\id HEB Hebrews, Kate, PNG, wwh 12/92 
\h HEBIRAIO 
\toc1 Hebiraio 
\toc2 Hebiraio 
\toc3 Hebiraio 
\mt1 HEBIRAIO  
\ip Papia i mitiŋic eki me eki qâreŋkewec i mi manaŋgopeneŋ. Mâc Paulore babaficfâc jaŋeraonec moczi qâreŋkewec i sawa manaŋgopeneŋ. Ŋic gâcne jaŋe Apolozi mecne qâreŋkewec, â gâcne jaŋe Banabazi qâreŋkewec, iŋuc mueŋgopieŋ. Papia rune ine Palestaiŋ mâreŋkonec Judaŋic Miti Opâ rua-jarekicne jaŋe. Hebiraio i Judaŋic jaŋere šâŋe raŋɋa moc. Papia qâreŋkewec mitiŋic eki Itali mâreŋko juhuc qâreŋkewec (gaŋ 13:24). Timoteo kâpâcwâru fickonec wahawec dameŋ ira qâreŋkewec (gaŋ 13:23).  
\ip Palestaiŋ mâreŋko Judaŋic gâcne Jesure kikefuŋ erâ juhapie fai-jeŋicko šika kâpâcwâru feme bugâpâcko jumbiŋ. Moneŋ mafa i wâc jowac rokicne (gaŋ 10:32-34). Eme pârâckehuc šiŋuc mumbiŋ: Miti ɋâricne bajuhapene fific guguriŋ boc enâreŋgopieŋ. Irec miti ɋâricne beherâ raŋɋane sawa bajuhuc mâteŋne junšepeneŋ (gaŋ 4:4-6 â gaŋ 10:26-29). Tucnezi biac mitire tutumaŋko mocwâc mi fisihuc qâoma embiŋ (gaŋ 10:25). Ine hâcne, Jesure hata râpeckerâ Judaŋic hata raŋɋa-jeŋic i mocwâc âtezo mumbiŋ.  
\ip Eme mitiŋic papia qâreŋke-jarewec eki bufac qajarehuc dâŋ šiŋuc qâreŋke-jarewec: Jesurao qohota sanaŋkehuc miti kiki papaŋ jaha bajuzo (gaŋ 3:1 â gaŋ 10:23). Ehuc qâoma rorokac tâmiric juzo (gaŋ 10:19-25). Á Jesure šiŋuc qâreŋkewec: Jesu e miti fârine jâmbâŋ bâfua-nârewec. Mârâc jaha mitio wiac ewarekicne i sahacne sawa. Jesu e fekicne sâko, porofete â aŋelo jaŋe ere wahacmicne sasawa (gaŋ 1 â 2). Mose â Josua jahe Jesure wahamicne (gaŋ 3 â 4). Taha bapa ŋic jaŋe sâqocne mutâmireniŋte tâpiri mi fojarewec. Qowi bâzi rikembiŋ irec fârine mi muzo, i mâc sâsâc ekicne. Jesu e taha bapa sâko fârine, eki kiŋnâŋecte kiwiric rome tarawec (gaŋ 4-10). Mitiŋic guru sâko mârâc jaha mamanasiŋhec juhuc sanaŋkembiŋ jaŋerao findendeŋnehuc ɋicwânšâŋhec erâ juzo (gaŋ 11 â 12). Erâ miti qaqazu â micne bapa hata âte-nârembiŋ, ijaha âte raku hae ŋeŋe sanaŋ bâfua-nârekicne, ira fisizo (gaŋ 13).  
\c 1  
\s1 Jesu e miti mujaŋgeŋke-nâre tarawec  
\p
\v 1 Anutu e mârâc jaha porofete ejareme jaŋe mimiŋnefâc-nâŋec dâŋ hawarine fuŋne fuŋne â hatane fuŋne fuŋne jaza warekuhapie  
\v 2 ine šâhec tataranao, dameŋ šira hâcne, Ŋokâ ecneme dâŋ nâzâwec. ŋokâ e wiac sasawa irec rune juocte mucnewec, ehec hâcne wiac bâfua-fârepic.  
\v 3 Anutu eri tatamac-ticnere qâreŋ erao fuawec fokacte â ju ju-ticnere sâc juekacte tâpiri dâŋticnezi wiac sasawa dope siŋsiŋ ecneha foekac. Eki sâqocne šure bataniŋ gie bafârerâ faic fekicne sâko ere fâreo fewec ŋekac.  
\v 4 Aŋelo hucjopa-fârewec jukac, irec sâcko aŋelo šâŋe siricke-fârehuc šâŋe fekicne hotâckewec.   
\s1 Aŋelo jaŋe wahakicne, Ŋokâ e fekicne  
\p
\v 5 Anutuzi mo aŋelo mo kecšiŋuc moc âzâcnewec:  
\q1 “Go hâcne ŋokâ-nane,  
\q1 no miŋecgac bâfuacgukopac”?  
\m Me kecšiŋuc:  
\q1 “Noni Mamac ecnerâ jupemu  
\q1 â eki Ŋokâ enarerâ juzejec”?   
\m
\v 6 Moc ine juku mârâc fufua e mâreŋko râeme wahaocmu irec dâŋ šiŋuc muwec:  
\q1 “Anuture aŋelofâc jaŋe dieŋzi hecne-fârenšepieŋ.”   
\m
\v 7 Aŋelo jaŋere kecšiŋuc mukicne:  
\q1 “E aŋelofâcne hawari-jeŋic bâtikieme mâŋâŋ eeŋgopieŋ,  
\q1 â kiŋaŋ qaqafâcne hawari-jeŋic bâtikieme šocbâruŋ eeŋgopieŋ   
\m
\v 8 Ŋokâre ine šiŋuc mukicne:  
\q1 “Anutu go ŋicwofuŋ ŋeŋege i ŋeŋe sanaŋ ŋerašihuc juocmu,  
\q1 â ŋicwofuŋ gunuge i bâbâtiŋ gunu biaŋ.   
\q1
\v 9 Go tiŋnere egareekac â hehesic ine râsi ecneekic.  
\q1 Irec Anutu, gore Anutu, eki šeri wokemaŋ rua-garewec,  
\q1 i âgofâcge jaŋere sâc jâuruhuc rua-garewec.”   
\m
\v 10 Moc šiŋuc mucnekicne:  
\q1 “Wofuŋ go fufuŋkenao mâreŋte hobeteŋ râemeŋ,  
\q1 â sambâŋne sambâŋne jaŋe megere qâreŋ.   
\q1
\v 11 Jaŋe siroweniŋmu, go ine jusanaŋkekic,  
\q1 jaŋe ŋaqi iŋucne raŋɋaŋkeniŋmu.   
\q1
\v 12 Ŋaqi iŋucne epie goki bataforiec-jopacmu,  
\q1 eme jaŋe hawari moc eniŋmu.  
\q1 Goki ine juekic ijaha juekic,  
\q1 â jara dameŋge i moc mi taraocmu.”   
\m
\v 13 Anutu e mo aŋelo mo šiŋuc moc âzâcnewec:  
\q1 “Ware fâre-naneo ŋehaŋtec  
\q1 râsifâcge guruc-jopape  
\q1 kikegere ââtesiŋ enšepieŋ”?   
\m
\v 14 Aŋelo sasawa jaŋe mârozi kiŋaŋ qaqa, ŋic bâbâpiaŋ rauckeniŋte mukicne jaŋe bafic-jopaniŋte sorec-jopakicne.   
\c 2  
\s1 Bâbâpiaŋ dâŋ mi qikiŋnezo  
\p
\v 1 Irec nâŋâc ma bâtirinšipeŋte dâŋ manambeŋ i mocwâc paŋšâic mana sakac enšepeneŋ.  
\v 2 Aŋelo mickonec dâŋ mukicne i mupaŋkekicne, eme huhucke â qaqatara fuame okacnehec ejujec,  
\v 3 izi wemocko bâbâpiaŋ dâŋ fekicne qikiŋnepene okacmâc foocmu? I Wofuŋ e jahac qanaŋ mufuawec, eme hazec fâri-jeŋiczi manambiŋ jaŋe muwarekupie sanaŋke-nârewec.  
\v 4 Ehame Anutu e jahac wâc mâsi â tâpiri wiac šâŋe furu bâfuahuc dâŋ i dopeckehuc Tiri Mârore taha biaŋ manawec sâc kâdoc qajarehuc feŋeŋ râecnewec.   
\s1 Jesu e dameŋ bembeŋne aŋelo jaŋere wahamicne juwec  
\p
\v 5 Hae mâreŋ šâhec fuaocmu, dâŋne muŋgopeneŋ hâcne, i Anutuzi aŋelo jaŋe guriŋne baniŋte mi muwec.  
\v 6 Mitiŋic moczi irec dâŋ mutaniŋkewec ine šiŋuc:  
\q1 “Go ŋic e wemomac-ticnere manasucneekic,  
\q1 â ŋicte ɋâric e wemo-ticnere hone maiŋ ecneekic?   
\q1
\v 7 Go dameŋ ŋondeŋ bembeŋne mac aŋelo jaŋere  
\q1 wahamicnao juocte mucnemeŋ,  
\q1 go tatamac â šâŋe biŋezi erickemeŋ,   
\q1
\v 8 ehuc wiac sasawa kike-ticnere rurumaŋko râemeŋ.”  
\m Anutu e wiac sasawa ŋicte rurumaŋko râewec, i bâtâc mi bahuc wiac furu jaha qikiŋnecne-fârewec ekac. Dameŋ šiŋuczia ine wiac šeŋgoma ŋicte rurumaŋko guruckekicne i mi honeeŋgopeneŋ.  
\v 9 Jesu ine honeŋgopeneŋ, e dameŋ ŋondeŋ bembeŋne mac aŋelo jaŋere wahamicne juhuc hâmocte šâic manawecte tatamac â šâŋe biŋe tahackekicne hâporâ jukac. E Anutuzi aki anonoc enâreocte mume hâmoc hâtâne ŋic sasawa nâŋâcnere erâ manawec hâcne.   
\s1 Jesu e ɋafâc-ticne munâreocte maname mi quŋkewec  
\p
\v 10 Wiac sasawa irec rune â bâbâfua e naru motecfâcne bocjaha eri tatamac-ticnao jowac-jopaocte manasuhuc bâbâpiaŋ-jeŋicte micne bapa e šâic serereŋ gie baku mao fisiocte mucnewec i sâcke-hâmowec.  
\v 11 Eme maŋfuru bacjopakac e mecne â furu bacjopakicne jaŋe mecne Mamac-jeŋic mocjaha, irec ɋafâc-nane mujareocte maname mi quŋkeekac.  
\v 12 Dâŋticne šiŋuc hâcne fokac:  
\q1 “No šâŋe biŋege ɋafâc-nane muromacke-jarepe,  
\q1 kikefuŋ guruo šeri mumuteŋ egarepe.”   
\m
\v 13 Erâ moc šiŋuc:  
\q1 “No erao roweckehuc jupemu.”  
\m Erâ moc šiŋuc:  
\q1 “Ʒi no erâ Anutuzi ɋie guru narewec nâŋe mâmâc juŋgopeneŋ.”   
\s1 Jesu e nâŋâcne sâc ewecte sâcne bafic-nâpoocmu  
\p
\v 14 Eme ɋie jaŋe sahac biuchec sasawa jueŋgopieŋte eki ijaha wâc rowec. I e jahacne hâmoczi hâmoc rune Sataŋ hâcne tâpiri-ticne qame goroŋkewecte,  
\v 15 erâ wâc hâmocte hâhâwiczi niŋgiŋ-jopame dameŋ-jeŋic sâc kâpâcwâru ficko ŋejumbieŋ jaŋe batarac-jopaocte iŋuc ewec.  
\v 16 Wiac i aŋelo kime dopec mi ejareekac i, e Abrahamte ɋâricfâc nâŋâc kime dopec enâreekac.  
\v 17 Eme irec hâcne ɋafâc-ticne jaŋehec sâc mocjaha jâmbâŋ eocte mucnekicne, hatane gâcne moc mi fowec. I taha bapa sâko urucne â hazec hâricne erâ Anuture maio taha gie bahuc ŋic ŋokac nâŋâcne sâqocne šure tâmireocte iŋuc ewec jukac hâcne.  
\v 18 E jahac šâic manahuc eesâicko rašiwecte ŋic eesâic fua-nâreha sâcne bafic-nâpoekac.   
\c 3  
\s1 Jesu e Mosere femicne  
\p
\v 1 Mitiŋic âgofâc-nane, sambâŋte mâmâc hefârec-ŋopakicne, ŋoŋe miti kiŋaŋ ŋic â taha bapa sâko Jesu, šâŋene murâ rereŋ eeŋgopeneŋ, erao findendeŋnenšepieŋ.  
\v 2 Eki gie runere mume rereŋ juwec, Mosezi Anuture ficko juwec irec sâc juwec hâcne.  
\v 3 Fic baekac ere šâŋe biŋezi ficte šâŋe biŋe jâuruekac, sâc ijaha Jesu šai šonšoŋ-ticnezi Mosere sirickekac.  
\v 4 Ficne ficne i bâbâfua-ticnehec, wiac sasawa irec bâbâfua ine Anutu.  
\v 5 Mose e Anuture ficko jufârehuc mume rereŋ gie bawec, i dâŋ šâhec fufuanere biŋe muocte kiŋaŋ qaqa juwec.  
\v 6 Kristo e ine ŋokâzi fic rune jukac. Ficticne nâŋâc hâcne. Erâ i mâc mâcne, wiac biŋe qanârekicne irec mamanac paŋšâic â bubiaŋko juhapene taraocmu, ine ficticne eŋgopeneŋ muzo.   
\s1 Israe ŋic maŋsanaŋ embiŋ iŋuc mi ezo  
\p
\v 7 Irec Tiri Mârozi dâŋ šiŋuc muwec i nâŋâcne biŋe ekac:  
\q1 “Ŋoŋe miŋecgac dâŋticne manaŋgopieŋko,   
\q1
\v 8 tuhuo eesâic fuame aaricko ekicne,  
\q1 maŋsanaŋ iŋuc mi enšepieŋ.   
\q1
\v 9 Mimiŋnefâc-ŋeŋic jaŋe ira wiac bapa-nane jara 40 honembiŋ,  
\q1 erâ sifu pepecne enarehuc esâicnumbiŋ.   
\q1
\v 10 Eme no irec manape gâpâreme jaŋere šiŋuc mupo:  
\q1 `Jaŋe maŋjeŋiczi raŋɋa raŋɋa qâsorieeŋgopieŋ,  
\q1 jaŋe nore hata moc mi hone manac embiŋ.'   
\q1
\v 11 Iŋucte kimbeŋ qajarehuc mumupaŋ dâŋ šiŋuc mupo:  
\q1 `Jaŋe nore jujumana hae mâreŋko moc mi rašinšepieŋ'.”   
\m
\v 12 Âgofâc-nane, ŋoŋeraonec moc e miti qikiŋnehuc maŋ gâgâpâc erâ Anutu jujune râpeckezacte soŋaŋ babac ehuc junšepieŋ.  
\v 13 Erâ šoaŋne šoaŋne miŋecgaczi miŋegac forahuc juocmu sâc faŋ qaqac enšepieŋ, sâqocnere eeatuczi ŋoŋeraonec ŋic moc ecneme maŋbâzic ezackohec.   
\s1 Israe ŋic jaŋere manasurâ hâwic-nâpozejec  
\p
\v 14 Nâŋâc Kristore miti kâdoc babaju, ine fuŋkehuc manasiŋkembeŋ mamanasiŋ i paŋnea bajuku mao fisinaŋmuzi eŋgopeneŋ.  
\v 15 Dâŋ šiŋuc fokac:  
\q1 “Ŋoŋe miŋecgac dâŋticne manaŋgopieŋko,  
\q1 aaricko ekicne, maŋsanaŋ iŋuc mi enšepieŋ”,   
\m
\v 16 ine weni jaŋe dâŋticne mana-bipiehuc aaric bâfuambiŋ? I mockoneczi mâcne, Mosezi micne bajareme Aigita mâreŋkonec warembiŋ ŋicguru i sasawa jaŋe hâcne.  
\v 17 Me weni jaŋere Anutuzi maname gâpâreme jara 40 tarawec? I sâqocne bahuc mâreŋ tuhuo hâmo sipiric embiŋ jaŋere hâcne iŋuc ewec.  
\v 18 Erâ weni jaŋere mumupaŋ dâŋ šiŋuc muwec: Nore jujumana hae mâreŋko mi rašinšepieŋ? I dâŋticne qahuc jumbiŋ jaŋere hâcne muwec.  
\v 19 Irec šiŋuc honeŋgopeneŋ: Jaŋe miti qiqikiŋ-jeŋicte quŋkerâ mi rašimbiŋ.   
\c 4  
\s1 Jujumana hae mâreŋko fisinaŋte munârekicne  
\p
\v 1 Jujumana hae mâreŋ-ticnao rašinaŋte mukicne. biŋedâŋ i mi hetâtieme omaewec, irec ŋoŋeraonec moczi hatao sifuckezacte mezac-nâpozejec.  
\v 2 Biŋe biaŋ dâŋ jaŋe jazakicne sâc ijaha nâŋâc nazakicne. Jaŋe ine dâŋ i manarâ maŋjeŋicko mi râepie hurâ fowecte jaŋerao fârimâc ewec.  
\v 3 Nâŋâc miti mana šakieeŋgopeneŋzi jujumana hae mâreŋko rašieŋgopeneŋ. E šiŋuc muwec:  
\q1 “No kimbeŋ qajarehuc mumupaŋ dâŋ šiŋuc mupo:  
\q1 Jaŋe nore jujumana hae mâreŋko moc mi rašinšepieŋ”,  
\m i mâreŋ hobeteŋne râehuc wiac sasawa bafârerâ sifu iŋuc muwec.  
\v 4 Irec šoaŋ namba 7 irec dâŋ moc šiŋuc muwec: “Anutu e wiac sasawa bafârereâ šoaŋ 7 ira jumanawec.”  
\v 5 Ehame faic honembeneŋ ine šiŋuc muwec: “Jaŋe nore jujumana hae mâreŋko moc mi rašinšepieŋ.”   
\p
\v 6 Eme ši ŋic gâcnezi jujumana hae mâreŋko rarašinere hata fokac jaha, â mârâc rarašire biŋe biaŋ jazakicne jaŋe qikiŋnehuc mi rašimbiŋ”  
\v 7 irec “miŋecgac” šâfo i mocwâc bahuc šâhec Dawidire micko dâŋ mupac i râeme šiŋuc muwec:  
\q1 “Ŋoŋe miŋecgac dâŋticne manaŋgopieŋko  
\q1 maŋbâzic mi junšepieŋ.”   
\p
\v 8 Josuazi jujumana hae mâreŋ fârine bâfua-jareme muzac, Anutuzi šâhec dameŋ mocte mi muzac.  
\v 9 Irec šiŋuc mananšepeneŋ: Anuture ŋicfâc jaŋere jujumana hombaŋ moc fokac.  
\v 10 Anutuzi gie batararâ jumanawec, iŋuc jaha ŋic moc Anuture jujumanao rašiocmuzi gie-ticne hetararâ jumanaocmu.   
\s1 Anutu dâŋticnere fuŋne  
\p
\v 11 Eme nâŋâcnaonec moczi docke sâqorec erâ ŋic mârâc qaqatara hata âtembiŋ ijaha âtezacte jujumana hae mâreŋko rašinaŋte šoɋac enšepeneŋ.  
\v 12 Anuture dâŋ i jujuhec â tâpirihec, erâ sâqe moc bune râpene micnehec irec sâc jâuruhuc mictara jâmbâŋ. Izi nâhuku qâqâtâc â maŋ, bibiric â siec wamboŋ šušuhuc-jeŋic nâtâcneekac, ehuc maŋte mamanasu â mamana wosâc irec fuŋne bataniŋkeekac.  
\v 13 Eme wiac bâfuakicne moczi moc Anuture maio soŋsoŋ mi foekac, erao wiac sasawa tâtâc â foŋ tâmiric foekac. Erao hâcne dâŋgie banaŋmu.   
\s1 Jesu taha bapa sâko-nâŋec e maŋafec Jaha iqickenšepeneŋ  
\p
\v 14 Taha bapa sâko hahaŋnehec moc junârekac, e sambâŋ fotâcne-fârerâ fewec jukac, Jesu Anuture Ŋokâ hâcne, eme iŋucne junârekacte šâŋe-ticne murâ rereŋ enšepeneŋ.  
\v 15 Erâ taha bapa sâko-nâŋec e dodocne enâreme hone qâoma mi enâreekac, nâŋâcnao eesâic fuaekac iŋuc jaha wâc erao eesâic fuŋne fuŋne fuawec, eesâicko dodocke mocjaha ine mi ewec.  
\v 16 Irec nâŋâc aki anonoc ŋeŋe rowaŋnao maŋafec jaha fisihuc junšepeneŋ, eme wiac izi me izi maic maic-nâpoha eki buuruc enârehuc aki anonoc-ticnere erâ bafic-nâpozejec.   
\c 5  
\s1 Jesu e šâic gie bakume Anutuzi taha bapa sâko âkendâŋnewec  
\p
\v 1 Mâreŋŋic nâŋâcnaonec taha bapa sâko rowosâec-jopakicne sasawa jaŋe ŋic jaŋere erâ Anutu fuacnehuc kiŋ bahacte taha bâzi rikecne niŋte râec-jopakicne.  
\v 2 Taha bapa iŋucne e jahac ŋic dodocne jukacte ŋic mutucne â qâsoriekicne sâcne urucne ejareekac.  
\v 3 Erâ fuŋne iŋucte ŋic jaŋere kiŋ bahacte mecne â e jahacne mâmâc taha bâzi rikeocte mukicne  
\v 4 Gie fekicne i ŋic moczi maŋticnere mi rorâ bapane, taha bapa ŋic moc e Anutuzi rowosâerâ gie mucneme sâcne baocmu, Aroŋ iŋuc hâcne ecnewec  
\v 5 Eme Kristo e iŋuc jaha e jahacne maname fefene eha taha bapa sâko mi ewec, i Anutuzi šiŋuc muhuc mucnewec:  
\q1 “Go hâcne Ŋokâ-nane,  
\q1 no miŋecgac bâfuacgukopac.”   
\m
\v 6 Erâ dâŋ moc šiŋuc muwec:  
\q1 “Goki Melikisede ere sâcko  
\q1 taha bapa jurašihuc jucmu sanaŋ.”   
\m
\v 7 Jesu e mâreŋko juwec dameŋ ira, hâmockonec bataraocte tâpiri focnewec erao numuhuc kio wâwâsic kâcɋene ecnewec. Ehuc Anutu araŋ bacnewecte manacnewec.  
\v 8 E ŋokâ juwec, erâ sifu šâic gie baku micrereŋte fuŋne mana tarawec.  
\v 9 Erâ wiac emataucke-fârerâ mume rereŋfâc-ticne sasawa jaŋere bâbâpiaŋ tatara tâmiric bâfuawec.  
\v 10 E hâcne taha bapa sâko erâ Melikisede ere sâcko juocte Anutuzi mucnewec.   
\s1 Ɋiemaŋ mi juzo  
\p
\v 11 Irec dâŋ bocjaha fokac, erâ ŋoŋe hazecfâŋ juŋgopieŋte ŋaza mutâc epemurâ manape ŋemâckekac.  
\v 12 Ŋoŋe dameŋ šora miti mana wareeŋgopieŋzi gâcne qazu-jarepie sâckezac” eme iŋucne ŋoŋe miti maine i mocwâc qaqazu-ŋarenere sâc eŋgopieŋ. Ŋoŋe nânâ sanaŋnere sâc aricne, susu nânâre sâc sawa juŋgopieŋ.  
\v 13 Susu nâeŋgopieŋ jaŋe ine ɋiene mujarezo, iŋucnezi dâŋ fârine wemocko mana taraniŋmu?  
\v 14 Nânâ sanaŋne i sokakicne jaŋere biŋe, maŋ mamanasu-jeŋic fua tâcneme biaŋne sâqocne mana wosâeeŋgopieŋ jaŋere biŋe hâcne.   
\c 6  
\s1 Anutu behe sanaŋkerâ maŋ bâbârisie mi fokac  
\p
\v 1 Irec nâŋâc ši Kristore dâŋ maine, fufuŋkeo mumune, i râepene foha dâŋ hukicne, wiac efehuc mumune, i moc šuhuckenaŋ. Wemocte miti hobeteŋne i hâsine râehuc maŋ bâbârisie â juju raŋɋa bebehe â Anutu mamanasiŋ,  
\v 2 â Miti Opâ â qizecko me rârâe â hâmockonec fafahare â bâtâc sanaŋ irec dâŋ mocwâc fuŋkezo?  
\v 3 Anutuzi maname sâckeme dâŋ moc šuhuckenaŋ.   
\p
\v 4 Ŋic mitizi maŋjeŋic batamaeme sambâŋkonec nânâ nâhonembiŋ â Tiri Mârohec embiŋ,  
\v 5 erâ Anuture dâŋbiaŋ â juju sanaŋte tâpiri mana aŋac embiŋ,  
\v 6 ŋic iŋucne jaŋe miti behe sanaŋkehuc Anuture Ŋokâ jaŋacne maŋte mocwâc maripoŋko qahuc mamakâc ecnepie mitio bâbârisiec-jopane mi fokac.  
\v 7 Mâreŋ moc hoezi gâbâ hehuc bâgunuckekume, ŋic sara mamac eeŋgopieŋ jaŋere biŋe nânâ monšaŋ bâfuaekac, i Anutu jambuŋ-ticnere fârine fuacneekac.  
\v 8 Á mâreŋ mocko hofâ qinšiŋ sawa fuaocmu, ine fârimâc ekacte sâwec fâreme juku šoczi šaocmu.   
\s1 Ɋicwânšâŋ erâ juju  
\p
\v 9 Âgofâc, no dâŋ mukopac i ŋoŋe sipirickeniŋmu manahuc mâcne, mitio biaŋke-hâmoniŋmu, iŋuc manahuc mukopac.  
\v 10 Anutu e eesifucne mâcne” ŋoŋe ere erâ ŋicfâc-ticne hone bafic ejarehuc jauŋ bacjopambiŋ erâ eeŋgopieŋ jaha irec wemocko nikeckeocmu.  
\v 11 Ŋoŋe šiŋuc eniŋte enârekac: ŋoŋe mâmâc sasawa sâc ijaha ɋicwânšâŋ epie sambâŋ šeŋaŋ bâbâfuare buâkec mi omaezejec, fofehame dameŋ tarazejec.  
\v 12 Eme mi rokawehuc, mitiŋic gâcne mamanasiŋ â sasanaŋhec juhuc wiac biŋec-nâpokicne rauckeeŋgopieŋ, jaŋere hata âteniŋmu.   
\s1 Biŋe qanârekicnezi juju-nâŋecte aŋga ekac  
\p
\v 13 Jaŋeraonec moc Abraham e Anutuzi biŋedâŋ âzâcnerâ femicne mocte maio mupaŋkeocte basarâ e jahacnao râehuc mupaŋkewec.  
\v 14 Ehuc šiŋuc muwec: “No jambuŋgurâ jambuŋgu epemu â basawecgurâ basawecgu epemu.”  
\v 15 Eme Abraham e mumupaŋ dâŋ irec woŋec tatakic tâmiriŋ juku fârine rowec.  
\v 16 Ŋiczi fekicne moc ere maio mumupaŋ dâŋ mupene mu qaqatarac eene mi fuaocmu.  
\v 17 Irec Anutu e ŋic biŋe qajareme maŋjahec enšipiŋte, maŋticnezi sanaŋkeha muwec irec fuŋne bataniŋkehuc biŋedâŋ irec fainao mumupaŋ dâŋ šuhuckewec.  
\v 18 Anutu e burec tâmiriczi dâŋsanaŋ jajahec âkendâŋ-jofahuc nâŋâcnao suru râewec, i ere dapeŋko rašimbeŋzi wiac biŋe qanârekicne irec fârine fotarierâ ronaŋte manasuhuc ewec.  
\v 19 Biŋe qanârekicne irec fârinezi juju-nâŋecte aŋga sanaŋne â tâtâcne tâmiric iŋucne ekac, erâ aŋga izi faic qoruc ââketâc irec râpenao râekicne fokac.  
\v 20 Ââketâc i micne bapa-nâŋec Jesu eki bânie-nârehuc fotâcnerâ maŋnao rašiwec. E Melikisede ere sâcko taha bapa erâ jusanaŋkeekaczi iŋuc ewec hâcne.   
\c 7  
\s1 Melikisedere fuŋne  
\p
\v 1 Melikisede e hâcne Salem haere ŋicwofuŋ â Anutu femicne sâko ere taha bapa juwec. Eki hâcne Abrahamzi ŋicwofuŋ râsifâc-ticne joparâ risiehame ra hatao bâfuarâ jambuŋkewec.  
\v 2 Erâ e hâcne Abrahamzi mafa mateŋ bâtâc barâ teŋkonec wâŋ irec sâc râcnewec. Melikisede šâŋe-ticne nâŋâcne dâŋko “Tiŋne ŋicwofuŋ”, â Salem ŋicwofuŋ ine “Wama ŋicwofuŋ”.  
\v 3 Melikisede e neŋgoc mamac tâmiric, apa ŋosa fuŋne-ticne qahuc mi mufuakicne, e juju-ticne fufuŋke tâmiric â tatara tâmiric. E Anuture ŋokâ ere sâsâc eocte mukicnezi taha bapa juju hati ewec.   
\s1 Melikisede e šâhec taha bapa gâcne Jumbiŋ Jaŋere sâc aricne  
\p
\v 4 Ʒi honeniŋ, e ŋic fekicne mo iŋucne irec mimiŋne-nâŋec Abrahamzi mafa mateŋ biaŋne sasawa bâwosâerâ teŋkonec wâŋ irec sâc râcnewec  
\v 5 Lewi-e ɋâricfâc gâcne taha gie baniŋte mujarekicne jaŋe ŋic ŋokac âgofâc-jeŋic Abrahamte tofafâc jaha sifu mafa wiac teŋkonec wâŋ irec sâc jowac roniŋte sâcmutâc dâŋqâhâcko mutâcne-jarekicne.  
\v 6 Á Melikisede e jaŋere guruonec mi fuakicnezi ine Abrahamtaonec teŋkonec wâŋ rowec Ehuc miti biŋe qacnekicne e jambuŋkewec.  
\v 7 Á fekicnezi wahakicne jambuŋkeekac i mozi mickeocmu?  
\v 8 Dameŋ ši ŋic sisirowenezi teŋkonec wâŋ roeŋgopieŋ” ira ine juju hati mucnekicnezi rowec.  
\v 9 No manape šiŋuc ekac, Lewi e teŋkonec wâŋ roekaczi Abrahamte bifuŋko fohuc wiac i Melikisede râcnewec”  
\v 10 e mamac-ticnere bifuŋko fohame Melikisedehec bâbâfuac epicte Abrahamzi râcneme Lewizi mâmâc râcnewec ekac.   
\s1 Taha bapa raŋɋane gie-jeŋic mi sâcke-hâmowec  
\p
\v 11 Lewire ɋâricfâc jaŋere taha bapa gie sâcke-hâmozac muzac, wemocko šâhec taha bapa moc Melikisede ere sâcko fuazac â Aroŋte sâcko aricne? Taha bapa giere erâ ŋic ŋokac sâcmutâc dâŋ jarekicne.  
\v 12 Eme taha bapa gie raŋɋane rârieha ɋâricne moc fuame, raŋɋanere sâcmutâc dâŋ iŋuc jaha râriehame ɋâricne moc fuaocmu.  
\v 13 Findaŋdâŋzi ŋic rokac e taha ufuŋko gie mujarekicne jaŋere guruonec mi fuawec, e guru mockonec.  
\v 14 Wofuŋ-nâŋec e Judare tofafâc jaŋeraonec fuawec, i mana-fâreŋgopeneŋ. Eme ŋicguru i jaŋe taha gie baniŋte Mosezi moc mi muwec.  
\v 15 Erâ irec fuŋne moc taniŋke-hâmokac wâc. Taha bapa moc Melikisedere sâcko fuaocte mukicne,  
\v 16 e sahaczi fuakicnere sâcmutâc râekicne irec sâcko mâcne, juju fofo sanaŋte tâpirio taha bapa erâ juwec jukac.  
\v 17 Ere hâcne dâŋ šiŋuc mutaniŋkekicne:  
\q1 “Goki Melikisede ere sâcko  
\q1 taha bapa jurašihuc jucmu sanaŋ.”   
\s1 Jesu e šâšâfic fârine irec jâcne  
\p
\v 18 Ine hâcne sâcmutâc dâŋ mârâc mukicne i tâpirimâc â fâri tâmiric ewecte bârâriekicne.  
\v 19 Sâcmutâc dâŋzi wiac moc mi emataucke-fârewec” eme irec okacne woworic fârine bâfuakicne, izi fârec-nâpome Anutu sâcne maickeeŋgopeneŋ.  
\v 20 Ɋâricne fuawec i mumupaŋ dâŋsanaŋ tâmiric mi fuawec raŋɋane jaŋe mumupaŋ tâmiricko taha bapa erâ jumbiŋ.  
\v 21 Ɋâricne ši ine mumupaŋ faio taha bapa ewec jukac. Ere dâŋqâreŋ šiŋuc fokac:  
\q1 “Wofuŋzi mumupaŋ dâŋ muwec i mi beheocmu:  
\q1 `Goki taha bapa jurašihuc jucmu sanaŋ'.”   
\m
\v 22 Fuŋne iŋucte šâšâfic fârinere jâcne ewec, Jesu hâcne.  
\v 23 Raŋɋane jaŋe hâmohuc tuczi tuc juwarembiŋte bocjaha juwarembiŋ.  
\v 24 Ɋâricne e ine juju sanaŋ jukacte taha bapa gie-ticne šušuhuc focnehuc juocmu sanaŋ.  
\v 25 Irec ere ŋesiŋko Anutu maickeeŋgopieŋ jaŋe sâcne bâbâpiaŋko râe basanaŋ ejareekac, e juju sanaŋ jukaczi hâcne dameŋ sâc roroŋ sasape ejareekac.   
\s1 Jesu e taha bapa sâko fârine jâmbâŋ  
\p
\v 26 Taha bapa sâko-nâŋec hâcne e furu, bahacmâc, ɋaɋacne, sâqocne bapa jaŋere sâcko mi juhuc qâtâcnerâ pectâc jujune, erâ sambâŋ hucke-fârewec jukac. Iŋucnezi hâcne junâreme sâcke-hâmokac.  
\v 27 E taha bapa raŋɋane jaŋe iŋucne mâcne, e sindaŋ tâmiriczi wemocko šoaŋne šoaŋne qanaŋ e jahacne sindaŋte erâ taha bâzi rikerâ šâhec ŋic jaŋere rikezac, e jahacne maŋ sahac i taha bâzi-nâŋec mocjaha hâcne râeme tarawec.  
\v 28 Sâcmutâc dâŋko ŋic maŋjeŋiczi dodocne jaŋe taha bapa sâko juniŋte mukicne. Eme šâhec ine sâcmutâc dâŋ faicnao mumupaŋ dâŋsanaŋzi Ŋokâ âkendâŋnewec. Eki hâcne maŋfuru jaha jurašihuc juocmu sanaŋ.   
\c 8  
\s1 Jesu e faic miti ufuŋ fârinao gie-ticne baekac  
\p
\v 1 Dâŋ mukicne irec hândâŋne šiŋuc: Taha bapa sâko junârekac e faic sambâŋko femicne sâko ere ŋeŋefuŋko mefârenao fewec ŋeekac.  
\v 2 E furu ufuŋ, mitific fârine hâcne, irec taha bapa jukac. Ufuŋ i ŋiczi mâcne, Wofuŋ e jahac bâfuawec.  
\v 3 Taha bapa sâko sasawa jaŋe nânâ qowi bâzi râe rikec eniŋte mujarekicne, irec taha bapa sâko-nâŋec wemocko taha bâzi tâmiric juzac?  
\v 4 Erâ e mâreŋko juhuc muzac taha bapa mi juzac, mâreŋko sâcmutâc dâŋte sâcko bâzi ririke ŋic sâcne juŋgopieŋ.  
\v 5 Jaŋe gie-jeŋic mitific jabane â sâsâcne ira baeŋgopieŋ, fârine ine sambâŋko ŋekac. Mose e mitire qoruc boze bazo ehame Wofuŋzi šiŋuc âzâcnewec: “Manakic, tikio hawarine gowatukicne irec sâcko wiac sasawa bazemec.”   
\s1 Ʒâšâfic ɋâricnere dâŋ  
\p
\v 6 Ʒi ine Jesuzi šâšâfic fekicnere jâcne juekacte taha gie fekicne jaha baekac. Ʒâšâfic fekicne ine biŋedâŋ fekicnezi hobeteŋ ecneha bâfuakicne.  
\v 7 Mârâc šâšâfic fowec, izi fârinehec eme muzac šâhec moc fuaocte dâŋne mi fuazac.  
\v 8 Anutu eki ine ŋic jaŋere maname mi sâckeme šiŋuc muwec:  
\q1 “Juku dameŋ mocko Israe kikefuŋ â Juda kikefuŋ  
\q1 jaŋehec šâšâfic ɋâricne moc bâfuapemu,  
\q1 Wofuŋzi iŋuc mukac.   
\q1
\v 9 Mârâc mimiŋnefâc-jeŋic Aigita mâreŋkonec jowac-jopapere  
\q1 mejeŋicko rohuc jaŋehec šâšâfic epo,  
\q1 šâšâfic iŋucne mâcne;  
\q1 jaŋe šâšâfic irec maŋnao paŋšâic mi jupie  
\q1 noni râpec-jopapo, Wofuŋzi iŋuc mukac.   
\q1
\v 10 Á šâhec Israe kikefuŋ jaŋehec šâšâfic epemu ine kecšiŋuc:  
\q1 No mumupaŋ dâŋnane maŋjeŋicko râepe huocmu,  
\q1 erâ buhândâŋ-jeŋicko qâreŋkepe foocmu,  
\q1 eme no Anutu-jeŋic jupemu  
\q1 â jaŋe kikefuŋfâc-nane juniŋmu.   
\q1
\v 11 Eme ŋic moczi ŋicâgo-ticne  
\q1 me ŋic moczi qomâ-ticne  
\q1 šiŋuc mi muhuc miti qazucneocmu:  
\q1 Ajoc, go Wofuŋte fuŋne manac â!'  
\q1 Macne, jaŋe wahakicnezi mecne fekicnezi mecne  
\q1 mâmâc manacnu-fâreniŋmu.   
\q1
\v 12 Ʒiŋucte manacnuniŋmu: No kiŋjeŋic behe-jarepemu  
\q1 â sindaŋ-jeŋicte mocwâc mi manasupemu,  
\q1 Wofuŋzi iŋuc mukac.”   
\m
\v 13 Eme Wofuŋ e šâšâfic ɋâricnere dâŋ muhuc, mârâc fowec irec “raŋɋaŋkekicne” muwec. Eme wiac raŋɋaŋkekicne â gufekicne izi arictac ezo ekac hâcne.   
\c 9  
\s1 Mârâc Wofuŋ mai eecnere wiac fowec i jabane  
\p
\v 1 Ʒâšâfic raŋɋanao Wofuŋ mai eecnere hata fowec â irec tiri qoruc boze mâreŋko ŋewec wâc.  
\v 2 Mitire qoruc boze hâcne kecšiŋuc bambiŋ: Maŋne moc maine, šâŋene Furufic mukicne, ira kendo kikenehec domawec erâ tebo ŋewec fainao poroŋ furu mukicne i fowec.  
\v 3 Eme bumec maŋne moc âke tâcnekicne fowec, šâŋene Furu Dindiŋ mukicne.  
\v 4 Ira hosâc ririke alata golzi bakicne ŋewec, erâ šâšâficte qorac tapa katapa golzi ɋorockekicne i ŋewec, erâ Aroŋte gunu ɋârerâ gitec hekicne i â qorac tapa mâmâc râekicne.  
\v 5 Fainao ine tatamacte kerubim hawari jajahec fakec-jekiczi katapa tapane sâockehuc domapic. Irec dâŋ ninic jaha wemocko mufârezo.   
\p
\v 6 Wiac iŋuc râepie fohame fic maŋne maine ira taha bapa jaŋe dameŋ sâc fec wahac ehuc gie-jeŋic bajumbieŋ.  
\v 7 Fic maŋne moc ira ine taha bapa sâko e bucticne jara moc maŋnao arec mocjaha fejujec. Erâ soc tâmiric aricne, sochec sasawa fehuc e jahacne â ŋic jaŋere bahacte tie jujec.  
\v 8 Wiac irec fuŋne Tiri Mârozi šiŋuc nâwotukac: Maŋne maine izi ŋehame furu ufuŋko rarašire hata mi fua tâcnekac.  
\v 9 Maŋne maine izi dameŋ šiŋuczia mâreŋko juŋgopeneŋ irec sâsâcne ekac. Tiri qoruc bozeo nânâ qowi bâzi râe rikec ee izi wemocko ŋic Anutu mai ecnembiŋ jaŋere maŋ bâpiaŋkezac?  
\v 10 I sahackopec sâcmutâc dâŋ sawa, nânâ opâre â sahac šušurere dâŋ fowec iŋucne, i šâhec fârinezi âkehockeocte jaba fowec.   
\s1 Kristo e taha bapa gie fârine bawec  
\p
\v 11 Kristo eki ine wiac fârine fuaocte mukicne irec taha bapa sâko fuawec, ehuc qoruc boze sâc moc, fârine jâmbâŋ, mezi mi bakicne, mâreŋko mi ŋeŋene, ira rašiwec.  
\v 12 Noniŋ bulimakao sochec mâcne, e jahacne sochec Furuficko arec mocjaha rašihuc kitâc-nâpowec izi fofo sanaŋ foocmu.  
\v 13 Noniŋ bulimakao soc â bulimakao šafe i ŋic wâwânâŋ fua-jarewec jaŋe epie furu bacjopame sahackopec ɋaɋackembiŋ”  
\v 14 Kristo e ine Mâro juweczi jukac eki neŋgoc ŋecneha maŋ sahac-ticne Anutu taha bâzi furu biaŋ ecnewec, eme nâŋâc eebapa aputacnezi maŋnâŋec hegâpârembeŋ i Kristore soczi sâcne šure ɋaɋackeme Anutu jujune kiŋaŋ qacnenaŋmu.   
\s1 Kristo socticnezi wiac kitâcne-nârewec  
\p
\v 15 Irec hâcne Kristo e šâšâfic ɋâricnere jâcne ewec, erâ šâšâfic raŋɋanao juhuc kiŋ bâfuakicne i taraocte hâmowec, eme irec biŋefâc-ticne jaŋe juju sanaŋte merâfâc roniŋte mujarekicne i sâcne roniŋmu.  
\v 16 Merâfâcte hata šiŋuc fokac: Runezi hâmome jaha rauckezo.  
\v 17 Ɋâricne juhame merâfâcte dâŋ mukicne i mâc foocmu, hâmome ine dâŋ irec fârine fuaocmu.  
\v 18 Irec hâcne šâšâfic raŋɋane i soc tâmiricko wâc mi fuawec.  
\v 19 Mose e sâcmutâc dâŋqâhâc jâcne jâcne, mutâcnekicnere sâcko ŋic jazaku jaza-fârerâ bulimakao â noniŋsoc opâhec bâsifuckerâ kâcbiŋko lama kanšaŋ bâbâroŋ qâfiserâ izi soc tieme miti papia mecne ŋic ŋokac mecne mâmâc rua -jarewec.  
\v 20 Ehuc šiŋuc jazawec: “Anutuzi šâšâficte dâŋ mupaŋke-ŋarejec irec soc ši hâcne.”  
\v 21 Erâ taha boze â taha giere râqâc wiac i iŋuc jaha soczi ruacne-fârewec.  
\v 22 Ine hâcne, sâcmutâc dâŋko mukicnere wiac šeŋgoma qâririŋ soczi šure ɋaɋackezo, â soc tâmiricko sâqocne bâbâtâmire mi fokac.   
\s1 Mesia e taha-nâŋec mocjaha bame sâckewec  
\p
\v 23 Sambâŋko wiac fârine fokac irec sâsâc wiac i soc omanezi šure ɋaɋackeocte mukicne, â wiac fârine e jahacne ine taha furi sâkozi šure ɋaɋackeocte hatane mocjaha fokac.  
\v 24 Irec hâcne Kristo e furu ufuŋ mezi bakicne, fârine irec sâsâcne mac, ira mi rašiwec, e sambâŋ maŋnao rašiwec, eme ira Anuture maio juhuc nâŋâcnere erâ taha gie-ticne baekac.  
\v 25 Erâ e maŋ sahac-ticne hâsi fâri taha-nâŋec qikiŋneocte wâc mi fewec, taha bapa sâkozi jâmbomac jarane jarane feekac, ehuc e jahacne soc mâcne, soc jabane rorâ tiri ufuŋko feekac.  
\v 26 Kristo e iŋucnere sâc erâ muzac mâreŋ fuaweckonecteaŋ wemo afecne hâmo warehuc juzac. E ine iŋuc mi ehuc dameŋ ŋondeŋ tataranao due-nâŋec bahuc kiŋnâŋec bârârieocte fua tâcnewec.  
\v 27 Ŋiczi mocjaha hâmonaŋte munârekicne, eme irec faicnao dâŋnâŋec mumutara fuaocte mukicne”  
\v 28 eme Kristo e iŋuc jaha, ŋic bocjaha kiŋjeŋic âsickehuc mocjaha hâcne hâmoweczi mocwâc sâqocnere gie baocte mâcne, e worickehuc jueŋgopieŋ jaŋe rocjopaocte sawa fua taniŋkeocmu.   
\c 10  
\s1 Sâcmutâc dâŋte sâcko taha gie bakicne i jabane  
\p
\v 1 Sâcmutâc dâŋko wiac mukicne i mâc šâhec fârine fuaocmu irec mumucne sawa fuakac, fârine jâmbâŋ mâcne. Irec taha bapa jaŋe sâcmutâc dâŋ reŋkehuc jarane jarane taha barâ ba epie ŋic ira Anutu mai ecneeŋgopieŋ jaŋe sâcne maŋfuru mi bacjopaekac.  
\v 2 Iŋuc eme muzac, taha bâzi ririke omaezac i¡ Ira Anutu mai ecneeŋgopieŋ jaŋe kiŋfâsâc enšapiŋ muzac, kiŋjeŋicte manabâc mocwâc mi enšapiŋ.  
\v 3 Taha bâzi izi ine jarane jarane fuame kiŋjeŋicte manasueŋgopieŋ.  
\v 4 Noniŋ bulimakao soczi wemocko kiŋjeŋic bâtâmirezac? I aricne.  
\v 5 Irec hâcne Kristo mâreŋko wahaocte dâŋ šiŋuc muwec:  
\q1 “Taha bâzi fuŋne fuŋnere mi egareekac,  
\q1 sahac ine bâfua-narekomec.   
\q1
\v 6 Qowi hâcbuc ririke me sâqocnere taha bapa  
\q1 i fua-gareocte mi muekic.   
\q1
\v 7 Eme mupo, `Manakic, no Anutu gore mic reŋkepere fisikopac',  
\q1 miti papiao nore dâŋ qâreŋkekicne irec sâcko.”   
\m
\v 8 Faic dâŋ šiŋuc muwec fokac, “Taha bâzi fuŋne fuŋne â qowi hâcbuc sâqocnere taha irec mi egareekac â irec takicguekac” wiac i sâcmutâc dâŋte sâcko râe rikec ekicne.  
\v 9 Erâ dâŋ šiŋuc šuhuckerâ muwec: “Manakic, gore dâŋ reŋkepere fisikopac”, iŋuc muhuc wiac raŋɋane bârârierâ ɋâricne moc âkendâŋnewec.  
\v 10 Irec Anuture micdâŋte erâ Jesu Kristo e sahac-ticnezi taha bame maŋfuru embeŋ, i arec mocjaha ekicnezi fofo sanaŋ.   
\s1 Jesu e nâŋâcnere taha fârine bawec  
\p
\v 11 Taha bapa sasawa jaŋe šoaŋne šoaŋne gie-jeŋic bahuc bâzi ijaha hati rikerâ rike ehuc jueŋgopieŋ, eme izi kiŋ bahac sâcne moc mi bâtâmireekac.  
\v 12 Kristozi ine sâqocne-nâŋecte taha mocjaha bame tarame faic Anutu mefârenao fewec jukac.  
\v 13 Eme ira râsifâc-ticne dockerâ waha fohuc kike-ticnere ââtesiŋ eniŋte woŋec juekac.  
\v 14 Maŋfuru eere hatao juŋgopieŋ jaŋere taha mocjaha bahuc bâbâpiaŋ-jeŋicte gie batarawec.  
\v 15 Eme Tiri Mârozi irec dâŋ mufua-nârekac wâc. Qanaŋ dâŋ šiŋuc fokac, Wofuŋ e kecšiŋuc mukac:   
\q1
\v 16 “Ʒâhec dameŋko jaŋehec šâšâfic epemu ine kecšiŋuc:  
\q1 No mumupaŋ dâŋnane maŋjeŋicko râepe huocmu,  
\q1 erâ buhândâŋ-jeŋicko qâreŋkepe foocmu.”   
\m
\v 17 Erâ šuhuckekac,  
\q1 “No kiŋjeŋic behe-jarepemu  
\q1 â sindaŋ-jeŋicte mocwâc mi manasupemu.”   
\m
\v 18 Sâqocne tâmire-fâreme ine irec taha bapa iŋuc jaha omaeocmu.   
\s1 Anutu siocmâc mai ecnezo  
\p
\v 19 Âgofâc, Jesu e socticnezi motâc ronârewecte furu ufuŋko fenaŋte maŋnâŋe. afeckekac.  
\v 20 Irec hatane ɋâricne â jujune ine e jahac bâšâwe-nârewec. Ehuc ââketâc fowec, sahac-ticne hâcne, i fotâcnerâ fewec.  
\v 21 Eme taha bapa fekicne Anuture ufuŋ qizeckerâ junârekac.  
\v 22 Irec nâŋâc mamanasiŋzi maŋnâŋec baafeckeha siocmâc mai ecnehuc junšepeneŋ. Ine qanaŋ maŋnâŋec kiŋzi hegâpârekicne i socticnezi ruacneme taniŋkeha â sahac-nâŋec opâ ɋaɋaczi šureha iŋuc sâcne enaŋmu.  
\v 23 Erâ mume sasanaŋzi wiac biŋe qanârewecte biŋedâŋ i kiki papaŋ jaha bajuhuc muhaŋnenšepeneŋ.  
\v 24 Erâ wâc sosoŋaŋ ehuc maŋjauŋte â eehâmo giere qaqafeŋ enšepeneŋ.  
\v 25 Ehuc mitire tutumaŋko gâcnezi mi fisihuc qâoma eeŋgopieŋ iŋuc mi ezo. Dameŋ sâko bâqiŋ-nâpokac, iŋuc hâcne manahuc šoɋac erâ faŋ qaqac enšepeneŋ.   
\s1 Sâqocne mana afeckehuc bapa irec dâŋ  
\p
\v 26 Nâŋâc dâŋ fâri qizecnezi maŋnâŋec âke tamaehame sâqocne mana jaŋgeŋkehuc bapene mozi irec taha bame tâmireocmu? Aricne, iŋuc mi fokac,  
\v 27 ine okacne hâhâwicne â šocbâruŋ sâko izi sawa woŋec-nâŋec foocmu. Ʒocbâruŋ izi mitire râsifâc šâmiziec-jopaocmu hâcne.  
\v 28 Ŋic moczi Mosere sâcmutâc dâŋ mana suahuc qame ŋic jajahec me jahec â moczi mujaŋgeŋkepie acmâc jaha qapie hâmoekac.  
\v 29 Eme ŋic moc e Anuture Ŋokâ ro waha âte ecnehuc, šâšâficte soc ruarâ maŋfuru ewec i mana suahuc aki anonoc rune Mâro musoriŋkeocmu, e okacne mo iŋucne fisicneocmu muŋgopieŋ?  
\v 30 Nâŋâc dâŋ kecšiŋuc muwec ere fuŋne manaeŋgopeneŋ: “Kiŋ babatara i nore gie, okacne babazu i noni epemu.” Erâ moc šiŋuc fokac: “Wofuŋ e ŋicfâc-ticne jaŋere dâŋ mutara-jareocmu.”  
\v 31 Anutu jujune ere meo fefe i wiac hâhâwicne jâmbâŋ.   
\s1 Miti ba behec mi ezo  
\p
\v 32 Ŋoŋe mârâc wiac ejumbieŋ irec manasunšepieŋ. Dameŋ ira maŋŋeŋiczi hae furehame fific guguriŋ maŋko juju gie sâko bahuc sanaŋkembiŋ.  
\v 33 Eme gâcne ŋoŋe imaŋ gomaŋ â šâic busâqoc fai-ŋeŋicko feme ŋic jaŋere maio mamakâc embiŋ, â gâcne ŋoŋe ine âgofâc-ŋeŋic wiac iŋucne ejarepie šâic-jeŋic mâmâc manambiŋ.  
\v 34 Ŋoŋe âgofâc-ŋeŋic kâpâcwâru ficko fepie jaŋere erâ buheric fua-ŋarewec, â moneŋ mafa ŋowac ropie ine mafa fârine fofone fonârekac muhuc manapie bubiaŋnehec ewec.  
\v 35 Eme ši hâbi-ŋeŋic mi goroŋkezejec, hâbihec juku furine kâcɋene rozo.  
\v 36 Irec ŋoŋe sasanaŋ bâfuarâ Anuture micdâŋkoa juku wiac biŋe qaŋarekicne irec fârine ronšepieŋ.   
\q1
\v 37 “Irec dameŋ bembeŋne mac moc fokac i tarame  
\q1 wareocte mukicne e ŋeŋe râqâc mi ehuc biac fisiocmu.   
\q1
\v 38 Ŋicnane biaŋkekicnezi ine mamanasiŋte erâ juju hotâckeocmu,  
\q1 â docke pârâc eocmuo maŋnanezi manacnepe mi biaŋkeocmu.”   
\m
\v 39 Nâŋâc ine docke pârâc ehuc sisipiricko rara irec biŋe mâcne, nâŋâc manasiŋkehuc maŋ qâqâtâc ŋeŋezic irec biŋe.   
\c 11  
\s1 Mamanasiŋte dâŋ  
\p
\v 1 Wiac biŋe qanârekicne i manapaŋkerâ irec woŋec juju, â wiac mi hohonene maŋzi sakarerâ babaju, izi mamanasiŋ ekac.  
\v 2 Mitiŋic raŋɋane jaŋe mamanasiŋ iŋucnehec jupie Anutuzi honec-jopame biaŋkewec hâcne.  
\v 3 Mâreŋ i Anuture micte fuawec, ine mamanasiŋhec juhuc mana taraeŋgopeneŋ. Wiac hohonene i mi honekickonec fuawec hâcne.   
\s1 Abe, Enoko â Noa  
\p
\v 4 Mamanasiŋhec juhuc Abezi Anutu bâzi rikecneme honeme sâckeha Kaiŋte qikiŋnewec. Mamanasiŋ-ticnere hâcne Anutuzi honeme kiŋfâsâc eme bâzi-ticne rohuc fuŋne-ticne bataniŋkewec. E mamanasiŋhec juwecte manapene hâmokicnezi sifu dâŋ nâzâkac ekac.  
\v 5 Enoko e mamanasiŋhec juwec, irec hâmoczi mi bâuaocte Anutuzi ɋâricne bafewec. Iŋuc ecnewecte ŋiczi basambiŋ. Erâ mi feha fuŋne-ticne biac šiŋuc mutaniŋkekicne: Anutuzi e honeme biaŋkewec.  
\v 6 Mamanasiŋ tâmiric jupene Anutuzi honec-nâpome bibiaŋke ine mi fokac. Anutu mâc mai mi ecnezo, jukac i mana šakiezo, â maŋzi hefârepene tahac-nâpoekac dâŋ i mana šakiehuc mai ecnezo.  
\v 7 Noa e mamanasiŋhec juwecte Anutuzi wiac šâhec fuaocmu irec biŋe qanaŋ âzâcnewec. Âzâcneme araŋ bacnehuc wiacfâc-ticne ɋâricne juniŋte murâ woke bawec. Iŋuc ehuc ŋic kiŋjeŋicte fuŋne bataniŋkewec. Erâ mamanasiŋte erâ kiŋfâsâc ee irec fârine rauckewec.   
\s1 Abraham  
\p
\v 8 Abraham e mamanasiŋhec juwecte mâreŋ-ticne beherâ moc rauckeocte irec dâŋ erao fuame reŋkewec. Erâ mâreŋ irec me irec mukicne kâuc bahuc sifu rawec.  
\v 9 Mamanasiŋhecte mâreŋ biŋe qacnekicne ira ra fisirâ jaba juwec. Jaba juhuc bozeo sawa ŋeŋerâ juwec. Isaka â Jakobo jahe biŋe mâmâc qajactekicnezi sâc ijaha epic.  
\v 10 Abraham e hae ŋeŋe sanaŋ moc Anutuzi bâfuarâ basarickewec irec mamanacko juwec.  
\v 11 Sara e iŋuc jaha mamanasiŋhecte tâpiri fuacneme ŋokac qizec juipiehuc kiwechec ewec. Ine ɋâricte biŋe qacnewec ere, mume fufuazi mukac, muhuc iŋuc ewec.  
\v 12 Eme irec hâcne ŋic mocjaha, fua sawecte tâpiri-ticne arictac ehame, eraonec ɋâric fua sawec embiŋ jaŋe sambâŋko bâpiŋ ŋerakac irec sâc, erâ hâwecmecko moŋgeŋ forakac, ŋiczi mi wowosene, irec sâc fuambiŋ.   
\p
\v 13 Ŋic izi hâcne mamanasiŋhec juhuc hâmo-fârembiŋ. Wiac biŋe qajarekicne irec fârine ine mi roro mâc taicko fome honerâ worickehuc jumbiŋ. Iŋuc ehuc fuŋne-jeŋic šiŋuc manambiŋ: Nâŋe mâreŋko hotâ â jaba juŋgopeneŋ.  
\v 14 Dâŋ iŋuc muhuc mâreŋ qizec moc bâfuaniŋte maŋjeŋic âeckeba ewec.  
\v 15 Erâ jaŋacne hae mâreŋ râpeckembiŋ irec maŋhâhâŋ mi ejarewec, irec ejareme muzac risiezo murâ sâcne risienšapiŋ.  
\v 16 Jaŋe ine hae mâreŋ biaŋ mocte maŋhâhâŋ ejarewec, sambâŋko fokac irec hâcne. Irec Anutu e jaŋere Anutu, ere iŋuc mupene maname mi sâqoreekac. Wemocte? E jahac hae sâko moc bâfua-jarewec.   
\s1 Isaka â Jakobo  
\p
\v 17 Abraham e Anutuzi esâickeme mamanasiŋhec juwecte Isaka taha bâzire qikiŋnewec, e biŋedâŋ roweczi ŋokâ-ticne mocjaha qikiŋnezo ewec hâcne.  
\v 18 Biŋedâŋ šiŋuc âzâcnekicne: “Isakaraonec ɋâricfâcge fua sawec eraniŋmu.”  
\v 19 I kecšiŋuc muhuc ewec: “Anutu e ŋic hâmockonec bâɋârec-jopaocte tâpiri focnekac.” Eme irec hâmockonec tinac bârisiecnewec.  
\v 20 Isaka e mamanasiŋhec juwecte Jakobo â Esau jambuŋ-jofahuc wiac šâhec fuaocmu irec findaŋdâŋ wâc jasawec.  
\v 21 Jakobo e mamanasiŋhec juwecte hâmozo ehuc Josefe ŋokâ jahec-ticne jambuŋ-jofawec, ehuc gunuzi âkesiŋnerâ ŋehuc Anutu dapecnewec.  
\v 22 Josefe e mamanasiŋhec juwecte hâmozo dameŋ-ticne maickeme Israe ŋic jaŋe juku Aigita mâreŋ beherâ raniŋmu irec manasurâ siec-ticnere qanaŋ dâŋ mutâcne-jarewec.   
\s1 Mose â Josua  
\p
\v 23 Mose fuame neŋgoc mamacne jahe mamanasiŋhecte motec honebâckerâ ŋicwofuŋ dâŋticnere mi hâwic-jofaha mosa jahec â moc soŋkepic.  
\v 24 Mose e mamanasiŋhec juwecte ine sokarâ Farao otâ-ticne-e ŋokâ mucneniŋte mupie qikiŋnewec.  
\v 25 E sâqocnere aŋac bembeŋne qikiŋnerâ Anuture ŋicfâc jaŋehec šâic busâqoc manaocte wosâewec.  
\v 26 Ehuc Aigita mâreŋkonec moneŋ mafa mâriri irec maname jawane ewec, â Kristore erâ mamakucne juocte ine maname fârine ewec. I juku furine roocte mana suhuc iŋuc ewec.  
\v 27 E mamanasiŋhec juwecte ŋicwofuŋ aaric-ticne qamaserâ Aigita mâreŋ behewec. Erâ Anutu mi hohonene e šâŋezi honehuc tinac erao siŋkewec.  
\v 28 Mose e mamanasiŋhec juwecte mume aakic lama hezurâ socnezi ficmotâc ruacnepie aŋelo momorizi jowaruhuc mârâc ŋokâfâc-jeŋic akic-jopawec.  
\v 29 Eme Israe ŋic jaŋe mamanasiŋhec jumbiŋte Hâwec Bâbâroŋko tiŋko rara tinac rahuc fotâcnembiŋ. Aigita ŋic jaŋe i jaha ezo mupie hâweczi ɋâcjopawec.  
\v 30 Israe ŋic jaŋe mamanasiŋhec jumbiŋte Jeriko haesac orâŋkekuhapie šoaŋ gie bapa 7 eme hericke qawec.  
\v 31 Sasec ŋokac Rahaba e mamanasiŋhec juwecte ŋic mâreŋ hone t^ecnepic jahe âgo ejactewec. Eme qaqatara ŋic jopambiŋko e akickekicne.   
\s1 Mitiŋic gâcne jaŋere dâŋ  
\p
\v 32 Erâ dâŋ gâcne wemocko mufârezo. Gideoŋ â Baraki â Simsoŋ â Jefita â Dawidi â Samue â porofete jaŋere binaŋ bafârepe muzac mâretec šorazac.  
\v 33 Jaŋe mamanasiŋhec jumbiŋte ŋic guru sâko bawahac-jopambiŋ. Bâbâtiŋ gie bâhâmombiŋ, wiac biŋe qajarekicne irec fârine rombiŋ, laioŋ micjeŋic bâbâzickembiŋ,  
\v 34 šocbâruŋ fâro-ticne hemâteŋkembiŋ, šika faio feipiehuc ɋâricne jumbiŋ, dockekicnezi mocwâc sanaŋkembiŋ, šikao momori wânšâŋ embiŋ, mâreŋ gâcnaonec râsi jopa jâpec embiŋ.  
\v 35 Ŋokac gâcne jaŋere ŋokâ hâmockonec bâɋâre-jarekicne. Ŋic tucne bâšâic-jopahuc mâsi qâsi ejarekicne, eme “miti behepie akic-ŋopazo” jazapie, juju sanaŋte ɋâreniŋte manasuhuc qikiŋnembiŋ.  
\v 36 Ŋic tucne jaŋe maric maŋgâpâc â qa imac ejarekicne, â tucne jaŋe me kike-jeŋic qarâ kâpâcwâru ficko râec-jopakicne.  
\v 37 Tucne jaŋe qânâzi hehâmoc-jopakicne, tucne jopa qâšâic ejarekicne, tucne jaŋe segezi bâtâc-jopambiŋ, tucne jaŋe šikazi upe-jeŋic qâtâcnembiŋ. Jaŋe lama â noniŋ sahacne rufarâ rorocko juhuc bebekâne erâ šâŋ goma faio jujumbieŋ.  
\v 38 Iŋucnezi ŋic wemo-jeŋicte mâreŋko jupie sâckewec. Jaŋe tiki tuhuo mâreŋ â qorac hawecko foforâ jujumbieŋ.  
\v 39 I jaŋe sasawa mamanasiŋ-jeŋicte Anutuzi honec-jopame biaŋkewec, erâ sifu wiac biŋe qajarekicne irec fârine mi bâfuambiŋ.  
\v 40 Fuŋne šiŋucte: Anutu e nâŋâcnao wiac fekicne râeocte maname fowec, irec jaŋe nâŋâc tâmiricko juju saric bâfuaniŋte mi manasuwec.   
\c 12  
\s1 Jesuzi micne banârewecte e bâjâpehuc sanaŋkezo  
\p
\v 1 Wišec guru sâko iŋucnezi karorac tinac erâ orâŋ-nâpoŋgopieŋte wiac bâmâc-nâpoekac i hetera-fârenšepeneŋ, â sâqocnere muczi fâfâc-nâpoekac i wâc hetâcnenšepeneŋ, ehuc hata nâwotukicne ira tatakic tâmiric gagasac jaha ranšepeneŋ.  
\v 2 Ehuc Jesu, mamanasiŋte micne bapa â mamanasiŋte fârine bâbâfua, erao findendeŋnehuc junšepeneŋ. E šeri bubiaŋ fuacneocte mukicne irec manasuhuc maripoŋte šâic manawec â mimi faio fefe mana suawec. Iŋuc erâ Anuture ŋeŋefuŋko mefârenao fewec ŋekac.  
\v 3 Sâqocne bapa jaŋe mukac mupe mo iŋucne ecnepie mana-bipierâ sanaŋkewec, ŋoŋe ere hâcne manasuhuc mi takirepie maŋŋeŋic betaŋkezejec.   
\s1 Anutuzi ba bâtiŋ enâreekac irec dâŋ  
\p
\v 4 Ŋoŋe sâqocnezi herokawec-ŋopazo eme samandiŋkerâ sahac-ŋeŋic bapie wozeme dodoma, i juwarehuc iŋuc sâcne mi embiŋ.  
\v 5 Erâ dâŋ moc “ŋokâ” muŋarehuc faŋ qaŋarekicne fokac irec nikec-ŋopawec me? Dâŋ šiŋuc:  
\q1 “Ŋokâ-nane, Wofuŋzi bâtiŋgume manatec  
\q1 wawahane mi ezejec,  
\q1 â bâšâicgume maŋge mi rokawezejec.   
\q1
\v 6 Wofuŋ e ŋic moc jauŋkezo murâ ba bâtiŋ ecneekac,  
\q1 â ŋic fuŋfuŋfâcne bacjopahuc qa qâtiŋ ejare-fâreekac.”   
\m
\v 7 Wofuŋzi ba bâtiŋ eŋarezo mume hâbi-ŋeŋic mi ŋeŋgoroŋkezejec. Anutuzi honec-ŋopame naru motecfâc-ticne epie iŋuc hâcne eŋareekac. Me mo mamaczi ŋokâ-ticne ba bâtiŋ mi ecneocmu?  
\v 8 Ba bâtiŋ i ŋic gâcne sasawa ejarewec, eme ŋoŋe i tâmiric jupie ine naru motecfâcne mâcne, fiuckonec fuakicne muŋarezo.  
\v 9 Erâ moc mupe: Mâreŋ mamacfâc-nâŋec jaŋe qa bâtiŋ enârepie araŋ bajare jumbeneŋ. Eme qâqâtâcte Mamac e araŋ bašihuc bacnepene sâckeocmu. Iŋuc ehuc juhâmonaŋmu.  
\v 10 Jaŋe mamana-jeŋicte sâc jara dameŋ bembeŋne sawa qa bâtiŋ enâre jumbieŋ, eki ine wiac fârine fua-nâreocte enâreekac, e jahacne tiri jujuo šuhuckenaŋte hâcne.  
\v 11 Bâbâtiŋ fuaocmu sâc i qanaŋ manapene bubiaŋhec mi ehuc busâqochec eekac” â šâhecko ine bâbâtiŋko juhuc sanaŋkeeŋgopieŋ jaŋerao fârine wamane fuaekac, šâŋene bahac fâsâc juju.   
\s1 Sasanaŋ bâfuarâ dodopec ezo  
\p
\v 12 Eme ŋoŋe meŋeŋic betaŋkekicne â hoqaŋeŋ-ŋeŋic ŋetarakicne, irec âte tiŋnehuc sanaŋkenšepieŋ.  
\v 13 Ehuc hata bâšâwepie wiŋkeme ŋoŋeraonec puriŋ ekicnezi ira qac qâsoric tâmiric âte rahuc biaŋkenšepieŋ.  
\v 14 Ŋoŋe ŋic mâmâc sasawa jaŋehec wamao jujure giene banšepieŋ, erâ maŋfuru erâ juniŋte henširiŋnenšepieŋ, maŋwânâŋhec juku Wofuŋ hohone i mi fokac.  
\v 15 Ŋoŋeraonec moczi Anuture aki anonoc ririzacte soŋaŋ babac enšepieŋ. Erâ ŋondeŋ-ŋeŋicko šâŋ opac moczi gitec herâ šacŋopame sâqorenšipiŋte rucŋeŋic banšepieŋ.  
\v 16 Erâ ŋoŋeraonec moczi Esaure hata mi âtehuc sasecŋic â ŋic araŋ bapa tâmiric mi ezejec. E nânâ mocjaha mac irec erâ mârâc fufuare merâfâc qikiŋnewec.  
\v 17 Ŋoŋe ere manaeŋgopieŋ, e šâhec jambuŋ rozo mume sakarecnekicne. E wiac ewec i suame arictac eocte kio-bipiehuc emâmâŋkewec.   
\s1 Nâŋâc Sinai tiki mâcne, Zioŋ tiki maickembeŋ  
\p
\v 18 Ŋoŋe tiki moc ba bâuac eene, šocbâruŋnehec ira mi ra fisimbiŋ, erâ hâweŋ, dapâc â mâŋâŋ šâšâkiriŋne irec maŋnao mi rašimbiŋ.  
\v 19 Erâ qeŋfânâŋ sâko â dâŋowa i wâc mi manambiŋ. Manambiŋzi dâŋ niniŋkeocte numu huacbuc embiŋ.  
\v 20 Dâŋ kecšiŋuc mukicne, irec manapie hâhâwicne ewec: “Qowi tiki âteuame qânâzi hehâmozo.”  
\v 21 Wiac i bipic tatarane hec fuakume Mosezi muwec: “No hâwicnume ɋarac ɋarac qakopac.”  
\v 22 Ŋoŋe tiki iŋucnao mâcne, ŋoŋe Zioŋ tiki, Anutu jujune ere hae sâkoo, sambâŋte Jerusalemko fisimbiŋ. Ehuc aŋelo mi wowosec-jopane â šeri tutumaŋ sâko  
\v 23 â fuŋfuŋ gurufâc-ticne šâŋejeŋic sambâŋko qâreŋkekicne jaŋe hâcne maic-jopambiŋ. Ehuc Anutu, ŋic sasawa nâŋâcne mumutara maickembiŋ, â ŋic tiŋne furu bacjopakicne qâqâtâcfâc-jeŋic jaŋerao šuhuckembiŋ”  
\v 24 â Jesu, šâšâfic ɋâricnere jâcne, erao fisirâ rurua soc maickembiŋ, soc izi Abe socticnezi wira wâwâsic ewec iŋuc mâcne, sâc moc wira wâwâsic eekac.   
\s1 Anutuzi juku mâreŋ itiriŋkeme ŋerisieocmu  
\p
\v 25 Ŋoŋe dâŋ ŋazaekac e râpeckenšipiŋte ruc bahuc junšepieŋ. Mârâc jaha mâreŋko waharâ dâŋ jazame qikiŋnepie okacne fisi-jarewec. Eme ši sambâŋko juhuc dâŋ nâzâekac, e râpeckerâ wemocko okac tâmiric junaŋmu.  
\v 26 Mârâc jaha dâŋ mume mâreŋ qiriŋ qawec. Eme ši ine dâŋticne šiŋuc fokac: No juku mâreŋ mocwâc itiriŋkehuc sambâŋ mâmâc itiriŋkepemu.  
\v 27 Mocwâc itiriŋkepemu, iŋuc muwec, ine wiac bâfuakicne i itiriŋkeme ŋerisieocte manasuhuc muwec. Ŋerisieme fofo sanaŋ i fuarâ qiriŋmâc fozokac.  
\v 28 Nâŋâc uucmaŋ moc qiriŋmâc fofo sanaŋ rauckenaŋmu, irec Anutu mucne bacnenšepeneŋ, ehuc rumerâ araŋ bacnehuc, jahac maname biaŋkeekac irec sâcko kiŋaŋ qacnenšepeneŋ.  
\v 29 Ehuc šiŋuc mananšepeneŋ: Anutunâŋec e šocbâruŋ iŋucne.   
\c 13  
\s1 Faŋdâŋ  
\p
\v 1 Qoqomâzi jauŋ babac eeŋgopieŋ i ŋoŋerao mi wahazejec.  
\v 2 Ŋic hezu hewâneŋ ejareniŋte qâoma mi enšepieŋ. Gâcnezi ŋic hezu hewâneŋ ejareŋgopeneŋ muhuc aŋelo ejarembiŋ.  
\v 3 Âgofâc-ŋeŋic kâpâcwâru ficko râec-jopakicne jaŋere manasuhuc manapie mâmâc râec-ŋopakicne tinac ezejec. Erâ ŋoŋe sahachec jaha juŋgopieŋte qa imac ejarekicne jaŋere wâc manasunšepieŋ.  
\v 4 Ŋowe ŋonâŋ jujure manapie wiac fârine eha fofo wirecko gâc mi hezejec. Boe sau â šuhuc bâtâc eeŋgopieŋ jaŋe Anutuzi okacne jareocmu.  
\v 5 Maŋŋeŋiczi moneŋ mafare harac mi ezejec. Wiac foŋarekac sâc mukâroŋ tâmiric bajunšepieŋ. Wofuŋ e jahac šiŋuc muwec: “Noni mi behecgupemu, â hone qâoma moc mi egarepemu.”  
\v 6 Irec nâŋâc hâbi-nâŋec rohuc šiŋuc munšepeneŋ:  
\q1 “Wofuŋ e ŋeŋezic-nane,  
\q1 no mi hâwicnuzejec;  
\q1 ŋic jaŋe wemo enareniŋmu?”   
\s1 Miti qazu-nârekicne ijaha bajuhuc Jesu bâjâpenšepeneŋ  
\p
\v 7 Micne bapafâc-ŋeŋic Anuture dâŋ ŋaza qazuc embiŋ jaŋere manasuhuc junšepieŋ, erâ miti hata âteku hâmombiŋ itirocne honehuc jaŋere bâjâpecne mamanasiŋhec junšepieŋ.  
\v 8 Jesu Kristo e juweczi jukac ijaha jurašihuc juocmu sanaŋ.  
\v 9 Mu qaqazuc dâŋ kosane hazec furu ŋazapie izi maŋŋeŋic mi hesifuckezejec” maŋŋeŋic aki anonoczi keteŋneme qiŋ herâ fome biaŋkeocmu, wiac nâkicnezi sâcne mi basanaŋkeocmu. Hata i âtembiŋzi fârine mi bâfuambiŋ.  
\v 10 Nâŋâcne alata ŋekac, irec nânâ i qoruc boze kiŋaŋ qacneeŋgopieŋ jaŋe nâniŋte mi mana-jarekicne.  
\v 11 Ŋoŋe manaeŋgopieŋ, qowi hezurâ socjeŋic taha bapa sâkozi sâqocnere kiŋte furu ufuŋko bafeme fârine hae sahao bahurâ šoczi rikeeŋgopieŋ.  
\v 12 Eme Jesu e iŋuc jaha socticnezi ŋic maŋfuru bacnâpoocte hae sahao qapie hâmowec.  
\v 13 Irec nâŋâc iŋuc jaha hae sahao erao hurâ, eki mimi faio fewec ijaha enšepeneŋ.  
\v 14 Ʒiŋuc manahuc enšepeneŋ: Hae ŋeŋe sanaŋ moc šira mi ŋenârekac” moc juku fufuane irec maŋhâhâŋ enâreekac.  
\v 15 Irec nâŋâc Jesure erâ Anutu šušuhuc jaha mumuteŋ ecnepene izi taha bâzi-ticne ezejec, micbipic-nâŋecte fârine šâŋe-ticne muac baafec enšepeneŋ hâcne.   
\s1 Muqâmoc dâŋ  
\p
\v 16 Jauŋ â bâmec baniŋte qâoma mi enšepieŋ, Anutu e irec hâcne maname taha bâzi fârine eocmu.  
\v 17 Micne bapafâc-ŋeŋic jaŋere dâŋ reŋkehuc sâsec-jopanšepieŋ” jaŋe maŋ qâqâtâc-ŋeŋic hone soŋaŋ eeŋgopieŋzi juku gie-jeŋicte fuŋne mutaniŋkeniŋmu. Irec gie-jeŋic bubiaŋko bapie sâckeocmu, busâqocko bahapie ŋoŋerao wiac sâcne mi biaŋkeocmu.   
\p
\v 18 Ŋoŋe nâŋere erâ numuhuc junšepieŋ. Nâŋe pectâc sasawa junaŋte šoɋac eeŋgopeneŋzi maŋnâŋecko bahac basaeŋgopeneŋ.  
\v 19 Nunumuzi baficnupie Wofuŋzi bârisiecnume ŋoŋerao biac fâpemurâ ŋaza sanaŋkekopac.   
\p
\v 20 Wama Anutu e lama soŋaŋ sâko Wofuŋ-nâŋec Jesu šâšâfic fofo sanaŋ irec socte hâmockonec bârisiewec,  
\v 21 Anutu eki hâcne wiac biaŋne fuŋne fuŋne tahac-ŋopahuc baafec-ŋopame dâŋticne reŋkenšepieŋ, erâ e jahac maname sâckeekac i Jesu Kristore erâ ŋoŋerao bâfuazejec. Erao mumuteŋzi mumuteŋ forašihuc juzejec sanaŋ. Jâmbomac.   
\p
\v 22 Âgofâc, no dâŋ šoricne boc mi qâreŋkepac, eme ŋoŋe uŋsawaŋ dâŋ i manapie mi sâqoreocte esoc-ŋopakopac.  
\v 23 Erâ ŋazape mananiŋ, âgo-nâŋec Timoteo e firuembiŋ, biac wareme jowape fanacmu.  
\v 24 Micnefâc-ŋeŋic â mitiŋic ŋokac sasawa manasu-ŋare-fârekopac. Italia mâreŋkonec jaŋe manasu-ŋareŋgopieŋ.  
\v 25 Aki anonoczi ŋoŋerao fofârezejec.