\id 1TH - Uare 
\h Tesalonika Ibiꞌa 
\toc3 Tesalonika Ibiꞌa 
\toc2 Tesalonika Ibiꞌa 
\toc1 Tesalonika Ekalesia Azaḡa Mazao Pauloꞌa Ibiꞌa Mirihiro 
\mt1 Tesalonika Ekalesia Azaḡa Mazao Pauloꞌa Ibiꞌa Mirihiro  
\c 1  
\p
\v 1 Eḡe, Paulo zu Silasi ebu Timoteoꞌa Tesalonika habaꞌa ekalesiaḡa azaḡa veize fefa ꞌadi miriheꞌohe. Zaꞌe Badiꞌa emeḡe Mama zu Zuhiꞌa Boro Iesu Keriso moneo raꞌeteꞌe azaḡa. Eme ꞌahige rae zihi: Badiꞌaꞌa manoḡa zu zama roḡeḡa ziniꞌenoꞌi!   
\s1 Tesalonika ekalesiaḡa azaḡaniꞌa Badiꞌa mazao firoteꞌe haḡaiḡa  
\p
\v 2 Emeḡe kuru zamaḡano, zae veize kurauꞌetene, eme zae uꞌano Badiꞌa mazao iḡaiḡa manoḡa tauḡi raꞌohe.  
\v 3 Mazaḡa emeḡeꞌa, Badiꞌa emeḡe Mama mazao kurauꞌetene, iḡaiḡa zae zamareꞌenaꞌa, ꞌahige raꞌohe: Zaꞌe Badiꞌa mazao fieꞌenaꞌa, gaueꞌohe. Ebu zae zamarone vaze mazaoꞌe boro ꞌahine, zaꞌe zeḡe veize gau boro haḡaeꞌohe. Ebu Zuhiꞌa Boro Iesu Kerisoꞌa hube hune bare onaiꞌuma raꞌeteꞌe ḡoeꞌa mae obene giganeꞌohe.   
\p
\v 4 Nego nabudi, Badiꞌa zamarone azaḡa, eme edeḡa, za ꞌai Badiꞌaꞌa ohotiro.  
\v 5 Emeḡeꞌa hari manoḡa haramo zinirotene, mene ḡoere isoḡa hina rehano, inaraḡeita haramido. Eꞌe zamaḡano Vine Zaḡoḡaniꞌa zae mazao gauadu, emeḡeꞌa haramidotaꞌaꞌe hube hune huga rae ihozido. Zu zae zuni edeḡa emeḡeꞌa zae teite radiunuteꞌe zamaḡano, nouge nouge zae danazinutaꞌe. Zaeꞌa emeḡe radoneo horonidotene, hari manoḡaꞌe mene ḡuriro hariḡa reido.  
\v 6 Zaꞌe hari manoḡa mae ḡihinirotene, aduga boro hidiro. Rehano, Vine Zaḡoḡaniꞌa matuꞌu hina iriꞌavoziro ꞌahine, za matuꞌuzeta hari manoḡa mae ḡihine onainu. Zaꞌa ꞌouginutaꞌaꞌe, emeḡe haḡai zuni Zuhiꞌa Boro haḡai haḡaiḡano onainu.   
\p
\v 7 Eꞌanoꞌo Makedonia zu Akaia habaꞌano radiuꞌeteꞌe ekalesiaḡa azaḡaniꞌa zaeꞌa haḡaeꞌeteꞌe haḡaiḡa hariḡa egaduni, zae haḡaio haḡae onamiꞌuma raꞌohe.  
\v 8 Mazaḡa Zuhiꞌa Boro hari manoḡaniꞌa zae mazaonoꞌo bororanadu, mene Makedonia zu Akaia habaꞌano daꞌo rehano, haba ꞌahoga ꞌahoga zamaḡano zuni bororu onaeha. Ebu zaeꞌa Badiꞌa mazao fieꞌeteꞌe hariḡa vaze niduꞌa igi hauḡeha. Eꞌanoꞌo emeꞌe zae hariꞌe mene bare reꞌuma.  
\v 9 Mazaḡa vaze niduꞌa edeḡa, zeꞌe, emeḡeꞌa Tesalonika habaꞌano hari manoḡa haramadu, zaeꞌa mae ḡihiniroteꞌe, eꞌe hariḡa meꞌodofiꞌohe. Ebu zaeꞌa nouge nouge ḡuriro badiꞌaḡa higone modadu, hube hune radiuꞌeteꞌe Badiꞌaḡa daꞌo zae Zuhiꞌa Boro radu, tuḡureḡa haḡaeꞌeteꞌe, eꞌe hariḡa zuni meꞌodofiꞌohe.  
\v 10 Ebu zaꞌe Theovaiteꞌe guhineꞌohe, rae meꞌodofiꞌohe. Aꞌe Iesu, Badiꞌaꞌa runeonoꞌo bare ḡaboniroteꞌe vazeḡa, zuni mada ḡonagano haḡai sauꞌa uꞌano Badiꞌaꞌa aduga ziniꞌuma madaḡano, ani eme ḡabofiꞌuma vazeḡa.   
\c 2  
\s1 Pauloꞌa Tesalonika neḡano haḡairoteꞌe haḡaiḡa rae fureniro  
\p
\v 1 Nego nabudi, za edeḡa, emeḡeꞌa Tesalonika neḡano ꞌiꞌudirotaꞌaꞌe, mene tauḡe amiro. Mazaḡa zae ḡehaḡa huneꞌa eꞌea hari manoḡa mae ḡihiniro.  
\v 2 Za edeḡa, emeḡeꞌa zae ne ꞌizema amogano, Filipi neḡano vazeꞌa ifi sausaufiro, zuni rae aduga rifiro. Rehano Tesalonika neḡa amirotene, emeḡe Badiꞌaꞌa inarafeadu, agire boꞌaḡano, rehano Badiꞌa hari manoḡa inare haramiro.  
\v 3 Mazaḡa emeḡeꞌa haramirotaꞌaꞌe, zae tutuze veꞌozifine ga, haḡai sauꞌa zae mazao haḡaifine zu zae soꞌozifine mene haramiro.  
\v 4 Rehano emeꞌe hari manoḡa harameꞌohe, mazaḡa Badiꞌaꞌa eme ꞌai manoḡa radu, hari manoḡa haramiꞌuma gauḡano ohofiro ꞌahine. Eꞌanoꞌo emeḡeꞌa harameꞌetene, mene vazeꞌa matuꞌoga, rehano Badiꞌaꞌa matuꞌiꞌuma ibiḡano harameꞌohe. Badiꞌa ani emeḡe zama faifaine ḡianeꞌeteꞌe vazeḡa.   
\p
\v 5 Zae edeḡa, emeḡeꞌa ḡorezinutaꞌe mene zamaze anoga radu, ga zae mazao ḡau mouga radu mene soꞌe ḡorezinu. Badiꞌa huga ani eme haḡai edeḡa.  
\v 6 Zuni emeꞌe, mene zaeꞌa ga vaze ꞌahoga ꞌahoganiꞌa nife mae ḡihinoga radu gauido,  
\v 7 emeꞌe Kerisoꞌa tuḡuiroteꞌe apostoloḡa azaḡa ꞌahine, nife boro azaḡa rouga zuni idaḡa. Rehano emeꞌe, roḡaꞌeꞌa ubuga duḡuru faifaizeꞌeteꞌe teige, zae boꞌaḡano roḡeru radiunu.   
\p
\v 8 Eme zae zamare borofiro ꞌahine, matuꞌufeta Badiꞌa hari manoḡa haramo zinirotene, ḡabonefe niduꞌa hina zae danazoga veize ḡau niduꞌa haḡao ziniro. Mazaḡa emeḡe zamarone zae mazaoꞌe boro bagaḡa.  
\v 9 Nego nabudi, za hubehune edeḡa, emeḡeꞌa zae mazao Badiꞌa hari manoḡa haraminuteꞌe zamaḡano, emeḡeꞌa inare hune gauinutaꞌaꞌe. Emeꞌe zaeꞌa emeḡe uꞌano hadize mene modifine, madai zu ohere niduꞌa gauido.   
\p
\v 10 Hubehune zaꞌe haḡaife horoniro, ebu Badiꞌa ane zuni edeḡa. Zaꞌe, Badiꞌa mazao fieꞌeteꞌe azaḡa teite, emeḡeꞌa radiunuteꞌe madaḡano, haḡaifeꞌe, Badiꞌaꞌa matuꞌiꞌuma haḡaiḡa zu duduḡa ebu mene veꞌoḡa haḡaiḡa haḡainu.  
\v 11-12 Zae edeḡa, ohozeꞌa ubuga duḡuru ihozeꞌeteꞌe teige, eme zae zaeꞌa fie gigaru onamogaradu danazinu, zu inara zinido, ebu iraduguzido, Badiꞌaꞌa matuꞌiꞌuma haḡaiḡano radiu onamifine. Mazaḡa za Badiꞌaꞌa huzeꞌohe, aneꞌa zae faifaine zuhiꞌaziꞌuma.   
\p
\v 13 Zuni eme zae uꞌano iḡaiḡa Badiꞌa mazao manoḡa tauḡi raꞌohe, mazaḡa za aḡua mazaḡano emeḡeꞌa Badiꞌa hari manoḡa haramo zinirotaꞌaꞌe mene vaze ḡoere, rehano Badiꞌa ḡoere rae radu zaeꞌa mae ḡihiniro. Aꞌe hube Badiꞌa ḡoere. Ebu eꞌe ḡoeꞌaniꞌe, zae, Badiꞌa ḡoere mae ḡihineꞌeteꞌe azaḡa, zamao gaueꞌohe.  
\v 14 Eꞌanoꞌo, nego nabudi, zaꞌe Iudea habaꞌa zamaḡano Keriso Iesu niḡano radiuꞌeteꞌe ekalesiaḡa azaḡaniꞌa haḡaidoteꞌe teige haḡairo. Zeḡeꞌa Iuda azaḡa mazaonoꞌo aduga hididoteꞌe teige, zae zuni haba tiba azaḡa mazaonoꞌo aduga hidido.  
\v 15 Zuhiꞌa Boro Iesu ebu peroveta azaḡa runedirotaꞌaꞌe, Iuda azaḡaniꞌa, ebu emeḡe hegofe bufirotaꞌa zuni Iuda azaḡaniꞌa. Zeꞌe Badiꞌaꞌa mene matuꞌiꞌuma haḡaiḡa haḡaeꞌohe. Zeꞌe vaze niduꞌa agire.  
\v 16 Iuda azaḡaꞌe, mene Iuda azaḡa mazao hari manoḡa haramoga mene uratadu, eme garareꞌohe. Hena, zeꞌa ḡabone hidiꞌuma radu. Deꞌugeꞌenaꞌa, zeḡe haḡai sauꞌa ragate ragate tiꞌohe. Eꞌanoꞌo Badiꞌaꞌa maḡuno zenadu, naeḡa haḡaoga raꞌohe.   
\s1 Paulo ani Tesalonika neḡa azaḡa ḡiazoga uratiro  
\p
\v 17 Nego nabudi, Tesalonika neḡano Iuda azaḡaniꞌa aduga boro fureraroteꞌe uꞌano, zaꞌe munemune azaḡa teiḡe emeḡeꞌa muhize iḡuniro, onao izidi mada nu vitineha (Aꞌe ahirioꞌe mene ḡiazeꞌe rehano, zamafeꞌe zae zamareꞌohe). Ebu zae ḡiazoga urate rudaunu ꞌahine, zae vaḡe bare amoga radu ibi vaḡe onainu.  
\v 18 Oꞌe, eme zae vaḡe amihi reiro. Hubehune eḡe, Pauloꞌa bare bare ibiḡa vaḡiro rehano, Sataniꞌa haḡai nunuoꞌnoꞌo ꞌuiro.  
\v 19 Eme uraꞌe bare ḡiazihi raꞌohe. Mazaḡa emeḡeꞌa zamareꞌetene, zaꞌe hubehune Badiꞌa mazao fie gigaruꞌeꞌuma, onamo emeḡe Zuhiꞌa Boro Iesuꞌa bare onaiteꞌe madaḡano ane zamao edaꞌuma. Ebu eꞌe madaḡano emeꞌe zaeꞌa naeḡa meiteꞌe uꞌano niguziꞌuma, ebu zae uꞌano matuꞌiꞌuma.  
\v 20 Hubehune eme zaꞌe niguzeꞌohe, ebu zae uꞌano matuꞌeꞌohe.   
\c 3  
\p
\v 1-2 Eme ꞌouge guhiu onamoga mene idararotene, eme raenaꞌa, Timoteoꞌe zae vaḡe tuḡune amiꞌuma, ebu emeꞌe emeḡe daꞌo Atena neḡano radiꞌuma reiro. Timoteoꞌe, emeḡe nego, emeḡe teite Badiꞌa gau haḡaeꞌohe, ebu Keriso hari manoḡa harameꞌohe. Eꞌanoꞌo eme Timoteo tuḡuniro, aniꞌe zaeꞌa Badiꞌa mazao fie gigaranoga veize danaziuma.  
\v 3 ꞌOugine zaeꞌa aduga hidine, zamazeꞌe mene hagariꞌuma. Mazaḡa zae zaeꞌe edeḡa, Keriso mazao fieꞌeteꞌe azaḡaniꞌe aduga hidiꞌuma.  
\v 4 Eme zae teite radiudoteꞌe zamaḡano, emeḡe niduꞌa nariga aduga hideꞌohe rae, bare bare iraduguzido. ebu zae edeḡa, eꞌe haḡaiḡaniꞌe zae mazao fureraro.  
\v 5 Eꞌanoꞌo eꞌa guhiu onamoga mene idararotene, zaeꞌa nouge nouge Keriso mazao fieꞌeteꞌe ederoga veize Timoteo tuḡuniro. Mazaḡa eꞌa riharotaꞌaꞌe, Sataniꞌa ibi nunuo soꞌozadu zaeꞌa Keriso mazao fieꞌeteꞌeꞌa dauḡiꞌuma reiro. ꞌOugine, emeḡeꞌa zae veize gaue onairotaꞌaꞌe, huga oꞌoꞌa reꞌuma.   
\s1 Timoteoꞌa Tesalonika azaḡa hariḡa manoḡa odohonairo  
\p
\v 6 Rehano Timoteo ani izidi zae mazaonoꞌo bare onaeha, ebu zae hari manoḡa odohe onaeha, raenaꞌa, zaꞌe Badiꞌa mazao ize fieꞌohe, zuni Badiꞌa zu vaze zamareꞌohe. Ebu zaꞌe iḡaiḡa eme zamareꞌohe, ebu emeḡeꞌa ḡiaze hunihi raꞌeteꞌe teige, zae zuni ḡiafe hunihi raꞌohe.  
\v 7 Eꞌanoꞌo nego nabudi, emeꞌe ꞌahama aduga boro hideꞌe rehano, zaꞌe ize Keriso mazao fieꞌohe rae egatene, zamafe inaraneha.  
\v 8 Ebu izidi emeḡeꞌa matuꞌufeta radiuꞌohe, mazaḡa zaꞌe Zuhiꞌa Boro mazao edau gigaruꞌe ꞌahine.   
\p
\v 9 Mazaḡa zaeꞌa Keriso mazao ize fieꞌeteꞌe haḡaiḡaniꞌa matuꞌofiꞌohe, eme kurauꞌetene, zae uꞌano Badiꞌa mazao nouge nouge manoḡa tauḡi reꞌuma?  
\v 10 Mada niduꞌa ohere niduꞌa, zamafe niduꞌa hina kurauꞌohe, emeḡe zae teite bare hidoga, zu bare ihozoga, zae Keriso mazao arane fie gigarafine.   
\p
\v 11 ꞌOugadu eme ꞌahige kurauꞌohe: Badiꞌa, emeḡe Mamaꞌa, zu emeḡe Zuhiꞌa Boro Iesuꞌa, emeḡeꞌa zae vaḡe amiteꞌe ibiḡa mae bohanifine!  
\v 12 Ebu Zuhiꞌa Boroꞌa zae zamarone borofadu, vaze niduꞌa zamaroga, zuni zae zamarotitoga, emeḡeꞌa zae zamareꞌeteꞌe teige.  
\v 13 Ebu eme ꞌadige kurauꞌohe: Kerisoꞌa zamaze inare radoga, Badiꞌa emeḡe Mama zamao haḡaize deheḡa reifine, zu sauꞌa moneo mene debazifine, aꞌe Zuhiꞌa Boro Iesuꞌa ane moneo raꞌeteꞌe azaḡa teite bare onaiteꞌe madaḡano.   
\c 4  
\s1 Badiꞌaꞌa matuꞌiꞌuma radoneḡa  
\p
\v 1-2 Eꞌanoꞌo nego nabudi, eme Badiꞌaꞌa matuꞌiꞌuma radoneḡa ibiḡa ihozido. Ebu izidi zaꞌe eꞌe radoneḡano radiuꞌohe. Rehano eme Zuhiꞌa Boro Iesu niḡano rinede umizeꞌohe. Mazaḡa Zuhiꞌa Boro Iesuꞌa rifiroteꞌe ḡoeꞌa emeḡeꞌa ihozidotaꞌaꞌe zae edeḡa, za eꞌe ibiḡano daꞌo radiu onameꞌenoꞌi!   
\p
\v 3 Badiꞌa ani uraꞌe, zaeꞌa zaḡozaḡoga urateꞌohe, mazaḡa zaꞌe Badiꞌaꞌa mae avo tiro ꞌahine. Zaꞌe daro haḡaiḡaonoꞌo vaginoi!  
\v 4 Ebu ohoze ohoze, zaꞌe zaḡozaḡe zu gubane ibiḡano ꞌahirize tuḡaneꞌenaꞌa, dugunoꞌi!  
\v 5 U ubuma gezo radoneḡano ago radoꞌi! Aꞌe Badiꞌa aḡuꞌa azaḡa haḡai.  
\v 6 Eꞌe haḡaiḡa sauꞌaꞌe negoḡo nabugo mazao ago haḡaoꞌi! Inuga teite ago darooꞌi! Mazaḡa ꞌuguḡa haḡaiḡa haḡaeꞌeteꞌe vazeḡaꞌe Zuhiꞌa Boroꞌa eꞌe naeḡa haꞌuma. ꞌAdiꞌe emeḡeꞌa ibiteo ꞌoma irina riḡa zi edemazidoteꞌe ḡoeꞌa.  
\v 7 Badiꞌaꞌa emeḡe zamafirotaꞌaꞌe, daro haḡaiḡa mene haḡaifine, rehano zaḡozaḡo radoneḡano radifine.  
\v 8 Eꞌanoꞌo iradugu ḡoeꞌa ꞌadi mene mae ḡihiniꞌuma vazeḡaꞌe, mene vaze iradugu ḡoeꞌa mae ḡihineꞌohe. Rehano, Badiꞌa, ani ane Vine Zaḡoḡa tuḡuno zenadu, danazeꞌe rehano, iradugu ḡoeꞌa rae modeꞌohe.   
\p
\v 9 U nego nabudi teite zamarotiteꞌeteꞌe moneoꞌe, za ꞌai Badiꞌaꞌa ihozadu, zamarotiteꞌohe. Eꞌanoꞌo mene miriho ziniꞌuma.  
\v 10 Hubehune zaꞌe Makedonia habaꞌa niduꞌa zamaḡano Iesu mone raꞌeteꞌe azaḡa niduꞌa zamareꞌohe. Rehano nego nabudi, eme bare umizihi! Bare bare ꞌougeꞌenoꞌi!   
\p
\v 11 Ebu ꞌadiꞌe, emeḡeꞌa zae teite radiunuteꞌe madaḡano, ihozidoteꞌe ḡoeꞌa rehano, bare ziꞌohe. Zamaze rinedeꞌenaꞌa, imuimuꞌuhi radiuꞌenoꞌi! Ebu evoreze hina zae zae gau daꞌo zamare haḡaeꞌenoꞌi! Vaze ago dudizeꞌenoꞌi!  
\v 12 ꞌOugine, Iesu mone mene raꞌeteꞌe azaḡaniꞌa zae radone horonadu, gubaziꞌuma. Zuni zae inarao gaueꞌenoꞌi, zaeꞌa ogomu, dabua, radone ḡauḡa niduꞌa meifine! ꞌOugine, zaꞌe vaze ꞌahoganiꞌa mene fereziꞌuma.   
\s1 Zuhiꞌa Boro Iesuꞌa bare onaiꞌuma hariḡa  
\p
\v 13 Nego nabudi, eme uraꞌe zaeꞌa ederoga, Iesu ni mae ḡihineꞌeteꞌe azaḡaniꞌa rudaroteꞌe mazao naginiꞌa fureraꞌumaꞌe. Badiꞌa aḡuꞌa azaḡa rudaꞌuma teige, zaꞌe zamaze ago vetuḡa ranoꞌi! Ze ꞌane rune vazeḡaꞌe mene bare ḡabodiꞌuma raꞌohe.  
\v 14 Eme, ḡoere ꞌadiꞌe huga raꞌohe. Iesu ani rudaro, ebu bare ḡabodiro. Eꞌanoꞌo Iesu ni mae ḡihinadu, rudaroteꞌe azaḡaꞌe, Iesuꞌa bare ovaiꞌuma madaḡano, Badiꞌaꞌa Iesu teite bare zamaziꞌuma.  
\v 15 Emeḡeꞌa ꞌada ziꞌeteꞌe ḡoeꞌaꞌe, Zuhiꞌa Boro Iesuꞌa reiroteꞌe ḡoeꞌa. Eme, ize ḡaboga radiuꞌeteꞌe azaḡaꞌe ize radiu onamo, Zuhiꞌa Boroꞌa bare ovaineꞌe, rudaroteꞌe azaḡaꞌe ibite ḡaboziꞌuma. Eꞌe enoganobuꞌu emeḡe zamafiꞌuma.  
\v 16 Zuhiꞌa Boro aneꞌa rune azaḡa iḡunoi raenaꞌa ḡihau huaune, tuḡure viga ḡihiꞌaniꞌa huaꞌuma, ebu kibi hodoga igiꞌuma. Eꞌe zamaḡano, Zuhiꞌa Boro aneꞌa adureonoꞌo ovaiꞌuma. Ebu Keriso mazao fiadu rudaroteꞌe azaḡaniꞌa gezo ḡabode iḡuniꞌuma.  
\v 17 Eꞌe enogano, eme, ize ḡaboga radiuꞌeteꞌe azaḡaꞌe, Badiꞌaꞌa zeḡe teite idaḡa mae ḡihifiꞌuma, ebu magube zamaḡa diuḡiꞌuma, adureo Zuhiꞌa Boro teite hidoga veize. Ebu emeꞌe Zuhiꞌa Boro teite radiu tuḡutuḡu radiꞌuma.  
\v 18 Zaꞌe, eḡeꞌa ꞌada teateꞌe ḡoeꞌa hina zae bare inaratitoꞌi!   
\c 5  
\p
\v 1 Nego nabudi, Zuhiꞌa Boro Iesuꞌa bare onaiꞌuma madaḡaꞌe ꞌahama mene miriho ziniꞌuma,  
\v 2 mazaḡa za edeḡa tauḡi, Zuhiꞌa Boroꞌa bare onaiꞌuma madaḡaꞌe. Ḡonoreꞌa ohere onaiteꞌe teige onaiꞌuma, ebu vaze niduꞌa zaguzagaꞌuma.  
\v 3 Vaze vazeꞌa raenaꞌa, “Eme uniho manoḡa maha, ebu aduga ꞌahoga oꞌoꞌa.” rae reꞌoreꞌeꞌeteꞌe zamaḡano, sauꞌa boroꞌa tabatabaze feuradu, zaguzaguziꞌuma. Aꞌe roḡae ahiꞌetaniꞌa ene furenoga radu, gigiꞌaniꞌa tabatabane feurohuꞌeteꞌe teige fureraꞌuma. Ebu zeꞌe eꞌe aduḡa boroꞌa fureruꞌeteꞌe mode feranoga mene idaḡa.   
\p
\v 4 Rehano nego nabudi, zaꞌe mene uzaboo radiuꞌeteꞌe azaḡa. Eꞌanoꞌo Iesuꞌa bare ovaine, ḡonoreꞌa zaguzaguzeꞌeteꞌe teige, mene zaguzaguziꞌuma.  
\v 5 Zaꞌe niduꞌa madai zu agaḡa zamaḡano radiuꞌeteꞌe azaḡa. Emetaꞌe ohere zu uzabo zamaḡano mene radiuꞌeteꞌe azaḡa.  
\v 6 Eꞌanoꞌo Iesuꞌe mene bare onaiꞌuma rae zamareꞌeteꞌe azaḡa teige, mene reꞌoreꞌe radiꞌuma! Ebu tohutohe radiꞌuma, zu haḡaife daꞌo faifaine duguniꞌuma.  
\v 7 Mazaḡa reꞌoreꞌe radiuꞌeteꞌe azaḡaꞌe uzabo zamaḡano reꞌoreꞌeꞌohe, ebu gage baboruꞌeteꞌe azaḡaꞌe uzabo zamaḡano gage baboruꞌohe.   
\p
\v 8 Rehano emeꞌe madai agaḡano radiuꞌe ꞌahine, haḡaife daꞌo faifaine duguniꞌuma. Eꞌe haḡaiḡaꞌe eme ꞌahige haḡaiꞌuma: Badiꞌa mazao fiꞌuma, ebu Badiꞌa zu vaze zamariꞌuma. Aꞌe uti vazeḡaniꞌa ahiri biriḡa hina ahiꞌa ꞌueꞌeteꞌe heuḡa. Ebu eme Iesuꞌa bare onaadu ḡabofiꞌuma rae zamare gigaruꞌeꞌuma. Aꞌe uti vazeḡaniꞌa utio vadini biriḡa hina vadiga ꞌueꞌeteꞌe heuḡa.  
\v 9 Mazaḡa Badiꞌaꞌa emeḡe meꞌofirotaꞌaꞌe, mene maḡunofeadu, emeḡe sauꞌa naeḡa rififine, rehano Zuhiꞌa Boro Iesu Keriso tuḡunadu, emeḡe sauꞌa naeḡa mae vaḡinadu, ḡabofifine.  
\v 10 Aneꞌa onaiteꞌe madaḡano, emeꞌe ruga ga ḡaboga rehano, ane teite ḡabone tuḡutuḡu radoga veize, ani emeḡe veize rudaro.  
\v 11 Eꞌanoꞌo zae zaeꞌa eḡe ḡoere ꞌadi hina inaratitoꞌi, ebu Badiꞌa mazao fie gigarafine danatitoꞌi! Eꞌe haḡaiḡaꞌe zaeꞌa haḡae onaeha. Zaeꞌa ꞌouge daꞌo haḡaeꞌenoꞌi!   
\s1 Badiꞌaꞌa matuꞌiꞌuma haḡaiḡa ḡonagano ihoziro  
\p
\v 12 Nego nabudi, eme umizeꞌohe. Zae boꞌaḡano, Zuhiꞌa Boro ibi moneo gau boro haḡaiꞌenaꞌa ibitoziniꞌeteꞌe ebu iraduguzeꞌeteꞌe azaḡa gubazoꞌi!  
\v 13 Zeḡeꞌa zae veize gaueꞌeteꞌe haḡaiḡa uꞌano zamaze niduꞌa hina gubazoꞌi, ebu zamarone boro zeḡe mazao toꞌi! Zae zae niduꞌa uniho manoḡa zamaḡano radoꞌi!  
\v 14 Nego nabudi, eme umizeꞌohe. Gauoga mene urateꞌeteꞌe tubuḡa azaḡaꞌe zeḡe hadi gauḡa veize iraduguzoꞌi! Zamaḡa rereḡa azaḡaꞌe inarazoꞌi! Zoreḡa azaḡaꞌe danazoꞌi! Vaze niduꞌa mazao zamaze rinedoꞌi!  
\v 15 ꞌAhoganiꞌa ꞌahoga mazao sauꞌa haḡaoꞌidene, sausaunateꞌe vazeḡa ninaꞌa, eꞌe naeḡa ago haḡaoꞌi, rae noꞌi! Rehano iḡaiḡa nabugota zuni vaze niduꞌa mazao haḡai manoḡa daꞌo haḡaeꞌenoꞌi!  
\v 16-18 Zaꞌe Keriso moneo radiuꞌeteꞌe azaḡa, eꞌanoꞌo Badiꞌaꞌa zae mazaonoꞌo urateꞌeteꞌe haḡaiḡaꞌe ahiꞌe; Mada niduꞌa matuꞌe radiuꞌenoꞌi! Iḡaiḡa kurauꞌenoꞌi! Naginiꞌa fureranoꞌidene, sauꞌa manoḡa rehano, Badiꞌa mazao manoḡa tauḡi roꞌi!  
\v 19 Vine Zaḡoḡaniꞌa zae mazao gaueꞌeteꞌe ibiḡa ago ꞌuoꞌi!  
\v 20 Vine Zaḡoḡaniꞌa ziniꞌeteꞌe ḡoeꞌaꞌe huga ꞌoꞌoꞌa radu ago reꞌoreꞌone modoꞌi!  
\v 21 ꞌUguḡa ḡoeꞌa egoꞌidene, faine ḡianoꞌi! Ebu manoḡa ḡauḡaꞌe moꞌi,  
\v 22 u sauꞌa ḡauḡaꞌe ago moꞌi!   
\s1 Ḡonaga ḡoeꞌa  
\p
\v 23 Eme ꞌahige kuratihi: Zama roḡeḡa rifeꞌeteꞌe Badiꞌaḡa, aneꞌa ane teige deheze huneꞌenaꞌa matuoziniꞌuma, ebu zaeꞌa haḡai sauꞌa mene haḡaoga veize, Badiꞌaꞌa vineze zu ahirize dananeꞌenoꞌi! Onamo, Zuhiꞌa Boro Iesu Kerisoꞌa bare onaiꞌuma.  
\v 24 Zae meꞌofiroteꞌe Badiꞌaḡa, ani ḡoereꞌe hugeita. Eꞌanoꞌo aneꞌa haḡao ziniꞌuma.   
\p
\v 25 Nego nabudi, emeḡe veize kurauꞌenoꞌi!   
\p
\v 26 Ebu zaꞌe, nego nabudi niduꞌa teite zama manoḡa teite mae ḡihitetoꞌi!  
\v 27 Zuhiꞌa Boro niḡano ziꞌohe. Fefa ꞌadiꞌe nego nabudi niduꞌa veize meꞌodoꞌi, zeḡe egoga veize!   
\p
\v 28 Emeḡe Zuhiꞌa Boro Iesu Keriso ane manoḡaniꞌa zae mazao radiuꞌenoꞌi!