\id TIT Doromu-Koki 
\ide 65001 - Unicode (UTF-8)
\h Titus 
\toc1 Paul di bura Titus rofu 
\toc2 Titus 
\toc3 Tit 
\mt2 Paul di bura  
\mt1 Titus  
\mt3 rofu  
\imt1 Ago di ini adina  
\im Titus bi Jew de amiye, kaere bi ekalesia amiye nisi Paul di asini moimai amiye ma duburi moimai Paul aedegika niyo. \bk Paul yaku mina bura\bk* ini aedena amiye rua Titus rofu Crete ri bura reyo. Ina yaku Crete ri fereyo, dubu di moimai ourefeideyainedi. Mina bura di adina bi regode.  
\ip Ouresi bi, Titus niyo beika vegu dubu di ourefeidena vene yaku rebiyaganedi, adina Crete amiye tau gade di vegu no dada. Adina yokoi bi Titus nioteimaro gokai ekalesia amiye neinei oteimarainedi; rema rumana tora, ma rema rumana rua, ma moimai rei tavoi tavoi rededi vene rofu. Sina regode bi Titus rofu Sei ini vene di vegu buni di ago bura reyo. Mina vegu bi uka amuta rena, auta rena, fufuta mana de, ita rafu sina de, ma dubu moi no rena de.  
\iot Beika sina ideri  
\io1 Ago di ini adina \ior 1.1–4\ior*  
\io1 Titus di moimai Crete ri \ior 1.5–16\ior*  
\io1 Titus yaku oteimago sina \ior 2.1–15\ior*  
\io1 Ekalesia vene are rei gira rena \ior 3.1–11\ior*  
\io1 Metona ago \ior 3.12–15\ior*  
\c 1  
\p
\v 1-2 Na Paul, kaere bi Sei di moimai rei tavoi reida amiye, ma Iesu Keriso di nifeidena amiye mina yaku bura reida.  
\p Mina reida dada, Sei yaku ini auba reyo vene bi ini mokena vari gira aesi sina rama di mokena moisi Sei ini mokena kana bi regedi. Ye toga toga ameibobina vegu di uka mokena moigifa, goina bi Sei, kaere ofa de nido, bi ari dobau sena nitore reyo.  
\v 3 Ma iniye ini niyo ariri ini ago moi ogau riyo; Sei una Moi vegu rina amiye di ago gira fafau mina oteimana moimai na nimaro.   
\p
\v 4 Titus, mina fefa bi ya rofu bura reida. Ya bi nai mida kana, adina ya bi nasa vakoi Sei rofu mokena vari gira aesifa.\x + \xo 1.4 \xt 2 Cor 8.23; Gal 2.3; 2 Tim 4.10\x*  
\p Sei uni Baba ma\f + \fr 1.4 \ft Bura bedakai ka \fq Varika amiye \ft nufa.\f* Iesu Keriso, kaere yaku bi uni Moi vegu rina amiye, yaku buni tora gade ma uka amuta ya maragane.   
\s1 Titus di moimai Crete ri  
\p
\v 5 Crete ri ya fereyaka, ini adina bi beika moi koina de fereyafa, mina moi koina reyainedi, ma ya niyaka kana, dubu tora vene taoni neineiri aeyainedi.  
\v 6 Mina ourefeidena amiye bi ini vegu no yokoi de, rema yokoi maka meyo amiye, ini mida mida kaere bi Sei rofu mokena vari gira aededi, ma bi rei tavoi tavoi de ma anema yora mida mida.\x + \xo 1.6 \xt 1 Tim 3.2–7\x* \fig Dubu di ourefeidena vene di vegu|src="Ubsb-02b.tif" size="span" ref="1.6" \fig*  
\v 7 Mina ourefeidena amiye bi Sei di moimai rebigo, mina resi bi vegu no yokoi de resi iniye maka mokena de resi evade maka gubuyo ga reyaine. Resi bi koru gira irina de, ruda rei tavoi de, ma ofa ofa dudu baku baku de redo amiye.  
\v 8 Idu bi amiye gaba reyaine, amiye kaere bi vegu buni uka masi ini yuka vana nari resi berou berou rofu mokena rorobo redo. Bi kikifa amiye, ma iniye moi rorobo rido amiye.  
\v 9 Ago rama oteimana mina moi gira kiki rebiyaine, ye mina ago rama dudu amiye egira rego, ma amiye kaere yaku ago rama rofu tourage rededi, mina vei mama riyainedi.   
\p
\v 10 Adina Jew vene tau gade, kaere bi ekalesia vene niyadi, bi ago neidena de vene, sakua vene ma amiye ofarosi rena vene.  
\v 11 Mina vene bi moi babo ri, adina ofa ofa dudu fore moigika beika oteimana de ago mina, oteimagasa usika ourena tau di varena amena moi no ridedi.  
\v 12 Iniye di ago nido amiye yokoi yaku ka niyo, “Crete vene bi ari neinei ofa ofa nidedi vene, tuma dona kana ma amei tavoi regasa iruku iridedi vene,” vo niyo.  
\v 13 Mina sina bi rama. Mina resi, mina vene rofu sina gira ni, ye ini mokena vari gira aegasa rama maka rebigedi,  
\v 14 ma Jew vene di sisina sina rofu o kaere ago gira rama rofu fufuta madedi vene di sina rama rofu, di anema aena ga reyagane.  
\v 15 Amiye kaere bi Sei di nemokori ini vegu no yokoi de, beika tau ina rofu ka bi no yokoi de. Idu kaere bi vegu no nufa vene ma Iesu rofu mokena vari gira de aededi, bi beika tau rededi bi buni de. Mina di adina bi, ini mokena ma ini uka di mokena bi kino nufa.  
\v 16 Ina iniye nikake rededi bi Sei ina diba, idu ini reremama rededi yaku nido ina bi Sei ina toto. Sei yaku ini vegu no ura de iniye redo, ma Sei di ago gira neidena ura de resi beika buni rena bi de rededi.   
\c 2  
\s1 Sei di oteimana ago buni  
\p
\v 1 Idu Titus, ya beika ago rama niyo, mina maka oteima ma diba niyagane.  
\v 2 Rumana tora tora oteima bi koru gira irina ga resi mokena gira ma buni resi ini yuka vana nari reyagane; ma Sei rofu mokena vari gira aena, uka manari ma moi yeiva resi toe moi dina, mina moi gira ribiyagane.  
\v 3 Mina kana, rema tora tora oteima bi beika rebigediri, ka Sei ina ura redo kana amebiyagane, bi amiye rofu nifafana rena de, o koru gira\f + \fr 2.3 \fk koru gira: \ft Greek agori mina bi \fq waini.\f* moke moke yaku ga ourefeideyagane, idu vegu buni regasa oteimabiyaganedi.  
\v 4 Mina ida dudu, ina ka rema rua niegira regedi, bi ini maruka ma mida uka masi  
\v 5 yuka vana nari resi ini maruka rofu maka uka mabiyaganedi, gokai ini yava dogo rena ma amiye rofu buni resi ini maruka di vava gabireri amebiyagane, ye makai dudu amiye yaku Sei di ago de nifafana regedi.   
\p
\v 6 Mina kana sina dudu, godua niegira re kumo iniye ini yuka vana nari reyaganedi.  
\v 7 Beika tau rebigiyari, ya kaya ka vegu buni re kumo mina ya vesi ya tari reyaganedi. Ye oteimabigiyari, bi uka di mokena buni ma gira dudu oteima,  
\v 8 ye mina sina rama bi amiye yaku no yokoi de veitao regedi. Mina resi kaere yaku uni ago obe regedi, bi maena regedi, adina una\f + \fr 2.8 \fq una; \ft bura bedakai \fq ya \ft nufa.\f* rofu beika sina no nigedi bi koina.   
\p
\v 9 Moimai rei tavoi rededi vene oteima, ina bi ini ourefeidena vene di gabireri, ini moimai tauri raga resi ini uka moi ada resi ini ago obe ga resi  
\v 10 ina rofu duma duma ga reyagane, idu ourefeidena amiye di uka moina di moimai di vegu rama rebiyagane. Ye ini beika tau rebigediri, bi Sei una Moi vegu rina amiye di rama iniye ago bi mina vava nigo.   
\p
\v 11 Adina Sei di moi baeyo buni tora gade bi una moi vegu rido, mina bi amiye tau rofu ogau niyo.  
\v 12 Sei rofu fufuta mana vegu ma mina kono di vegu no rofu de nisi nido, idu gua duakau amenari, yuka vana nari rena, vegu rorobo dudu, ma Sei di mokedo kana dudu amegi, mina una oteimado.  
\v 13 Uni isivaga iniye Sei ma Moi vegu rina amiye Iesu Keriso\f + \fr 2.13 \fq Uni isivaga iniye Sei ma Moi vegu rina amiye Iesu Keriso; \ft o \fq Isivaga iniye Sei ma uni Moi dairina amiye Iesu Keriso.\f* di vabara ogau nigo, bi mina ada rena meda uka mokena aena nari resifa,  
\v 14 bi kaere yaku vegu no tau rofu, una erufusi iniye rofu amiye moisi moi ruaka riyo, ye vegu buni rena mokena rebigedi.\x + \xo 2.14 \xt Ex 19.5; Deut 4.20; 7.6; 14.2; Ps 130.8; 1 Pet 2.9\x*   
\p
\v 15 Ye Titus, mina ya oteimaida sina bi amiye nioteima. Mina vava tau dudu, ya yaku niegira re kumo mina vegu no ga reyaganedi. Resi amiye yaku yi sina rofu gedu mana ga reyagane.   
\c 3  
\s1 Ekalesia vene are rei gira rena vegu  
\p
\v 1 Amiye tau dudusa nioteima kumo ourefeidena vene ma gavamani vene di vava gabireri amesi ini ago neidegasa moi gira risi beika moimai buni maka regika amebiyagane.  
\v 2 Resi amiye rofu nifafana rena de, idu amiyesa ave nisi auta regasa amena maka rebiyagane, ye mina vegu rama amiye rofu reisa bi amiye oteimago ya bi gokai kana amiye.  
\v 3 Una ka sena bi mokena buni yokoi de, ago neidena de, dona auna di moke moke resi ofarosi regamadi ma roaita moi ada regika vegu no yaku una ourefeidegamo. Ma uni mokena no masi amiye be rofu ka maunu nigamafa. Resi amiye be rofu gubuyo resi uniye uniye ka gubuyo regamafa.  
\v 4 Idu, uni moi vegu rina amiye, Sei di mokei tora rena ma uka mana amiye rofu di bae ogau niyori,  
\v 5 vegu buni ma mokena rorobo reyafa dada, una moi vegu rina de reyo, idu ini uka iriyeduka dudu, bi una moi vegu riyo. Vima kikifa di vava dudu una koiteyo, ma dudusa vata nisi ruaka niyafa, makai dudu una moi vegu riyo.  
\v 6 Iesu Keriso uni Moi vegu rina amiye yaku beika reyo dada, Sei yaku ini uka noibanu dudu, ini Vima kikifa una fafau moi urafo reyo.  
\v 7 Ye makai dudu, uni vegu bi rorobo niyo, ini buni tora gade dada, ma toga toga ameibobina vegu di uka mokena moinari, bi ini mida mida nigifa.  
\v 8 Mina sina bi rama sina.  
\p Gua ura reida ya bi mina sina besa ni, ye kaere Sei rofu mokena vari gira aeyadi vene bi mokena buni dudu, vegu buni kimo rebigedi. Amiye rofu mina moimai buni di sina bi buni ma amiye tau bi ina dudu buni baku regedi.  
\v 9 Idu deda kayamo, tutubena ini vata ni baeyadi sina, ita rafu sina ma Jew vene di ago gira dada kayamo rededi mina fere, adina mina sina tau bi beika buni yokoi de rigo ma buni yokoi de moi vata rigo.  
\v 10 Ekalesia vene moi etagae risi nanaka redo amiye bi ouresi ago gira ni; ya neidena de regori, bi dudusa ago gira ni. Mina de ya neidegori, bi kaini ferei tavoi re.  
\v 11 Minari mamo vei mama regiya mina amiye bi mokena buni feresi vegu no redo amiye; vegu no redo dada, iniye di no yaku moiyo.   
\s1 Metona ni mama rena ago  
\p
\v 12 Artemas o Tychicus ya rofu nifeidegidari, ya bi ida maina resi na rofu Nicopolis taoniri bae, adina mina avari bi mironari amegida mina mokeida.\x + \xo 3.12 \xt Acts 20.4; Eph 6.21–22; Col 4.7–8; 2 Tim 4.12\x*  
\v 13 Zenas, kaere bi ago gira oteimana amiye, ma Apollos yaku ini dibo regika regediri, moi aede kumo gugura moi mona reyagane.\x + \xo 3.13 \xt Acts 18.24; 1 Cor 16.12\x*  
\v 14 Uni vene moimai buni di mokena moi gira risi ari neinei di gugura fore moi negau risi vare tavoi amei tavoi bi ga reyaganedi.   
\p
\v 15 Amiye tau nasa yaku ini yuata ya rofu ka nifeidededi. Kaere vakoi mokena vari gira aeyafa ma una uka madedi, ka yuata nifeidesifa.  
\p Sei di buni tora gade iniye bi ya vene tausa ameyaine.