa Boro Iesuꞌa ize ꞌizema onaogano, ibite ize vaze ḡehaḡaniꞌa Badiꞌa aḡireniꞌuma, ebu Badiꞌa goro ḡoeꞌa rae modeꞌeteꞌe vazeḡa sauꞌa huneḡaniꞌa fureraꞌuma. Aniꞌe ḡonagano Badiꞌaꞌa ire rogao mae feuniꞌuma. \v 4 Aniꞌe Badiꞌa huga, ebu vazeꞌa Badiꞌa teiḡe kurauꞌeteꞌe ḡauḡa niduꞌa agireniꞌuma, ebu Badiꞌa zu ḡau niduꞌa vitinadu, aneꞌa ane mae hitananiꞌuma. Ebu aniꞌe Badiꞌa Neo diuḡe ehoriꞌuma, ebu aneꞌa ane bare ‘Eꞌe Badiꞌa huga’ rae reꞌuma. \p \v 5 Zae edeḡa, ḡoere ꞌadiꞌe eḡeꞌa zae teite radiudoteꞌe madaḡano zido. \v 6 Zuni zae edeḡa, izidi aḡire vazeḡaniꞌa fureraꞌuma ibiḡa naginiꞌa ꞌueꞌetaꞌaꞌe. Badiꞌaꞌa ḡoitoriroteꞌe madaḡanobuꞌu, aniꞌa fureraꞌuma. \v 7 Badiꞌa goro ḡoeꞌa aḡirohauꞌeteꞌe zamaroneḡa sauꞌaniꞌa vaze vaze zamao sifu gaueꞌohe, rehano hunioꞌe mene fufurimaꞌuma. Mazaḡa aḡire vazeḡaniꞌa gauiꞌuma ibiḡaꞌe vaze ꞌahoganiꞌa ꞌue radiꞌuma, aḡire vazeḡa ꞌue radiuetaꞌaꞌe vazeḡaꞌe Badiꞌaꞌa mae vaḡiniꞌuduꞌu, \v 8 aniꞌa fureraꞌuma. Aniꞌe madaḡa meine, Zuhiꞌa Boro Iesuꞌa ḡoeꞌa inaraḡa hina sausaune runiꞌuma, ebu Iesuꞌa onaiteꞌe agaḡaḡa boro hina sausaune runiꞌuma. \p \v 9 Aḡire vazeḡaꞌe Sataniꞌa gauiꞌuma ibiḡano gaue onaiꞌuma. Sataniꞌa gigiꞌaḡa hanadu aniꞌe haḡai nu badeḡa, tahi zu zaguzagaꞌuma haḡaiḡa ebu haḡai nunu niduꞌa ḡuriro moneo haḡaiꞌuma. \v 10 Ebu aḡire vazeḡa sauꞌa haḡaiḡa nunu niduꞌa hina rune ibiḡano radiuꞌeteꞌe azaḡa soꞌoziꞌuma. Zeꞌe Badiꞌa hari manoḡa, ḡoere huga mae ḡihinifone, Badiꞌaꞌa ḡabozifo rehano, zeꞌe mae ḡihinoga mene uratiro. Eꞌanoꞌo ze mazaoꞌe rune ibiḡano onamoga daꞌo. \v 11 Zeꞌe Badiꞌa hari manoḡa mene mae ḡihiniro ahine, Badiꞌaꞌa zeḡe zama mae ḡunuḡununiꞌuma, ebu ze ꞌane ḡuriro ḡoeꞌaꞌe huga radu mae ḡihiniꞌuma. \v 12 Zeꞌe ḡoere huga, hari manoḡa mene mae ḡihiniro, ebu haḡai sauꞌa sauꞌa matuꞌuḡa haḡairo. Eꞌanoꞌo Badiꞌaꞌa ꞌaheḡe ḡoreziꞌuma, ''Zaꞌe sauꞌa haḡa ahine, aduga hidiꞌuma.'' \p \v 13 Nego nabudi, Zuhiꞌa Boro zamarone azaḡa, eme iḡaiḡa zae uꞌano Badiꞌa mazao manoḡa tauḡi raꞌohe. Mazaḡa za ꞌai ḡabozoga veize irina ꞌoma Badiꞌaꞌa inahe meiro. Aꞌe Vine Zaḡoḡaniꞌa Badiꞌa veize avo ohoziroꞌeteꞌe gauḡa uꞌano, zu zaeꞌa Badiꞌa hari manoḡa mae ḡihineꞌeteꞌe uꞌano. \v 14 Badiꞌa ani, zae ḡabodoga rae zamaziro, ebu emeḡeꞌa hari manoḡa haramoziniro. Aꞌe zae zuni Zuhiꞌa Boro Iesu Keriso agaḡa manoḡa zamaḡano radifine. \v 15 Eꞌanoꞌo nego nabudi, zaꞌe edau gigaranadu, emeḡeꞌa hebe hina ziroteꞌe ga fefao mirihiroteꞌe ihoreḡa ḡoeꞌa zamare radiuꞌenoꞌi! \p \v 16-17 Eme ꞌahige kuratihi: Emeḡe Zuhiꞌa Boro Iesu Keriso zuni Badiꞌa emeḡe Mamaꞌa zamaze rinedoꞌi, ebu haḡai manoḡa haḡaiteꞌea, zu ḡoere manoḡa reiteꞌe moneo inarazoꞌi! Badiꞌa ani emeḡe zamariro, ebu ane manoḡa uꞌano inara rifi onamo tuḡutuḡu. Kerisoꞌa emeḡe uꞌano rudaroteꞌe anoꞌo, Badiꞌaꞌa radiu tuḡutuḡu ḡauḡa rifoga veize ḡoitoriro. Ebu emeꞌa hubehune radiu tuḡutuḡu ḡauḡa zamareꞌeteꞌe hidoga veize, aniꞌa danafeꞌohe. \c 3 \s1 Paulo zu ane teite gaueꞌeteꞌe azaḡa veize kuranoꞌi \p \v 1 Nego nabudi, ḡoere ꞌahogaꞌe ꞌahiguḡa: Emeḡe veize kuranoꞌi, zaeꞌa hari manoḡa mae ḡihiniroteꞌe teige, Zuhiꞌa Boro hari manoḡaniꞌa ḡarihe rovotifine! \v 2 Ebu eme aduga rifiꞌeteꞌe azaḡa sauꞌa huneḡa mazaoꞌonoꞌo Badiꞌaꞌa eme biroga veize kuranoꞌi, mazaḡa mene vaze niduꞌaꞌe Badiꞌa mazao fieꞌohe! \v 3 Rehano Zuhiꞌa Boro aniꞌe ḡoitoroneḡa mene variꞌeꞌe ahine, aniꞌa inaraziꞌuma ebu sauꞌaniꞌa za mene meifine duguziꞌuma. \v 4 Eme hubehune ꞌahige rae zamareꞌohe: Zuhiꞌa Boroꞌa danaziꞌuma ꞌahine, emeḡeꞌa haramo ziniꞌeteꞌe haḡaiḡano zaeꞌa haḡaeꞌeteꞌe haḡaiḡaꞌe haḡae onamiꞌuma raꞌohe. \v 5 Ebu eme ꞌahige kuratihi: Zuhiꞌa Boroꞌa zamaze ibito hanadu, Badiꞌaꞌa nouge nouge zae zamare borofeꞌeteꞌe ederoga. Zu Kerisoꞌa rahao ꞌada aduga boro zamaḡano rinede onaminuteꞌe zaeꞌa ederoga, ebu zae zuni eꞌe haḡaiḡano onamoga. \s1 Tubuḡa azaḡa iraduguziro \p \v 6 Nego nabudi, Zuhiꞌa Boro Iesu Keriso niḡano eme ꞌahige zihi: Iesu moneo raꞌe rehano, tubuḡa azaḡa, zu emeḡeꞌa ihozidoteꞌe haḡaiḡano mene radiuꞌeteꞌe azaḡa mazaonoꞌo vaḡinoꞌi! \v 7 Zae edeḡa, emeḡeꞌa haḡaeꞌeteꞌe teige zae zuni haḡaine manoḡa. Emeḡeꞌa zae teite radiunuteꞌe madaḡano eme mene tuboga horofinu. \v 8 Eme vaze ogomu naeḡa mene haḡadu mene mae autauḡinu. Ebu za mazao aduga ꞌahoga mene zehoga veize, eme madai zu ohere gau boro haḡaido. \v 9 Emeꞌe apostolo azaḡa ꞌahine, zae mazao ogomu mae tauḡoga idaḡa rehano, emeḡeꞌa gauadu ogomu hidido. Emeḡeꞌa gau ḡihau haḡaeꞌeteꞌe zaeꞌa emeḡe haḡai horonadu, zae zuni ꞌouge haḡaifine. \v 10 Emeḡeꞌa zae teite radiunuteꞌe madaḡano zinaꞌa, ‘Iniu vaze gauoga mene uratoꞌidene, ogomu ago hanoꞌi!’ rae zido. \p \v 11 Emeꞌa za hari igiꞌetene, za nuꞌe tubuḡa raꞌohe. Zeꞌe mene gauadu, vaze daꞌo dudizeꞌohe. \v 12 ꞌUguḡa azaḡaꞌe, emeḡeꞌa Zuhiꞌa Boro Iesu Keriso niḡano ziꞌohe. Zaꞌe imuimuꞌuhi radoꞌi, ebu ogomu hidoga veize gauoꞌi! \v 13 Ebu nego nabudi, zaꞌe haḡai manoḡa haḡaeꞌeteꞌe moneo ago fuḡozoꞌi! \p \v 14 Iniu vazeꞌa emeḡeꞌa fefao ꞌada teateꞌe ḡoeꞌa rae modoꞌidene, eꞌe vazeḡaniꞌa nagini haḡaeꞌeteꞌe ekalesia azaḡa ihozoi! Ane teite ago zaꞌuoꞌi, ani mazagaronoga veize. \v 15 Rehano ani agire vazeḡa rae ago noꞌi, rehano negoze iraduguneꞌeteꞌe teige iradugonoꞌi! \s1 Ḡonaga ḡoeꞌa \p \v 16 Zama roḡeḡa rifiꞌuma Zuhiꞌaḡa Boro, aneꞌa iḡaiḡa zae radone niduꞌa zamaḡano ane zama roḡeḡa ziniꞌenoꞌi! Ebu Zuhiꞌa Boroꞌe zae niduꞌa teite radiuꞌenoꞌi! \p \v 17 Ḡonaga ꞌadi ḡoeꞌaꞌe eḡe, Pauloꞌa eḡe ꞌevore hina uhiu ḡoeꞌa miriheꞌohe. Aꞌe eḡeꞌa hubehune tuḡureha rae ederifine, e ꞌahige miriheꞌohe. \p \v 18 Emeḡe Zuhiꞌa Boro Iesu Keriso manoḡaniꞌa zae niduꞌa mazao radiuꞌenoꞌi!