\id 2PE 2 Peteò, Kate, PNG, wwh 12/92 
\h PETORO II 
\toc1 Petoro II 
\toc2 Petoro II 
\toc3 2Pe 
\mt1 PETORO II  
\ip Petorore papia II i Petoro e jahac me mitiŋic âgo-ticne moczi Petorore šâŋeo âkehotahuc qâreŋkewec i mi mana sanaŋkeŋgopeneŋ. Petorozi Asia mâreŋ masunao Jesure kikefuŋfâc jurambiŋ jaŋere papia namba I qâreŋkeme mi šorame jaŋerao mitire mumusifuc ŋic fisirâ šiŋuc jazambiŋ: Miti ɋâricnezi akadâŋ âkehockeme arictac ewecte juju kosa juzo. Iŋuc murâ dâŋ moc šiŋuc mumbiŋ: Jesu e mocwâc mi fisizokac e fesanaŋ fewec hâcne. Ere woŋec maŋgâŋko mi juzo, behezo. Mumusifuc dâŋ i muhuc sasec mamakuc embiŋ. Ehuc ŋic ŋokac qazu-jarezo mumbiŋ. Eme Petoro e jahac me mitiŋic moczi irec dâŋ manarâ uŋdâŋ qâreŋke-jarewec hâcne.  
\ip Qâreŋŋic e mitire fârine jaŋerao fua ɋârâŋkeocte bufac qajarewec (gaŋ 1:3-11). Ehuc wiac hone manac eweczi miti mana sarickehuc muwec. Eme hâmoc dameŋ-ticne bembeŋkewecte ši mimic uŋ sawaŋ ejarewec (gaŋ 1:12-21). Erâ mumusifuc â sasec ŋic jaŋere fuŋne ritu-jâmbâŋkewec gaŋ 2). Á Wofuŋ fifisi-ticnere fuŋne mujaŋgeŋkehuc qâreŋkewec (gaŋ 3).  
\c 1  
\s1 Mumušâwe â jambuŋdâŋ  
\p
\v 1 Simoŋ Petoro, Jesu Kristore kiŋaŋ qaqa â aposolo noni, Anutu â bâbâpiaŋ-nâŋec Jesu Kristo tiŋne-ticnere erâ mamanasiŋ furi sâko tahac-nâpokicne ijaha ŋare tahac ekicne, ŋoŋe papia ši qâreŋke-ŋarekopac.  
\v 2 Ŋoŋe Anutu â Wofuŋ-nâŋec Jesu mana maŋ epie ŋoŋerao aki anonoc â wama ɋaŋɋaŋ ɋâriaŋ fuahuc fozejec.   
\s1 Mitire fârine bâfua rahuc juzo  
\p
\v 3 Jesu e tatamac â tâpiri-ticnezi hefârec-nâpome hone šâŋitac ecnepene sahacte â maŋte dope sasawa i Anutu tâpiri-ticnezi bâfua-nârewec.  
\v 4 Iŋuc erâ dâŋ biŋe fekicne furi sâko nâre tahac ewec, i maŋkepene irec fârine nâŋâcnao fuame mâreŋko sasecte sisipiric fokac i râpeckerâ Anuture hawari qâreŋfâc enaŋmu.  
\v 5 Irec ŋoŋe mamanasiŋhec juŋgopieŋte šoɋac epie tiŋne ju ju-ŋeŋic fuazejec, tiŋne jujuzi mamana bâfuazejec,  
\v 6 mamanazi maŋte sowa bâfuazejec, maŋte sowazi sasanaŋ bâfuazejec, sasanaŋzi miti nunumure aafec bâfuazejec,  
\v 7 miti nunumure aafeczi ââgo juju bâfuazejec, ââgo jujuzi maŋjauŋ bâfuazejec.  
\v 8 Wiac i sasawa ŋoŋerao fohuc fua ɋârâŋkeme Wofuŋ-nâŋec Jesu Kristo mana maŋ eniŋte giene bapie fârimâc mi eocmu.  
\v 9 Moc e wiac i tâmiric juocmu, ere šiŋuc muzo: E šâŋe tiŋtuŋ â maŋmutuc, mârâc šure bâpiaŋ ecnekicne irec nikeckewec.  
\v 10 Âgofâc, ŋoŋe irec hâcne samarierâ, bâwosâec-ŋoparâ hefârec-ŋopakicne i fârinehec eocte sasanaŋ bâfuanšepieŋ. Ŋoŋe iŋuc erâ docke pârâc tâmiric sâcne juniŋmu.  
\v 11 Iŋuc epie juku Wofuŋ â bâbâpiaŋ-nâŋec Jesu Kristozi eŋareme ere juju sanaŋte uucmaŋko ququŋke tâmiric hata aaŋko rašiniŋmu.   
\s1 Petoro e hâmoc-ticnere manawec  
\p
\v 12 Ŋoŋe wiac i sasawa qazu-ŋarekicne â dâŋfârio keteŋ-ŋopakicne domaŋgopieŋ, i manahuc sifu dâŋ ijaha heɋâre-ŋarehuc jupemu.  
\v 13 Sahac boze-nanehec juhuc sâc dâŋ i manasu-ŋarehuc wiwic-ŋopape sâckeocmu.  
\v 14 No boze-nane biac hetarapemu i manakopac, dâŋ i Wofuŋ-nâŋec Jesu Kristozi mufua-narewec.  
\v 15 Erâ behec-ŋopape ŋoŋe dâŋ i ɋâreme ɋâre mana rahuc juniŋte emoc bâmoc eŋarepemu.   
\s1 Petoro e bapa fuŋfuŋ juhuc wiac hone manac ewec  
\p
\v 16 Nâŋe Wofuŋ-nâŋec Jesu Kristo tâpiri-ticnere â fifisi-ticnere dâŋ ŋazambeŋ, i nemu binaŋ ŋic mamanao fuakicne mi ŋazambeŋ, nâŋe bapa fuŋfuŋ domahuc Wofuŋ tatamac-ticne fuame honembeŋ.  
\v 17 Ine Anutu Mamaczi eri mumuteŋ râcnehame sambâŋ tatamackonec erao dâŋ šiŋuc wahawec: “Joroc Ŋokâ-nane keci hâcne, no hone aŋac ecneekopac.”  
\v 18 Nâŋe ehec mâmâc tiri tikio juhapene dâŋ i sambâŋkonec wahame manambeŋ.  
\v 19 Eme nâŋe irec porofete jaŋere dâŋ manapene fârine jâmbâŋ eekac, izi šoclambe iŋucne erâ dapâcko tamaeekacte ŋoŋe ira šâŋe fihuc juhapie hae fure-fârezejec â maŋŋeŋicko bâpiŋ sâkozi wefuzejec.  
\v 20 Erâ qanaŋ moc šiŋuc mana-hâmonšepieŋ: Findaŋdâŋ miti papiao qâreŋkekicne fokac irec fuŋne i ŋic moczi e jahacne maŋte mi mumune.  
\v 21 Findaŋdâŋ i ŋiczi manasu biric erâ moc mi mukicne, ŋic jaŋe Tiri Mârozi fenšoŋ-jopame Anuturaonec dâŋ mu jumbieŋ.   
\c 2  
\s1 Miti bâbâsifuc ŋic jaŋere dâŋ  
\p
\v 1 Israe ŋic jaŋerao porofete burecne i wâc mâmâc fuarâ jumbiŋ, eme ŋoŋerao iŋuc jaha qaqazu burecne fuaniŋmu. Jaŋe mitire mumusifuc bâfuapie ŋoŋerao fâfâuc fuaocmu, erâ Wofuŋ kiwiric-jeŋic rowec e mickeniŋmu. Iŋuc epie sisipiric ɋeŋfâfâc jaha fisi-jareocmu.  
\v 2 Ŋic i jaŋe sasec gie bapie bocjahazi honerâ bâjâpec-jopaniŋmu, eme jaŋere erâ miti hata susure fuaocmu.  
\v 3 Erâ wâc moneŋ mafare andac ehuc maŋko fuac dâŋzi eatuc-ŋopahuc wiac-ŋeŋicte kâŋgâc gie baniŋmu. Jaŋere okacne dâŋ esecne mukicne i mi pârâwewec, â sisipiric-jeŋic i micmâŋ mi ewec.   
\s1 Ŋic mârâc jaha okacne fisi-jarewec irec dâŋ  
\p
\v 4 Anuture manaeŋgopeneŋ, e aŋelo sâqorekicne jaŋe mi akic-jopawec, aricne, e hârâcko tuŋjopame duŋdapâcko humbiŋ, ira okac dameŋte woŋec foeŋgopieŋ.  
\v 5 E mârâc sasac jaha ŋic â wiac sasawa mi akic-jopawec, mâc Noa, tiŋne jujure biŋe mumu, erâ ŋic ŋokac 7 jaŋe sawa ŋezic-jopame ɋâricne juhapie ŋic sâqocne jaŋerao rumi sâko fisiwec.  
\v 6 Erâ Sodom â Gomora hae iŋuc jaha sirowenicte mume šoczi šacjofawec, i ŋic sâqocne šâhec fuarâ juniŋmu jaŋere uŋ muhuc iŋuc ewec.  
\v 7 Erâ wâc mitiŋic Loti e sindaŋŋic jaŋe wiac mamakâcne mimi tâmiric ehuc jupie irec bušâic manahuc juhame ŋezickewec.  
\v 8 Loti e mitiheczi jaŋere ŋondeŋko juhame jaŋe sindaŋ hârindaŋ epie šoaŋne šoaŋne hone manac ehuc maŋne sisi hâhâŋ wemo afecne ewec.  
\v 9 Wofuŋ eki ine ŋic mitihec eesâic docko roroŋ sasapec ejareekac â miti tâmiric jaŋe okac dameŋko šâic gie mujareocte kâpâcwâru bacjopaekac.  
\v 10 Ŋic maŋjeŋiczi sasecte bâruŋkeme sohoŋ nâ ruac ehuc Wofuŋ â ŋic fekicne ro waha âte ejareeŋgopieŋ jaŋe hâcne kâpâcwâru sanaŋne bacjopaocmu. Ŋic iŋucnezi hâhâwic tâmiric mukac mupe ehuc tatamachec jaŋe wâc musuac-jopaeŋgopieŋ.  
\p Miti beherâ sasecko sipirickezo   
\p
\v 11 Iŋuc ehapie aŋelo jaŋe ine sasanaŋ â tâpiri fuŋmoc fojarekaczi Wofuŋte maio mi mugâpâre-jareeŋgopieŋ.  
\v 12 Ŋic izi hâcne maŋ tâmiric, qowi qa nâc ejareeŋgopeneŋ jaŋe iŋucne. Jaŋe wiac fuŋne kâuc baeŋgopieŋ i kosa musuaeŋgopieŋ” irec qowi sisipiric sipirickeniŋmu,  
\v 13 ehuc hehesic-jeŋicte furine roniŋmu. Jaŋe šoaŋ ɋaɋacko tiwâ šepec â gae wowozi šeri-jeŋic eekac. Mamakâcne â maŋwânâŋ qâŋkerâ juju, šege hârocko hefârec-ŋopahuc bâbâsifucte eeatuc-ŋopa,  
\v 14 šâŋe-jeŋiczi sasec šâŋe fifi, sâqocne gapecmâc ee, ŋic biric borocne wiac iŋucnere doc babac-jopa, moneŋ mafare harac eku maŋjeŋic ekicne, ŋic iŋucnezi hârâcte biŋe hâcne¡  
\v 15 Jaŋe hata dândâŋne i râpeckerâ qâsoriehuc Bileam, Beorore ŋokâ, ere kike hata bâjâpembiŋ. E sâqocnere furi roocte andac eme  
\v 16 Wofuŋzi qaqatara-ticnere haneckewec. Eme doŋgi dâŋ tâmiriczi ŋicdâŋ dâŋehuc porofete bâbâsifucne e heckenewec.   
\s1 Sâqocnere gisicbeŋ  
\p
\v 17 Ŋic iŋucnezi opâ šizicne iŋucne, erâ mâŋâŋzi hâwec ficne sueme ra fe ware fe eekac iŋucne tinac. Ŋic i jaŋe ŋafe sanaŋko dapâc qisiricko fisiniŋte mukicne.  
\v 18 Jaŋe pacgoroŋ dâŋ erâ, ŋic qâpuc hata ɋâri qaqa jaha râpeckembiŋ, jaŋe eatuc-jopaeŋgopieŋ, ehuc tiwâ šepeczi gisicbeŋ eme sicne-jarepie fisipie qâturerâ sasec gie baeŋgopieŋ.  
\v 19 Ehuc ŋic šiŋuc jazaeŋgopieŋ: “Iŋuc erâ niŋgiŋ tâmiric sâcne juhâmozo”, i jaŋacne sisipiricte niŋgiŋko fohuc iŋuc mueŋgopieŋ. Ŋic moczi wiac mocte kiŋaŋ qaocmu, e wiac irec niŋgiŋko juocmu hâcne.  
\p Hata raŋɋanao risierâ kiŋsâko hurezo   
\p
\v 20 Manaŋgopieŋ, miti tâmiric jaŋere sohoŋ râpeckerâ Wofuŋ â bâbâpiaŋ Jesu Kristo mana maŋ embiŋzi ijaha mocwâc maickerâ qohotaniŋmu, ine mârâc juju bapa-jeŋic afecne sâqorehame šâhec juju bapa-jeŋic sâqore sanaŋkeocmu.  
\v 21 Ŋic iŋucne jaŋe tiŋne hata kâuc bahuc mi âtepie muzac boc mi sâqorezac” â hata i âtekicnezi tiri sâcmutâc dâŋ qazu-jarekicne i mocwâc igockehuc hata raŋɋanao risiepie ine sâqoreekac.  
\v 22 Ŋic iŋucne jaŋerao dâŋ šiŋuc mukicne i sanaŋkeekac: Qâto e nânâ maŋurâ ijaha mocwâc nâekac, â bec e opâ ruarâ izia sohoŋ ruaekac.   
\c 3  
\s1 Wofuŋte dâŋ racne mi eocmu  
\p
\v 1 Jorocfâc-nane, ŋoŋere papia ši qâreŋkehape jajahec ekac. No maŋŋeŋic wiwickepe mitidâŋ mi mana sifuckehuc sâcne mana taraniŋte qâreŋke-ŋareekopac hâcne.  
\v 2 Eme ŋoŋe tiri porofete mârâc jaha dâŋ mumbiŋ irec mecne â aposolofâc-ŋeŋic nâŋe Wofuŋ â bâbâpiaŋte sâcmutâc dâŋ ŋazambeŋ i mecne mâmâc manasuhuc junšepieŋ.  
\v 3 Ehuc qanaŋ šiŋuc mana sanaŋkenšepieŋ: Dameŋ bembeŋkezo eme ŋic âke sisicne fuarâ mufec muriŋ dâŋ muhuc sasec gie-jeŋicte hešâkiriŋkerâ juniŋmu.  
\v 4 Ehuc šiŋuc muniŋmu: “Wofuŋ risieocte mukicne fârine weni? Kâcɋenefâc-nâŋec hâmombiŋ, ehame wiac sasawa mâreŋ fuaweckonecteaŋ fowarehuc juwec iŋucnea fohuc jukac.”  
\v 5 Jaŋe fuŋne šiŋuc mana-bipiehuc dâŋ i mueŋgopieŋ: Sambâŋ e mârâc jaha fuawec â mâreŋ e iŋuc jaha. I Anutu dâŋticnere opâonec fuarâ opâheckoaŋ fowec.  
\v 6 Eme šâhec opâzia ŋic â wiac sasawa qâuruc-jopahuc bâsirowec-jopawec.  
\v 7 Á sambâŋ â mâreŋ ši fokopirec ine Anuture dâŋzi sakarec-jofame šocte biŋe erâ fokopirec. Okac dameŋ maickeme ŋic sâqocne jaŋe sipirickeniŋte irec woŋec fokopirec hâcne.   
\s1 Wofuŋ e nâŋâcnere erâ dameŋ-ticne bâšoraekac  
\p
\v 8 Jorocfâc-nane, wiac moc ši kâuc mi banšepieŋ: Wofuŋ e šoaŋ gie bapa mocjahare maname jare I tauseŋ tinac eekac â jara I tauseŋ irec maname šoaŋ gie bapa mocjaha tinac eekac.  
\v 9 Wofuŋ e dâŋ muwec irec fârine bâfuaocte bititiehuc dameŋ mi bâšoraekac, ŋic gâcnezi manapie iŋuc tinac eekac. Aricne, e ŋic gâcnezi sipirickenšipiŋte ŋoŋere erâ woŋec juekac. E ŋic mâmâc sasawa maŋjeŋic bârisie-fâreniŋte muekac hâcne.   
\s1 Sambaŋ â mâreŋ sirowezokopirec  
\p
\v 10 Wofuŋte dameŋ e râsi fisieŋgopieŋ iŋuc jaha ututuŋ maickeocmu. Maickeme sambâŋ e fânâŋ sâko ehuc siroweocmu, â wiac hohonene sasawa i šoczi šafâreocmu, erâ wâc mâreŋ â fainao wiac bâfuakicne i šoczi šâseŋkeocmu.  
\v 11 Wiac sasawa sirowe-fâreocmu, irec ŋoŋe pectâc juhuc miti sisirombe faio bajunšepieŋ.  
\v 12 Iŋuc ehuc Anutu dameŋ-ticne hejâpehuc harac huacbuc enšepieŋ. Maickeme hâcne sambâŋ e šoczi šârârâŋneocmu, â wiac hohonene sasawa i šocbâruŋko šâtâmireocmu.  
\v 13 Nâŋâc ine sambâŋ ɋâricne â mâreŋ ɋâricne fuaocte biŋe qanârekicne, irec woŋec jueŋgopeneŋ, eme ira tiŋne jujuzi sâcke-fârerâ fozokac.   
\s1 Mumutara â jambuŋdâŋ  
\p
\v 14 Jorocfâc-nane, ŋoŋe wiac iŋucnere woŋec juhuc ere maio maŋfuru â bahacmâc juniŋte wawariehuc wamao jupie honec-ŋopame sâckezejec.  
\v 15 Erâ Wofuŋ-nâŋeczi dameŋ-ticne bâšorame munšepieŋ, bâpiaŋ-nâpoocte ekac. Âgo biaŋ-nâŋec Paulo e maŋɋârâŋ-ticnere sâcko dâŋ irecteaŋ qâreŋke-ŋarewec.  
\v 16 E papia qâreŋkehuc sâc dâŋ i mufua rawec. Papia-ticnao dâŋ gâcne fokac irec fuŋne qame hukicne. Eme dâŋ iŋucne i ŋic mutucne â biric borocne jaŋe musifuckeeŋgopieŋ. Erâ i ere papiare sawa mâcne, miti papia gâcnere mâmâc ehuc sisipiric maickeeŋgopieŋ.  
\v 17 Âgo biaŋfâc-nane, uŋdâŋ qanaŋ ŋazakicnere ŋic kosa jujune jaŋere mumusifuczi maŋŋeŋic bâŋgoroŋkeme dockenšipiŋte sawaŋ-ŋeŋic qahuc junšepieŋ.  
\v 18 Ehuc Wofuŋ â bâbâpiaŋ-nâŋec Jesu Kristo ere aki anonocko â fuŋne-ticne mana utuckehuc soka sanaŋ enšepieŋ. E eri tatamac i šiŋuczia focnekac erâ juju sanaŋ dameŋko iŋuc jaha focne rahuc juzokac.