\id 2TH - Tabo (Fly River dialect) NT - Papua New Guinea 2006 (DBL 2014) \h 2 Tes \toc3 2 Tes \toc1 Polote Naba 2 Leta Tesalonaika Sosi Epatamo Osiyodiliya \toc2 2 Tesalonaika \mt2 POLOTE NABA 2 LETA \mt1 TESALONAIKA SOSI EPATAMO \mt2 OSIYODILIYA \c 1 \p \v 1 Na ebe Polote Sailasiko ega꞉walo Timotiko, ale la꞉ Tesalonaika sosi epatamo me leta paliboma꞉. Nanitabola, la꞉ nanitabokobi midipiate aimano Nabiwi Godoko ega꞉walo Kawodawa Ya꞉su Kelisoko magumulo bilukulinamata. \v 2 Modobola Nabiwi Godoko ega꞉walo Kawodawa Ya꞉su Kelisoko iba꞉te ibino nilakapo tanalo ega꞉walo milo tanalo la꞉tamo nikalaema꞉ta. \s1 Godote Kuba Osiyodilolepiatamo Wiya Ikalame Tanalo \p \v 3 Aimano nanitabokobi midipi ekakiala꞉, modobola tete bilibilinomolo ale la꞉ mabuma꞉ Godotamo kalakala tabo bowadipalatelenakoma꞉. Iyo, ale eba kunu kowagelenama꞉ me ebe wade tanalola, mabu la꞉imano nanitabokobi midi tanalote eba apepeonalo, la꞉ magumulo epetapiate epetapi nilakapolo demalagidilola꞉wenama ebe tanalote atumu kawoma꞉ neda꞉na. \v 4 Ebe mabuma꞉ ale Godokono sosi epo epetapiatamo da꞉nemaimionakoma꞉, ibi magumulo la꞉ eba walogolelo la꞉imano wadewade osiyodilole tanaloma꞉ gelanakoma꞉. Iyo, nanitabokobi midia꞉piate la꞉tamo kawokawo temeteme dikalametana la꞉ wiyasiya ebe mibomibo magumulo Godoko nanitabokobi midi mabuma꞉ kodakodalo delamota꞉wenama, ale ebe tanaloma꞉ nanitabokobi midipi epetapi kawonomamo ebema꞉ analenakoma꞉. \p \v 5 Nanitabola, la꞉le temeteme uwate tetelo kodakodalo delamota꞉wenama, ebe tanalote me tanalo awokalimina, Godote me opo epono kuba osiyodilole tanalo danagilamelelaemene ebete ebe tanalo tuputupunomolo ma kunu kosiyodilomene, ebete la꞉imano temeteme uwate mabuma꞉ la꞉ ebeno wadewade ga꞉limapi gudima꞉ eba ka꞉la꞉milo, modobo tabo ebo kegemene la꞉le ebeno Kawo Elawodawano duliyomolamo ka꞉nopila꞉oaema꞉. \v 6 Iyo, Godoko ebe iyaiya tuputupu tanalo kapiya osiyodiloledawala, ebema꞉ piyate me tetelo temeteme la꞉tamo dikalametana ebete iba꞉tamo kuba wiya kikalaemene, \v 7 wiyasiya ebete la꞉godone ega꞉walo agodone aimano temeteme tanalo bilibilinomo iyabaiamo eba alomolo a kapimiya gelebadikobi ebo ka꞉midimene. \p Nanitabola, ebe tetelo aimano Kawodawa Ya꞉sute ebeno elawo nopopinomago Unu Duliyomolone awokala da꞉pemene, \v 8 piyate ebeno Wade Tabamo tudila꞉oa꞉no ega꞉walo Godoko ubia꞉noma꞉ deda꞉ona, ebete ebe epatamo elawo ela menagononomamo wiya ebo ka꞉pikalaemene. \v 9 Ebene ebe kuba osiyodilolepino temeteme tanalote uwomua꞉ tetelo bitanamene, iyo, Kawodawate ibi ebeno ololo apune ega꞉walo ebeno elawo pukuilame alonomone iyabaiamo gito kalibolemene iba꞉te ibino kuba wiya magumulo ka꞉nilukulionama꞉. \v 10 Wiyasiya kalakala kawonomola, Kawodawate ebeno Kawo Egelalo da꞉pemene, ebe tetelo piyate ebeno epoma꞉ deda꞉ona ebe nanitabokobi midipi bilibilinomate ebe unamo eba adipatelo ebe mabuma꞉ kawonomamo kanoanoma꞉na꞉! Ebema꞉ numa꞉la꞉, la꞉le ebe epono taneba kawonomo magumulo atumu ka꞉pola꞉namamota, mabu ale la꞉tamo ebeno Wade Tabo da꞉pa꞉kiyawaima꞉ la꞉ ebe tabo nanitabokobi a꞉midimata. \p \v 11 Ebema꞉ ale ebe tanalo eba malagidilolo tete bilibilinomo epetapilo la꞉ mabuma꞉ aimano Godotamo ma kunu towetoweonakoma꞉, ebete kebe wade okoli tanaloma꞉ la꞉ deka꞉la꞉mitia, modobola ebete ebe okoli magumulo la꞉ ebeno wadewade ga꞉limapi gudima꞉ na꞉midilima꞉ta, ega꞉walo modobola ebete ebeno elawo la꞉tamo nikalaema꞉ta, la꞉le la꞉imano tepo magumuno wadewade ubi tanalone ega꞉walo la꞉imano nanitabokobi midi magumune tuputupu osiyodilole tanalo eba waulatelelo ebe iyaiya tanalo wadenomamo kopoliyalema꞉. \v 12 Ebe mabuma꞉ piyate la꞉imano wadewade ilukuli tanalo dulaema꞉na꞉, iba꞉te aimano Kawodawa Ya꞉suko walogolo ebeno mailo unamo eba adipatelo, ebe wade amama tanalote Ya꞉sugodone la꞉tamo atumu ka꞉ka꞉pemaigamene, ebema꞉ modobola me wade tanalote aimano Godoko ega꞉walo Kawodawa Ya꞉su Kelisoko ibino nilakapo magumudo eba kunu nemaigamene. \c 2 \s1 Me Opolo Kawokawo Kuba Osiyodiloledawate Kemaigamene \p \v 1 Ebema꞉ aimano nanitabokobi midipi ekakiala꞉, aimano Kawodawa Ya꞉sukono pe tetelo ebete a nanitabokobi midipi eba꞉go kilukulinama꞉ kapiyakobi da꞉pa꞉midimene, ebe tanaloma꞉ ale la꞉ ma kunu analeta, \v 2 piyate a꞉da꞉ elemasigi tabo ma kunu degelana, “Kawodawano Kawo Egela iyalo emaigi,” ebe mabuma꞉ la꞉imano woki netewama꞉ akoeda꞉oala꞉ ega꞉walo la꞉ woki bilibili tanalo akolawa꞉la꞉. Diyala, la꞉ magumulo epetapiate da꞉begelane me tabono tanalote agodone pi. Ao, eba kunua꞉! Ale dopamo la꞉godolo eba pilukulilo la꞉tamo Godokono woki dawokaliminakima꞉ ega꞉walo tete epetapilo ale tabo gito degelanakima꞉, ega꞉walo ale walone dopo leta la꞉tamo dapalibima꞉, ebe iyaiya tete bilibilinomolo mako tabote agodone ka꞉pemaiga꞉. \p \v 3 Ebema꞉ epetapino iyaiya a꞉da꞉ elemasigi tabo nanitabokobi akomidila꞉la꞉. Numa꞉la꞉, Ya꞉sukono pe egelate pemaiga꞉no, dopamo me opo epo bilibilinomate Godokono nanitabo gabo eba atepalo Kawokawo Kuba Osiyodiloledawate ebo kemaigamene. Nanitabola, ebe dawate Saitanakono Ela Opolo kuba wiya nanitabonomolo kelaemene, \v 4 mabu a nanitabokobi midipiate nani Godoma꞉ deka꞉minakoma꞉ ebete kegemene ebe nani Kawodawa꞉. Ega꞉walo me opo epo epetapiate iyaiya ida꞉da꞉lino uliyana damamalatelenaka, ebete ibino amamalatele tanalo bilibilinomo eba odiyobolelo ebe a꞉ka꞉tuwa꞉ ebe unamo adipatelo ebo kegemene, “Na Godotela, na me opo lumagia꞉!” Iyo, ebe tetelo ebete nani Godo Amamateno Iya Motolo eba okolitalo, epo bilibilinomo kawiya ebo kanalemene iba꞉te ebe kapiya kamamatema꞉. \p \v 5 Nanitabola, nale dopamo egela epetapilo la꞉godolo eba pokolilo me iyaiya tanalo la꞉ iyatulaimata, wiyasiya modobola la꞉ me tetelo naimano tabo walo na꞉kemalagidilola꞉la꞉. \v 6 La꞉ iyatawalata, me tetelo me opolo idawano elawote me Kawokawo Kuba Osiyodiloledawano tanalo nodiyobona, iyo, ebe mabuma꞉ Godokono ubi tete pea꞉no ebe dawate a꞉kemaigamene. \v 7 Ebema꞉ me tetelo kebe elawote Kubadawano maiga tanalo dodiyobona, Godote ebe elawo iyabaiamo iyatia꞉no Kubadawate diya gabodo me opo kawonomolo ebeno woko bosiyodilona, iyo, ebete eba kunu ebeno kuba osiyodilole tanalo iyalo owagilimiya. \v 8 Wiyasiya numa꞉la꞉, walone ebe dawano kuba tanalote epatamo awokalanomo kawokalamene, ebene Godote kebe tete ebetamo dikaemene, ebe tete olopoligote Kawodawa Ya꞉sute pete ebeno tabone da꞉pemaigamene ebe da꞉pesonomo tabo kapiyamo ebe Kubadawa gito kapanakapuimene. \p \v 9 Ebema꞉ modobola la꞉ niyatawala꞉, me Kubadawate da꞉pemene, ebete iyaiya anoano tanalo bilibilinomo ega꞉walo tole tanalo Saitanakono elawo kawonomamo ka꞉posiyodilolemene me opo epo a꞉da꞉ ka꞉pemasigiolema꞉. \v 10 Iyo, ibi magumulo piyate Godoko nanitabokobi midia꞉no gito da꞉elaoma꞉na꞉, iba꞉te a꞉elaoa꞉no dopamo Kubadawate iyaiya a꞉da꞉ elemasigi gabodo ibi ibino olalati uwomuamo kemagatalemene. Nanitabola, ebe epate Godokono nanitabo tanalo kalakalago nelawiyataleka꞉ Godote ibino igilo ba꞉mula꞉lelamiyana꞉, wiyasiya iba꞉te ebe tanalo kawo tanaloma꞉ kegeliya꞉ ebema꞉ iba꞉te nanitabolo ka꞉kubakubaoma꞉na꞉. \v 11 Numa꞉la꞉, iba꞉te nanitabo tanalo lawea꞉ mabuma꞉ Godote iba꞉tamo A꞉da꞉ Elemasigidawa paliboma꞉ modoboma꞉ gena. Ma kunu iba꞉te ebe dawano elawo tanalamo gudite ebeno a꞉da꞉ tabono iyaiya tanalo nanitabokobi ka꞉midilima꞉na꞉, \v 12 iyo, me opo epo magumulo piyate Godokono nanitabo tanalo lawea꞉no ibino kateneno ubilo iyaiya kuba tanalo kalakalago dosiyodilolena, ebete ibi bilibilinomono tanalo anagilamelelamete iba꞉tamo kuba wiya ebo kikalaemene. \s1 Godote Nanitabokobi Midipino Igilo Ka꞉mula꞉lema꞉ Ibi Duwatiya \p \v 13 Ebema꞉ aimano nanitabokobi midipi ekakiala꞉, modobola tete bilibilinomolo ale la꞉ mabuma꞉ kalakala tabo Godotamo bowadipalatelenakoma꞉. Nanitabola, ebete la꞉ nilakapolo demalagidiloletana, ebe mabuma꞉ ebete me opo wagilimi mabune la꞉ uwatiyata, la꞉le ebeno tanalo nanitabokobi eba midilo ebeno Uliyanate la꞉ talenapima꞉ midilitate la꞉le igilo mula꞉ tanalo ebo kelawa꞉ema꞉. \v 14 Iyo, ale Wade Tabo la꞉tamo da꞉kiyawaima꞉ Godote ebe tanalodo la꞉ eka꞉la꞉miata, la꞉le nanitabokobi midipi epetapiago Kawodawa Ya꞉su Kelisokono elawonomo alo magumulo kilukula꞉wenama꞉. \v 15 Ebema꞉ aimano ekakiala꞉, ale Godokono tabo kiyawao magumulo ega꞉walo aimano dopo leta magumulo la꞉ kebe iyaiya tanalo kiyatulametanakia, modobola la꞉ ebe tanalo nanitabolo eba watila꞉mota꞉nalo kodakodalo nelamota꞉onala꞉. \p \v 16-17 Numa꞉la꞉, iyalo tetenomolo aimano Kawodawa Ya꞉su Kelisote aimano Nabiwi Godago a kawonomamo eba malagidiloenalo, iba꞉te ibino nilakapo magumudo a uwomua꞉ teteno tepo magumuno elawo atamo ikaeamiya ale Ya꞉sukono pe uwomuamo olowiolo kemakopelenama꞉. Ebema꞉ modobola iba꞉te eba kunu la꞉imano tepo magumu elawokobi namidilinakoma꞉na꞉, tete bilibilinomolo wadewade tanalate la꞉imano tabo gela magumune ega꞉walo osiyodilole magumune ka꞉pemaimionakoma꞉. \c 3 \s1 Tesalonaika Sosi Epate Poloi Mabuma꞉ Godoko Ka꞉toweoema꞉ Polote Ibi Danaliya \p \v 1 Ebema꞉ aimano nanitabokobi midipi ekakiala꞉, me leta uwomu apulo ale la꞉ ma kunu analeta, modobola la꞉ towetowe tabamo a Godotamo nowadipaeateiyala꞉, mabu a ubila Kawodawa Ya꞉sukono tabote aimano woko magumudo me opo epo epetapi bilibilinomatamo samonomamo ka꞉toma꞉, ega꞉walo a ubila olowiopiate ebe tabo eba moiolo Godotamo kalakala tabo kadipatema꞉, la꞉le dopamo ebeno tabo keba kunu kelawa꞉ima eba kunu. \v 2 Ebene modobola la꞉ me tanalo idima꞉ Godoko na꞉ka꞉toweomiyala꞉, ebete kawokawo kuba osiyodilolepi dubuno elawo magumune aimano igilo ka꞉mula꞉leaema꞉, mabu me opo epo epetapiate Godokono tabo olowio tetelo nanitabokobi ka꞉midina꞉. \p \v 3 Ebema꞉ kalakala kawonomola, la꞉imano nanitabokobi midi mabuma꞉ Kawodawate atumu la꞉ elawokobi eba midililo, Saitanakono gowela tanalo magumulo la꞉ ebete kitakeamidalema꞉ta! Iyo, aimano Kawodawa ebe Nanitabodawanomola! \v 4 Ebema꞉ a iyatawala ale kebe iyaiya tanaloma꞉ la꞉ danaletanaka, la꞉le ebe tanalo osiyodilole magumulo eba pola꞉nalo ebe tanalo gito a꞉ka꞉miyapaema. Numa꞉la꞉, Kawodawate la꞉ mabuma꞉ ebe wade woki atamo nikaeamena, ebema꞉ woki bilibili tanalote agodolo kitana꞉. \v 5 Modobola la꞉le nanitabokobi midi gabodo eba tolamenalo, Kawodawa Kelisote la꞉ dopolametate temeteme maimio tetelo ebete ebeno kodakodalo utitata tanalago ega꞉walo Godokono nilakapo kimalagidilo tanalago la꞉ nemagatalenakoma꞉ta. \s1 Nanitabokobi Midipiate Woko Nosiyodilonama꞉na꞉ Ibi A꞉ka꞉tuwa꞉ Ibino Iyaiya Modoboa꞉ Tanalo Kulaema꞉ \p \v 6 Ebema꞉ aimano nanitabokobi midipi ekakiala꞉, ale aimano Kawodawa Ya꞉su Kelisokono mailamo la꞉ ma kunu analeta, la꞉ magumulo piyate aimano iyatulame tanalamo tudila꞉oa꞉no ega꞉walo iba꞉te ibi a꞉ka꞉tuwa꞉ walubilima꞉ damolama꞉ deda꞉ona, modobola la꞉ ebako nanitabokobi midipino osiyodilole magumamo ako-opila꞉la꞉. \v 7 Iyo, ale la꞉ magumulo keba kunu ka꞉pilukulima꞉ la꞉ ebe tanalo iyatawanomolata, ebema꞉ modobola la꞉ atu osiyodilole magumulo nilukulinala꞉. Numa꞉la꞉, ebe tetelo ale woko osiyodiloma꞉ damolama꞉ eda꞉oa꞉no, \v 8 idoko ega꞉walo egela bilibilinomolo aimano kotamo mibomibo woko osiyodilonakima꞉ a a꞉ka꞉tuwa꞉ aimano iyaiya modoboa꞉ tanalo kulaema꞉, ebene ebe gabodo ale lumagi idigodone bae nilakapolo gito kelawenakia꞉, ao, a ebetamo a꞉wiyanakima꞉. \v 9 Nanitabola, Godokono wokopiate ibino modoboa꞉ tanalo magumulo nanitabokobi midipiagodone inamabu ega꞉walo mani uwatema꞉ talena kitana꞉, wiyasiya ale la꞉go eba ilukulinalo eba kunu kowagelenakia꞉, mabu a ubi iyatima꞉ la꞉tamo wade uli tanalo idi awokalimite, la꞉le woko osiyodilo magumulo aimano osiyodilole tanalo kowaloma꞉tala꞉ema꞉. \v 10 Me mabuma꞉ ale la꞉ ma kunu analiata, “Kebe lumagite woko osiyodilo ubia꞉noma꞉ deda꞉mene, modobola epetapiate ebetamo bae akoikama꞉la꞉.” \p \v 11 Ebema꞉ numa꞉la꞉, ale me tanaloma꞉ la꞉ walo nakanaleta mabu tabote atamo ma kunu pemaigi, la꞉ magumulo epetapiate woko osiyodiloma꞉ damolama꞉ eba eda꞉olo, ibi a꞉ka꞉tuwa꞉ ibino iyaiya tanalo ulamea꞉no ibino tabo gela magumulo piyate iyaiya nanitabo woko dosiyodilolena iba꞉tamo temeteme ebo ikalamenaka. \v 12 Iyo, ale ebakobako epo eba totomulatelelo Kawodawa Ya꞉su Kelisokono mailamo ibi kawonomamo analema꞉, iba꞉te tabo gela magumulo epo epetapiatamo temeteme ikalamea꞉no, wiyasiya iba꞉te mani woko kelekele osiyodilole magumulo ibi a꞉ka꞉tuwa꞉ ibino iyaiya modoboa꞉ tanalo nulamenakoma꞉na꞉. \p \v 13 Ebema꞉ ekakiala꞉, kalakala kawonomola, la꞉imano nanitabokobi midi magumulo wadewade tanalo kosiyodilola꞉ema꞉ elawoa꞉noma꞉ akoeda꞉oala꞉. \v 14 Ega꞉walo la꞉ magumulo lumagi idite me leta tabono iyatulame tanalamo tuduwatama꞉ ubia꞉noma꞉ eda꞉lo woko osiyodiloa꞉no gito da꞉lutamene, modobola la꞉ ebako lumagino kuba tanalo kawokalima꞉ema꞉ ebeno osiyodilole magumulo eba꞉go akokapiyala꞉. Diyala, me gabodo ebete ilipo lawete ebeno kuba wokine Godotamo walo da꞉ba꞉kolobigamene, \v 15 wiyasiya numa꞉la꞉, ebete ebeno woki iyakobi samamo midia꞉no ebe la꞉go gowelaodawama꞉ akomida꞉la꞉, la꞉le wiyasiya ebe la꞉imano nanitabokobi midi ekawima꞉ ka꞉milo ebeno tepo magumuno kuba wokima꞉ ebe nilakapolo naniyala꞉. \s1 Polote Leta Uwomu Apulo Iyaiya Tabo Da꞉kiyawaiya \p \v 16 Ebema꞉ milo atamo dikaeamena, modobola ebe Kawodawate la꞉ bilibilinomagodolo eba okolinalo tete bilibilinomolo ebe a꞉ka꞉tuwa꞉ la꞉imano tanalo bilibilinomo magumulo ebeno milo la꞉tamo nikalamenakoma꞉ta. \p \v 17 Numa꞉la꞉, me leta uwomu apulo na Polote naimano mailo ega꞉walo nilakapo tabo naimano kotonomamo akulolemo, lumagi idite me uwomu tabo kakulolea꞉. Iyo, me naimano koto mulola, naimano leta bilibilinomo osiyodilole magumulo na a꞉ka꞉tuwa꞉ ma kunu akulolenakomo. \p \v 18 Modobola aimano Kawodawa Ya꞉su Kelisokono nilakapo tanalote la꞉ bilibilinomagodolo nitanamene. Me ebe naimano tabo uwomula. Taula.