\id 2TI 2 Timothù, Kate, PNG, wwh 12/92 
\h TIMOTEO II 
\toc1 Timoteo II 
\toc2 Timoteo II 
\toc3 2Ti 
\mt1 TIMOTEO II  
\c 1  
\s1 Jambuŋdâŋ  
\p
\v 1 Paulo no Anuture micte, Kristo Jesuzi juju bâfuawec irec biŋedâŋ muiŋnepemurâ Kristo Jesure aposolo epozi  
\v 2 Timoteo motec biaŋ-nane gore papia ši qâreŋkekopac. Anutu Mamac â Wofuŋ-nâŋec Kristo Jesu eraonec aki anonoc, uruc jauŋ â wama gorao fotâcnerâ fozejec.   
\s1 Timoteo mamanasiŋ fârine focnewec  
\p
\v 3 Mamac ŋosafâc-nane jaŋe maŋfâsâc juhuc tuczi tuc Anuture kiŋaŋ qawarekupie ɋâric-jeŋic noni iŋuc jaha eekopaczi daŋge âzâcnehuc nunumuo šušuhuc ŋafe furec manasucguhuc juekopac.  
\v 4 Nore ki busâqoc emeŋ, irec manasurâ honecguhuc bubiaŋ sâko manapemurâ enareekac.  
\v 5 Erâ mamanasiŋ fârine fogarekac, irec wâc manasuekopac, mamanasiŋ i hâcne mimige Loisi â neŋgocge Eunike jaherao foweczi gorao wâc fotâcnewec fokac i manakopac.   
\s1 Sasanaŋhec erâ mitire juju gie bazo  
\p
\v 6 Eme no irec hâcne manasu-gararâ mupe: No menane qizecgao râepe Anutuzi jambuŋ tahacguwec i hehâroŋketec šocne fuazejec.  
\v 7 Ehuc šiŋuc manasuzemec: Anutu e hâbi-nâŋec goroŋkeocte mâro mi nârewec, tâpirihec â maŋ jauŋhec â maŋsowahec enaŋte nârewec.  
\v 8 Irec go Wofuŋ-nâŋecte biŋe mutaniŋkecmurâ mimi gaŋgaŋ mi ezemec, erâ kâpâcwâru ŋicticne nore dâŋ mucmurâ acmeruŋ wâc mi ezemec. Go Anutuzi tâpiri gareme sâc no qâsuecnurâ Biŋebiaŋte erâ šârâ hâriŋ faio juzemec.  
\v 9 Eki hâcne bâpiaŋ-nâporâ tiridâŋ-ticnezi hefârec-nâpowec. I biaŋ-nâŋecte mâcne, e jahac maname fowecte aki anonoc-ticnere erâ iŋuc enârewec. I mârâc jaha jâmbâŋ Kristo Jesure erâ biŋe qanârekicne.  
\v 10 Eme fârine fufua ine dameŋ ši bâbâpiaŋ-nâŋec Kristo Jesu wahame fua tâcnewec. Eki hâcne hâmoc qâmizierâ juju â wiac fofo sanaŋ Biŋebiaŋko bajaŋgeŋke-nârewec.  
\v 11 Eme no irec biŋe mumu â aposolo â qaqazu jupemurâ munarekicne.   
\s1 Mitire kadahe aimuŋ soŋaŋkezo  
\p
\v 12 No irec hâcne šârâ hâriŋ faio juekopac, ehuc mi mimieekopac. No manasiŋkeekopac ere maŋjahec mi eekopac, aricne, no šiŋuc manapaŋkeekopac, e tâpiriheczi šeŋaŋ-nane sâcne soŋaŋke-narehame dameŋ sâko maickezokac.  
\v 13 Dâŋ fârine irec biri-ticne qazu-garepo ijaha bâjâpezemec, i Kristo Jesu manasiŋkehuc â maŋzi jauŋkehuc iŋuc ezemec.  
\v 14 Tiri Mâro maŋnâŋecko juekac eki neŋgoc ŋegarehame miti kâdoc qârârie-garekicne, i aimuŋ soŋaŋketec fogarezejec.   
\s1 Onesiforo ere dâŋ  
\p
\v 15 Asia mâreŋko behecnu-fârembiŋ i manameŋ, Figelo â Hemogene jahe mâmâc.  
\v 16 Wofuŋ e Onesiforo ere wiacfâc maŋuruc qajarezejec. Mamac-jeŋiczi kâpâcwâru ŋic nore mi takickeha bubiaŋ hati qanarehuc juwec.  
\v 17 E Roma haeo fisirâ šoɋac basacnuku bâfuacnuwec.  
\v 18 Wofuŋzi manaha dameŋ sâko Wofuŋtao uruc jauŋ bâfuazejec. E Efesoo wâc kiŋaŋ qaqa gie wemo afecne bawec i go gahac hone manac emeŋ.   
\c 2  
\s1 Wofuŋte momori gie bazo  
\p
\v 1 Kristo Jesuzi aki anonoc tahacguwec i go motec-nanezi bajuhuc qabocge qame huzejec  
\v 2 Ŋic bocjahazi hone manac ehapie gie gaza gowatuc epo, gie i hâcne ŋic tucne Wofuŋte hatao jueŋgopieŋ â miti munusuŋkeniŋte tâpiri fojarekac iŋucne jaŋe qazu-jaretec banšepieŋ wâc  
\v 3 Go Kristo Jesure momori ŋic sanaŋne juhuc irec šârâ hâriŋ kâdocge rocmurâ mi takicguzejec.  
\v 4 Moc e momori gie baocmuzi wemocko sahackopec gie fuŋne fuŋne ameckeocmu. E momori jaŋere birio râeweczi wiac honeme sâckeocmu i sawa eocte muocmu.  
\v 5 Moc e sisiric gie bahuc sâcmutâc qâsuaocmuzi furine mi roocmu.  
\v 6 Moc e he sarac ehuc šâic-ticne manaocmuzi nânâ fârine micne barâ bâsurâ nâme sâckeocmu.  
\v 7 Dâŋ gazakopac i manatâc qâtâc ezemec. Wofuŋ eki maŋge bâwiŋkeme mana tara-fârezemec.   
\s1 Mi docke pârâc ezo  
\p
\v 8 Go Jesu Kristore mamanac juzemec” e Dawidire ɋâriczi hâmockonec ɋârerâ faharewec” Biŋebiaŋ-ticne iŋuc hâcne muekopac.  
\v 9 Biŋebiaŋ irec erâ šâic fâro manaekopac, erâ wâc sâqocne bapa iŋucne niŋgiŋnumbiŋ ŋekopac Anuture dâŋ ine mi niŋgiŋkekicne.  
\v 10 No šâic gie sasawa i Anutu bâwosâefâc-ticne jaŋere erâ ŋetâcneekopac, jaŋe Kristo Jesure bâbâpiaŋzi ŋihe umbiŋ ejareha eri tatamac fofone mâmâc rauckeniŋte iŋuc eekopac hâcne  
\v 11 Dâŋ šiŋuc fokac i jâmbomac:  
\q1 Ere hâmocko šuhuckembeŋko  
\q1 juju-ticnao iŋuc jaha šuhuckenaŋmu,   
\q1
\v 12 šâic mana takirenaŋmuo  
\q1 ehec guriŋ bapa gie wâc banaŋmu.  
\q1 E mic banaŋmuo  
\q1 eki iŋuc jaha mic bacnâpoocmu.   
\q1
\v 13 Mumupaŋ-nâŋeczi dockeocmuo  
\q1 ere mumupaŋzi sanaŋkeocmu.  
\m Moc murâ moc mu i erao mi fokac.   
\s1 Mitire mumusifuc  
\p
\v 14 Go dâŋ i heɋâre-jarerâ Anuture maio mujomirehuc jaza sanaŋketec dâŋ racnere mu iigoc mi enšepieŋ. I wiac fârimâc, iŋuc ehuc miti mamana sipiric-jopaniŋmu.  
\v 15 Anutuzi mana-gareme sâckeocte šoɋachec juhuc giege bazemec, ehuc dâŋ fâri qizecne fâretiŋ jaha mujaŋgeŋkehuc jutec mimizi gieŋic gore faio mi fezejec.  
\v 16 Á dâŋ jawanere ojowane bapie mi bafic-jopazemec. Iŋuc eeŋgopieŋzi eraku miti beheniŋmu.  
\v 17 Burecdâŋ-jeŋiczi biac wicbâroŋ iŋucne erâ ŋedâmâreocmu. Ŋic iŋucne jaŋeraonec moc Himenaio â moc Fileto.  
\v 18 Jahe dâŋ fâri beherâ mukopirec, fafahare i biac fuawec. Iŋuc muhuc ŋic gâcne miti ba imac ejarekopirec.   
\s1 Anuture qânâ wâtuŋ â râqâc furi sâko  
\p
\v 19 Anutuzi qânâ wâtuŋ râeme huwec ine qiŋ herâ domakac. Maqâreŋ-ticne šiŋuc fokac: Wofuŋzi biŋefâc-ticne šâŋitac-jopaekac Erâ moc šiŋuc “Wofuŋte šâŋe bajuŋgopieŋ jaŋe šeŋgoma bâbâsifuc râpeckenšepieŋ.”  
\v 20 Ufuŋ sâkoo râqâc wiac goì â siliwazi bakicne i sawa mâcne, jâczi â mâreŋzi bakicne i mâmâc ŋekac. Râqâc gâcnao wiac furi sâkozi huocmu. gâcnao wiac omanezi huocmu.  
\v 21 Moc e bâbâsifuc wiac qikiŋneme maŋne ɋaɋackeme râqâc furi sâko eme ufuŋ runezi jambuŋkerâ bajuhuc izi gie biaŋ fuŋne fuŋne baocmu.   
\s1 Wofuŋte ŋic juzo  
\p
\v 22 Socɋârizi wiac fuŋne fuŋnere andac eeŋgopieŋ i bâec bazemec. Ehuc maŋjeŋic biaŋkekicnezi Wofuŋ mu wâwâsic ecneeŋgopieŋ jaŋe bafic-jopatec tiŋke biaŋ eere â mamanasiŋte â maŋjauŋte â wamare henširiŋnenšepieŋ.  
\v 23 Mugufuc dâŋ mutucne â racne igockezemec, irec fârine mu qaqatarac sawa fuaekac i manakic.  
\v 24 Wofuŋte kiŋaŋŋiczi mu hehefaric mi ezejec, e ŋic sasawa âgo ejarehuc miti micafec qazu-jarezejec, â pepecne ecnepie wiac aaricko mi ejarezejec”  
\v 25 erâ ŋic maŋrâŋgeŋ ine urucko mu bâtiŋ ejareme Anutu e jahac moc bawahac-jopame maŋjeŋic bârisierâ dâŋfâri šâŋitanšepieŋ.  
\v 26 Eme maŋjeŋic uŋtome, Sataŋte dâŋ reŋkeniŋte wiwitic-ticnao kicjopawec i hetaranšepieŋ.   
\c 3  
\s1 Miti bâbâsifuc ŋic jaŋere dâŋ  
\p
\v 1 Go šiŋuc manazemec: Dameŋ tarazo eha sâqocnezi sawe mâririackeocmu.  
\v 2 Ŋic kecšiŋucne juniŋmu hâcne: Jaŋe jaŋacnere sawa manoniehuc juju, moneŋ sasec, ruruc bâbâcne, sahac mumuteŋ, musurecne, neŋgoc mamac dâŋ qaqatara, nâme nikecne, araŋ bapa tâmiric,  
\v 3 maŋjauŋ tâmiric, kiŋ babaju, micko âkechec, nâ areŋne, qicqucne, wiac biaŋne qaqaisoc,  
\v 4 docbapa, enšaŋaucne, pepecne, sasecte aŋac kâcɋene bajuhuc Anuture aŋac mi mamana,  
\v 5 sahaczi miti hawari juhuc mitio sasanaŋ tâmiric juju. Iŋucne hâcne jupie honec-joparâ râpec-jopazemec.  
\v 6 Ŋic mukopac jaŋeraonec tucnezi kamierâ ficbiri juhuc ŋokac kosane, bahac fuŋne fuŋne bâfuambiŋ â saseczi ejareme ra qa ware qa eeŋgopieŋ, iŋucnezi jaŋere eniŋte mu bâdoc ejareeŋgopieŋ”  
\v 7 ŋokac dameŋ sâc mamana gie bahuc dâŋ fâri qizecnere fuŋne mi mana taraeŋgopieŋ iŋucne hâcne.  
\v 8 Mârâc jaha Jaŋe â Jambere jahe Mosere dâŋ bawahapic, iŋuc jaha ŋic mukopac jaŋe maŋjeŋic sifuckekicnere mamanasiŋte hata kâuc bahuc mutuc eeŋgopieŋ.  
\v 9 Erâ wiac eejeŋic wemocko boc efeniŋmu. Mutuc-jeŋicte fuŋne taniŋkeme ŋic sasawa hone-fâreniŋmu, Jaŋe Jambere jaherao fuawec iŋuc.   
\s1 Paulo šârâ hâriŋ ŋemâcne fuacnewec  
\p
\v 10 Go jupe juju-nanezi ine miti mumu-nane, juju-nane, giebapa-nane, mamanasiŋ-nane, buuruc-nane, maŋjauŋ-nane, sasanaŋ-nane,  
\v 11 fific guguriŋ-nane â šârâ hâriŋ-nane, irec hatane âtehuc bâjâpecnuekic. Antiokia haeo â Ikonioŋ haeo â Listera haeo fific guguriŋ enarepie šâic serereŋ mo iŋucne manapo¡ Eme Wofuŋzi sifu wiac iŋucnaonec bataracnuwec.  
\v 12 Erâ ŋic gâcne wâc Kristo Jesurao qohotahuc miti hata âteniŋmu jaŋe mâmâc fific guguriŋ fua-jare-fâreocmu.  
\v 13 Ŋic repicne â eeatucne jaŋe ine jaŋacnao â gâcne jaŋerao eeatuc gie bafeku repire sanaŋkeniŋmu.   
\s1 Tiri papia wose manac ehuc juzo  
\p
\v 14 Go ine dâŋ qazu-garekicne â maŋge ekicne ira qohotahuc juzemec. Dâŋ moraonec romeŋ i kâuc mi bakomec.  
\v 15 Erâ go ɋieocnecteaŋ tiri papia wose manac ewefuhuc juekicte izi maŋge batamaeha Kristo Jesu manasiŋkehuc bâbâpiaŋ sâcne bâfuacmu.  
\v 16 Miti papia i Anutu Mâro-ticnere qafeŋko fua-fârewec, eme irec wose manac epene mitire fuŋne qazu-nâreekac â mu tutuc enâreekac â mu bâtiŋ enâreekac â tiŋne hata nâwotuekac.  
\v 17 Iŋuc enârehuc bašawiec-nâpokume nâŋâc Anuture ŋicfâri erâ eehâmo gie fuŋne fuŋne sâcne bâfuanaŋmu.   
\c 4  
\s1 Pectâc juhuc miti gie ɋicwânšâŋ jaha bazo  
\p
\v 1 No Anuture maio â Kristo Jesu, juku Wofuŋ tâpirihec fisirâ ɋâricne â hâmokicne dâŋnâŋec mutaraocmu, ere maio gazapaŋkepe manac:  
\v 2 Go miti muminširiŋkezemec, ehuc ŋic irec ejareha me mi ejareha ɋicwânšâŋ jaha jazazemec. Erâ ŋic mu tutuc â mu bâtiŋ â mu sawaŋ ejarehuc qaqazu giege uneŋko tatakic tâmiric bazemec.  
\v 3 Juku dameŋ moc maickeme miti riucdâŋ manapie joŋtaweme qikiŋneniŋmu. Qikiŋnerâ miti hazecte nâpene-jeŋic sawa eme qaqazu mana wosâc ejarepie maŋjeŋic sâckeme iŋucnea guruhec rocjopaniŋmu.  
\v 4 Ehuc mitidâŋ fârine râpeckerâ nemu binaŋko qohotaniŋmu.  
\v 5 Go ine dameŋ sâc maŋtiec juzemec, šârâ hâriŋzi faigao feme sanaŋkezemec, Biŋebiaŋ muromackezemec, gie mugarekicne i basarickezemec.   
\s1 Paulo dameŋ-ticne bembeŋkewec  
\p
\v 6 No ine biac due bazo ekopac, rara dameŋ-nane bembeŋkekac.  
\v 7 No juju gie biaŋ batarakopac, hata-nane âte wareku mao fisikopac, mamanasiŋ-nane soŋaŋkehape mi ŋeŋgoroŋkewec.  
\v 8 Eme ši sambâŋte eri hendiŋ biŋe-nane râekicne fokac, i juku dameŋ sâkoo Wofuŋ, mumutara tiŋne eki narezokac, erâ no sawa mâcne, fifisi-ticnere aŋac-jopaha jueŋgopieŋ jaŋe mâmâc jarezokac.   
\s1 Ŋic gâcnezi Paulo behembiŋ  
\p
\v 9 Go fâro barâ norao biac warezemec.  
\v 10 Dema e mâreŋkopec wiac irec mana kikiwerâ behecnurâ Tesalonike haeo fâwec, Kereske e Galatiao rawec, â Tito e Dalimatia mâreŋko fâwec.  
\v 11 Ʒi Lukahec buc jukoperec. Mareko jowatec mâmâc warezepirec. E giere sâcne baficnuocmu.  
\v 12 Tikiko ine sorepe Efeso haeo fâwec.  
\v 13 Warezo ehuc hata ŋaqi-nane Troa haeo Karpo ere ficko hetarapo i bawarezemec, erâ papia-nane qizecne â rehacne mâmâc amecke warezemec.  
\v 14 Aeŋzi wiac bapa ŋic Alesande e sâqocne bocjaha enarewec, irec Wofuŋzi juku okacne bazucneocmu.  
\v 15 Dâŋnâŋec mâretec ro waha âte ewec. Go ere sawaŋge qazemec.  
\v 16 Dâŋgie-nane bâbâni fuawec dameŋ ira âgo moczi dâŋte mi baficnuwec, aricne, jaŋe behecnu-fârembiŋ” kiŋjeŋic mi fojarezejec.  
\v 17 Wofuŋ eki ine miti musawe tarape qâpuc jaŋe mana-fâreniŋte dopecnurâ basanaŋnuwec, ehuc laioŋte mickonec bataracnuwec.  
\v 18 Wofuŋ e sâqocne irec me irec ŋezicnurâ sambâŋ uucmaŋ-ticnao râecnuocmu. Erao eri tatamac forahuc juzejec sanaŋ. Jâmbomac.   
\p
\v 19 No Prisika â Aqila â Onesiforo wiacfâc-ticne mâmâc manasu-jare-fârekopac, i jazazemec.  
\v 20 Erasto e Korinti haeo juwec â Trofimo e huc bame Milete haeo hetarapo.  
\v 21 Go hoemaŋ dameŋ mi maickeha biac warezemec. Eubulozi manasu-garekac, erâ wâc Pudeŋ â Lino â Klaudia â âgo sasawa jaŋe iŋuc jaha manasu-gareŋgopieŋ.  
\v 22 Wofuŋzi maŋ qâqâtâcgehec juzejec. Aki anonoczi ŋoŋerao fozejec.