\id 2TH - Mountain Koiali NT [kpx] -Papua New Guinea 1981 (web version -2013 bd) 
\h 2 Tesalonia 
\toc1 2 Tesalonia 
\toc2 2 Tesalonia 
\toc3 2Tes 
\mt1 2 Tesalonia  
\c 1  
\s1 Bolou tota Tesalonia ekalesiaho hisaliale  
\p
\v 1 Bolo, Sailasi, Timoti noeabulike levaleva ko hisaliai Tesalonia ekalesia ata laheho hanavoma. Nahie Mama Dilava isi nahie Kosive Iesu Keliso keau la malevege laeau ataeabe holievelu.  
\v 2 Iale no isivialeike abu la huhuevei la hoesegevege ue dua vave.   
\s1 Dilavau atae toela ibina oveveve  
\p
\v 3 No haokuvuia, no vani bahata la vahaeho vai laheho Dilava imihama. Kosealemo la evievi kemo la negolahage keu balugai lohoge la moleho isivilahamale ketau balugai lohoma.  
\v 4 La vaveve kateimale vamale kemoike no la ivi tabagevei ekalesia ata haivema. Kosealemo vaveve toela isi vatehani keau laemo lohosege la evievi kemo dobuluviholisito kemo negolahama.   
\p
\v 5 La vaveve bahata kemo no hilokage Dilava vaveve keu seleve unaha. Iale la vatetumu kemo negolahalemo auna bae la malevege matamave doga keve uve.  
\v 6 Isito oleteau la aiogevei vatehani laovemale kebia auna bae vatehani ovei. Vatehani oveale kemo nahi hilokage Dilava vaveve keu seleve unaha.  
\v 7-8 Vani kela nahi vatehani malemale kemo auna nahie hoesegevege nahiabuna ke halioi ue dua vai. Iesuna au anelu vuvunetebiahi otogomo dobai lohoniege Dilava hilokaholimale kebia malevei venemo hatuevege abuna vatehani baluga malei. Oleuoleu nahie Kosive Iesu Keliso hoto evisi vaholige auna vatehani ovei.  
\v 9 Vatehani ovege Kosiveu au atagae matamamo umale keve abu bae talivebene. Isito abuna Dilavamo uoholi seleveai.  
\v 10 Vani kela Kosivena dobai lohoge atave abuna hoesehavoi ivive ebagevai loui kosea, “No Kosive kou baluga.” Ige la no hoto louale ke evisi la uvu mai avuemo mavoale lataeabuna vani kela abuhi Dilava hoesehavove.   
\p
\v 11 Katealemoike no vani bahata laheho guligulilahai isiviale Dilavau la hoesegevege lana isivive vai vaveve dua unaha vageve. No Dilava imihai loui kosea, “Tesalonia ata keau isiviale vaveve dua vagei. Iale ana a vuvunemo evieviabe ke negotige abuna a lovi ke vage uoholisi.” No kateai Dilava imihama.  
\v 12 Iale ataeabuna la vaveve ke elehai nahie Kosive Iesu ivi ebagevai. Ige nahie Dilavana Iesuti la ivi tabagevei abu uvu laovei la tedaevei.   
\c 2  
\s1 Atae toelana au ebika mai Dilava toai.  
\p
\v 1 No haokuvuia, nahie Kosive Iesu Kelisou loholive nahi bevuevege nahiabuna avuluvuta igaetoai uveve kemo di isiviai hoto mole loui la namigevei.  
\v 2 Ata degomoleau tababulahai lobolahai la haivei loui kosea, “Kosive vani keu subuta lohonu.” Isege degomoleau lobolahai loui kosea, “Bolou noheho levaleva hanavoi loui avoe, ‘Kosive vaniu subuta lohonu.’” Kateai louge lainaho hotoeabe evisi huhulahai kemo dolodoloalive.  
\v 3-4 Ataeau kateale vai la lobogevege lainaho kemo dolodololahagelive. Kosealemo nahi hilokage vani keu vuguvuguage ata moagaeabuna abu evievimo dobuluvisi Dilava kabebihavoi. Isege ata mole toela igaena lohoniege au ebika ebagemai loui kosea, “La Dilava isi onobenobe hoesegevemale kebia haleveito da igae hoesehavove.” Isi Dilava dubu baluga ke uvue tiniege ugulamoi loui kosea, “Dau Dilava dalike.” Auna kateige Dilavana bae mai veneu lahai hodovavesiteve hanavoi.   
\p
\v 5 Subuta di lahehi ui hoto kateale la haiveale ke lana huhulahalu.  
\v 6 La hilokage vaveve katealena vata komo lohoi. Isito ono moleu aike humahave bamuale keta la hilokalu. Iale vani mole igaena lohoge atae toela kena lohoi.  
\v 7 Novae vani komo ataeau ata nehe ke nahate vaime Dilava halevai menakave aiogevema. Isito vani moleu lohoge Dilava vaveveu humaha ke bamumale kena uoholige atae toela kena lohoi.  
\v 8-9 Vani kemo atae toela kena lohoniege Setene vuvunemo loboe vaveve nimolete vaevei tete vaveve vaevei. Ke vaevege uoholige Iesuna au vuvunemo dobai lohoniege au aie vivimo ke aiohavoi hamage auna hatai.  
\v 10 Isito auna lohoholisege atae toela kena vasohuta loboe hoto loui ata lobogevege abuna ukolikolie humaha hosidisi haluviveve humaha keve tai. Kosealemo keau hotoe dua ke kabebihavoi isiviholilu eviliho.  
\v 11 Vaveve katealemo Dilavana halevege abuna loboe hoto ke evisi ke unaha vagei.  
\v 12 Abu hotoe duaho isiviholisi halevai vaveve toela unaha vamale ke ibini Dilavana bae ovei.   
\s1 Hoto seleve mataha tumutumuave.  
\p
\v 13 No haokuvuia, no hoto mole louge evive. No vani bahata la vahaeho vai laheho guligulilahama. No hilokage Kosiveu au uvu mai laemo mamonu. Subuta Dilavau la tabagevei la maleveale kemo no hoto seleve loui la haivege la ke evisi malu. Isege Munana Tumuteu la hoesegevege la Dilava ata holilu.  
\v 14 No subuta tiale hotoe dua loui la haivei loui kosea, “Dilavau la hohavei la malevege lana bae nahie Kosive Iesu Keliso keti igaetoai atagavemo uve.  
\v 15 Iale no haokuvuia, no laheho hoto seleve loui mesoho hisaliale ke evisi avuemo lavisi mataha tumutumuave.  
\v 16-17 Nahie Mama Dilavau au uvu mai nahiovei nahi hoesegevealemo nahi vani bahata negolahai gabie ukolikoli maveve hemei ui. Iale no isiviale nahie Kosive Iesu Kelisona abu Mamati la uvu hoesegevei negotievege lana bae negolahai hotoe dua loui vaveve dua vageve.   
\c 3  
\s1 Noheho noinoilahave.  
\p
\v 1 No haokuvuia, no hotoe gabi igae ko louge evive. Noheho noinoilahave. Ige no valive hotoe dua loui ata moaga haivege abuna la hoto ke evie dua vamale ke nahate abutana vai.  
\v 2 La noheho noinoilahale kemo Dilavana atae toelemo nahie malevei. Kosealemo atae toela kebiau hotoe dua eviholimalea.   
\p
\v 3 Isito la ke evialemo Dilavau bae la halevelivebene. Auna la nibievei negotievege toelabeu bae laemo lohoi la aiogevelivebene.  
\v 4 No evievi nahie Kosivemo mavoi hilokage no la haivemale hoto ke lana vani baita vageve.   
\p
\v 5 No isiviale Kosiveu la uvu hoesegevege lana Dilavau au uvu bahata laoveale ke hilokave. Isi au lohoveve ke hototamo homasilaha halevave. Isito ke hemei ugeve.   
\s1 Hoto evioholimale kebiamo haliohatuve.  
\p
\v 6 No haokuvuia, nahie Kosive Iesu Keliso ke ivimo no la namigevege evive. Evievi ata degomoleau lovioholisito u unahamale kebiamo haliohatuve. Keau no hoto loui haiveale ke ehovaholilu.  
\v 7 No lahehi ui lovilahamale ke la hilokage noeau homasiholilu. Iale ke nahate lana vave.  
\v 8 Noeau laemo heiata lovibe ioholilu. Isito vavita gututa noeau negolahai lovilahalu. Katealemoike la noemo la monibe hatuoholilu.  
\v 9 No laemo kunai malei lovi ige keta duave. Isito no katealeho isiviholilu. Kosealemo no isiviale negolahai lovilahage lana ke elehai ke ehovave.  
\v 10 No lahehi ui la namigevei kosea, “Olena lovioholiniege au bae lovi ilivebene.”   
\p
\v 11 No kateale louale keu koseanu. No evige la degomoleau lovilahaliho isiviholilu. Isito isiviale u unahai lovite kebiamo hoto loui aiogevegei.  
\v 12 Iale nahie Kosive Iesu Keliso ke ivimo no isuta kebia namigevei kosea, “Uveve dua vai lovilahalive la lovi ke isi uve.”   
\p
\v 13 No haokuvuia, no hoto mole louge evive. Lainaho vaveve dua vamale kemo kabebilahagelive.  
\v 14 No laheho levaleva ko hisaliai hanavoge mesoho ata degomoleau bae hoto ko malivebene. Abu katelahage kebia hilokaevei haliohatueveve. Ige elike abu matilahai vaveve kateale halevai.  
\v 15 Abu katelahage lainaho la bahoe kebia vaveve ke nahate abuemo valive. Isito ese igaeau vamale ke nahate vai namigevege abu ke halevai hoidevei.   
\s1 Hotoe gabi  
\p
\v 16 Kosive ke igaeike uveve dua mai nahiovenu. Iale di isiviale auna vani bahata lahehi ui la vaveve bahata kemo la tedaevege lana kemo ue dua vageve.   
\p
\v 17 Iale Bolo dailike aike beni mai di adala hisaliai kosea, “La nohovu. Lana duave.”  
\v 18 Di levaleva bahatamo di adata hoto kateale hisaliama. Di isiviale nahie Kosive Iesu Keliso keu vani bahata la huhuevei la hoesegevegei. Di hotou kemo kateai ua.