\id 1PE Doromu-Koki \ide 65001 - Unicode (UTF-8) \h 1 Peter \toc1 Peter di ouresi bura \toc2 1 Peter \toc3 1 Pet \mt1 Peter \mt2 di ouresi bura \imt1 Ago di ini adina \im \bk Peter di ouresi bura\bk* bi ekalesia vene rofu bura reyo. Mina vene bi “Sei di vo niyo vene”, kaere bi Asia keika di meda baedo enana eta rofuri rerevaida niyadi. Mina bura di ago tora bi ini bura vededi vene rofu egira regika, adina ini mokena vari gira aena dada toe ma esika esika maro. Bura reyo amiye yaku bura vededi vene di mokena Iesu Keriso di ago buni fafau ina vene rofu oteimaradi, adina Iesu di muyena ma dadi rae rena ma Sei nitore reyo dudusa dena meda yaku ina vene rofu uka mokena madedi. Makai resi bi ini toe moigedi, adina ini mokenari diba nigedi bi ini mokena vari gira aena bi rama ba ide. Ye “Iesu Keriso di ogau nina ariri” ini obini moigedi. (1.7) \ip Toe di medari, mina egira rena agosa bura reyo amiye yaku ka bura vededi vene rofu guyaguya niyo ina bi Keriso di vene kana ameyaganedi. \iot Beika sina ideri \io1 Ago di ini adina \ior 1.1–2\ior* \io1 Sei di moi vegu rido di oteimana ago \ior 1.3–12\ior* \io1 Vegu akeke amena rofu egira rena ago \ior 1.13—2.10\ior* \io1 Ekalesia amiye esika esika moina di medari di moimai \ior 2.11—4.19\ior* \io1 Ekalesia amiye di ave nina ma naivo naivo rena \ior 5.1–11\ior* \io1 Metona ago \ior 5.12–14\ior* \c 1 \p \v 1 Na Peter, kaere bi Iesu Keriso di nifeidena amiye— \p Sei di auba reyo vene kaere bi Pontus, Galatia, Cappadocia, Asia ma Bithynia gagani gaganiri rerevaida nisi amededi vene idana kana rofu mina bura reyaka. \v 2 Baba Sei senagi ya diba nisi auba reyo ma ini Vima ya akeke rigo, ye Iesu Keriso di ago neidegedi ma ini dava yaku ya moi ruaka rigo. \p Sei di buni tora gade ma ini uka amuta ya rofu besa tanu maraine. \s1 Toga amei baena uka mokena \p \v 3 Buni tora gade Sei uni Varika amiye Iesu Keriso di Baba rofu manadi! Ini iriyeduka tora gade dada ,dudusa vata nina vegu una maro, Iesu Keriso muyenari gutuna dadi rae reyo ida dudu. Mina bi toga amei baena di uka mokena una vata baeyo. \v 4 Ye Sei yaku gugura buni tora gade ini vene rofu dogo redo, mina asanu regika nari resifa. Ina yaku mina omari dogo redo, ye mironari bi iko, no o abiye de nigedi. \v 5 Mina bi ya rofu, yi mokena vari gira aena dudu, Sei yaku ini vava dudu nari rei mona redo ma yi moi vegu rina di ari di metonari, ya rofu ogau nigi dogo reyo. \p \v 6 Mina dada ada tora iniye refa, idu mina ituari beika toe idana idanari atesi yi uka yarena iniye rededi. \v 7 Ye mina idari, yi mokena vari gira aena bi rama ba ide oteimago. Goro fore ka moi sikori rigo, ma bi itari orisi ini no moi yakugo. Ma yi mokena vari gira aena yaku goro fore besa ebu resi Iesu Keriso di ogau nina ariri, bi ini roka moi odoro risi vabara iniye ma kikifa rena magedi. \v 8 Gokai beika vena de reyadi,\f + \fr 1.8 \fq vena de reyadi; \ft bura bedakai \fq diba de niyadi \ft nufa.\f* idu uka madedi ma gua vena de rededi, idu mokena vari gira ina rofu aededi. Ye ya bi ini roka moi odoro rina dudu, ada tora gade resi gokai sina ago nigi anua rededi, \v 9 adina yi mokena vari gira aededi di obini bi yi vima moi vegu rigika. \p \v 10 Mina moi vegu rina dada, senagi senagi Sei di ago niyadi vene, kaere Sei di buni tora gade ya moigedi di sina niyadi, bi vei dogo rei mona resi Sei di agori bi maina reyadi. \v 11 Ina vene bi maina regamadi goina medari vata nigo ma gokai kana dudu ogau nigo.\f + \fr 1.11 \fq goina medari vata nigo ma gokai kana dudu ogau nigo; \ft o \fq goina amiye vata nigo ma goina medari vata nigo.\f* Mina bi meda Keriso di vima, kaere ina vene dudu yaku ninegau reyo; niyadi Keriso bi esika esika moigo, ma gabi bi ini vabara ogau nigo. \v 12 Sei yaku ini ago nidedi vene rofu niokuyo ini moimai renari bi ina kaya di de naivo reyadi, idu bi ya vene\f + \fr 1.12 \fq ya vene; \ft bura bedakai \fq una \ft nufa.\f* di naivo reyadi. Mina bi ago buni di beika tau niyadi vene, Vima kikifa omari gutuna, moi feideyo di vava dudu sena ya vene rofu niogau reyadi. Ye naivo naivo vima beika ogau nigo mina vegika ura rededi. \s1 Amei kikifa di vegu di raka nina \p \v 13 Mina resi moimai rena fafau mokei mona resi yi yuka vana nari regasa Iesu Keriso ogau nigori, buni tora gade ya rofu baego, mina rofu uka mokena ae mona refa. \v 14 Sei di mida kana, ini ago neidesi yi senagi ada gira di vegu di ura rena ga ourefeidefa. \v 15 Idu yi beika tau regedi bi kikifa dudu, Sei kaere ya raka niyo kana, \v 16 ini adina bura reyo, “Ya bi amei kikifa refa, ini adina na bi kikifa.”\x + \xo 1.16 \xt Lev 11.44–45; 19.2\x* \p \v 17 Ma Sei, kaere bi amiye tau di no, bi ida yokoi maka dudu kota redo, yokoi yokoi ini beika redo kana. Ina rofu Baba kana raka nigedi vonisi, bi konori amededi di medari bi ori dudu, ya kaya nari rei mona refa. \v 18 Mina ye, ya ya diba, beika rofu ya voi reyo yaku ya erufuyo, mina bi beika rama de vegu yi tutubena ya maradi. Mina bi moi sikori rigo diya goro o siriva kana de. \v 19 Idu mina bi Keriso ini dava dudu davana tora mina maro, kaere bi ori sisika mamoe mida, ini roaitari no yokoi de o ara yokoi de mina kana. \v 20 Sei yaku oma ma kono rina koderi, bi sena auba reyo, idu ari baena tumu nigediri, ya dada moi ogau riyo. \v 21 Ina dudu mokena vari gira Sei rofu aededi, kaere bi muyenari gutuna moi dadi rae resi vabara maro, ye yi mokena vari gira aena ma yi uka mokena bi Sei fafau aededi mini. \p \v 22 Yi anema yora niyadi ago rama rofu bi\f + \fr 1.22 \ft Bura bedakai ka \fq Vima dudu \ft nufa.\f* yi vima moi ruaka riyo ma yi usika ourena rofu uka noibanu maradi, mina bi yi uka noibanu dudu\f + \fr 1.22 \fq yi uka noibanu dudu; \ft bura bedakai \fq uka kikifa dudu \ft nufa.\f* ya kaya ya kaya uka noibanu mabifo. \v 23 Ya bi dudusa vata niyadi, yi nono baba muyededi dudu de, idu vegu toga toga amena di mida mida kana, Sei di ago toga vegu amedo dudu. \v 24 Adina:\x + \xo 1.24 \xt Is 40.6–8\x* \q1 “Amiye tau bi oruma kana, \q2 ma ini vabara bi suma dakimu di farofaro kana. \q1 Oruma rarako nigedi ma farofaro yaregedi, \q2 \v 25 idu Varika amiye di ago bi toga toga ameibobigo.” \m Mina ago bi ago buni ya rofu niokudo. \c 2 \s1 Vegu amedo fore ma gagani tora kikifa \p \v 1 Mina dada ya kaya rofu vegu no tau gade, ofa ofa ago tau gade, ofarosi vegu, gonema ma ago no tau gade makufa. \v 2 Mida kakua vata niyadi kana, toga vima di susu ruaka vaifa. Ye mina iribigediri, moi vegu rinari\f + \fr 2.2 \fq moi vegu rinari; \ft bura bedakai mina ago nufa de.\f* tora nigedi. \v 3 Adina, “Ya bi ya kaya veitao reyadi Varika amiye bi buni.”\x + \xo 2.3 \xt Ps 34.8\x* \p \v 4 Varika amiye rofu baefa, vegu amedo fore\f + \fr 2.4 \fk vegu amedo fore: \ft Mina ini adina bi \fq Varika amiye bi vegu amena di adina ma bi yava moi gira redo fore kana \ft (Is 28.16, Mt 21.42, Mk 12.10 ma Lk 20.17 baku re).\f* amiye yaku etofa reyadi, idu Sei yaku auba reyo, adina bi ini nemokori buni vayavaya. \v 5 Ma fore vegu amededi kana baefa ma ya kaya yi roaita dudu, Sei di vima nivakena yava akudo. Ma makai Sei ma amiye utari naivo vene nivakena yava kikifa kana, naivo regedi vima di ori sisika buni Sei rofu, Iesu Keriso dudu regika. \v 6 Adina Sei di agori bura reyo:\x + \xo 2.6 \xt Is 28.16\x* \q1 “Ve kumo, na yaku fore buni vayavaya auba reyaka, \q2 mina yava moi gira redo fore bi Zion ri aeyaka; \q2 ma kaere ina rofu mokena vari gira aego bi maena de rego.” \m \v 7 Mina fore bi buni vayavaya, kaere mokena vari gira aededi vene rofu di; idu kaere mokena vari gira aena de\f + \fr 2.7 \fq mokena vari gira aena de; \ft bura bedakai \fq obededi \ft nufa.\f* vene bi:\x + \xo 2.7 \xt Ps 118.22\x* \q1 “Yava akuna vene moi kekevata uyadi fore \q2 bi yava moi gira redo fore iniye niyo.” \m \v 8 Ma:\x + \xo 2.8 \xt Is 8.14–15\x* \q1 “Amiye yaku mina fore futu regedi; \q2 mina rabema ya moi keto rego.” \m Ago de neideyadi dada, futu rededi Sei di mokena kana. \p \v 9 Idu ya bi ini abidi reyo vene, kini di Sei ma amiye utari di naivo vene, gagani tora kikifa vene ma Sei iniye di vene, ye Sei di vegu buni buni niogau regika, kaere mukunari gutuna ini vabara buni vayavayari ya raka ni moi yakuyo.\x + \xo 2.9 \xt Ex 19.5–6; Deut 4.20; 7.6; 14.2; Is 9.2; 43.20, 21; Tit 2.14\x* \v 10 Ari yokoiri ya bi Sei di amiye de, idu gua ya bi ini amiye. Ari yokoiri iriyeduka de moiyadi, idu gua bi iriyeduka moiyadi.\x + \xo 2.10 \xt Hos 2.23\x* \s1 Reremama buni rena \p \v 11 Nai uka maida amiye, amiye idana ma rerevaida ni dina vene kana, ya usa nida ya kaya yi roaita di ura rena kana ga refa; mina bi toga toga vimasa ruda rebigedi. \v 12 Yi reremama rededi tutubena idana vene di fogori bi kikifa dudu buni maka ameyaine, ye vegu no rededi vene kana no nigediri, yi reremama buni reyadi vei mama resi Sei di dego medari, ini roka moi odoro rigedi. \p \v 13 Varika amiye dada, ya kaya yi ourefeidena vene tau gade gabireri raga refa, kini di ourefeidena gabireri, \v 14 o gavana di ourefeidena gabireri, kaere Sei yaku nifeideyo vegu no rededi vene fafau, kaunava masi vegu buni rededi fafau, buni ni moi odoro riyagane. \v 15 Adina Sei yaku ini beika ura redo, bi yi beika buni rededi yaku ada de amiye di ada gira ago moi bere rigedi. \v 16 Vegu no erufuna amiye kana amefa, idu yi vegu no erufuna vegu dudu, vegu no fafa ga refa, idu Sei di moimai rei tavoi rededi vene kana amefa. \v 17 Amiye tau vanu nivava resi yi ekalesia usika ourena rofu, uka masi Sei rofu ori resi kini nivava refa. \s1 Keriso di esika esika moina di ida \p \v 18 Ya yavari moimai rei tavoi rededi vene yi varika vene rofu, akeke tau dudu ini gabireri raga refa, diya kaere ya rofu buni resi ave nidedi maka, idu ina ka kaere ya rofu ave de nidedi. \v 19 Adina ya rofu buni tora gade vonisi, ya bi Sei diba nisi mokena rorobo de vegu rofu esika esikari are rei gira regedi. \v 20 Ya fafau bi no regedi ma ya ubobo regedi vonisi, beika dada nisi buni ya magedi? Idu ya bi buni regedi ma ya fafau esika esikari are rei gira regedi vonisi, Sei di nemokori mina bi buni tora gade. \v 21 Adina Sei yaku mina rofu ya raka niyo, Keriso ka esika esika ya\f + \fr 2.21 \fq ya; \ft bura bedakai \fq una \ft nufa.\f* rofu gurauyo dada, ya\f + \fr 2.21 \fq ya; \ft bura bedakai \fq una \ft nufa.\f* oteimagi, makai resi ini anuka usi diyainedi. \v 22 Ina bi vegu no yokoi de resi ka ofa sina yokoi de niyo.\x + \xo 2.22 \xt Is 53.9\x* \v 23 Adina bi ago esika toe maradiri, mina toe dairi nikabai de reyo. Esika esika gurauyori, amiye ni moi ori ago mana de reyo, idu ini uka mokena Sei kaere mokena rorobo dudu amiye kota rego di vanari aegamo.\x + \xo 2.23 \xt Is 53.7\x* \v 24 Iniye ini roaitari uni vegu no satauro\f + \fr 2.24 \fk satauro: \ft Greek agori mina bi \fq yabo.\f* odorori uakaiyo, ye gokai vegu no dudu muyesi vegu rorobo dudu amegifa. Mina bi ini ara yaku ya moi buni riyadi.\x + \xo 2.24 \xt Is 53.5\x* \v 25 Adina ya bi mamoe kana ini dina ida mina moi rerevaida nigamadi. Idu gua ya bi mamoe dogo redo ma vima buni ourefeidena amiye dairisi usi didedi.\x + \xo 2.25 \xt Is 53.6\x* \fig Mamoe dogo redo amiye|src="bk00004c.tif" size="span" ref="2.25" \fig* \c 3 \s1 Rema vene ma maruka vene \p \v 1 Mina ida yokoi maka dudu, ya mena rema vene yi rumana neidebifo, ye bedakai ka Sei di ago de neidegediri, bi ago yokoi de ini rema di reremama buni maka dudu Sei rofu mokena vari gira aegedi.\x + \xo 3.1 \xt Eph 5.22; Col 3.18\x* \v 2 Adina bi, yi kikifa rena ma ori dudu reremama vegedi dada. \v 3 Yi etofaro roaita di buni buni rofu, ada iye boboni rena, goro roaitari aena o varuka buni aku mana dudu maka ga matuka refa.\x + \xo 3.3 \xt 1 Tim 2.9\x* \v 4 Idu mina kana bi, yi uka ide reremamari ini buni mina ogau niyaine; mina buni bi de tarego, idu bi vima amuta ma bere nina dudu autu nidedi, adina Sei di nemokori ini davana bi tora iniye. \v 5 Adina senagi rema kikifa, kaere bi Sei rofu uka mokena aegamadi, bi ini roaita moi eruaka regasa ini maruka di ago neidegamadi. \v 6 Sarah bi makai kana; Abraham di ago neidesi ina rofu varika vo nigamo. Yi reremama buni ma deda rofu ori de regediri, ya bi gua ini mida mida nigedi.\x + \xo 3.6 \xt Gen 18.12\x* \p \v 7 Mina ida yokoi kana, ya mena rumana vene yi remasa diba dudu amesi kikifa refa, adina ina bi yeiva iniye de, ye ya remanu gogo risi Sei yaku vegu buni maro mina moidedi. Mina bi refo, ye yi guriguri usari, beika yokoi yaku de kebi rigo.\x + \xo 3.7 \xt Eph 5.25; Col 3.19\x* \s1 Vegu rama rena dada esika esika moina \p \v 8 Sina metonari: ya tau vakoi mokena yokoi maka ma iriyeduka refa, usika ourena rofu uka mafa, uka yau ma mokena ave nifa. \v 9 Ya rofu vegu no regori dairi, vegu no ga refa, o ya kovai nigori, dairi kovai ga nifa. Makai bi de, idu buni tora gade dairi mafa, ini adina Sei yaku mina dada ya raka niyo, ye buni tora gade magedi dada. \v 10 Adina:\x + \xo 3.10 \xt Ps 34.12–16\x* \q1 “Kaere amiye ini ura redo bi ini vegu ada resi \q2 ari buni buni vego, \q2 ini afiye yaku vegu no di sina ga nisi \q2 ini vena yaku ofa sina ga niyaine. \q1 \v 11 Ina bi vegu no rofu etagae risi buni mina reyaine; \q2 ina bi uka amuta maina resi usi diyaine. \q1 \v 12 Adina Varika amiye yaku ini nemoko dudu, mokena rorobo vene vesi \q2 ini anema dudu ini usa usa neidedo; \q2 idu ini seira, kaere vegu no rededi vene, bi gedu mado.” \p \v 13 Ye ya mina mokena buni toga rededi fafauri, bi kaere yaku esika ya mago? \v 14 Idu mokena rorobo rena fafau, ka esika esika moigedi vonisi, buni tora gade ya rofu mago. Amiye rofu ori ga resi mokena tau ga moifa.\x + \xo 3.14 \xt Is 8.12–13; Mt 5.10\x* \v 15 Idu yi ukari Varika amiye Keriso\f + \fr 3.15 \fq Keriso; \ft bura bedakai \fq Sei \ft nufa.\f* moi kikifa rifa. Ari tau bi toro dudu amefa, ye amiye yaku yi uka mokena yi ideri ini rama ya nikaitegori, mina bi nikabai resi nirorotari refa. \v 16 Idu ave nina ma kikifa rena dudu mina moimai refa. Ye yi uka di mokena buni dudu ka refa, ye kaere ya ni no regediri, yi reremama buni rena Keriso ideri, ni no rededi vene bi maena regedi. \v 17 Adina bi buni fafau esika moigedi bi buni, Sei ina ura redo vonisi, idu vegu no rena fafau esika moina bi buni de. \v 18 Adina Keriso mokena rorobo de amiye ka uru yokoi maka vegu no fafau, mokena vari gira de aededi vene rofu esika moiyo,\f + \fr 3.18 \fq esika moiyo; \ft bura tau \fq muyeyo \ft nufa.\f* ye makai Sei rofu ya\f + \fr 3.18 \fq ya; \ft bura bedakai \fq una \ft nufa.\f* moi bogo di; ina bi roaita iniye dudu emuyeyadi, idu vima iniye dudu moi vegu riyo. \v 19 Ma dibura yavari amededi vima rofu ka disi ago nirausi reyo, \v 20 adina mina vima bi senagi Sei di ago obe regamadi, Noah di medari, Sei yaku toro reyori, sisima akugamadiri. Ye mirona ituari amiye be—ini naba bi 8—koru dudu moi vegu riyo.\x + \xo 3.20 \xt Gen 6.1—7.24\x* \v 21 Mina koru bi babatiso di rebe; bi gua ya moi vegu rido. Bi diya roaita kino koite makudo kana, idu usa usa nina Sei rofu kana, uka di mokena buni nufa Iesu Keriso ini muyenari dadi rae reyo dudu, \v 22 kaere bi omari boyo ma naivo naivo vima, ourefeidena vene ma vava nufa vene ini vava gabireri, Sei di vana rama eta rofu ameinu reyo. \c 4 \s1 Vegu idana niyadi \p \v 1 Keriso bi\f + \fr 4.1 \ft Bura bedakai ka \fq una rofu \ft nufa.\f* roaita rofu esika gurauyo dada, mina ye ya kaya mokena yeiva, moi ina yaku mokena moiyo kana; ini adina bi, amiye kaere roaita rofu esika guraudo, bi toga vegu no de redo. \v 2 Ye gua ini vegu ameibobigori, bi roaita di ura rena dudu de, idu Sei di mokena dudu. \v 3 Tutubena idana vene yaku ura rededi kana, ari tau bi ya rofu moi koina niyadi: nemoko kore kore rena, koa rei tavoi rena, koru gira irisi ada forovai rena, rema rumana tausa varena, koru gira irisi adena una, ma ofa sei mina ago gira rofu de risi ofa sei nivakena. \v 4 Ma ina vene bi tururu reyadi, ini vegu no iniye iniye regasa ameibobina mina auta de rededi dada, mina resi ya nifafana rededi. \v 5 Idu, ini beika regamadi bi Sei niyainedi, kaere bi muyena ma vegu rededi vene kota regika dogo redo. \v 6 Mina dada ago buni ka senagi muyeyadi vene rofu senagi amegamadiri niokuyadi. Ini roaitari amiye kana kota reyo, idu Sei kana vima dudu amegedi dada. \s1 Sei di beika baika buni nari rededi vene buni \p \v 7 Beika tau koina nigedi meda bi negau niyo. Mina dada yuka vana nari resi yi guriguri dada yi mokena nari refa. \v 8 Mina beika baika tau fafau, toga ya kaya ya kaya yeiva dudu uka mafa, ini adina bi mina uka mana yaku vegu no rena tau efono rego.\x + \xo 4.8 \xt Prov 10.12\x* \v 9 Ya kaya gaba rena ga ni kosika refa. \v 10 Sei yaku amiye neinei beika bi ini moimai maro kana, mina moimai resi ya kaya nari refa, Sei di buni tora gade di moimai rededi vene kana. \v 11 Kaere ago nido bi Sei di ago niyaine; kaere naivo redo bi Sei yaku maro yeiva, mina dudu naivo reyaine, ye mina di gokai tau Iesu Keriso dudu Sei di roka moi odoro rigedi, kaere toga toga bi vabara di ma vava di. Rama. \s1 Ekalesia amiye kana esika moina \p \v 12 Nai uka maida vene, esika teki teki rego ma moigediri, yi uka maina regika, tururu ga refa. Mina kana esika ya rofu bi bouna de. \v 13 Idu ada refa, ya bi Keriso di esika moina mina rau rededi, ye gokai ini vabara ogau nigori, ya ka bi ada noibanu dudu mina vegedi. \v 14 Keriso di roka dada ya nikiraini regedi vonisi, ya rofu buni tora gade mago, adina Vima vayavaya, mina bi Sei di Vima, ya fafau amedo.\f + \fr 4.14 \ft Bura bedakai ka \fq Ina vene dada ini roka moi no ridedi, idu ya dada ini roka moi odoro ridedi \ft nufa.\f* \v 15 Ye esika moigedi vonisi, amiye yokoi amiye emuyena, duma duma rena, vegu no rena ba amiye bisu basu rei tavoi rena kana, mina bi esika ga moi. \v 16 Idu ekalesia amiye dada esika moigo vonisi bi, maena ga revo, idu Keriso di roka\f + \fr 4.16 \fq Keriso di roka; \ft bura bedakai \fq mina \ft nufa.\f* dudu Sei di roka moi odoro ri. \p \v 17 Adina Sei di vene di kota rego kora regi di meda bi okiyo. Ye Sei una rofu siko kora regori, bi gokai dudu, bi ini ago buni obe rededi vene rofu bi kota resi beika kana kaunava mago? \v 18 Ma:\x + \xo 4.18 \xt Prov 11.31\x* \q1 “Amiye mokena rorobo nufa moi vegu rigi bi gira; \q2 ye Sei di mokena kana de rededi vene ma vegu no rededi vene bi gokai nigedi?” \m \v 19 Mina dada kaere Sei ini ura dudu esika moigedi, bi vegu buni renari ini vima oma ma kono riyo amiye rofu refo; ina toga ini ago nina redo. \c 5 \s1 Sei di amiye mamoe tau kana \p \v 1 Na, na kaya kaere bi amiye tora, bi ekalesia tora vene yi fogori egira reida. Na bi Keriso di esika moina veyaka amiye ma vabara vata nigo, mina vegu ka rau regida. Mina ya nida, \v 2 Sei di vene yi fogori mamoe kana nari resi ourefeidefa, idu niguba bi ga refa, idu ini ura dada, Sei di ura ya fafau dada;\f + \fr 5.2 \fq Sei di ura ya fafau dada; \ft bura bedakai mina ago nufa de.\f* ofa ofa dudu fore moina moimai ga refa, idu yi uka dadina dudu moimai refa.\x + \xo 5.2 \xt Jn 21.15–17\x* \v 3 Kaere amiye nari regi ya maro, bi ya kaya moi tora bi ga refa, idu ya usi dinari, ya kaya amiye di fogori yi moimai oteimafa. \v 4 Kamini mina mamoe dogo redo Varika amiye ogau nigori, ya bi ini vabara di kini kana ada bou moigedi; ini vabara di yeiva bi keika de nigo. \p \v 5 Mina makai, ya ofi godua bi tora vene di gabireri raga refa; ma yi amiye tau ya kaya ya kaya varuka kana ave nina nufa fufuta bou rebifa, adina “Sei yaku matuka vene gedu mado, idu ave nidedi vene rofu buni tora gade mado.”\x + \xo 5.5 \xt Prov 3.34\x* \v 6 Mina dada, Sei di vana di vava gabireri ya kaya moi ave rifa, ye ini ari buniri, ya moi odoro rigo dada.\x + \xo 5.6 \xt Mt 23.12; Lk 14.11; 18.14\x* \v 7 Yi mokena toe tau bi inasa ferefa, ini adina bi ina yaku ya nari redo. \p \v 8 Ya kaya vesi nari refa; yi tuma amiye Bodaka bi lion goroka tora nido kana, dibo resi amiye iri vau regi maina redo.\f + \fr 5.8 \ft Bura bedakai ka \fq dada \ft nufa.\f* \v 9 Yi mokena vari gira aena egira resi ina rofu are resi gedu mafa; ini adina bi ya diba, mina kono tora noibanuri, yi asiyaka Sei rofu mokena vari gira aena vene ka mina kana esika esika moidedi. \v 10 Ye mina neitua keika guraugedi, ma gabi bi buni tora gade di Sei, kaere ini toga toga ameibobina vabara Keriso ideri ya\f + \fr 5.10 \fq ya; \ft bura bedakai \fq una \ft nufa.\f* rofu raka niyo, bi iniye ya dudusa moi rorobo risi yo nisi egira resi ya moi are rego. \v 11 Vava tau bi toga toga Sei di! Rama. \s1 Metona yuata nina sina \p \v 12 Silas na aedeyo ma mina bura keika riyafa; nai mokenari ina bi ekalesia dubuini, kaere bi ini ago nido amiye. Na ura reida bi ya niegira resi mina ago tau, bi Sei di buni tora gade rama ya rofu niogau regida. Mina dudu are rei gira refa.\x + \xo 5.12 \xt Acts 15.22, 40\x* \p \v 13 Yi rasini dubu Babylon ri, ina ka Sei yaku auba reyo, ma Mark, kaere bi nai mida kana, ina yaku ya vene rofu yuata nifeideyadi.\x + \xo 5.13 \xt Acts 12.12, 25; 13.13; 15.37–39; Col 4.10; Phlm 24\x* \v 14 Ya kaya ya kaya ekalesia di uka mana dudu fuka refa. \p Uka amuta ya tau fafau ameyaine, ya kaere bi Keriso di.