\id JAS - Tabo (Aramia dialect) NT - Papua New Guinea 2006 (DBL 2014) 
\h Ya꞉i 
\toc3 Ya꞉i 
\toc1 Ya꞉imesikono Leta Ebete Hibima꞉ Midipa꞉tamo Ododiya꞉ 
\toc2 Ya꞉imesi 
\mt1 YA꞉IMESIKONO LETA  
\mt2 EBETE HIBIMA꞉ MIDIPA꞉TAMO ODODIYA꞉  
\c 1  
\p
\v 1 Na ba꞉ Ya꞉imesitila, Godoko ba꞉gala Kodawa Ya꞉su Kelisoko ibino okodawala. Ba꞉bema꞉ Isalaela 12 gu ipuwalo la꞉ puya꞉te Yudiya hopone ikuliti ba꞉moe hopo konomolo hiya꞉hiya꞉ da꞉nemedehonama, la꞉ nonolata, nale ba꞉moe leta la꞉tamo poememo.   
\s1 Godoko Hibima꞉ Midi Komo Ba꞉gala Ebeno Mulu Komo  
\p
\v 2 Naeno hibima꞉ midipi ekaka꞉la꞉, hiliyonomo hiya꞉hiya꞉ temeteme komate la꞉tamo dikulihona, wadiyala la꞉ konomamo na꞉kalakalahanala꞉,  
\v 3 mabu la꞉ iya꞉tawahala koko temeteme komate hibima꞉ mididawatamo da꞉pelamemena꞉, ba꞉bi komodo ebete ebeno hibima꞉ midi ipuwalo apete kodakodalo kola꞉nama꞉ne.  
\v 4 Ba꞉bema꞉ la꞉ kodakodalo la꞉mota꞉hana komo akamiya꞉pala꞉, mabu la꞉ ba꞉ma ka꞉na ba emedena la꞉eno hibima꞉ midi ipuwalo helohelonomoma꞉ keda꞉hama꞉nemata, iyo, la꞉eno apepeho ipuwalo la꞉le eta kapiya hido komo a꞉kotamata.   
\p
\v 5 Ba꞉bema꞉ la꞉ ipuwalo kebe lumagigodolo mulu ukui itanaheno, wadiyala ebete Godoko na꞉toemehamene, ba꞉bene Godote ebetamo mulu komo kikamema꞉ne. Ba꞉ hibila, Godote ba꞉bako toemehodawatamo ubiha꞉ tabo a꞉kagaa꞉mene, mabu ebeno kalakala bitana tawakalubi hiliyonomatamo ebeno hidohido komo ikalameholema꞉.  
\v 6 Huiyatiya numa꞉la꞉, la꞉ Godogodone eta komo lawema꞉ la꞉eno hibima꞉ midi ipuwalo ukui gagagagama꞉ eda꞉halo ebe akatoemehala꞉, mabu ukui gagagagagodawoeno emalagidole komate ba꞉ kehaha꞉ kolomoeno gawiya keba ka꞉nala꞉ka꞉ ba꞉ba ka꞉nala, huhuti hiya꞉hiya꞉ hapuni da꞉monako gawiyate ba꞉ atumu hiya꞉hiya꞉ ba꞉ba ka꞉na komahila꞉halema꞉na꞉.  
\v 7 Ba꞉bako lumagiti akemalagidolala꞉ ebete Godoko toemeho ipuwalo eta hido komo kolawema꞉ne,  
\v 8 ao, ebegodolo ukui netewa ba꞉pola꞉na, ba꞉bema꞉ ebeno ododili hiliyonomo ipuwalo ebe nalegana.   
\s1 Ilinaha꞉dawa Ba꞉gala Dogodogodawa Ibino Komo  
\p
\v 9 Ba꞉bema꞉ wadiyala hibima꞉ midipi ipuwalo ilinaha꞉dawate na꞉kalakalamene, mabu ebeno tepo ipuwalo Godote hidohido komamo ebe ya꞉lo a꞉tabuimiya꞉, ba꞉gala galane ebete hido huiya kikamema꞉ne.  
\v 10 Ba꞉gala wadiyala dogodogodawate atumu na꞉kakalakalamene, mabu Godote ebeno tepo ipuwoeno awae komo ba iya꞉tumi ebe ba꞉ma ka꞉na kiyamiya꞉, ebegodolo ditana ba꞉be dogodogo komo ba꞉ ko komoha꞉. Iyo, galane hopo haboeno dogodogo komate kowibohoma꞉na꞉, hopo haboeno haiyaiti hopamo ma꞉tigate waiwaima꞉ keba ka꞉na keda꞉nako ba꞉ba ka꞉na.  
\v 11 Iyo, hibila, hegelate ba podolo koenomoma꞉ deda꞉mene ba꞉ba tetelo haiyaa꞉te waiwaima꞉ eda꞉hate ibino hidohido tita꞉te ba꞉ dito kowibohoma꞉na꞉, ba꞉bema꞉ dogodogodawate ba꞉ ba꞉ba ka꞉na kewagelema꞉ne, ebete ebeno hiya꞉hiya꞉ mani oko ba owatiho ebeno ka꞉ka꞉te ba꞉bo kalatidima꞉ne.   
\s1 Kuba Gabamo Emogabuimi Komate Godogodone A꞉kapelama꞉la꞉  
\p
\v 12 Ba꞉bema꞉ kebe hibima꞉ mididawate koko temeteme ipuwalo kodakodanomolo da꞉la꞉namene, wadiyala ebete na꞉kalakalamene mabu ebete ba꞉bako pawi ipuwalo kodakodama꞉ deda꞉mene ebete emedena ka꞉ka꞉ huiya kolawema꞉ne. Numa꞉la꞉, ba꞉moe ka꞉ka꞉ ba꞉ puya꞉te Godoko malemalelo demalagidolona ebete iba꞉tamo ikalamema꞉ hibilo da꞉goiya꞉ ba꞉be komola.   
\p
\v 13 Ba꞉gala eta komo. Etate hiya꞉hiya꞉ temeteme ipuwalo ba la꞉na kuba gabamo emogabuimi komote ebetamo da꞉pemene, ebete ba꞉ma ka꞉na akagaa꞉la꞉, “Ba꞉moe kubate Godogodone natamo pe.” Ao, eba ka꞉naha꞉. Godote lumagi kuba gabamo a꞉kemogabuima꞉le, ba꞉gala Saitanakono helo puliyala ebete ebeno kuba gabamo emogabuimi komo Godotamo kododima꞉.  
\v 14 Ba꞉bema꞉ numa꞉la꞉, kuba gabamo emogabuimi komate ba꞉ lumagino kateneno kubakuba ubi gabodo pelamenaka, iyo, ba꞉moe ba꞉be gabodo Saitanate ebe adimuya꞉tate ebeno gubi ipuwamo dito kona꞉da꞉nama꞉ne.  
\v 15 Ba꞉ba tetelo ba꞉be lumagino tepo ipuwalo kateneno kuba ubi komote apete kuba ododi komo kalahimima꞉ne, ba꞉bene ebeno kuba ododi komote ebeno emede ipuwalo konomoma꞉ deda꞉mene, ebete hoe ba꞉bo kalahimima꞉ne mabu kuba ododi komoeno huiya ba꞉ hoela.   
\p
\v 16 Ba꞉bema꞉ naeno hidohido hibima꞉ midipi ekaka꞉la꞉, la꞉ ha꞉kiya la꞉ ha꞉da akamiholama꞉la꞉,  
\v 17 mabu hiliyonomo hidohido komate Hunu Haboeno Nabiwigodone ebeno malemalelo atamo pelamena, huiyatiya kuba komate ebegodone a꞉kapelama꞉la꞉. Ebe ba꞉ alomo da꞉la꞉minana ba꞉bi olokino Namutudawala ba꞉gala ebe ba꞉ hibi malemale Kodawanomola, ba꞉bema꞉ ebeno malemale komote atamo hiya꞉ma꞉ a꞉keda꞉le, ba꞉ma ka꞉na eta tetelo konomamo kahawakalimi, eta tetelo nanekela꞉mo kahawakalimi, ebete ba꞉ba ka꞉na kewagelenaha꞉.  
\v 18 Numa꞉la꞉, ebete a ebeno gugudima꞉ komidima꞉ ebeno ubi bihatiya꞉, ale ebeno Hibi Tabo ipuwado uliulinoma꞉ eda꞉hate kohawakalahalema꞉. Ba꞉bema꞉ ba꞉moe komo ba꞉ hibinomola, ebete ba꞉moe hopoeno ilina hiliyonomo dododiliya꞉, ibi ipuwalo a ba꞉ dopo noloho gao keba ka꞉nala꞉ka꞉ ba꞉ba ka꞉nala.   
\s1 Lumagiti Godokono Tabo Dito Uli Modoboha꞉, Wadiyala Ebete Hibilo Na꞉papamiwatamene  
\p
\v 19 Naeno hidohido ekaka꞉la꞉, wadiyala la꞉ ba꞉moe komo nemalagidolala꞉. Modoboha꞉ lumagiti komopino tabo ulihoheno ebe ha꞉kiya ebeno komo tiyolo olamagi, ba꞉gala modoboha꞉ lumagiti eta lumagitamo tiyolo mauba,  
\v 20 mabu Godokono tuputupu emede komoeno gaote lumagino mauba gabodo a꞉kanolohamena꞉.  
\v 21 Ba꞉bema꞉ la꞉eno tepo ipuwalo da꞉pola꞉na ba꞉bi dalowa꞉ ukui komo, ba꞉gala la꞉eno apa꞉mo dododilinakoma ba꞉bi kuba ododili komo, wadiyala la꞉ ba꞉bi komo hiliyonomo tama꞉mo miya꞉tete, ba꞉bene Godote la꞉eno tepo ipuwamo damihonako ba꞉be tabamo hibilo na꞉papamila꞉hala꞉, mabu ba꞉be tabote ba꞉ la꞉eno ka꞉ka꞉ muleno gaboma꞉ eda꞉na.   
\p
\v 22 Numa꞉la꞉, la꞉ Godokono tabo ulihote papamila꞉haleheno, ba꞉moe gabodo la꞉ ha꞉kiya la꞉ bamihoholamenakomata. Ba꞉bema꞉ wadiyala la꞉ ebeno tabo uliti hibilo na꞉papamila꞉hala꞉,  
\v 23 mabu kebe lumagiti Godokono tabo uliti papamiwataheno, ebe ba꞉ pote galasilo ebeno holoholo daedae ukuilo dumita ba꞉be lumagi huiyala.  
\v 24 A꞉iye! Ba꞉bako lumagiti ebeno holohololo eta kuba dumimini, ebete ba꞉be komo hiduimihino, tote bada kuba komo kumi ba꞉be komo ba꞉ dito konadodoma꞉ne.  
\v 25 Huiyatiya kebe lumagiti Godokono Hidonomo Tutumu Tabo hidamo umiti kalakalago ba lawe, ebete ba꞉be tabamo papamiwatate adodoheno ba꞉be komo ipuwalo demedenamene, Godote ebeno hiliyonomo ododili ipuwalo ebe hidonomamo bowalubinakomene. Ba꞉ hibila, Godokono Hidonomo Tabote ba꞉bako lumagi ebeno hibima꞉ midi ipuwalo tutunomoma꞉ komidima꞉ne.   
\s1 Hibi Gabodo Godoko Ta꞉mata Komo  
\p
\v 26 Ba꞉bema꞉ la꞉ hidamo! Kebe lumagiti ebe ha꞉kiya ebe Godoko ta꞉matadawama꞉ ba goe huiyatiya ebeno ma꞉lapila hidamo uminaheno, ba꞉be lumagi ebe ha꞉kiya ebe ha꞉da kamihomema꞉ne. Ebeno Godoko ta꞉mata komo ba꞉ nene huiyala, iyo, ebeno emede ipuwalo hido komote a꞉kitanamene!  
\v 27 Ba꞉bema꞉ Godokono hibi ta꞉matadawoeno komo keba ka꞉nala꞉ka꞉? Ebete halipa gugudi ba꞉gala hamolehamole kamenakamena ba꞉bakobako awae tawakalubi ibino menemene ipuwalo hidonomamo owalubilina, ba꞉gala ebete ba꞉moe hopolo ba emedena kuba komokomo kododilinaha꞉, ba꞉ma ka꞉na ebete ebeno tepo ipuwa ukulate gala dalowa꞉ma꞉ a꞉kamida꞉mene. Ba꞉ hibila, Godote ba꞉bako lumagi dumimini ebe ebeno hibi ta꞉matadawama꞉ koka꞉mima꞉ne.   
\c 2  
\s1 Dogodogopi Kapiyatamo Hidohido Komo Akododila꞉la꞉  
\p
\v 1 Naeno ekaka꞉la꞉, la꞉ ba꞉ aeno Kodawa Ya꞉su Kelisoko hibima꞉ midipilata ba꞉gala ebe ba꞉ Godokono helo alo ipuwalo demedena ba꞉be Kodawala, ba꞉bema꞉ la꞉le tawakalubi hunu nikapa꞉mo ulameheno ba꞉ma ka꞉na eta lumagi miya꞉palo eta lumagi ebo akalawa꞉la꞉.  
\v 2 Ba꞉be mabuma꞉ keba tetelo eta dogodogodawate ebeno hidohido kaliko pupuliti ba꞉gala huiya konomo kakaeto ebeno kokotamo puliti la꞉eno sose kapiyuimi komamo da꞉pemene, ba꞉bene ba꞉be atu tetelo eta ilinaha꞉dawate la꞉ ipuwamo da꞉kapemene, la꞉eno ukui ibi netewapa꞉tamo keba ka꞉na na꞉kitanamene?  
\v 3 Hidohido kaliko pupuliti da꞉pemene, la꞉ ba꞉be lumagi koamo ba emalagidolo ebetamo ba꞉ma ka꞉na ba꞉ka꞉ga꞉loma, “Ama꞉ nolata, ba꞉moe dopo hapu habamo nemeda꞉?” Huiyatiya ilinaha꞉dawa da꞉pemene, la꞉ ebe malemalelo emalagidoloheno ebetamo ba꞉ma ka꞉na ba꞉ka꞉ga꞉loma, “Eta haba hibi kitanaha꞉, wadiyala ama꞉ tamelo dito na꞉la꞉na?”  
\v 4 A꞉iye! La꞉ ba꞉mako ododi komodo la꞉eno tepo ipuwoeno kuba ukui komo behawakalilamenakomata, mabu la꞉eno tepo ipuwalo la꞉ dogodogopi hidohidoma꞉ ba ga꞉la, ilinaha꞉pi nenema꞉ midililo ibi malemalelo kemalagidolenaha꞉!   
\p
\v 5 O naeno hidohido ekaka꞉la꞉, wadiyala la꞉ ba꞉moe tabo hidamo nulia꞉la꞉! Godote ilinaha꞉pi hibinomolo uwatiya꞉, iba꞉te ba꞉moe hopolo ba emedena hibima꞉ midi ipuwalo kokopima꞉ keda꞉hanama꞉. Ba꞉ hibila, galane iba꞉te Godokono Ko Gawadubu Habalo da꞉pola꞉na ba꞉bi dogodogo ilina kuwatema꞉na꞉, mabu Godote hibinomo tabo ya꞉lo olamagiya꞉, ba꞉be Haboeno hidohido komo ebe malemalelo demalagidolona ba꞉bi tawakaluba꞉tamo kikalamema꞉.  
\v 6 Huiyatiya numa꞉la꞉, la꞉ ba꞉bako ilinaha꞉pi malemalelo kemalagidolenaha꞉, dogodogopi kapiya bemalagidolenamata. A꞉iye! La꞉eno kuba ukui bada konomola꞉ka꞉! Komo tetelo ba꞉bi atu dogodogopa꞉te la꞉ hibima꞉ midipa꞉tamo koko temeteme ba ikalame gabomanino tabo anagiya꞉mida habamo la꞉ ba꞉bo magatalenakata.  
\v 7 Iyo, komo ibi ba꞉ Ya꞉su Kelisoko diduduputiminaka ba꞉bi hibima꞉ midiha꞉pila, ba꞉bema꞉ Ya꞉sukunu hido mahilo ebete la꞉ kowalubilima꞉ dikalamiya꞉la, iba꞉te ba꞉be mahilo kubama꞉ ga꞉lana.   
\p
\v 8 Numa꞉la꞉, Ko Gawadubu Godote ebeno konomo tutumu tabo ebeno Bukalo ba꞉ma ka꞉na hawakalimina, “Ama꞉ ha꞉kiya ama꞉ demalagidolona, ba꞉ba ka꞉na ama꞉ tamelo demedehona ba꞉bi tawakalubi malemalelo nemalagidolena,” ba꞉bema꞉ wadiyala la꞉ ba꞉moe tabamo hibinomolo na꞉papamila꞉hanala꞉.  
\v 9 Huiyatiya la꞉ papamila꞉haheno, ba꞉ma ka꞉na la꞉ tawakalubi hunu nikapa꞉mo ulamelo eta ilinaha꞉dawa nenema꞉ miditi, ba꞉bene ebe miya꞉pate eta dogodogodawa da꞉lawema, la꞉ ko kuba kododima꞉nemata. A꞉iye! Godokono konomo tutumu adikanale mabuma꞉ kuba huiyate la꞉tamo hibilo kopema꞉ne,  
\v 10 mabu kebe lumagiti Godokono hiliyonomo tutumu tabo ba uwate eta kapiya dadikanalemene, ba꞉ba tetelo ebete hiliyonomo tutumu tabo da꞉wakalamina ba꞉bako dubuma꞉ keda꞉ma꞉ne. Iyo, kapiya tutumu tabo adikanaledawa ba꞉gala hiliyonomo tutumu tabo wakalamidawa ibino komo ba꞉ kapiyala, mabu ibi netewapa꞉te kapiya gabodo ibino kuba huiya Godogodone kuwatema꞉na꞉.   
\p
\v 11 Ba꞉bema꞉ numa꞉la꞉, Kodawa Godote tutumu tabo ba꞉ma ka꞉na goiya꞉, “Ama꞉ eta dubuino kamena pilolo akalawa꞉la꞉,” ba꞉gala ba꞉moe atu Kodawate gala na꞉kagoiya꞉, “Ama꞉ eta lumagi akanakapuma꞉la꞉.” Ba꞉bene keba tetelo ama꞉ dopo tutumu tabo ba lawe huiyatiya ama꞉ tote eta lumagi dito da꞉nanakapumimina꞉, amia꞉no komote keba ka꞉na na꞉kitanamene? Ama꞉ dopo tutumu tabo adikanaleheno, ba꞉be mabuma꞉ Godote ama꞉tamo ba꞉ka꞉kalakalamene? Ao, ebete kuba huiya ama꞉tamo hibilo kikamema꞉na꞉ta, mabu ama꞉ ba꞉ ebeno eta tutumu tabo adikanala꞉ta!   
\p
\v 12 La꞉ hidamo nulia꞉la꞉, Godokono konomo tutumu tabo ba꞉ malemale hawakalimi tutumu tabola, ba꞉be tutumu tabote tawakalubino hibima꞉ midi ipuwalo ibi tutunomoma꞉ midilina. Ba꞉bema꞉ wadiyala la꞉ la꞉eno tabo ga꞉la ipuwalo ba꞉gala ododili komo ipuwalo ba꞉be ko tutumu tabamo hibilo na꞉papamila꞉hanala꞉, mabu galane Godokono Hunu Habalo ba꞉be kapiya tutumuti la꞉eno komo kanagiya꞉midalamema꞉na꞉ta.  
\v 13 Ba꞉ hibila, ba꞉ba tetelo Godote malemaleha꞉ tawakaluba꞉tamo ebeno malemale hawakalimihino kuba huiya iba꞉tamo kikalamema꞉ne, huiyatiya malemale hawakalimipa꞉tamo ebete kuba huiya a꞉kikalama꞉mene, ao, ebete ebeno malemale iba꞉tamo konomamo kohawakalimima꞉ne.   
\s1 Godoko Hibima꞉ Midi Komo Ba꞉gala Hidohido Ododili Komo Ba꞉ Kapiyala  
\p
\v 14 Naeno ekaka꞉la꞉, kebe lumagiti Godoko hibima꞉ midima꞉ goelo hidohido komo ododilihino, ebeno komo keba ka꞉nala꞉ka꞉? Godote tawakalubino komo danagiya꞉midalamemene, ba꞉ba tetelo ebete ba꞉be lumagino hibima꞉ midi komo modoboma꞉ ba꞉ka꞉goemene? Ao, ba꞉bako lumagino hibima꞉ midi komo ba꞉ ha꞉da amiho komola, ebeno ka꞉ka꞉ mula꞉ komote a꞉kitanamene.  
\v 15 Diyala la꞉eno hibima꞉ midipi kapiyuimi ipuwalo eta lumagiti kalikoha꞉ma꞉ kuda꞉ eda꞉na, ba꞉gala nahoeno ilinaha꞉dawate kuda꞉ a꞉luta.  
\v 16 Ba꞉bene la꞉ ipuwalo etate ba꞉bako awae lumagi umiti, ebe owalubihino ebetamo ba꞉ma ka꞉na da꞉goemene, “Ama꞉ Godokono kalakalago na꞉toa, ebe ha꞉kiya ama꞉ kalikamo ba꞉gala baa꞉mo kowalubima꞉na꞉ta,” ba꞉be tabo owalubi taboha꞉, ba꞉ kuba tabola. Ba꞉bema꞉ keba tetelo eta hibima꞉ mididawate ilinaheno demedena, ba꞉bene ama꞉le ebe kalikamo ba꞉gala baa꞉mo owalubihino, amia꞉no hibima꞉ midi komote keba ka꞉na kitana?  
\v 17 Ama꞉ hidamo nulia꞉, ama꞉le Godoko hibima꞉ midima꞉ goete huiyatiya hidohido komo ododilihino, amia꞉no hibima꞉ midi komo ba꞉ hoela.   
\p
\v 18 Huiyatiya la꞉eno hibima꞉ midipi kapiyuimi ipuwalo komopa꞉te na꞉ga꞉lana, “Lumagigodolo hidohido ododili komate pola꞉naheno kubaha꞉, mabu Godoko hibima꞉ midi komo ba꞉ tepo ipuwoeno ododi komola, apa꞉mo ododi komoha꞉.”  
\p Ba꞉bema꞉ na Ya꞉imesiti ibino tabo ba huiya na꞉goemo, “La꞉le hidohido komo dododilima nale la꞉eno hibima꞉ midi komo ba꞉bo kiya꞉tawama꞉nemo, huiyatiya la꞉le ododilihino na a꞉kiya꞉tawamo. Numa꞉la꞉, naeno komo ba꞉ ba꞉ma ka꞉nala, komopa꞉te naeno hibima꞉ midi komo kiya꞉tawahama꞉ nale hidohido komo ba꞉bema꞉ ododilinakomo.”   
\p
\v 19 Huiyatiya la꞉ komopa꞉te koga꞉lama꞉nemata, “Ale Godoko kapiya hibima꞉ na꞉midinama꞉, ba꞉moe ba꞉ ko komola, aeno apa꞉mo ododili komoha꞉.”  
\p Na huiyatiya kogoema꞉nemo, “Iyo, Godoko kapiya ba꞉ Kodawala, Saitanakono kubakuba gobogobo ba꞉be komo atumu iya꞉tawahala. Ba꞉bema꞉ iba꞉te ba꞉be komo hibima꞉ ba midi Godokono heloma꞉ lililahalelo na꞉toletolehona, huiyatiya numa꞉la꞉, iba꞉te ibino kuba ododili komo miya꞉paleheno hidohido komo a꞉kododila꞉la꞉. Ba꞉bema꞉ la꞉ na꞉kemalagidolutama Godote ibino tole komoma꞉ iba꞉tamo kokalakalama꞉ne? Ao, ibino hidohido komo ododiliha꞉ mabuma꞉ ebete iba꞉tamo kuba huiya hibilo kikalamema꞉ne!”   
\p
\v 20 A꞉iye, ama꞉ hidohido komo ododiliha꞉ lumagima꞉ deda꞉na, ama꞉ daedae lumagilata! Ama꞉ numa꞉, Godokono Bukoeno eta tabo komote a ba꞉ma ka꞉na iya꞉tua꞉mena, kebe lumagiti Godoko hibima꞉ midima꞉ goelo huiyatiya hidohido komo ododilihino, ba꞉be lumagino hibima꞉ midi komo ba꞉ ha꞉da amiho komola.  
\v 21 Iyo, ama꞉ aeno iniwa A꞉ibalahamakono komo nemalagidola. Ebete Godoko hibima꞉ ba midi, ebeno hibima꞉ midi komote ebeno ododi komodo ba꞉ma ka꞉na hawakaluya꞉, ebete Godoko owatidoloeno nakola patapata hunamo ebeno gudu Aisa꞉keko adila꞉tete Godotamo hibilo ikamiya꞉, iyo, ebeno hido ododi komodo Godote ebe eta tuputupudawama꞉ ba꞉bo ka꞉miya꞉.  
\v 22 Ba꞉bema꞉ ale ba꞉moe komo umima꞉, A꞉ibalahamakono hibima꞉ midi komo ba꞉gala ebeno ododi komo kapiyanomoma꞉ ba eda꞉, ebeno hibima꞉ midi komote ebeno ododi komodo modobonomoma꞉ ba꞉bo eda꞉miya꞉.  
\v 23 Iyo, ba꞉moe komote A꞉ibalahamatamo uluhukuya꞉, Godote ebeno Bukalo dopamo da꞉goiya꞉ ba꞉be tabote hibima꞉ keda꞉ma꞉, mabu ebeno Bukalo tabo ba꞉ma ka꞉na itana, “A꞉ibalahamate Godoko hibima꞉ da꞉midiya꞉, ba꞉bema꞉ Godote ebe tuputupudawama꞉ ba꞉bo goiya꞉.” Iyo, hibila, A꞉ibalahamakono hibima꞉ midi mabuma꞉ Godote ebe ebeno hido mabulubima꞉ ka꞉miya꞉.  
\v 24 Ba꞉bema꞉ wadiyala ama꞉ ba꞉moe ko komo hidamo na꞉lawa꞉, ama꞉ Godoko hibima꞉ midilo hidohido komo nododilinakuya꞉, mabu Godote hidohido ododili komo ama꞉godolo dulamemene ebete ama꞉ tuputupudawama꞉ koka꞉mima꞉na꞉ta. Huiyatiya ama꞉ hibima꞉ midi ipuwalo hidohido komo ododilihino, amia꞉no hibima꞉ midi komo ba꞉ ha꞉da amiho komola, Godote ama꞉ tuputupudawama꞉ a꞉kaka꞉ma꞉mena꞉ta.   
\p
\v 25 Ba꞉gala Godokono Bukate eta hibima꞉ mididawoeno komo bekahawakalimina, ebeno mahilo ba꞉ La꞉iha꞉batela. Ba꞉be kamenate dopamo Godoko hibima꞉ midiha꞉ tetelo dubu bilibili kamenama꞉ eda꞉nami, huiyatiya Isalaela tawakaluba꞉te ebeno Ka꞉inane hopo lawema꞉ da꞉pikuliya꞉, ba꞉ba tetelo ebete ibino Godo hibima꞉ miditi ibi ba꞉ma ka꞉na owalubiliya꞉. Isalaela dubu netewapa꞉te hopo umihoma꞉ diya gabodo ebetamo da꞉puluhukuya꞉, La꞉iha꞉bate ibi Ka꞉inane hopo gabomani dubatamo kikalamiya꞉ha꞉, ebete huiyatiya ibi hiya꞉ gabodo dito oelamiya꞉ gabomani dubate ibi anakapulamekapoma꞉. Ba꞉ hibila, mabu La꞉iha꞉bate ba꞉moe hido komo dododiya꞉, ba꞉be mabuma꞉ Godote ebe eta tuputupudawama꞉ ba꞉bo ka꞉miya꞉.   
\p
\v 26 Ba꞉bema꞉ naeno iya꞉tulame taboeno ipuwa kohawakalimima꞉ eta go tabo ba꞉ma ka꞉na itana. Lumagiti da꞉hoemene ba꞉ba tetelo ebeno gobogobote ebeno apene dito kuluhukuma꞉ne, gala ba꞉be hoe apelo a꞉kemedenamene. Ba꞉bema꞉ hibila, lumagino hibima꞉ midi komo ba꞉ ba꞉ba ka꞉nala, ebegodolo hidohido ododili komate pola꞉naheno, komopa꞉te ba꞉bo kiya꞉tawahama꞉na꞉ ebeno hibima꞉ midi komo ya꞉lo a꞉hoi.   
\c 3  
\s1 Hibima꞉ Midipa꞉te Ibino Tabo Olamagimi Komokomo Hidamo Nulamenamena꞉  
\p
\v 1 Naeno hibima꞉ midipi ekaka꞉la꞉, la꞉eno sose kapiyuimi ipuwalo kapiyakapiyanomate iya꞉tulamepima꞉ neda꞉huya꞉la꞉, mabu la꞉ iya꞉tawahala a puya꞉te Godokono tabo iya꞉tulamepima꞉ deda꞉hanama꞉, galane ebete aeno tabo olamagimi komo ba꞉gala ododili komo konomamo kanagilamelea꞉mema꞉ne, huiyatiya ebete komo hibima꞉ midipino komo ba꞉ba ka꞉na a꞉kanagilamelelama꞉mene.   
\p
\v 2 Ba꞉ hibila, komo tetelo a hibima꞉ midipi hiliyonomate Godokono hibi gabo otanakoma꞉. Huiyatiya numa꞉la꞉, a ipuwalo kebe lumagiti ebeno tabo olamagi komo hiliyonomo hidonomamo dulamena, ba꞉ma ka꞉na ebeno ma꞉lapilate eta kapiya tabo kubamo goeheno, ba꞉be lumagino ododili ipuwalo eta kubate atumu a꞉kitanamene, iyo, ebete ebeno apeno hiya꞉hiya꞉ ododili komo hiliyonomo hidonomamo ulamena eta kuba ododikapoma꞉.  
\v 3 Ba꞉bema꞉ wadiyala la꞉ ba꞉moe go tabo hidamo nemalagidolala꞉, oso-goeno namutudawate ebeno tabamo hale ihatete, ba꞉bene ebete oso-goe hunamo ba emede ba꞉be deha꞉poto hala꞉mo oso-goe hibi gabodo ba꞉bo katama꞉ne.  
\v 4 Ba꞉gala eta go tabo ba꞉ma ka꞉nala, huhuti kehaha꞉ kolomoeno ko palai boge heloamo ba atuta, boge atadawate atumu kiya꞉li deha꞉potoamo ba꞉be boge ebeno ubi gabodo dito katama꞉ne.   
\p
\v 5 Ba꞉bema꞉ lumagino ma꞉lapila ba꞉ atumula. Ebe ba꞉ lumagino ape konomo ipuwalo ditana ba꞉be apeno deha꞉poto komola, huiyatiya ebe ha꞉kiya ubi dihatemene ma꞉lapilate lumagi kuba gabamo ba꞉bo komagatama꞉ne. Iyo, ebete awagaha tabo olamagi komodo koko komo ododilima꞉ da꞉goemene, ebete ba꞉ ba꞉ba ka꞉na ebeno ka꞉ka꞉ konomo konekubahimima꞉ne, koe powa deha꞉potote konomoma꞉ eda꞉te koko kehate da꞉la꞉mota꞉hana ba꞉bi ilina keba ka꞉na ka꞉wamotenako ba꞉ba ka꞉na.  
\v 6 Iyo, hibila, lumagino ma꞉lapila ba꞉ koe powa huiyala, mabu ma꞉lapilate lumagino apelo ba꞉ deha꞉poto ilinama꞉ eda꞉na, huiyatiya ebeno kuba tabo olamagi komate ba꞉be lumagino ape konomo dalowa꞉ma꞉ miditi ebeno emede komoeno hiliyonomo komokomo dito kokubahilamema꞉na꞉. Ba꞉bema꞉ numa꞉la꞉, ma꞉lapiloeno koete Saitanakono Koe Habane puluhukunako, iyo, ma꞉lapilate ba꞉be Kubadawoeno ubi komamo papamiwatanako.   
\p
\v 7 Ba꞉ hibila, natamo wapata꞉lame ilina ba꞉gala tepamo wapata꞉lame ilina, beya ipuwalo da꞉ka꞉ka꞉halena ba꞉bi ilina ba꞉gala holahola, tawakaluba꞉te ba꞉bi hiya꞉hiya꞉ ilina hiliyonomo gelebadilame iya꞉tawahala,  
\v 8 huiyatiya lumagiti ebeno ma꞉lapila gelebadimi modoboha꞉. Gabo kitanaha꞉ mabu ma꞉lapilate kubanomoma꞉ ba eda꞉, ebeno kuba tabo olamagi komate komo tawakalubi anakapulamema꞉ ewagelena, ebe helo kalu keba ka꞉nala꞉ka꞉ ba꞉ba ka꞉nala.   
\p
\v 9-10 Ba꞉bema꞉ naeno hibima꞉ midipi ekaka꞉la꞉, wadiyala la꞉ ba꞉moe komo hidamo nemalagidolala꞉. Komo tetelo a hibima꞉ midipa꞉te aeno ma꞉lapilamo aeno Kodawa Nabiwi Godoko a꞉milimihonakoma꞉, ba꞉bene komo tetelo ale komo tawakaluba꞉tamo maubahalete aeno tabamo ibi ba꞉bo kubahilamenakoma꞉. Numa꞉la꞉, Godote ba꞉bi tawakalubi ebeno holoholamo ododiliti ebeno gugudima꞉ ka꞉lamina, ba꞉bema꞉ milimiho tabo ba꞉gala mela tabo atu lumagino tabone dikulimina꞉ ba꞉be komo ko kubanomoma꞉ keda꞉ma꞉ne! A꞉iye, ba꞉bako kubate a ipuwalo akuluhukala꞉!  
\v 11-12 O naeno ekaka꞉la꞉, la꞉ iya꞉tawahala, sipolo gao kehane tawakaluba꞉te boga꞉me gao a꞉katapihala꞉, ba꞉gala hiwila gao kehane atumu sipolo gaote a꞉kanolohala꞉. Ba꞉ ba꞉ba ka꞉na tawakaluba꞉te hido a꞉la꞉mina beya ma꞉pene kuba solo beya a꞉kiyapohala꞉, iba꞉te huiyatiya hido beyanomo biyapohonaka, iyo, hibila, solagoeno beya ma꞉pete hido gola beya tawakaluba꞉tamo ikalame modoboha꞉.   
\s1 Godokono Hibi Mulu Komo  
\p
\v 13 Ba꞉bema꞉ la꞉eno hibima꞉ midipi kapiyuimi ipuwalo eta mulu ukuidawa ba꞉ka꞉luta? Wadiyala ba꞉bako dawate tuputupu emede komodo ebeno mulu ba꞉ma ka꞉na na꞉hawakalima꞉mene, ebete awagahaheno hidohido komo kapiya bododilinakomene.  
\v 14 Huiyatiya la꞉ la꞉eno tepo ipuwalo komopino ilinama꞉ iba꞉tamo da꞉maubahanama, ba꞉gala awagaha ipuwalo la꞉ ha꞉kiya la꞉ da꞉wadiya꞉paa꞉latelenama, la꞉ hidamo! La꞉eno awagaha komoeno ododili ipuwado la꞉ Godokono hibi gabo ha꞉da gaboma꞉ ga꞉lanamata, ba꞉bema꞉ wadiyala la꞉ ba꞉be awagaha komo na꞉miya꞉pala꞉.  
\v 15 A꞉iye, la꞉godolo ditana ba꞉be awagaha ukui Godokono Hunu Habane kapenaha꞉! Ao, ba꞉bako ukui ba꞉moe hopoeno mulu ukui komola, ba꞉be ha꞉da mulu komote Saitanagodone ba pena Godokono hibi mulu komago ba꞉bo palaholonako.  
\v 16 Ba꞉bema꞉ puya꞉te komopino ilinama꞉ iba꞉tamo da꞉maubahana, ba꞉gala puya꞉te awagaha ipuwalo ibi ha꞉kiya ibi kapiya demalagidolena, ba꞉ba꞉te olowabeletihui ipuwalo hiya꞉hiya꞉ utitatate hiliyonomo hiya꞉hiya꞉ kuba komo ba꞉bo ododilinaka.   
\p
\v 17 Huiyatiya Godogodone da꞉pena ba꞉be mulu komoeno ododili komo eba ka꞉naha꞉, mabu ebeno hibi muluti tawakaluba꞉godolo ditana, iba꞉te kuba dalowa꞉ komokomo a꞉kododila꞉la꞉. Ba꞉bi tawakaluba꞉te tatabalo ba emedena olowabeletihui komo a꞉kiya꞉tawahala꞉, huiyatiya ibi ipuwalo etate eta malemaletelo hidohido komo ba꞉bo ododilinaka. Ba꞉bene iba꞉te tawakalubi hunu nikapa꞉mo ulameheno ba꞉ma ka꞉na eta lumagi miya꞉pate eta lumagi ebo a꞉kalawa꞉la꞉, ba꞉gala iba꞉godolo ma꞉lapila netewa komote kitanaha꞉.  
\v 18 Ba꞉ hibila, puya꞉te ba꞉mako tataba emede komo komopa꞉tamo dikalamena, ibi ba꞉ hidohido kikipo hakamo damihona ba꞉bi okopi huiyala, mabu ibino oko owati ipuwalo hidohidonomo naha ilinate hibilo kopikulima꞉na꞉.   
\c 4  
\s1 Ba꞉moe Hopoeno Komokomo Koamo Emalagidole Komo  
\p
\v 1 Ba꞉bema꞉ la꞉ hibima꞉ midipi ipuwalo alaholoho komo ba꞉gala olowabeletihui komo kebene ka꞉pelamenaka? Iyo, ba꞉bi komate la꞉eno kateneno kubakuba ubi komodo pikulinaka, mabu ba꞉bako ubi komate la꞉eno tepo ipuwalo hidohido ukui komago alaholohona.  
\v 2 Ba꞉ ba꞉ba ka꞉na la꞉le komopino ilina uwatema꞉ ewagelenamata, huiyatiya uwate gabo umihino ba꞉bema꞉ la꞉le la꞉eno tabamo ibi anakapulamenakomata. Ba꞉gala la꞉ koko ilina uwatema꞉ ubi konomola, huiyatiya la꞉godolo pola꞉naheno ba꞉bema꞉ la꞉le ba olowabeletihui kubanomamo ba꞉bo alaholohonakomata. A꞉iye! Mabu keka꞉ la꞉le la꞉eno komo ilina modobolo kuwatenaha꞉? Mabu ba꞉ la꞉le Godoko la꞉eno modoboha꞉ komoma꞉ hibi gabodo a꞉katoemehalemata.  
\v 3 Ba꞉bema꞉ numa꞉la꞉, keba tetelo la꞉le eta ilinama꞉ Godoko da꞉toemehonakoma, ba꞉ba tetelo la꞉eno tepo ipuwoeno ukui tuputupulu kapola꞉naha꞉, mabu la꞉ ubila ba꞉be ilina lawete la꞉ ha꞉kiya la꞉ kokalakaluilamema꞉. Iyo, la꞉le Godoko kokalakaluimima꞉ ukui kihatenaha꞉, ba꞉bema꞉ ebe ubihinola eta ilina la꞉tamo ikalame.   
\p
\v 4 A꞉iye, la꞉ ba꞉ hibima꞉ midiha꞉ tawakalubi huiyalata! La꞉ iya꞉tawahala꞉ka꞉, kebe lumagiti ba꞉moe hopoeno komokomo koamo demalagidolena ebete Godokoba꞉ alaholohodawama꞉ eda꞉na? Iyo, ba꞉ hibila, pote ba꞉moe hopoeno ilina ba꞉gala awagaha komokomo uwatema꞉ dewagelena, ebe ba꞉ Godokoba꞉ alaholodawala.  
\v 5 Ba꞉bema꞉ numa꞉la꞉, Godokono Bukalo tabote ba꞉ma ka꞉na itana, “Godoko ubi konomola ebeno Gobogobote ha꞉kiya aeno tepo ipuwalo kemedenama꞉, ba꞉bema꞉ ebete aeno kubakuba ukui komago helonomamo alaholohonako.” Iyo, la꞉ iya꞉tawahala ba꞉be tabote hibinomoma꞉ ba eda꞉na,  
\v 6 ebeno Bukalo ba꞉moe eta tabote atumu ba꞉ka-itana,  
\b  
\q1 “Puya꞉te dawagahana Godote iba꞉go nalaholohona,  
\q1 huiyatiya puya꞉te ibi ha꞉kiya ibi hopamo da꞉miya꞉tena,  
\q1 ebete iba꞉tamo ebeno ko malemale behawakaliminako.”  
\b  
\m Kalakala konomola, Godote ebeno malemale atamo ba꞉ ba꞉ba ka꞉na hawakalimina!   
\b  
\p
\v 7 Ba꞉bema꞉ wadiyala la꞉ ha꞉kiya la꞉ Godotamo ikamehote Saitanatamo helonomoma꞉ neda꞉hanala꞉, mabu la꞉le ba꞉ba ka꞉na dewagelema, Saitanate la꞉ kuba gabamo emogabuilame ipuwane la꞉ miya꞉palete gobogobamo tiyo kalahula꞉ma꞉ne.  
\v 8 Ba꞉ hibila, keba tetelo la꞉ Godoko tama꞉mo da꞉pelamema, ba꞉be atu tetelo ebete la꞉tamo puluhukuti la꞉ kalakalago kopuwatema꞉na꞉ta. Ba꞉bema꞉ la꞉ puya꞉te kuba komokomo dododilinama, wadiyala la꞉ la꞉eno dalowa꞉ kokoto ukulalete kuba komo gala akododila꞉la꞉. Ba꞉gala la꞉ puya꞉te Godoko ba꞉gala ba꞉moe hopoeno komo atu tetelo ta꞉matalema꞉ dewagelenama, wadiyala la꞉ la꞉eno tepo ipuwoeno kubakuba ukui hiduilamete,  
\v 9 ba꞉bene la꞉eno kuba mabuma꞉ wadiyala la꞉le tepo temetemema꞉ eda꞉hate nihima꞉la꞉. Iyo, wadiyala la꞉ la꞉eno iya꞉da꞉ komo miya꞉pate tepo ipuwoeno ihi komo na꞉lawiya꞉la꞉, ba꞉bene la꞉eno kalakala komote huiyatiya menemenema꞉ neda꞉mene.  
\v 10 Ba꞉bema꞉ hibila, la꞉ Godokono holoholo hapulu la꞉ ha꞉kiya la꞉ hopamo ba miya꞉te, ebete huiyatiya la꞉ hunamo kowadiya꞉paa꞉latelema꞉na꞉ta.   
\s1 Eta Hibima꞉ Mididawoeno Komo Kubama꞉ Akagaa꞉la꞉  
\p
\v 11 Naeno ekaka꞉la꞉, ba꞉moe ba꞉ eta komola. La꞉eno hibima꞉ midipi kapiyuimi ipuwalo etate etoeno komo kubama꞉ akagaa꞉la꞉, mabu keba tetelo ama꞉ eta hibima꞉ mididawoeno komo kubama꞉ da꞉goemena꞉, ba꞉ba tetelo ama꞉ Godokono konomo malemale tutumu tabo kadikanalema꞉na꞉ta. Numa꞉la꞉, Godote ebeno tutumu tabamo ama꞉ bikiyamenata ama꞉le amia꞉no hibima꞉ midi ekawi malemalelo kemalagidolonama꞉, ba꞉bema꞉ keba tetelo ama꞉ amia꞉no ekawi kubama꞉ da꞉goemena꞉, ba꞉ba tetelo ama꞉ Godokono tutumu tabo atumu kubama꞉ kakagoema꞉na꞉ta.  
\v 12 A꞉iye, ama꞉ ko lumagiha꞉! Ama꞉tamo helo pote kikametana eta lumagino komo kanagiya꞉midamema꞉? Godoko kapiya ba꞉ tutumu tabo ododilidawala, ba꞉gala ebe kapiya ba꞉ tawakalubino komokomo anagilamelelamedawala, ba꞉bema꞉ ba꞉moe Kodawa kapiyate modobola tawakalubino emede komokomo ba anagilamelelame etoeno ka꞉ka꞉ mula꞉mete etatamo kuba huiya kikamema꞉ne.   
\s1 Lumagiti Ebeno Ododili Komoma꞉ Awagaha Tabo Akolamaga꞉la꞉  
\p
\v 13 Ba꞉gala eta komo. La꞉ komopi ba꞉ma ka꞉na ga꞉lanakomata, “Ka꞉lo gapogapolo o dumutu hegelalo na ko habamo tote, ba꞉bolo nale kapiya gogo ba nemede bisnisi oko nowatiti mani kokonomo konuwatema꞉nemo.”  
\v 14 A꞉iye! Ama꞉ iya꞉tawaha꞉ dumutu ama꞉tamo bada komote na꞉kuluhukumini. Ama꞉ hopo lumagilata, ba꞉bema꞉ amia꞉no ka꞉ka꞉ ba꞉ ahuta keba ka꞉nala꞉ka꞉ ba꞉ba ka꞉nala, lumagiti tete nanekele umiti ha꞉kiya tiyonomo ba꞉bo kowiboma꞉ne.  
\v 15 Ba꞉bema꞉ wadiyala ama꞉le awagaha tabo olamagi komo miya꞉pate ba꞉ma ka꞉na na꞉goiya꞉, “Godote helo natamo dikanamemene, na dumutu ka꞉ka꞉go ba luta nale ebeno ubi komo ba꞉bo kododima꞉nemo.”  
\v 16 Huiyatiya la꞉ komopi ba꞉mako hidohido tabo a꞉kaga꞉lalemata, la꞉ ha꞉kiya la꞉ bawagaminalenamata, ba꞉bema꞉ Godote la꞉eno awagaha tabo ga꞉la komoma꞉ kakalakalanaha꞉.  
\v 17 Iyo, ba꞉moe komo ba꞉ hibila, kebe lumagiti tuputupu ododi komo ba iya꞉tawa huiyatiya ba꞉be komamo papamiwataheno, ebeno ododiha꞉ komodo ebete Godokono kukala ba꞉bo kadikanalema꞉ne.   
\c 5  
\s1 Dogodogopa꞉te Ibino Kuba Ododili Komo Miya꞉palete Godotamo Nohobila꞉hamena꞉  
\p
\v 1 Ba꞉bema꞉ dogodogopa꞉la꞉, la꞉ naeno tabo hidamo nulia꞉la꞉. Wadiyala la꞉ ba꞉ma tetelo ihimi na꞉tupuima꞉la꞉, mabu koko temetema꞉te la꞉tamo ba꞉ na꞉pelama꞉,  
\v 2 iyo, tete tatalila la꞉eno dogodogo komate kokubakubahama꞉na꞉. Ba꞉ba tetelo la꞉eno pupulino ilina unawa꞉te nalete,  
\v 3 ba꞉bene la꞉eno hidohido disi hakate ba uwate nonokama꞉ ba꞉bo keda꞉hama꞉na꞉. Ba꞉bema꞉ hibila, Godote tawakalubino kuba danagilamelelamemene, ba꞉be Ko Hegelalo ba꞉bi nonoka ilinate la꞉eno kuba ododili komo ba꞉gala kuba ukui komo kohawakalilamema꞉na꞉. Numa꞉la꞉, ba꞉moe hopoeno kuititi tetete ba penape, la꞉eno ilina ya꞉lo a꞉dogodoguilamenamimata, huiyatiya tete tatalila la꞉eno kalakala komote kowiboma꞉ne, iyo, la꞉eno nonoka ilinate la꞉eno ape ba kubahilame la꞉eno kalakalate ba꞉bo kowiboma꞉ne, helonomo koete daha ipulunomoma꞉ keba ka꞉na ka꞉midinako ba꞉ba ka꞉na.   
\p
\v 4 Ba꞉ hibila, la꞉eno kuba komo ba꞉ ba꞉ma ka꞉na itana. La꞉eno koko bisnisi ipuwalo puya꞉te la꞉eno kolowamino pali ilina da꞉tapiholamenaka, la꞉le iba꞉tamo hido huiya a꞉kikalama꞉lemata, ba꞉bema꞉ iba꞉te ibino temeteme ipuwalo konomamo ihimina. A꞉iye, Helodawa Godote ba꞉be ihimi komo ya꞉lo iya꞉tawui!  
\v 5 Ba꞉bema꞉ numa꞉la꞉, la꞉ ba꞉moe hopolo dogodogopima꞉ ba eda꞉hana la꞉ ha꞉kiya la꞉eno kateneno ubilo la꞉ a꞉kalakaluilamenakomata, iyo, la꞉ hidohido baa꞉ ba nahana gadigadihibima꞉ ya꞉lo eda꞉huimata. Ba꞉bema꞉ gadigadi kau-goegoe keba ka꞉nala꞉ka꞉ la꞉ ba꞉ba ka꞉nala, tete tatalila Namutudawate la꞉ anakapulamema꞉ kopema꞉ne.  
\v 6 Ba꞉gala eta komo. Komo tetelo la꞉le tuputupu tawakaluba꞉tamo maubahalete, ba꞉bene la꞉le ibi gabomana꞉tamo dito magatalenakomata iba꞉te iba꞉tamo hoe huiya kikalamema꞉. A꞉iye! Ba꞉bi tawakaluba꞉te la꞉tamo eta kuba a꞉kododa꞉la꞉, huiyatiya ba꞉be gabodo la꞉le ibi dito anakapulamenakomata!   
\s1 Hibima꞉ Midi Ipuwalo Kodakodalo La꞉mota꞉hana Komo  
\p
\v 7 Ba꞉bema꞉ naeno ekaka꞉la꞉, la꞉eno hibima꞉ midi ipuwalo kodakodalo na꞉la꞉mota꞉hanala꞉ Kodawa Ya꞉sukunu pe teta꞉mo. Wadiyala la꞉ pali ododidawoeno komo nemalagidolala꞉, ebete pali ilina amihote hidohido pali ilina naha tete ba꞉bo kolatimima꞉ne. Ba꞉ma ka꞉na dopo manome tetelo wegolate donakomene ba꞉gala kuititi manomelo gala da꞉konakomene, hakate hido gibama꞉ ba eda꞉ ebeno pali ilinate hidamo ba꞉bo kapepehoma꞉na꞉.  
\v 8 Ba꞉bema꞉ la꞉ ba꞉ atumu Ya꞉sukunu pe komo latimima꞉ ubiha꞉ma꞉ eda꞉haheno kodakodalo na꞉la꞉mota꞉hanala꞉, mabu ebeno pe tete ba꞉ na꞉tatali!  
\v 9 Ba꞉bema꞉ naeno ekaka꞉la꞉, la꞉ ipuwalo etate eta lumagino komoma꞉ ubiha꞉ tabo akagaa꞉la꞉, mabu diyala, Godote amia꞉no tamedawoeno emede komo modoboma꞉ ba goe huiyatiya ama꞉ kubadawama꞉ da꞉ goemene. Iyo, ba꞉be Kodawate ba꞉ na꞉pe a hiliyonomoeno komokomo kopanagilamelea꞉mema꞉!   
\p
\v 10 Ba꞉gala naeno ekaka꞉la꞉, wadiyala la꞉le ya꞉lo tetelo da꞉pikuliya꞉ ba꞉bi Godokono ukui hawakalimipino komo nemalagidolala꞉. Iba꞉te Godokono oko ba owatina koko temeteme duwatenakui, huiyatiya iba꞉te hibima꞉ midi ipuwalo kodakodalo la꞉mota꞉hananakuya꞉, ba꞉bema꞉ iba꞉te keba ka꞉na kemedenama꞉, wadiyala la꞉ ba꞉ ba꞉ba ka꞉na nemedenala꞉.  
\v 11 Numa꞉la꞉, a hibima꞉ midipa꞉te ba꞉bako okopi ba emalagidole ba꞉ma ka꞉na ga꞉lanakoma꞉, “Ibino kodakodalo la꞉mota꞉hana mabuma꞉ Godokono kalakala komote iba꞉godolo hibilo nitanami!” Ba꞉bema꞉ wadiyala la꞉ eta hibima꞉ mididawa Yaubakono komo atumu na꞉kemalagidolala꞉. Konomo olalati komote ebetamo duluhukuya꞉, ba꞉ba tetelo ebete hibima꞉ midi ipuwalo kodakodalo la꞉nami, ba꞉bema꞉ Kodawa Godote ebe owalubiti olalati ipuwane ebeno ka꞉ka꞉ a꞉mula꞉miya꞉. Kalakala konomola, Godoko ba꞉ konomo malemaledawala.   
\s1 Hibinomo Tabo Goe Komo  
\p
\v 12 Ba꞉bema꞉ naeno hibima꞉ midipi ekaka꞉la꞉, ba꞉moe eta komo ba꞉ ko komonomola. La꞉le komopa꞉tamo hibinomo tabo ga꞉lama꞉ dewagelema, ulihopa꞉te la꞉eno tabo hibima꞉ komidima꞉ la꞉le Godokono Hunu Haboeno mahilo akaka꞉ma꞉la꞉ ba꞉gala hopo haboeno mahilo atumu akaka꞉ma꞉la꞉. Ba꞉bema꞉ hibima꞉ mididawa, wadiyala ama꞉ huiyatiya amia꞉no tabo olamagi ipuwalo eta ilinoeno mahilo ka꞉mihino tabo hibilo ba꞉ma ka꞉na na꞉goiya꞉, “Iyo, na kododima꞉nemo,” ba꞉gala keba tetelo ama꞉ eta komo ododi modoboha꞉ma꞉ deda꞉mena꞉, wadiyala ama꞉ eta hibi tabo ba꞉ma ka꞉na na꞉goiya꞉, “Ao, na a꞉kododa꞉mo.” A꞉iye! Komopa꞉te ama꞉ hibima꞉ komidima꞉ ama꞉le amia꞉no tabo heluimima꞉ eta tabo akagaa꞉la꞉, mabu ba꞉bako tabo olamagi komoma꞉ Godote kuba huiya ama꞉tamo kopoemema꞉ne.   
\s1 Godotamo Toetoe Tabo Olamagi Komo  
\p
\v 13 Ba꞉bema꞉ la꞉ ipuwalo kebe lumagiti komo temeteme ipuwalo demedena, wadiyala ebete toetoe tabo Godotamo nolamaga꞉mene. Ba꞉gala kebe lumagiti kalakala ipuwalo demedena, wadiyala ebete Godoko adikumi ohale nalapihohamene.  
\v 14 Ba꞉gala kebe lumagi temetemete dumina, wadiyala ebete sose watowatopi ka꞉lamiti, ba꞉bene iba꞉te pelamete Kodawa Ya꞉sukunu mahilamo olibi kikipoeno iha꞉mo ebeno wato kali pabutimiti Godotamo ebe ba꞉bo nadipata꞉mena꞉.  
\v 15 Ba꞉bema꞉ iba꞉te Godoko hibima꞉ ba midi, ebete ibino toetoe tabo uliti temetema꞉goeno lumagi ba꞉bo kohiduimima꞉ne, ba꞉gala diyala, ba꞉be temetemete ba꞉be lumagino kuba ododili komodo ebetamo kuda꞉ a꞉pi, ba꞉bene Godote ba꞉be komo iya꞉tawate ba꞉be atu tetelo ebeno kuba egebolemete kadodolemema꞉ne.  
\v 16 Ba꞉bema꞉ wadiyala la꞉ ipuwalo etate ebeno kuba ododili komokomo kahawakalilame, etate ebeno kuba ododili komokomo kahawakalilame, ba꞉ba ka꞉na newagelenala꞉, ba꞉bene la꞉ ipuwalo etate eta Godotamo nadipatenakuya꞉la꞉, ebete la꞉eno kuba egebolelamete la꞉eno apeno hiya꞉hiya꞉ temeteme komo tama꞉mo komiya꞉telamema꞉. Ba꞉ hibila, kapiya tuputupudawoeno toetoe tabo olamagi ipuwado Godoko ba꞉ modobola koko hanohano komo ododilima꞉.   
\p
\v 17 Numa꞉la꞉, Godokono ukui hawakalimidawa Elayako ba꞉ hopo lumagila, a keba ka꞉nala꞉ka꞉ ebe ba꞉bako lumagila. Huiyatiya ebe hido tuputupudawala, ba꞉bema꞉ wegolate kowiboma꞉ ebete Godotamo konomamo da꞉toetoiya꞉, Godote ebeno tabo hibilo uliya꞉, iyo, ba꞉ba tetene tupuimiti wegolate tete ga꞉ga꞉nomolo konakuiha꞉, ba꞉be tete ba꞉ netewa-kapiya gogo ba꞉gala sikisi manome tetela.  
\v 18 Huiyatiya wegolate gala oma꞉ Elayate Godotamo toetoe tabo da꞉kolamagiya꞉, Godote ebeno toetoe tabo gala kuliti wegola hopamo ba꞉bo poemiya꞉ tawakalubino pali ilinate gala kakapepehoma꞉.   
\s1 Lumagino Ka꞉ka꞉ Mula꞉me Komo  
\p
\v 19 Ba꞉bema꞉ naeno hibima꞉ midipi ekaka꞉la꞉, naeno kuititi leta tabo ba꞉ ba꞉ma ka꞉nala. La꞉ ipuwalo etate Godokono hibi gabone gobogobamo delehegamene, wadiyala etate ebe gala na꞉kamagaha꞉mene.  
\v 20 Iyo, la꞉ ba꞉moe ko komo nemalagidolala꞉, kebe lumagiti kuba ododidawa umiti ebeno kuba gabone Godokono hibi komamo gala da꞉kamagahemene, Godote ba꞉be tuputupudawoeno ododi komodo kubadawoeno ka꞉ka꞉ mula꞉mete ebeno kuba ododili komokomo ba꞉bo kegebolemema꞉ne.  
\p Ba꞉moe ba꞉ naeno tabo kuititila. Ba꞉ba꞉la.