\id 1JN 1 John - KORAFE J. FARR 27 November 2002 
\h 1 John 
\toc2 1 John 
\toc1 John Nunda Reta Tuturoda Gefusira, Amo Eviri. 
\mt1 John Nunda Reta Tuturoda Gefusira, Amo Eviri.  
\ip Iesu da ambo jimbi eni javo John, nu embako edo ghaeko 85-90 A.D. ainda jokáda, nunda geka evia gefusira. (2 John a 3 John avose, sifo daba aminda gefusira.) John gefusira amo, nu evovodae natofo ekaresia jokáda aikena roboghoi ‘nanda sasingu’ sise, geka gefusira.  
\ip Avata John da sifoda, evetu genembo mendeni tumondari beká dodo iriari. Ne totofo dederuse nemo, tumondari embova sise, Iesu mo nu God beká ava, ne jo tumondaeri. A kotugo, God vose fira genembo beká edo sirorusira ábarago, ne jo tumondae useri. Evetu genembo resera eimi, ne \it asisi\it* mo roera teriago sise, tamo fisighae mo, roera ijoghakova sedo ghuseri. Aminguse, fisida uju itatako jo buregae, ne ari ekoko mendeni mendeni isaghada edo ghuseri. Nemokena beisiga use, nenda geka da mino sise, John nunda geka fakarago emo, buku einda jokáda gefusira.  
\is1 John Nunda Reta Tuturoda Gefusira, Ainda Mendo Mendo Mo Eviri.  
\ip 1:1-4 John geka tuturo usira.  
\ip 1:5—2:29 God mo, usasa bekári. Namonde mave nunda sasingu arera amo, tumba da geka a irari ava ighagha edo, Iesu da amboda amboda use, ari eveva use irarera.  
\ip 3:1-24 God da sasingu mo, ne ari eveva use, nenda nano namendi dubo ruruse irarera. O Satan da sasingu mo, ne ari ekoko use, nenda nano namendi jo dubo bae arera.  
\ip 4:1-6 Evetu genembo God da Geka seraera, ai, Satan da geka seraera, ava dere garera.  
\ip 4:7—5:21 Keriso da natofo rea tumondaetera, a nu redae tumondaetera, a kotugo nange use iraetera, ainda geka sedo, tano usira.  
\c 1  
\s1 1:1-4 Jebuga Da Susu Mo, Keriso Numori.  
\p
\v 1 Tuturoda, Geka eni irei. Geka ava mave tumondarira amo, nu jebuga evovodae irari ava tuve barira. Geka amo namane nininguseri, a saramana iri, namane gosuseri. A kotugo, namane ditiimi gido, ungoi jighi gosuseri.  
\v 2 Na Geka resena emo, Keriso dae resena. Numo, God dirigetiri fira isagha etiri namane gosuseri. Namane nu gido, aindae nemokena osa sise irera. Jebuga giti God Afa kena ireira amo, numori.  
\v 3 Nu isagha etiri gido, namane nunda bino ava osa seraera. Ainda tuka mo: ne namonde dabade tatedo iraeteri. A namane mo, God Afa nunda Mandi Iesu Keriso de dabade tatedo irera.  
\v 4 Aindae sise, ne namonde dabade tatedo, ivuga ari dae sise resera.   
\s1 1:5-10 God Mo, Nu Usasa Bekári.  
\p
\v 5 Geka namane Keriso kena ningido, nemokena sari dae erera amo, eviri. God mo, nu usasa bekári. Numokena a nunda jokáda, tumba eni tefori.  
\v 6 Ava sedo, “Na God ghae dabade tatedo irena,” sise, tumba da ari ava use irarera amo, namonde gungubo sarera. Ainda beká mo: namonde rea arera, a rea sarera, jo foa dabako ae arira. Amo, namonde gungubo sarera.  
\v 7 O namonde, God de dabade usasada deinghuse irarera amo, namonde tofo tofo tatedo dabade iroro, nunda Mandi Iesu da ororoimi, namondeda ari ekoko seghe fugarira.   
\p
\v 8 Avata, “Namane eveva vanembo eraera,” sarera amo, namonde totofo dederuse irarera. Amo, namondekena geka beká eni tefori.  
\v 9 O namondeda ari ekoko God kena vujegarera amo, nu rea beka gagojuse ari dae sisira ava, nune arira. Nu namondeda ari ekoko isasambu seghe fugedo, kote doyarira.  
\v 10 O, “Namane eveva vanembo eraera,” sarera amo, namonde kau God gungubo sariá sise sarera. Mave aminge sarira amo, nu God da Geka eniko jo bae beká irira.   
\c 2  
\s1 2:1-6 Mave God Dubo Barira Amo, Nu God Da Geka Ningido, Amingarira.  
\p
\v 1 Nanda sasingu, na geka eregefena emo, erá ari ekoko eove dae sedo eregefena. Avata namonde ari eko mave arira amo, Iesu Keriso genembo aindae sedo, God Afakena sorega fumbarira. Ai resira amo: Keriso nusuka numoá, God da dombuda numo bekári.  
\v 2 Nu tofo mandi namondedae rea usira aindae sedo, God namonde a evetu genembo isasambu da ari ekoko kote doyeraira.   
\p
\v 3 Namonde God da sasingu edo irera ava, nange kasama areri? Kote givu! Namonde nunda Geka a nunda uju ava kaifa use irarera amo, namonde nunda natofo edo irera ava, namonde kasama arera.  
\v 4 O mave eminge sarira, “Na God kasama edo, nunda natofo jokáda teredo irena,” aminge sise, God da Geka a nunda uju jo ae arira amo, nu gungubo katori. Amo, nu geka beká eni jo bae irira.  
\v 5 O mave God da Geka kaifa eraira amo, nu God ava inononda dubo buraira. Namonde God de dabade tatedo irera, ava kasama ari da emboro mo eviri.  
\v 6 Mave “Na God ghae tatedo irena,” sarira amo, nu Iesu Keriso da amboda amboda ise, nunda ari avanembo use irarira. Amingururari gido, namonde kasama edo, “Geka bekári. Genemboá nu God ghae tatedo irera.” sarera.   
\s1 2:7-17 Namonde God Da Natofo Edo Irise, Nano Namendi Eni Jo Imboe Ae Arera.  
\p
\v 7 Nanda kokomana, na ne dubo ererurena. Na rea oroko aovo dae resena emo, jo agho dari seka iraeri. Ne anakora tuturoda ningido ghusevu.  
\v 8 Avata oroko tumba da sifo dadabari dae erira. Usasa beká ava tuturo edo janimbari dae erira aindae, agho dari emo ojighira seka da kaugo edo irira. Ainda beká ava, Keriso ijugeari isagha edo ghusira, a kotugo nembarago kau daba ava eraeva.   
\p
\v 9 Mave nunda nano namendi eni imboe use, “Na usasa jokáda deinghuse irena,” sarira amo, gungubori. Nu giti tumba jokáda irá ghedo ghusira, a kotugo oroko barago, nu dombu daba ava irira.  
\v 10 Mave nunda nano namendi dubo ruruse irarira amo, nu usasa jokáda irise deingharira. Nu usasa jokáda irise a ari eveva avanembo use, nunda komana jo itako derari, ari eko eni use gofae arira.  
\v 11 O mave nunda nano namendi eni imboe use irarira amo, nu tumba jokáda deinghuse irarira. Amingururari, nunda diti gajari, jo gae ya emboro kasigarira.   
\p
\v 12 Nanda sasingu, Iesu da javoda, God nenda ari ekoko kote dotutusira aindae sedo, na nemokena geka emo eregefena.  
\v 13 Afa koro, ne God tuturoda ireira amo, numoá kasama use ireva aindae sedo, nemokena eregefena. Gigimasa, ne Satan de dabade isoro edo de atai fati fefetuseva aindae sedo, nemokena eregefena.   
\p
\v 14 Nanda sasingu, ne God Afa kasama edo nunda aito ava kasama use ireva aindae sedo, nemokena eregefena.! Afa koro, ne God tuturoda ireira, numoá kasama use ireva aindae sedo, nemokena eregefena. Gigimasa, God da Geka nenda ghamo jokáda iriri, ne fakina edo Satan de dabade isoro edo de atai fati fefetuseva aindae sedo, nemokena eregefena.   
\p
\v 15 Erama enda a enda einda gugua eni dubo beove! Mave enda dubo buraira amo, nu God Afa jo dubo bae eraira.  
\v 16 Enda da gugua resena amo eviri: fisi da uju, gugua ditiimi gosuse dighighi ari, guguadae sakai sari, roera avavaga jo Afakena ghedo foa ghae eraira. Amo enda da guguari.  
\v 17 A enda einda gugua evetu genembo dighighi eraera amo, enda einghae dabade dadabari dae erira. O mave God da uju ava use irarira amo, nu jebuga evovodae irarira.   
\s1 2:18-27 Genembo Eni Amboda Kerisokena Gitofu Ari dae Furarira.  
\p
\v 18 Nanda sasingu, ningivu! Sifo buvari dae erira. Genembo tomanako eni amboda eredo, Keriso kena gitofu use fetarira, aindae setero niningusevu. Avori, evetu genembo digari eredo, Keriso da gitofu use fefetuseri. Avo gido, namonde kasama erera, Ategi da Sifo foa buvari dae erira.  
\v 19 Giti, evetu genembo setena amo, ne namonde dabade iriari. Avata ne namonde dodo aera esike irera. Kotugo, ne jo namonde dabade tate gogoghombae useri. Amingaetera amo, ne namonde jo doyae aeteri. Avata kotugo, ne eredo namonde dotutusera aindae, evetu genembo tomanakoi gido kasama erera, ne jo namonde dabade tate gogoghombae useri.   
\p
\v 20 O nemo, ne jo amingo iraeri. Keriso nunda Asisi Kakara ava nemokena mutiri budo ireva; ava sedo, ne geka beká ava kasama use ireva.  
\v 21 Ne jo Geka Beká kasama ae irariá sise, gembae erena. Na nemokena eregefena, einda tuka mo eviri. Ne Geka beká anakora kasama edo ireva. A kotugo, geka beká aimi, gungubo eni jo sirorae eraira, ábarago kasama ereva.   
\p
\v 22 Avori, genembo eni Keriso kena gitofu arira, setena amo, mavejori? Kote givu! Mave gungubo sise, “Sonemba Kato God mutari sisira amo, jo Iesu iraeri,” sarira amo, nu gungubo katori. Genembo amo, aminge sise, God Afa nunda Mandighae dabade, ava ighagha eraira.  
\v 23 Ainda tuka mo: mave God da Mandi ighagha arira amo, nu aminguse, Numamo barago ighagha arira. Kotugo kau daba aminga ava, mave dubo jovereghedo, God da Mandi dae ivuga use nati joká darira amo, nu aminguse, God Afakena barago kau daba ava arira.   
\p
\v 24 Avo gido, geka tuturoda nininguseva ava, jighi gogoghombedo tumonduse irareva. Aminguse irareva amo, ne God Afa nunda Mandighae dabade tatedo irareva.  
\v 25 Kotugo, Keriso nune rea mutari sisira amo, jebuga evovodae irari ava mutari dae sisira.   
\p
\v 26 Na geka gembena emo, na, evetu genembo nemo dereraera, ava kotise gembeni.  
\v 27 O nemokena mo, avori. Keriso nunda Asisi nemokena mutiri rurusevu. Ne Asisi de dabade tatedo irareva amo, na redae ne ijugareni? Ne inono edo irareva. Ainda beká mo: nunda Asisi ijugururari, roera isasambu ainda beká ava, ne kasama areva. A nu rea ijugeraira amo, geka beká vanembori. Aminda gungubo eni tefori. Ava sedo, Asisi da ijuga ava nininguse Keriso de dabade tatedo irivu!   
\s1 2:28-3:10 God Da Sasingu Kau Emingori.  
\p
\v 28 Avori, nanda sasingu, sekago eminge resena. Erá nunda furari da sifo aminda meka geove dae sise, Keriso de dabade tatedo, tumo fainghevu!  
\v 29 Keriso nu eveva vanembori. Ava sedo, evia kasama evu! Evetu genembo mave ari eveva avanembo use irera, nembarago God da sasinguri.   
\c 3  
\p
\v 1 Kote givu! God Afa da dubo bari namondekena mo, tomanako bekári! Nunda dubo bari namondekena ijuguse, namonde nunda sasingudae bari sisira. Sisira ava, beká siroretiri namonde nunda sasingu edo irera. Evetu genembo fisi da uju use irera, ne God a nunda irari ava jo kasama ae irera. Aindae sedo, ne namonde a namondeda irari barago, jo kasama ae eraera.  
\v 2 Nanda nano namendi, namonde oroko God da sasingu edo irera. Avata sifo gombuda, namonde kau mavega arera ava, namonde jo kasama e gogoghombae irera. Avata dabako kasama erera amo, eviri. Keriso jovereghe furarira ainda sifoda, nu kau mavega, ava fuge gido, namonde kau numongo ava edo irarera.  
\v 3 Avori, namonde numongo arera ava, mave kasama use a tumonduse irarira amo, kau Keriso eraira aminga ava use, nu ari ekoko da emboro isasambu imboe use darigarira.   
\p
\v 4 Mave ari eko eni arira amo, nu God da Agho Dari ava bejarira. Ainda susu mo: ari ekoko rejo ava irira, ainda kau ava, Agho Dariimi ijugeraira.  
\v 5 Ne kasama ereva, Keriso evetu genembo da ari ekoko seghe fugari dae sedo fusira. Numokena ari eko eni tefori.  
\v 6 Ava sedo, evetu genembo mave Keriso de dabade tatarera amo, ne jo ari ekoko use irae arera. O mave ari ekoko use irarera amo, ne Keriso jo gae irera, a nu jo kasama ae irera.   
\p
\v 7 Nanda sasingu, evetu genembo mendeni da gungubo geka ava, erá tumondeove dae sise resena. Mave ari eveva use irarira amo, nu kau Keriso da kaugori.  
\v 8 O mave ari ekoko use irarira amo, nu Satan da tofo edo irise, amingarira. Ainda beká mo: Satan nu tuturoda ghedo ari ekoko udo refira. Aindae sedo God da Mandi fusira. Amo, Satan da ari rea eraira a rejo etiri sirorusira ava, dari bejare dae sedo, fusira.   
\p
\v 9 Evetu genembo mave God da sasingu edo irera amo, ne jo ari ekoko use irae arera. Ainda beká mo: God nunda jebuga a nunda irari ava, nunda sasingu da dubo jokáda fitiri sembiri, nu nenda afa edo irira. Ava sedo, evetu genembo mave God da sasingu edo irera amo, ne jo ari ekoko use irari da kaugo iraeri.  
\v 10 God da sasingu mavejori, kotugo Satan da sasingu mavejori, ava nange kasama areri? Amo kau evavagori! Evetu genembo mave ari ekoko use irarera, o nenda nano namendi imboe use irarera amo, ne jo God da sasingu iraeri.   
\s1 3:11-18 Namonde Minonde Minonde Dubo Ruruse Irarera.  
\p
\v 11 Geka tuturoda setero nininguseva amo, eviri. Namonde minonde minonde dubo ruruse irarera.  
\v 12 Kau Cain usira aminga ava, namonde jo ae arera. Nu Satan da tofo edo irise, nunda namendi detiri ambududurusira. Amingusira da beká mo: nu ari ekoko avanembo edo ghusira. O nunda namendi mo, ari eveva avanembo edo ghusira.  
\v 13 Ava sedo, nanda nano namendi, evetu genembo fisi da uju ava use irera aimi eredo, kau Cain usira aminga ava use, ne imboe arera amo erá buneove!   
\p
\v 14 Namonde ambarida ghe fera jebugakena sembudo irera, ava kasama erera. Namonde ava kasama erera da beká mo: namonde nano namendi dubo ruruse irera. O mave nunda nano namendi jo dubo bae irira amo, nu ambari jokáda irira.  
\v 15 Ai resira amo: mave nunda namendi imboe use irarira amo, kau nunda namendi dari ambaetira, ainda kaugo ava kotise iraetira. A namonde kasama erera: evetu genembo mave kokomana daoro ambarera amo, ne jebuga evovodae irari ava jo bae arera.  
\v 16 Keriso namondedae sedo rea usira ava kotise, namonde dubo bari da aito ava kasama arera. Keriso emingusira. Nu namondedae sedo fira ambududurusira. Ava sedo, namonde kau daba ava use, namondeda nano namendi sonembari dae sedo, ambaeteri.  
\v 17 O makasi embo eni baimaraghae irari gido, nunda namendi eni susu iti fafode aimi jo sonembae irise, “Na God dubo ererurena,” saetira amo, nu gungubo saeti. Ai resira amo: nu God da uju ava use nunda namendi sonembaetira, avata nu jo sonembaeri.  
\v 18 Nanda sasingu, namonde tofo tofo dubo bari da emboro mo, jo geka sari vanembo iraeri. Namondekena dubo bari iraetira amo, namonde evetu genembo sonembuse saramana ururoro, namondeda dubo bari ava isagha ari evetu genembo gido ghaeteri.   
\s1 3:19-24 Namonde Eveva Eraera O Sembae Eraera Ava, Dubo Jokáda Itatamarera.  
\p
\v 19 Avori, namonde God da Geka beká ava tumonduse, jebuga budo irera ava, nange kasama areri? A namonde nange kasama use, dubo jama edo God dae jo oju ae areri? Amo, namonde emingarera.  
\v 20 Namonde dubo jokái, “Arie, na dara eteni!” aminge itatamaetera amo, namonde oju use vujegaeteri. Ainda beká mo: namondeda dubo joká ainda kasama mo, kitakori. O God da kasama mo, teria bekári. Ava sedo, dara rea usera, nu anakora kasama edo irira.  
\v 21 O namondeda dubo jokáda, ari eko eni jo itatamae arera amo, namonde fakina edo, God da dombuda fete gogoghombarera.  
\v 22 Amingedo, namonde rejodae benunu sarera amo, mutari namonde barera. Mutari barera da beká mo: nunda geka a nunda uju ava urureoro gido, nu ivuga eraira.  
\v 23 A God rea uju eraira amo, eviri. Namonde, nunda Mandi Iesu Keriso rea aoro dae sisira ava use, nunda javo fakinaghae ava tumonduse, tofo tofo dubo ruruse irarera. God nu, namonde amingaoro dae uju eraira.  
\v 24 Mave God da geka a uju ava use irarira amo, nu God ghae dabade tatarira, a God numokena irarira. Kotugo, God namondekena irira ava, nange kasama areri? Amo, eminge kasama arera. Nunda Asisi namondekena mutiri rurusera aindae, namonde kasama erera, God namondekena irira.   
\c 4  
\s1 4:1-6 Feroveta Geka Rea Seraera Ava Ijujarera.  
\p
\v 1 Nanda nano namendi, evetu genembo digari eminge seraera, “Namane God da Asisi budo irera.” Mendeni mo, ne geka beká seraera. A mendeni mo, gungubo seraera. Ava itatame gaovo dae resena. Ne, God da Asisiimi sonemburureari geka seraera, ai, sukarui sonemburureari geka seraera? Kote givu! Ainda beká mo: feroveta derari kakato digari mo, Satan da uju ava sari dae sedo, yama reighi mendeni mendeni aminda, geka vironu seraera.  
\v 2 O mendeni mo, God da Asisiimi ijugurureari geka seraera. Ava sedo, geka beká ava nange kasama areri? Amo mave, “God da Mandi Iesu Keriso fira, namondeda tamo budo, enda eminda siroredo genembo beká usira,” ava dubo isambuimi aminge isagha sarira amo, nu geka beká God da Asisi budo aimi sarira.  
\v 3 O mave gekaá ighagha arira amo, nu God da Asisi jo baeri. Nu Keriso da Gitofu da asisi ava budo irira, ágido ighagha arira. Ainda asisi eko furarira amo, setero ne niningusevu. Ava oroko ojighira irira.   
\p
\v 4 Avata nanda sasingu, ne God da natofo edo ireva. Ava sedo, ne feroveta gungubo kakato setena ava darigedo, atai fati fefetusevu. Ainda beká mo: Asisi nene ruruseva amo, nu fakinaghaeri. O evetu genembo mendeni endada irise, fisi da uju use, asisi eni rurusera amo, jo amingo iraeri.  
\v 5 Evetu genembo amo, ne enda da saramana, enda da uju, a enda da kotari aindae seraera. Ne enda da tofori. Aindae ne aminge sirureoro, evetu genembo mendeni endada irera aimi, nenda geka ningiraera.  
\v 6 O namonde mo, God da tofori. Mave God da natofo edo irera aimi, namondeda geka ningiraera. A mave God da tofo jo ae irera amo, ne namondeda geka jo ningae eraera. Aminguse iroro gido, mave geka beká da Asisi rurusira, a mave derari da asisi rurusira ava, namonde kasama arera.   
\s1 4:7-21 God Namonde Dubo Ruruse, Nunda Mandi Dirigetiri Namondekena Fusira.  
\p
\v 7 Nanda kokomana, namonde tofo tofo dubo baeteri. Ainda beká mo: dubo bari isambu God kena ghe foa gheraira. Numo, dubo bari isambu da susuri. Ava sedo, mave nunda komana dubo barira amo, nu God kasama edo, nunda mandi o gagara edo irira a gido, nunda komana dubo buraira.  
\v 8 O mave nunda komana jo dubo bae eraira amo, nu God jo kasama ae irira. Ainda beká mo: God nu dubo bari da susuri.  
\v 9 God nunda dubo bari kau mavega ava, namondekena eminge ijugusira. Nu, namonde nange nunda Mandi da javoda jebuga tuve baetera ava kotise, nunda Mandi dabako tainako ava dirigetiri endada fusira.  
\v 10 Dubo bari beká mo eviri: namonde numoá jo dubo bae irero, nu namonde dubo ruruse, namondeda ari ekoko kote doyari dae sedo, nunda Mandi dirigetiri fira, ari ekoko da mino futuse ambududurusira.   
\p
\v 11 Avori, nanda kokomana, God namonde dubo ruruse, amingusira. Ava sedo, namonde kau daba aminga ava use, tofo tofo dubo baeteri.  
\v 12 Evetu o genembo eni God nunda ditiimi jo gae irira. Avata namonde tofo tofo dubo ruruse irarera amo, God nu tofo mandi namondeda jokáda saramana ururari, nunda dubo bari baji mindafu beká ava arira.   
\p
\v 13 Namonde God de dabade tatedo irera ava, nange kasama areri? Amo, saone? Nu nunda Asisi mutiri rurusera ava, dubo jokái itatamuse kasama eraera, nu namonde dabade tatedo irera.  
\v 14 God Afa nunda Mandi, evetu genembo isambu sonembari jebugaoro dae sedo, dirigetiri endada fusira ava, namane totofo gido, ainda bino ava osa seraera.  
\v 15 Mave, “Iesu mo, nu God da Mandiri,” sarira amo, God nu anakora genembo ainghae tatedo, nunda dubo jokáda irarira.  
\v 16 Namonde God de dabade tatedo irera ava sedo, God namonde nange dubo buraira, ava kasama use tumonderaera. God nu dubo bari da susuri, aminge seteni. Ava sedo, mave dubo ruruse irarira amo, nu God ghae tatedo irari, God nunda dubo jokáda irarira.  
\v 17 Avori, God ururari, namondeda dubo joká, nunda dubo bariimi bedo beká ava arira. Nu amingarira da beká mo eviri. Nu uju erira, namonde Ategi da Sifo aminda, fakina edo jo oju ae aeteri. A namonde jo oju ae arera da beká mo: Keriso nu namonde dabade tatise, namonde dubo ruruse, nunda jebuga mutiri budo, endada irise, namonde kau numongo ava ari dae use irera.  
\v 18 Eregoseva? Mave ni dubo barira aindae, ni jo nundae oju ae aresa. O nundae oju aresa da beká mo, nunda dubo bari jo tumonde gogoghombae aresa. Nunda dubo bari tumonde gogoghombaetesa amo, ninda oju dadabaeti. Avori, God namonde dubo buraira. Nunda dubo bari tomanako itatamuse kotugo numoá minoda dubo ruruse, namonde nundae oju jo ae eraera. O oju arera amo, namonde susu eindae oju arera. Namonde nunda dubo bari jo tumonde gogoghombae irise, Ategi da Sifo aminda, nu namondekena fakarago ariá kotise oju arera.   
\p
\v 19 God nu giti namonde dubo rurusira, aindae sedo, namonde nu dubo buraera.  
\v 20 Mave, “Na God dubo ererurena,” sise, nunda namendi eni imboe arira amo, nu gungubo sarira. Ainda beká mo: namonde God jo ditiimi gae eraera. O namondeda nano namendi mo, ditiimi giraera. Ava sedo, namonde God kena dubo bari ijugari sarera amo, fakaragori. Ai resira amo: namonde numo sonembari da goroto eni tefori. O namonde nano namendikena dubo bari ijugari sarera amo, raugakori. Ava sedo, mave nunda namendi eni imboe arira amo, nu God barago imboe arira.  
\v 21 Keriso nu aindae sise, agho dari evia futusira. Mave nu God dubo bari sarira amo, nunda namendi barago dubo barira.   
\c 5  
\s1 5:1-5 Namonde God Da Mandi Iesu Ava Tumonduse, Fakina Arera.  
\p
\v 1 God Genembo dirigari furare dae sisira amo, Iesu ri. Geka ava, mave tumonderaira amo, nu God da mandi o gagara edo irira. A mave genembo eni ava dubo barira amo, nu genembo ainda sasingu barago dubo barira.  
\v 2 Avori, namonde God dubo ruruse, nunda Geka a Agho Dari kaifa arera amo, namonde kasama arera, namonde nunda sasingu barago dubo ruruse irarera.  
\v 3 Kotugo, namonde God dubo buraera ava, nange ijugururoro isagha ari gaeteri? Namonde emingaore! Namonde nu dubo ruruse, nunda Geka a Agho Dari kaifa use irarera. A nunda Agho Dari namondekena jo fakarago iraeri. Namonde ari da kaugori.  
\v 4 Ai resira amo: God da sasingu, ne irari eko enda eminda irira ainda fakina ava, nene de atai fati fetari sarera amo, inono arira. Ne Iesu Keriso tumonduse, amingarera.  
\v 5 Iesu nu God da Mandi ava, mave tumondarira amo, nu nusukako irari eko endada irira ainda fakina ava, de atai fati fetarikena barago, inono arira.   
\s1 5:6-12 Emboro God Afakena Amo, Iesu Numori. Emboro Eni Tefori.  
\p
\v 6 Iesu Keriso fusira, resena emo, nu uvu ororoghae fusira. Nunda tano uvu ororoghae aimi, ijugetiri namonde kasama erera: nu God da Mandiri. Nu jo uvu vanemboimi furaeri. Nu nange nange uvuimi bafataito usira, a nange nange nunda ororo avereguse ambududurusira ava gido, namonde kasama erera: nu God da Mandiri. Kotugo, Iesu mo, nu God da Mandi ava, God da Asisi barago namondekena ijugeraira. Ainda beká mo: geka beká da susu, amo God da Asisi numori.  
\v 7-8 Ava sedo, tano isambu etodaba naká aimi ijugeraira amo, Iesu nu God da Mandiri. Tano setena amo, God da Asisi, a uvu ororoghaeri. A nenda ijuga mo, jo nunda nunda iraeri, dabakori. Amo, Iesu nu God da Mandiri.  
\v 9 Avori, namonde evetu genembo da osa sari ava tumonderaera; ava sedo, namonde God da osa sari barago tumondaeteri. Ainda beká mo: God da geka fakinaghaeri. O evetu genembo da geka mo, jo amingo iraeri. Ava sedo, tano etodaba naká setena ava, God nune tofo mandi nunda Mandi Iesu dae ijugetiri isagha usira; ava sedo, tano rea ijugeraira ava, namonde tumondarera.  
\v 10 A mave God da Mandi tumondarira amo, nu nunda dubo jokáda evia itatamarira: tano rea ijugeraira amo, geka bekári. O mave God da osa sari evia jo tumondae arira amo, nu inono, God gungubo sariá sarira. Ainda tuka mo: God nu tofo mandi rea nunda Mandi dae sisira ava, gungubo sariá sise, nu jo tumondae eraira.  
\v 11 God nunda Mandidae rea sisira amo, eviri. God namondekena jebuga evovodae irari futusira da susu mo, nunda Mandiri.  
\v 12 God da Mandi, mave bu nunda dubo jokáda fitari nune kaifa ururari irarira amo, jebuga resena emo, nu anakora budo irira. O mave God da Mandi jo bae arira amo, nunda jebuga barago, jo bae arira.   
\s1 5:13-21 God da Sasingu, Nenda Irari Kau Emingori.  
\p
\v 13 Ne mave God da Mandiá tumonduse, nundae javono gateraeva, nemokena resena, ningivu! Ne aminge tumonduse, anakora jebuga evovodae irari torughe ruruseva ava itatamedo, kasama e gogoghombaovo dae sise eregefena.  
\v 14 Namonde God da dombuda fetedo, tumo faingharera. Ainda beká mo eviri: namonde kasama erera, namonde God da uju ava ari dae kotise, rejodae benunu sarera amo, nu ningarira.  
\v 15 Kotugo namonde sifo reda banungarera amo, nu anakora dengoro jave ningarira. Avori, namonde ava kasama use itatameraera: namonde rejodae benunu sarera amo, nu anakora mutari barera.   
\p
\v 16 Namonde ari ekoko mendeni mendeni use, jo ambae arera. Ninda namendi eni ari eko eni ururari garesa amo, ninda namendidae sise, God kena banungaso ningido, nunda jebuga ninda namendikena mutarira. Avata ari eko eni irira, ava use irarera amo, namonde sifo gombuda ambari ava torugharera. Ninda namendi, ari eko resena evia ururari garesa amo, jo nundae banungaso dae sae arena.  
\v 17 Ari ekoko isasambu mo, ekokori. Avata setena, daba ava sari dae erena. Ari ekoko isasambu eraera amo, namonde dara God da dombuda eraera. Avata ari ekoko mendeni mendeni use, jo ambae arera.   
\p
\v 18 Eregoseva: namonde kasama erera, God da sasingu ne jo ari ekoko use irae arera. Ainda beká mo: God da Mandi kaifa ururari, Satan jo foa ne dederururari ari ekoko use irae arera.   
\p
\v 19 A namonde kasama erera: evetu genembo a reighi isambu endada irera amo, Satan da sari ningariri. Avata kotugo, namonde kasama erera: namonde mo, God da tofori. Yari budo givu!   
\p
\v 20 A kotugo, namonde kasama erera: namonde God beká ava kasama aoro dae sedo, God da Mandi fira namondeda munju afigetiri dubo koteraera. A namonde oroko God de dabade tatedo irera amo, namonde nunda Mandi Iesu Keriso barago namonde tatedo irera. Amo jo bunae arera. Numo God beká, a nu jebuga evovodae irari da susuri. Yari budo givu!   
\p
\v 21 Nanda sasingu, ove kevari a gode mendeni mendeni gi darigedo ghevu! Erá tumonde baingheove dae resena. Yari budo givu!  
\p Avori, nanda geka tano eviri.