\id JAS James, Kate, PNG, wwh 12/92 
\h JAKOBO 
\toc1 Jakobo 
\toc2 Jakobo 
\toc3 Jakobo 
\mt1 JAKOBO  
\ip Jakobore papia mo mitiŋiczi qâreŋkewec i mi mana sanaŋkeŋgopeneŋ. Ŋic gâcne jaŋe, Jesure ɋa Jakobo eki mecne qâreŋkewec, iŋuc muhapie gâcne jaŋe šiŋuc mueŋgopieŋ: Aricne, Judaŋic opâ ruac moc šâhec juwec eki Jakobore šâŋeo âkehotahuc qâreŋkewec. Qâreŋŋic e me e qâreŋkeweczi fuŋne-ticne mi mutaniŋkewecte mi mana-hâmoŋgopeneŋ hâcne. Irec Jesure ɋazi qâreŋkewec iŋuc mi musanaŋkehuc mecnehec sawa mupene fooc.  
\ip Papia maŋnao miti mamana betaŋkekicne jaŋere uŋsawaŋ dâŋ bocjaha qâreŋkekicne fokac. Erâ papia i kikefuŋ mocjahere biŋe mâcne, Judaŋic opâ ruac Siria mâreŋko jurambiŋ jaŋere biŋe qâreŋkekicne. Jerusalem haeo mitire šika fuame ŋic ŋokac bocjahazi wiserâ hae mâreŋ gâcnao rambiŋ. Ehame gâcnezi Siria mâreŋko fisirâ ira hâcne jurambiŋ. Ehuc Judaŋic fekicne ijaha jumbiŋ jaŋere kiŋaŋ qaqa embiŋ. Jaŋe šâic busâqocko jumbiŋ. Bomboŋfâc-jeŋic jaŋe qaisoc-joparâ râsi ejarembiŋ. Eme irec qâreŋŋiczi maŋuruc qajarewec (gaŋ 1:1-8 â 5:7-11). Erâ bocjahazi miti sahaczi sawa bajumbiŋte šiŋuc qâreŋke-jarewec: Mamanasiŋ fâri tâmiric i wiac jawane (gaŋ 2:8-26). Ŋic fekicne moc moczi tutumaŋ-jeŋicko fisipie boc dape-jarembiŋ, irec mana sâqorerâ qâreŋkewec wâc (gaŋ 2:1-7). Erâ fekicne jaŋere fuŋne rituwec (gaŋ 1:9-12 â 5:1-6). Nameŋzi bâbâsâqorec embiŋ, irec uŋdâŋ mâmâc râe-jarewec (gaŋ 3:1-12 â gaŋ 4:1-12).  
\c 1  
\s1 Eesâicte fârine  
\p
\v 1 Jakobo no Anutu â Jesu Kristo ere kiŋaŋ qaqazi Israe ŋicguru 12 siŋsaŋ qarâ juraŋgopieŋ ŋoŋe mu šeri eŋarehuc papia ši ŋe-ŋarekopac.  
\v 2 Ŋoŋerao eesâic fuŋne fuŋne fuame manapie bubiaŋnehec sasawa ezejec.  
\v 3 Wiac iŋucnezi hâcne mamanasiŋ-ŋeŋic ba esâic ecnekume gâtâ bame ŋoŋerao sasanaŋ fuaocmu.  
\v 4 Sasanaŋte fârine ŋoŋerao fua-hâmozejec, eme wiac moc mi basahuc bahacmâc â maŋfuru junšepieŋ.   
\s1 Maŋɋârâŋ basarâ Wofuŋ numucnezo  
\p
\v 5 Ŋoŋeraonec moczi maŋɋârâŋ basarâ Anutu numucnezejec. Eme e ŋic sasawa, dâŋ mi munârehuc, wiac maŋhumuc nâreekaczi bâfuacneocmu.  
\v 6 Nunumu ine maŋjahec ehuc mâcne, Wofuŋ manasiŋkehuc numucnezejec. Maŋjahec eocmu e hâwec siri, mâŋâŋzi ficne sueme fâuckerâ tâtieekac, iŋucne eocmu.  
\v 7 Ŋic iŋucnezi Wofuŋtaonec wiac moc roocmu mi muzejec.  
\v 8 Maŋguru â tie faranezi wemocko iŋuc eocmu.   
\s1 Mafahec juju i wiac fârine mâcne  
\p
\v 9 Opâ ruac wahakicnezi fekicne jukopac muhuc maname šerine ezejec.  
\v 10 Á mafaŋiczi wahakicne jukopac muhuc maname šerine ezejec. Jâcârizi ŋeindaŋnerâ biac mârâŋkeekac, iŋuc jaha mafaheczi biac siroweniŋmu.  
\v 11 Ʒoaŋ e furicte wefurâ šocnezi šariŋ rikeme ɋaŋame ârine mârâŋkeme eri-ticne wahaekac, iŋuc jaha mafaŋic jaŋe ɋaŋapie qâŋtac-jeŋic sawa ŋeocmu.  
\v 12 Ŋic moc e eesâicko qiŋ herâ juocmu ere manape šerine ekac E sanaŋkeku maŋne eme Wofuŋzi eri hendiŋ juju sanaŋ hâcne râcneocmu maŋjeŋic ere domakac jaŋe biŋe qajarekicne.   
\s1 Eesâicte dâŋ  
\p
\v 13 Ŋic moc sâqocnere eesâic fuacneme šiŋuc mi muzejec: Anutuzi esâic nukac. Sâqocnere eesâic Anuturao fufuane mi fokac, â eki wâc ŋic moc sâqocnere mi esâickeocmu.  
\v 14 Eesâic ine kecšiŋuc fuaocmu, qanaŋ ŋic moc e jahacne saseczi beŋgisic sicnecnehuc hehawickeocmu.  
\v 15 Eme saseczi motec kiweckerâ roocmu, šâŋene sâqocne” sâqocnezi ine woze qeuc eku hâmoc bâfuaocmu.   
\p
\v 16 Âgo biaŋfâc-nane, ŋoŋe dâŋ mi mana sifuckenšepieŋ,  
\v 17 jauŋ biaŋne â taha fârine i faicnec sasawa, tatamac Mamac eraonec wahaekac, erao hâcne hec hetikic â sâsâoc mi fokac.  
\v 18 Anutu e manapaŋkewecte dâŋfârizi naru motecfâcne bâfuac-nâpowec, i wiac sasawa bâfuawec irec hata qaqasune tinac enaŋte iŋuc enârewec.   
\s1 Dâŋ mamana sawazi aricne, rereŋzi fârine  
\p
\v 19 Âgo biaŋfâc-nane, mananiŋ. Ŋiczi dâŋ mamanare afeckenšepeneŋ, dâŋ mumure â aaricte ine ŋemâckenšepeneŋ.  
\v 20 Aaricko wiac eeŋgopeneŋ izi Anuture tiŋne hata ririekac.  
\v 21 Irec ŋoŋe maŋwânâŋ â râŋgeŋ bârâŋgeŋ hetararâ urucko juhuc maŋŋeŋicko mitidâŋ râekicne i âgo ecnenšepieŋ. Izi hâcne maŋ qâqâtâc-nâŋec bâpiaŋkeocte tâpiri focnekac.  
\v 22 Ŋoŋe mitidâŋte fârine bâfuanšepieŋ, mâc hazecte nâpene sawa eme maŋŋeŋic eatuckeniŋmu.  
\v 23 Moc e mitidâŋ mana qâoma eocmu, e ŋiczi šâŋe mai-nâŋec hawario honerâ eeŋgopeneŋ, sâc ijaha eocmu.  
\v 24 Ʒâŋe mai-nâŋec hawario honerâ ra qâoma erâ izia hawari-nâŋecte nikec-nâpoekac.  
\v 25 Á moc e sâcmutâc dâŋ fârine, rambaŋko rârâec-nâpone, dâŋ ira mana utuckerâ juocmu, ehuc mana qâoma mâcne, mana rereŋ eocmu, iŋucnezi ine dâŋte fârine bâfuarâ mana aŋac eocmu.   
\s1 Mitio jujure dâŋ  
\p
\v 26 Moc e mitio jukopac muekaczi micbipic-ticne mi soŋaŋkehuc maŋticne eatuckeekac, ŋic iŋucnere mitio juju i racne eocmu.  
\v 27 Hozec bekâ busâqocko juhapie hone maiŋ ejarezo â mâreŋko sâqocne fokac izi maŋnâŋec hegâpârezacte pectâc juzo, izi Anutu â Mamac ere maio wâwânâŋ tâmiricko mitio juju ekac.   
\c 2  
\s1 Mafahec â hapetac sâc mocjaha ejarezo  
\p
\v 1 Âgofâc, ŋoŋe tatamac Wofuŋ-nâŋec Jesu Kristo manasiŋkeeŋgopieŋzi ŋic fekicne wahakicne wiac sâctiri mi ejarenšepieŋ.  
\v 2 No kecšiŋucte mukopac: Tutumaŋ-ŋeŋicko ŋic moc boreŋ qonaŋkerâ ŋaqi erinehec hefâocmu, eme ere râpefuŋko ŋic hapetac moc ŋaqi taocnehec hefâocmu.  
\v 3 Ehame ŋoŋe ŋic ŋaqi erinehec erao šâŋe firâ šiŋuc âzâcneniŋmu: “Go šira ware popoo ŋec.” Iŋuc murâ hapetac e šiŋuc âzâcneniŋmu: “Go ocna domac, me ɋâriŋko waha ŋec.”  
\v 4 Ŋoŋe ŋondeŋ-ŋeŋicko ŋic teŋtiri ejareeŋgopieŋ, i maŋŋeŋicko dâŋ repicne soŋkepie fokacte wiac esifuckeeŋgopieŋ hâcne.  
\v 5 Âgo biaŋfâc-nane, dâŋ mupe mananiŋ: Anutuzi ŋic weniŋucne rowosâec-jopawec? Mâreŋko hapetac jueŋgopieŋ jaŋe hâcne mamanasiŋko maŋ mâririhec erâ uucmaŋ rauckeniŋte rowosâec-jopawec. I irec ejareekac jaŋe hâcne biŋe qajarewec.  
\v 6 Eme ŋoŋe ine hapetac jaŋe šâŋe titikic honec-jopaeŋgopieŋ. Á weni jaŋezia bâuruŋ-ŋoparâ kiarao râec-ŋopaeŋgopieŋ? Mafahec jaŋe hâcne iŋuc eŋareeŋgopieŋ.  
\v 7 Ehuc wâc šâŋe biaŋ fai-ŋeŋicko fewec e musoriŋkeeŋgopieŋ.   
\s1 Dâŋ gâcne reŋkehuc gâcne qatarazo i mi sâckeocmu  
\p
\v 8 “Gahacnere egareekac sâc ijaha âgogere egarezejec”, sâcmutâc dâŋ neŋgocne iŋuc qâreŋkekicne fokac, i reŋkepie jâmbomac biaŋkeocmu.  
\v 9 Á ŋic sâctiri ejareniŋmu, ine bahac bâfuapie sâcmutâc dâŋzi qaqatara ŋic eŋgopieŋ irec fuŋne bataniŋkeocmu.  
\v 10 Moc e sâcmutâc dâŋ gâcne reŋke-fârehuc mocjaha qatarame sâcmutâc dâŋ qâqâhâc qatarawec eocmu.  
\v 11 “Ŋowe ŋonâŋ ŋohe bebehec mi ezepirec” muwec ekizia wâc “go šika mi qazemec” muwec. Eme go ŋonâŋge mi behecmu, šika ine qacmu, ine dâŋ qaqatara ŋic ecmu.  
\v 12 Sâcmutâc dâŋ rambaŋko rârâec-nâpo izi juku fuŋne babataniŋ dameŋko rambaŋko râec-ŋopaocte wiac mana tarahuc mu bac enšepieŋ.  
\v 13 Ŋic uruc jauŋ tâmiric juocmu e wâc juku uruc jauŋ mi ecnezo. Uruc jauŋhec juocmu e fuŋne babataniŋko hâhâwic tâmiric domaocmu.   
\s1 Mamanasiŋ fâri tâmiric i wiac omane  
\p
\v 14 Âgofâc-nane, ŋic moczi “mamanasiŋhec jukopac” muocmu, ehuc eehâmo gie mi baocmu, e mamanasiŋ-ticnezi moc bafickeocmu me? Mamanasiŋzi wemocko sisipirickonec bataraocmu.  
\v 15 Ŋic me ŋokac âgo-ŋeŋic moczi qoruc ŋaqi me nânâ wiac basahuc juhame  
\v 16 ŋoŋeraonec moczi e šiŋuc âzâcneocmu: “Go sâcne ra juzemec, erâ fâfârezicte sahacge foŋkezemec â nânâ nâ gapec ezemec”, moc e miczi iŋuc sawa muhuc jauŋ mi bacneocmu, izi wemocko bafickeocmu?  
\v 17 Irec mamanasiŋ bucticne, fârine eehâmo gie mi fuaocmuo, hâmo mâteŋ ekicne muzo.  
\v 18 Me moczi šiŋuc mecne muocmu: “Go mamanasiŋ fogarekac, â no eehâmo gie fonarekac.” Me, mamanasiŋge eehâmo gie tâmiric i nowatutec honepe. Á no eehâmo gie bahuc mamanasiŋ-nanere fuŋne sâcne gowatupemu.  
\v 19 Anutu mocjaha jukac, dâŋ i mana šakiekic” i sâcne ekic. Dâŋ i demoŋ jaŋe wâc mana šakieŋgopieŋ, ehuc ɋarac ɋarac qaeŋgopieŋ.  
\v 20 Ŋic maŋtac go mamanasiŋ eehâmo gie tâmiriczi wiac jawane ekac irec fuŋne ši manac.   
\s1 Abraham â Rahaba jahe mamanasiŋte fârine bâfuapic  
\p
\v 21 Mimiŋne-nâŋec Abraham e ŋokâ-ticne Isaka taha bâzi rikeocte alatao râewec ira Anutuzi manacneme kiŋfâsâc ewec i eebapa-ticnere hâcne.  
\v 22 Eme šiŋuc honekic: Abraham mamanasiŋ-ticne I eebapa-ticnezi bafickewec, ehuc mamanasiŋ-ticne qizecne qawec.  
\v 23 Eme irec hâcne Abrahamte dâŋqâreŋ kecšiŋuc fokac i sanaŋkewec: “Abraham e Anutu manasiŋkeme ere maname kiŋfâsâc ewec.” Eme irec šâŋe-ticne Anuture âgo mucnekicne  
\v 24 Honeŋgopieŋ, Anutu e ŋic moc mamanasiŋ-ticnere sawa mi maname kiŋfâsâc eocmu, fârine eehâmo gie bame manacneme kiŋfâsâc eocmu.  
\v 25 Á sasec ŋokac Rahaba e iŋuc jaha mamanasiŋ-ticnere fârine eehâmo gie bame Anutuzi manacneme kiŋfâsâc ewec. E ŋic mâreŋ hone tâcnepic jahe erao fisipire âgo ejacterâ hatasoŋko râec-jofame wisepic.  
\v 26 Irec šiŋuc fokac: Sahac e mâro tâmiric erâ qâŋɋâŋ eekac, iŋuc jaha mamanasiŋzi eehâmo gie tâmiric qâŋɋâŋne jaha eekac.   
\c 3  
\s1 Nameŋ-nâŋec soŋaŋkenšepeneŋ  
\p
\v 1 Âgofâc-nane, ŋoŋe bocjahazi qaqazu gie baniŋte mi fotarienšepieŋ. Manaŋgopieŋ, mumutara dameŋko Wofuŋzi qaqazu nâŋe wiac bašihuc enâreocmu.  
\v 2 Nâŋâc mâmâc sasawa wiac gâbâ esifuckeeŋgopeneŋ. Ŋic moc e dâŋko moc mi sâqoreocmu, e ŋic saric sarahaŋne mucnezo. Iŋucnezi me sahac-ticne sasawa guriŋne sâcne bafâreocmu.  
\v 3 Becâsic jaŋe dâŋnâŋec reŋkeniŋte micko kiki râe-jareeŋgopeneŋ. Erâ izi becsâko bac bâtikic ejareeŋgopeneŋ.  
\v 4 Wokere wâc manaeŋgopeneŋ, jaŋe kâcɋene sâko, erâ mâŋâŋ sanaŋnezi ficne suec-jopame raeŋgopieŋ, eme sifu guriŋ bapa e guriŋ piticne i bac bâtikic ehuc hata muocmu ijaha wokezi raocmu.  
\v 5 Eme ŋicnameŋ e iŋuc jaha wiac piticne, erâ wiac wemo afecne efeekac. Manaŋgopieŋ, šoc masisi i wiac huŋgaŋne mac, eme iŋucne maczi sopâc sâko rikepene šafâreekac.   
\s1 Nameŋzi sisipiric eeŋgopeneŋ  
\p
\v 6 Eme nameŋ-nâŋec šoc masisi iŋucnea wâc. Eki hâcne me sahac gâcne siric-jopahuc sâqocnere neŋgocne eekaczi sahac-nâŋec bâbie-fâreekac â juju-nâŋecte ŋesiŋ rikeme šafâreekac” e jahacne ine hârâckonec šoczi qâhâsâme šaekac.  
\v 7 Qowi fuŋne fuŋne tiŋkonec â hâweckonec erâ wipe homa wiac i ŋiczi bâmâteŋkezo murâ bâmâteŋkeeŋgopeneŋ.  
\v 8 Nameŋ ine mo ŋic mozi bâmâteŋkeocmu? E gapec tâmiric ririsiehuc sâqocne baekac, qotâre micopâzi fusucmakicne tinac.  
\v 9 Nameŋ-nâŋeczi Wofuŋ Mamac muteŋkeeŋgopeneŋ, erâ nameŋzia ŋic Anuture hawarifâc sâwec-jopaeŋgopeneŋ.  
\v 10 Mic ijaha mumuteŋ â sâwec wahaekac. Âgofâc-nane, iŋuc wemocte?  
\v 11 Opâ šâŋe ijaha nocne â hâtâne ataŋ wahaekac me?  
\v 12 Âgofâc, hâmeŋko woraŋ fuaocmu? Me saŋko hâmeŋ fuaocmu? Me hâweczi nocne eocmu?   
\s1 Mamana hata faicnec â juwicnec  
\p
\v 13 Ŋoŋerao maŋɋârâŋhec â maŋ manahuc wiac ee iŋucne moc juŋgopieŋ me? Ine wama ruaine juhuc eebapa biaŋne bâfuahuc maŋɋârâŋ-jeŋicte fuŋne bataniŋkenšepieŋ.  
\v 14 Á maŋjeŋicko iiŋguuŋ hâtâne â hehefaric fohame ine sahac-jeŋic bafehuc dâŋfâri manaŋgopeneŋ mupie burec eocmu.  
\v 15 Maŋɋârâŋ hata iŋucne i faicnec wahakicne mi muzo, aricne, mâŋɋârâŋ hata iŋucne i mâreŋkonec, ŋickonec, Sataŋtaonec.  
\v 16 Iiŋguuŋ â hehefaric foocmu ijaha wâc fâfâuc â wiac gâgâpâcne gâcne gâcne fofâreocmu.  
\v 17 Maŋɋârâŋ hata faicnec izi ine wiac šiŋuc bâfuaekac: Qanaŋ maŋɋaɋac, erâ wama, miriŋ, micrereŋ, uruc jauŋhec juju â mitire fârine gâcne, erâ wâc maŋguru tâmiric â siocmâc juju.  
\v 18 Wamare guriŋne baeŋgopieŋ jaŋe wamao ukicne sara mamac epie fârine tiŋne juju fua-jareekac.   
\c 4  
\s1 Harac gie bahuc fârine mi bâbâfua  
\p
\v 1 Ŋoŋerao šika â rârâsi foekac i fuŋne weniŋucte? Me sahac-ŋeŋicko andac forakac izi hâcne šika gie baekac.  
\v 2 Ŋoŋe andac eipiehuc wiac mi rauckeeŋgopieŋ. Ŋoŋe qaqac â iiŋguuŋ eec ehuc sifu wiac sâcne mi hotâckeeŋgopieŋ. Ŋoŋe kikisâ â kikisuec ehuc wiac sâcne mi hure nâc eeŋgopieŋ. I nunumu tâmiric jueŋgopieŋ irec.  
\v 3 Moc i numu-bipiehuc wiac mi roeŋgopieŋ, ine maŋŋeŋicko dâŋ sâqocne šiŋuc foha numueŋgopieŋte: “Wiac fua-nâreme samarierâ andac-nâŋecte fârine bâfuanšepeneŋ.”   
\s1 Maŋnâŋeczi ra fo ware fo mi ezejec  
\p
\v 4 Oi, šâšâfic hehetâc ŋic ŋoŋe¡ Mâreŋko wiac fokac irec biŋe juocmuzi Anutu râpeckeocmu, i mi manaŋgopieŋ me? Irec moc e mâreŋkopec wiac kosa âgo ecneocmuzi Anutu kisâ ecneocmu.  
\v 5 Me dâŋqâreŋ kecšiŋuc fokac i ŋoŋe manapie racne eekac me? “Maŋnâŋecko mâro ŋewec i ere biŋe sawa juocte šoɋac sâko eekac.”  
\v 6 Erâ ŋifec ine aki anonoc wemo afecne sicne-nâreekac. Irec dâŋqâreŋ hâcne kecšiŋuc fokac: “Anutu e ŋic maŋfefe dope qatara-jareekac, ŋic maŋhuhuŋ ine aki anonoc sicne-jareekac.”  
\v 7 Irec ŋoŋe Anuture rurumaŋko raširâ domanšepieŋ. Ehuc Sataŋ bâsuenšepieŋ, eme behec-ŋoparâ wiseocmu.  
\v 8 Ŋoŋe Anutu maickepie eki wâc maic-ŋopaocmu. Sâqocne bapa, maŋŋeŋic ra qa ware qa eekac, ŋoŋe meŋeŋic šurerâ maŋŋeŋic baɋaɋackenšepieŋ.  
\v 9 Ŋoŋe fuŋne-ŋeŋic mana tararâ ki busâqoc enšepieŋ. Gâgâwi-ŋeŋiczi rirehame busâqoc fuazejec, â šeri-ŋeŋiczi rirehame ki mamakuc fuazejec.  
\v 10 Wofuŋte maio maŋhuhuŋ jupie eki bafaharec-ŋopaocmu.   
\s1 Wofuŋ mi âkehockezo  
\p
\v 11 Âgofâc-nane, ŋoŋe mumusâqoc mi enšepieŋ. Moc e âgo-ticne musâqorerâ okacne dâŋko râeocmu, e sâcmutâc dâŋ musâqorehuc hetâtieocmu. Go ine sâcmutâc dâŋ hetâtiecmuo rereŋŋic mi ehuc mumutara ŋic ecmu.  
\v 12 Sâcmutâc dâŋ irec mumufua â soŋaŋ mocjaha sawa jukac, aakic â bebehe irec gie ekizia baocmu. Go ine wemogezi âgoge okacne dâŋko râecmu?   
\s1 Wofuŋzi mana-nâreme wiac enaŋmu  
\p
\v 13 Ajoc, moc ši mananiŋ. ŋoŋe kecšiŋuc mueŋgopieŋ: Miŋecgac me tomâcko hae ira ra moneŋ mafa hurehuc juhapene jara moc tarame risienšepeneŋ.”  
\v 14 Oi ŋoŋe, tomâcko wiac iŋuc me iŋuc fuaocmu, i moc manaeŋgopieŋ? Me juju-ŋeŋic i weniŋucne? I rombâŋ iŋucne, fua fuahuc izia qašueekac.  
\v 15 Irec ŋoŋe kecšiŋuc mupie sâckeocmu: “Wofuŋzi mana-nâreme ɋâricne juhuc iŋuc me iŋuc enšepeneŋ.”  
\v 16 Ŋoŋe ine pacgoroŋ dâŋ boc muhuc sahac-ŋeŋic bafeeŋgopieŋ. Pacgoroŋ dâŋ i wiac sâqocne.  
\v 17 Ŋic moc e wiac biaŋne eocte mana tarahuc sifu qikiŋneekac, e bahac bâfuakac muzo.   
\c 5  
\s1 Ŋic moneŋ mafa sasec jaŋere dâŋ  
\p
\v 1 Ajoc, mafa mâririhec ŋoŋe šârâ hâriŋ fua-ŋareocmu irec qanaŋ ki mamakuc enšepieŋ.  
\v 2 Mafa mâriri-ŋeŋic i šaŋke-fârewec, ŋaqi guru dindiŋ-ŋeŋic mâreŋte temane ewec,  
\v 3 â moneŋ boreŋ-ŋeŋic gufewec, eme gufe izi ŋaŋacne fuŋne bataniŋkehuc sahac-ŋeŋic šoc iŋucne nâmizieocmu. Ŋoŋe dameŋ qândâŋkeha mafa sesuc sembureŋ hefembiŋ.  
\v 4 Manaŋgopieŋ, padi qaŋarepie gie furi sakare-jarembiŋ irec kiŋzi hohosâcne qakac, erâ qa roro ŋic jaŋere kio wâwâsiczi sambâŋ momori jaŋere Wofuŋte hazecko huwec.  
\v 5 Ŋoŋe mâreŋko wiac nâminširiŋkehuc mana aŋac embiŋ â okac dameŋ maickeha nâ areŋ embiŋ.  
\v 6 Ŋoŋe ŋic tiŋne dâŋne mutararâ šikao râembiŋ. E sahac-ticne mi ŋezickekac.   
\s1 Ʒârâ šâpâ faio hâbi hâro juzo  
\p
\v 7 Âgofâc-nane, ŋoŋe Wofuŋ fisiocte woŋec tatakic tâmiric junšepieŋ. Manaŋgopieŋ, gie rune moczi iŋuc jaha nânâ he sarac erâ fârine fua biaŋ eocte woŋec juekac, ehuc hoe šoaŋ sâckoa bacneme fua sokac eocte mamanac juekac.  
\v 8 Eme Wofuŋte dameŋ bembeŋkekacte ŋoŋe iŋuc jaha tatakic tâmiric woŋec juhuc maŋŋeŋic keteŋnenšepieŋ.  
\v 9 Âgo bureŋ, ŋoŋe mu takic mi eec enšepieŋ” manaŋgopieŋ mumutara ŋic e motâc râpeo domakac, fuŋne-ŋeŋic rituzacte dâŋ ere biŋe râepie fozejec.  
\v 10 Âgofâc-nane, porofete Wofuŋte micte dâŋ mumbiŋzi šâic busâqoc tatakic tâmiric manahuc jumbiŋ jaŋere kike hata bâjâpehuc junšepieŋ.  
\v 11 Manaŋgopieŋ, šâicmaŋko sasanaŋhec jumbiŋ jaŋere manapene šerine ekac. Hiobe sasanaŋ-ticnere manaeŋgopieŋ, â Wofuŋzi šâhec wiac afusecnewec i wâc manaeŋgopieŋ. Wofuŋ e buuruc â jauŋ-ticne kâcɋene fokac hâcne.   
\s1 Mumupaŋte dâŋ  
\p
\v 12 Âgofâc-nane dâŋ fârine moc ši: ŋoŋe sambâŋko ɋetickehuc mumupaŋ, me mâreŋko ɋetickehuc mumupaŋ, me wiac mocko ɋetickehuc mumupaŋ, i mi enšepieŋ. Ŋoŋe dâŋŋeŋic jâmbomacte fârine jâmbomac ezejec â aricnere fârine aricne jaha ezejec. I kiŋ bâfuanšipiŋte iŋuc enšepieŋ.   
\s1 Hucko fohuc wiac ezo  
\p
\v 13 Ŋoŋeraonec moczi šâic busâqocko juocmu, e Anutu numucnezejec, me moczi bubiaŋko juocmu, e mumuteŋ gae hezejec.  
\v 14 Ŋoŋeraonec moczi huc foocmu, e kikefuŋte micne bapa hefârec-jopame fisirâ ere faio numunšepieŋ, erâ Wofuŋte šâŋe muhuc wokemaŋ opâ ruacnenšepieŋ.  
\v 15 Eme mamanasiŋko nunumu mukicne izi huchec bâpiaŋkeocmu â Wofuŋzi e ɋiɋicne baocmu. Á sâqocne bawecko i bâtâmirecneocmu.  
\v 16 Irec ŋoŋe ɋiɋic qaniŋte sâqocne mumufuac erâ nunumuzi dodopec enšepieŋ. Ŋic tiŋne moczi numume tâpirinehec eocmu.  
\v 17 Elia e ŋic jaha, nâŋâc iŋucne. Eme eki hoe mi heocte samarierâ numume mâreŋko jara jahec â moc â mosa 6 hoe mi hehe mâc fowec.  
\v 18 Eme šâhec mocwâc numume sambâŋkonec hoe wahame mâreŋko wiac ukicne âkešuwec.   
\s1 Qâsoriekicne bârisiec-jopazo  
\p
\v 19 Âgofâc-nane, ŋoŋeraonec moc e dâŋfârire hata qâsorieme âgo moczi bâtikieocmu,  
\v 20 e dâŋ šiŋuc manazejec: Moc e âgo-ticne hata sâqocnaonec bârisieocmuzi e jahacne maŋ qâqâtâc hâmockonec bataraocmu â sâqocne guru sâko sâockeocmu.