\id TIT - Tabo (Aramia dialect) NT - Papua New Guinea 2006 (DBL 2014) 
\h Tai 
\toc3 Tai 
\toc1 Polote Leta Taitasitamo Ododiya꞉ 
\toc2 Taitasi 
\mt2 POLOTE LETA  
\mt1 TAITASITAMO  
\mt2 ODODIYA꞉  
\c 1  
\p
\v 1 Na ba꞉ Polotela, Godokono okodawala, iyo, Ya꞉su Kelisote ebeno sose tupuimima꞉ hiya꞉hiya꞉ hopamo doelamiya꞉, ba꞉bi okopi ipuwalo na ba꞉ etala.  
\p Ba꞉ hibila, Godote ya꞉lo tetelo pui da꞉ka꞉lamiholiya꞉, nale ba꞉bi tawakalubino hibima꞉ midi ipuwalo ibi kowalubilinama꞉ ebete na ba꞉bema꞉ laweniya꞉, iyo, ebete ubi natamo ihatiya꞉ nale ba꞉bi tawakalubi Godokono hibi iya꞉tawa komodo ba magatale, iba꞉te ebeno ubi komamo papamila꞉ha ipuwalo  
\v 2 ebeno wiboha꞉ ka꞉ka꞉ lawema꞉ uliholo bemedenamena꞉. A iya꞉tawahala, Godoko ha꞉da amihodawaha꞉, ebete hibi tabonomo bolamaginako, ba꞉bema꞉ ba꞉moe hopo tupuimihino ebete dopamo hibima꞉ midipa꞉tamo kebe komo ikalamema꞉ dolamagiya꞉, iba꞉te ba꞉be ka꞉ka꞉ ebegodone hibinomolo kolawema꞉na꞉.  
\v 3 Iyo, aeno Ka꞉ka꞉ Mula꞉lea꞉medawa Godote ebeno hido tetenomolo ba꞉moe Hido Tabo hopo habanapa꞉tamo a꞉hawakalimiya꞉, ba꞉bema꞉ na ba꞉be tabo bolamaginakomo mabu ebete na a꞉kiyanamiya꞉ nale ba꞉moe oko kowatinama꞉.   
\p
\v 4 O Taitasi, ama꞉ ba꞉gala na, aeno hibima꞉ midi komo ba꞉ kapiyala, ba꞉bema꞉ ama꞉ ba꞉be hibima꞉ midi ipuwalo naeno hibi guduma꞉ ba eda꞉na, nale ba꞉moe leta ama꞉tamo poememo.  
\p Ba꞉ hibila, aeno Ka꞉ka꞉ Mula꞉lea꞉medawa ba꞉ Ya꞉su Kelisotela, ba꞉bema꞉ wadiyala ebe ba꞉gala Nabiwi Godoko iba꞉te ibino malemale komo ba꞉gala hete komo ama꞉tamo nikama꞉mena꞉ta.   
\s1 Sose Watowatopino Emede Komo  
\p
\v 5 Numa꞉, Kuliti hopolo naeno oko owati ipuwalo nale kebe komokomo upula꞉leheno da꞉pola꞉na, wadiyala ama꞉ ba꞉bi komo ba ulame ba꞉be hopoeno hiya꞉hiya꞉ haboeno sose ipuwalo watowatopi nuwatiya꞉, nale ama꞉ keba ka꞉na ka꞉kiyamitima ba꞉ba ka꞉na. Ba꞉ hibila, ama꞉le ba꞉be oko kowatima꞉ nale ama꞉ ba꞉bolo ba꞉bema꞉ pimiya꞉puimata.  
\v 6 Ba꞉bema꞉ sose watodawoeno emede komo tuputupunomolo ba itana, ebeno ododili komo ipuwalo eta kapiya deha꞉potonomo kubate itana modoboha꞉. Wadiyala ebete kamena kapiyagodawama꞉ ba eda꞉na, ebeno guguda꞉te atumu tuputupunomo hibima꞉ midipima꞉ neda꞉hamena꞉, ba꞉bene tawakaluba꞉te ibino ododili komoma꞉ ibi talaluwapima꞉ ba꞉gala nabiwino tabo ulihoha꞉pima꞉ ka꞉lami modoboha꞉.  
\v 7 Ba꞉ hibila, sose watodawate Godokono genamoeno hiya꞉hiya꞉ komo bulamena, ba꞉bema꞉ ebeno emede ipuwalo eta kapiya deha꞉potonomo kubate itana modoboha꞉. Iyo, ebete awagaha dubuma꞉ akeda꞉la꞉, ba꞉gala ebeno tepo ipuwalo koe komote tiyolo akuluhukunakala꞉. Ba꞉bene ebete gamoda nihoha꞉dawama꞉ neda꞉mene, ba꞉gala ebete alaholo ipuwalo komopi kubahilame modoboha꞉, ba꞉gala ebete ha꞉da amiho gabodo ilina dogodogodawama꞉ eda꞉ma꞉ ubi ihate modoboha꞉.  
\v 8 Wadiyala ebe huiyatiya ebeno genamalo kapela tawakalubi hidamo nowalubilinakamene, ba꞉gala ebete Godokono hido emede komo konomamo ba emalagidolona, ebe ha꞉kiya ebeno komokomo hidamo nulamenakamene. Ba꞉bene sose watodawoeno tuputupunomo emede ipuwalo wadiyala ebete ebeno ape Godokono oko kapiyamo ba ihatena kateneno kuba ubi komamo papamiwata modoboha꞉,  
\v 9 ba꞉gala Ya꞉sukunu dopo ta꞉matapa꞉te ebeno hibi taboeno komokomo a keba ka꞉na kiya꞉tua꞉menakui, wadiyala ebete ba꞉bi atu mulu komo kodakodalo na꞉watila꞉mota꞉namene. Numa꞉, ba꞉moe gabodo hido watodawate sose tawakalubi hibi taboeno komamo ba owalubilina, puya꞉te ba꞉be tabago alaholohoma꞉ dewagelena, ebete ibino daedae ukui komo ba꞉bo ba꞉hawakalilamenakomene.   
\s1 Godokono Mahilamo Ha꞉da Tabo Olamagimipino Komo  
\p
\v 10 Ba꞉bema꞉ Taitasi, ama꞉ numa꞉, Kuliti hopoeno sose tawakalubi ipuwalo komo hiliyonomate hibi taboeno komamo papamila꞉ha ubiha꞉ma꞉ ba eda꞉hana, iba꞉te ibino daedae ukui komamo komopi ha꞉da ba꞉bo amiholamenaka, iyo, puya꞉te Yunapi dubuino tama itamida kukala ko komonomoma꞉ da꞉ga꞉lana, ibi ba꞉ ba꞉bako ha꞉da tabo olamagimipi ipuwalo dopopima꞉ eda꞉hana.  
\v 11 Ba꞉ hibila, ba꞉ba꞉te ubi bihatena ibino ha꞉da tabo iya꞉tulame komodo soseno komo hiya꞉hiya꞉ badininipala꞉tamo ukui bilibili komo ba ikalame iba꞉godone koko mani kuwatelamema꞉, ba꞉bema꞉ wadiyala ama꞉ ibi na꞉duhilamiya꞉ eta kapiya tabo ga꞉lakapoma꞉.   
\p
\v 12 A꞉iye! Dopamo tetelo Kuliti hoponapa꞉godolo eta muludawate uluhukuti ebeno tawakalubino komoma꞉ ba꞉moe kodakoda tabo hibinomolo goiya꞉, “Kuliti hoponapi hiliyonomo ba꞉ ha꞉da amihopila, iyo, ibi tumuino helohelo ilina huiyala, ba꞉bema꞉ iba꞉te hido ukui komamo a꞉kapapamila꞉hala꞉la꞉, huiyatiya buhamama꞉ ba eda꞉hana ibino kateneno ubi komo kapiya bemalagidolena!”  
\v 13 Numa꞉, ba꞉be taboeno komo ba꞉ hibinomola, ba꞉bema꞉ wadiyala ama꞉ Kuliti tawakalubi konomamo na꞉kiyahalamiya꞉ iba꞉te ibino hibima꞉ midi ipuwalo hidohido ukui kuwatema꞉.  
\v 14 Ba꞉ma ka꞉na iba꞉te Yunapino komo iniwali ha꞉kiya ibino kateneno ukuia꞉mo da꞉ga꞉lanakui ba꞉bi hiya꞉hiya꞉ uwi konomamo gala akemalagidola꞉la꞉, iyo, puya꞉te Godokono hibi komo ubiha꞉ma꞉ deda꞉hui iba꞉te ba꞉bi dubuino hiya꞉hiya꞉ tutumu tabo gala akulia꞉la꞉.   
\p
\v 15 Ama꞉ numa꞉, kebe lumagino tepo ipuwalo kuba dalowa꞉ ukui kapiyate itama꞉naheno, ba꞉be mabuma꞉ ebete Godoko adikumima꞉ dododilinako ba꞉bi hiliyonomo komate atumu dalowa꞉ha꞉ma꞉ eda꞉hanaka. Huiyatiya puya꞉te Godokono tabo hibima꞉ midihino, ba꞉gala puya꞉te ibino tepo ipuwalo kuba dalowa꞉ ukui demalagidolena, iba꞉te Godoko adikumima꞉ eta hido komo ododi modoboha꞉, mabu ebete iba꞉tamo dopamo dikalamiya꞉ ba꞉be hido mulu tepo ipuwa ba꞉gala emalagidolo komo iba꞉te ya꞉lo a꞉kubahilamiya꞉.  
\v 16 Ba꞉be mabuma꞉ ibi ha꞉kiya ibi Godokono hibi komo iya꞉tawahapima꞉ ga꞉lanaka, huiyatiya ibino kuba ododili komate ba꞉moe komo behawakalimina, iba꞉te ebeno komo hibilo kiya꞉tawahanaha꞉. Iyo, ibino emede komate kuba dalowa꞉ma꞉ ba eda꞉hana Godotamo kapapamila꞉hanaha꞉, ba꞉bema꞉ ebeno umi ipuwalo ibi modoboha꞉ ebetamo eta hido komo ododima꞉.   
\c 2  
\s1 Sose Tawakalubino Hiya꞉hiya꞉ Komoma꞉ Polote Komo Tutumu Tabo Dolamagiya꞉  
\p
\v 1 Naeno gudu Taitasi, ama꞉ huiyatiya tawakalubi hidamo niya꞉tulamenakuya꞉, Ya꞉sukunu dopo ta꞉matapa꞉te ebeno mulu taboeno komokomo a keba ka꞉na kiya꞉tua꞉menakui ba꞉ba ka꞉na.  
\v 2 Ba꞉bema꞉ puya꞉te hibima꞉ midipi ipuwalo nabima꞉ deda꞉hana, wadiyala ama꞉ ibi na꞉kiyalamiya꞉, iba꞉te hidohido mulu ukui uwatelo ibi ha꞉kiya ibino komo hidamo ba ulamena, ibino emede komate komopino umi ipuwalo hidonomoma꞉ neda꞉hamena꞉. Iyo, na ubila iba꞉te ibino hibima꞉ midi ipuwalo ba꞉gala ibino malemale hawakalimi ipuwalo ba꞉gala ibi Ya꞉suku mabuma꞉ duwatenaka, ba꞉bi temeteme ipuwalo iba꞉te kodakodalo na꞉la꞉mota꞉hanamena꞉.   
\p
\v 3 Ama꞉ ba꞉ atumu hibima꞉ midipi menokobi na꞉kakiyalamiya꞉, iba꞉te Godokono holoholo hapulu hidonomamo ba emedena ebe mabuma꞉ talonapima꞉ neda꞉hanamena꞉. Ba꞉ma ka꞉na iba꞉te helo gala꞉ipi gao beya konomamo niho modoboha꞉ ibino ukui komate daedaema꞉ eda꞉hakapoma꞉, ba꞉gala iba꞉te ha꞉da tabo olamagimi komodo komopi akakubahilama꞉la꞉. Wadiyala iba꞉te huiyatiya uli ape kamenakamena hidamo ba iya꞉tulame  
\v 4 iba꞉tamo mulu ukui ba꞉bo nikalamenakamena꞉, iba꞉te ibino awi ba꞉gala gugudi malemalelo kemalagidolenama꞉.  
\v 5 Iyo, uli ape kamenakamenate ibi ha꞉kiya ibino komokomo ba ulamena ibino tepo ipuwalo eta dalowa꞉ ukui komote itana modoboha꞉, ba꞉gala iba꞉te ibino genama gulu hiya꞉hiya꞉ oko hidamo ba owatihona ibino awino ubi komamo ba꞉papamila꞉hanakomena꞉. Ba꞉ hibila, kamenakamenate ba꞉ba ka꞉na demedenamena꞉, eta hibima꞉ midiha꞉ dawate ibino komoma꞉ Godokono tabo kubama꞉ goe gabo a꞉kuma꞉mene.   
\p
\v 6 Wadiyala ama꞉ ba꞉ atumu uli ape dubu na꞉kakiyalamiya꞉, iba꞉te ibi ha꞉kiya ibino komokomo hidamo nulamenakamena꞉.  
\v 7 Ba꞉gala naeno gudu, wadiyala ama꞉ amia꞉no hiliyonomo ododili komo ipuwalo hido go ba꞉bi uli ape dubatamo na꞉hawakaliminakuya꞉ iba꞉te ama꞉ hidamo kibamitinama꞉. Ba꞉ma ka꞉na Godokono tabo iya꞉tulame okoeno komoma꞉ ma꞉lapila netewa komote ama꞉godolo itanaheno, wadiyala ama꞉le amia꞉no tabo ulihopino komokomo ba emalagidolena ama꞉ tuputupunomolo nemedeniya꞉.  
\v 8 Iyo, ama꞉le tawakalubi hidonomo tabamo nowalubilinakuya꞉, ba꞉bene eta lumagiti a꞉kamodobamene amia꞉no iya꞉tulame komo kubama꞉ goe. Ba꞉ ba꞉ma ka꞉na puya꞉te ama꞉go dalaholohona, iba꞉te a hibima꞉ midipino komoma꞉ eta kuba tabo ga꞉la gabo nipo dohowadimina꞉ ba꞉bo kohilopohoma꞉na꞉.   
\p
\v 9 Ba꞉gala koko okopi dubate pui mana꞉mo duwatiya꞉ ibino huiyaha꞉ oko kowatihonama꞉, ba꞉bi huiyaha꞉ okopi ipuwalo puya꞉te hibima꞉ midipima꞉ deda꞉hana, wadiyala ama꞉ ibi na꞉kiyalamiya꞉ iba꞉te ibino hiliyonomo oko ipuwalo ibino namutulubi kokalakaluilamenama꞉ iba꞉te ibino ubi komamo na꞉papamila꞉hanakamena꞉. Iyo, ibino namutuluba꞉te hiya꞉hiya꞉ oko iba꞉tamo ba ikalame, modoboha꞉ iba꞉te ba꞉bi oko mabuma꞉ iba꞉tamo kuba tabo ga꞉la,  
\v 10 ba꞉gala iba꞉te ibino namutulubino mani pilolo uwateheno, wadiyala ibi huiyatiya ibino tuputupu ododili komamo ba꞉moe komo na꞉hawakaliminakamena꞉, ibino hiliyonomo oko owatiho komo ipuwalo eta ha꞉da ododi komo kapiyate kitanaha꞉. Ba꞉bema꞉ iba꞉te ba꞉ ba꞉ba ka꞉na aeno Ka꞉ka꞉ Mula꞉lea꞉medawa Godokono iya꞉tulame komokomo hidamo ba hawakalilamena, tawakalubi hiliyonomate ba꞉bi komo hidohidonomoma꞉ ba꞉ga꞉lanakomena꞉.   
\p
\v 11 Ba꞉ hibila, Godote ebeno malemale komo ba꞉ma ka꞉na hawakalimiya꞉, ebete hopo habanapi hiliyonomoeno ka꞉ka꞉ komula꞉lelamema꞉ atamo ba꞉bema꞉ piya꞉.  
\v 12 Ba꞉bema꞉ ebeno malemale komote a biya꞉tua꞉mena, ale kuba ododili ipuwane ba꞉gala ba꞉moe hopoeno kateneno ubi komone ohobila꞉hate, a ha꞉kiya aeno komo hidamo ba ulamena Godokono tuputupu emede komamo ebe kapiyatamo ba꞉papamila꞉halenakoma꞉.  
\v 13 Ba꞉ ba꞉ba ka꞉na aeno Ka꞉ka꞉ Mula꞉lea꞉medawa Ya꞉su Kelisokono Hidonomo Hegelate uluhukuma꞉ ale uliholo bemedenama꞉, mabu ba꞉ba tetelo ebete ebeno alo konomago atamo hibilo kopema꞉ne, iyo, ebe ba꞉ aeno Kodawa Godotela.  
\v 14 Ba꞉ hibila, ebete ebeno ka꞉ka꞉ gobogobamo a mabuma꞉ ba꞉ma ka꞉na ihatiya꞉, ebete a aeno hiliyonomo kuba ododili ipuwane ba꞉gala aeno tepo ipuwoeno dalowa꞉ ukui komone a uluhukua꞉tete, ale ebeno tawakalubinomoma꞉ ba eda꞉hana aeno ubi konomo ba꞉bo bihatenama꞉ hido komokomo kapiya kododilinama꞉.   
\p
\v 15 Ba꞉bema꞉ naeno gudu, Godote kebe helo konomo ama꞉tamo dikamiya꞉la, wadiyala ama꞉le toleheno ba꞉be heloamo ba꞉moi komokomo hidamo ba iya꞉tulame, tabo ulihopi ipuwalo hidohidopino ukui kodakoduilamete huiyatiya kuba ododilipi dito na꞉kiyahalamenakuya꞉. Iyo, amia꞉no hiliyonomo ododili ipuwalo sose tawakaluba꞉tamo gigiho aka꞉hiya꞉midala꞉, ibi ipuwalo etate tabo ba꞉ma ka꞉na akagaa꞉la꞉ ama꞉ sose watodawaha꞉.   
\c 3  
\s1 Hibima꞉ Midipino Tuputupu Emede Komo  
\p
\v 1 Ba꞉bema꞉ Taitasi, ale Kuliti hopoeno sose tawakalubi dopamo kebe komo kiya꞉tulamima꞉, wadiyala ama꞉ ba꞉be atu komo ibi gala ba꞉ma ka꞉na na꞉kakiyalamiya꞉, iba꞉te gabomanino hiya꞉hiya꞉ okopino tabamo na꞉papamila꞉hanakamena꞉. Ba꞉gala wadiyala iba꞉te na꞉hidonakamena꞉ hiliyonomo hidohido komo kododilima꞉,  
\v 2 ba꞉bene iba꞉te eta lumagino komoma꞉ kuba tabo akaga꞉lala꞉, ba꞉gala komopa꞉go olowabeletihuihino tatabapima꞉ ba eda꞉hana, ba꞉be tataba emede komo iba꞉te tawakalubi hiliyonomatamo na꞉hawakaliminakamena꞉.   
\s1 Aeno Ka꞉ka꞉ Mula꞉lea꞉me Komo  
\p
\v 3 Ba꞉ hibila, ale dopamo daedae ukui ipuwalo ba emedena, Godotamo papamila꞉haheno hibo gabo dito ududiya꞉ma꞉. Numa꞉, ba꞉ba tetelo a ha꞉kiya a kokalakaluia꞉mema꞉ ale aeno kateneno hiya꞉hiya꞉ ubi komamo papamila꞉hanakuima꞉, ba꞉bene aeno emede ipuwalo hiya꞉hiya꞉ kuba ododili komate ba tabotabohona, ale komopino dogodogo ilina mabuma꞉ iba꞉tamo ba꞉bo maubahanakuima꞉, iyo, komopino maubaha ipuwalo iba꞉te ago alaholohoma꞉ ba ewagelena ale ba꞉ atumu iba꞉go alaholohoma꞉ kewagelenamima꞉.  
\v 4 Huiyatiya kalakala konomola, aeno Ka꞉ka꞉ Mula꞉lea꞉medawa ba꞉ Godotela, iyo, ale aeno modoboha꞉ komokomo ipuwalo ba emedena ebeno hido owalubi komote ebeno malemale emalagidolo komago atamo hibilo uluhukuya꞉.  
\v 5 Ba꞉bema꞉ a ha꞉kiya aeno heloamo kebe kapiyakapiya hidohido komo dododilinakuima꞉, ebete ba꞉bi ododili komamo a kowalubiya꞉ha꞉, ao, ebete huiyatiya ebegodolo ditana ba꞉be malemale komo kapiyanomamo aeno ka꞉ka꞉ a꞉mula꞉lea꞉miya꞉. Numa꞉, ebeno Gobogobote aeno tepo ipuwoeno dalowa꞉ ukulalea꞉me helo atamo ikaa꞉miya꞉ ale ebeno uli ka꞉ka꞉mo kohawakalahalema꞉, ba꞉bema꞉ Godote ba꞉be gabodo ebeno ka꞉ka꞉ mula꞉ komo atamo dito ikaa꞉miya꞉.  
\v 6 Iyo, ebete aeno Ka꞉ka꞉ Mula꞉lea꞉medawa Ya꞉su Kelisoko ipuwado ebeno Gobogoboeno helo konomo aeno tepo ipuwamo a꞉haminuya꞉,  
\v 7 mabu ebete ebeno ubi ba꞉ma ka꞉na ihatiya꞉, ebete ebeno malemale komodo a tuputupupima꞉ miditi, ba꞉bene ale ebegodone lawema꞉ uliholo da꞉latiminama꞉ ba꞉be wiboha꞉ ka꞉ka꞉te atamo hibinomolo kuluhukuma꞉ne.  
\v 8 Ama꞉ numa꞉, ba꞉moe iya꞉tulame tabo komo ba꞉ hibinomola.  
\s1 Polote Taitasikono Oko Owati Komoma꞉ Tabo Dolamagiya꞉  
\p Naeno gudu, na ubila puya꞉te ibino hibima꞉ midi komo Godotamo da꞉miya꞉ti, ama꞉le ibi ba꞉moi hiya꞉hiya꞉ komo hidonomamo niya꞉tulamiya꞉, ba꞉bene iba꞉te ibino ubi konomamo nihatenakamena꞉ komo tawakalubi kowalubilima꞉ iba꞉te ibino emede ipuwane hidohido komo kuluhukulatelema꞉, iyo, ba꞉be gabodo komo hiliyonomo tawakaluba꞉te naeno iya꞉tulame komone hido owalubi komokomo kuwatema꞉na꞉.  
\v 9 Huiyatiya wadiyala ama꞉ tawakalubino daedae olowabeletihui komone dito nohobiguya꞉, ba꞉ ba꞉ma ka꞉na Yunapi iniwalino mahilo iya꞉tulame komoma꞉, ba꞉gala Godote Moseseko ipuwado tawakaluba꞉tamo dikalamiya꞉, ama꞉le ba꞉bi hiya꞉hiya꞉ Tutumu Taboeno ugumuili ipuwa komoma꞉ anagiya꞉mida ukui tawakaluba꞉tamo ikalameheno iba꞉go akolowabeletihuia꞉la꞉. Ba꞉ hibila, ba꞉bakobako tabo ga꞉la ipuwane eta hido owalubi komote a꞉kuluhukale!  
\v 10 Ba꞉bema꞉ hibima꞉ midipi ipuwalo eta dubuti olowabeletihui komamo ibi anagiya꞉midalema꞉ dewagelenako, wadiyala ama꞉le ebe kapiya o netewa teta꞉mo koamo na꞉kiyahamiya꞉ ebete ba꞉be komo komiya꞉pama꞉. Ebete huiyatiya amia꞉no tabo ulihino atu kuba ododi da꞉katupuimimini, ba꞉ba tetelo sose tawakaluba꞉te ebetamo talona nihata꞉mena꞉ ebete ibino kapiyuimi komamo gala akapa꞉la꞉.  
\v 11 Ba꞉ hibila, ba꞉bako dubuino ododi komone ama꞉ kiya꞉tawama꞉na꞉ta, ebete ebeno tepo ipuwalo Godokono hibi komone ya꞉lo ohobigui, iyo, ebe ha꞉kiya ebeno kuba ododili komodo ba꞉moe komo behawakalimina, ebete kuba huiya hibinomolo kolawema꞉ne.   
\s1 Polote Leta Kuititi Hapulu Tabo Komokomo Dolamagiya꞉  
\p
\v 12 Ba꞉bema꞉ Taitasi, ama꞉ numa꞉, tete tatalila na Polote Atimasiko o Tikikasiko ibi ipuwalo eta kapiya ama꞉tamo kopoemema꞉nemo, ba꞉bene ebete ama꞉tamo hawela ikama꞉tepama꞉ da꞉pemene, wadiyala ama꞉ na unamema꞉ Nikapolasi habamo pe gabo tiyonomolo na꞉hiduimiya꞉, mabu nale nopo ba꞉ma ka꞉na ihatimo hopoeno giba teteno kuititi teta꞉mo ba꞉moe habalo kemedema꞉.  
\v 13 Ba꞉bene Apolosiko ba꞉gala gabomanino tutumu iya꞉tawadawa Sinasiko ibi netewapa꞉te natamo atumu kakapuluhukuma꞉, wadiyala ama꞉ ibi hidamo nowalubiliya꞉, iyo, ibino pe gaboma꞉ kebe modoboha꞉ komate da꞉pola꞉lama꞉na ba꞉bi komo ama꞉ malemalelo dito na꞉tuputupuilamiya꞉.   
\p
\v 14 Ba꞉gala eta komo. Aeno hibima꞉ midipa꞉te Kuliti hopolo demedehona, wadiyala ama꞉ ibi na꞉tutumulateliya꞉, iba꞉te ibino emede ipuwalo hegehege mani oko ba owatiho ibi ha꞉kiya ibino modoboha꞉ komokomo nulamenakamena꞉, ba꞉bene komo tetelo iba꞉te hiya꞉hiya꞉ gabo atumu kakulamema꞉na꞉ hidohido komo komopa꞉tamo kododilima꞉. Iyo, wadiyala iba꞉te ibino ukui konomamo nihatenakamena꞉ ba꞉ba ka꞉na kewagelenama꞉, iba꞉te ibino emede ipuwalo buhamama꞉ eda꞉hakapoma꞉.   
\p
\v 15 Ba꞉bema꞉ puya꞉te nagodolo demedena, ibi hiliyonomate ibino nolata tabo ama꞉tamo poema꞉, ba꞉bene Kuliti hopolo puya꞉te Godoko hibima꞉ midi ipuwalo a demalagidoloena, wadiyala ama꞉ aeno nolata tabo iba꞉tamo nolamagiya꞉.  
\p Wadiyala Godokono malemale komote la꞉ hiliyonomagodolo nitanamene. Ba꞉moe ba꞉ naeno tabo kuititila. Ba꞉ba꞉la.