\id 1TH - Tabo (Fly River dialect) NT - Papua New Guinea 2006 (DBL 2014) \h 1 Tes \toc3 1 Tes \toc1 Polote Dopo Leta Tesalonaika Sosi Epatamo Osiyodiliya \toc2 1 Tesalonaika \mt2 POLOTE DOPO LETA \mt1 TESALONAIKA SOSI EPATAMO \mt2 OSIYODILIYA \c 1 \p \v 1 Na ebe Polote Sailasiko ega꞉walo Timotiko, ale la꞉ Tesalonaika sosi epatamo me leta paliboma꞉. Nanitabola, la꞉ nanitabokobi midipiate Nabiwi Godoko ega꞉walo Kawodawa Ya꞉su Kelisoko magumulo bilukulinamata. Modobola Godokono nilakapo tanalo ega꞉walo ebeno milo tanalote la꞉godolo na꞉pola꞉nama꞉na꞉. \s1 Tesalonaika Sosi Epono Nanitabokobi Midi Tanalo \p \v 2 Ale tete bilibilinomolo la꞉ bilibilinomono tanaloma꞉ Godotamo kalakala tabo eba adipatelo la꞉ towetowe tabamo ebo wadipalatelenakota. \v 3 Iyo, la꞉imano nanitabokobi midi magumulo kebe wadewade tanalo kosiyodilola꞉wenakima, ega꞉walo nilakapo kimalagidilo magumulo kebe woko elawonomamo kosiyodilawenaima, ega꞉walo me tetelo la꞉le kodakodalo eba lamota꞉onalo Kawodawa Ya꞉su Kelisokono pe tanaloma꞉ demakopela꞉wenama, ale Nabiwi Godokono ololo apulo me iyaiya tanalo ka꞉dodolomatilina꞉. \p \v 4 Aimano nanitabokobi midipi ekakiala꞉, a iyatawala Godote iyalo tetelo la꞉ nilakapolo eba malagidilolenalo la꞉ ebo uwatiyata la꞉le ebeno epoma꞉ keda꞉wenama꞉. \v 5 Ebe mabuma꞉ ale Ya꞉sukono Wade Tabo la꞉tamo dadaima꞉, ebe tetelo ebe tabote me opo epono mulo tabo gela magumulo kitania꞉. Ao, ebe tabote wiyasiya Godokono Uliyanano elawamo la꞉tamo pi, ebema꞉ la꞉le la꞉imano tepo magumulo iyatawaimata ebe tabote Godogodone nanitabonomolo pemaiga. \p Numa꞉la꞉, ale la꞉imano nanitabokobi midi magumulo la꞉ kowalubilitama꞉ egela epetapilo la꞉ magumulo keba kunu ka꞉pilukulima꞉, ebe tanalo la꞉ iyatawalata. \v 6 Ebene Godokono Uliyanagodone da꞉pemaigana, la꞉le ebe kalakalago ebeno Wade Tabo delawa꞉ima, ebe tetene wagilimite nanitabokobi midia꞉piate kawokawo temeteme la꞉tamo eba ikalamelo, la꞉ wiyasiya aimano ilukuli tanaloma꞉ ega꞉walo Kawodawa Kelisokono okoli tanaloma꞉ a ebo ibamiatenapimata. \v 7 Ebema꞉ la꞉imano osiyodilole tanalate atumu Ma꞉sadoniya ega꞉walo Guliki opo epatamo ulima꞉ eda꞉iya, la꞉le keba kunu kilukula꞉wenama iba꞉te ibino nanitabokobi midi magumulo eba kunu na꞉kilukulinama꞉na꞉. \v 8 Wiyasiya Kawodawano tabote la꞉imano osiyodilole magumudo Ma꞉sadoniya ega꞉walo Guliki opo epo ibi kapiyatamo ka꞉toa꞉, iyo, ebe tabote tuteleno diyamo keba kunula꞉ka꞉ iyaiya mulu opamo eba kunu a꞉ti, ebema꞉ ale ebe opo epatamo da꞉nemaimima꞉, ale tabo kiyawaoa꞉no iba꞉te la꞉imano nanitabokobi midi tanalo iyalo olowiya. \v 9 Numa꞉la꞉, ibi bilibilinomate negelana ale Wade Tabo la꞉tamo dadaima꞉ la꞉le a kalakalago keba kunu kuwatea꞉ima, ega꞉walo iba꞉te na꞉kegelana la꞉le a꞉da꞉ elemasigi uliyanano ida꞉da꞉li amamalatele magumune Igilodawa ega꞉walo Nanidawa Godoko amamate tanalamo keba kunu kolobila꞉ima, \v 10 ega꞉walo Godokono Gudute Unu Duliyomolone pema꞉ la꞉le ebe tanalo demakopela꞉wenama, iba꞉te ebe tanaloma꞉ atumu na꞉kegelana. \p Me tanalo nanitabola, Godote ebeno Gudu a꞉e magumune igilamo adipatiya, ebema꞉ me Ya꞉sute a nanitabokobi midipino igilo na꞉mula꞉leamena, Godogodone da꞉pemene ebe dowa tanalo kawonomote a puwatekapoma꞉. \c 2 \s1 Polote Tesalonaika Kawo Duliyomololo Godokono Woko Keba Kunu Kosiyodilonamile \p \v 1 Ebema꞉ aimano nanitabokobi midipi ekakiala꞉, la꞉ iyatawanomolata ale la꞉ magumulo woko osiyodiloma꞉ da꞉pelaima꞉ ebe woko magumulo wadewade da꞉ima꞉te emaimiya. \v 2 Ega꞉walo la꞉ iyatawalata, ale la꞉tamo pelamea꞉no dopamo Pilipai duliyomololo nanitabokobi midia꞉piate a malogoelo temeteme atamo keba kunu kikaeami, ebene ale la꞉imano duliyomolamo da꞉pelaima꞉ ebolo epetapi bilibilinomate atumu a kawonomamo odiyoboema꞉ eba wagelelo, wiyasiya aimano Godote tole tanalo iyabaiamo iyatiamete, ale ebegodone da꞉pena ebe Wade Tabo la꞉tamo wadenomamo ebo pa꞉kiyawaima꞉. \p \v 3 Nanitabola, la꞉le me Wade Tabo nanitabokobi ka꞉mida꞉ema꞉ ale la꞉ danaletia, ebe tetelo ale ele gabo odidi tanalodo ega꞉walo tepo magumuno kalawikalawi wokino tanalodo iyaiya a꞉da꞉ elemasigi tabo kegela꞉. \v 4 Ao, aimano tanalo eba kunua꞉, ale wiyasiya epatamo Godokono nani tabo kapiya a꞉kiyawaonakoma꞉, mabu Godote a ebeno wadewade wokopima꞉ ka꞉milo ebeno Wade Tabo kiyawao woko atamo ikaeamiya. Ebema꞉ ebe woko osiyodilo magumulo aimano woki ma kunu kitana꞉, ale epo eba kalakalailamenalo iba꞉te a kowalogoenama꞉, ao wiyasiya aimano ubi niyatinakoma꞉ Godoko kapiya kekalakalaiminama꞉, mabu ebete aimano tepo magumuno tanalo bilibilinomo eba ulamelo ebo anagilameleamenako. \v 5 Ebema꞉ la꞉ iyatawalata, a la꞉go eba pilukulilo ale unu gabodo la꞉ walogolelo la꞉tamo nilakapo tabo ka꞉kiyawaonakia꞉ inamabu epetapi ega꞉walo mani la꞉godone kuwatema꞉, iyo, Godote aimano nanitabo tanalo atumu iyatawala aimano tepo magumuno wokilo ebako a꞉da꞉ elemasigi tanalote la꞉tamo kitanatia꞉! \v 6-7 Numa꞉la꞉, ale Kelisokono alibolepima꞉ dedaonama꞉ ebe tanalo kawonomamo malagidiloa꞉no ale la꞉ kanaletanakia꞉ iyaiya inamabu epetapi ega꞉walo mani atamo gito kikaeamoa꞉ema꞉, iyo, aimano woko osiyodilo magumulo ale epono amama tanalo la꞉godolo ega꞉walo epetapiagodolo kowadinakia꞉, wiyasiya ale la꞉ wadenomamo anikulamenapiata, menokote ebeno gudi wadenomamo danikulamenanako eba kunu. \p \v 8-9 O aimano nanitabokobi midipi ekakiala꞉, ale la꞉ kawonomamo nemalagidilolenata, ebe mabuma꞉ ale Godogodone da꞉pena ebe Wade Tabo la꞉tamo eba ikalamelo la꞉ mabuma꞉ aimano igilo iyabaiamo ebo alomonakima꞉. Nanitabola, aimano nilakapo la꞉tamo da꞉pesoma꞉ keda꞉namia꞉, ebema꞉ ale la꞉ magumulo temeteme woko eba osiyodilolo kebe kodakoda tanalo kulamenakima꞉, na iyatawala la꞉ ebe tanalo ka꞉dodolomatila꞉wena꞉. Iyo, idoko ega꞉walo egela ale aimano kotamo woko osiyodilonakima꞉ a a꞉ka꞉tuwa꞉ aimano iyaiya modoboa꞉ tanalo kulaema꞉, mabu ale Godokono Wade Tabo kiyawao woko la꞉godolo eba posiyodilolo ale da꞉peso temeteme idi la꞉tamo kikalametama꞉ ubia꞉noma꞉ eda꞉onakima꞉. \p \v 10 Nanitabola, ale ebe tetelo la꞉ nanitabokobi midipi magumulo kebe tanalo kosiyodilolenakima꞉ ebe tanalo ebe tuputupu-ibinomola, kuba osiyodilo tanalo kapiya idite agodolo kitananakia꞉. Iyo, la꞉ ega꞉walo Godoko la꞉le aimano wade-talena ilukuli tanalo iyatawanomolata, \v 11 ega꞉walo la꞉ me tanalo idi iyatawalata, nabiate ibino gudi keba kunu kowalubilinake, ale la꞉ bilibilinomo eba kunu walubilinakiyata. \v 12 Numa꞉la꞉, iyaiya tete epetapilo ale la꞉ wade tabono tanalamo eba walubililo la꞉ analenakiyata la꞉le la꞉imano ilukuli magumulo Godokono wadewade ga꞉limapi gudima꞉ keda꞉wenama꞉, mabu ebe Kawodawate la꞉ ka꞉la꞉mi katepana꞉ la꞉le ebeno Kawo Elawodawano duliyomolono pukuilame tanalo kawonomo eba꞉go kapimiya kelawa꞉ema꞉. \v 13 Ebema꞉ modobola ale tete bilibilinomolo Godotamo kalakala tabo begelanama꞉, mabu Godogodone da꞉pena la꞉le ebe tabo agodone dolowiaima, ebe tetelo la꞉le me opo lumagino taboma꞉ kegelawea꞉, wiyasiya la꞉le kodakodalo lawa꞉wete Godokono nani tabonomoma꞉ midimata. Nanitabola, ebe tabo Godokonola, ebema꞉ kebe lumagite ebe nanitabokobi da꞉midina, ebe tabote ebe magumulo wade woko bosiyodilonamene. \s1 Ya꞉suko Mabuma꞉ Temeteme Tanalate Tesalonaika Nanitabokobi Midipiatamo Demaimiya \p \v 14 Ebema꞉ aimano nanitabokobi midipi ekakiala꞉, Godokono tabote la꞉ magumulo woko dosiyodilona, a ebe tanalo iyatawala mabu ebeno sosi epate Yudiya opono iyaiya duliyomololo dilukuliona, ebe nanitabokobi midipiatamo kebe temeteme tanalate kemaimiyale ebe atu tanalate la꞉tamo a꞉kemaimiya. Iyo, la꞉imano opo epate la꞉tamo kebako temeteme kikalametia, dopamo tetelo Yu epono opolo epetapiate Ya꞉su Kelisokono waloma꞉tapiatamo ebako atu temeteme ebe kikalamiya. \v 15 Ebema꞉ modobola la꞉ ebe nanitabokobi midia꞉ Yu epono tanalo nemalagidilala꞉, Godokono elawo tanalote iba꞉tamo kawonomamo itana, mabu iba꞉te epo nodiyobolena ebetamo pelaema꞉! Iyo, iba꞉te dopamo Godokono woki awokalimipi danakapulamenakiya, ebene ebe atu gabodo Kawodawa Ya꞉suko akanakapumiya ega꞉walo a ebe nanitabokobi midipi aimano opone elawamo gito a꞉na꞉ma꞉ateiya. \v 16 Ebene ale aimano opo atepate mulu opolo dilukuliona ebe Yua꞉piatamo tolamete Godokono igilo mula꞉ tabo iba꞉tamo kiyawao eba nowagilimilo, wiyasiya ebolo Yu epo epetapiate a odiyoboema꞉ atumu kowageliya. Ebema꞉ numa꞉la꞉, iba꞉te uwomu tetelo me kawo kubanomo idi eba osiyodilolo Godokono ololo apulo ibino kuba osiyodilole tanalate etabokai, me mabuma꞉ ebeno kawo dowa tanalonomote iba꞉tamo a꞉pemaiga! \s1 Polote Tesalonaika Sosi Epatamo Walo Toma꞉ Ubi Da꞉kiyatiya \p \v 17-18 Ebema꞉ aimano nanitabokobi midipi ekakiala꞉, ale la꞉ da꞉miyapatia ebe tetene wagilimite me teta꞉mo pemaiga, ale tete da꞉pesolo aimano katene apa꞉mo iyaiya eba ilukula꞉tepalo wiyasiya aimano tepo magumuno wokilo ale la꞉go kapiyanomoma꞉ eda꞉onatima꞉. Ebe mabuma꞉ tete bilibilinomo epetapilo ale ubi kawonomamo iyatinakima꞉ la꞉tamo kapimiya pelamete la꞉imano ololo walo ka꞉ka꞉pulaema꞉, ega꞉walo tete epetapilo na Poloko na a꞉ka꞉tuwa꞉ pema꞉ wagelenakimo wiyasiya Saitanate a nodiyoboenaki. \p \v 19 Nanitabola, aimano ubi la꞉tamo kawonomamo bitana. Numa꞉la꞉, la꞉ aimano kalakala tanalono mabulata, ebema꞉ ale Ya꞉sukono pe tanalo nemakopelenama꞉ mabu ale la꞉ ebeno ololo apulo walo da꞉kulametamene, ebe tetelo aimano kalakalate kawonomoma꞉ ka꞉keda꞉mene. Iyo, ale Saitanatamo gowela magumulo delaima꞉, la꞉ ebe ebe wato kikopulata, \v 20 mabu ale Ya꞉su Kelisoko magumulo eba ilukulinalo, la꞉ aimano amama tanalolata ega꞉walo aimano kalakala mabulata. \c 3 \s1 Polote Tesalonaika Sosi Epo Ka꞉nowalubilima꞉ Timotiko Danalibiya \p \v 1 Numa꞉la꞉, ale la꞉tamo kapimiya pelaema꞉ gabo nipo dowadima꞉, ebema꞉ aimano tepo magumulo woki bilibilima꞉ eba eda꞉olo ale negelima꞉, “Modobola a epetapiate me A꞉tenese duliyomololo eba ilukulilo, \v 2 a magumulo aimano nanitabokobi mididawa ekawi Timotiko kapiya kanalibomalema꞉.” Nanitabola, ale Ya꞉sukono Wade Tabo da꞉kiyawaonakoma꞉ Timotite ago kapimiya Godokono wade woko bosiyodilona, ebema꞉ ale ebe la꞉tamo apalibima꞉ ebete la꞉ eba powalubililo la꞉le nanitabokobi midi magumulo kodakodalo kelamota꞉wenama꞉, \v 3 mabu a ubia꞉nola nanitabokobi midia꞉pino temeteme ikalame tanalodo la꞉ magumulo idi kapiyate kubanu alegama꞉. La꞉ iyatawanomolata mako temetema꞉te Godokono ubilo a nanitabokobi midipiatamo pemaimionaka, \v 4 mabu a la꞉go eba pilukulilo ale la꞉ ma kunu analiata, “Nanitabokobi midia꞉piagodone temeteme tanalate atamo ka꞉pemaimioma꞉na꞉.” Iyo, nanitabola, me tetelo la꞉ iyatawanomolata ebe tanalote la꞉tamo emaigi. \v 5 Ebema꞉ numa꞉la꞉, nale me tanalo eba malagidilolo Timotiko ebema꞉ palibimo, iyo, la꞉ mabuma꞉ nale naimano tepo magumulo woki bilibilima꞉ eba eda꞉lo ubi ebo iyatimo, ebete la꞉go eba pokolilo la꞉imano nanitabokobi midi tanalo wadenomamo ka꞉pulamelelametama꞉. Ebe tetelo na ubia꞉nola la꞉ epetapiate Saitanakono kuba tanalamo wabuga꞉ta gabamo da꞉guda꞉ima ebete ebe tanalo puima꞉, mabu mako tanalote la꞉tamo nemaigataleka꞉, ale kebe kodakoda woko la꞉ magumulo kosiyodilima꞉ ebe wokote gito ba꞉kubana꞉! \p \v 6 Wiyasiya Timotite la꞉godone atamo walo da꞉ka꞉pi, ebe tetelo ebete la꞉ mabuma꞉ wade tabonomo atamo adai, ma kunu la꞉imano nanitabokobi midi tanalote Godotamo kodakodalo itana ega꞉walo la꞉imano nilakapo epetapiatamo atumu ba꞉kitana, ega꞉walo ebete a napanai la꞉ tete bilibilinomolo a nilakapolo keba kunu kemalagidiloa꞉wenama, iyo, ale la꞉ ulaema꞉ ubi kawonomamo diyatinama꞉ la꞉ atumu a uaema꞉ ubi na꞉kiyatinamata. \v 7 O aimano nanitabokobi midipi ekakiala꞉, Timotite la꞉imano nanitabokobi midi tanaloma꞉ a da꞉pikiyawaoami ebe tabote a nanitabolo kalakala ikaeami! Ebe mabuma꞉ ale aimano mibomibo tanalo ega꞉walo iyaiya temeteme tanalo kawonomamo a꞉kemalagidilolema꞉, \v 8 mabu kebe tetelo la꞉ Kawodawa Ya꞉suko magumulo kodakodalo delamota꞉wenama, ale ebe tanalo dolowima꞉ ebe tetelo a kawo kalakala lawete aimano ilukuli magumulo woki bilibili tanalo idite nanitabolo a꞉kitanamene. \v 9 Ebema꞉ ale Godokono ololo apulo delamota꞉onama꞉ la꞉ mabuma꞉ aimano kalakala beda꞉ kawonomola꞉ka꞉! Iyo, ale aimano kalakala tabo ebetamo eba wadipalatelelo, \v 10 egela ega꞉walo idoko bilibilinomolo ebe na꞉toweomenakoma꞉ ebete a gabo diyatuamemene, ale pelamete la꞉imano ololo eba pulamelo kebe modoboa꞉ tanalate la꞉imano nanitabokobi midi magumulo da꞉pola꞉na ebe iyaiya tanalo ka꞉pa꞉tuputupuilaemalema꞉. \p \v 11 Ebema꞉ modobola aimano Nabiwi Godoko ega꞉walo aimano Kawodawa Ya꞉suko iba꞉te gabo nosiyodiloma꞉na꞉ ale la꞉tamo ka꞉pelaema꞉. \v 12 Ega꞉walo modobola Kawodawate la꞉imano tepo magumulo ebeno nilakapo kimalagidilo tanalo kawonomoma꞉ na꞉midimene, ebene la꞉ magumulo epetapiate epetapi nilakapolo eba malagidilolelo la꞉le opo epo epetapi bilibilinomo atumu kawonomamo bemalagidilolenamata, ale la꞉ keba kunu kemalagidiloletana eba kunu. \v 13 Ega꞉walo modobola aimano Kawodawa Ya꞉sute me gabodo la꞉imano tepo magumu na꞉kodakodailaemene, ebene ebete ebeno talena waloma꞉tapi bilibilinomago walo da꞉ka꞉pemene, ebe tetelo la꞉le aimano Nabiwi Godokono ololo apulo tuputupupinomoma꞉ eba eda꞉olo ebo ka꞉nelamota꞉onamamota, mabu la꞉ magumulo kapiya kuba idite a꞉kitanamene. \c 4 \s1 Nanitabokobi Midipiate Ibino Ilukuli Magumulo Godoko Keba Kunu Na꞉kekalakalaiminama꞉na꞉ \p \v 1 Ebema꞉ aimano nanitabokobi midipi ekakiala꞉, la꞉ dopamo agodone iyatawaimata la꞉imano ilukuli magumulo la꞉ Godoko keba kunu na꞉kekalakalaima꞉wenama, ebema꞉ aimano kalakala bitana mabu la꞉ eba kunu bilukulinamata. Ebene me leta uwomu apulo ale me tanaloma꞉ la꞉ Kawodawa Ya꞉sukono mailamo walo kawonomamo nakanaleta, modobola la꞉ ebe tuputupu ilukuli magumulo eba pola꞉nalo la꞉imano wadewade osiyodilole magumulo napepeonala꞉, \v 2 iyo, ale dopamo Ya꞉sugodone uwatete la꞉tamo dikalametia ebe iyaiya totomu tabono tanalo la꞉ iyatawalata. \v 3 Ebema꞉ la꞉ mabuma꞉ Godokono ubi ma kunula, la꞉le ebeno talena okoli tanalo magumulo eba pola꞉nalo buwele pilo tanalo ega꞉walo dubu idino kamiyale pilo tanalo makomako kuba tanalo ako-osiyodilola꞉la꞉. \v 4 Modobola, la꞉ bilibilinomate wiyasiya wadewade ega꞉walo talena ilukuli woki kapiya nuwatiyala꞉, tete bilibilinomolo la꞉imano kateneno kuba ubi tanalate la꞉imano tepo magumuno wade mulo wokino tanalamo nanitabolo ka꞉tudila꞉onama꞉. \v 5 Numa꞉la꞉, piyate ibino kateneno iyaiya ilipo tanalo elawonomamo dowaloma꞉talena ebe kuba osiyodilolepiate Godokono tanalo iyatawa꞉, ebe mabuma꞉ ebe ubia꞉nola la꞉le ibi keba kunula꞉ka꞉ ebako epoma꞉ eda꞉oma꞉. \v 6 Iyo, la꞉le nanitabokobi midi magumulo kapiya alailame gudima꞉ eba eda꞉onalo, modoboa꞉ idite ebeno lumagitamo kateneno kuba ilipo tanalo osiyodiloma꞉, ega꞉walo modoboa꞉ idite a꞉da꞉ elemasigi gabodo ebeno ekawino wade tanalo idi pilolo laema꞉. \p Nanitabola, ale dopamo la꞉ kawiya ma kunu analiata, piyate mako kuba tanalo dosiyodilolena Godote iba꞉tamo wiya nanitabolo kikalaemene. \v 7 Numa꞉la꞉, Godote a nanitabokobi midipiate ebeno talena okoli tanalo magumulo ka꞉pola꞉nama꞉ a iyalo eka꞉miya, iyo, ebe ubia꞉nola ale kateneno kubakuba ubi tanalono osiyodilole magumulo kilukulinama꞉. \v 8 Ega꞉walo me tanalo idila. Godote ebeno Uliyana la꞉tamo nikalamenata la꞉le ebeno talenapima꞉ keda꞉wenama꞉, ebema꞉ la꞉ magumulo idite aimano iyatulame tabo ubia꞉noma꞉ deda꞉na, ebete me opo lumagino totomu taboma꞉ ebeno ubia꞉ tanalo kawokalimina꞉, ao, ebeno osiyodilo magumulo ebete Godokono totomu taboma꞉ ebeno ubia꞉ tanalo awokalimina. \p \v 9-10 Ega꞉walo modobola la꞉ me tanalo idi na꞉kuma꞉la꞉, la꞉le nanitabokobi midipi nilakapolo kemalagidilola꞉wenama꞉ Godote la꞉ dopamo iyatulamiata. Nanitabola, la꞉le ebeno tabamo tudila꞉olo Ma꞉sadoniya opono nanitabokobi midipi ekaki bilibilinomo na꞉nilakapoilamenakomata, wiyasiya aimano ekakiala꞉, kuba꞉ ale me leta magumulo Godokono nilakapo kimalagidilo tanaloma꞉ la꞉ walo kakanaletama꞉, iyo, a ubi kawonomola me kapiya tabo idi la꞉ kanalema꞉ta, modobola la꞉ Godokono nilakapo magumulo walo nakapepeala꞉. \v 11 Ebema꞉ la꞉ la꞉imano ubi kawonomamo ma kunu niyatinala꞉, la꞉le epo epetapiago milolo eba ilukulinalo epetapino tanaloma꞉ tabo gela꞉no la꞉ a꞉ka꞉tuwa꞉ la꞉imano ilukuli tanalo kapiya wadenomamo kulaemamota. Ega꞉walo kebe iyaiya modoboa꞉ tanalo la꞉godolo da꞉pola꞉na, mani woko kelekele osiyodilole magumulo la꞉ a꞉ka꞉tuwa꞉ ebe tanalo na꞉modoboilamenakiyala꞉, ale la꞉ dopamo keba kunu kanaletia eba kunu. \v 12 Numa꞉la꞉, la꞉ me tanalamo nanitabolo da꞉tudila꞉oaema, ebe tetelo la꞉ mani ega꞉walo inamabu epagodone gito uwatema꞉ temeteme iba꞉tamo a꞉kikalama꞉ema, iyo, ebe mabuma꞉ nanitabokobi midia꞉piate la꞉imano tuputupu osiyodilole tanalo dulamelelametamene iba꞉te la꞉ wadewade epoma꞉ ebo kegelama꞉na꞉. \s1 Kawodawa Ya꞉sukono Pe Tanalo \p \v 13 Aimano nanitabokobi midipi ekakiala꞉, piyate nanitabokobi midi magumulo da꞉elaiya, a ubila la꞉ ibino nanitabo tanalo wadenomamo niyatawala꞉, la꞉le ibino a꞉elao tanaloma꞉ tepo magumulo mibomibo lawekapoma꞉. Numa꞉la꞉, nanitabokobi midia꞉piate ibino epono a꞉elao tanaloma꞉ kubanomamo iminaka, mabu iba꞉te Ya꞉sukono kalakala tanalo ega꞉walo ebeno pe tanaloma꞉ olowiolo kemakopelena꞉. Wiyasiya la꞉ ibi keba kunula꞉ka꞉ eba kunu akoeda꞉oala꞉, \v 14 mabu a nanitabokobi midipiate iyatawala, Ya꞉sute da꞉iya ebete igilamo walo a꞉kemaigiya, iyo, ebe mabuma꞉ piyate nanitabokobi midi magumulo da꞉elaoma꞉na꞉ Godote iba꞉tamo igilo walo ka꞉kikalaemene, ebete Ya꞉sutamo igilo keba kunu kikamiyale eba kunu, ebema꞉ kalakala kawonomola, ebeno pe egelalo ebete ibi atamo walo ka꞉kemagaelemene! \p \v 15 Ebema꞉ ka꞉lo ale la꞉ diyatulametita, me tabo Kawodawano iyatulame tabola. Nanitabola, Ya꞉sukono pe egelalo a piyate nanitabokobi midi magumulo igilolo dilukulionama꞉, Unu Duliyomolamo ka꞉nodoloma꞉ piyate dopamo da꞉elaiya ale ebe nanitabokobi midipi a꞉ka꞉dopalaema꞉. \v 16 Numa꞉la꞉, ebe egelalo Godote ebeno tabo madodo unamo adipatelo modobo tabo degepatemene, ebe tetelo me opo epate Godokono tutele diyamo ega꞉walo ebeno elawo nopodawanomono tabo madodo olowiote Kawodawa Ya꞉sute Unu Duliyomolone ebo ka꞉piwisigamene. Ebema꞉ piyate nanitabokobi midi magumulo da꞉elaiya, iba꞉te dopamo igilamo maimiote, \v 17 ebene a piyate me opolo igilolo dilukulionama꞉ Ya꞉sute a uwatete, a nanitabokobi midipi bilibilinomate eba꞉go tobolo unulo ebo kanaladabutimalema꞉. Nanitabola, ebe tetene wagilimite ale Kawodawa Ya꞉suago uwomua꞉ uwomua꞉ tetelo bilukulinama꞉, \v 18 ebema꞉ modobola la꞉ magumulo me tabono tanaloma꞉ epetapiate epetapi wadenomamo nowalubiuinakiyala꞉. \c 5 \s1 Nanitabokobi Midipiate Ya꞉sukono Pe Tanaloma꞉ Olowiolo Nemakopelenama꞉na꞉ \p \v 1-2 Ebema꞉ aimano nanitabokobi midipi ekakiala꞉, Kawodawa Ya꞉sukono Kawo Egelalo kebe iyaiya tanalate demaimioma꞉na꞉, ebe tanaloma꞉ nale me leta magumulo la꞉ kawiya akanaletama, mabu la꞉ iyatawanomolata pilo dubute idokolo keba kunu ka꞉penakole Ya꞉sute ebe Egelalo eba kunu ka꞉pemene. \v 3 Iyo, ebe egelate pea꞉no dopamo nanitabokobi midia꞉piate ma kunu begelanakoma꞉na꞉, “Aimano ilukuli tanalo wadenomola, ega꞉walo tole tanalote agodolo kitana꞉ mabu me opo epate milo tanalo magumulo ilukulina.” Wiyasiya ebe tetenomolo Godokono kawo olalati tanalonomote iba꞉tamo gito ka꞉pemaigamene, lamitu kamiyalete iyaiya tanalo eba osiyodilolelo ebeno gudu alaimi temetemete ebetamo keba kunu ka꞉pemaiganakole eba kunu. Nanitabola, ebe tetelo nanitabokobi midia꞉piatamo da꞉pemaigamene, iba꞉te ebe olalati temeteme magumune alautioma꞉ gabo nipo kowadima꞉na꞉! \p \v 4 O nanitabokobi midipi ekakiala꞉, piyate idoko kawonomolo u delaonanaka iba꞉te pilo dubuno pe tanalo kiyatawaonakoa꞉, wiyasiya la꞉imano tanalo eba kunua꞉! La꞉ idoko magumulo kilukula꞉wena꞉ wiyasiya la꞉ Kawodawano pe tanaloma꞉ olowiolo ilukulinamata, ebema꞉ ebete ebeno Kawo Egelalo da꞉pemene la꞉le ebe tanalo uma꞉wete a꞉kela꞉wa꞉omata. \v 5 Numa꞉la꞉, la꞉ bilibilinomate alo teteno gudima꞉ eda꞉onamata, iyo, a nanitabokobi midipi idoko teteno gudia꞉, \v 6-7 ebema꞉ epetapiate u delaonanaka ale ebako epoma꞉ eda꞉oma꞉ modoboa꞉, mabu idoko tete ebe ibino u lao tetela ega꞉walo idoko tete ebe ibino gamoda nio tetela. Modobola ale wiyasiya tuputupu wokilo eba ilukulinalo aimano Kawodawano pe tanaloma꞉ olowiolo kemakopelenamalema꞉, \v 8 iyo, a nanitabokobi midipi a egela teteno epola, ebema꞉ modobola ale tete bilibilinomolo tuputupu wokilo bilukulinama꞉. Ega꞉walo modobola ale Godoko nanitabokobi midi tanalo ega꞉walo nilakapo kimalagidilo tanalo, ebe netewa kawokawo tanalo aimano apa꞉mo ka꞉pupulimalema꞉, gowelaodawate ebeno negege inamabu da꞉pulinako eba kunu. Ega꞉walo ale aimano igilo mula꞉ tanalo Ya꞉sugodone nanitabolo laema꞉, modobola ale ebeno pe tanaloma꞉ olowiolo bemakopelenama꞉, mabu ebako olowio tanalo ebe goweladawano diba keba kunula꞉ka꞉ eba kunula. \p \v 9 Numa꞉la꞉, Godote a keka꞉miya꞉ ebete aimano kuba osiyodilole mabuma꞉ ebeno kawo dowanomo magumulo wiya atamo kikaeaema꞉. Ao, ebete wiyasiya a uwateiya ale aimano Kawodawa Ya꞉su Kelisokono woko tanalodo aimano igilo mula꞉ tanalo kelaema꞉, \v 10 mabu Ya꞉sukono a꞉e tanalono magumu ma kunula, ebe ubila ale uwomua꞉ uwomua꞉ tetelo eba꞉go kilukulinama꞉. Ebema꞉ kalakala kawonomola, nanitabokobi midipi magumulo piyate dopamo da꞉elaiya ega꞉walo piyate ebeno pe egelalo me opolo dilukulionama꞉na꞉ ibi bilibilinomate kapiya tetelo ibino nanitabo kalakala ebegodone ka꞉nelaema꞉na꞉. \v 11 Iyo, me mabuma꞉ modobola la꞉ la꞉imano tabono tanalamo ega꞉walo la꞉imano osiyodilole tanalamo la꞉ magumulo epetapiate epetapi wadenomamo nowalubiuinakiyala꞉, la꞉ me tetelo keba kunu kosiyodilawenama eba kunu. \s1 Polote Leta Uwomu Apulo Iyatulame Tabo Epetapi Da꞉kiyawaiya \p \v 12 Aimano nanitabokobi midipi ekakiala꞉, ale la꞉ analeta la꞉imano nanitabokobi midi magumulo piyate Kelisokono nanitabo gabo ega꞉walo okoli tanalo la꞉ iyatulaema꞉ woko dosiyodilona, modobola la꞉ la꞉imano tepo magumuno wokilo ibi unamo eba wadipalatelelo ibino tabamo na꞉tudila꞉onala꞉. \v 13 Numa꞉la꞉, iba꞉te la꞉ kowalubilitama꞉ wade woko osiyodilona, ebema꞉ modobola la꞉ ibino tabamo wadenomamo eba tudila꞉olo ibi nilakapolo nemalagidilolenala꞉. Ega꞉walo me tanalo idila, modobola la꞉imano taneba magumulo la꞉ bilibilinomate milolo nilukulinala꞉. \p \v 14 Ebema꞉ aimano nanitabokobi midipi ekakiala꞉, ale la꞉ kawiya nanaleta la꞉ magumulo piyate damolama꞉ deda꞉ona, modobola la꞉le ibi nanala꞉la꞉ woko nanitabolo kosiyodilolenama꞉. Ega꞉walo piyate ibino nanitabokobi midi magumulo ilipo diyatawaona ega꞉walo piyate elawoa꞉noma꞉ deda꞉ona, modobola la꞉le la꞉imano tabamo ega꞉walo osiyodilole tanalamo ibi nowalubiliyala꞉, iyo, la꞉le iyaiya epo epetapi bilibilinomo la꞉imano tabamo dowalubila꞉wenakoma la꞉le iba꞉tamo samamo ubia꞉noma꞉ akoeda꞉onakala꞉. \v 15 Ega꞉walo me tanalo idila. La꞉imano ilukuli magumulo idite iditamo kuba dosiyodilomene, ebe tetelo temeteme lawedawate kuba osiyodilodawatamo wiya akoikama꞉la꞉, wiyasiya modobola la꞉le tete bilibilinomolo la꞉imano ubi kawonomamo niyatinakiyala꞉, la꞉ magumulo idite iditamo nilakapo eba awokalimilo iyaiya epo epetapi bilibilinomatamo atumu wadewade tanalo kapiya ka꞉kosiyodilola꞉wenama꞉. \p \v 16 Ebene tete bilibilinomolo la꞉le Godokono kalakalago eba ilukulinalo, \v 17 idoko ega꞉walo egela bilibilinomolo eba꞉go tabo gela tanalo atepa꞉no, \v 18 wadewade tanalate maimio tetelo ega꞉walo olalati tanalate maimio tetelo ebetamo kalakala tabo nowadipalatelenakiyala꞉. Nanitabola, me netewa-kapiya tanalo ebe Godote la꞉imano ilukuli magumulo ulaema꞉ ubi diyatina ebe tanalola, mabu la꞉le Ya꞉su Kelisoko magumulo eba ilukulinalo ebe wadewade tanalate la꞉godolo nemaimionakoma꞉na꞉. \p \v 19 Ebema꞉ Godokono Talena Uliyanate kebe woko kosiyodilonale ebe woko ako-odiyobala꞉, \v 20 iyo, kebe tetelo lumagi idite Godokono woki nanitabonomolo dawokalimene, modobola la꞉le ebe tabo lawa꞉wete kubama꞉ akogelala꞉. \v 21 Wiyasiya la꞉ nanisiwale, epate kebe iyaiya tabono tanalo Godokono mailamo da꞉kiyawaonaka, la꞉le ebe tabono tanalo bilibilinomo la꞉imano wade wokiamo anagilama꞉wete nani tabonomoma꞉ samamo akogelala꞉. Me gabodo la꞉le Godokono nani tabono iyaiya tanalo kodakodalo eba watila꞉mota꞉nalo, \v 22 iyaiya kuba tabo ega꞉walo osiyodilole tanalo bilibilinomo la꞉le walogabo apuamo na꞉midaliyala꞉. \p \v 23 Nanitabola, kebe dawate a nanitabokobi midipiatamo milo dikaeamena, ebe Kawodawa ebe Godotela, ebema꞉ ale la꞉ mabuma꞉ ebe ma kunu toweomenakoma꞉, ebete la꞉imano ilukuli tanalo bilibilinomo magumulo la꞉ ebeno nani talenapima꞉ eba midililo, ebete la꞉imano uliyanano woki ega꞉walo tepo magumuno ubi tanalo ega꞉walo ape kawonomono osiyodilole tanalo wadenomamo nulamelelamenakoma꞉ta. Kalakala kawonomola, me gabodo Kawodawa Ya꞉su Kelisokono pe tetelo kuba da꞉peso idite la꞉ magumulo a꞉kitanamene. \v 24 Numa꞉la꞉, Godote la꞉ ebeno talenapima꞉ keda꞉oaema꞉ ka꞉la꞉minata, ebema꞉ ebe modobola ebete ebe wade woko la꞉ magumulo opoliyama꞉, iyo, ebete kebe tanalo osiyodilolema꞉ tabo da꞉kiyawaona ebete ebe iyaiya tanalo nanitabonomolo bosiyodilolenakomene. \p \v 25 Ebema꞉ aimano nanitabokobi midipi ekakiala꞉, modobola la꞉ atumu a mabuma꞉ Godotamo na꞉towetoweonakiyala꞉, \v 26 ega꞉walo la꞉ daladabuta꞉wenakoma, modobola la꞉ bilibilinomo epetapiate epetapino koto uwateuilo na꞉wiyamidauinakiyala꞉. \v 27 Na Polote Godokono mailamo la꞉ ma kunu analemata, la꞉ me leta nanitabokobi midipi ekaki bilibilinomatamo neka꞉la꞉mioliyala꞉. \p \v 28 Modobola aimano Kawodawa Ya꞉su Kelisokono nilakapo tanalote la꞉godolo nitanamene. Me ebe naimano tabo uwomula. Taula. \fig La꞉le Godago tabo gela tanalo akatepala꞉|alt="Group praying on knees" src="CN02076B.tif" size="span" loc="1/2 of page" copy="1978 David C. Cook Publishing Co." ref="5.17" \fig*