\id COL Colossians 0, Kate, PNG, wwh 12/92 
\h KOLOSAI 
\toc1 Kolosai 
\toc2 Kolosai 
\toc3 Kolosai 
\mt1 KOLOSAI  
\ip Kolosai i hae šâŋe jaha, hae i Efeso hae ramicnao ŋewec. Mâreŋ ira Laodikea hae ŋewec wâc. Paulo e jahacne Kolosai haeo mi ra fisiwec (gaŋ 2:1). Motec-ticne Epafara eki hae ira miti gie bame Jesure kikefuŋ fuambiŋ (gaŋ 1:7 â gaŋ 4:12). Filemoŋ e hae ijaha juwec wâc. Paulo e Roma haeo kâpâcwâru ficko ŋehame Epafara e ere busâqoc manarâ ra iqickewec. Iqickerâ hae-ticnaonec miti ŋic ŋokac jaŋere dâŋ binaŋ ecnewec. Jaŋerao mâreŋ mockonec mitiŋic burecne fisirâ maŋ bâsifuc ejarembiŋ. Ehuc šiŋuc mumbiŋ: Ŋoŋe miti maine sawa bajueŋgopieŋ, râpene ine fokac. Nâŋe aŋelozi dâŋ soŋne mufua-nârembiŋ, i qazu-ŋarepene reŋkenšepieŋ. Ehuc aŋelo araŋ bajarenšepieŋ â sowa bâtâc hombaŋ sabata ŋenšepieŋ. Jesu sawa manasiŋkepie mi sâckeocmu. Iŋuc hâcne jazapie Kolosai haeonec miti mamana jaŋe dâŋ irec maŋjahec erâ Epafara ecnepie Paulorao rarâ dâŋ binaŋ ecnewec.  
\ip Eme Paulo e dâŋ i manarâ Kolosai ŋic jaŋere papia qâreŋkewec. Ehuc mitire fuŋne kecšiŋuc mutaniŋkewec: Jesu e wiac sasawa irec Wofuŋ. Aŋelo fekicne wahakicne jaŋe ere jujuo fuambiŋ juŋgopieŋ wâc. Á dâŋ soŋne Anuturao fowarehuc fowec, irec fârine Jesuzi bâfuawec. Eme ši dâŋ soŋne moc mi fokac. Erâ Jesu e hâmohuc âgo bacnâpome erea embeŋ. Eme irec fainao wiac šuhuckerâ enaŋte mi munârekicne (gaŋ 1). Gaŋ 2 ira mu qaqazuc dâŋ gâcne gâcne forakac. Mitiŋic burecne jaŋere Paulozi šiŋuc qâreŋkewec: Jaŋe maŋko fuac dâŋ â qâpucdâŋ ŋazapie manarâ Kristo bâsueniŋmu. Jaŋe wiac jawane ŋarehuc boreŋ fâri-ŋeŋic ŋowac rozo muŋgopieŋ. Iŋuc muhuc kime dopec ejarewec. Dâŋ i erâ Efeso ŋic qâreŋke-jarewec irec dâŋ tucne mâmâc qâreŋkehuc âkesiŋ-jopawec (gaŋ 3 erâ 4:1-5). Eme šâhec e jahacne dâŋ binaŋ ehuc papia qâreŋke tarawec (gaŋ 4:6-18). Eme Tikiko râcneme barawec.  
\c 1  
\s1 Jambuŋ â daŋge mumuteŋ dâŋ  
\p
\v 1 Paulo no Anuture micte Jesu Kristore aposolo epo, erâ âgo-nâŋec Timoteo,  
\v 2 nâhe Kolosai haeonec mitiŋic â âgofâc-nâhec Kristorao qohotaŋgopieŋ ŋoŋe papia ši râe-ŋarekoperec. Anutu Mamac-nâŋec eraonec aki anonoc â wama ŋoŋerao fotâcnerâ fozejec.   
\p
\v 3 Nâŋe Wofuŋ-nâŋec Jesu Kristo ere Mamac Anutu hâcne ŋoŋere erâ dameŋ sâc daŋge nunumu ecneeŋgopeneŋ.  
\v 4 Ŋoŋe Kristo Jesu manasiŋkeeŋgopieŋ â mitiŋic hae gâcnaonec maŋjauŋ ejareeŋgopieŋ irec mecne,  
\v 5 â sambâŋ miti šeŋaŋ ŋoŋere biŋe râekicne irec mâmâc Anutu muteŋkeeŋgopeneŋ. Ŋoŋe miti šeŋaŋte kâuc mi baeŋgopieŋ. Dâŋ fâri qizecne Biŋebiaŋ hâcne ŋoŋerao fuawec irec biŋe mârâc manambiŋ.  
\v 6 Biŋebiaŋ i mâreŋ sâc fua bâbâriŋ rahuc fârinehec eekac. Eme Anutu akidâŋ-ticne ŋoŋerao fâme jâmbomacko mana maŋ embiŋ, dameŋ ira ŋoŋerao iŋuc jaha fârinehec ewec.  
\v 7 Joroc âgo babafic-nâŋec Epafara, Kristore kiŋaŋ qaqa micrereŋhec, eki qazu-ŋareme manambiŋ hâcne.  
\v 8 Erâ ekizia wâc, Mârozi ŋoŋerao maŋjauŋ bâfuawec, irec dâŋ binaŋ enârewec.   
\s1 Miti mana ɋârâŋke rahuc irec fârine bâfuazo  
\p
\v 9 Eme nâŋe dâŋ binaŋ-ŋeŋic manarâ izia fuŋkerâ Anutuzi maŋ mamana-ŋeŋic bâsokame micdâŋ-ticnere â Mârore maŋɋârâŋ dâŋ mana taraniŋte numucne warehuc jueŋgopeneŋ.  
\v 10 Wofuŋzi iŋuc hâcne eŋareme ju ju-ŋeŋiczi fuŋne-ticne mutaniŋkeme honec-ŋopame biaŋkezejec. Á mitio gie fuŋne fuŋne fokac, i bahuc irec fârine bâfuanšepieŋ, ehuc Anuture fuŋne mana ɋârâŋke rahuc junšepieŋ.  
\v 11 Erâ Anuture tâpiri mu wawarec-ticnehec izi âkesiŋ-ŋopame hâbi sâko hepie hume juhapie fai-ŋeŋicko wiac ŋemâcne feme sâc docke pârâc tâmiric bumâteŋ jaha de domahuc bubiaŋ mananšepieŋ.  
\v 12 Erâ Mamac-nâŋec e faic tatamacko merâfâc-ticne râe-nârewec, i mitiŋic nâŋâc ru sâc enaŋte bâmoc-nâpoekacte buafec jaha daŋge âzâcnenšepeneŋ.   
\s1 Wiac sasawa ŋokâre jujuo fuawec  
\p
\v 13 Anutu e dâpac runere tâpirionec batarac-nâporâ joroc Ŋokâ-ticnere uucmaŋko râec-nâpowec.  
\v 14 Ŋokâ-ticne eki hâcne sâqocne-nâŋec tâmireote kiwiric-nâŋec rowec.  
\v 15 Anutu soŋne ere hawari tâtâc fufua Ŋokâ-ticne hâcne. E wiac sasawa mi fuahame micne barâ juweczi juwec.  
\v 16 Ere jujuo wiac sasawa sambâŋko â mâreŋko fua-fârewec, wiac hohonene â mi hohonene, ŋic me aŋelo ɋuŋɋasaŋhec me tâpirihec, fekicne sâko me araŋ bapa-jarene, i mâmâc sasawa ere tâpirio â ere biŋe fuakicne.  
\v 17 E wiac sasawa irec juwicnao juwec erâ wiac sasawa irec micne sâko, erâ wiac sasawa ere dope sisiŋko fowarehuc juekac.   
\s1 Kristo e fekicne sâko-nâŋec  
\p
\v 18 Erâ e me sahac-ticne, kikefuŋ-ticne hâcne, nâŋâcne qizec juekac. Erâ fufuŋke ŋic, hâmockonec micne barâ faharewec, ehuc wiac sasawa irec jâcne ewec.  
\v 19 Anutu e juju â tâpiri-ticnere rowaŋ Ŋokârao guru fufusuc foocte maname sâckewec.  
\v 20 Erâ wiac sasawa sambâŋko â mâreŋko Anutu jahacnehec miriŋ bacnâpoocte mucneme eki hâcne maripoŋko socticnezi wama bâfuahuc iŋuc ewec.   
\s1 Jesu e hâmoc-ticnezi miriŋ bacnâpowec  
\p
\v 21 Ŋoŋe mârâc jaha Anutu râpeckerâ nâme nikecne erâ sâqocne fuŋne fuŋne bahuc maŋšârâhec jujumbieŋ.  
\v 22 Eme Kristo sahac biuchec fuarâ hâmoc-ticnezi miriŋ bacŋoparâ Anuture maio furu â maŋɋaɋac â bahac fâsâc juniŋte râec-ŋopawec.  
\v 23 Eme irec ŋoŋe mamanasiŋko qiŋ herâ domahuc, Biŋebiaŋzi woworic bâfua-ŋarewec i sifucke-ŋarezacte biric borocne mi enšepieŋ. Biŋebiaŋ i ŋoŋe qazu-ŋarekicne, erâ ŋoŋe sawa mâcne, ŋicne ŋicne mâreŋ sâc jaza rakicne. Paulo no hâcne irec kiŋaŋŋic juekopac.   
\s1 Anuture dâŋ soŋne fowarehuc juku Jesurao fârinehec ewec  
\p
\v 24 No ŋoŋere erâ šâic serereŋ faio juekopac irec ši manape biaŋkeekac. Kristozi me sahac-ticne, kikefuŋ-ticne hâcne, ere erâ šâic serereŋ manawec, šâic irec tofanao šuhuckehuc mamanane fokacte nore sahacko fehuc micne qazejec.  
\v 25 No Anutu dâŋbiri-ticnere sâcko kikefuŋte kiŋaŋ qaqa erâ ŋoŋerao micdâŋ-ticnere qaqazu gie batarapemurâ munarekicne.  
\v 26 Dâŋ i dameŋne dameŋne soŋne fome mimiŋzi ɋâric mi mamana mâc juwefuhuc jumbiŋ, eme dameŋ šiŋuczia ine mitiŋicfâc-ticne mufua-nârekicne.  
\v 27 Erâ qâpuc jaŋerao dâŋ soŋnere mâriri biaŋ sâko fuakac i mitiŋicfâc-ticne mutaniŋke-nârekac. Kristo maŋŋeŋicko juekac e hâcne dâŋ soŋnere fârine â sambâŋ šeŋaŋ irec hozine.  
\v 28 Ere fuŋne mutaniŋkehuc ŋicne ŋicne uŋ sawaŋ ejarerâ maŋɋârâŋ dâŋ sasawa jaza qazuc eeŋgopeneŋ, i Kristoo ŋic fârine epie erao guruc-jopanaŋte iŋuc eeŋgopeneŋ.  
\v 29 Ere tâpirizi eferenšoŋnume gie i hâcne fotariehuc baekopac.   
\c 2  
\s1 Kristo mana maŋ ehuc mana tarazo  
\p
\v 1 No ŋazape mananiŋ, ŋoŋe mecne â Laodikea haeonec â ŋic gâcne šâŋe mai-nane mi honembiŋ, ŋoŋere šâic afecne mi manaekopac.  
\v 2 Ŋoŋe maŋŋeŋiczi âte tâcnerâ roroc efâreme Anutu dâŋsoŋ-ticnere fuŋne, Kristo hâcne, mana maŋ ehuc mana utuckerâ mana taranšepieŋ.  
\v 3 Erao hâcne maŋɋârâŋ â mamana tara irec šâkâŋne soŋkekicne fokac.   
\s1 Ŋicdâŋ racne mi manazo  
\p
\v 4 Moczi moc mu hemiriŋ eŋarehuc maŋ bâsifuc eŋarenšipiŋte dâŋ mukopac.  
\v 5 No sahac-nanezi wiwicko juekopac, maŋnanezi ine ŋoŋehec juhuc ŋoŋe Kristo manasiŋkehuc šišimic erâ sosoŋaŋko domapie honec-ŋoparâ bunane biaŋkekac.  
\v 6 Ŋoŋe Kristo Jesu Wofuŋ eŋareocte rombiŋ erao qohotahuc junšepieŋ,  
\v 7 ehuc eraoa gâtâ barâ fua-hâmonšepieŋ, â mamanasiŋte hata ŋaza ŋowatuc ekicne ijaha âte sanaŋkerâ daŋge mumuteŋ ecnehuc jupie ferâ fe ehuc fozejec.  
\v 8 Moczi moc ŋickonec mamana dâŋ, eeatuc dâŋ racne hâcne, qazu-ŋarehuc maŋŋeŋic bawisenšipiŋte rucŋeŋic banšepieŋ. Dâŋ iŋucne i mimiŋne jaŋere maŋko fuac dâŋ â mâreŋte wiac tâpirihec ira roweckehuc mueŋgopieŋ, Kristorao siŋkehuc mâcne.   
\s1 Anutu e Kristorao šuhuc-nâpowec  
\p
\v 9 Manaŋgopieŋ, Anuture sâc i Kristo maŋ sahac-ticnao qaja fuserâ qâniniwerâ fokac.  
\v 10 Irec ŋoŋe erao wiac moc mi basaniŋmu, eki hâcne micne â fekicne sasawa jaŋere qizecne.  
\v 11 Eraonec maŋeŋic wâc rombiŋ, mezi sahacko ma bapa i mâcne, juju-ŋeŋic raŋɋane heunuckehuc Kristore maqâreŋhec embiŋ hâcne.  
\v 12 Ihec eniŋte Miti Opâ rua-ŋarehuc ere hâmocko šuhuc-ŋopakicne, erâ Anutu e tâpiri-ticnezi Kristo hâmockonec bâɋârewec, tâpiri ijaha manasiŋkepie ŋoŋerao fotâcneme fafahare-ticnao wâc šuhuc-ŋopakicne.  
\v 13 Ŋoŋe mârâc jaha ma tâmiric juhuc sâqocne kosa barâ hâmocne juhapie Anutu e kiŋŋeŋic behehuc Kristohec bâɋârec-ŋopawec.  
\v 14 Erâ dâŋ qaqatara-nâŋec qâreŋkekicne i âke sifuckehuc irec kiŋ papia i bâsuckerâ maripoŋko ɋetickeme arictâc ewec.  
\v 15 Iŋuc ehuc fekicne â tâpirihec hâbi-jeŋic bâŋgoroŋkerâ saoreŋ qahuc fuŋne-jeŋic bataniŋkewec.   
\s1 Boreŋ fâri-nâŋec wiac jawanere mi qikiŋnezo  
\p
\v 16 Ŋic moczi nânâ qowi soware me sabata hombaŋ me mosa hombaŋ i me i ŋeŋere me mi ŋeŋere mu supaic mi eŋarezejec.  
\v 17 Wiac iŋucnere nâkumucne muzo, fârine šâhec fuaocte irec nâkumucnezi qanaŋ bâniewec. Á fârine ine Kristorao fuawec fokac.  
\v 18 Ŋic gâcnezi maŋhuhuŋ hawari erâ juhuc aŋelo araŋ bajareeŋgopieŋ, â maŋnâŋec ŋerisieme wiac honeeŋgopeneŋ muhuc irec manapie fârine eme sahac-jeŋic maŋgâŋ mušoraeŋgopieŋ, ŋic iŋucne jaŋe boreŋ fâri-ŋeŋic mi ŋowac ronšepieŋ.  
\v 19 Jaŋe hâcne Kristorao sâcne mi siŋkeeŋgopieŋ. Eki qizec-nâŋec â nâŋâc me sahac-ticne. Eme qizeckonec ruazi fâuckerâ wahahuc me kike fâri ombâŋ-ticne basanaŋ-nâpohuc bândeŋ-nâpoekac. Ehuc gume hesiwiŋ enâreme soka sanaŋte tâpiri Anuturaonec fua-nâreekac.   
\s1 Kibâtâc dâŋ ŋicmaŋko fuakicne mi manazo  
\p
\v 20 Ŋoŋe Kristore hâmocko šuhuckehuc mâreŋte wiac tâpirihec râpeckembiŋko wemocte mâreŋte hae fâri juhuc tinac sâcmutâc dâŋticne reŋkeeŋgo-pieŋ?  
\v 21 Dâŋ kecšiŋuc: “Keci mi bâuac, keci mi nâc, keci mi roc.”  
\v 22 Wiac nâ bac erâ bebehene hâcne, irec kibâtâc dâŋ i ŋiczi maŋjeŋicte manasurâ mu qaqazuc eeŋgopieŋ.  
\v 23 Ŋic iŋucnezi maŋɋârâŋ hawari erâ “bâtâcko â sowa juhuc sahac bâpitiwazo” iŋuc mupie dâŋ izi fârine tinac eekac. Erâ wiac iŋucnezi fârine aricne, izi sasec aka sâcne mi hecneocmu.   
\c 3  
\s1 Wiac faic fokac irec henširiŋnezo  
\p
\v 1 Ŋoŋe Kristo fafahare-ticnao šuhuckembiŋko ine faic Anuture maŋfuŋko Kristo jukacko wiac fokac, irec henširiŋnehuc junšepieŋ.  
\v 2 Mâreŋko wiac fokac irec mâcne, faic wiac fokac irec maŋ mamanasu-ŋeŋic râepie fozejec.  
\v 3 Ŋoŋe hâmombiŋ hâcne, eme juju-ŋeŋic Kristohec Anuturao soŋkekicne fokac.  
\v 4 Juku Kristo e juju runâŋeczi fua taniŋkeme ŋoŋe iŋuc jaha ehec mâmâc tatamac huririnao fua taniŋkeniŋmu.   
\s1 Maŋraŋɋa heunucke behec ezo  
\p
\v 5 Wiac kecšiŋucte ine sowa juhuc sahac-ŋeŋic bâhâmonšepieŋ: Boe sau, maŋwânâŋ, bu gâgâpâcne, sasec sâqocne, buchâro, i eocmu e sahac-ticnezi wofuŋ ecnekac muzo.  
\v 6 Wiac i sasaware Anuturaonec okacne fisiocmu.  
\v 7 Ŋoŋe mârâcko iŋuc jaha wiac i bajupie maŋ fâri-ŋeŋic ejujec.  
\v 8 Ʒi ine wiac iŋucne sasawa hetaranšepieŋ. Ehuc aaric, kimbeŋ, râŋgeŋ bârâŋgeŋ, dâŋ gâgâpâcne â simbiŋne i qikiŋnenšepieŋ.  
\v 9 Burec eec i wâc mi enšepieŋ. Maŋraŋɋa-ŋeŋic mâsi qâqâreŋ-ticnehec heunucke behec erâ  
\v 10 maŋɋâri-ŋeŋic hepie hume rojuŋgopieŋ. Maŋ i hâcne bâbâfuazi bâpiaŋkeme mamanahec erâ e jahacne hawari iŋucne fuahuc jukac.  
\v 11 Irec bârâwiŋ juju i tarawec, Grikŋic â Judaŋic, mahec â ma tâmiric, hâwecŋic â kâte sanaŋ, kiŋaŋ qaqa â ŋicbomboŋ, mâmâc sasawa Kristozi qâhâc-nâporâ micne junâre-fâreekac.   
\s1 Mitio jujure dâŋ  
\p
\v 12 Eme Anuture biŋefâc, e jahac maŋjauŋ eŋarehuc rowosâec-ŋopawec, ŋoŋe buuruc â buafec â maŋhuhuŋ â miriŋ â bumâteŋ izi ŋaqi-ŋeŋic eme hepie hume rojunšepieŋ.  
\v 13 Ŋoŋe aakic enšepieŋ, â ŋondeŋ-ŋeŋicko dâŋ fuame kiŋ bebehec enšepieŋ. Wofuŋzi kiŋ behe-ŋarewec iŋuc jaha eec enšepieŋ.  
\v 14 Eme wiac sasawa irec fainao maŋjauŋ bajupie izi wiac bâture-fârehuc ematauckezejec.  
\v 15 Erâ Kristore wamazi maŋŋeŋicko guriŋne bazejec. Ŋoŋe wamahec erâ me sahac mocjahao juniŋte rocŋopakicne hâcne. Erâ wâc daŋge mumuteŋ ehuc junšepieŋ.  
\v 16 Kristore dâŋzi ŋondeŋ-ŋeŋicko sawe mâririackezejec. Eme maŋɋârâŋ dâŋ fuŋne fuŋne qaqazuc ehuc faŋ qaqac enšepieŋ. Erâ miti gae mânec i Mârozi baafec-ŋopaha maŋŋeŋiczi Anutu muteŋkehuc hecnenšepieŋ.  
\v 17 Eme maŋzi me mezi wiac ezo murâ i Wofuŋ Jesu manasiŋkehuc enšepieŋ, ehuc ere erâ Anutu Mamac daŋge âzâcnenšepieŋ.   
\s1 Ŋowe ŋonâŋ, neŋgoc mamac, kiŋaŋ qaqa, ŋicbomboŋ  
\r (Efe 5: 22 ­ 6: 9)  
\p
\v 18 Ŋokac ŋoŋe ŋowefâc-ŋeŋic jaŋere rereŋfâc junšepieŋ, Wofuŋte biŋe ekicnezi iŋuc epie sâckeocmu.  
\v 19 Ŋic ŋoŋe ŋonâŋfâc-ŋeŋic maŋjauŋ ejarenšepieŋ, šâšâicne ine mi ejarenšepieŋ.  
\v 20 Naru motec ŋoŋe neŋgoc mamacfâc-ŋeŋic dâŋ mupie sâc reŋkenšepieŋ, iŋuc epie Wofuŋzi maname biaŋkeocmu.  
\v 21 Mamac ŋoŋe naru motecfâc-ŋeŋic hâwic sahac enšipiŋte aaricko wiac mi ejarenšepieŋ.  
\v 22 Kiŋaŋ qaqa ŋoŋe mâreŋ ŋicbomboŋfâc-ŋeŋic jaŋere mic reŋke-fârenšepieŋ, maizi qambaraŋ ejarepie ŋiczi sawa honec-ŋopapie sâckeocte mâcne, maŋsiocmâc Wofuŋ araŋ bacnehuc epie sâckeomu.  
\v 23 Gie-ŋeŋic sasawa i ŋic jaŋere erâ mâcne, Wofuŋte erâ aafec faio banšepieŋ.  
\v 24 Kecšiŋuc manahuc: Gie furi sambâŋko merâfâc fokac i Wofuŋtaonec roniŋmu. Irec Wofuŋ Kristo ere kiŋaŋ qaqafâc juŋgopieŋ hâcne.  
\v 25 Moc e gie-ticne bâsâqoreocmu, e irec okacne jaha roocmu. Wofuŋtao ra rowec ware rowec mi fokac.   
\c 4  
\p
\v 1 Ŋicbomboŋ ŋoŋe kiŋaŋ qaqafâc-ŋeŋic wiac sâkoa etiŋnehuc ejarenšepieŋ, ehuc ŋaŋacne femicne Wofuŋ sambâŋko jukac i manasunšepieŋ.   
\s1 Nunumure dâŋ  
\p
\v 2 Paŋšâic jaha numuhuc junšepieŋ. Erâ rucgereŋ juhuc daŋge nunumu enšepieŋ.  
\v 3 Erâ nâŋere wâc numupie Anutuzi mitire hata bâšâwe-nâreme Kristore dâŋ soŋne mufuanšepeneŋ. Dâŋ irec hâcne niŋgiŋko fokopac.  
\v 4 Nunumuzi dopecnupie dâŋ afeckehuc mujaŋgeŋkepe sâckezejec.  
\v 5 Qâpuc jaŋehec bâbâfuac erâ wiac mana tara-hâmohuc enšepieŋ. Ehuc gie bapa dameŋ mi sipirickenšepieŋ.  
\v 6 Dâŋŋeŋic hâwec ruacnepie aŋacne ezejec. Eme ŋic dâŋ iŋuc me iŋuc bâtikie-jareniŋte mi bititienšepieŋ.   
\s1 Tikiko â Onesimo  
\r (Efe 6: 21-22)  
\p
\v 7 No nahacne dâŋ binaŋ i Tikikozi eŋareocmu. E joroc âgo babafic-nâŋec â Wofuŋte kiŋaŋ qaqa micrereŋhec.  
\v 8 E hâcne juju-nâŋecte dâŋ binaŋ eŋarehuc mu âkeriŋ eŋareocte ŋoŋerao sorepe fakac.  
\v 9 Erâ Onesimo, miti mamana âgo biaŋ-nâŋec, ŋoŋere haeonec, e mâmâc ecnepe fârâ širec dâŋ binaŋ eŋare-fâreocmu.   
\s1 Mumutara dâŋ  
\p
\v 10 Kâpâcwâru ŋic âgo-nane Aristako â Banaba nafe-ticne Mareko â Jesu, šâŋe-ticne moc Justo, jaŋe manasu-ŋareŋgopieŋ. Mareko ere sâcmutâc eŋarepo, fâ fisiocmuo âgo ecnenšepieŋ.  
\v 11 Ŋic i jaŋe sawa Judaŋic jaŋeraonec fuakicnezi Anutu uucmaŋ-ticnere giere baficnueŋgopieŋ, ehuc bubiaŋ qanareeŋgopieŋ.  
\v 12 Erâ ŋoŋere haeonec ŋic moc Epafara, Kristore kiŋaŋ qaqa, ere mamanac ŋoŋerao fokac, erâ ŋoŋe sanaŋkerâ Anuture micsâcko juhuc wiac mana tararâ etiŋneniŋte dameŋ sâc nunumuzi dopec-ŋopaekac.  
\v 13 No fuŋne-ticne manakopac, e ŋoŋere mecne erâ Laodikea haconec â Hierapoli haeonec mitiŋic jaŋere mecne mâmâc šâic gie wemo afecne baekac.  
\v 14 Luka dokta biaŋ-nâŋec â Dema jahe mu šeri eŋarekopirec.  
\v 15 Erâ no Laodikea haeonec mitiŋic â Nimfasi â wiacfâcne mu šeri ejarekopac i mufua-jarenšepieŋ.  
\v 16 Papia ši ŋic ŋokac wose-jarepie mana-fârepie Laodikea haeonec kikefuŋ jaŋerao râepie rame wosenšepieŋ. Á jaŋere moc qâreŋkepo iŋuc jaha ŋarepie wosenšepieŋ.  
\v 17 Arikipo e šiŋuc âzâcnenšepieŋ: “Miti gie Wofuŋzi neŋgoc ŋeha mugarekicne i aijakic jaha bâhâmozemec.”  
\v 18 Paulo no nahacne šâŋe qâreŋ ši râekopac. Kâpâcwâru ŋic nore manasunšepieŋ. Aki anonoczi ŋoŋerao fozejec.