\id 1JN 1 Johî, Kate, PNG, wwh 12/92 
\h JOHANE I 
\toc1 Johane I 
\toc2 Johane I 
\toc3 1Jn 
\mt1 JOHANE I  
\ip Asia mâreŋ masunao Jesure kikefuŋ gurune gurune jurambiŋ. Eme Paulo â Petoro jahe hâmohapire Johanezi Efeso haeo ra juwec. Ira juhuc hae sâc mitiŋic ŋokac jurambiŋ jaŋe mamac ejarewec. Mamac ejarehuc juhame jara 23 tarawec. Eme papia I qâreŋkewec i ŋic i jaŋere biŋe qâreŋkewec hâcne. Petorozi qanaŋ jaha ŋic ijaha papia jajahec râe-jarewec. Eme papia-ticnezi mitire mumusifuc â bâbâsifuc fowec i hehâmowec. Hehâmohame šâhec moc fuawec. Ine ŋic moc šâŋene Kerinti eki kecšiŋuc muwec: Kristo â Jesu jahere fuŋne bârâwiŋ. Kristo e ŋic sahachec mi fuawec. ŋic omane moc juwec šâŋene Jesu e Johanezi Miti Opâ ruacneme erao Kristozi hapâ hawari iŋucne wahawec. Erâ Jesuhec juhame maripoŋko qazo ehapie Kristo e beherâ sambâŋko risie fewec. Burecdâŋ i hâcne haŋ bazo eme Johanezi hehâmoocte papia ši râe-jarewec.  
\ip Dâŋ qizecne kecšiŋuc qâreŋkewec: Wofuŋ e tatamac rune irec naru motecfâcne tatamackoa juhuc dâpâckonec wiac qikiŋnezo (gaŋ 1 â 2-1-17). Erâ dâŋ qizecne moc: Kristore râsifâc juŋgopieŋ jaŋe Anutu Mamac â Ŋokâ-ticne bârâwiŋ-jofazo muŋgopieŋ jaŋere sawaŋ qahuc juzo (gaŋ 2:18-29 â 4:1-6). Dâŋ qizecne moc: Anutu e maŋjauŋ sokawec jâmbâŋ eŋarewecte sâqocne geŋkehuc maŋjauŋ eec ezo (gaŋ 3). Erâ moc: Anutu e maŋjauŋ irec fuŋqizecne jukac eme nâŋâc âgofâc-nâŋec maŋjauŋ ejarepene Anuturao qacneocmu (gaŋ 4:7-21 â 5:1-4). Erâ moc: Jesu e Anuture Ŋokâ muhuc e manasiŋkenaŋmuo ine sisipiric hatao mi rahuc juju sanaŋ rauckenaŋmu (gaŋ 5:5-21).  
\c 1  
\s1 Mumušâwe dâŋ  
\p
\v 1 Fuŋnaonecteaŋ fowarehuc juwec, eme hazeczi manambeŋ â šâŋe-nâŋeczi honembeŋ, erâ hone dendeŋnehuc mezi ba bâuac ecnembeŋ, i juju sanaŋte Micdâŋ hâcne.  
\v 2 Juju fârine fua tâcneme honembeŋte juju sanaŋte biŋedâŋ hâcne mufuarâ ŋazaeŋgopeneŋ. Juju sanaŋ i Mamactao fowarehuc juku nâŋerao fomârâŋkewec.  
\v 3 Ine hâcne wiac hone manac embeŋ ijaha ŋoŋe wâc ŋazaeŋgopeneŋ. Ŋazapene manapie miriŋ-nâŋec fuame mocjaha junaŋte hâcne mueŋgopeneŋ. Eme miriŋ babac-nâŋec i Mamac â Ŋokâ-ticne Jesu Kristo erao qâsiŋnerâ foekac.  
\v 4 Iŋuc fuame bubiaŋ-nâŋec fua ɋârâŋke taraocte papia ši hâcne qâreŋke-ŋarekopac.   
\s1 Tatamacko juhuc sâqocnere hehesoŋ mi bajuzo  
\p
\v 5 Dâŋ biŋe Jesuraonec kecšiŋuc manambeŋte ŋazaeŋgopeneŋ: Anutu e tatamac, dapâc i erao moc mi fohuŋgaŋkekac.  
\v 6 Nâŋâc dapâcko juhuc Anuturao qohotaŋgopeneŋ mupene burec eocmu â dâŋ fâri qizecne mi bajunaŋmu.  
\v 7 E jahacne tatamacko jukac iŋuc jaha wâc nâŋâc tatamacko junaŋmu, ine miriŋ babac sâcne enaŋmu, eme Ŋokâ-ticne Jesu Kristo ere soczi sâqocne-nâŋec šureme ɋaɋackenaŋmu.  
\v 8 Nâŋâc sâqocne-nâŋec mi fokac, iŋuc munaŋmuo maŋnâŋec eatuckenaŋmu â dâŋ fâri qizecne maŋnâŋecko mi foocmu.  
\v 9 Á sâqocne-nâŋec mufuanaŋmuo ine e mume sasanaŋ â tiŋne runezi sâqocne-nâŋec šurehuc bahac-nâŋec nâwoc rofâreocmu.  
\v 10 Nâŋâc sâqocne mi baeŋgopeneŋ, iŋuc mupene Anutu burecŋic mucneŋgopeneŋ eocmu â dâŋticne maŋnâŋecko mi foocmu.   
\c 2  
\s1 Anutu dâŋticne reŋkehuc erao sâcne qohotazo  
\p
\v 1 Naru motecfâc-nane, ŋoŋe sâqocne banšipiŋte dâŋ i qâreŋke-ŋarekopac. Á moc e sâqocne baocmu, ine Mamactao sacfozic-nâŋec Jesu Kristo e tiŋne runezi jukac, irec manasuzejec.  
\v 2 Eki hâcne sâqocne-nâŋecte kiwiric rowec, erâ nâŋâcne sawa mâcne, mâreŋ sâc ŋic jaŋere mâmâc rowec.  
\v 3 Anutu mana maŋ eeŋgopeneŋ, ine sâcmutâc dâŋticne mana rereŋ epene fuŋne jaŋgeŋkeme mananaŋmu.  
\v 4 Á ŋic moc e sâcmutâc dâŋticne mana rereŋ mi ehuc muocmu, “No Anutu mana maŋ eekopac”, ere burecŋic muzo, ŋic iŋucnere maŋko dâŋ fâri qizecne mi fokac.  
\v 5 Moc e ine Anuture dâŋ mana rereŋ eocmu, e jâmbomac Anutu maŋjauŋ fârine ecneocmu. Iŋuc ehuc ine Anuturao qohotaeŋgopeneŋ irec fuŋne taniŋkeme mananaŋmu.  
\v 6 Moc e Anuturao qohotahuc jukopac muocmu, e Jesu juwec irec sâcko jaha juzejec.   
\s1 Ââgo erâ tatamacko juhâmozo  
\p
\v 7 Jorocfâc-nane, no sâcmutâc dâŋ ɋâricne moc mi qâreŋke-ŋarekopac, i raŋɋane, fuŋnaonec mana wefuhuc jueŋgopieŋ i hâcne. Dâŋ qazu-ŋarekicne irec hâcne sâcmutâc dâŋ raŋɋane mukopac.  
\v 8 Erâ dâŋ qâreŋkekopac i sâcmutâc dâŋ ɋâricne wâc ekac, i Jesurao â ŋoŋerao mâmâc fârine ekac. Ine fuŋne šiŋucte: Dapâc raruŋkehame tatamac fârinezi fua tâcnehuc fokac.  
\v 9 Eme ŋic moc e âgo-ticne qaisockeekaczi “no tatamacko jukopac” muocmu, ere dapâcko juweczi jukac muzo.  
\v 10 Á moc e âgo-ticne maŋzi jauŋkeocmu, e ine tatamacko sâcne juraocmu, ehuc sâqocne bâbâiŋ moc mi bâfuaocmu.  
\v 11 Á moc e âgo-ticne qaisockeocmu, e ine dapâcko juocmu â dapâcte hatao raocmu, e dapâcko šâŋe fime qiŋquŋkeme wemocko hata-ticne hone taraocmu.   
\s1 Kâcɋne piticne dâŋ i mâmâc manazo  
\p
\v 12 Naru motec ŋoŋe Jesu šâŋe-ticnere erâ sâqocne bâtâmire-ŋarekicnere dâŋ qâreŋke-ŋarekopac.  
\v 13 Mamac ŋoŋe juwarehuc juwec sanaŋ e mana maŋ embiŋte dâŋ qâreŋke-ŋarekopac. ŋicmotec ŋoŋe sâqocne rune sanaŋkecnembiŋte dâŋ qâreŋke-ŋarekopac. Naru motec ŋoŋe Mamac mana maŋ embiŋte dâŋ qâreŋke-ŋarekopac.  
\v 14 Mamac ŋoŋe juwarehuc juwec sanaŋ e mana maŋ embiŋte dâŋ qâreŋke-ŋarekopac. Ŋicmotec ŋoŋe sasanaŋ-ŋeŋic fokac â Anuture dâŋzi maŋŋeŋicko fokac â sâqocne rune sanaŋkecnembiŋte dâŋ qâreŋke-ŋarekopac.   
\s1 Maŋnâŋec mâreŋkopec wiacte mi domazejec  
\p
\v 15 Maŋŋeŋic mâreŋko me mâreŋte wiacko mi râepie fozejec. Moc e maŋticne mâreŋko râeme foocmu, e wemocko Mamac maŋjauŋ ecneocmu.  
\v 16 Manaŋgopieŋ, mâreŋkopec wiac sasawa: Sahaczi sasec, šâŋezi sasec â maŋzi fefe wiac, i Mamactaonec mâcne, i mâreŋkonec.  
\v 17 Eme mâreŋ e sasec wiac-ticnehec siroweocmu, Anuture micdâŋ mana rereŋ eocmu e ine juhuc juocmu sanaŋ.   
\s1 Kristore râsi qizec fuaocte mukicne  
\p
\v 18 Naru motecfâc-nane, dameŋ bembeŋke-jâmbâŋkekac” eme ŋoŋe Kristore râsi qizec fuaocte mukicne i manaŋgopieŋ” eme ši biac râsifâcne bocjaha fuambiŋ juraŋgopieŋ” irec hâcne dameŋ bembeŋke-jâmbâŋkekac i manaŋgopeneŋ.  
\v 19 Jaŋe fufua i nâŋâcne ŋondeŋkonec fuambiŋ, â âgo fârifâc-nâŋec juju ine mi jumbiŋ. Jaŋe âgo fârifâc-nâŋec jurâ muzac mi behec-nâponšapiŋ. Behec-nâpombiŋ i fuŋne šiŋuc taniŋkeocte embiŋ: Nâŋâcnehec jueŋgopieŋ jaŋe âgo fârifâc-nâŋec sasawa aricne.  
\v 20 Ŋoŋe ine Tiri runezi Mâro rua-ŋarewecte mamanahec sasawa juŋgopieŋ.  
\v 21 Ŋoŋe dâŋ fâri qizecne kâuc baeŋgopieŋ muhuc papia mi qâreŋke-ŋarekopac. Aricne, ŋoŋe dâŋfâri manaeŋgopieŋte qâreŋke-ŋarekopac. Erâ wâc šiŋucte: Burec sasawa i ere maŋnaonec mi fuaekac.   
\s1 Anutu Mamac â ŋokâ mi bârâwiŋ-jofazo  
\p
\v 22 Burecŋic i more muzo? Jesu e Kristo aricne, ŋic moczi iŋuc mume ere burecŋic muzo. Mamac â Ŋokâ mic bacjofaocmu, ŋic ere muzo, e Kristore râsi qizec.  
\v 23 Moc e Ŋokâ mickeocmu, e Mamac mâmâc qikiŋneocmu, â moc e Ŋokâ muɋaɋackeocmu, e Mamac mâmâc sakareocmu.  
\v 24 Fuŋnaonecteaŋ mitidâŋ mana warehuc jumbiŋ i hâcne maŋke junšepieŋ. Mitidâŋ i maŋke jupie Ŋokâ â Mamac jahe iŋuc jaha maŋŋopahuc junicmu.  
\v 25 Wiac i Jesuzi biŋe qanârewec, juju sanaŋ hâcne.   
\s1 Mâro ruarâ juku Jesurao qacfiric domazo  
\p
\v 26 Maŋ bâsifuc eŋareeŋgopieŋ jaŋere dâŋ iŋuc qâreŋke-ŋarekopac.  
\v 27 Ŋoŋere ine šiŋuc mukopac, Mâro rua-ŋarewec i ŋoŋerao foocmu, irec wemocte ŋic moczi mu qazuc eŋareocmu, i aricne. Mâro ruambiŋ eki dâŋ sasawa ŋaza qazuc eekac. Eme dâŋ i burec mâcne, i jâmbomac. Eme qazu-ŋarewec iŋuc maŋnao junšepieŋ.  
\v 28 Naru motecfâc-nane, ŋoŋe Kristo maŋnao junšepieŋ. Eme juku fua tâcneme qacfiric domanšepeneŋ, ehuc fifisi-ticnao mimišu qâšušu ehuc wise ŋeŋe uruŋ mi enšepeneŋ.  
\v 29 Anutu e tiŋne juekac, ŋoŋe iŋuc manaeŋgopieŋko ine ŋic moc tiŋnea jume honerâ munšepieŋ, Anuturaonec fuawec.   
\c 3  
\s1 Anuture naru motecfâc juŋgopeneŋ irec fuŋne  
\p
\v 1 Manaŋgopieŋ, Mamac-nâŋec e maŋjauŋ mo iŋucne enârehuc naru motecfâc-ticne munârewec. Eme i hâcne juŋgopeneŋ. Ŋic miti tâmiric jaŋe mi šâŋitac-nâpoeŋgopieŋ, i Anutu e jahacne mi šâŋitambiŋ irec.  
\v 2 Âgo biaŋfâc-nane, nâŋâc šiŋuczia Anuture naru motecfâc juŋgopeneŋ, â juku sâc weniŋucne bâfuanaŋmu, ine biac mi fua taniŋkekac. šiŋuc ine manaŋgopeneŋ: Wofuŋ fua tâcneme juju hawari-ticne honehuc sâc ijaha enaŋmu.  
\v 3 Eme moc e irec erâ worickehuc juocmuzi Wofuŋ e ɋaɋacne jukac iŋucnea juocte maŋticne emasaŋkeocmu.   
\s1 Sâqocne bahuc Sataŋte motec ezo  
\p
\v 4 Moc e sâqocne baekac, e sâcmutâc dâŋ qâsuaekac, sâcmutâc dâŋ qâqâsua izi hâcne sâqocne fârine.  
\v 5 Á Jesure ine manaeŋgopieŋ, e sâqocne bârireocte fisiwec, erâ e jahacne ine bahac fâsâc juwec.  
\v 6 Moc e Jesuo juekaczi sâqocne mi baekac. Á moc e sâqocne baekac, e ine Jesu hone manac mi ecnewec.  
\v 7 Naru motecfâc-nane, moczi moc maŋ bâsifuc eŋarezo mupie mi mananšepieŋ. Moc e tiŋne hata âteme ere ŋic tiŋne muzo, e Jesuzi juju tiŋne juekac, iŋuc jaha juocmu.  
\v 8 Moc e sâqocne baocmu, e Sataŋte ŋic. Sataŋ e sâqocne fuŋnaonecteaŋ bawec bahuc juekac. Anuture Ŋokâ eki Sataŋte gie imackeocte fisiwec hâcne.   
\s1 Anuture naru motec juhuc sâqocne bapa i mi fokac  
\p
\v 9 Moc e Anuturaonec fuaweczi sâqocne mi baocmu. Anuturaonec jujure tâpiri focnehame e Anuturaonec fuakicnezi wemocko sâqocne baocmu.  
\v 10 Anuture naru motec â Sataŋte naru motecfâc jaŋere fuŋne šiŋucko hâcne taniŋkeme honezo: Moc e juju tiŋne mi juocmu, e Anuturaonec mi mucnezo, â moc e âgo-ticne maŋjauŋ mi ecneocmu, ere ijaha muzo.  
\v 11 Mitidâŋ mana wareeŋgopieŋ i šiŋuc hâcne: Maŋzi Jauŋ babac enšepeneŋ.  
\v 12 Kaiŋte hata mi âtenšepeneŋ, e sâqocne runere motec erâ ɋaticne qâhâmowec. Erâ wemocte qâhâmowec? Ine kecšiŋucte: E Jahacne juju bapa sâqocne â ɋaticnere juju bapa biaŋne irec.   
\s1 Maŋjauŋ enârekicnere maŋjauŋ enšepeneŋ  
\p
\v 13 Âgofâc-nane, miti tâmiriczi qaisoc-ŋopapie manapie iŋuc me iŋuc mi ezejec.  
\v 14 Nâŋâcne šiŋuc manaeŋgopeneŋ: Hâmockonec wiserâ jujuo rašimbeŋ. Iŋuc ekicnere hâcne âgofâc-nâŋec maŋjauŋ ejareeŋgopeneŋ. Moc e maŋjauŋ tâmiric juocmu e ine hâmocnea Juocmu.  
\v 15 Moc e âgo-ticne qaisockeocmu e šika qaqaŋic mucnezo. Eme ŋoŋe šika qaqaŋic jaŋere manaeŋgopieŋ, jaŋere maŋko juju sanaŋ mi fuarâ foocmu.  
\v 16 Jesu e nâŋâcnere erâ juju-ticne qikiŋnewecko maŋjauŋte fuŋne šâŋitambeŋ. Eme nâŋâc iŋuc jaha âgofâc-nâŋec jaŋere erâ juju-nâŋec qikiŋnenaŋte munârekicne.  
\v 17 Ŋic moc e nânâ mafa mâriri-ticne fohame âgo-ticne waha qaqane jume hone takirerâ bune bofackeocmu, ere muzo, maŋticnao Anuture maŋjauŋ mi fokac.  
\v 18 Naru motecfâc-mae, nâŋâc jauŋ i dâŋzi â micbipiczi sawa mâcne, mezi â maŋzi banšepeneŋ.   
\s1 Anuture dâŋ reŋkehuc hâhâwicmâc juzo  
\p
\v 19 Iŋuc epene dâŋ fâri qizecnere kikefuŋ juŋgopeneŋ irec fuŋne taniŋkeme mananaŋmu. Eme maŋnâŋeczi mumu hehec enâreme Anuture maio sâcne bâmiriŋkenaŋmu.  
\v 20 Ehuc šiŋuc munšepeneŋ: Anutu e maŋnâŋecte sâc mâcne, e sâc moc juhuc wiac mana-fâreekac.  
\v 21 Jorocfâc-nane, maŋnâŋeczi mumu hehec mi enârehame Anuture maio qacfiric sâcne junaŋmu.  
\v 22 Erâ micdâŋ-ticne reŋkehuc ere maio wiac ebac epene biaŋkeekacte irec me irec numucnepene nâreekac.  
\v 23 Sâcmutâc dâŋticne kecšiŋuc fokac: ŋokâ-ticne Jesu Kristo ere šâŋe manasiŋkehuc maŋzi jauŋ babac enšepeneŋ. Iŋuc hâcne enaŋte munârewec.  
\v 24 Moc e sâcmutâc dâŋticne reŋkeocmu e Anutuhec maŋmaŋ enicmu. Anutu maŋkeeŋgopeneŋ i Mâro nârewec eki mufua-nâreme manaeŋgopeneŋ.   
\c 4  
\s1 Mâro fuŋne fuŋne juŋgopieŋ  
\p
\v 1 Âgo biaŋfâc-nane, mâro kosa jaŋere dâŋ mi mana šakienšepieŋ. Mâro moc e Anuturaonec me mâcne, i mana taraniŋte ruc banšepieŋ. Porofete burecne wemo afecne fuambiŋ juraŋgopieŋ.  
\v 2 Anuture Mâro e šiŋucko šâŋitazo: Mâro moc e Jesu Kristo ŋic fuawec i mutaniŋkeocmu, e Anuturaonec iŋuc mucnezo.  
\v 3 Á mâro moc e Jesu mi mutaniŋkeocmu e Anuturaonec mâcne. E Kristo râsi qizec-ticnere mâro iŋuc muzo. Ere manaeŋgopieŋ, e mâreŋko fuaocte mukicne, eme šine hâcne biac fuakac.   
\p
\v 4 Naru motecfâc-mae, ŋoŋe Anuturaonec, irec porofete burecne sanaŋke-jarembiŋ. Ŋoŋere maŋko juekac ere tâpirizi mâreŋko juekac ere tâpiri sirickekac hâcne.  
\v 5 Porofete burecne jaŋe mâreŋkonec, irec mâreŋkonec ŋiczi dâŋ mumu i mueŋgopieŋ, mupie mâreŋkoneczi hazec-jeŋic râeeŋgopieŋ.  
\v 6 Nâŋâc ine Anuturaonec, eme moc e Anutu hone šâŋitac eekaczi dâŋnâŋec manaekac. Anuturaonec mi fuakicnezi ine dâŋnâŋec qikiŋneekac. Dâŋ fâri qizecnere mâro â bâbâsifuc mâro jahere fuŋne iŋucko hâcne šâŋitaeŋgopeneŋ.   
\s1 Anutu e maŋjauŋte fuŋne  
\p
\v 7 Jorocfâc-nane, nâŋâc maŋjauŋ eec enšepeneŋ. Maŋjauŋ i Anuturaonec. Eme moc e maŋjauŋhec juomu, e Anuturaonec fuakicnezi Anutu mana maŋ eekac mucnezo.  
\v 8 Moc e maŋjauŋ tâmiric juocmuzi Anutu šâŋe ruruŋkeocmu. Anutu e maŋjauŋ irec fuŋqizecne hâcne.  
\v 9 Anutuzi Ŋokâ-ticne mocjaha e juju bâfua-nâreocte mâreŋko soreme wahawec ira hâcne maŋjauŋ-ticne nâŋâcnao fua taniŋkewec.  
\v 10 Maŋjauŋte fuŋne šiŋuc fokac: Nâŋâc Anutu maŋjauŋ mi ecnembeŋ, ekizia nâŋâc maŋjauŋ enârehuc Ŋokâ-ticne soreme waharâ sâqocne-nâŋecte erâ kiwiric nâwoc rowec.   
\s1 Anuture maŋjauŋ honehuc ŋiczi wâc eec enšepeneŋ  
\p
\v 11 Jorocfâc-nane, Anutu e maŋjauŋ iŋucne sâko enarewecte nâŋâc iŋuc jaha maŋzi jauŋ babac ehuc junšepeneŋ.  
\v 12 Ŋiczi Anutu hohone i moc mi ekicne, maŋzi jauŋ babac enaŋmuo ine Anutu maŋkenaŋmu, eme maŋjauŋ-ticne nâŋâcnao fua sarickeocmu.  
\v 13 Eki nâŋâc maŋnâpoekac â nâŋâc e maŋkeeŋgopeneŋ, irec fuŋne ine Mâro-ticne nârewec ira taniŋkewec.  
\v 14 Mamac e Ŋokâ-ticne mâreŋ sâc ŋic bâpiaŋ-nâpoocte soreme wahawec, eme nâŋe šâŋe fâri-nâŋeczi qame honembeŋte dâŋ i mutaniŋkeeŋgopeneŋ.  
\v 15 Eme ŋic moczi Jesu e Anuture Ŋokâ jâmbâŋ dâŋ i mutaniŋkeocmu, e Anutu maŋkeocmu â Anutuzi wâc e maŋkeocmu.  
\v 16 Anutu maŋjauŋ-ticne nâŋâcnao fuawec i hone šâŋitac erâ mana šakiembeŋ. Anutu e maŋjauŋte fuŋqizecne, eme moc e maŋjauŋhec juocmu e Anutuzi maŋkeocmu, â eki wâc Anutu maŋkeocmu.   
\s1 Maŋjauŋheczi hâhâwic me âgo qaqaisoc mi ezejec  
\p
\v 17 Iŋucko nâŋâcnao maŋjauŋ fua tarawec, i okac dameŋko qacfiric domanaŋte. Jesuzi juekac iŋuc jaha nâŋâc wâc mâreŋko šira jueŋgopeneŋ hâcne.  
\v 18 Hâhâwic â maŋjauŋ jahe ââgo aricne, maŋjauŋ fârinezi hâhâwic guriŋkeocmu. Hâhâwic e šâic-ticnehec. Irec moc e hâhâwic bajuocmu, erao maŋjauŋ sâcne mi fua tarawec muzo.  
\v 19 Nâŋâc ine Anutuzi qanaŋ maŋjauŋ enarewecte maŋjauŋhec junšepeneŋ.  
\v 20 Ŋic moc e Anutu maŋjauŋ ecneekopac muhuc âgo-ticne qaisockeocmu, ere burecŋic muzo. Manaŋgopieŋ, moc e âgo-ticne šâŋezi hohonene e qaisockehuc wemocko Anutu mi hohonene maŋjauŋ ecneocmu.  
\v 21 Jesure sâcmutâc dâŋ šiŋuc fonârekac: Anutu maŋjauŋ ecneekaczi âgo-ticne mâmâc ecnezejec.   
\c 5  
\s1 Anuturao qohotapene wiac moczi mi bawahac-nâpoocmu  
\p
\v 1 Ŋic moczi Jesu e Kristo muhuc mana šakieocmu, e Anuturaonec fuakicne muzo. Eme moc e mamac bâbâfua maŋjauŋ ecneocmuzi ɋâricfâcne mâmâc ejareocmu.  
\v 2 Nâŋâc Anuture naru motecfâc maŋjauŋ ejareeŋgopeneŋ me mâcne, ine Anutu maŋjauŋ ecnehuc sâcmutâc dâŋticne reŋkepene izi mufuaocmu.  
\v 3 Anutu maŋjauŋ mâc mi ecnezo, sâcmutâc dâŋticne reŋkehuc hâcne maŋjauŋ ecnezo. Anuture sâcmutâc dâŋ i dâŋ ŋemâcne aricne.  
\v 4 Anuturaonec fuakicne sasawa jaŋe mâreŋkonec wiac qamaseeŋgopieŋ, â mâreŋkonec wiac qame wahaekac tâpiri i šâŋene mamanasiŋ-nâŋec.   
\s1 Anutu e dâŋticne dopeckehuc wiac râewec  
\p
\v 5 Moczi sasanaŋhec erâ mâreŋkonec wiac sasawa qamaseocmu? Ŋic moc e, Jesu e Anuture Ŋokâ, iŋuc muhuc mana šakieocmu eki hâcne iŋuc eocmu.  
\v 6 Jesu Kristo eki hâcne opâhec â sochec fisiwec, opâhec sawa mâcne, opâhec â sochec mâmâc.  
\v 7 Mârozi ine fuŋne mufuaekac, Mâro e dâŋ fâri qizecnere rune hâcne.  
\v 8 Irec jahec â moc jaŋe dodopec gie baeŋgopieŋ: Mâro â opâ â soc. Eme jaŋe jahec â moczi fuŋne-jeŋic mocjaha.  
\v 9 Ŋiczi dâŋ dodopec ehuc mupie manapene jâmbomac eekac, â Anutuzi dâŋ moc dopeckeme ine fâri rarau jâmbâŋ eekac. Anuture dodopec dâŋ ine Ŋokâ-ticnere dâŋ dopeckewec i hâcne.  
\v 10 Moc e Anutu Ŋokâ-ticne manasiŋkeocmu, e Anuture dâŋ fârine maŋkeocmu. Moc e Anuture dâŋ mi mana šakieocmu, i Anutu burecŋic mucnekac eocmu. Ŋic iŋucnezi Anutu e Ŋokâ-ticnere dâŋ dopeckewec i maname fâri tâmiric ekac hâcne.  
\v 11 Á dâŋ dopeckewec ine šiŋuc fuakac: Anutu e juju sanaŋ bâfua-nârewec, â juju sanaŋ irec jâcne ine Ŋokâ-ticne.  
\v 12 Moc e Ŋokâ rauckeocmu e juju rauckeocmu, moc e ŋokâ mi rauckeocmu e juju wâc mi rauckeocmu.   
\s1 Nunumure â sâqocnere dâŋ  
\p
\v 13 No dâŋ i ŋoŋe kecšiŋuc mananiŋte qâreŋke-ŋarekopac: Anutu Ŋokâ-ticne manasiŋkeeŋgopieŋ ŋoŋe juju sanaŋ foŋarekac.  
\v 14 Nâŋâc šiŋuc muhuc Anutu bubiaŋ manacneeŋgopeneŋ: Wiac mocte, e jahac maname fokac irec sâcko râehuc numucnepene mana-nâreocmu.  
\v 15 Ine hâcne, wiac i me i numucnepene mana-nâreocmu, i manahuc šiŋuc wâc mananaŋmu: Wiac numucnekicne i biac rauckeŋgopeneŋ.  
\v 16 Ŋic moc e âgo-ticnezi sâqocne bame honeocmu, sâqocne hârâcte niŋgiŋ sanaŋ-ticnehec i mâcne, ine honerâ ere erâ numume Anutuzi juju hatao râeocmu, ine sâqocne hârâcte niŋgiŋ sanaŋ-ticnehec mi baniŋmu jaŋe iŋuc ejareocmu. Sâqocne hârâcte niŋgiŋ sanaŋ-ticnehec i fokac wâc. Iŋucnere nunumu gie baocte mi mukopac.  
\v 17 Juju bapa hehesicne i sâqocne sasawa. Erâ sâqocne gâcne ine hârâcte niŋgiŋ sanaŋ-ticnehec mi ekac.   
\s1 Maŋ mamanasu-nâŋec fuame Wofuŋ fârine šâŋitaeŋgopeneŋ  
\p
\v 18 Nâŋâc šiŋuc manaŋgopeneŋ: Anuturaonec fuakicnezi sâqocne mi baocmu. Anuture Ŋokâzi hone maiŋ ecnehame sâqocne runezi mi bâuaocmu.  
\v 19 Nâŋâc Anuturaonec fuakicne, â miti tâmiric sasawa jaŋe sâqocne rune ere rurumaŋko foŋgopieŋ, iŋuc manaŋgopeneŋ.  
\v 20 Erâ šiŋuc wâc manaŋgopeneŋ: Anutu Ŋokâ-ticne e waharâ maŋ mamanasu bâfua-nârewecte jâmbomac rune mana maŋ ecneeŋgopeneŋ. Eme jâmbomac rune, Ŋokâ-ticne Jesu Kristo, eki maŋnâpokac. Eki hâcne Anutu fârine â juju sanaŋ rune.  
\v 21 Naru motecfâc-mae, wofuŋ jawane jaŋere rucgereŋ-ŋeŋic banšepieŋ.