\id LAM  
\ide UTF8
\h EOKSRA 
\toc1 Eoksra 
\toc2 Eoksra 
\toc3 Eok 
\mt1 EOKSRA  
\is1 Tukakinyen Book In EOKSRA  
\ip Book in \bk Eoksra\bk* el sifani kas ke on limekosr ma akkalemye eoksra lun mwet Jew ke musalla lun Jerusalem in yac 586 B. C. (meet liki Christ), oayapa ke ma koluk ma sikyak nu sin mwet uh tukun sisila acn we ac sruoh lun mwet we. Finne srumunyuk mu mwemelil pa yohk in book se inge, tusruktu oasr pac akkalemyeyen lulalfongi ke God, ac finsrak nu ke pacl fahsru uh. Kusen on inge orekmakinyuk sin mwet Jew ke pacl in alu ac lalo lalos ke yac nukewa, su akesmakinyalos ke musalla lun mutunfacl sac ke yac 586 B. C.  
\is1 Takla Lun Koanon Book Se Inge  
\io1 Asor ke acn Jerusalem 1:1–22  
\io1 Kalyeiyuk acn Jerusalem 2:1–22  
\io1 Mwe kalya ac mwe finsrak 3:1–66  
\io1 Musalla lun acn Jerusalem 4:1–22  
\io1 Sie pre in siyuk ke pakomuta 5:1–22  
\c 1  
\s1 Mwet Uh Asor Ke Acn Jerusalem  
\q1
\v 1 Pakomuta! Fuka mukela lun Jerusalem, su sie pacl ah sessesla ke mwet.  
\q2 Sie pacl ah akfulatyeyuk el sin faclu nufon, a inge el supwar oana sie katinmas.  
\q2 Meet el arulana fulat, a inge el putatyang nu in moul in mwet kohs.   
\b  
\q1
\v 2 El tung ke fong nufon, ac sroninmutal sorori ke likintupal.  
\q2 Inmasrlon mwet kawuk lal meet ah nufon, tiana sie lula in akwoyal.  
\q2 Mwet asruoki nu sel meet ah sisella, ac inge elos nukewa lainul.   
\b  
\q1
\v 3 Mwet Judah elos mwet kohs ke sripen lillilyak elos liki acn selos.  
\q2 Elos muta in facl saya, ac wangin acn elos in pangon acn selos sifacna.  
\q2 Mwet lokoalok lalos raunelosla, ac wangin innek in kaingla lalos.   
\b  
\q1
\v 4 Wanginla mwet tuku nu ke Tempul in pacl inge in tuh alu ke len mutal.  
\q2 Tulik mutan su tuh alullul we elos muta in keok, ac mwet tol elos sasao na.  
\q2 Mutunpot in siti uh oalallana, ac acn Zion oan in ongoiya lulap.   
\b  
\q1
\v 5 Mwet lokoalok lal elos kutangulla, ac el oan ye ku lalos.  
\q2 \nd LEUM GOD\nd* El oru elan keok ke sripen ma koluk puspis lal.  
\q2 Tulik natul uh sruoh ac utukla lukel.   
\b  
\q1
\v 6 Wolana lun Jerusalem wanginla,  
\q2 Mwet kol lalos elos oana deer ma munasla ke masrinsral,  
\q2 Su apkuran in wanginla ku la ke elos kaingkin mwet ma ukwalos uh.   
\b  
\q1
\v 7 Ke Jerusalem el musalla ac mukaimtalla in pacl inge, el esamak ma nukewa ma wo nu sel meet ah.  
\q2 Ke el putatyang nu inpoun mwet lokoalok lal, wangin sie acn ku in kasrel mweuni mwet lokoalok lal.  
\q2 Mwet kutangulla uh isrunul ke el ikori.   
\b  
\q1
\v 8 Wanginla sunakinyal; el koflufolla, ac sununteiyuk el.  
\q2 El sao ac wikin mutal ke mwekin.  
\q2 Jerusalem el aktaekyal sifacna ke ma koluk lulap lal.   
\b  
\q1
\v 9 Ma fohkfok lal arulana mohtotla, tusruktu wanginna nunkeyen ma ac sikyak uh sel.  
\q2 Ikori lal ah arulana koluk, ac wangin sie mwet ku in akwoyal.  
\q2 Mwet lokoalok lal elos kutangla, ac el wowoyak nu sin \nd LEUM GOD\nd* ac siyuk ke pakoten lal.   
\b  
\q1
\v 10 Mwet lokoalok lal elos pisrala ma saok lal nukewa.  
\q2 El sifacna liye ke elos utyak nu in Tempul,  
\q2 Yen \nd LEUM GOD\nd* El tia lela mwet pegan in utyak nu we.   
\b  
\q1
\v 11 Mwet lal elos sasao ke sukyen ma elos in kang;  
\q2 Elos sang ma saok lalos ayaol mwe mongo in sruokya moul lalos.  
\q2 Ac siti uh wowoyak ac fahk, “Liyeyu, \nd LEUM GOD\nd*. Liyeyu in keok luk.”   
\b  
\q1
\v 12 El pang nu selos nukewa su fufahsryesr yen el muta we, ac fahk, “Ngetma liyeyu!  
\q2 Wangin sie mwet nu pulakin waiok oana nga,  
\q2 Waiok su ma \nd LEUM GOD\nd* El use nu fuk in pacl in kasrkusrak lal.   
\b  
\q1
\v 13 “El supwama e lucng me, sie e su firirrir in nga.  
\q2 El filiya sie kwasrip nu sik ac sisyuwi nu infohk uh.  
\q2 Na El sisyula ac likiyuwi in mutana in waiok luk.   
\b  
\q1
\v 14 “El tuni ma koluk luk nukewa ac kapsreni nu sie;  
\q2 El sripisrya ke kwawuk, ac nga munasla ke toasriya uh.  
\q2 Leum El eisyuyang nu sin mwet lokoalok luk, ac wangin ma nga ku in oru in lainulos.   
\b  
\q1
\v 15 “Leum El isrun mwet mweun fokoko luk nukewa;  
\q2 El supwama sie un mwet mweun in tuh kunausla mwet fusr luk.  
\q2 El itungya mwet luk oana grape ke nien fut wain.   
\b  
\q1
\v 16 “Pa inge sripa se oru sroninmutuk kahkkakla uh.  
\q2 Wangin mwet ku in akwoyeyula; wangin mwet ku in akkeyeyu.  
\q2 Mwet lokoalok luk kutangyula; wangin kutena ma lula lun mwet luk.   
\b  
\q1
\v 17 “Nga asroela pouk, tuh wangin mwet in kasreyu.  
\q2 \nd LEUM GOD\nd* El pangon mwet lokoalok liki acn nukewa in lainyu.  
\q2 Elos oreyu oana sie ma na olafohkfok.   
\b  
\q1
\v 18 “Tusruktu suwohs ma \nd LEUM GOD\nd* El oru, mweyen nga tuh tia aksol.  
\q2 Porongeyu, kowos mwet yen nukewa; ngetma liyeyu in waiok luk.  
\q2 Mukul fusr ac mutan fusr luk elos utukla nu in sruoh.   
\b  
\q1
\v 19 “Nga pang nu sin mwet ma asruoki nu sik, tuh elos srunga kasreyu.  
\q2 Mwet tol ac mwet kol elos misa fin inkanek in siti uh  
\q2 Ke elos sukok mongo in sruokya moul lalos sifacna.   
\b  
\q1
\v 20 “O \nd LEUM GOD\nd*, ngetma liye keok lulap lun ngunik!  
\q2 Insiuk arulana musalla ke asroeyen ma koluk luk.  
\q2 Oasr akmas orek ke inkanek uh; finne in lohm uh oasr pac misa.   
\b  
\q1
\v 21 “Porongo sasao luk; wanginna mwet in akwoyeyu.  
\q2 Mwet lokoalok luk elos engan lah kom ase ongoiya nu sik.  
\q2 Tari supwama len se ma kom tuh wulema kac ah; oru mwet lokoalok luk in keok oapana nga.   
\b  
\q1
\v 22 “Sang mwatalos ke ma koluk lalos nukewa.  
\q2 Kalyaelos oana ke kom tuh kalyeiyu ke ma koluk luk.  
\q2 Nga sasao in keok luk, ac insiuk musallana.”   
\c 2  
\s1 Kaiyuk Lun Leum Nu Sin Jerusalem  
\q1
\v 1 In kasrkusrak lun Leum, El afinya Zion ke lohsr matoltol.  
\q2 El ekulla ma wo nukewa lun acn we nu ke ma na pilasr.  
\q2 Finne Tempul lal, El ngetla liki pac ke len in kasrkusrak lal.   
\b  
\q1
\v 2 Leum El kunausla siti srisrik nukewa in acn Judah, ac tiana pakomuta.  
\q2 El kunausya pot ku ma lisring acn we.  
\q2 El aklusrongtenye tokosrai sac ac mwet kol nukewa lun acn we.   
\b  
\q1
\v 3 In kasrkusrak lal El kunausya ku lun Israel;  
\q2 El tia lungse kasrekut ke mwet lokoalok elos tuku.  
\q2 El kasrkusrak lain kut oana sie e su esukak ma nukewa.   
\b  
\q1
\v 4 El aksuwosye mwe pisr natul nu kacsr oana mwet lokoalok se;  
\q2 El onelosla nukewa su kut tuh lungse ac insewowokin meet.  
\q2 Inge in acn Jerusalem kut arulana pulakin usren kasrkusrak lal.   
\b  
\q1
\v 5 Leum El kunausla Israel oana sie mwet lokoalok;  
\q2 El oru tuh pot ku ac inkul fulat sin tokosra in arulana mwesri.  
\q2 El use nu fin mwet Judah mwe asor su wangin saflaiya.   
\b  
\q1
\v 6 El fukulya Tempul su kut alu nu sel we nu ke ip srisrik.  
\q2 El tulokinya in wanginla len mutal ac len Sabbath.  
\q2 Tokosra ac mwet tol elos kewa pulakin kuiyen kasrkusrak lal.   
\b  
\q1
\v 7 Leum El ngetla liki loang in orek kisa lal, ac som liki Tempul mutal sel.  
\q2 El lela mwet lokoalok in ikruiya pot kac.  
\q2 Ke elos kutangla, elos sasa in acn ma kut tuh engan in alu we meet.   
\b  
\q1
\v 8  \nd LEUM GOD\nd* El otela mu pot Zion enenu na in ikori.  
\q2 El srikeya in kalem na pwaye lupan acn ma ac kunausyukla.  
\q2 Tower ac pot in kalkal uh tukeni na oan musalla.   
\b  
\q1
\v 9 Mutunpot kac pukpuki oan mokutkuti, ac osra kac uh kipatpat uh.  
\q2 Inge tokosra ac mwet leum uh kewa elos oasr in sruoh.  
\q2 Ma Sap uh tia sifil lutiyuk, ac wanginla aruruma lun mwet palu ma tuku sin \nd LEUM GOD\nd*.   
\b  
\q1
\v 10 Mwet matu lun Jerusalem elos muta infohk uh tia kas.  
\q2 Kutkut oan fin sifalos ac elos nukum nuknuk yohk eoa.  
\q2 Mutan fusr elos srimi nwe infohk uh.   
\b  
\q1
\v 11 Mutuk totola ke tung, ac insiuk keoklana.  
\q2 Nga foroti in asor luk ke mwet luk su kunausyukla.  
\q2 Tulik fusr ac tulik srisrik uh mulalla na oan fin inkanek in siti uh.   
\b  
\q1
\v 12 Elos tung nu sin nina kialos ke elos masrinsral ac malu;  
\q2 Elos ikor fin inkanek uh oana in fakfuki elos.  
\q2 Ac kuiyalos sriksrikeni nwe ke na elos misa inpoun nina kialos.   
\b  
\q1
\v 13 O Jerusalem, Jerusalem saok sik, mea nga ku in fahk?  
\q2 Nga ac akwoye kom fuka? Wangin mwet nu pulakin keok ouinge.  
\q2 Ongoiya nu sum inge yoklana, oana lupan meoa uh. Wanginna finsrak in sifil akwoyeyuk kom.   
\b  
\q1
\v 14 Wangin ma mwet palu lom tuh fahk nu sum sayen kikiap mukena.  
\q2 Kas in luti lalos nu sum kiapwekomla, mweyen elos tia fahkak ma koluk lom.  
\q2 Elos oru kom nunku mu kom tia enenu in auliyak.   
\b  
\q1
\v 15 Mwet ma fahsryak in siti uh ngetot liye kom ac srengak sum.  
\q2 Elos usruk sifalos ac isrun musalla lun Jerusalem, ac fahk,  
\q2 “Ku siti na kato sac pa inge? Ku pa inge wo se ma faclu yukin uh?”   
\b  
\q1
\v 16 Mwet lokoalok lom nukewa aksruksrukye kom ac sracsralik liye kom ke srunga lalos.  
\q2 Elos sralak ngoasrolos ac fahk, “Kut kunausulla!  
\q2 Pa inge len se kut muta soano ah!”   
\b  
\q1
\v 17  \nd LEUM GOD\nd* El tufahna orala ma se El tuh aksangengye kut fahk mu El ac oru ah;  
\q2 El kunauskutla ac wanginna pakomuta lal nu sesr, oana ke El tuh fahk nu sesr pacl loeloes somla ah.  
\q2 El sang kutangla nu sin mwet lokoalok lasr, ac akenganyalos ke kunausyukla kut uh.   
\b  
\q1
\v 18 O Jerusalem, lela pot ku lom in wowoyak nu sin Leum!  
\q2 Lela sroninmotom in sororla oana infacl ke len ac fong.  
\q2 Oru nwe ke na kom mwemelilla ke tung ac asor.   
\b  
\q1
\v 19 Lela kom in tukaki tukakyak ac pang nu sin Leum ke fong nufon se;  
\q2 Fahkak nufon ma oan in nunak lom an nu sel, ac kwafe sel Elan pakoten nu sin tulik nutum  
\q2 Su masrinsral ac apkuran in misa ke insruwasrik in inkanek nukewa!   
\b  
\q1
\v 20 Ngetma, O \nd LEUM GOD\nd*! Efu kom ku kalyei kut ange?  
\q2 Mutan elos kang monin tulik natulos su elos kuloi!  
\q2 Mwet tol ac mwet palu elos anwuki na in Tempul!   
\b  
\q1
\v 21 Mwet fusr ac mwet matu uh kewa misa oan inkanek uh.  
\q2 Mukul fusr ac mutan fusr anwuki ke cutlass nutin mwet lokoalok.  
\q2 Kom onelosi ac tiana pakomutalos ke len in kasrkusrak lom.   
\b  
\q1
\v 22 Kom solama mwet lokoalok luk in tuh akpwaryalos ke mwe aksangeng rauniyula,  
\q2 Ac wangin mwet ku in kaingla ke len in kasrkusrak se lom uh.  
\q2 Elos akmuseya tulik nutik su nga tufahla ac kuloi.   
\c 3  
\s1 Kalyeiyuk, Auliyak, Ac Finsrak  
\q1
\v 1 Nga pa sie su pula tari kalyeiyuk sin God.   
\q2
\v 2 El pwenyu ac sap nga in som nu yen lohsr matoltol.   
\q2
\v 3 El sringilyu na sringilyu ke sringsring na upa.   
\b  
\q1
\v 4 El kanteya monuk ac kinet keik oan mangelik, ac el koteya sri keik.   
\q2
\v 5 El kuhlusyuyak ke mwe keok ac fosrnga lulap.   
\q2
\v 6 El patokyula in muta in acn na lohsrlosr ac foulin ma misa oan we.   
\b  
\q1
\v 7 El kapriyuwi ke sein; nga sie mwet kapir su wangin finsrak la in kaingla.   
\q2
\v 8 Nga wowoyak nu lucng in suk kasru, tusruktu God El tia lungse porongeyu.   
\q2
\v 9 Nga tukulkul ke nga fahsr, ac pot eot uh kosreyula yen nukewa nga for nu we.   
\b  
\q1
\v 10 El kasrikiyu oana soko bear; el sroma nu fuk oana soko lion.   
\q2
\v 11 El ukweyuyak liki inkanek uh, seseya monuk nu ke ip srisrik, na El som likiyu.   
\q2
\v 12 El amakinya mwe pisr natul ah, ac oru tuh in nga pa El akola in pisrik uh.   
\b  
\q1
\v 13 El pusrukma sukan pisr natul, na liksreni tilyang nu in monuk.   
\q2
\v 14 Mwet uh isrunyu len nufon se; nga mwe tafunkas nu selos nukewa.   
\q2
\v 15 Mwe keok upa mukena pa El ase tuh in mwe mongo nak ac ma nimuk.   
\b  
\q1
\v 16 El ilya mutuk infohk uh, ac kotalik wihsik fin eot uh.   
\q2
\v 17 Nga tila esam lah mea kalmen misla ku engan uh.   
\q2
\v 18 Tiana loes pacl lula ke moul luk; wanginla finsrak luk in \nd LEUM GOD\nd*.   
\b  
\q1
\v 19 Nunak luk ke waiok luk ac ke wangin acn in muta luk uh, oana sie pwasin na mwen.   
\q2
\v 20 Nga tia tui in nunku kac, ac ngunik toasrlana.   
\q2
\v 21 Tusruktu finsrak luk sifilpa foloko ke nga esamak ma se inge:   
\q1
\v 22 Lungse kawil ac pakoten lun \nd LEUM GOD\nd* uh tiana wanginla;   
\q2
\v 23 Aksasuyeyuk ke lotutang nukewa, ac arulana oaru oana takak lun faht uh ke len nukewa.   
\q2
\v 24  \nd LEUM GOD\nd* mukena pa oasr yuruk uh; ke ma inge El na pa mwe finsrak luk.   
\b  
\q1
\v 25  \nd LEUM GOD\nd* El wo nu sin mwet nukewa su lulalfongi in El.   
\q2
\v 26 Ke ma inge, wo tuh kut in mongfisrasr in tupan molela lal —   
\q2
\v 27 Oayapa wo kut in akpahye kut in mongfisrasr ke pacl kut fusr uh.   
\b  
\q1
\v 28 In pacl kut keok uh, kut enenu in mukena muta misla ac muteng.   
\q2
\v 29 Kut enenu in pasrla nwe ten ac eiskutyang nu sel, tuh sahp srakna oasr finsrak.   
\q2
\v 30 Finne puopo ac akkolukyeyuk kut, enenu kut in mislana.   
\b  
\q1
\v 31 Leum El pakoten ac El fah tia siskutlana nwe tok.   
\q2
\v 32 Sahp El ac akasorye kut, tusruktu lungse lal nu sesr pwayena ac ku na.   
\q2
\v 33 El tia insewowo in oru kut in asor ku waiok.   
\b  
\q1
\v 34 Leum El etu pacl ngunasr akkeokyeyuk in presin uh;   
\q2
\v 35 El etu ke pacl ma mwet uh tia ase suwohs lasr ma El oakiya nu sesr.   
\q2
\v 36 Ke pacl ma nununku suwohs uh tia orek, El etu.   
\b  
\q1
\v 37 Ma lungse lun Leum mukena pa orek pacl nukewa.   
\q2
\v 38 Ma wo ac ma koluk kewana ac orekla fal nu ke sap lal.   
\q2
\v 39 Efu ku kut in torkaskas ke kalyeiyuk kut ke ma koluk lasr?   
\b  
\q1
\v 40 Lela kut in tuni ouiyen orekma lasr ac folokla nu yurin \nd LEUM GOD\nd*.   
\q2
\v 41 Lela kut in ikasla insiasr nu sin God inkusrao, ac pre ac fahk,   
\q2
\v 42 “Kut orekma koluk ac lain kom, O \nd LEUM GOD\nd*, ac kom tiana nunak munas nu sesr.   
\b  
\q1
\v 43 “Kom ukwe kut ac unikuti; kasrkusrak lom tuh kosrala pakoten lom,   
\q2
\v 44 Ke sie pukunyeng su arulana matoltol, oru pre lasr tia ku in sasla nu yurum.   
\q2
\v 45 Kom orekut oana acn in sisi kutkut lun faclu.   
\b  
\q1
\v 46 “Angonyuk kut ac aksruksrukiyuk kut sin mwet lokoalok lasr nukewa.   
\q2
\v 47 Ma lasr nukewa kunausyukla ac sikiyukla; kut muta in sensen ac sangeng.   
\q2
\v 48 Sroninmutuk soror oana soko infacl ke sripen kunausyukla mwet luk.   
\b  
\q1
\v 49 “Sroninmutuk ac fah kahkkakla ac tia tui   
\q2
\v 50 Nwe ke \nd LEUM GOD\nd* El ngeti inkusrao me ac liye kut.   
\q2
\v 51 Insiuk arulana asor ke nga liye ma sikyak nu sin mutan in siti uh.   
\b  
\q1
\v 52 “Srifusryuki nga oana sie won sin mwet lokoalok, su wanginna sripa lalos in srungayu.   
\q2
\v 53 Nga moul na ac elos sisyuyang nu in luf se, ac kaliya mutun luf uh ke sie eot lulap.   
\q2
\v 54 Kof uh mutawauk in afinyula, ac nga nunku mu misa apkuranme.   
\b  
\q1
\v 55 “Nga wowoyak nu sum, O \nd LEUM GOD\nd*, liki kapin luf sac me,   
\q2
\v 56 Ac ke nga kwafe sum in lohng tung luk, kom porongeyu.   
\q2
\v 57 Kom topukyu ac fahk nu sik nga in tia sangeng.   
\b  
\q1
\v 58 “O Leum, kom tuku in loangeyu, ac kom molela moul luk.   
\q2
\v 59 Oru nununku lom an in wo nu sik; kom etu ma sufal ma orek lainyu inge.   
\q2
\v 60 Kom etu luman srunga lun mwet lokoalok luk nu sik, ac pwapa koluk elos oru in lainyu.   
\b  
\q1
\v 61 “Kom lohng ke elos fahk kas in purakak lainyu, O \nd LEUM GOD\nd*; kom etu pwapa koluk nukewa lalos.   
\q2
\v 62 Elos kaskas keik ac oru akoo koluk lalos len nufon.   
\q2
\v 63 Elos isrunyu ke lotutang lac nwe ke fongeni.   
\b  
\q1
\v 64 “O \nd LEUM GOD\nd*, kalyaelos ke ma elos oru inge.   
\q2
\v 65 Oru sie selnga na upa nu faclos, ac oru nunkalos in arulana fosrngala.   
\q2
\v 66 Sokolosyak ac sukelosla liki fin faclu.”   
\c 4  
\s1 Tukun Kunausyukla Acn Jerusalem  
\q1
\v 1 Gold saromrom lasr arulana ohkla;  
\q2 Eot ke Tempul oalik na inkanek uh.   
\b  
\q1
\v 2 Mukul fusr lun Zion elos tuh saok sesr oana gold,  
\q2 A inge pilesreyuk elos oana tup ma orek ke fohk kle.   
\b  
\q1
\v 3 Finne kientop in wolf soko el ac katitii ma fusr natul,  
\q2 Tusruktu mwet luk elos sulallal nu sin ma fusr natulos, oana won ostrich uh.\x - \xo 4:3 \xt Job 39:13–17\x*   
\b  
\q1
\v 4 Elos fuhlela tulik fusr natulos in misa ke masrinsral ac malu;  
\q2 Tulik uh ngusr mwe mongo, a wangin mwet ac sang nu selos.\x - \xo 4:4 \xt Eok 2:11–12\x*   
\b  
\q1
\v 5 Mwet ma kang mwe mongo na yuyu meet elos misa fin inkanek uh ke masrinsral;  
\q2 Elos su tohfla in kasrup la elos iluhsya pus uh in sukok mwe mongo.   
\b  
\q1
\v 6 Mwet luk elos kalyeiyuk upa liki na mwet ma tuh muta Sodom,  
\q2 Su sun ongoiya ke God El tuh kunausla acn we ke kitin pacl na srisrik.\x - \xo 4:6 \xt Gen 19:24\x*   
\b  
\q1
\v 7 Fisrak natusr elos tuh tiana akfohkfokyeyukla, ac elos nasnas oana snow;  
\q2 Wasri ac ku, saromrom finsroalos ke kuiyen manolos.   
\b  
\q1
\v 8 Inge elos misa oan ke inkanek uh, tia akilenyuk elos ke sripen sroalsroalla mutalos.  
\q2 Kolo kaclos pulamlamla oana sak, ac arosrosak oan fin sri kaclos.   
\b  
\q1
\v 9 Wo nu selos su anwuki ke mweun liki elos su misa tok,  
\q2 Su wangin mwe mongo in sruokya moul lalos, pwanang elso misa ke masrinsral.   
\b  
\q1
\v 10 Ongoiya se ma sun mwet luk inge oru sie mwe aksangeng na lulap;  
\q2 Nina ma saokkin tulik natulos, elos poeleak tulik natulos sifacna mwe mongo.\x - \xo 4:10 \xt Dut 28:57; Ezk 5:10\x*   
\b  
\q1
\v 11  \nd LEUM GOD\nd* El okoama nufon fulen kasrkusrak lal;  
\q2 El akosak sie e in Zion su esukak acn we nwe ke mwesri oan infohk uh.   
\b  
\q1
\v 12 Wangin sie mwet in kutena acn, finne mwet leum lun mutunfacl saya,  
\q2 Tuh lulalfongi mu oasr mwet mweun ku in utyak ke mutunpot lun Jerusalem.   
\b  
\q1
\v 13 Tusruktu ma inge sikyak, mweyen mwet palu we elos orekma koluk, ac mwet tol uh oasr mwatalos  
\q2 Ke elos pwanang misa lun mwet wangin mwata.   
\b  
\q1
\v 14 Mwet kol lun acn we elos foroht forma inkanek uh oana mwet kun.  
\q2 Elos arulana srahfon, oru wangin mwet lungse pusralulos.   
\b  
\q1
\v 15 Mwet ah wowoyak ac fahk, “Tiok! Komtal fohkfok! Nimet pusralyu!”  
\q2 Ouinge elos takusrkusr som liki mutunfacl nu ke mutunfacl, a wangin mwet lohang nu selos.   
\b  
\q1
\v 16 Wanginla nunak lun \nd LEUM GOD\nd* kaclos; El sifacna luseloselik.  
\q2 Wangin nunak lal ke mwet tol ac mwet kol lasr.   
\b  
\q1
\v 17 Kut sukok kasru nwe wanginla ku lasr in sifilpa suk, a wanginna kasru tuku nu sesr.  
\q2 Kut tupanna mu mutunfacl se ac tuku kasrekut, a tiana tuku.   
\b  
\q1
\v 18 Mwet lokoalok lasr elos tawi kut; kut tiana ku in forfor innek uh.  
\q2 Len lasr uh safla; pacl safla lasr uh tuku tari.   
\b  
\q1
\v 19 Elos ukwekuti, mui liki ke eagle uh ac pwesrouli nu facsr lucng me uh.  
\q2 Elos lol acn kut fahsr we fin inging uh, ac kasriki kut ac sruokkuti in acn mwesis.   
\b  
\q1
\v 20 Elos sruokya kuiyen moul lasr, aok tokosra su \nd LEUM GOD\nd* El sulela;  
\q2 El su kut tuh lulalfongi mu ac langoekut liki kutena mwet ma ac utyak in mweuni kut uh.   
\b  
\q1
\v 21 Mwet Edom ac mwet Uz, kowos in israsr na; engan ke srak oasr pacl in engan lowos uh.  
\q2 Pacl in ongoiya lowos ac fah tuku pac; kowos ac fah koflufolla ac tukulkulwot tukulkulme ke mwekin.   
\b  
\q1
\v 22 Zion el eis tari molin ma koluk lal; \nd LEUM GOD\nd* El ac tia filikuti in sruoh nwe tok.  
\q2 Tusruktu mwet Edom, \nd LEUM GOD\nd* El ac fah kai kowos; El ac fah akkalemyela orekma koluk lowos.   
\c 5  
\s1 Sie Pre In Siyuk Ke Pakomuta  
\q1
\v 1 O \nd LEUM GOD\nd*, esam ma sikyak nu sesr.  
\q2 Liye kut, ac liye lupan mwekinla lasr.   
\b  
\q1
\v 2 Acn sesr uh oan inpoun mwet saya;  
\q2 Ac mwetsac elos muta in lohm sesr.   
\b  
\q1
\v 3 Papa tumasr elos anwuki sin mwet lokoalok,  
\q2 Ac inge nina kiasr elos katinmas.   
\b  
\q1
\v 4 Kut enenu in moli kof nimasr;  
\q2 Ac kut moli pac etong nu ke enenu lasr.   
\b  
\q1
\v 5 Kumakinyuk kut upa, oana donkey ku camel;  
\q2 Kut totola, a tia lela nu sesr in mongla.   
\b  
\q1
\v 6 Kut ngusr mongo sin Egypt ac Assyria,  
\q2 In suk moul lasr.   
\b  
\q1
\v 7 Mwet matu lasr elos tuh orekma koluk, tusruktu inge elos wanginla,  
\q2 Ac akkeokyeyuk kut ke ma koluk lalos.   
\b  
\q1
\v 8 Mwet ma oana mwet foko uh elos leumi kut,  
\q2 Ac wangin mwet ku in molikutla liki ku lalos.   
\b  
\q1
\v 9 Mwet akmas oalik yen nukewa;  
\q2 Kut pilesrala sensen lasr ke kut ac suk mongo nasr.   
\b  
\q1
\v 10 Masrinsral lasr oru manosr folla ke fever,  
\q2 Nwe ke na kulun manosr fol oana funyu se.   
\b  
\q1
\v 11 Sruinkuiyuk mutan kiasr Fineol Zion sifacna,  
\q2 Oayapa mutan fusr natusr in siti srisrik nukewa in acn Judah.   
\b  
\q1
\v 12 Mwet kol lasr utukla ac loksakeyuki;  
\q2 Ac mwet matu lasr tiana akfulatyeyuk.   
\b  
\q1
\v 13 Mukul fusr lasr akkohsyeyuk in ilil wheat,  
\q2 Ac tulik srisrik natusr sringelik ye kahp in etong uh.   
\b  
\q1
\v 14 Mwet matu elos tila muta ke mutunpot in siti uh,  
\q2 Ac mwet fusr elos tila orek on.   
\b  
\q1
\v 15 Wanginla engan ke moul lasr;  
\q2 Pacl in tacn lasr uh ekla pacl in asor.   
\b  
\q1
\v 16 Wangin ma lula ke ma nukewa kut yukin meet ah.  
\q2 Kut orekma koluk, ac inge kut muta in ongoiya lulap.   
\b  
\q1
\v 17 Kut maskunak nunak lun insiasr  
\q2 Ac tia ku in liye wo ke sroninmutasr,   
\b  
\q1
\v 18 Mweyen Eol Zion el mukelana oan ac wanginla mwet we,  
\q2 Ac kosro jackal lemnak uh tiltil fin mahnum in acn we.   
\b  
\q1
\v 19 Tusruktu kom, O \nd LEUM GOD\nd*, kom tokosra ma pahtpat,  
\q2 Ac kom fah leumi nwe ke saflaiyen pacl uh.   
\b  
\q1
\v 20 Efu ku kom siskutla arulana pahtlac?  
\q2 Ya kom ac tiana sifilpa esam kut?   
\b  
\q1
\v 21 Folokinkutwot nu yurum, \nd LEUM GOD\nd*! Folokinkutwot!  
\q2 Folokonak wolana lasr meet ah.   
\b  
\q1
\v 22 Ku fuka, kom siskutla na nwe tok?  
\q2 Ya wanginna saflaiyen kasrkusrak lom uh?