\id 1JN - Tabo (Fly River dialect) NT - Papua New Guinea 2006 (DBL 2014) 
\h 1 Yon 
\toc3 1 Yon 
\toc1 Yonekono Dopo Leta Ebete Nanitabokobi Midipiatamo Osiyodiliya 
\toc2 1 Yone 
\mt1 YONEKONO DOPO LETA  
\mt2 EBETE NANITABOKOBI MIDIPIATAMO OSIYODILIYA  
\c 1  
\s1 Igilo Tabono Tanalo  
\p
\v 1 La꞉ olowiopiala꞉, ale Igilo Tabono tanalo me leta magumulo la꞉tamo dawokalimitama꞉, ebe Tabote dopamo wagilimi mabune dokolinami ebe Kawodawala. Nanitabola, ale me tetelo ebe Tabono tanalo aimano galamo olowiote ega꞉walo aimano balidinomamo a꞉kumiyama꞉, iyo, ale umite aimano kotonomamo ebe atumu ologiyama꞉.  
\v 2 Mabu ebe Igilote me opolo awokaliya ega꞉walo ale aimano balida꞉mo ebe umiyama꞉, ebema꞉ ale ebeno tanalo awokalimilo Nabiwi Godokono uwomua꞉ igilo tanaloma꞉ la꞉tamo me tabo ebema꞉ kiyawautama꞉. Numa꞉la꞉, kebe Igilote dopamo Godago dokolinami, ebe Igilo ebe walone atamo dapawokaliya ebe atu Igilola.  
\v 3 Ebema꞉ mabu keleka꞉ ale ulamete dolowiyama꞉ ebe tanalo la꞉tamo da꞉kiyawautama꞉? Mabu bitana a ubila la꞉ olowiopiate ago kapiyama꞉ eda꞉oma꞉, ale Nabiwi Godago ega꞉walo ebeno Gudu Ya꞉su Kelisago kapiyama꞉ keba kunu keda꞉onama꞉ eba kunu,  
\v 4 ebema꞉ nanitabola, ale me leta nosiyodiloma꞉, la꞉la, ala, a bilibilinomono kalakalate kawonomoma꞉ keda꞉ma꞉.   
\s1 Godokono Alo Magumulo Wapata꞉lame Tanalo  
\p
\v 5 Nanitabola, ale Godokono Gudugodone dolowiyama꞉ ebe atu tabo ma kunu ka꞉kiyawautama꞉, Godoko ebe alola, ebegodolo idoko tanalo idite kitana꞉, puliyanomola.  
\v 6 Ebema꞉ ale idoko magumulo eba wapata꞉lamelo ma kunu degelama꞉, a eba꞉go kapiyanomoma꞉ eda꞉onama꞉, nanitabola, a a꞉da꞉ elemasigipila mabu ale aimano ilukuli magumulo a꞉da꞉ gabodo tolamenama꞉.  
\v 7 Wiyasiya Godote alo magumulo keba kunu kokolinale ale eba kunu ebeno alo magumulo dowapata꞉lamenama꞉, ebe tetelo ale ebe magumulo eba ilukulionalo kapiyanomoma꞉ beda꞉onama꞉, iyo, ebeno Gudu Ya꞉sute ebeno kalimamo aimano kuba osiyodilole tanalo bilibilinomo bukulaleamenakomene.   
\p
\v 8 Numa꞉la꞉, kebe tetelo a a꞉ka꞉tuwa꞉ a kuba osiyodilolea꞉pima꞉ degelama꞉, a a꞉ka꞉tuwa꞉ a a꞉da꞉ kelemasigiomalema꞉, ebene agodolo nanitabo tanalote a꞉kitanamene.  
\v 9 Wiyasiya ale aimano kuba Godotamo dawokalilaema꞉, ebete a walubima꞉ kebe tabo dopamo da꞉kiyawaiya ebe tanalo ebete nanitabo tuputupu gabodo kosiyodilomene, iyo, ebete aimano iyaiya kuba osiyodilole tanalo egeboleamete ka꞉dodolomatiliaemene, ega꞉walo ebete aimano tepo magumuno kubakuba daleya kukulaoleaemene.  
\v 10 Me mabuma꞉ a a꞉ka꞉tuwa꞉ a kuba osiyodilolea꞉pima꞉ degelama꞉, ale ebe tabamo Godoko a꞉da꞉ dawama꞉ midilo ebeno nani tabote a magumulo a꞉kitanamene.   
\c 2  
\s1 Ya꞉su Kelisoko Ebe Aimano Walubidawala  
\p
\v 1 Naimano guda꞉la꞉, nale me tabo me letamo akulolete la꞉tamo palibomo la꞉le kuba idi Godotamo osiyodilokapoma꞉, wiyasiya kebe tetelo a magumulo lumagite kuba dosiyodilomene, ebe tetelo ebe walubima꞉ aimano Tuputupudawa ba꞉luta, ebe Ya꞉su Kelisotela, towetowe tabamo a Nabiwi Godotamo dowadipaeatenako ebe Walubidawala.  
\v 2 Nanitabola, Godokono dowa tanalote atamo dopamo emaigiya mabu a kuba osiyodilolepila, wiyasiya Kelisote aimano iyaiya kuba osiyodilole tanalo ebeno kalimamo degeboleamiya, ebe tetelo ebete Godokono dowa tanalo opoliyate a Godago kapiyakobi a꞉midiya. Wiyasiya numa꞉la꞉, ebe osiyodilo tanalodo ebete a nanitabokobi midipi kapiya kowalubiya꞉, ao, ebete ebe atu tetelo me opo epo bilibilinomo walubilima꞉ ibino iyaiya kuba tanalo ebeno kalimamo egebolelamiya.   
\p
\v 3 Ebema꞉ ale Godokono totomu tabamo da꞉tudila꞉oma꞉, me gabodo a ebeno tanalo nanitabolo kiyatawaomalema꞉.  
\v 4 Iyo, lumagi idite Godokono totomu tabamo tuduwata꞉no ma kunu degemene, “Na Godokono tanalo iyatawala,” ebe a꞉da꞉ elemasigidawala, ebegodolo nanitabo tanalote kitana꞉,  
\v 5 wiyasiya kebe lumagite Godokono tabamo tuduwatate nanitabolo dosiyodilomene, ebeno nilakapo kimalagidilo tanalote ebe lumagino tepo magumulo ketabokamene. Ebema꞉ ale Godoko magumulo dilukulionama꞉, a keba kunu na꞉kiyatawaoma꞉?  
\v 6 A ebe tanalo ma kunu kiyatawaomalema꞉, potele Godoko magumulo okolinama꞉ degemene, modobola Kelisote keba kunu kepata꞉namile ebete eba kunu nepata꞉namene.   
\s1 Ya꞉sukono Oli Totomu Tabo  
\p
\v 7 Naimano wadewade namutupiala꞉, nale me leta magumulo Ya꞉sukono oli totomuno tanalo dawokalimitamo, ebe totomu dopamo wagilimi mabune la꞉ olowiyamata, ebema꞉ me oli totomu la꞉godolo tagala totomu keba kunula꞉ka꞉ eba kunula.  
\v 8 Wiyasiya modobola ebe tagala totomute la꞉tamo olinoma꞉ walo na꞉keda꞉mene, mabu me tetelo ebeno nanitabo tanalote Kelisoko magumulo ega꞉walo la꞉ magumulo awokalanako, iyo, idoko tanalote nolopoligo, ebene nanitabo alote eba pemaigalo na꞉pukuilame.   
\p
\v 9 Ebema꞉ nale me leta magumulo oli totomuno tanalo walo ma kunu kawokalimitamo, kebe lumagite alo magumulo okolinama꞉ gelo ebeno ekawitamo da꞉dowana, ebete idoko magumulo bokolina, iyo, ebete idoko magumune ka꞉nemaiga꞉.  
\v 10 Wiyasiya kebe lumagite ebeno ekawi nilakapolo demalagidilona, ebete alo magumulo bokolina ega꞉walo ebeno osiyodilo tanalodo ebeno ekawite agowa ukamidate a꞉kegamene.  
\v 11 Nanitabola, kebe lumagite ebeno ekawitamo da꞉dowana, ebe idoko magumulo dokolina ebe dawala, iyo, ebete kebe gabodo kepata꞉nale ega꞉walo ebete kebamo ka꞉tonale, ebete ebe tanalo iyatawa꞉ mabu idokote ebeno balidi a꞉mula꞉lemi.   
\b  
\p
\v 12 Naimano guda꞉la꞉, na la꞉tamo leta nosiyodilomo mabu Godote Kelisokono elawo mailamo la꞉imano kuba egebolelametate a꞉dodolomatililamiata.   
\p
\v 13 Ega꞉walo naimano nabiala꞉, na la꞉tamo leta nosiyodilomo mabu la꞉ aimano Kawodawano tanalo iyatawala, ma kunu ebe dopamo wagilimi mabune dokolinami ega꞉walo uwomua꞉ tetelo dokolinamene ebe dawala.  
\p Ega꞉walo oli apepeo dubala꞉, na la꞉tamo leta nosiyodilomo mabu la꞉ Kuba Namutudawatamo eba gowelaolo ebeno wato kikopu ebo lawimata.  
\b  
\p Iyo, naimano guda꞉la꞉, na la꞉tamo leta nosiyodilomo mabu la꞉ Nabiwi Godokono tanalo iyatawala.   
\p
\v 14 Ega꞉walo naimano nabiala꞉, na la꞉tamo leta nosiyodilomo mabu la꞉ aimano Kawodawano tanalo iyatawala, ma kunu ebe dopamo wagilimi mabune dokolinami ega꞉walo uwomua꞉ tetelo dokolinamene ebe dawala.  
\p Ega꞉walo oli apepeo dubala꞉, na la꞉tamo leta nosiyodilomo mabu la꞉ elawoelawonomolata, ebene Godokono tabote la꞉ magumulo eba itanalo la꞉ Kuba Namutudawano wato kikopu ebo lawimata.   
\s1 Me Opono Inamabu Ega꞉walo Iyaiya Amama Tanalo Kawonomamo Akomalagidilolenala꞉  
\p
\v 15 Ebema꞉ la꞉ nanisiwale! Me opono inamabu ega꞉walo ebeno iyaiya amama tanalo kawonomamo akomalagidilolenala꞉, mabu kebe lumagite me opono iyaiya tanalo kawonomamo demalagidilolena, ebete Nabiwi Godoko nilakapolo malagidilonama꞉ modoboa꞉.  
\v 16 Ebema꞉ me opono iyaiya tanalo keba kunula꞉ka꞉? Ebe iyaiya tanalo ebe kuba epate kateneno ubilo demalagidilolenaka ebe tanalola, ega꞉walo iba꞉te balida꞉mo ulamete ibino ubilo duwatenaka ebe tanalola, ega꞉walo iba꞉te kebe tanalo osiyodilolelo damamaonaka ebe tanalola. Numa꞉la꞉, ebe iyaiya kuba tanalo bilibilinomate me opo epono wokine pemaimionaka, Nabiwi Godogodonea꞉!  
\v 17 Ebema꞉ me tanalo ebe nanitabola, me opo ega꞉walo me opono kuba ubi tanalate nolopoligona, wiyasiya kebe lumagite Godokono ubi tanalamo da꞉tuduwatamene, ebete uwomua꞉ igilago bokolinamene.   
\s1 Kelisotamo Gowela Tanalo Osiyodilodawano Tanalo  
\p
\v 18 Naimano guda꞉la꞉, me opono uwomu tete netatali. Iyo, dopamo la꞉ ma kunu olowiyamata, Kelisotamo Gowela Tanalo Osiyodilodawate na꞉pe, ebema꞉ nanitabola, dubu epetapi bilibilinomate iyalo emaimiya Kelisotamo gowela tanalo kosiyodilolenakoma꞉, iba꞉te me tetelo me opolo bilukuliona. Ebema꞉ a me tanalone niyatawaonama꞉, me tete ebe me opono uwomu tetela.  
\v 19 Numa꞉la꞉, ebe dubate aimano taneba datepiya, ebe mabuma꞉ iba꞉te aimano taneba epoma꞉ nanitabolo keda꞉ona꞉. Kebe tetelo iba꞉te aimano tanebapima꞉ neda꞉onataleka꞉ iba꞉te a magumulo bilukulionana꞉, wiyasiya iba꞉te a nanitabolo da꞉miyapaiya ebe tanalote a niyatuamena, ibi magumulo lumagi idite aimano tanebadawama꞉ keda꞉na꞉.   
\p
\v 20 Wiyasiya la꞉imano tanalo iyanomola. Kelisote ebeno Wade-talena Uliyana la꞉ unamo dadipaniya, ebema꞉ ka꞉lo la꞉ bilibilinomate Godokono nanitabo tanalo iyatawala.  
\v 21 Iyo, la꞉ daedale kimalagidilago kilukuliawena꞉, wiyasiya la꞉ Godokono nanitabo tanalo iyatawanomolata, ma kunu a꞉da꞉ tabo idite ebegodone ka꞉pemaiganakoa꞉. Nanitabola, ebe mabuma꞉ nale me leta la꞉tamo osiyodilomo.  
\v 22 Ebema꞉ la꞉ magumulo a꞉da꞉ elemasigidawa potelela꞉ka꞉? Ebe Kelisotamo gowela tanalo dosiyodilona ebe lumagila, ega꞉walo ebe potele degena Ya꞉suko Kelisotea꞉ ebe dawala. Numa꞉la꞉, ebako lumagite Nabiwi Godoko ega꞉walo ebeno Gudu Ya꞉suko ubia꞉noma꞉ eba eda꞉nalo ebe tanalo awokala ebo genako.  
\v 23 Iyo, kebe lumagite Godokono Guduno tanaloma꞉ ubia꞉ tabo awokala degena, ebete atumu Nabiwi Godotamo ubia꞉ tabo kegena, wiyasiya kebe lumagite Godokono Gudu anikuima꞉ awokala degena, ebete atumu Nabiwi Godoko anikuima꞉ kegena.   
\p
\v 24 Ebema꞉ la꞉le dopamo wagilimi mabune kebe nani tabo kolowiawiyama, modobola la꞉ magumulo ebe tabote nitanamene. Nanitabola, la꞉ ebe tabo kodakodalo datila꞉wenama, ebema꞉ la꞉ Nabiwi Godoko ega꞉walo ebeno Gudu Ya꞉suko ibi magumulo bilukulionamata.  
\v 25 Iyo, numa꞉la꞉, Godago ilukuli tanalo ebe uwomua꞉ igilola, Ya꞉sute atamo ikaeaema꞉ nanitabolo degiya me ebe tanalola.   
\p
\v 26 Ebema꞉ piyate la꞉ a꞉da꞉ masigilima꞉ dowagelena, nale ibino a꞉da꞉ tanalo awokalima꞉ me leta ebema꞉ osiyodilomo.  
\v 27 Nanitabola, la꞉ ibino a꞉da꞉ elemasigi tanalamo a꞉ka꞉guda꞉ema, mabu Kelisote ebeno Uliyana la꞉ unamo iyalo adipaniya, iyo, ebete uwomua꞉ tetelo la꞉go eba okolinalo ebe a꞉ka꞉tuwa꞉ tanalo bilibilinomo la꞉ biyatulamenakoma꞉ta, lumagi iditea꞉. Numa꞉la꞉, ebeno iyatulame tanalo ebe nanitabonomola, iyo, a꞉da꞉ tanalo idite ebegodone ka꞉pemaiganakoa꞉, ebema꞉ ebete la꞉ keba kunu kiyatulametana, modobola la꞉ eba kunu ebe magumulo nilukulionala꞉.   
\p
\v 28 Iyo, naimano guda꞉la꞉, modobola la꞉ Kelisoko magumulo nilukulionala꞉, ebema꞉ ebeno pe egelate da꞉pemaigamene, ale ebe teta꞉mo nemaimiote tolea꞉noma꞉ eba eda꞉olo ebeno ololo apulo tanalo idima꞉ ilipokobi a꞉kolowioma꞉.  
\v 29 La꞉ iyatawalata Kelisoko ebe tuputupudawala, ebema꞉ modobola la꞉ me tanalo idi atumu na꞉kiyatawala꞉, kebe lumagite ebeno tuputupu tanalo magumulo dokolina, ebe Kelisoko keba kunula꞉ka꞉ eba kunula ega꞉walo ebe Godokono gudu idila.   
\c 3  
\s1 Godokono Gudino Tanalo  
\p
\v 1 Ebema꞉ Nabiwite a nilakapolo keba kunu kemalagidiloenale, modobola la꞉ ebe tanalo numa꞉la꞉, iyo, ebeno nilakapo atamo beda꞉ kawonomola꞉ka꞉! Nanitabola, ebete ebeno nilakapo magumudo a ebeno gudima꞉ ka꞉mina, iyo, a nanitabokobi midipi ebeno gudima꞉ eda꞉onama꞉, ebema꞉ me opo epate aimano tanalo kiyatawaona꞉ mabu iba꞉te atumu Godokono tanalo iyatawa꞉.  
\v 2 Ebema꞉ naimano wadewade namutupiala꞉, a iyatawala ka꞉lo a Godokono gudila, wiyasiya a nanitabolo iyatawa꞉ walone a keba kunu na꞉kilukulionama꞉. Me tetelo a me kapiya tanalo iyatawala, Kelisote atamo walo da꞉ka꞉pemene, ebe tetelo ebe keba kunula꞉ka꞉ a eba kunu keda꞉omalema꞉ mabu ale ebeno ololo nanitabolo kuimalema꞉.  
\v 3 Ebe mabuma꞉ kebe lumagite olowiolo Kelisoko demakopelena, ebe lumagite ebeno tepo magumuno daleya ukulate walo daleyakobi a꞉ka꞉midimene, ebene ebete Kelisoko keba kunula꞉ka꞉ eba kunu bokolinamene, ebeno tepo magumulo daleya tanalo idite a꞉kitanamene.   
\p
\v 4 Ega꞉walo me tanalo idila. Lumagite Godokono pukala bilibilinomo magumulo kapiya idi dadikanalemene ebe tetelo ebete ebetamo kuba nanitabolo kosiyodilomene, mabu nanitabola, ebetamo kuba osiyodilo tanalo ega꞉walo ebeno pukala adikanale tanalo ibi kapiyanomola.  
\v 5 Iyo, la꞉ iyatawalata Kelisote me opamo apawokaliya ebete epono iyaiya kuba osiyodilole tanalo iyabaiamo kapalomolaema꞉. Ebe kapiyate me tanalo osiyodiloma꞉ modobola mabu ebe kapiyagodolo kuba osiyodilo tanalo puliyala.  
\v 6 Ebema꞉ kebe lumagite Kelisoko magumulo dokolina, ebete kuba osiyodilo magumulo a꞉kokolinamene, wiyasiya kebe lumagite kuba osiyodilole magumulo dokolina, ebe lumagite Kelisokono tanalo nanitabolo kelawea꞉ ega꞉walo ebete ebeno tanalo iyatawa꞉.   
\p
\v 7 Naimano guda꞉la꞉, la꞉ nanisiwale, lumagi idite la꞉ a꞉da꞉ akomasigila꞉la꞉! Numa꞉la꞉, kebe lumagite tuputupu tanalo dosiyodilolenakomene ebe lumagi ebe tuputupudawala, Kelisoko keba kunula꞉ka꞉ eba kunula.  
\v 8 Wiyasiya kebe lumagite kuba tanalo dosiyodilolenakomene ebe Saitanakono guduma꞉ eda꞉na, mabu me opono wagilimi mabune pete me teta꞉mo pemaiga Saitanate iyaiya kuba tanalo kapiya osiyodilolenako. Me mabuma꞉ Godokono Gudute me opamo ebema꞉ pawokaliya, Saitanate dosiyodilolenako ebe kubakuba tanalo ebete nanitabolo palukolemete ka꞉popoliyadigalema꞉.   
\p
\v 9 Numa꞉la꞉, Godokono gudima꞉ deda꞉ona iba꞉te kuba osiyodilole magumulo walo a꞉kilukulionama꞉na꞉, mabu Godote ibi magumamo ebeno igilo iyalo iyatiya, lumagite wadewade kikopu damelamo keba kunu kamionakole eba kunu. Nanitabola, Godokono igilote ebeno guda꞉godolo ditanamene, iba꞉te kuba tanalo osiyodilolema꞉ modoboa꞉.  
\v 10 Ebema꞉ modobola la꞉ niyatawala꞉, epono osiyodilole tanalate ibi anagiyamidalena, ma kunu Godokono gudi ega꞉walo Saitanakono gudi iba꞉te iyaiya ka꞉pola꞉nama꞉. Iyo, me tanalo nanitabola, piyate tuputupu tanalo osiyodilolea꞉no ega꞉walo piyate ibino ekaki nilakapolo malagidilolea꞉no, iba꞉te Godokono gudima꞉ keda꞉ona꞉.   
\s1 Idite Idi Nilakapolo Malagidilo Tanalo  
\p
\v 11 Ebema꞉ numa꞉la꞉, la꞉ dopamo wagilimi mabune kebe tabo kolowiawiyama ebe tabo ebe ma kunula, modobola a nanitabokobi midipi magumulo idite idi nilakapo kemalagidilo, idite idi nilakapolo kemalagidilo, a eba kunu bilukulionama꞉.  
\v 12 La꞉ iyatawalata Ka꞉inikono tanalo, ebema꞉ ebe keba kunula꞉ka꞉ la꞉ eba kunu eda꞉oma꞉ modoboa꞉. Eiye, ebe Saitanakono guduma꞉ eba eda꞉lo ebeno ekawitamo kuba kawonomo osiyodiliya. Mabu keleka꞉ ebete ebeno ekawi gito danakapumiya? Iyo, ebete kuba osiyodilole magumulo eba okolinalo, wiyasiya ebeno ekawite tuputupu tanalo osiyodilolenami, ebete ebetamo dowakobi ebema꞉ olowiya. \fig Ka꞉inite ebeno ekawi gito anakapumiya|alt="Abel with lamb, Cain coming" src="CO00617B.TIF" size="col" loc="1/2 of page" copy="1978 David C. Cook Publishing Co." ref="3.12" \fig*   
\p
\v 13 Ebema꞉ naimano nanitabokobi midipi ekakiala꞉, la꞉ tuputupu osiyodilole magumulo eba ilukulionalo, me opo epate la꞉tamo dowa tanalo dosiyodilolema꞉na꞉, la꞉ ebe tanaloma꞉ akola꞉wa꞉oala꞉.  
\v 14 A iyatawala a a꞉e magumune igilamo iyalo opila꞉iyama꞉ mabu a nanitabokobi midipi ekaki epetapi nilakapolo nemalagidilolenama꞉, wiyasiya kebe lumagite nilakapo kimalagidilo magumulo okolina꞉no, ebe lumagite a꞉e magumune nanitabolo ka꞉nemaiga꞉.  
\v 15 Ega꞉walo kebe lumagite ebeno ekawitamo da꞉dowana, ebe lumagino tanalo ebe potele ebeno ekawi danakapumiya ebe dawano osiyodilo tanalo keba kunula꞉ka꞉ eba kunula, iyo, ibi netewapino woki ebe kapiyala. Ebema꞉ a iyatawala ebako lumagino tepo magumulo uwomua꞉ igilo puliyanomola, mabu lumagi anakapumidawagodolo Godokono nanitabo igilote a꞉kitanamene.   
\p
\v 16 Numa꞉la꞉, Kelisote ebeno igilo a mabuma꞉ iyabaiamo iyatiya, ebema꞉ a ebeno osiyodilo tanalodo nilakapo kimalagidilo tanalo nanitabolo kiyatawaomalema꞉, iyo, modobola a atumu aimano igilo nanitabokobi midipi mabuma꞉ iyabaiamo balomonakoma꞉.  
\v 17 Wiyasiya kebe tetelo a nanitabokobi midipi magumulo inamabu dogodogodawa idite inamabua꞉dawa umite ebe walubia꞉no, ebete mako tabo keba kunu na꞉kegemene, “Na Godoko nilakapolo nemalagidilonamo?” Eiye, ebete ebako tabo gema꞉ modoboa꞉!  
\v 18 Ebema꞉ naimano guda꞉la꞉, a epetapiatamo nilakapo tabo gito a꞉kegelanakoma꞉. Ao, modobola a epetapino modoboa꞉ tanalo ulamelelamete iba꞉tamo nilakapo inamabu eba ikalamelo Godokono nanitabo nilakapo iba꞉tamo eba kunu kawokalimalema꞉.   
\s1 Godokono Ololo Apulo Tolea꞉no Utitata Tanalo  
\p
\v 19 Ebema꞉ kalakala kawonomola, a me nilakapo gabodo kiyatawaomalema꞉ a Godokono nanitabo tanalo magumulo ilukulionama꞉, ega꞉walo aimano tepo magumulo ebeno milo kapiyate eba itanalo ale tolea꞉noma꞉ eda꞉onama꞉ ebeno ololo apulo utitatama꞉.  
\v 20 Wiyasiya kebe tetelo aimano tepo magumuno wokite a kubakubapima꞉ deka꞉imene, ale ebe kuba woki laema꞉ modoboa꞉ mabu ebako wokite Godogodone ka꞉pena꞉. Numa꞉la꞉, ebete aimano waminaole tanalo bilibilinomo eba iyatawanalo ebete dopamo a tuputupupima꞉ eka꞉miya, ebema꞉ ale woki bilibilima꞉ a꞉keda꞉oma꞉ mabu ebeno tabono elawote aimano tepo magumuno elawo nodolina.   
\p
\v 21 Ebema꞉ naimano wadewade namutupiala꞉, tete idilo aimano tepo magumuno wokite a kubakubapima꞉ deka꞉imene, ebe kuba woki lawea꞉no ale tolea꞉noma꞉ eda꞉ote aimano towetowe tabago Godokono ololo apuamo gito ka꞉nemaimiomalema꞉.  
\v 22 Ebe tetelo ale beda꞉ tanaloma꞉ ebe da꞉toweoema꞉ ebete atamo nanitabolo kikaeaemene, mabu ale ebeno totomu tabamo tudila꞉ote ebeno iyaiya ubi tanalo kapiya ebo osiyodilolenakoma꞉.  
\v 23 Nanitabola, me Godokono kawo totomu tabola, ale ebeno Gudu Ya꞉su Kelisokono mailo nanitabokobi eba midinalo, a magumulo idite idi nilakapolo bemalagidilonama꞉, Ya꞉sute a dopamo keba kunu kiyatuamiyale eba kunu.  
\v 24 Ega꞉walo tanalo idi ma kunula. Kebe lumagite Godokono totomu tabamo da꞉tuduwatanako, ebete Godoko magumulo bokolina ega꞉walo Godote atumu ebe magumulo ba꞉kokolina. Ebema꞉ Godote a magumulo dokolina a ebe nanitabo tanalo iyatawala, mabu ebete atamo dikaeamiya ebe Wade-talena Uliyanate a ebe tanalo niyatuamena.   
\c 4  
\s1 Godokono Uliyana Ega꞉walo Kelisotamo Gowelao Uliyana Ibino Iyaiya Osiyodilole Tanalo  
\p
\v 1 Naimano wadewade namutupiala꞉, epetapiate ma kunu gito degelanaka, “A Godokono Uliyanagopila,” la꞉ ibino tabo nanitabokobi akomida꞉la꞉. Modobola la꞉ wiyasiya ibino iyaiya tabo ega꞉walo ilukuli tanalo wadenomamo nulamelelamenala꞉, mabu diyala, iba꞉te Godokono Uliyanano elawamo dilukulione o kuba uliyanano elawamo dilukulione. Numa꞉la꞉, me tetelo opo kawonomolo a꞉da꞉ tabo kiyawaopiate Godokono mailo ka꞉milo gito wapata꞉lamena!  
\v 2 Ebema꞉ la꞉ Godokono Uliyanagono wokodawa ma kunu kiyatawaomamota, kebe lumagite ma kunu da꞉kiyawaonako, “Ya꞉su Kelisote lumagino apa꞉mo me opamo nanitabolo apawokaliya,” ebe Godokono Uliyanagonola.  
\v 3 Wiyasiya kebe lumagite Ya꞉sukono tanaloma꞉ a꞉da꞉ tabo da꞉kiyawaonako ebe Godokono Uliyanagono wokodawa꞉, ao, ebeno uliyana ebe Kelisotamo Gowela Tanalo Osiyodilodawano uliyanala. Nanitabola, dopamo la꞉ ma kunu olowiyamata, ebe kuba uliyanate me opamo ka꞉pemene, ebema꞉ ebete epatamo iyalo pemaigate me opolo bokolina.   
\p
\v 4 Naimano wadewade guda꞉la꞉, piyate Godokono mailamo a꞉da꞉ tabo da꞉kiyawaonaka la꞉le ibino wato kikopu iyalo elawimata, mabu la꞉ Godokono gudilata ega꞉walo la꞉ magumulo woko dosiyodilona ebe Wade-talena Uliyanano elawote kawonomoma꞉ eda꞉na, iyo, ebe elawote ibi magumulo woko dosiyodilona ebe uliyana idino elawo nodolina.  
\v 5 Numa꞉la꞉, ebe a꞉da꞉ kiyawaopiate me opono tanaloma꞉ gelana, mabu me opolo woko dosiyodilona ibi ebe kuba uliyanagopila, iyo, me opo epono kalakala ebema꞉ itana ibino iyaiya tabo olowioma꞉.  
\v 6 Wiyasiya aimano tanalo iyanomola mabu a Godokono gudima꞉ eda꞉onama꞉. Ebema꞉ numa꞉la꞉, kebe lumagite Godokono tanalo nanitabolo diyatawana ebete aimano tabo kolowimene, wiyasiya Godokono tanalo iyatawa꞉ lumagite aimano tabo a꞉kolowimene. Iyo, a me gabodo niyatawaonama꞉ kebe tanalate Godokono nani Uliyanagodone da꞉pemaimiona ega꞉walo kebe tanalate a꞉da꞉ elemasigi uliyanagodone da꞉pemaimiona ebe iyaiya tanalo.   
\s1 Godoko Ebe Nilakapodawala  
\p
\v 7 Naimano wadewade namutupiala꞉, modobola a magumulo idite idi nilakapolo kemalagidilo, idite idi nilakapo kemalagidolo, a eba kunu bowagelenama꞉ mabu nilakapo tanalo ebe Godogodone pena. Ebema꞉ kebe epagodolo nilakapo kimalagidilo tanalo ditanamene ibi Godokono gudila, iyo, ibi Godokono nanitabo tanalo iyatawala,  
\v 8 wiyasiya kebe lumagigodolo nilakapo kimalagidilo tanalote itana꞉no, ebe lumagi Godokono nanitabo tanalo iyatawa꞉ mabu Godoko ebe kawo nilakapodawanomola.  
\v 9 Numa꞉la꞉, Godote ebeno nilakapo atamo ma kunu awokalimiya, ebete ebeno Gudu kapiyanomo me opamo apalibiya ale nanitabo igilo ebegodone kelaema꞉.  
\v 10 Ebema꞉ ebe nanitabo nilakapo tanalo ebe ma kunula. Dopamo ale Godoko nilakapolo malagidiloa꞉ tetelo ebete a kawonomamo eba malagidiloelo ebeno Gudu Kelisoko atamo ebo palibiya, iyo, ebete ebeno ubi ebo iyatiya aimano iyaiya kuba osiyodilole tanalo Kelisokono kalimamo egeboleamete a ebeno gudima꞉ ka꞉midima꞉.   
\p
\v 11 O naimano wadewade namutupiala꞉, Godote ebeno nilakapo tanalo atamo eba kunu awokalimiya, ebema꞉ modobola a atumu idite idi nilakapolo ba꞉kemalagidilonakoma꞉.  
\v 12 Nanitabola, me opo wagilimi mabune lumagi idite Godoko kumiya꞉, wiyasiya kebe tetelo a magumulo idite idi nilakapolo kemalagidilo, idite idi nilakapolo kemalagidilo, a eba kunu dilukulionama꞉, ebe tetelo epetapiate aimano osiyodilo magumudo Godoko nanitabolo kuima꞉na꞉, mabu ebete a magumulo bokolina ega꞉walo ebeno nilakapo tanalote a magumulo tabokanomola.   
\p
\v 13 Godote a magumulo dokolina ega꞉walo ale ebe magumulo dilukulionama꞉, ebe tanalo a keba kunu na꞉kiyatawaoma꞉? Dopo tanalo ebe ma kunula, Godote atamo dikaeamiya ebe Uliyanate a kiyatuaemene.  
\v 14-15 Ega꞉walo aimano tabo kiyawao tanalo ebe a iyatuame tanalo idila. Iyo, ale balida꞉mo dumiyama꞉ ebe nanitabo tanalo epetapiatamo ma kunu ba꞉kiyawaonakoma꞉, “Godote ebeno Gudu me opamo apalibiya, ebete epono Igilo Mula꞉lelamedawama꞉ ka꞉peda꞉nama꞉.” Ebema꞉ nanitabola, kebe lumagite awokala ma kunu da꞉kiyawaona, “Ya꞉suko ebe Godokono Gudula,” Godote ebe lumagi magumulo nanitabolo bokolina ega꞉walo ebete atumu Godoko magumulo ba꞉kokolina.  
\v 16 Ega꞉walo ebe wade woki laema꞉ Godokono nilakapo tanalote atumu a iyatuamedawa idima꞉ keda꞉na. Iyo, Godote kawo nilakapodawanomoma꞉ eba eda꞉nalo a nilakapolo malagidiloena, ebema꞉ a magumulo kebe lumagite ebe tanalo nanitabokobi midite nilakapo kimalagidilo magumulo dokolinamene, ebe lumagite kiyatawamene ebete Godoko magumulo bokolina ega꞉walo Godote ebe magumulo atumu ba꞉kokolina.   
\p
\v 17 Numa꞉la꞉, me nilakapo kimalagidilo tanalodo a tuputupu epoma꞉ eda꞉onama꞉, ebema꞉ Godote epo bilibilinomono iyaiya kuba tanalo danagilamelelaemene, ebe Kawo Egelalo ebeno ololo apuamo kalakalago ka꞉nutitatamalema꞉. Ebe tetelo tole tanalote agodolo a꞉kitanamene, mabu ebete Unu Duliyomololo keba kunu kokolinale, eba kunu ale me opolo atumu kilukulionama꞉.  
\v 18 Nanitabola, Godokono nanitabo nilakapo kimalagidilo magumulo tole tanalo puliyala, mabu nilakapo kimalagidilo tanalote tole tanalo iyabaiamo ebeno elawamo ka꞉na꞉ma꞉tamene. Ebema꞉ kebe lumagite Godokono ololo apuamo utima꞉ da꞉toletolena, Godokono nilakapo kimalagidilo tanalote ebe magumulo woko wadenomamo kosiyodilona꞉, iyo, ebako lumagite nemalagidilona Godote ebetamo kuba wiya kikaemene, ebema꞉ ebegodolo tole tanalo kapiyate itana.   
\p
\v 19 Numa꞉la꞉, Godote a dopamo nilakapolo nemalagidiloenami, ebema꞉ modobola a nilakapo kimalagidilo magumulo bilukulionama꞉.  
\v 20 Ebema꞉ kebe lumagite ebeno ekawitamo dowalo ma kunu degemene, “Nale Godoko nilakapolo nemalagidilonamo wiyasiya a꞉ma꞉ kemalagidilawena꞉,” ebe lumagi a꞉da꞉ elemasigidawala. Eiye! Ebete me opolo eba okolinalo kebe lumagi ebeno balida꞉mo dumina ebe ekawi nilakapolo malagidiloa꞉no, ebete umia꞉noma꞉ deda꞉na ebe Godo nilakapolo keba kunu na꞉kemalagidilonamene? Gabo puliyanomola, a꞉kitanamene!  
\v 21 Nanitabola, Kelisote atamo kebe kawo totomu tabo dikaeamiya ebe tabo ebe ma kunula, kebe lumagite Godoko nilakapolo demalagidilona, modobola ebete atu gabodo ebeno ekawi nilakapolo na꞉kemalagidilonamene.   
\c 5  
\s1 Nanitabokobi Midipino Elawote Me Opono Elawo Anakapumi Tanalo  
\p
\v 1 Numa꞉la꞉, Ya꞉sute Godokono Alibodawa Kelisoma꞉ deda꞉na, piyate ebe tanalo nanitabokobi da꞉midina ibi Godokono gudila, ebema꞉ piyate Nabiwi Godoko nilakapolo demalagidilona, iba꞉te atumu ebeno gudi bilibilinomo atu nilakapo tanalago kemalagidilolena.  
\v 2 Ebema꞉ Godokono nilakapo kimalagidilo tanalote agodolo ebeno gudi epetapiatamo ditana, ale ebe tanalo ma kunu iyatawaonama꞉, kebe tetelo ale ebe nilakapolo eba malagidilolo ebeno totomu tabamo da꞉tudila꞉onakoma꞉, ebe tetelo ebeno nilakapo tanalote a magumulo nanitabolo itananako.  
\v 3 Nanitabola, Godoko nilakapolo malagidilo tanalo ega꞉walo ebeno totomu tabamo tuduwata tanalo, ebe tanalo netewate iyaiya ka꞉pola꞉na꞉, ibino woko osiyodilo tanalo ebe kapiyala. Ega꞉walo ale ma kunu a꞉kemalagidiloma꞉, Godokono totomu tabamo tudila꞉o tanalote atamo kodakodanomoma꞉ eda꞉na.  
\v 4-5 Ao, eba kunua꞉, mabu Godokono gudi bilibilinomagodolo ebeno elawo bitana iba꞉te me opono kuba osiyodilo elawo kanakapuima꞉. Ebema꞉ me opono kuba osiyodilole tanalo anakapuima꞉ lumagite elawonomoma꞉ keba kunu na꞉keda꞉namene, ega꞉walo potele na꞉ka꞉modobomene me opono elawo anakapuima꞉? Nanitabola, a magumulo potele ebeno nanitabokobi midi magumulo Ya꞉suko Godokono Guduma꞉ degena, ebe dawate modobo elawo belawenakomene.   
\s1 Ya꞉su Kelisokono Nanitabo Tanalo Dawokalimina Ebe Netewa-kapiya Tanalo  
\p
\v 6 Me tanalo nanitabola, Ya꞉su Kelisote me opamo da꞉piya, ebete ebeno nanitabo tanalo awokalima꞉ ebete obo ega꞉walo kalima ka꞉ka꞉liya tanalago atamo a꞉pemaigiya, iyo, ebete me netewa gabodo ebeno tanalo atamo apawokalimiya. Ega꞉walo me tanalo idila, Godokono Uliyanate atumu Ya꞉sukono nanitabo tanalo kawokalimina mabu ebe Godokono nanitabo tanalo awokalimidawala.  
\v 7 Ebema꞉ Kelisokono tanalo kawokaliminama꞉ me netewa-kapiya tanalate ba꞉pola꞉nama꞉na꞉,  
\v 8 Godokono Uliyanano tabono tanalo, ega꞉walo Kelisokono kalimate deka꞉ka꞉liya ebe tanalo, ega꞉walo opo lumagite ebe obamo daduba꞉midiya ebe tanalo, iyo, me netewa-kapiya tanalate me atu tanalo awokalimina, Ya꞉su Kelisoko ebe Godokono Gudula.   
\p
\v 9 Numa꞉la꞉, me opo epate nanitabolo degelanaka, tete bilibilinomo epetapilo ale ebe tabo nanitabokobi da꞉midilinakoma꞉ ebe tanalo kuba꞉. Wiyasiya Godote ebeno Guduno tanaloma꞉ kebe tabo kegenale, modobola ale ebe tabo wadenomamo olowite nanitabokobi ka꞉midimalema꞉, iyo, Godokono tabono iyaiya tanalo ebe nanitabonomola, ebete a꞉da꞉ tabo ka꞉kiyawaona꞉, ebema꞉ ebeno tabono elawote opo epono elawo nodolina.  
\v 10 Ebema꞉ kebe lumagite Godokono Gudu nanitabokobi da꞉midina, ebe lumagino tepo magumulo Godokono nani tabote bitana. Wiyasiya numa꞉la꞉, kebe lumagite Godokono tabo nanitabokobi midia꞉no ebe lumagite me gabodo Godoko a꞉da꞉ elemasigidawama꞉ midina, mabu Godote ebeno Guduno tanaloma꞉ nanitabolo degiya, ebe nanitabokobi midia꞉dawate ebe tabo ubia꞉noma꞉ eda꞉na.  
\v 11 Nanitabola, Godote ebeno Guduno nanitabo tanalo awokalima꞉ me tanalo osiyodiliya, ebete ebeno Gudugodolo ditana ebe uwomua꞉ igilo atamo ikaeamiya.  
\v 12 Ebe mabuma꞉ kebe lumagite Godokono Gudu nanitabolo danikumina ebegodolo uwomua꞉ igilo bitana, wiyasiya kebe lumagite Godokono Gudu lawea꞉no, ebe niyala, nanitabo igilote ebegodolo kitana꞉.   
\s1 Godokono Guduno Uwomua꞉ Igilono Tanalo  
\p
\v 13 Ebema꞉ la꞉ piyate Godokono Guduno mailo nanitabokobi da꞉mida꞉wenama, na me leta la꞉tamo osiyodilomo, la꞉le uwomua꞉ igilo delawa꞉wiyama ebe igilote la꞉godolo eba itanalo la꞉le nanitabolo kiyatawaema꞉.  
\v 14 Nanitabola, ale towetowe tabago Godokono ololo apuamo da꞉nemaimioma꞉, ebe tetelo ale tolea꞉no aimano iyaiya modoboa꞉ tanaloma꞉ ebe kanamalema꞉, ebema꞉ a me tanalo iyatawala, ale kebe tanalo ebeno ubilo ebe da꞉toweoema꞉, ebete ebe towetowe tabo nanitabolo kolowimene.  
\v 15 Ega꞉walo a iyatawala, Godote aimano towetowe tabo dolowiomene ebete a nanitabolo kowalubimene, iyo, a kebe tanalo ebegodone laema꞉ ebe da꞉toweoema꞉ ebete atamo kikaeaemene, mabu tete bilibilinomolo ebete aimano iyaiya towetowe tabo olowionako.   
\p
\v 16 Ebema꞉ la꞉le nanitabokobi midipi magumulo ekawi idino kuba osiyodilo tanalo duma꞉ema, modobola la꞉ ebeno tanalo Godotamo towetowe tabamo nadipatemiyala꞉, ebene Godote ebeno tepo magumuno tanalo wadekobi midite ebetamo igilo walo ka꞉kikaemene. Wiyasiya kebe tetelo lumagite kuba kawonomo dosiyodilomene, ma kunu ebete Godokono Uliyanano nanitabo woko kubama꞉ degemene, ebe tetelo ebeno igilo mabuma꞉ Godotamo akotowetoweala꞉, modobola ebako kubadawate a꞉eamo na꞉toamene.  
\v 17 Numa꞉la꞉, me kuba osiyodilo tanalo kapiyanomote lumagi a꞉eamo kemagatamene, ebema꞉ la꞉ naimano tabono tanaloma꞉ woki bilibilima꞉ akoeda꞉oala꞉. Nanitabola, a epono osiyodilole tanalo bilibilinomo magumulo aimano tuputupua꞉ tanalo ebe Godokono pukala wakalami tanalola, wiyasiya kalakala kawonomola, ebegodolo elawo bitana ebako iyaiya kuba osiyodilole tanalo egeboleamete igilo atamo walo ka꞉kikaeaema꞉.   
\p
\v 18-19 Nanitabola, a iyatawala Godokono guda꞉te kuba osiyodilole magumulo kilukuliona꞉, mabu Godogodone dawokaliya ebe Elawodawate ibi na꞉ga꞉lulatelena Kubadawa Saitanate ibi kubailamekapoma꞉. Ebema꞉ numa꞉la꞉, me opo kawonomote ebe Kubadawano elawo magumulo itana, wiyasiya a iyatawala a nanitabokobi midipiate me opolo eba ilukulionalo a Godokono gudima꞉ eda꞉onama꞉, ebema꞉ kuba tanalo idite a a꞉kologimene.  
\v 20 Ega꞉walo a tanalo idi iyatawala, Godokono Gudute me opamo da꞉piya, ebete atamo wade mulo tanalo a꞉pikaeamiya ale Nanidawano tanalo wadenomamo kiyatawaonama꞉. Numa꞉la꞉, ebe Nanidawa ebe Godotela, ebe Uwomua꞉ Igilola, ebema꞉ kalakala kawonomola, ale ebeno Gudu Ya꞉su Kelisoko magumulo bilukulionama꞉!   
\p
\v 21 Ebema꞉ naimano wadewade guda꞉la꞉, modobola la꞉ nani Godo kapiya eba amamatenalo, ida꞉da꞉li epetapi amamalatele tanalamo ega꞉walo ibino a꞉da꞉ elemasigi uliyanano wokino tanalamo akotudila꞉onakala꞉.  
\p Me ebe naimano tabo uwomula. Taula.