\id 1JN  1 John NT0010.1J - Kanite N.T. Gibson/McCarthy 
\h 1 Yoni 
\toc1 1 Yoni 
\toc2 1 Yoni 
\mt1 1 Yoni  
\ip Yonia Yisasiene vaiyeno tuelufua (12) anagapi maineno Yisasima humainea kea avopi kae-malene. Kae-maleteno haenagaa kosunama leno mainenoa talia (3) avona kae-malene. Yisasia falitenoma hetino ikapinaga haitegeno Yonia sikisitia (60) kafu agava maineno vani (1) Yoni kea kae-maleneane.  
\c 1  
\s1 Haimuaene Kemoa efufute emaine.  
\p
\v 1 Ehema ma mopama talo ohunea kanafina Yisasie, nago agia Haimuma Hanea Kemoe, maineane. Maineanagina nagaya naulagafiti ani kanoa agelama huna agetena nayateti atafa hu-mainoanagina avona kaena tamahanepauve.  
\v 2 Anima hano ohu tahaimumona aepaamoa Nefaene tokaeno maineleti evayi higena age-mainoe. Hano ohu tahaimula agola alita maige maige hisuna kanoa aepaamona agetena tamagelafa huna tamahanepauve.  
\v 3 Tagaiene tamakaienena nagoke taipa huta maisuna yafe havitena agetena humainoa kanomofe tamahanepauve. Tagayama Anumaya Kotiene nafaneamoa, Yisasi Kalaisiene, nagoke taipale mainone.  
\v 4 Mani kema kaova kemoa tagaiti muse yatimoa tamagelafa huno havatesia yafe mani avopina kae-malenone.   
\s1 Tagaya hale yapi ute ete huta maisune.  
\p
\v 5 Nagi Yisasima tahapai-mainea kea havitena tamahanepaugi haviho. Anumaya Kotia hale yamaaene kano mainegeno aguafina osi kanoa haniki mai yamaa tamagelafa huno omalene.  
\v 6 Omaleanagita tagaya Anumaya Kotiene taguamoa nagoke taipale mainone. nehuta haniki mai yapima ute etema hisunana havige nehuta kelamage kemona akave nomalone.  
\v 7 Nomalonanagi Anumaya Kotima hale yapima mainea ya huta hale yapima ute etema hisunana nelafuyaene nagoke taipale maisunagenoa Anumaya Kotina nafaneamoa, Yisasi kolamoa mukia kefo yatia aye hami nelate.   
\p
\v 8 Aye nehami nelateanagi tagaya Kefo yatia omalene. huta hisunana tagaiti taipamona havige aye lavataga hisunageno kelamage kemoa taguafina omalegeta havigeage veane mainone.  
\v 9 Mainonagi tagayama kefo yama hu-mainona yafema hu falotema hisunana Anumaya Kotia aigetateno ani kefo yatia atalelategahie. Anumaya Kotia fatago auava yamaaene kano maineno tahapai-mainea kemona ani kate maleno hugahie. Mukia kefo kavama nehuna yana aye hami-talesigeno taguamoa efeage hugahie.  
\v 10 Tagayama Kefo yatia omalene. hutama hisunana Anumaya Kotifena Havigeage kano maine. huta nehunageno agai kemoa taguafina nomale.   
\c 2  
\s1 Yisasia tagai tahamaisea kano maine.  
\p
\v 1 Nagaini nafaneyagamo-gatama kefo kavala ohisaya yafe mani avona negaogi tagayama kefo yama hisunana Yisasi Kalaisia fatago agu agesaene kanogino tagaite maleno Nefatega ke huno havigegahie.  
\v 2 Anumaya Kotia tagayama kefo yama huna yafena havino aipa haviya hu-lateanagi Yisasia kefo yatihe falitegeno Anumaya Kotia aigetateno alino atalelatene. Tagaitige kefo yafena ani kavala ohunegi mukia ma mopafima mainaya veamogami kefo yafeene ani kavala huno fali-latene.  
\v 3 Hanaa huta Yisasina tagua amitafa hu-mainesuna yafena havisune? Anumaya Kotia kahegi malenea kema akave malesunana tamage huta Tagua amitafa hu-mainone. huta nehuta agaila ago age-mainone huta hugahune.  
\v 4 Nagoa veamoya Anumaya Kotina tagua amitafa hu-mainone. huya nehuya Anumaya Koti kahegi kea akave omalesayana havigeage veane mainageno kelamage kemoa amakuafina omalene.  
\v 5-6 Omaleneanagi nagoa veamoya Anumaya Koti kema akave malesaya yateti Anumaya Kotife hamau amayamopafi tusiya huno hamau-maine. Yisasiene tokaena mainoe. hunoma nehea kanomoa Yisasima hu-mainea kava huno ute ete hisie. Aniama hisunana Yisasiene tokaeta mainone. huta havilama hugahune.   
\s1 Nago kanomoa tamage huno Anumaya Kotifema nehaiya kanomoa nefugamifena nehaiye.  
\p
\v 7 Nahau nayamopafi nenahaiya nafunagana-gatama menima negaova kahegi malenea kea haegafa ohavinaya kea nokaogi nayoma ehe kanafima havilinaya ke negaove. Ani kea nayoma ago havimainaya ke hane.  
\v 8 Haneanagi menima negaova kahegi kemoa haegafa kelafa hane. Haniki-mainea yamoa ago fanane higeno tamage hale yama aye vasa hisia yana ago emaine. Yisasiene tamakaiene kanale kavama nehaya yafe mani kea Tamage nehie. hutama nehae.   
\p
\v 9 Nagoa veamoya Hale yapi nemaune. huya nehuya amafuamakana-gamina amaipa kafama he neamatesayana haniki-mainea yapi mainae.  
\v 10 Amafuamakana-gamifema hamau amayamopafi hamauge hamauge nehia veamoya hale yapi maineya aye hataga huliya kefo yapina asaga hu otavigahae.  
\v 11 Otavigahayanagi amafuamakana-gamina amaipa kafa he neamataya veamoya haniki-mainea yapi maineya ute ete nehageno ani haniki yamo amaulaga ayesu nehigeya visaya kana agelama huya noagae.   
\p
\v 12 Osi nafanenimogatama Yisasi agile Anumaya Kotia kefo yatamia ago aige-lamateno atale-lamatenea yafe mani avona negaove.  
\v 13 Vayatamamo-gatama Yisasia nayoma ehe kanafima mainea kanomona aepaa ago havilama hutama havimainaya yafe mani avona negaove. Neyavemo-gatama Satanienema tua hutama agase-mainaya yafe mani avona negaove.   
\p
\v 14 Nafaneyagamo-gatama Nefafema havimainaya yafe mani avona kae-malenoe. Vayatamamo-gatama Yisasia nayoma ehe kanafima mainea kanomo aepaa havilama hutama havilinaya yafe mani avona kae-malenoe. Neyavemo-gatama tokiya neyave mainaya yafeene Anumaya Koti kemoma tamakupi hanea yafeene Satanienema tu hutama agasaya yafeene tamakaife huna mani avona kae-malenoe.   
\s1 Tagaya ma mopale auava yafena otahaisie.  
\p
\v 15 Ma mopaene mopale hanea yafeene tusia muse hutama agetama tamahayea ohiho. Nagoa veamoyama ma mopafi yafema tusia muse huteya age hamayema hisayana Nefana amakua noamiye.  
\v 16 Mukia mopafi hanea yana augafa haga neyaene aulaga age haye hu yaene augafa alino hai kava hu yaene Nelafategatila omenegi mani mopafima mainaya veamogami amaku amakesafiti falote humaine.  
\v 17 Ma mopaene mukia yama ageya hamaye hu yaene hano hugahianagi Anumaya Kotima haiya kavama nehia kanomoa hano ohu haimula alino agola maige maige hugahie.   
\s1 Kalaisina kame vayaa ago falote humainae.  
\p
\v 18 Nafaneyaganimo-gatama ma mopama hano hisia kanamoa ago falote higeno Kalaisina kame kanoamoa ago egahie hu-mainea kea ago havimainae. Kasagoya Kalaisina kame vayaa ago evayi hu-mainaya yafena ageho ma mopama hano hisia kanamoa ago falote humaine huta havimainone.  
\v 19 Ani Kalaisina kame vayaa tagaiene mainaleti nelataleya tagayama havuna amakesa ohaviya alu anaga maineya tagaila nelataleya havigu nemaiye. Tagayama havuna amakesama havileasipa otatalaleasine. Mukia veamoya tagai anaga omainae huya havisaya yafe tataleya umainae.   
\p
\v 20 Tamakaila Anumaya Kotia Alu Aotage Avamula tamamigetama kelamage kea havilinae.  
\v 21 Nagaya tamakaya Yisasifena kelamage kea ohavinaya yafe avona negaove huna nohugi tamakaya Yisasifena kelamage keama havilinaya yafe negaove. Ke-lamage kefitila havigema nehaya kemoa omene.   
\p
\v 22 Havigeage kanoa ta maine? Nagoa veamoya Yisasina Anumaya Koti hutegeno emainea kanoa, Kalaisia omaine. huyama nehaya veamoya havigeage veane mainae. Ani veamoya Anumaya Kotiene nafaneamoene amakavenoma hutenayana veamoya Kalaisina kame veanea mainae.  
\v 23 Nagoa veamoya Yisasina amakavenoma hutesayana Anumaya Koti nafanea omaine. Omainagi nagoa vayamoya Yisasifema Anumaya Koti hutegeno emainea kano maine. huya hisayana Yisasia amakupi mainegeno Anumaya Kotia nefoamimo maine.   
\s1 Alu Aotage Avamumoa tamageage kea hulave-nelie.  
\p
\v 24 Tamakayama nayoma havimalenaya kea atafa hutakalo higeno kutamifi haneno. Ani kavama hisayana Nelafaene nafaneamoene tokaetama agola maigahae.  
\v 25 Maigahayanagi Kalaisia tagaifena hu lokiya vaino mage humaine Agola maige maige hisaya tamahaimula tamamigahue. huno hu lokiya vai-maineane.   
\p
\v 26 Havigeage kema huya havi kapima tamavaleya visaya yafema aye lamavataga hisaya veamoya havisaya yafe mani avona ago nekaove.  
\v 27 Kaovanagi Anumaya Koti Alu Aotage Avamumona tamamineanagitama tamakaya ago avalageno tamakupi mainegi havigu alu kanomo havi ya tamave-liyafenagi Alu Aotage Avamumoa mukia yafena tamav nelino tamageage hugahianagino havigea ohugahie. Hulamavema-nelia yafena Yisasiene aigamaetama maiho.   
\p
\v 28 Nagi osi nafanenimogatama Yisasiene aigamaetama maiho. Aigamaetama maisunana Yisasima ikapinagati esia kanama vayima hisigeta kolia ohuta agai augafima agesuna yafena tagayea ohugahune.  
\v 29 Tamakayama Yisasia fatago auava yamaaene kano maine. hutama havilama hu-mainaya yafe nagoa veamoya fatago kavama huge huge nehaya veamoya Anumaya Koti nafane mainae. hutama ago havilinae.   
\c 3  
\s1 Menia tagaya Anumaya Koti nafane mainone.  
\p
\v 1 Vaeha Nelafaa tagaifema tusiya huno hau ayamopafima nehaiyanagino tagaifena Anumaya Kotia nafaneyagania mainae. huno humaine. Tamage agaia nafaneyagalafa mainone. Ma mopale yafema muse nehaya veamoya Anumaya Kotifema havilama huya ohaviya kava huya tagayama Anumaya Koti nafanema mainona yafena tagaienefena havilama nohae.  
\v 2 Nenahaiya nafunagana-gatama meni kanafina tagaya Anumaya Koti nafane mainonagi haenagaama maisuna aepaa ohavinonagi mani kemona ago havimainone. Yisasima esia kanafina agaila aepaama agesuna yafe agaienena nagoke avamete maigahune.  
\v 3 Ani yafe mukia veamoya Yisasima esigeya agesaya yafe amametitia nehuya amakua sese huge huge nehuya Yisasia kefo kavama ohuno agupima oniya yama omalenea kava huya kanale kavaage huya maisae.  
\v 4 Mukia kefo kavama huge huge nehaya veamoya Anumaya Kotina amakaveno huteteya agaiama kahegi malenea kea ali neatagae. Kefo yama nehaya yamona aepaamoa Anumaya Koti ke atagae ya hane.  
\v 5 Tamakaya ago age-mainae Yisasia tagai kefo yana ali talegahe ikapinagatila emaine. Agaila aguafina tamage huno kefo yamaa omalene.  
\v 6 Yisasiene aigamaeya nemaiya veamoya kefo kavala huge huge nohae. Kefo kavama huge huge nehaya veamoya Yisasina oageneyagiya agelama huya oagenae.  
\v 7 Osi nafaneyaganimoga-tama tamakaya kaye ho. Nagoa veamoya havi kapi visaya yafe aye lamavataga hugahae. Fatago kavama huge huge nehaya veamoya Yisasima fatago kanoma mainea ya huya ani veamoya fatago veane mainae.  
\v 8 Mainagi kefo kavama huge huge nehaya veamoya Satani nafaneyaga mainae. Satania nayona ehe kanaleti aepa heno kefo kavala hume hume neea kano mainegeno Anumaya Kotina nafaneamoa Satanima kefo kavama hu-malenea yana alino kofanafa huno ali hano hu-talesia yafe ma mopafina efalote humaine.  
\v 9 Anumaya Kotima amatenea veamoya kefo kavala maiya huge huge nohae. Anumaya Kotina haimuamoa amakupi hanegeya Anumaya Kotima amatenea yafe kefo kavala huge huge maiya nohagi amakaya Anumaya Koti nafaneyaga mainae.  
\v 10 Fatago huya nomaiya veamoyaene Yisasi kema nehaviya vayamofe hamau ayamopafima nohamaiya veamoyaene Anumaya Koti nafanea omainae. Ani auava yaamia ageteta Ma veamoya Anumaya Koti nafane mainayanagi atu veamoya Satani nafaneyaga mainae. huta agegahune.   
\s1 Yisasia tafu-tagana-gamife tahau tayamopafima lahau yana tokiyaage yana ago taveli-maine.  
\p
\v 11 Nayoma havimainaya kea mage huno humaine Yisasi kema nehaviya tamafu tamakana-gamifena tamahau tamayamopafi tamahaino. huno hu-maineane.  
\v 12 Tagaya Kenima humainea kava ohisune. Kenia Satani nafanema mainea yafe aganaamona haegeno fali-maine. Naa higeno haegeno fali-maine? Aganaamoa fatago huno mainea yafe agaia kefo kavaage nehia kanogino aipa haviya huteteno aganaamona haegeno fali-maine.  
\v 13 Yisasina tamakuama aminaya nafunagana-gatama ma mopale yafema muse nehaya veamoya tamakaila kamea hu-lamatesaya yafena atali talua ohiho.  
\v 14 Yisasina amukuama aminaya tafu-tagana-gamifena tagaya tahau tayamopafima tahaisiana kefo kavama nehuna yana falimai yapiti ago hetita agola maige maige hisuna tahaimula hanea yapi mainona yafena ago havimainone. Neamafu-gamifema hamau amayamopafima nohamaiya veamoya falimai yapi mainae.  
\v 15 Nagoa veamoya neamafugamima amaipa kafa hematesayana amakeyama fakaliya augafa veane mainagetama tamakaya ago age-mainae. Veama amakeya fakaliya veamogami amakupina agola maige maige hisaya hamaimula omalene.  
\v 16 Yisasia tagaife huno fali-mainea yafe hau ayamopafima haiya yana taveligeta tagaya ago havimainonafe tagaya ania huta Yisasima taveli-mainea kavala nelafu-gamina amaya hisuna yafe falisune.  
\v 17 Faligahunanagi nagoa veamoyama ma mopalema kanaleya huya maisaya yana hanegeya nagoa yafema kafu huya nemaiya anagaamima amaketeya Tamahaote yatamie. huya nagola nesaya yana oamamisagenoa Anumaya Kotina hau ayamopafima nehaiya yana ani veamogamipina tamage huno omalene.  
\v 18 Osi nafaneyaganimo-gatama nelafu-gamifena tahau tayamopafina Tusiya huno tamakaifena nelahaiye. huta tavayafiti keagela ohisunagi tamagelafa huta amaya nehuta tagua amamigetao.   
\s1 Anumayamona aguama aminesia kanomoa Anumaya Koti aufina kolia ohugahie.  
\p
\v 19-20 Ania hisunana Anumaya Kotina kelamage kea haviteta mainona veane mainone. huta nehavita tagaiti taguamona Kefo kava nehunanagino Anumaya Kotia kaiyeke hulategahie. hutama hisagenoa Anumaya Kotia tagai taguamona agaseno ala kano maineanagino mukia yafena ago havimainea kano maineafe Tagaila laya hugahie. nehuta agai aufina taipamoa falu hinageta maigahune.  
\v 21-22 Nenahaiya anaganimo-gatama taguamoa kaiyekema hu notatesiana tagaitihena Kefo kavala nohune. huno hisigeta Anumaya Kotifena kolia ohuta nunamuma huta havigesunagenoa keama akave nemalona yafeene haiya kavama nehuna yafeene havigesuna yana tamigahie.  
\v 23 Anima akave malesuna kahegi kemoa mage huno nehie Nagai nafanea Yisasi Kalaisia hulamatenea yafena havitama tamakupi maletama tamametiti hutetama mama Yisasima hu-mainea kea akave maletama nagoke nagokemo-gatama nelamafu-gamifena tamahau tamayamopafi tamahaino. huno hu-maineane.  
\v 24 Mukia Anumaya Kotia kahegi malenea kema akave nemalaya veamoya Anumaya Kotiene ailokaeya maigeno Anumaya Kotia ani veamoyaene ailokaeno maine. Ani yafema havisuna yafe Alu Aotage Avamula ago tamigeno tagai tagupi maine.   
\c 4  
\s1 Avamumogamina fako hutama Anumaya Kotitegati neefi alu kateti neefi hutama ageho.  
\p
\v 1 Nenahaiya anaganimogatama ma mopafina kasagoya havigeage amaune vayamoya Anumaya Koti kea alita neone. huya emainagi mukia vayamoya avamumo kema hisaya kea ohavitama hagotetama Anumaya Koti humategeya emainafi? Hanateti emainafi hutama agelama hutetama amakai kea haviho.  
\v 2 Maa hutama agelama hiho Yisasi Kalaisia ma mopafima eana velafa emaine. huyama humainaya veamogami agetetama Amakupina Anumaya Kotina Alu Aotake Avamuamoa maine. hutama agelama hugahae.  
\v 3 Yisasia ma mopafima eno velafa maine. huya hu falotema nohaya vayamogami amakupina Anumaya Kotina Alu Aotage Avamuamoa omainegi alu avamule Anumaya Kotitegatila omenea avamu amakupina mainegetama tamakaya inaa augafa vayama esaya kea ago havilinae. Ma mopafina Kalaisina kame hutesaya amaune vayala ago emainae.   
\p
\v 4 Osi nafanenimogatama tamakaya Anumaya Koti nafaneyaga mainae. Ma mopafima mainea Satania osi kanoa mainegi Anumaya Kotina Alu Aotage Avamuamoa tamakupima mainea Avamumoa Satanina ago agaseno ala mainea yafe havigeage amaune laga nehaya vayala ago amakase-mainae.   
\p
\v 5 Anima havigeage amaunema laga nehaya vayala ma mopafiti falote huteya mopale yafe kea nehageya mani mopafi yafe musema nehaya veamoya amakai kea nehaviye.  
\v 6 Nehaviyanagi tagaya Anumaya Koti nafaneyaga mainone. Anumaya Kotina agelama nehaya veamoya tagai kea nehaviyanagi Anumaya Kotia oamatenea veamoya tagai kea nohaviye. Ani kavama nehaya yafe ke-lamage Avamumoma nehia kene havigeage avamumoma nehia kene havilama huta ago havilinone.   
\s1 Anumaya Kotifema nelahaiya avamete nelafu-gamifena tahau tayamopafi tahaisie.  
\p
\v 7 Nenahaiya anaganimo-gatama tahau tayamopafima nelahaiya yana Anumaya Kotitegati efalote huno emaine. Ani yafe Yisasina amakuama aminaya anagatimo-gamifena tahau tayamopafi nelai-hainageta maigetao. Mukia anagatimo-gamifema hamau amayamopafi nehamaisia veamoya Anumaya Koti amatenea veane maineya Anumaya Kotina agelama nehae.  
\v 8 Anumaya Kotia tahau tayamopafima nelahaiya yamona aepaa maine. Ani yafe hamau amayamopafima nohamaiya veamoya Anumaya Kotina tamagelafa huya oagenae.  
\v 9 Anumaya Kotia maa huno tagaifena hau ayamopafina hau-mainea kavala tagaila taveli-maine. Anumaya Kotia agaia nafanea aiya nagoke nafaneamona hutegeno ma mopafina emaine. Emaineafe Yisasima fali-mainea yateti agola maige maige hisuna tahaimula aliteta kanaleya huta maisuna yafe hutegeno emaine.   
\p
\v 10 Manima hau ayamopafima hau-mainea yana tagaya Anumaya Kotife tahau tayamopafi nelahaiya yanomagi agaia tagaifema hau ayamopafima hau-mainegeno agaia nafanea hutegeno emaine. Tagayama kefo yama huna yafena Anumaya Kotia havino aipa haviya hu-lateneanagi Yisasia kefo yatihe huno faligeno Anumaya Kotia aigetateno kefo yatia alitalesia yafe Yisasina hutegeno emaine.   
\p
\v 11 Nenahaiya nafunagana-gatama haviho Anumaya Kotia ania huno tagaifena hau ayamopafima hau-mainea yafe tagaya ani kava huta nelafu-gamifena tahau tayamopafi tahaisie.  
\v 12 Nagoke kanomoa Anumaya Kotina oagenegi tagayama nelafu-gamifema tahau tayamopafima lahaisigenoa Anumaya Kotia tagaienena tokaeno mainegeno agaima hau ayamopafima hau-mainea yana tagupi tamigeno tokiyaage huno ala hu-maine.   
\p
\v 13 Anumaya Kotia Alu Aotage Avamua ago taminea yafe Anumaya Kotia tagupi maigeta tagaya agai agupi mainone. huta havimainone.  
\v 14 Havuna yafe Anumaya Kotia agaia nafanea hutegeno ma mopafi veamogami amaku amamemaa aligatisia yafe emaineanagita agaila ago agelama humaineta tamakaila tamahanepaune.  
\v 15 Tamahanepaunanagi nagoa veamoya Yisasifema Anumaya Koti nafane maine. huya hisayana Anumaya Kotia amakaiene tokaeno maigeya ani veamoya Anumaya Kotiene tokaeya mainae.   
\p
\v 16 Anumaya Kotima tagaifema hau ayamopafima nehaiya yana ago havilama huta tagupi malenone. Anumaya Kotia tahau tayamopafima nelahaiya yamona aepaa mainegi hamau amayamopafima nehamaiya veamoya Anumaya Kotiene tokaeya maigeno Anumaya Kotia amakaiene tokaeno maine.  
\v 17 Ani yafe Anumaya Kotife tahau tayamopafina tusiya huno tahau-mainesigeta tagaya ma mopafina maineta Yisasima hu-mainea kava huta maisuna yafe Anumaya Kotia kaiyekema humatesia yupa kolia huta lagayea ohugahune.  
\v 18 Anumaya Kotia hau ayamopafima nehaiya veamoya kolia nohaya yafe Anumaya Kotia hau ayamopafina tusiya huno nehaiya yamoa koli hisaya amakesa ago anati-talene. Kefo kavama nehuna yafe anonaa havi yana aligahune. huya amakesa nehavigeno kolia hu yana falote nehigi kolima nehaya veamoya Anumaya Kotima amakaifema tusiya huno hau ayamopafima nehaiya yamoa amakaipina tokiyaage huno ala ohune.   
\p
\v 19 Anumaya Kotia hagoteno tagaifena hau ayamopafi hau-mainea yafe tagaya nelafu-gamifeene Anumaya Kotifeene tahau tayamopafina lahaisie.  
\v 20 Nagoa veamoya Anumaya Kotifena Tahau tayamopafima nelahaiye. huteya Yisasina amakuama aminaya aganaamo-gamifema amaipa kafama he neamatesayana havigeage veane mainae. Age-mainaya anagaamo-gamifema ohamaisiana ania huya Anumaya Kotina, oagenaya kanomofena, hamau amayamopafina nohamaiye.  
\v 21 Anumaya Kotia kahegi malenea kema taminea kemoa mage huno humaine Anumaya Kotifema hamau amayamopafima nehamaiya veamoya ania huya Yisasina amakuama aminaya veamogamina hamau amayamopafina hamaisie. huno humaine.   
\c 5  
\s1 Yisasife amakupi maleya amametiti nehaya veamoya ma mopafi kefo kavamo tokiya ago agase-mainae.  
\p
\v 1 Mukia veamoya Yisasife Anumaya Kotima taugafa aligatigahe hutenea kanoa, Kalaisi maine. huyama haviya amakupi maleya amametitima hayana Anumaya Kotina nafaneyagaa mainae. Maineya Nelamafaa, Anumaya Kotifena, amahau amayamopafima hamaisigeya ania huyama Anumaya Kotina nafaneyagaahena hamaugahie.  
\v 2 Tagaya Anumaya Kotifema tahau tayamopafima tahaisigeta agai kema akave malesunana agai nafaneyagahe tahau tayamopafina nelahaiye huta havigahune.  
\v 3-4 Tagayama Anumaya Kotife tamagelafa huno lahaisiana agai kea akave malegahune. Agai kemoa kana ohuneanagita Anumaya Kotima latenea nafaneyagaa maineta ma mopale kefo kavala ago agase-mainone. Agaifema tagupi maleta tametitima hu-mainonana ma mopale kefo kavala ago ataleta agase-mainone.   
\s1 Anumaya Kotia nafaneamofe huhaleno humaine.  
\p
\v 5 Hana veamoya ma mopale kefo kavala ago ataleya agase-mainae? Yisasia Anumaya Kotina nafaneama maine. huya amakupi maleya amametitima hu-mainaya veamoya ma mopale kefo kavala neataleya ago agase-mainae.  
\v 6 Yisasi Kalaisia egeno tina faletetegeno fali-mainea kolamaamoa lavi-mainea yateti Anumaya Kotia tagu tamena aligatigahe hutegeno emainea kano maine. Ani kanoma emainea yafe titetikela lave-otinegi agaia kolamaaletiene taveligeta age-mainone. Anumaya Kotina Alu Aotake Avamuamoa kelamage kemona aepaa mainea yafe ania huno tave-nelie.  
\v 7-8 Yisasia Anumaya Kotima taugafa aligatigahema hutegeno emainea kanohena tagufa (3) yamo tahanepaiye, Anumaya Kotina Alu Aotake Avamuamoene timoene kolamaamoene tahanepaiya nagoke kate tahanepaiye.  
\v 9 Nehageta tagaya veamoyama hu falote haya kea nehavunanagi Anumaya Kotima hu-mainea kea Yisasia nagaini nafane maine. huno hu falote hunoma humainea kea veamogami kemona amakaseno ala humainea kegita havisune.  
\v 10 Anumaya Koti nafanehema haviyama amakupi maleya amametitima nehaya veamoya Yisasifena amakupi ago havimainagi Anumaya Kotifema haviya amakupi omaleya amametitima nohaya veanea Anumaya Kotia Yisasifema nagaini nafane maine. huno hu-mainea kema nohaviya yafe Anumaya Kotifena Havigeage kano maine. huya nehae.  
\v 11 Anumaya Kotia mage huno humaine Agola maige maige hisaya tamahaimula ago tamaminoe. hunoma hiana agola maige maige hisuna tahaimumona aepaa agaia nafane maine.  
\v 12 Nagoa veamoya Anumaya Kotina nafanehema Nagupi emaiyo. huyama hisayana agolama maige maige hisaya hamaimula ago ali-mainagi Anumaya Kotina nafaneamofema Nagupi emaiyo. huyama nohaya veamogamina Yisasia amakupina omainegeya agolama maige maige hisaya hamaimula oalinae.   
\s1 Tagaya havimainone maige maige hisuna tahaimula ago ali-mainone.  
\p
\v 13 Agola maige maige hisuna tahaimula ago ali-mainone hutama havilama hisaya yafe tamakaya Anumaya Koti nafanehe havitama tamakupi maletama tamametitima haya veamogatami mani avona kaena tamahanepauve.  
\v 14 Tagaya Anumaya Kotitegama nelahaisia yafema havigesunana havigahie. Havigahie huta havimainona yafe agaifena kolia ohuta agaite eupa huta havinegone.  
\v 15 Mukia yafema havigesunana havigahie. huta havilama hu-mainona yafe Havigesuna yana lamigahie. huta havimainone.   
\p
\v 16 Nagola kefo kavala falisia augafa kefo kava haneanagi nago kanoa ania augafa kefo kavama hiseana ani kanomofe Anumaya Kotitega ke hutama havigeho huna nohugi nago negafuma agesanageno kefo kavama mainoma nehisia kanomofena Anumayamotega havigesanageno agola maige maige hisia haimula amigahie.  
\v 17 Mukia kefo kavala kefo yamaage hanegi kefo kavafema amakua aiyahaema hisayana ofaligahae.   
\p
\v 18 Tagaya ago havimainone Anumaya Kotima atenea kanomoa kefo kavala maino huge huge nohie. Yisasie, Anumaya Kotima atenea nafanemoa, auvai neamatea yafe Satania melino haviya humategahena mematafa ohugahie.   
\p
\v 19 Anumaya Koti nafaneyaga mainonagi mukia veanemoya Satani tokiyale aiyafinaga nemaiya yafe tagaya ago havimainone.   
\p
\v 20 Yisasi Kalaisia, Anumaya Koti nafanemoa, eaamo aepaa agelama hisuna tagu tagesa ago tamineafe tamage Anumaya Kotina agelama nehuta agaiene nafaneamoene ailokaeta mainone. Ani kanoa tamage Anumaya Koti maineno agola maige maige hisuna tahaimumona aepaa maine.  
\v 21 Mainegi osi nafaneyaganimogatama kava yagaitama afaa Anumayamofena tamakesa havitama tamakua oamiho.  
\m  
\q1 Kaiyekenia male me hano hie.  
\m  
\q1 Nagainia nagia Yoninae.