\id TIT  
\ide UTF8
\h TITUS 
\toc1 Leta Lal Paul Nu Sel Titua 
\toc2 Titua 
\toc3 Tit 
\mt2 Leta Lal Paul Nu Sel  
\mt1 TITUS  
\is1 Tukakinyen Leta Lal Paul Nu Sel TITUS  
\ip Titus el sie mwet fusr su tia mwet Jew. El forla ac ekla sie mwet Christian, na el tuh welul Paul ac kasrel ke orekma ac fufahsryesr lal. \bk Leta Lal Paul Nu Sel Titus\bk* inge tuh supweyuk nu sel ke el muta Crete, acn ma Paul el likilya we in kasru orekma lun church we. Oasr sripa yohk tolu in leta se inge. Ma se meet, Paul el akesmakinyal Titus ke ouiyen moul ma fal nu sin mwet kol lun church, mweyen el akilen lah moul lun mwet puspis in acn Crete tiana wo. Ma se toko uh pa kas in kasru nu sel Titus ke ouiyen luti lal nu sin kais sie u in church: nu sin mukul matu, nu sin mutan matu (su ac fah tafwela in luti nu sin mutan fusr), oayapa nu sin mukul fusr ac nu sin mwet kohs. Ma se safla uh pa kas in kasru ke ouiyen moul lun sie mwet Christian, yokna nu ke moul in misla ac kulang; ac elos in srike tuh in wangin srunga, akukuin ac srisri in inmasrlon mwet in church.  
\is1 Takla Lun Koanon Leta Se Inge  
\io1 Kas in tukakunla 1:1–4  
\io1 Mwet kol lun church 1:5–16  
\io1 Ma kunen kain in u ke church 2:1–15  
\io1 Kas in akku ac sensenkakin 3:1–11  
\io1 Kas in aksafye 3:12–15  
\c 1  
\p
\v 1 Ma sel Paul, mwet kulansap lun God ac mwet sap lun Jesus Christ.  
\p Nga suleyukla ac supweyukla in kasru lulalfongi lun mwet sulosolla lun God, ac kololos nuh ke ma pwaye su lutiyuk in alu lasr uh,  
\v 2 su oakwuki ke finsrak nu ke moul ma pahtpat. God, su koflana kikiap, El wulema nu sesr moul se inge meet liki na mutaweyen pacl uh,  
\v 3 ac ke pacl fal, El akkalemyela ke kas lal. Ma inge ituku nu sik, ac nga sulkakinelik fal nu ke sap lun God, Mwet Lango lasr.   
\p
\v 4 Nga sim nu sum, Titus, wen na pwaye nutik in lulalfongi su kut tukeni ipeis kac.  
\p Lungkulang ac misla nu sum sin God Papa, ac Christ Jesus, Mwet Lango lasr.\x - \xo 1:4 \xt 2 Cor 8:23; Gal 2:3; 2 Tim 4:10\x*   
\s1 Orekma Lal Titus In Acn Crete  
\p
\v 5 Nga tuh likikomi fin acn Crete tuh kom in ku in aksafyela ma su soenna suwosla, ac tuh kom in sulela mwet elder lun church ke kais sie siti. Esam mwe luti luk nu sum inge:  
\v 6 sie mwet elder enenu elan mwet wangin mwatal, elan mukul tumun mutan sefanna, tulik natul in mwet lulalfongi ac tia tulik sununta ac seakosten.\x - \xo 1:6 \xt 1:6–9; 1 Tim 3:2–7\x*  
\v 7 Ke sripen sie mwet kol lun church el liyaung orekma lun God, enenu in wangin mwatal, elan tia orek lumah ke ma kunal, tia mongsa, tia sie mwet nim mwe sruhi, tia sie mwet lungse anwuk, ku rapkui mani.  
\v 8 Enenu elan kulang nu sin mwet nukewa, ac lungse oru ma wo. Elan leum facl sifacna, suwohs in orekma lal, mutal, ac ku in sifacna kutong lungse lal.  
\v 9 Enenu elan sruokya ku kas su fal in lulalfongiyuk, ac luti in suwohs oana ma oakwuki tari. Fin ouinge, el ac ku in akkeye mwet ke mwe luti pwaye, ac oayapa aksuwosye tafongla lalos su lain mwe luti inge.   
\p
\v 10 Tuh oasr mwet puspis, yokna sin mwet Jew su forla ac weang mwet Christian, su utuk nunak ac kiapu mwet uh ke kaskas lusrongten lalos.  
\v 11 Enenu in sikulyuki sramsram lalos uh ke sripen elos akfohsye mwet in sou nufon se ke ma su tia fal in lutiyuk, ac elos oru ma inge in eis mani lalos kac.  
\v 12 Sie sin mwet palu lalos sifacna el fahk, “Mwet Crete uh elos kaskas kikiap pacl nukewa. Elos oana kosro lemnak inima uh, ac elos mwet alsrangesr ac kainmongo.”  
\v 13 Kas na pwaye se pa inge. Ouinge kom in arulana kaelos, tuh lulalfongi lalos in suwohs ac pwaye,  
\v 14 ac elos in tia sifil lohang nu ke sramsram lusrongten lun mwet Jew, ku nu ke ma sap ma oakiyuki sin mwet su forla liki ma pwaye.  
\v 15 Ma nukewa nasnas nu selos su inse nasnas; a wangin ma nasnas nu selos su fohkfok insialos ac elos selulalfongi, tuh akfohkfokyeyukla tari nunak lalos ac insialos.  
\v 16 Elos fahk mu elos etu God, a orekma lalos siena liki fahk lalos. Elos mwet srungayuk ac seakosten ac tia fal in oru kutena orekma wo.   
\c 2  
\s1 Kas In Luti Pwaye  
\p
\v 1 A kom in luti ma fal nu ke mwe luti pwaye.  
\v 2 Luti mukul matu tuh elos in asmak ac tia sruhi, elos in etu nunak ac sifacna karingin ouiyalos; elos in okak in lulalfongi, in lungse, ac in muteng.  
\v 3 Oayapa kom in luti mutan matu tuh moul lalos in mutal, fal nu ke mutan kulansap lun Leum. Elos in tia utukinmasrol ku mwel mwe sruhi, a elos in mwet luti ke ma wo,  
\v 4 tuh elos fah ku in luti mutan fusr in lungse mukul tumalos ac tulik natulos,  
\v 5 ac in sifacna liyaung ouiyen moul lalos in nasnas ac kulang, in karinganang wo lohm selos, ac in akos mukul tumalos, tuh in wangin kutena kas mwet uh ac ku in fahk in akkolukye kas lun God.   
\p
\v 6 In ouiya se pacna inge, kom in oayapa kwafe nu sin mukul fusr elos in sifacna liyaung ouiyen moul lalos.  
\v 7 Ouiyen moul lom in mwe srikasrak in ma nukewa, ac kom in oaru ac moniyuk in mwe luti lom.  
\v 8 Orekmakin kas suwohs ma ac tia ku in sufanyuk, tuh mwet lokoalok lom elos fah mwekin ac tia ku in fahk kas koluk kacsr.   
\p
\v 9 Mwet kohs elos in pusisel nu sin leum lalos ac akinsewowoyalos in ma nukewa. Elos in tia folkas nu selos,  
\v 10 ku pisre ma lalos. A elos in akkalemye lah elos mwet wo ac oaru in pacl nukewa, tuh elos in ku in nawela mwe luti ke God, Mwet Lango lasr, in ma nukewa elos oru.   
\p
\v 11 Tuh God El akkalemye tari lungkulang lal ke El ase molela nu sin mwet e nukewa.  
\v 12 Lungkulang lal luti kut in fahsr liki ma lungse lun faclu ac ouiyen moul ma pilesru God; ac tuh kut in karingin kut sifacna, ac moulkin moul suwohs ac mutal fin facl se inge  
\v 13 ke kut tupan Len insewowo se kut finsrak kac, ke wolana lun God Fulat lasr ac Jesus Christ Mwet Lango lasr fah sikme.  
\v 14 El sifacna eisalang kacsr tuh elan molikutla liki ma koluk nukewa, ac oru tuh kut in mwet nasnas su ma lal mukena, ac kena in oru ma wo.\x - \xo 2:14 \xt Psa 130:8; Exo 19:5; Dut 4:20; 7:6; 14:2; 1 Pet 2:9\x*   
\p
\v 15 Luti ma inge ac orekmakin ku lom nufon ke pacl kom akkeye ac kaelos su porongekom. Nik kom lela elos in pilesrekom.   
\c 3  
\s1 Ouiyen Moul Lun Mwet Christian  
\p
\v 1 Kom in akesmakinyalos tuh elos in pusisel nu sin mwet kol ac mwet wal fulat, in aksolos ac akola in oru ma wo in ouiya nukewa.  
\v 2 Fahk nu selos tuh elos in tia fahk kas koluk ke kutena mwet, a elos in misla, kulang ac fakpap nu sin mwet nukewa.  
\v 3 Meet kut tuh oayapa lalfon, seakos, ac tafongla. Kut tuh kulansupu lung lun ikwa ac kain in mwe akpwar puspis. Kut kwacna nunak koluk ac sok; mwet uh srungakut ac kut oayapa srungalos.  
\v 4 Tusruktu ke kulang ac lungse lun God Mwet Lango lasr akkalemyeyuk tari,  
\v 5 El loangekutla. Tia ke sripen kutena orekma wo su kut oru, a El molikutla ke sripen pakoten lal sifacna. El molikutla ke Ngun Mutal su oulkutla in ase isusla sasu ac moul sasu nu sesr.  
\v 6 Ke lungkulang yoklana lun God, El okoama Ngun Mutal nu facsr ke Jesus Christ Mwet Lango lasr,  
\v 7 tuh ke sripen lungkulang lal kut fah aksuwosyeyuk yurin God ac usrui moul ma pahtpat su kut finsrak kac.  
\v 8 Kas pwaye se pa inge.  
\p Nga lungse kom in akyokye fahk lom ke ma inge, tuh elos su lulalfongi ke God elos in ku in nunku kac ac sang pacl lalos in oru orekma wo, ma ac oasr sripa nu sin mwet nukewa.  
\v 9 A kom in sensenkin kom liki mwe siyuk lalfon, ac tak sou loeloes ke fwil meet ah, ku akukuin, ac alein ke Ma Sap. Ma inge nukewa pilasr ac wangin sripa.  
\v 10 Sang kas in kai pacl se ku luo nu sin mwet se su oru tuh in oasr sraclik inmasrlowos, na toko kom fah tia sifil aengani yorol.  
\v 11 Tuh kom etu lah mwet ouinge mwet koluk nunka, ac ma koluk lalos sifacna fahkak lah elos tafongla.   
\s1 Kas Safla Lal Paul Nu Sel Titus  
\p
\v 12 Ke pacl se nga ac supwalot Artemas ku Tychicus nu yurum uh, kom aksaye na tuku nu yuruk nu Nicopolis, mweyen nga wotela sik in muta we ke pacl in misrisr uh.\x - \xo 3:12 \xt Orek 20:4; Eph 6:21–22; Col 4:7–8; 2 Tim 4:12\x*  
\v 13 Sang kuiyom in kasrel Zenas, mwet orekma ke ma sap, ac Apollos, in akoelos nu ke fufahsryesr lalos, ac liye tuh ma nukewa elos enenu in oasr yorolos.\x - \xo 3:13 \xt Orek 18:24; 1 Cor 16:12\x*  
\v 14 Mwet lasr uh enenu in akpahyeyuk in sang pacl lalos in oru ma wo, ac in kasru ke ma eneneyuk na pwaye. Elos in tia sununtei moul lalos.   
\p
\v 15 Elos nukewa su muta yuruk inge paing kom. Sang lung lasr nu sin mwet kawuk lasr in lulalfongi.  
\p Lungkulang lun God in wi kowos nukewa.