\id EPH Doromu-Koki 
\ide 65001 - Unicode (UTF-8)
\h Ephesus vene 
\toc1 Paul di bura Ephesus vene rofu 
\toc2 Ephesus vene 
\toc3 Eph 
\mt2 Paul di bura  
\mt1 Ephesus vene  
\mt3 rofu  
\imt1 Ago di ini adina  
\im \bk Paul di bura Ephesus vene rofu\bk* di ouresi ago bi “Sei di nirorotari reyo mokena dada, beika baika omari ma konori amededi tau noibanu Keriso dudu ukita rigo” (1.10). Ini usa usa nina ago bi Sei di vene yaku mina nirorotari rena ago usi ina dada ameyagane. Makai amiye tau noibanu bi Iesu Keriso dudu yokoi maka nigedi.  
\ip \bk Ephesus vene rofu\bk* ouresi bura renari, mina yokoi maka nina ago niyo bi Baba Sei ini vene auba reyo di ida rofu. Ka bi gokai ina bi ini Mida Iesu Keriso dudu ini vegu no koite makusi erufuyo, ma gokai Vima kikifa yaku Sei di nitore reyo ago tora niyo bi rama niyaine. Kamini ini ago regode ere bi bura vededi vene usa usa nido bi Keriso dudu egogo resi yokoi maka niyagane.  
\ip Ago bouna bouna mina bura renari oteimadedi Sei di vene bi yokoi maka niyadi Keriso dudu: ekalesia vene bi roaita kana, ma Keriso bi ini ada; o yava kana, ma Keriso bi ini moi gira redo fore; o rema kana, ma Keriso bi ini maruka. Mina bura bi ini mokena tora tora nufa, Sei di buni tora gade Keriso dudu mina niyo dada. Beika baika tau noibanu bi Keriso di uka mana, ori sisika rena, vegu no koite makuna, buni tora gade ma vegu no nufa de di vabarari kana niyo.  
\iot Beika sina ideri  
\io1 Ago di ini adina \ior 1.1–2\ior*  
\io1 Keriso ma ekalesia vene \ior 1.3—3.21\ior*  
\io1 Vegu ruaka Keriso ri \ior 4.1—6.20\ior*  
\io1 Metona ago \ior 6.21–24\ior*  
\c 1  
\p
\v 1 Na bi Paul, kaere bi Sei di ura dudu Iesu Keriso di nifeidena amiye —\x + \xo 1.1 \xt Acts 18.19–21; 19.1\x*  
\p Sei di vene Ephesus ri\f + \fr 1.1 \fq Ephesus ri \ft bura bedakai mina ago nufa de.\f* amededi, kaere Iesu Keriso rofu vegu rama rededi, ya rofu bura reida mini:   
\p
\v 2 Uni Baba Sei ma Varika amiye Iesu Keriso di buni tora gade ma uka amuta ya maragane.   
\s1 Vima di buni tora gade Keriso dudu  
\p
\v 3 Uni Varika amiye Iesu Keriso di Baba kaere bi Sei, bi ini roka moi odoro rinadi, kaere bi Keriso dudu oma di gaganiri, vima di buni tora gade noibanu una maro.  
\v 4 Kamini oma ma kono bi rina koderi, Sei yaku una auba reyo, ye una bi ini nemokori kikifa ma butigi yokoi de dudu inasa amebigifa.  
\p Ini uka mana dudu  
\v 5 senagi nirorotari reyo bi Iesu Keriso dudu ini mida mida kana, una vadema aego—mina bi ini buni ma ura rena dada.  
\v 6 Ye ini buni tora gade vabara dada ini roka moi odoro rinadi. Adina mina ini uka maro Amiye dudu una rofu maro!  
\v 7 Ini dava dudu ina yaku una voi resi erufuyo; mina bi uni vegu no koite makuyo, ini buni tora gade bi tora gade gade dada.\x + \xo 1.7 \xt Col 1.14\x*  
\v 8 Bi mokena tora ma ada yora tau noibanu dudu mina una mai buaru reyo!   
\p
\v 9 Ini ura di nisui ago una rofu moi ogau riyo, ini nirorotari rena dada; mina bi Keriso dudu dogo resi aeyo.  
\v 10 Mina bi meda nemoko rama nigori, ini nirorotari reyo mokena dada, beika baika omari ma konori amededi tau noibanu Keriso dudu ukita rigo.   
\p
\v 11 Ina dudu Baba di ini beika baika moiyafa, adina ini nirorotari rena ago senagi mokeyo makai kana rego, mina bi kaere, ini ura di mokena dada, beika baika tau noibanu moimai redo.  
\v 12 Ye una kaere ouresi Keriso rofu uka mokena aeyafa vene, bi ini vabara moi odoro riyaganedi!   
\p
\v 13 Ya vene yaku ini ago rama, mina yi moi vegu rina di ago buni, neidegasa ya ka ina rofu mokena vari gira aeyadi ma nitore reyo Vima kikifa di bera ya fafau aeyo.  
\v 14 Mina Vima kikifa bi Sei yaku ini vene ini beika baika mago di rama niyaine, nitore rena ago mina moigifa mamo, ye ini vabara moi odoro rigifa.   
\s1 Paul di usa usa nina  
\p
\v 15 Mina resi ya mokena vari gira Varika amiye Iesu rofu aesi Sei di vene tau noibanu uka maradi, mina neideyaka dada,  
\v 16 na bi toga toga Sei rofu buni tora gade manari, ya fafau de feresi nai usa usa nina tauri ya rofu mokeida.  
\v 17 Nai usa nida bi uni Varika amiye Iesu Keriso di Sei, kaere bi vabara di Baba, ina yaku ini Vima ya maraine, ye Vima yaku ya rofu Sei moi ogau rigo; makai bi ya ya diba ina.  
\v 18 Na usa usa nida bi yi mokena moi vabara riyaine, ye uka mokena ya rofu raka niyo, mina diba niyagane; gokai ini nitore reyo ago buni tora gade ini vene rofu bi beika baika tau nufa.  
\v 19 Ka Sei di vava bi isivaga iniye una mokena vari gira aesifa vene rofu. Mina vava uni ideri moimai redo bi ini vava isivaga iniye mini;  
\v 20 mina dudu Keriso muyenari gutuna dadi rae resi oma di sanari, ini vana rama eta rofu moi ameinu reyo.\x + \xo 1.20 \xt Ps 110.1\x*  
\v 21 Keriso mironari ourefeidena vene, vava nufa vene ma varika vene ina tau noibanu odoro ourefeidedo; ini vava di roka bi gua meda ma meda baegori, tau vakoi di roka ebu redo.  
\v 22 Sei yaku mina beika baika tau noibanu Keriso di yuka gabireri aesi tau noibanu di Varika amiye isivaga iniye kana, ekalesia vene maro.\x + \xo 1.22 \xt Ps 8.6\x*\x + \xo 1.22 \xt Col 1.18\x*  
\v 23 Mina ekalesia vene bi Keriso di roaita kana; Keriso bi beika tau noibanu ideri amedo ma mina vene bi ina yaku moi vata baena iniye reyo.   
\c 2  
\s1 Muyenari gutuna vegu amena rofu  
\p
\v 1 Kamini ago gira odena ma vegu no renari, yi vimari bi muyeyadi.\x + \xo 2.1 \xt Col 2.13\x*  
\v 2 Ye mina kono di vegu kana, ya ka makai resi aura di vava di ourefeidena amiye\f + \fr 2.2 \fk aura di vava di ourefeidena amiye: \ft Mina bi Satani.\f* usi digamadi. Mina bi obe rededi vene ideri gua moimai redo vima mini.  
\v 3 Ari yokoiri ina vene di fogori, una tau vakoi uni roaita di udu dada, amesi roaita ma mokena di ura usi digamafa, bi amiye tau noibanu kana Sei di gubuyo iniye bi moigifa.   
\p
\v 4 Idu ini uka mana tora una rofu dada, Sei yaku iriyeduka tora iniye redo.  
\v 5 Ye ago gira odenari ka muyeyafari, Keriso sa una moi vegu riyo. Ya bi buni tora gade dudu moi vegu riyo.  
\v 6 Ma ina tau vakoisa una moi dadi rae resi oma sanari, Iesu Keriso sa una moi ameinu reyo.  
\v 7 Ye meda baegediri, ina yaku ini buni tora gade di eru rededi gugura tora iniye Iesu Keriso ri, ini buni buni una rofu mina dudu oteimago.  
\v 8 Adina yi mokena vari gira aeyadiri, buni tora gade dudu ya moi vegu riyo. Mina bi diya ya kaya reyadi; bi beika Sei davana de nufa dudu, ya maro.  
\v 9 Mina bi diya reremama buni dudu, amiye yokoi yaku nivasena rego baebu.  
\v 10 Adina una bi beika Sei yaku moimai rei vau reyo mini. Iesu Keriso dudu, Sei yaku senagi dogo reyo vegu buni rofu una riyo, ye rebigifa dada.   
\s1 Keriso ri yokoi maka nina  
\p
\v 11 Mina dada, ya tutubena idana vene evata riyadi, mokefa mirona ituari Jew vene\f + \fr 2.11 \fk Jew vene: \ft Greek agori mina bi \fq “roaita nugaradi vene”.\f* bi “roaita nugana de reyadi vene” kana ya raka niyadi.  
\v 12 Mirona ituari ya bi Keriso gaima iniye amegasa Israel vene rofu gagani bouna vene, uka ago di nitore reyo ago idana vene rofu kana. Ya bi uka mokena nufa de ma konori Sei sa amena de regamadi.  
\v 13 Idu ya kaere sena bi gaima iniye, Keriso di dava dudu, ya bi gua Iesu Keriso ri moi atafu riyo.  
\v 14 Adina mina vene remanu moi yokoi maka risi ini roaita dudu, ruda rena di tobo di okuna kota uratokuyo. Ye ina bi uka amuta una maro.  
\v 15 Ina yaku ini roaitari ago gira ini tabu ago nufa, mina uroro reyo, ye ina dudu mina vene remanu moi yokoi maka resi moi ruaka rigo dada; ye makai uka amuta maro.\x + \xo 2.15 \xt Col 2.14\x*  
\v 16 Kamini mina remanu satauro muyeyo dudu, Sei rofu roaita yokoi kana, ini uka yokoi maka riyaine, ye makai tuma vene kana, ini ruda rena moi gana rigo.\x + \xo 2.16 \xt Col 1.20\x*  
\v 17 Resi ya gaima iniye vene ma ya atafu amededi vene rofu baesi uka amuta ago buni niogau reyo.\x + \xo 2.17 \xt Is 57.19\x*  
\v 18 Adina una tau vakoi Vima yokoi maka dudu Baba rofu atafu degifa.   
\p
\v 19 Mina dada gua ya bi idana vene ma okina vene de, idu ya bi Sei di vene di auta rena vene ma Sei di yava vene.  
\v 20 Ya bi yava kana, nifeidena vene ma Sei di ago niyadi vene fafau variyadi ma Iesu Keriso iniye bi ini moi gira redo fore.  
\v 21 Ye mina yava noibanu bi inasa moi yokoi maka riyo ma Varika amiye nivakena yava kikifa kana tora nidedi.  
\v 22 Ya ka inasa vakoi Sei di vima di amena yava kana akudedi.   
\c 3  
\s1 Paul di moimai tutubena idana vene rofu  
\p
\v 1 Mina resi na Paul, na bi tutubena idana vene di buni rofu, Iesu Keriso dada diburari ameida amiye.  
\v 2 Rama iniye ya bi Sei di buni tora gade di moimai ya dada na maro, mina neideyadi.  
\v 3 Mina bi nisui ago na rofu moi ogau riyo ma sena mina fafau bura keika reyaka.  
\v 4 Mina bura vegasa yi ada yora nigedi Keriso di nisui ago na rofu veifategedi dada.\x + \xo 3.4 \xt Col 1.26–27\x*  
\v 5 Senagi tutubena bouna vene di mida mida yaku mina nisui ago ina toto, gua ini kikifa nifeidena vene ma Sei di ago niyadi vene, Vima dudu moi ogau riyo kana.  
\v 6 Mina nisui ago bi tutubena idana vene ka vakoi gugura rau rena adina vene, ma roaita yokoi maka di, ma ago buni dudu, Iesu Keriso di nitore reyo ago moigedi vene.   
\p
\v 7 Ye na bi mina ago buni di naivo naivo rena amiye niyaka, Sei di buni tora gade na maro dada, mina ini vava di moimai rena dudu na maro.  
\v 8 Na bi Sei di vene tau noibanuri egona iniye, idu mina buni tora gade na maro. Ye Keriso rofu maina de rena buni tau tora, mina di ago buni tutubena idana vene rofu niokugida.  
\v 9 Sei yaku\f + \fr 3.9 \ft Bura bedakai ka \fq Iesu Keriso dudu \ft nufa.\f* beika baika tau noibanu risi ini nisui ago di nirorotari rena ago bi senagi senagi sui niyo ma amegamo, ye gua na yaku amiye tau noibanu rofu mina moi ogau rida.  
\v 10 Ye gua oma sanari amededi ourefeidena vene ma vava nufa vene yaku ekalesia vene dudu, Sei di mokena vabara bouna bouna diba niyaganedi.  
\v 11 Mina bi ini toga toga vegu ameibobina nirorotari rena ago dada, Iesu Keriso uni Varika amiye dudu reyo mini.  
\v 12 Una bi ina rofu mokena vari gira aesifa dudu, ori yokoi de uka gira dudu Sei rofu baegifa.  
\v 13 Mina dada, ya usa nida beika ya rofu esika moida, ya bi mina rofu uka yau ga niyaganedi, adina bi yi buni dada.   
\s1 Keriso di uka mana  
\p
\v 14 Mina resi\f + \fr 3.14 \ft Bura bedakai ka \fq uni Varika amiye Iesu Keriso di \ft nufa.\f* Baba rofu nai efuka imi odeida,  
\v 15 kaere yaku oma ma kono di yava vene noibanu ini roka maro.  
\v 16 Ye ini vabara di buni tau tora dada, ini Vima yi ideri ina dudu, moi yeiva rigi vava ya maraine.  
\v 17 Ye mokena vari gira aena dudu, Keriso yi uka ideri amebiyaine ma ya bi uka mana daru feidei nedo kana, are rei gira reyagane.  
\v 18 Resi Sei di vene tau vakoisa ya vene yaku ini uka mana di rafo, doba, odoro ma moka, mina diba ni vau resi  
\v 19 Keriso di uka mana diba nina ebu redo, mina ka diba niyaganedi, ye Sei di tau noibanu yaku ya moi vata baeyaine.   
\p
\v 20 Kamini gua vava uni ideri moimai redo dada, beika una yaku usa nisifa o mokesifa mina noibanu fafau bi besa besa rego amiye rofu:  
\v 21 Ekalesia vene ma Iesu Keriso dudu tutubena vene bouna tau noibanuri, Sei rofu bi vabara toga toga amebiyaine! Rama.   
\c 4  
\s1 Keriso di roaita yokoi maka nina  
\p
\v 1 Mina dada, na Varika amiye di moimai gabireri dibura ameida amiye, ya egira reida ya bi Sei yaku raka niyo di ida buni kana amebiyagane.  
\v 2 Ya ya kaya moi egona rina, ave nina ma toro rena tau noibanu dudu, ya kaya ya kaya uka mana dudu udiko rebifo.\x + \xo 4.2 \xt Col 3.12–13\x*  
\v 3 Gokai uka amuta dudu Vima yaku ya yokoi maka riyori, mina moi gira rigika bi ura rei gira refa.  
\v 4 Roaita bi yokoi maka ma vima ka yokoi maka, ye Sei ya raka niyori, bi uka mokena yokoi maka rofu ka raka niyo.  
\v 5 Varika amiye bi yokoi maka, ma mokena vari gira aena bi yokoi maka ma babatiso rena ka bi yokoi maka;  
\v 6 Sei ma amiye tau noibanu di Baba bi yokoi maka, kaere bi amiye tau noibanu odoro ourefeidesi ina dudu moimai resi ini\f + \fr 4.6 \fq ini; \ft bura bedakai \fq yi \ft nufa.\f* ideri amedo.   
\p
\v 7 Idu Keriso di buni tora gade ini gokai tora, mina maro kana, makai mina una neinei rofu maro.  
\v 8 Mina resi yomakai niyo:\x + \xo 4.8 \xt Ps 68.18\x*  
\q1 “Ina yaku dibura vene moi ourefeideyo ma  
\q2 inasa odoro iniye sanari boyadi ma  
\q2 gugura buni buni amiye maro.”   
\m
\v 9 “Ina yaku odoro boyo,” vo niyori, ini adina bi Keriso bi ouresi kono di soku dabigara rofu ka neyo.  
\v 10 Mina neyo amiye, ina yaku ka mina oma tau noibanu odoro iniye boyo, ye beika baika tau noibanu, ini vima dudu moi vata baeyainedi dada.  
\v 11 Ma ina yaku bedakai nifeidena vene kana, bedakai ini ago nidedi vene kana, bedakai ago buni niokudedi vene kana ma bedakai mamoe kana amiye dogo resi oteimana vene kana auba reyo,  
\v 12 Sei di vene bi naivo di moimai rofu moi dogo resi Keriso di roaita moi egira reyaganedi.  
\v 13 Mina bi toga bobigo una tau noibanu baesi mokena vari gira aenari, yokoi maka nisi ma Sei di mida diba ni vau resi Keriso kana, vima dudu tora ni vau regifa mamo.  
\v 14 Ye ureure tafo resi bouti moi etagae ridedi kana, oteimana ago tau noibanu di aura ufu rededi kana, amiye di aonega dudu, ma ofa ofa oteimana ago dudu eru redo, mina tau rofu dudusa mida kakua kana ga rebinadi.  
\v 15 Idu uka mana dudu, ago rama nigasa beika baika tau noibanuri inasa tora ninadi, kaere bi uni ada, Keriso mini.  
\v 16 Ina gutuna mina roaita noibanu bi ini ro, musa ma daru noibanu dudu vakoi egira redo; ini yuka vana tau vakoi ini moimai rei mona redediri, bi roaita yaku tora nido, ye uka mana dudu iniye egira redo.\x + \xo 4.16 \xt Col 2.19\x*   
\s1 Vegu ruaka Keriso dudu  
\p
\v 17 Mina dada, Varika amiye ini rokari niokusi nida, tutubena idana vene\f + \fr 4.17 \ft Bura bedakai ka \fq idana \ft nufa.\f* ini mokena tavoi tavoiri, nana rededi kana dudu ga rebifa.  
\v 18 Ini ada yora bi mukuna niyo ma Sei di vegu rofu iniye feresi kokofu reyadi, ini ada bi fore kana ma ini uka gira dada.  
\v 19 Ini maena amutena bi koina niyo ma udu nufa vegu no iniye tau noibanu di vegu regika, uka ideri mokena no iniye moi orefaradi.   
\p
\v 20 Idu makai kana dudu, Keriso bi ya rofu de oteimaradi!  
\v 21 Mina bi rama iniye, Iesu di ago rama gutuna ini ago ya oteimaradi ma neideyadi vonisi bi.  
\v 22 Ini ago bi sena yi vegu di ida moi makugedi; mina bi yi gokai amegamadi bi ofa ma udu dada moi no riyo.\x + \xo 4.22 \xt Col 3.9\x*  
\v 23 Ma Vima yaku yi mokena moi kero resi moi ruaka riyaine  
\v 24 ma ya amiye ruaka niyaganedi, kaere bi mokena rorobo ma ago rama di kikifa dudu, Sei kana riyo.\x + \xo 4.24 \xt Gen 1.26; Col 3.10\x*   
\p
\v 25 Mina dada, ofa ofa sina bi fereyadi dada, ya yokoi yokoi ya atafu amedo amiye rofu ago rama nifa, adina una bi uniye uniye di.\x + \xo 4.25 \xt Zech 8.16\x*  
\v 26 Gubuyo resi vegu no ga refa; yi uka gubuyo dudu, meda nesi ga tomu niyaine.\x + \xo 4.26 \xt Ps 4.4\x*  
\v 27 Bodaka biri rina ida eboka ga refa.  
\v 28 Duma duma redo amiye bi dudusa duma ga reyaine, idu moimai yeiva resi ini vana dudu reremama buni reyaine, ye gugura beika de amiye rofu beika yokoi rau reyaine.  
\v 29 Moi no rina ago yokoi yi vena gutuna ga yakuyagane, idu ago buni vonisi, bi meda buniri, amiye egira regi mina maka yakuyagane, ye makai neidededi vene bi buni tora gade maraine.  
\v 30 Kamini Sei di Vima kikifa moi uka esika ga refa, kaere erufuna meda rofu ini bera ya fafau aeyo.  
\v 31 Mokena ru, gubuyo ma gubuyo sisi iniye, kayamo rena ma nifafana rena vegu ya rofu yakuyagane, vegu no tau noibanusa.  
\v 32 Idu ya kaya ya kaya rofu vegu buni resi iriyeduka dudu, uka masi vegu no erufuyagane, Sei yaku Keriso dudu yi vegu no koite makuyo kana.\x + \xo 4.32 \xt Col 3.13\x*   
\c 5  
\s1 Vabarari amena  
\p
\v 1 Mina dada, Sei yaku beika redo mina tari refa, ini uka mado mida mida kana.  
\v 2 Resi uka mana dudu nana refa, Keriso kana, kaere bi Sei rofu aira ma sisika buni orina kana, una uka masi una dada ini vegu maro.\x + \xo 5.2 \xt Ex 29.18; Ps 40.6\x*   
\p
\v 3 Idu koa rena, udu o vegu no tau gade bi yi utari ga ameyaganedi, Sei di vene rofu bi buni de dada.  
\v 4 Ago kino ma ni tavoi tavoi o iko boma ago ka ga nibifa, adina mina kana ago ya rofu bi buni de. Idu ya bi Sei rofu buni tora gade mabifa.  
\v 5 Adina mina vei mona resi diba nidedi, koa redo amiye, vegu no nufa amiye o moke moke moido amiye, kaere bi ofa sei nivakedo, ina bi Keriso ma Sei di ourefeidena amena sanari adina amiye de nigo.   
\p
\v 6 Amiye yokoi yaku ni tavoi tavoi rena ago dudu ga ya eru reyaine, adina Sei di gubuyo iniye obe rededi vene, fafau mina vegu dada baedo.  
\v 7 Mina dada, mina kana beika yokoi rededi venesa bi auta ga refa.  
\v 8 Adina ari yokoiri ya bi mukunari amegamadi, idu ya bi gua Varika amiyesa vabarari amededi; kamini vabara di mida mida kana nana rebifa.  
\v 9 Adina vabara\f + \fr 5.9 \fq vabara; \ft bura bedakai \fq Vima\ft  nufa.\f* di meko bi buni vayavaya, mokena rorobo ma ago rama tau noibanuri baku rededi.  
\v 10 Varika amiye yaku beika bi ura rego, mina maina refa.  
\v 11 Mukuna di vegu rei tavoi tavoi auta ga refa, idu ka moi ogau rifa.  
\v 12 Adina mina vegu suiri rededi bi maena dada ago de nigifa.  
\v 13 Idu beika tau noibanu vabara rofu moi ogau rigori, bi vei mama regedi;  
\v 14 adina beika tau noibanu bi vabara dudu moi ogau ridedi.\f + \fr 5.14 \fq beika tau noibanu bi vabara dudu moi ogau ridedi; \ft o \fq vabara yaku beika tau noibanu moi ogau rido.\f* Mina dada yomakai niyo:  
\q1 “Ya vareisa amiye bi dadisi  
\q2 muyena gutuna dadi rae re kumo  
\q1 Keriso ya moi vabara rego.”   
\p
\v 15 Mina dada, ya gokai nana rededi vei mona rebifo, diba de nufa vene kana dudu bi de, idu diba nufa vene kana.  
\v 16 Meda yasa amedediri, vegu buni rei mona rebifa, mina bi no rededi ari dada.\x + \xo 5.16 \xt Col 4.5\x*  
\v 17 Mina resi ada de kana ga refa, idu Varika amiye di beika ura redo ka diba nifa.   
\p
\v 18 Resi waini tau irina dudu ya kaya yi vegu moi no rena ga refa, idu Vima yaku ya vata baeyaine.  
\v 19 Ya kaya ya kaya Sei di roka moi odoro rina sina, yauta ma vima di kikifa yauta nigasa yi uka meko ideri, Varika amiye rofu kukuroka buni refa.\x + \xo 5.19 \xt Col 3.16–17\x*  
\v 20 Resi beika baika tau noibanu dada, uni Varika amiye Iesu Keriso di roka dudu toga toga Baba Sei buni tora gade mafa.   
\s1 Rema vene ma maruka vene  
\p
\v 21 Keriso\f + \fr 5.21 \fq Keriso; \ft bura bedakai \fq Sei \ft nufa.\f* di ori dudu ya kaya ya kaya ekure rebifa.   
\p
\v 22 Odima vene, yi maruka vene rofu ekure refa, Varika amiye rofu rededi kana.\x + \xo 5.22 \xt Col 3.18; 1 Pet 3.1\x*  
\v 23 Adina maruka bi ini odima di ada, makai kana Keriso bi ekalesia vene di roaita di ada; ina ka bi ini moi vegu rido amiye.  
\v 24 Ye ekalesia vene yaku Keriso rofu ekure rededi kana, odima vene ka ini maruka vene rofu beika baika noibanuri ekure rebigedi.   
\p
\v 25 Maruka vene, yi odima vene uka mabifa, Keriso yaku ekalesia vene uka masi ini vegu ina rofu maro kana.\x + \xo 5.25 \xt Col 3.19; 1 Pet 3.7\x*  
\v 26 Ago di koru dudu rafei moi ruaka riyo, ye makai ina rofu moi akeke riyaine.  
\v 27 Ye ina yaku mina ekalesia vene vabara nufa iniye masi oteimaraine, ini kino yokoi de, ro musina de, o mina kana deda yokoi nufa de, ye kikifa ma butigi yokoi de amebiyagane.  
\v 28 Mina ida dudu maruka vene yaku iniye ini roaita uka madedi kana, ini odima vene ka uka mabiyagane. Amiye kaere ini rema uka mado, bi iniye ka uka mado.  
\v 29 Amiye yokoi yaku iniye ini roaita ura de reyo, idu ina yaku iruku masi uka mana dudu dogo redo, Keriso yaku ekalesia vene redo kana,  
\v 30 adina una bi ini roaita\f + \fr 5.30 \ft Bura bedakai ka \fq ma nena \ft nufa.\f* di vene.  
\v 31 “Mina di adina rumana yaku ini nono baba feresi ini remasa gogo nisi ina remanu bi roaita yokoi maka nigedi.”\f + \fr 5.31 \fk ini nono baba feresi...: \ft Mina bi Jew vene di toutou kana.\f*\x + \xo 5.31 \xt Gen 2.24\x*  
\v 32 Mina sui ago bi tora iniye, ye mina ago nida bi Keriso ma ekalesia vene di.  
\v 33 Kamini ya yokoi yokoi iniye uka mado kana, ini rema uka maraine, ye odima yaku ini maruka emagui reyaine.   
\c 6  
\s1 Mida mida ma nono baba  
\p
\v 1 Mida mida, Varika amiye dudu\f + \fr 6.1 \fq Varika amiye dudu \ft bura bedakai mina ago nufa de.\f* yi nono baba di ago neidebifa, adina mina bi rama.\x + \xo 6.1 \xt Col 3.20\x*  
\v 2 “Yi nono baba emagui re,” bi ouresi ago gira bi ini nitore rena ago nufa:\x + \xo 6.2 \xt Ex 20.12; Deut 5.16\x*  
\v 3 “ye mina dudu yi vegu buni niyaine ma konori amei doba reyaine.”   
\p
\v 4 Baba vene, yi mida mida moi gubuyo ga rebifa, idu Varika amiye di moi rorobo rina ma oteimana dudu, ini tora nidediri ourefeidebifa.\x + \xo 6.4 \xt Col 3.21\x*   
\s1 Moimai rei tavoi rededi vene ma ini ourefeidededi vene  
\p
\v 5 Moimai rei tavoi rededi vene, Keriso rofu regedi kana, ori ma tururu rena ma uka buni dudu, yi kono di ourefeidena amiye rofu ini ago neidefa.\x + \xo 6.5 \xt Col 3.22–25\x*  
\v 6 Amiye yaku ura regedi kana, ne rofu maka naivo ga refa, idu Keriso di moimai rei tavoi rededi vene kana, ye beika Sei ura redo bi uka meko noibanu dudu reyaganedi.  
\v 7 Uka ada dudu naivo refa, Varika amiye rofu kana, amiye rofu bi de.  
\v 8 Diba nifa ye beika vegu buni amiye yokoi yaku rego, bi Varika amiye rofu ini obini moigo, moimai rei tavoi redo amiye ba moimai rei tavoi de redo amiye.   
\p
\v 9 Ma ourefeidena vene, mina ida yokoi makari, yi moimai rei tavoi rededi vene rofu moi ori regika biri rifa. Resi ya roada yi ourefeidena Amiye omari amesi ina rofu amiye yokoi bi buni ma yokoi bi buni de makai de mokedo, mina mokefa.\x + \xo 6.9 \xt Deut 10.17; Col 3.25; 4.1\x*   
\s1 Sei di iya rena gugura tau noibanu  
\p
\v 10 Sina metonari, Varika amiye ma ini isivaga tora iniye di vava dudu toga yeiva refo. \fig Sei di iya rena gugura|src="hk00194c.tif" size="col" ref="6.10–20" \fig*  
\v 11 Sei di iya rena gugura noibanu akufa, ye ya kaya Bodaka di nirorotari rena mokena rofu are rei gira reyagane.  
\v 12 Adina una bi amiye rofu ruda de resifa, idu ourefeidena vene, vava nufa vene, mina kono di mukuna amededi vava ma oma sanari amededi vima no di vava, mina rofu ruda resifa.  
\v 13 Mina dada, Sei di iya rena varuka buaru moi akufa, ye meda no baegori, moi biri riyagane. Ma beika tau reyadiri, bi besa are rei gira rebigedi.   
\p
\v 14 Mina resi, ago rama yi gagaba berota kana ukita risi mokena rorobo di kokoba fafa mereki gira akusi are refa.\x + \xo 6.14 \xt Is 11.5; 59.17\x*  
\v 15 Resi tamaka, ago buni di uka amuta di dogo rena kana, yi yuka rofu akufa.\x + \xo 6.15 \xt Is 52.7\x*  
\v 16 Mina tau noibanu fafau, mokena vari gira aena di mari moifa, ye mina dudu amiye no di fairo rededi ora tau noibanu kafegedi.  
\v 17 Ma moi vegu rina di ada bou gira ma Vima di bainasi moifa; mina bi Sei di ago.\x + \xo 6.17 \xt Is 59.17\x*  
\v 18 Meda tau noibanuri, Vima dudu, guriguri nina ma usa usa nina tau gade dudu usa nifa. Ye makai niduri rena noibanu dudu, toga nemoko kikisi Sei di vene tau noibanu fafau usa usa nibifa.  
\v 19 Resi na dada ka usa usa nibifa, ye sina nigika uka bubu dudu ago nigidari, bi na mago, ye ago buni di sui ago niokugida.  
\v 20 Na bi mina rofu ago moi raga rena seini ukita reyo amiye, ye uka bubu dudu niokugida, na ago niyagadu kana.   
\s1 Metona yuata sina  
\p
\v 21 Nai uka maida dubuini ma Varika amiye di vegu rama rena naivo redo amiye Tychicus yaku beika na rofu vata niyadi ma beika na reida, mina tau noibanu ya nioteimago, ye ya ka diba niyagane.\x + \xo 6.21 \xt Acts 20.4; 2 Tim 4.12\x*\x + \xo 6.21 \xt Col 4.7–8\x*  
\v 22 Makai dada ya rofu nifeidegida—una gokai resifa ya diba niyagane ma ina yaku yi uka egira reyaine.   
\p
\v 23 Baba Sei ma Varika amiye Iesu Keriso yaku usika ourena uka amuta ma uka mana mokena vari gira aenasa ya maraine.  
\v 24 Uni Varika amiye Iesu Keriso koina de nina uka mana dudu, ini uka madedi vene noibanusa bi buni tora gade ameyaine.\f + \fr 6.24 \ft Bura bedakai ka \fq Rama \ft nufa.\f*