\id 1TH Doromu-Koki 
\ide 65001 - Unicode (UTF-8)
\h 1 Thessalonica vene 
\toc1 Paul di ouresi bura Thessalonica vene rofu 
\toc2 1 Thessalonica vene 
\toc3 1 Thes 
\mt2 Paul di ouresi bura  
\mt1 Thessalonica vene  
\mt3 rofu  
\imt1 Ago di ini adina  
\im Thessalonica bi Rome di taoni tora Macedonia gaganiri. Paul yaku minari ekalesia vene moi egogo reyo. Mina reyori, Paul yaku ago buni Jew de vene rofu niyo dada. Doba de, Jew vene yaku nitourage reyadi, amiye tau gade ini uka moigamo, Jew vene di vegu dada. Paul bi mina resi Thessalonica feresi Berea ri boyo. Corinth okisi ameyo doba niyo ma Paul bura yokoi baku reyo, ini asini ma vakoi moimai redo amiye Timothy iniye di sina Thessalonica duburi mina iniye gokai vedo kana.  
\ip \bk Paul di ouresi bura Thessalonica vene rofu\bk* bi mironari mina ekalesia vene rofu, moi egira ma rama vo nigika bura reyo. Ina yaku Sei rofu buni tora gade maro, adina ini mokena vari gira aena ma uka mana di ago neideyo. Ina venesa doba de ameyori, ini beika vegu regasa amegamadi, mina vene rofu ni ruaka resi duburi Keriso dairi dego nikaitena sina nikabai resi niyo: kaere Keriso rofu mokena vari gira aesi muyeyo Keriso dairi denari, bi toga ameibobina vegu moigo ba? Ma goivaka Keriso bi dudusa dairi dego? Mina resi Paul niyo bi moimai regasa Keriso dego nari reyaganedi.  
\iot Beika sina ideri  
\io1 Ago di ini adina \ior 1.1\ior*  
\io1 Buni tora gade nina ma roka moi odoro rina \ior 1.2—3.13\ior*  
\io1 Ekalesia di vegu egira rena ago \ior 4.1–12\ior*  
\io1 Keriso dairi dego di ago \ior 4.13—5.11\ior*  
\io1 Metona vegu egira rena ago \ior 5.12–22\ior*  
\io1 Metona ago \ior 5.23–28\ior*  
\c 1  
\p
\v 1 Mina bura na Paul, Silas ma Timothy gutuna —\x + \xo 1.1 \xt Acts 17.1\x*  
\p Thessalonica ekalesia vene ya rofu bura reyafa, kaere bi Baba Sei ma Varika Iesu Keriso sa:  
\p Buni tora gade ma uka amuta bi yasa.   
\s1 Thessalonica vene di vegu amena ma mokena vari gira aena  
\p
\v 2 Una bi ari neinei ya vene tau rofu usa usa nigasa ya vene fafau Sei rofu buni tora gade masifa.  
\v 3 Una bi uni Baba Sei di nemokori toga ya mokei baesifa, gokai yi mokena vari gira aena moimai yaku moi vata rido, ma gokai yi uka mana yaku yi moimai rei tavoi moi vata rido, ma gokai yi uka mokena, uni Varika amiye Iesu Keriso rofu, mina moi gira rido.  
\v 4 Usika ourena, una diba Sei yaku ini uka ya masi ya bi ini auba reyo,  
\v 5 adina uni ago buni bi ya rofu ago dudu maka de moi baeyafa, idu vava nufa ka, ma Vima kikifa ma mokena gira iniye dudu. Makai ya ya diba gokai yasa amegamafari, bi vegu reyafa; mina bi yi buni dada.  
\v 6 Ya vene bi una ma Varika amiye yaku amesifa kana mina reyadi; gokai esika esika tora gade moiyadi, idu Vima kikifa yaku ada ya vene maro, ma ya yaku ago buni moi gira riyadi.\x + \xo 1.6 \xt Acts 17.5–9\x*  
\v 7 Mina ye, ya bi Macedonia ma Achaia gagani di mokena vari gira aededi vene tau yaku veyaganedi kana niyadi.  
\v 8 Adina Varika amiye di ago bi ya rofu Macedonia ma Achaia ri maka de yakuyo, yi mokena vari gira aena Sei rofu di sina bi gagani gagani tau ka diba niyadi. Mina resi, minari beika yokoi de nigifa,  
\v 9 adina gokai una moi dui reyadi, bi iniye niyadi mironi. Ma gokai ofa sei rofu kero rei feresi vegu amedo ma rama Sei rofu naivo reyadi ka niyadi.  
\v 10 Ma ini Mida oma gutuna dego nari rededi ka niyadi—mina bi ini Mida Iesu, kaere bi muyenari dadi rae reyo ma kaere bi Sei di gubuyo baedo rofu una erufugo.   
\c 2  
\s1 Paul di moimai Thessalonica ri  
\p
\v 1 Usika ourena, ya kaya ya diba una bae nesi ya egoru rei tavoi de reyafa.  
\v 2 Ya ya diba, sena Philippi ri, bi una rofu no reyadi, ma esika esika moiyafa, idu uni Sei di aedena yaku yeiva una maro dada, una tourage regamadi utari, ini ago buni bi ya niyafa.\x + \xo 2.2 \xt Acts 16.19–24; 17.1–9\x*  
\v 3 Uni usa usa ago ya vene rofu resifa bi vegu no o mokena no dudu ya eru regika de reyafa.  
\v 4 Idu Sei di ura ini ago buni uni vanari nimagi reyo kana, mina nisifa; amiye di uka moi buni regika de resifa, idu Sei di uka moi ada regika resifa, kaere bi uni uka mokena diba nisi vedo.  
\v 5 Ya ya diba una bi ya moi ada reyaganedi di ago dudu de bae neyafa, o unike udu dudu irisifa, ofa nigika ago nina de reyafa—Sei diba uni uka mokena bi!  
\v 6 Amiye yaku uni roka moi odoro riyaganedi de reyafa, ya vene rofu o be vene rofu ka de,  
\v 7 idu Keriso di nifeidena vene kana, una yaku uni vava dudu, una aedegi ya efare reyagadu. Idu ya vene fogori ave niyafa, kosini yaku ini mida mida susu masi dogo redo kana.\f + \fr 2.7 \fq ya vene fogori ave niyafa, kosini…kana; \ft bura bedakai \fq yasa amegamafari, una bi mida mida kana; una bi kosini kana \ft nufa.\f*  
\v 8 Uni uka ya marafa, mina resi ada dudu, Sei di ago buni maka de ya marafa, idu uni vegu ka.  
\v 9 Usika ourena, rama iniye mokefa, Sei di ago buni ya vene rofu nirausi rega digasa urusa ariu moimai reyafa, moimai gira resi esika moiyafa, ya vene rofu toe moi baena ga regika.   
\p
\v 10 Ya vene ma Sei iniye ka una vegamadi, uni vegu gokai bi akeke, rorobo ma vegu no de, ya vene kaere mokena vari gira aeyadi vene di fogori.  
\v 11 Adina ya ya diba una neinei gokai reyafa bi baba yaku ini mida redo kana,  
\v 12 Sei di ukari ina rofu, yi vegu buni niyainedi ya egira regamafa, kaere bi ya raka nido, ini ourefeidena amena sana ma ini vabara ideri dui reyagane.   
\p
\v 13 Ma una ka toga Sei rofu buni tora gade masifa, adina Sei di ago buni moiyadi, goina bi una rofu neideyadiri; ya bi amiye di ago kana dudu de moiyadi, idu Sei di ago kana, goina bi rama iniye. Adina Sei yaku mina ago dudu ka ini moimai yi veguri redo, ya kaere ina rofu mokena vari gira aededi.  
\v 14 Ma ya uni usika ourena, kaere bi Iesu Keriso di, beika Sei di duburi, Judea gaganiri amededi Jew vene gutuna ina vene rofu reyadi kana, yi gagani vene gutuna esika esika ka moiyadi,\x + \xo 2.14 \xt Acts 17.5\x*  
\v 15 kaere yaku Varika amiye Iesu ma Sei di ago nidedi vene umuyeyadi ma una ka meki reyadi. Ina bi Sei moi ada de reyadi, idu amiye tau di tuma vene niyadi!\x + \xo 2.15 \xt Acts 9.23, 29; 13.45, 50; 14.2, 5, 19; 17.5, 13; 18.12\x*  
\v 16 Tutubena idana vene rofu sina nimarafa moi vegu rigedi, idu una mina ka biri rigi regamadi. Mina ida dudu ini vegu no mina besa besa tauri bodedi. Sei di gubuyo tora iniye bi kamini ina fafau deyo!   
\s1 Paul dudusa ina vene vegi mokeyo  
\p
\v 17 Idu, usika ourena, neituari ya rofu etagae riyafari—uni mokena bi de, idu uni roaita yaku maka—gokai ya de veyafa ma gokai dudusa ya vegika reyafa!  
\v 18 Adina uni ura bi dudusa ya rofu bae negifa. Na Paul, bi besa bae negika reida, idu Satani yaku una biri riyo.  
\v 19 Adina uni Varika amiye Iesu di budari dairisi degori, ya vene kaere bi uni uka mokena, uni ada rena ma uni ni-ika rena di vegu.  
\v 20 Rama iniye, ya vene bi uni vabara ma ada rena!   
\c 3  
\p
\v 1 Mina dada, una bi makai toga de amegasa nari regamafari, uni mokena buni moiyafa bi unike maka Athens ri amegifa.\x + \xo 3.1 \xt Acts 17.15\x*  
\v 2 Timothy bi nifeidesifa, kaere bi uni dubuini ma Keriso di ago buniri, Sei di vakoi moimai resifa amiye, yi mokena vari gira aena moi gira ma ya egira reyainedi,  
\v 3 ye mina esika esika yaku ga ya moi no riyainedi. Ya ya diba mina deda vegu bi Sei di mokenari baegedi.  
\v 4 Adina, una yasa amegamafari, sena ya toga toga nigamafa bi una rofu esika esika magedi. Ye niyafa kana bi vata niyo, bi ya ya diba.  
\v 5 Mina dada, toga de amegasa nari regidari, Timothy nifeideyaka yi mokena vari gira aena bi gokai mina. Na bi ori reyaka be bi Satani yaku ya yi uka maina regi nivegori, uni moimai reyafa bi tavoi tavoi rego baebu!   
\p
\v 6 Idu Timothy bi ruika mamo una rofu bae okiyori, ago buni moi baeyo, yi gokai mokena vari gira aesi uka madedi. Ina niyo bi ya yaku mokena buni dudu una mokededi, ma yi ura una vegi rededi, una ka gokai ya vegifa kana.\x + \xo 3.6 \xt Acts 18.5\x*  
\v 7 Ye, usika ourena, uni toe ma esika esika tauri una egira reyadi ya fafau, adina yi mokena vari gira aena dada.  
\v 8 Ya vene bi Varika amiye ideri are rei gira rededi vonisi, ye rama una gua mamo veguri ameinu regifa.  
\v 9 Una bi gokai Sei buni tora gade ya fafau magifa; uni Sei di nemokori ya dada ada reyafa, mina rofu buni tora gade masifa.  
\v 10 Urusa ariu una bi usa usa ni yeiva resifa, ye dudusa ya vegifa, goinari yi mokena vari gira aena yau nido sana ya egira regika.   
\p
\v 11 Ma gua bi uni Baba Sei iniye ma Varika amiye Iesu yaku uni ida ya vene rofu bae negifa, ina vene bi riyagadu!  
\v 12 Varika amiye ya kaya ya kaya ma amiye tau vakoi rofu uka madedi tora nisi rausi reyaine, una yaku ka ya rofu resifa kana.  
\v 13 Ye ina yaku yi uka ideri yeiva ya mago, ye uni Baba Sei di nemokori, uni Varika amiye Iesu ini akeke vene tausa degori, ya bi vegu no yokoi de nufa ma akeke amebigedi.   
\c 4  
\s1 Sei ada reyaine vegu amena  
\p
\v 1 Usika ourena, una yaku gokai ameyaganedi, bi ago ya marafa, mina yaku Sei moi ada regedi, bi gua amededi mini. Ye metonari, bi ya usa nisi ago niegira resifa Varika amiye Iesu ideri, bi mina vegu bi besa besa rebiyagane.  
\v 2 Adina ya ya diba beika ago gira bi Varika amiye Iesu di vava dudu ya marafa.  
\v 3 Ye mina bi Sei di ura dudu ya mina akeke niyaganedi: ya bi koa rena di vegu mina egavoi reyaganedi;  
\v 4 ya kaya ya kaya yi yuka vana nari reyagane, ida akeke ma rorobo dudu,  
\v 5 ma tutubena idana vene kaere bi Sei ina toto, ina vene di koa mokena kana de.  
\v 6 Ma mina idari, bi amiye yokoi yaku ini usika ourena fafau vegu no ga reyaine, o ofa ofa vegu rofu ga boyaine. Adina una makai sena ya ni yeiva resi niyafa, mina kana vegu no bi Varika amiye yaku toe mago.  
\v 7 Adina Sei yaku vegu no rena di, uni vo de niyo, idu vegu akeke dudu amebina di, vo niyo.  
\v 8 Mina resi, kaere amiye mina ago masifa mina fufuta mago, bi amiye rofu mina fufuta de mado, idu mina bi Sei rofu fufuta mado, kaere yaku ini Vima kikifa ya mado.\f + \fr 4.8 \fq mado; \ft bura bedakai \fq maro \ft nufa.\f*   
\p
\v 9 Ma gua usika ourena rofu uka mana bi ya rofu de bura regifa, adina mina bi Sei yaku ya kaya ya kaya uka maraganedi sena ya oteimaro.  
\v 10 Ma mina makai Macedonia gagani tauri usika ourena tau vakoi rofu rededi. Idu, usika ourena ya guyaguya nisifa, mina bi besa besa reyaganedi.  
\v 11 Ya sena niyafa kana, yi mokena moi tora rifo kumo kimo amebina vegu niyaine, yi moimai iniye maka resi yi vana dudu maka moimai refo.  
\v 12 Mina resi yi ameibobigediri, ya dubu etofaro vene ya rofu kikifa regedi, ye amiye yokoi rofu moi aedena moigika de regedi.   
\s1 Varika amiye di dena  
\p
\v 13 Usika ourena, uni ura bi ya diba niyaganedi, neyadi vene rofu bi ga uka esika refo, ye kaere be bi dadi rae rena di uka mokena aena de, mina vene kana ga reyagane.  
\v 14 Adina una bi mokena vari gira aesifa Iesu bi muyesi dudusa dadi rae reyo, ye Sei yaku mina neyadi vene, kaere bi ini mokena vari gira Iesu rofu aegasa muyeyadi, mina inasa moi dego.   
\p
\v 15 Varika amiye iniye di ago kana, mina ya nisifa, Iesu dairi degori, una kaere vegu ameibogifa, bi rama muyeyadi vene ouresi dadi rae regedi ma gabi una bi dadi rae regifa.\x + \xo 4.15 \xt 1 Cor 15.51–52\x*  
\v 16 Adina Varika amiye bi naivo naivo vima tora di goroka ma Sei di kibi kukuroka rena dudu, oma gutuna imuna nigasa dego, ma Keriso rofu mokena vari gira aesi muyeyadi vene siko dadi rae regedi.  
\v 17 Mina usi bi, una kaere vegu ameibobigifa una afei bogo ma ina venesa seuya odorori Varika amiye egogo resi baku regifa. Mina resi makai Varika amiyesa toga amegifa.  
\v 18 Mina resi ya kaya ya kaya mina ago dudu egira rebifo.   
\c 5  
\s1 Varika amiye di dena mina toro refa  
\p
\v 1 Ma, usika ourena, goina ari ma meda nemokori beika vata nigo, bi ya vene rofu bura de regifa,  
\v 2 adina ya ya diba kotana Varika amiye di dego meda bi duma duma amiye yaku urusa okido kana.\x + \xo 5.2 \xt Mt 24.43; Lk 12.39; 2 Pet 3.10\x*  
\v 3 Amiye yaku “Ari bi uka amuta ma buni vayavaya dudu” vo nibigediri, evade moi no rina meda okigo, rivo rema mida moigika esika guraudo kana; ma ori de digedi.  
\v 4 Idu, usika ourena ya bi mukunari de, ye mina meda yaku duma duma amiye kana de ya etururu rego.  
\v 5 Adina ya tau vakoi bi vabara ma ariu di mida mida. Una bi mukuna ma urusa di rofu de.  
\v 6 Mina ye, una bi be vene yaku varededi kana ga rebinadi, idu ne are resi uni yuka vana nari rebinadi.  
\v 7 Adina kaere varededi, bi urusari varededi, ma kaere koru gira irisi forovai rededi, bi urusari koru gira irisi forovai rededi.  
\v 8 Idu una bi ariu vena di vene, mina ye uniye uni yuka vana nari resi mokena vari gira aena ma uka mana mina uni kokoba mari kana aebinadi, ma Sei di moi vegu rina di uka mokena bi ada bou kana aenadi.\x + \xo 5.8 \xt Is 59.17; Eph 6.13–17\x*  
\v 9 Una yaku Varika amiye Iesu Keriso dudu moi vegu rina moigifa, adina Sei yaku ini gubuyo di esika esika moina rofu, uni vo de niyo.  
\v 10 Ina bi una dada muyeyo, mina resi muyena de o muyesifa vonisi, bi inasa vakoi amebigifa.  
\v 11 Mina dada ya kaya ya kaya egira regasa aedegedi, gua rededi kana.   
\s1 Metona ni mama rena ago ma yuata nina sina  
\p
\v 12 Usika ourena, gua ya usa nisifa bi, yi fogori amiye kaere moimai rei gira resi Varika amiye di rokari ya nari resi ya fafau oteimadedi, ya bi ina rofu vei mama resi rei mona rebifa.  
\v 13 Ina vene bi ini moimai dada, uka manari bi rei mona mona resi kikifa rebifa. Ya kaya ya kaya uka amuta dudu amebifa.   
\p
\v 14 Ma usika ourena, ya usa nisifa bi amei tavoi varei tavoi rededi vene niegira refa, uka yau vene egira refa, mokena yau vene aedefa ma amiyesa gubuyo ga rebifa.  
\v 15 Vei mona rebifa, amiye yokoi yaku ya rofu no rebigori, ya yaku ina rofu dairi no ga refa, idu vegu buni ya kaya rofu kana, amiye tau rofu toga rebifa.   
\p
\v 16 Ari neinei ada rebifa;  
\v 17 usa usa toga nigasa amebifa;  
\v 18 beika baika tauri Sei rofu buni tora gade mabifa, adina Iesu Keriso dudu mina bi Sei di ura ya rofu.   
\p
\v 19 Vima kikifa di ita ga ukafefa;  
\v 20 Sei di ago nido amiye di ago rofu ga mokei itu refa.  
\v 21 Beika baika tau mina vei mona resi buni maka moi gira ribifa;  
\v 22 deda vegu no rofu egavoi rebifa.   
\p
\v 23 Uka amuta di Sei iniye yaku ya moi akeke kotana riyaine, ma uni Varika amiye Iesu Keriso dairi degori, ina yaku yi vima, uka mokena ma roaita vegu no yokoi de nufa moi gira rei mona rego.  
\v 24 Sei, ya raka nido amiye, bi ini beika ago niyo mina moi gira risi rego, adina bi vegu rama redo amiye.   
\p
\v 25 Usika ourena, una fafau usa usa nifo.   
\p
\v 26 Usika ourena tau yuata nisi ekalesia vene di fuka refo.   
\p
\v 27 Varika amiye di vava gabireri, nai ago gira nida, mina bura bi usika ourena\f + \fr 5.27 \ft Bura bedakai ka \fq kikifa \ft nufa.\f* tau vakoi rofu vegasa nifa.   
\p
\v 28 Uni Varika amiye Iesu Keriso di buni tora gade bi ya venesa amebiyaine.