\id 2TI - Tabo (Fly River dialect) NT - Papua New Guinea 2006 (DBL 2014) \h 2 Tim \toc3 2 Tim \toc1 Polote Naba 2 Leta Timotitamo Osiyodiliya \toc2 2 Timoti \mt2 POLOTE NABA 2 LETA \mt1 TIMOTITAMO \mt2 OSIYODILIYA \c 1 \p \v 1 Na ebe Polotela, Ya꞉su Kelisote ebeno sosi wagilima꞉ iyaiya opamo daliboliya, ebe wokopi magumulo na idila. Iyo, Godote ebeno ubilo na elaweniya, nale ebeno woko eba osiyodilonalo tabo ma kunu ka꞉kiyawaonakoma꞉, Ya꞉su Kelisoko magumulo ditana ebete ebe igilo ebe waloma꞉tapiatamo gito kikalaema꞉ nanitabonomolo egiya. \p \v 2 O Timoti, a꞉ma꞉ nale kawonomamo demalagidilotanama ebe gudunomolata, ebema꞉ nale me leta a꞉ma꞉tamo palibomo. Modobola Nabiwi Godoko ega꞉walo aimano Kawodawa Ya꞉su Kelisoko iba꞉te ibino nilakapo tanalo, ega꞉walo lumagitamo kuba wiya ikamea꞉ tanalo, ega꞉walo milo tanalo a꞉ma꞉tamo nikaema꞉ta. \s1 Polote Timotiko Mabuma꞉ Godotamo Kalakala Tabo Dawokalimiya \p \v 3 Nanitabola, nale naimano tepo magumuno mulo wokino tanalamo Godotamo woko nosiyodilonamo, naimano Yu epo ewoni epetapiate ebetamo nanitabo woko dopamo keba kunu kosiyodilonami eba kunu. Ebema꞉ idoko ega꞉walo egela bilibilinomo epetapilo naimano towetowe tabo ge magumulo nale a꞉ma꞉ eba malagidilolo a꞉imano tanaloma꞉ kalakala tabo ebetamo kiyawaolo a꞉ma꞉ ebo adipatenakomata. \v 4 Iyo, ebe osiyodilo tanalodo nale a꞉imano ii tanalo ka꞉dodomatina꞉, ebema꞉ na ubi kawonomamo niyatinamo a꞉ma꞉ walo ka꞉kumitama꞉, mabu na iyatawala nale ebe tetelo naimano tepo magumulo kawonomomamo kekalakalamamo. \s1 Polote Timotiko Daniya Ebete Woko Wadenomamo Kosiyodilonama꞉ \p \v 5 Ega꞉walo nale atumu a꞉imano nanitabokobi midi tanalo wadeno ka꞉dodomatina꞉. Nanitabola, kebe nanitabokobi midi tanalote dopamo a꞉imano aida Lowisigodolo ditanami, ebe atu tanalote a꞉imano menoko Yunisigodolo walo na꞉kitanami, ebema꞉ kalakala kawonomola, na iyatawala me tetelo ebe atu nanitabokobi midi tanalote a꞉ma꞉godolo nanitabolo ba꞉kitana. \v 6 Ebe mabuma꞉ nale a꞉ma꞉ walo nakanamata, a꞉ma꞉ sosi woko wagilimia꞉no dopamo nale a꞉ma꞉tamo koto dowatiliyamo, ebe tetelo a꞉ma꞉le Godokono woko kosiyodilawenama꞉ ebete nilakapolo a꞉ma꞉tamo kebe iyanomo elawo kikametiyala, modobola a꞉ma꞉ ebe elawamo ebeno woko nosiyodilonakiye. Iyo, lumagite ela mena da꞉pesamo kawo ela keba kunu kemadonakole, eba kunu modobola a꞉ma꞉ Godokono woko eba osiyodilonalo ebeno elawote a꞉ma꞉ magumulo kawonomoma꞉ neda꞉mene. \v 7 Numa꞉, ale Godokono woko osiyodilonama꞉ ebete atamo tole tanalo kikaeamiya꞉. Ao, ebete wiyasiya ebeno elawo atamo ikaeamete, ebene ebeno nilakapo kimalagidilo tanalo atumu atamo kikaeamete, ebene ebete wade woki atamo atumu akoikaeamiya ale kateneno ubi tanalamo tudila꞉okapoma꞉. \p \v 8 Ebema꞉ a꞉ma꞉ Kawodawa Ya꞉sukono tanalo awokalima꞉ ilipokobi ako-olowiala꞉, ega꞉walo nale ebe mabuma꞉ gabamanino idoko motolo dokolinamo ebe tanaloma꞉ atumu ilipokobi ako-olowiala꞉. Iyo, na keba kunula꞉ka꞉, modobola a꞉ma꞉ eba kunu ebeno Wade Tabo kiyawaoma꞉ temeteme epetapi nanitabokobi midia꞉piagodone kalakalago nuwatenakiye, ebene Godote a꞉ma꞉tamo elawo kikaema꞉ta ebe temeteme magumulo kodakodalo kuta꞉wenama꞉. \s1 Ya꞉sukono Wade Tabo Kiyawao Woko Osiyodilo Tanalo \p \v 9 Ebema꞉ numa꞉, a nanitabokobi midipiate Godokono talenapima꞉ keda꞉onama꞉ ebete aimano igilo mula꞉leamete ebeno nilakapo magumudo a ebo ka꞉miya, aimano wadewade osiyodilole tanalodoa꞉. Iyo, me opo wagilimia꞉no ebete dopamo ebeno ubilo me nilakapo tanalo Ya꞉su Kelisodo atamo ikaeamiya. \v 10 Ebe mabuma꞉ aimano Igilo Mula꞉dawa Ya꞉su Kelisote me opamo da꞉piya, ebete ebe nilakapo tanalo atamo nanitabolo apawokalimiya, iyo, ale ebeno Wade Tabo olowio tanalodo me tanalo iyatawaiyama꞉, ebete a꞉e tanalono elawo anakapumite uwomua꞉ igilo atamo ebo adaiya. \p \v 11 Ebene Godote na ebo laweniya, nale ebeno alibolepi dubu magumulo idima꞉ keda꞉nama꞉, mabu ebe ubila nale Ya꞉sukono Wade Tabono iyaiya tanalo bilibilinomo eba niyatulamelo epatamo ka꞉na꞉kiyawaonakoma꞉. \v 12 Me mabuma꞉ na epetapiagodone temeteme uwatenakomo, wiyasiya numa꞉, nagodolo ilipo tanalo kitana꞉ mabu nale poko nanitabokobi ka꞉midinamo ebe Kawodawano elawo na iyatawala. Ebema꞉ nanitabola, ebete na wade wokodawama꞉ gelo natamo dikanamiya, ebe Wade Tabo kiyawao woko ebete Uwomu Egela teta꞉mo wadenomamo eba buyaminanatolo idawate a꞉ka꞉kubaiminakomene. \v 13 Ebema꞉ Timoti, a꞉ma꞉le Ya꞉su Kelisoko magumulo eba okolinalo, ebete a꞉ma꞉tamo dikametanaka, modobola a꞉ma꞉ ebe nanitabokobi midi tanalo ega꞉walo nilakapo kimalagidilo tanalo nowatila꞉mota꞉na, ega꞉walo a꞉ma꞉le nagodone kebe iyaiya mulo iyatulame tanalo kolowiawiyala, modobola a꞉ma꞉ ebe tanalo atumu kodakodalo uwata꞉wete nowaloma꞉taliye, mabu ebe iyatulame tanalate epatamo wade okoli tanalono uli ebe awokalimina. \v 14 Ega꞉walo me tanalo idila. Godote a꞉ma꞉ wade wokodawama꞉ gelo Wade Tabo kiyawao woko a꞉ma꞉tamo dikametiyala, modobola a꞉ma꞉ ebeno Uliyanano elawamo ebe woko wadenomamo na꞉buiyateniye. Kalakala kawonomola, ebe Wade-talena Dawate a nanitabokobi midipi magumulo bokolina! \s1 Polote Onisipolasikono Walubi Tanaloma꞉ Tabo Da꞉kiyawaiya \p \v 15 Naimano gudu, a꞉ma꞉ iyatawalata, Paigelasiko ega꞉walo Emogenesiko iba꞉te na atepanete, ebene A꞉isiya opo kawonomolo dilukuliona ebe epo bilibilinomate nagodone atumu a꞉kolobila꞉iya. \v 16 Wiyasiya Onisipolasikono tanalo eba kunua꞉, mabu nale gabamanino idoko motolo dokolinamo ebete ebe tanaloma꞉ ilipoa꞉no iyaiya tete epetapilo na gito walubininaki, ebema꞉ modobola Kawodawa Ya꞉sute ebe ega꞉walo ebeno moto epo iba꞉tamo ebeno nilakapo tanalo nawokalimene. \v 17 Numa꞉, ebete Loma kawo duliyomolamo da꞉pemaigi ebe atu egelalo na kowalubinima꞉ na wadininapete idoko motolo ebo punami, \v 18 ebema꞉ Kawodawate ebeno Uwomu Egelalo epono tanalo danagilamelelaemene, epo epetapiate ibino kuba wiya ebegodone eba uwatelo, modobola Onisipolasite wiyasiya ebegodone nilakapo tanalo kapiya nelaemene! A꞉ma꞉ iyatawanomolata, na Epesese kawo duliyomololo egela epetapilo da꞉pokolimo ebete kebako wade osiyodilole tanalodo na kowalubininakile. \c 2 \s1 Ya꞉suko Mabuma꞉ Wade Gowelaodawama꞉ Eda꞉ Tanalo \p \v 1 Ebema꞉ naimano gudu Timoti, modobola a꞉ma꞉ Ya꞉su Kelisogodone da꞉pena ebe nilakapo magumulo kodakodalo uta꞉wete elawonomoma꞉ neda꞉na. \v 2 Ega꞉walo piyate nanitabokobi midi magumulo woki netewa꞉noma꞉ eda꞉olo woko nanitabolo dosiyodilona, modobola a꞉ma꞉ ebako dubu kapiyakapiya uwata꞉wete ibi wadenomamo niyatulamenakiye, iyo, dopamo a꞉ma꞉ eba olowiolo nale epo bilibilinomono ololo apulo kebe iyaiya tanalo ka꞉kiyawaonakimo ebe atu tanalamo ibi nowalubiliye. Numa꞉, a꞉ma꞉le nani wokopi epetapi eba kunu diyatulama꞉emene, walone iba꞉te ebe atu tanalo epo epetapi wadenomamo ka꞉niyatulaema꞉na꞉. \p \v 3 Ega꞉walo me tanalo idila, a꞉ma꞉ Ya꞉su Kelisoko mabuma꞉ Saitanago gowelaodawama꞉ eba eda꞉nalo nanitabokobi midipi epetapiagodone iyaiya temeteme duwata꞉wenaka, modobola a꞉ma꞉ elawoa꞉noma꞉ akoeda꞉la꞉. \v 4 Numa꞉, wade gowelao dubute ebeno watodawa kapiya kalakalaima꞉ ubi eba iyatilo, ebe a꞉ka꞉tuwa꞉ ebeno iyaiya ubi tanalo kosiyodilolenakoa꞉. Ma kunu ebete gowelao tanalo kapiya malagidiloma꞉ eba kalakalalo, ebete ubia꞉noma꞉ eda꞉na kamiyale ega꞉walo gudi ega꞉walo gowelao tanalo osiyodilolea꞉pino iyaiya ilukuli tanalate ebe matuomeoma꞉, mabu ebe iyatawala gowelao magumulo ebe tanalate ebe elawoa꞉kobi ka꞉midima꞉na꞉. \v 5 Ega꞉walo bolamo kalakaladawate atumu taneba idino wato kikopu laema꞉ ubi eba iyatilo, ebete bolamo kalakala tanalono totomu tabamo tuduwatalo ebe a꞉ka꞉tuwa꞉ ebeno iyaiya ubi tanalo kosiyodilolenakoa꞉, mabu ebe iyatawala ebete eba kunu wagelea꞉no taneba idipiate wato kikopu ebegodone gito kelaema꞉na꞉. \v 6 Ega꞉walo pali osiyodilodawate ebeno woko elawonomamo kosiyodilomene, mabu ebe iyatawala epate nani tabo ma kunu gelana, ebeno pali inamabuate demaimioma꞉na꞉ ebe dopo lumagima꞉ keda꞉mene pali inamabu magumulo ebeno apu kuwatema꞉. \v 7 Ebema꞉ naimano gudu, nale da꞉kiyawautamo modobola a꞉ma꞉ ebe tabono magumu wadenomamo nemalagidila, mabu Godote wadewade woki a꞉ma꞉tamo kikaema꞉ta a꞉ma꞉le naimano iyaiya tabono magumu tanalo bilibilinomo wadenomamo kemalagidilola꞉ema꞉. \p \v 8 Ega꞉walo modobola a꞉ma꞉ Ya꞉su Kelisokono tanalo wadenomamo nemalagidila, ma kunu ebe Kawo Elawodubu Da꞉ibidikono walonepi magumulo awokalate, ebene ebete da꞉iya Godote ebe igilamo walo akadipatiya. Nanitabola, nale ebeno Wade Tabo eba kiyawaolo me kawokawo tanalo dawokalilamenakomo, \v 9 ebe mabuma꞉ nanitabokobi midia꞉piate kawokawo temeteme natamo ikanamenaka. Iyo, me tetelo na idoko motolo eba okolinalo iba꞉te naimano koto auli ala꞉mo ematuolamolenamiya, gabamaniate kawo kubanomo osiyodilodawano koto keba kunu kematuolamolemenake eba kunu. Wiyasiya kalakala kawonomola, mabu Godokono nani wokopiate da꞉kiyawaonaka ebe tabote elawonomoma꞉ eba eda꞉nalo lumagi idite ebe tabo kiyawao tanalo matuomeoma꞉ modoboa꞉! \v 10 Ebema꞉ nale iyaiya temeteme epetapi kalakalago uwatenakomo, mabu Godote kebe epo ebeno gudima꞉ keda꞉onama꞉ dopamo deka꞉la꞉mioliya, na ubila ebe epate Ya꞉su Kelisodo igilo mula꞉ tanalo nago lawete uwomua꞉ uwomua꞉ tetelo ale ebeno amama tanalo magumulo kapimiya bilukulinama꞉. \p \v 11 Ebema꞉ numa꞉, oale osiyodilodawa idite aimano igilo mula꞉ tanalo eba malagidilolo nani tabonomo ma kunu akuloliya, \b \q1 “Mabu ale Ya꞉suago a꞉elaiyama꞉, \q2 ale eba꞉go Unu Duliyomololo ba꞉nilukulinama꞉, \q1 \v 12 ebene temeteme magumulo ale elawoa꞉noma꞉ eda꞉oa꞉no, \q2 walone eba꞉go kawokawo elawodubuma꞉ keda꞉omalema꞉, \q1 wiyasiya ale temeteme magumulo \q2 ebe iyatawa꞉noma꞉ degelama꞉, \q2 ebe mabuma꞉ ebete atumu a iyatawa꞉noma꞉ kegemene. \b \q1 \v 13 Wiyasiya kalakala beda꞉ kawonomola꞉ka꞉, \q1 mabu kebe tetelo ale ebe nanitabolo waloma꞉ta꞉no, \q2 ebe tetelo ebete Nanidawanomoma꞉ eba eda꞉nalo \q2 a gito a꞉ka꞉miyapaemene, \q1 iyo, ebete a kowalubima꞉ dopamo nanitabolo degiya, \q2 ebete ebe tabo iyabaiamo iyatima꞉ modoboa꞉!” \s1 Godokono Wokodawate Ebe Keba Kunu Na꞉kekalakalaimene \p \v 14 Ebema꞉ Timoti, modobola a꞉ma꞉ me iyaiya tanaloma꞉ sosi epo walo eba ka꞉kiyawaolamelo, Godokono ololo apulo ibi kawiya ma kunu nanaliye, iba꞉te iyaiya iyatulame tabono magumuma꞉ akoapaminateua꞉la꞉. Nanitabola, ebako osiyodilo tanalo magumulo wade tanalote a꞉kemaigamene mabu apaminateui tanalote olowiopi ka꞉kubailaemene. \p \v 15 Ebene a꞉ma꞉le a꞉imano woko magumulo Godoko kekalakalaima꞉ema꞉, modobola a꞉imano ape kawonomo ebetamo ikamenomo nikamiye, mabu kebe wokodawate Godokono nani tabo epo epetapi wadenomamo diyatulamenako ebe lumagite ilipo tanalo a꞉kiyatawamene. \v 16 Ebema꞉ piyate Godotamo tudila꞉o ubia꞉noma꞉ deda꞉ona ibino tabo gela magumamo ako-opegala꞉, mabu ibino daedale iyatulame tanalate kebe epo kuba gabamo kowabuga꞉talenale, iba꞉te ebako olowiopi Godogodone mulunomamo kemagatalema꞉na꞉, \v 17 iyo, ibino kuba iyatumi tanalote gabugabu kani kawonomote lumagino ape magumamo keba kunu ka꞉tonakole eba kunula. \p Nanitabola, Aimaneyasiko ega꞉walo Pailitasiko ibi netewapi eba kunula. \v 18 Iba꞉te Godokono nanitabo iyatumi tanalo eba atepalo a꞉da꞉ tabo ma kunu gelana, piyate nanitabokobi midi magumulo da꞉elaiya Godote ibi igilamo iyalo owadipalateliya, ebene ebete a nanitabokobi midipi epetapi igilamo a꞉kowadipaeatemene! Eiye, iba꞉te me kuba iyatumi tanalamo epetapino nanitabokobi midi tanalo iyabaiamo iyalekelamenaka! \v 19 Wiyasiya kalakala kawonomola, tete bilibilinomolo Godokono Motono nanitabo kodakoda alote ba꞉ena, ebe alo unamo ebete me tabo iyalo akuloliya, “Piyate Godokono epoma꞉ deda꞉ona, ebete ibino tanalo iyatawanomola,” ebene alono apuamo ebete tabo walo ma kunu kakuloliya, “Piyate ibi a꞉ka꞉tuwa꞉ Godokono epoma꞉ degelana, modobola iba꞉te kuba osiyodilole tanalone nanitabolo nolobila꞉oma꞉na꞉.” \p \v 20 Ebema꞉ numa꞉, inamabu bilibilidawano kawo motolo iyaiya kalili ega꞉walo meleki ma kunu ba꞉pola꞉na, epetapi golodo ega꞉walo siliba inamabuamo osiyodilole kawokawonomo wiya inamabula, ega꞉walo epetapi kewamo ega꞉walo gebetamo osiyodilole opodopo wiya inamabula, ebene ebete ebe iyaiya kalili ega꞉walo meleki magumulo epetapi uwatete ibi unamo ebeno bae alomonako, wiyasiya ebete epetapi kuwatete ebamo sosowa gito iyalekenako. \v 21 Me tabo ebe ulila, ma kunu Godoko ebe inamabu bilibilidawa keba kunula꞉ka꞉ eba kunula, ega꞉walo epo ebeno motolo da꞉pola꞉na ebe iyaiya kalili ega꞉walo meleki keba kunula꞉ka꞉ eba kunula. Ebe mabuma꞉ modobola lumagite kuba osiyodilole tanalo bilibilinomo miyapate ebeno watodawa Godokono woko kapiya kosiyodilonama꞉ ebe a꞉ka꞉tuwa꞉ ebe wadekobi namida꞉mene, mabu Godote ebe lumagino tepo magumu wadenomamo itanalo duimimene, ebete ebe lawete iyaiya wadewade tanalo bilibilinomo ebedo ebo kosiyodilolemene. \p \v 22 Ebema꞉ naimano gudu, oli ape epate ibino kateneno kuba ubi gabodo kebe iyaiya tanalo kosiyodilolenake, a꞉ma꞉ ebe tanalo kuba nibote maigama꞉ gelo ebe osiyodilole magumune nalaula꞉nakiye. Modobola a꞉ma꞉ wiyasiya tuputupu okoli tanalo ega꞉walo nanitabokobi midi tanalo, nilakapo kimalagidilo tanalo ega꞉walo milo tanalo, ebe tanalo uwatema꞉ ubi kawonomamo niyatinakiye. Nanitabola, piyate ibino tepo magumulo daleya woki malagidiloa꞉no Kawodawa Godote ibi kowalubilima꞉ ebe da꞉toweomenaka, iba꞉te ibino ubi tanalo a꞉ma꞉go kapimiya eba kunu alomonaka. \v 23 Wiyasiya epetapiate ibino daedale wokilo iyaiya iyatulame tabono tanaloma꞉ dapaminateuinaka, a꞉ma꞉ ibino tabo gela tanalamo ako-opegala꞉, mabu a꞉ma꞉ iyatawalata, ebako tabo gela tanalone iyaiya anagiyamida tanalate epo magumulo maimionaka. \p \v 24 Numa꞉, a꞉ma꞉ Kawodawa Godokono wokodawalata, ebema꞉ modobola a꞉ma꞉ epo epetapiago apaminateuia꞉no ibi bilibilinomatamo nilakapo tanalo eba awokaliminalo ibino wade iyatulamedawama꞉ nediye, iyo, a꞉ma꞉ lumagi idi ubia꞉noma꞉ samamo akoeda꞉la꞉. \v 25 Ega꞉walo a꞉ma꞉ Godokono woko eba osiyodilolo piyate a꞉ma꞉ odiyoboma꞉ dowagelema꞉na꞉, modobola a꞉ma꞉ iba꞉tamo ibino kuba osiyodilole tanalo milo gabodo nawokalilamiye. Diyala, Godote a꞉ma꞉do iba꞉tamo wade woki da꞉bikalaemene, ebema꞉ iba꞉te kuba osiyodilole magumune olobila꞉ote ebeno nanitabo tanalo diyatawaoma꞉na꞉, \v 26 ebe tetelo iba꞉te wadewade woki eba uwatelo Saitanakono gubi magumune iyabaiamo gito kilapatela꞉oma꞉na꞉. Nanitabola, iba꞉te ebeno kuba ubi tanalamo tudila꞉oma꞉ ebe Kubadawate ibi ebeno gubi magumamo iyalo alomi, ebema꞉ modobola a꞉ma꞉ ibi nowalubiliye. \c 3 \s1 Me Opono Uwomu Tetelo Kuba Osiyodilole Tanalono Maimio Tanalo \p \v 1 Ebema꞉ modobola a꞉ma꞉ me tanalo niyatawa, me opono uwomu tetelo iyaiya kodakoda tanalo bilibilinomate ka꞉pemaimioma꞉na꞉. \v 2 Ebe tetelo epo epetapi bilibilinomate ibi a꞉ka꞉tuwa꞉ ibi eba malagidilolenalo mani uwatema꞉ ubi kawonomamo balomonakoma꞉na꞉, ega꞉walo iba꞉te amama magumulo epo epetapi epoa꞉ma꞉ gelalo ibi bemalogolenakoma꞉na꞉, ega꞉walo iba꞉te ibino menokobila nabila iba꞉tamo tudila꞉oa꞉no kalakala tanalo iba꞉tamo akawokaliminakoma꞉na꞉, iyo, iba꞉te atumu Godoko tolemea꞉pima꞉ beda꞉onama꞉na꞉. \v 3 Ebene iba꞉te nilakapoa꞉pima꞉ eba eda꞉olo, piyate iba꞉tamo kuba dopamo dosiyodiloliya iba꞉te ebe epatamo wiya ikalaema꞉ ubi kawonomamo biyatinakoma꞉na꞉, ega꞉walo iba꞉te tuputupupi epetapino tanaloma꞉ a꞉da꞉ elemasigi tabo gito begelanakoma꞉na꞉. Ebene iba꞉te ibino kateneno kuba ubi tanalo kapiyatamo tudila꞉olo epo epetapi ibino elawo gowela tanalamo eba kubailamelo, iba꞉te wiyasiya wade tanalo kapiya idi osiyodiloma꞉ ubia꞉noma꞉ beda꞉onakoma꞉na꞉. \v 4 Ebene iba꞉te kebe epo ibino namutupima꞉ unu gabodo kegelane iba꞉tamo diya gabodo iyaiya kuba tanalo bosiyodilolenakoma꞉na꞉, ega꞉walo iba꞉te woki wadenomamo uwatea꞉no ibino kuba ubi tanalo kosiyodilolema꞉ gawagawalo ba꞉tolamenakoma꞉na꞉, iyo, iba꞉te amama tanalo kawonomo magumulo Godoko kalakalakobi midima꞉ ubia꞉nola wiyasiya ibi a꞉ka꞉tuwa꞉ ibi kapiya kalakalakobi midilima꞉ bowagelenakoma꞉na꞉. \v 5 Ebene iba꞉te unu gabodo ibi a꞉ka꞉tuwa꞉ ibi Godoko waloma꞉tapima꞉ eba gelalo wiyasiya ibino tepo magumulo nanitabo tanalote a꞉kitanamene, iyo, ibino ubi tanalate kalawikalawilo eba pola꞉lamenalo Godokono nanitabo elawo dologala inamabuma꞉ midite laema꞉ ubia꞉nola. \p Nanitabola, walone ebako kuba osiyodilolepi bilibilinomate kemaimioma꞉na꞉, ebema꞉ me tetelo a꞉ma꞉ ebako epago akokapiyala꞉. \v 6 Ibi magumulo dubu epetapiate ibino motonomo miyapate epetapino motolo eba nilukulinalo daedale woki buwelemele ega꞉walo kamiyale ibino kuba ubi gabodo ebo magatalenaka. Ebema꞉ numa꞉, ebe kamiyala꞉te ibino kuba osiyodilole mabuma꞉ tepo magumulo mibomiboma꞉ eba eda꞉olo, wiyasiya ibino kateneno iyaiya kuba ubi tanalate a꞉ka꞉tuwa꞉ maimionaka, ebema꞉ iba꞉te nanitabokobi midi magumulo woki netewama꞉ eda꞉olo ebako kuba dubuno tabamo gito tudila꞉onaka. \v 7 Nanitabola, ebe kamiyale niyaniyala, mabu iba꞉te Godokono nanitabo tanalo laema꞉ gabo eba wadilo ibino kateneno ubi tanalate ibi gito odiyobolenaka, iyo, ebe mabuma꞉ iba꞉te uwomua꞉ tetelo nanitabolo a꞉kiyatawaonakoma꞉na꞉. \p \v 8-9 Ebema꞉ dopamo tetelo Godote Mosesedo ebeno nanitabo tanalo eba awokalimilo piyate ebe odiyoboma꞉ dowageliya, modobola a꞉ma꞉ ebe dubu netewa Ya꞉nesiko ega꞉walo Ya꞉mbalasiko ibino tanalo nemalagidila. Numa꞉, ibino kuba osiyodilo mabuma꞉ epo bilibilinomono ololo apulo ilipo tanalote iba꞉tamo gito maigiya, ebema꞉ me tetelo piyate nanitabokobi midipi kamiyale da꞉kubailamenaka ebe a꞉da꞉ tabo iyatulamepiate atumu kawo ilipo kelaema꞉na꞉, mabu ibino kalawikalawi wokino tanalodo iba꞉te nanitabokobi midi magumune iyalo a꞉na꞉gudiya. Nanitabola, iba꞉te Godokono tanalo odiyoboma꞉ eba wagelenalo wiyasiya ebe odiyoboma꞉ a꞉ka꞉modoboma꞉na꞉, mabu ibino osiyodilole magumulo epo bilibilinomate tatalila ibino daedale wokino tanalo nanitabolo kuima꞉na꞉. \s1 Nanitabokobi Midipino Temeteme Uwate Tanalo \p \v 10-11 Ebema꞉ Timoti, a꞉ma꞉ iyatawanomolata naimano iyatumi tanalo ega꞉walo osiyodilole tanalo ega꞉walo woko osiyodilo tanalono kawonomo magumu. Iyo, a꞉ma꞉ naimano okoli tanalo nanitabolo uminakiyata, ma kunu nale nanitabokobi midi magumulo epo nilakapolo eba malagidilolenalo lumagi idi samamo ubia꞉noma꞉ keda꞉nakia꞉, ega꞉walo epetapiate natamo iyaiya temeteme dikanamenakiya, ebe tanalo magumulo ega꞉walo iyaiya mibomibo epetapi magumulo nale kodakodalo eba utinalo elawoa꞉noma꞉ keda꞉nakia꞉. Nanitabola, A꞉ntiyoka duliyomololo ega꞉walo Aikoniyama duliyomololo ega꞉walo Lista duliyomololo nanitabokobi midia꞉piate kawokawo temeteme natamo dikanamonenakiya, ebe tetelo ebe temeteme bilibilinomo magumulo Godote naimano igilo a꞉mula꞉naki. \p \v 12 Ebema꞉ nanitabola, piyate Ya꞉su Kelisoko magumulo eba ilukulinalo Godoko kapiyatamo tudila꞉oma꞉ dowagelena, ibi bilibilinomate epetapiagodone temeteme buwatenakoma꞉na꞉. \v 13 Ega꞉walo a꞉da꞉ tabo iyatulamepi, iyo, kuba epetapi osiyodilolepi atumu, ibi bilibilinomono tanalo ma kunula. Ibi magumulo epetapiate epetapi a꞉da꞉ eba masigililo kuba gabamo ebo bemagatalenakoma꞉na꞉, ebema꞉ piyate me tetelo egege kuba dosiyodilolenaka, walone iba꞉te kawokawo kuba tanalo kapiya osiyodilole eba wagilamelo kubanomoma꞉ ebo keda꞉oma꞉na꞉. \s1 Godokono Bukano Tabote Nanitabokobi Midipi Keba Kunu Kowalubilinakole \p \v 14 Naimano gudu, a꞉ma꞉ wiyasiya Godokono tabono iyaiya tanalo dopamo uwata꞉wete nanitaboma꞉ da꞉midila꞉wiyala, modobola a꞉ma꞉ ebe iyatumi magumulo woki netewama꞉ eda꞉no nepata꞉na. Numa꞉, piyate a꞉ma꞉ dopamo diyatumitanakiya a꞉ma꞉le ebe nanitabokobi midipino tanalo iyatawalata, \v 15 ebene gudu da꞉peso tetene wagilimite me teta꞉mo pemaiga a꞉ma꞉le Godokono Talena Buka apuapuno tabo iyatawanapiyata. Ebema꞉ nanitabola, ebe Buka tabono tanalate wade mulo woki a꞉ma꞉tamo eba ikamelo, a꞉ma꞉le Ya꞉su Kelisoko nanitabokobi midi magumudo a꞉imano igilo mula꞉ tanalo ebo kelaema꞉ta. \v 16 Iyo, Godokono Buka tabono tanalo bilibilinomate ebeno Uliyanano elawamo apawokalaiya me opo epo kowalubilinama꞉, ma kunu ebeno Buka tabono tanalate tete epetapilo ebeno nanitabo tanalo epatamo awokaliminaka, tete epetapilo a꞉da꞉ tabo iyatumi tanalo odiyobonaka, tete epetapilo epono kuba osiyodilole magumune ibi oba꞉midalenaka, ega꞉walo tete epetapilo ibi tuputupu ilukuli tanalo iyatulamenaka. \v 17 Ebema꞉ nanitabola, Godokono Bukano iyaiya tabono tanalone ebeno wokodawate elawo lawete wadedawa ega꞉walo mulo wokodawa idima꞉ beda꞉namene, mabu ebete ebe gabodo elawo nanitabolo kelaemene wadewade tanalo bilibilinomo kosiyodilolema꞉. \c 4 \s1 Polote Timotiko Walo Da꞉ka꞉totomutiya Ebete Woko Wadenomamo Kosiyodilonama꞉ \p \v 1 Ebema꞉ naimano gudu, numa꞉, Ya꞉su Kelisote ebeno Kawo Elawodawano gobebobo laema꞉ na꞉pe, iyo, ebete da꞉pemaigamene ebe tetelo piyate dopamo da꞉elaiya ega꞉walo piyate igilolo dilukuliona, ebete ebe epo bilibilinomono tanalo kapanagilamelelaemene. Ebe mabuma꞉ nale ebe ega꞉walo Godoko ibi netewapino ololo apulo a꞉ma꞉ anamata, \v 2 a꞉ma꞉le Godokono tabo epatamo ka꞉kiyawawenakoma꞉, iyo, ibino ubi tetelo ega꞉walo ubia꞉ tetelo modobola a꞉ma꞉ kodakodalo uta꞉wete ebeno iyaiya tabono tanalo ibi niyatulamenakiye. Ebene olowiopi magumulo a꞉ma꞉le lumagi idi samamo ubia꞉noma꞉ eda꞉no, piyate kuba dosiyodilolena, a꞉ma꞉le ibi wade tabamo eba walubililo tolea꞉no ibino kuba awokalilama꞉wete ibi kawiya nanalenakiye iba꞉te kuba osiyodilole magumune kolobila꞉oma꞉. \v 3 Mabu tete na꞉pe, epate Ya꞉sukono iyaiya mulo iyatulame tanalo olowioma꞉ ubia꞉noma꞉ keda꞉oma꞉na꞉, wiyasiya iba꞉te ubi kawonomo biyatinama꞉na꞉ piyate ibino kateneno osiyodilole tanalo modoboma꞉ degelanaka ebako iyatulamepi kapiyatamo gawagawalo ka꞉tolaema꞉na꞉ ibino tabo ka꞉nolowioma꞉. \p \v 4 Numa꞉, ebe olowiopiate Godokono nanitabo tanalone eba olobila꞉olo iyaiya opo epono ewonino a꞉da꞉ elemasigi oi tanalo waloma꞉tale ebo ka꞉nowagilima꞉na꞉. \v 5 Ebema꞉ naimano gudu, a꞉ma꞉ woki netewama꞉ eda꞉no woko osiyodilo tanalono temeteme magumulo kodakodalo eba utinalo, modobola a꞉ma꞉ nanitabokobi midia꞉piatamo Godokono Wade Tabo natanakiye, ega꞉walo Godote kebe iyaiya woko epetapi a꞉ma꞉tamo kikameotanaka ebe tanalo bilibilinomo atumu wadenomamo nopoliyalenakiye. \s1 Polote Ebeno A꞉e Tanalo Tatalima꞉ Eda꞉ Tanalo Dawokalimiya \p \v 6 Numa꞉, naimano tanalo ma kunula. Tete a꞉pe Godote ebe a꞉ka꞉tuwa꞉ ebe eba watidilolo ebete naimano igilo da꞉pelawenaemene na ebo ka꞉emamo, iyo, tatalila na me opo katepamamo. \v 7 Nanitabola, nale naimano nanitabokobi midi tanalo eba atila꞉nalo Saitanago gowelanapete wato kikopu a꞉pelaemo, iyo, nale elawoa꞉noma꞉ eda꞉no uwomuamo a꞉pemaigamo, sukulu gudino kalakala egelalo idawate elawamo keba kunu ka꞉puliganakole eba kunu. \v 8 Ebema꞉ tete tatalila Kawodawa Ya꞉sute natamo wade wiya kikanaemene, sukulu watodawate gudi magumulo elawodawanomotamo wade wiya keba kunu kikamenakole eba kunu. Iyo, tuputupu okoli tanalono wade wiyate na mabuma꞉ bitana, wiyasiya na kapiyate a꞉kelaemo, mabu Ya꞉sute epono tanalo tuputupulo danagilamelelaemene, ebe Kawo Egelalo piyate ebe nilakapo kimalagidilo tanalago ebeno pe tete demakopelena, ebete ibi bilibilinomatamo kapimiya ebe wadewade wiya atumu ka꞉ka꞉pikalamolemene. \s1 Timotite Samamo Ka꞉pema꞉ Polote Ebe Daniya \p \v 9 O naimano gudu, a꞉ma꞉le natamo samamo pema꞉ gabo nanitabolo nowadiye, \v 10 mabu Dimasite me opono iyaiya kalakala tanalo kawonomamo demalagidilolenati ebete na atepanete Tesalonaika duliyomolamo gito ti, ebene Godokono woko ka꞉nosiyodiloma꞉ Kelesenete nagodone Galesiya opamo eba nemaigalo, naimano namutudawa idi Taitasite atumu Da꞉lamesiya opamo gito ka꞉ti. \v 11-12 Ega꞉walo numa꞉, naimano walubidawa idi Tikikasiko nale Epesese duliyomolamo dopamo alibimo, wiyasiya me tetelo Lukuko kapiyate nagodolo bokolina, ebema꞉ na ubila a꞉ma꞉ Makako lawa꞉wete ebe natamo nemagaiye mabu woko osiyodilo magumulo ebete naimano wade walubidawama꞉ eda꞉na. \p \v 13 Ega꞉walo me tanalo idila. A꞉imano pe tetelo nale Talowase duliyomololo Kapasigodolo datepimo, modobola a꞉ma꞉ naimano ape enaenakobi midino ga꞉ga꞉ kaliku ega꞉walo naimano iyaiya buka mokopiole uwata꞉wete ebo nowadaiye, ebe buka magumulo naimano ubi kawonomo bitana sipi-goeogoeono tamamo osiyodilole buka kuwatema꞉. \p \v 14-15 Ega꞉walo a꞉ma꞉ me dubu idino tanalo wadenomamo numa꞉ ebete a꞉ma꞉tamo kuba osiyodilokapoma꞉, ebe A꞉lesandatela, auli inamabu osiyodilole wokodawala! Ebete a nanitabokobi midipino iyatulame woko kodiyoboma꞉ gowela tanalo eba osiyodilolelo natamo kawokawo temeteme ebo ikanamenaki, ebema꞉ Kawodawa Godote ebeno kuba osiyodilole mabuma꞉ ebetamo wiya nanitabolo kikaemene! \p \v 16-17 Nanitabola, Loma gabamaniate naimano tanalo danagiyamidanamiya, ebe tete naimano dopo tetela ibino ololo apuamo da꞉nemaigimo. Numa꞉, ebe tetelo nanitabokobi midipi epetapi bilibilinomate tolekobi olowiote na gito atepaniya, ebema꞉ na a꞉ka꞉tuwa꞉ eba utitalo naimano kuba osiyodiloa꞉ tanalo tabo anagiyamidadawatamo ebo awokalimo. Wiyasiya kalakala kawonomola, mabu gabamanino ololo apulo Kawodawa Ya꞉sute nago eba utitalo elawo natamo ikanami, nale Yua꞉ epo epetapi bilibilinomatamo ebeno Wade Tabo kiyawaonomo ka꞉kiyawaoma꞉, ega꞉walo atu tetelo ebete naimano igilo eba mula꞉namelo tabo anagiyamidadawate a꞉e wiya natamo kikanamea꞉. Numa꞉, piyate na datepaniya, na ubia꞉nola Godote ibino tole tanaloma꞉ kuba wiya iba꞉tamo ikalaema꞉, \v 18 mabu na me tanalo iyatawala, Kawodawano ubilo ebete kuba osiyodilolepi bilibilinomono koto magumune naimano igilo walo ka꞉mula꞉namete, ebeno Kawo Elawodawano elawote kebolo kitanale ebete na ebe Unu Duliyomolamo olalatia꞉no kemagatanemene. Modobola uwomua꞉ uwomua꞉ tetelo amama tanalote ebegodolo nitanamene! Me tabo nanitabola, taula! \s1 Polote Leta Uwomu Apulo Iyaiya Nilakapo Tabo Da꞉kiyawaiya \p \v 19 Ebema꞉ modobola a꞉ma꞉le Pilisilako ega꞉walo Akuilako ega꞉walo Onisipolasikono moto epo ibi bilibilinomatamo naimano nilakapo tabo na꞉kiyawaiye. \v 20 Numa꞉, nale Loma duliyomolamo da꞉pimo, gabo tetelo Elastasite Kolini duliyomololo polowagilite, ebene naimano walubidawa idi Topimasiko gabugabute da꞉pelawi, ebema꞉ nale ebe Mailitase duliyomololo gito kapatepimo. \v 21 O naimano gudu, na ubi kawonomola, giba tete pea꞉no a꞉ma꞉le natamo pema꞉ gabo nowadiye! \p Malo dilukulina Yubulasiko, Pudenisiko, Lainasiko, Kolodiyako, ega꞉walo nanitabokobi midipi ekaki epetapi, ibi bilibilinomate ibino nilakapo tabo a꞉ma꞉tamo paliba. \p \v 22 Modobola Kawodawa Ya꞉sute a꞉imano tepo magumulo nokolinamene, ega꞉walo ebeno nilakapo tanalote a꞉ma꞉ ega꞉walo a꞉ma꞉go daladabutinaka la꞉ bilibilinomagodolo nitanamene. Me ebe naimano tabo uwomula. Taula.