\id REV Revelation NT0010.RE - Kanite N.T. Gibson/McCarthy 1-Jul-02 
\h Leveleseni 
\toc1 Leveleseni 
\toc2 Leveleseni 
\mt1 Leveleseni  
\ip Mani kemona agimo aepaꞋa Kanite kefina mage huno hane “Fala kimainea yana alino fufute maleno ali falote humalene.” huno humaine. Mani avona haenagama falote hisia yana Yisasi KalaisiꞋa himona kana yapi ali falote huno Yonina ave-ligeno YoniꞋa kae-malenegeta nehavune. YoniꞋa ani kanafina kosuna leteno nagola ti amuꞋnopi hanea kumate kina nopi maineno mani yaꞋyaga himona kana yapi ageteno kae-malene. YisasiꞋa faliteno hetino ikapinaga haitegeno YoniꞋa sikisiti faefuꞋa (65) kafu agava maineno Leveleseni kea kae-malene.  
\c 1  
\s1 Mani kemona aepaꞋamoꞋa maꞋa humaine.  
\p
\v 1 Nagaya YoniꞋnae Yisasi KalaisiꞋa naveligeꞋna ageteꞋna mani kea kaeꞋna tamahapaigahe nehue. Nayona mani kemoꞋa fala-kino haneanagino Anumaya KotiꞋa ani kanamoꞋa aupaꞋa falote hisia yana Yisasi Kalaisina agaiꞋa aliꞋya veaꞋne amave-lisiafene huno Yonina ave-ligeno kae-malene. YisasiꞋa ensole kanoꞋa hutegeno nagaya agai aliꞋyama neꞋalua kanoa, Yoninile, eaꞋamo mani yaꞋyaga me naveli-maine.  
\v 2 Me naveligeꞋna age-mainoa yafeꞋene Anumaya Koti kene Yisasi Kalaisi humainea kene aliꞋna tamage huꞋna tamahanepauve.  
\v 3 Ma avopima kae-maloa kea ago aupaꞋa falote hisia yafe aune laga huno humainea kema hapaliꞋya havisaya veaꞋnene haviteꞋya akaveꞋma malesaya veaꞋnene tusiꞋa muse hugahae.   
\s1 YoniꞋa seveniꞋa (7) kumate hanea mono note avona kaeno amamine.  
\p
\v 4 Nagaya YoniꞋnae Esia kotega seveniꞋa (7) mono noma hanea veaꞋmogatamale mani avona kaeꞋna nelamamue.  
\p Anumaya KotiꞋa nayona maineanagino menienena maineanagino haenagaꞋa maisia kanogino agaiꞋa kava yagai-mainea siamo aulega seveniꞋa (7) AvamuꞋmoꞋya hetiꞋya mainayanagiꞋya kayone hisaya yaꞋamiene tamaipa falu hisia yaꞋamiene tamamisae.  
\v 5 Tamamisageno Yisasi KalaisiꞋa fatago huno Anumaya Koti kema hamapai-mainea kanomoꞋa fali-mainaya veapitila uhagote-lateno heti-maineanagino mukiꞋa veaꞋnema fali-mainesafiti hetisaya katia valilatene. MukiꞋa mopafima mainaya sauve vayaꞋmogamina sauveꞋamimoꞋa agaiꞋage maineanagino kayone hisia yamaꞋaene tamaipamo falu hisia yamaꞋaene tamamisie. Tagaifena hau ayamopafi haigeno agaiꞋa kolamaꞋa ailaki-talenea yateti mukiꞋa kefo yatimoꞋa aigagilateneanagino agola ali kalu hetalene.  
\v 6 He-taleneanagino Anumaya KotiꞋa kava yagailatesia yapi tavaleno tategeta mainonanagita tagayama Nelafa Anumaya Koti aliꞋyama neꞋalita agima alisaga huta musema hutesunafene huno hulatene. Hulateneanagita mukiꞋa kanafina agai agia alisaga hisunageno tokiyaꞋage hale yamaꞋamoꞋa agola hanege hanege huno hanesie. Tamage.   
\p
\v 7 Ageho YisasiꞋa siate maiteno egahigi mukiꞋa amakaveꞋnoma huteteꞋya augafafima kevema aye-mainaya veaꞋnene mukiꞋa ma mopafima mainaya veaꞋmoꞋyaene ageteꞋya tusiya huꞋya hamau huteꞋya avi tegahae. E, ani yana tamage huno falote hugahie. Tamage.   
\p
\v 8 Ala Anumaya KotiꞋa mage huno humaine “Nagaya nagaiꞋniꞋa mukiꞋa tokiyamona aepaꞋa mainoanagiꞋna mukiꞋa yatela kava yagai-mainoafe alivayayesua kanoa tamage huꞋna mainoe. Nayo kanafina mainoanagiꞋna menia mainoanagiꞋna haenagaꞋa maigahue. TusiꞋa tokiyaꞋnia hanea kava kano mainoe.” huno hu-maineane.   
\s1 YoniꞋa Yisasina age-maine.  
\p
\v 9 Nagaya YoniꞋnae neputamimoꞋna tamakaiꞋenena YisasiꞋene ailokaeta mainona yafe tusiꞋa kana yaꞋene tagata aiya yaꞋene falote hianagi Anumaya KotiꞋa kava yagailategeta mailava huta tokiyaꞋage huta mainone. Nagaya Anumaya Koti kene YisasiꞋa tagaiꞋma hulatenea mono kene huhaleꞋna hua yateti navaleꞋya Patimosia ti amuꞋnopi hanea kumate kina hunatageꞋna mainoe.  
\v 10 Mainogi nago SotaꞋyupa Alu Aotage AvamuꞋmoꞋa tokiyaꞋage huno natafa higeꞋna nehavugeno nakavelagati nagola ala kegefamoꞋa ufema nehaya avamete huno agea aigeꞋna havimainoe.  
\v 11 Ani kemoꞋa mage huno humaine “MukiꞋa yama agesana yana avopi kaeteka atalegeno seveniꞋa (7) kumate hanea mono note veatega vino. Efesusiene Simenaene Pegamumuene Taiyatailaene Satisiene Filatelefiene LeotisiaꞋene vino.” huno humaine.   
\p
\v 12 HigeꞋna kema nahapaiya kanoma agesuafene huꞋna maiyahae huꞋna agoana seveniꞋa (7) lamua kanileta yafateti talo humale lamua hanegeꞋna age-mainoe.  
\v 13 Agoa lamuyagamo amuꞋnopina nago kanoa, ikapinagati emainea kanoa vayaꞋmo atenea nafaꞋnemo augafa kana kanoa hetino mainegeno ayaꞋaya kenamoꞋa aiyalega vai-talegeno tavigeno kanileta yafateti talo humale amuꞋnofila aigagino haifiꞋyafale hu-malenegeꞋna agoe.  
\v 14 Agogeno ayolagefamoꞋa efeꞋage huno sipi sipimo ayolagefaleti talo humale nofi kana huteno efeꞋage sia kana nehigeno aulagamoꞋa ata nefemoꞋma hia avamete humaine.  
\v 15 Higeno aiyamoꞋa nagola atafima kae-malageno teno tokiyaꞋage huno hale yamaꞋaene kanileta yafa kana nehigeno agema aiya agemoꞋa paugegefa nehigeno ala timo agemoꞋma neꞋaiya avamete kava huno aimaine.  
\v 16 Ayapina seveniꞋa (7) kaꞋnefi atafa hu-linegeno avayafitila tole kaiyaga aveꞋneꞋne naepe kaꞋyona anikofi-linegeno augosamoꞋa yagemoꞋma hia kava huno aigalu galu huno aivasa humaine.  
\v 17 Aigalu galu higeꞋna neꞋageꞋna fali-mainea vaya kana huꞋna aiyafi nagoꞋya aye-mainogeno tamaga ayana naugafale maleno mage huno hie “Kolia ohuo nagaya mukiꞋa tokiyamona aepaꞋa mainoanagiꞋna nagaya uhagoteꞋna maiteꞋna haenagalafana maiteꞋna huꞋna mainoa kano mainoe.  
\v 18 Nagaya nahaimuꞋene kano mainoe. Nayona ago fali-mainoanagi ago hetiꞋna haegafa huꞋna agola mukiꞋa kanafina maige maige huꞋna mainoanagiꞋna veaꞋma nefalia yaꞋene fali-mainaya veaꞋmoꞋya mainaya kumate ki nofitela ali-lineꞋna ani yapitiꞋma amavaleꞋna amatalesua himamuꞋnia hane.  
\v 19 Haneafe kagaya menima falote higeka agana yaꞋene haenagama falote hisia yaꞋenena avopi kae-malo.  
\v 20 SeveniꞋa (7) kaꞋnefiꞋene seveniꞋa (7) kanileta yafateti talo humalenaya lamuenena tamaga nayapima hanegeka agana yamoꞋa falaki-mainea yamo aepaꞋa kahapaigahue. SeveniꞋa (7) kaꞋnefiꞋmoꞋa maꞋa humaine seveniꞋa (7) kumateꞋma Yisasife haviꞋya melitalu nehaya veate kava vayafe* humaine. SeveniꞋa (7) lamumoꞋa ani seveniꞋa (7) mono noꞋyagafi Yisasife haviꞋya melitalu nehaya veafe humaine.”   
\c 2  
\s1 Efesusi mono note mainaya veatega ma kemoꞋa umaine.  
\p
\v 1 Efesusi mono note mainaya veate kava kanohena* mage huka kao nagaya tamaga nayapina seveniꞋa (7) kaꞋnefi atafa hulineꞋna seveniꞋa (7) kanileta yafateti talo humalenaya lamumo amuꞋnopi ute ete nehua kanomoꞋna mani kea tamahanepauve.  
\v 2 Nagaya tamakai auꞋava yatamia ago age-mainoe. TusiꞋa kasageke-voke hutama aliꞋyama neꞋaliya yafeꞋene mailava hutama tokiyaꞋageꞋma hutama nemaiya yaꞋenena ago age-mainoe. Kefo yama nehaya veafena “HavigegeꞋyama nehaya yamo otahaiya vayala mainayanagita tamakai kea ohavigahune.” hutama nehae. NehageꞋya ani vayaꞋmoꞋya havige huꞋya “Tagayaenena Aposolo vaya mainone.” huꞋya nehayanagi tamakaya keꞋamia ago havitama fako hutama haviyana “HavigegeꞋya maiꞋya nehaya vaya mainae.” hutama nehae.  
\v 3 Tamakaya nagai nagima alilinageꞋya ali haviyama hulamatayanagi kasalola otamahaenegi lokiya vaitama mainaya yafena ago tamake-mainoe.  
\v 4 NaꞋa nehayanagi nagoꞋa kavala havi kava nehae. Hagotetama nagai kea havitama lamakupi maletama tamakuꞋa kanaleꞋya hutama namitetamagi menia ani yana ago neꞋataletama ali hataga huligeno osi nehie.  
\v 5 Nayoma tamahau tamayamopafi tamahau-mainea yafena tamakesa havi havi hiho. Menia ago neꞋataletama asaga hulavi-mainagi tamakuꞋa aiyahae hutama nagoꞋene eheꞋma humainaya kavala etetama hiho. TamakuꞋama aiyahae ohisageꞋna nagaya esuaꞋamoꞋna lamutamia meliꞋna atalegahue.  
\v 6 Atalegahugi tamakaya nagola kanale auꞋava yana ago hageꞋna age-mainoe. Tamakaya Nikolasi mono kema nehaviꞋya amaugafa age hamaꞋyema nehaya yafena tusiꞋa lamaipa kafa he neꞋamatae. Nagayaenena aniꞋama nehaya kavaꞋamihena naipa kafa he neꞋamatoe.   
\p
\v 7 Nagi tamakesama hanesimogatama AvamuꞋmoꞋma Yisasi kema haviya melitaluma nehaya veaꞋmogamifema hia kea haviho. “NagoꞋa veaꞋmoꞋya SataniꞋene tuma huꞋya agasesayana Anumayamo kumate ikapinaga hanea yosa, agola maige maige hisaya hamaimu amamisia yosamo alaga ‘Neho.’ huꞋna amamisugeꞋya negahae.” huno humaine.   
\s1 Simena mono note mainaya veatega ma kemoꞋa vie.  
\p
\v 8 Simena mono note mainaya veate kava kanohena* mage huka kao nagaya uhagoteꞋna maiteꞋna haenagalafana mainoe. Fali-mainofitila ago eteꞋna hetiꞋna mainoe.  
\v 9 Tamakaya kana yapi mainetama mukiꞋa yatamia omale veaꞋne mainayanagi Anumaya KotiꞋa kanale yana ago tamamigeꞋna nagaya ago age-mainoe. NagoꞋa veaꞋmoꞋya “Tagaya Yuta veaꞋne mainone.” huꞋya nehayanagi Yuta veaꞋnea omainagi Satani anaga maineꞋya huhaviya hu-lamataya yana nagaya ago age-mainoe.  
\v 10 Tamakata aisia yana aligahayanagi kolia ohiho. Haviho SataniꞋa aye lamavataga hisigeꞋya nagoꞋa veaꞋmogatamina nofila hulamategahae. TeniꞋa (10) kanafi* ani kana yaꞋene tamakata aisia yaꞋenena aligahayanagi havitama lamakupi malenaya yana atafa hu-linetama falisageꞋna ani yateti kanale miyana anonatamia maige maige hisaya tamahaimula tamamigahue.   
\p
\v 11 Nagi tamakesama hanesimogatama AvamuꞋmoꞋma mono note mainaya veaꞋmogamifema hia kea haviho. “SataniꞋenema tuma hutama agasesaya veaꞋmogatama tole yupama etetama falisaya yamoꞋa, hani yapima tegelege nehia atafina visaya yamoꞋa, ali haviya hu otamategahie huꞋna nehue.”   
\s1 Pegamumu mono note mainaya veatega ma kemoꞋa umaine.  
\p
\v 12 Ma kemoꞋa Pegamumu mono note mainaya veate kava kanohena mage huka kao tole kaiyaga aveꞋneꞋne nehia naepe kaꞋyona alilinoa kanomoꞋna mage huꞋna nehue.  
\v 13 Tamakaya SataniꞋma mainea siamo hanea kumate mainageꞋna ago tamake-mainoe. Ani kumate mainayanagi nagai nagia atafa hulitama tokiyaꞋage hulinageno nago kanoa, AtipasiꞋa, tamakaiꞋene maineanagino kolia ohunegi mukiꞋa kanafina efi efi huno Yisasi kea huhaleno nehigeꞋya atafa huꞋya ani kumate hayageno fali-maineanagi ani kanafiꞋenena tamakaya nagia atafa hulinetama nagaifena havitama tamakupi malenaya yana oꞋatalenae.  
\v 14 OꞋatalenagi nagoꞋa kefo yana nehageno naipamoꞋa haviyana nehie. Tamakai amuꞋnopina nagoꞋa veaꞋmoꞋya PalamuꞋma humainea kea atafa huꞋya akave nemalae. Nayona PalamuꞋa Isaleli veaꞋmoꞋya asaga hu lavisae huno Palakina mage huno hapai-maine “Mage huka hamapaiyo ‘Amayateti talo humalenaya afa yafe ‘Anumayati maine.’ hutama amiya kavela nenetama kumai kavala hiho.’ huka amaipa ayesana kea hamapaiyo.” huno humaineane.  
\v 15 NaꞋa hianagi tamakaipitila nagoꞋamoꞋya NikolasiꞋma hia mono kemona akave nemalae. Ani kemoꞋa PalamuꞋma hia avamete humainea ke.  
\v 16 Ani kefo yafena tamakuꞋa aiyahae hutama nagoꞋene ohisaya tamakesa haviho. Aiyahae ohisageꞋna nagaya osi kana kanoꞋa maiteꞋna tamakaitela esuaꞋamoꞋna navayafima hanea aveꞋneꞋne naepe kaꞋyoteti amakaiꞋenena tua hugahue.   
\p
\v 17 Nagi tamakesama hanesimogatama AvamuꞋmoꞋa mono noteꞋma neꞋvaya veaꞋmogamifema hia kea haviho. SataniꞋenema tuma huꞋya agase-mainesaya veaꞋmogamina falakino hanea kavela, manae huꞋya nehaya kavela neꞋamamiꞋna nagola efeꞋage yafatela hamaote hamaote haegafa amakima kae-malenoa yafana amamisugeꞋya nagoꞋa veaꞋmoꞋya ani amakiyaga oꞋagegahagi agaiꞋa yafama alisimoꞋa agaiꞋage agegahie.   
\s1 Taiyataila maineꞋya mono note neꞋvaya veatega ma kemoꞋa umaine.  
\p
\v 18 Taiyataila maineꞋya mono noteꞋma neꞋvaya veate kava kanohena* mage huka kao nagaya Anumaya Koti nafaꞋnemonia naulagamoꞋa ata nefeꞋmo hia kava humainegeno naiyamoꞋa haesa yafamo vagaꞋyo vagaꞋyo hia kava humainegeꞋna tokiyaꞋage huꞋna heti-mainoa kanomoꞋna mani kea nehugi kao.  
\v 19 Nagaya tamakai auꞋava yatamia ago age-mainoe. Nagaifena tamahau tamayamopafi nelamahaigetama havitama tamametiti hutetama nagai aliꞋyama aliyana mailava hutama tokiyaꞋage humainageꞋna tamake-mainoe. Menima nehaya yamoꞋa hagotetama humainaya yamona ago agasetama kanale kava nehae.  
\v 20 Nehayanagi nagoꞋa kefo yama nehagenoꞋa naipamoꞋa haviya nehie. Nago aꞋmo agia YesepeliꞋe mage huno humaine “Nagaya Anumayamo aune a mainoe.” huno havigea nagai aliꞋya veaꞋmogamina ayemavataga huno mage nehie “Kumai yana nehutama amayateti talo humalenaya afa anumayamoma amiya kavela neho.” huno humaine.  
\v 21 HigeꞋna nagaya ani aꞋmofena “Kumai yakahena kaguꞋa aiyahae huka nagoꞋene ohisana kagesa havio.” huꞋna agava mauvanagi aguꞋa aiyahae nohie.  
\v 22 Aiyahae nohiafe nagaya tusiꞋa agata aisia kalia neꞋamiꞋna ani aꞋenema kumaima nehaya veaꞋnene kefo yaꞋamihema amakaye huꞋya amakuꞋama aiyahae ohisageꞋnahena tusiꞋa kana yana amamigahue.  
\v 23 NeꞋamamiꞋna ani aꞋmo kema akave nemalaya veaꞋmogamina hamaesugeꞋya faligahae. FalisageꞋya mukiꞋa Anumaya Koti anagaꞋmoꞋya ageteꞋya nagaya veaꞋmogami amaku amakesa tamagelegatiꞋma huꞋna fako nehua kano mainoa yafena havigahae. MukiꞋa veaꞋmogatama nehaya kavala ageteꞋna agoꞋma humainaya yateti anonatamia tamamite lamamite hugahue.   
\p
\v 24 Hugahugi nagoꞋa Taiyataila mainaya veaꞋmogatama ani aꞋmo kea akave omaletama Satani kema falakino hanea kema ohavinaya veaꞋmogatama nagoꞋa kahegi kea tamahaopaigahue.  
\v 25 Tamahaopaigahugi mukiꞋama atafa hulinaya kea atafa hutama tokiyaꞋage hu-linetama maime maime neꞋvigeꞋna nagaya eteꞋna ano.  
\v 26 SataniꞋene tuma huꞋya agaseꞋya nagai kema akave maleme maleme haisaya veaꞋmogamina nagaya tokiyaꞋnia amamisugeꞋya mukiꞋa veatela kava yagaigahae.  
\v 27 NenafaꞋa tokiya namigeꞋna kavama neꞋyagauva tokiyaꞋnia aniꞋa huꞋna tamamisugetama tokiyaꞋage hutama kava yagaigahae. VeaꞋmoꞋya mopa susufaneleꞋma aiko neligeno aposino yagi-yagipe nelavia avamete kava huꞋya yagaigahae.  
\v 28 Kava yagai-mainesageꞋna natema evaꞋyi nehia kaꞋnefiꞋmoꞋa tusiya huno aivasa huno hale yamaene kaꞋnefila tamamigahue.   
\p
\v 29 Nagi tamakesama hanesimoga-tama AvamuꞋmoꞋa mono note neꞋvaya veaꞋmogamifema hia kea haviho.   
\c 3  
\s1 Satisi maineꞋya mono note neꞋvaya veatega ma kemoꞋa umaine.  
\p
\v 1 Satisi maineꞋya mono note neꞋvaya veate kava kanohena* mage huka kao nagaya seveniꞋa (7) Anumayamo AvamuꞋene seveniꞋa (7) kaꞋnefiꞋyagaene nayapina atafa hulinoa kanomoꞋna mani kea tamahanepauve “Nagaya tamakai auꞋava yatamia ago tamake-mainoanagiꞋya veaꞋmoꞋya tamakaifena ‘Agola maige maige hisaya hamaimu hanea veale.’ huꞋya nehayanagi tamakaya nagai kema atalaya yafena ago fali-mainae.  
\v 2 Faligahe hayanagi tamauꞋma fae-maiya yana neꞋataletama hetitama kanale auꞋava yatamia ali lokiya vaiho. Nagaya agoana auꞋava yatamimoꞋa AnumayaniꞋamo aufina fatago ohunae.  
\v 3 Ohuneanagitama agoꞋma havi-mainaya mono kehena tamakesamoꞋa hao hinagetama akave maletama kefo yatamihena tamakuꞋa aiyahae hiho. Fae-mainesaletiꞋma he otisayana nagaya ‘Omegahie.’ hutama hisaya kanafi musufa vaya kana huꞋna esuaꞋamoꞋna kefo yamo anonatamia me lamamigahue.  
\v 4 Me lamamigahuanagi nagoꞋa Satisi mainaya veaꞋmoꞋya kanaleꞋya hageno amakuꞋamoꞋa oniꞋyaꞋagela ohunea veaꞋne mainayanagiꞋya efeꞋage kenaꞋamia faimatesugeꞋya amatesia kava huꞋya nagaiꞋene ailokaeꞋya vaiyegahae.  
\v 5 Vai neꞋayesageꞋna SataniꞋene tuma huꞋya agase-mainaya veala efeꞋage kena faimategahue. Maige maige hisaya hamaimu hanesia veaꞋmogami amakima kae-malenoa avopi ani veaꞋmogami amakia haneanagiꞋna aye ohananegahuanagiꞋna amakai amakia Nenafa auleꞋene ensole vea amauleꞋene huhaleꞋna hugahue.”   
\p
\v 6 Nagi tamakesama hanesimoga-tama AvamuꞋmoꞋa mono note neꞋvaya veaꞋmogamifema hia kea haviho.   
\s1 Filatelafia maineꞋya mono note neꞋvaya veatega ma kemoꞋa umaine.  
\p
\v 7 Filatelafia maineꞋya mono note neꞋvaya veate kava kanohena* mage huka kao nagaya Anumaya KotiꞋna alu aotage kanogiꞋna tamagelafa nehue. TevitiꞋma kava yagai-mainea ki nofila nagaya ago aliꞋna fita yaki-malenoanagino nago kanomoꞋa eteno alino fita okigahie. Nagaya fita ago aliꞋnama ki-malesugenoꞋa nago kanomoꞋa alino oꞋyakigahie.  
\v 8 Nagaya mage nehue tamakai auꞋava yatamia ago age-mainoe. Ageho tamakai tamaufina fita ago yaki-malogeno visaya fiamoꞋa hane. AgoꞋma yaki-malenoa fita nago kanomoꞋa eteno alino okigahie. Tamakaya osi kanoꞋa tokiyatamia hanegetama nagai kea akave nemaletama nagai nagia ali fala okigeꞋna age-mainoe.  
\v 9 Haviho nagoꞋa veaꞋmoꞋya mage nehae “Isaleli veaꞋne mainone.” huꞋya havigea nehayanagi Satani veaꞋne mainayanagiꞋna nagaya amakaila aliꞋna tamaiyafinaga amatesugeꞋya “Ago tagase.” huꞋya ape humaineꞋya nagaya tamakaifema nayamopafima nenahaiya yana amavelisugeꞋya agegahae.  
\v 10 “Kana yapina tokiyaꞋage hutama mailava hutama maiho.” huꞋnama hu-mainoa kea ago akave malenagi mukiꞋa ma mopafi veaꞋmogamina avameꞋma humatesua yapina tusiꞋa kana yamo falote hugahianagiꞋna tamau vaisugetama tamakaya ani yapina omaigahae.  
\v 11 Nagaya naiyayeꞋna aupaꞋa egahugi. Atafa hulinaya kea atafa hutalako hulisayana nagoꞋa veaꞋmoꞋya tamamisua kanale yana tamahaofalegahae.  
\v 12 Atafa hulineꞋya SataniꞋenema tuma huꞋya agase-mainaya veaꞋmoꞋya no yosamo avamete kana hageꞋna Anumayamo mono nopi ayeꞋna ali hetimatesugeꞋya maigahayanagiꞋya eteꞋya oꞋutafa huꞋya oꞋugahayanagiꞋna amaugafale AnumayaniꞋamo agiene AnumayaniꞋamona ikapinagati esia kumaꞋmo agia, haegafa Yelusalemu kumaꞋmo agiene nagaila haegafa nagiene amaugafale kaemategahue.   
\p
\v 13 Nagi tamakesama hanesimogatama AvamuꞋmoꞋa mono note neꞋvaya veaꞋmogamifema hia kea haviho.   
\s1 Leotisia maineꞋya mono note neꞋvaya veatega ma kemoꞋa umaine.  
\p
\v 14 Leotisia maineꞋya mono note neꞋvaya veate kava kanohena* mage huka kao nagaya kelamage kemona aepaꞋa maineꞋna efi efi huꞋna mukiꞋa kanafina kea huhaleꞋna nehue. Nagaya mukiꞋa Anumaya KotiꞋa eheꞋma taloma humalenea yamona aepaꞋa mainoanagiꞋna mani kea mage huꞋna tamahanepauve.  
\v 15-16 Nagaya tamakai auꞋava yatamia ago age-mainoe. Nagai kemona tamakaveꞋnona ohunayanagi tamakupina yasiꞋage humainegeno amukoa nohie. Nagai kemoꞋa tamakupina amukoꞋageꞋma hu-maineleꞋasina musena huleꞋasinagi nagai kea osiꞋa tamakupina malenageno muvalisua naipa nehigeꞋna nagaitegatila tamavaleꞋna hagaꞋyu hu-lamatalesua nagesa nehie.  
\v 17 Tamakaya mage hutama nehae “KasagoꞋya afenoꞋyatia hai ali-mainone. Nago ya kanoꞋahena aupa nohune.” hutama nehayanagi tamakaya havige nehagi haviyatafa hutama mainayanagiꞋya veaꞋmoꞋya tamakeꞋya kalagi ai-lama-tesaya avamete hutama mukiꞋa yafena aupa hutama mainageno tamaulagamoꞋa asu hu-mainegetama tamaugafa alapaꞋage veaꞋne kana hutama mainaya yafena tamakaitamia noꞋagae.  
\v 18 NaꞋa humaineafe mani kea tamahanepauve mone afenoꞋene veaꞋnema maisayafena nagaitegati kanileta yafana, atafi kae-malenaya yafana me miya hiho. Tamaugafa alapaꞋage mainageno tamakaye hisia yama aiso hisayafe efeꞋage kena me miya hutama failiho. Tamaulagafima falesaya masavena tamamisugetama falesageno tamaulagamoꞋa kanale hinagetama agegahae. Ani yaꞋyaga nagaiteti me miya hiho.  
\v 19 Nagaya nayamopafima nahaiya veaꞋmoꞋya nagai kema haviꞋya akave malesaya yafena kaꞋyo kevea neꞋamamuafe aluya hutama lamakesa nehavitama kefo yatamihena tamakuꞋa aiyahae hutama “NagoꞋene ohugahune.” hutama hiho.  
\v 20 Ageho nagaya fiate heti-maineꞋna tamakaifena kea nehuanagitama ani kema nagoke nagokeꞋmogatama havitetama fitama yaki-natesayana haifaleꞋna tamakaiꞋene tokaeta maineta kavela negahune.  
\v 21 NagoꞋa veaꞋmoꞋya SataniꞋene tuma huꞋya agasesaya veafena mage huꞋna humategahue “Nagaya SataniꞋenena tua huꞋna agaseteꞋna NenafaꞋma kava yagai-mainea sialela agaiꞋene me lokaeꞋna mainoa avamete hutama nagaiꞋene kava yagaigahae.” huꞋna humategahue.   
\p
\v 22 Nagi tamakesama hanesimoga-tama AvamuꞋmoꞋa mono note neꞋvaya veafema hia kea haviho.   
\c 4  
\s1 Ikapinaga maineꞋya Anumaya Koti agia alisaga nehae.  
\p
\v 1 YoniꞋa mage huno hie ani kemoꞋa haꞋnoma higeꞋna agoana ikapina nago fita yaki-malenea fiana age-mainoe. NeꞋagogeno hagoteꞋnama ufema nehia augafa agema aigeꞋna havua augafa kea nagoꞋene havuana mage huno hie “Male ehaigeꞋna mukiꞋa yama anileꞋma falote hisia yana kavelino.” huno hie.  
\v 2 Higeno aupaꞋa Anumaya Koti AvamuꞋmoꞋa tusiya huno natafa higeꞋna agoana ikapinaga nago sia agogeno ani siale nago kanoa maine.  
\v 3 Ani sialeꞋma mainegeꞋna agoa kanomo augafamoꞋa tusiya huno aihaesa huno alave alave huteno aihalegeꞋna age-mainoe. Agogeno nagoꞋma alave alave hiana yosa haisa fulagenaꞋmoꞋa sauve kanomo siale aigagi-maineno aihanelegeꞋna age-mainoe.  
\v 4 NeꞋagogeno tueti foꞋa (24) sia ani sauve kanomo siale maigagi-mainageꞋya tueti foꞋa (24) kava vayaꞋmoꞋya ani siayagale mainae. MaineꞋya efeꞋage kenaꞋamia fai-lineꞋya amanutela sauve veaꞋmoꞋya kanileta yafateti talo humale tumano kuꞋma vai neꞋaliya avamete huꞋya vai-linae.  
\v 5 Anumaya Koti sialeti aulumaya alino monagemo huno alu ge lu gema aiya yamoꞋa anifiti falote humaine. Anumaya Koti siamo aulega seveniꞋa (7) lamua aivasa humaine. Ani lamua Anumayamona seveniꞋa (7) AvamuꞋamoꞋya mainae.  
\v 6 Mainageno Anumaya Koti siamo aulega nago tikotuna hanegeno telelalayamaꞋa tamage huno omalegeno galasimoꞋma alave alave hia avamete humaine. FoꞋa (4) hamaimuꞋene anagaꞋmoꞋya hetiꞋya ani siale maigagiꞋya mainageno amaulaga kasagoꞋya haneteno amaulegaene amakavelagaene alino anoꞋvai-maine.  
\v 7 Hagote haimuꞋene kanomoꞋa kaveꞋage afua, laiyoni afu kana higeno anile haimuꞋene kanomoꞋa pulamaka kana higeno anile haimuꞋene kanomona vaya augosa kali-maigeno anile haimuꞋene kanomona anale haleno vai neꞋayea haki kana nama kana humaine.  
\v 8 Ani foꞋa (4) hamaimuꞋene anagaꞋmoꞋya sikisiꞋa (6) amagekoꞋna hanegeno kasagoꞋya amaulagamo amaugafamona agupilegaene amagekoꞋnamona afepinagaene alino vai-maine. Vai-mainageno felugaene kegeꞋene mage huꞋya huge huge nehae  
\q1 “Anumaya KotiꞋa mukiꞋa tokiyamona aepaꞋa maineno kefo yana nohigi tusiya huno alu aotage kano maine. NayoꞋene meniene maineanagino haenagaꞋa maisia kano maine.” huꞋya humainae.   
\m
\v 9-10 HamaimuꞋene anagaꞋmoꞋya sauve kanomo siale maiya kanoa, agola maige maige nehia kanomofena, mage huꞋya hae “TokiyaꞋage hale yamaꞋa hanea kagia alisaga nehuta tusiꞋa muse nehune.” huꞋya nehageꞋya ani tueti foꞋa (24) kava vayaꞋmoꞋya sauve kanomo siale maiya kanoa agola maige maige nehia kanomo aule mope huꞋya agia alisaga hugahe ali-mainaya kanileta yafateti talo humale tumano kuꞋamia aliꞋya ani siamo aiyafi mo malae.  
\v 11 Mo nemaleꞋya mage huꞋya hae  
\q1 “Vaeha tagai Anumaya Kotigae kagaya mukiꞋa yana ‘NaꞋa huꞋna talo hugahue.’ huka humainanafe mukiꞋa yana talo hu-malanageno haneafe tagaya tokiyaꞋage hale yamaꞋaene kagia alisaga nehuta tokiyaꞋage kano mainane huta kagia alisaga nehune.” huꞋya hae.  
\m HageꞋna nagaya YoniꞋna himona kana yapi age-mainoe.   
\c 5  
\s1 YoniꞋa nagola avoma kae-male omana haꞋya ki-malenegeno age-maine.  
\p
\v 1 Nagaya YoniꞋnae agoana ani sauve kanomo sialeꞋma maiya kanomona tamaga ayapina nagola avoma kae-male omana aye-gafage ki-malegeno hane. Ani omanamona amegaene agusafinagaene avona kae-maleteno veaꞋmoꞋya oꞋagesayafene huno atupale seveniꞋa (7) menimo fuki kana yateti aye kaꞋmae-malene.  
\v 2 Aye kaꞋmae-malenegeꞋna agoana nagola tokiyaꞋa hanea ensole kanomoꞋa ala kegefafiti keha keha huno mage hie “Hana kanoa atesia kanomo anima menimo fukiteti aye kaꞋmae-malegeno hanea omana ali vaka yegahie?” huno hie.  
\v 3 HigeꞋna agoana atiyeꞋyama agayana ikapinagaene mopafiꞋene mopamona afepinagaene nagola ani avoma ali vaka yesigeno atesia kanoa omaine.  
\v 4 Nagola ani avoma kae-male omanama ali vaka yesigeno atesia kanoa omaigeꞋna ageteꞋna tusiya huꞋna avia ate-mainoe.  
\v 5 NeꞋatogeno tueti foꞋa (24) kava vayapiti nago kanomoꞋa nagaifena mage huno hie “Avia oꞋateka havio nago kanoa Teviti aginagomoꞋa, kaveꞋage laiyoni afu kana humainea kanoa, Yuta nofipiti kanogino, SataniꞋene tua huno ago agase-maineafe ani avoma kae-male omana seveniꞋa (7) menimo fukiteti aye kaꞋmae-malenea yana ali hakao huteno ali vaka-yegahie.” huno humaine.   
\s1 YoniꞋa Sipi sipi nafaꞋnea age-maine.  
\p
\v 6 Ani sauve kanomo siamo amuꞋnopina nagola Sipi sipi nafaꞋnea heti-mainegeꞋya foꞋa (4) hamaimuꞋene anagaꞋyaene tueti foꞋa (24) kava vayaꞋmoꞋyaene agaila mai kagi-mainageꞋna age-mainoe. Agoana ani Sipi sipi nafaꞋnea maiyanagi hayagenoꞋma fali-mainea afu kana huno seveniꞋa (7) aveꞋene seveniꞋa (7) aulagaene hane. Ani aulagayaga seveniꞋa (7) Anumaya KotiꞋa hutegeno mukiꞋa ma mopafi vaiyatete nehia Alu Aotage AvamulagiꞋya mainae.  
\v 7 Ani Sipi sipimo nafaꞋnemoꞋa viaꞋamo sauve kanomo siale mainea kanomona tamaga ayapiti ani avoma kae-male omana ali-maine.  
\v 8 AligeꞋya foꞋa (4) hamaimuꞋene anagaꞋyaene tueti foꞋa (24) kava vayaꞋmoꞋyaene ani Sipi sipimo nafaꞋnea avate mope huꞋya mukiꞋamoꞋya gita kana yana yagame nehaya yaꞋene kanileta yafateti talo hu-malenaya yopaene atafa hulinae. Ani yopafina manaꞋage halinamo humainea taꞋnefamoꞋa havate-maine. Ani manaꞋage halinamoꞋa maꞋa humaine veaꞋmoꞋya nunamuma nehuꞋya Anumayamo agima alisaga nehageno Anumayamo avate vigeno havigeno aipamoꞋa kanale higeno hagaꞋage manama nehavia kava humaine.  
\v 9 Ani anagaꞋmoꞋya Sipi sipi nafaꞋnemofena mage huꞋya yagamea humainae  
\q1 “Kagaila kahayageka fali-mainana kolateti ma mopafi veaꞋmogamina, alu kote kotega veaꞋnene, alu make alu make neꞋaiya veaꞋnene, alu amaugafa alu amaugafa kalimainea veaꞋnene, kefo yaꞋamimo alino haꞋyagimatenegeka kagayama fali-mainana kolateti anifiti aligalu heka amavayu huteka Anumaya Koti veaꞋne maisaya yafe mukiꞋa ago miya humatenane. Miya humatenanafe kagaila kanale ya huno katea kava hana kano mainananagika anima aye-gafage ki-maleteꞋya menimo fukiteti aye kaꞋmae-malenea avo omana alika ali hakao hisana tokiyakaꞋa hane.  
\v 10 Anumaya KotiꞋa kava yagai-lamatesia yapi ago amatanageꞋya Anumaya Koti agia alisaga nehuꞋya agai aliꞋyana neꞋaliꞋya ma mopafi veaꞋmogamina kava humategahae.” huꞋya yagamea hageꞋna havimainoe.   
\s1 Sipi sipi nafaꞋnemo agia alisaga humainae.  
\p
\v 11 HaviteꞋna agoana kasagoꞋya ensole vayala teni milioniꞋa (10,000,000) ensole vayaꞋmoꞋya hetiꞋya Anumaya KotiꞋma nemaiya sialeꞋene foꞋa (4) hamaimuꞋene anagaene tueti foꞋa (24) kava vayaꞋmoꞋyaene maigagiꞋya maineꞋya ala kegefafiti mage huꞋya hageꞋna havimainoe.   
\q1
\v 12 “Ani Sipi sipi nafaꞋnea hayageno faliteno heti-mainea kanogino tusiꞋa kanale kano maineanagino atesia napamaꞋa aliteno tusiꞋa tokiyaꞋa hanenageno mukiꞋa kanale yaꞋene kanale havi haviꞋyaꞋene hanea kanogino kava hisia tokiyaꞋaenena haneanagita tokiyaꞋage hale yamaene agia alisaga hisunageno anale hanesigeno mukiꞋa muse hisia yana alisie.” huꞋya hae.   
\m
\v 13 HageꞋna havugeno mukiꞋama Anumaya KotiꞋa talo humalenea yamoꞋa ikapinaga mainaya yaꞋene mopafima mainaya yaꞋene mopamo agusafinagama mainaya yaꞋene tipima mainaya yaꞋenena mukiꞋamoꞋya mage huꞋya hae  
\q1 “Sauve kanomo siale mainana Anumaya Kotigaene Sipi sipi nafaꞋnene agola mukiꞋa kanafina muse hisaꞋa yamoꞋa hanege hanege huno hanesie. TokiyaꞋage hale yamaꞋaene tanakia haneanagita alisaga hisunageno anale hanesigetana kava hisaꞋa tokiyatanimoꞋa hanege hanege huno hanesie.” huꞋya hae.   
\m
\v 14 HageꞋya foꞋa (4) hamaimuꞋene anagamoꞋya “Tamage huꞋya hae.” hageꞋya tueti foꞋa (24) kava vayaꞋmoꞋya ape huꞋya Anumayamo agia alisaga humainae.   
\c 6  
\s1 Sipi sipi nafaꞋnemoꞋa menimo fukiteti aye kaꞋmae-malenea fukina ali hakao humaine.  
\p
\v 1 Nagaya YoniꞋna agoana Sipi sipi nafaꞋnemoꞋa eaꞋamo nagola menimo fukiteti aye kaꞋmae-malenea fukina ago melino hakao higeꞋna havuana foꞋa (4) hamaimuꞋene anagapiti nagoꞋmoꞋa agea aigeꞋna havuana agema aiya agemoꞋa monagemoꞋma hia avamete huno mage hie “Male eno.” huno hie.  
\v 2 HigeꞋna agoana nagola efeꞋage hosi afua agogeno nago kanomoꞋa ani afumo agupifi maineno ati kevea huno atafa hu-lineno tumano kula, vayaꞋmoꞋya kame vayaꞋamima tuma huꞋya amakase-mainaya vayaꞋmoꞋya vai neꞋaliya tumano kula amigeno nagoꞋene kame vayaꞋamienena tua huno amakasegahe umaine.   
\p
\v 3 Vigeno ani Sipi sipi nafaꞋnemoꞋa anile menimo fukiteti aye kaꞋmae-malenea fukina melino hakao higeꞋna havuana foꞋa (4) hamaimuꞋene anagapiti anile tu (2) molia kanomoꞋa mage huno hie “Male eno.” huno hie.  
\v 4 HigeꞋna agoana nagola kolamaꞋage hosi afua agogeno nago kanomoꞋa ani afumo agupifi mainegeno ala aveꞋneꞋne naepe kaꞋyoꞋene mukiꞋa ma mopafi veaꞋnene tuma hisia tokiyaꞋaene amigeno aliteno ma mopafi veaꞋmoꞋya tuma huꞋya hamaesageꞋya falisaya amakesa ago amamineanagino amaipa falu huꞋya maisaya yamoꞋa mukiꞋa ma mopafina ago haꞋno humaine.   
\p
\v 5 Ani Sipi sipi nafaꞋnemoꞋa tagufa (3) molia menimo fukiteti aye kaꞋmae-malenea fukina melino hakao higeꞋna havuana foꞋa (4) hamaimuꞋene anagapiti tagufa (3)molia kanomoꞋa mage huno hie “Male eno.” huno higeꞋna agoana nagola anupa hosi afua agogeno nago kanomoꞋa ani afumo agupifi maiya kanomoꞋa sigelima nehaya yana ayapi alilino emaine.  
\v 6 Alilino mainegeꞋna neꞋageꞋna havuana foꞋa (4) hamaimuꞋene anagapiti nago agema aigeꞋna havua agemoꞋa mage huno hie “Nago kanomoꞋa nagoke yupa nate aepa heno aliꞋyana alime alime visiaꞋamo unema haꞋno hisigeꞋya amisaya miyateti tole osi keꞋayopi laisimo alaga fako huka amamio. Ani avamete miyana kamisageka sikisiꞋa (6) maya aniꞋa huka amamio. AniꞋa huka amamigananagi olivi yosama hanea yosamo alagafiti masavema neꞋaliya yosayagaene nofi alagamo timaꞋa aliꞋya tatiteꞋya nenaya nofiꞋene alika haviyana ohuo.” huno hie.   
\p
\v 7 HigeꞋna agoana Sipi sipi nafaꞋnemoꞋa foa (4) molia menimo fukiteti aye kaꞋmae-malenea fukina melino hakao higeꞋna havuana foꞋa (4) hamaimuꞋene anagapiti foa (4) molia kanomoꞋa mage huno hie “Male eno.” huno hie.  
\v 8 HigeꞋna agoana nagola kanileta hosi afua agogeno ani afumo agupifi maiya kanomo agia “Vaya fali yamoꞋe.” huꞋya neꞋayaya kanomo akaveꞋma via kanomo agia “Fali-mainaya veaꞋne neꞋvaya kumale.” huꞋya agia neꞋayaya kanomoꞋa akave vigeꞋana vaꞋana ani tole kanolatamogania tusiꞋa tokiya anamigeꞋana mukiꞋa ma mopafi mainaya veala ali fako huꞋana foꞋafi (4) amatageꞋya maiya anagapiti nagoꞋa veaꞋmogamina he-falimatesia tokiyaꞋania ali-mainaꞋe. AliꞋageꞋya nagoꞋamoꞋya tu huteꞋya fali-mainagi nagoꞋamoꞋya kafu huꞋya amakategeꞋya fali-mainagi nagoꞋamoꞋya alu kali lu kali aliꞋya fali-mainagi afai kalamoꞋya nagoꞋamogamina hamaesageꞋya falisaya tokiyaꞋania ali-mainaꞋe.   
\p
\v 9 NaꞋa higeno Sipi sipi nafaꞋnemoꞋa faefua (5) molia menimo fukiteti aye kaꞋmae-malenea fukina melino hakao higeꞋna agoana Anumayamofe amakesa haviꞋya sipi sipia heꞋya folamole kae salamana huꞋya nemalaya folamo kana folamoa ikapinaga hanegeꞋna agogeno ani folamomo aiyafina Anumaya Koti kema haviꞋya atafa hu-lineꞋya huhaleꞋya humainaya yatetiꞋma hamayageꞋya fali-mainaya veaꞋmogami amamena amake-mainoe.  
\v 10 AgogeꞋya ani amamemoꞋya ala kegefafiti mage huꞋya hae “Tokiyaka hanea Anumayatimogae alu aotage kanomoga tamagegeꞋya nehane. Ma mopafi veaꞋmoꞋya tahayageta faliteta malela emainonanagika aniꞋama humainaya yatetila kagaya na yu kaiyekea hu-mateteka kefo yaꞋamimo anonaꞋamia amamigane?” huꞋya hae.  
\v 11 Nehageno efeꞋage ayaꞋaya kenaꞋamia alino amamiteno mage huno hamapaiye “Maifalu hutama mainegeꞋya tamafu-tamakanaꞋya tamakaiꞋene Yisasi aliꞋyama neꞋaliꞋya agai kema huhaleꞋya nehaya yateti tamakaiꞋma hulamatenaya kava huꞋya hamaesageꞋya faliteꞋya esageꞋna kame vayatamia kaiyekea humategahue.” huno hie.   
\p
\v 12 Huteno Sipi sipi nafaꞋnemoꞋa sikisia (6) molia menimo fukiteti aye kaꞋmae-malenea fukina melino hakao higeꞋna agoana tusiꞋa imi aligeno yagemoꞋa asu huno hanimaꞋage higeno ikamoꞋa haesa ko tino kola kana humaine.  
\v 13 Higeno yasimoꞋa yosamona mo lifagagi me lifagagi higeno afuma otenea yosa alagamoꞋa halali hulavia kava huno kaꞋnefiꞋyagamoꞋa ikapitila atafai-lavi-maine.  
\v 14 IkamoꞋa iva yuguma alitama aye kafage kitama haꞋyama negiya kava huno ikamoꞋa fanane higeno mukiꞋa agoꞋyaene ti amuꞋnopima hanea mopaene noꞋamia ataleꞋya nagoꞋene omalenae.  
\v 15 NaꞋa higeno mukiꞋa ma mopafi mainaya sauve vayaꞋyagaene kava vayaꞋyagaene ati vayate kava vayaꞋyagaene miyaꞋamimo hai-mainea veaꞋnene tokiyaꞋamima hanea vayaꞋene nofipi maineꞋya miya oꞋali aliꞋya neꞋaliya veaꞋnene amakaiꞋami aliꞋyaꞋamile nemaiya veaꞋnene tusiꞋa amamaꞋyo aigeꞋya “Hanate maisune.” huꞋya huteꞋya yafakapiꞋene agoꞋyafi hanea ala yafakefamo akavelega faleꞋya mo falakiꞋya mainae.  
\v 16 Fala kiꞋya maineꞋya keha keha huꞋya mukiꞋa agoꞋyaheꞋene yafafeꞋene mage huꞋya hae “Tagaya sauvemo siale mainea kanoa Anumaya Koti aule omaisuna tagesa nehune. Sipi sipi nafaꞋnemoꞋa tusiꞋa hai vai nelategeta koli nehunagi agoꞋyamogatama kofa hu-lavitama tagaila etama aiso hulateho.  
\v 17 Ala kanolatamogania hanai vai-lateꞋana kaiyeke hulatesaꞋa kanamoꞋa ago falote hianagiꞋya hanaꞋa augafa veaꞋmoꞋya anaulela hetigahae?” huꞋya hageꞋna haenagama falote hisia yana himona kana yapi ageteꞋna havilinoe.   
\c 7  
\s1 Vani hataleti foti fo tauseniꞋa (144,000) Isaleli veaꞋmogamina Anumayamo avona hamanile aigaꞋmaema-tene.  
\p
\v 1 Ani kema haviteꞋna agoana foꞋa (4) ensole vayaꞋmoꞋya foꞋa (4) ma mopamo atupalega heti-maineꞋya yasimona atafa huꞋya ali-talako huligeno yasimoꞋa taga higeno mopafima hanea yamoꞋene hagelimoꞋene yosayagamoꞋenena kanage kanagala ohunae.  
\v 2 OhageꞋna agogeno nago ensole kanomoꞋa yagemoꞋma evaꞋyi nehilegati eaꞋamo haimuꞋma hanea Anumaya KotiꞋa agaiꞋa veaꞋmogami humatenea avona aigaꞋmaematesia yana ayapi atafa hulineno ani foꞋa (4) ensole vayala mopaene hageliꞋene ali haviyama hisaya tokiyaꞋamima amaminea ensole vayafe mage huno ala kegefafiti hamapaiye.  
\v 3 “Tamakaya mopaene hageliꞋene yosayagaenema ali haviyama hisaya ensole vayaꞋmogatama neꞋataletama tagava mainegeta tagaya hagoteta Anumaya Kotitimo aliꞋya veaꞋmogami hamanilela AnumayamoꞋma humatenea avona aigaꞋmae-matetesunagetama ani yaꞋyaga ali haviyana hugahae” huno hie.  
\v 4 HigeꞋna havugeno huyogino hamanile avoma kae-malenea veaꞋnea vani hataleti foti fo tauseniꞋa (144,000) Isaleli veaꞋnea alu nofipiti alu nofipiti huyogi-malenea veꞋnea agoe.  
\v 5 Yuta nofipiti tuelufu tauseniꞋa (12,000) veaꞋnene Lupeni nofipiti tuelufu tauseniꞋa (12,000) veaꞋnene Kati nofipiti tuelufu tauseniꞋa (12,000) veaꞋnene huyogi-malene.  
\v 6 Asa nofipiti tuelufu tauseniꞋa (12,000) veaꞋnene Napatalai nofipiti tuelufu tauseniꞋa (12,000) veaꞋnene Manase nofipiti tuelufu tauseniꞋa (12,000) veaꞋnene huyogi-malene.  
\v 7 Simioni nofipiti tuelufu tauseniꞋa (12,000) veaꞋnene Livai nofipiti tuelufu tauseniꞋa (12,000) veaꞋnene Isaka nofipiti tuelufu tauseniꞋa (12,000) veaꞋnene huyogi-malene.  
\v 8 Sepuluni nofipiti tuelufu tauseniꞋa (12,000) veaꞋnene Yosefe nofipiti tuelufu tauseniꞋa (12,000) veaꞋnene Penisamini nofipiti tuelufu tauseniꞋa (12,000) veaꞋnene huyogi-malene.   
\s1 KasagoꞋya veaꞋmoꞋya Anumaya Koti agia alisaga humainae.  
\p
\v 9 KasagoꞋya veaꞋnea ohavunamaꞋa veaꞋnea alu kotega alu kotega veaꞋnene, alu make alu make neꞋaiya veaꞋnene, alu amaugafa lu amaugafa kali-mainea veaꞋnene, mukiꞋa Anumaya Koti sauve kanomo siamo aulegaene Sipi sipi nafaꞋnemo aulegaene heti-maineꞋya efe kena ayaꞋaya kenaꞋamia failineꞋya faꞋnofamo haisa amayapi atafa huli huli hulinae.  
\v 10 Hu-lineꞋya ala kegefafiti mage huꞋya hae “Sauve kanomo siale mainea Anumaya KotitimoꞋene Sipi sipi nafaꞋnemoꞋene tagu tamema ago aligati-mainea yamona aepaꞋa mainaꞋe.” huꞋya hae.  
\v 11 NehageꞋya mukiꞋa ensole veaꞋmoꞋya hetiꞋya Anumaya KotiꞋma mainea sialeꞋene tueti foꞋa (24) kava vayaꞋmoꞋyaene foꞋa (4) hamaimuꞋene anagaꞋmoꞋyaene maigagiꞋya maineꞋya mukiꞋamoꞋya ani siale ape huꞋya Anumaya Koti agia alisaga nehuꞋya mage huꞋya hae.   
\q1
\v 12 “Tamage Anumaya KotiꞋa mukiꞋa muse hisia yana alisie. TokiyaꞋage hale yamaꞋaene agia haneanagino kanale havi haviꞋyamaꞋa hanea kano maineafe agia alisaga nehuta tusiꞋa muse hutesune. AgaiꞋa kava yagaisia tokiyaꞋamoꞋa agola hanege hanege huno hanesie. Tamage.” huꞋya humainae.   
\s1 Ani anagaꞋmogamina amakatama neꞋaiya yamoꞋa menia agola haꞋno hie.  
\p
\v 13 Ani kea hu neꞋatageno nagola ala kava kanomoꞋa nagaifena mage huno nahavige “Nama ayaꞋaya efe kenama fai-linaya veala taꞋyae? Hanategati emainae?” huno nahavige-maine.  
\v 14 NahavigegeꞋna nagaya, YoniꞋna, mage huꞋna hue “MusekaꞋa nehugi kagaya kagaikaꞋa havilinane.” huꞋna hugeno nagaifena mage huno hie “Mani veaꞋmoꞋya tusiꞋa kana yama hanea kanafi maineꞋya tokiyaꞋage huꞋya kefo yaꞋamihema haviꞋya fali-mainea Sipi sipi nafaꞋnemo kolateti kenaꞋamia agola sese hageno efeꞋage hu-maineanagiꞋya emainae.  
\v 15 Ani yafe amakaya Anumaya KotiꞋma mainea siamo aulega heti-maineꞋya felugaene kegeꞋene agai agia alisaga nehuꞋya agai aliꞋya neꞋaliyanagino Anumaya KotiꞋa au vaimateno kava yagaimategahie.  
\v 16 Yagai-mateneanagino nagoꞋene amakala otegahie. Tifena oꞋamakegahie. YagemoꞋa amuko-nako huno amaleno oꞋamasagaligahie.  
\v 17 Sipi sipi nafaꞋnemoꞋa Anumaya Koti mainea siamona aulega hanea amuꞋnopi hetino maineno sipi sipi kava kanoꞋami maineanagino kapaiꞋma nehagea tima hanea komulega amavaleno mo matenageꞋya maige maige hisaya tina nenesageno Anumaya KotiꞋa amaunua alino haꞋmi-matesigeꞋya nagoꞋene avia oꞋategahae.” huno higeꞋna nagaya YoniꞋna havimainoe.   
\c 8  
\s1 Sipi sipi nafaꞋnemoꞋa sevenia (7) molia menimo fukiteti aye kaꞋmae-malenea fukina ali hakao humaine.  
\p
\v 1 Ani Sipi sipi nafaꞋnemoꞋa haenagalafana menimo fukiteti aye kaꞋmae-malenea yana melino hakao higeꞋna agogeno mukiꞋa ikapinagama hanea yamoꞋa kanage kanagela ohuꞋya mukiꞋa yamoꞋa kea ohigeno vaniꞋagi hafu aovamoꞋa eumaine.  
\v 2 EutegeꞋna anile agoana seveniꞋa (7) ensole veaꞋmoꞋya Anumaya Koti aule hetiꞋya mainageno seveniꞋa (7) ufena amamigeꞋna age-mainoe.   
\p
\v 3 Agogeno nago ensole kanomoꞋa nagola kanileta yafateti talo hu-malenea yopa ayapi ali-linegeno afuma heꞋya folamole kae salamana huꞋya nemalaya folamo kana folamole* heti-mainegeno kasagoꞋya manaꞋage nehia taꞋnefamo halinamoꞋene Yisasina amakuꞋa aminaya veaꞋmoꞋya nunamuma huꞋya havigaya nunamuꞋene ani yopafina ali malesigeno ailokaenoꞋma haisiana AnumayamoꞋa kanale manaꞋa havisiafene huno sauve kanomo siamo aulega kanileta yafateti talo hu-malenea folamo hanea folamole mo malene.  
\v 4 Momalegeno ani manaꞋage halinamoꞋene Anumaymona amakuꞋama aminaya veaꞋmogami nunamuꞋyagaene ani ensole kanomo ayapitila ataleꞋya Anumayamo aule haimainae.  
\v 5 Haigeno ani ensole kanomoꞋa kanileta yafateti talo humale yopa alino folamole atama nelea ata ani yopafi maleno havateteno alino ani ata ikapinagati ma mopafi hagaꞋyu hu-talegeno elavigeno ikapinagatila akali kalu huno aulumayala neꞋaligeno nagola ala agegefa neꞋaigeno imila ali-maine.   
\s1 FoꞋa (4) ensole vayaꞋmoꞋya ufena humainae.  
\p
\v 6 SeveniꞋa (7) ufema atafa hu-linaya ensole vayaꞋmoꞋya ani ufema hisaya yafe talo tala humainae.  
\v 7 Hagote ensole kanomoꞋa agaiꞋa ufena higeno koꞋmopamoꞋene atamoꞋene kolamoꞋene atagufe-lavino mopafi tavigeno mukiꞋa ma mopa tagufale (3) ali fako hu-malageno anifiti nagokeꞋma ali fako hu-malaya haupa kaiyaga mukiꞋa mopafi hanea yaꞋene mukiꞋa yosayagaene mukiꞋa apeꞋene atamoꞋa teno asagali-talene.   
\p
\v 8 Asagali-talegeno tu (2) molia ensole kanomoꞋa agaiꞋa ufena higeno ala agoꞋya kana yana ata nelegeno hagelipi tavi-maine. Ani hagelimona tagufale (3) ali fako hu-malageno anifiti nago haupa kaiyaga hanea timoꞋa kolamaꞋage huno vali vali humaine.  
\v 9 KolamoꞋa vali vali higeno ani haupa kaiyagama mainaya noyameyagaene tipi yagaene fali haꞋno hageno ani haupa kaiyagama hanea tipi kaleyaga ali haviya hu-talageno anifima mainaya veala fali haꞋno humainae.  
\v 10-11 Faligeno tali (3) molia ensole kanomoꞋa agaiꞋa ufena nehigeno kaꞋnefila ala kaꞋnefekefamo agia “AtuꞋage nehuno satuꞋage kaꞋnefile.” huꞋya nehayanaginoꞋa kaꞋniꞋmoma nelea avamete huno ikapinagatila elaviaꞋamo mukiꞋa ma mopamona tagufafi (3) melino fako hu-malageno anifiti nago haupa kaiyagama hanea tiꞋyagaene tima kapaiꞋma nehagea ti komufi hanea timoꞋene atuꞋage higeꞋya mukiꞋa ani lima ne-mainaya veaꞋnea fali-mainae.   
\p
\v 12 Faligeno fo (4) molia ensole kanomoꞋa agaiꞋa ufena nehigeno yagemoꞋa tagufafi (3) ali fako hu-malageno anifiti nago haupa kaiyaga asu humaine. AniꞋa huꞋya ikana tagufafi (3) ali fako humalageno anifiti nago haupa kaiyaga aniꞋa huno asu humaine. KaꞋnefiꞋyaga tagufafi (3) ali fako hu-malageno anifiti nago haupa kaiyaga aniꞋa huno asu humaine. Asu hu-maigeno felugama aye vasa nehia yaꞋamimoꞋa tagufafi (3) ali fako hu-malageno anifiti nago kanafina asu higeno kegela tagufafi (3) ali fako hu-malageno anifiti nago kanafina ikaꞋene kaꞋnefiꞋene asu higeno tusiꞋa haniki-maine.   
\p
\v 13 Nagaya YoniꞋna agogeno nagola ala hakiki kana nama ikamo amuꞋnote haleno vigeꞋna age-mainoe. NeꞋagogeno ala kegefafiti mage huno hie “AvoꞋnio avoꞋnio tagufa (3) ensole anagaꞋmoꞋya ufena nehisageno tusiꞋa kana yamoꞋa ma mopafi mainaya veaꞋmogatamile falote hugahe higeꞋna tusiꞋa nahau hu nelamatoe.” huno higeꞋna havue.   
\c 9  
\s1 Faefu (5) molia ensole kanomoꞋa agaiꞋa ufena humaine.  
\p
\v 1 Faefu (5) molia ensole kanomoꞋa agaiꞋa ufena higeꞋna agogeno nago kaꞋnefimoꞋa ikapinagati atafai-lavino mopafi elavigeno ma mopafina nago komua afe yapi tavi-mainea komumona ayola omale komugefagino ani komumo ki nofila ani kaꞋnefimona amine.  
\v 2 Amigeno aliteno ani ki nofiteti ani komua yakigeno ani komufitila tusiꞋa halinamo huno ehaiyana tusiꞋa atagefafiti hia halinamo avamete huno ehaiyaꞋamo yagene ikaꞋene ayesu higeno tusiꞋa hani kimaine.  
\v 3 Kigeno kasagoꞋya keꞋnu kafamoꞋya ani halinafitila mopafina aitagu-fetageno veaꞋma akafu amanisaya tokiyaꞋamia amamigeꞋya akafuꞋma amani yana kulumale nehaya osifaꞋvemoꞋma neꞋamania avamete huno amanigeꞋya tusiꞋa amakata aimaine.  
\v 4 Ani keꞋnufena mage huno hie “ApeꞋene talaꞋyaꞋene yosayagaenena oneho. NagoꞋa veaꞋnege, Anumaya KotiꞋa hapalimateteno agia hamanilela aigaꞋmae oꞋamatenea veaꞋmogamina akafu amanitama ali haviya humateho.  
\v 5 FaefuꞋa (5) ikana amakata aisia yana amamite amamite hugahayanagi hamaegeꞋya ofaliho.” huno higeꞋya akafu amanigeꞋya amakata yama aliyana kulumale nehaya osifaꞋvemoꞋma veaꞋma akafu neꞋamania avamete huno amanigeꞋya tusiꞋa amakata aimaine.  
\v 6 Ani yama alisaya kanafina veaꞋmoꞋya falisaya yafena tusiya huno hamaugahianagi ofaligahae. Amakatama aiya yafena tusiya huꞋya falisaya kafena ati yegahayanagi oꞋagegahae.   
\p
\v 7 Ani keꞋnumoꞋya tuma hugahema nehaya hosi afumo avamete huꞋya amanutela kanileta yafateti talo humale tumano kula vai-linageno amaugosamoꞋa veaꞋmogami amaugosa kali-maine.  
\v 8 Kali-maigeꞋya ani keꞋnumoꞋya ayaꞋaya amayolagefa, haesa aꞋnemogami amayolagefa kana hu-mainegeno amaveꞋmoꞋa kaveꞋage laiyoni afumo ave kana humaine.  
\v 9 HumainegeꞋya hamaifiꞋyafafina kapaleti talo humale halegu kana yana anoꞋvai-maleneꞋya amagekoꞋna agema aiyana tuma hugahe vaya hosimoꞋya avayu nehaya kalemo nehia kea ala kegefa huno neꞋaiya agemoꞋma hia kava huno agea aimaine  
\v 10 Ani keꞋnumo amaigoꞋyafina avetaꞋnafaꞋage nekaꞋya, kulumale nehaya osifaꞋvemo akafu neꞋamania ave kana hia nekaꞋya, hanegeꞋya ani nekaꞋyaleti faefuꞋa (5) ikamo aguꞋafina veala akafu amaniꞋya ali haviya humategahae.  
\v 11 Ani keꞋnumo sauve kanoꞋamia maineanagino ani kava kanoꞋamimoꞋa SataniꞋe, ayoꞋa omale komugefale kava yagai-maineanagino agia Yuta veaꞋmogami kea, Hipalu kefina Apatonie huꞋya nehagi Kaliki kefina Apolionie huꞋya nehagi tagaiti kefina mage humaine “Vea alino haviya hinageꞋya fali haꞋno hu-matesia kanoe.” humaine.   
\p
\v 12 KeꞋnumoꞋya ali haviya humatesaya kanamoꞋa haꞋno hianagi avoꞋnio tolea tusiꞋa kana yatala falote hisaꞋa yafena nahau hulamatoe.   
\s1 Sikisi (6) molia ensole kanomoꞋa ufena humaine.  
\p
\v 13 Sikisi (6) molia ensole kanomoꞋa agaiꞋa ufena higeꞋna havugeno Anumaya Koti auleꞋma kanileta yafateti talo humale folamomo foꞋa (4) atupale hanea avela foꞋa (4) avepitila agea aigeꞋna havimainoe.  
\v 14 Havugeno ufema atafa hulinea ensole kano sikisi (6) molia ensole kanomofena mage huno hie “FoꞋa (4) ensole vayala, Yufaletisi titegama nofiꞋma humatenaya ensole vayala kalu heka amatalegeꞋya viho.” huno hie.  
\v 15 Higeno “Anumaya KotiꞋa na kafufina na ikatela na kanafina na aovaꞋa ani foꞋa (4) ensole vayaꞋmoꞋya mukiꞋa ma mopafi veaꞋmogamina tagufafi (3) ali fako humalageno anifiti nago haupa kaiyagama mainesaya veala hamaesagetama faligahae.” huno huteno amatafa hu-lineane. Ani kanamoꞋa efalote higeno ani ensole vayala kalu heno amatalegeꞋya ani kavala nehae.  
\v 16 Ani kavaꞋma nehisageꞋya amaya huꞋya hamaesaya ati vayaꞋamia tu hataleti milioniꞋa (200,000,000) hosimo agupifi mainaya ati vayala mainae huꞋya hageꞋna nagaya YoniꞋna havimainoe.  
\v 17-18 HaviteꞋna himona kana yapi amakoana ani hosimogami amakupifima mainaya vayaꞋmoꞋya hamaifiꞋyafafina halegula haesaꞋene okoꞋene kaniletaꞋene halegula aye hai-linageno hosimogami amanutela kaveꞋage afua laiyoni afumogami amanu kana hutegeno amavayafitila atamoꞋene halinamoꞋene hiꞋmanaꞋage atama nelea yafaꞋyagaene falote huno mukiꞋa ma mopafi veaꞋmogamina tagufafi (3) ali fako hu-malageno anifiti nago haupa kaiyaga veaꞋmogamina ani ataene halinamoꞋene hiꞋmanaꞋage atama nelea yafaꞋyagaletiꞋene hamayageꞋya fali-mainae.  
\v 19 Hosimogamina hamaesaya tokiyaꞋamia amavayafiꞋene amaigoꞋyafiꞋene hanegeno amaigoꞋyamoꞋa osifaꞋve kana huno akafu amanisia amanuna hanegeꞋya veala akafu amanigeꞋya hamae-mainae.   
\p
\v 20 Anima tusiya huno ali haviya hia yamoꞋma ohamaenea veaꞋmoꞋya agayanagi kefo yama humainaya yafena amakuꞋa aiyahae nohae. Kanileta yafatetiꞋene siliva yafatetiꞋene haesa yafatetiꞋene afa yafatetiꞋene yosaletiꞋene talo hu-malenaya yafena “Anumayati mainae” huꞋya hayanagi ani yaꞋyaga amaulaga oꞋageꞋya kea ohaviꞋya kama vai oꞋayeꞋyama nehaya afa anumayamo-gamiene Kefo AvamuꞋmogami amakiene alisaga huꞋya “Anumayati mainae.” huꞋya nehaya kavala oꞋatalenae.  
\v 21 OꞋataleneꞋya veaꞋma hamae nefaliya yaꞋene analisama nehaya yaꞋene kumaima nehaya yaꞋene musufa yama hu-liteꞋya nehaya yaꞋenefena amakuꞋa aiyahae nohae.   
\c 10  
\s1 Ensole kanomoꞋa avoma kaemale omana Yonina amigeno nemaine.  
\p
\v 1 Anile nagaya YoniꞋna agoana nagola tokiyaꞋage ensole kanoa ikapinagati elavino egeꞋna age-mainoe. Ani ensole kanomo augafamona siaꞋmoꞋa alino anoꞋvai-tegeno anutela fulagenaꞋmoꞋa maleno kagi-mainegeno augosamoꞋa yagemoꞋma hia kava huno aivasa nehigeno tole aiyamoꞋa ata anefeꞋmo nehia tunage yosa kana nehigeno emaine.  
\v 2 EgeꞋna agogeno nagola osi avona ayapi hanegeno tamaga aiyamoꞋa hagelimo agupile ayegeno haoga aiyamoꞋa mopafi ayegeno huteno aye hala hale humaine.  
\v 3 Humaineno agema aiyana laiyoni afumoꞋma vale vale nehia avamete huno keha keha nehigeno seveniꞋa (7) akali kalu ko nelino tusiya huno monagemoꞋa humaine.  
\v 4 SeveniꞋa (7) akali kaluma hia kea haviteꞋna avopi ago kaegahe huanagi ikapinagati nago kea falote huno mage huno higeꞋna havue “SeveniꞋa (7) akali kaluma hia kea avopina okaeka fala-kilio.” huno higeꞋna havue.   
\p
\v 5 Havugeno timo agupileꞋene mopafiꞋenema aiya aye hala halema hu-mainegeꞋna agoa ensole kanomoꞋa tamaga ayana ikate alisaga hie.  
\v 6-7 Huteno mage hie “HaimuꞋene kanogino Anumaya KotiꞋa mukiꞋa kanafina maige maige huno ikaꞋene ikapinaga hanea yaꞋene mopaene mopafima hanea yaꞋene hageliꞋene hagelipima hanea yaꞋyagaene talo hu-malenea kanomo agile tamage nehue. Anumaya KotiꞋa nagoꞋene agava omaigahigi seveni (7) molia ensole kanomoꞋa agaiꞋa ufena hugahe nehinageno Anumaya KotiꞋa nayoma falakino hanea kea, agaiꞋa aliꞋyama ali-mainaya amaune vayaꞋma hamapai-mainea kemoꞋa falote huno tamage hugahie.” huno hie.   
\p
\v 8 HigeꞋna hagoteno ikapinagatiꞋma higeꞋna havua kemoꞋa eteno nagoꞋene mage huno hie “Hagelimo agupileꞋene mopafiꞋene aiyama aye hala hale huno heti-maiya ensole kanomo ayapima hanea ali vakaye-linea avona kagaya molio.” huno hie.  
\v 9 HigeꞋna ani ensole kanomote vuaꞋamoꞋna mage huꞋna hue “Kagaya ani osi avo omana namio.” huꞋna hugeno mage huno nahapaiye “Kagaya alika no. Nesanana kavayafina tumemo timoꞋma hia kava huno hagaꞋage hugahianagi nakaisanana kaipafinaga atuꞋage hugahie.” huno hie.  
\v 10 HigeꞋna ani osi avona ensole kanomo ayapiti aliꞋna nogeno navayafinaga tumemo timoꞋma hia avamete huno hagaꞋage hianagi neꞋnama nakauvana naipafinaga atuꞋage humaine.   
\p
\v 11 HigeꞋya Yoninia mage huꞋya nahapaiye “Kagaya nagoꞋene alu amaugafa kalimai veaꞋnene, alu kote kote mainaya veaꞋnene, alu make lu make neꞋaiya veaꞋnene ala sauve veaꞋnenefena kaune kea laga huka hamapaigane.” huno nahapaiye.   
\c 11  
\s1 Tole kanolatamo-gania Anumayamo kea huhaleꞋana hu-mainaꞋe.  
\p
\v 1 Nago kanomoꞋa maleꞋna agege gege hisua ayopa kana kaꞋyona namiteno mage hie “Kagaya hetika Anumaya Koti mono noꞋene* kae salamana nehaya folamoleꞋene mo maleka agege gege huka hapalika ago. Ani nopina Anumaya Koti agima alisaga nehaya veala hapalika ago.  
\v 2 Hapaligananagi malagama hanea mopa* maleka agege gege huka ohapalio. Ani kaiyaga Anumaya Koti kema nohavisaya veaꞋmogami amamineanagiꞋya tagufa (3) kafuene sikisiꞋa (6) ikaꞋene ani veaꞋmoꞋya Anumaya Koti kumala alu aotage kuma meli haviya hugahae.  
\v 3 NehisageꞋna nagaya tolea nagai kema huhaleꞋana hisaꞋa kanolatana tokiyaꞋnia anamisugeꞋana kayavo kena fai-lineꞋana tagufa (3) kafuene sikisiꞋa (6) ikaꞋene nagai kea huhaleꞋana hugaꞋe.” huno hie.   
\p
\v 4 Ani lole kanolatana ma mopafi kava humainea Anumayamo aule heti-mainaꞋana tole olivi yosa kana huteꞋana tole kaꞋni kana humainaꞋe.  
\v 5 NagoꞋa veaꞋmoꞋya ani kanolatana ali haviya hugahema hisagenoꞋa ani kanolatamogani anavayafitila atamo aikalu huno kame veaꞋania temasagalisigeꞋya faligahae. E, anakaiꞋma ali haviya hunatesaya veaꞋmoꞋya faligahae.  
\v 6 Ani lole kanolatamo-gania tokiyaꞋanileti “Kola oꞋaiyo.” huꞋana hisaꞋageno kema huhaleꞋana hisaꞋa kanafina kola oꞋaigahie. Tifema “KolamaꞋage huo.” huꞋana hisaꞋagenoꞋa aniꞋa hugahie. Anakesama havisaꞋa kanafina “TusiꞋa kana yaꞋene kaliene falote huo.” huꞋana hisaꞋagenoꞋa ma mopafi veala nagoꞋene nagoꞋene huꞋana hamaegaꞋe.   
\p
\v 7 HamaegaꞋanagi Anumaya KotiꞋma anaminea kea hu haꞋno hutesaꞋageno kefo afai afumoꞋa ayola omaleno afepinaga tavi-mainea komufinagati ehaino me hanaesigeꞋana faligaꞋe.  
\v 8 FalisaꞋageno anaugafamoꞋa ala kumaꞋmo kateꞋma, AnumayaꞋanimona Yisasina yafaga yosaleꞋma haeꞋya asai-malenaya kumaꞋmo, yegegate malegahae. Avame kefima hu-maleꞋya nehaya ala kumaꞋmo agia Sotomuene Isipienene huꞋya nehae.  
\v 9 FalisaꞋa anaugafa yegegate tagufa (3) kanaene ani kanamo yagemoꞋa amuꞋnote eneꞋvigeꞋya nagoꞋa veaꞋnea alu kote kote veaꞋnene, alu make lu make neꞋaiya veaꞋnene, alu maugafa lu maugafa kalimai veaꞋneyagaene, ani kanolatamo-gani anaugafa ageme-geme vayanagi nagoꞋa veaꞋmoꞋya aliꞋya hevainategahe hayanagi ani veaꞋmoꞋya “AꞋao.” huꞋya hageꞋya aliꞋya hevai oꞋanatenae.  
\v 10 Hevai oꞋanatenagi ani kanolatamogania mukiꞋa kotega veaꞋma tusiya huꞋana ali haviyama hu neꞋamataꞋa kanolatama faliꞋa yafenagiꞋya tusiya huꞋya musena nehuꞋya muse yana amafaluꞋamimo-gamina momami memami hugahae.  
\v 11 Hugahagi tagufa (3) kanaene ani kanamo yagemoꞋa amuꞋnote evia kanamoꞋa haꞋno hutegeno Anumaya KotiꞋa ani kanolatamo-gani anaugafafi hanaimula huvainategeꞋana ani kanolatana eteꞋana hetiꞋageꞋya mukiꞋa veaꞋmoꞋya ani yana agageno amamaꞋyoa aigeꞋya kolia humainae.  
\v 12 Koli nehuꞋya haviyana ikapinagati ala kegefafiti ani kanolatafena mage huno hie “Tanakaya ehaitana eꞋo.” huno higeꞋya kame veaꞋanimoꞋya age-mainageꞋana siapi hai-faleꞋana ikapinaga hai-mainaꞋe.  
\v 13 Hai-mainaꞋa anayufina tusiꞋa imila aliteno ani ala kumakefa teniꞋafi (10) ali fako hu-malageno anifiti ani imiꞋmoꞋa nago kaiyaga ali haviya higeno seveni tauseniꞋa veaꞋne (7,000) hamaegeꞋya fali haꞋno humaine. NaꞋa hu-mainayafe ofaliꞋyama afaꞋa mainaya veaꞋmoꞋya tusiꞋa koli huteꞋya ikapinagama mainea Anumaya Koti agia alisaga humainae.   
\p
\v 14 Tole kana yana ago haꞋno hianagi avoꞋnio nagoꞋke kana yana aupa kanafi falote hugahe higeꞋna nahau hu nelamatoe.   
\s1 Seveni (7) molia ensole kanomoꞋa ufena humaine.  
\p
\v 15 Anile seveni (7) molia ensole kanomoꞋa agaiꞋa ufena higeꞋna havugeno ikapinagati nagoꞋa veaꞋmoꞋya ala kegefafiti mage huꞋya humainae “Anumaya KotiꞋene taugafama aligatisiafene huno hutenea kanoene ma mopafi kava veaꞋmogamina ago amakasaꞋageꞋya anaiyafinaga mainayanagino Anumaya KotiꞋa agola maige maige huno kava yagaigahie.” huꞋya humainae.  
\v 16 Anile Anumaya Koti aule hanea sialeꞋma mainaya vayala tueti foꞋa (24) kava vayaꞋmoꞋya mopafi asaga hu-laviꞋya amakoꞋya ye-maineꞋya Anumaya Koti agia alisaga huꞋya mage hae   
\q1
\v 17 “Vae Anumaya Kotigae tusiꞋa tokiyakaꞋa haneanagika nayona mainananagika menia mainananagika tusiꞋa tokiyakaleti aepa heka mukiꞋa yatela kava neꞋyagaina yafe tagaya kagaifena tusiꞋa musekaꞋa nehune.  
\v 18 Kagai kema nohavia veaꞋmoꞋya kagaifena amaipa kafa henegatayafe kagaya kaipa kafa hemateka mukiꞋa fali-mainaya veaꞋnema kaiyeke humateka kefo yaꞋamimo anonaꞋamia amamisana kanamoꞋa ago falote humaine. Ani kanafina kagai kema haviꞋya amakupi malenaya veaꞋnene kagai amaune veaꞋnene mukiꞋa kagai kagima alisaga huꞋya kaiyafinagama nemaiya veaꞋnene ala amakima hanea veaꞋnene osi amakima hanea veaꞋnene kanale anona yaꞋamia amamigane. Amamiteka nagoꞋa veaꞋmoꞋya ma mopafi veaꞋmogamima ali haviya huneꞋamataya veaꞋmogamina kefo yaꞋamimo anonaꞋamia kagaya ali haviya humategane.” huꞋya humainae.   
\p
\v 19 Hageno Anumaya Koti nona ikapinaga hanea mono nona yaki-talageno Anumaya KotiꞋma alino hagelafimatenea kema hanea pokisia ani mono nopina fufu yate hanegeꞋya neꞋagageno anile ala agegefa neꞋaigeno monagemoꞋa tusiya nehigeno imila neꞋaligeno koꞋmopamoꞋa talagufe-lavino aimaine.   
\c 12  
\s1 YoniꞋa nago aꞋene ala osifaꞋvene age-maine.  
\p
\v 1 Nagola tusiꞋa tokiyaꞋage avame yana ikapinaga falote hie. Nago aꞋmoꞋa mainegeno kenaꞋamoꞋa yege aumona ayeno auꞋvai-maigeno ikamoꞋa aiyafinaga hanegeno anutela tuelufuꞋa (12) kaꞋnefimoꞋya tumano ku kana huno vai-line.  
\v 2 Ani aꞋmoꞋa aipaene maineno inamu ya alitegeno agata aigeno avovo humaine.   
\p
\v 3 Nehigeno nagola tokiyaꞋage avame yana ikapinaga falote hie. Nagola tusiꞋa haesa osifaꞋve mainegeno seveniꞋa (7) anuna hanegeno teniꞋa (10) aveꞋyaga anuꞋyagafina hanegeno seveniꞋa (7) ala sauve kanomo tumano kuꞋyaga ani avetela vai-line.  
\v 4 Ani osifaꞋvemoꞋa ikateꞋma hanea kaꞋnefiꞋyaga tagufafi (3) ali fako hu-malageno anifiti nago haupa kaiyaga kaꞋnefiꞋyaga aigoꞋyaleti aye tafai-talegeno mopafi elavi-mainegeno ani osifaꞋvemoꞋa aꞋmo aule hetino nafaꞋneꞋama neꞋatesiana ani havi osifaꞋvemoꞋa haeno nesiafene huno agava maine.  
\v 5 Mainegeno ani aꞋmoꞋa ne nafaꞋnema neꞋateana ani nafanemoꞋa haenaga ala kano maiteno aeni ayopaꞋa ali-lineno mukiꞋa ma mopafi veate tokiyaꞋage huno kava yagaisia nafaꞋnema neꞋateana ani nafaꞋnea aupaꞋa hafaleꞋya avalesaga huꞋya anafinaga Anumaya Koti siale atenae.  
\v 6 Atageno ani aꞋmoꞋa nafaꞋnema atetenoꞋa faleno vigeno Anumaya KotiꞋa maisia kumala talo tala hutegeno kaꞋme kotega viaꞋamo tagufa (3) kafuene sikisiꞋa (6) ikaꞋene Anumaya KotiꞋa yagaitene.   
\p
\v 7 NaꞋa higeno ikatela tusiꞋa tua falote humaine. Ensolemo-gami kava kanoꞋamimo agia Maikoloe ensole vayaꞋyagaene tokaeꞋya havi osifaꞋvene agaiꞋa Kefo AvamuꞋyagaene tusiꞋa tua humainae.  
\v 8 Tuma hayanagi havi osifaꞋvemo tokiyaꞋa omalegeꞋya asaga hu-mainageꞋya avaleꞋya ikapinagati avaleꞋya hagaꞋyu hu-talegeno nagoꞋene anile omaigahie.  
\v 9 Ani nayoma nemaiya ala osifaꞋvemo agia SataniꞋe nehaya kanomoꞋa ma mopafi veafena havigegeꞋya huno ayemavataga hugeno omai kanoene agaiꞋa avamuꞋyagaene ikapinagatila amavaleꞋya hagaꞋyu humatalageꞋya ma mopafina elavi-mainae.   
\p
\v 10 Elavi-mainageꞋna havugeno ikapinaga ala kegefafiti mage huno hie “Anima avaleꞋya hagaꞋyu hu-talaya kanomoꞋa tafu-tagana-gamina mukiꞋa kanafina humatege humatege huno mage hie ‘Ani kefo yana nehae.’ huno Anumaya Koti aufima hufalote nehia kanomona ikapinagatila ago avaleꞋya hagaꞋyu hu-talenaya yafe AnumayatimoꞋa tagu tamema aligatisia yamoꞋa ago falote humaine. Anumaya KotiꞋa agaiꞋa tokiyaꞋa mukiꞋa veaꞋnea ago amave-liteno agaya ala sauve kava kano maine. Maineanagino agaiꞋa tamaugafa aligatisiafene huno hutenea kanomo kava yagaisia tokiyaꞋa hane.  
\v 11 Haneanagino SataniꞋa tafu-tagana-gamifena ‘NaꞋa kefo yana nehae.’ huno ali falotela hianagi tafu-taganaꞋya YisasiꞋa, Sipi sipi nafaꞋnemo kolamoꞋma tavi-mainea kene Anumaya Koti kemoꞋene huhaleꞋya humainaya yateti Satanina agase-mainayanagi amakaiꞋami amaugafahena amakesa ohaviꞋya falisaya yafe kolia nohae.  
\v 12 NaꞋa humainaya yafe ikamogaene ikapinaga mainaya veaꞋnene musena hiho. Musena hugahayanagi Satanina ikapinagatila avaleꞋya hagaꞋyu hu-talageno ma mopafina elavi-mainegeno ‘Aupa kana kanoꞋa maigahue.’ huno agesa havimainea yafenagino aipamoꞋa ata neleanagiꞋna avoꞋnio ma mopafiꞋene hagelipiꞋene mainaya yaꞋyagahena nahau hugi kaꞋyeho.”   
\p
\v 13 Ala osifaꞋvea ago avaleno hagaꞋyu hu-talegeno ma mopafi elavinoꞋma emainea yana ageteno ani ne nafaꞋnema atenea aꞋmona ali haviya hutesia yafe mo nati-maine.  
\v 14 Mo natianagi Anumaya KotiꞋa ani aꞋmona aluga aluga haopalega ala hakikimo agekoꞋna talo huno ategeno ani aꞋmoꞋa haleno kaꞋme kotega, Anumaya KotiꞋa talo tala humalenea kumate umainegeno Anumaya KotiꞋa tagufa (3) kafuene sikisiꞋa (6) ikaꞋene yagai-mainegeno ani havi osifaꞋvemoꞋa ali haviya hutesia tokiyaꞋa omalene.  
\v 15 Omaleneno ani osifaꞋvemoꞋa avayafitila muvali-talegeno tavia timoꞋa tusiꞋa ti hogino aiyayeno laviaꞋamo ani aꞋmona asaga huno nakaino ali haviya hisie huno ani kavala humaine.  
\v 16 NaꞋa hianagi ani aꞋmona aya hisia yafe mopamoꞋa eko alino avaya aka hu-mainegeno ani osifaꞋvemo avayafitiꞋma lavia timoꞋa ani eko kapi tavi fale haꞋno humaine.  
\v 17 Tavi haꞋno hianagi ani osifaꞋvemoꞋa aꞋmofena aipa kafa heteteno ani aꞋmo aginagomoꞋyaene tua hugahe umaine. Ani veaꞋmoꞋya Anumaya Koti kahegi kema haviꞋya akaveꞋma nemaleꞋya Yisasi humainea kema atafa hu-linaya veaꞋnene tua hugahe umaine.  
\v 18 Ani osifaꞋvemoꞋa hagelimo agegayalega hetino maine.   
\c 13  
\s1 Tole kefo afai afulatana vaꞋyi humainaꞋe.  
\p
\v 1 OsifaꞋvemoꞋa hagelimo agegayalega hetino mainegeꞋna nagaya YoniꞋna agogeno nagola kefo afai afua hage lipiti vaꞋyi higeꞋna age-mainoe. Ani kefo afai afumo anumoꞋa seveniꞋa (7) anuꞋyaga hanegeno teniꞋa (10) aveꞋyagamo anupitila hai-mainegeno ani aveꞋyagamotela ala sauve kanomo tumano kuꞋyaga teniꞋa (10) tumano ku vailine. Ani seveniꞋa (7) anutela kefo afai afumo agia hanegeno ani agiyagamoꞋa Anumaya Kotifena kamuge hatageꞋya vaiteꞋya hu-haviya hutaya agiyaga kae-malageno hane.  
\v 2 Ani kefo afai afumona agoana maꞋa humaine. Nagola afai pusimo agia lepatie nehaya afu kana huno aiyamoꞋa nago ala afai kalamo agiꞋa peamo aiya kana humaine. AvayamoꞋa laiyoni afumo avaya kana hu-mainegeꞋna age-mainoe. Agogeno ani ala osifaꞋvemoꞋa agaiꞋa tokiyaꞋaene ala kava hisia siaꞋaene ani kefo afai afumona amine.  
\v 3 Amigeno ani kefo afai afumona nago anuna ago hae-malenaya falitesea afugula haneanagi amuna ageno ago eteno kanale hutene. Kanale hutegeꞋya ageteꞋya mukiꞋa ma mopafi veaꞋmoꞋya ageteꞋya amamaꞋyo aigeꞋya ani kefo afai afumona akave umainae.  
\v 4 Ala osifaꞋvemoꞋa agaiꞋa tokiya kefo afai afumona aminea yafe mukiꞋa veaꞋmoꞋya ani kefo afai afumofena “Alati maine.” huꞋya agia alisaga humainae. Kefo afai afumo agiene alisaga nehuꞋya mage huꞋya hae “Hana kanomoꞋa kefo afai afumo tokiyaꞋamoꞋma hia kavala huno hugahie? Ta agaiꞋenema tuma hisia tokiyaꞋa hane?” huꞋya hae.   
\p
\v 5 Hageno Anumaya KotiꞋa mage huno hie “Atalegeno tagufa (3) kafuene sikisiꞋa (6) ikaꞋene kava yagaino.” huno higeno ani kefo afai afumoꞋa agaiꞋa agia alisaga huno Anumaya Kotifena tusiya huno kamugea hatageno vaitene.  
\v 6 Ani kefo afai afumoꞋa avaya aka-naka huno Anumaya Kotina kamugea hu neꞋateno Anumaya Koti agiene nemaiya kumaꞋaene ikapinagama mainaya veaꞋaenena hu-haviya humatene.  
\v 7 Hu neꞋamategeno Anumaya KotiꞋa atalegeno Yisasina amakuꞋa aminaya veaꞋnene tua huno amakaseteno mukiꞋa alu kote alu kote veaꞋnene, alu make lu make neꞋaiya veaꞋnene, alu maugafa lu maugafa kalimai veaꞋnene, kava humatesia tokiya amigeno kava yagaino maine.  
\v 8 Kava yagai-maineanagiꞋya mukiꞋa ma mopafi veaꞋmoꞋyama agia alisaga hugahayanagi maige maige hisaya hamaimuꞋma hanea veaꞋmogami amakima hanea avopi amaki kae-malenea veaꞋmoꞋya agia alisaga ohugahae. Ani avona Anumaya KotiꞋa ma mopama taloma ohunea kanafina mage huno hu-maineane “Nagai Sipi sipi nafaꞋnea, YisasiꞋa, faligahie.” huno hutenea kanomo avone.   
\p
\v 9 Nagi tamakesama hanesimo-gatama mani kea havilama hutama hiho.  
\v 10 Anumaya KotiꞋa “E.” huno hisigeꞋya nagoꞋa veaꞋmoꞋya kina nopina ugahae Anumaya KotiꞋa “Naepe kaꞋyoteti haetama falimato.” huno hisigeꞋya nagoꞋa veaꞋmoꞋya naepeleti falilamategahae. Ani auꞋava yamoꞋma falote hisigetama Anumaya Koti kea haviꞋya amakupiꞋma malenaya veaꞋmogatama tokiya vaitama mani kea ali lokiya vaitama atafa hu-litama maiho.   
\p
\v 11 Nagaya YoniꞋna agogeno nago kefo afai afumoꞋa* mopamo agusafiti evaꞋyi humaine. Ani kefo afai afumo anupina tole avela, sipi sipi nafaꞋnemo ave kana ave haneanagi agema aiyana tusiꞋa puku pukumo age kana huno agea aimaine.  
\v 12 NeꞋaigeno hagote kefo afai afumoꞋa tokiyaꞋa amigeno ani himamuleti mukiꞋa ma mopafi veaꞋmogamitela kava humaineno anima nago kefo afai afumoꞋa mukiꞋa ma mopafi mainaya veaꞋmogamifena mage huno hie “Hagote kefo afai afumona anupina haeꞋya falitesaya kava hageno amuna ale-maineanagino eteno kanale hutenea afumo agia alisaga hiho.” huno humaine.  
\v 13 Nehuno anima nago kefo afai afumoꞋa mukiꞋa aluꞋa augafa tokiyaꞋage avame yana nehuno atamofena “Ikapinagati elavio.” hunoꞋma hiana veaꞋmoꞋya neꞋagageno atamoꞋa ikapinagati mopafina elavi-maine.  
\v 14 Elavigeno hagote kefo afai afumoꞋa “NaꞋa huo.” huno tokiya amigeno nago afai afumoꞋa tokiya avame yama nehia yateti veala aye mavataga hiaꞋamo ani veafena mage huno humaine “Tamakaya hagote kefo afai afua, naepeleti honomu ayageno faliteno eteno mainea afumo agia alisaga hisaya yafe yosaleti avameꞋname hutama amena talo hiho.” huno humaine.  
\v 15 HigeꞋya taloma hayana Anumaya KotiꞋa atalegeꞋya nago kefo afai afumo amena yosaleti talo humalaya kefo afai afumo amela haimula amigeno aepa heno nagoꞋa veaꞋmoꞋya agai agima alisaga nohageno haegeꞋya fali-maine.  
\v 16 Ani kefo afai afumoꞋa mage huno hie “MukiꞋa veaꞋmogamina, amakima omale veaꞋnene, amakima hanea veaꞋnene, miyaꞋami hanea veaꞋnene, miyaꞋamima omale veaꞋnene, nofipi maineꞋya miya oꞋali aliꞋya neꞋaliya veaꞋnene, amakaiꞋami miya alisaya aliꞋyama neꞋaliya veaꞋnene tamaga amayatelo hamanilelo ohananesia avona kaemateho.” huno higeꞋya kasagoꞋya veaꞋmo-gamina ani avomoꞋa hamanileti kae-male kae-male humaine.  
\v 17 HigeꞋya ani avona hagote kefo afai afumo agio ifi ani agimo napamao amaugafaleꞋma ani alegana yama omalenesaya veaꞋmoꞋya nago yana alu veaꞋneletila miya ohigeꞋya amakaiꞋami yana alu veaꞋmoꞋya miya ohugahae.   
\p
\v 18 NagoꞋa veaꞋma kanale havi haviꞋyaꞋami hanea veaꞋmoꞋya ani hagote kefo afai afumo napamaꞋa hapaliꞋya havilama hisae. Ani napana nago kanomo agimo napamaꞋa hane. Ani agimo napana sikisi hataleti sikisiti sikisiꞋa (666) napamaꞋa hane.   
\c 14  
\s1 KasagoꞋya Sipi sipi nafaꞋnemo veaꞋmoꞋya haegafa yagame humainae.  
\p
\v 1 Nagaya YoniꞋna agogeno Anumaya Koti Sipi sipi nafaꞋnea Saiyoni* agoꞋyale hetino mainegeꞋya kasagoꞋya veaꞋmoꞋya vani hataleti foti fo tauseniꞋa (144,000) veaꞋmoꞋya agaiꞋenena ani agoꞋyale hetiꞋya mainae. Ani veaꞋmogami hamanilela Sipi sipi nafaꞋnemo agiene agaiꞋa Nefa agiene kae-malenae.  
\v 2 Nagaya ikapinagati kanale age aiya agea havugeno ti anamoꞋma asaga hu-lavino nelavino agema neꞋaiya kava huno neꞋaino monagemoꞋma hia kava higeꞋna havimainogeno kasagoꞋya veaꞋmoꞋya gitama neꞋaigeno agema neꞋaiya kava higeꞋna havimainoe.  
\v 3 HavugeꞋya ani veaꞋmoꞋya Anumaya KotiꞋma mainea siamo auleꞋene foꞋa (4) hamaimuꞋene anagaꞋmo-gami amauleꞋene kava vayaꞋmo-gami amauleꞋene hetiꞋya maineꞋya haya yagamea nagoꞋa veaꞋmoꞋya ohavinaya yagamea, haegafa yagame humainae. Ani yagame haya veaꞋnea ma mopafi mainageno Anumaya KotiꞋa amaku amamema aligati-mainea veala vani hataleti foti fo tauseniꞋa (144,000) veaꞋmoꞋya amakaiꞋamige ani yagame havimainae.  
\v 4 Ani veaꞋmoꞋya aꞋnea amavayu huꞋya ofaeyageno amakuꞋamoꞋa oniꞋyaꞋagela ohigeno Sipi sipi nafaꞋnemoꞋa vai neꞋyageꞋya ani veaꞋamoꞋya akavela vai neꞋayaye. Anumaya Koti Sipi sipi nafaꞋnemoꞋa faliteno kefo yaꞋamimo aigagimatenea yapiti miya humateteno ma mopafi veaꞋmogami amuꞋnopiti hagoteno amaugafa aligati-mainegeno Anumaya KotiteꞋene Sipi sipi nafaꞋnemoteꞋene amavaleno amate-maineane.  
\v 5 AmategeꞋya ani veaꞋmoꞋya havige ohu vealagiꞋya nagoꞋa kefoꞋamia omaleneane.   
\s1 Tagufa (3) ensole vayaꞋmoꞋya kanale kea huhaleꞋya humainae.  
\p
\v 6 Nagaya agoana nago ensole kanomoꞋa ikaꞋmo amuꞋnote haleno vai neꞋayeno agola hanege hanege huno nehanea kanale mono kea alino mukiꞋa ma mopafi mainaya veaꞋmogamina alu kote alu kote veaꞋnene, alu make lu make neꞋaiya veaꞋnene, alu maugafa lu maugafa kalimainea veaꞋnene hamapaisia yafe vai neꞋaye.  
\v 7 Vai-yeno ala kegefafiti mage huno hie “Anumaya KotiꞋa veaꞋmogami alino kaiyekema humatesia kanamoꞋa ago falote hu-mainegi tamakaya koli nehutama Anumaya Koti agia alisaga hiho. Anumaya KotiꞋa ikaꞋene mopaene hageliꞋene mopafitiꞋma kapai nehagea tiꞋene agaiꞋa talo hu-malegetama agai agia alisaga hiho.” huno humaine.   
\p
\v 8 Hume hume neꞋvigeno akavelega nago ensole kanomoꞋa neꞋeno mage huno humaine “Ala kumala Papiloni* kumala tusiya huꞋya ago aliꞋya tagape aitalae. Papiloni veaꞋmoꞋya mukiꞋa kotega veafena mage huꞋya humainae ‘Tagayama huna kava hutama kumai yana hagaꞋage huno havili kana humainegi afaꞋa neho.’ huꞋya hageꞋya ani kumai yana maiꞋya humainae.”   
\p
\v 9-10 Ani lole ensole kanolaꞋmogani anakavela nago ensole kanomoꞋa neꞋeno ala kegefafiti mage huno hie “NagoꞋa veaꞋmoꞋya kefo afai afuene amayateti avave-name huꞋya talo hu-malenaya ameꞋeneꞋma agima alisagama nehuꞋya ‘Ani kanomo agia nayatelo nahanilelo agia aigaꞋmaelato.’ huꞋyama hu-mainaya veaꞋmogamina Anumaya KotiꞋa haima neꞋvaiya yana aligahae. Anumaya Koti aipamoꞋa haviya hinageno hai vaimateno ata nelenageno atuꞋage huno havili kana higeno takino amamisigeꞋya ani veaꞋmoꞋya ani havilina negahae. Nesayana alu aotage ensole veaꞋmogami amauleꞋene Sipi sipi nafaꞋnemo auleꞋene hiꞋmanaꞋage ata nelea yafaꞋyaga hanea atafi mainesageno amaleno asagalisigeꞋya tusiya huꞋya amakata aigahie.  
\v 11 MukiꞋa kanafina ani amakatama aige aige hisia atamo halinamoꞋa taga ohugahianagino agola haige haige huno haigahie. HaigeꞋya ani veaꞋmoꞋya kefo afai afuleꞋene amayateti avame-name huꞋya talo hu-malenaya amemaꞋaene agia alisaga nehuꞋyama ani kanomo agima amaugafale hanesia veaꞋmoꞋya mukiꞋa kanafina agola kegeꞋene felugaene amaugafa amakata aige aige hinageꞋya haꞋno ohugahie.” huno humaine.   
\p
\v 12 Havisayana tamakaya Yisasina tamakuꞋama aminaya veaꞋmogatama Yisasife havitama tamakupi malenaya kea atafa hu-linetama Anumaya Koti kahegi kema akave maletama mailokiya vaitama maiho.   
\p
\v 13 Nagaya YoniꞋna ikapinagati nago kea havugeno mage huno hie “Kagaya kea maꞋa huka kao mukiꞋa AnumayamoꞋene ailokaeꞋya nemaiya veaꞋmoꞋya menima aepa heꞋya falisaya veaꞋmoꞋya tusiꞋa muse hugahae.” huno humaine. Higeno Alu Aotage AvamuꞋmoꞋa mage hie “E, aliꞋya ali-mainaya yana neꞋataleꞋya maifalu hisageꞋya kanale kavaꞋma hu-mainaya yamoꞋa amakaiꞋene ugahae.” huno humaine.   
\s1 Anumaya KotiꞋa ma mopafima afule-mainea kaveꞋma hataka hisia kanamoꞋa ago falote humaine.  
\p
\v 14 Nagaya agogeno nago efeꞋage siatela nago vemoꞋa ikapinagati emainea kanoa vayaꞋmo atenea kano avamete hia kanoa siate maineno anute kava vayaꞋmogami tumano kula, kanileta yafateti talo humale tumano kula vaiteno ayapina aveꞋneꞋne huno fagagi-mainea naepe kaꞋyona ali-line.  
\v 15 Ali-linegeno nago ensole kanomoꞋa Anumaya Koti nopiti hati-lavino neꞋeno ani siateꞋma maiya kanohena ala kegefafiti mage huno hapaiye “MukiꞋa ma mopafi kaveꞋmoꞋa afule-mainegeno ani kave alisuna kana haneanagika kagayama ali-linana naepe fagagi humainea naepe kaꞋyotetila nesateꞋma humainea kavela alio.” huno hie.  
\v 16 Higeno siateꞋma maiya kanomoꞋa fagagi-mainea naepe kaꞋyotetila mukiꞋa ma mopafima afule-mainea kavela hataga humaine.   
\p
\v 17 Nehigeno nago ensole kanomoꞋa ikapinaga hanea mono nopiti hati-lavino elaviaꞋamo agaiꞋenena aniꞋa huno tusiꞋa kaꞋyona fagagino aveꞋneꞋne huno naepe kaꞋyona ali-lino emaine.   
\p
\v 18 NeꞋegeno nago ensole kanoa ataleꞋma kava nehia kanogino afuma heꞋya negaeyaya folamole maineleti neꞋataleno emaine. EaꞋamo fagagino aveꞋneꞋnea naepe kaꞋyoma ali-lia kanomofena ala kegefafiti mage huno hie “MukiꞋa mopafi nofi alagayagamoꞋa ago afule-maineafe kagaya ani naepe kaꞋyokaꞋa alika ani nofi alagayaga mo hataga huka halaꞋya huo.” huno humaine.  
\v 19 Higeno ani ensole kanomoꞋa naepe kaꞋyomaꞋa ali-lino ape huno mukiꞋa mopafima hanea nofi alagayaga hataga huno helafi-lino viaꞋamo veaꞋmoꞋya amaiyaletiꞋma aye lata-pageno timaꞋamoꞋma nelavia yafa yopa, Anumaya KotiꞋa kefo yafena tusiya huno aipa kafa huteno kefo yama nehaya veaꞋmogamina anonaꞋamima amamisia ala yafa yopafi mo malene.  
\v 20 Mo malegeno ala kumaꞋmona malaga ani nofi alagama aye lata-pegenoꞋa anima aye latapea kolamoꞋa tusiya huno lavino lavino laviaꞋamo timoꞋa hogino veaꞋmogami amayoꞋnaleꞋma nehaiya avamete huno hogino ayaꞋaya kotega tali hataleti (300) kilomita tavigeꞋna age-mainoe.   
\c 15  
\s1 SeveniꞋa (7) ensole vayaꞋmoꞋya seveniꞋa (7) havi yatafa atafa hulinae.  
\p
\v 1 Nagaya YoniꞋna nagola tusiꞋa tokiyaꞋage alegana avame yana ikapinaga falote higeꞋna agoana maꞋa humaine. SeveniꞋa (7) ensole vayaꞋmoꞋya anile maineꞋya seveniꞋa (7) havi yatafana veaꞋmogami haenagalafa falote hisia ali haviya humatesia yana atafa hulinae. Anima ali haviya humatesia yana haꞋno hisigeno Anumaya Kotina aipamoꞋma ata nelea yana agola haꞋno hugahie.   
\p
\v 2 Nagaya agoana nagola hageli kotuna galasi kana huno alave alave nehigeno amuꞋnoꞋafina ata nelegeꞋna age-mainoe. Ani kotute mukiꞋa veaꞋmoꞋya “Kefo afai afuene amayateti talo hu-malenaya amefeꞋenena agia alisaga ohugahunagi. Agiene napamaꞋaene taugafalega okaegahae.” huꞋyama ani afumona agase-mainaya veaꞋmoꞋya ani hagelimo agegayale heti-maineꞋya Anumaya KotiꞋma amaminea yaveꞋya atafa hu-lineꞋya yagamea humainae.  
\v 3 Ani veaꞋmoꞋya MoseseꞋa Anumaya Koti aliꞋya kanomo yagamene Sipi sipi nafaꞋnemo yagamene huꞋya maꞋa humainae  
\q1 “Ala Anumaya Kotigae tusiꞋa tokiyakaꞋa haneanagika mukiꞋa humainana yamoꞋa kanaleꞋya huka talo hanageta tagaya neꞋagonageno tamaꞋyoa neꞋaiye. MukiꞋa mopafi veaꞋmogamina ala sauve kanoꞋami maineka kava neꞋyagaika kagaikaꞋa auꞋava yakamoꞋa tamagelafa huno fatago humaine.  
\v 4 Ala kanomogae kagaikaꞋage nagokeꞋmoga kefo yana ohuka alu aotage kanoma mainana yafena hana kanomo kagaifena kolikaꞋa ohugahie? Hana kanomo kagai kagia alisaga ohugahie? MukiꞋa mopafi veaꞋmoꞋya kagaya fatago huka mainana auꞋava yakaꞋa ago age-mainaya yafe kagaitega eaꞋamoꞋya kagia alisaga hugahae.” huꞋya yagamefitila humainae.   
\p
\v 5 Yagamea nehageꞋna ikapinaga eteꞋna agoana mono nopina, kelamagema ali falote nehia nona, alu aotage seli nona yaki-mainegeꞋna age-mainoe.  
\v 6 NeꞋagogeꞋya seveniꞋa (7) ensole veaꞋmoꞋya seveniꞋa (7) yaꞋyaga veaꞋma ali haviya humatesaya yama atafa hu-linaya ensole vayaꞋmoꞋya mono nopitila hati-laviꞋya kumatega emainae. Ani veaꞋmoꞋya oniꞋya ohu kenamoꞋa alave alave huno efeꞋage humainea kena fai-lineꞋya kanileta yafateti talo humale nofila amaifiꞋyafale ayegalaki-lineꞋya emainae.  
\v 7 Ageno foꞋa (4) hamaimuꞋene anagaꞋmogami amuꞋnopitila nago kanomoꞋa eaꞋamo seveniꞋa (7) yopa kanileta yafateti talo humale yopayaga ali-lino amamine. Ani yopayagafina Anumaya KotiꞋa maige maige huno mainea kanomona haima vaigeno aipamoꞋa atama nelea yana ani yopafina havate-maine. Havate-mainegeno alino seveniꞋa (7) ensole veala ani yopayaga me mamine.  
\v 8 Me mamigeꞋya Anumaya Kotina tokiya hale yamaꞋaene himamuꞋaene halina kana huno ani mono nopina havate-maine. Havate-maineanagiꞋya nagoꞋa veaꞋmoꞋya ani nopinaga haiꞋya ofalenae. OfalenayanagiꞋya seveniꞋa (7) ensole veaꞋmoꞋya anima seveniꞋa (7) ali haviya humatesaya aliꞋyaꞋamia ali haꞋno hutesageꞋya veaꞋmoꞋya eteꞋya ani nopinaga hai-falegahae.   
\c 16  
\s1 Anumayamona haima neꞋvaiya yana seveniꞋa (7) yopafiti aliꞋya aihelafi-talene.  
\p
\v 1 NaꞋa higeꞋna havuana ikapinaga hanea mono nopiti nagola tusiꞋa agegefa aigeꞋna havugeno seveniꞋa (7) ensole vayafe mage huno hie “Tamakaya Anumaya Kotina haima vaigeno aipamoꞋa atama nelea yana seveniꞋa (7) yopafi hanegi alitama mopafi mo aitagu-feho.” huno hie.   
\p
\v 2 Higeno hagote molia ensole kanomoꞋa viaꞋamo ani yopaꞋafima hanea yana alino mopafi mo aitagu-fegeꞋya kefo afai afumo avoma amaugafaleꞋma kae-malenea veaꞋmoꞋya ani kefo afai afumo amefena “Anumayati mainane.” huꞋya agima alisaga nehaya veaꞋmogamina tusiꞋa kele amamu amale-maine.   
\p
\v 3 Amamuna amalegeꞋya mainageno anile molia ensole kanomoꞋa yopaꞋafima hanea yana alino hagelipi mo laki-talegeno ani hagelimoꞋa falimainaya veaꞋmogami kolamoꞋma hia kava huteno mukiꞋa tipima mainaya kafayaga faliꞋya faluti-mainae.   
\p
\v 4 Falutigeno anile tagufa (3) molia ensole kanomoꞋa yopaꞋafima hanea yana ala tima nelavia tipiꞋene kapaiꞋma nehagea tipiꞋene taki-talegeno ani liꞋyagamoꞋa kolamaꞋage ti hapae-maine.  
\v 5 NaꞋa higeꞋna havugeno titeꞋma kava yagai-mainea ensole kanomoꞋa mage huno hie “Anumaya Kotiga nayona mainananagika menia aniꞋa huka maineka kefo yana nohana Alu aotage kanogika kaiyekema humateka kefo yamo anonaꞋama hu-matana yana fatago huka nehane.  
\v 6 Ani veaꞋmoꞋya kagaikaꞋa alu aotage veaꞋnene amaune veaꞋnekaene hamayageꞋya fali-mainae. Faligeno ani veaꞋmogami kolamoꞋma takilavi-mainea yafe kagaya ani kefo yaꞋamimo anonaꞋamia neꞋamaminanagiꞋya ani kola tima nesayana kagaya kanale kava hu neꞋmatane.” huno humaine.  
\v 7 HigeꞋna havugeno afuma heꞋya kae salamanama hu neꞋataya folamoleti nago kemoꞋa falote huno mage hie “E, tamage mukiꞋa tokiyakaꞋa hanea Anumaya Kotiga kaiyekea fatago hulama huka hu neꞋamatana kano mainane.” huno humaine.   
\p
\v 8 HigeꞋna agogeno anile fo (4) molia ensole kanomoꞋa yopaꞋafitila yagefi ailaki-talegeno Anumaya KotiꞋa atalegeno yagemoꞋa tusiꞋa amukoꞋage huteno mukiꞋa veala teno amasagali-maine.  
\v 9 AmasagaligeꞋyagi veaꞋma kefo yamo anonaꞋamima amamisia tokiyaꞋama hanea Anumaya Koti agia aye haviya nehayanagiꞋya amakuꞋa aiyahae huꞋya Anumayamo agia alisaga ohunae.   
\p
\v 10 Ohageno faefu (5) molia ensole kanomoꞋa yopaꞋafima hanea yana kefo afai afumo siale taki-talegeno mukiꞋa ani kefo afai afumoꞋma kava humatenea kaiyaga tusiꞋa hani kigeꞋya agai veaꞋmoꞋya amaugafa amakatama aiya yafe amakaiꞋami amavefuꞋnafi hataga hatago huꞋya akafula ani-mainae.  
\v 11 NeꞋanigeno amaugafaleꞋenena amamuna amaleno amakatama aiya yafena ikapinaga mainea Anumaya Kotifena kamuge hatageꞋya vaitayanagi kefo yama humainaya yafena amakuꞋa aiyahae ohunae.   
\p
\v 12 Aiyahae ohageno sikisi (6) molia ensole kanomoꞋa yopaꞋafima hanea yana tusiꞋa lina Yufaletisi lima nelavia tipi taki-talegeno ani limoꞋa taꞋneno hau huteno ala kakefa falote humaine. Higeno yagema vaꞋyi nehilegati ala Sauve vayaꞋma esaya kamoꞋa falote humaine.  
\v 13 Falote higeꞋna nagaya neꞋagogeno tagufa (3) Kefo Avamula utu kana avamula nagola osifaꞋvemo avayafiti vaꞋyi higeno nagola kefo afai afumo avayafiti vaꞋyi higeno nagola havigegeꞋyama nehia aune kanomo* avayafiti vaꞋyi humaine.  
\v 14 VaꞋyi huteꞋya ani taliꞋa (3) Kefo AvamuꞋmoꞋya haiꞋya maineꞋya tokiyaꞋage avame yana nehuꞋya mukiꞋa ma mopafi Sauve vayateꞋma vayana ani vayala amavaleꞋya alitalu humategahe umainae. TusiꞋa tokiyaꞋama hanea Anumaya KotiꞋa ala tuma hisia kanafina Anumaya KotiꞋene tuma hisaya yafe melitalu humatenae.   
\p
\v 15 YisasiꞋa mage huno humaine “Haviho ‘Omegahie.’ hutama nehaya kanafina musufa kanomoꞋa neꞋea avamete kava huꞋna egahue. Egahuanagi ani kanafina kenaꞋamia omalenageꞋya alapaꞋagela maisaya veala amakayea ohisaya yafe menia nagaifema amakesa nehaviꞋya amaula ofaeꞋya kenaꞋamia fai-lisayana musena hugahae huꞋna nehue.” huno humaine.   
\p
\v 16 Utu kana Kefo AvamuꞋmoꞋya mukiꞋa kotegati ala Sauve veaꞋmogamina amavaleꞋya ayaꞋamoꞋya Yuta veaꞋmogami kefina Amagetoni huꞋya nehaya kumate melitalu humatene.   
\p
\v 17 AupaꞋa seveni (7) molia ensole kanomoꞋa yopaꞋafima hanea yana ikate hanea yasifi taki neꞋa-talegeno ikapinagama hanea mono nopitila ala kegefa falote huno mage hie “MukiꞋa yana hai haꞋno hie.” huno humaine.  
\v 18 Ani kea nehigeno aulumaya kotino ute ete higeno monagemoꞋa tusiya huno agea neꞋaigeno tusiꞋa imila ali-maine. VeaꞋmoꞋya ma mopafima mainaya kanafina aniꞋa augafa imila aligeꞋya oꞋagenayanagino mukiꞋa imila agaseno tusiꞋa imikefa ali-maine.  
\v 19 Aligeno ala kumala Papilonia* ali haviya huno tagufafi (3) ali fako higeno mukiꞋa ma mopafi ala kumaꞋyagaene alino haviya humatene. Anumaya KotiꞋa Papilonia ala kumapi maineꞋya kefo yama nehaya veafena agela okaninegi agesa havino haima neꞋvaiya yamoꞋa aipafina ata nelegeno kefo yaꞋamimo anonaꞋamia amamigeꞋya alimainae.  
\v 20 Ala imikefa aligeno mukiꞋa hagelimo amuꞋnopima hanea mopaene agoꞋyagaene fanane humainae.  
\v 21 TusiꞋa koꞋmopa, yafa ku kana huteno, ala alaisi ku kana huno kanaꞋage huno ikapinagati asaga hulavi hulavi hiaꞋamo veamogami amaugafale taviaꞋamo ali haviya humategeꞋya Anumaya Kotifena “Otahaiya kano mainane.” huꞋya kamugea hatageꞋya vaitenae.   
\c 17  
\s1 Tusiya huno kumaiya nehia aꞋmoꞋa kefo yamaꞋamo anonaꞋa ali-maine.  
\p
\v 1 SeveniꞋa (7) yopa atafa hulinaya ensole vayapiti nagoke ensole kanomoꞋa eaꞋamo nagaifena mage huno hie “Kagaya male egeꞋna kavelino. Ma kumai aꞋmoꞋa, timona avoyalega ala kumate mainea aꞋmoꞋa, kefo yamaꞋamo anonaꞋa alisia yafena nagaya kaveligahue.  
\v 2 MukiꞋa ma mopafima mainaya Sauve vayaꞋmoꞋya ani kumate mainaya veaꞋnenena tusiya huꞋya kumaiya heꞋya* vai neꞋayageꞋya ma mopafima mainaya veaꞋmoꞋyaenena ani kumate veaꞋnenena kefo yama nehaya kava huꞋya havilima neꞋya anegi-nagima nehaya kava humainae.” huno higeꞋna havi-mainoe.   
\p
\v 3 Nehavugeno Alu Aotage AvamuꞋmoꞋa nagaila Yoninia tokiyaꞋa namitegeno ani ensole kanomoꞋa navaleno vea omai kaꞋme kotega mo natene. Mo nategeꞋna nagaya nago akefa agoana haesa kefo afai afumo agupifi mainegeꞋna age-mainoe. Ani kefo afai afumo augafalela Anumaya Kotina kamugema hatageꞋya amakiya agia augafale kae-malenae. Ani kefo afai afumona seveniꞋa (7) anuꞋyaga hanegeno ani anuꞋyagalela teniꞋa (10) aveꞋyaga hane.  
\v 4 HanegeꞋna nagaya agoana ani akefamoꞋa oko kenaene haesa kenaene fai-lino maine. MiyamoꞋa hai-mainea seveliyaꞋene kanileta yafateti talo humale yaꞋene fai-linegeno augafalela aleꞋale nehigeno maiya akefa age-mainoe. Agogeno ayapina kanileta yafateti talo humale keꞋayola ali-linegeno kumai yama nehia yaꞋene havigu-nagu hiꞋmanaꞋage kefo yamaꞋaene ani keꞋayopina havate-maine.  
\v 5 Ani aꞋmo hanilela agaiꞋa agia avame kea mage huꞋya kae-malenae “Papilonia ala kumateꞋma mukiꞋa kumai yama nehaya yaꞋene ma mopafima kefo yama nehaya yaꞋenena itaꞋamoꞋe.” huno kae-malene.  
\v 6 KaegeꞋnama agoana ani aꞋmoꞋa mukiꞋa Anumaya Kotina alu aotage veaꞋnene, YisasiꞋma hulatenea mono kema hamanepaiya veaꞋnene hamaegeꞋya fali-mainaya veaꞋmogami kolana ani aꞋmoꞋa valu valu huno neteno havilima neteꞋya anegi-nagima nehaya kava higeꞋna ageteꞋna atali talu nehugeno namaꞋyoa aimaine.  
\v 7 NeꞋaigeno ani ensole kanomoꞋa mage huno hie naꞋa higeno kamaꞋyoa neꞋaiye? Nagaya ani aꞋmofeꞋene agupifima mainea afua, seveniꞋa (7) anuꞋyaga hanegeno ani anuꞋyagalela teniꞋa (10) aveꞋyaga hanea afuenefena falakino hanea kea hu falote huꞋna kahapaigahue.  
\v 8 Agana kefo afai afumoꞋa nayona maineanagino meni kanafina ago fali-maineanagino haenagaꞋa ayoꞋma omale komufitila hetino ataleno ehaisiaꞋamo hani yapima tegelege nehia atafina agola umaigahie. Umaigahianagi Anumaya KotiꞋa ma mopa taloma ohunea kanafima hanea avopina, maige maige hisaya hamaimuꞋma hanea veaꞋmogami amakima kae-malenea avopina, ma mopafi mainaya veaꞋnea amakima okaenea veaꞋmoꞋya ani kefo afai afuma agesayana atali huꞋya tusiꞋa amamaꞋyo aigahie. Ani afua nayona maineanagino menia ago fali-maineanagino haenagaꞋa eteno evaꞋyi hisia afai afue.  
\v 9 Kanale havi haviꞋyaꞋamima hanesia veaꞋmoꞋya mani yafena havilama huꞋya havigahae. Haviho. “Ani kefo afai afumona seveniꞋa (7) anumoꞋa seveniꞋa (7) agoꞋyale humaleno higeno ani kumai aꞋmoꞋa ani agoꞋyale maine.  
\v 10 NaꞋa higeno ani anuꞋyagamoꞋa seveniꞋa (7) ala sauve kava vaya mainae. MaineꞋya ani sauve vayapitila faefuꞋa (5) ago faligeno nagoke menia mainegeno nagokela yaufa falote ohune. Haenaga evaꞋyima hisiana osi kana kanoꞋa maigahie.  
\v 11 Maigahianagi kefo afai afumoꞋa nayona maineanagino menia ago fali-mainea afugino eiti (8) molia Sauve kano maineanagino seveni (7) molia Sauve anagapi maineanagino hani yapi visiaꞋamo tege-lege nehia atafi agola umaigahie.   
\p
\v 12 Agana teniꞋa (10) aveꞋmoꞋa teniꞋa (10) Sauve vaya maineꞋya menia yaufa kava aliꞋyana oꞋalinayanagiꞋya kefo afai afuene tokiyaꞋami aliteꞋya ani kava aliꞋyana aupa kana kanoꞋafi kava yagaiteꞋya atalegahae.  
\v 13 Ani teniꞋa (10) Sauve vayaꞋmoꞋya nagoke amaku amakesale maineꞋya tokiyaꞋamia kefo afai afumona amigahae.  
\v 14 AmiteꞋya ani Sauve vayaꞋmoꞋyaene kefo afai afuene ali nagopi ataleꞋya Sipi sipi nafaꞋnenema tuma hisayana Sipi sipi nafaꞋnemoꞋa, ala kava veaꞋmogamina kavaꞋami maineanagino ala Sauve veaꞋmogamina ala Sauve kanoꞋami mainea yafe ani luma hisayana amakaila amakasegahie. ‘Nagaitega eho.’ hunoꞋma huyogi-malenea veaꞋmoꞋya mukiꞋa kanafina efi efi huꞋya agai kema akave nemalaya veaꞋnene Sipi sipi nafaꞋnene ailokaeꞋya maineꞋya ani luma hisayana amakasegahae.” huno ani ensole kanomoꞋa higeꞋna havimainoe.   
\p
\v 15 Havugeno mage huno nahapaiye “Agana tiꞋyaga, kumai aꞋmoꞋa ani ti avoyaleꞋma mopale mainea timoꞋa, veafe humaine. KasagoꞋya veaꞋmoꞋya alu kote alu kote veaꞋnene, alu make lu make neꞋaiya veaꞋnene, alu maugafa lu maugafa kali-mai veaꞋnene elitalu huꞋya maine.  
\v 16 Anima teniꞋa (10) aveꞋyagama hanegeka agana teniꞋa (10) Sauve vayaꞋmoꞋyaene ani kefo afai afuene ali nagopi ataleꞋya ani kumai aꞋmona amaipa kafa huteteꞋya ali haviya hutegahae. HuteꞋya aluya huꞋya tua huteteꞋya kenaꞋa augafaletila hate-taleteꞋya augafa alagaꞋage mainesigeꞋya augafamona ameꞋa neteꞋya atafi kae-talegahae.  
\v 17 E, Anumaya KotiꞋa agaiꞋama humainea kemoꞋa tamage huno falote hisiafene huno ani amaku amakesa teniꞋa (10) Sauve vayaꞋmogamina amaminegeꞋya nagoke amakesageꞋya haviteꞋya ‘Ala kava kano maisie.’ huꞋya ani kefo afai afumona tokiyaꞋamia aminae. Amigeno kavama maisia yamaꞋa hanesigeno Anumaya KotiꞋa hamapai-mainea kemoꞋma falote huno tamagema hisia kana ani kefo afai afumoꞋa haꞋno hugahie.   
\p
\v 18 Ani akefa aganana tusiꞋa ala kava yagai-mainea kumala, mukiꞋa Sauve vayaꞋmogamina ago amakaseno hai-mainea kumafe nehie.” huno higeꞋna havimainoe.   
\c 18  
\s1 Papiloni kumaꞋmoꞋa ago haviya humaine.  
\p
\v 1 Ikapinagati nago ensole kanoa elavigeꞋna nagaya YoniꞋna agogeno ani ensole kanomoꞋa tusiꞋa tokiyaꞋa hanegeno elavinoꞋma eana yagemoꞋma aivasa nehia avamete huno konagali yamaꞋamoꞋa mopamona aivasa humaine.  
\v 2 Hu-malegeno ani ensole kanomoꞋa ala kegefafiti mage huno hie “Papilonia ala kumakefamoꞋa tusiya huno ago haviya hu-mainegeꞋya menia Kefo AvamuꞋyagaene nagoꞋa fali-mai afuyaga aye laga-feꞋya neꞋvaiya namayagaene ani kumapina ali vai-mainae.  
\v 3 Ani Papiloni veaꞋmoꞋya mukiꞋa kotega veafena ‘Tagayama nehuna kava hutama kumaima he auꞋava yamoꞋa hagaꞋage ti kana hu-mainegi neho.’ huꞋya hageꞋya ani kavaꞋma haya yamo ani kumala agola ali haviya humaine. MukiꞋa ma mopafi Sauve vayaꞋene aniꞋa huꞋya agaiꞋene kumai yana hu-mainayagiꞋya ma mopafi miyana tusiꞋa miya alisaya aliꞋya neꞋaliya veaꞋmoꞋya tusiya huꞋya kumai yana hu-liteꞋya haya yateti ala miyakefa ali-mainaya yafe ani kumala agola ali haviya hu-talenae.” huno humaine.   
\p
\v 4 Nagaya havugeno nago kemoꞋa ikapinagati mage huno humaine “MukiꞋa veaꞋnimogatama ani kumapitila neꞋataletama hati-lavitama malaga eviho. Havigu nagopi tamakaya afalu falu hutama mainesageno ani veaꞋmogami kefo yaꞋamimoꞋene huyafenagi ailokaetama ani veaꞋmogami kefo yamo anonaꞋami aliyafenagi hati-lavitama eviho.  
\v 5 Ani veaꞋmoꞋyama humainaya kefo yaꞋamimoꞋa ala itugefamoꞋma hia kava huno maleme maleme ikapi nehaiyanagino Anumaya KotiꞋa mukiꞋa ani kumate veaꞋmoꞋyama hu-mainaya kefo yafena agesa havino maine.  
\v 6 Anumaya Kotigae neꞋaganageno agoꞋma kefo yama humainea yamaꞋamona alika tolegeꞋya ali lokaeka hu-mainea avamete masufina takika amigeno neno.  
\v 7 Ani kumai aꞋmoꞋa agaiꞋa augafa alino nehaino ageno haꞋyema hia kavaꞋma hu-mainea yatetila kagaya aniꞋa huka augafa agata aisia yaꞋene tusiꞋa aviteno augafahema kalagi aisia yaꞋene amio. Ani aꞋmoꞋa agupinaga mage huno nehavie ‘Nagaya ala Sauve aꞋnemo siale mainoanagiꞋna megusa akefa omainoanagino nagaitela kana yamoꞋa falote hisigeꞋna nagaya avia oꞋategahue.’ huno agesa havimaine.  
\v 8 Havianagi ani kefo yama humainea yateti aupaꞋa nagoke yupa anonaꞋa agata aisia yana falote hugahie. Ani kumate mainaya veaꞋmoꞋya kasagoꞋya kaliene amaka tesia yaꞋene aliteꞋya falisageꞋya mukiꞋa veaꞋmoꞋya amahau huꞋya avi tegahae. AtamoꞋa Papiloni kumala tesagali-talegahie. E, tusiꞋa tokiyaꞋa hanea Anumaya KotiꞋa havino kaiyekea humateteno anima amaugafa amakata aisia yana tusi yate amamigahie.   
\p
\v 9 MukiꞋa Sauve vayaꞋmoꞋya ani kumai akefaenena kumaima heꞋya mukiꞋa kefo yaꞋenema humainaya Sauve vayaꞋmoꞋyama ani kumateꞋma kae-malesageno ata halinamoꞋma ageteꞋya tusiya huꞋya hamauna huteꞋya avia ategahae.  
\v 10 Ani veaꞋmoꞋya agatama aiya yama alia yafena tusiꞋa koli huteꞋya aluꞋale hetiꞋya maineꞋya mage huꞋya hugahae ‘Vaeha tahau hane tahau hane Papilonia ala kumala tokiyaꞋage kumaꞋmogagi nagoke yagefi kaugafa kagata yana anonakaꞋa ago ali-mainane.’ huꞋya hutegahae.   
\p
\v 11 Ma mopafima tusiꞋa miyama alisaya aliꞋya neꞋaliya veaꞋmoꞋya afeno yaꞋamima miya hisaya veaꞋnea omaigeꞋya ani kumafena amakesa havi havi huꞋya avia neꞋateꞋya amaipamoꞋa kanaꞋage hia yapi maigahae.  
\v 12-13 Ani afeno yama miya hisageꞋya monea alisia afeno yana kanileta yafateti talo humale yaꞋene efe yoleti talo humale yaꞋene miyamaꞋamoꞋa hai-mainea seveliyaꞋene sesuyagaene haesa ohaesa kenaene kaꞋyogaꞋyo humainea kenaene oko kenaene mukiꞋa kanale manaꞋage yosaene afumo avete talo humale yaꞋene miyamaꞋamoꞋa hai-mainea yosale talo humale yaꞋene haesa yafateti talo humale yaꞋene kapaleti talo humale yaꞋene tokiyaꞋage yafaꞋene manaꞋage kimamufaene hagaꞋage higeꞋya nenaya yamoꞋene manaꞋage halinama nehia yaꞋene manaꞋage masaveꞋene vaini tiꞋene atafi negayaya masaveꞋene taꞋnefa falauvaꞋene vitimo alagaene pulamakaene sipi sipiene hosi afuene hosimo avayuma nehia kalene veaꞋmogami amaugafa mukiꞋa miya higeꞋya nofipi maineꞋya miya oꞋali aliꞋyama neꞋaliya veaꞋnene, aliꞋya vaiyatete nehaya afenoꞋami miya hisaya veaꞋnea omaigeꞋya avia neꞋateꞋya amaipamoꞋa kanaꞋage humainae.  
\v 14 HumainageꞋya ani ala kumafena mage huꞋya hugahae ‘MukiꞋa tamahaꞋyema higetamama neꞋaliya afenoꞋyana ago tamahafaleꞋya haꞋno hutalae. Kanale miya afenotamiene konagali yatamiene ago haꞋno hianagitama nagoꞋene oꞋaligahae.’ huꞋya hugahae.   
\p
\v 15 HuteꞋya ani veaꞋmoꞋya ani ala kumapitiꞋma afenoꞋyaꞋamileti monema hu-hatiꞋyama neꞋaliya veaꞋmoꞋya ani ala kumateꞋma mainaya veaꞋmoꞋya kefo yamo anonaꞋamia amakatama aiya yana aliya yafe tusiꞋa koli huteꞋya aluꞋale hetiꞋya maineꞋya avia neꞋateꞋya kalagila neꞋaiꞋya hamauna hugahae.  
\v 16 NehuꞋya mage huꞋya hugahae ‘Vaeha tusiꞋa tahau nehane tahau nehane. Nayona kanale kenakaꞋa haesa ohaesa kenaene oko kenaene fai-lineka konagalima ali-maleneka kanileta yafateti talo humale yaꞋene kanale miyamaꞋamo hai-mainea seveliyaꞋene kaugafale vai-lineka konagalia ali-maleka nemainane.  
\v 17 Nemainanagi nagoke yagefi mukiꞋa ani ala mone afeno yakaꞋa mukiꞋa ali haviya hugatae.’ huꞋya hugahae.  
\p NehisageꞋya ‘MukiꞋa tipi kalefi kava vayaꞋene tipi kalema aliꞋya vai neꞋayaya vayaꞋmoꞋyaene ani tipi kalefima aliꞋya neꞋaliya yapiti miyamaꞋa ali-mainaya veaꞋnene aluꞋale heti-maineꞋya Papiloni kumala agegahae.  
\v 18 NeꞋageꞋya Papiloni kumala atamoꞋma teno asagaligeno halinamoꞋma muti muti hia yana neꞋageꞋya mage huꞋya hugahae ‘Ani kumala mukiꞋa kumala agase-mainea kumalageno teno ali haviya nehie.’ huꞋya hugahae.  
\v 19 NehuꞋya taꞋnefa kateꞋya amanupi aiteꞋya avia neꞋateꞋya hamauna nehuꞋya mage huꞋya hugahae ‘Vaeha ala kumaꞋmogae tusiꞋa lahau nehane.’ MukiꞋa tipi kaleyagamona amafaheꞋya anile visayaꞋamoꞋya miyaꞋamima ani kumategatila ala huꞋya neꞋaliyanagi nagoke yagefi haviya-tafana hane.’ huꞋya hugahae.   
\p
\v 20 Hugahayanagi tamakaya ikapinaga mainaya veaꞋmo-gatamaene Yisasina tamakuꞋa aminaya veaꞋmo-gatamaene Aposolo vayaꞋmo-gatamaene Anumaya Koti aune veaꞋmogatamaene ani kumaꞋma ali haviya hutalea yafena muse hiho. Ani ala kumaꞋmo tamakaila ali haviya hu nelamatea yafenagino Anumaya KotiꞋa kefo yamaꞋamo anonaꞋa ago amine hutama hiho.” huno humaine.   
\p
\v 21 Higeno nagola tokiyaꞋage ensole kanomoꞋa nagola tusiꞋa yafakefa alisaga huteno hagelipi hagaꞋyu hu neꞋataleno mage huno hie ani ala yafakefama hagaꞋyu hutaloa yamoꞋa Anumaya KotiꞋa ani avamete huno ani Papilonia ala kumala, alino tusiya huno ali haviya huteno alino hagaꞋyu hu-talenageno fanane hinageꞋya nagoꞋene veaꞋmoꞋya oꞋagegahae.  
\v 22 YaveꞋyamoꞋma agema neꞋaiya yaꞋene aluꞋa aluꞋa yagamema nehaya yaꞋene kapufama nehaya yaꞋene ufema nehaya yamoꞋenena nagoꞋenena agea aisigeꞋya ohavigahae. VeaꞋmoꞋya kagaipina nagoꞋene aliꞋyana oꞋaligahae. Talo tala huꞋya imuma kiya kanafima kema yeso nehisaya kea nagoꞋene ohavigahae.  
\v 23 Nayona kagai veaꞋmoꞋya miyana hu hatisaya aliꞋyama neꞋaliya veaꞋmoꞋya ma mopafina ala veaꞋne mainagetama tamakaya aluꞋa aluꞋa hanageke yama humatenaya yamoꞋa mukiꞋa veala ayemavataga hu-mainayafe Anumaya KotiꞋa tamakai kumala ali haviya hu-taleneanagino tamakai kumatela kaꞋniꞋmoꞋa nagoꞋene aivasa ohugahie. AꞋnema aligahe hageno aꞋmoꞋa vema aligahe higeꞋya musema nehaya kemoꞋa tamakaipina nagoꞋene falote ohugahie.   
\p
\v 24 Anumaya KotiꞋa ageana ani kumate mainaya veaꞋmoꞋya Anumaya Kotina amakuꞋa aminaya veaꞋnene agai amaune veaꞋnenena ma mopafina kasagoꞋya veaꞋnenena hamaeꞋya falimatenaya kolamoꞋa ani kumapina hanea yafe auhanageke yamaꞋamoꞋene hanea yateti Anumaya KotiꞋa ali haviya hutegahie.   
\c 19  
\s1 Ikapinaga mainaya veaꞋmoꞋya Papilonima haviya hia yafene muse humainae.  
\p
\v 1-2 Nagaya anile havugeno kasagoꞋya ikapinaga mainaya veaꞋmoꞋya ala kegefafiti mage huꞋya hae “Tagaya Anumaya Koti agia alisaga hisune. Anumaya KotiꞋa kaiyekema humategahena kanaleꞋya huno kelamage keleti fatago huno kaiyekea hu neꞋamateno ani kumai aꞋmona tokiyaꞋama hanegeno mukiꞋa ma mopafi veafena ‘Kefo yama hiho.’ huno ali haviya hu neꞋamatea yatetila Anumaya KotiꞋa ani kefo yamo anonaꞋa ago amine. Ani kumai aꞋmoꞋa Anumaya Koti aliꞋya veala hamaeno falimateneanagino ani yateti Anumaya KotiꞋa kefo yamaꞋamo anonaꞋa ago amine. Amineanagita Anumaya Koti agia alisaga hisune. Anumaya KotitimoꞋa agaiꞋage tokiyaꞋage hale yamo aepa maineanagino tagu tamena ago aligati-maineanagita agia alisaga nehune.”   
\p
\v 3 EteꞋya ala kegefaleti nagoꞋene mage huꞋya hae “Tagaya Anumaya Koti agia alisaga hisune. Ani kumala atama leno asagali-talia yapiti halinamoꞋa agola haige haige huno nehaiya yafe Anumaya Koti agia alisaga hisune.” huꞋya humainae.  
\v 4 NehageꞋya tueti foꞋa (24) kava vayaꞋmoꞋyaene foꞋa (4) hamaimuꞋene anagaꞋmoꞋyaenena ala sauve kanomo siale mainea Anumaya Kotite asaga hulaviꞋya amakoꞋya yemaineꞋya agia alisaga nehuꞋya mage hae “Tamagelafa huꞋya nehayanagita Anumaya Koti agia alisaga hisune.” huꞋya humainae.  
\v 5 Nehageno ala sauve kanomo sialeti nago kemoꞋa falote huno mage hie “Tamakaya Anumaya Koti aliꞋya neꞋalitama aiyafinagama mainaya veaꞋmogatamaene afa veaꞋnene tamakima hanea veaꞋnenena Anumaya Koti agi alisaga hiho.” huno humaine.   
\s1 Sipi sipi nafaꞋnemoꞋa aꞋne aligeꞋya kave talo tala hu-malenae.  
\p
\v 6 Anile nago kea havuana kasagoꞋya veaꞋmoꞋya alitalu huꞋya maineꞋya ailalupeꞋya haya kemoꞋa, timoꞋma anama nelavino agema neꞋaiya avamete nehuꞋya, monagemoꞋma nehia avamete huꞋya ala kegefafiti mage huꞋya hae “Anumaya Koti agia alisaga hisune. Anumaya Kotiti mukiꞋa tokiyaꞋa hanegeno kasagoꞋya kava veaꞋmogamina amakaseno agaiꞋage ala kava kano maineanagita agia alisaga hisune.  
\v 7 Sipi sipi nafaꞋnemoꞋa* aꞋma alisia kanamoꞋa ago falote higeno alisia aꞋmoꞋa ago talo tala huno maineafe tagaya tusiꞋa muse nehuta taipa kanale yapiti yagamea huta Anumaya Kotina tokiyaꞋage hale yamaꞋa hanea agia alisaga hisune.  
\v 8 Anumaya KotiꞋa oniꞋya ohuno efeꞋage humainea kena ani aꞋmona amigeno fai-line.” huꞋya humainae. Ani kenahema hiana Yisasina amakuꞋama amitafa huteꞋya alu aotage veaꞋnema fatago huꞋya nemaiya veaꞋmogami auꞋavafe humaine.   
\p
\v 9 Anile ensole kanomoꞋa Yisasina amakuꞋa aminaya veafena mage huno nahapaiye “Kagaya mani kea avopi kao. ‘Sipi sipi nafaꞋnemoꞋa aꞋma alisia imua ago kimalegeno ‘EhoꞋ huno ke humalenagiꞋya esaya veaꞋmoꞋya tusiꞋa muse hisae.’ Mani kea Anumaya Koti kelamage kea hugeka nehavine.” huno humaine.  
\v 10 HigeꞋna nagaya ani ensole kanomo agia alisaga hugahe aiyafi asaga hulaviꞋna nagoꞋya yemaugeno “AꞋaogi kagaya naꞋa ohuo. Nagaya kagaiꞋene kafu-kaganaꞋyaenena, Yisasi kema havitama atafa hu-linetama huhaletama nehaya veaꞋmogatamaene nagoke aliꞋya neꞋaluna kano mainogi nagai nagia alisaga ohuganagi Anumaya Koti agiꞋage alisaga huo. YisasiꞋma humainea kemoꞋa Anumaya Koti kema huhaleꞋya hisaya tokiya veaꞋmogami amamine.” huno nahapai-maine.   
\s1 YoniꞋa ageana nago kanomoꞋa efe hosimo agupifi mainegeno agemaine.  
\p
\v 11 IkamoꞋa aihagalo higeꞋna agogeno nagola efeꞋage hosimoꞋa mainegeꞋna age-mainoe. Ani hosimo agupifima maiya kanomo agimoꞋa maꞋa humaine “Efi efi huno kanale aliꞋya neꞋalia kanoe. Kelamage kegeꞋya nehia kanoe.” huꞋya agia aye-mainae. Ani kanomoꞋa fatago huno kaiyekea humateno nagoꞋa veaꞋmoꞋyaenema tuma hisiana fatago yateti huno tua nehie.  
\v 12 AulagamoꞋa atamo kaꞋni kana huno aiha nelegeno anutela ala Sauve vayaꞋmogami tumano kuꞋyaga kasagoꞋya vai-linegeno augafalela nago agia kae-malegeno ani agia agaiꞋage havilinea agi haneanagiꞋya mukiꞋa veaꞋmoꞋya ani agia ohavinae.  
\v 13 AgaiꞋama fai-linea kolamoꞋa ayaꞋaya kenaꞋale tusiya hu-mainegeno Anumaya Koti aepama hugafino humainea yafe agima ayayana “Anumaya Kotina keꞋae.” huꞋya agia ayemainae.  
\v 14 Ikapinaga ati vayaꞋmoꞋya efe hosiyagamo agupifi maiteꞋya kanaleꞋya huno efeꞋage huteno oniꞋya ohu kena, faili faili huꞋya akavela umainae.  
\v 15 NeꞋvageno mukiꞋa ma mopafi veaꞋnema hamaesia aveꞋneꞋne humainea naepea avayafina aniline. Ani-lineanagino amakaseno hagote Sauve kano maineno tokiyaꞋage huno mukiꞋa veaꞋmogamina kava humategahie. Humateneno veaꞋmoꞋya nofi alagayaga amaiyaletiꞋma aye lata-pageno timaꞋamoꞋma nelavia avamete kava huno ani kanomoꞋa tusiꞋa tokiyaꞋama hanea Anumaya KotiꞋa haima vai neꞋamatea kame vayaꞋa kefo yamo anonaꞋamia amamigahie.  
\v 16 NeꞋamamino kenaꞋaleꞋene aiya amoteꞋenema kae-malenea agimoꞋa maꞋa humaine “Ala Sauve vayaꞋmogamina ala Sauve kanoꞋamie. Ala kava veaꞋmogamina ala kavaꞋami mainea kanoe.” huno agia kae-malene.   
\p
\v 17 Kae-malenegeꞋna neꞋagogeno nago ensole kanomoꞋa yagemo aufi hetino mukiꞋa ikamo amuꞋnote haleꞋya vai-yayea namayagahena mage huno hie “Tamakaya Anumaya KotiꞋa ala kaveꞋma taloma humalea kavetela melitalu hiho.  
\v 18 Melitalu hutama fali-mainaya Sauve veaꞋnene ati veate kava veaꞋnene mai-lokiya vaiꞋya nemaiya veaꞋnene hosi afuyagaene ani hosimo agupifi nemaiya vayaꞋene, nofipi maineꞋya miya oꞋali aliꞋya neꞋaliya veaꞋnene afaꞋa mainaya veaꞋnene, ala amakiene veaꞋnene, osi amakima hanea veaꞋnene mukiꞋa falisagetama amakaila amaugafamo amamela negahae.” huno humaine.   
\p
\v 19 HigeꞋna nagaya agoana ani kefo afai afuene ma mopafi Sauve vayaꞋene ati vayaꞋamienena efe hosimo agupifima maiya kanoene ati vayaꞋaene tu hugahe melitalu humainae.  
\v 20 NaꞋa hayanagi anima efe hosimo agupifima maiya kanomoꞋa kefo afai afuene havigegeꞋyama nehia aune kanoene alino nofi hunatene. Ani kefo afai afumoꞋa hapaigeno ani havigegeꞋyama nehia aune kanomoꞋa tokiyaꞋage avame yana humaine. Nehuno anima tokiyaꞋage avame-name yama humainea yateti amaugafalela kefo afai afumo agia kae-malenageꞋya kefo afai afumona amemaꞋamo agima alisaga nehaya veaꞋnena havige aye mavataga humaine. Anima aye mavatagama humainea kefo afai afuene havi aunema laga humainea kanoene hanaegeꞋana ofalinaꞋagi afaꞋa hanaimula hanegeꞋya anavaleꞋya tusiꞋa komugefa hiꞋmanaꞋage yafaꞋyagama hanegeno atama tegelege nehia komufi anasaga huno vai-talenae.  
\v 21 Vai-taleteno efe hosimo agupifima maiya kanomoꞋa mukiꞋama melitalu humainaya ati vayaꞋmogamina ayaꞋaya naipea avayafina ani-lineanagino ani naipeleti hamaegeꞋya fali-mainae. FaligeꞋya mukiꞋa namayagamoꞋya ani veaꞋmogami amaugafa aye laga-feꞋya nageno tusiya huno amamupa-napa ayemaine.   
\c 20  
\s1 Satanina vani tauseniꞋa (1,000) kafu nofi huteno maine.  
\p
\v 1 Nagaya YoniꞋna agogeno nago ensole kanoa ikapinagati elavi-maine. Ani kanomo ayapina ayola omale komule ki nofiꞋene ayaꞋaya seni nofiꞋene hanegeno elavi-maine.  
\v 2-3 ElaviaꞋamo ani osifaꞋvea metafa humaine. Ani osifaꞋvea ehe kanafima mainea osifaꞋvea kame kanotigino agia SataniꞋe. Ani Satanina metafa huno tokiyaꞋage seni nofila kiteteno anima ayoꞋma omale komufina asaga huno vai-taleteno avaya tileno tokiyaꞋage hutegeno SataniꞋa vani tauseniꞋa (1,000) kafu ani komufina nofipi maineanagino ani kanafina veaꞋmogamina havigea aye mavataga ohugahianagino vani tauseniꞋa (1,000) kafuma haꞋno hutesigenoꞋa ani komufitila atalesigeno aupa kana kanoꞋafi ute ete hugahie.   
\p
\v 4 Anile nagaya agoana nagoꞋa veala ala sauve vayaꞋmogami siale mainageno Anumaya KotiꞋa kaiyekema humateꞋya ali fako hu-matesaya aliꞋyamo tokiya amamine. Ani veaꞋmoꞋya Yisasina amakuꞋa amiteꞋya agai kene Anumaya Koti kene hamapai-mainaya yatetiꞋma amakeꞋya hataga hageꞋya falimainaya veaꞋmogami amamena age-mainoe. Ani amamema agoa veaꞋmoꞋya kefo afai afuene talo hu-malenaya ameꞋene agiene alisaga ohuꞋya kefo afai afumo agienema hamanileꞋene amayateꞋenema omalene. Omalea veaꞋmoꞋya eteꞋya hamaimula aliteꞋya ala kava veaꞋne maineꞋya KalaisiꞋene vani tauseniꞋa (1,000) kafua kava yagaiꞋya maigahae.  
\v 5 Ani veaꞋnema heti-mainaya kana hagote-lamateꞋya fali-mainaya veala hetisaya kana hane. Haneanagi nagoꞋama fali-mainaya veaꞋmoꞋya ani kanafina heotigahagi vani tauseniꞋa (1,000) kafumoꞋa haꞋno hu-tesigeꞋya hetigahae.  
\v 6 Anima hagoteꞋya hetisaya veala Anumaya Kotina alu aotage veaꞋneꞋa mainayanagiꞋya tusi muse hugahae. Anumaya KotiꞋa tegelege nehia atafina amatesigeꞋya nagoꞋene eteꞋya tole molia kanalela ofaligahae. OfaligahayanagiꞋya Anumaya Kotigani Kalaisigani anakia alisaga nehuꞋya aliꞋya veaꞋani maineꞋya vani tauseniꞋa (1,000) kafua KalaisiꞋene sauve kava maigahae.   
\s1 Satanina agola ali haviya hutene.  
\p
\v 7 HaenagaꞋa vani tauseniꞋa (1,000) kafumoꞋa haꞋnoma nehigenoꞋa Satanina nofiꞋma hutenea nopitila atalesigeno ehaigahie.  
\v 8 Hati-lavino visiaꞋamo mukiꞋa mopaene mopaene mainaya veaꞋmo-gami amakia Kogi nofi veaꞋnene Magogi nofi veaꞋnene SataniꞋa havige huno aye-mavataga hisiaꞋamo “Melitalu hutama tu hiho.” huno amavaleno melitalu hu-matesigeꞋya ani veaꞋmogami napamoꞋa ti kahaepa kana hu-maineanagiꞋya huyo okigahae.  
\v 9 Ani veaꞋmoꞋya mukiꞋa kotega vai neꞋayeꞋya Anumaya Kotina amakuꞋa aminaya veaꞋmogami kumala, Anumaya KotiꞋa muse nehia ala kumaꞋmona meli kagiꞋya amavayagigahayanagi ikapinagati atamoꞋa elavisiaꞋamo ani veaꞋmogamina tesagali haꞋno hugahie.  
\v 10 HaꞋno hinageno Anumaya KotiꞋa Satanina, havigema aye mavataga humainea kanomona, ata neleno hiꞋmanaꞋage nehia yafaꞋyagama tegelege nehia komufina asaga huno vaigahie. Ani komufina kefo afai afuene havigema nehia aune kanoene mainaꞋa komufinagino ani lagufa (3) vayala anifinaga maineꞋya kegeꞋene felugaene mukiꞋa kanafina agola amagata aige aige hisia yamoꞋa hanetafa huno hanemategahie.   
\s1 Anumaya KotiꞋa tusiꞋa kaiyeke humategahie.  
\p
\v 11 Anile nagaya YoniꞋna himonafi kana yapi agoana ala efeꞋage ala Sauve kanomo sia hanegeno ani siale mainea kanoa age-mainoe. Agogeno mopamoꞋene ikaꞋmoꞋenena agai aulela faleꞋana fanane huꞋana nagoꞋene omaletafa humainaꞋe.  
\v 12 Nagaya fali-mainaya veaꞋma agoana amaki hanea veaꞋnene, amakima omale veaꞋnene, ala Sauve kanomo aule heti-mainageno ensole vayaꞋmoꞋya avoꞋyaga ali vakaye-mainae. Nago avona, maige maige hisaya hamaimuꞋma hanea veaꞋmogami amakima hanea avoꞋene vakayeꞋya ani avopina agoꞋma humainaya auꞋava kavaꞋamimo kema kae-malenaya keleti fali-mainaya veala Sauve kanomo siale maiya kanomoꞋa kaiyekeꞋamia fako humatene.  
\v 13 Hage lipima fali-mainaya veala ani limoꞋa amatalegeꞋya uvaꞋyi huꞋya mo heti-mainageꞋya fali yamoꞋene fali-mainaya veaꞋmoꞋya neꞋvaya kotegaene anakaipima mainaya veaꞋmogamina amatalaꞋageꞋya eteꞋya hetigeno Anumaya KotiꞋa humainaya auꞋava yateti kaiyekeꞋamia fako humatene.  
\v 14-15 Kaiyekea humateteno mukiꞋa veaꞋmogami amakimoꞋa maige maige hisaya hamaimuꞋma hanea veaꞋmogami amaki hanea avopima amakima okaenesaya veala Anumaya KotiꞋa atama tegelege nehia komufi amavaleno hagaꞋyu huma-talegahie. Fali yaꞋene fali veaꞋmoꞋya unemaiya koꞋene ata tegelege nehia komufi anasaga huno vai-talesigeꞋana haꞋno hutafa hugaꞋe. Ani atama nelea komufima visayana tole (2) yupa eteꞋya faligahae.   
\c 21  
\s1 Haegafa ikaꞋene mopaene falote hugahie.  
\p
\v 1 Nagaya YoniꞋna agoana hagotenoꞋma hanea ikaꞋene mopaene hage limoꞋene fanane higeno haegafa ikaꞋene mopaene age-mainoe.  
\v 2 Nagaya alu aotage kumala, haegafa Yelusalemu, Anumaya KotiꞋa ikapinagati ataleno elavigeꞋna agoe. Agogeno aꞋmoꞋa vema aligahe kanale kenama fai-lineno kanale konagali ali-maleno veleꞋma neꞋvia augafa kava huno elavigeꞋna age-mainoe.  
\v 3 Nagaya havugeno ala sauve kanomo sialeti nago ala kegefafiti mage huno hie “Menia Anumaya KotiꞋa veaꞋnene tokaeno maigahie. Ani veaꞋmogami amuꞋnopi mainesigeꞋya mukiꞋa veala agaiꞋa veaꞋne maisageno Anumaya KotiꞋami maigahie.  
\v 4 Maineno amaunua aye haꞋmi-talesigeꞋya nagoꞋene veala ofaligahae. AmaipamoꞋa kana ohinageꞋya avia oꞋategahayanagino amakata aisaya yamoꞋenena haꞋno hugahie. Nayoma nemaiya augafa auꞋava yamoꞋa ani kanafina haꞋno hugahie.” huno hu-maine.   
\p
\v 5 Higeno ala Sauve kanomo sialeꞋma maiya kanomoꞋa mage huno hie “Haviho nagaya mukiꞋa yana ago aliꞋna haegafaꞋage hu-maluanagino haegafa huno hanegahie. Mani kea tamage nehue. MukiꞋa veaꞋmoꞋya haviꞋya amakupi maleꞋya amametiti hisaya yafe mani kelamage ke nehugi kae-malo.”  
\v 6 Mage huno nahapaiye “MukiꞋa aliꞋyania hai alivaya aye-mainoe. Nagaya mukiꞋa tokiyamona aepaꞋa mainoanagiꞋna kava yagai-maineꞋna mukiꞋa yana ali vayayesoa kano mainogi uhagoteꞋna maiteꞋna haenagalafa mainoe. VeaꞋmoꞋya tifema amakesigeꞋya hamaimu alisaya tina kapaiꞋma nehagea tinagiꞋya miya ohugahagi afaꞋa amamisugeꞋya negahae.  
\v 7 VeaꞋmoꞋya SataniꞋene tuma huꞋya agasesayana nagaya mani kanale yaꞋyaga afaꞋa amamigahue. AmamiteꞋna nagaya AnumayaꞋami maisugeꞋya amakaya nagai nafaꞋneyaga maigahae.   
\p
\v 8 Maigahagi koli nehaya veaꞋnene, nagaifema haviꞋya amakupima nomalaya veaꞋnene, amakuꞋamo oniꞋyaꞋage humai veaꞋnene, veaꞋma hamaeꞋya falimate veaꞋnene, kumai heꞋya vai neꞋayaya veaꞋnene, hanageke kavaꞋma nehaya veaꞋnene, ago fali-mainaya veafe ‘Anumayati maine.’ huꞋya amakisana neꞋvaiya veaꞋnene, havigeꞋage veaꞋnene hiꞋmanaꞋage atama nelea yafaꞋyagamoꞋa atama tegelege nehia komufi hanea yate taviꞋya maigahae. Ani veaꞋmoꞋya hagoteꞋya fali-mainayanagiꞋya ani atama nelea komufima visayana tole (2) yupa eteꞋya faligahae.”   
\s1 YoniꞋa haegafa Yelusalemua ikapinagati age-maine.  
\p
\v 9 Anile seveniꞋa (7) yopafi, haenagalafama Anumayamona hai vai-mateno ali haviya humatesia yamaꞋa hanea yopayagama atafa hu-linaya ensole veapiti nago kanomoꞋa nagaifena mage huno hie “Kagaya egeꞋna Sipi sipi nafaꞋnemoꞋa menima aꞋma alitesia aꞋnea kavelino.” huno hie.  
\v 10 HigeꞋna Alu Aotage AvamuꞋmoꞋa tusiya huno natafa huteno navaleno nagola anayapi hai-mainea agoꞋyafi mo nateteno alu aotage kumala, Yelusalemua, Anumaya Kotitegati ikapinagati ataleno elavia kumala naveli-maine.  
\v 11 Nave-ligeꞋna agoana Anumaya Kotina tokiyaꞋage hale yamaꞋamoꞋa ani kumatela aivasa humaine. Hale yamaꞋamoꞋa tusiya huno aluꞋa augafa kava huno ala miyamo hai-mainea yafatetiꞋma aivasa nehia avamete kava humaine. Ani yafamo agia yasipa taugosama neꞋagona galasimoꞋma nehia kava huno alave alave higeꞋna halegeꞋna age-mainoe.  
\v 12 NeꞋagogeno ani ala kumatela kegiꞋya anayapi hu-malageno hane. Ani kegiꞋya kovefina tuelufuꞋa (12) fiana hane. Ani fiamo amete ametela ensole veala hetiꞋya maite maite humainae. Ani fitatela tuelufuꞋa (12) Isaleli nofi veaꞋmogami amakia kae-malenae.  
\v 13 Ani kegiꞋyafima hanea fiana yagema vaꞋyi nehilega tagufa (3) fiane. Yagema tavi nefalea kaiyaga tagufa (3) fia hane. Aluga aluga haopalega nago haopalega tagufa (3) fia hanegeno nago haopalega tagufa (3) fia hanegeno humaine.  
\v 14 Ani kegiꞋya ala kumateꞋma aye-govema huꞋya kegiꞋyama humalayana hagoteꞋya tuelufuꞋa (12) yafana amalaguma aimale yatela maleteꞋya kegiꞋya hu-malenae. Ani yafatela Sipi sipi nafaꞋnemona tuelufuꞋa (12) aposolo vayaꞋmogami amakia kae-malenae.   
\p
\v 15 NagaiꞋenema kea kea hia ensole kanomoꞋa ani kumaꞋene kegiꞋyaene fiaꞋene maleno agege gege huno hapaligahe kanileta yafateti talo humale kaꞋyona ali-line.  
\v 16 Ali-lino eaꞋamo me maleno ageana ani ala kumala ayaꞋayaꞋamoꞋene nago kaiyagaꞋamoꞋene anayafima hai-maineaꞋamoꞋenena nagotineno nago avamete tueti tu hataleti (2,200) kilomita higeno mukiꞋamoꞋa nago avamete humaine.  
\v 17 Higeno maleno neꞋagea kaꞋyoteti ani kegiꞋyamona maleno ageana amegama hanemamoꞋa veaꞋmoꞋyama maleꞋyama neꞋagaya augafa kava huno vani hataleti fotifo (144) mita humaine.   
\p
\v 18 Ani kumate kegiꞋya Anumaya KotiꞋma hu-maleana ala monemo hai-mainea yafana yasipae nehaya yafateti hu-malene. Hu-maleteno ani kumatela kanileta yafateti ki-malegeno aivasa huno alave alave hia yamoꞋa galasimoꞋma hia kava humaine.  
\v 19 Ani ala kumateꞋma amalagu aimale yateꞋma hu-maleana kegiꞋyale malenaya yafana ala miyakefa hai-mainea yafateti malete malete huno humalene. HagotenoꞋma malegaꞋmae-malenea yafamo agia yasipa. Anima tole molia yafana oko yafamo agia sapaiya malene. Anile tagufama (3) molia yafana nagola efeꞋage yafamo agia agetie huno malene. Anile foa (4) molia yafana yosa haisa yafamo agia emelalie huno malene.  
\v 20 Anile faefu (5) molia yafamoꞋa efeꞋene haesaꞋene havigu humainea yafamo agia satonikisie huno malene. Anile sikisima (6) molia yafana haesa yafamo agia konilianie huno malene. Anile seveni (7) molia yafana kanileta yafamo agia kalisolaitie huno malene. Anile eiti (8) molia yafana yosa haisa yafamo agia pelie huno malene. Anile naeni (9) molia yafana nagola kanileta yafamo agia topasie huno malene. Anile teni (10) molia yafana yosa haisa kaliteno kaniletamaꞋa hanea yafamo agia kalisopelesie huno malene. Anile aleveni (11) molia yafana oko yafamo agia haiyasinie huno malene. Anile tuelufuma (12) molia yafana haesa yafamo agia ametisie huno malene.  
\v 21 Ani kumaꞋmo kegiꞋyaleꞋma hanea fita tuelufuꞋa (12) fitmona miyamaꞋamoꞋa hai-mainea seveliyateti talo humale fita hane. Nagoke nagoke fitalela nagoke ala seveliyateti talo humalene. Ani kumateꞋma visaya katela kanileta yafateti talo hu-malenegeno alave alave nehigeno akalo kateꞋma he-nemalaya galasimoꞋma hia kava higeꞋya age hagalo huꞋya age-mainae.   
\p
\v 22 Agogeno ani kumatela nagola mono nona omalegeꞋna age-mainogi tusiꞋa tokiyaꞋa hanea Anumaya KotiꞋene Sipi sipi nafaꞋnene ani kumatela mainaꞋageꞋya mukiꞋa veaꞋmoꞋya anakai anakima alisaga haya yafenagino mono no kana huꞋana mainaꞋageꞋna age-mainoe.  
\v 23 Agogeno ani ala kumatela yagemoꞋene ikamoꞋene aivasa hisia aliꞋyaꞋania omalegi Anumaya Kotina tokiyaꞋage hale yamaꞋamo ani kumatela tusiya huno aivasa hu-maigeno Sipi sipi nafaꞋnemoꞋa ani kumate kaꞋnila maine.  
\v 24 MainaꞋageno ani kumateti hale yamo aivasa hu-mainegeꞋya mukiꞋa koteti veaꞋmoꞋya vai neꞋyesageꞋya mukiꞋa ma mopafi Sauve vayaꞋmoꞋya kanale-nale yaꞋamia aliꞋya ani kumate esaꞋyaꞋamoꞋya emaigahae.  
\v 25 Mainesageno ani kumatela hanina okigahianagiꞋya ani kegiꞋyamo fita aliꞋya okigahae.  
\v 26 MukiꞋa veaꞋmoꞋya konagali yaꞋamiene ala amakiene aliꞋya ani kumatekeꞋya egahae.  
\v 27 Egahayanagi kefo yamaꞋageꞋma nehaya veaꞋnene, amakuꞋamo oniꞋyaꞋage hu-mainea veaꞋnene, havigeꞋage veaꞋnenena ani kumatela ometafa huꞋya omegahae. Omegahagi Sipi sipi nafaꞋnemo avopima, maige maige hisaya hamaimuꞋma hanea avopima amakima kae-malenesia anagaꞋmoꞋya amakaiꞋamige ani kumatela ehaigahae.   
\c 22  
\s1 YoniꞋa hamaimu amamisia tiꞋene yosaene agemaine.  
\p
\v 1 Anile ani ensole kanomoꞋa nagola ala tikefa, hamaimu neꞋamamia tina naveli-maine. Ani limona telelalayamaꞋa omalegeno galasifima age-hagalo nehia kava nehigeno ani limoꞋa Anumaya KotiꞋene Sipi sipi nafaꞋnemogani mainaꞋa sialeti ani limoꞋa elavi-maine.  
\v 2 Elavia timoꞋa aiyayeno ala kumaꞋmo kamona amuꞋnopi nelavigeno ani timona aluga aluga agegayale hamaimu neꞋamamia yosayaga hane. Ani yosayagamoꞋa nago kafumo aguꞋafina tuelufuꞋa (12) kanale ikamaꞋahe ikamaꞋahe ani alagamoꞋa afula neleane. Ani yosamo haisamoꞋa mukiꞋa kotega veaꞋma kali alisagenofena alino falu hu-matesia yosa haisa hane.   
\p
\v 3 NagoꞋa Anumaya KotiꞋa hinageno ali haviya humatesia yana omalegahigi Anumaya KotiꞋene Sipi sipi nafaꞋnene nemaiꞋa sialatana ani kumatela hanesigeꞋya Anumaya Koti aliꞋya veaꞋmoꞋya agia alisaga nehuꞋya maigahae.  
\v 4 MaineꞋya Anumaya Koti aufina neꞋagesageno agaiꞋa agia hamanilela kaemategahie.  
\v 5 Ani kumatela nagoꞋene hanina okigahie. Anumaya Koti hale yamoꞋa aivasa humategahianagiꞋya nagoꞋene kaꞋnila hanagalisaya yaꞋene yagemoꞋenena aivasa ohugahie. Amaku amamema agigati-mainea veaꞋmoꞋya agola kava yagaiꞋya maigahae.   
\s1 YisasiꞋa aupaꞋa huno egahie.  
\p
\v 6 Ani ensole kanomoꞋa mage huno hie “Manima nehavina kea kelamage kea hanegeka kagupi malesana ke hane. Anumaya KotiꞋa amaune veaꞋneꞋahena ‘NaꞋa hutama hamapaiho.’ huno amaku amakesa neꞋamamia kanomoꞋa ensole kanoꞋamona agai aliꞋya veaꞋnele hutegeno eaꞋamo mukiꞋa yamoꞋa aupaꞋama falote hisia yana amave-lisiafene huno hutegeno umaine.”  
\v 7 Haviho. YisasiꞋa mage huno humaine “Nagaya aupa kanafi egahue.” huno higeꞋna nagaya mage hue “NagoꞋa veaꞋmoꞋya Anumaya KotiꞋa haenaga falote hisia yafe mani avopima hu-mainea kemo akave nemalesaya veaꞋmoꞋya tusiꞋa muse hugahae.”   
\p
\v 8 Nagaya YoniꞋna ani yaꞋyaga ageteꞋna mani kea ago havimainoe. MukiꞋa ani yana nave-ligeꞋna ageteꞋna havimaineꞋna ensole kanomo agia alisaga hugahe aiyaꞋafi ape humainoe.  
\v 9 Huanagi ani ensole kanomoꞋa mage huno hie “Kagaya naꞋa ohuo. Nagaya kagaiꞋene amaune kafu-kaganaꞋyaene mukiꞋa mafima Anumaya Koti avopima hanea kemo akave nemalaya veaꞋnene aliꞋya amafaluꞋna mainoanagika nagai nagia alisaga ohuganagi nagoke Anumaya Kotina agaiꞋage agigeꞋya alisaga huo huno hie.”  
\v 10 Huteno mage huno hie “Manima Anumaya Koti avopima hanea kemoꞋa aupaꞋa falote hisia yafe kagaya ani kea fala okio.  
\v 11 Ani kanamoꞋa aupaꞋa falote hugahe nehiafe kefo yama nehisaya veala nagoꞋene ani kefo yana maiꞋya hisae. Kumai yama nehisaya veala ani kava maiꞋya hisae. Fatago kavakeꞋyama nehisaya veala ani kavakeꞋya maiꞋya hisae. Alu aotage auꞋava yapima nemaisaya veaꞋmoꞋya nagoꞋene ani kava nehuꞋya maisae.” huno humaine.  
\v 12 Nehigeno YisasiꞋa mage huno hie “Haviho nagaya aupaꞋa esuana mukiꞋa veaꞋmoya hu-mainesaya avamete amamisua anonaꞋamia aliꞋna egahue.  
\v 13 Nagaya mukiꞋa yamona aepaꞋa maiteꞋna kava yagai-mainoanagiꞋna mukiꞋa aliꞋyana aliꞋna avaya-yesua kano mainoe. UhagoteꞋna maitena haenaga-lafana mainoe.  
\v 14 KasagoꞋya veaꞋmoꞋya kefo yaꞋamihema haviꞋya amakuꞋama seseꞋma humalenesaya veaꞋmoꞋya musena hugahae. AmakuꞋa agoꞋma sese hu-malenayafe hamaimu amamisia yosamo alaga aliꞋya neneꞋya ala kumaꞋmo fiatela afaꞋa hai falegahae.  
\v 15 Hai falegahayanagi kefo yamaꞋage veaꞋnene, hanageke kava nehaya veaꞋnene, kumai heꞋya vaineꞋayaya veaꞋnene, vea hamaeꞋya falineꞋamataya veaꞋnene, ago fali-mainaya veafe ‘Anumayati maine.’ huꞋya amakisana neꞋvaiya veaꞋnene havigehe muse huꞋya akave nemalaya veaꞋnene ani kumaꞋmona malaga maigahayanagiꞋya Anumayamo ala kumatela haiꞋya omaigahae.  
\v 16 Nagaya YisasiꞋna ensole kanoꞋnimona hutogeno tamakaitega eaꞋamo nagaifema havitama tamakupi malenaya veaꞋmo-gatamina mani kea hufalote huno tamahapaisie huꞋna hutenoe. NagaiꞋnige Teviti nofipiti aginagomoꞋna maineꞋna Teviti nafaꞋneꞋa mainoe. Nagaya hale yamaꞋaene kaꞋnefila, natema hagoteno vaꞋyi nehia kaꞋnefi mainoe.” huno humaine.  
\v 17 Higeno Alu Aotage AvamuꞋamoꞋene Yisasina amakuꞋa amitafa humainaya veaꞋnene Yisasife mage hae “Kagaya eno.” huꞋya hageꞋya mani kema havisaya veala Yisasife mage huꞋya hisae “Kagaya eno.” huꞋya hisae. HisageꞋya tifema amakesia veaꞋmoꞋya etama Anumaya KotiꞋma afaꞋa tamamisia timoꞋa maige maige hisaya tamahaimu tamamisia tinagi tamahaisigetama me neho.   
\s1 Mani avopima hanea kema havisaya veaꞋmogatamina YoniꞋa tokiyaꞋage ke tamahanepaiye.  
\p
\v 18 Nagaya manima Anumaya Koti kefima aune laga humale kema mani avopima hanea kema havisaya veaꞋmogatama mani kene alu kene moli lokaetama ayaꞋaya kea ohiho. TokiyaꞋage ke tamahanepaugi naꞋama hisayana Anumaya KotiꞋa mani avopima tamahanepaiya havi yama falote hulamatesia yamoꞋa tamakata aisia yanagino tamakaila tamamigahie.  
\v 19 Tamamigahigi nagoꞋa veaꞋmoꞋya manima Anumaya Koti avopima hanea aune kema ali talesayana Anumaya KotiꞋa mani avomoꞋma tamahapaiya kanale yana otamamigahianagitama ani veaꞋmogatama maige maige hisaya tamahaimu tamamisia yosamo alaga nesaya yana tamaha-falesigetama Anumaya Koti alu aotage kumatela oꞋugahae.   
\p
\v 20 YisasiꞋa mani kema tahapaiya kanomoꞋa mage hie “Tamage nagaya aupaꞋa egahue.” huno humaine. HigeꞋna nagaya YoniꞋna mage huꞋna nehue “E, tamage Anumayati Yisasiga eno.” huꞋna nehue.   
\p
\v 21 AnumayatimoꞋa YisasiꞋa kayonema nehia yamaꞋamoꞋa mukiꞋa amakuꞋama amitafa nehaya veaꞋmo-gatamina tamamisie. Mani kea tamage.  
\m  
\q1 KeꞋnia male haꞋno hie.  
\m  
\q1 NagaiꞋni nagia YoniꞋnae.