\id 2TH - Tabo (Aramia dialect) NT - Papua New Guinea 2006 (DBL 2014) 
\h 2 Tes 
\toc3 2 Tes 
\toc1 Polote Naba 2 Leta Tesalonaika Sose Tawakaluba꞉tamo Ododiya꞉ 
\toc2 2 Tesalonaika 
\mt2 POLOTE NABA 2 LETA  
\mt1 TESALONAIKA SOSE TAWAKALUBA꞉TAMO  
\mt2 ODODIYA꞉  
\c 1  
\p
\v 1 Na Polote Sailasiko ba꞉gala Timotiko, ale la꞉ Tesalonaika sose tawakaluba꞉tamo ba꞉moe leta bepoemema꞉. Ba꞉ hibila, la꞉ hibima꞉ midipa꞉te aeno Nabiwi Godoko ba꞉gala Kodawa Ya꞉su Kelisoko ipuwalo bemedenamata.  
\v 2 Wadiyala Nabiwi Godoko ba꞉gala Kodawa Ya꞉su Kelisoko iba꞉te ibino malemale komo ba꞉gala hete komo la꞉tamo nikalama꞉mena꞉ta.   
\s1 Godote Kuba Ododilipa꞉tamo Huiya Ikalame Komo  
\p
\v 3 Aeno hibima꞉ midipi ekaka꞉la꞉, wadiyala hiliyonomo tetelo ale la꞉ mabuma꞉ Godotamo kalakala tabo ba꞉wadiya꞉paa꞉latelenakoma꞉. Iyo, ale ba꞉ba ka꞉na kewagelenama꞉ ba꞉moe ba꞉ hido komola, mabu la꞉eno hibima꞉ midi komote ba apepehona, la꞉ ipuwalo etapa꞉te etapi malemalelo demalagidolenama ba꞉be komote atumu koma꞉ neda꞉na.  
\v 4 Ba꞉be mabuma꞉ ale komo Godokono sose tawakaluba꞉tamo da꞉nikulinakoma꞉, ibi ipuwalo la꞉ ba awagaminale la꞉eno hidohido ododili komoma꞉ ga꞉lanakoma꞉. Iyo, hibima꞉ midiha꞉pa꞉te la꞉tamo koko temeteme dikalamena la꞉ huiyatiya ba꞉be menemene ipuwalo Godoko hibima꞉ midi mabuma꞉ kodakodalo da꞉la꞉mota꞉hanama, ale ba꞉be komoma꞉ komo hibima꞉ midipi konomamo ba꞉bema꞉ kiyalamenakoma꞉.   
\p
\v 5 Ba꞉ hibila, la꞉le temeteme uwate tetelo kodakodalo da꞉la꞉mota꞉hanama, ba꞉be komote ba꞉moe komo behawakalimina, Godote hopo habanapino kuba ododili komokomo danagilamelelamemene ebete ba꞉be komo tuputupunomolo ba꞉ma ka꞉na kododima꞉ne, ebete la꞉eno temeteme uwate mabuma꞉ la꞉ ebeno hidohido ga꞉limapi gugudima꞉ ba ka꞉lami, modobo tabo ba꞉bo kogoema꞉ne la꞉le ebeno Ko Gawadubu habamo kona꞉pa꞉la꞉hama꞉.  
\v 6 Iyo, Godoko ba꞉ tuputupu komokomo kapiya ododilidawala, ba꞉bema꞉ puya꞉te ba꞉ma tetelo temeteme la꞉tamo dikalamena ebete iba꞉tamo kuba huiya kikalamema꞉ne,  
\v 7 huiyatiya ebete la꞉godone ba꞉gala agodone aeno temeteme komo hiliyonomo gobogobamo ba miya꞉te a kapimilo ba꞉bo kogelebadia꞉mema꞉ne.  
\p Ba꞉ hibila, ba꞉ba tetelo aeno Kodawa Ya꞉suti ebeno helonomo nopopa꞉go Hunu Habane hawakala da꞉pemene,  
\v 8 puya꞉te ebeno Hido Tabamo papamila꞉haheno ba꞉gala Godoko ubiha꞉ma꞉ deda꞉hana, ebete ba꞉bi tawakaluba꞉tamo helonomo powagoeno koa꞉mo huiya ba꞉bo kopikalamema꞉ne.  
\v 9 Ba꞉bene ba꞉bi kuba ododilipino temeteme komote itana itana tetelo bitanamene, iyo, Kodawate ibi ebeno holoholo hapuni ba꞉gala ebeno helonomo a꞉la꞉mina alone tama꞉mo ba꞉ dito koelamema꞉ne iba꞉te ibino kuba huiya ipuwalo konemedehonama꞉.  
\v 10 Huiyatiya kalakala konomola, Kodawate ebeno Ko Hegelalo da꞉pemene, ba꞉ba tetelo puya꞉te ebeno tawakalubima꞉ deda꞉hana ba꞉bi hibima꞉ midipi hiliyonomate ebe hunamo ba adipate ebe mabuma꞉ konomamo kohanohanohoma꞉na꞉! Ba꞉bema꞉ numa꞉la꞉, la꞉le ba꞉bi tawakalubino konomo kapiyuimi ipuwalo atumu kopola꞉nama꞉nemata, mabu ale la꞉tamo ebeno Hido Tabo da꞉polamagimima꞉ la꞉ ba꞉be tabo hibima꞉ a꞉midimata.   
\p
\v 11 Ba꞉bema꞉ ale ba꞉be komo ba emalagidolo komo hiliyonomo tetelo la꞉ mabuma꞉ aeno Godotamo ba꞉ma ka꞉na toetoehonakoma꞉, ebete kebe hido emede komoma꞉ la꞉ da꞉ka꞉lami, wadiyala ebete ba꞉be emede ipuwalo la꞉ ebeno hidohido ga꞉limapi gugudima꞉ na꞉midila꞉mena꞉ta, ba꞉gala wadiyala ebete ebeno helo la꞉tamo nikalama꞉mena꞉ta, la꞉le la꞉eno tepo ipuwoeno hidohido ubi komone ba꞉gala la꞉eno hibima꞉ midi ipuwane tuputupu ododili komo ba uluhukulatele ba꞉bi komo hidamo kupula꞉lema꞉.  
\v 12 Ba꞉be mabuma꞉ puya꞉te la꞉eno hidohido emede komokomo dulamemena꞉, iba꞉te aeno Kodawa Ya꞉suku awagaminalo ebeno mahilo hunamo ba adipate, ba꞉be hido awagaha komote Ya꞉sugodone la꞉tamo atumu kakapuluhukuma꞉ne, ba꞉bema꞉ wadiyala ba꞉moe hido komote aeno Godo ba꞉gala Kodawa Ya꞉su Kelisoko ibino malemale ipuwado ba꞉ ba꞉ba ka꞉na nuluhukamene.   
\c 2  
\s1 Ba꞉moe Hopo Habalo Koko Kuba Ododilidawate Komahigama꞉ne  
\p
\v 1 Ba꞉bema꞉ aeno hibima꞉ midipi ekaka꞉la꞉, aeno Kodawa Ya꞉sukunu pe tetelo ebete a hibima꞉ midipi eba꞉go kemedenama꞉ da꞉pekapiyuia꞉memene, ba꞉be komoma꞉ ale la꞉ ba꞉ma ka꞉na kiyalama꞉ta,  
\v 2 puya꞉te ha꞉da amiho tabo ba꞉ma ka꞉na da꞉ga꞉lana, “Kodawoeno Ko Hegelate ya꞉lo uluhukui,” ba꞉be mabuma꞉ la꞉eno ukuiti gagagagama꞉ akeda꞉hala꞉ ba꞉gala la꞉ ukui bilibili komo akalawa꞉la꞉. Diyala, la꞉ ipuwalo komopa꞉te da꞉ na꞉ga꞉lana ba꞉moe tabo komote agodone pi. Ao, eba ka꞉naha꞉! Ale dopamo la꞉godolo ba pemede la꞉tamo Godokono ukui da꞉hawakaliminakuima꞉ ba꞉gala komo tetelo ale tabo dito da꞉ga꞉lanakuima꞉, ba꞉gala ale galane dopo leta la꞉tamo da꞉poemima꞉, ba꞉bi hiya꞉hiya꞉ tete hiliyonomolo ba꞉mako tabote agodone kuluhukuha꞉.   
\p
\v 3 Ba꞉bema꞉ komopino ha꞉da amiho tabo komokomo hibima꞉ akamidila꞉la꞉. Numa꞉la꞉, Ya꞉sukunu pe hegelate uluhukuhino, dopamo hopo habanapi hiliyonomate Godokono hibi gabo ba miya꞉pa Koko Kuba Ododilidawate ba꞉bo komahigama꞉ne. Ba꞉ hibila, ba꞉be dawate Saitanakono Koe Habalo kuba huiya hibinomolo kolawema꞉ne,  
\v 4 mabu a hibima꞉ midipa꞉te hibi Godoma꞉ da꞉ka꞉minakoma꞉ ebete ba꞉be Kodawa hibiha꞉ma꞉ kogoema꞉ne. Ba꞉gala komo hopo habanapa꞉te hiya꞉hiya꞉ ida꞉da꞉lino gobogobo dadikulamenaka, ebete ibino adikulame komokomo hiliyonomo ba duhilame ebe ha꞉kiya ebe hunamo adipatelo ba꞉bo kogoema꞉ne, “Na ba꞉ Godotela, na hopo lumagiha꞉!” Iyo, ba꞉ba tetelo ebete hibi Godo Adikumino Hiya꞉ Genamalo ba luta, tawakalubi hiliyonomo ba꞉bo kokiyahalamema꞉ne iba꞉te ebe kapiya kadikumima꞉.   
\p
\v 5 Ba꞉ hibila, nale dopamo komo hegelalo la꞉godolo ba pemede ba꞉moi komokomo la꞉ iya꞉tulamimata, huiyatiya wadiyala la꞉ ba꞉ma tetelo naeno tabo komokomo gala na꞉kemalagidola꞉la꞉.  
\v 6 La꞉ iya꞉tawahala, ba꞉ma tetelo hopo habalo etoeno helote Koko Kuba Ododilidawoeno komo na꞉duhimina, iyo, ba꞉be mabuma꞉ Godokono ubi tete peheno ba꞉be dawate a꞉kamahigamene.  
\v 7 Ba꞉bema꞉ ba꞉ma tetelo kebe helote Kubadawoeno mahiga komo da꞉duhimina, Godote ba꞉be helo tama꞉mo ihateheno Kubadawate diya gabodo hopo konomolo ebeno oko bowatina, iyo, ebete ba꞉ ba꞉ba ka꞉na ebeno kuba ododili komo ya꞉lo a꞉tupuimiya꞉.  
\v 8 Huiyatiya numa꞉la꞉, galane ba꞉be dawoeno kuba komote tawakaluba꞉tamo hawakalanomo kohawakalama꞉ne, ba꞉bene Godote kebe tete ebetamo dikamemene, ba꞉be tete wibote Kodawa Ya꞉suti pete ebeno tabone da꞉puluhukumini ba꞉be deha꞉potonomo tabo kapiyamo ba꞉be Kubadawa ba꞉ dito kopanakapumima꞉ne.   
\p
\v 9 Ba꞉bema꞉ wadiyala la꞉ niya꞉tawahala꞉, ba꞉moe Kubadawate da꞉pemene, ebete hiliyonomo hiya꞉hiya꞉ hanohano komo ba꞉gala tole komo Saitanakono konomo heloamo kopododilima꞉ne hopo habanapi ha꞉da kopamiholamema꞉.  
\v 10 Iyo, ibi ipuwalo puya꞉te Godoko hibima꞉ midihino dito da꞉ha꞉lahamena꞉, iba꞉te ha꞉lahaheno dopamo Kubadawate hiya꞉hiya꞉ ha꞉da amiho gabodo ibi ibino olalati kuitita꞉mo komagatalema꞉ne. Ba꞉ hibila, ba꞉bi tawakaluba꞉te Godokono hibi komo kalakalago na꞉lawiya꞉tale Godote ibino ka꞉ka꞉ ba꞉mula꞉lelamiya꞉na꞉, huiyatiya iba꞉te ba꞉be komo ko komoma꞉ kaga꞉luya꞉ha꞉ ba꞉bema꞉ iba꞉te hibilo kokubakubahama꞉na꞉.  
\v 11 Numa꞉la꞉, iba꞉te hibi komo laweha꞉ mabuma꞉ Godote iba꞉tamo Ha꞉da Amihodawa oemema꞉ modoboma꞉ goena. Ba꞉ ba꞉ma ka꞉na iba꞉te ba꞉be dawoeno helo komamo guditi ebeno ha꞉da tabo komokomo hibima꞉ komidilima꞉na꞉,  
\v 12 iyo, hopo habanapi ipuwalo puya꞉te Godokono hibi komo laweheno ibino kateneno ubilo hiya꞉hiya꞉ kuba komo kalakalago dododilina, ebete ibi hiliyonomoeno komokomo anagilamelelamete iba꞉tamo kuba huiya ba꞉bo kikalamema꞉ne.   
\s1 Godote Hibima꞉ Midipino Ka꞉ka꞉ Komula꞉lema꞉ Ibi Duwatiya꞉  
\p
\v 13 Ba꞉bema꞉ aeno hibima꞉ midipi ekaka꞉la꞉, wadiyala hiliyonomo tetelo ale la꞉ mabuma꞉ kalakala tabo Godotamo ba꞉wadiya꞉paa꞉latelenakoma꞉. Hibila, ebete la꞉ malemalelo demalagidolena, ba꞉be mabuma꞉ ebete ba꞉moe hopo tupuimi mabuni la꞉ uwatiya꞉ta, la꞉le ebeno komo hibima꞉ ba midi ebeno Gobogobote la꞉ talonapima꞉ midiliti la꞉le ka꞉ka꞉ mula꞉ komo ba꞉bo kolawema꞉.  
\v 14 Iyo, ale Hido Tabo la꞉tamo dolamagimima꞉ Godote ba꞉be komodo la꞉ a꞉ka꞉lamia꞉ta, la꞉le komo hibima꞉ midipa꞉go Kodawa Ya꞉su Kelisokono helonomo alo ipuwalo kemedenama꞉.  
\v 15 Ba꞉bema꞉ aeno ekaka꞉la꞉, ale Godokono tabo olamagimi ipuwalo ba꞉gala aeno dopo leta ipuwalo la꞉ kebe komokomo kiya꞉tulametanakui, wadiyala la꞉ ba꞉bi komo hibilo ba watila꞉mota꞉na kodakodalo na꞉la꞉mota꞉hanala꞉.   
\p
\v 16-17 Numa꞉la꞉, ya꞉lo tetenomolo aeno Kodawa Ya꞉su Kelisote aeno Nabiwi Godokoba꞉ a konomamo ba emalagidoloena, iba꞉te ibino malemale ipuwado a emedena teteno tepo ipuwoeno helo atamo ikaa꞉miya꞉ ale Ya꞉sukunu pe kuitita꞉mo uliholo kolatiminama꞉. Ba꞉bema꞉ wadiyala iba꞉te ba꞉ ba꞉ba ka꞉na la꞉eno tepo ipuwa na꞉heluilamenakamena꞉, hiliyonomo tetelo hidohido komate la꞉eno tabo ga꞉la ipuwane ba꞉gala ododili ipuwane kopikulinakoma꞉.   
\c 3  
\s1 Tesalonaika Sose Tawakaluba꞉te Polui Mabuma꞉ Godoko Kotoemehoma꞉ Polote Ibi Da꞉kiyalamiya꞉  
\p
\v 1 Ba꞉bema꞉ aeno hibima꞉ midipi ekaka꞉la꞉, ba꞉moe leta kuititi hapulu ale la꞉ ba꞉ma ka꞉na kiyalama꞉ta, wadiyala la꞉ toetoe tabamo a Godotamo na꞉wadiya꞉paa꞉tiya꞉la꞉, mabu a ubila Kodawa Ya꞉sukunu tabote aeno oko ipuwado komo hiliyonomo hopo tawakaluba꞉tamo tiyonomolo kotoma꞉, ba꞉gala a ubila ulihopa꞉te ba꞉be tabo ba milimiho Godotamo kalakala tabo kadipatema꞉, la꞉le dopamo ebeno tabo keba ka꞉na ka꞉lawiuima ba꞉ba ka꞉na.  
\v 2 Ba꞉bene wadiyala la꞉ ba꞉moe eta komoma꞉ Godoko na꞉katoemehuya꞉la꞉, ebete koko kuba ododilipi dubuino helo ipuwane aeno ka꞉ka꞉ komula꞉lea꞉mema꞉, mabu komo hopo habanapa꞉te Godokono tabo uliho tetelo hibima꞉ kamidinaha꞉.   
\p
\v 3 Ba꞉bema꞉ kalakala konomola, la꞉eno hibima꞉ midi mabuma꞉ Kodawate atumu la꞉ ba heluilame, Saitanakono alaholoho ododili ipuwalo la꞉ ebete kitagua꞉midalema꞉na꞉ta! Iyo, aeno Kodawa ba꞉ Hibidawanomola!  
\v 4 Ba꞉bema꞉ a iya꞉tawahala ale kebe hiya꞉hiya꞉ komoma꞉ la꞉ da꞉kiyalamenaka, la꞉ ba꞉bi komokomo ododili ipuwalo ba pola꞉na ba꞉bi komo dito a꞉kamiya꞉pala꞉mata. Numa꞉la꞉, Kodawate la꞉ mabuma꞉ ba꞉be hido ukui atamo nikaa꞉mena, ba꞉bema꞉ ukui bilibili komote agodolo kitanaha꞉.  
\v 5 Wadiyala la꞉le hibima꞉ midi gabodo ba tolame, Kodawa Kelisote la꞉ dopalamete temeteme ikuliho tetelo ebete ebeno kodakodalo utitata komago ba꞉gala Godokono malemale emalagidolo komago la꞉ na꞉magatalenakamena꞉ta.   
\s1 Hibima꞉ Midipa꞉te Oko Nowatinamena꞉ Ibi Ha꞉kiya Ibino Modoboha꞉ Komokomo Kulamema꞉  
\p
\v 6 Ba꞉bema꞉ aeno hibima꞉ midipi ekaka꞉la꞉, ale aeno Kodawa Ya꞉su Kelisokono mahilamo la꞉ ba꞉ma ka꞉na kiyalama꞉ta, la꞉ ipuwalo puya꞉te aeno iya꞉tulame komamo papamila꞉haleheno ba꞉gala iba꞉te ibi ha꞉kiya owalubilima꞉ buhamama꞉ deda꞉hana, wadiyala la꞉ ba꞉bako hibima꞉ midipino ododili ipuwamo akogomala꞉.  
\v 7 Iyo, ale la꞉ ipuwalo keba ka꞉na ka꞉pemedima꞉ la꞉ ba꞉be komo iya꞉tawahanomola, ba꞉bema꞉ wadiyala la꞉ atu ododili ipuwalo nemedenala꞉. Numa꞉la꞉, ba꞉ba tetelo ale oko owatima꞉ buhamama꞉ eda꞉haheno,  
\v 8 du ba꞉gala hegela hiliyonomolo aeno kokotamo menemene oko owatihonakuima꞉ a ha꞉kiya aeno modoboha꞉ komokomo kulamema꞉, ba꞉bene ba꞉be gabodo ale eta lumagigodone baa꞉ malemalelo dito kalawenakuiha꞉, ao, a ebetamo a꞉huiyanakuima꞉.  
\v 9 Ba꞉ hibila, Godokono okopa꞉te ibino modoboha꞉ komokomo ipuwalo hibima꞉ midipa꞉godone ilina ba꞉gala mani uwatema꞉ talona kitanaha꞉, huiyatiya ale la꞉go ba emedena ba꞉ba ka꞉na kewagelenakuiha꞉, mabu a ubi bihatima꞉ la꞉tamo eta hido go hawakalimiti, la꞉le oko owati ipuwalo aeno ododili komo kota꞉matalema꞉.  
\v 10 Ba꞉moe ba꞉be mabuma꞉ ale la꞉ ba꞉ma ka꞉na a꞉kiyalamia꞉ta, “Kebe lumagiti oko owati ubiha꞉ma꞉ deda꞉mene, wadiyala komopa꞉te ebetamo baa꞉ akikama꞉la꞉.”   
\p
\v 11 Ba꞉bema꞉ numa꞉la꞉, ale ba꞉moe komoma꞉ la꞉ gala na꞉kakiyalama꞉ta mabu tabote atamo ba꞉ma ka꞉na puluhukui, la꞉ ipuwalo komopa꞉te oko owatima꞉ buhamama꞉ ba eda꞉ha, ibi ha꞉kiya ibino hiya꞉hiya꞉ komo ulameheno ibino tabo ga꞉la ipuwalo puya꞉te hibi oko komokomo dowatihona iba꞉tamo temeteme ba꞉bo ikalamenaka.  
\v 12 Iyo, ale ba꞉bako tawakalubi ba tutumulatele Kodawa Ya꞉su Kelisokono mahilamo ibi koamo kiyahalamema꞉, iba꞉te tabo ga꞉la ipuwalo komo tawakaluba꞉tamo temeteme ikalameheno, huiyatiya iba꞉te hegehege mani oko owatiho ipuwalo ibi ha꞉kiya ibino modoboha꞉ komokomo nulamenakamena꞉.   
\p
\v 13 Ba꞉bema꞉ ekaka꞉la꞉, kalakala konomola, la꞉eno hibima꞉ midi ipuwalo hidohido komo kododilima꞉ heloha꞉ma꞉ akeda꞉hala꞉.  
\v 14 Ba꞉gala la꞉ ipuwalo eta lumagiti ba꞉moe leta taboeno iya꞉tulame komamo papamiwata ubiha꞉ma꞉ eda꞉lo oko owatihino dito da꞉lutamene, wadiyala la꞉ ba꞉bako lumagino kuba komo kohawakalimima꞉ ebeno ododili ipuwalo eba꞉go akakapiyala꞉. Diyala, ba꞉moe gabodo ebete hilopo lawete ebeno kuba ukui komone Godotamo gala da꞉ kohobigamene,  
\v 15 huiyatiya numa꞉la꞉, ebete ukui hiya꞉ma꞉ tiyolo midihino ebe la꞉go alaholodawama꞉ akamida꞉la꞉, la꞉le huiyatiya ebe la꞉eno hibima꞉ midi ekawima꞉ ka꞉milo ebeno tepo ipuwoeno kuba ukui komoma꞉ ebe malemalelo na꞉kiyamiya꞉la꞉.   
\s1 Polote Leta Kuititi Hapulu Tabo Komokomo Dolamagiya꞉  
\p
\v 16 Ba꞉bema꞉ hete atamo dikaa꞉mena, wadiyala ba꞉be Kodawate la꞉ hiliyonomagodolo ba emedena hiliyonomo tetelo ebe ha꞉kiya la꞉eno hiliyonomo komokomo ipuwalo ebeno hete la꞉tamo nikalamenakamena꞉ta.   
\p
\v 17 Numa꞉la꞉, ba꞉moe leta kuititi hapulu na Polote naeno mahilo ba꞉gala nolata tabo naeno kokotonomamo miya꞉temo, eta lumagiti ba꞉moe kuititi tabo kamiya꞉teha꞉. Iyo, ba꞉moe ba꞉ naeno kokotola, naeno leta hiliyonomo ododili ipuwalo na ha꞉kiya naeno mahilo ba꞉ma ka꞉na miya꞉tenakomo.   
\p
\v 18 Wadiyala aeno Kodawa Ya꞉su Kelisokono malemale komote la꞉ hiliyonomagodolo nitanamene. Ba꞉moe ba꞉ naeno tabo kuititila. Ba꞉ba꞉la.