\id 3JN 3 John Tinata Tuna PNG WWH 08/98 \h 3 Ioanes \toc1 A Vautuluna Buk Kai Ioanes \toc2 3 Ioanes \toc3 3 Ios \mt1 A VAUTULUNA BUK KAI IOANES \c 1 \p \v 1 A patuana tadav Gaio, ra.vakak na tutana, nina iau mari ia tuna. \p \v 2 Talaigu tuna, iau araring upi una ki mamal ma upi na boina kaum nilaun, da ra tulungeam i ki mamal. \v 3 Tago i ngala muka kaugu gugu ta nam ra bung ba ra umana tura i dat dia ga pot i tana, ma dia ga varvai ure ra dovotina piram, tago u vanavana ta ra dovotina. \v 4 Pa ta magit mulai i manga ngala muka kaugu gugu tana, ia kaka go, ba iau valongore ra umana natugu dia vanavana ta ra dovotina. \s1 Di pite pa Gaio \p \v 5 Talaigu tuna, i fovot kaum papalum u pait ia tadav diat a lavur tura i dat dia vaira; \v 6 ma dia tar varvai dovot ta ra luaina mata i ra ekelesia ure kaum varmari; ma i boina ba una tul vue diat ta kadia vinavana da i topa God. \v 7 Tago dia tar vana pa ure ra Iang, ma pa dia vatur vake ta magit tai ra umana Tematana. \v 8 Kari go i takodo upi dat a vango diat, upi dat a umana tena papalum varirivut ma ra dovotina. \s1 Diotrepe dir ma Demetrio \p \v 9 Iau ga tumu ta umana magit tadav ra ekelesia; ma Diotrepe, nina i mainge upi na lualua kakit ta diat, pa i kapupi dat. \v 10 Io, ba iau pot, ina vanuk tar mule ra lavur magit i papait ia, tago i tata vakuku ure dat ma ra kaina tinata; ma vakir nam uka, go bula, pa i vango ra umana tura i dat, ma i tigal bat diat dia mainge, ma i okole vue diat kan ra ekelesia. \v 11 Talaigu tuna, koko una mur pa ra magit i kaina, una mur pa ra magit i boina. Nina i pait ra magit i boina, tai God nam; nina i varpiam, pa i ti gire God. \v 12 A tarai par ma ra dovotina iat, bula, dia varvai dovot ure Demetrio; maia, avet bula ave varvai dovot, ma u tar nunure ba kaveve varvai i dovot. \s1 A mutuaina tinata na varvagai \p \v 13 Mangoro na magit ba ina tumu ia tadav u, ma pa iau mainge ra tutumu tadav u ma ra polo na tutumu ma ra pen; \v 14 iau nuk ia ba i maravai upi dor a varboboi ma dor a tata ma ra ngie i dor. \v 15 A malmal, na ki piram. A umana talai dat dia vatatabe u. Una vatatabe ra lavur talai dat tikatikai, ma una vatang ra iang i diat.