\id PHP  Philippians NT0010.PH - Kanite N.T. Gibson/McCarthy 
\h Filipai 
\toc1 Filipai 
\toc2 Filipai 
\mt1 Filipai  
\ip Poloa Lomu kumate kina nopi maineno Filipai kumate maineya Yisasife haviya amakupi malenaya veamogamife huno mani avona kaeno amamine. Yisasia faliteno hetino ikapinaga haitegeno Poloa tetia (30) kafu agava maineno Filipai kea kae-malene.  
\c 1  
\p
\v 1 Polonaene Timotiene taagaya Yisasi Kalaisina aliya kanolatamaa-mogataa Filipai mainetama Yisasi Kalaisi hulatenea yafe havitama tamakupi malenaya veanene tamakai soka vayaene amakaima amaya nehaya vayaene mani avona kaetaa nelamamue.   
\p
\v 2 Anumaya Kotia, Nelafaene Anumayatimoa, Yisasi Kalaisiene kayone huge huge nehaa yaaniene tamaipa falu hisia yaaniene tamamisae.   
\s1 Poloa Anumaymofe huno muse hutene.  
\p
\v 3 Mukia kanafina tamakaife nagesa havi havi huna Anumayani-motega muse huna havinegoe.  
\v 4-5 Yisasia hulatenea kanale mono kema hagotetama havilinaya kanaleti tamakaya nagaiene ailokaetama ani kea hamapai-mainaya yafena tamakaifena muse huna Anumayamotega havinegoe.  
\v 6 Nagaya ago havimainoe Anumaya Kotia tamakupima kanale aliyama aepa hemainea aliyana alime alime haino Yisasi Kalaisi eteno esia yupa hano hugahie.  
\v 7 Tamakaya nagupima mainaya yafena tamakaifena nagesa havua nagesamoa fatago huno ani kate nevie. Nagaya kinafi mainoa kanafiene Yisasia hulatenea kanale mono kema huhalena hamapai-mainoa kanafienena tamakaya nagaiene Anumaya Kotia kayone hu-nelatea yapi mainone.  
\v 8 Anumaya Koti aulagafina lamage nehue Yisasi Kalaisima hau ayamopafi nehaiya yana nagupi hanegena tamakesua yafena aluya huna ha ha nehue.   
\p
\v 9-10 Mukia kanafina Anumayamo-tegama havigoana maa nehue tamahau tamayamopafi nelamahaiya yamoa ala huteno kanale tamaku tamakesa hanesigetama mukia yana agetama Kanale yano havi yano? hutama ali fako hutama havisae. Havisageno Yisasi Kalaisima esia yupa tamakuamoa efeage nehisigetama mukia veamogami amaufina kefo yatamia omale veane maisae huna havinegoe.  
\v 11 Yisasi Kalaisia ali falote hinageno fatago auava yama hisaya yamoa tamakupina hiya hisigetama Anumaya Kotina agia alisaga hisae huna Anumayamotega havinegoe.   
\s1 Poloa kina nopima mainea yamoa Yisasi kanale mono kea alino ala humaine.  
\p
\v 12 Nafunagana-gatama havisae huna nehue nagaitema falote humainea kana yateti Yisasima hu-latenea kanale mono kemona alino maleli otenegi alu kumate kumatela nagoene umaine.  
\v 13 Umainegi ala kava kanomo ati vayamoyaene mukia veamoyaene haviya nagaifena mage nehae Yisasi akavema nehia yateti kina nopina maine. huya havilinae.  
\v 14 Kina nopi mainoa yateti Yisasina amakua aminaya nafunaganaya tokiya vaiya koli hisaya amakesa neataleya Anumaya Koti kea nagoene ali lokiya vaiya hamapai-mainae.   
\p
\v 15 Nagoamoya nagima haneafe amaipamoa haviya higeya nagima ali haviya hisaya yafena Kalaisi kea hamapaigeya nagoamoya kanale amaku amakesale maineya naya hisaya yafena Kalaisi kea hamapai-mainae.  
\v 16 Nagayama Yisasia hu-latenea kanale mono kema huna lokiya vai-malenoa yateti navaleya kina nopina natagena mainoafe nagoamoya haviteya amakua namiya Yisasima hulatenea kanale mono kea hamanepaiye.  
\v 17 Hamanepaiyanagi nagoa vayamoya fatago amaku amakesa omalegeya amakaiami amaki alisaga hisaya yafe kina nopima mainoa kana yafena Nagoene kana yana amisune. huya Kalaisia hu-latenea mono kea hamanepaiye.  
\v 18 Naa nehayanagi aoteyamaae. Mukia hamapaiya kea amegati kema nehaya kene tamagema nehaya kenena Kalaisia hulatenea kanale mono kea hamanepaiye. Ani yafena aluya huna musena nehue. Tamage nagaya nagoene musena hugahue.   
\s1 Poloa haegafama huno mainenoa Filipai veane hamamaesia yafe agesa havimaine.  
\p
\v 19 Ago havimainoe tamakaya naya hugahema Anumayamotega havinegaya yamoene Yisasi Kalaisi Avamumoa nayama nehia yamoene ali haviyama hunatenaya yapiti naugafa aligatigahie huna musena nehue.  
\v 20 Ani yafena tusiya huna nametitia nehuna nagayea nohigi Kalaisina mukiama haisia kavala hugahue huna nagesa nehavina mukia kanafima humainoa kava huna menienena kolia nohue. Haegafama huna maisuo falisuo humainoa yateti mukia veamoya Kalaisi agia alisaga hisae huna nagesa nehavue.  
\v 21 Haegafama hunama mainoana Kalaisia nagaila aepania maineanagina falisuana tusia kanale yania aligahue.  
\v 22 Haegafama huna ma mopafima maisuana nagaini aliyamoa alagaa ayegahianagi hana kate visue huna havilama nohue.  
\v 23-24 Ani yafena kasageke-voke huna tole nagesa nehavue Kalaisiene umaisuana tusia kanaleya hugahie huna nagesa nehavuanagi tamaya hisuafene huna ma mopafi maisue huna nehue.  
\v 25 Ani yafe nagoke kate nagesa nemaloe. Yisasima hulatenea yafe havitama tamakupi maletama tamametiti humainaya yamo tokiya vaisigetama muse hisae huna tamakaienena maigahue huna nehue.  
\v 26 Ani yafe tamakaitega etena visugetama nagaifena muse hisaya yamoa ala hisigetama Yisasi Kalaisi agia alisaga hugahae huna nehue.   
\s1 Anumayamoa Filipai veanea alino kanale humateteno amatalegeya kana yana ali-mainae.  
\p
\v 27 Falisuo maisuo Kalaisia hulatenea kanale mono kema tamahapai-mainoa kava hutama fatago kate vaiyeho. Mo lamakesuo afaa alule mainesuo tamakaifena mani kegeya havisue Nagoke amaku amakesale hetiya maineya Yisasia hulatenea yana haviya amakupi maleneya tokiyaage huya alu veamogamina huhaleya hamanepaiye. huya hisagenahena tusia muse hugahue.  
\v 28 Yisasi kema ohiho. huya nehaya veamogamifena kolima ohisayana tole yana amaveligahae. Amakaya agola hani yapi tegelege nehia atafi visaya veane mainaya yafeene Anumaya Kotia agaia tamaku tamamema aligatisia yafeene amaveligahae.  
\v 29 Ani yafe Kalaisima hulatenea yamo kea havitama lamakupi maletama tamametiti hisaya lamaku tamakesageya Anumaya Kotia otamaminegi Kalaisi agile tamaugafa lamakata aisia yaene tamamine.  
\v 30 Tamamineanagitama hagotena Yisasi kema hamanepaina Satanienena tua hugetama nage-mainayanagino menia nagoene ani kavala nehie huno higetama ago havilinae. Tamakaya nagaiene ani aliyatela Satanienena nagopi tua nehune.   
\c 2  
\s1 Tagaya nagoke taipale maineta nagoamogamina amaya hisune.  
\p
\v 1 Tamakaya Kalaisiene ailokaetama mainageno tamakuamoa muse huno tokiyaagela nehio? Ifi agaia hau ayamopafima nehaiya yamaa ago aligeno tamaipamoa falu nehio? Ifi Alu Aotage Avamumoene ailokaetama vaiyetama mainao? Ifi nagoamogamina tamahauna humatetama kalagila aineamatao?  
\v 2 Naama hayana nagaila muse yanimoa alama hisiafena nagoke tamaku tamakesale maiho. Nagoamogamifena tamahau tamayamopafi tamahaisigeya amakaya ania huya tamakaifena hamaisie.  
\v 3 Tamakaitami lamakia alitama haisaya yafena tamakesa ohaviho. Aao, mukia veafena Ago tagasetama mainae. hutama afete maiho.  
\v 4 Tamakaitami yamaagefena tamakesa ohavitama alu veamogami yateenena amaya hisaya yafena tamakesa haviho.   
\s1 Kalaisia agaia augafa alino afete taviafe Anumaya Kotia avalesaga huno anale atene.  
\p
\v 5 Yisasi Kalaisi agu agesamoma humainea avamete hutama maiho.  
\v 6-7 Yisasi Kalaisia Anumaya Kotiene nagoke avamete huana mainaanagi anima Anumaya Kotienema nago avamete huno mainea auava yamaa agaia atafa hulino maisia agesa ohavinegi ani auava yamaa ataletegeno vaya kana huno falote huteno aliya kanomo auava kava huno maine.  
\v 8 Maigeya veamoyama agayana velafa maineno augafa alino ohaino ako huno Anumaya Koti kea akave maleteno maime haino fali-maine. Afaa ofalinegi agaye hisifa kava huya yafaga yosale nili heya asaigeno fali-maine.  
\v 9 Naama higenofena Anumaya Kotia anale avalesaga huno ateteno nago agia malene. Ani agimoa mukia veamogami amakia amakase-mainea agia malene.  
\v 10 Maleneafe ikapinaga mainaya vayaene ma mopafi mainaya veanene fali-mainaya veanene Yisasi agile amaleya ayeya agia alisaga huya Kava hulato. huya hugahae.  
\v 11 Huteya mukia veamoya mage huya hufalote hugahae Yisasi Kalaisia Anumayatimo maine. huya nehuya Nelafana, Anumaya Koti agia alisaga hugahae.   
\s1 Tagaya mukia veamogami amunopina kani kana huta maisune.  
\p
\v 12 Nahau-mainea nenafugatama Yisasima hulatenea yafena nehavitama mukia kanafina, nagaya tamakaienema mainoa kanafiene, menima tamatalena emainoa kanafienena tusiya hutama navayama ali hipoya humainaya kavakeya hiho. Tamaku tamamema aligati-mainea yana ali-talako hulisaya yafena kolia nehutama atali talu hutama tokiyaage hiho.  
\v 13 Anumaya Kotina agaima haisia kavama hisaya tamaku tamakesa tamamiteno ani yama alisaya tokiyatamienena agola tamamine.   
\p
\v 14 Mukia aliyama alinutamahena kalugalu kema vaiya yaene ala kenakema nehaya yaenena neataletama aliyakeya aliho.  
\v 15 Naama hisayana mukia vea amaufina kefo yatamia omalesia veane mainesageno tamakuamoa efeage hisigetama kanale auava yama ohuya vegano-kano nehaya veapi mainetama Anumaya Koti nafaneyaga mainetama kani kana hutama maiho.  
\v 16 Maige maige hisaya hamaimu alisaya kea hamanepaigena nagaya Kalaisia kaiyekema humatesia yupa tamakaifena muse hulamatena Kasageke aliyama ali-mainoa aliyamoa afa ya kanala ohunegi anonaa ago falote humaine. huna hugahue.   
\p
\v 17 Tamametitima nehutama aliyama nealiya yamoa maa humaine nayoma afu heya Anumaya Kotina muse yama neamiya avamete humaine. Humaineafe nagaima nahaesageno kolaniamoma taki-lavisigena Anumaya Kotina muse yama amisuana tamakaiene nagaiene muse hugahune.  
\v 18 Naa humaineafe tamakaya nagaiene musena hiho.   
\s1 Poloa Timotife Hutesugeno Filipai ugahie. huno humaine.  
\p
\v 19 Anumayatimona Yisasima haisigenahena aupa kanafi Timotina hutesugeno tamakaitega ugahie. Uteno etenoma esiana tamakaifena me nahapaisigeno naguamoa tusi muse hugahie.  
\v 20 Timotia agaiage nagai nagu nagesamo nehia avamete kano mainea kano maineanagino hau hulamateno tamaya hisia yafe agesa nehavie.  
\v 21 Mukia veamoya amakaiami yatefekeya amakesa nehavigi Yisasi Kalaisi aliyatefena amakesa nohaviye.  
\v 22 Timotifena tamakaya ago havimainae. Kanale kano maineanagino Yisasima hulatenea yafema kanale mono kema hamapauva kemona maa nehie nafanemona nefaa aliyama aya huno alia kava huno naya nehiane.  
\v 23 Ani yafe nagaima mukia kavama hunatesaya kea havitena Timotina aupaa hutesugeno tamakaitega ugahie.  
\v 24 Visigena nagaya visua yupa Anumayamoa kania vali-nategahie huna nametitia nehuna nagaienena aupaa tamakaitega ugahue huna nehue.   
\s1 Poloa Epafalotitusina hutesugeno Filipai ugahie. huno humaine.  
\p
\v 25 Epafalotitusina hutesugeno tamakaitega eteno visie huna nehue. Ani kanoa nenafuagitama hutageno egetaa lokaetaa nagopi afalu-falu kana hutaa mainetaa Satanienena tua nehutaa Yisasi kea hamapai-mainoe. Tagai tagile taya huo. hutama hutageno me naya humaine.  
\v 26 Aguamoa tusiya huno tamakesia yafena avianeate. Tamakaya agayama kalima alia kea ago havimainayanagino aguamoa kanaagela nehie.  
\v 27 Tamage ala kali alino aupaa faligahe hianagi Anumaya Kotia kalagi aiteno alino falu hutene. Agaiagefena kalagila ai oatenegi nagaya nago kana yaene alisua yafena agesa nehavino kalagila ainateteno alino falu hutene.  
\v 28 Alino falu hu-teneanagitama tamakaya musema hisaya yafe hutesugeno eteno tamakaitega visia yafena aluya huno nenahaiye. Muse hisagena nagaya havina kanama hua yamoa hano hugahie.  
\v 29 Tamakaitegama vigetamahena Anumayamoene ailokaetama mainageno etenoma emainea yafena tusia muse hutama agia alisaga hiho.  
\v 30 Tamakaya naya hugahe hayanagi kosa he-otamategeno agaya eno maiyamaa atafa hu-talako ohuno tamakai tamakile Kalaisi aliyatela nagaila me naya huteno aupaa falisia kavala humaine. Naa yama nehia kanomo agia alisaga hiho.   
\c 3  
\s1 Kalaisifema haviya amakupi malaya veala Anumayamo aufina fatago veane mainae.  
\p
\v 1 Nafunagana-gatama nago kene tamahapaisue Anumayamona nafaneyagaa mainagi tusia muse hiho. Etena mani kema kaesua yafena kasalola nonahae. Ani kemoa tamaya hugahie.  
\v 2 Kefo aliyama nealiya vayamoya afai kala kana huya Tamaugafa hataga hiho. huya nehaya vayafena kayetama maiho.  
\v 3 Tagaya Anumaya Koti Avamuteti Anumaya Koti agia alisaga nehunafe Anumaya Kotina tama nafanea mainone. Yisasi Kalaisia hulatenea yafena aluya huta musena nehuta Taugafama laga hu-malenona yamoa taya ohugahie. huta tametitia nehune.  
\v 4 Nagoa veamoya Tagaiti laugafale hu-malenona yamoa taya hugahie. huya nehayanagi nagaya ago amakasena mainoe. Mainoafe nahaigena Nagaini naugafale hu-malenoa yamoa naya hugahie. huna hisua kania haneanagi ani kea ohugahue.  
\v 5 Natetenoa nagoke sota maiteya nagoya anoya laga hu-mainayanagina Isaleli kotega kano-lafana Penisamini nofipiti kano mainoe. Tole Hipalu alavelatamogani nataagena Hipalu kano mainoe. Falasia vayamogami kahegi kea akave nemaloane.  
\v 6 Anumaya Koti aliya nealue huna lokiyaage huna Yisasi veamogamina hamaena ali haviya humatenoanagi kahegi kema akave malenoafenagina fatago kano mainoanagino mukia veamogami amaufina kefo yania omalene.  
\v 7 Naa auava kavala humainoanagi Kalaisi nafanema maisuafene huna mukia nagima alisaga nehaya yamoa afa ya kana humaine huna neataloe.  
\v 8 Tamage Yisasi Kalaisienema ailokaena maisua yamoa mukia nagima alisaga hisua yamona agase-maine. Yisasi Kalaisina agelama hisua yafe mukia nagima alisaga nehaya yana afa ya kana hu-maineanagina afaa neataloe. Ani yayagamoa aifa kana hu-maineanagina Kalaisienema ailokaena maisuafene huna neataloe.  
\v 9 Ataletena Yisasiene ailokaena maisue huna Nagainima kahegi kema ali oatagaovafe fatago kano mainoe. huna nohugi Kalaisima hulatenea yafe havina nagupi malena nametiti hua yateti Anumaya Kotia Fatago kano mainane. huno hunenate. Yisasi Kalaisima hulatenea yafe haviya amakupi maleya amametiti humainaya yateti Anumaya Kotina fatago auavaamoa falote nehie.  
\v 10 Nagaila nago yafeke nenahaiye. Kalaisina agelama huna agetena fali-mainefitima heti-mainea tokiyaahena havina atafa hulisua yafe nenahaiye. Agaiene ailokaena augafa agatama aimainea yana alitena agaiene nagoke avamete huna falisua yafe nenahaiye.  
\v 11 Naa huna mainena falisugeno ali hetinategahie huna nametitia nehue.   
\s1 Poloa Anumayamo malenea alegana yate ugahe aiyage aiyage huno nevie.  
\p
\v 12 Yisasi Kalaisi auava yana ago alina avaya-yetena tusiya huna kanale kavakeya nehua kano mainoe huna nohugi Yisasi Kalaisia navalegena agai nafane mainoafe nayamufa aina ani aliyana nealue.  
\v 13 Nafunagana-gatama ani auava yana ago ali-mainoe huna nohugi nagoke nagu nagesale mainoe. Nayoma humainoa yafena nagesa nohavugi haenagama Alime alime uka anile mo talo. huno humainele visuafene huna nayamufa aina naiyayena neue.  
\v 14 Anumaya Kotia Yisasi Kalaisi keleti Anale haiyo. huno humaineafe tusiya huna naiyayena Ani legana yate uka mo talo. huno humainele uvayi hutena muse yania alisue huna nehue.   
\p
\v 15 Tametitima humainona yana tokiya vaita ani tametitilema alopa veama maisunana nagayama nehua kea alita tagu tagesale malesune. Nagoa veamogatama alu lamakesale mainesayana Anumaya Kotia ani lamaku tamakesa ali fatago huno tamave-ligahie.  
\v 16 Tamave-ligahigi kanale auava yama agoma atafa hutalako hulita mainona yamona akave maleta vaiyesune.   
\p
\v 17 Nafunagana-gatama haviho mukia nagayama nehua auavanima ageteya akave nemalesaya veamogamina agelama hutama amakave maleho.  
\v 18 Mukia kanafina ago tamahapai-mainoa keagi menia nahaigena nagoene naunumoa nehigena tamahanepauve nagoa veamoya Kalaisia yafaga yosale fali-mainea kemona kame huteya mainae.  
\v 19 Ani veamoya amakaiami amaugafamo age haye hia yafena tusia muse nehuya Ani yamoa Anumaya Kotina agaseno kanale ya hane. huya amakaye hisifa kavafena musemaa hu neateya ma mopafi yafekeya amakesa havi havi huya nemaiye. Naama nehaya veamoya hani yapi tegelege nehia atafi ugahae.  
\v 20 Ugahayanagi tagaya ikapinaga anaga mainonanagino tagu tamema aligatisia kanomofena, Anumayati Yisasi Kalaisia, ikapinagatila ataleno elavisia yafe tametitia huta agava mainone.  
\v 21 Agava mainonanagino eteno esiana agaia tokiyaleti mukia yamoa agai akave malesaya yafe alino aiyafinaga nemaleno tagaima kana yama nelamia fulu fulu laugafa alino agaia augafamo tokiya hale yamaaene augafa kana huno talo hulatesigeta ani laugafale maigahune.   
\c 4  
\s1 Mukiamogata nagoke taipale maineta kanale tagu tagesa alisune.  
\p
\v 1 Nenahaiya nafunagana-gatama ania hutama Anumayatimote hetitama ailokaetama mai fatago hiho. Nagua lamamina tamakai tamaufima tamakesua yafena aluya huno nenahaiye. Aluya huna musetamia nehuna veamogamina tamakaifena hamanepaina tamakia alisaga nehue.   
\p
\v 2 Yuotiagatana Sitikegatana Anumayatimote ailokaetana mainetana nagoke tanaku tanakesale maio huna nehue.  
\v 3 Nehuafe kagaya Anumaya Koti aliyama ailokaetaa nealua kanomoga ani atalana anaya huo. Ani atalamogania nagaiene Kalemeniene nagoa nagaienema aliya nealiya veanene ailokaeta Yisasima hulatenea kanale mono kema hamanepauna aliyana ali-mainae. Ani veamogami amakima agola maige maige hisaya hamaimuene veamogami amaki kae-malenea avopi amakia hanegi ani atalana anaya huo.   
\p
\v 4 Mukia kanafina Anumayatimote ailokaetama mainetama muse hiho. Nagoene mani kea nehue musena hiho.   
\p
\v 5 Anumayatimoa ago aupaa egahe nehiafe kayone humate veane mainegeya tamakeho.  
\v 6 Nago yafena tamakesa havi havi hutama kalagila oaiho. Muki yafena Anumaya Kotitega muse nehutama havigeho.  
\v 7 Havigesayana Yisasi Kalaisiene ailokaetama mainesageno tamaipa falu hisia yama tamamisiana mukia alu yamo amaipa falu yana agase-mainea falu yamaamoa tamaku tamakesalela yagailamategahie.   
\p
\v 8 Nafunagana-gatama kenima hano hisia kea mage hugahe hue. Ma yafena tamakesa havi havi hutama haviho, tamageage kene, kanale agu agesafiti humainea yaene, fatago humainea kavaene, oniya ohunea kavafeene, tusia muse hisaya yafeene, nagoa kavama hisayana tamaki alisaga hisaya kavafeene, mukia fatago kavafeenena tamakesa havi havi hiho.  
\v 9 Nagaya mukia kavala huge tamave-ligema hugetama ali-mainaya auavafeene mukia tamahapaugetama havimainaya auavafeene, higetama age-mainaya auavafeenena mukia kanafina ani kavakeya hiho. Naama hisagenoa Anumaya Kotia taipa falu hisia yama taminea kanomoa tamakaiene ailokaeno maigahie.   
\s1 Poloa Filipai veamoya muse ya aminaya yafe huno muse humaine.  
\p
\v 10 Tamakaya etetama nagaifena tamakesa havi havi hutama ali heti-mainaya yafena Anumayamotega huna tusia muse nehue. Hagotetama nagaifena tamakesa havi havi hu-mainayanagi nayama hisaya katamia omalene.  
\v 11-12 Mani kema nehuana Mukia yania omalene. huna nohugi maa yafena havimainoe alu ya alu yamoa nagaitema falote higena mukia yafena naipa havina kanale huneamatoafe afenonia hanesiano omalesiano kanalele. Kavela nenamu hisuo nagatesiano kanalelagi. Mukia yama hanesiano omalesiano kanalele. Mukia kanafina naipa havina kanale huneamatoe.  
\v 13 Kalaisia nagaila nagu nagesa alino tokiya vainategena agaia tokiyaleti mukia kavala afaa huleasine.   
\p
\v 14 Huleasinagi kana yamoa nagaitema falote higetama tamakaya kanaleya hutama ali kayone hunatetama naya humainae.  
\v 15 Tamakaya Filipai kumate veala ago havimainae ehema Yisasia hulatenea kanale mono kema tamahapai-mainoa kanafina Masetoniatima umainoa kanafina nagoa Yisasi anagamoya nahamaeya nagoa yana namigena oalinogi tamakaitamige naminae.  
\v 16 Tesalonaika mainogetama hagotetama naya hutetama haenagaenena ania hutama naya humainae.  
\v 17 Naya humainagi menia nagoa yana namisae huna nohugi naminaya yatetila Anumaya Kotia anonaa tamamisiafene huna nehue.  
\v 18 Kosa henatea yaene nagoa yaene ago namigena alugeno namu humaine. Tamakaya muse yama namiya yana Epafalotitusia ago alino me namigena ali-mainoe. Anima naminaya muse yana afu heya Anumaya Kotina muse yama neamiya avamete kava humainie. Nagaima namiya yana Anumaya Kotiene amigeno ageteno aipamoa tusia kanaleya humaine.  
\v 19 Anumayanimoa agaia tokiyaage hale yamaafina mukia kanale yakeya malenefiti tamakaya Yisasi Kalaisiene ailokaetama mainayanagino nagoa yamoma kosa he otamatesiana afaa tamamigahie.  
\v 20 Anumaya Kotina Nelafa agia tamagelafa huta alisaga nehisunageno mukia kanafina anale hanege hanege huno hanesie. Tamage.   
\s1 Poloa Maiho. huno hu falu fala humatenea ke.  
\p
\v 21 Mukia veamoya, Yisasi Kalaisina amakuama neamiya veamogamifena huna falu fala hu neamatoe. Nagaiene mainaya tafu-taganaya ania huya hu falu fala hu nelamatae.  
\v 22 Sisa nopi aliya nealiya veanene nagoa Yisasina amakua aminaya veamoyaene tamakaila hu falu fala hu nelamatae.   
\p
\v 23 Yisasi Kalaisia Anumayatimona kayone yamaamoa tamaku nafanene maisie.  
\m  
\q1 Kenia male hano hie.  
\m  
\q1 Nagaini nagia Polonae.