\id COL Colossians NT0010.CO - Kanite N.T. Gibson/McCarthy 
\h  Kolosi 
\toc1  Kolosi 
\toc2  Kolosi 
\mt1 Kolosi  
\ip PoloꞋa Lomu kumate kina nopi maineno Kolosi kumate maineꞋya Yisasife haviꞋya amakupi malenaya veaꞋmogamitega mani avona kae-malegeꞋana Tikikasigani Onisimasigani aliꞋana momaminaꞋe. YisasiꞋa faliteno hetino iꞋkapinaga haitegeno PoloꞋa 30Ꞌa kafu agava maineno Kolosi kea kae-malene.  
\c 1  
\p
\v 1-2 Nagaya PoloꞋnae Anumaya KotiꞋa agaiꞋa haiya avamete huno Aposolo kanoa hunatenegeꞋna mainoafe nagaiꞋene Timoti nenafuꞋene Kolosi kumate mainetama Yisasife havitama tamakupi malenaya neꞋafugatama mani avona kaetaꞋa nelamamuꞋe. Anumaya KotiꞋa Nelafa kayone hisia yamaꞋaene tamaipa falu hisia yamaꞋaene tamamisie.   
\s1 Kolosi kumate anagaꞋmoꞋya tamage huꞋya Yisasite amametitia humainae.  
\p
\v 3 TaꞋagaya mukiꞋa kanafina Yisasi Kalaisina NefaꞋa, Anumaya Kotifena havinegeta tamakaifena tusiꞋa muse hutaꞋa havinegoꞋe.  
\v 4-5 TaꞋagaya tamavagea ago havilinoꞋe. Anumaya KotiꞋa tamagelafa humainea kemoꞋa, Yisasife kanale mono kea, tamahapaiya kea ago evaꞋyi higetama YisasiꞋa hulatenea yafe havitama tamakupi maletama tamametiti hutama mukiꞋa Yisasife haviꞋya amakuꞋa amitafa humainaya veaꞋmogamife tamahau tamayamopafi nelamahaiye. Anumaya KotiꞋa tamamisia yana iꞋkapinaga talo tala humaleneafe tamametiti nehaya yapiti aniꞋama nehaya yamoꞋa falote hia yafena taꞋagaya Anumayamotega tamakaifena muse nehutaꞋa ke hutaꞋa havinegoꞋe. mage hutaꞋa  
\v 6 Anima YisasiꞋa hulatenea kanale mono kea mukiꞋa kotega kagino ala huno veapina alino kanale auꞋava yana ali falote humaineafe tamakaite eaꞋamo Anumaya Koti kayone hisia yafema havilama haya kanafi aepa heno tamakaipina aniꞋa huno kanale auꞋava yana ali falote humaine.  
\v 7 EpafalasiꞋa mani mono kea huhaleno higetama havilinae. Ani kanoa taꞋagaila taꞋaya huno Yisasi Kalaisi aliꞋyana alige alige nehia kanogino taꞋagaiꞋene nagopi aliꞋyana neꞋaluna kanogino agaifena aluya huno nenahaiye.  
\v 8 Alu Aotage AvamuꞋmoꞋa veafema tamahau tamayamopafi nelahamaiya yana tamaminegetama aniꞋa kavaꞋma nehaya yafena EpafalasiꞋa ago taꞋahapai-maine.   
\s1 PoloꞋa Kolosi veala alino tokiya vaimatesia yafe Anumaya Kotitega havinege.  
\p
\v 9 Ani yafe hagote kanafina taꞋagaya ani kea havitetaꞋa ani yupa aepa hetaꞋa tamaya hutaꞋa Anumaya Kotitega havigetaꞋa tamakaifena taꞋagela kaniotamatenoꞋe. Mage hutaꞋa havigoꞋe “Alu Aotake AvamuꞋmoꞋa kanale amaku amakesa amamino Anumaya KotiꞋma nehaiya auꞋava yana hamapaisigeno amakupina hiya hinageꞋya havisae.  
\v 10 Hiya hisigetama tamakaya kama vaiyesayana Anumayamo veaꞋne fatago hutama maisageno AnumayamoꞋa mukiꞋa maisaya auꞋava yatamihena ‘Nagai nafaꞋnemoꞋya amatea kava nehae.’ huno haisie. MukiꞋama nehaya kavala kanale yakeꞋya falote hisigetama Anumaya Koti aepaꞋa aluya hutama agetetama agaifema havilinaya yatamimoꞋa ala hisie.  
\v 11 Anumayamona tokiyaꞋage hale yamaꞋaleti aliꞋya tokiya vaimatesageꞋya hetofa veaꞋne maineꞋya mukiꞋa kana yama falote hisigenoꞋa amakuꞋamoꞋa atali talua ohinageꞋya tokiyaꞋage veaꞋne ako huꞋya amaipa muse yapi maisae.  
\v 12 TokiyaꞋage hale yapi mainaya veaꞋnene hetita maisuna tokiya taminageta tatesia kava huta anifi maisuna yafe Nelafatega tusiꞋa muse hisune.” hutaꞋa Anumayamotega havinegoꞋe.  
\v 13 Hagoteno Satani kava hulategeta hani yapi mainonageno Anumaya KotiꞋa ani yapiti tavaleno agaiꞋa hau ayamopafi nehaiya nafaꞋnemo kava yagai-mainelega tavaleno latene.  
\v 14 Kefo yatimo aigagilategeta mainonageno Anumaya Koti nafaꞋnemoꞋa anifiti kalu hetalesiafe miya hulategeta mainonageno kefo yatia aigetateno atalelatene.   
\s1 PoloꞋa Kalaisi auꞋavaꞋene aliꞋyamaꞋaenefe humaine.  
\p
\v 15 VeaꞋmoꞋya Anumaya Kotina oꞋagegahe hayanagi agaiꞋa nafaꞋnea YisasiꞋa NefaꞋene nago avamete huꞋana mainaꞋanagino YisasiꞋa Anumaya Kotina hagote nafaꞋneꞋagino* maineno mukiꞋa Anumaya KotiꞋma talo humalenea yatela alaꞋami maine.  
\v 16 Anumaya KotiꞋa hapaigeno YisasiꞋa agaiꞋa mukiꞋa yana talo humalene. Ikapinaga yaꞋene mopafi yaꞋene neꞋagona yaꞋene noꞋagona yaꞋene ensole vayaꞋene Satani AvamuꞋene ala kava vayaꞋenena agaiꞋa agima alisaga hisaya yafe YisasiꞋa talo humalene.  
\v 17 YisasiꞋa hagoteno mainegeno mukiꞋa yamoꞋa agaiꞋa humainea keleti noꞋamile noꞋamile maime ute ete huꞋya mailama humainae.  
\v 18 YisasiꞋa agaife haviꞋya amakupi malenaya veaꞋmogami amakenopa maineno kava yagaimatene. YisasiꞋa agaife haviꞋya amakupi malenaya veaꞋmogami aepaꞋa maineno mukiꞋa yamona kava yagaimateno ala kanoꞋami maisiafe uhagotemateno fali-mainefitila eteno heti-maine.  
\v 19 Anumaya KotiꞋa haigeno agaiꞋaene mukiꞋa tokiyaꞋaene kanale auꞋava yamaꞋaene nafaꞋneꞋamopi maleno hiya humalene.  
\v 20 NaꞋa humaineafe YisasiꞋa yafaga yosaleꞋma faligeno lavi-mainea kolateti Anumaya KotiꞋa mukiꞋa yamaꞋa ma mopafi yaꞋene iꞋkapinaga yaꞋene aigetateno falu hulateno “Nagoke taipale maisune.” huno humaine.   
\p
\v 21 Nayona tamaku tamakesamoꞋa kame hutesaya kava higetama kefo yana maitama nehutama Anumaya KotiꞋenena kame hutenae.  
\v 22 Hutayanagi YisasiꞋa Nefatega tamavalesigetama kefo yatamia omalesigetama alu aotage veaꞋa maisaya yafeꞋene nagoke veaꞋmoꞋya “Kefo ya nehae.” huꞋya ohisaya yafeꞋene YisasiꞋa augafa agata aigeno yafaga yosale fali-maine. Fali-mainea yateti ago aigetamateno falu hunelamateno nagoke taipale alino lamatene.  
\v 23 Lamatenegi tamakaya YisasiꞋma hulamatenea mono kema havitama tamakupi malenaya yana atafa hutama tokiya vaiho. Havigu nago yamo tamavayu hisigetama YisasiꞋma hulamatenea kanale mono kema havilinetama tamametiti nehaya yana ataleyafenagi mai lokiya vaitama maiho. Ani kanale mono kea tamakaya havitageꞋya mukiꞋa mopale veaꞋmoꞋya havilinageꞋna nagaya PoloꞋna anima Yisasi hulatenea kanale mono kemo aliꞋya kano maineꞋna mani kea hamanepauve.   
\s1 PoloꞋa Koloso veaꞋne amaya humaine.  
\p
\v 24 Tamakai tamaya hisuafe naugafa nagata aiya nopima mainoa yafena aluya huꞋna musena nehue. Kalaisi augafamoꞋma tusiꞋa agata aimainea avamete huꞋna nagaya naugafa nagatama aiya yateti Yisasife haviꞋya amakupi malenaya veala agaiꞋa augafa maigeꞋna Yisasina agatama aimainea yana ali haꞋno nehue.  
\v 25 Anumaya KotiꞋa “Yisasina amakuꞋa aminaya veaꞋnea amaya huo.” huno hunateneanagiꞋna mukiꞋa Anumaya Koti kea huhaleꞋna tamahapaisugetama havilama hisayafene huno hunatene.  
\v 26 Hunatenegeno Anumaya Koti kea nayona falakino hanegeꞋya mukiꞋa veala hamaopainagi menia ago fufute evaꞋyi higeꞋya mukiꞋa Yisasina amakuꞋa aminaya veaꞋmoꞋya nehaviye.  
\v 27 Nehavianagino Anumaya KotiꞋa agaiꞋa haiya kava huno Yuta vea omainaya veaꞋmogami amuꞋnopi anima falaki-mainea kea, tusiꞋa kanale kea, taveligeta anima falaki-mainea kea mage huꞋya hageta havimainone “Yisasi KalaisiꞋa tagupi maineanagita tagaya haenagaꞋa agaiꞋa tokiyaꞋage hale yamaꞋaene kumatela umaigahune.” huꞋya hageta haviteta tametitia nehune.  
\v 28 Tagaya nagoke nagokeꞋmogami Kalaisifena huhaleta hamanepaita tamavaleta Anumaya Koti auleꞋma tamatesunana KalaisiꞋene aigaꞋmaeꞋya tokiyaꞋage mono veaꞋne maisae huta kanale tagu tagesaleti huge tamaveligea nehuta mukiꞋa veafena “KaꞋyetama maiho.” huta nehune.  
\v 29 Nehugeno KalaisiꞋa mukiꞋa tokiyaꞋama nagupi naminea tokiyaleti nagaya tusiꞋa kasageke yapiti himamu huꞋna aliꞋyana neꞋalue.   
\c 2  
\s1 TokiyaꞋage tametiti nehuta havigea nehaya kea atalesune.  
\p
\v 1 TamakaiꞋene Leotisia mainaya veaꞋnene mukiꞋa nagai naufima onagenaya veaꞋnene tamaya hisua yafe nagaya kasageke huꞋna aliꞋyana neꞋaluanagitama havisae huꞋna avona negaove.  
\v 2-3 TamakuꞋamona ali lokiya vailamatesigetama nelamafuꞋene nago tamaku tamakesa havitama tamahau tamayamopafi tama-haisigetama Anumaya Kotina falaki-mainea keꞋamo aepa Yisasi KalaisiꞋa agaiꞋa mukiꞋa kanale agu agesa nehavia yaꞋene Anumaya Koti agesafi hanea yaꞋene havilama hisageno tamakupina hiya hisia yafe tusiya huno nenahaiye.   
\p
\v 4 Havigu nagoꞋa veaꞋmoꞋya tamaipa ayesaya ke huꞋya havige ayelamavataga hisaya yafe mani kea nehue.  
\v 5 TamakaiꞋenena tokaeꞋna omainoanagi nagu nagesamoꞋa tamakaiꞋene maineanagitama tamakaya KalaisiꞋa hulatenea mono kema havitama tamakupi maletama tamametiti hutetama tokiya vaitama nagopima hetitama fatago hutama maiya yafe haviteꞋna tusiꞋa muse nehue.   
\s1 YisasiꞋene ailokaeta maineta haegafa lahaimula alisune.  
\p
\v 6 Tamakaya “Yisasi KalaisiꞋa tagaite kava yagai-latesie.” hutama ago avale-mainayafe kava hutama agaiꞋene ailokaetama vaiyeho.  
\v 7 YisasiꞋma hulatenea mono kema huhaleꞋya hagetama havitama tamakupi malenaya kea atafa hutama yosa hafuꞋyamoꞋma mopafi taviteno itaꞋamoꞋma atafa huno hageno ala hume hume analeꞋma haiya avamete hutama Yisasi KalaisiꞋene ailokaetama fatago hutama ala hutama mukiꞋa kanafina Anumaya Kotifena muse hiho.   
\p
\v 8 Havigu nagoꞋa veaꞋmoꞋya afa kema, yasimo alino esia kema, nehuꞋya havige ayelamavataga nehuꞋya tamavayu huꞋya havi kapi tamatesagi tamakaya kaꞋye ho. NaꞋa augafa veaꞋmoꞋya taginagomogami kavaꞋene ma mopafi havigu kene aliꞋya nehagi Yisasi Kalaisifena nohae.  
\v 9 Nohagi mukiꞋa Anumaya Kotina tusiꞋa lokiya yamaꞋaene kanale auꞋava yamaꞋaene Yisasi Kalaisi agupina tusiya huno hiya humaine.  
\v 10 Hiya humaineafe KalaisiꞋene aigaꞋmaetama ani lokiya yamaꞋaene kanale auꞋava yamaꞋaene ali-mainageno hiya higetama mainae. Mainageno KalaisiꞋa agaiꞋa mukiꞋa kava vayaꞋene ensole vayaꞋene Satani AvamuꞋyagaene kavaꞋami maine.  
\v 11 Maineafe KalaisiꞋene hagotetama aigaꞋmaetama mainaya kanafina Yuta vayaꞋmoꞋya amaugafa laga nehaya avamete huno kefo yama nehaya atafa lamaipa laga huno alitalene. Ani yana veaꞋmoꞋya amayatetila taga ohunagi KalaisiꞋa agaiꞋa taga hu-talegeno kefo yamoꞋa menia yagai otatene.  
\v 12 Yagai otamateneafe tima falelamatea kanala KalaisiꞋenena aigaꞋmaetama maigeno agaiꞋene komufina hevailamatene. Anumaya KotiꞋa komufitiꞋma Kalaisina ali hetitenea yafena havitama tamakupi malageno KalaisiꞋene fali-mainafitila ago ali hetilamatene.  
\v 13 Hagotetama age lamahaꞋye hutama kefo yama haya yamo tamahaegeno tamaku tamamemoꞋa fali-maine. Falianagi Anumaya KotiꞋa tamakaila Yisasi KalaisiꞋene fali-mainafitila ali hetilamateno haegafa tamahaimula tamamiteno mukiꞋa kefo yama haya yana aigetamateno atale-lamatene.  
\v 14 MukiꞋa nayo kahegi kema akave omalonafe kaiyekea hulatesia kemona Anumaya KotiꞋa aye hanane-talene. Ani avomoꞋa kaiyeke hulatesia yate tatafa hu-linegeno Yisasina yafaga yosale maleꞋya nili hetafa hu-malenaya yateti ani kemo akavela nomalonafe anonaꞋa ali haꞋno hu-talene.  
\v 15 Ali haꞋno hu-taleneafe Anumaya KotiꞋa YisasiꞋma yafaga yosale fali-mainea yateti mukiꞋa Satani AvamuꞋyagaene kavaꞋamiene tokiyaꞋamia amakaseno alihaviya hu-taleteno mukiꞋa veaꞋmogami amaulagafi Satani yaꞋyaga “TokiyaꞋamia omalene.” huno amaveli-maine.   
\s1 YisasiꞋene ago fali-mainonafe nagoꞋa kahegi kea taya ohugahie.  
\p
\v 16 Havigu nagoꞋa veaꞋmoꞋya nesaya kavefeꞋene tifeꞋene opa kanaene sapati kanaene maifalu hisaya kanaenefena “NaꞋa higetama ma kavala nehae.” huꞋya kaiyekea hu otamatesae.  
\v 17 Ani kavaꞋyaga augafaꞋa omalenea yaꞋyaga amemaꞋamo hia avamete huꞋya haenagama falote hisia kanamofe tave-neligi Yisasi KalaisiꞋa tama yatafana agaiꞋage maine.  
\v 18 NagoꞋa veaꞋmoꞋya himonama agaya yafena atafa amaipafiti tusiya huꞋya amaugafa aliꞋya haiteꞋya mage nehae “Taugafa alita nohauna veaꞋne mainone.” huꞋya amega amaugafafiti huteꞋya “Ensole vayaꞋmogami amakia alisaga hiho. Alisaga ohisayana Anumaya Koti nafaꞋnea omainae.” huꞋya nehaya yafe havigu amakai kema havisageꞋya fako huꞋya kanale anonatamia tamaha-falesagi kaꞋye ho.  
\v 19 Ani vayaꞋmoꞋya KalaisiꞋenena aigaꞋmaeꞋya omainae. Tamage KalaisiꞋa tagai kava yagailatesia tagenopa maigeta augafaꞋa mainone. Ani tagenopamoꞋa mukiꞋa augafafina taleꞋya taganunaene nuna amigeno ayegaꞋmaesia yaꞋene amigeno Anumaya Koti tokiyaleti ani augafamoꞋa ko nehie.   
\p
\v 20 Tamakaya KalaisiꞋene ago falitetama kefo yatamia ataletama mukiꞋa ma mopafi tamakinagomogami kefo yana ago atalenae. NaꞋa higetama Yisasi kea nohaviya veaꞋmoꞋya vaineꞋayaya kava hutama vaineꞋayae? NaꞋa higetama mani vayaꞋmo kahegi kea akave nemalae?  
\v 21 Mage huꞋya nehae “Ma yatela atafa ohiho. Ma yana oneho. Ma yatela ameꞋamela ohiho.” huꞋya nehae.  
\v 22 Ani kema nehaya yaꞋyagamoꞋa nesunageno fanane hugahie. AmakaiꞋami amaku amakesafiti mani kahegi kea tamahanepaiye.  
\v 23 NehageꞋya tamage ani kahegi kea kanale havi haviꞋya nehaya vayaꞋmogami kea kana nehagi amegale kea mage hae “Tagaitige Anumaya Koti agia alisaga nehuna yaꞋene laugafa alita ohaisuna yaꞋene laugafa aiko neluna kavaꞋene tahaꞋnemae.” huꞋya hagi ani nehaya kavala taugafa age tahaꞋye hisia yana atalesuna yafe taya ohugahie.   
\c 3  
\s1 Tagaya KalaisiꞋene ago eteta heti-mainone.  
\p
\v 1 Anumaya KotiꞋa KalaisiꞋene tamakaila ago alino hetilamateno haegafa tamahaimula ago tamamine. Tamamineafe tamakaya anafinagati alisaya yafe tamakesa havi havi hutama maiho. Anafinaga YisasiꞋa Anumaya Kotina tamaga ayatega hanea siale maine.  
\v 2 Maineafe mukiꞋa kanafina tamakaya anafinaga yafekeꞋya tamakesa havi havi hutama mainetama ma mopafi yafena tamakesa ohaviho.  
\v 3 Tamakaya kefo yama nehaya atafa tamaipa ago falitegeno kanaleꞋya hutama maisaya yatamia ago falakino KalaisiꞋene aigaꞋmae-maineanagino Anumaya Kotipi hane.  
\v 4 Hanegeno KalaisiꞋa tamahaimuꞋmo aepaꞋa fufuteꞋma evaꞋyi hisigetama tamakaiꞋene tokiya hale yamaꞋafi umaigahae.   
\s1 Nayona yana ago ataleta menia haegafa veaꞋne mainone.  
\p
\v 5 TokiyaꞋage hale yamaꞋafi umaisaya yafe ma mopafi kefo yama nehaya yaꞋyaga hamaetama haꞋno hiho. MaꞋa auꞋavafe nehue munaꞋnene aꞋnene kumai he yane. TamaugafamoꞋa oniꞋyaꞋage nehia kefo yane. Augafa haga neyane. Age lamahaꞋye nehaya yane. Alu kanomo yate age lamahaꞋye nehaya yamoꞋa ago fali-mainaya veaꞋmogamife “Anumayati maine.” huꞋya amakisana vaiꞋya amaku amisaya avamete huno Anumaya Kotina amaku oꞋaminaya avamete kava nehie.  
\v 6 MukiꞋa ani kavaꞋma nehaya veaꞋmogamina Anumaya KotiꞋa aipamoꞋa haviya nehianagino haivaimateno anonaꞋamia amakata aisia yana amamigahie.  
\v 7-8 Hagotetama tamakaiꞋenena ani veaꞋnene vaiyatete nehutama ani kavala hu-mainagi menia mukiꞋa ani kavala ataleho. Kema vaiyane. Tamaipafiti anumayayamo hai yane. Vaya havita haviya humatesaya yane. VeaꞋmogamife kamuge hatagetama vaimate yane. Age lamahaꞋye nehaya yamo avagema nehaya kea ataleho.  
\v 9 Tamakaya atafa kenama asagitama hagaꞋyu hutalaya avamete hutama atafa lamaipaene humainaya yaꞋenena ago atalenagi nelamafu-gamifena havigema ayemavataga nehaya kea ataleho.  
\v 10 Tamakaya yaufa kenama alitama nefaiya avamete hutama haegafa tamaku tamakesale ago mainageno Anumaya KotiꞋa mukiꞋa kanafina agaiꞋa auꞋava yana tamave-ligetama havitetama ani haegafa lamaku tamakesamoꞋa nagoꞋene haegafa veaꞋne kana hutama Anumaya Koti mainea avamete hutama mainetama Anumaya Kotifena havilama hugahae.  
\v 11 Ani haegafa vayala mainetama mukiꞋa veala nagoke avamete mainone Yuta veaꞋnene Yuta vea omainaya veaꞋnene, amaugafa laga hu-malenaya vayaꞋene taga ohunaya vayaꞋene haesa veaꞋnene anupa veaꞋnene nofipi aliꞋya neꞋaliya veaꞋnene afaꞋa maineꞋya miya neꞋaliya veaꞋnene nago avamete mainageno KalaisiꞋa agaiꞋa hagote kanoꞋamia kasagoꞋya veaꞋmogami amakupina maine.   
\s1 VeaꞋmogamife aluya huno lahaisia auꞋava yana alisune.  
\p
\v 12 Tamakaila Anumaya KotiꞋa hapali-lamatenea veala agaila alu aotage veaꞋneꞋa mainageno tamakaifena hau ayamopafi nehaiya veaꞋne mainaya yafe kenama alitama nefaiya avamete hutama maꞋa kanale kavala failiho. MukiꞋa veafe tamahau humatetama kayone humateho. Tamaugafa alitama ohaiho. Alu kanomo kema havisayana ako hutama kea oꞋamakiho. Tamamena mailava hutama maiho.  
\v 13 Tamakai amuꞋnopima mainesia kanomoꞋa nefufena havigema hutesigenofena amena malelava huno maineno aigeꞋateno kefo yamaꞋa ataletesie. AnumayatimoꞋa kefo yatamia ago aigetamateno atalelamateneafe tamakaya aniꞋa hutama ani kavakeꞋya hiho.  
\v 14 Tamahau tamayamopafima nelamahaiya yamoꞋa mukiꞋa mani kanale kavaꞋmona agaseno ala humaine. Kenatimona atafa hisia tamuꞋnofiꞋma kitama atalakoma huna avamete huno tahau tayamopafima nelahaiya yana aniꞋa huno mukiꞋa mani kanale kavala haꞋyagino hetofa huligahie.  
\v 15 KalaisiꞋa tamaipa falu hisia yana tamamineanagino kava hulamatesigetama keꞋa haviho. Nagoke tamaipale maisaya yafe Anumaya KotiꞋa tamakaifena ke higetama ageno “Nagai naugafa nagoke mainae.” huno humaine. MukiꞋa yafena mukiꞋa kanafina Anumaya Kotitega muse huteho.  
\v 16 Kalaisi humainea kea tusiꞋa kanale kegi tamakuꞋafina tokiyaꞋage huno haneno. Mani kea nelamafuꞋya kefo yama hisagetama kanale havi haviꞋyatamileti hamapaitama ali fatago humateho. TamakuꞋaleti yagamea hutama Anumaya Kotitega musena hutetama yagamefiti Anumaya Koti agia alisaga hiho.  
\v 17 MukiꞋama hisaya kavaꞋene kenema mukiꞋa ani yateti Anumayatimona Yisasi agia alisaga nehutama agaiꞋama hulatenea yafena Anumaya Kotitega musena hiho.   
\s1 PoloꞋa Yisasi kema nehaviya alavene nafaꞋneyagaꞋamienefe humaine.  
\p
\v 18 Tamakaya aꞋnemogatama anautamimogami kea akave maleho. NaꞋama hisaya yamoꞋa Anumayamo aufina fatago kava nehie.  
\v 19 Vemogatama aꞋnetamimo-gamifena tamahau tamayamopafi tamahaisigetama amaipa haviya hisia kea hu oꞋamateho.   
\p
\v 20 NafaꞋnemogatama itatami-afotamimogami kea mukiꞋa havitama akave maleho. NaꞋama hisaya yafena AnumayamoꞋa aluya huno nehaiye.  
\v 21 Nefagatama nafaꞋnetamimoꞋya haviꞋya amakaye hisifa kea hu oꞋamateho. Humatesayana amaipa haviꞋya haviya hugahae.   
\s1 PoloꞋa aliꞋya veaꞋnene kavaꞋamimofeꞋene humaine.  
\p
\v 22 Nofipi mainetama miya oꞋali aliꞋya veaꞋmogatama* mopale mainaya kava vayatamimogami kea mukiꞋa havitama akave maleho. Havigu “Nagaifena ‘Kanale kano maine.’ huno hisie.” hutama kava kanomo aulekeꞋya aliꞋyana neꞋalitama havigu alulegama visaya kanafina oꞋalisagi aꞋao Anumayamofena koli nehutama tamakuꞋamoꞋa fatago hinagetama mukiꞋa kanafina aliꞋyatekeꞋya maiho.  
\v 23 MukiꞋa yama hisaya yana alitama tokiyaꞋage hutama aliho. “Ma mopafi afa vayaꞋmogami aliꞋyana noꞋalunagi Anumayatimo aliꞋya neꞋalune.” hutama aliho.  
\v 24 Tamakaya ago havimainae Anumaya KalaisiꞋa tamakaila kava kanotami maineanagino haenagaꞋa aliꞋyatamileti anonaꞋa tamamigahie.  
\v 25 Tamamigahigi veaꞋmoꞋya kefo yama nehisaya yatetila anonaꞋamia aligahae. AnumayamoꞋa mukiꞋa veaꞋmoꞋya humainesaya yateti nago avamete huno anonaꞋamia amamigahie.   
\c 4  
\p
\v 1 Tamakaya aliꞋyate kava vayaꞋmogatama aliꞋya vayatamimo-gamina fatago kavakeꞋya humateho. Tamakaya ago havimainae kava kanotamia ikapinaga nagoke maine.   
\s1 Nunamu hutama havigetama fatago kate tokiyaꞋage hutama vaiye ho.  
\p
\v 2 Tamakaya nunamuna atafa hutama tokiyaꞋage hu-linetama tamau kalo-kalola ohutama efi efi hutama tamakesa havitama musena hiho.  
\v 3 Kalaisifena nayoma hu falakitenaya mono kea nagaya huhaleꞋna hua yateti nagaila navaleꞋya kina hunatageꞋna mainoanagino Anumaya KotiꞋa kama yakinatesigeꞋna ani kema nagoꞋene huhaleꞋna hisua yafena nunamuna havigeho.  
\v 4 Anumayamona haisia avamete kanaleꞋya huꞋna aepaꞋaene huhaleꞋna hisugeꞋya havisaya yafe Anumayamotega ke hutama havigeho.   
\p
\v 5 Tamakaya kanale havi haviꞋyaꞋamima hanea vea kana hutama Yisasi kema nohavisaya veapima mainutama fatago hutama mainetama afaꞋa omaitama Yisasi kea hamapaiho.  
\v 6 Hamapaisaya kemoꞋa mukiꞋa kanafina hagageꞋya hamaisifa kegeꞋya nehutama mukiꞋa veapima kenonaꞋamima hugahena kanale kegeꞋya hutama hamapaisae.   
\s1 PoloꞋa Tikikusigani Onesimusigania hunategeꞋana Kolosi umainaꞋe.  
\p
\v 7 TikikusiꞋa nagaya mukiꞋa navagea tamahapaigahie. Ani kanoa nagaila nenahaiya nenafuꞋe, Anumayamo aliꞋyatela efi efi huno kanale aliꞋya kanogita tokaetaꞋa aliꞋyana neꞋaluꞋane.  
\v 8 Tamakaya tagayama nemauna tavagea tamaha-painagetama havitama muse hisageno tamaipamoꞋa kanale hisiafene huꞋna hutogeno tamakaitega umaine.  
\v 9 Onesimusina agaiꞋene Tikikusiganina hunatesugeꞋana ugaꞋe. OnesimusiꞋa efi efi huno kanale aliꞋya alino maigeno nenahaiya nenafuꞋa, tamakai kumateti kanogino maleꞋma folote humainea yamo kea tamahapaigaꞋe.   
\s1 PoloꞋa Kolosi mainaya veafe huno falu fala humatene.  
\p
\v 10-11 AlisatakusiꞋa nagaiꞋene nofipi mainea kanoene MakiꞋa Panapasina akuꞋamoꞋene YisasiꞋa nago agia YasatusiꞋene huꞋya falu fala hulamatae. Ani vayaꞋmoꞋyage Yuta vayapitila nagaiꞋenena Anumaya KotiꞋma kava yagaisia yafena vaiyatete huꞋya hamanepaiꞋya nagaila aluya huꞋya naya hageno naipamoꞋa kanale humaineafe Makifena nagaya agoꞋma humainoa kele nehavianagitama tamakaiteꞋma uvaꞋyi hisigetama avaletama ali kayone huteho.   
\p
\v 12 EpafalasiꞋa tamakai kumate kanogino tamakaila huno falu fala hu nelamate. Ani kanoa Yisasi Kalaisi aliꞋya kanogino mukiꞋa kanafina tamaya hisia yafena Anumaya Kotitega mage huno havinege “Anumaya Kotina hau-mainea kavafena havilama huteꞋya hetiꞋya tokiyaꞋage veaꞋne fatago huꞋya maisae.” huno havinegeane.  
\v 13 Havinegeno tamakayaene Leotisia veaꞋnene Hielapolisi veaꞋnene tamaya hisia yafena tusiya huno aliꞋyana aligeꞋna agelama huteꞋna tamakaitela huhaleꞋna nehue.  
\v 14 LukuꞋa tahau tayamopafi nelahaiya tota kanotiene TemasiꞋene huꞋana falu fala hulamataꞋe.   
\p
\v 15 Leotisia kumate mainaya tafu-tagana-gamiꞋene Nifaene agai nopi melitalu huꞋya Yisasife haviꞋya amakupi malenaya veaꞋnene hu falu fala humatogi hamapaiho.  
\v 16 Tamakaya mani avoma hapalitama havitetama Leotisia maineꞋya Yisasife haviꞋya amakupi malenaya veate atalegeno vinageꞋya amakaiꞋene hapaliꞋya havisageꞋya amakaiꞋma amaminoa avona tamakaila tamamisagetama hapalitama haviho.  
\v 17 Tamakaya Akipusina mage hutama hapaiho “AnumayamoꞋma kaminea aliꞋyana kava yagaika tokiyaꞋage huka mukiꞋa alio.” hutama hapaiho.   
\p
\v 18 Mani kea nago kanoa hapaugeno kae-maleneanagi nagaya PoloꞋna nagaiꞋniꞋa nayapiti “KanaleꞋya hutama mainao?” huꞋna hu falu fala hulamate keꞋnia negaove. Nagaya nofipi mainogi tamakesa havitama namiho. Anumaya KotiꞋa kayone hisia yamaꞋamoꞋa tamakaiꞋene hanesie.  
\m  
\q1 KeꞋnia male haꞋno hie.  
\m  
\q1 NagaiꞋni nagia PoloꞋnae.