\id 1TH 1 Thessalonians, Kate, PNG, wwh 12/92 
\h TESALONIKE I 
\toc1 Tesalonike I 
\toc2 Tesalonike I 
\toc3 1Te 
\mt1 TESALONIKE I  
\ip Tesalonike hae Makedonia mâreŋko ŋekac. Paulo e miti kiŋaŋ namba 2 raku Tesalonike haeo fisirâ sabata hombaŋ jahec â moc miti mume Judaŋic gâcne â qâpuc bocjaha jaŋe mana šakiembiŋ. Eme Judaŋic râŋgeŋne jaŋe irec aaric bâfuarâ qâpuc suruc-jopapie Paulo â Sila jofazo mupie jahe ŋafeoa Berea haeo wiserâ rapic (Aposolo 17:1-10). Eme irecnec Paulozi Ateŋ haeo rawec. Erâ Tesalonike haeonec miti mamana jaŋere mana mezac erâ Timoteo jaŋerao soreme rawec. Ra fisirâ miti babaju-jeŋicte fuŋne manarâ risierâ Paulo Korinti haeo bâfuarâ dâŋ binaŋ ecnewec Ecneme fuŋne-jeŋic manarâ papia-jeŋic qâreŋkewec (gaŋ 3:1-8).  
\ip Tesalonike haeonec miti ŋic ŋokac jaŋe jopa qâšâic ejarepie Jesure erâ šâic manambiŋ (gaŋ 1:6 â gaŋ 2:14). Eme tatakic tâmiric juhuc sanaŋkepie mitizi jaŋerao fua ɋârâŋkewec (gaŋ 1:5 â gaŋ 2:13). Paulo e irec bune biaŋkeme Wofuŋ daŋge mumuteŋ ecnewec (gaŋ 1:1-4). E irec qâreŋke-jarehuc dâŋ mocte mâmâc qâreŋke-jarewec. Jaŋe Wofuŋ fisiocte woŋec juhuc šiŋuc mumbiŋ: Jesu e fisihuc hâmokicnefâc-nâŋec hetarac-jopame šâhec eniŋmu. Iŋuc muhuc jaŋere busâqoc manambiŋ. Erâ gâcne jaŋe Wofuŋ e biac jâmbâŋ fisiocmu murâ gie-jeŋic hetararâ hâhâŋ qahuc jumbiŋ. Eme Paulo e Wofuŋ fifisi-ticnere fuŋne mufua-jarewec (gaŋ 4:14-18 â gaŋ 5:1-3). Erâ maŋɋâri juhuc Jesure ŋicfâc fârine jâmbâŋ erâ bahacmâc juniŋte bufac qajarewec (gaŋ 5:6-11 â gaŋ 4:1-8). Erâ papia ra fisime tutumaŋ-jeŋicko woseniŋte mujarewec (gaŋ 5:27). Tesalonike ŋic jaŋere papia I i Paulozi bâbâni jâmbâŋ qâreŋkewec, papia gâcne sasawa i šâhec qâreŋkewec.  
\ip Papia irec dâkâne sâko jajahec kecšiŋuc fokopirec:  
\ip 1. Gaŋ 1-3. Daŋge mumuteŋ dâŋ.  
\ip 2. Gaŋ 4-5. Uŋsawaŋ â mu qaqazuc dâŋ.  
\c 1  
\s1 Paulo e jaŋere erâ Anutu daŋge nunumu ecnewec  
\p
\v 1 Paulo, Siliwano â Timoteo nâŋe Tesalonike haeonec kikefuŋ, Anutu Mamac â Wofuŋ Jesu Kristo ere ŋicfâc, ŋoŋere papia ši râeŋgopeneŋ. Aki anonoc â wama ŋoŋerao fotâcnerâ fozejec.  
\v 2 Nâŋe dameŋ sâc ŋoŋere erâ Anutu daŋge âzâcneeŋgopeneŋ, erâ nunumu gie bahuc sâc ŋoŋere manasu-fâreeŋgopeneŋ.  
\v 3 Ŋoŋe mamanasiŋ-ŋeŋicte fârine bâfuaeŋgopieŋ â maŋjauŋte bâmec gie baeŋgopieŋ â Wofuŋ-nâŋec Jesu Kristo paŋšâic jaha worickeeŋgopieŋ, irec Mamac-nâŋec Anutu ere maio hati manasurâ mufuahuc âzâcneeŋgopeneŋ.  
\v 4 Âgofâc, nâŋe manaŋgopeneŋ, Anutuzi maŋjauŋ eŋarehuc rowosâec-ŋopawec.  
\v 5 Iŋuc eŋarewecte Biŋebiaŋ bafârâ ŋazapene dâŋ sawa mi ewec, i tâpirihec â Tiri Mârohec â buâkecnehec ewec. Ŋoŋerao jumbeŋko ŋoŋere erâ wiac ebac embeŋ i manaŋgopieŋ.  
\v 6 Eme nâŋe bâjâpec-nâpombiŋ, bâjâpec-nâpohuc Wofuŋ e jahacne mâmâc bâjâpembiŋ. Ehuc miti i fific guguriŋ faio Tiri Mârozi bufahac qaŋarehame ro maŋ embiŋ.  
\v 7 Ŋoŋe iŋuc ehuc Makedonia â Akaia mâreŋkonec miti mamana jaŋe micne bajarehuc fuŋne qazu-jarembiŋ.   
\s1 Tesalonike ŋic jaŋere dâŋ biŋe hae sâc rawec  
\p
\v 8 Ŋoŋeraonec hâcne Wofuŋte dâŋzi haŋ barahuc Makedonia â Akaia mâreŋko fuawec, erâ i sawa mâcne, ŋoŋe Anutu manasiŋkembiŋ irec dâŋ biŋe i hae sâc mana-fârepie nâŋe jajazane moc mi fuawec.  
\v 9 Jaŋe jaŋac ŋoŋerao gie bapene fârine fuawec irec dâŋ nâzâeŋgopieŋ. Erâ ŋoŋe nemuɋâŋ râpeckerâ Anutu jujune â fârine maickerâ ŋicfâc-ticne embiŋ,  
\v 10 erâ Ŋokâ-ticne Jesu hâmockonec bâɋârekicne, e juku sambâŋkonec waharâ okac dameŋko ŋezic-nâpozokac, ere šawiehuc jueŋgopieŋ, irec dâŋ binaŋ-ŋeŋic hae sâc eeŋgopieŋ.   
\c 2  
\s1 Paulo e Wofuŋzi honeme biaŋkeocte irec mocjaha muwec  
\p
\v 1 Âgofâc-nane, ŋoŋerao fisirâ gie bapene fârimâc mi ewec i ŋaŋac manaŋgopieŋ.  
\v 2 Qanaŋ Filipi haeo qa imac enârembiŋ i manaŋgopieŋ wâc. Enârepie sifu mi dockembeŋ. Aricne, Anuturao roweckepene bubiaŋ qanâreme afeckerâ ŋoŋerao fârâ Anuture Biŋebiaŋ i juju gie sâko bahuc mufua-ŋarembeŋ.  
\v 3 Babaafec dâŋ mueŋgopeneŋ i mamana sifuc faio mâcne, me maŋsifuc faio mâcne, me kege wage eŋarehuc mâcne”  
\v 4 Anutuzi honec-nâpome sâckeme Biŋebiaŋ muromackenaŋte betoŋ-nâpowec irec sâc mueŋgopeneŋ. Ŋiczi mana-nârepie biaŋkeocte aricne, Anutu e maŋ hohonezi mana-nâreme biaŋkeocte mocjaha mueŋgopeneŋ.   
\p
\v 5 Ŋoŋe nâŋere manaeŋgopieŋ, nâŋe bâbâmiriŋ dâŋ moc mi ŋazambeŋ mitio ake hehuc moneŋ mafare andac i wâc mi embeŋ, i Anutuzi manaha mukopac.  
\v 6 Kristore aposolo nâŋe mana-nârepie feme sâckeocmu i manahuc sifu ŋoŋe me hae gâcnaonec ŋicbomboŋ eŋarenaŋte mi mumbeŋ.  
\v 7 Aricne, neŋgoc moczi kogocfâcne hemiriŋ-jopaekac, iŋuc jaha nâŋe ŋoŋerao juhuc eŋarembeŋ.  
\v 8 Aŋac-nâŋec ŋoŋerao fowecte Anuture Biŋebiaŋ ŋaŋazare sawa mâcne, ŋoŋere erâ juju-nâŋec qiqikiŋ irec mâmâc afeckembeŋ, maŋnâŋec ŋoŋerao âeckewec irec.   
\s1 Paulozi mamac-jeŋic erâ miti qazu-jarewec  
\p
\v 9 Âgofâc, micneneŋ eŋarepene takic-ŋopazacte ŋafe furec sahacte gie mâmâc šocne fârone bahuc domambeŋ, i ehuc Anuture Biŋebiaŋ ŋazambeŋ, ŋoŋe irec manasueŋgopieŋ.  
\v 10 Nâŋe maŋtaniŋ â tiŋne â bahacmâc juhuc miti mamana ŋoŋe wiac eŋarembeŋ, i ŋoŋe mecne â Anutu mecne fuŋne-nâŋec manaŋgopieŋ.  
\v 11 Erâ moc šiŋuc wâc manaŋgopieŋ: Mamac moczi naru motecfâcne ejareekac, sâc ijaha nâŋe ŋoŋe eŋarehuc buc buc mu sawaŋ dâŋ ŋazambeŋ â esoc qafeŋ eŋarembeŋ â šiŋuc mušakiehuc ŋazambeŋ:  
\v 12 “Uucmaŋ-ticne â eri tatamac-ticne rauckeniŋte hefârec-ŋopaekac Anutu hâcne, ere ŋicfâc fârine erâ irec sâcko junšepieŋ.”   
\s1 Miti manahuc šika kimbiŋ  
\p
\v 13 Nâŋe Anuture dâŋ ŋazapene manapie ŋicdâŋ mi ewec. Eme iŋuc sâcne manambiŋ, i Anuture dâŋ jâmbâŋ, eki miti mamana ŋoŋerao gie baekac. Eme nâŋe irec hâcne Anutu daŋge mumuteŋ kuduc jaha ecnehuc jueŋgopeneŋ.  
\v 14 Âgofâc-nane, ŋoŋe Anuture kikefuŋ Judaia mâreŋko Kristo Jesurao qohotambiŋ jaŋehec sâc mocjaha embiŋ. Jaŋe Judaŋiczi jopa qâšâic ejarembiŋ iŋuc jaha âgofâc-ŋeŋic gâcnezi ŋoŋe ŋopa qâšâic eŋarembiŋ.  
\v 15 Judaŋic jaŋe Wofuŋ Jesu â porofete iŋuc jaha qâhâmoc-jopambiŋ, erâ wâc nâŋe nâpo jâpec enârembiŋ. Jaŋe Anutu âgo mi ecneeŋgopieŋ â ŋicne ŋicne kisuec-jopaeŋgopieŋ.  
\v 16 Ehuc qâpuc miti jazapene manarâ biaŋkenšipiŋte aka henareeŋgopieŋ. Jaŋe iŋuczi iŋuc ehuc sâqocne faio fefec hefekupie kiŋjeŋicte sâc micne qame Anuture kimbeŋ fisi-jarewec.   
\s1 Paulo e jaŋere maŋhâhâŋ ecnewec  
\p
\v 17 Âgofâc, nâŋe behec-ŋopambeŋ, erâ maŋzi mâcne, sahaczi dameŋ ŋondeŋ ši ŋoŋe tâmiric juhuc huacbuc eŋgopeneŋte mocwâc honec-ŋopanaŋte boc enâreekac.  
\v 18 Eme irec fârâ iqic-ŋopanaŋte mumbeŋ, Paulo no nahac dameŋ moc â moc fâzo mupe Sataŋzi aka henarewec.  
\v 19 Ŋoŋere aŋac-nâpoekac i šiŋucte: Wofuŋ-nâŋec Jesu ere fifisi dameŋko weni jaŋe gie fâri-nâŋec â šeri-nâŋec â eri-nâŋec eniŋmu? Ŋoŋe wâc enâreniŋmu hâcne.  
\v 20 Ŋoŋe mumuteŋ-nâŋec â bubiaŋ-nâŋec.   
\c 3  
\s1 Paulo e jaŋere manabâc erâ Timoteo soreme rawec  
\p
\v 1 Ŋoŋere maŋhâhâŋ boc enarekume nâŋe gâcnezi sifu Ateŋ haeo buc juhuc  
\v 2 Timoteo sorepene behec-nâporâ ŋoŋerao fâwec. E âgo-nâŋec â Anuture gieŋic juhuc Kristore Biŋebiaŋ muekaczi fârâ mitio hume keteŋ eŋarehuc faŋ qaŋareocte mucnembeŋ.   
\p
\v 3 Ŋoŋe šârâ hâriŋ faio juhuc dockenšipiŋte iŋuc embeŋ. Ŋoŋe manaŋgopieŋ, miti mâteŋne juhuc mananaŋte mi munârekicne.  
\v 4 Nâŋe ŋoŋerao juhuc qanaŋ dâŋ šiŋuc ŋazambeŋ: “Ʒika biac fai-nâŋecko feocmu.” Eme dâŋ i sanaŋkewec, i manaŋgopieŋ.  
\v 5 Eme eesâic runezi bârokawec-ŋopame gie-nanere fârine omaezacte maŋ kukumbuc boc enareme jupe bape sâqoreme ŋic e miti babaju-ŋeŋicte fuŋne manaocte sorepe fâwec.   
\s1 Timoteozi risierâ dâŋ binaŋ ewec  
\p
\v 6 Eme ši Timoteo e risie warerâ mamanasiŋ â maŋjauŋ-ŋeŋicte biŋe biaŋ nâzâwec” Erâ nâŋere boc manasueŋgopieŋ, â nâŋe ŋoŋe honec-ŋopazo muhapene ŋoŋe iŋuc jaha nâŋe honec-nâpozo mueŋgopieŋ, dâŋ i nâzâ-fârewec.  
\v 7 Âgofâc, nâŋe šârâ hâriŋ â bušâiczi maŋnâŋec hehâriŋkeme juhapene miti babaju-ŋeŋicte dâŋzi bunâŋec bâuruewec.  
\v 8 Ŋoŋe Wofuŋ heme hariŋ ecnehuc sanaŋkeeŋgopieŋ i manahuc maŋnâŋec fie ruruckekac.   
\s1 Miti jaŋerao fua biaŋ erâ fosanaŋkeocte Paulozi numuwec  
\p
\v 9 Ŋoŋere erâ Anuture maio bubiaŋ sâko manaeŋgopeneŋte Anutu daŋge mo iŋucne ecnepene sâckeocmu?  
\v 10 Mâc mana-nâreha ŋoŋerao fârâ hohonec erâ miti gâcne forakac i moc šuhucke-ŋarenaŋte ŋafe furec mu wâwâsic ecneeŋgopeneŋ.  
\v 11 Mamac-nâŋec Anutu â Wofuŋ-nâŋec Jesu e jahac hata bâfua-nâreme ŋoŋerao fânšepeneŋ.  
\v 12 Ŋoŋerao ine Wofuŋzi maŋjauŋ-ŋeŋic bâŋɋârâŋkeme ŋedâmâreme ŋaŋackoaŋ â gâcne jaŋehec eec enšepieŋ” nâŋe iŋuc jaha ŋoŋe eŋareeŋgopeneŋ.  
\v 13 Erâ Anutuzi maŋŋeŋic keteŋkeme ŋoŋe Mamac-nâŋecte maio bahacmâc â maŋfuru juhapie Wofuŋ-nâŋec Jesu tiŋnefâc-ticne sasawa jaŋehec fisizejec.   
\c 4  
\s1 Maŋ wâwânâŋhec aricne, maŋtaniŋ juzo  
\p
\v 1 Âgofâc-nane, Wofuŋ Jesure erâ uŋ sawaŋ eŋarehuc moc šiŋuc ŋazapene mananiŋ: Mitio juju bapa-ŋeŋiczi Anutu âgo ecneocte fuŋne ŋaza qazuc embeŋ, ijaha junšepieŋ. Mitio juju i sâcne jueŋgopieŋ, mâc juŋɋârâŋkeniŋte ŋazaŋgopeneŋ.  
\v 2 Wofuŋ Jesure micte dâŋ ŋaza qâmoc embeŋ, irec kâuc mi baŋgopieŋ.  
\v 3 Anutu e šiŋuc hâcne muekac: Boe sau qikiŋnehuc maŋɋaɋac junšepieŋ.  
\v 4 Ŋoŋerao moczi e jahacne ŋonâŋ maŋɋaɋacko â pectâcko rauckezejec,  
\v 5 sasecte šocbâruŋko misac, i ŋic qâpuc Anuture kâuc baeŋgopieŋzi eeŋgopieŋ.  
\v 6 Moczi moc aka huckehuc wiac iŋucnao âgo-ticne mi eatuckezejec. Wofuŋ e wiac irec okacne bazu-fâreocmu” nâŋe dâŋ i mârâc jaha mujomirerâ ŋazambeŋ.  
\v 7 Maŋwânâŋhec junaŋte aricne, maŋɋaɋac junaŋte Anutuzi hefârec-nâpowec.  
\v 8 Irec moc e dâŋ i bâsueocmu, e ŋic moc mâcne, Anuctu e jahacne bâsueocmu, Tiri Mâro maŋŋeŋicko râeekac e hâcne bâsueocmu.   
\s1 Maŋjauŋhec juhuc gie šoɋac bazo  
\p
\v 9 Ŋoŋe miti mamanazi maŋzi jauŋ babac eniŋte wemocte boc qâreŋke-ŋarenaŋmu, Anutu e jahac maŋzi jauŋ babac eniŋte fuŋne ŋaza ŋowatuc ewec.  
\v 10 Erâ ŋoŋe Makedonia mâreŋ hae sâc opâ ruac juraŋgopieŋ jaŋe maŋjauŋ ejarehuc jueŋgopieŋ. Erâ sifu mocwâc ɋârâŋkeocte ŋazaŋgopeneŋ.  
\v 11 Erâ dâŋ moc šiŋuc ŋaza qâmoc embeŋ: Rac warec juhuc dâŋ ojowa mi ee, hae-ŋeŋicko ŋezurâ ŋehuc mezi gie muŋarekicne aijakic jaha baniŋte ɋicwânšâŋ enšepieŋ.  
\v 12 Ehuc qâpuc jaŋere maio roroc tâmiric pectâc junšepieŋ.   
\s1 Jesu fifisi-ticnere dâŋ  
\p
\v 13 Âgofâc, ŋoŋe hâmokicne jaŋere kâuc bârâ, miti tâmiriczi maŋjeŋic šickeme ki mamakuc eeŋgopieŋ iŋuc enšipiŋte ŋazapene mananiŋ:  
\v 14 Nâŋâc Jesu hâmorâ faharewec dâŋ i maŋkerâ šiŋuc mananšepeneŋ: Anutu e Jesu ecneme hâmokicne jaŋe e jahacnehec amec-jopa fisiocmu.  
\v 15 Á moc i Wofuŋ e jahacne micdâŋ ŋazanaŋ: Mâreŋko ɋâricne juhapene fisiocmu nâŋâc hâmokicne mi siric-jopanaŋmu.  
\v 16 Wofuŋ e sambâŋkonec wahaocte ine dâŋ wiwira â aŋelo qizecte micšonšoŋ â Anuture qeŋfânâŋ fuahame wahaocmu. Wahame Kristo manasiŋkehuc hâmombiŋ jaŋe bâbâni fahareniŋmu.  
\v 17 Faharepie ɋâricne junaŋmu, tiwâne hâcne, izi jaŋerao šuhuckepene karoraczi bafec-nâpome sawao Wofuŋhec bâbâfuac enaŋmu. Erâ Wofuŋhec juhuc junaŋmu sanaŋ.  
\v 18 Ŋoŋe dâŋ i hâcne muc manac ehuc maŋ bâbâmâteŋ enšepieŋ.   
\c 5  
\s1 Wofuŋ dameŋ-ticne acmâc jaha maickeocmu  
\p
\v 1 Âgofâc-nane, dameŋte â šâfore dâŋ wemocte moc qâreŋke-ŋare mu?  
\v 2 Ŋaŋac šiŋuc sâcne manaŋgopieŋ: Râsi jaŋe ŋafeo ututuŋ fisieŋgopieŋ, iŋuc jaha dameŋ-ticne ɋeŋfâfâc jaha maickeocmu.  
\v 3 Eme ŋic jaŋe aki wama sâko fokac muhuc mana fâsâerâ juhapie wiac hâhâwicnezi acmâc jaha fisi-jareocmu. Ŋokac kiwechec moc e gozi onšoŋ jaha kime fâfâreocmu, iŋuc jaha ŋic iŋucne jaŋe wiac onšoŋ jaha fua-jareme wemocko moc wiseniŋmu.  
\v 4 Âgofâc, ŋoŋe ine dapâcko mi juŋgopieŋ, irec wemocko Wofuŋte dameŋzi râsi iŋucne erâ ututuŋ maic-ŋopame bipic tatara eniŋmu.  
\v 5 Ŋoŋe tatamacte â šoaŋte kikefuŋ ekicne, nâŋâc ŋafere me dapâcte biŋe aricne.   
\s1 Dameŋ mi manaŋgopeneŋte maŋɋâri juhuc ruc bazo  
\p
\v 6 Irec ŋic gâcnezi guŋ fopie qâtec-joparâ guŋ mi fonšepeneŋ, rucgereŋ-nâŋec bahuc maŋte sowa junšepeneŋ.  
\v 7 Guŋ fofo jaŋe ŋafeo foeŋgopieŋ gae wowo jaŋe ŋafeo wohuc bâbâsifuc bâfuaeŋgopieŋ.  
\v 8 Ʒoaŋte biŋe ekicne nâŋâc ine maŋte sowa junšepeneŋ, ehuc mamanasiŋ â maŋjauŋ izi maruku enârezejec, â bâbâpiaŋte woworiczi dunâŋec ezejec.  
\v 9 I šiŋucte: Anutu e kimbeŋ-ticnere fârine hotâckenaŋte mâcne, Wofuŋ-nâŋec Jesu Kristore erâ bâbâpiaŋ rauckenaŋte muekac.  
\v 10 E hâcne okac-nâŋec hâmowec, i hâmohuc me ɋâricne juhuc ehec mâmâc junaŋte iŋuc ewec  
\v 11 Ŋoŋe irec hâcne faŋ qaqac â hehe šakiec eeŋgopieŋ iŋuc jaha ehuc junšepieŋ.   
\s1 Micne bapa sâsec-jopahuc ŋic gâcne mâmâc bafic-jopazo  
\p
\v 12 Âgo bureŋ, wiac mocte esoc-ŋopaŋgopeneŋ: Ŋoŋerao šâic gie baeŋgopieŋ â Wofuŋte erâ micne baŋareeŋgopieŋ â mu bâtiŋ eŋareŋgopieŋ i jaŋe sâsec-jopanšepieŋ.  
\v 13 Ehuc gie-jeŋicte erâ maŋjauŋ ejarehuc mana-jarepie fejâmbâŋkezejec. Erâ wâc wama qaqac ehuc junšepieŋ.  
\v 14 Âgofâc, hazec qâuŋ dâŋ moc ŋazape mananiŋ. Ŋic kosa jujune jaŋe uŋ sawaŋ ejarenšepieŋ, ŋic manabâcne jaŋe mu âkeriŋ ejarenšepieŋ, betaŋkekicne jaŋe dopec-jopanšepieŋ, erâ mâmâc hezu hemiriŋ ejarenšepieŋ.  
\v 15 Sâqocnere okac babazuc enšipiŋte sosoŋaŋ enšepieŋ. Ŋaŋackoaŋ â ŋic gâcne sasawa jaŋehec eehâmoc erâ erahuc junšepieŋ.   
\s1 Faŋ qaqa dâŋ  
\p
\v 16 Bubiaŋ faio jurâ jurahuc junšepieŋ.  
\v 17 Nunumu moc mi hetaranšepieŋ.  
\v 18 Wiac irec me irec daŋge mumuteŋ enšepieŋ, i Kristo Jesure erâ eniŋte Anutuzi muŋarekac.  
\v 19 Mârore šoc mi hehâponšepieŋ.  
\v 20 Anuture micdâŋ mufua-ŋarepie mana qâoma mi enšepieŋ.  
\v 21 Dâŋ sasawa mana wosâerâ bâtâc banšepieŋ, â biaŋne eme bajunšepieŋ.  
\v 22 Sâqocne fuŋne fuŋne ine qikiŋnenšepieŋ.   
\s1 Jambuŋdâŋ  
\p
\v 23 Anutu wama rune e jahac šure bâpiaŋ eŋareme maŋfuru ejâmbâŋkenšepieŋ, eme mâro â maŋ qâqâtâc â sahac-ŋeŋic furu fohame Wofuŋ-nâŋec Jesu Kristo ere fifisi dameŋko bahacmâc domanšepieŋ.  
\v 24 Hefârec-ŋopakac e mume sasanaŋ, irec gie-ticne baku batarocmu.   
\p
\v 25 Âgofâc, ŋoŋe nâŋere erâ numunšepieŋ.  
\v 26 Opâ ruac ŋoŋe mitio meo babac efârenšepieŋ.  
\v 27 No Wofuŋte maio ŋaza sanaŋkepe: ŋoŋe papia kecši opâ ruac mâmâc sasawa wose-jarepie mananšepieŋ.  
\v 28 Wofuŋ-nâŋec Jesu Kristo ere aki anonoczi ŋoŋerao fotâcnerâ fozejec.