\id 1TI 1 Timothù, Kate, PNG, wwh 12/92 
\h TIMOTEO I 
\toc1 Timoteo I 
\toc2 Timoteo I 
\toc3 1Ti 
\mt1 TIMOTEO I  
\ip Timoteo e Lisitera haeo fuawec. Mimi-ticne â neŋgoc-ticne jahe Juda ŋokac. Neŋgoc-ticne e Miti Opâ ruacnekicne (Aposolo 16:1-13(c) mamac-ticne ine ŋic qâpuc (Timoteo II 1:5). Timoteo e ɋieonecteaŋ miti manahuc juku sokawec (Timoteo II 3:15). Paulo e miti kiŋaŋ šâšâŋiŋ raku Lisitera haeo fisirâ Timoteo motec bawec. Eme izia Paulo bâjâpehuc juwec sanaŋ. Ehuc miti giere bafickewec â kiŋaŋ rac warec ehuc juwec. Paulo e fuŋne-ticne Filipi 2:19-22 ira qâreŋkewec. Juku Timoteo soreme Efeso haeo miti mamana guru hone soŋaŋ â hume keteŋ ejarewec. E jahac ine Makedonia mâreŋko juhuc papia qâreŋkecnewec (gaŋ 1:3). Timoteo e Paulozi hâmohame Efeso haeoa juwec.  
\ip Efeso haeo ŋic tucnezi miti qâsuahuc dâŋ hehesicne mupie haŋ bawec. Jaŋe qâpucdâŋ â Judaŋic jaŋere dâŋ â mitidâŋ i mâmâc bâturepie sisifucne ewec. Eme Timoteo e dâŋ i hehâmoocte Paulozi bufac qacnewec (gaŋ 1). Erâ tutumaŋ-jeŋicko gae nunumure â miti mumure dâŋ mutâcnecnewec (gaŋ 2). Erâ mitire micne bapa â babafic juju bapa-jeŋicte dâŋ šuhuckewec (gaŋ 3). Erâ Timoteo e jahacne juju bapare mâmâc qâreŋkewec (gaŋ 4). Ʒâhec ine hozec jaŋere dâŋ â soŋaŋ kiŋaŋ qaqa jaŋere dâŋ mutâcnecnewec (gaŋ 5 â 6:1-2(c) erâ ŋic hehesicne jaŋere fuŋne rituwec (gaŋ 6:3-10), â Timoteo e sâmbâŋ boreŋte fotarieocte bufac qacnewec wâc (gaŋ 6:11-21).  
\c 1  
\s1 Jambuŋdâŋ  
\p
\v 1 Paulo no Anutu bâbâpiaŋ-nâŋecte micte â Kristo Jesu mamanac-nâŋecte micte Kristo Jesure aposolo juekopaczi  
\v 2 mitio motec jâmbâŋ-nane Timoteo go papia ši qâreŋke-garekopac. Anutu Mamac â Wofuŋ-nâŋec Kristo Jesu eraonec aki anonoc â uruc jauŋ â wama gorao fotâcnerâ fozejec.   
\s1 Mitire numusifuc irec dâŋ  
\p
\v 3 No Makedonia mâreŋko razo ehuc gazapo iŋuc ezemec, ehuc Efeso haeo šuhuckerâ juhuc, ŋic tucnezi miti musifuckeeŋgopieŋ jaŋe qatara-jaretec behenšepieŋ.  
\v 4 Jaŋe nemu binaŋ bahuc ŋic gaŋne gaŋne juwefumbiŋ irec fuŋne qapie rašic wefuc eme mu qaqataranehec fuaekac. Iŋuc epie Anutu manasiŋkehuc kiŋaŋ qaqacne i wahame sâqoreekac.  
\v 5 Miti mumure fârine ine šiŋuc fuame sâckeocmu: Maŋtaniŋ â maŋšuruc â maŋ mamanasiŋhec juhuc maŋjauŋ bâfuazo.  
\v 6 Ŋic tucnezi ine miti hata i qâsorierâ dâŋ jawane fârimâc bâfuambiŋ bajuŋgopieŋ.  
\v 7 Erâ jaŋacnere šiŋuc mueŋgopieŋ: Nâŋe Mosere sâcmutâc dâŋ irec qaqazu, iŋuc murâ dâŋ kosa muhuc irec sasanaŋ bâfuaeŋgopieŋ.   
\s1 Sâcmutâc dâŋ i ŋic hehesicne jaŋere mukicne  
\p
\v 8 Nâŋâc sâcmutâc dâŋte šiŋuc manaeŋgopeneŋ: I dâŋ biaŋne, erâ fuŋneticne mana-hâmohuc bajuzo.  
\v 9 Fuŋne-ticne ine šiŋuc fokac: Sâcmutâc dâŋ i ŋic bahacmâc jaŋere biŋe mi ekac, ŋic sindaŋne, râŋgeŋne, araŋ bapa tâmiric, sâqocne bapa, maŋwânâŋhec, šaubacne, neŋgoc mamac sisipiric, šika qaqa,  
\v 10 boe sau ŋic, ŋiczia ŋicko sasec gie bapa, ŋic ŋokac fiuc rocjoparâ gâcne qikiŋne-jarehuc moneŋ bâbâfua, burecŋic, Wofuŋte šâŋe muhuc burecko mumupaŋ ee, erâ wiac gâcne moc dâŋ fari biaŋ râsi ecneekac, wiac iŋucne eeŋgopieŋ jaŋere hâcne sâcmutâc dâŋ mukicne.  
\v 11 Anutu juju aŋac rune ere Biŋebiaŋ eri tatamacnehec tahacnukicne izi hâcne iŋuc mufuakac.   
\s1 Jesuzi Paulo kiŋticne behehuc miti gie mucnewec  
\p
\v 12 Tâpiri narehuc basanaŋnuwec Wofuŋ-nâŋec Kristo Jesu e daŋge âzâcneekopac. Eki mana-nareme sâckeme betoŋnuhuc miti gie munarewec hâcne.  
\v 13 Juwicnao e musoriŋkehuc ŋicfâcne râsi ejarerâ jopa qâšâic ejarehape sifu iŋuc enarewec. No Wofuŋte fuŋne kâuc bahuc mamanasiŋ-nane tâmiricte iŋuc epore akicnuwec.  
\v 14 Eme Wofuŋ-nâŋecte aki anonoczi norao qaja fuseme Kristo Jesuraonec mamanasiŋ â maŋjauŋhec epo.  
\v 15 Jesu Kristo e sâqocne bapa bâpiaŋ-nâpoocte mâreŋko wahawec, dâŋ i fârine jâmbâŋ â mâmâc sâko ro maŋ eenere sâc. Sâqocne bapa jaŋere micne no hâcne.  
\v 16 Eme Jesu Kristo e akicnurâ, uruc jauŋ-ticne ŋemâcne fokac, irec fuŋne norao furu jaha bataniŋkewec i mâc mâcne, ŋic šâhec mâsi i hâcne norao honerâ e manasiŋkerâ juju sanaŋko fisiniŋte iŋuc enarewec.  
\v 17 Juju sanaŋte Wofuŋ Sâko, mi hâhâmone â mi hohonene, Anutu sâko mocjaha hâcne, ere šâŋe biŋe â eri tatamac forašihuc juzejec sanaŋ. Jâmbomac.   
\s1 Mitire momori gie bazo  
\p
\v 18 Motec-nane Timoteo, qanaŋ gore findaŋdâŋ fuawec irec sâcko dâŋ mutâcne-garekicne i hâcne râe-garekopac. Go i bajuhuc momori gie biaŋ sanaŋkerâ bazemec.  
\v 19 Erâ mamanasiŋge fošakierâ fohame maŋge soŋaŋketec ɋaɋacnea fozejec. Ŋic tucnezi maŋɋaɋac juju râpeckembiŋte mamanasiŋ-jeŋic ŋeŋgoroŋkeme qâsoriembiŋ.  
\v 20 Jaŋeraonec moc Himenaio â moc Alesande, eme jahe Sataŋzi bâšâic-jofakume mumusoriŋ-jekic behenicte erao râec-jofapo.   
\c 2  
\s1 Nunumure dâŋ  
\p
\v 1 No bâbâni dâŋ moc gaza qâmoc epe: Nunumu wâwâsic â daŋge mumuteŋ izi ŋaŋacne â ŋic gâcne sasawa dopec-jopahuc  
\v 2 ŋicwofuŋ â kia gawamaî mâmâc dopec-jopanšepieŋ. Eme soŋaŋ-nâpohapie wamao mâteŋne â mitine juhâmopene ŋiczi mana-nârepie fezejec.  
\v 3 Izi biaŋkeocmu, â bâbâpiaŋ-nâŋec Anutu e irec maname sâckeocmu.  
\v 4 Eki ŋic mâmâc sasawa biaŋkerâ dâŋ fâri qizecne mana maŋ eniŋte muekac hâcne.  
\v 5 Anutu mocjaha hâcne junârekac, erâ Anutu â ŋic ŋondeŋ-nâŋecko ŋicwirec-nâŋec mocjaha Jesu Kristo e ŋic ekicnezi junâre-fârekac.  
\v 6 Eki hâcne juju-ticne qikiŋnehuc mâmâc sâko kiwiric-nâŋec rowec, irec biŋezi dameŋ-ticnao haŋ baocte.  
\v 7 No irec biŋe mumu â aposolo jupemurâ râecnukicne, erâ ŋic qâpuc dâŋ fâri qizecne â mamanasiŋte fuŋne jaza mutâc epemurâ qaqazu gie munarekicne. Dâŋ i burec mâcne, jâmbomac mukopac.   
\s1 Ŋic â ŋokac jaŋere dâŋ  
\p
\v 8 Ŋic jaŋere mukopac, jaŋe hae sâc aaric â maŋjahec tâmiric juhuc mejeŋic ɋaɋacne foha Anuturao sicnerâ numunšepieŋ.  
\v 9 Á ŋokac jaŋere mukopac, jaŋe ŋaqi aickerâ rojuhuc rume rume jupie izi eri-jeŋic ezejec, â qizec susuc-jeŋicko mâsi qâreŋ ee, me eri wiac furi sâko qoqonaŋ, me ŋaqi hohonebâcne ro juju ine mi enšepieŋ.  
\v 10 Ŋokac mitio juzo muŋgopieŋzi eehâmo gie bapie sâckeocmu.  
\v 11 Ŋokac jaŋe wahamicne juhuc niniŋkerâ hazec râehuc mamana gie banšepieŋ.  
\v 12 Ŋokaczi qaqazu gie baocte me ŋic qâhuc-jopaocte mi manacnekopac, e mâc rumerâ juzejec.  
\v 13 Adam e bâbâni bâfuakicne â Ewa ine šâhec.  
\v 14 Adam e eesaic rune mi manacnewec, ŋokaczi ine manacnerâ qaqatara bâfuawec.  
\v 15 Ŋokaczi motec roro-ticnere biaŋkeocmu, ine mamanasiŋhec â maŋjauŋhec erâ maŋɋaɋac juniŋmu ŋokac i jaŋe iŋuc hâcne eniŋmu.   
\c 3  
\s1 Mitire micne bapa irec dâŋ  
\p
\v 1 Moc e mitire micne bapa juocte muocmu, e gie furi sâkore ecnekac muzo, dâŋ i jâmbomac.  
\v 2 Eme mitire micne bapazi bahacmâc juhuc ŋokac mocjahahec juzejec, erâ maŋsowa juzejec, eesifuc tâmiric metâne juzejec, jauŋhec juzejec, qaqazu gie basarickehuc bapane,  
\v 3 waiŋ opâ âmbâŋ mi nâzejec, šikafac aricne, urucne â wamane juzejec, moneŋ mafare mubâre mi ezejec,  
\v 4 e jahacne wiacfâc sâcne soŋaŋ-jopazejec erâ pectâc juhuc naru motecfâcne mu bâtiŋ ejareme micrereŋhec junšepieŋ.  
\v 5 Moc e wiacfâc-ticne sâcne mi soŋaŋ-jopaocmu, e wemocko Anuture kikefuŋ mamac ejareocmu.  
\v 6 Erâ opâ ruac ɋâricne moczi mitire micne bapa mi juzejec, iŋucnezi penaroŋ eme Sataŋzi doc bazacte.  
\v 7 Ŋic ŋokac kikefuŋko mi rašimbiŋ jaŋe wâc manacnepie sâckeekac ŋic iŋucnezi mitire micne juzejec, jaŋe musoriŋkepie Sataŋzi maŋne bâsifuckeme ere bitiŋko kizacte.   
\s1 Babafic jaŋere dâŋ  
\p
\v 8 Babafic jaŋe iŋuc jaha ŋic metâne junšepieŋ, nameŋ sosohoc mi junšepieŋ, waiŋ opâ nâ âmbâŋ mi enšepieŋ, moneŋ mafare mubâre mi enšepieŋ.  
\v 9 Miti boreŋ soŋsoŋ fowarehuc juwec i maŋɋaɋacko duckepie fozejec.  
\v 10 Jaŋe wâc qanaŋ ba esâic ejarezo” eme fuŋne-jeŋic hone manac epie sâckeme gie jarezo.  
\v 11 Ŋonâŋfâc-jeŋic jaŋe iŋuc jaha metâne junšepieŋ, gupe micko âkec mi enšepieŋ, maŋsowa juhuc wiac sasawa mu bac epie fâri fideteŋ efârezejec.  
\v 12 Babafic moc e ŋokac mocjahahec juzejec. Naru motecfâc-ticne â wiacfâc-ticne sâcne soŋaŋ-jopazejec.  
\v 13 Eme babafic moc e gie-ticne bame biaŋkeme maŋte juju šae biaŋne bâfuaocmu â Kristo Jesurao qohotahuc giere afecke-hâmoocmu.   
\s1 Mitire gumi â hobeteŋne  
\p
\v 14 No gorao biac fâpemurâ manasuhuc sifu kecšiŋucte dâŋ ši qâreŋke-garekopac:  
\v 15 Wiac moczi niŋgiŋnume jupe šorame Anuture ficko ju bac ezore fuŋne kâuc bazic. Anutu jujune ere kikefuŋfâc jaŋe hâcne ficticne erâ wâc dâŋ fâri qizecnere gumi â hobeteŋne juŋgopieŋ.  
\v 16 Miti-nâŋecte fuŋne qame hukicne mutaniŋkeeŋgopeneŋ i qeŋ bipinehec:  
\q1 E sahacko fua tâcnekicne,  
\q1 Mârozi fuŋne bataniŋkekicne,  
\q1 aŋelozi honekicne,  
\q1 qâpucko biŋene mukicne,  
\q1 mâreŋ sâc mana maŋ ekicne,  
\q1 eri tatamacko bafekicne.   
\c 4  
\s1 Sataŋzi ŋic maŋ bâsifuc ejareme miti âke sipuniŋmu  
\p
\v 1 Mâro e qanaŋ šiŋuc mujaŋgeŋkerâ muekac: Juku šâhec ŋic tucnezi miti beherâ maŋ bâsifuc bâbâfua jaŋere eeatuc dâŋko â demoŋ jaŋere burecdâŋko qohotaniŋmu.  
\v 2 Ine burecŋiczi maŋjeŋic šukiwic bakicnere ŋic eatuc-jopahuc šiŋuc jazaeŋgopieŋ:  
\v 3 “Ŋokac mi rohuc ŋicšeŋoŋ juzo â nânâ gâcne mi nâhuc irec sowa juzo.” Nânâ i Anutuzi râe-fârewec, erâ mamanasiŋhec juhuc dâŋfâri mana maŋ embeŋzi daŋge âzâcnehuc nanaŋte muwec.  
\v 4 Anuturaonec wiac fuakicne i biaŋne sasawa. Erâ daŋge âzâcnehuc nâ bac eeŋgopeneŋko qaqatarene mi fokac.  
\v 5 I Anuture dâŋzi â nunumuzi jambuŋkekicne hâcne.   
\s1 Maŋzi aafec gie bazo  
\p
\v 6 Go opâ ruac dâŋ i jaza qâmoc ecmu, ine Jesu Kristore kiŋaŋŋic dâŋ rereŋhec jucmu, ehuc mamanasiŋte dâŋ â mitire dâŋfuŋne fârine mana rereŋ ewaremeŋ izi maŋgere nâqiŋ eha jucmu.  
\v 7 Á qeŋokac qizec dâŋ wose murarane ine qikiŋnezemec. Go Wofuŋ manasiŋkehuc jucmurâ maŋzi aafec bazemec.  
\v 8 Sahacte aafec gie bapa izi fâfârine, â maŋ baafeckehuc Wofuŋ manariŋ qâriŋ eecne ine fârine. Izi šira mâreŋko â juku sambâŋko juju bâfua-nâreocte mukicne.  
\v 9 Dâŋ i fârine jâmbâŋ â mâmâc sâko ro maŋ eenere sâc.  
\v 10 Irec fârine hâcne ronaŋte gie amec fâfâuc baeŋgopeneŋ, ine mumusoriŋzi fai-nâŋecko feipieha Anutu jujune ere mamanacko juhuc eeŋgopeneŋ. E hâcne mâreŋ sâc ŋic jaŋere bâbâpiaŋ juekaczi mamana hec nâŋâcne ejâmbâŋkeekac.   
\s1 Timoteo juju bapa-ticnere dâŋ  
\p
\v 11 Dâŋ mukopac sasawa i jaza mutâc ezemec.  
\v 12 Go motec ɋâri jukic irec ŋic jaŋe gore manapie wawahane mi ezejec. Go maŋjauŋhec â mamanasiŋhec â maŋɋaɋachec jutec miti mumugezi â juju bapagezi opâ ruac guru hata jowatuzejec.  
\v 13 Woŋec-nane juhuc miti wose qazuc â jaza qâmoc ehuc juzemec.  
\v 14 Micne bapa jaŋe Mâroraonec dâŋ mufuahuc mejeŋic qizecgao râehuc jambuŋgumbiŋ, jambuŋ irec fârine sifucke-garezacte bâiŋ basawec ezemec.  
\v 15 Go irec mana mezac ehuc giege bašihuc batec fârine fuarâ fua ehuc fome hone-fârenšepieŋ.  
\v 16 Gahacne maŋ sahac soŋaŋkehuc mitire dâŋfuŋne furu mimic foŋareocte mâmâc soŋaŋkezemec. Go i hâcne paŋšâic bajuzemec. Iŋuc ecmuo ine dâŋge manaeŋgopieŋ jaŋe mecne â go gahacne mâmâc juju biaŋko fisiniŋmu.   
\c 5  
\s1 Mu tutuc â mu bâtiŋ irec dâŋ  
\p
\v 1 Ŋicqizec moc dâŋ âzâcnemurâ fâfâcnehec mi ecnezemec, mamac-nane muhuc urucko mu tutuc ecnezemec, ŋicmotec hahac ɋafâc-nane muhuc sâcjeŋicko jaza bâtiŋ ejarezemec.  
\v 2 Ŋokac qizec neŋgocfâc-nane muhuc iŋuc jaha uruc jauŋdâŋ jazazemec, ŋokac sahac ɋâri seŋfâc-nane muhuc rucge bahuc dâŋ wiac jazazemec.   
\s1 Hozec bâmec bajarezo  
\p
\v 3 Hozec sâsec-jopahuc dâŋjeŋic dopeckezemec, hozec jâmbâŋ jaŋere mukopac.  
\v 4 Hozec moc naru motec me ŋosafâcne juniŋmu, ine jaŋe qanaŋ jaŋacne ficko miti gie bahuc ŋic ŋokac qizefâc-jeŋic jauŋ-jopanšepieŋ, ehuc juwicnao wiac ejarekicne irec tofa bazunšepieŋ. Anutu e irec maname sâckeocmu.  
\v 5 Hozec fârine ine e jahackoaŋ juhuc Anuturao roweckeekac, ehuc ŋafe furec nunumu wâwâsic ecneekac.  
\v 6 Á hozec moc sasec gie baocmu ere ine ɋâricnezi hâmocne mucnezo.  
\v 7 Dâŋ i wâc jaza sanaŋketec manarâ bahacmâc junšepieŋ.  
\v 8 Moc e wiacfâcne â soctofafâcne hone jauŋ kime dopec mi ejareocmu e miti beherâ qâpuc sanaŋ ewec mucnezo.   
\s1 Hozec fuŋne-jeŋic manazo  
\p
\v 9 Hozec moc jara-ticne 60 bazuwec, erâ ŋic mocjahahec juwec, iŋucne sawa šâŋe-ticne bâmec papiao râezo.  
\v 10 Erâ eehâmo gie bawec me mâcne, irec fuŋne taniŋkeocte kecšiŋuc mu wioc ezo: Naru motec rocjoparâ gume jowac ejarewec me mâcne? Erao ŋic furune fisipie hezu hewâneŋ ejarewec me mâcne? Mitiŋic bâmec bajarewec me aricne? Jauŋ gie fuŋne fuŋne bawec me mâcne? Fuŋne-jeŋic iŋuc hâcne manazo.  
\v 11 Hozec sahac ɋâri jaŋe šâŋe-jeŋic bâmec papiao feocte mupie ine qatara-jarezemec. Iŋucne jaŋe sasecte ejareme Kristo qâoma ecnerâ ŋicte sahac bapa eeŋgopieŋ.  
\v 12 Erâ mârâc dâŋ mupaŋkembiŋ i qâsuapie bahacnehec eekac.   
\p
\v 13 Erâ wâc gie tâmiricte ficbiri juhuc oma qâoma erâ jueŋgopieŋ, erâ i sawa mâcne, dâŋ jawane â simbiŋne kosa wosepie feekac.  
\v 14 Irec no šiŋuc mukopac: Hozec sahac ɋâri jaŋe ŋic mocwâc rorâ naru motec rocjoparâ dete mamac â ro rikec qâ rikec enšepieŋ. Iŋuc ehuc jupie kisâ jaŋe sâqocnere ojowa baniŋmurâ dâŋ basarâ behenšepieŋ.  
\v 15 Hozec gâcne jaŋe ine biac hata qâsoriembiŋ Sataŋ bâjâpeeŋgopieŋ.  
\v 16 Hozec moc e miti ŋokac mocte ficko juhuc gie bafickeme ine eki bâmec bacnezejec, â qâqâhâc-jeŋickonec mi rozejec, qâqâhâc-jeŋic i hozec waha qaqane jaŋere ezejec.   
\s1 Soŋaŋ jaŋere dâŋ  
\p
\v 17 Soŋaŋzi gie-jeŋic bapie biaŋkeme wiac bafehuc ehâmo-jarezo, ine miti mumu â qaqazu gie paŋšâic baeŋgopieŋ jaŋe hâcne iŋuc ejarezo.  
\v 18 Miti papiao dâŋqâreŋ šiŋuc hâcne fokac: “Bulimakaozi gi bagarehuc sopâc kecɋaŋ nâzo mume mi sakarecnezemec.” Erâ moc šiŋuc: “Gie bapa ŋic e furi fuacneme sâckeocmu.”  
\v 19 Ŋic mocjahazi soŋaŋ moc dâŋko râezo mume mi manacnezemec, ŋic 2 me 3 jaŋe mupie ine manarâ giene bazemec.  
\v 20 Moczi bahac bâfuame âgo guru jaŋere maio mu bâtiŋ ecnetec gâcne jaŋe manahuc hâwic-jopazejec wâc.  
\v 21 No Anutu â Jesu Kristo ere maio â aŋelo bufuŋfâc-ticne jaŋere maio kecšiŋuc mupaŋke-garekopac: Dâŋ gaza qâmoc ekopac i aimuŋ soŋaŋkehaŋ moc mi wahazejec, ehuc maŋgere ŋic ŋokac wiac sâctiri moc mi ejarezemec.  
\v 22 Go ŋic miti giere fâro ehuc biac mi jambuŋ-jopazemec, jaŋere kiŋzi gore faio fezacte. Gahacne maŋ sahac soŋaŋketec ɋaɋacnea fozejec.   
\s1 Hucte dâŋ â sâqocne fufuare dâŋ  
\p
\v 23 Go bukiki â huc šâic gâbâ egareekacte opâ sawa mi nâzemec, waiŋ opâ afecne mac nâzemec wâc.  
\v 24 Ŋic tucne jaŋere sâqocne i fuŋne babataniŋ dameŋ mi maickeha qanaŋ fua taniŋkeekac, tucne jaŋere soŋsoŋ foku šâhec fuaocmu.  
\v 25 Eme eehâmo gie i iŋuc jaha fua taniŋkeekac, â iŋuc mi eekacko soŋsoŋ foku šâhec fua taniŋkeocmu.   
\c 6  
\s1 Kiŋaŋ qaqa jaŋere dâŋ  
\p
\v 1 Kiŋaŋ qaqa juŋgopieŋ jaŋe sasawa bomboŋfâc-jeŋic sâsec-jopahuc rume-jarenšepieŋ, Anuture šâŋe biŋe babawaha â miti susure fuazacte iŋuc enšepieŋ.  
\v 2 Erâ bomboŋfâc-jeŋic gâcne opâ ruac jaŋe ine šiŋuc mi muhuc bawahac­ jopanšepieŋ: “Mitio sâcnâŋec mocjaha eŋgopeneŋ.” Aricne, “bomboŋfâc-nâŋec jaŋe Wofuŋ manasiŋkepie âgo jauŋ ejareekacte ehâmo-nâreeŋgopieŋ”, iŋuc muhuc kiŋaŋ maŋafec jaha qajarepie sâckeocmu. Go dâŋ i jaza mutâc ehuc faŋ qajarezemec.   
\s1 Moneŋ mafare andac mi ezo  
\p
\v 3 Moc e dâŋ i âke sipurâ moc muhuc Wofuŋ-nâŋec Jesu Kristo ere dâŋbiaŋ qikiŋnehuc miti hatare sâcmutâc râpeckeekac ere šiŋuc muzo:  
\v 4 E maŋgâc erâ sahac-ticne bafehuc dâŋ giŋkeme giŋ bašihuc muraocmu, izi sasec-ticne eocmu hâcne. Eme irec iiŋguuŋ, hehefaric, mumusoriŋ, qoqoric,  
\v 5 erâ wâc mu qaqatarac hati fuaekac. Ŋic iŋucne jaŋe maŋjeŋic sifuckerâ mamana-jeŋic šikeme, moneŋ mafa fua-nârezejec muhuc miti bajuniŋte mueŋgopieŋ.  
\v 6 Miti babajuzi jâmbomac sahacte dope bâbâfua-nârene, mocjaha mukâroŋ tâmiric bajunšepeneŋ.  
\v 7 šiŋuc manasunšepeneŋ: Fuanaŋte mâreŋko metariŋ warembeŋ, juku hâmonaŋte iŋuc jaha metariŋ jaha ranaŋmu.  
\v 8 Eme irec hâcne nânâ wiac â ŋaqi qoruc fonâreme manapene sâckeha junšepeneŋ.  
\v 9 Moneŋ mafa sâko qâhâckezo muniŋmu, jaŋe eesâicte wiwiticko feniŋmu, erâ wiac omane fuŋne fuŋnere sasec bâfuarâ mana utuckehuc sipirickeniŋmu.  
\v 10 Moneŋ mafare andaczi sâqocne gâcnere jâcne hâcne. Ŋic tucnezi irec harac ehuc miti hata qâsorierâ bušâic sâko bâfuambiŋ.   
\s1 Juju sanaŋte hešakiezo  
\p
\v 11 Anuture ŋic go wiac iŋucne geŋkezemec. Ehuc tiŋke biaŋ erâ mitihec â mamanasiŋhec â maŋjauŋhec â sasanaŋhec â buuruchec ecmurâ irec fotac qatariezemec.  
\v 12 Erâ mamanasiŋte juju gie biaŋ bazemec. Baku juju sanaŋte hešakiezemec. Go irec hâcne hefârecgukicne, erâ go gahac iŋuc ecmurâ ŋic tutumaŋko mupaŋketec manambiŋ.  
\v 13 Anutu wiac sasawa juju bâfua-jareekac ere maio â Jesu Kristo kia Pilatorao mumupaŋ fârine muwec ere maio musanaŋke-garekopac:  
\v 14 Go sâcmutâc dâŋ mugarekicne i bâbâsifuc tâmiric â bâbâbiene tâmiric reŋkehuc juhaŋte Wofuŋ-nâŋec Jesu Kristo fisizejec.  
\v 15 Irec dameŋ maickeme juju aŋac â tâpiri buc focneekac Anutu hâcne, eki motâc rome fua taniŋkeocmu. E ŋicwofuŋ jaŋere Wofuŋ Sâko â fekicne jaŋere Fekicne.  
\v 16 E bucticne hâhâmo tâmiriczi, tatamac moczi moc mi rarašine irec maŋnao juekac. E ŋic moczi moc mi honekicne erâ mi honezo. Mumumbiaŋ â tâpiri focneweczi focnehuc juocmu sanaŋ. Jâmbomac.   
\s1 Hobeteŋne fofo sanaŋ bâfuazo  
\p
\v 17 Ŋic mâreŋte moneŋ mafa ɋâfoŋne fojarekac jaŋe jazatec sahac-jeŋic mi bafehuc wiac sisirowenere manapie izi hobeteŋne-jeŋic eme ira mi âtesiŋnenšepieŋ. Anutu e mâriri bâfua-nâreme nâ bac ehuc jueŋgopeneŋ erao âtesiŋnenšepieŋ.  
\v 18 Erâ mu jaretec buafec â bokifac erâ eehâmo gie bahuc mitire fârine bocjaha bâfuanšepieŋ.  
\v 19 Ehuc hobeteŋne-jeŋic moc fofo sanaŋ i bâfuarâ juju fârine rauckenšepieŋ.   
\s1 Timoteore uŋsawaŋ dâŋ  
\p
\v 20 O Timoteo, go merâfâc garekicne i soŋaŋkehuc bajuzemec. Erâ dâŋ jawane â fârimâc, ŋic gâcnezi bajuhuc šâŋene “dâŋ qame hukicne” mueŋgopieŋ, i qikiŋnezemec.  
\v 21 Ŋic tucnezi dâŋ ira hâcne qohotahuc mamanasiŋte hata qâsoriembiŋ. Aki anonoczi ŋoŋerao fozejec.