\id EPH - Tabo (Aramia dialect) NT - Papua New Guinea 2006 (DBL 2014) 
\h Epe 
\toc3 Epe 
\toc1 Polote Leta Epesese Sose Tawakaluba꞉tamo Ododiya꞉ 
\toc2 Epesese 
\mt2 POLOTE LETA  
\mt1 EPESESE SOSE TAWAKALUBA꞉TAMO  
\mt2 ODODIYA꞉  
\c 1  
\p
\v 1 Na ba꞉ Polotela, Ya꞉su Kelisote ebeno sose tupuimima꞉ hiya꞉hiya꞉ hopamo doelamiya꞉, ba꞉bi okopi ipuwalo na ba꞉ etala, mabu Godote ebeno ubilo na ba꞉bema꞉ laweniya꞉. Ba꞉bema꞉ la꞉ puya꞉te Epesese habalo Godokono tawakalubima꞉ ba eda꞉hana Ya꞉su Kelisoko ipuwalo hibilo demedehonama, nale ba꞉moe leta la꞉tamo poememo.   
\p
\v 2 Wadiyala aeno Nabiwi Godoko ba꞉gala Kodawa Ya꞉su Kelisoko iba꞉te ibino malemale komo ba꞉gala hete la꞉tamo nikalama꞉mena꞉ta.   
\s1 Godote Kelisokono Oko Ipuwado Hiliyonomo Hidohido Komo Atamo Dikaa꞉mena  
\p
\v 3 Numa꞉la꞉, aeno Kodawa Ya꞉su Kelisokono Nabiwi ba꞉ Godotela, ba꞉bene ale Kelisoko ipuwalo demedenama꞉, ebete ba꞉be komodo a hidonomamo kowalubinama꞉ ebeno Hunu Habalo kebe hidohido komate da꞉pola꞉na ba꞉bi komo hiliyonomo ebete atamo dito ikaa꞉mena. Ba꞉moe ba꞉be mabuma꞉ wadiyala ale ebe komilimihoma꞉nema꞉!   
\p
\v 4 Ba꞉ hibila, ba꞉moe hopo ododi tupuimihino dopamo ebete a uwatiya꞉, ale Kelisokono oko ipuwado ebeno tawakalubima꞉ ba eda꞉hana, eta deha꞉potonomo kubate agodolo itanaheno ale ebeno holoholo hapulu talonanomolo ba꞉ba ka꞉na kola꞉mota꞉hanama꞉. Iyo, ya꞉lo tetenomolo ale hawakalahaleheno ebete a malemalelo ba emalagidoloena  
\v 5 ebeno ubi komo ba꞉bo ihatiya꞉, ebe ha꞉kiya ebe kokalakaluimima꞉ ebete a uwatete Ya꞉su Kelisokono oko ipuwado a ebeno hibi gugudima꞉ komidima꞉.  
\v 6 Ba꞉bema꞉ numa꞉la꞉, ebete poko konomamo demalagidolona ba꞉be Gudugodone ebeno hidonomo malemale komo atamo dito dikaa꞉miya꞉, ba꞉be mabuma꞉ wadiyala ale ebe komilimihoma꞉nema꞉!   
\p
\v 7-8 Ba꞉ hibila, Kelisokono hawiti da꞉ka꞉ka꞉liya꞉, Godote a ba꞉be hawa꞉mo uwatete aeno kuba ododili komo egebolea꞉mete Saitanakono du genamane ba꞉ dito uluhukua꞉tiya꞉. Numa꞉la꞉, ebete hiya꞉hiya꞉ komo hiliyonomo ba iya꞉tawa ebeno mulunomo ukui komodo kebe komo atamo konomamo dikaa꞉miya꞉, ba꞉be malemale komoeno hido komo bada konomola꞉ka꞉!  
\v 9-10 Ba꞉bema꞉ numa꞉la꞉, Godote ebeno ubilo kalakalago dihatiya꞉ ba꞉be nopo ebete dopamo ugumuiya꞉, huiyatiya ba꞉ma tetelo ebete ba꞉be nopoeno komo atamo ba꞉ma ka꞉na hawakalimiya꞉, ebete ebeno hido oko Kelisoko ipuwado kupula꞉ma꞉ne. Iyo, ebete ba꞉moe hopolo ba꞉gala Hunu Habalo kebe tawakalubi ba꞉gala gobogobo ba꞉gala ilina ba꞉gala komo hiliyonomo komokomo dododiliya꞉, ba꞉ba꞉te hidonomamo kopola꞉nama꞉ ebete ibi hiliyonomo kapiya ukuia꞉mo kapiyuilamete Kelisote ibino Ko Gawadubuma꞉ keda꞉nama꞉ ebe ba꞉bo kihatema꞉ne. Ba꞉bema꞉ kalakala konomola, Godote kebe tete hidonomoma꞉ da꞉goemene, ba꞉ba tetenomolo ba꞉moe nopoeno komote hibinomolo ba꞉bo kuluhukuma꞉ne!   
\p
\v 11 Ba꞉ hibila, kebe komokomo hiliyonomate ba꞉moe hopo habalo ba꞉gala Hunu Habalo dikulinaka, ba꞉bi komate Godokono ubi komo kapiyado ikulihonaka, iyo, ba꞉moe hopo ododi tupuimihino ebete dopamo ebeno hido ukui komodo dihatiya꞉, ba꞉be nopoeno komokomo hiya꞉ma꞉ komidilima꞉ eta komote a꞉kuluhukamene. Ba꞉bema꞉ a hawakalahaleha꞉ tetelo Godote a mabuma꞉ ebeno ubi keba ka꞉na kihatiya꞉, ebete ba꞉ ba꞉ba ka꞉na ododiya꞉, iyo, ebete a Kelisoko ipuwalo uwatete a ebeno tawakalubima꞉ ba꞉bo midiya꞉.  
\v 12 Numa꞉la꞉, a Yunapi ipuwalo puya꞉te Kelisoko dopamo hibima꞉ da꞉midiya꞉ma꞉, Godote ebeno nopo atamo dopamo ba꞉bema꞉ hawakalimiya꞉ ale ebeno hido ododi komoma꞉ ebe komilimihonama꞉.  
\v 13 Huiyatiya ba꞉ma tetelo la꞉ Yuha꞉pa꞉te Godokono tawakalubima꞉ atumu a꞉keda꞉huimata, iyo, la꞉ Godokono hibi taboeno komokomo dulihuima, ba꞉be Hido Tabo komodo la꞉eno ka꞉ka꞉ mula꞉ komote ba hawakala, la꞉ Kelisoko hibima꞉ ba꞉bo midimata. Ba꞉bema꞉ la꞉le Godokono hibi gugudima꞉ eda꞉ha komo kohawakalimima꞉, ebete ba꞉be atu tetelo ebeno Gobogobo la꞉tamo ikalamia꞉ta, dopamo ebete hibinomolo keba ka꞉na ka꞉goiya꞉ ba꞉ba ka꞉na.  
\v 14 Numa꞉la꞉, Godokono Gobogobote a hibima꞉ midipi hiliyonomo ipuwalo bemedena, ba꞉bema꞉ a iya꞉tawahanomola kebe hidohido komate aeno Nabiwi Godogodolo a mabuma꞉ da꞉pola꞉na, ba꞉bi komo hiliyonomate a ebeno guguda꞉tamo hibinomolo kikulihoma꞉na꞉, iyo, ba꞉be tete ba꞉ ebete a ba꞉moe hopoeno hiliyonomo temeteme komone duluhukua꞉temene ba꞉be kalakala tetela. Ba꞉ hibila, ba꞉ba tetelo ale ebeno hido ododi komoma꞉ ebe konomamo komilimihoma꞉nema꞉!   
\s1 Polote Epesese Sose Tawakalubino Komoma꞉ Godotamo Da꞉toetoenakui  
\p
\v 15 Ba꞉moe ba꞉be mabuma꞉ la꞉le Kodawa Ya꞉suku hibima꞉ da꞉midinama ba꞉gala la꞉le Godokono komo tawakalubi hiliyonomo malemalelo demalagidolenama, na Polote ba꞉bi netewa komo dulihuimo,  
\v 16 ba꞉ba tetene tupuimiti ba꞉ma teta꞉mo puluhuku nale la꞉eno komoma꞉ kalakala tabo Godotamo ba꞉bema꞉ adipatenakomo, iyo, ba꞉be komote nagodolo kekelanaha꞉. Ba꞉bene naeno toetoe tabo olamagi ipuwalo nale la꞉ ba emalagidolena  
\v 17 Godoko ba꞉ma ka꞉na kiyamenakomo, ebeno hibi komo da꞉hawakalimina ba꞉gala mulu ukui tawakaluba꞉tamo dikalamena ebete ba꞉be Gobogobo la꞉tamo kikalamema꞉, mabu hibila, ba꞉be Gobogobote la꞉ ipuwalo ba emedena, ebete la꞉ komodobuilamema꞉na꞉ta la꞉eno tepo ipuwalo Godokono hibi komo kiya꞉tawahama꞉. Numa꞉la꞉, ba꞉be Godo ba꞉ aeno Kodawa Ya꞉su Kelisote ebeno Godoma꞉ da꞉ka꞉mina ba꞉be Helodawala, iyo, ebe ba꞉ alo konomo ipuwalo demedena ba꞉be Nabiwila.   
\p
\v 18 Ba꞉bene nale ebe eta komoma꞉ gala ba꞉ma ka꞉na katoemehonakomo, ebete la꞉eno tepo ipuwoeno gigiho na꞉hilama꞉mene la꞉le ebeno taboeno hibi komokomo kiya꞉tawahama꞉. Ba꞉ ba꞉ba ka꞉na la꞉le ba꞉moe komo kiya꞉tawahama꞉nemata, ebete la꞉ hibilo a꞉ka꞉lamia꞉ta la꞉le Kelisokono pe komoma꞉ uliholo hidonomamo kemedenama꞉. Ba꞉gala la꞉le eta komo ba꞉ma ka꞉na kakiya꞉tawahama꞉nemata, ebete la꞉ ebeno tawakaluba꞉tamo kebe tepo ipuwoeno dogodogo komo ikalamema꞉ hibinomolo da꞉goiya꞉, ba꞉bi komoeno hido komo bada konomola꞉ka꞉!  
\v 19-20 Iyo, ba꞉ba tetelo la꞉ ba꞉moe eta komo ba꞉ atumu kakiya꞉tawahama꞉nemata, a hibima꞉ midipi ipuwalo oko dowatina ebeno helote konomoma꞉ eda꞉na, eta dawoeno helote ba꞉be helo a꞉kagogolonamene.  
\p Ba꞉ hibila, Godote ba꞉be atu konomo heloamo Kelisoko hoe ipuwane dadipatiya꞉, ebe ebeno Hunu Habamo magatate ebeno tu hapu Ko Gawadubu luta baha꞉mo ba꞉ dito nadipiya꞉.  
\v 21 Ba꞉be mabuma꞉ Kelisote ba꞉bolo Ko Gawadubuma꞉ ba neda꞉na, ebeno helote hiliyonomo hiya꞉hiya꞉ nopopino helo na꞉gogolena, iyo, ibi ipuwalo puya꞉te helohelonomoma꞉ deda꞉hana ba꞉gala puya꞉te helohelodopoma꞉ deda꞉hana, puya꞉te Hunu Habalo oko dowatihona ba꞉gala puya꞉te hopo habalo oko dowatihona, ibi hiliyonomate ebeno ubi komamo na꞉papamila꞉halena. Ba꞉gala kalakala konomola, iba꞉te ba꞉ma tetelo keba ka꞉na kewagelena, iba꞉te ba꞉ ba꞉ba ka꞉na emedena emedena tetelo ebe kapiyatamo hibinomolo ba꞉papamila꞉hanamena꞉!  
\v 22 Iyo, hibila, Godote ebeno helo konomo Kelisotamo ba꞉ ba꞉ba ka꞉na ikamiya꞉, ba꞉bema꞉ Kelisote hiliyonomo komokomoeno Kodawanomoma꞉ ba eda꞉na, Godote ebetamo helo atumu a꞉kikamiya꞉ sose tawakalubino Watodawama꞉ keda꞉nama꞉.  
\v 23 Ba꞉bema꞉ sose tawakalubi ba꞉ Kelisokono apela, mabu ebete ya꞉lo tetenomolo Hunu Habalo ba꞉gala hopo haba konomolo kebe hidohido oko ka꞉tupuilamiya꞉, ba꞉bi hiya꞉hiya꞉ oko ba hawaminale ebete a sose tawakalubi ipuwado ebeno hidonomo kuititi oko bowatina.   
\c 2  
\s1 Godote Hibima꞉ Midipi Hoe Ipuwane Uluhukulatelete Ibi Da꞉ka꞉kilamiya꞉  
\p
\v 1 Ba꞉bema꞉ numa꞉la꞉, la꞉ dopamo Godokono ubi komamo papamila꞉haheno kuba ododili ipuwalo ba emedena, la꞉le ha꞉lahapima꞉ eda꞉hanamimata.  
\v 2 Ba꞉ba tetelo la꞉le ba꞉moe hopo haboeno kuba ododili gabodo ba tolamena, kebe Kubadawate Godotamo papamila꞉haha꞉ tawakalubi ipuwalo oko dowatina, la꞉le ba꞉be dawoeno gobogobo beta꞉matanamimata. Iyo, alomo hunulu demedehona ba꞉bi kuba gobogobate potamo da꞉papamila꞉hana, la꞉le dopamo ba꞉be atu Kubadawa la꞉eno Ko Gawadubuma꞉ midinamimata.  
\v 3 Ba꞉ hibila, dopamo a hiliyonomate komo kuba ododilipa꞉go kapiyuimiti ba꞉ ba꞉ba ka꞉na emedenamima꞉, iyo, ale aeno kateneno kuba ubi komo konomamo ba emalagidolena aeno apeno hiya꞉hiya꞉ kuba ukui komamo ba꞉ dito papamila꞉halenakuima꞉. Ba꞉moe ba꞉be mabuma꞉ ale komo hopo habanapima꞉ ba eda꞉hana, Godote a hiliyonomoeno tepo ipuwoeno kuba komoma꞉ konomamo maubate aeno kuba ododili komoeno huiya ikaa꞉mema꞉ ba꞉bo goiya꞉.   
\p
\v 4 Huiyatiya kalakala konomola, Godote a malemalelo ba emalagidoloena ebeno malemale atamo konomamo hawakalimina,  
\v 5 ba꞉bema꞉ keba tetelo ale aeno kuba ododili ipuwalo ha꞉lahapima꞉ deda꞉hanamima꞉, ba꞉ba tetelo ebete Kelisokono ododi komodo a uwatete ba꞉ dito ka꞉kia꞉miya꞉. Iyo, ebete ebeno malemale komamo la꞉eno ka꞉ka꞉ ba꞉ba ka꞉na mula꞉lelamiya꞉ta,  
\v 6 ba꞉bema꞉ hibila, Godote Kelisoko hoe ipuwane keba ka꞉na kadipatiya꞉, a hibima꞉ midipa꞉te eba꞉go kapiyama꞉ deda꞉huya꞉ma꞉, ba꞉ba tetelo Godote a ba꞉ atumu ka꞉ka꞉mo ba kawadiya꞉paa꞉te ebete ubi ba꞉bo ihatiya꞉, ale ebeno Hunu Habalo Kelisokono Ko Gawadubu helo ipuwalo eba꞉go kapimilo kopola꞉nama꞉.  
\v 7 Numa꞉la꞉, Godote ebeno malemale Ya꞉su Kelisokono ododi komodo atamo da꞉hawakalimiya꞉, ba꞉be malemale komote konomoma꞉ deda꞉na, ebete ba꞉be komo emedena emedena tetelo kohawakaliminama꞉ aeno ka꞉ka꞉ ba꞉bema꞉ mula꞉lea꞉miya꞉.   
\p
\v 8 Ba꞉bema꞉ hibila, la꞉ Godoko hibima꞉ da꞉midima, ba꞉be komodo ebete ebeno malemale komamo la꞉eno ka꞉ka꞉ a꞉mula꞉lelamia꞉ta. Iyo, la꞉ ha꞉kiya la꞉eno eta hido ododi komamo la꞉eno ka꞉ka꞉ mula꞉ komo kalaweha꞉, huiyatiya ba꞉moe komo ba꞉ Godokono dito ikame komola,  
\v 9 ba꞉bema꞉ lumagiti ebeno ka꞉ka꞉ mula꞉ komoma꞉ awagahalo ebe ha꞉kiya ebe adipate modoboha꞉.  
\v 10 Ba꞉bema꞉ numa꞉la꞉, a hibima꞉ midipi ba꞉ Godokono oko owati komokomola, iyo, ebete Ya꞉su Kelisokono ododi komodo a uliuli tawakalubima꞉ a꞉midiya꞉, ale ebeno oko ba owatina hidohido komokomo kododilinakoma꞉. Ba꞉ hibila, a hawakalahaleha꞉ tetelo ebete ebeno ubi komo ya꞉lo ihatiya꞉, ale galane tetelo ba꞉moi komokomo hidamo kododilinakoma꞉.   
\s1 Yunapi Ba꞉gala Yuha꞉pi Iba꞉te Kelisoko Ipuwalo Kapiya Tawakalubima꞉ Deda꞉hana  
\p
\v 11 Ba꞉gala eta komo. Yunapi dubate ibi ha꞉kiya Godokono tama itamida kukala lawepima꞉ ba ka꞉lamina, la꞉ puya꞉te Yuha꞉pi ipuwalo da꞉hawakalahaliya꞉ma, iba꞉te la꞉ Godokono kukala laweha꞉pima꞉ ka꞉laminakata. Iyo, iba꞉te la꞉ Godokono tawakalubiha꞉ma꞉ ga꞉lana, mabu iba꞉te ibino apelo kebe tama itamida komo hopo habanapino ukuia꞉mo da꞉lawiya꞉, ba꞉be komo Godokono ubi komoma꞉ ga꞉lalo konomamo emalagidolona. Huiyatiya numa꞉la꞉, la꞉ Yuha꞉pi puya꞉te hibima꞉ da꞉midinama la꞉ ba꞉ atumu Godokono tawakalubilata, ba꞉bema꞉ la꞉ dopamo la꞉eno hibima꞉ midiha꞉ tetelo keba ka꞉na kemedeonamima, wadiyala la꞉ ba꞉be kuba pakala emede komo hidamo nemalagidolala꞉.  
\v 12 Ba꞉ba tetelo la꞉ Kelisokoba꞉ kapiyama꞉ keda꞉hanamiha꞉, ba꞉gala la꞉ kapelapima꞉ ba eda꞉hana Godokono hibi Isalaela tawakaluba꞉go atumu kakapiyanamiha꞉. Ba꞉be mabuma꞉ Godote ibi kowalubilinama꞉ ibino iniwala꞉tamo kebe hiya꞉hiya꞉ nopo da꞉tamoteholiya꞉ ba꞉gala kebe hido tabo komokomo dolamagiya꞉, la꞉ ba꞉bi komo iya꞉tawahaheno la꞉ Godogodone eta hido komo lawema꞉ uliholo kemedenamiha꞉, iyo, ba꞉be tete ga꞉ga꞉nomolo la꞉le ebeno komo hibilo kiya꞉tawahanamiha꞉.  
\v 13 Huiyatiya kalakala konomola, la꞉ puya꞉te dopamo muhululu demedenamima, Ya꞉su Kelisokono hawiti la꞉eno kuba egebolelamema꞉ da꞉ka꞉ka꞉liya꞉, ba꞉be hawi komodo Godote la꞉ ba꞉ma tetelo tatalia꞉mo a꞉magaheliya꞉ta, iyo, ebete Kelisoko ipuwado ba꞉be hido komo hibinomolo ododiya꞉.   
\p
\v 14 Ba꞉bema꞉ numa꞉la꞉, Kelisote keha pihigalo Yunapi ba꞉gala Yuha꞉pi kapiya tawakalubima꞉ da꞉midiliya꞉, ba꞉ ba꞉ba ka꞉na ebe ha꞉kiya ebe ibino milo komoeno nopoma꞉ midiya꞉ ibi ipuwalo etapa꞉te etapa꞉go gala alaholohokapoma꞉. Iyo, ba꞉bi netewa kapiyuimipa꞉te alaholo ipuwalo hiya꞉hiya꞉ kopola꞉nama꞉ ibi tetenomolo dopamo ditanami, ebete ba꞉be kala imi ebeno hoe komodo dito anabulimiya꞉.  
\v 15-16 Ba꞉ hibila, Godote dopamo Moseseko ipuwado Yunapa꞉tamo dikalamiya꞉, Kelisote ba꞉bi hiya꞉hiya꞉ Tutumu Tabo ba꞉gala kukala komokomo tama꞉mo a꞉miya꞉tiya꞉, mabu ebe ubila Yunapi ba꞉gala Yuha꞉pi ebete ibi hiliyonomo uwatete kapiya uli tawakalubima꞉ ba midili, iba꞉te gala alaholohoheno ebe ipuwalo kapimilo kemedehonama꞉. Iyo, ebete keha pihigalo da꞉hoiya꞉ ba꞉be komodo Yunapi ba꞉gala Yuha꞉pi ibino alaholoho komo hibinomolo anakapumiya꞉, ba꞉gala ba꞉be atu tetelo ebete ibi hiliyonomo uwatete Godokono mabulubima꞉ keda꞉hanama꞉ ibi ebetamo gala a꞉kamagaheliya꞉.  
\v 17 Ba꞉moe ba꞉be mabuma꞉ Kelisote ba꞉moe hopamo pete ebeno Hido Tabo ba꞉ma ka꞉na polamagiya꞉, la꞉ Yuha꞉pi puya꞉te Godogodone muhululu dopamo demedehonamima ba꞉gala a Yunapi puya꞉te ebe tamedopolo demedehonamima꞉, a hiliyonomate alaholohoheno kapimilo kemedehonama꞉.  
\v 18 Iyo, a Yunapi ba꞉gala la꞉ Yuha꞉pi a hiliyonomatamo modobo gabote bitana, ale Kelisokono ododi komodo aeno Nabiwi Godokono holoholo hapuamo kopelamema꞉, ba꞉be gabo ba꞉ ebeno kapiya Gobogobote da꞉hiduimiya꞉ ba꞉be gabola.   
\p
\v 19 Ba꞉bema꞉ kalakala konomola, la꞉ Yuha꞉pa꞉te ba꞉ma tetelo Godokono holoholo hapulu kapelapimo kemedehonaha꞉, iyo, la꞉ dopamo kapelapima꞉ deda꞉hanamima ba꞉be komote ya꞉lo a꞉wibuya꞉, ba꞉bema꞉ ba꞉ma tetelo la꞉ Godokono badininipalama꞉ ba eda꞉hana ebeno komo guguda꞉go kapiya tawakalubima꞉ eda꞉hanamata.  
\v 20-21 Ba꞉bema꞉ hibila, la꞉ Yuha꞉pi ba꞉gala Yunapi hibima꞉ midipi, la꞉ ba꞉ Kodawa Godoko adikumino hiya꞉ genamalata, iyo, Ya꞉su Kelisote detena la꞉ hiliyonomo ba꞉ ba꞉be genamama꞉ eda꞉hanamata. Ebe ha꞉kiya ba꞉be talona genamoeno nakola huiya hototoma꞉ eda꞉na, ba꞉bene ebete ebeno sose tupuimima꞉ hiya꞉hiya꞉ doelamiya꞉ ba꞉bi okopi ba꞉gala puya꞉te Godokono ukui hawakalimipima꞉ deda꞉hana ibi atumu, ibi hiliyonomo ba꞉ ba꞉be genamoeno komo kodakoda aboma꞉ eda꞉hana. Ba꞉bema꞉ ba꞉ma tetelo ebete ebeno heloamo ba꞉be genamoeno hiya꞉hiya꞉ keha modobuilamete ba moga꞉lamehole hunamo ba꞉bo adipatena,  
\v 22 ba꞉ma ka꞉na la꞉ Yuha꞉pa꞉te Kelisoko ipuwalo ba emedehona, ebete la꞉ ba꞉gala Yunapi hibima꞉ midipi, la꞉ hiliyonomo kapimilo uwatete ebeno genama eteno ilinama꞉ midiliti la꞉ ba꞉bo moga꞉lameholenata, ba꞉be genama ba꞉ Godokono Gobogobote kebolo kemedena ba꞉be talona genamala.   
\c 3  
\s1 Godote Yuha꞉pa꞉tamo Hido Tabo Olamagi Oko Polotamo Dikamiya꞉  
\p
\v 1 Ba꞉bema꞉ na Polote Ya꞉su Kelisoko mabuma꞉ du genamalo ba emedena la꞉ Yuha꞉pi Godotamo a꞉wadiya꞉paa꞉latelenakomata, iyo, nale ebeno tabo la꞉tamo dolamaginakomo ba꞉be mabuma꞉ gabomana꞉te na ba꞉moe du genamamo ihateniya꞉.   
\p
\v 2 La꞉ dopamo hibilo ulihuimata Godote ba꞉moe oko natamo ikanamiya꞉, ebeno malemale komote la꞉ Yuha꞉pa꞉tamo ditana nale ba꞉be komo la꞉tamo kohawakalimima꞉,  
\v 3 iyo, ebete dopamo kebe komo dugumuiya꞉, ba꞉ma tetelo ebete ba꞉be diya nopoeno ipuwa na iya꞉tunamiya꞉, nale ba꞉be komo ba꞉bema꞉ hawakaliminakomo. Numa꞉la꞉, ba꞉moe leta ipuwalo na ba꞉be komo a꞉hawakalima꞉tepamo,  
\v 4 ba꞉bema꞉ la꞉ naeno tabo komokomo ka꞉lamihole ipuwalo wadiyala la꞉ Kelisokono diya nopoeno ipuwa hidonomamo na꞉lawiya꞉la꞉, ba꞉be komo ba꞉ nale ebegodone dopamo diya꞉tawuya꞉mo ba꞉be komola.  
\v 5 Ba꞉ hibila, hopo habalo dopamo demedehonama꞉ ba꞉bi hiya꞉hiya꞉ tawakalubi tetelo Godote ba꞉moe diya nopoeno ipuwa iba꞉tamo kahawakaliminakuiha꞉, huiyatiya kalakala konomola, a tetelo ebeno Gobogobote ebeno hido-talona okopa꞉tamo a꞉hawakalimiya꞉, ibi ba꞉ ebete ebeno sose tupuimima꞉ hiya꞉hiya꞉ doelamiya꞉ ba꞉gala puya꞉te ebeno ukui hawakalimipima꞉ deda꞉huya꞉ ba꞉bi okopila.  
\v 6 Ba꞉bema꞉ numa꞉la꞉, ba꞉moe diya nopoeno ipuwa ba꞉ ba꞉ma ka꞉nala. Ba꞉ma tetelo Yuha꞉pi ba꞉gala Yunapi ibi hiliyonomate Hido Tabo hibima꞉ midi komodo Godokono hidohido owalubi komo hiliyonomo kapimilo kuwatema꞉na꞉, ba꞉gala iba꞉te ebeno kapiya tawakalubima꞉ ba eda꞉hana, Godote Ya꞉su Kelisoko ipuwado ibi kowalubilima꞉ kebe tabo dopamo hibilo dolamagiya꞉, ba꞉be taboeno komote ibi hiliyonomatamo kapimilo kuluhukuma꞉ne.   
\p
\v 7 Ba꞉ hibila, ebeno oko na ipuwado owatima꞉ Godote ebeno hiya꞉nomo helo ebeno malemalelo natamo ikanamiya꞉, iyo, ba꞉be ikame komodo ebete na ebeno okodawama꞉ a꞉midiniya꞉ nale Ya꞉sukunu Hido Tabo tawakaluba꞉tamo kolamaginakoma꞉.  
\v 8 Ba꞉bema꞉ numa꞉la꞉, Godokono tawakalubi hiliyonomo ipuwalo puya꞉te hegehegenomoma꞉ deda꞉hana ibi ipuwalo na deha꞉potonomoma꞉ ba eda꞉na, huiyatiya Godote na lawenete hidonomo oko natamo dito ikanamiya꞉. Hibila, naeno oko ba꞉ ebeno tabo Yuha꞉pa꞉tamo olamagi okola, iyo, Kelisogodolo kebe dogodogonomo komate da꞉pola꞉na, ebete ba꞉bi hidohido komamo tawakalubino tepo ipuwa dowalubilinako, na ba꞉be komoma꞉ iba꞉tamo ba꞉bema꞉ olamaginakomo.  
\v 9 Ba꞉gala Godote komo gogo hiliyonomolo dugumuinami, ebete ba꞉ma tetelo ba꞉be diya nopoeno komodo oko keba ka꞉na kowatina, nale ba꞉be komo tawakaluba꞉tamo atumu a꞉kahawakaliminakomo. Ba꞉ hibila, ba꞉moe hopolo ba꞉gala alomo hunulu da꞉pola꞉na, Godoko ba꞉bi hiliyonomo ilina ododilidawama꞉ eda꞉na, ba꞉bene ebete ebeno diya nopoeno ugumui komo ipuwalo ubi ba꞉ma ka꞉na ihatiya꞉,  
\v 10 ebete ba꞉ma tetelo ebeno sose tawakaluba꞉godolo ebeno mulu komoeno hiya꞉hiya꞉ hidohido komokomo kohawakalilamema꞉. Iyo, ebe ubila ba꞉be komodo Hunu Habalo demedehona ba꞉bi nopopi ipuwalo puya꞉te helohelonomoma꞉ deda꞉hana ba꞉gala puya꞉te helohelodopoma꞉ deda꞉hana, ibi hiliyonomate ebeno mulu komo hidonomamo kumima꞉.   
\p
\v 11 Ba꞉bema꞉ hibila, Godote ya꞉lo tetenomolo kebe komote uluhukuma꞉ ubi dihatiya꞉, komo gogo hiliyonomate ba petolame ukui hiya꞉ma꞉ midihino ebete ba꞉ma tetelo aeno Kodawa Ya꞉su Kelisokono oko ipuwado ba꞉be komo hibinomolo ododiya꞉.  
\v 12 Ba꞉bema꞉ kalakala konomola, ale ebe ipuwalo ba emedena ebe hibima꞉ midi komodo ale Godokono holoholo hapuamo pelamema꞉ toleha꞉ma꞉ eda꞉hanama꞉, iyo, gigihote atamo a꞉hiya꞉midalo itana.  
\v 13 Ba꞉be mabuma꞉ na Polote la꞉ bikiyalamemata, la꞉le naeno temeteme komoma꞉ la꞉eno hibima꞉ midi ipuwalo heloha꞉ma꞉ akeda꞉hala꞉, mabu naeno temeteme komate la꞉ hibilo owalubilinakata la꞉le Kelisoko mabuma꞉ kawagahanama꞉.   
\s1 Hibima꞉ Midipa꞉te Kelisokono Konomo Malemale Komo Kiya꞉tawahama꞉ Polote Tabo Dolamagiya꞉  
\p
\v 14 Ba꞉moe ba꞉be mabuma꞉ komo hiliyonomo tetelo nale Nabiwi Godokono holoholo hapuamo pupamo pemedete la꞉ mabuma꞉ ebe na꞉petoemehonakomo,  
\v 15 mabu hibila, puya꞉te Hunu Habalo demedehona ba꞉gala puya꞉te hopo habalo demedehona, Godoko ba꞉ ibi hiliyonomoeno Nabiwila, iyo, ibi hiliyonomoeno ka꞉ka꞉te ba꞉ ebe kapiyagodone puluhukuna.   
\p
\v 16 Ba꞉bene nale Godoko na꞉toemehonakomo, ebete ebeno Gobogoboeno helo ikame komodo la꞉eno tepo ipuwoeno ukui kokodakoduilamema꞉. Iyo, ebe modobola la꞉ kowalubilima꞉, mabu kebe dogodogo komate ebeno hido A꞉la꞉minanomo Habalo da꞉pola꞉na, ebete ba꞉bi hidohido komamo tawakalubino tepo ipuwa owalubilinako.  
\v 17 Ba꞉gala nale ebe gala na꞉katoemehonakomo, la꞉le Kelisoko hibima꞉ ba midina ebete ba꞉be komodo la꞉eno tepo ipuwalo kemedenama꞉. Numa꞉la꞉, malemale emalagidolo komo ba꞉ hido pali haka huiyala, ba꞉bema꞉ nale eta komoma꞉ Godoko ba꞉ma ka꞉na katoemehonakomo, ebete la꞉ ba owalubilina la꞉eno tepo ipuwoeno hahate ebeno malemale haka ipuwamo na꞉tohamena꞉, iyo, wadiyala malemale emalagidolo komo kapiyate la꞉eno hiliyonomo ododili komoeno mabuma꞉ neda꞉namene.  
\v 18 Ba꞉ ba꞉ba ka꞉na la꞉le Godokono komo tawakalubi hiliyonomago ukui hidamo kolawema꞉nemata, Kelisokono malemale emalagidolo komote konomoma꞉ deda꞉na ba꞉be komo la꞉le kapimilo kiya꞉tawahama꞉. O ebeno malemale bada konomola꞉ka꞉, iyo, ba꞉be malemale komo eta lumagiti modobotema꞉ hiya꞉hiya꞉ modobolatele gabo nipo oholena!  
\v 19 Ba꞉bema꞉ numa꞉la꞉, komo hopo habanapa꞉te Kelisokono malemale komoeno ipuwa hibinomolo a꞉kiya꞉tawahanakamena꞉, huiyatiya nale Godoko betoemehonakomo, ebete la꞉ ba owalubilina la꞉le ba꞉be malemale komo hidonomamo kiya꞉tawahama꞉. Hibila, ba꞉moe ba꞉be gabodo ebete ebeno hido emede komamo la꞉eno tepo ipuwa konomamo da꞉tabuilamelelamemena꞉, ba꞉ba tetelo la꞉eno ododili ipuwalo la꞉ ebe huiyama꞉ hibinomolo keda꞉hama꞉nemata.   
\p
\v 20 Ba꞉bema꞉ kalakala konomola, aeno tepo ipuwoeno modoboha꞉ komo komodobuilamema꞉ ale aeno ubi miya꞉te ipuwalo kebe hidohido komo uwatema꞉ Godoko da꞉kiyamenakoma꞉, ebe modobola ba꞉bi komo hiliyonomo atamo ikaa꞉me, iyo, ebete atamo modobonomolo ikaa꞉mete gala eta tetelo dito kakikaa꞉mema꞉ne, mabu ebeno helo komote aeno tepo ipuwalo oko bowatina.  
\v 21 Ba꞉bema꞉ ba꞉moe hopo haboeno kuititi tete peheno, wadiyala Kelisokono sose tawakaluba꞉te ebe ipuwalo ba emedena ibino oko owatiho komo ipuwado Godoko nawagaminanakamena꞉, iyo, emedena emedena tetelo awagaha komote ebegodolo nitanamene! Ba꞉moe tabo ba꞉ hibinomola, ba꞉ba꞉la!   
\c 4  
\s1 Hibima꞉ Midipi Hiliyonomate Kelisokono Kapiya Apema꞉ Deda꞉hana  
\p
\v 1 Ba꞉bema꞉ nale aeno Kodawoeno oko mabuma꞉ gabomanino du genamalo ba emedena la꞉ ba꞉ma ka꞉na toelameholemata, Godote la꞉ ebeno ubilo kowapata꞉lamenama꞉ da꞉ka꞉lamiya꞉la, wadiyala la꞉ ba꞉ ba꞉ba ka꞉na ebeno hidohido ga꞉limapi gugudima꞉ neda꞉haniya꞉la꞉.  
\v 2 Ba꞉bene la꞉eno kapiyuimi ipuwalo etate eta malemalelo demalagidolona, ba꞉be komo kohawakalimima꞉ wadiyala etate etatamo tiyolo akamaubanakala꞉, iyo, wadiyala la꞉ ha꞉kiya la꞉ hopamo miya꞉tete komopa꞉tamo temeteme ikalameha꞉ma꞉ ba eda꞉hana komopino komoma꞉ ubiha꞉ tabo tiyolo akaga꞉lanakala꞉.  
\v 3 Numa꞉la꞉, Godokono Gobogobote la꞉eno tepo ipuwamo dihatelamena ba꞉be hetete la꞉ kapiya tawakalubima꞉ midilinata, ba꞉bema꞉ la꞉eno ukuilo la꞉le kapiyama꞉ eda꞉ komo hidonomo komoma꞉ ba ga꞉lana, la꞉eno ododili komo hiliyonomo ipuwalo gabo hidonomamo numinakuya꞉la꞉ ba꞉be komote la꞉godolo hibilo kitanama꞉.   
\p
\v 4 Ba꞉ hibila, ale kebe hido komo kumima꞉ uliholo demedenama꞉ ba꞉be komo ba꞉ kapiyala, iyo, Godote a a꞉ka꞉miya꞉ ale aeno emede ipuwalo ba꞉be komo kapimilo kolatiminama꞉. Ba꞉ ba꞉ma ka꞉na a ebeno tawakalubi ba꞉ kapiya ape huiyala, ba꞉gala a ipuwalo oko dowatina ba꞉be Gobogobo atumu ba꞉ kapiyanomola.  
\v 5 Iyo, aeno Kodawa ba꞉ atumu kapiyala, aeno hibima꞉ midi komo ba꞉ kapiyala, ba꞉gala aeno watowatopa꞉te a kebe beyamo da꞉wadua꞉tiya꞉ ba꞉be beya atumu ba꞉ kapiyala.  
\v 6 Ba꞉gala aeno Nabiwi Godoko ba꞉ kapiyala, iyo, hopo habanapi hiliyonomate ebegodone ikulihuya꞉, ba꞉bema꞉ ebe kapiyate ibi hiliyonomoeno Namutudawama꞉ ba eda꞉na, ibi hiliyonomagodolo ebeno oko bowatina, iyo, ebete ibi hiliyonomo ipuwalo bemedena.   
\p
\v 7 Ba꞉gala eta komo. Kelisote Godokono hiya꞉hiya꞉ oko a ipuwado kowatihonama꞉ ebete eta kapiyatamo eta hiya꞉nomo helo komo ikamete, eta kapiyatamo eta hiya꞉nomo helo komo akikamiya꞉, a hiliyonomatamo malemalelo ba꞉ ba꞉ba ka꞉na ikaa꞉mehoiya꞉, iyo, ebete ebeno ubi komo atamo keba ka꞉na kihatiya꞉, ebete oko owati komoeno helo atamo hiya꞉hiya꞉ ba꞉ba ka꞉na ikaa꞉mehoiya꞉.  
\v 8 Ba꞉ hibila, Godokono Bukalo eta tabote ba꞉be komo ba꞉ma ka꞉na hawakalimina,  
\b  
\q1 “Godokono Oemedawa Kelisote  
\q2 hopo habanapi kowalubilima꞉  
\q1 ebeno hiya꞉hiya꞉ komo  
\q2 iba꞉tamo malemalelo dito ikalameholiya꞉.  
\q1 Iyo, puya꞉te eba꞉go dalaholohonama꞉,  
\q2 ebete ibino wato kikipo lawete,  
\q1 ba꞉bene ebeno awagaha habamo da꞉nodoluya꞉,  
\q2 ebete ebeno tawakaluba꞉tamo  
\q2 malemale komokomo ba꞉bo ikalameholiya꞉.”   
\b  
\m
\v 9 Ba꞉bema꞉ wadiyala la꞉ ba꞉moe taboeno ipuwa hidamo ba꞉ma ka꞉na nemalagidolala꞉. Kelisote ebeno awagaha habamo hibinomolo odoluya꞉, mabu dopamo ebete ebe ha꞉kiya deha꞉potoma꞉ miditi ba꞉moe hopoeno ha꞉laha tawakalubino habamo dito nihitiguya꞉.  
\v 10 Iyo, pote hoe ipuwamo da꞉nihitiguya꞉, ebe ba꞉ galane tetelo alomo hununomamo ebeno awagaha haba lawema꞉ da꞉nodoluya꞉ ba꞉be atu dawala. Ba꞉bema꞉ ebete Ko Gawadubu haba ba꞉ba ka꞉na da꞉nelawiya꞉, ba꞉ba tetelo ebete Hunu Habalo ba꞉gala hopo haba konomolo kebe hidohido oko ya꞉lo tetenomolo da꞉tupuilamiya꞉, ba꞉bi hiya꞉hiya꞉ oko hiliyonomo hawaminalema꞉ tabo ba꞉bo ihatiya꞉.   
\p
\v 11 Ba꞉bema꞉ ebete ba꞉bi oko kohawaminalema꞉, ebete ebeno hiya꞉hiya꞉ oko owati komoeno helo hopo habanapa꞉tamo malemalelo ikalameholiya꞉. Iyo, ebete komopi ba noelame iba꞉tamo helo ikalamiya꞉ iba꞉te hiya꞉hiya꞉ hopolo ebeno kapiya hibi sose konetupuimima꞉, ba꞉gala ebete Godokono ukui hawakalimipa꞉tamo eta helo atumu a꞉kikalamiya꞉ iba꞉te oko hidamo kowatima꞉, ba꞉gala ebete ebeno Hido Tabo atapa꞉tamo eta helo atumu a꞉kikalamiya꞉ hibima꞉ midiha꞉pa꞉te iba꞉godone hibi komo kulihoma꞉, ba꞉gala ebete hiya꞉hiya꞉ pasta ba꞉gala Godokono Bukoeno hiya꞉hiya꞉ taboeno ipuwa iya꞉tulamepi ibi hiliyonomatamo eta helo atumu a꞉kikalamiya꞉.  
\v 12 Numa꞉la꞉, ebete ebeno hiya꞉hiya꞉ helo Godokono tawakaluba꞉tamo ba꞉ba ka꞉na ikalameholiya꞉, mabu ebete ebeno ubi bihatiya꞉ ibi hiliyonomo ba heluilame iba꞉te ba꞉moe hopolo ebeno hiya꞉hiya꞉ oko kowatihonama꞉, iyo, ba꞉moe ba꞉be gabodo ibi hiliyonomate kapimilo Kelisokono apema꞉ ba eda꞉hana ibino hibima꞉ midi ipuwalo hidonomamo kapepehoma꞉na꞉.  
\v 13 Ba꞉bema꞉ a hiliyonomate ba꞉ba ka꞉na aeno hibima꞉ midi komoeno ododili ipuwalo kapiyanomo tawakalubima꞉ ba eda꞉hana, a kapimilo Godokono Guduino komo hibinomolo ba꞉bo kiya꞉tawahama꞉nema꞉. Ba꞉ hibila, ale aeno ukuilo koko kelatala apepeho tawakalubima꞉ deda꞉hama꞉, Kelisote ebeno tuputupunomo ododili ipuwalo keba ka꞉na kemedena, ale ba꞉ba ka꞉na aeno ododili ipuwalo ebe huiyamo hibinomolo bemedehonama꞉.   
\p
\v 14 Ba꞉bema꞉ numa꞉la꞉, ha꞉da amiho dubate ibino mulu ukui komamo tawakalubi kuba gabamo hiya꞉hiya꞉ magatalema꞉ ba ewagelena, puya꞉te ibino tabamo da꞉papamila꞉hanaka ibi ba꞉ daedae gugudi huiyala. Iyo, huhuti hiya꞉hiya꞉ hapuni a꞉mo tetelo koko gawiyate hiya꞉hiya꞉ keba ka꞉na ka꞉mahila꞉halenaka, ba꞉bi tawakalubi ba꞉ ba꞉ba ka꞉nala mabu iba꞉te ibino ukui ipuwalo gagagagama꞉ eda꞉hana. Huiyatiya ale aeno hibima꞉ midi ipuwalo hegehege gugudima꞉ eda꞉ha komo da꞉miya꞉pama꞉, ba꞉ba tetelo ale ha꞉da amihopino iya꞉tulame komamo gala a꞉kaguda꞉ma꞉,  
\v 15 iyo, ale huiyatiya aeno emede ipuwalo komopi malemalelo ba emalagidolena, etate etatamo Godokono hibi tabo komokomo kapiya ba꞉bo olamagiminakoma꞉. Ba꞉be gabodo ale hidonomamo apepehote aeno ododili hiliyonomo ipuwalo Kelisoko huiyama꞉ keda꞉hama꞉nema꞉, mabu a sose tawakalubi Kelisokono apema꞉ ba eda꞉hana ebe ba꞉ aeno apeno watoma꞉ eda꞉na.  
\v 16 Ba꞉ hibila, wituwitate apeno hiya꞉hiya꞉ komo hidamo moga꞉lameholete, ba꞉bene ba꞉bi komate ibino ape kapiya ipuwalo ba pola꞉na ibino hiya꞉hiya꞉ oko modobolo owatihona. Ba꞉bema꞉ numa꞉la꞉, Kelisokono malemale komo ba꞉ ebeno apeno wituwitu hiliyonomo huiyala, iyo, ba꞉be malemale komote sose ipuwalo ba itana, sosete hibima꞉ midi ipuwalo hidamo apete hiya꞉hiya꞉ oko owatihoma꞉ helonomoma꞉ ba꞉bo keda꞉ma꞉ne.   
\s1 Hibima꞉ Midiha꞉pino Emede Komo Ba꞉gala Hibima꞉ Midipino Uli Ka꞉ka꞉go Emede Komo  
\p
\v 17-18 Ba꞉be mabuma꞉ nale la꞉ Kodawa Kelisokono mahilamo ba kiyalame ba꞉moe eta komo ko komonomoma꞉ goemo, hibima꞉ midiha꞉pa꞉te keba ka꞉na kemedehona, la꞉eno emede ipuwalo ibi huiyama꞉ akeda꞉hala꞉. Numa꞉la꞉, ibino tepo ipuwalo du konomote bitana, ba꞉bema꞉ ibino ukui komate ibi kuba gabamo ba magatale gabo kuititi tetelo eta hido komo a꞉kanuma꞉mena꞉. Iyo, iba꞉te Godokono hibi komo ubiha꞉ma꞉ eda꞉hate, huiyatiya daedae ukui komo uwatete ibino tepo ipuwoeno ukui ba kodakoduilame, ibi ha꞉kiya ibi Godogodone ba꞉bo iya꞉hiliya꞉ ebeno hido ka꞉ka꞉ kolawema꞉.  
\v 19 Ba꞉bema꞉ dopamo iba꞉te kuba ododili ipuwalo kebe hilopo komo diya꞉tawahanakui, ba꞉ma tetelo atu kuba komokomo ba ododili iba꞉te hilopoha꞉ma꞉ eda꞉hana. Ba꞉ ba꞉ba ka꞉na iba꞉te ibino ukuilo konomamo emalagidolena, kateneno ubi komamo papamila꞉halelo ibino apa꞉mo hiya꞉hiya꞉ hilopo komo kododilinama꞉, iyo, iba꞉te ba꞉bako kuba ododilima꞉ ibino iya꞉wa konomote bitana.   
\p
\v 20 A꞉iye, la꞉ Kelisogodone ba꞉bako kuba emede komo kiya꞉tawahaha꞉!  
\v 21 Ba꞉ hibila, la꞉le Ya꞉sukunu komo hidamo ulihuimata, ba꞉bene la꞉ ebe hibima꞉ ba midina, ebegodolo ditana ba꞉be hibi gaboeno komokomo ebeno okopa꞉te la꞉ ba꞉bo iya꞉tulamia꞉ta.  
\v 22 Ba꞉bema꞉ la꞉ dopamo keba ka꞉na kemedeonamima, ba꞉be pakala emede komoeno hiliyonomo kuba ododili komo na꞉wadipipikulama꞉la꞉. Numa꞉la꞉, ba꞉be pakala emede komote la꞉eno ha꞉da amiho ubi komodo hibo gabo la꞉tamo ba ududi la꞉ ba꞉bo kubahilamenama꞉ta,  
\v 23 ba꞉bema꞉ Godote la꞉eno tepo ipuwoeno ukui ulinoma꞉ komidilima꞉, wadiyala la꞉ haba ebetamo nikamiya꞉la꞉.  
\v 24 Iyo, wadiyala la꞉ ebeno uli emede komoeno ododili komo nuwatiya꞉la꞉, lumagiti hidohido kaliko kopupulima꞉ kalakalago duwatenako ba꞉ba ka꞉na. Ba꞉ hibila, Godote ba꞉be uli emede komo a hibima꞉ midipi mabuma꞉ a꞉hiduimia꞉miya꞉ ale ebe huiyama꞉ keda꞉hanama꞉, ba꞉bema꞉ keba tetelo ale ebeno uli emede ipuwalo hibilo demedenama꞉, ba꞉ba tetelo hopo habanapa꞉te ebeno hibi komoeno tuputupu ba꞉gala talona emede komo a ipuwado hidamo kumima꞉na꞉.   
\p
\v 25 Ba꞉bema꞉ hibima꞉ mididawa, ha꞉da amiho tabo gala akolamaga꞉la꞉. Wadiyala ama꞉ huiyatiya ama꞉ tamelo demedena ba꞉be lumagitamo hibi tabo komokomo kapiya nolamaginakuya꞉, mabu a hibima꞉ midipi hiliyonomate Kelisokono apema꞉ kapimilo eda꞉hanama꞉.  
\v 26 Ba꞉bema꞉ ama꞉ eta komoma꞉ da꞉maubamena꞉, hidamo! Mauba komote hibo gabo ududi komodo ama꞉ kubamo magata modoboha꞉, ba꞉bene keba tetelo mauba komote ama꞉godolo duluhukumini, wadiyala tiyolo na꞉wibadigamene. Iyo, kebe hegelalo mauba komote ama꞉tamo da꞉pemene, wadiyala ba꞉be atu hegelate nihitigaheno ama꞉ dopamo amia꞉no mauba komo tama꞉mo nihatiya꞉,  
\v 27 mabu hibila, ama꞉ ba꞉moe ododi komodo Saitanatamo haba a꞉kikama꞉mena꞉ta.   
\p
\v 28 Ba꞉gala eta komo. Kebe lumagiti komopino ilina ba꞉gala mani pilolo dopamo duwatenakui, ebete ba꞉bako kuba ododi komo miya꞉pate ebe ha꞉kiya ebeno kokotamo hibi oko na꞉tupuima꞉mene. Ba꞉ hibila, mani oko owati ipuwalo ebe ha꞉kiya ebeno modoboha꞉ komokomo ba modobuilame, gabote ebegodolo kakitanama꞉ne ebete awaepi atumu kakowalubilima꞉.   
\p
\v 29 Ba꞉gala ama꞉ kuba tabo komokomo akolamaginakala꞉, wadiyala ama꞉ huiyatiya hido owalubi tabo komokomo kapiya nolamaginakuya꞉, iyo, ba꞉bako tabo olamagi komote ama꞉godolo ba itana, ulihopa꞉te ibino modoboha꞉ ukui komoma꞉ hido owalubi buwatenakomena꞉.   
\p
\v 30 Ba꞉bene la꞉eno ododili ipuwalo la꞉ Godokono Gobogobotamo temeteme ikamema꞉ modoboha꞉, mabu Godote ebe la꞉tamo ikalamia꞉ta, ebete la꞉ ipuwalo ba emedena Godokono kukalama꞉ keda꞉nama꞉. Iyo, ba꞉be kukalate la꞉ ba꞉ma ka꞉na iya꞉tulamenata, la꞉ ba꞉ ebeno gugudima꞉ eda꞉hanamata ba꞉bema꞉ ebeno Hido Hegelate la꞉ mabuma꞉ hibinomolo kuluhukuma꞉ne, ba꞉be Hegelalo ebete la꞉ ba꞉moe hopoeno hiliyonomo temeteme komone kuluhukulatelema꞉na꞉ta.  
\v 31 Ba꞉bema꞉ wadiyala la꞉ hiya꞉hiya꞉ mauba komo hiliyonomo na꞉wadipipikulama꞉la꞉, ba꞉ma ka꞉na la꞉le eta lumagino komoma꞉ la꞉eno tepo ipuwate kakama꞉ akeda꞉hanakala꞉, ba꞉gala la꞉eno tepo ipuwalo koe komote akuluhukunakala꞉, iyo, la꞉ eta lumagitamo hilopo ikamema꞉ helo tabo ba꞉gala ebe iduduputimi tabo akaga꞉lanakala꞉, ba꞉gala la꞉eno ubi komo akihatenakala꞉ ebe eta gabodo kubahimima꞉.  
\v 32 Huiyatiya wadiyala la꞉ ipuwalo etate etatamo malemale ba hawakalimi la꞉le komopino temeteme komoma꞉ la꞉eno tepo ipuwa akakodakoduilama꞉la꞉, iyo, keba tetelo eta lumagiti kuba dododimini la꞉ ebeno kuba egebolemete nadodomiya꞉la꞉, Godote la꞉eno kuba Kelisoko ipuwalo egebolelamete keba ka꞉na kadodolelamitiya꞉la ba꞉ba ka꞉na.   
\c 5  
\s1 Alo Ipuwalo Demedehona Ba꞉bi Tawakalubino Komo  
\p
\v 1 Hibila, la꞉ ba꞉ Godote konomamo demalagidolena ba꞉bi gugudilata, ba꞉bema꞉ wadiyala la꞉ la꞉eno emede ipuwalo ebe huiyama꞉ neda꞉hanala꞉.  
\v 2 Numa꞉la꞉, Kelisote hoe ipuwalo ebeno ape hawa꞉goeno ilina huiyama꞉ miditi ebeno ka꞉ka꞉ a mabuma꞉ Godotamo dikamiya꞉, Godote ba꞉be komo hido nibo ilina ikame komoma꞉ goiya꞉. Ba꞉be mabuma꞉ Kelisote atamo ebeno konomo malemale keba ka꞉na ka꞉hawakalimiya꞉, wadiyala la꞉ ba꞉ ba꞉ba ka꞉na atu malemale ipuwalo nemedenala꞉.   
\p
\v 3 Numa꞉la꞉, la꞉ ba꞉ Godokono tuputupu tawakalubilata, ba꞉bema꞉ ba꞉moi kuba komokomo la꞉godolo akapola꞉nala꞉ — kamenakamena ba꞉gala bohelemele pilo komo, apa꞉mo hiya꞉hiya꞉ hilopo ododili komo, ba꞉gala mani konomamo emalagidolo komo. Iyo, ba꞉bakobako kuba ododili ipuwalo eta deha꞉potonomo kubate la꞉godolo aka-itanala꞉, hibima꞉ midiha꞉pa꞉te la꞉eno emede komoma꞉ kuba tabo ga꞉lakapoma꞉.  
\v 4 Ba꞉gala la꞉ hiya꞉hiya꞉ dalowa꞉ ukui hawakalilamema꞉ tabo akolamagiminakala꞉, iyo, komopino hilopo ododili komoma꞉ tabo ga꞉laheno wadiyala la꞉ huiyatiya hiya꞉hiya꞉ tetelo kalakala tabo Godotamo na꞉wadiya꞉paa꞉latelenakuya꞉la꞉.  
\v 5 Ba꞉bema꞉ wadiyala la꞉ ba꞉moe komo hidonomamo nemalagidolala꞉. Puya꞉te kamenakamena ba꞉gala bohelemela꞉tamo pilo komo dododilinaka, ba꞉gala puya꞉te ibino apa꞉mo hiya꞉hiya꞉ hilopo komo dododilinaka, ba꞉gala puya꞉te mani konomamo demalagidolona, ibi hiliyonomo ipuwalo etate Kelisoko ba꞉gala Godoko ibi netewapino Ko Gawadubu komodo eta hido owalubi komo a꞉kuminakamene. Numa꞉la꞉, pote mani konomamo demalagidolona, ebeno komo ba꞉ ida꞉da꞉li adikulamedawoeno komo huiyala.   
\p
\v 6 Ba꞉bema꞉ la꞉ ipuwalo etate mahigate hopo habanapino daedae ukui komamo la꞉ ha꞉da amiholamema꞉ dewagelemene, la꞉ ebeno tabo akulia꞉la꞉. Ba꞉ hibila, nale kebe kuba komokomoma꞉ la꞉ da꞉kiyahalamema, ba꞉bako ododili komoma꞉ Godokono konomo mauba komote kopema꞉ne, iyo, puya꞉te ebetamo papamila꞉ha ubiha꞉ma꞉ deda꞉hana ba꞉ba꞉te kuba huiya kolawema꞉na꞉.  
\v 7 Ba꞉be mabuma꞉ la꞉ ba꞉bako tawakaluba꞉go eta komo ododihino iba꞉go akakapiyala꞉.   
\p
\v 8 Ba꞉ hibila, la꞉ dopamo du ipuwalo emedenamimata, huiyatiya la꞉ du ipuwane ikuliti ba꞉ma tetelo aeno Kodawoeno alo ipuwalo emedenamata, ba꞉bema꞉ la꞉ aloeno gugudima꞉ ba eda꞉hana wadiyala la꞉ alo ipuwalo hidamo na꞉wapata꞉lamenala꞉.  
\v 9-10 Iyo, la꞉ Kodawa Godoko kokalakaluimima꞉ la꞉eno ododili ipuwalo gabo hidamo numinakuya꞉la꞉, mabu numa꞉la꞉, puya꞉te alo ipuwalo hibilo demedehona, iba꞉godone hidohido gao hiliyonomate ikulinaka, ba꞉gala iba꞉te Godokono tuputupu emede komo ba hawakalimina ebeno hibi tabo komokomo ba꞉bo olamagiminaka.  
\v 11 Ba꞉be mabuma꞉ puya꞉te du ipuwalo demedehona, la꞉ ba꞉bi tawakalubino ododili komamo iba꞉go akakapiyala꞉, mabu ibino ododili ipuwane eta hido gaote a꞉kuluhukale. Wadiyala la꞉ huiyatiya Godokono alamo ibino ododili komo na꞉la꞉minaliya꞉la꞉, komo tawakaluba꞉te ba꞉bi kuba komoeno temeteme ipuwa hidamo kumima꞉,  
\v 12 mabu hibila, tuputupu lumagiti tabo goema꞉ kohilopoma꞉ne iba꞉te diya gabodo dododilinaka ba꞉bi komoma꞉!   
\p
\v 13 Ba꞉gala eta komo. Tawakaluba꞉te dugumuilina Godote ba꞉bi hiliyonomo komo awalela ipuwane ebeno alamo kuluhukulatelema꞉ne, iyo, ba꞉bi komoeno hibi ipuwa ba꞉bo kohawakalahalema꞉na꞉,  
\v 14 ba꞉bema꞉ ba꞉moe hopoeno hiliyonomo komo ipuwalo alote kebe komo da꞉la꞉minamene tawakaluba꞉te hidonomamo kumima꞉na꞉, awalela ipuwalo gala a꞉kitanamene. Ba꞉moe ba꞉be mabuma꞉ Godokono tawakaluba꞉te eta mulu tabo ba꞉ma ka꞉na ga꞉lana,  
\b  
\q1 “U da꞉watita, ama꞉ na꞉mahiga!  
\q1 Ama꞉ hoe ipuwane uluhukuti  
\q2 ka꞉ka꞉ gala da꞉kalawemena꞉,  
\q1 Kelisokono alote  
\q2 ama꞉ ba꞉bo ka꞉la꞉minama꞉na꞉ta.”   
\b  
\m
\v 15 Ba꞉bema꞉ wadiyala la꞉ mulu ukui tawakalubima꞉ ba eda꞉hana la꞉eno ododili komokomo hidonomamo nemalagidolenala꞉, iyo, muluha꞉ tawakalubi akibamilatela꞉la꞉.  
\v 16 Numa꞉la꞉, hopo haba konomolo ba꞉ma tete ba꞉ hibima꞉ midiha꞉pino kuba ododili tetema꞉ eda꞉na, ba꞉bema꞉ Godote kebe hidohido tete la꞉tamo dikalamenaka, wadiyala la꞉ ba꞉bi hiya꞉hiya꞉ tetelo hido owalubi komo tawakaluba꞉tamo nododilinakuya꞉la꞉.  
\v 17 Ba꞉bema꞉ la꞉ daedae tawakalubima꞉ eda꞉haheno, huiyatiya Kodawa Godote la꞉le kododilima꞉ ebeno ubi komo keba ka꞉na kihatena, wadiyala la꞉ ba꞉bi komokomo hidamo niya꞉tawahanala꞉.   
\p
\v 18 Ba꞉gala eta komo. La꞉ helo gala꞉ipi gao beya koamo akanihala꞉, mabu la꞉ ba꞉ba ka꞉na dewagelema, la꞉eno niho tetelo daedaema꞉ ba eda꞉ha la꞉ ha꞉kiya la꞉ ba꞉bo kokubahilamema꞉nemata. Wadiyala la꞉ huiyatiya Godokono Gobogoboeno komo koamo na꞉nihonakuya꞉la꞉, ebete la꞉eno tepo ipuwa hidamo kotabuilamema꞉.  
\v 19 Ba꞉bema꞉ la꞉ la꞉eno tepo ipuwalo hiya꞉hiya꞉ ohale alapiho komamo Godoko hidonomamo nadikuminakuya꞉la꞉. Iyo, ba꞉ ba꞉ma ka꞉na Godokono Bukoeno Sam Ohale bukalo da꞉pola꞉na ba꞉bi ohale, ba꞉gala hibima꞉ midipa꞉te Godokono hanohano komo hawakalilamema꞉ dododilinaka ba꞉bi ohale, ba꞉gala ebeno Gobogobote la꞉eno tepo ipuwamo da꞉miya꞉tenako ba꞉bi ohale, la꞉eno hiya꞉hiya꞉ tetelo komopa꞉te komopi ba꞉bi hiya꞉hiya꞉ ohaleno tabamo ba owaluba꞉tihui la꞉eno Kodawatamo balapihonakomata.  
\v 20 Ba꞉bene la꞉le aeno Kodawa Ya꞉su Kelisoko ta꞉mata komo kohawakalimima꞉, wadiyala la꞉eno emede ipuwalo kebe hiya꞉hiya꞉ komate la꞉tamo dikulihona, la꞉ ba꞉bi hiliyonomo komoma꞉ Nabiwi Godotamo kalakala tabo na꞉wadiya꞉paa꞉latelenakuya꞉la꞉.   
\s1 Hibima꞉ Mididawa Dubu Ba꞉gala Ebeno Kamena Iba꞉te Keba Ka꞉na Na꞉kemedenamena꞉  
\p
\v 21 Ba꞉bema꞉ hibima꞉ midipa꞉la꞉, la꞉ Kelisotamo ba papamila꞉ha, ebe hunamo kadipatema꞉ wadiyala la꞉ ipuwalo etate etatamo malemalelo na꞉papamila꞉hanakuya꞉la꞉.   
\p
\v 22 Ba꞉bema꞉ wadiyala la꞉ hibima꞉ midipi kamenakamenate la꞉eno awa꞉tamo na꞉papamila꞉hanakuya꞉la꞉, la꞉le Kelisotamo keba ka꞉na ka꞉papamila꞉honama ba꞉ba ka꞉na.  
\v 23 Numa꞉la꞉, Kelisote sose ipuwalo hibima꞉ midipino watodawama꞉ keba ka꞉na keda꞉na, ba꞉ ba꞉ba ka꞉na dubuti ebeno kamenoeno watodawama꞉ ka-eda꞉na, huiyatiya wadiyala la꞉ dubate ba꞉moe eta komo hidamo nemalagidolala꞉, sose tawakaluba꞉te Kelisokono apema꞉ ba eda꞉hana, ebete ibi mabuma꞉ ebeno malemale konomo hawakalimiti ibino Ka꞉ka꞉ Mula꞉ledawama꞉ ba꞉bo ediya꞉.   
\p
\v 24 Ba꞉bema꞉ sose tawakaluba꞉te Kelisotamo keba ka꞉na ka꞉papamila꞉hana, wadiyala kamenakamenate atumu ibino awa꞉tamo ba꞉ba ka꞉na na꞉kapapamila꞉hanakamena꞉.  
\v 25 Huiyatiya hibima꞉ midipi dubala꞉, la꞉ ba꞉moe eta ko komo akadodala꞉. Kelisote sose tawakalubi malemalelo ba emalagidolena ibi mabuma꞉ ebeno ka꞉ka꞉ gobogobamo keba ka꞉na kihatiya꞉, wadiyala la꞉ ba꞉ ba꞉ba ka꞉na la꞉eno kamenakamena malemalelo nemalagidolenala꞉.   
\p
\v 26 Numa꞉la꞉, Kelisote ebeno ka꞉ka꞉ gobogobamo ihate komodo ebete sose tawakalubi ba꞉ dito uwatiya꞉, iba꞉te Godokono talonapima꞉ ba eda꞉hana ebeno oko kowatinama꞉. Iyo, Kelisote ba꞉bi tawakalubino kuba ododili komo ba꞉gala ibino tepo ipuwoeno dalowa꞉ ukui komo ebeno taboeno komokomamo ukulalenomo dukulaliya꞉, iba꞉te uliuli tawakalubima꞉ ba꞉bo eda꞉huya꞉, tawakaluba꞉te mala꞉ ikila komodo dulinomoma꞉ keba ka꞉na keda꞉hanaka ba꞉ba ka꞉na.  
\v 27 Ba꞉ hibila, Kelisote ebeno ubi komo ba꞉ma ka꞉na ihatiya꞉, ebeno oko owati komodo sosete hagalu bohelema꞉ deda꞉mene, ba꞉bene ebe ha꞉kiya ba꞉be hido a꞉la꞉mina sose ebeno kamenama꞉ kolawema꞉ne. Ba꞉bema꞉ ba꞉be kamenagodolo eta kuba deha꞉potonomote a꞉kitanamene, iyo, ebete eta dubuino komo iya꞉tawaheno tuputupunomolo ba emedena, ebete da꞉pulinako ba꞉be kaliko ba꞉ dalowa꞉ha꞉ hidonomo kalikola, ebeno a꞉la꞉mina bada konomola꞉ka꞉!   
\p
\v 28 Ba꞉bema꞉ wadiyala hibima꞉ midipi ipuwalo eta dubuti ebeno kamena malemalelo nemalagidolonamene, ebe ha꞉kiya ebeno ape keba ka꞉na kemalagidolona ba꞉ba ka꞉na. Numa꞉la꞉, dubuti kamena da꞉lawemene ba꞉ba tetene tupuimiti ibino emede ka꞉ka꞉te kapiyama꞉ keda꞉ma꞉ne, ba꞉bema꞉ keba tetelo ebete ebeno kamena demalagidolona, ba꞉be atu gabodo ebe ha꞉kiya ebe na꞉ka-emalagidolona.  
\v 29 Ba꞉ hibila, ba꞉moe hopolo eta dubuti ba꞉ma ka꞉na kemedenaha꞉, ebete ebeno apeno modoboha꞉ komokomo ulame tetelo ebe ha꞉kiya ebe a꞉kowaluba꞉le. Ao, dubuino ododili komo eba ka꞉naha꞉. Keba tetelo baa꞉ kape komote ibi dulame, ibi ha꞉kiya ibi owalubilima꞉ baa꞉ ohote ba꞉bo nahanaka, ba꞉bema꞉ wadiyala hibima꞉ midipi dubate ibino kamenakamenoeno modoboha꞉ komokomo ipuwalo ibi atumu na꞉kowalubilinakamena꞉. Numa꞉la꞉, Kelisote a sose tawakalubi konomamo ba emalagidoloena ebete a ba꞉ba ka꞉na owalubinako,  
\v 30 mabu a hibima꞉ midipi hiliyonomo ba꞉ ebeno apeno komokomola.   
\p
\v 31 Ba꞉bene Godokono Bukalo eta tabote ba꞉ma ka꞉na itana, “Ba꞉moe ba꞉be mabuma꞉ dubuti ebeno menoko nabiwi miya꞉palete ebeno kamenago kapiyama꞉ keda꞉ma꞉ne.”  
\v 32 Numa꞉la꞉, ba꞉moe taboeno eta ipuwa komote diya ditana, nale ba꞉be komo la꞉tamo ba꞉ma ka꞉na hawakalimimo, sose tawakalubi ba꞉ Kelisokono kamenala, ba꞉bema꞉ hibima꞉ midipi ba꞉gala ebe iba꞉te kapiyama꞉ hibinomolo eda꞉na.  
\v 33 Ba꞉bema꞉ la꞉ ba꞉be naeno dopo iya꞉tulame tabo ba lawe, ba꞉moi netewa koko komo atumu na꞉kemalagidola꞉la꞉. Dubuti ebe ha꞉kiya ebe keba ka꞉na kemalagidolona, wadiyala ebete ebeno kamena ba꞉ba ka꞉na nemalagidolonamene, ba꞉gala kamenate ebeno tepo ipuwoeno ukuilo ebe ha꞉kiya ebe hopamo ba ihate ebeno awi hunamo nadipatenakamene.   
\c 6  
\s1 Hibima꞉ Midipi Gugudi Ba꞉gala Ibino Nabi Menokobi Iba꞉te Keba Ka꞉na Na꞉kemedenamena꞉  
\p
\v 1 Guguda꞉la꞉, wadiyala la꞉ la꞉eno nabi menokobi iba꞉tamo na꞉papamila꞉hanakuya꞉la꞉, mabu Godote ba꞉be komo tuputupu ododi komoma꞉ goena.  
\v 2-3 Iyo, Godote Isalaela tawakaluba꞉tamo eta ko tutumu tabo ba꞉ma ka꞉na ikalamiya꞉, “Amia꞉no nabiwi ba꞉gala menoko ibino komoma꞉ kuba tabo olamagihino iba꞉tamo na꞉papamiwatanakuya꞉.” Ba꞉bene ebete gala na꞉kagoiya꞉, “Ba꞉moe tutumu tabamo papamiwata komodo ama꞉ hido owalubi komo nagodone ba꞉ma ka꞉na kolawema꞉na꞉ta, ama꞉le tete ga꞉ga꞉nomolo hido hopolo ba emedena hiliyonomo komokomo ipuwalo nale ama꞉ hidonomamo bowalubinakomata.” Ba꞉bema꞉ numa꞉la꞉, Godokono Tutumu Tabo hiliyonomo ipuwalo ba꞉moe tutumu ba꞉ dopo tutumuma꞉ ediya꞉, lumagino papamiwata komodo Godote ebetamo hido owalubi komo kihatenakoma꞉ hibilo a꞉goiya꞉.   
\p
\v 4 Ba꞉gala la꞉ puya꞉te nabima꞉ deda꞉hanama, la꞉ la꞉eno gugudino ododili komokomoma꞉ ibi hiliyonomo tetelo koamo akakiyahalamenakala꞉, iba꞉te ibino tepo ipuwalo la꞉tamo maubahakapoma꞉. Wadiyala la꞉ huiyatiya Kodawa Kelisokono iya꞉tulame komamo ibi ba tutumulatelena ibino kuba ododili tetelo iba꞉tamo modobo huiya nikalamenakuya꞉la꞉, iba꞉te hibima꞉ midi ipuwalo hidamo kapepehoma꞉.   
\s1 Hibima꞉ Midi Okopi Ba꞉gala Ibino Oko Namutulubi Ibino Ododili Komo  
\p
\v 5 Ba꞉bene koko okopi dubate la꞉ pui mana꞉mo duwatiya꞉la la꞉le ibino huiyaha꞉ oko kowatihonama꞉, ba꞉bi dubate ba꞉moe hopolo la꞉eno oko namutulubima꞉ ba eda꞉hana, wadiyala la꞉ la꞉eno ukuilo ibi tolelamelo ibi hunamo wadiya꞉paa꞉latelete iba꞉tamo na꞉papamila꞉hanakuya꞉la꞉, la꞉le Kelisotamo keba ka꞉na ka꞉papamila꞉honama ba꞉ba ka꞉na. Iyo, wadiyala la꞉ la꞉eno tepo ipuwalo eta kuba ukui ugumuihino oko hibinomolo nowatinakuya꞉la꞉.  
\v 6 Ba꞉gala oko owati ipuwalo la꞉ ba꞉ma ka꞉na akemalagidolala꞉, oko namutudawate natamo kokalakalama꞉, ebete na dunamita ba꞉be kapiya tetelo nale oko hidamo owatinakomo. Ao, eba ka꞉naha꞉. Namutudawate la꞉ ulame tetelo ba꞉gala ulameha꞉ tetelo, wadiyala la꞉ Godokono ubi komamo papamila꞉halo, la꞉ ha꞉kiya la꞉ Kelisokono okopima꞉ ba ga꞉la la꞉eno tepo ipuwoeno helo konomamo oko ba꞉bo nowatinakuya꞉la꞉.  
\v 7 Iyo, la꞉le la꞉eno oko hibi kalakalago owati modobola, manaha꞉ hopo habanapi kalakaluilamema꞉, la꞉ huiyatiya aeno Kodawa Kelisoko kokalakaluimima꞉ oko hidamo nowatinakuya꞉la꞉.  
\v 8 Ba꞉bema꞉ puya꞉te huiyaha꞉ okopima꞉ deda꞉hana ba꞉gala puya꞉te mani oko dowatihona, wadiyala la꞉ hiliyonomate ba꞉moe ko komo akadodala꞉, aeno Kodawate hiliyonomo tawakalubino ododili komo ba ulamena, ebete hido okodawatamo ebeno hido huiya hibinomolo kikamema꞉ne.   
\p
\v 9 Ba꞉gala la꞉ hibima꞉ midipi oko namutuluba꞉la꞉, puya꞉te la꞉eno oko huiyaheno kowatihonama꞉ mana꞉mo duwatiya꞉ma, la꞉ ba꞉bi okopa꞉tamo atumu hido tepo ipuwoeno malemale na꞉hawakaliminakuya꞉la꞉, iyo, keba tetelo iba꞉te oko modobodopolo owatihino, ba꞉ba tetelo la꞉le ibi temeteme huiya ikalamema꞉ akakiyahalama꞉la꞉. Wadiyala la꞉ ba꞉moe ko komo akadodala꞉, la꞉ ba꞉gala ibi la꞉ hiliyonomo ba꞉ Hunu Habalo demedena ba꞉be Konomo Namutudawoeno huiyaha꞉ okopilata. Ba꞉ hibila, ba꞉be Kodawate kapiya gabonomodo hiliyonomo tawakalubino komo tuputupulu kanagilamelelamema꞉ne ibino modobo huiya iba꞉tamo kikalameholema꞉.   
\s1 Hibima꞉ Midipa꞉te Saitanatamo Alaholohoma꞉ Kebe Ilina Ka꞉pupulinaka  
\p
\v 10 Ba꞉bema꞉ ba꞉moe leta kuititi hapulu nale la꞉ ba꞉ma ka꞉na kiyalamemata, la꞉ aeno Kodawa Kelisoko ipuwalo ba emedena ebeno konomo helo lawete helonomoma꞉ neda꞉huya꞉la꞉.  
\v 11 Ba꞉gala la꞉ hibima꞉ midi komoeno alaholoho ipuwalo wato kikipo kolawema꞉, wadiyala la꞉ Godokono alaholohoeno ilina hiliyonomo na꞉pupulinakuya꞉la꞉, ba꞉bema꞉ Saitanakono ha꞉da amihoho komate la꞉tamo dikulimina꞉, ba꞉ba tetelo la꞉ modoboma꞉ keda꞉hama꞉nemata la꞉le kodakodalo kola꞉mota꞉hanama꞉.  
\v 12 Numa꞉la꞉, aeno alaholoho komote komo hopo habanapa꞉tamo kitanaha꞉, huiyatiya ale hiya꞉hiya꞉ kuba gobogobo kapiyago alaholohonakoma꞉. Iyo, ibi ipuwalo komo ba꞉ helohelodopo gobogobola ba꞉gala komo ba꞉ helohelonomo gobogobola, komo ba꞉ ba꞉moe hopoeno du ipuwalo da꞉wapata꞉lamena ba꞉bi gobogobola ba꞉gala komo ba꞉ alomo hunulu heloamo da꞉wapata꞉lamena ba꞉bila.  
\v 13 Ba꞉bema꞉ la꞉eno alaholo komoma꞉ Godokono modobo ilina hiliyonomo na꞉pupula꞉la꞉, mabu hibila, la꞉ ba꞉bi ilina ba pupuli, kuba tetete la꞉tamo duluhukumini, la꞉ Saitanatamo ba꞉bo kohelohelohoma꞉nemata, iyo, alaholo ipuwalo la꞉le haba ebetamo ikameheno kodakodalo kola꞉mota꞉hanama꞉nemata.   
\p
\v 14 Ba꞉bema꞉ hibima꞉ mididawa, ama꞉ kodakodalo ba la꞉na ba꞉ma ka꞉na na꞉hiduya꞉. Ama꞉le Godokono hibi komo amia꞉no kamakemo puliti na꞉kodakoduimiya꞉, ba꞉gala ebeno tuputupu emede komo amia꞉no nehe ilinamo kapuliti,  
\v 15 ba꞉gala ebeno hete tawakaluba꞉tamo dikalamena ba꞉be Hido Tabo amia꞉no nato ilinamo na꞉pupuliya꞉, alaholoho ipuwalo amia꞉no natote igulugadigakapoma꞉.  
\v 16 Ba꞉bene ama꞉le Godoko hibima꞉ da꞉midina, wadiyala ama꞉ hiliyonomo tetelo ba꞉be komo amia꞉no makeyo ilinamo lawete natanakuya꞉, mabu hibila, ama꞉go dalaholona ba꞉be Kubadawate ebeno koe powagoeno tele ama꞉tamo da꞉pemelemene, ama꞉ modoboma꞉ keda꞉ma꞉na꞉ta ba꞉bi ilina amia꞉no hibima꞉ midi komamo koduhilamema꞉.  
\v 17 Ba꞉bene tawakalubino ka꞉ka꞉ mula꞉ komote Godogodone duluhukuna, wadiyala ama꞉ alaholoho ipuwalo ba꞉be komo amia꞉no dibamo kapuliti, ba꞉gala Godokono Gobogoboeno alaholo gili akona꞉lawiya꞉, ba꞉be gili ba꞉ Godokono Tabola.   
\p
\v 18 Ba꞉bene hiliyonomo hiya꞉hiya꞉ tetelo la꞉le hiya꞉hiya꞉ toetoe tabo ga꞉la komodo Godokono Gobogoboeno heloamo ebetamo nolamagiminakuya꞉la꞉, iyo, wadiyala la꞉ ba꞉be komo ododima꞉ heloha꞉ma꞉ eda꞉haheno ebeno hiya꞉hiya꞉ tawakalubi hiliyonomo ba꞉bo na꞉wadiya꞉paa꞉latelenakuya꞉la꞉.  
\v 19 Ba꞉gala wadiyala la꞉ na mabuma꞉ Godoko atumu ba꞉ma ka꞉na na꞉katoemehonakuya꞉la꞉, keba tetelo nale Hido Tabo kolamagima꞉ hido tete duminakomo, ebete natamo hidohido ukui modobolo nikanamenakamene. Numa꞉la꞉, Godote ba꞉be Taboeno ipuwa tawakaluba꞉tamo dopamo ugumuiya꞉, huiyatiya ba꞉ma tetelo ebe ubi bihatena nale ba꞉be komo hibima꞉ midiha꞉pa꞉tamo toleheno ba hawakalimi iba꞉te hidamo kiya꞉tawahama꞉,  
\v 20 iyo, nale Hido Tabo hiya꞉hiya꞉ tawakaluba꞉tamo atama꞉ ebete na ba꞉bema꞉ ka꞉namiya꞉. Ba꞉ hibila, ba꞉be oko owati mabuma꞉ nale gabomanino du genamalo emedenamo, ba꞉bema꞉ wadiyala la꞉le toetoe tabamo na Godotamo nadipanatenenakuya꞉la꞉, ebete modobo helo natamo ba ikaname ba꞉be Tabo olamagi ipuwalo nale toleha꞉ma꞉ keda꞉nama꞉.   
\s1 Polote Leta Kuititi Hapulu Tabo Komokomo Dolamagiya꞉  
\p
\v 21 La꞉ nonolata, aeno hibima꞉ mididawa ekawi eta Tikikasiti la꞉tamo da꞉puluhukumini, ebete naeno emede komo ba꞉gala ododili komo hiliyonomo la꞉ kopikiyalamema꞉na꞉ta. Ba꞉ hibila, ebete Kodawa Ya꞉sukunu eta hido okodawama꞉ eda꞉na,  
\v 22 ba꞉bema꞉ nale ebe la꞉tamo poememo, la꞉le aeno emede komokomo ebegodolo dulihoma la꞉ kalakala ba꞉bo kolawema꞉nemata.   
\p
\v 23 Ba꞉bema꞉ wadiyala Nabiwi Godoko ba꞉gala Kodawa Ya꞉su Kelisoko iba꞉te hibima꞉ midipi ekaki hiliyonomatamo hete komo ba꞉gala malemale emalagidolo komo ba ikalame ibino hibima꞉ midi komo ba꞉bo na꞉koimilama꞉mena꞉.  
\v 24 Ba꞉gala puya꞉te emedena tetelo aeno Kodawa Ya꞉su Kelisoko konomamo demalagidolonamena꞉, wadiyala Godokono malemale komote ibi hiliyonomagodolo nitanamene. Ba꞉moe ba꞉ naeno tabo kuititila. Ba꞉ba꞉la.