\id 2PE - Tabo (Aramia dialect) NT - Papua New Guinea 2006 (DBL 2014) 
\h 2 Pit 
\toc3 2 Pit 
\toc1 Pitakono Naba 2 Leta Ebete Hibima꞉ Midipa꞉tamo Ododiya꞉ 
\toc2 2 Pita 
\mt1 PITAKONO NABA 2 LETA  
\mt2 EBETE HIBIMA꞉ MIDIPA꞉TAMO ODODIYA꞉  
\c 1  
\p
\v 1 Na ba꞉ Saimono Pitatela, Ya꞉su Kelisokono okodawala, iyo, ebete ebeno sose tupuimima꞉ hiya꞉hiya꞉ hopamo doelamiya꞉, ba꞉bi okopi ipuwalo na ba꞉ etala.  
\p Ba꞉ hibila, Ya꞉su Kelisoko ba꞉ aeno Ka꞉ka꞉ Mula꞉lea꞉medawala, ebe ba꞉ Godotela. Ba꞉gala ebete ebeno tuputupu ododili gabodo puya꞉tamo hibima꞉ midi komo dikalamiya꞉, la꞉ ba꞉ ba꞉bi tawakalubilata, ba꞉bema꞉ nale ba꞉moe leta la꞉tamo poememo, mabu la꞉eno hibima꞉ midi komo ba꞉gala aeno hibima꞉ midi komo ba꞉ kapiyanomola.   
\p
\v 2 Wadiyala la꞉ Godokono komo ba꞉gala aeno Kodawa Ya꞉sukunu komo ba iya꞉tawaha, ibino malemale komo ba꞉gala ibino hete komote la꞉godolo konomamo na꞉pola꞉namena꞉.   
\s1 Hibima꞉ Midi Ipuwalo Apepeho Komo  
\p
\v 3 Ba꞉ hibila, dopamo tetelo Ya꞉suti a a꞉ka꞉miya꞉ ale ebeno helonomo alago ba꞉gala ebeno tuputupu ododili komago kemedehonama꞉. Ebegodolo Godokono helote bitana ba꞉bema꞉ ebete atamo hiliyonomo hidohido komo ikaa꞉miya꞉, ale ebeno komo ba iya꞉tawaha Godokono ubi komamo hibilo kopapamila꞉hanama꞉.  
\v 4 Iyo, ebete dopamo a kowalubima꞉ kebe tabo hibilo da꞉goiya꞉, ba꞉be taboeno hibi komote ba꞉ma ka꞉na uluhukuya꞉, ebete atamo kokonomo komo ba꞉gala hidohidonomo komo dito ikaa꞉miya꞉, mabu ebe ubila ale hopo tawakalubino kateneno kuba ododili ipuwane ikuliti aeno emede ipuwalo ale Godokomo kemedehonama꞉.   
\p
\v 5 Ba꞉be mabuma꞉ la꞉le la꞉eno hibima꞉ midi ipuwalo apepeho wakolado kalehawaminama꞉, wadiyala la꞉ la꞉eno ukui konomamo nihatenala꞉. Iyo, la꞉ ba꞉ ba꞉ma ka꞉na Godoko hibima꞉ ba midina, ebeno tuputupu emede komo na꞉lawiya꞉la꞉. Ba꞉bene la꞉ tuputupulu ba emedehona, Godokono hibi iya꞉tawa komo na꞉lawiya꞉la꞉.  
\v 6 Ba꞉bene la꞉ Godokono komo hibilo ba iya꞉tawahana, Godokono helo lawema꞉ tepo kodakoda komo na꞉lawiya꞉la꞉. Ba꞉bene la꞉ tepo kodakodalo ba la꞉mota꞉hana, koko temeteme ipuwalo heloha꞉ma꞉ eda꞉haheno kalakala na꞉lawiya꞉la꞉. Ba꞉bene la꞉ temeteme ipuwalo heloha꞉ma꞉ eda꞉haheno ba la꞉mota꞉hana, Godotamo hibilo papamiwata komo na꞉lawiya꞉la꞉.  
\v 7 Ba꞉bene Godotamo hibilo ba papamila꞉hana, la꞉ komo hibima꞉ midipa꞉tamo malemale hawakalimi komo na꞉lawiya꞉la꞉. Ba꞉bene la꞉ hibima꞉ midipa꞉tamo malemale ba hawakalimina, wadiyala Godokono malemale emalagidolo komote hopo habanapi hiliyonomatamo la꞉ ipuwalo konomoma꞉ neda꞉mene.   
\p
\v 8 Ba꞉ hibila, ba꞉moi apepeho wakoloeno komo hiliyonomate la꞉godolo konomamo da꞉pola꞉namena꞉, ba꞉ba tetelo la꞉ aeno Kodawa Ya꞉su Kelisokono hibi komo ba iya꞉tawaha ebeno hidohido gao noloho oko bowatihonamata.  
\v 9 Huiyatiya numa꞉la꞉, kebe hibima꞉ midi lumagigodolo ba꞉bi komokomate pola꞉naheno, ebe ba꞉ baidi tamihodawala, iyo, ebeno emede komote ba꞉moe komo behawakalimina, Ya꞉suti ebe ebeno kuba ododili ipuwane uluhukutiti ebeno tepo ipuwa dukulamiya꞉, ebete ba꞉be hido komo ya꞉lo adodui.  
\v 10 Ba꞉bema꞉ naeno ekaka꞉la꞉, Godote la꞉ dopamo da꞉ka꞉lamiholiya꞉ ba꞉be komo hibilo kohawakalimima꞉, wadiyala la꞉ la꞉eno hibima꞉ midi ipuwalo helohelonomoma꞉ neda꞉huya꞉la꞉, mabu hibila, la꞉ ba꞉ba ka꞉na dewagelema la꞉ nato ukamidahalete a꞉kaguda꞉mata.  
\v 11 Iyo, ba꞉moe ba꞉be gabodo Godote la꞉tamo gigiho ka꞉hiya꞉midalamema꞉na꞉ta, la꞉le aeno Ka꞉ka꞉ Mula꞉lea꞉medawoeno kalakala emede habamo kona꞉pa꞉la꞉hama꞉, ba꞉be Kodawa ba꞉ Ya꞉su Kelisotela ba꞉gala ebeno Ko Gawadubuma꞉ eda꞉ komote emedena emedena tetelo bitanamene.   
\s1 Pitate Ebeno Hoe Komo Tatalima꞉ Da꞉goiya꞉  
\p
\v 12 Ba꞉ hibila, la꞉ ba꞉moi komokomo ya꞉lo iya꞉tawahuya꞉mata, ba꞉bema꞉ Godote la꞉tamo dikalamiya꞉la la꞉ ba꞉be hibima꞉ midi ipuwalo heloma꞉ eda꞉hanamata. Huiyatiya numa꞉la꞉, naeno kalakala bitana komo hiya꞉hiya꞉ tetelo ba꞉moi atu komo la꞉ gala kakakiyalamenakoma꞉,  
\v 13 ba꞉bema꞉ na hoeheno dopamo la꞉ ba꞉moi komo gala da꞉kakiyalamema, ba꞉be komo ba꞉ hido komola.  
\v 14 Iyo, na iya꞉tawala tete tatalila na ba꞉ kohoema꞉nemo, mabu aeno Kodawa Ya꞉su Kelisote ba꞉moe komo na ya꞉lo iya꞉tunami.  
\v 15 Ba꞉moe ba꞉be mabuma꞉ ba꞉moe leta ipuwalo nale ba꞉moi komokomo la꞉ gala ba꞉bema꞉ kakiyalamemata, naeno hoe gala hapuni la꞉le ba꞉moi komo hidamo kemalagidolenama꞉.   
\s1 Godokono Ukui Hawakalimipa꞉te Ya꞉suku Mabuma꞉ Bukamo Hibi Tabo Komokomo Da꞉miya꞉tiya꞉  
\p
\v 16 Numa꞉la꞉, a Kodawa Ya꞉su Kelisokono oelamepa꞉te ebeno helo komo ba꞉gala hawakala komo la꞉tamo da꞉pehawakalimiya꞉ma꞉, ba꞉ba tetelo ale la꞉ ha꞉da kamiholamiya꞉ha꞉. Ba꞉gala komo hiya꞉hiya꞉ tawakalubino iniwala꞉te ibi ha꞉kiya ibino kapiyuimi mabuma꞉ eyoni guguda꞉tamo kebako uwi ka꞉kiyahanakui, ale ba꞉bako tawakalubino uwi komokomo la꞉ kakiyahalamiya꞉ha꞉. Ba꞉ hibila, ale Ya꞉sukunu Ko Gawadubu helo aeno baida꞉mo dumiya꞉ma꞉, ba꞉be komo la꞉ a꞉kiyalamiya꞉ta,  
\v 17 mabu Nabiwi Godote Ya꞉suku ba milimiho ebe dawagaminutiya꞉, ba꞉ba tetelo komo a ebeno oelamepa꞉te ba꞉bolo na꞉pola꞉nuya꞉ma꞉. Ba꞉bene ale aeno galamo Ko Alonomodawoeno tabo madodo ba꞉ma ka꞉na uliya꞉ma꞉, “Ba꞉moe ba꞉ naeno kapiya Gudunomola. Na ebetamo na꞉kalakalutamo!”  
\v 18 Iyo, a Ya꞉sukuba꞉ talona hununomo hakalo da꞉pola꞉nuya꞉ma꞉, ba꞉ba tetelo Godokono tabo madodote ebeno Hunu Habane atamo ba꞉ba ka꞉na puluhukuya꞉.   
\p
\v 19 Ba꞉bema꞉ Godokono ukui hawakalimipa꞉te Ya꞉suku mabuma꞉ Bukamo ya꞉lo tetelo da꞉miya꞉tiya꞉, ale ba꞉bi komokomo hibima꞉ na꞉midilinama꞉. Numa꞉la꞉, ibino tabo komokomo ba꞉ alo deha꞉potote konomo du ipuwalo keba ka꞉na ka꞉la꞉minana ba꞉ba ka꞉nala, ba꞉bene tete tatalila Huli Olokiti ha꞉kiya kuluhukuma꞉ne, iyo, ba꞉ba tetelo hido hegelate ba powaloho duino hilibubuti dito kowiboma꞉ne. Ba꞉bema꞉ hibila, ba꞉be alote la꞉eno tepo ipuwalo hidamo ka꞉la꞉minalema꞉, wadiyala la꞉ Godokono okopa꞉te dopamo da꞉hawakalimiya꞉ ba꞉be tabo hibima꞉ miditi hidonomamo na꞉lawiya꞉la꞉.  
\v 20 Ba꞉gala ba꞉moe ko komo hidamo niya꞉tawahala꞉. Godokono ukui hawakalimipa꞉te ebeno Bukamo dopamo kebe tabo komokomo ka꞉miya꞉tiya꞉, lumagiti ha꞉kiya ebeno mulu ukuia꞉mo ba꞉bi taboeno ipuwa uwate modoboha꞉,  
\v 21 mabu Godokono ukui hawakalimipa꞉te ibi ha꞉kiya ibino ubilo ibino ukui tabo Bukamo kamiya꞉tenakuiha꞉. Ao, Godokono Gobogobote ibi keba ka꞉na kiya꞉tulamenakui, iba꞉te ebeno tabonomo Bukamo miya꞉telo ba꞉ ba꞉ba ka꞉na olamagiminakuya꞉.   
\c 2  
\s1 Godokono Mahilamo Ha꞉da Tabo Olamagimipa꞉te Ikuli Komo  
\p
\v 1 Ba꞉bema꞉ numa꞉la꞉, la꞉eno iniwalino tetelo Godokono hibi tabo olamagimipa꞉te oko ba owatina, atu tetelo Godokono mahilamo ha꞉da tabo olamagimipa꞉te a꞉mahila꞉halenakuya꞉, ba꞉bema꞉ ba꞉ma tetelo komo ba꞉bakobako dubate la꞉ ipuwalo gala kakikulima꞉na꞉. Ba꞉ba꞉te la꞉eno ka꞉ka꞉ mula꞉ komo kokubahilamema꞉ ibino ha꞉da tabo komokomo kolamagimima꞉na꞉, ba꞉bene kebe dawate ibino kuba ododili komoeno helo ipuwane ibi ebeno hawa꞉mo malemalelo duluhukulateliya꞉, iba꞉te ebe ubiha꞉ma꞉ ba eda꞉ha ba꞉bo koga꞉lama꞉na꞉ ebe ibino Namutudawaha꞉. Ba꞉ hibila, ba꞉moe gabodo ibi ha꞉kiya ibi kokubahilamema꞉na꞉, iyo, iba꞉te iya꞉tawaha꞉ tetelo olalatiti ibi dito kopuwatema꞉ne.  
\v 2 Huiyatiya olalatiti iba꞉tamo peheno, dopamo komo sose tawakalubi hiliyonomate kateneno ubi gabodo ibi ba ta꞉matale Godokono hibi gabo komiya꞉pama꞉na꞉, iyo, ba꞉ba tetelo hibima꞉ midiha꞉pa꞉te ibino kuba ododili komokomo ba ulamelelame Godokono hibi gabo kuba gaboma꞉ ba꞉bo koga꞉lama꞉na꞉.  
\v 3 Ba꞉gala eta komo. Ba꞉bi ha꞉da tabo olamagimipa꞉te ubi konomamo ihatena la꞉eno mani ha꞉da gabodo uwatema꞉, ba꞉bema꞉ ibi ha꞉kiya ibino ukui komamo komo hiya꞉hiya꞉ uwi la꞉ ba꞉bo kokiyahalamema꞉na꞉ta. Huiyatiya numa꞉la꞉, dopamo tetelo Godote ibino kuba huiya ikalamema꞉ hibilo a꞉goiya꞉, ba꞉bema꞉ ba꞉be kuba huiyate ba꞉ na꞉pe, iyo, ibi Anakapulamedawate ya꞉lo a꞉hiduya꞉, ebete hido tete belatimina.   
\s1 Godote Kuba Ododilipa꞉tamo Huiya Ikalame Komo  
\p
\v 4 Ba꞉ hibila, Hunu Haboeno komo nopopa꞉te Godokono tutumu dadikanaliya꞉, ba꞉ba tetelo ebete ibi Saitanakono konomo du bobamo dito iya꞉hekiya꞉, iba꞉te du ipuwalo auli hala꞉mo matuhulamehola꞉go ba emedehona ibino kuba huiya uwate hegela kolatiminama꞉.   
\p
\v 5 Ba꞉gala Nowate hopo habanapa꞉tamo Godokono tuputupu emede komo dolamagiya꞉, iba꞉te Godokono ubi komamo kapapamila꞉huya꞉ha꞉. Ba꞉be mabuma꞉ Godote iba꞉tamo kuba huiya atumu ka-ikalamiya꞉, iyo, ebete hulama beya ba꞉moe hopamo da꞉poemiya꞉, ba꞉ba tetelo ibi hiliyonomate a꞉ha꞉lahuya꞉, huiyatiya Nowate komo sa꞉ba꞉ni tawakaluba꞉go ibi kapiyate ka꞉ka꞉ mula꞉ komo ba꞉bo lawiya꞉.   
\p
\v 6 Ba꞉gala Sodomo Gomola koko habalo demedehonama꞉, Godote ba꞉bi tawakaluba꞉tamo kuba huiya ba ikalame koe powagoeno da꞉poemiya꞉, ibi hiliyonomo koete ba꞉ dito pehawaminadigaliya꞉. Ba꞉bema꞉ numa꞉la꞉, ibino olalati komo ba꞉ gola, Godokono ubi komamo papamila꞉haleha꞉pa꞉tamo kuba huiyate keba ka꞉na duluhukumini.  
\v 7-8 Ba꞉ba tetelo Godote Sodomo habanapino kuba ododili mabuma꞉ ibi hiliyonomo ba anakapulame tuputupu dubu Lotokono ka꞉ka꞉ kapiya bemula꞉miya꞉, mabu ba꞉be dubuti ibi ipuwalo ba emedena ibino kateneno kuba ubi komokomoma꞉ tepo menemene da꞉lawenakui ibino kuba ododili ipuwamo kopeganakuiha꞉. Iyo, ebete iba꞉godolo hiya꞉hiya꞉ kuba ododili komo dulamenakui ba꞉gala ibino kuba tabo ga꞉la komo dulihonakui, ba꞉bema꞉ ebete ebeno tepo ipuwalo ko temetemenomo biya꞉tawanakui. \fig Sodomo habanapino olalati komo ba꞉ gola|alt="Six people rushing from burning city" src="CO00656B.TIF" size="col" loc="3/4 of page on right hand side in corner" copy="1978 David C. Cook Publishing Co." ref="2.6" \fig*   
\p
\v 9 Ba꞉bema꞉ hibila, Godoko iya꞉tawala puya꞉te ebeno ubi komamo da꞉papamila꞉hana ba꞉bi tawakalubino temeteme ipuwalo ibino ka꞉ka꞉ komula꞉lelamema꞉. Ba꞉gala ebe iya꞉tawala ebete kuba ododilipi ibino olalati komamo matuhulameholete ibi Kuititi Hegela teta꞉mo komagatalema꞉ne iba꞉te kuba huiya ba꞉bo konuwatema꞉.  
\v 10 Iyo, puya꞉te ibino hiya꞉hiya꞉ kateneno dalowa꞉ ubi ipuwalo ba wapata꞉lamena Godotamo papamila꞉hale ubiha꞉ma꞉ deda꞉hana, Godote ba꞉bako tawakaluba꞉tamo kuba huiya konomamo hibinomolo kikalamema꞉ne.  
\s1 Godokono Mahilamo Ha꞉da Tabo Olamagimipino Kuba Emede Komo  
\p Numa꞉la꞉, ba꞉bi kuba ododilipi ba꞉ Godokono mahilamo ha꞉da tabo olamagimipila. Ba꞉bema꞉ ibino emede komo ba꞉ma ka꞉nala, ibi ha꞉kiya ibi hunamo wadiya꞉paa꞉latelelo Hunu Haboeno nopopi katolelamenaha꞉, iyo, iba꞉te ibi biduduputilamenaka.  
\v 11 Huiyatiya Godokono nopopino komo hiya꞉la, iba꞉te ebe tolemelo ebeno holoholo hapulu ba꞉bako kuba ukuia꞉gopi iduduputilameheno ibi kubapima꞉ akaga꞉lala꞉, mabu ibi iya꞉tawahala komopino komo anagilamelelame oko ba꞉ Godokono okola, ibino okoha꞉. Ba꞉ hibila, ba꞉bi nopopino helo konomote hopo tawakalubino helo na꞉gogolona, huiyatiya iba꞉te ba꞉be komo ba iya꞉tawaha ibi ha꞉kiya ibi kawagaminalenaha꞉.  
\v 12 A꞉iye, ba꞉ma tetelo da꞉mahila꞉halena ba꞉bi ha꞉da tabo olamagimipino komo eba ka꞉naha꞉! Iba꞉te Godokono hibi komo iya꞉tawahaheno, ebeno hidohido komoma꞉ kuba tabo ba꞉bema꞉ ga꞉lanaka. Iyo, ibi ba꞉ tumu goegoe keba ka꞉nala꞉ka꞉ ukuihino ba꞉ba ka꞉na emedehona, ba꞉bema꞉ pomolo dubate ba꞉bako goegoe gubi ipuwalo uwateholete keba ka꞉na kanakapulamenaka, ibino kuititi tete ba꞉ ba꞉ba ka꞉na kuluhukuma꞉ne.   
\p
\v 13 Mabu iba꞉te temeteme komopa꞉tamo dito dikalamenaka, ba꞉bema꞉ Godote ibino kuba huiyama꞉ temeteme iba꞉tamo kikalamema꞉ne. A꞉iye! Iba꞉te na꞉kalakalahana kateneno kuba ubi komokomo hegela tetelo hilopoheno kododilinama꞉, ba꞉bema꞉ la꞉ hibima꞉ midipino kapiyuimi poko baa꞉ naha ipuwalo iba꞉te la꞉go da꞉pola꞉namena꞉, ibi ba꞉ hido baa꞉ ipuwalo da꞉pola꞉na ba꞉bi kuba nene huiyala, iyo, ibino ododili komamo la꞉ ha꞉da kamiholamema꞉ iba꞉te konomo kalakala belawenaka.  
\v 14 Ba꞉bema꞉ numa꞉la꞉, keba tetelo iba꞉te kamenakamena ba꞉gala bohelemele dulamenaka, kuba ododi ukui kapiyate iba꞉tamo ba꞉bo penako, iyo, iba꞉te kateneno kuba ododilima꞉ iya꞉wa kokonomola. Ba꞉bene puya꞉te hibima꞉ midi ipuwalo heloha꞉ma꞉ deda꞉hana, iba꞉te ba꞉bi gugudi Saitanakono kuba emogabuimi komamo magatalenaka, ba꞉gala ibi ipuwalo ibi ha꞉kiya ibi iya꞉tulamiya꞉ ibino tepo ipuwoeno ukuiti mani emalagidole komamo kopapamila꞉halenama꞉. Ba꞉be mabuma꞉ ibi Saitanakono gugudila, iyo, Godote iba꞉tamo kuba huiya hibilo kikalamema꞉ne!   
\p
\v 15 Iyo, hibila, iba꞉te hido tuputupu gabo miya꞉pate, Biyokono gudu Ba꞉ilamako ebeno kuba ododili gabodo ebe ba꞉bana ta꞉matana. Ba꞉be dubuino komo ba꞉ma ka꞉nala, ebete mani kokonomo uwatema꞉ ebeno ubi dihatiya꞉, ba꞉bema꞉ ebete kuba ododi gabodo to ba꞉bo tupuimiya꞉.  
\v 16 Huiyatiya Godote ebeno daedae ukui koduhimima꞉ ebeno donoki-goe ipuwane lumagino tabo madodamo ebe koamo kiyahamiya꞉, ba꞉be ha꞉da tabo olamagidawate Isalaela tawakaluba꞉tamo eta kuba ododikapoma꞉.   
\s1 Godokono Mahilamo Ha꞉da Tabo Dolamagiminaka Ebete Iba꞉tamo Kuba Huiya Ikalame Komo  
\p
\v 17 Ba꞉bema꞉ numa꞉la꞉, ba꞉moi ha꞉da tabo olamagimipi dubu ba꞉ beya ma꞉pete gagalema꞉ deda꞉ ba꞉ba ka꞉nala, mabu hopo tawakaluba꞉te iba꞉godolo hido owalubi a꞉kuma꞉mena꞉. Ba꞉gala hopote gagalema꞉ deda꞉, ba꞉ba tetelo konomo huhuti da꞉watanako ba꞉bi bubuti dito kopokoa꞉tahalema꞉na꞉ huiyatiya wegolate a꞉koamene, ba꞉bi dubu ba꞉ ba꞉ba ka꞉nala mabu iba꞉te tawakaluba꞉tamo giba a꞉kikalama꞉la꞉. Ba꞉bema꞉ Godote ibi mabuma꞉ kebe du bobo konomo ya꞉lo dododilamiya꞉, ebete ibi ba꞉bamo konoelamema꞉ne iba꞉te ba꞉bolo temetema꞉go konemedehonama꞉.  
\v 18 A꞉iye! Iba꞉te hiya꞉hiya꞉ awagaha tabo komokomo ba꞉gala daedae ukui komokomo bega꞉lanaka, ba꞉gala puya꞉te Godotamo ohobila꞉ma꞉ kuba ododili ipuwane ka꞉ma꞉nomo da꞉pikula꞉, iba꞉te ba꞉bi tawakalubi ibino kateneno ubi komamo gala kuwatete Saitanakono kuba gabamo ba꞉bo magatalenaka.  
\v 19 Iba꞉te iba꞉tamo tutulu emede komo ikalamema꞉ ibi a꞉kiyalamenaka, huiyatiya ibi Godokono hibi tutu ipuwalo kemedehonaha꞉, mabu iba꞉te ibino kateneno ubi komoeno huiyaha꞉ okopima꞉ eda꞉hana. Iyo, hibila, lumagiti kebe kuba ododi komamo da꞉papamiwatana, ebete ba꞉be komoeno okodawama꞉ eda꞉na, ebegodolo tutulu emede komo puliyanomola.   
\p
\v 20 Ba꞉bema꞉ hibima꞉ midipa꞉la꞉, la꞉ hidamo! Kebe tawakaluba꞉te aeno Kodawa ba꞉gala Ka꞉ka꞉ Mula꞉lea꞉medawa Ya꞉su Kelisokono hibi komo ba iya꞉tawaha ba꞉moe hopoeno kuba ubi komone da꞉pikuliya꞉, ba꞉bene kuba ubi komate ibi gala kamatuhulameholete, iba꞉te ba꞉bi kuba ododili komamo gala da꞉kapapamila꞉halemena꞉, ibi niliya! Dopamo tetelo iba꞉te nanekela꞉mo kubadopoma꞉ eda꞉hanama꞉, huiyatiya galane ibino ka꞉ka꞉ kuititi tetelo iba꞉te kubanomoma꞉ keda꞉hama꞉na꞉.  
\v 21 Ba꞉bema꞉ numa꞉la꞉, ba꞉bako tawakaluba꞉te Godokono tuputupu gabo iya꞉tawaha꞉ma꞉ neda꞉honatale, iba꞉te kuba huiya nanekela꞉mo buwatena꞉. Huiyatiya iba꞉te Godokono gabo ba iya꞉tawaha, ebete ibi ebeno talona ipuwalo kemedenama꞉ dikalamiya꞉, iba꞉te ba꞉be tutumu gunima꞉mo dito ihilateliya꞉, ba꞉be mabuma꞉ ibino olalati komote konomoma꞉ keda꞉ma꞉ne!  
\v 22 Ba꞉ hibila, Godokono mulu ukui tabote ibino komo ba꞉ma ka꞉na hawakalimina, “Gahate kebe kuba ilina da꞉dalohomene, ebete ba꞉be atu ilina gala dito kakanalema꞉ne,” ba꞉gala eta mulu ukui tabote ba꞉ma ka꞉na goena, “Lumagiti ebeno dabi goe hidamo dukulamene, ba꞉be goete bula꞉i ipuwamo kanopegate ba꞉bo konilulugutihoma꞉ne.”   
\c 3  
\s1 Kodawa Ya꞉suti Ba꞉moe Hopamo Hibilo Gala Kakapema꞉ne  
\p
\v 1 Naeno hidohido mabuluba꞉la꞉, ba꞉moe ba꞉ netewa tetema꞉ eda꞉ nale la꞉tamo leta oelame, iyo, ba꞉moi netewa leta ipuwalo la꞉le Godokono tuputupu komokomo hidamo kemalagidolenama꞉, nale la꞉ ba꞉bema꞉ iya꞉tulamemata.  
\v 2 Numa꞉la꞉, Godokono ukui hawakalimipa꞉te kebe komate ibino gala hapuni pikulihoma꞉ dopamo dolamagiminakui, na ubila la꞉le ba꞉bi talona okopino bukoeno tabo komokomo gala hidamo na꞉kemalagidola꞉la꞉. Ba꞉gala aeno Ka꞉ka꞉ Mula꞉lea꞉medawa, ebe ba꞉ aeno Kodawala, ebeno oelamepa꞉te kebe tutumu tabo ebegodone uwatete la꞉tamo dikalamiya꞉la, wadiyala la꞉le ba꞉bi komoma꞉ atumu ukui gala na꞉kamiya꞉ta꞉la꞉.   
\p
\v 3 Ba꞉bema꞉ ba꞉moe ko komo hidamo niya꞉tawahala꞉. Ba꞉moe hopoeno kuititi tete ba tatali, komo hibima꞉ midiha꞉pa꞉te pikuliti ibino kateneno kuba ubi komamo ba꞉bo kopapamila꞉halema꞉na꞉. Ba꞉bene iba꞉te la꞉ walilatelelo  
\v 4 ba꞉ma ka꞉na koga꞉lama꞉na꞉, “Hibila꞉ka꞉, Ya꞉suti gala pema꞉ a꞉ka꞉goiya꞉? Ale ebe kuminaha꞉, kebolo kemedena? Ba꞉moe hopo tupuimi mabuni pete ba꞉ma teta꞉mo puluhuku tawakaluba꞉te dito emedehonama꞉, ba꞉gala eta hanohano komote aeno naba꞉tamo uluhukuhino iba꞉te ba꞉ dito ha꞉lahuya꞉!”   
\p
\v 5 A꞉iye! Ba꞉bako tabo ga꞉lapa꞉te iya꞉tawahala ya꞉lo tetenomolo Godote ba꞉moe hopo ba꞉gala alomo ebeno tabamo dododiliya꞉, huiyatiya iba꞉te ubihinola ba꞉be komo hibima꞉ midi. Numa꞉la꞉, Godote ba꞉moe hopo dododiya꞉, ba꞉ba tetelo ebete gagale hopo kulukulu beya ipuwane uluhukutiti beyamo ba꞉bo ododiya꞉,  
\v 6 ba꞉gala ebete eta tetelo hulama beya da꞉poemiya꞉ ba꞉be atu beyamo pakala hopo haba konomo a꞉kubahimiya꞉.  
\v 7 Ba꞉bema꞉ ebete kodakoda tabo ba꞉ma ka꞉na ihatiya꞉, ba꞉ma tetelo da꞉pola꞉na ba꞉moe hopo konomo ba꞉gala alomo iba꞉te ebeno ubi teta꞉mo modobolo kopola꞉nama꞉, ba꞉bene puya꞉te ebetamo papamila꞉ha꞉pima꞉ deda꞉hana, ebete ebeno Kuititi Hegelalo ba꞉bi tawakalubino komo anagilamelelamete ibi ba hawaminadigale ba꞉moe hopo koa꞉mo ba꞉bo kokubahimima꞉ne.   
\p
\v 8 Ba꞉bema꞉ naeno hidohido mabuluba꞉la꞉, ba꞉moe kapiya ko komo akadodala꞉. Kodawa Godogodolo kapiya hegela ba꞉ kapiya taosene gogo huiyala, ba꞉gala kapiya taosene gogo ba꞉ kapiya hegela huiyala, ba꞉ma ka꞉na gopowahi tete ba꞉gala ga꞉ga꞉nomo tete ebete kapiya tetenomoma꞉ goena.  
\v 9 Ba꞉bema꞉ puya꞉te daedae ukuilo ba꞉ma ka꞉na da꞉ga꞉lana, “Hopo kuititi a꞉kuluhukamene,” iba꞉te Kodawa Godokono komo hibilo kiya꞉tawahanaha꞉. Iyo, Godote ba꞉moe hopoeno kuititi tetema꞉ hibilo da꞉goiya꞉, ba꞉be komote ebeno ubi tetelo kopuluhukuma꞉ne, huiyatiya numa꞉la꞉, ebete hopo habanapi malemalelo emalagidolelo tete ba꞉bema꞉ ga꞉gima꞉tepana, mabu ebe ubila tawakalubi hiliyonomate ibino kuba ododili ipuwane ohobila꞉te ka꞉ka꞉ mula꞉ komo ebegodone kolawema꞉.   
\p
\v 10 Ba꞉bema꞉ hibila, Kodawa Godokono Ko Hegelalo Ya꞉suti kopema꞉ne, pilo dubuti tawakalubino ulihoha꞉ tetelo keba ka꞉na ka꞉penako ba꞉ba ka꞉na. Ba꞉ba tetelo ba꞉moe hopo ba꞉gala hopoeno ilina hiliyonomate kapimilo dito kowibohoma꞉na꞉, ba꞉bene atu tetelo alomo ba꞉gala alomoeno koko ilinate konomo diyamago kowibohoma꞉na꞉, mabu helonomo koete ba꞉moi ilina hiliyonomo dito kohawaminadigalema꞉ne.  
\v 11 Iyo, Godote ba꞉moi ilina hiliyonomo ba꞉moe gabodo kohawaminadigalema꞉ne, ba꞉bema꞉ wadiyala la꞉ hibima꞉ midipa꞉te la꞉eno emede ipuwalo talonapima꞉ eda꞉halo ebe kapiyatamo na꞉papamila꞉hanakuya꞉la꞉,  
\v 12 ba꞉gala wadiyala la꞉ la꞉eno hidohido ododili komodo ebe nowalonala꞉ ba꞉be tetete tiyonomolo kopema꞉. Ba꞉ hibila, Godokono Ko Hegelalo helonomo koete alomo ba꞉gala alomoeno koko ilina kapimilo kupula꞉digalema꞉ne,  
\v 13 huiyatiya kalakala konomola, ba꞉ba tetelo ebete a hibima꞉ midipi ebeno uli hopo haba ba꞉gala uli hunu haba a ba꞉bamo komagatoema꞉ne, ba꞉bolo ebeno tuputupu emede komo kapiyate kitanama꞉ne. Numa꞉la꞉, ebete dopamo ba꞉be hido komo ododima꞉ hibilo da꞉goiya꞉, ale ba꞉be komoeno tete ba꞉bema꞉ latiminama꞉.   
\p
\v 14 Ba꞉bema꞉ naeno hidohido mabuluba꞉la꞉, la꞉ ba꞉be Ko Hegela ba latimina, wadiyala la꞉eno ukui konomamo ba꞉ma ka꞉na nihatenakuya꞉la꞉, la꞉le Godokono holoholo hapulu ba la꞉mota꞉hana la꞉eno hiliyonomo ododili komo ipuwalo eta kapiya deha꞉potonomo kubate a꞉kitanamene. Iyo, la꞉le ebeno tataba ipuwalo ba emedehona, modoboha꞉ komopa꞉te la꞉eno eta kapiya ododi komo kubama꞉ ga꞉la.  
\v 15 Ba꞉gala aeno Kodawate tiyolo puluhukuhino, la꞉ ba꞉moe komo nemalagidoluya꞉la꞉ ebete tete na꞉ga꞉gima꞉tepana komo hopo habanapa꞉te ibino ka꞉ka꞉ mula꞉ komo kolawema꞉.  
\p La꞉ iya꞉tawahala Poloko ba꞉ hibima꞉ midipi ipuwalo aeno hido naniwi etala, ba꞉bema꞉ ebete dopamo eta leta la꞉tamo poemelo atu tabonomo beka-olamagi. Iyo, Godote kebe mulu ukui ebetamo dikamiya꞉ ebete ba꞉be mulu komamo la꞉ ya꞉lo owalubilia꞉ta,  
\v 16 ba꞉bema꞉ hibila, nale kebe tabo dolamagimo, Polokono hiliyonomo leta ododili ipuwalo ebete aeno Kodawoeno pe komoma꞉ ba꞉ atu tabo beka-olamaginako. Na iya꞉tawala, komo tetelo ebeno tabo komokomoeno ipuwa kodakoda hibinomola, ba꞉be mabuma꞉ komo daedae ukuia꞉gopi ba꞉gala hibima꞉ midi ipuwalo ukui gagagagama꞉ deda꞉hana, ba꞉bakobako tawakaluba꞉te ebeno taboeno ipuwa ha꞉da amihoho gabodo hawakalilamenaka. Numa꞉la꞉, iba꞉te atu gabodo Godokono Bukoeno komo tabo komokomoma꞉ tawakalubi kubamo iya꞉tulamenaka, ba꞉be mabuma꞉ ibi ha꞉kiya ibino ukui ba kubahilamena ibino olalati komote hibilo kopema꞉ne.   
\s1 Pitate Leta Kuititi Hapulu Tabo Dolamagiya꞉  
\p
\v 17 Naeno hidohido mabuluba꞉la꞉, la꞉le ba꞉bakobako tawakalubino ha꞉da amiho komo dopamo iya꞉tawahuya꞉mata, ba꞉bema꞉ la꞉ hidamo! Puya꞉te Godokono tutumu tabo da꞉wakalaminaka, na ubihinola iba꞉te ibino ha꞉da amiho komamo la꞉ ba magatale, la꞉le ba꞉ma tetelo kebe hibi gabodo olalatihino da꞉tolamenama ba꞉be gabote la꞉godone alatidi.  
\v 18 Ba꞉bema꞉ la꞉ aeno Kodawa ba꞉gala Ka꞉ka꞉ Mula꞉lea꞉medawa Ya꞉su Kelisokono komo ba iya꞉tawahana ebeno malemale ipuwalo napepehonala꞉. Wadiyala awagaha komote ba꞉ma tetelo ba꞉gala emedena emedena tetelo ebegodolo nitanamene!  
\p Ba꞉moe ba꞉ naeno tabo kuititila. Ba꞉ba꞉la.