\id TIT Titus 1, Kate, PNG, wwh 12/92 
\h TITO 
\toc1 Tito 
\toc2 Tito 
\toc3 Tito 
\mt1 TITO  
\c 1  
\s1 Mumušâwe â jambuŋdâŋ  
\p
\v 1 Paulo, Anuture kiŋaŋŋic â Jesu Kristore aposolo, no gie munarekicne i Anuture bâwosâecfâc jaŋe mamanasiŋhec eniŋte â dâŋ fâri qizecne mitio fokac i mana taraniŋte”  
\v 2 ehuc juju sanaŋte biŋedâŋ, Anutu burec tâmiriczi mârâc jaha dameŋ mi fowecko muwec, i manahuc juju sanaŋ worickehuc juniŋte.  
\v 3 Dâŋticne i hâcne dameŋ-ticnao mufuahuc Anutu bâbâpiaŋ-nâŋeczi noni muromackepemurâ mupaŋke-narewec.  
\v 4 Eme mamanasiŋ wirec fonârekacte motec jâmbâŋ-nane jukomec Tito go hâcne papia ši râe-garekopac. Anutu Mamac â bâbâpiaŋ-nâŋec Kristo Jesu eraonec aki anonoc â wama gorao fotâcnerâ fozejec.   
\s1 Soŋaŋ micne bapa jaŋere dâŋ  
\p
\v 5 Gie tofane fokac i bataracmurâ Kreta nucko hetaracgupo, irec gazapo iŋuc ehuc hae sâc soŋaŋ râec-jopa razemec.  
\v 6 Ŋic moc bahac fâsâc â ŋokac mocjahahec juocmu, erâ naru motecfâcne mitihec â šaubac tâmiric â pepecne tâmiric juniŋmu, ŋic iŋucne râec-jopazemec.  
\v 7 Micne bapa moc e Anuture gie soŋaŋkeekaczi bahacmâc juzejec, ehuc pepecne tâmiric â šâšâicne tâmiric â waiŋ âmbâŋ mi nânâ â šikare aafec tâmiric â moneŋ mafare sasec tâmiric, iŋuc juzejec.  
\v 8 Erâ jauŋhec â wiac biaŋne sasawa dodopecke â wama ruaine, tiŋne, araŋ bapanehec â sowa bâtâchec juzejec.  
\v 9 Mitidâŋ mu qaqazuc ehuc hatane basanaŋkekicne i paŋnea bajuzejec. Eme izi tâpiri râcneme dâŋ fâri biaŋ ŋic qazu-jarehuc mu sawaŋ ejarezejec â miti âke sipueŋgopieŋ jaŋere dâŋ bawahazejec.   
\s1 Mumusifuc â eeatuc ŋic  
\p
\v 10 Ŋic bocjahazi râŋgeŋne â dâŋ racne mumu â eeatuc-jeŋichec juŋgopieŋ, Judaŋiczi opâ ruac jaŋerao wemo afecnezi iŋuc juŋgopieŋ.  
\v 11 Ŋic izi hâcne moneŋ mafare erâ, mumusifuc-jeŋic qatarakicne i musawehuc garikiŋ gâcne furu jaha ba sipiric ejareeŋgopieŋ” ŋic iŋucne jaŋere mic qâbâzickezo.  
\v 12 Kreta jaŋacne porofete moczi šiŋuc muwec: “Kreta ŋic jaŋe burec hati, qowi mimicne â wiac âmbâŋ nânâ.”  
\v 13 No dâŋ i manape jâmbomac ekac. Irec go mu bâtiŋ sanaŋne ejaretec mamanasiŋzi bâɋârec-jopame ɋiɋic qanšepieŋ.  
\v 14 Ehuc Judaŋic jaŋere mamana gufuc dâŋ racne â ŋic dâŋfâri râpeckembiŋ jaŋere sâcmutâc dâŋ mi mananšepieŋ.  
\v 15 Maŋɋaɋachec jueŋgopieŋzi wiac sasaware manapie ɋaɋacne eekac. Á sâqocnezi maŋjeŋic bâbiekume mamanasiŋ tâmiric embiŋ jueŋgopieŋ, jaŋe ine mamana â maŋjeŋic mâmâc wâwânâŋhec efârewecte wiac mocte manapie ɋaɋacne mi eekac.  
\v 16 Jaŋe, Anuture fuŋne manaeŋgopeneŋ, miczi iŋuc muhapie eebapa-jeŋiczi ine mickeekac. Jaŋe ŋic mamakâcne â dâŋ qaqatara, â gie biaŋne moc bapanere sâc mâcne.   
\c 2  
\s1 Ŋic ŋokac kâcɋene jaŋere dâŋ  
\p
\v 1 Go ine miti riucdâŋ fokac irec sâcko jaza mutâc ezemec.  
\v 2 Ehuc mutec ŋic kâcɋene jaŋe sowa bâtâc â metâne â wama ruaine jupie mamanasiŋ â maŋjauŋ â maŋuruc furu fojarezejec.  
\v 3 Erâ ŋokac kâcɋene iŋuc jaha jazatec miti ŋokac fârine erâ gupe micko âkec tâmiric â nârâmbe tâmiric juhuc juju biaŋte qaqazu enšepieŋ.  
\v 4 Ehuc ŋokac socɋâri jaza mutâc epie ŋowe ɋiefâc-jeŋic jauŋ biaŋne ejarenšepieŋ.  
\v 5 Erâ mimihec erâ sasec tâmiric juhuc nâ qofac â wiac bâpiaŋke emasaŋ ehuc ŋowefâc-jeŋic sâsec-jopanšepieŋ. I Anuture dâŋ susure fuazacte iŋuc enšepieŋ.   
\s1 Ŋicmotec â kiŋaŋ qaqa jaŋere dâŋ  
\p
\v 6 Ŋicmotec iŋuc jaha esoc-jopatec sowa bâtâc-jeŋichec junšepieŋ.  
\v 7 Ehuc go gahac wiac biaŋne sasawa irec micne bajarehuc eehâmo gie batec honerâ bâjâpecgunšepieŋ. Miti mutiŋnehuc â bâmâckehuc jazazemec.  
\v 8 Erâ hata sanaŋ fokac irec sâcko musaricketec kisâ jaŋere maŋ henšaŋneme jaŋe burec enâreniŋte dâŋ basarâ behenšepieŋ.  
\v 9 Kiŋaŋ qaqa jazatec bomboŋfâc-jeŋic jaŋere dâŋ reŋke-fârehuc kiŋaŋ biaŋne qajarenšepieŋ, ehuc micjeŋicko mi ronšepieŋ.  
\v 10 Erâ fiuc serereŋ tâmiric juhuc wiac-jeŋic hone qâzuc ehâmonšepieŋ. Iŋuc ehuc bâbâpiaŋ-nâŋec Anutu dâŋticne ba eric ecneniŋmu.   
\s1 Ʒure baɋaɋac enârekicnere juju jaŋgeŋnao juzo  
\p
\v 11 Mâreŋ sâc ŋic biaŋkenaŋte Anuture aki anonoczi bâtâcne bâtimuŋ ewec.  
\v 12 Erâ izi bâfiriec-nâpohuc bâtiŋ-nâpohame qâpuc hata â wiac jawanere andac i qikiŋnerâ mâreŋ šira wama ruaine â tiŋne â mitine junšepeneŋ.  
\v 13 Iŋuc juhuc Anutu sâko â bâbâpiaŋ-nâŋec Kristo Jesu ere eri tatamac fua tâcneme juju aŋacko fisinaŋte irec mamanac junšepeneŋ.  
\v 14 Eki hâcne nâŋâcnere due bahuc sindaŋkonec bâhoc-nâpowec, erâ fuŋfuŋfâc-ticne juhuc mitire fârine šoɋac erâ bâfuanaŋte šure bâpiaŋ enârewec.  
\v 15 Go paŋšâic erâ dâŋ i hâcne jazahuc mu sawaŋ â mu bâtiŋ ejarezemec. Ŋic jaŋe go mi hucgunšepieŋ.   
\c 3  
\s1 Tiri Mâroraonec fufua ɋâricne fuambeŋ  
\p
\v 1 Go dâŋ heɋâre-jarehuc jazatec ŋic jaŋe kia gawamaî â fekicne araŋ bajarehuc dâŋjeŋic reŋkenšepieŋ, erâ gie biaŋne fuŋne fuŋne fokac irec afeckerâ banšepieŋ.  
\v 2 Erâ mumusoriŋ â dâŋ mumuc mi enšepieŋ. Aricne, wamane juhuc ŋic maŋuruc ejare-fârenšepieŋ.  
\v 3 Nâŋâc mârâc jaha iŋuc jaha maŋmutuc erâ râŋgeŋne juhuc qac qâsoric ejumbeneŋ. Erâ sasec fuŋne fuŋne irec kiŋaŋ qahuc sindaŋ â iiŋguuŋ bâfuarâ mamakâcne erâ kikisuec ejumbeneŋ.  
\v 4 Izi šâhec ine bâbâpiaŋ-nâŋec Anutu uruc jauŋ â buafec-ticne fua tâcneme  
\v 5 eki nâŋâc tiŋne juhuc gie moc bambeŋte mâcne, buuruc-ticnere erâ juju ɋârire opâzi â Tiri Mâroraonec fufua ɋâricnezi bâpiaŋ-nâpowec.  
\v 6 E bâbâpiaŋ-nâŋec Jesu Kristore erâ Tiri Mâro afecne mi qoŋgiŋke-nârewec.  
\v 7 I nâŋâc Kristore aki anonocte erâ kiŋnâŋec fâsâeme juju sanaŋte mamanac juku rauckenaŋte iŋuc enârewec.   
\s1 Dâŋ fârimâc qikiŋnezo  
\p
\v 8 Dâŋ i jâmbomac, eme go ɋicwânšâŋ erâ âkendâŋnetec Anutu manasiŋkeeŋgopieŋzi eehâmo gie baniŋte šoɋac enšepieŋ. I wiac biaŋne, i epie ŋic jauŋ bacjopaocmu.  
\v 9 Á mugufuc dâŋ jawane â fuŋne qaqa dâŋbiri â sâcmutâc dâŋte mu qaqatarac â bac bârisic ine geŋkezemec. I wiac racne â fârimâc.  
\v 10 Ŋic hâme âkefâucne moc uŋdâŋ mocjaha me jajahec âzâcnetecne qikiŋneme behetec buc juzejec.  
\v 11 Go manakic, ŋic iŋucne e qaqaharicne, maŋnezi mumu hehec ecne-bipieha sâqocne baekac.   
\s1 Mumutara dâŋ  
\p
\v 12 No Atema me Tikiko sorepe gorao fâ fisime biac Nikopoli haeo ware bâfuacnuzemec, no hae ira hâcne hoemaŋko juzo mukopac.  
\v 13 Sâcmutâc mamana ŋic Ʒena â Apolo jahe miti kiŋaŋ ranicte nânâ mafa wiac bâmocke-jactetec wiac mi basahuc bititiezepirec.  
\v 14 Ŋicfâc-nâŋec jaŋe wâc eehâmo gie baku maŋjeŋic ezejec, eme sahacte dope babasa fuaocmu sâc jauŋ gie bapie miti-jeŋiczi fârinehec ezejec.  
\v 15 Ŋic nohec jueŋgopieŋ jaŋe sasawa go manasu-gareŋgopieŋ. Mitio âgo enâreeŋgopieŋ jaŋe manasu-jareŋgopeneŋ irec wâc jazazemec. Aki anonoczi sâcŋopa-fârezejec.