\id 2TH Doromu-Koki 
\ide 65001 - Unicode (UTF-8)
\h 2 Thessalonica vene 
\toc1 Paul di bura remanu ere Thessalonica vene rofu 
\toc2 2 Thessalonica vene 
\toc3 2 Thes 
\mt2 Paul di bura remanu ere  
\mt1 Thessalonica vene  
\mt3 rofu  
\imt1 Ago di ini adina  
\im Amiye be yaku Keriso dairi dena di mokena ekalesia vene rofu Thessalonica taoniri moi no regamadi. \bk Paul di ouresi bura Thessalonica vene rofu\bk* ri bi mokena Varika amiye bi sena deyo vo niyadi, mina fafau bura reyo. Ina yaku mina mokena moi rorobo resi ina vene rofu niyo Keriso dairi dena koderi, “amiye no iniye” (2.3) di ourefeidena gabireri vegu no moi tora iniye nigedi. Mina amiye no iniye yaku Keriso rofu uka gira dudu moi no regika.  
\ip Nifeidena amiye Paul yaku ekalesia vene rofu niyo bi esika esika ma toe bi ina vene fafau ogau nibigo, idu ini mokena vari gira bi aebiyaganedi. Ina vene yaku moimai regasa Paul ini moimai rededi venesa moimai regamo kana, toga toga vegu buni regika, ameyaganedi.  
\iot Beika sina ideri  
\io1 Ago di ini adina \ior 1.1–2\ior*  
\io1 Keriso dairi degori, bi Sei yaku amiye kota aego \ior 1.3–12\ior*  
\io1 Keriso dairi dena di ago \ior 2.1–17\ior*  
\io1 Sei di mokena vari gira aena vene di vegu \ior 3.1–15\ior*  
\io1 Metona ago \ior 3.16–18\ior*  
\c 1  
\p
\v 1 Mina bi Paul, Silas, ma Timothy yaku bura reyafa —\x + \xo 1.1 \xt Acts 17.1\x*  
\p Thessalonica ri ekalesia vene rofu, kaere bi uni Baba Sei ma Varika amiye Iesu Keriso di:   
\p
\v 2 Baba Sei ma Varika amiye Iesu Keriso di buni tora gade ma uka amuta bi ya venesa ameyaine.   
\s1 Kota rena Keriso di denari  
\p
\v 3 Usika ourena, una toga toga ya dada Sei rofu buni tora gade manadi. Makai resifa bi buni, ini adina yi mokena vari gira aena bi tora nido ma ya kaya ya kaya rofu uka mana ka bi tora nido.  
\v 4 Mina dada, una yaku Sei di ekalesia vene di nemokori ka ya rofu ni-ika resifa. Ya ni-ika resifa sana bi yomakai: esika tora ma toe tora moisi amededi, idu are rei gira resi yi mokena vari gira Sei rofu aesi amededi.   
\p
\v 5 Mina vegu rededi yaku nido Sei di kota rena bi mokena rorobo redo, ye makai esika moi amededi dada, ini ourefeidena amena sana ideri amegedi.  
\v 6 Sei yaku vegu rama rego dada: Esika ya madedi vene rofu bi ina yaku esika mago.  
\v 7 Resi bi Sei yaku ya rofu, kaere bi gua esika moisa, bi ini vegu buni masi una rofu ka makai rego. Varika amiye Iesu ini naivo naivo vima yeiva tau ma ita fairo dudu, oma gutuna ogau nigedi di meda bi makai vata nigo.  
\v 8 Sei rofu gedu madedi vene ma uni Varika amiye Iesu di ago buni de neidededi vene rofu, ini obini toe tora iniye mago.  
\v 9 Ini obini bi yomakai: ina vene bi toga toga ameibobina di esika esika di kaunava mina masi Varika amiye ma ini vava di vabara gutuna resi ini nemokori nugai feidego.\x + \xo 1.9 \xt Is 2.10\x*  
\v 10 Ini mina dego medari, ini vene tau yaku ini vabara magedi ma ini mokena vari gira aeyadi vene yaku ini roka niodoro regedi. Mina ya vene ka ina vene fogori are regedi, adina ya niyafa ago bi mina mokena vari gira aeyadi.   
\p
\v 11 Mina dada, toga toga ya vene rofu usa usa nisifa. Uni Sei rofu usa usa nisifa, ina yaku ya vene di vegu moi buni reyainedi, vegu buni ya raka niyo amegedi dada. Ina yaku yi vegu buni di ura tau ma mokena vari gira aena di moimai vava dudu moi rama aego.  
\v 12 Makai ida dudu, bi ya vene dada, uni Varika amiye Iesu di roka niodoro regedi, ma uni Sei ma Varika amiye\f + \fr 1.12 \fq uni Sei ma Varika amiye; \ft o \fq uni Sei Varika amiye.\f* Iesu Keriso di buni tora gade dudu, ina dada yi roka bi niodoro rego.   
\c 2  
\s1 Amiye no iniye  
\p
\v 1 Uni Varika amiye Iesu Keriso di dairi dego inasa egogo regifari di sina bi yomakai: Nai usika ourena vene ya usa nisifa\x + \xo 2.1 \xt 1 Thes 4.15–17\x*  
\v 2 bi yi mokena bi evade moi forovai ga rebifa, o uka esika ga refa, adina bi be vene yaku nidedi bi Varika amiye\f + \fr 2.2 \fq Varika amiye; \ft bura bedakai \fq Keriso \ft nufa.\f* di meda bi okiyo, vo nidedi. Be yaku mokededi bi vima di agori o sina sina yokoiri, o fefa yokoiri bura reyafa.  
\v 3 Ofa mokena dudu yokoi yaku ga ya eru reyaine. Adina mina meda bi de okigo mamo amiye tau Sei rofu gedu magedi ma amiye no iniye bae ogau nigori, kaere bi Sei yaku muyena sanari moi feidego.  
\v 4 Mina amiye yaku amiye di usa nidedi gugura tau ma ofa sei rofu bi gedu masi iniye mina tau rofu ni moi odoro rigo. Ma Sei nivakena yavari dui resi ameinu rego, ye iniye nikake rego ina bi Sei.\x + \xo 2.4 \xt Ezek 28.2; Dan 11.36 \x*   
\p
\v 5 Mina sina tau yasa amegasa nigamaka, bi mokededi ba ide?  
\v 6 Ma mina nida sina de vata nido, bi vegu yokoi yaku moi gira rido, gua ga vata niyainedi, ya ya diba beika bodo bi. Ma ini ari ramari ogau nigo.  
\v 7 Adina vegu no di vava sui amedo yaku ini moimai sena rei baedo, idu beika bodo vegu vata nigo bi de vata nigo bogo moi gira rido amiye etae rigo mamo.  
\v 8 Resi bi amiye no iniye kamini ogau nigo, idu Varika amiye Iesu degori, bi ini vena gutuna asa moi feidesi umuyego ma ini dedo vabara dudu moi no rigo.\x + \xo 2.8 \xt Is 11.4\x*  
\v 9 Mina amiye no iniye di baedo bi Satani di moimai dudu vava tau, rebe ma ofa vegu rena rego.\x + \xo 2.9 \xt Mt 24.24\x*  
\v 10 Resi mina ofa vegu bi amiye kaere muyegedi rofu rego. Muyegedi, adina bi sina rama di uka mana rofu vauya rededi, ye makai dudu moi vegu de rigo.  
\v 11 Mina dada, Sei yaku ofa ma forovai mokena moi feidedo, ye ofa vegu rena rofu kamini mokena vari gira aegedi.  
\v 12 Ye Sei yaku amiye tau, kaere bi sina rama rofu mokena vari gira de aesi vegu no vei ada reyadi, di kota aego.   
\s1 Sei ya moi vegu rigi raka niyo  
\p
\v 13 Usika ourena, toga toga ya dada Sei rofu buni tora gade manadi, ya kaere Varika amiye yaku ya uka mado. Mina dada adinari gutuna,\f + \fr 2.13 \fq adinari gutuna; \ft bura bedakai \fq siko\ft  nufa.\f* Sei yaku ya moi vegu rigika raka niyo, ma Vima kikifa di vava ma sina rama rofu yi mokena vari gira aededi dudu ya moi kikifa rego.  
\v 14 Resi uni ago buni dudu ya raka niyo, uni Varika amiye Iesu Keriso di vabara moiyaganedi.  
\v 15 Usika ourena, mina dada, uni ago niyafa dudu ba ya rofu bura reyafa dudu, are rei gira resi mina ago rama ya oteimarafa moi gira rifa.   
\p
\v 16 Gua uni Varika amiye Iesu Keriso ma uni Baba Sei, kaere bi una rofu uka madedi, bi buni tora gade dudu toga toga ameibobina di mokena tora ma uka mokena buni una maradi.  
\v 17 Ina vene mokena tora dudu yi uka moi gira reyagane. Ma vegu buni resi ago buni nibigedi.   
\c 3  
\s1 Una rofu usa usa nifa  
\p
\v 1 Usika ourena, uni sina metonari, bi una fafau usa usa nifa kumo, Varika amiye di ago bi evade urafo rego resi vabara moiyainedi, Sei yaku ya kaya ya kaya rofu reyo kana.  
\v 2 Usa usa ka nifa Sei yaku vegu no vene ma vegu rorobo de rededi vene gutuna una moi vegu rigo. Adina amiye tau bi Sei rofu mokena vari gira de aededi.   
\p
\v 3 Idu Varika amiye toga toga ini ago nidodi vegu redo. Adina yeiva ya masi amiye no iniye rofu ya moi vegu rigo.  
\v 4 Una yaku mokena vari gira Varika amiye rofu aesifa, ma mina ago gira ya rofu niyafa ya rededi, bi toga rebigedi.   
\p
\v 5 Varika amiye yi uka di mokena Sei di uka mana ma Keriso di moi yeiva resi toe moi dina veguri ourefeideyaine.   
\s1 Moimai reyaganedi  
\p
\v 6 Usika ourena, uni Varika amiye Iesu Keriso di roka dudu ya ago gira nisifa mini, uni usika ourena be, kaere bi moimai de rena amededi vene, ma kaere bi oteimana ago marafa bi de neidededi, mina kaiba ga refa.  
\v 7 Ya kaya diba uni vegu reyafa bi buni, mina kana reyainedi. Yasa amegasa una bi murono de.  
\v 8 Resi amiye yokoi di iruku iri tavoi de reyafa. Idu, uru ari kosika de dudu moimai regamafa, una dada ya yokoi yaku fore makugedi baebu.  
\v 9 Makai reyafa, bi una aedeyaganedi di vava nigi de nufa, idu makai regifari, una vesi uni vegu tari reyaganedi.  
\v 10 Yasa amegasa ago gira nigamafa, “Kaere moimai rofu vauya rego, bi iruku ga iriyaine.”   
\p
\v 11 Makai neidesifa amiye be yi fogori bi murono amegasa moimai de resi bisu basu rei tavoi rededi.  
\v 12 Varika amiye Iesu Keriso di roka dudu mina vene rofu ago gira nisi sisiba masifa, vegu rorobo dudu amesi moimai dudu iniye ini vegu baku rebiyagane.   
\p
\v 13 Ma usika ourena, ya bi vegu buni rena rofu bi kosika ga refa.  
\v 14 Amiye yokoi yaku mina ago fefari ya rofu moi feidesifa de neidego vonisi, beika redo vesi ina rofu ga bofa; maena reyainedi.  
\v 15 Resi tuma amiye yokoi kana ga dogo refa, idu yi dubuini kana mokena dudu, ago buni ni diba refa.   
\s1 Metona ago  
\p
\v 16 Varika amiye iniye, kaere bi uka amuta di adina, bi ari neinei ida yokoi yokoi dudu uka amuta ya maraine. Varika amiye bi ya vene tausa.   
\p
\v 17 Na kaya nai vana dudu mina bura reyaka. \sig Na Paul yaku ya yuata nifeideida.\sig* Fefa tau bi makai dudu bera imida. Mina bi makai bura reida.   
\p
\v 18 Uni Varika amiye Iesu Keriso di buni tora gade bi ya vene tausa amebiyaine.