\id 2TI Doromu-Koki 
\ide 65001 - Unicode (UTF-8)
\h 2 Timothy 
\toc1 Paul di bura remanu ere Timothy rofu 
\toc2 2 Timothy 
\toc3 2 Tim 
\mt2 Paul di bura remanu ere  
\mt1 Timothy  
\mt3 rofu  
\imt1 Ago di ini adina  
\im \bk Paul di bura remanu ere Timothy rofu\bk* di sina tora bi nineu rena ago Timothy rofu. Timothy bi amiye keika ma Paul di asini ma aedeyo amiye. Bura rena ago di sina tora tora bi are rei gira rena vegu fafau. Paul yaku Timothy nineu resi niegira reyo bi mokena vari gira aena dudu, toga Iesu Keriso rofu ninegau resi ago buni ma Sei di uka ago kori di oteimana ago moi gira resi oteimana amiye ma esika esika moina ma ruda renari, Sei di ago niogau redo amiye kana, ini moimai reyaine.  
\ip Paul yaku ka Timothy rofu “forovai ma ada yora de kayamo ago” (2.23) di no usi digi ago gira tora iniye maro. Adina ini buni yokoi de iniye, idu neidededi vene moi no rego maka.  
\ip Mina ago tauri, Timothy yaku bura reyo amiye di vegu ma mokena di oteimana ago mokeyaine—mina bi ini mokena vari gira aena, toro rena, uka mana, egira rena ma toe moinari esika moina.  
\iot Beika sina ideri  
\io1 Ago di ini adina \ior 1.1–2\ior*  
\io1 Sei di roka moi odoro rina ma egira rena vegu \ior 1.3—2.13\ior*  
\io1 Nineu rena ago ma ago gira mana \ior 2.14—4.5\ior*  
\io1 Paul di amena \ior 4.6–18\ior*  
\io1 Metona ago \ior 4.19–22\ior*  
\c 1  
\p
\v 1 Na Paul bi Sei di ura dudu Iesu Keriso di nifeidena amiye, nitore reyo vegu Iesu Keriso sa dada—   
\p
\v 2 Mina bi Timothy nai uka maida mida, ya rofu bura reida:\x + \xo 1.2 \xt Acts 16.1\x*  
\p Baba Sei ma Iesu Keriso uni Varika amiye di buni tora gade, iriyeduka ma uka amuta ya maragane.   
\s1 Buni tora gade mana ma egira rena ago  
\p
\v 3 Na bi Sei rofu buni tora gade masi nai tutubena vene reyadi kana ka naivo reida. Resi uka di mokena buni iniye dudu maka resi na bi toga toga nai urusa ma ariu usa usa nigasa ya mokeida.  
\v 4 Yi isaka niyori, ya mokegasa ya vegi ura reida, ye ada rena bi na vata baeyaine dada.  
\v 5 Na bi yi mokena vari gira aena rama iniye mokeida. Mina mokena vari gira aena bi siko yi aufa rema Lois ma yi nono Eunice sa amegamo. Ma na na diba iniye gua yasa ka amedo mini.\x + \xo 1.5 \xt Acts 16.1\x*  
\v 6 Mina dada dudusa ya nioteimaida Sei beika ya maro, bi fu rei fairo re, mina bi yasa mini. Nai vana ya fafau aeyakari mina moiyo.  
\v 7 Adina Sei yaku vima una maro bi ori di vima de, idu vava, uka mana ma uniye dogo rena di vima.   
\p
\v 8 Mina dada uni Varika amiye o na ini dibura ameida amiye na rofu maena ga re, idu Sei di vava dudu ago buni rofu esika moigifa nasa kaiba re.  
\v 9 Kaere ina yaku una moi vegu risi vegu kikifari raka ni dui reyo, diya beika reyafa dada, idu iniye di ura ma ini buni tora gade dada. Mina bi senagi senagi gokai beika vata nina koderi, Iesu Keriso ri una maro.  
\v 10 Idu mina bi gua Iesu Keriso di ogau nina dudu moi erau riyo. Ina yaku una moi vegu risi muyena di vava ukero vau resi ago buni dudu toga toga vegu ameibobina vabara dudu kana, moi ogau riyo.   
\p
\v 11 Ye Sei yaku mina ago buni niogau amiye, nifeidena amiye ma\f + \fr 1.11 \ft Bura bedakai ka \fq tutubena idana vene di \ft nufa.\f* oteimana amiye kana na abidi reyo.\x + \xo 1.11 \xt 1 Tim 2.7\x*  
\v 12 Mina resi na bi mina rofu gurauga ameida. Idu na bi maena de reida, adina na na diba kaere rofu na bi mokena vari gira aeyaka, resi na bi nai mokena moida, beika na rofu nimaro,\f + \fr 1.12 \fq beika na rofu nimaro; \ft o \fq beika ina rofu nimaraka.\f* ina yaku na nari rego bogo mina Keriso di dairina meda okigo.  
\v 13 Beika ago rama mokena vari gira aena ma uka mana dudu, Iesu Keriso ri na rofu neideyo, mina di oteimana ida usi di.  
\v 14 Vima kikifa kaere uni ideri amedo dudu, beika buni Sei ya nimaro mina nari re.   
\p
\v 15 Ya ya diba Asia gaganiri vene tau noibanu bi na ferei tavoi reyadi, Phygelus ma Hermogenes ka.  
\v 16 Idu Varika amiye yaku Onesiphorus di yava vene rofu ini iriyeduka moi oteimaraine, adina ina bi toga na moi aesi dibura yavari, seini yaku ukita reyadi rofu maena de reyo,  
\v 17 Rome okigasa bi na maina rei yeiva regamo ma gabi mamo na veitao reyo.  
\v 18 Varika amiye yaku ini iriyeduka ina rofu mago bi, Varika amiye rofu baku reyaine ini meda bae okigori! Ya diba kotana niyo gokai Ephesus amegamakari, bi ida tauri na naivo reyo.   
\c 2  
\s1 Iesu Keriso di iya rena amiye buni  
\p
\v 1 Mina resi nai mida, buni tora gade Iesu Keriso ri mina dudu yeiva re.  
\v 2 Resi beika na yaku niyaka ma ninegau reyadi vene tau gade di nemokori neideyo, mokena vari gira aededi vene rofu nima, kaere ka bi amiye bouna rofu mina oteimagedi.   
\p
\v 3 Iesu Keriso di iya redo amiye buni kana, nasa esika esika moi.  
\v 4 Iya redo amiye bi amiye tavoi kana dudu moimai idana de rego—ini ura bi ini ourefeidena amiye moi ada rego.  
\v 5 Ma isira amiye yokoi yaku ni-ika regedi isira de rego vonisi, ini ago gira dada, bi ini isira rena obini bi de moigo.  
\v 6 Bi buni muro rei yeiva redo amiye siko ini murori iruku moigo.  
\v 7 Beika nida fafau bi moke, adina Varika amiye yaku beika baika tau gade rofu ada yora ya mago.\f + \fr 2.7 \fq mago; \ft bura bedakai \fq maraine \ft nufa.\f*   
\p
\v 8 Iesu Keriso, David di tutubena amiye, kaere muyenari gutuna dadi rae reyo, ago buni nirausi reyaka kana, mina moke.  
\v 9 Mina fafau, duma duma amiye kana seini yaku na ukita riyadi ma gurauda mini. Idu Sei di ago bi seini yaku ukita rei vau de reyadi!  
\v 10 Mina dada beika tauri are rei gira reida, Sei di auba reyo vene rofu, ma Iesu Keriso dudu, toga toga ameibobina di vabara nufa, ka moi vegu rigo dada.  
\v 11 Ago rama bi yomini:  
\q1 “Inasa muyeyafa vonisi,  
\q2 una ka inasa vegu amegifa.   
\q1
\v 12 Una are rei gira regifa vonisi,\x + \xo 2.12 \xt Mt 10.33; Lk 12.9\x*  
\q2 bi inasa ka ourefeidegifa.  
\q1 Una yaku de buda aegifa,  
\q2 ina ka de una buda aego.   
\q1
\v 13 Ina niyo kana, una bi de regifa vonisi,  
\q2 ina bi ini ago kana mina toga redo mini,  
\q2 adina iniye fufuta magi anua rego.”   
\s1 Moimai redo amiye buni  
\p
\v 14 Mina beika tau ina vene rofu toga oteimasi Sei di nemokori sina ago fafau, kayamo ga reyagane nioku, adina neidededi vene rofu ini buni yokoi de, idu no moigedi maka.  
\v 15 Sei ya yo niyo kana, amiye nigika ya kaya moi gira ma buni re, kaere bi maena de redo moimai amiye, ye mina ago rama bi ida rorobori ourefeide.  
\v 16 Idu Sei rofu ni tavoi tavoi ago bi egavoi re, adina mina yaku amiye Sei rofu besa besa moi gaima rido.  
\v 17 Ma ini ago bi roaita moi no rena koito ara tora nibobigo kana. Ina vene di fogori bi Hymanaeus ma Philetus,  
\v 18 kaere bi ago rama dada rerevaida ni diyadi; ini ago niyadi bi amiye muyenari gutuna dadi rae rena bi sena koina niyo. Ye amiye bedakai di mokena vari gira aena bi uyareyadi.  
\v 19 Idu Sei di gado variyo bi gira ma are rei gigitani reyo, ma ina fafau yomina ago bura reyo: “Varika amiye bi ina diba kaere bi ini,” ma “Amiye tau noibanu kaere bi Varika amiye\f + \fr 2.19 \fq Varika amiye; \ft bura bedakai \fq Keriso \ft nufa.\f* di roka niokudedi, bi mokena rorobo de ferei etagae riyagane.”\x + \xo 2.19 \xt Num 16.5\x*   
\p
\v 20 Ye yava tora tora ideri goro ma siriva dudu rina yava siua maka de amededi, idu yabo ma kono kaka dudu rina ka amededi; bedakai ini moimai bi tora, ma bedakai ini moimai bi keika. \fig Goro ma siriva dudu rina yava siua, ma yabo ma kono kaka dudu rina siua|src="hk00143c.tif" size="span" ref="2.20" \fig*  
\v 21 Mina dada, amiye yokoi yaku mina rofu iniye moi ruaka ribigo vonisi, bi moimai tora di yava siua kana nigo. Makai bi amiye tora di moimai rofu moi kikifa resi vegu buni tau gade rofu dogo rego.  
\v 22 Ye mida ruaka di roaita di ura ori disi uka ruaka dudu, Varika amiye di roka nidedi venesa mokena rorobo, mokena vari gira aena, uka mana ma uka amuta maina rei usi di.  
\v 23 Resi forovai ma ada yora de kayamo ago egavoi re, adina ya ya diba mina dudu ruda moi evata rido.  
\v 24 Ma Varika amiye di moimai rei tavoi redo amiye bi kayamo ga reyainedi, idu bi amiye tora noibanu rofu ave nisi oteimago diba dada toro reyaine.  
\v 25 Ka bi ina rofu tourage rededi ave nina vegu rorobo reyaine, kamini Sei yaku vegu no feresi moi etagae rina vegu mago baeko, ye makai ago rama diba nigedi.  
\v 26 Kamini senagi Bodaka yaku buoru ideri aeyo ini ura kana regedi, ma gabi makai ada yora nisi mina buoru gutuna yaku diyagane.   
\c 3  
\s1 Ari ini koina nina  
\p
\v 1 Ye yomina diba ni, ari koina nina baegori, ari bi toe iniye vata nibigo.  
\v 2 Adina amiye bi iniye maka uka mabigedi, moni uka mabigedi, iniye ni-ika rega kokoba famagasa nivasina rebigedi, ago no nibigedi, ini nono baba obe rebigedi, buni tora gade ma kikifa de regedi;  
\v 3 uka mana koina, moi amuta rena ura de regedi, amiye roka moi no rigedi, yuka vana dogo de regedi, ruda emi regedi, vegu buni rena uka de magedi;  
\v 4 siri rebigedi, ada de dudu vegu regedi, matuka tora nufa, Sei rofu uka de magedi, idu roaita di ura maka bi uka magedi;  
\v 5 etofarori bi Sei di mokena kana, idu ini vava fufuta magedi. Mina kana kana amiye rofu egaima ri.  
\v 6 Adina mina kana vene di bedakai yaku yava ideri kokoya kana dui resi vegu no di toe nufa, uka yau rema vene di mokena moi yau ridedi, kaere ini roaita di ura bouna bouna yaku moi yarededi.  
\v 7 Ina bi beika tau toga mokei karegika rededi, idu ago rama bi toga baku rena de rededi.  
\v 8 Senagi senagi Jannes ma Jambres yaku Moses di ida biri rigika reyadi kana, mina vene ka ago rama bi biri ridedi—ini mokena bi kamini no niyo ma ini mokena vari gira aena bi ofa ofa maka.\x + \xo 3.8 \xt Ex 7.11\x*  
\v 9 Idu ina bi gaima iniye de digedi, adina ini forovai rena vegu bi amiye yaku vei mama regedi, mirona amiye remanu di forovai rena kana.   
\s1 Metona ni mama rena ago  
\p
\v 10 Idu ya bi nai oteimana ago, nai vegu rena, nai vegu di ida, nai mokena vari gira aena, nai toro rena, nai uka mana, nai are rei gira rena,  
\v 11 nai esika ma toe moina, mina beika tau na rofu vata niyadi bi usi diyo. Mina bi Antioch, Iconium ma Lystra ri vata niyadi—mina esika bouna bouna moiyaka ma veyo! Ye Varika amiye yaku mina tau noibanu na moi vegu riyo.\x + \xo 3.11 \xt Acts 13.14–52; 14.1–7, 8–20\x*  
\v 12 Kamini amiye tau noibanu, kaere Iesu Keriso sa Sei di mokena kana vegu amegika ura rededi, bi esika magedi.  
\v 13 Idu amiye no ma ofa ofa nina vene bi ini vegu nori isivaga iniye nigedi. Ina yaku amiye bedakai moi eva rigedi ma bouna vene ka ina vene rofu eva nigedi.  
\v 14 Idu ya bi yi beika diba nisi mokena vari gira aena moi gira riyo bi toga rebi, adina ya ya diba kaere ya rofu nioteimaradi bi.  
\v 15 Ma ya kakuari gutuna gua, ya bi Sei di ago kikifa diba nigamo, moi vegu rina mokena vari gira Iesu Keriso aena dudu, mina rofu ya mokena vabara mago mini.  
\v 16 Sei di ago tau gade bi Sei yaku amiye di mokenari aeyo. Ina ini vava bi nioteimana, nirorotari rena, emana ma mokena rorobo dudu sikuru rena rofu,  
\v 17 ye Sei di amiye bi yeiva nisi vegu buni tau gade rofu dogo reyaine.   
\c 4  
\p
\v 1 Sei ma Iesu Keriso, kaere bi vegu amena vene ma muyena vene kota rego, na yaku ini nemokori ma ini ogau nigo ma ini ourefeidena amena sana dudu, bi nai ni yeiva resi nida ago bi yomini:  
\v 2 ago buni nirausi re; ari buni ma ari nori ya kaya dogo re; toro ma nioteimana tau noibanu dudu, vegu no rofu nierau resi nimatisi egira re.  
\v 3 Adina ini ari bae okigori, amiye yaku oteimana ago buni udiko regedi, idu iniye ini roaita di ura dada, neidena maka regi, mina rofu bi oteimana vene moi egogo regedi.  
\v 4 Resi ina vene bi ago rama rofu ini anema moi etae risi sisina di sina tavoi tavoi neidebigedi.  
\v 5 Idu ya kaya gokai beikari ma toe baegori, ini esika esika fadimagasa ago buni niogau rena amiye di moimai resi yi naivo naivo tau Sei rofu, bi rei mona re.   
\p
\v 6 Adina na bi sena waini koru aira kana rausi reyadi ma nai digida di ari bi bae okiyo.  
\v 7 Na bi ruda buni ruda reyaka moi koina resi toga mokena vari gira aegamaka.  
\v 8 Sena mokena rorobo di obini na rofu ae torekai reyo, goina bi Varika amiye, mokena rorobo nufa kota redo amiye, yaku mirona medari na mago—na maka de, idu kaere kaere yaku uka mana dudu, ini ogau nigo meda tua regamadi ka obini moigedi.   
\s1 Iniye ini sina  
\p
\v 9 Na rofu evade ida maina resi baegiya bi buni.  
\v 10 Adina Demas bi mina kono di vegu uka masi na ferei disi Thessalonica ri boyo. Ma Crescens bi Galatia ri diyo ma Titus bi Dalmatia ri diyo.\x + \xo 4.10 \xt 2 Cor 8.23; Gal 2.3; Col 4.14; Tit 1.4; Phlm 24\x*  
\v 11 Luke maka bi nasa. Mark afesi yasa bogedi, adina na rofu naivo naivo renari ina bi buni iniye.\x + \xo 4.11 \xt Acts 12.12, 25; 13.13; 15.37–39; Col 4.10, 14; Phlm 24\x*  
\v 12 Na yaku Tychicus bi Ephesus ri nifeideyaka.\x + \xo 4.12 \xt Acts 20.4; Eph 6.21–22; Col 4.7–8\x*  
\v 13 Ya baegiyari, nai ituri bou rina varuka doba Troas ri Carpus sa fereyaka, mina ma nai buka moi bae; na ura reida bi mina vibani rori bura reyadi mina ka moi bae.\x + \xo 4.13 \xt Acts 20.6\x*   
\p
\v 14 Alexander fore \it kopa\it* moimai redo amiye yaku vegu no tau gade na rofu reyo; Varika amiye yaku ini beika reyo di obini dairi mago.\x + \xo 4.14 \xt Ps 62.12; Rom 2.6\x*  
\v 15 Ya ka ina rofu vei mona re, adina uni oteimana ago rofu una tourage rei mona reyo.   
\p
\v 16 Ouresi nai vegu nigira regi na kota reyori, amiye yokoi yaku na aedegi de okiyo, idu amiye tau noibanu bi na feresi diyadi. Ina rofu bi toe ga iki maraine!  
\v 17 Idu Varika amiye bi nai eta rofu are resi yeiva na maro, ye makai na dudu, ago bi ninegau rei mona rego ma tutubena idana vene tau noibanu neideyaganedi. Ma lion di venari na moi vegu riyo.  
\v 18 Varika amiye yaku vegu no tauri, na moi vegu risi ini ourefeidena amena sana omari na afei bogo. Ina rofu bi toga toga vabara niyaine! Rama.   
\s1 Metona yuata sina  
\p
\v 19 Priscilla ma Aquila ma Onesiphorus di yava vene tau gade nai yuata sina nifeideida.\x + \xo 4.19 \xt Acts 18.2; 2 Tim 1.16–17\x*  
\v 20 Erastus bi Corinth ri ameyo, ma Trophimus bi gauka reyo, ye Miletus ri fereyaka.\x + \xo 4.20 \xt Acts 19.22; 20.4; 21.29; Rom 16.23\x*  
\v 21 Ye buni bi evade ava di ari okina koderi minari okigiya.  
\p Eubulus yaku yuata ago ya nifeidedo ma Pudens, Linus, Claudia ma usika ourena tau noibanu ka yuata ago nifeidededi.   
\p
\v 22 Varika amiye\f + \fr 4.22 \ft Bura bedakai ka \fq Iesu Keriso \ft nufa.\f* bi yi vimasa.  
\p Sei di buni tora gade bi ya tau noibanusa.