\id EPH Ephesians 0, Kate, PNG, wwh 12/92 
\h EFESO 
\toc1 Efeso 
\toc2 Efeso 
\toc3 Efeso 
\mt1 EFESO  
\ip Paulo e miti kiŋaŋ šâšâŋiŋ moc rawec, i ra juku risieocte wareku Efeso haeo fisiwec Erâ i jaŋehec juhuc miti gie mi bawec, mâc jowarurâ warewec. Eme šâhecko miti kiŋaŋ mocwâc rarâ Efeso haeo jara 2 â nâfocne iŋuc juhuc ŋic miti jazame mâretec haŋ bawec. Eme irec hâcne ŋic qâpuc tucne jaŋe, nemu sâko-nâŋec ere ufuŋ i qoroc heocmu, muhuc dâŋsâko jâmbâŋ bâfuarâ ŋic bâiŋ-jopapie šika bâfuazo embiŋ Efeso i Asia mâreŋ masune irec hae qizec sâko ŋewec. Eme ira miti fuahuc rârec rârec hae ŋerawec ira mâmâc fua rawec. Eme Paulo e šâhec kâpâcwâru ficko ŋehuc papia i wirec-jeŋic qâreŋkewec. Erâ Tikiko râcneme barâ rawec (Efeso 6:21-22)  
\ip Mitire fuŋne kecšiŋuc qâreŋke-jarewec Anutuzi juwicnao dameŋ tâmiricko biŋefâc-ticne enaŋte mana wosâec-nâpohuc miti fufuare dâŋ birickewec. Izi šâhec dameŋne maickeme Jesu râehuc hatane bâfuawec (gaŋ 1). Mârâc jaha juju kosa juhapie sâqocnezi âke fâuc-ŋopame gurune gurune jumbiŋ. Eme Wofuŋzi rocŋoparâ. sambâŋte jujuo râec-ŋopame maŋ mocjaha â guru mocjaha embiŋ (gaŋ 2(c) Anuture dâŋ soŋne i Wofuŋzi Paulo mufuacnewec. Dâŋ soŋnere fârine Jesuzi hâcne bâfuawec (gaŋ 3). Juju guru mocjaha embiŋ. Irec mitio gegec dodoc boc mi juzo, erâ qâpuc juju â sâqocne fuŋne fuŋne qikiŋnezo (gaŋ 4). Tatamacko juhuc dapâcte wiac râsi ecnezo, dameŋ mi spirickezo, mitire momori wiac bajuhuc râsi mi hohonene jopa jâpec ezo. Faŋdâŋ i â gâcne qâreŋke-jarerâ ŋic ŋokac, neŋgoc mamac â naru, motec, ŋicbomboŋ â kiŋaŋ qaqa mitidâŋ kâdoc qajarewec (gaŋ 5 â 6)  
\c 1  
\s1 Jambuŋdâŋ  
\p
\v 1 Paulo no Anuture micte Jesu Kristore aposolo epozi Efeso haeonec mitiŋic, Kristo Jesu manasiŋkeeŋgopieŋ hâcne, ŋoŋere papia ši râekopac  
\v 2 Mamac-nâŋec Anutu â Wofuŋ Jesu Kristo eraonec aki anonoc â wama ŋoŋerao fotâcnera fozejec.   
\s1 Anutu e mârâc jaha miti hata mušâwe-nârewec  
\p
\v 3 Wofuŋ-nâŋec Jesu Kristo ere Anutu â Mamac, eki sambâŋkonec miti jambuŋ-ticne fuŋne fuŋne Kristore erâ nâre tahac ewecte mumbiaŋkenšepeneŋ.  
\v 4 Eki mârâc jaha jâmbâŋ mâreŋte hobeteŋne mi fuahame mai-ticnao maŋfuru â bahacmâc junaŋte Kristore erâ mana wosâc enârewec.  
\v 5 E qanaŋ maname fowecte hâcne Jesu Kristore erâ maŋjauŋ enârehuc naru motecfâc-ticne erâ junaŋte buafec-ticnere mupaŋke-nârewec.  
\v 6 E joroc Ŋokâ-ticnere erâ aki anonoc biaŋ-ticne tahac-nâpowecte muteŋ bâteŋ ecnenšepeneŋ.   
\s1 Jesure soczi kitâc-nâpowec  
\p
\v 7 Jesu e socticnezi kitâc-nâpowecte sâqocne bâbâtâmire fua-nârewec, i aki anonoc-ticnere šâkâŋ fokac irec sâc hâcne.  
\v 8 Eme šâkâŋ-ticnao maŋɋârâŋ â mamana fâri bâmâckehuc qoŋgiŋke-nârewec.  
\v 9 Ehuc maŋbuc-ticnere dâŋ, qanaŋ maname biaŋkeme šiŋuc âkendâŋnewec i mujaŋgeŋke-nârewec:  
\v 10 “No guriŋne bahape dameŋ maŋkepo i qosackeme Kristozi wiac sasawa, sambâŋko mecne mâreŋko mecne, qâturehuc irec fuŋqizecne ezejec.”  
\v 11 Ere erâ, wiac sasawa maŋticnere mupaŋkerâ baekaczi mârâc jaha hone wosâec-nâporâ miti merâfâc rauckenaŋte munârewec.  
\v 12 Eme irec Kristore mamanac jumbeŋ jueŋgopeneŋzi Anutu šâŋe rara-ticnere mumuteŋfâc erâ junšepeneŋ.  
\v 13 Eme ŋoŋe iŋuc jaha dâŋ fâri qizecne, bâbâpiaŋ-ŋeŋicte Biŋebiaŋ hâcne, ro maŋ ehuc Kristo manasiŋkepie Tiri Mâro qanaŋ biŋe qanarekicne i ŋareme maqâreŋhec embiŋ.  
\v 14 Sambâŋko huhure biŋe-nâŋec fokac, irec šâšâficne Mâro nârekicne. Eme Anutu šâŋe rara-ticnere mumuteŋ sâko fuaocte biŋefâc-ticne nâŋâcnao Mârozi bâbâpiaŋ gie fuŋkewec i batarazokac.   
\s1 Miti jaŋerao qaja fuserâ foocte Paulozi nunumu gie bawec  
\p
\v 15 Eme ŋoŋe Wofuŋ Jesu manasiŋkeeŋgopieŋ â mitiŋic âgofâc-nâŋec maŋjauŋ ejareeŋgopieŋ, irec biŋedâŋ manapore  
\v 16 ŋoŋere dameŋ sâc manasuhuc Wofuŋ daŋge mumuteŋ ecneekopac.  
\v 17 Ehuc ŋoŋere šiŋuc numuekopac: Wofuŋ Jesu Kristo ere Anutu, eri tatamac Mamac hâcne, eki Mâro ŋareme izi maŋɋârâŋhec bacŋoparâ Wofuŋte fuŋne mufua-ŋareme mana taranšepieŋ.  
\v 18 Erâ maŋšâŋe-ŋeŋic bâtâcneme ine Wofuŋzi rocŋopahuc sambâŋ šeŋaŋ biŋe qaŋarewec, irec manapie fârine ezejec, â fuŋfuŋfâc-ticne ŋoŋe huhure šâŋe rara biaŋ kadahe ŋarewec, irec wâc manapie fârine ezejec,  
\v 19 â mamanasiŋhec nâŋâcnao tâpiri soka makakicne i teqâ saki-ticnezi gie baekac sâc bâfuawec, irec iŋuc jaha manapie fârine ezejec.  
\v 20 Tâpiri irec fuŋne Kristo hâmockonec bâɋârerâ sambâŋko mefâre-ticnao râehuc bataniŋkewec.  
\v 21 Ehuc kia gawamaî â ŋicwofuŋ â fekicne fuŋne fuŋne jaŋere femicne sâko râewecte mâreŋko â sambâŋko šâŋe biŋe fokac izi gâkowakac, dameŋ šiŋucziare sawa mâcne, iŋuc fohuc juocmu sanaŋ.  
\v 22 Erâ wiac sasawa maŋfuŋnao heteckehuc kike-ticnere rurumaŋko guruc-jopahuc qizec-jeŋic eocte âkendâŋnerâ kikefuŋ gurufâcne jaŋerao râewec.  
\v 23 Eme jaŋe me kikefâc-ticne ehapie ŋihe umbiŋ ejarehuc fofotâc juhuc wiac sasawa sâcke raekac.   
\c 2  
\s1 Mârâc jaha juju kosa jukicne  
\p
\v 1 Ŋoŋe mârâc jaha sindaŋ hârindaŋ ehuc hâmocne jujumbieŋ.  
\v 2 Ine mâreŋte juju hata maŋnao juhuc saware tâpiri irec ŋicbomboŋ erao qohota jumbieŋ. Ere mârozi hâcne dameŋ šiŋuczia wâc qaqatara ŋic jaŋerao gie baekac.  
\v 3 Nâŋâc mârâc jaha jaŋere sâc jaha jufârehuc maŋraŋɋa-nâŋecte aŋac bâjâpembeŋ. Ehuc sahac-nâŋecte â maŋ mamanasu-nâŋecte dâŋ reŋkehuc gâcne jaŋe iŋucne kimbeŋte biŋefâc embeŋ.   
\s1 Anutuzi bâɋârec-nâporâ sambâŋte jujuo râec-nâpowec  
\p
\v 4 Anutu eki buuruc-ticne bocjaha fokacte maŋjauŋ kâcɋene enârehuc  
\v 5 qaqatara-nâŋecte erâ hâmokicne nâŋâc Kristohec mâmâc bâɋârec-nâpowec. Manaŋgopieŋ, katucmâc-ticnere erâ bâpiaŋ-ŋopawec ŋoŋe.  
\v 6 E Kristo Jesuhec bâɋârec-nâporâ ehec mâmâc sambâŋte jujuo ŋec-nâpowec hâcne.  
\v 7 i nacnere mocko šiŋuc fuaocte ewec: Aki anonoc-ticnere rowaŋ sâko i Kristo Jesuo maŋuruc qanârehuc qaratie-nâreocmu.  
\v 8 Manaŋgopieŋ, e aki anonoc eŋarehuc mamanasiŋ-ŋeŋicte erâ bâpiaŋ-ŋopawec, i ŋaŋacnere mâcne, Anutu buafec-ticnere iŋuc eŋarewec.  
\v 9 Mo gie mo bambiŋte iŋuc eŋarezac, i aricne. Irec sahac mumuteŋ moc mi fuazejec.  
\v 10 Nâŋâc Anuture metofafâc, eki Kristo Jesuo bâfuac-nâpowec hâcne, erâ hata biaŋne Anutuzi hâcne mušâwe-nârewec i âtehuc junaŋte munârewec.   
\s1 Kâteoneczi haeo fisikicne  
\p
\v 11 Ŋoŋe mârâc jaha qâpuc jujumbieŋ, irec manasuhuc junšepieŋ. Eme dameŋ ira ma tâmiric juhapie Judaŋic jaŋe sahac-jeŋicko maheczi šâgu muŋare jumbieŋ.  
\v 12 Dameŋ ira Kristo tâmiric jumbiŋ, erâ Israe ŋic jaŋe hae fâri juhapie ŋoŋe mafa jumbiŋ, â jaŋe fuŋfuŋfâc-ticne bacjopame biŋedâŋ-ticne bajuhapie ŋoŋe šoŋifecfâc-ticne erâ metariŋ jumbiŋ, erâ maŋzi wiac fârine moc mi worickehuc Anutu tâmiric hâcne jumbiŋ.  
\v 13 Dameŋ šiŋuczia ine ŋoŋe kâteo jumbiŋzi Kristo Jesurao šuhuckehuc Kristo socticnere erâ haeo fisimbiŋ jueŋgopieŋ.   
\s1 Jesuzi rârâsi qame wahame maŋ mocjaha embeŋ  
\p
\v 14 E jahac wama-nâŋec juekac. E ŋic jâcne jajahec ŋondeŋ-jekicko rârâsizi aka sanaŋ fowec i qâropiehuc, mocjaha bacjofawec.  
\v 15 Ine sâcmutâc dâŋqâhâcko bâtâc â mumuac bocjaha mukicne i e jahacne sahac qaisockehuc bârâriewec. Ehuc ŋic jâcne jajahec jahere dodoma tacko ŋic ɋâricne mocjaha ine e jahac fuarâ domahuc wama bâfuawec.  
\v 16 E maripoŋlo hâmowecko ŋic jâcne jajahec fâri ombâŋ mocjahao qâturec-nâpohuc Anutuhec miriŋ bacnâpowec, ehuc rârâsi qame wahawec.  
\v 17 Erâ fisirâ kâteo jukicne ŋoŋe â haeo jukicne nâŋe mâmâc wamare biŋedâŋ nâzâme manambeŋ.  
\v 18 Erâ wâc hata bâšâwe-nârewecte nâŋâc Mâro mocjaha rauckerâ Mamactao fisieŋgopeneŋ.   
\s1 Ŋiczi Wofuŋte ufuŋ enaŋte mukicne  
\p
\v 19 Eme irec dameŋ šiŋuczia mafa â jaba mocwâc mi jueŋgopieŋ, ŋoŋe mitiŋic gâcne jaŋehec hae fâri â Anuture kikefuŋfâc embiŋ juŋgopieŋ.  
\v 20 Ŋoŋe aposolo â porofete jaŋe wâtuŋ ŋokacne ehuc decŋopapie doma raŋgopieŋ, â Jesu Kristozi wâtuŋ ŋicne ekac.  
\v 21 Erao ŋicne ŋicne šuhucke itic epene Wofuŋte furu ufuŋ fua feekac.  
\v 22 Mârozi ŋoŋe iŋuc jaha erao râe šuhuc eŋareme Anuture fic eŋgopieŋ hâcne.   
\c 3  
\s1 Wofuŋzi dâŋ soŋne fowarewec i Paulo mufuacnewec  
\p
\v 1 Eme Paulo no irec hâcne qâpuc ŋoŋere erâ Kristo Jesure kâpâcwâru ŋic epo jukopac.  
\v 2 Ŋoŋe nore manambiŋ, Anutuzi uruc jauŋ-ticnere erâ ŋoŋerao miti gie bapemurâ munarewec.  
\v 3 Munarehuc dâŋ soŋne mufua-narewec, dâŋ i hâcne biac bembeŋne qâreŋkepac,  
\v 4 ŋoŋe i wosehuc, no Kristore dâŋ soŋne maŋzi hone raruŋkekopac iŋuc sâcne mananiŋmu.  
\v 5 Dâŋ soŋne i mârâc jaha ŋic juwarembiŋ jaŋerao mi mufuakicne, tiri aposolo â porofete nâŋerao šâhec Mârozi mufuawec.  
\v 6 Dâŋ soŋne kecšiŋuc: Biŋebiaŋte fârine qâpuc ŋoŋe Judaŋic nâŋehec sâc mocjaha â guru mocjaha erâ Kristo Jesurao biŋedâŋ deŋkewec i mâmâc rauckerâ bajuniŋte mukicne.  
\v 7 Eme Biŋebiaŋ irec kiŋaŋ qaqa jupemurâ Anutuzi uruc jauŋ-ticnere erâ tâpiri sâko-ticnere fuŋne norao bataniŋkewec.  
\p Dâŋ soŋnere fârine Jesuzi bâfuawec   
\p
\v 8 Kristorao mâriri sâko fofone fokac irec dâŋ soŋne qâpuc mutaniŋke-jarepemurâ irec gie biaŋ mitiŋic wawahane jâmbâŋ no hâcne munarekicne.  
\v 9 Dâŋ soŋne muraruŋkepere mukicne, i Anutu bapafâre e maŋbuc-ticnere dameŋne dameŋne baju warehuc juwec.  
\v 10 Ʒi ine Anutuzi kikefuŋ gurufâc-ticne nâŋâcnao maŋɋârâŋ-ticnere fârine qaratiekume qâreŋne fuŋne fuŋne fuame sambâŋko ira fekicne â tâpirihec jaŋe wâc hone šâŋitac eeŋgopieŋ.  
\v 11 Anutu e mârâc jaha dameŋ tâmiricko maŋnezi dâŋ mupaŋkewec irec fârine hâcne Wofuŋ-nâŋec Kristo Jesu sorehuc bâfuawec.  
\v 12 Eme eki hâcne hata bâšâwe-nâreme e manasiŋkehuc hâhâwic tâmiric Anutu maickeeŋgopeneŋ.  
\v 13 Irec šiŋuc ŋazape mananiŋ: No ŋoŋere erâ fific guguriŋ faio jupe irec maŋŋeŋic mi wahazejec, aricne, ŋoŋe irec manapie eri qoqonaŋ-ŋeŋic ezejec.   
\s1 Paulozi Efeso ŋic jaŋere numuwec  
\p
\v 14 Irec hâcne sambâŋko â mâreŋko ŋic guru sâc jueŋgopeneŋ  
\v 15 nâŋâcne Mamac fârine e dieŋzi hecnehuc ŋoŋere erâ numucnehuc šiŋuc muekopac:  
\v 16 Anutu e hahaŋnehec sâkozi Mâro ecneme tâpiri bâfua-ŋareme maŋŋeŋiczi soka sanaŋ ezejec.  
\v 17 Eme Kristo manasiŋkepie maŋŋeŋicko ŋeŋe juju ezejec. Eme ere maŋjauŋko gâtâ barâ qiŋ herâ domanšepieŋ.  
\v 18 Ehuc mitiŋic gâcne sasawa jaŋehec mâmâc mitire fuŋne botâŋne, hâŋne otecne. i afeckerâ mana taranšepieŋ,  
\v 19 erâ wâc Kristore maŋjauŋ, ŋic mamana jâuru-fâreekac, i sifu mana-hâmonšepieŋ. Ehame Anuturao maŋ mâriri fufusuc fokac izi bâfusec-ŋopazejec.   
\s1 Mumuteŋ dâŋ  
\p
\v 20 Tâpiri-ticnere fuŋne nâŋâcnao bataniŋkeekac Anutu hâcne, e wiac bapa-ticnezi nunumu-nâŋec â mamanasu-nâŋec siricke-fâreekacte  
\v 21 kikefuŋko â Kristo Jesurao mumuteŋ-ticne mimiŋzi ɋâric šuhuckeme šuhuc fofehuc juzejec sanaŋ. Jâmbomac.   
\c 4  
\s1 Mârozi qâzuc-nâpome juju guru mocjaha embeŋ  
\p
\v 1 No Wofuŋte kâpâcwâru ŋiczi faŋ qaŋarehuc ŋazape: Wiac fekicnere hefârec-ŋopakicne irec sâcko junšepieŋ.  
\v 2 Ehuc maŋhuhuŋ â buuruc â bumâteŋ juhuc maŋjauŋko dedec ââsic enšepieŋ.  
\v 3 Erâ Mâro e wamare muczi qâzuc-ŋoparâ dâtâc-ŋopawec, i qâtâcnenšipiŋte ruc babac ehuc junšepieŋ.  
\v 4 Fâri ombâŋzi mocjaha â Mârozi mocjaha erâ wâc sambâŋ šeŋaŋ mocjahare biŋe qaŋarehuc hefârec-ŋopakicne.  
\v 5 Ine hâcne, Wofuŋzi mocjaha, mamanasiŋzi mocjaha, Miti Opâzi mocjaha.  
\v 6 Erâ Anutu e Mamac wirec-nâŋec mocjaha, eki mâmâc sasawa qâhuc-nâpokac erâ maŋnâŋec sâc tâpiri sicne-nâreekac â mâŋnâŋec sâc ŋeŋe juju eekac.   
\s1 Wofuŋzi miti giere ŋic fuŋne fuŋne râec-nâpowec  
\p
\v 7 Kristo e ŋicne ŋicne mitire kâdoc nârewec sâc bajueŋgopeneŋ.  
\v 8 Irec hâcne dâŋqâreŋ moc šiŋuc fokac:  
\q1 “E faic jâmbâŋ fehuc kâpâcwâru ŋic bacjopa rawec,  
\q1 e ŋic wiac tahac-jopawec.”   
\m
\v 9 “Faic fewec”, i mâc mi mukicne, mâreŋko juwic jâmbâŋ wahaweckonec risie fewec.  
\v 10 E wahaweczia risierâ sambâŋne sambâŋne fotâcnerâ fewec, i sambâŋ â mâreŋ fusucmarâ jufâreocte fewec hâcne.  
\v 11 Erâ ekizia wâc ŋic gâcne aposolo râec-nâpowec, gâcne porofete, gâcne miti kiŋaŋ ŋic, gâcne lama guru jaŋere soŋaŋ â qaqazu,  
\v 12 i mitiŋic ŋokac bašawiec-jopapene kikefuŋte kiŋaŋ qaqa gie bapie Kristore me kike fâri ombâŋ soka sanaŋ eocte ŋic iŋuc râec-nâpowec.   
\s1 Mitio gegec dodoc boc mi juzo  
\p
\v 13 Iŋuczi iŋuc gie bakupene mamanasiŋ-nâŋec â Anutu ŋokâ-ticnere fuŋne mamana-nâŋec i niniweme maŋ mocjaha enšepeneŋ. Ehuc mitio sosoka-nâŋecte sâc mukicne i Kristore rowaŋkonec tâpiri fârehuc fua sokac eku ŋic kâcɋene erâ bâfuanšepeneŋ.  
\v 14 Nâŋâc ɋiene hati mi ee sanaŋkerâ juhapene eeatuc ŋic jaŋe sioc enârepie gibioc dâŋ â mumusifuc-jeŋicte mâŋâŋzi ba bâsoriŋ â qac qârândiŋ moc mi enârezejec.  
\v 15 Aricne, nâŋâc dâŋfâri paŋšâic bajupene maŋjauŋ-nâŋeczi fua sawec ehame qizec-nâŋec Kristo erao šuhucke sanaŋkenšepeneŋ.  
\v 16 Erao šuhuckepene ruazi ŋeturec-nâporâ bândeŋ-nâpome ɋâɋâdoc erâ me sahac-ticne eeŋgopeneŋ. Ehuc tofafâc-ticne erâ tâpiri fonâreekac sâc gie bahuc maŋjauŋko soka sawec enaŋmu.   
\s1 Qâpuc juju mi juzo  
\p
\v 17 No Wofuŋte maio ŋaza-jâmbâŋkepe: Ŋoŋe qâpuc, maŋ mamanasu-jeŋic wiac jawanere foekac, jaŋere sâc mi junšepieŋ.  
\v 18 Jaŋe maŋjeŋic dapâc ekicnere mutuc â maŋsanaŋ erâ Anuture juju râpeckembiŋ.  
\v 19 Eme maŋjeŋic šickeme nânâ qowire nâ areŋ ehuc sasec mamakâc fuŋne fuŋne takicmâc ebac eeŋgopieŋ.  
\v 20 Ŋoŋe ine juju iŋucne juniŋte Kristore fuŋne mi qazu-ŋarekicne.  
\v 21 Ŋoŋe fuŋne-ticne qazu-ŋarekicko Jesurao dâŋfâri kecšiŋuc fokac i hâcne manambiŋ:  
\v 22 Qâpuc juju râpeckerâ maŋraŋɋa-ŋeŋic burec ehuc sasecko sipirickeekac, i heunuckenšepieŋ.  
\v 23 Erâ mâro manacnepie mamanasu-ŋeŋic heɋârehame  
\v 24 maŋɋâri hepie huzejec. I hâcne Anuture hawari iŋucne tiŋne â furu jâmbâŋ bâfuakicne.   
\s1 Sâqocne fuŋne fuŋne qikiŋnezo  
\p
\v 25 Irec ŋoŋe burec beherâ dâŋ jâmbomac sasawa nazaŋ gazaŋ enšepieŋ, nâŋâc qoqomâ efâreŋgopeneŋte.  
\v 26 Kimbeŋko mi sâqorenšepieŋ. Kimbeŋ aaric mi bajuhapie šoaŋ ŋeutuckezejec.  
\v 27 Erâ Sataŋ mi mana uruecnenšepieŋ.  
\v 28 Fiuc rorozi fiuc qikiŋnerâ meticnezi gie šoɋac bahuc nânâ mafa bâfuarâ waha qaqane boki bajarezejec.  
\v 29 Dâŋ simbiŋne micŋeŋickonec mi wahazejec, dâŋ biaŋne sawa, ine dodopec eere hatane fuame mupie ŋic âgo bacjopazejec.  
\v 30 Anuture Tiri Mâro mi qaisockenšepieŋ, e hâcne roroc-nâpo dameŋko maqâreŋ-ŋeŋic eocte tahac-ŋopakicne.  
\v 31 Râsidâŋ, kimbeŋ aaric, mu ojowa, susurec, erâ wiac gâgâpâcne gâcne i ŋondeŋ-ŋeŋicko mi fuazejec.  
\v 32 Ŋoŋe ââgo erâ eehâmoc ehuc kiŋ bebehec enšepieŋ, Anutu e iŋuc jaha Kristore erâ kiŋŋeŋic behewec.   
\c 5  
\s1 Sâqocne geŋkecnehuc juzo  
\p
\v 1 Ŋoŋe joroc naru motecfâcne juŋgopieŋzi Anutu sâckehuc junšepieŋ.  
\v 2 Erâ maŋjauŋhec junšepieŋ. Kristo e iŋuc jaha maŋjauŋ enârehuc nâŋâcnere erâ sahac-ticne qaisockerâ Anutu taha bâzi biaŋ ecnewec.  
\v 3 Boe sau, sasec mamakâc, buchâro, irec saŋuc wâc mitiŋic ŋoŋere ŋondeŋko mi fuazejec.  
\v 4 Dâŋ miminehec, mutucdâŋ, dâŋ simbiŋne, i epie sâqoreocmu. Daŋge mumuteŋ ine epie sâckeocmu.  
\v 5 Ŋoŋe šiŋuc mana sanaŋkenšepieŋ: Boe sau ŋic â sasec mamakâchec â buchâro, nemu qaŋgec ŋic hâcne, jaŋe Kristo â Anutu uucmaŋ-ticnao ŋeŋe basaniŋmu.   
\s1 Soŋsoŋko wiac miminehec mi ezo  
\p
\v 6 Eatuc-ŋopahuc siocdâŋ ŋazapie manapie fârine mi ezejec. Sâqocne iŋucnere hâcne Anuturaonec okacne qaqatara ŋic jaŋerao fuaocmu.  
\v 7 Irec ŋoŋe mi bafic-jopanšepieŋ.  
\v 8 Ŋoŋe mârâc jaha dapâchec jujumbieŋ, ši ine Wofuŋtao fisirâ tatamachec embiŋ juŋgopieŋ. Irec tatamacte ɋâricfâc erâ irec hawari junšepieŋ.  
\v 9 Tatamacte fârine fuaekac i maŋbiaŋhec juju â tiŋne ju ju â jâmbomac dâŋ mumu.  
\v 10 Wiac ezo murâ ine Wofuŋzi maname biaŋkeocmu me mâcne, i qanaŋ mana wosâerâ enšepieŋ.  
\v 11 Gâcnezi dapâcte wiac jawane epie mi qâsuec-jopanšepieŋ, aricne. Ŋoŋe irec tapa qararuŋkehuc qatara-jarenšepieŋ.  
\v 12 Wiac soŋsoŋko eeŋgopieŋ i mu bâuac epene miminehec jaha eocmu.  
\v 13 Wiac iŋucne tapane qararuŋkepene tatamaczi âeckeme fuaocmu. Eme tâtâc fuakac wiac izi wâc tatamac bâfuaocmu.  
\v 14 Irec hâcne šiŋuc mukicne:  
\q1 “Guŋ foekiczi faharec, â hâmockonec ɋârec,  
\q1 eme Kristozi batamaecguocmu.”   
\s1 Maŋmutuc erâ dameŋ mi sipirickezo  
\p
\v 15 Ŋoŋe juju bapa-ŋeŋicte ruc bahuc junšepieŋ. Erâ mutuc matacne mâcne, maŋ mamanasuhec junšepieŋ.  
\v 16 Dameŋ šira sâqocnezi haŋ bawec fokacte dameŋ gâcne mi behehuc gie šoɋachec banšepieŋ.  
\v 17 Maŋ tâmiric tinac mi junšepieŋ, Wofuŋzi gie muŋareekac i hone šâŋitac enšepieŋ.  
\v 18 Waiŋ opâ wiacte âmbâŋ mi enšepieŋ, izi maŋ sisipiric gie. Mârore ine âmbâŋ enšepieŋ.  
\v 19 Mârozi esoc-ŋopaocmu sâc gae mânec hehuc maŋ nareŋ gareŋ enšepieŋ. Á maŋŋeŋicko Wofuŋ gaezi â musizi mu šeri ecnenšepieŋ.  
\v 20 Erâ Wofuŋ-nâŋec Jesu Kristore erâ dameŋ sâc Anutu Mamac wiac fuŋne fuŋnere daŋge mumuteŋ ecnenšepieŋ.   
\s1 Ŋonâŋ jaŋere dâŋ  
\r (Koì 3: 18 ­ 4: 1)  
\p
\v 21 Ŋoŋe Kristo araŋ bacnehuc micrereŋ eec efârenšepieŋ.  
\v 22 Ŋonâŋ ŋoŋe Wofuŋte rereŋfâc juŋgopieŋ iŋuc jaha ŋowefâc-ŋeŋic jaŋere junšepieŋ.  
\v 23 Ŋowezi ŋonâŋte qizec ekac hâcne, iŋuc jaha Kristozi kikefuŋte qizec ekac, ehuc me sahac-ticnere bâbâpiaŋ wâc ekac.  
\v 24 Eme kikefuŋzi Kristore mic reŋkeekac, iŋuc jaha ŋonâŋ jaŋe ŋowefâc-jeŋic jaŋere mic dameŋ sâc reŋkenšepieŋ.   
\s1 Ŋowe jaŋere dâŋ  
\p
\v 25 Ŋowe ŋoŋe ŋonâŋfâc-ŋeŋic maŋjauŋ ejarenšepieŋ. Kristo e iŋuc jaha kikefuŋ-ticne maŋjauŋ ecnehuc ere due bawec.  
\v 26 Erâ kikiruhucne â sâfânehec â wâc wiac gâcnehec juzacte mitidâŋzi opâ umbiŋkeha šurehuc jambuŋkerâ  
\v 27 ericke bâpiaŋ ecnerâ e jahacne biŋe furu â bahacmâc juocte mucnewec.  
\v 28 Eme ŋowe jaŋe jaŋacne sahac jauŋ bacneeŋgopieŋ, sâc ijaha ŋonâŋfâc-jeŋic bajarenšepieŋ. Moc e ŋonâŋ-ticne maŋjauŋ ecnehuc e jahacne sahac mâmâc ecneocmu.  
\v 29 Ŋic moczi moc sahac-ticne râsi mi eecne, gume jauŋ ecnehuc jaha juekac, Kristozi kikefuŋ ecnehuc juekac iŋuc”  
\v 30 nâŋâc me sahac-ticnere tofafâc juŋgopeneŋ hâcne.  
\v 31 “Irec hâcne ŋic moczi neŋgoc mamac jahec-ticne behec-jofarâ ŋonâŋ-ticnerao qohotame jahe maŋ sahac mocjaha erâ junicmu.”  
\v 32 I dâŋ soŋne, qame hukicne. Ine Kristo â Kikefuŋ jahere muhuc mukopac.  
\v 33 Ŋoŋe ine ŋic sasawa sahac-ŋeŋic jauŋ baeŋgopieŋ sâc ijaha ŋonâŋfâc-ŋeŋic jauŋ bacjopanšepieŋ. Á ŋokac ine ŋowefâc-ŋeŋic araŋ bajarenšepieŋ.   
\c 6  
\s1 Neŋgoc mamac â naru motec jaŋere dâŋ  
\p
\v 1 Naru motec ŋoŋe Wofuŋte erâ neŋgoc mamacfâc-ŋeŋic jaŋere dâŋ reŋkenšepieŋ. Izi hata biaŋne.  
\v 2 “Go neŋgoc mamac jahecge sâsec-jofazemec”, i sâcmutâc dâŋ fekicne, erâ biŋedâŋ-ticne šiŋuc šuhuckerâ mukicne:  
\v 3 “Iŋuc erâ mâreŋko dameŋ šora juhâc qâhâmocmu.”  
\v 4 Mamac ŋoŋe naru motecfâc-ŋeŋic aaric bâfuanšipiŋte wiac kosa mi ejarenšepieŋ. Ŋoŋe mitio jaza bâtiŋ â uŋ sawaŋ ejarehuc soŋaŋ-jopahapie sokanšepieŋ.   
\s1 Ŋicbomboŋ â kiŋaŋ qaqa jaŋere dâŋ  
\p
\v 5 Kiŋaŋ qaqa ŋoŋe mâreŋ ŋicbomboŋfâc-ŋeŋic araŋ bajarehuc, maŋŋeŋiczi qâzuc foha, Kristo ecneŋgopieŋ tinac, mana mezac ehuc micjeŋic reŋkenšepieŋ.  
\v 6 Ŋoŋe ŋicbomboŋfâc-ŋeŋic maizi qambaraŋ ejarepie honec-ŋopapie biaŋkeocte mâcne, nâŋe Kristore kiŋaŋ qaqa, iŋuc muhuc Anutuzi hata muwec i maŋafec jaha âtenšepieŋ.  
\v 7 Ŋic jaŋere manasuhuc aricne, Wofuŋte manasuhuc gie-ŋeŋic tatakic tâmiric banšepieŋ.  
\v 8 Ŋoŋe manaeŋgopieŋ, moc e kiŋaŋ qaqa me ŋicbomboŋ juhuc wiac biaŋne ehuc juocmu, e Wofuŋzi okacne sâc ijaha bazucneocmu.   
\p
\v 9 Erâ ŋicbomboŋ ŋoŋe kiŋaŋ qaqafâc-ŋeŋic iŋuc jaha ehâmo-jarenšepieŋ, ehuc mu imac mi ejarenšepieŋ. Erâ šiŋuc mananšepieŋ: Kiŋaŋ qaqa â ŋicbomboŋ ine sambâŋko Wofuŋ wirec-ŋeŋic jukac, e ra rowec ware rowec mi focnekac.   
\s1 Râsi mi hohonene jueŋgopieŋ  
\p
\v 10 Mutarahuc mupe: Wofuŋtao roweckepie tâpiri sâko-ticnezi ŋoŋerao fotâcneme qaboc-ŋeŋichec junšepieŋ.  
\v 11 Erâ Anuturaonec sându maro šika wiac ro barâ juhapie Sataŋzi rucko râsi fisi-ŋareme hâbi-ŋeŋic rorâ jâpenšepieŋ.  
\v 12 Ŋoŋe manaŋgopieŋ, nâŋâc râsi sahac biuchec jaŋehec šika qaqa mi eeŋgopeneŋ, aricne, ŋicbomboŋ sâko â momori sanaŋ, dameŋ ši dapâc fokac irec guriŋ bapa, demoŋ sâqocne sambâŋ rurumaŋko jueŋgopieŋ, jaŋe râsi enâreeŋgopieŋ.  
\v 13 Irec Anuturaonec sându maro šika wiac ro bajuhuc šika dameŋko qiŋ herâ domahapie râsi jaŋe bâipiec-ŋoparâ wisenšepieŋ.   
\s1 Momorire wiac bajuzo  
\p
\v 14 Ŋoŋe kecšiŋuc domanšepieŋ: Dâŋ fâri qizecnezi umbika-ŋeŋic eme jomanšepieŋ, kiŋfâsâczi maruku-ŋeŋic eme rufanšepieŋ,  
\v 15 wamare Biŋebiaŋ bašawiehuc badomanšepieŋ, izi kikehuhu hepie hume âte sanaŋkeŋgopieŋ ezejec.  
\v 16 Erâ neŋgocne sâko ine mamanasiŋzi maro-ŋeŋic eme dameŋ sâc he bâfeŋnerâ domahapie sâqocne runere šoc tepe moteczi kisowarierâ hâpozejec.  
\v 17 Erâ wâc aeŋdu šâŋene bâbâpiaŋ hepie huzejec, â Mâroraonec šika, Anuture dâŋ hâcne, i bajunšepieŋ.  
\v 18 Ŋoŋe šâfo sâc Mârore tâpirio Wofuŋ šušuhuc jaha numucnehuc wâsickenšepieŋ, erâ qâoma mi ehuc rucjaric-ŋeŋic banšepieŋ, erâ hae sâc mitiŋic guru jaŋere nunumu gie banšepieŋ wâc.  
\v 19 Erâ nore mâmâc numuhuc jupie Wofuŋzi micnane baafeckeme Biŋebiaŋ soŋsoŋ fowec i asa feferaŋko mutaniŋkezepac.  
\v 20 No irec biŋe mumu kâpâcwâruo foekopaczi hâhâwic tâmiric mutaniŋkepe sâckezejec.   
\s1 Mumutara dâŋ  
\r (Koì 4: 7-8)  
\p
\v 21 Juju-nanere fuŋne â gie baekopac i kâuc banšipiŋte Tikikozi fârâ dâŋ binaŋ eŋare-fâreocmu, e âgo biaŋ-nâŋec â Wofuŋte kiŋaŋ qaqa micrereŋhec.  
\v 22 Eki nâŋere dâŋ binaŋ eŋarehuc bubiaŋ qaŋareocte sorepe fakac hâcne.  
\v 23 Anutu Mamac â Wofuŋ Jesu Kristo eki âgofâc-nane ŋoŋe wama bâfua-ŋarehuc mamanasiŋ-ŋeŋic basanaŋkeme maŋjauŋhec junšepieŋ.  
\v 24 Wofuŋ-nâŋec Jesu Kristo erao qohota sanaŋkeeŋgopieŋ ŋoŋerao aki anonoczi fozejec.