\id 1TI - Tabo (Fly River dialect) NT - Papua New Guinea 2006 (DBL 2014) \h 1 Tim \toc3 1 Tim \toc1 Polote Dopo Leta Timotitamo Osiyodiliya \toc2 1 Timoti \mt2 POLOTE DOPO LETA \mt1 TIMOTITAMO \mt2 OSIYODILIYA \c 1 \p \v 1 Na ebe Polotela. A nanitabokobi midipiate pokono pe tanaloma꞉ olowiolo demakopelenama꞉, ebe Kawodawa ebe Ya꞉su Kelisotela, ebene ebete ebeno sosi wagilima꞉ iyaiya opamo daliboliya, ebe wokopi magumulo na idila, iyo, ebe ega꞉walo aimano Igilo Mula꞉dawa Godoko iba꞉te na ananiya ebe woko kosiyodilonama꞉. \p \v 2 O Timoti, a꞉ma꞉le nanitabokobi midi magumulo naimano nani guduma꞉ eda꞉nata, ebema꞉ nale me leta a꞉ma꞉tamo palibomo. Modobola Nabiwi Godoko ega꞉walo aimano Kawodawa Ya꞉su Kelisoko iba꞉te ibino nilakapo tanalo, ega꞉walo lumagitamo kuba wiya ikamea꞉ tanalo, ega꞉walo milo tanalo a꞉ma꞉tamo nikaema꞉ta. \s1 Iyaiya A꞉da꞉ Tabo Iyatulamepino Tanalo \p \v 3 Nale dopamo Ma꞉sadoniya opamo toma꞉ eba olosiyodilutalo a꞉ma꞉ kebe tabo kanatiama ebe atu tabo kanamata, ma kunu a꞉ma꞉ Epesese kawo duliyomololo eba okolinalo, nanitabokobi midipi magumulo piyate iyaiya a꞉da꞉ tabo diyatulamenaka, modobola a꞉ma꞉ ibi kawiya eba analelo nodiyoboliye. \v 4 Modobola a꞉ma꞉ talena iba꞉tamo niyatilamiye iba꞉te ewonino iyaiya iyatulame oi ega꞉walo ewonino mailono iyaiya tanalo akoiyatulamenakala꞉, mabu ebakobako daedale tanalate ibi magumulo apaminateui tanalo eba wadipalatelelo, iba꞉te Godokono gabo ebo kanaetoamidama꞉na꞉. Nanitabola, ale ebeno gabo aimano nanitabokobi midi kapiyado biyatawaonakoma꞉, wiyasiya ale me opo epono iyaiya ewonino iyatulame tanaloma꞉ tabo gela magumudo nanitabo tanalo a꞉kuima꞉. \v 5 Ebema꞉ nale a꞉ma꞉ me tabo nanamata, mabu na ubila daleya꞉ tepo magumuno kimalagidilo tanalo ega꞉walo milo okoli tanalono mulo wokino tanalo ega꞉walo tuputupu nanitabokobi midi tanalonomo, ebe tanalate a꞉imano sosi epagodolo eba pola꞉nalo ebe iyaiya tanalo magumune nilakapo kimalagidilo tanalote bemaiganakomene. \v 6 Wiyasiya numa꞉, nanitabokobi midipi epetapiate daedale taboma꞉ apaminateui tanalodo me wadewade tanalone gito eleoiya. \v 7 Ebema꞉ me tetelo iba꞉te ibino ubi niyatina, Godote Mosesedo epatamo dikalamiya ebe Totomu Tabo iyatulamepima꞉ keda꞉onama꞉, wiyasiya ibi modoboa꞉ mabu Godokono iyaiya tabono magumu tanalo ibi iyatawa꞉, iyo, iba꞉te tabo tolea꞉no kiyawaonaka wiyasiya Godokono nanitabo tanalo kumina꞉. \p \v 8 A iyatawala, kebe tetelo ale nanitabo gabodo Godokono Totomu Tabo diyatulaema꞉ ebe tanalote olowiopino wade walubi tanaloma꞉ keda꞉mene. \v 9 Wiyasiya numa꞉, Godote ebeno Totomu Tabo me opono tuputupupino tanaloma꞉ kikalamiya꞉, ao, ebete ebeno Totomu Tabono iyaiya tanalo kuba osiyodilolepino tanaloma꞉ ikalamiya iba꞉te ebeno nanitabo gabo kiyatawaoma꞉. Ebema꞉ nanitabola, Godokono Totomu malagidilolea꞉pi ega꞉walo ebetamo tudila꞉oa꞉pi, ebe ololoma꞉ eda꞉oa꞉pi ega꞉walo ele gabo odidipi, ebeno pukala wakalamipi ega꞉walo ebe tolemea꞉pi, nabila menokobila anakapulamepi ega꞉walo epo epetapino igilo iyaililamepi, ebe kuba osiyodilolepi bilibilinomo iyatulaema꞉ Godote ebeno Totomu Tabo ebema꞉ ikalamiya. \p \v 10 Ebene piyate buwelemele pilo ega꞉walo kamiyale pilo dosiyodilolena, piyate dubu gabatamo ega꞉walo egege guda꞉tamo ilipo tanalo dosiyodilolena, piyate ibino mibomibo woko wiya꞉no kosiyodilolenama꞉ epo epetapi pilolo duwatena, piyate gabamanino tanalo anagiyamida bailo ega꞉walo iyaiya tete epetapilo a꞉da꞉ tabo da꞉kiyawaona, Godote atumu ebe kuba osiyodilolepino tanaloma꞉ ebeno Totomu Tabo ebema꞉ ikalamiya. Iyo, me opo epo bilibilinomo magumulo kebe lumagite Ya꞉sukono dopo waloma꞉tapino iyatulame tabo kapiyanomo dadikamidalemene, ebe lumagino tanaloma꞉ Godokono Totomu Tabono tanalate ebema꞉ pola꞉na. \v 11 Ebema꞉ numa꞉, Ya꞉suko waloma꞉tapino iyatulame tanalate ebeno Wade Alo Tabo magumune pemaimiona, ebe tabo ebe nale iyaiya epatamo ka꞉kiyawaonakoma꞉ Wadenomo Godote natamo dikanamiya me ebe tabola. \s1 Ya꞉sukono Nilakapo Tanaloma꞉ Polote Kalakala Tabo Da꞉kiyawaiya \p \v 12 Ebema꞉ natamo elawo dikanamiya nale aimano Kawodawa Ya꞉su Kelisotamo kalakala tabo gemo, mabu ebete na nanidawama꞉ gelo ebeno woko kosiyodilonama꞉ na ebema꞉ ka꞉na꞉miya. \v 13 Nanitabola, dopamo tetelo nale ebeno tanaloma꞉ kubakuba tabo eba kiyawaolo kawo dowanomo magumulo kawokawo temeteme ebetamo ebo ikamenakimo. Wiyasiya ebe tetelo ebete iyatawiya, nale ebe nanitabokobi midia꞉ mabuma꞉ daedale wokilo ebakobako kuba tanalo dosiyodilolenakimo, ebema꞉ ebete kuba wiya natamo ikanamea꞉no ebeno nilakapo natamo gito awokalimiya. \v 14 Iyo, aimano Kawodawa Ya꞉su Kelisote ebeno nilakapo natamo kawonomamo dadipaniya, ebe tetelo ebegodone demaigana ebe nanitabokobi midi tanalo ega꞉walo nilakapo kimalagidilo tanalo naimano tepo magumulo emaimiya. \p \v 15 Ebema꞉ nale me nani tabonomo gemo, Ya꞉su Kelisote kuba osiyodilolepino igilo mula꞉lelaema꞉ me opamo a꞉piya. Iyo, modobola a꞉ma꞉ me tabo kodakodalo nelawa꞉, mabu naimano kuba osiyodilole tanalate epo epetapi bilibilinomono kuba osiyodilole tanalo eba odoililo, \v 16 Ya꞉su Kelisote na kawokawo kuba osiyodiloledawatamo wiya ikanamea꞉no nilakapo gito awokalimiya. Me mabuma꞉ Ya꞉sute kebe epo ebeno uwomua꞉ igilo laema꞉ deka꞉la꞉mioliya, modobola iba꞉te ebe nanitabokobi midia꞉ tetelo me wade tanalo niyatawaoma꞉na꞉, Ya꞉sute ibi nilakapoilamelo nemakopelena iba꞉te ibino kuba osiyodilole tanalo magumune ebetamo nanitabolo kolobila꞉oma꞉, ebete na Poloko keba kunu kemakopelenenamile eba kunu. \v 17 Ebema꞉ kalakala kawonomola! Godoko ebe uwomua꞉ uwomua꞉ tetelo dokolinamene ebe Kawo Elawodawala, ega꞉walo ebete a꞉ka꞉enamene, ega꞉walo a me opo epate ebe balida꞉mo uima꞉ modoboa꞉, ega꞉walo ebe kapiyanomo Godotela, idi puliyanomola. Ebema꞉ modobola uwomua꞉ tetelo epate ebe unamo eba adipatenalo amama tanalote ebegodolo nitanamene! Me tabo ebe nanitabonomola, taula! \p \v 18 Timoti, numa꞉, a꞉ma꞉le nanitabokobi midi magumulo naimano guduma꞉ eda꞉nata, ebema꞉ na ubila me leta magumulo kapiyakapiya tanaloma꞉ a꞉ma꞉ kawiya anama꞉, a꞉ma꞉le me tabamo ka꞉tuduwataema꞉. Nanitabola, Godokono wokopiate ebeno Uliyanano elawamo kebe wadewade tanalate a꞉ma꞉godone kemaimioma꞉ tabo dopamo da꞉kiyawaiya, me tetelo ibino nani tabono tanalate naimano tabago kapiyama꞉ eda꞉te a꞉ma꞉ nanitabolo kowalubima꞉ta. Ebema꞉ modobola a꞉ma꞉ ebe walubi tabono tanalo bilibilinomo kodakodalo nowatila꞉mota꞉niye, elawo dubute gowela inamabu keba kunu kowatila꞉mota꞉nanakole eba kunu, \v 19 ega꞉walo a꞉imano nanitabokobi midi magumulo kodakodalo eba utinalo, a꞉imano tepo magumuno mulo wokino tanalate wadenomamo ka꞉pola꞉nama꞉ kuba da꞉pesonomo idi ako-osiyodilala꞉. \p Numa꞉, Ya꞉suko waloma꞉tapi epetapino tanalo ebe ma kunula, Godote kebe mulo tepo magumuno woki iba꞉tamo kikalamiyale, iba꞉te tudila꞉oma꞉ ubia꞉noma꞉ deda꞉iya ibi a꞉ka꞉tuwa꞉ ibino nanitabokobi midi tanalo a꞉kubailamiya, lumagite kewa꞉ kolomodo ebeno pe kubanu atalo ebe pete kawokawo ulo magumamo keba kunu ka꞉nololunakole eba kunu. \v 20 Iyo, Aimaneyasiko ega꞉walo A꞉lesandako ibi netewapi ebakopila, ebe mabuma꞉ nale ibi nanitabokobi midipino taneba magumune wagailite Saitanakono koto magumamo gito alomimo, iba꞉te ibino kuba wiya eba lawelo wade woki ma kunu kelaema꞉, iba꞉te Godokono tanaloma꞉ kubakuba tabo walo a꞉kegelanakoma꞉na꞉. \c 2 \s1 Godotamo Towetowe Tabo Gela Tanalo \p \v 1 Ebema꞉ Timoti, nale a꞉ma꞉ kebe iyaiya tanaloma꞉ kanatama me ebe kawo tanalonomola. La꞉ nanitabokobi midipino aladabuti tetelo Godotamo towetowe tabo da꞉kiyawawenakoma, modobola la꞉le me opo epo bilibilinomono iyaiya tanaloma꞉ eba towetoweolo kalakala tabo atumu na꞉kegelanakiyala꞉, \v 2 ebene atu tetelo kawokawo elawodubu ega꞉walo gabamani wokopi epetapi bilibilinomo atumu na꞉kowadipalatelenakiyala꞉. A꞉ma꞉ numa꞉, a nanitabokobi midipiate eba kunu gabamaniagodolo wade milo okoli tanalo kuimalema꞉, ega꞉walo ale Godokono ubi tanalo bilibilinomamo eba tudila꞉onalo epo epetapino ololo apulo tuputupunomolo bilukulinama꞉. \v 3 Ebema꞉ nanitabola, mako towetowe tabo gela tanalo ebe aimano Igilo Mula꞉dawa Godote wadenoma꞉ degena me ebe tanalola, \v 4 mabu ebe ubila me opo epo bilibilinomate ebeno nanitabo tanalo iyatawaote ibino igilo mula꞉ tanalo ebo kelaema꞉. \p \v 5 Numa꞉, Godoko ebe kapiyanomola. Ega꞉walo me tanalo idila, ebe ega꞉walo epo tetenomolo dutina ebe Ya꞉su Kelisote me opolo lumagino apa꞉mo dawokaliya ebe dawala. Ebema꞉ nanitabola, ebe kapiyagodolo elawo bitana epo Godotamo kemagaelema꞉, \v 6 mabu ebe a꞉ka꞉tuwa꞉ ebeno igilo balamo iyatite ibi Saitanakono idoko motone kowagailima꞉ ebeno kalimamo wiyakobi ebo midiliya. Iyo, ebete ebe gabodo ebeno wade tetenomolo me tanalo awokalimiya, Godokono ubi bitana epo bilibilinomate ebegodone igilo mula꞉ tanalo kelaema꞉. \v 7 Ebe mabuma꞉ ebete na Polotamo ebeno woko ikanamiya, nale ebeno alibolepi dubu idima꞉ eda꞉te Yua꞉piatamo Wade Tabo eba kiyawaolo ibi ebo kiyatulamenakoma꞉. A꞉ma꞉ niyata, me tabo nale da꞉kiyawautamo ebe nanitabonomola, na a꞉da꞉ tabo ka꞉kiyawauta꞉! \p \v 8 Ebema꞉ naimano ubi tanalo ma kunu itana. Kebe iyaiya tetelo nanitabokobi midipiate daladabutinaka, modobola dubate dowa tanalo ega꞉walo apaminateui tanalo bilibilinomo balamo alomote, ebene ibino tepo magumulo daleya꞉noma꞉ eba eda꞉olo iba꞉te ibino koto Godotamo wadipalatelelo towetowe tabo ebo na꞉kiyawaonakoma꞉na꞉. \s1 Nanitabokobi Midipi Kamiyaleno Tanalo \p \v 9 Ega꞉walo na ubila nanitabokobi midipi kamiyala꞉te wade mulo gabodo kaliku pupuliote ibino unu tama kawonomamo akomalagidilolenala꞉. Ebema꞉ iba꞉te eke aupulatole tanalo, ega꞉walo galono golodo sepisepi pupuli tanalo, ega꞉walo negege tulukaula pupuli tanalo, ega꞉walo wiya kawokawonomo kaliku pupuli tanalo, ebe iyaiya unu nikapi wadekobi midi tanalo iba꞉te kawokawo tanaloma꞉ akogelala꞉. \v 10 Wiyasiya modobola iba꞉te epetapiatamo wadewade tanalo nosiyodilolenakoma꞉na꞉, mabu me osiyodilole gabodo iba꞉te agaluagalu kamiyalenomoma꞉ keda꞉oma꞉na꞉, iyo, kebe kamiyalete ebe a꞉ka꞉tuwa꞉ ebe Godoko waloma꞉tadawama꞉ degena, modobola ebete ebeno osiyodilole magumulo nanitabo tanalo nawokalimene. \p \v 11 Ega꞉walo nanitabokobi midipiate daladabutinaka, modobola kamiyala꞉te tabo gela꞉no Godokono tabo kiyawaopino iyatulame tanalamo gito na꞉tudila꞉onakoma꞉na꞉. \v 12 Ebe mabuma꞉ nanitabokobi midipi magumulo nale kamiyale iditamo elawo kikamenakoa꞉, ebete Godokono tabamo dubu eba iyatulamitalo ibino watodawama꞉ keda꞉ma꞉, ao, Godokono tabo iyatulame tetelo kamiyala꞉te tabo gela꞉no gito nolowionakoma꞉na꞉. \v 13 Ebema꞉ numa꞉, nale kamiyaleno tanalo kawokalima꞉ kebe netewa tanalate Godokono Bukalo da꞉pola꞉na, nale ebe tanalo a꞉ma꞉ kiyatuimamota. Dopo tanalo ebe ma kunula, Godote A꞉da꞉meko dopamo osiyodilote, walone ebeno kamiyale Ibiko ebo osiyodiliya. \p \v 14 Ega꞉walo tanalo idi ma kunu itana, Saitanate epo kuba gabamo wabuga꞉talema꞉ dowageliya, ebe tetelo ebete dopo dubu A꞉da꞉meko kemasigiya꞉, ao, ebete ebeno kamiyale Ibiko kapiya masigite ebene ebete Godokono pukala ebo adikanaliya. \v 15 Wiyasiya Godokono igilo mula꞉ tanalote nanitabokobi midipi dubu kapiyatamo kitana꞉, ao, kamiyala꞉tamo atumu ba꞉kitana, ebema꞉ kebe kamiyalete wade mulo wokilo Ya꞉suko nanitabokobi eba midinalo tuputupu okoli tanalo ega꞉walo nilakapo kimalagidilo tanalo miyapa꞉no, ebete gudi alailame gabodo igilo mula꞉ tanalo nanitabolo kelaemene. \c 3 \s1 Sosi Watodawano Okoli Tanalo \p \v 1 Me tanalo nanitabola, kebe tetelo dubute sosi watodawama꞉ eda꞉ma꞉ ubi kawonomamo diyatimene, me wade tanalola mabu sosi watodawano woko wadenomola. \v 2 Ebe mabuma꞉ ebe wokodawano osiyodilole tanalo magumulo kuba kapiya idi da꞉pesonomote itanama꞉ modoboa꞉. Ma kunu sosi watodawate kamiyale kapiyagodawama꞉ eda꞉te, ebene nanitabokobi midipi magumulo ebeno okoli tanalo tuputupunomolo eba itanalo, ebete wadewade mulo woki kapiya malagidilolelo ebe a꞉ka꞉tuwa꞉ ebeno tanalo wadenomamo nulamenakomene. Ebene ebete ebeno motolo kapela epo wadenomamo nowalubilinakomene, ega꞉walo modobola ebete Godokono tabo kiyawao magumulo wade iyatulamedawama꞉ neda꞉mene. \v 3 Ega꞉walo sosi watodawate gamoda niodawama꞉ eda꞉ modoboa꞉, ebene ebete gowelao tanalo ega꞉walo apaminateui tanalo osiyodilolema꞉ modoboa꞉, wiyasiya milo okolidawama꞉ neda꞉mene. Ega꞉walo ebete ebeno tepo magumulo mani kawonomamo malagidiloma꞉ modoboa꞉. \v 4 Ebene ebete ebeno moto epono tanalo wadenomamo ulamelelamete, modobola ebete ebeno gudi wadenomamo niyatulamenakomene, iba꞉te ibino osiyodilole tanalo bilibilinomodo ibino nabiwi eba malagidilolo ebeno tabamo ka꞉tudila꞉onama꞉. \v 5 Nanitabola, kebe dubute ebeno moto epo wadenomamo ulamea꞉no, ebete atumu Godokono sosi epo wadenomamo a꞉kulaemene. \p \v 6 Ega꞉walo numa꞉, sosi watodawate Ya꞉suko waloma꞉ta magumulo oli lumagima꞉ eda꞉ modoboa꞉. Ebako dawate sosi atama꞉ ubi diyatimene, diyala, ebe a꞉ka꞉tuwa꞉ ebe da꞉bowalogomene, ebema꞉ Godote kuba wiya ebetamo kikaemene, ebete dopamo Saitanatamo kuba wiya keba kunu kikamiyale eba kunu. \v 7 Ebene modobola sosi watodawate nanitabokobi midia꞉pino ololo apulo atumu wadewade tanalo na꞉kosiyodilolenakomene, iba꞉te ebeno wade okoli tanalo uimite ebe tuputupudawama꞉ kegelama꞉. Iba꞉te ebeno okoli magumulo kuba idi uima꞉ modoboa꞉, mabu iba꞉te ebegodolo tuputupua꞉ osiyodilo tanalo idi umite ebe kubadawama꞉ degelama꞉na꞉, diyala, ebete ilipo lawete Saitanakono gubi magumamo gito da꞉ba꞉negamene. \s1 Sosi Watowatopi Walubilidawano\f + \fr 3.8 \ft Buka ka꞉la꞉mioledawa, modobola a꞉ma꞉ me tanalo niyatawa, keyakeyapino tabamo nanitabokobi midipiate sosi watowatopi walubilidawa dikonema꞉ ka꞉minaka.\f* Okoli Tanalo \p \v 8 Ebema꞉ sosi watowatopi walubilidawano okoli tanalote epetapino umi magumulo atumu wadenoma꞉ neda꞉mene. Ma kunu ebete mena netewa lumagima꞉ akoeda꞉la꞉, ebene ebete elawo gala꞉ipi da꞉imi obo kawonomamo nioma꞉ modoboa꞉, ega꞉walo ebete a꞉da꞉ elemasigi gabodo inamabu bilibilidawama꞉ eda꞉ma꞉ ubi iyati modoboa꞉. \v 9 Ega꞉walo Godote kebe nanitabo gabo epatamo kawokalimiyale, modobola sosi watowatopi walubilidawate ebe gabono iyatulame tanalo bilibilinomo kodakodalo eba watila꞉mota꞉-nalo ebeno tepo magumulo woki netewama꞉ akoeda꞉la꞉. \v 10 Ebema꞉ potele sosi walubidawama꞉ woko wagilima꞉ ubi dawokalimene, modobola la꞉ sosi watowatopiate ebeno okoli tanalo dopamo wadenomamo nulamelemiyala꞉, ebene la꞉ ebegodolo kuba idi umia꞉no modobola ebete sosi woko nowagilimene. \p \v 11 Ega꞉walo wokopi kamiyaleno ilukuli tanalate epetapino umi magumulo atumu wadewadenoma꞉ neda꞉oma꞉na꞉. Ma kunu iba꞉te epono iyaiya tanaloma꞉ kubakuba tabo akogelanakala꞉, ebene iba꞉te wadewade mulo woki kapiya malagidilolelo ibino osiyodilole tanalo bilibilinomo magumulo nanitabopinomoma꞉ neda꞉oma꞉na꞉. \p \v 12 Ega꞉walo numa꞉, sosi watowatopi walubilidawate kamiyale kapiyagodawama꞉ neda꞉mene, ebene modobola ebete ebeno gudi ega꞉walo ebeno moto epo epetapi ibino iyaiya tanalo wadenomamo nulamelelamenakomene. \v 13 Nanitabola, piyate sosi watowatopi walubili woko wadenomamo dosiyodilona, epetapiate ibi ibino wade woko osiyodilole tanaloma꞉ demoiolema꞉na꞉, iba꞉te Ya꞉su Kelisoko nanitabokobi midi magumulo apepeote ebeno woko osiyodiloma꞉ tole tanalote iba꞉godolo a꞉kitanamene. \s1 Godoko Waloma꞉ta Tanalono Kawo Magumu \p \v 14-15 Ebema꞉ Timoti, nale a꞉ma꞉tamo samonomamo pema꞉ ubi iyatimo, wiyasiya na gabo samamo umia꞉no, ebe tanalo eba malagidilolo nale me leta magumulo iyatulame tabo epetapi ebema꞉ akulolemo. Ma kunu nale a꞉ma꞉ iyatuimata, sosi epono aladabuti tetelo iba꞉te Godokono umi magumulo tuputupu tanalo keba kunu na꞉kosiyodilolenakoma꞉na꞉. Numa꞉, uwomua꞉ uwomua꞉ tetelo dokolinamene, a sosi epo ebe Kawodawano moto epola, ega꞉walo a ebeno motono alo ega꞉walo abo keba kunula꞉ka꞉ eba kunula, mabu ale ebeno nanitabo iyatulame tanalo me opolo eba wadipalatelenalo ebeno motono a꞉emena tanalote kodakodalo kitanamene. \v 16 Ebema꞉ nanitabola, a nanitabokobi midipiate Godokono ubi gabodo ebe keba kunu kowaloma꞉tanama꞉, ebe tanalono magumu beda꞉ kawonomola꞉ka꞉! \b \q1 Aimano Kawodawate me opolo \q2 lumagino apa꞉mo awokaliya, \q1 ebene ebeno tuputupu okoli tanalo kawokalima꞉, \q2 ebete ebeno Uliyanano elawamo \q2 a꞉e magumune maigate, \q1 Godokono nopopiate \q2 ebe uwomua꞉ igilago ebo umiya. \b \q1 Ega꞉walo ebe waloma꞉tapiate ebeno tanalo \q2 me opo kawonomolo awokalimiya, \q1 ebene epo bilibilinomate \q2 ebe nanitabokobi eba midilo, \q1 ebete Godokono Unu Duliyomolamo ebo odoliya, \q2 ebeno ololo apulo kawo alo magumulo ka꞉nokolinama꞉. \c 4 \s1 Godokono Mailamo A꞉da꞉ Tabo Kiyawaopino Tanalo \p \v 1 Numa꞉, Godokono Uliyanate awokala ma kunu gena, me opono uwomu tetelo epetapiate Saitanakono kubakuba uliyana ega꞉walo a꞉da꞉ elemasigi uliyanano iyatulame tanalamo tudila꞉ote, iba꞉te Ya꞉suko nanitabokobi midi magumune ebo kolobila꞉oma꞉na꞉. \v 2 Nanitabola, me a꞉da꞉ elemasigi tanalo ebe mena netewa epagodone maimiona, iyo, Godote kebe wade mulo woki ibino tepo magumamo dopamo dalomolamiya, ebe wadewade woki ibino kuba osiyodilole magumulo gito alatidiolamiya, wadewade inamabuate elalo keba kunu kowamotenakole eba kunu. \v 3 Ebe a꞉da꞉ elemasigipiate negelanaka nanitabokobi midipi magumulo dubute kamiyale laema꞉ Godote talena iyatilamiya, ega꞉walo iba꞉te na꞉kegelanaka wadewade inamabu epetapi naoma꞉ talenala. \p Wiyasiya numa꞉, Godote ebe tanalo bilibilinomo nanitabokobi midipi mabuma꞉ osiyodilolete iba꞉tamo ikalamiya, ebema꞉ piyate ebeno nanitabo tanalo diyatawaona, iba꞉te kalakala tabo ebetamo adipatelo ebe inamabu gito benaonakoma꞉na꞉, ega꞉walo dubute ebeno kamiyala꞉go kapiyama꞉ eda꞉ tetelo iba꞉te atumu Godotamo kalakala badipatenakoma꞉na꞉. \v 4 Nanitabola, Godote me opono tanalo bilibilinomo ebeno epo mabuma꞉ osiyodiloliya, iyo, ebe tanalate wadewadenoma꞉ eda꞉ona, ebema꞉ modobola epate ebe iyaiya nilakapo tanalo uwatema꞉ ubia꞉noma꞉ eda꞉oa꞉no Godotamo kalakala tabo eba gelalo ebeno kotone nuwatenakoma꞉na꞉. \v 5 Ebema꞉ numa꞉, Godote me opono inamabu osiyodilole dolopoligiya, ebete ebe inamabu bilibilinomo ulamete ebeno tabo kiyawao tanalamo ibi wadewadenoma꞉ midiliya, ega꞉walo me tetelo ale inamabu epetapi uwatelo ebetamo kalakala tabo dadipatenakoma꞉, ebete ebe tanalodo atumu ebe inamabu wadewadenoma꞉ walo ba꞉kegenakomene. \s1 Ya꞉su Kelisokono Wade Wokodawano Tanalo \p \v 6 Ebema꞉ Timoti, a꞉ma꞉le Ya꞉su Kelisokono wade wokodawama꞉ eda꞉ tanalo kawokalima꞉ema꞉, modobola a꞉ma꞉ me iyatulame tabo nanitabokobi midipi ekakiatamo na꞉kiyawaonakiye. Iyo, a꞉ma꞉ ibino uliyana apuno bae iba꞉tamo modobolo dikalama꞉emene ebe tanalote a꞉imano tanalo ma kunu kawokalimene, a꞉ma꞉le nanitabokobi midi magumulo kebe iyatulame tanalo kowaloma꞉ela꞉wenapiyala, a꞉ma꞉le wadenomamo apema꞉ ebe iyaiya nanitabo tanalo atumu nanitabolo na꞉kenaonata. \v 7 Ega꞉walo a꞉ma꞉ ewonino iyaiya iyatulame oi ako-olowionakala꞉, mabu ebakobako oi tanalate epono daedale wokido eba pemaimionalo Godokono nanitabo tanalo kawokalimina꞉. Wiyasiya numa꞉, a꞉ma꞉ Godotamo nanitabolo ka꞉tuduwatawenama꞉ modobola a꞉ma꞉ a꞉imano tepo magumu na꞉kodakodaiminakiye, bolamo kalakaladawate elawonomoma꞉ keda꞉ma꞉ ebeno ape keba kunu ka꞉kodakodaiminakole eba kunu. \v 8 A꞉ma꞉ iyatawalata bolamo kalakalaopiate ibino ape elawonomoma꞉ keda꞉oma꞉ keba kunu ka꞉midilinake, iyo, eba kunu iba꞉te ibino katene ape walubilima꞉ me tanalo osiyodilonaka. Wiyasiya numa꞉, a꞉imano tepo magumute elawonomoma꞉ keda꞉ma꞉ a꞉ma꞉le a꞉imano woki atumu da꞉kodakodaima꞉wenakomene, me gabodo a꞉ma꞉ a꞉ka꞉tuwa꞉ a꞉ma꞉ walubima꞉ wade tanalonomo bosiyodilonakoma꞉ta, mabu a꞉ma꞉ me opolo Godokono wade okoli tanalono wadewade tanalo duwata꞉emene walone uwomua꞉ igilo nanitabolo ka꞉nelaema꞉ta. \p \v 9 Ebema꞉ nale a꞉ma꞉tamo degemo, modobola a꞉ma꞉ me tabo kodakodalo nelawa꞉, \v 10 mabu a nanitabokobi midipiate Godokono uwomua꞉ igilo laema꞉ woko ebetamo elawonomamo ebema꞉ osiyodilonama꞉. Nanitabola, ebete me opo epo bilibilinomono Igilo Mula꞉ledawama꞉ eba eda꞉nalo nanitabokobi midipiatamo nanitabo igilo ebo kikalaemene, iyo, ebe uwomua꞉ tetelo dokolinamene ebe Igilodawala, ebema꞉ ale ebeno pe tanalo olowiolo makopelenama꞉. \p \v 11 Ebema꞉ naimano gudu, modobola a꞉ma꞉ me totomu tabo ega꞉walo iyatulame tabo nanitabokobi midipiatamo na꞉kiyawaonakiye. \v 12 Nanitabola, a꞉ma꞉ sosi epo magumulo oli ape dubulata, wiyasiya iba꞉tamo gigiyu akoa꞉iyamidala꞉, ibi magumulo idite ma kunu gema꞉ a꞉ma꞉ sosi watodawa꞉. Iyo, modobola a꞉ma꞉ a꞉imano tabo kiyawao tanalo ega꞉walo osiyodilole tanalo bilibilinomo magumulo tuputupudawanomoma꞉ eba eda꞉lo wade uli iba꞉tamo nawokaliminakiye. Ebema꞉ iba꞉te a꞉imano nilakapo kimalagidilo tanalo ega꞉walo a꞉imano nanitabokobi midi tanalo ega꞉walo a꞉imano tepo magumuno daleya꞉ woki dulamelemetamene, ebe tetelo iba꞉te a꞉ma꞉ nani sosi watodawama꞉ keka꞉ima꞉ta. \p \v 13 Ebene sosi woko osiyodilo magumulo modobola a꞉ma꞉ nanitabokobi midipiatamo Godokono Buka apuno iyaiya tabo ka꞉la꞉miola꞉wete ebe tabamo ibi eba walubililo ebo niyatulamenakiye. Numa꞉, nale Epesese duliyomolamo da꞉pemo, ebe tetelo me atu tanalo a꞉ma꞉go kapimiya ka꞉posiyodilolemamo. \v 14 Ebema꞉ naimano gudu, kebe tanalote a꞉ma꞉tamo dopamo demaigiya, a꞉ma꞉ ebe tanalo akododomatiala꞉. Iyo, a꞉ma꞉ sosi woko wagilimia꞉no watowatopiate Godokono Uliyanano elawamo ibino koto a꞉ma꞉tamo eba watililo wadewade tanalate a꞉ma꞉godolo kemaimioma꞉ nani tabo da꞉kiyawaiya, ebe tetelo a꞉ma꞉le Godokono woko kosiyodilawenama꞉ ebete nilakapolo iyanomo elawo a꞉ma꞉tamo ikamiyata. Ebema꞉ modobola a꞉ma꞉ ebe elawamo ebeno woko nosiyodilonakiye, \v 15 ebene sosi epatamo me iyaiya tanalo eba iyatulamenalo a꞉imano igilo iyabaiamo iyatilo elawoa꞉noma꞉ akoeda꞉la꞉, mabu a꞉ma꞉ ebako woko osiyodilo magumulo eba apelo epate ebe tanalo ebo kuima꞉na꞉. \v 16 Wiyasiya a꞉ma꞉ nanisiwale! Modobola a꞉ma꞉ a꞉ka꞉tuwa꞉ a꞉imano okoli tanalo ega꞉walo iyatulame tanalo wadenomamo nulamenakiye. A꞉ma꞉godolo me netewa kawokawo tanalate modobolo da꞉pola꞉namene, ebe tetelo piyate a꞉imano iyatulame tabo dolowiona, a꞉ma꞉le ibino igilo ega꞉walo a꞉imano igilo kapimiya ka꞉mula꞉lema꞉ta. \c 5 \s1 Nanitabokobi Midipi Epetapiago Wadenomamo Ilukuli Tanalo \p \v 1 Ebema꞉ Timoti, nanitabokobi midipi magumulo kebe kadelete kuba dosiyodilomene, modobola a꞉ma꞉ ebe kawiya ana꞉no a꞉imano nani nabiwima꞉ gelo Godokono tabamo ebe nowalubiye. Ega꞉walo a꞉ma꞉go atu apepeo oli dubuno tanaloma꞉ modobola a꞉ma꞉ ibi a꞉imano ekaki ega꞉walo nanima꞉ midila꞉wete, \v 2 ebene abeleabela꞉te a꞉imano menokobima꞉ neda꞉oma꞉na꞉. Ega꞉walo a꞉ma꞉ nanisiwale! A꞉ma꞉ oli apepeo kamiyale ega꞉walo buwelemele Godokono tabamo dowalubila꞉emene, ebe tetelo ibi a꞉imano ekaki ega꞉walo nanikubima꞉ na꞉midiliye a꞉imano tepo magumuno wokite iba꞉tamo tuputupunomolo kitanama꞉. \s1 Nanitabokobi Midipi Amoleamoleno Tanalo \p \v 3 Ega꞉walo me tanalo idila. Amoleamole magumulo idite wade walubi tanalo laema꞉ ebeno mabu epagodolo walubidawa nanitabolo umia꞉no, modobola a꞉ma꞉ sosi epo nanaliye iba꞉te ebe wadenomamo kowalubinakoma꞉. \v 4 Wiyasiya kebe tetelo amole idino kawokawo gudi ega꞉walo kawokawo a꞉la꞉migo guda꞉te nanitabokobi midipima꞉ deda꞉ona, modobola ibi a꞉ka꞉tuwa꞉ ibino menoko tete bilibilinomolo kowalubinama꞉ wadewade woki nuwatenakoma꞉na꞉, mabu eba kunu ebe guda꞉te ibino Godoko waloma꞉ta tanalo nanitabolo kawokalima꞉na꞉. Nanitabola, nabiwila menokola iba꞉te gudi egege tetelo ibi keba kunu kowalubilinakiye, kawokawo guda꞉te ebe iyaiya walubi tanalo malagidilolelo wade wiya ibino amole menokotamo dikaema꞉na꞉, Godote ibino nilakapo tanalo umilamete wadenoma꞉ kegemene. \v 5 Ebene kebe amolete wade walubi tanalo laema꞉ ebeno mabu epagodolo walubidawa nanitabolo umia꞉no, modobola ebete Godokono woko kapiya eba osiyodilonalo ebeno igilo tanaloma꞉ woki bilibilima꞉ akoeda꞉la꞉. Eba kunu ebete idoko ega꞉walo egela bilibilinomolo Godago tabo gelalo ebeno iyaiya modoboa꞉ tanalo ega꞉walo epetapino iyaiya modoboa꞉ tanalo eba wadipalatelenalo walubi tanalo ebegodone laema꞉ olowiolo nemakopelenanakomene. \v 6 Wiyasiya a꞉ma꞉ iyatawalata amoleamole epetapino tanalo eba kunua꞉. Ibi a꞉ka꞉tuwa꞉ ibi ibino kateneno ubilo kalakalailaema꞉ eba wagelenalo Godokono woko kosiyodilona꞉, ebema꞉ nanitabola, ebako amoleamola꞉te ibino unu tamano igilo kawonomamo eba malagidilolelo wiyasiya iba꞉te tepo magumulo iyalo a꞉elaiya. \v 7 Ebema꞉ naimano gudu, modobola a꞉ma꞉ nanitabokobi midipi me tabamo nowalubiliye, epetapiate ibino amoleamoleno osiyodilole tanalo ulamelo kubama꞉ gelakapoma꞉. \p \v 8 Ega꞉walo me tanalo idila. Modobola nanitabokobi mididawate ebeno nani gudino iyaiya modoboa꞉ tanalo ulamelo ibi dopamo walubilite, ebene ebeno mabu epo epetapi atumu wadenomamo na꞉kowalubilinakomene. Nanitabola, ebegodolo walubi gabote eba itanalo ebete ibino iyaiya modoboa꞉ tanalo ulamelelamea꞉no, ebete ebeno nilakapo osiyodiloa꞉ tanalodo ma kunu gena, Ya꞉suko nanitabokobi midi gabo ebe nanitaboa꞉. Iyo, ebete ebeno nilakapo osiyodilolea꞉ tanalodo kubadawama꞉ eda꞉te, ebene me kuba osiyodilo tanalote nanitabokobi midia꞉pi epetapino iyaiya kuba osiyodilole tanalo odoili. \p \v 9 Ebema꞉ kebe amolete dopamo kapiya awiagodawama꞉ deda꞉nami, ega꞉walo ebe 60 ulama odoli tetedawama꞉ deda꞉na, modobola a꞉ma꞉ ebako dawano mailo sosino amoleamoleno mailo bukamo iyata꞉wete, ebene nanitabokobi midipiate ebako amole kapiya nilakapolo nowalubinakoma꞉na꞉. Wiyasiya a꞉ma꞉ ebeno mailo iyatia꞉no, \v 10 modobola sosi epate ebeno osiyodilole tanalo dopamo nulamelema꞉na꞉. Ebema꞉ iba꞉te ebe wade kamiyalenomoma꞉ degelama꞉na꞉, ma kunu dopamo ebeno gudino egege tetelo ebete ibi wadewade iyatulame tanalamo dowalubilinaki, ega꞉walo me tetelo ebete iyaiya nilakapo tanalo bilibilinomo osiyodilolema꞉ ebeno ubi kawonomamo eba iyatinalo, ebete ebeno motolo kapela epo wadenomamo dowalubilinako, ega꞉walo nanitabokobi midipi epetapi walubilima꞉ agowa ukulaoleno obo iba꞉tamo dowadaenako, ega꞉walo tete epetapilo nigologolopi nilakapolo atumu da꞉kowalubilinako, modobola a꞉ma꞉ ebako amole kapiya walubi nowagilimiye. \p \v 11-12 Wiyasiya modoboa꞉ a꞉ma꞉ oli ape amoleno mailo bukamo iyatima꞉. Nanitabola, kebe amoleamoleno mailote bukalo da꞉pola꞉lamena, sosi epate ibino mailo akulolelamea꞉no dopamo iba꞉te Kelisokono woko osiyodiloma꞉ ibino ape ebe kapiyatamo ikameoma꞉ nani tabonomo awokala geliya. Wiyasiya numa꞉, oli ape amolete mako nani tabo gema꞉ a꞉ka꞉modobomene, mabu walone ebeno kateneno ubi tanalate demaimioma꞉na꞉ dubu laema꞉ walo ka꞉kowagelemene. Ebema꞉ ebe niyala, mabu ebete dopamo kebe nani tabo kegiyale ebe tabo dadikamidalemene, ebeno kuba wiyate Godogodone ebetamo ka꞉pemene. \v 13 Ega꞉walo me tanalo idila. Oli ape amoleamola꞉te nanitabokobi midi magumulo kodakodalo kelamota꞉ona꞉, ebema꞉ diyala, iba꞉te kuba osiyodilo tanalo ida꞉mo ma kunu da꞉ba꞉na꞉gudima꞉na꞉, iba꞉te nanitabo woko osiyodiloa꞉no ibino namutupi magumulo moto idine moto ida꞉mo eba wapata꞉lamelo iyaiya epono tanaloma꞉ tabo gela ebo kowagilima꞉na꞉. Iyo, ebe tetelo iba꞉te kuba idi ma kunu ka꞉kosiyodiloma꞉na꞉, iba꞉te woko osiyodiloma꞉ damolama꞉ eba eda꞉olo, ibi a꞉ka꞉tuwa꞉ ibino iyaiya tanalo ulamea꞉no, ibino tabo gela magumulo piyate nanitabo wokono iyaiya tanalo dosiyodilolena iba꞉tamo temeteme ebo kikalaema꞉na꞉. \p \v 14 Ebema꞉ na ubila oli ape amolete dubu walo kelawete guda꞉goma꞉ eba eda꞉lo ebeno motolo wadewade iyaiya woko ebo nosiyodilolenakomene, mabu kebe nanitabokobi midia꞉piate ago da꞉gowelaona, iba꞉te ebako kamiyaleno tuputupu okoli tanalo duima꞉na꞉, ebe mabuma꞉ iba꞉te gabo a꞉kuima꞉na꞉ a nanitabokobi midipino tanalo kubama꞉ kegelama꞉. \v 15 Numa꞉la꞉, amoleamole epetapiate Saitanako kowaloma꞉tama꞉ nanitabokobi midi magumune iyalo olobila꞉iya, ebema꞉ ibino kuba osiyodilole mabuma꞉ nanitabokobi midia꞉pi epetapiate aimano ilukuli tanaloma꞉ kuba tabo gelanaka. \p \v 16 Ebema꞉ amoleamoleno tanaloma꞉ me tabo ebe naimano iyatulame tabola. Kebe tetelo nanitabokobi midi kamiyaleno mabu epo magumulo amoleamola꞉te da꞉pola꞉nama꞉na꞉, modobola ebete a꞉ka꞉tuwa꞉ ibi wadenomamo nowalubilinakomene, iyo, ebe amoleamoleno epate sosi magumulo walubi tanalo uwatema꞉ akogelanakala꞉. Wiyasiya kalakala kawonomola, amoleamole magumulo pokono mabu epate nanitabolo pola꞉na꞉no, modobola sosite ebako amole kapiya nilakapo tanalamo nowalubinakomene. \s1 Sosi Watowatopiatamo Ibino Woko Wiya Ikalame Tanalo \p \v 17 Ebema꞉ me tanalo idila. Sosi watowatopi magumulo piyate Godokono tabo kiyawao woko ega꞉walo ebeno iyatulame woko wadenomamo kosiyodilolema꞉ ibino igilo nanitabolo dalomona, ega꞉walo piyate watowatopino iyaiya woko epetapi wadenomamo dosiyodilolena ibi atumu, modobola sosite ebako wokopiatamo wiya kawonomamo nikalamenakomene, netewa wokono wade wiya keba kunula꞉ka꞉ eba kunu. \v 18 Mabu Godokono Bukalo totomu tabote ma kunu itana, “Epate witi-laiso naono kikopu kuwatema꞉ ibino kau-goeote ebe inamabu mikitaolelo woko iba꞉tamo dosiyodilomene, ebe tetelo iba꞉te ebe kau-goeono tabo ala꞉mo matuima꞉ modoboa꞉, mabu ebete iba꞉tamo woko osiyodilo magumulo witi-laiso kikopu kapiyakapiya naoma꞉ modobola, iyo, ebe nao inamabu ebe ebeno wokono wiya da꞉pesola.” Ebene tabo idite ma kunu kitana, “Wokopiate duliyomolo epagodone wiya laema꞉ modobola.”\f + \fr 5.18 \ft Buka ka꞉la꞉mioledawa, modobola a꞉ma꞉ Totomu Tabo 25.4 numiye. Me tabono magumu ma kunula, kau-goeote woko osiyodilo magumulo epo dowalubilimene, ebema꞉ modobola iba꞉te ibino nilakapolo wade walubi tanalo kau-goeotamo atumu na꞉kiyatima꞉na꞉. Ega꞉walo Polote Timotiko Buka tabo idima꞉ dakaniya, ebe tabo ebe Ya꞉sute ebe waloma꞉tapiatamo dopamo degiya ebe tabola, ebema꞉ modobola a꞉ma꞉ Ma꞉t 10.10 ega꞉walo Luk 10.7 tetelo numiye.\f* \p \v 19 Ega꞉walo a꞉ma꞉ nanisiwale, kebe tetelo lumagite a꞉ka꞉tuwa꞉ a꞉ma꞉tamo pete sosi watodawano osiyodilo tanalo kubama꞉ da꞉pegemene ebeno tabo ako-olowiala꞉, wiyasiya netewa o netewa-kapiya nanitabokobi midipiate ebeno kuba tanalo kapimiya dapawokalima꞉na꞉, ebe tetelo a꞉ma꞉ toawete ebe sosi watodawano tanalo nanitabolo na꞉numiye. \v 20 Ebene ebe sosi watodawate kuba tanalo nanitabolo dosiyodili, modobola a꞉ma꞉ sosi epono ololo apulo ebe kawiya naniye, ebe gabodo watowatopi epetapiate atu kuba osiyodiloma꞉ ka꞉toletoleoma꞉. \s1 Polote Iyaiya Tabo Epetapi Da꞉kiyawaiya \p \v 21 Ebema꞉ naimano gudu, nale Godoko ega꞉walo Ya꞉su Kelisoko ega꞉walo ibino wade-talena nopopi ibino ololo apulo a꞉ma꞉ anamata me iyaiya tanalo sosi magumulo kosiyodilola꞉ema꞉, ebene a꞉ma꞉ nanisiwale, sosi epono tanalo anagilamelelame tetelo a꞉ma꞉ lumagi unu nikapiamo eba umilo lumagi idi atepalo lumagi idi gito akolawa꞉la꞉. \p \v 22 Ega꞉walo a꞉ma꞉ lumagi idino watamo koto watililo ebe Godokono wokamo samamo akoiyata꞉la꞉, mabu kebe tetelo a꞉ma꞉ tuputupu wokiago osiyodiloa꞉no, diyala, a꞉ma꞉le ebe gabodo kuba okolidawatamo woko da꞉bikama꞉emene. Numa꞉, ebete ebeno woko gobebobolo eba okolitalo kubakuba tanalo epetapi walo da꞉kosiyodilolemene, ebe tetelo ebeno kuba wiyate a꞉ma꞉tamo atumu ka꞉pemene. A꞉ma꞉ nanisiwale, a꞉imano osiyodilole magumulo gigiyu akoa꞉iyamidala꞉ tepo magumuno daleya tanalote a꞉ma꞉tamo ka꞉pema꞉! \p \v 23 Ega꞉walo Timoti, me tanalo idila. Iyaiya tete epetapilo kateneno temeteme tanalate a꞉imano tepo magumulo a꞉ma꞉ uminakota, ebema꞉ obo kapiyanomo akoniala꞉, modobola a꞉ma꞉ wiyasiya tete epetapilo elawo gala꞉ipi da꞉imi obo kela꞉mo na꞉ninakiye. \p \v 24 Ega꞉walo sosi woko osiyodilo magumulo me tanalo idi na꞉kemalagidila. Epo epetapino kuba osiyodilole tanalate awokala ba꞉pola꞉lamena, ebema꞉ epetapiate negelana iba꞉te walone kuba wiya nanitabonomolo kuwatema꞉na꞉. Wiyasiya epo epetapino kuba osiyodilole eba kunua꞉ mabu iba꞉te ibino kuba osiyodilole tanalo nowaminalena, ebema꞉ numa꞉, walone Godote ebeno ubi tetelo ebe kubakuba tanalo bilibilinomo kawokalilaemene. \v 25 Nanitabola, epono wadewade osiyodilole tanalate atumu awokala ba꞉pola꞉na, wiyasiya epetapi kapiyakapiya waminaolelo da꞉pola꞉na ebe tanalate Godokono wade tetelo nanitabolo kawokalaoma꞉na꞉. \c 6 \s1 Piyate Woko Namutupiatamo Wiya꞉ Woko Dosiyodilona Ibino Tanalo \p \v 1 Ebema꞉ me tanalo idila. Kawokawo wokopi dubate maniamo kebe epo kuwatiye iba꞉tamo wiya꞉ woko kosiyodilolenama꞉, ebe wiya꞉ wokopi magumulo piyate nanitabokobi midipima꞉ deda꞉ona, modobola iba꞉te ibino tepo magumuno wokilo ibi a꞉ka꞉tuwa꞉ ibi opamo eba alomolo ibino woko namutupi unamo nowadipalatelenakoma꞉na꞉. Numa꞉, nanitabokobi midia꞉piate ebako wokopino tuputupu ilukuli tanalo dulamelelaema꞉na꞉, ibi mabuma꞉ iba꞉te gabo a꞉kuima꞉na꞉ aimano iyatulame tanalo kubama꞉ kegelama꞉, iyo, iba꞉te ibino tabo gela magumulo Godokono mailo atumu a꞉ka꞉kubaima꞉na꞉. \p \v 2 Ebene wiya꞉ wokopi magumulo piyate nanitabokobi midipi namutupiatamo woko dosiyodilona, iba꞉te kuba tabo ma kunu akogelala꞉, “Aimano woko namutupi kawokawo epoa꞉. Ao, ibi a keba kunula꞉ka꞉ ebako nanitabokobi midipi ekakila, ebema꞉ ale iba꞉tamo nanitabo woko a꞉kosiyodiloma꞉!” Eiye, ebako woki tabo ebe kubanomola! Modobola ebe wiya꞉ wokopiate wiyasiya ibino woko namutupino nanitabokobi midi tanalo eba malagidilolo, ibi nilakapoilamelo ubi kawonomamo ebo nalomonakoma꞉na꞉, iba꞉te woko osiyodilo magumulo ibino namutupi kowalubilinama꞉. \s1 Inamabu Bilibila꞉gopima꞉ Eda꞉o Tanalo \p Ebema꞉ Timoti, modobola a꞉ma꞉ Godokono tabo eba kiyawaolo me iyaiya tanalo sosi epo wadenomamo niyatulamiye. \v 3 Numa꞉, aimano iyatulame tanalate epo nowalubilina iba꞉te Godotamo nanitabolo ka꞉tudila꞉oma꞉, wiyasiya kebe lumagite iya gabono tanalo diyatulamenako, ebete aimano Kawodawa Ya꞉su Kelisokono iyaiya mulo iyatulame tanalago kapiyama꞉ keda꞉na꞉, \v 4 mabu ebako a꞉da꞉ tabo iyatulamedawa ebe a꞉ka꞉tuwa꞉ ebe eba walogonalo ebegodolo wade woki kapiya idi kitamena꞉. Ebe ubi kawonomola epo kubailamelo iba꞉go iyaiya tabono magumuma꞉ apaminateuima꞉, ebema꞉ me tanalo magumune iyaiya kubate emaimionaka. Ma kunu ebete epetapino inamabuno tanaloma꞉ iba꞉tamo na꞉dowana, ega꞉walo ebete epetapi magumulo anagiyamida tanalo ebe wadipalatelenako, ega꞉walo ebete epetapi emalogolenako, ega꞉walo ebete ebeno kuba tepo magumuno wokilo epetapino osiyodilole tanalo kubanomoma꞉ genako, \v 5 ega꞉walo ebete atu kubakuba wokiagopi epetapiago gowelao tanalo katepana꞉. Nanitabola, ebako dubu bilibilinomate Godokono nanitabo gabo iyalo atepiya, ebema꞉ ibino wokilo daedalenomoma꞉ eda꞉olo a꞉da꞉ tabo ma kunu gelana, lumagite Godoko waloma꞉ta magumulo inamabu bilibila꞉godawama꞉ keda꞉mene. \p \v 6 Wiyasiya Godokono nanitabo tanalo ma kunula. Kebe lumagite ebe waloma꞉tama꞉ ebeno kalakala magumulo dokolina, ebe lumagite Unu Duliyomolono wadewade tanalo kawonomamo kuwatemene, me opono inamabua꞉. \v 7 Ebe mabuma꞉ wade tepo magumuno wokiagopiate ma kunu malagidilona, “A me opamo dapawokalaiyama꞉ beda꞉ inamabuago ka꞉pemaimiyama꞉? Puliyala! Ega꞉walo ale da꞉elaoma꞉ beda꞉ inamabuago na꞉ka꞉tolaema꞉? Puliyanomola! \v 8 Ebe mabuma꞉ a me opolo eba ilukulinalo agodolo kebako kapiyakapiya nao inamabu ega꞉walo pupuliono inamabuate modobolo da꞉pola꞉amena, modobola kalakalate agodolo nitanamene!” \p \v 9 Wiyasiya numa꞉, kebe epate inamabu bilibila꞉gopima꞉ eda꞉oma꞉ ubi diyatina, Saitanate ibi kuba gabamo eba wabuga꞉talelo iba꞉te ebeno guba꞉mo ebo ka꞉na꞉gudima꞉na꞉. Iyo, ebe ubila ebete ebe epo kubailaema꞉, ebema꞉ ebete ibi ibino daedale ubi tanalamo uwatete a꞉e magumamo ebo kanamiyamidalemene. \v 10 Ebema꞉ nanitabola, lumagite mani kawonomamo demalagidilona, ebe tanalo ebe lumagino kuba osiyodilole tanalo bilibilinomono mabula. Iyo, epo epetapiate kawokawo mani uwatema꞉ ubi alomolo nanitabokobi midi magumune da꞉nemaimiya, me ebe gabodo ibi a꞉ka꞉tuwa꞉ iba꞉tamo kawokawo tepo temeteme ebo ikalamiya. \s1 Nanitabokobi Mididawano Wade Wiya Lawe Tanalo \p \v 11 O naimano gudu, a꞉ma꞉ wiyasiya Godokono wade wokodawalata, ebema꞉ modobola a꞉ma꞉ me kubakuba ubi tanalo bilibilinomo kuba nibote maigama꞉ gelo Godokono wade okoli tanalono iyaiya tanalo wadenomamo nowaloma꞉taliye. Ma kunu Godoko nanitabokobi midilo ebe kapiyatamo tuduwata tanalo, ega꞉walo ebeno tuputupu osiyodilole tanalo, ega꞉walo ebeno nilakapo kimalagidilo tanalo, ega꞉walo ebeno milo okoli tanalo, ega꞉walo temeteme magumulo kodakodalo uti tanalo, me tanalo bilibilinomate a꞉ma꞉godolo na꞉pola꞉nama꞉na꞉. \v 12 Ebene a꞉ma꞉le nanitabokobi midi magumulo uwomu teta꞉mo modobolo ka꞉nemaigaema꞉, modobola a꞉ma꞉ kodakodama꞉ nediye, sukulu gudino kalakala egelalo idite dopodawama꞉ keda꞉ma꞉ elawonomamo da꞉puliganako eba kunu. Ma kunu a꞉ma꞉ Godogodone uwomua꞉ igilo ka꞉nelaema꞉ta, mabu a꞉ma꞉le dopamo epono ololo apulo Godoko waloma꞉tama꞉ nani tabo degeawiyala, ebe tetelo ebete ebe igilo a꞉ma꞉tamo ikaema꞉ ka꞉miyata. \p \v 13 Ebema꞉ numa꞉, Godoko ebe me opo inamabu bilibilinomatamo igilo dikalamena ebe Kawodawala, ega꞉walo Ya꞉su Kelisoko ebe Poniyase Paeletekono dopo apulo ebeno nanitabokobi midi tanalo dawokalimiya ebe Nanidawala. Ebema꞉ naimano gudu, nale ibi netewapino ololo apulo a꞉ma꞉ kawonomamo totomutimata, \v 14 a꞉ma꞉le aimano Kawodawa Ya꞉su Kelisokono pe uwomuamo ebeno iyaiya totomu tabamo wadenomamo na꞉tuduwatanakiye, iyo, modoboa꞉ epetapiate kapiya tanalo da꞉pesonomo idima꞉ a꞉imano woko kubama꞉ kegelama꞉. \v 15 Nanitabola, Godoko kapiya ebe Wadedawanomola ega꞉walo Unudawanomola! Iyo, me opo epono kawokawopi ega꞉walo elawodubu bilibilinomo magumulo ebe kapiya ebe Kawodawanomola, ega꞉walo ebe kapiya ebe Kawo Elawodawanomola! Ebe mabuma꞉ ebete modobo tabo degemene, ebe wade tetenomolo Ya꞉sute me opamo walo ka꞉ka꞉pemene. \v 16 Iyo, nanitabola, Godoko kapiya ebe uwomua꞉ uwomua꞉ Igilodawanomola. Ebete kebe kawo alo magumunomolo kokolinale, lumagi idite ebeno ololo apuamo ka꞉nemaigama꞉ ebe alo magumamo toma꞉ modoboa꞉, ebema꞉ me opo epo bilibilinomo magumulo idite ebe dopamo kumiya꞉ ega꞉walo me tetelo ibi magumulo idite atumu ebe kumina꞉. Ebema꞉ modobola uwomua꞉ tetelo amama tanalo ega꞉walo elawo tanalo kawonomote ebegodolo na꞉pola꞉nama꞉na꞉! Taula! \s1 Polote Leta Uwomu Apulo Iyaiya Tabo Da꞉kiyawaiya \p \v 17 Ebema꞉ piyate me opolo inamabu bilibila꞉gopima꞉ deda꞉ona, modobola a꞉ma꞉ ibi nanaliye ibi a꞉ka꞉tuwa꞉ ibino tanaloma꞉ akoamamala꞉. Modobola iba꞉te wiyasiya ibino inamabu bilibili kawonomamo malagidilolea꞉no, Godoko kapiya ibino walubidawama꞉ gelalo ebeno pe tanaloma꞉ olowiolo nemakopelenama꞉na꞉. Nanitabola, Godote a꞉ka꞉tuwa꞉ aimano modoboa꞉ tanalo eba ulameleamenalo, ebete kebe iyaiya inamabuamo a kawiya kowalubinakole, ebe ubi niyatina ale ebe inamabuma꞉ nanitabolo kekalakalaonama꞉. \p \v 18 Ega꞉walo a꞉ma꞉le ibi ma kunu walo nakanaliye, modobola iba꞉te ibino wade osiyodilole tanalo dogodogokobi na꞉midilima꞉na꞉, iyo, iba꞉te kawo nilakapo tanalonomo awokalimi magumulo ubia꞉noma꞉ akoeda꞉oala꞉ epetapino iyaiya modoboa꞉ tanalo ka꞉modoboilamelelaema꞉. \v 19 Numa꞉, me gabodo ibi a꞉ka꞉tuwa꞉ ibi kowalubilima꞉na꞉, mabu Godokono Unu Duliyomololo ibino inamabu bilibilinomate nanitabolo ba꞉na꞉pola꞉lamenama꞉na꞉, iyo, ibino nilakapo awokalimi tanalo ebe ibino motono kodakoda mabu keba kunula꞉ka꞉ eba kunula, mabu iba꞉te walone tetelo Godogodone da꞉nelaema꞉na꞉ ebe nanitabo igilo ebe ibino uwomua꞉ igilo tanalola. \p \v 20 O Timoti, a꞉ma꞉ niyata! Godote a꞉ma꞉ wade wokodawama꞉ gelo a꞉ma꞉tamo kebe iyaiya woko kikameotiyala, modobola a꞉ma꞉ ebe woko wadenomamo nulamenakiye. Ebema꞉ a꞉da꞉ elemasigi epate kebe iyaiya tanalo mulo iyatawa tanaloma꞉ kegelane, a꞉ma꞉ ebako daedale tabo kiyawao magumamo akonopegala꞉. Modobola a꞉ma꞉ wiyasiya ibi miyapawete iba꞉go akoapaminateua꞉la꞉, mabu nanitabola, ibino tabo gela tanalate olowiopi epetapi Godoko ololoa꞉pima꞉ midilinaka, \v 21 iyo, dopamo ebako epo epetapi ibi a꞉ka꞉tuwa꞉ ibi mulo iyatawaopima꞉ eba gelalo iba꞉te nanitabokobi midi magumune gito nemaimiya. \p Naimano gudu, modobola Godokono nilakapo tanalote a꞉ma꞉ ega꞉walo a꞉ma꞉go daladabutina la꞉ bilibilinomagodolo nitanamene. Me ebe naimano tabo uwomula. Taula.