\id 2CO 2 Corinthians, Kate, PNG, wwh 12/92 
\h KORINTI II 
\toc1 Korinti II 
\toc2 Korinti II 
\toc3 2Ko 
\mt1 KORINTI II  
\ip Paulo e Korinti ŋic jaŋere papia I râe-jareme rame woserâ dâŋjeŋic fowec i sâcne mi mufâsâembiŋ. Eme Paulo e irec biŋe manarâ Tito soreme rawec. E jahacne ine Efeso haeo ŋewec. Eme Tito e rarâ jume šorame Paulo e woŋec juipierâ mâretec maŋbahackewecte e jahac Korinti haeo raocte rawec. Raku Makedonia mâreŋko fisirâ ira Tito bâfuawec. Erâ Tito ere mickonec dâŋ šiŋuc manawec: Korinti ŋic jaŋe Paulore dâŋ mana uruerâ bahac fowec i bâtiŋnembiŋ, ehuc sâqocne bapa e tuŋkembiŋ, â fâfâuc fowec irec dâŋ wâc mutararâ maŋ mocjaha embiŋ, erâ wâc bâbâsifuc wiac gâcne i bâtiŋneniŋte giene bahuc jumbiŋ.  
\ip Paulo e dâŋ i manarâ bune uruene Wofuŋ daŋge âzâcnewec. Erâ Titozi dâŋ i sawa mi barawec. Dâŋ moc bafisiwec ine šiŋuc: Korinti kikefuŋ neŋgocne sâko jaŋe Paulore dâŋ reŋkehuc bâbâtiŋ gie bapie Judaŋic opâ ruac bâbâsifucne jaŋe i honerâ aaric-jopawec. Irec Paulo mupitiwahuc mâretec musoriŋkembiŋ, ehuc gie-ticne â eebapa-ticne surehuc Korinti ŋic dâŋ bocjaha jazambiŋ. Gie repicne i fuŋkerâ bahapie Titozi hone manac ejarewecte irec dâŋ binaŋ wâc Paulo ecnewec. Eme Paulo e bubiaŋ fârine manaweczi ŋifec bušâic wâc manawec. Ehuc Korinti ŋicfâcne maŋ bâsifuc ejarekupie sisipiricte hatao mocwâc ranšipiŋte boc mezackewec. Irec papia namba II ši hâcne Makedonia mâreŋko juhuc qâreŋkewec.  
\ip Papia maŋnao dâŋ neŋgocne neŋgocne kecšiŋuc forakac:  
\ip Gaŋ 1-7. Paulo miti gie-ticnere dâŋ.  
\ip Gaŋ 8-9. Jerusalem haeonec kikefuŋ jaŋere erâ taha moneŋ rârâere dâŋ.  
\ip Gaŋ 10-13. Paulo e kikefuŋ jaŋere erâ juju gie fârine bawec.  
\c 1  
\s1 Jambuŋ â mumuteŋ dâŋ  
\p
\v 1 Anuture micdâŋte Jesu Kristore aposolo epo Paulo no hâcne, erâ qomâ-nâŋec Timoteo nâhe Korinti haeonec Anuture kikefuŋ â Akaia mâreŋko mitiŋic juraŋgopieŋ ŋoŋe papia ši qâreŋke-ŋarehuc šiŋuc mukoperec:  
\v 2 Mamac-nâŋec Anutu â Wofuŋ Jesu Kristo eraonec aki anonoc â wama ŋoŋerao fotâcnerâ fozejec.  
\v 3 Wofuŋ-nâŋec Jesu Kristo ere Mamac â Anutu muteŋkenšepeneŋ. E buuruc Mamac â bâbâmiriŋ rune juekac.  
\v 4 Ehuc šârâ hâriŋ fuŋne fuŋne enâreme bâmiriŋ-nâpoekac. Eme Anutuzi bâmiriŋ-nâpoekac, bâbâmiriŋ izia nâŋe iŋuc jaha âgo gâcne šârâ hâriŋ fuŋne fuŋne maŋnao juhapie sâcne bâmiriŋ-jopanaŋmu.  
\v 5 Kristo e šâic manawec irec tofane nâŋerao ɋârâŋne fuaekac, iŋuc jaha bâbâmiriŋ-ticne ɋârâŋnea bâfua-nâreekac.  
\v 6 Nâŋerao fific guguriŋ fuaekac, i ŋoŋerao bumâteŋ â bâbâpiaŋ fuaocte fua-nâreekac, â bâbâmiriŋ fua-nâreekac i wâc ŋoŋere erâ fua-nâreekac, ine bâbâmiriŋ izi ŋoŋerao fotâcnerâ dopec-ŋopahame fific guguriŋ nâŋerao fuaekac ijaha ŋoŋerao fuame irec šâic maŋuruc jaha mananiŋte.  
\v 7 Eme nâŋe ŋoŋere manabâc mi ehuc šiŋuc manapaŋkeŋgopeneŋ: Ʒârâ hâriŋte kâdoc rohuc bâbâmiriŋte kâdoc mâmâc roeŋgopieŋ.   
\s1 Wofuŋzi Paulo â âgofâcne hâmockonec batarac-jopawec  
\p
\v 8 Nâŋe Asia mâreŋko šârâ hâriŋ faio juwefumbeŋ irec kâuc banšipiŋte mupe mananiŋ: Ira wiac hâhâwicne jâmbâŋ fai-nâŋecko ferâ kimâc-nâpome juju-nâŋecte mâretec mana maŋbahac embeŋ.  
\v 9 Eme ši hâmocte biŋe eŋgopeneŋ muhuc maŋnâŋec ŋeŋgoroŋkewec. Erâ i mâc mi fua-nârewec, nâŋe nâŋâcne tâpirire manapene waha qaqane eha Anutu hâmoc qâŋɋâŋ bâɋâreekac e mocjaha manasiŋkenaŋte wiac i fua-nârewec.  
\v 10 Eme eki hâcne hâmockonec batarac-nâpowec. Erâ e batarac-nâpoweczi juku wâc batarac-nâpozokac, dâŋ iŋuc mana šakiehuc erao siŋkeeŋgopeneŋ.  
\v 11 Eme ŋoŋe nunumuzi bafic-nâpopie Anutu e buafec-ticnere erâ ŋezic-nâpome micne micne musereckerâ nâŋere erâ daŋge mumuteŋ ecnepie sâckezejec.   
\s1 Paulozi maŋfâsâc juwec  
\p
\v 12 Nâŋe nâŋâcnere piticne mana biaŋkeeŋgopeneŋ ine kecšiŋucte: Maŋfâsâc â mitio maŋtaniŋ jupene maŋnâŋeczi wiac mocte tutuc mi qanâreekac. Nâŋe miti tâmiric jaŋere maio iŋuc hâcne juhuc miti mamana ŋoŋere maio wâc jujâmbâŋkeeŋgopeneŋ. I mâreŋko maŋɋârâŋ dâŋ fokac ira siŋkehuc mâcne, Anuture uruc jauŋko siŋkehuc eeŋgopeneŋ.  
\v 13 Nâŋe dâŋ hetac herirec ehuc mâcne, dâŋ fârine sasawa qâreŋke-ŋarepene wose manac eeŋgopieŋ. No manakopac, ŋoŋe šâhec mana tara-jâmbâŋkeniŋmu.  
\v 14 Ine hâcne gâcne ŋoŋe šiŋuc biac mana tarazo eŋgopieŋ: Nâŋe ŋoŋere boreŋfâc â ŋoŋe Wofuŋ Jesu dameŋ sâko-ticnao nâŋere boreŋfâc eniŋmu.   
\s1 Paulozi pacgoroŋ dâŋ mi muwec  
\p
\v 15 No dâŋ i hâcne maŋkehuc qanaŋ ŋoŋerao fârâ bubiaŋ qaŋarepemurâ mupo.  
\v 16 Erâ fâ honec-ŋoparâ Makedonia mâreŋko razo mupo. Ira ra jurâ mocwâc ŋoŋerao risiepe gâcnezi bâjâpecnupie Judaia mâreŋko ranaŋte manasupo.  
\v 17 Eme no iŋuc muhuc âkesac eŋarepo muŋgopieŋ me? Me no ŋic miti tâmiric, irec dâŋ mupaŋkepe moc i fârine â moc i racne eekac?  
\v 18 Anutu e jâmbomac rune jukacte dâŋ ŋazapene wemocko racne â fârine ataŋ eocmu?  
\v 19 Anuture Ŋokâ Jesu Kristo ere fuŋne i no â Siliwano â Timoteo nâŋe ŋazapene gâcne fârine â gâcne racne iŋuc mi ewec. Aricne, ere fuŋne i fâri fideteŋ sasawa.  
\v 20 Anuture biŋedâŋ fuŋne fuŋne i erao hâcne deŋke-fârekac. Irec hâcne esoc-nâpome “Jâmbomac” muhuc Anutu mucne bacneeŋgopeneŋ.  
\v 21 Ŋoŋehec Kristorao râec-nâpo sanaŋkewec i Anutu eki hâcne.  
\v 22 Erâ ekizia wâc ma qâreŋ banârehuc šâšâfic-ticne Mâro maŋnâŋecko râeme huwec.   
\p
\v 23 No Korinti haeo fârâ imac-ŋopazipore mi fâpo. Dâŋ i Anutuzi manaha jâmbomac jâmbâŋ mukopac.  
\v 24 Erâ nâŋe mitio ŋicbomboŋ eŋarenaŋte mi muŋgopeneŋ, mâc ŋoŋerao bubiaŋ fuaocte babaficko gie baeŋgopeneŋ. Ŋoŋe mamanasiŋko qiŋ herâ domaŋgopieŋ i manakopac.   
\c 2  
\s1 Paulozi Korinti haeo mi risiewec irec dâŋ  
\p
\v 1 No ŋoŋerao fârâ busâqoc mocwâc bâfua-ŋarezipore manabâc erâ jupo.  
\v 2 Noni busâqoc eŋarehape weni jaŋe bubiaŋ bâfua-nareniŋmu? Busâqoc ecnekicnezi wemocko iŋuc eocmu?  
\v 3 Eme no dâŋ i hâcne šiŋucte qâreŋke-ŋarepo: No fâpe ŋoŋe bubiaŋ bâbâfua-narezi busâqoc bâfua-narenšipiŋ. No nâŋâcnere šiŋuc hâcne manapaŋkepo: Nore bubiaŋzi mâmâc sâko-nâŋec ekac.  
\v 4 No bunane gufeme ŋoŋere šâic wemo afecne manahuc kifaio papia qâreŋke-ŋarepo, i bu ririke eŋarepemurâ mâcne, maŋnane ŋoŋerea sanaŋne domakac, irec fuŋne ŋowatupemurâ epo.   
\s1 Ŋic bâbâtiŋ wiac ejarerâ šâhec mocwâc âgo ejarezo  
\p
\v 5 Ŋic busâqoc bâfua-nârewec, eki no sawa mâcne, ŋoŋe gâcne mâmâc bâfua-ŋarewec, weniŋuc musokahuc “mâmâc sâko bâfua-ŋarewec” mupemu.  
\v 6 Ŋoŋe bocjahazi bâtiŋnehuc wiac ecnembiŋ, i manape tarakac.  
\v 7 Ʒi ine busâqocko juku sipirickezacte kiŋticne behehuc mu bâmiriŋ ecnenšepieŋ.  
\v 8 Irec hâcne harierâ âgo jauŋ ecneniŋte mukopac.  
\v 9 No bâbâtiŋte mârâc qâreŋke-ŋarepo, i dâŋnane sasawa reŋkepie fuŋne taniŋkeocte esâic-ŋopapo.  
\v 10 Ŋoŋe ŋic mocte kiŋ behepie no iŋuc jaha behepemu. Kiŋ behekopac (bahac bâfuawec i norao moc qacnewecko behekopac(c) ine ŋoŋere manasuhuc Kristore micte ekopac.  
\v 11 I Sataŋzi eatuc-nâpozacte iŋuc eŋgopeneŋ. E wiac enâreocte manasuekac, irec kâuc mi baŋgopieŋ.   
\s1 Mitizi âsu mumundoŋ eekac  
\p
\v 12 No Troa haeo fisihape Kristore Biŋebiaŋ mupemurâ irec hatane Wofuŋzi bâšâwe-narewec.  
\v 13 Eme qomâ-nane Tito (e ŋoŋeraonec biac mi risiewecte(c) basahuc maŋhâhâŋ enareme ŋicbureŋ mâzoc-joparâ Makedonia mâreŋko warepo.  
\v 14 Opoŋ, Anutu e Kristore gieŋicfâc-ticne nâŋe saoreŋ qahuc bataniŋ-nâpoekac, ehuc enâreme miti-ticnere âsu aŋac biaŋ bâiŋnepene ŋezurâ mâreŋ sâc raekac, irec mumuteŋ sâko ecnezo.  
\v 15 Nâŋe Kristore âsu mumundoŋ eŋgopeneŋzi Anutu bâiŋnecnepene ŋic jujure biŋe â sisipiricte biŋe mâmâc jopaekac.  
\v 16 Sisipiricte biŋe jaŋe fârepie hurâ hâmoc âsu erâ jopame hâmoeŋgopieŋ, â jujure biŋe jaŋe fârepie hurâ juju âsu erâ âke ɋârec-jopame jueŋgopieŋ. Gie iŋucne mozi bame sâckeocmu?  
\v 17 Nâŋe ŋic gâcnezi eeŋgopieŋ iŋuc mi eeŋgopeneŋ. Ŋic gâcne bocjahazi Anuture dâŋte manapie âbârâ gie-jeŋic eekac. Nâŋe ine maŋtaniŋ juhuc Anuture micte â Anuture maio Kristorao qohotahuc miti mueŋgopeneŋ.   
\c 3  
\s1 Jaŋe Paulole pasi embiŋ  
\p
\v 1 Nâŋe ŋoŋe bâmiriŋ-ŋopanaŋte dâŋ iŋucne mocwâc fuŋkeŋgopeneŋ me? Me ŋic tucnezi eeŋgopieŋ iŋuc erâ ŋoŋerao fisirâ bâbâmiriŋ papia moc ŋowatueŋgopeneŋ? Me ŋoŋe moc qâreŋkerâ nâreeŋgopieeŋ?  
\v 2 Iŋuc aricne, papia-nâŋec i ŋoŋe hâcne. Erâ papia I maŋŋeŋicko qâreŋkekicne, ŋic mâmâc sasawa hone wosec eene.  
\v 3 Nâŋe ŋoŋerao gie bapene Kristore papia embiŋ, irec fuŋne tâtâc fokac. Erâ papia i tiŋtezi mi qâreŋkekicne, i Anutu jujune ere Mârozi qâreŋkewec, tafe omanao mâcne, ŋicmaŋ tafeo qâreŋkewec.  
\v 4 Qacfiric dâŋ iŋucne ine Kristore erâ Anutu manasiŋkepene fonârekac.  
\v 5 Gie fârine moc nâŋe nâŋâcnaonec fuaekac iŋuc mu manasuc enaŋte ropaŋ mi fonârekac,wiac epene bibiaŋkene i Anuturaonec sasawa.   
\s1 Miti giezi eri tatamachec  
\p
\v 6 Anutu eki hâcne bašawiec-nâpome šâšâfic ɋâricnere gie baeŋgopeneŋ. I dâŋqâreŋte giene mâcne, i Mârore gie. Dâŋqâreŋzi hâcne sisipiric bâfua-nâreekac, â Mârozi ine juju bâfua-nâreekac.  
\v 7 Miti gie raŋɋane,sisipiricte biŋe mumu hâcne, i qorac tapao qâreŋkekicne, erâ gie i sifu tatamac tâmiric mi fowec. Irec hâcne Mosere šâŋe maio tatamac hâhâwicne fome Israe ŋic jaŋe wemocko ira firâ honenšapiŋ. Erâ tatamac i fofone mâcne.  
\v 8 Miti gie raŋɋanere tatamac iŋuc hâcne fowec.Ehame wemocko miti gie ɋâricne, Mârore biŋe mumu, i tatamac tâmiric foocmu?  
\v 9 Sisipiricte biŋe mumu irec giezi tatamac wawahanehec, â kiŋfâsâc eere biŋe mumu irec giezi tatamac fekicne sâkohec.  
\v 10 Gie raŋɋanere tatamac i gie ɋâricnere tatamac sâkozi sâockeme weaŋkeekac.  
\v 11 Wiac fotâmireweczi mârâc tatamacnehec fuawec, â wiac forašihuc jujune irec tatamaczi ine fekicne sâko.   
\s1 Maŋfoŋ i Wofuŋzia bararuŋkeekac  
\p
\v 12 Mamanac-nâŋec iŋuc fokacte gie maŋafec jaha baeŋgopeneŋ,  
\v 13 ehuc Mose mi sâckeeŋgopeneŋ. E Israe ŋic jaŋe tatamac rârâriene i fotâmirehame honenšipiŋte šâŋe maine foŋkewec.  
\v 14 Eme maŋjeŋic sanaŋkewecte miti raŋɋanezi wâc foŋnehec eweczi eekac. Irec wose manac ehuc mi mana taraeŋgopieŋ. Erâ foŋ i mâc mi raruŋkeocmu, Kristo e mocjahazi bararuŋkeocmu.  
\v 15 Jaŋe dameŋ šiŋuczia Mosere dâŋqâreŋ woseeŋgopieŋ sâc maŋjeŋic foŋnehec eekac.  
\v 16 Jaŋe maŋjeŋic bârisierâ Wofuŋ maickepie izia foŋ i firue-jareocmu.  
\v 17 Wofuŋ e Mâro rune, eme Wofuŋte Mârozi juekacko wiac omaraŋ foekac.  
\v 18 Nâŋâc ine šâŋe mai-nâŋec foŋ tâmiric fokacte Wofuŋte tatamaczi âke tamaec-nâpome bâtikiepene wefuekac,ehuc Wofuŋte hawari sâc erâ tatamacheczi tatamachec eeŋgopeneŋ. I Wofuŋ Mâro ere mâsi.   
\c 4  
\s1 Biŋebiaŋ i foŋne tâmiric  
\p
\v 1 Wofuŋ e buafec-ticnere gie iŋucne munârewecte mi pârâweeŋgopeneŋ.  
\v 2 Ehuc bahac,mimi fuazacte soŋsoŋko eene, i râpecke-fârembeŋ Me sioc faio juhuc Anuture dâŋ bâbâsifucke i wâc mi eeŋgopeneŋ, aricne Nâŋe Anuture maio miti mutaniŋkehuc ŋic jaŋere maŋ bâmiriŋkepene fuŋne-nâŋec manaeŋgopieŋ.  
\v 3 Eme Biŋebiaŋ mueŋgopeneŋ izi foŋnehec moc eekacko ine sisipiricte biŋe jaŋerao sawa foŋnehec eekac.  
\v 4 Miti qiqikiŋ jaŋe hâcne mâreŋ širec ŋicbomboŋzi maŋjeŋic bâzickeme wemocko Biŋebiaŋte tatamaczi hume Kristo e Anuture sâc jâmbâŋ jukac muhuc Wofuŋ qâreŋ-ticne šâŋitaniŋmu?  
\v 5 Nâŋe miti muhuc nâŋe nâŋâcne dâŋ mi ŋazaeŋgopeneŋ, Jesu Kristo eki Wofuŋ â nâŋe ine Jesure erâ kiŋaŋ qaqafâc-ŋeŋic sawa juŋgopeneŋ, iŋuc ŋazaeŋgopeneŋ.  
\v 6 Anutu e mârâc jaha fuŋnao dapâc fohame hae mâreŋ fureocte mume furewec, ekizia hâcne mume maŋnâŋecko mitire tatamaczi uŋ heme Kristore šâŋe maio Anuture huriri qâreŋ fua tâcneha šâŋitambeŋ.   
\s1 Paulo e wiac hâhâwicnezi maŋ gogoroŋ mi ecnewec  
\p
\v 7 Tâpiri šâkâŋ i nâŋerao mâcne, Anuturao fokac, irec fuŋne taniŋkeocte boreŋ šeŋaŋ-ticne kuši mâreŋzi bakicne nâŋerao duckekicne.  
\v 8 Hume serereŋ faio juipiehuc sifu docke šaŋ mi eeŋgopeneŋ. Bebekâne juipiehuc sifu mi mana utuckeeŋgopeneŋ,  
\v 9 fific guguriŋ faio juipiehuc sifu mamac babasa mi eeŋgopeneŋ, qa imac enâre-bipiehapie sifu hâmo sipiric mi eeŋgopeneŋ.  
\v 10 Iŋuc ehuc sahac-nâŋecko Jesu hâmoc-ticnere ma amecke jueŋgopeneŋ, i Jesu juju-ticnere ma iŋuc jaha sahac-nâŋecko fuaocte hâcne.  
\v 11 Ŋic jaŋe Jesure erâ dameŋ oombâŋko gâbâ sipiric-nâpohuc hâmocko râec-nâpoeŋgopieŋ, i Jesu juju-ticnere tâpirizi sahac hâhâmo-nâŋecko fua taniŋkeocte iŋuc fua-nâreekac.  
\v 12 Eme šiŋuc fokac: Nâŋerao hâmoczi gie baekac,â ŋoŋerao jujuzi gie baekac.   
\s1 Paulo e Wofuŋ manasiŋkehuc miti giere mi takickewec  
\p
\v 13 Dâŋqâreŋ moc šiŋuc fokac: “No Wofuŋ manasiŋkeekopacte miti muekopac.” Eme nâŋe dâŋqâreŋ irec sâcko Mârozi esoc-nâpoha Wofuŋ manasiŋkeeŋgopeneŋte miti mueŋgopeneŋ.  
\v 14 Ehuc šiŋuc manapaŋkeeŋgopeneŋ: Wofuŋ Jesu bâɋârewec eki nâŋe iŋuc jaha Jesuhec bâɋârec-nâporâ ŋoŋehec mâmâc erao râec-nâpoocmu.  
\v 15 Nâŋe wiac sasawa i ŋoŋere erâ kecšiŋuc muhuc eeŋgopeneŋ: Mitizi haŋ barahame ŋic bocjahazi manahuc Anutu šeri mumuteŋ sâko ecnepie Izi šuhuckeme šuhuc forahuc fozejec.   
\s1 Mâreŋko šâic busâqoc i wawahane  
\p
\v 16 Nâŋe šiŋuc manahuc mi pârâweeŋgopeneŋ: Sahac-nâŋec bâmuzuckehame maŋnâŋec šoaŋne šoaŋne soka biaŋ eekac.  
\v 17 Mâreŋko šâic busâqoc-nâŋec mâmâŋne â tatarane izi eri aŋac biaŋ ŋemâc bâmâcne â fofo sanaŋ bâfua-nârehame guru dindiŋ fonârezokac.  
\v 18 Erâ wiac tâtâc fokac irapec mâcne, wiac soŋsoŋ fokac irapec firâ râqârepene i fua-nârezokac. Wiac hohonene izi sisirowene,wiac mi hohonene izi fofo sanaŋ.   
\c 5  
\s1 Boze wamba-nâŋec raruŋkeme Wofuŋzi ficsanaŋ bâfua-nâreocmu  
\p
\v 1 Nâŋe šiŋuc manaŋgopeneŋ: Mâreŋte ficboze-nâŋec raruŋkeme Anutuzi sambâŋko ficsanaŋ moc bâfua-nâreocmu, fic i mezi mi bakicne, mâc qiŋ sanaŋ qaŋqaŋ qakicne.  
\v 2 Eme nâŋe irec hâcne sambâŋkonec fic i henâreme huocte aŋac-nâpome harac huacbuc ehuc jueŋgopeneŋ.  
\v 3 Maŋ qâqâtâc-nâŋeczi biuctac ezacte i hâcne rojupene sâckeocmu.  
\v 4 Sahac boze-nâŋecko junaŋmu sâc ŋeŋe rârâqâc enâreme hujâi ehuc jueŋgopeneŋ. Nâŋe ŋaqi-nâŋec raŋɋane hetaranaŋte mi enâreekac, i fohame fainao ɋâricne henareme huocte enâreekac. Ehuc hâmocte biŋe ekicne i jujuzi ɋâckeocte mueŋgopeneŋ.  
\v 5 Wiac biaŋ i fua-nâreocte bâmoc-nâpowec i Anutu eki hâcne, ehuc irec kifac Mâro hâcne râe-nârewec.   
\s1 Ʒira mâreŋ jabao jueŋgopeneŋ  
\p
\v 6 Nâŋe irec hâcne mana afeckehuc jueŋgopeneŋ. Ehuc šiŋuc manaeŋgopeneŋ: Mâreŋ sahaczi haefuŋ-nâŋec eha jueŋgopeneŋ,i Wofuŋ basahuc mâreŋ jabao jueŋgopeneŋ.  
\v 7 Dameŋ šiŋuczia maŋzi wiac manasiŋkehuc jujune sawa fokac, fârine hohone aricne.  
\v 8 Erâ sifu mana afeckeeŋgopeneŋ. Ehuc sahachec mâreŋ jabao juju i beherâ mame sâko hae-nâŋecko Wofuŋhec juju irec aŋac-nâpoekac.  
\v 9 Eme juju i mame sâko haeo me mâreŋ jabao junaŋmu ine kecšiŋuc muhuc ropaŋ eeŋgopeneŋ: Aimuŋ jupene Wofuŋzi honec-nâpome sâckezejec.  
\v 10 Ʒiŋuc hâcne manaŋgopeneŋ: Juku šeŋgoma Kristore dâŋ mumutara ŋeŋe fuŋnao fua tâcnepene, sahachec juhuc wiac hurekicne, biaŋne me sâqocne, irec tofa ru sâc bazu-nâreocmu.   
\s1 Paulore fuŋne i Anutu â ŋic mâmâc manambiŋ  
\p
\v 11 Wofuŋ araŋ bacnehuc junaŋte mukicne i manahuc ŋic mu hemiriŋ ejareeŋgopeneŋ. Iŋuc ehapene Anutuzi maŋnâŋec honeekac, â ŋoŋe iŋuc jaha maŋŋeŋiczi fuŋne-nâŋec ŋazame manaeŋgopieŋ.  
\v 12 Nâŋe iŋuc mupene manapie nâŋe harierâ bâbâmiriŋ dâŋ muŋgopeneŋ mi ezejec. Nâŋe mâc ŋaza qâmoc eŋgopeneŋ, eme ŋoŋe ŋic gâcne, maŋtac juhuc sahackopec wiacte sawa penaroŋ eeŋgopieŋ, jaŋe dâŋ i jazahuc bâsâoc-nâponšepieŋ.  
\v 13 Nâŋe maŋnâŋec ŋeŋgoroŋkeekacko ine Anutu gie-ticnere erâ ŋeŋgoroŋkeekac, me maŋnâŋec fâretiŋ foekacko ine ŋoŋe mitihec eniŋte iŋuc foekac.   
\s1 Anutuzi ââgo šâšâfic dâŋ âkendâŋnewec domakac  
\p
\v 14 Kristore maŋjauŋzi maŋnâŋec fenšoŋkehame juhuc šiŋuc mana sanaŋkeeŋgopeneŋ: Mocjahazi okac-nâŋec hâmowecte mâmâc sâko hâmombeŋ ekac.  
\v 15 Mâmâc sâko okac-nâŋec hâmowec ine kecšiŋucte: Juju i nâŋâc nâŋâcnere mâcne, okac-nâŋec hâmorâ faharewec ere erâ junšepeneŋ.  
\v 16 Irec ši miti dameŋko sahac hawari sawa hohonec erâ šâšâŋitac i sâcne mi enaŋmu. Erâ wâc Kristo iŋuc jaha mârâc sahac hawarine honehuc šâŋitambeŋ, irec sâc šiŋuczia mocwâc mi enaŋmu.  
\v 17 Irec ŋic moc Kristorao šuhuckeekac e fuŋmoc eekac. Ine wiac raŋɋane omaewec, ŋicbureŋ, wiac ɋâricne fuawec.  
\v 18 Wiac i Anuture mâsi sasawa. Eki hâcne Kristozi jahacnehec miriŋ bacnâpowec. Erâ nâŋâc miriŋ babac biŋedâŋ mupene haŋ baocte irec gie munârewec.  
\v 19 Ine hâcne Anutu e Kristoo juhuc mâreŋŋic jahacnehec miriŋ bacnâpowec, ehuc kiŋnâŋec behewec. Erâ miriŋ babac dâŋ ŋondeŋ-nâŋecko âkendâŋnewec domakac.  
\v 20 Irec nâŋe Kristore biŋe mumuzi Anuture mu baafec dâŋ ŋazaeŋgopeneŋ. Nâŋe Kristo âkehockehuc numu-ŋareeŋgopeneŋ: Anutuhec miriŋ babac enšepieŋ.  
\v 21 Sâqocnere kâuc bawec e Anutuzi nâŋâcnere erâ sâqocne bapa mucnewec, i nâŋâc Jesuhec qâfâsâehuc Anuture tiŋne jujufâc enaŋte iŋuc hâcne ewec.   
\c 6  
\s1 Paulo e Anuture ŋic juhuc wiac bocjaha erahuc fuŋne-ticne bataniŋkewec  
\p
\v 1 Anuture babaficfâc nâŋe mu âkesiŋ eŋarehuc šiŋuc ŋazaeŋgopeneŋ: “Anuture aki anonoc tahac-ŋopakicne i fârimâc mi ezejec.”  
\v 2 Dâŋ šiŋuc hâcne fokac:  
\q1 “No dameŋ biaŋko mana-garepo  
\q1 â bâbâpiaŋ dameŋko baficgupo.”  
\m Manaŋgopieŋ,dameŋ biaŋ jâmbâŋ šine hâcne, â bâbâpiaŋ dameŋ iŋuc jaha šine hâcne.  
\v 3 Nâŋe ŋic jaŋe gie bapa-nâŋec surenšipiŋte gâŋ ŋezic mi ejareeŋgopeneŋ.  
\v 4 Nâŋe Anuture gieŋic jueŋgopeneŋ irec fuŋne bataniŋkehuc wiac šiŋuc eraeŋgopeneŋ: Ʒâicmaŋko maŋuruc jueŋgopeneŋ, šârâ hâriŋ faio jueŋgopeneŋ, fific guguriŋ faio jueŋgopeneŋ, hâhâwic maŋko jueŋgopeneŋ,  
\v 5 šika faio jueŋgopeneŋ, kâpâcwâru ficko ŋeeŋgopeneŋ, râsi ŋondeŋko jueŋgopeneŋ, giere šâic manaeŋgopeneŋ, guŋɋâri jueŋgopeneŋ, nânâ tâmiricko jueŋgopeneŋ,  
\v 6 bahac fâsâc jueŋgopeneŋ, mamana tarahec jueŋgopeneŋ, bumâteŋ jueŋgopeneŋ, âgo jauŋ ejareeŋgopeneŋ, Tiri Mârohec jueŋgopeneŋ, maŋjauŋ fârihec jueŋgopeneŋ,  
\v 7 dâŋ fâri qizecne mueŋgopeneŋ, Anuture tâpirio jueŋgopeneŋ, mitire sându marohec jueŋgopeneŋ,  
\v 8 mumumbiaŋ â mimi qaqa ŋoŋondeŋko jueŋgopeneŋ, mu bâsâoc â mufec muriŋ ŋoŋondeŋko jueŋgopeneŋ, burecŋic munârehapie siocmâc jueŋgopeneŋ,  
\v 9 fuŋne-nâŋec basahapie biŋe rarahec jueŋgopeneŋ, hâmozo eeŋgopeneŋzi sifu ɋâricne jueŋgopeneŋ, nâpo sipiric ekicnezi sifu mi omaeeŋgopeneŋ,  
\v 10 busâqoc enârekicnezi sifu bubiaŋko jueŋgopeneŋ. hapetaczi sifu ŋic bocjaha bâmec bajareeŋgopeneŋ, wiac babasanezi sifu mâriri sâkohec jueŋgopeneŋ.   
\s1 Paulo e Korinti ŋic jaŋere maŋne kâcɋene domawec  
\p
\v 11 O Korinti ŋicbureŋ, maŋnâŋec ŋoŋerea kâcɋene domame micnâŋec afeckekac hâcne.  
\v 12 Maŋzi sanaŋnea šâfic-ŋopaŋgopeneŋ, ŋoŋere maŋjauŋ ine afecne mac fokac.  
\v 13 Eme no naru motecfâc-nane ŋoŋe ŋazape: Ŋoŋe okacne bazuhuc iŋuc jaha maŋŋeŋic nâŋere râepie kâcɋenea domazejec.   
\s1 Sâqocne â biaŋne jahe ââgo mi enicmu  
\p
\v 14 Ŋic qâpuc jaŋe jâcjeŋic reŋkepie ŋoŋe mi bafic-jopanšepieŋ. Tiŋne â hehesic jahe wemocko ââgo enicmu? Me tatamac â dapâc jahe wemocko šâšâfic enicmu?  
\v 15 Me Kristo â râsi qizec-ticne jahe wemocko maŋ mocjaha enicmu? Me opâ ruac â qâpuc jaŋe wemocko qâfâsâeniŋmu?  
\v 16 Me Anuture ufuŋ â nemuɋâŋ jahe wemocko šušuhuc enicmu? Manaŋgopieŋ, Anutu jujunere ufuŋ i nâŋâc. Anutuzi šiŋuc hâcne muwec:  
\q1 “No ŋondeŋ-jeŋicko ŋeŋe juju epemu,  
\q1 ehuc Anutu-jeŋic ehape  
\q1 jaŋe ŋicfâc-nane junšepieŋ.   
\q1
\v 17 Irec qâpuc behec-joparâ  
\q1 bâtâcko junšepieŋ, Wofuŋzi iŋuc mukac.  
\q1 Erâ wiac mamakâcne ba bâuac mi enšepieŋ,  
\q1 eme noni hezu hewâneŋ eŋarepemu.   
\q1
\v 18 Erâ mamac eŋarehape  
\q1 naru motecfâc-nane erâ junšepieŋ.  
\q1 Wofuŋ bapa-fâre e dâŋ iŋuc mukac.”   
\c 7  
\s1 Paulo e Korinti ŋic maŋjeŋic mi sakarecneniŋte jazawec  
\p
\v 1 Âgo bureŋ, wiac iŋucnere biŋe qanârekicnere wiac mamakâcnezi maŋ sahac-nâŋec hegâpâreekac i šure ɋaɋackenšepeneŋ. Erâ Anutu araŋ bacnehuc maŋɋaɋac jaha junšepeneŋ.  
\v 2 Ŋoŋe maŋŋeŋic mi sakare-nârenšepieŋ. Nâŋe ŋoŋerao wiac hehesic mi embeŋ, me wiac-ŋeŋic ima mi qambeŋ, me wiac-ŋeŋic moc kâŋgâc mi rombeŋ.  
\v 3 No dâŋ i musâqorec-ŋopahuc mi mukopac. No miŋecne mac ŋazapac, maŋnâŋeczi šâfic-ŋopaŋgopeneŋ, i ŋoŋehec mâmâc hâmonaŋte me junaŋte.  
\v 4 Maŋnanezi ŋoŋerao siŋkeha wemo afecne muafec-ŋopakopac, no bunane boc bâmiriŋkekicne, šâic busâqocko šeri kâcɋene fua-narekac.   
\s1 Paulo e Korinti haeonec biŋe manarâ bune biaŋkewec  
\p
\v 5 Makedonia mâreŋko ware fisirâ wemocko âke uruerâ junšapeŋ. Ʒira sahacte biŋe šika â maŋte biŋe hâhâwic, wiac izi fuarâ sisi hâhâŋ enâreha jumbeŋ.  
\v 6 Bebekâne bâmiriŋ-jopaekac Anutu eki hâcne ine nâŋere bâbâmiriŋte Tito ecneme risiewec.  
\v 7 Erâ risiewec irec sawa mâcne, ŋoŋe bubiaŋ dâŋ âzâcnembiŋ, i bafisime manarâ bunâŋec uruewec. Erâ no woricnuhuc jueŋgopieŋ â ki busâqochec jueŋgopieŋ â nore erâ gie-ŋeŋic dopeckehuc šoɋac eeŋgopieŋ, i nâzâme bubiaŋ fekicne manapo.   
\s1 Bušâic ɋaɋacne manarâ biaŋkezo  
\p
\v 8 No mârâc papia moc qâreŋke-ŋarehuc maŋšâic bâfua-ŋarepo, irec bunane mi sâqorekac. Qâreŋkepo ira jâmbomac bunane sâqorewec. Ʒi ine manakopac, i dameŋ bembeŋne sawa maŋšâic bâfua-ŋarewec.  
\v 9 Eme ši bubiaŋ manakopac, ine bušâic manambiŋ irec mâcne, bušâiczi ŋoŋerao maŋ bâbârisie bâfuawec, irec bunane biaŋkekac. Anutu mamana-ticnere sâcko bušâic ɋaɋacne manambiŋte dâŋnâŋeczi mi bâsâqorec-ŋopawec.  
\v 10 Bušâic ɋaɋacne izi maŋ bâbârisie bâfuame ŋiczi biaŋkezo, eme bušâic iŋucne bâfuaocmuzi šâhec irec mi maname sâqoreocmu. Á bušâic gâpâcne, ŋic mamanare sâcko fuaekac, izi ine maŋmutuc bâfuame sipirickezo.  
\v 11 Honeniŋ me, bušâic ɋaɋacnezi ŋoŋerao fârine wemo afecne bâfuawec: Fâro, fuŋne babataniŋ, sâqocne bâbâsue, hâhâwic, mu hejâpec, šoɋac, bâbâtiŋ, wiac iŋuc hâcne bâfuawec. Eme sâqocnere hehesoŋ â ŋeŋezic ŋoŋerao mi fokac, irec fuŋne taniŋkewec.  
\v 12 Mârâc papia qâreŋke-ŋarepo, i ŋic sâqocne bawec ere erâ mâcne, me sâqocne bajarewec jaŋere erâ wâc mâcne, dâŋ ŋazapene Anuture maio micrereŋ-ŋeŋicte fuŋne taniŋkeocte irec qâreŋke-ŋarepo. Eme ŋoŋe iŋuc hâcne ehuc bunâŋec bâmiriŋkembiŋ.   
\s1 Korinti ŋic jaŋe Tito bubiaŋ qacnembiŋ  
\p
\v 13 Erâ bunâŋec bâmiriŋkembiŋ sawa mâcne, ŋoŋe Tito bubiaŋ qacnepie risieme nâŋe wemo afecne mana biaŋ embeŋ.  
\v 14 No mârâc jaha muafec-ŋopahuc Tito âzâcnepo, dâŋ i burec mi ewec. Ŋoŋe dâŋ ŋazape fârinehec efârewec, iŋuc jaha Tito ŋoŋere mumumbiaŋ dâŋ âzâcnepo i wâc fârinehec jaha ewec.  
\v 15 Tito ŋoŋerao fâme araŋ bacnehuc micne reŋkembiŋ, e irec manasuhuc maŋne ŋoŋere boc ecneekac.  
\v 16 No ŋoŋere erâ maŋbahac tâmiric sâcne jupemu, irec bunane biaŋkekac.   
\c 8  
\s1 Makedonia mâreŋkonec kikefuŋ jaŋerao buafec kâcɋene fowec  
\p
\v 1 Âgo bureŋ, Makedonia mâreŋkonec kikefuŋ jaŋerao Anuture jauŋ fuawec irec ŋazanaŋ.  
\v 2 Jaŋe šârâ hâriŋ sâkoo juhuc bahac qahameŋ erâ tac qararacne jueŋgopieŋ, ehame sifu mitire šeri fekicne fojareekacte bubiaŋ wiac ɋâfoŋne bâmockembiŋ.  
\v 3 No jaŋere mana-jâmbâŋkekopac, jaŋe jaŋacne maŋte afeckerâ tâpiri-jeŋicte sâc, erâ wâc sâc i jâuruhuc râembiŋ.  
\v 4 Nâŋe mi ejarehapene jaŋe jaŋac hota-nârehuc mitiŋic jaŋere bubiaŋ wiac bâfuarâ bafic-nâponiŋte mumbiŋ.  
\v 5 Erâ wiac afecne eniŋmu muhapene šiŋuc embiŋ: Qanaŋ maŋjeŋic Wofuŋ qikiŋnecnerâ nâŋe mâmâc Anuture erâ qikiŋne-nârembiŋ.   
\s1 Jerusalem haeonec bubiaŋ wiac bâbâfua-jare  
\p
\v 6 Jaŋe iŋuc embiŋte Titozi ŋoŋerao bubiaŋ gie barâ tofane râewec i bataraocte mucneŋgopeneŋ.  
\v 7 Eme mamanasiŋ â miti mumu â miti fuŋne mamana tara â giere šoɋac â maŋjauŋ eenare, wiac iŋucnere fârine bocjaha bâfuambiŋte bubiaŋ gie mukicne irec iŋuc jaha afeckenšepieŋ.  
\v 8 No hotâ-ŋarehuc mi mukopac, miti mamana gâcne jaŋerao aafec fuawec, eme ŋoŋere maŋjauŋ sâc weniŋucne fokac irec fuŋne taniŋkeocte mukopac.  
\v 9 Ŋoŋe Wofuŋ-nâŋec Jesu Kristo uruc jauŋ-ticnere manaeŋgopieŋ, e mâriri sâkoheczi ŋoŋere erâ hapetac ewec, i ŋoŋe hapetac-ticnere erâ mâririhec eniŋte iŋuc hâcne ewec.  
\v 10 Eme ši dâŋ mâc ŋazakopac i reŋkepie fârinehec ezejec. Ŋoŋe hâcne jara raŋɋanao biac moneŋ bâtureniŋte afeckerâ fuŋkembiŋ.  
\v 11 Eme i šuhuckerâ etarapie aafec-ŋeŋicte fârine, wiac foŋarekac sâc fuazejec.  
\v 12 Wiac buafecte rârâe irec mamana biaŋ fuaocmu, rârâe ine moc e focnekac irec sâc râezejec, mi focnekac irec sâc mâcne.  
\v 13 Bubiaŋte wiac rârâere mukicne i jaŋe sahac mâteŋ juhapie ŋoŋe šocne šâicne mananiŋte mâcne,  
\v 14 ŋoŋere mafa mâririzi dameŋ šiŋuczia jaŋere roroc jâpeme wiac sâckoa fuaocte mukicne, eme juku dameŋ mocko jaŋere mâririzi ŋoŋere roroc jâpeme iŋuc jaha sâckoa fua-ŋarezejec.  
\v 15 Dâŋqâreŋ šiŋuc hâcne fokac: “Bocjaha nusembiŋzi mâririhec mi embiŋ, â afecne nusembiŋzi roroc mi embiŋ.”   
\s1 Tito â âgo jahec-ticne jauŋ ejareniŋte dâŋ  
\p
\v 16 Anutu e Tito esockeme, maŋnâŋezi ŋoŋere erâ bâruŋkekac sâc ijaha erao fuakacte muteŋkenaŋ.  
\v 17 Nâŋe mucnepene manawec sawa mâcne, e jahac maŋticnere afecke-jâmbâŋkerâ fâzo ekac.  
\v 18 Opâ ruac âgo-nâŋec moc, kikefuŋ sasawa jaŋe Biŋebiaŋte gie bapa-ticnere mana biaŋ eeŋgopieŋ, e mâmâc sorepene fâkopirec.  
\v 19 Kikefuŋ jaŋe ŋic e hâcne bubiaŋ moneŋ rorore bafic-nâpoocte bâwosâembiŋ. Gie i Wofuŋ sâsehuc buafec-nâŋecte baŋgopeneŋ.  
\v 20 Mumusifuc fuazacte moneŋ sâko i šâŋe šereŋko sosoŋaŋ ehuc ro qâzuc eeŋgopeneŋ.  
\v 21 Nâŋe wiac epene Wofuŋzia maname biaŋkeocte mâcne, ŋiczi mâmâc manapie sâckeocte mueŋgopeneŋ.  
\v 22 Nâŋe jahehec âgo-nâŋec moc mâmâc sorec-jopapene fâŋgopieŋ, ŋic e dameŋ gâcnao esâicke honepene šoɋac-ticnere fuŋne taniŋkewec, ši ine ŋoŋere bubiaŋ manahuc šoɋac fekicne bâfuakac.  
\v 23 Ŋoŋe Titore manaeŋgopieŋ, e âgo babafic-nane, mâmâc gie bapa ŋicjahec-ŋeŋic jukoperec, â âgo jahec-nâŋec jahere wâc manaŋgopieŋ, jahe kikefuŋ jaŋe sorec-jofaŋgopieŋ, erâ jahe Kristore šuŋe gâpiŋ hâcne.  
\v 24 Nâŋe ŋoŋe muafec-ŋopaeŋgopeneŋ irec dâŋ i fârinehec eocte ŋic iŋucnezi fâpie âgo jauŋ ejarepie kikefuŋ gâcne jaŋe mananšepieŋ.   
\c 9  
\s1 Moneŋ qanaŋ râe bâmoc eniŋte iazawec  
\p
\v 1 Mitiŋic ehâmo-jarehuc moneŋ jareniŋte i sâcne manaŋgopieŋ, irec wemocte boc qâreŋke-ŋarepemu.  
\v 2 Akaia opâ ruac ŋoŋe jara raŋɋanao biac afeckerâ moneŋ bâbâfua fuŋkembiŋ, irec binaŋ Makedonia ŋic bajarepe ŋic gâcne sâko jaŋe šoɋac-ŋeŋicte biŋe manarâ bujeŋic âeckewec.  
\v 3 No muafec-ŋopapo i racne ezacte âgofâc-nane sorec-jopape fâpie mupo iŋuc hâcne erâ šawienšepieŋ.  
\v 4 No nahac šâhec Makedonia ŋic jaŋehec fâpe moneŋ rârâere bititiepie dâŋnane wawahane eme no â ŋoŋe mâmâc mimienšipeŋ.  
\v 5 Irec hâcne ŋic ejarepe bânierâ fâŋgopieŋ. Fâ fisipie bubiaŋ moneŋ râeniŋte nazambiŋ i qanaŋ râe bâmoc epie ŋezejec. Eme micneneŋte moneŋ mâcne, mitire bubiaŋte moneŋ ezejec.   
\s1 Buafecko wiac qiqikiŋ irec Anutuzi maname biaŋkeekac  
\p
\v 6 Erâ ine šiŋuc mukopac: Moc e wiac afecne he sarac eocmu, e wiac afecnea nâ roroc eocmu, â moc e wiac ŋemâcne he sarac eocmu e wiac ŋemâcnea nâ roroc eocmu.  
\v 7 Irec šiŋuc efârezo: Moc e buafec-ticnere sâcko wiac-ticne qikiŋnezejec, jâiŋko me micneneŋte misac. Wiac buafec qikiŋneocmu, ŋic iŋucnere Anutuzi maname biaŋkeocmu.  
\v 8 Anutu e tâpiri runezi buafec-ticnere jambuŋ-ŋopame mâriri fua-ŋareme ŋaŋacne nâ bac eipiehuc bâmec gie fuŋne fuŋne baniŋte wiac mi basaniŋmu.  
\v 9 Dâŋqâreŋ šiŋuc hâcne fokac:  
\q1 “E kada bahuc ŋic hapetac bâmec bajareekac,  
\q1 â buafec-ticne i tofamâc fohuc juocmu.”   
\m
\v 10 Ŋic ukicne bâfua-jareme he sarac eeŋgopieŋ â fârine bâfua-jareme nâ bac eeŋgopieŋ, Anutu e hâcne ŋoŋe wâc he sarac eniŋte ukicne bâfua-ŋarerâ jambuŋkeme buafec-ŋeŋicte fârine fua sawec eocmu.  
\v 11 Eme mâriri sâkohec erâ ŋic bâmec fuŋne fuŋne bajarepie jaŋe nâŋâcnere erâ Anutu daŋge mumuteŋ ecneniŋmu.  
\v 12 Ŋoŋe mitiŋic bubiaŋ wiac ejarepie izi roroc-jeŋic jâpeocmu sawa mâcne, izi daŋge mumuteŋ irec mâriri wâc bâfuame Anuturao qacneocmu.  
\v 13 Ŋoŋe Kristore Biŋebiaŋ mana rereŋ eeŋgopieŋ irec fuŋne bubiaŋ wiac-ŋeŋiczi bataniŋkeme Jerusalem haeonec mitiŋic â opâ ruac gâcne sasawa jaŋehec ââgo šušuhuc-ŋeŋic fuame Anutu mumbiaŋkeniŋmu.  
\v 14 Erâ ŋoŋerao Anutu miti-ticnere fârine fua sawec ekacte maŋzi šâfic-ŋopahuc ŋoŋere erâ Anutu numucneniŋmu.  
\v 15 Anutu buafec-ticne i wemocko sâcne mutaniŋkezo, irec mâc wareckehuc daŋge âzâcnenaŋ.   
\c 10  
\s1 Mâreŋkonec sându marozi juju gie fârine mi bazo  
\p
\v 1 Ʒi Paulo noni Kristo bumâteŋ-ticnere â uruc-ticnere erâ ŋazape mananiŋ. Gâcnezi nore mueŋgopieŋ, “Ʒira ware juhuc miriŋdâŋ enâreekac, â ocna ra juhuc momori dâŋ enâreekac.”  
\v 2 Âgofâc, ŋoŋerao fâ juhuc momori dâŋ ŋazapemurâ irec mi qafeŋnunšepieŋ. Gâcnezi “sahacte wiacko utuckerâ juekac”, nore iŋuc mueŋgopieŋ, ŋic i jaŋe momori dâŋ jazapemurâ maŋnane afeckekac.  
\v 3 Wiac nâŋe sahachec juju i jâmbomac jueŋgopeneŋ, â momori juju ine sahacte hata fokac iŋucko mi jueŋgopeneŋ.  
\v 4 Sându maro bajuhuc juju gie baeŋgopeneŋ, i mâreŋkonec mâcne, i Anuture tâpiri sanaŋhec. Eme izi râsire sac bazueŋgopeneŋ, â qac momori-ticne qapene wahaekac,  
\v 5 â hârâc huec Anuture dâŋ sirickeekac i qa imac eeŋgopeneŋ, erâ Kristore micrereŋ sawa fuaocte mamana fuŋne fuŋne kâpâcwâru baeŋgopeneŋ.  
\v 6 Ŋoŋe micrereŋte afecke-fârehapie nâŋe ŋic gâcne jaŋe qaqatara-jeŋicte bâtiŋ-jopazore woŋec juŋgopeneŋ.   
\s1 Ŋic moczi Paulo mupitiwawec  
\p
\v 7 Wiac moc ši tâtâc fokac i honeniŋ: Ŋoŋe wemocte sahackopec wiac omanere manapie fârine eekac? Ŋoŋeraonec ŋic moczi e jahacnere maname Kristore ŋic fârine eekacko šiŋuc manazejec: E buc Kristore ŋic mi juekac, nâŋe wâc Kristore ŋicfâc jaha jueŋgopeneŋ.  
\v 8 Erâ Wofuŋzi giere tâpiri râe-narewec, ŋoŋe âkesiŋ-ŋopapere, sipiric-ŋopapere mâcne, no irec erâ ropaŋdâŋ piticne murašihuc mupe boc mi sâqore-nareocmu.  
\v 9 Á papia qâreŋke-ŋareekopac irec manapie mu hâhâwic dâŋ mi ezejec.  
\v 10 Ʒiŋuc hâcne munareeŋgopieŋ: “Papiao dâŋ bipinehec â tâpirinehec qâreŋkeekac, sahaczi maic-nâpoekac ine weweaŋne, â dâŋ mumu-ticne ine wawahane.”  
\v 11 Ŋic iŋucne jaŋe šiŋuc mananšepieŋ: Nâŋe šoricko juhuc dâŋ qâreŋkeeŋgopeneŋ, dâŋ irec fârine ŋondeŋ-ŋeŋicko juhuc bâfuaeŋgopeneŋ.   
\s1 Giere sahac fefe mi juzo  
\p
\v 12 Ŋic sahac fefe jueŋgopieŋ jaŋerao nâŋe iŋucnezi wemocko šuhuckerâ sâc babac enaŋmu. Ŋic i jaŋe hâcne gâcne nâŋere eebapa irec mi manasuhuc jaŋacnere sawa muhuc sahac fefe dâŋ kosa woseeŋgopieŋ.  
\v 13 Nâŋe ine Anutuzi giere sâc banârewec iŋuc bafâku ŋoŋerao fisimbeŋ, irec mac manasuhuc mumuafec dâŋ mueŋgopeneŋ, â sâc tâmiricko kosa mumu ine mi eeŋgopeneŋ.  
\v 14 Nâŋe gie-nâŋecte sâc i mi musokaeŋgopeneŋ, gie rukec-nâŋec i jâmbomac ŋoŋerao fokac, nâŋe hâcne bâbâni ŋoŋerao fisirâ Kristore Biŋebiaŋ qanaŋ ŋazambeŋ.  
\v 15 Nâŋe ŋic gâcne jaŋere gieo kâŋgâc raši domahuc sahac fefe dâŋ kosa mumu i mi eeŋgopeneŋ. Mamanasiŋzi ŋoŋerao fua sawec eme gie rukec-nâŋec bâsokanaŋte ine jâmbomac maŋnâŋec domaha jueŋgopeneŋ.  
\v 16 Eme ŋic râpe-ŋeŋicko juŋgopieŋ jaŋerao Biŋebiaŋ muranaŋmu. Á ŋic mocte gie fârine rauckehuc pepec dâŋ mumu i mi eeŋgopeneŋ.  
\v 17 Moc e mumuteŋ dâŋ muzo murâ Wofuŋte erâ muzejec.  
\v 18 Moc e jahacne sahac mumbiaŋkeme e miti fârihec ekac mi mucnezo, Wofuŋzi mumbiaŋkeme miti fârihec ekac muzo.   
\c 11  
\s1 Miti furune moc mi fokac  
\p
\v 1 Ŋoŋe manahapie mutucdâŋ piticne ŋazape. Sifu mac mananšepieŋ.  
\v 2 No ŋoŋere erâ qizec qaekopac, erâ qizec qaqa dâŋnane i Anuturaonec. Noni ŋoŋe Kristore biŋefâc erâ pectâc juniŋte ŋic mocjaha ehec bâturec-ŋopapo.  
\v 3 Ʒi ine homazi Ewa sioc ecnehuc bâdockewec iŋuc jaha ŋoŋe ŋic gâcnezi eatuc-ŋopapie maŋŋeŋic fâuckeme Kristo râŋgeŋ rocnenšipiŋte manabâc ekopac.  
\v 4 Ŋoŋerao ŋic moczi fisirâ Jesure fuŋne nâŋe ŋazaeŋgopeneŋ ijaha mâcne, hawarine moc ŋazaocmu, â Mâro nâŋeraonec rombiŋ i mâcne, furune moc ŋareocmu, â Biŋebiaŋ nâŋeraonec manambiŋ i mâcne, maracne moc ŋazaocmu, i ŋoŋe mi qatarahuc mâc manapie sâckeekac.  
\v 5 No nahacnere manape norao wiac i me i basahuc aposolo fekicne sâko jaŋere jujuwicnao jukopac mi eekac.  
\v 6 No miti muminširiŋkerâ mumu i mi mecne fonarekac, â mitire fuŋne mamana ine manaekopac, erâ irec fuŋne baratie-fârehuc mâmâc-ŋeŋic bataniŋke-ŋarepo.   
\s1 Miti gie bapa burecne  
\p
\v 7 Me nahac wahamicne juhuc ŋoŋe ikisiŋ-ŋopahuc Anuture Biŋebiaŋ katucmâc ŋazapo i sâqorewec me?  
\v 8 Ŋoŋerao miti gie bapemurâ kikefuŋ gâcne jaŋe jâmbomac moneŋ mafa jowac ropo.  
\v 9 Ŋoŋerao ine wiac basac bahameŋ juhuc mubâre mi eŋarepo. No batac qatac juhape Makedonia mâreŋkonec âgofâc-nane fisirâ wiac nare gumec embiŋ. Á ŋoŋerao ine mâc juhape nore šâic mi manambiŋ â jufehuc wâc mi mananiŋte mukopac  
\v 10 Kristore dâŋfâri maŋnaneo foha mukopac: šeridâŋ inane Akaia mâreŋko moc mi bawaha-narezo.  
\v 11 Muŋgopieŋ,ŋoŋere mi enarehame iŋuc eekopac? Iŋuc aricne,i Anutuzi manakac.  
\v 12 Wiac eekopac i ehuc jupemu, erâ i mâc mâcne, ŋic gâcne jaŋe Paulore sâcko juŋgopeneŋ muhuc maŋjeŋic bafenšipiŋte siŋ qatara-jareekopac  
\v 13 Ŋic iŋucnezi aposolo burecne â miti gie bapa siochec juhuc Kristore aposolofâc nâŋere sahac hawari sawa eeŋgopieŋ.  
\v 14 Erâ i wiac furune mi eeŋgopieŋ, Sataŋ e jahacne wâc aŋelo tatamachec jaŋere hawari tinac eekac,  
\v 15 eme irec gie bapa ŋicfâc-ticne jaŋe iŋuc jaha tiŋnere kiŋaŋ qaqa jaŋere hawari rojueŋgopieŋ.   
\s1 Korinti ŋic jaŋe gieŋic burecne mi bâsuec-jopambiŋ  
\p
\v 16 Mupac i mocwâc mupe, nore manapie ŋic mutucne mi ezejec. Erâ sifu muzo murâ muniŋ, ehuc mana-narehapie sahac-nane piticne muteŋkepe  
\v 17 No ši dâŋ mupemu i Wofuŋte micsâcko mi mupemu, mâc mumuteŋ dâŋ fuŋkekicnere sifu mutuc erâ mupemu.  
\v 18 Ŋic gâcnezi sahackopec wiacte mumumbiaŋ dâŋ mueŋgopieŋte no iŋuc jaha epemu.  
\v 19 Oi, fuŋne mamana ŋoŋe, gâcnezi mutucdâŋ ŋazapie manapie sâckeekac hâcne.  
\v 20 Á kiŋaŋ qaqafâc-jeŋic bacŋopapie iŋuc jaha manapie sâckeekac, â ŋowac ro nâc eŋareniŋmu me eatuc-ŋopaniŋmu me ŋicbomboŋ eŋareniŋmu me imac-ŋopaniŋmu, i ŋoŋe manapie sâcke-fâreocmu hâcne.  
\v 21 Nâŋe gegec dodocnezi iŋuc sâko wemocko eŋarenšapeŋ, i mana sâqorehuc mukopac. Moc e wiac irec me irec penaroŋ eocmu, i no ezo murâ sâcne epemu. Dâŋ i mutucne, i mana-bipiehuc mukopac.   
\s1 Paulozi šârâ šâpâo mâretec fehuc juwec  
\p
\v 22 Jaŋacnere Judaŋic mueŋgopieŋ, no wâc ijaha. Jaŋacnere Israe ŋic mueŋgopieŋ, no wâc ijaha. Jaŋacnere Abrahamte ɋâric mueŋgopieŋ, no wâc ijaha.  
\v 23 Jaŋacnere Kristore gieŋic mueŋgopieŋ, no ši sifu maŋmutuc dâŋ mupe, no Kristore gieŋic sâc moc. No giere šâic manaekopac i sâc moc, â kâpâcwâru ficko feekopac i sâc moc, â šika kiekopac i sâc moc, â sipirickezo eekopac i sâc moc.  
\v 24 Judaŋic jaŋe dameŋ memoc repazi 39 numbiŋ,  
\v 25 dameŋ jahec â moc kâcbiŋzi nukicne, moc i qânâzi hehâmocnumbiŋ, dameŋ jahec â moc woke hericke fâuc eme hâwecko hurâ hu epo, ŋafe šoaŋ moc woke sâqoreme hâwecko qac qâsoriehuc jupo.  
\v 26 Erâ sopâc kâte hârâc tiki fotâcne qâqâwiric bazu bâfeŋ ehuc jupo, opâ rumio šârâ šâpâ faio fehuc jupo, râsi ŋondeŋko šârâ šâpâ faio fepo, Judaŋic ŋondeŋko šârâ šâpâ faio fepo, qâpuc ŋondeŋko šârâ šâpâ faio fepo, ŋic jujuo šârâ šâpâ faio fepo, tuhuo šârâ šâpâ faio fepo, hâwecko šârâ šâpâ faio fepo, mitiŋic burecne jaŋere ŋondeŋko šârâ šâpâ faio fepo.  
\v 27 Iŋuczi iŋuc ehuc hume serereŋ â huacbuc qâbucne juwarepo, ehuc ŋafeo guŋɋâri juju,nânâ opâre hâhâmo, hoe mâmâteŋte ɋarac ɋarac qaqa, ŋaqi bilaŋke babasa, iŋuc ehuc juekopac.  
\v 28 Erâ i sawa mâcne, šoaŋne šoaŋne kiŋaŋ fisihuc fâro âkefec enarepie hae sâc kikefuŋ jaŋere mana mezac ehuc juekopac.  
\v 29 Wemocko hae moczi qau bititicne juhapie âke uruerâ sâcne jupemu? Wemocko hae moczi qâsoriehapie sâcne ŋemâteŋkepemu?  
\v 30 Eme no irec wemo-nane musokapemu? Gegec dodoc-nane mocjaha musokape sâckeocmu.  
\v 31 Wofuŋ Jesu ere Anutu â Mamac, e mumuteŋ hatizi dâŋ jâmbomac mukopac i manakac.  
\v 32 Damasko haeo juhape ŋicwofuŋ Areta ere kiazi kâpâcwâru bacnuocte hae upeo somâ râewec.  
\v 33 Eme irec âgofâc-nane jaŋe kâdocko ŋihecnurâ sacrâpeo âke suecnupie hurâ wisepo.   
\c 12  
\s1 Paulozi wiac šâŋe hazec furu hone manac ewec  
\p
\v 1 Mumuteŋ dâŋ mupene mi sâckeekac, erâ sifu mupe. Ehuc Wofuŋzi maŋko fuac â maŋbâwiŋ enarewec, irec dâŋ binaŋ epe.  
\v 2 No Kristore ŋic moc manakopac e wiac moc honerâ jukuhame jara 14 ekac. Ŋic e hâcne Wofuŋzi maŋbâwiŋ ecneme sambâŋ namba 3 ira fewec. I sahachec me sahac tâmiric ewec, i no mi manakopac,Anutuzia manakac.  
\v 3 Eme ŋic e Wofuŋzi maŋbâwiŋ ecneme paradisio hâcne ferâ dâŋ miczi mi mumune â mâreŋŋiczi mi mumufuane i manawec.  
\v 4 No ŋic e manakopac, â sahachec juhuc me sahac hetarahuc ewec, i no mi manakopac, Anutuzia manakac.  
\v 5 Ŋic ere erâ mumuteŋ dâŋ mupemu, nahacnere mi mupemu, ine muzo murâ gegec dodoc-nane sawa musokapemu.  
\v 6 Mumuteŋ dâŋ mupe muzac, i jâmbomac dâŋ muzapore ŋic mutucne mi ezapo. Erâ nore manapie fefene boc ezacte ine mi epemu, wiac mupe bape ŋaŋac hone manac eeŋgopieŋ izia fozejec.   
\s1 Paulore sahac biucko šârâ moc fowec  
\p
\v 7 Wofuŋzi wiac šâŋe hazec furu nowatuwec, irec maŋnane fezacte sahac biuc-naneo šârâ moc duckewec, i Sataŋte kiŋaŋŋic moc e maŋnanezi boc fezacte mehuhuŋzi hecnuhuc juocte mukicne.  
\v 8 Eme behecnuocte Wofuŋ wâsickekuhape jahec â moc ewec.  
\v 9 Eme dâŋ šiŋuc nazawec: “Jauŋ-nanezi sâcguekac â tâpiri-nanezi dodoc rorokacko fua ɋârâŋkeekac.” Irec Kristore tâpirizi norao mâckeocte dodoc rorokac-nanere manape feha mumbiaŋkezepac.  
\v 10 Eme Kristore erâ dodoc rorokac epemu me šika kipemu, me hume serereŋ jupemu, me fific guguriŋ â imaŋ gomaŋ faio jupemu, i sifu bubiaŋ manaekopac. No dodoc rorokacko sanaŋkeekopac hâcne.   
\s1 Paulo aposolo gie-ticnere fuŋne taniŋkewec  
\p
\v 11 Ʒi mutucdâŋ mupac, i ŋoŋe enarepie mupac. Ŋaŋac mumbiaŋnupie sâckezac. No jawa omane juekopac i manakopac, erâ aposolo fekicne jaŋere wahamicne juju ine mi juekopac.  
\v 12 No ŋoŋerao gie maŋuruc jaha bape mâsi â wiac šâŋe furu â wiac tâpirihec fuahuc izi aposolo fuŋne-nane bataniŋkewec.  
\v 13 Eme ŋoŋe wemo basahuc kikefuŋ gâcne jaŋere sâc mi embiŋ? Mâc wiac ŋowac ro nâc ee i mocjaha mi eŋarepo. Hehesic-nane i mi mana sâqore-narenšepieŋ.   
\s1 Paulo e Korinti ŋic jaŋere maŋne kâcɋene domawec  
\p
\v 14 No jajahec iqic-ŋopapo, eme ši mocwâc fâpere šawiehuc jukopac. Fârâ mârâc epo ijaha ehuc sahacte dopere mi bâšâic-ŋopapemu. No moneŋ mafa-ŋeŋicte mâcne, ŋaŋacnere harac eekopac. Naru moteczi neŋgoc mamac wiac hure-jareniŋte mi mukicne, neŋgoc mamaczi naru motec hure-jareniŋmu ine sâckeocmu.  
\v 15 No ine maŋ qâqâtâc-ŋeŋic biaŋkeocte moneŋ mafa sawa mâcne, juju-nane wâc qaisockezo afeckekopac. Nore maŋzi ŋoŋere kâcɋene domaha ŋoŋerezi nore piticne domaoc me?   
\p
\v 16 Ŋic gâcnezi nore šiŋuc mueŋgopieŋ: Wiac tâtâc nânâwoc ro i mi ewec. Á soŋsoŋko ŋic eatuc-jopahuc wiac jojowac ro i ewec mecne.  
\v 17 Irec ŋoŋe muniŋ, no ŋicfâc-nane ŋoŋerao sorec-jopahuc ejarepe wiac moc ŋowac rombiŋ me?  
\v 18 Erâ Tito fâocte mucnepo ehuc opâ ruac moc sorepe jojowac erâ fâpic. Eme Titozi fârâ wiac moc ŋowac rowec me? Nâhe Mâro wirec â hata wirec mi jukoperec me?   
\s1 Ŋic gâcnezi maŋŋjeŋic bârisieniŋte uŋ jazawec  
\p
\v 19 Dâŋ mueŋgopeneŋ i esecne mana warepie sahac ŋeŋezic dâŋ eekac me? Erâ iŋuc mâcne, nâŋe Kristohec juhuc Anuture maio dâŋ mueŋgopeneŋ, erâ âgofâc, irec me irec mâcne, ŋoŋe âkesiŋ-ŋopanaŋte dâŋ mueŋgopeneŋ.  
\v 20 No ŋoŋerao fârâ honec-ŋopape mi sâckezacte, â ŋoŋe nore iŋuc jaha manapie mi sâckezacte manabâc ekopac. Ŋoŋerao kisâ, iiŋguuŋ, kimbeŋ, hehefaric, micko âkec, gupe, penaroŋ, hesi qâsifuc, wiac i fohame fâ bâfuazipore maŋbahacnukac.  
\v 21 Ŋoŋeraonec gâcnezi maŋwânâŋ, boe sau, nânâ qowi âmbâŋ nânâ, i ehuc maŋjeŋic mi bârisieeŋgopieŋ, eme iŋuc juhapie ŋoŋerao fâpe Anutu-nanezi bawahacnume ŋic iŋucne jaŋere ki busâqoc ezipore mana mezac ekopac.   
\c 13  
\s1 Bahacdâŋ mumu fuaocmu  
\p
\v 1 Ʒi ŋoŋerao mocwâc fâpe jahec â moc eocmu. Fâ fisipe ŋic jajahec me jahec â moczi mocte bahacte fuŋne mupie dâŋticne munaŋmu.  
\v 2 Ŋic bahachec â gâcne ŋoŋe mâmâc arecne 2 fâpo ira uŋ ŋazapo ijaha wiwicko juhuc mukopac, ši šâhec mocwâc fârâ mi akic-ŋopapemu.  
\v 3 Nore maŋko dâŋ râeme muekopac Kristo hâcne, ere tâpiri fuame honezo mueŋgopieŋte honenšepieŋ. Kristo e ŋoŋerao gie-ticne rorokacne mâcne, tâpirihec baekac.  
\v 4 Mârâc jâmbomac rokaweme maripoŋko qambiŋ, ši ine Anuture tâpirihec faharewec jukac. Nâŋe iŋuc jaha ere erâ rokaweeŋgopeneŋ irec ere erâ wâc Anuture tâpirio ŋesiŋnehuc jujure fuŋne ŋoŋerao bajaŋgeŋkenaŋmu.   
\s1 Uŋsawaŋ dâŋ  
\p
\v 5 Ŋoŋe mamanasiŋhec jueŋgopieŋ me mâcne, irec maŋŋeŋic esâicke honehuc fuŋne bataniŋkenšepieŋ. Me Jesu Kristozi maŋŋeŋicko juekac irec fârine basaeŋgopieŋ? Iŋuc eeŋgopieŋko sahaczi mitiŋic muŋarezo.  
\v 6 Nâŋe ine sahaczi mitiŋic mi jueŋgopeneŋ, iŋuc hone tarac-nâponiŋte worickekopac.  
\v 7 Anutuzi soŋaŋ-ŋopame bahac mi bâfuaniŋte numucnehuc jueŋgopeneŋ. Nâŋe honec-nâpopie mitiŋic fârine enaŋmu me mâcne, irec mi mueŋgopeneŋ, ŋoŋe mitidâŋ reŋkepie fârinehec eocte mocjaha mueŋgopeneŋ.  
\v 8 Nâŋe iŋucnezi wemocko dâŋfâri râsi ecnenaŋmu, âgo ecnenaŋmu sawa fokac.  
\v 9 Nâŋe tâpiri basahuc juhapene ŋoŋe tâpirihec juniŋmu i bunâŋec biaŋkeocmu. Erâ maŋŋeŋiczi soka sanaŋ eocte Wofuŋ numucneeŋgopeneŋ.  
\v 10 No ŋoŋerao fârâ šâire-ŋarezipore qanaŋ šoricko juhuc uŋdâŋ qâreŋke-ŋarekopac. Wofuŋzi tâpiri narewec, izi imac-ŋopapemurâ mâcne, hume keteŋ eŋarepemurâ narewec.   
\s1 Jambuŋdâŋ  
\p
\v 11 Erâ dâŋ mutarahuc kecšiŋuc mupe: Ŋoŋe bubiaŋko junšepieŋ, erâ uŋsawaŋ dâŋ manarâ maŋŋeŋic ba emasaŋ enšepieŋ. Ŋoŋe maŋ mocjaha efârerâ wamao junšepieŋ. Eme Anutu e maŋjauŋ â wama runezi ŋoŋehec juocmu.  
\v 12 Ŋoŋe mitio meo babac efârenšepieŋ. širec mitiŋiczi manasuc-ŋopa-fâreŋgopieŋ.  
\v 13 Wofuŋ Jesu Kristore aki anonoc â Anuture maŋjauŋ â Tiri Mârore miriŋ i ŋoŋerao fohuc juzejec.