\id 1CO 1 Corinthians, Kate, PNG, wwh 12/92 
\h KORINTI I 
\toc1 Korinti I 
\toc2 Korinti I 
\toc3 1Ko 
\mt1 KORINTI I  
\c 1  
\s1 Jambuŋdâŋ  
\p
\v 1 Anuture micte Jesu Kristore aposolo epo Paulo no hâcne â âgo-nâŋec Sostene  
\v 2 nâhe Korinti haeonec Anuture kikefuŋ ŋoŋere papia ši râekoperec. Ŋoŋe Jesu Kristozi jambuŋ-ŋoparâ tirimoc juniŋte hefârec-ŋopawec. Iŋuc eŋareme ine hae sâc opâ ruac šira â gâcnao Wofuŋ Jesu Kristo šâŋe-ticne riwaseckehuc jueŋgopieŋ jaŋehec mocjaha embiŋ.  
\v 3 Mamac-nâŋec Anutu â Wofuŋ Jesu Kristo eraonec aki anonoc â wama ŋoŋerao fotâcnerâ fozejec.   
\s1 Korinti ŋic Jaŋerao miti fârine fua-hâmowec  
\p
\v 4 Anutu e Jesu Kristore erâ aki anonoc sesic-ŋopawecte no ŋoŋere manasuhuc daŋge berec jaha âzâcneekopac.  
\v 5 E miti mumure aafec â mamana fuŋne fuŋne aameo tahac-ŋopawec.  
\v 6 I Kristore mumutaniŋ dâŋzi ŋondeŋ-ŋeŋicko gâtâ bawecte iŋuc fuawec.  
\v 7 Eme mitire wiac moc mi basaeŋgopieŋ. Mâc Wofuŋ-nâŋec Jesu Kristo fua taniŋkeocte woŋec mocjaha jueŋgopeneŋ.  
\v 8 Eki hâcne Wofuŋ-nâŋec Jesu Kristore fifisi dameŋko kiŋfâsâc domaniŋte hefârec-ŋopame juhapie dameŋ-ŋeŋic taraocmu.  
\v 9 Anutu e Ŋokâ-ticne Jesu Kristo, Wofuŋ-nâŋec hâcne, erao šuhuckeniŋte hefârec-ŋopaweczi mocmu mocmu-ticne mi fokac.   
\s1 Korinti ŋic jaŋerao mitire fâfâuc fuawec  
\p
\v 10 Âgofâc-nane, no Wofuŋ-nâŋec Jesu Kristo šâŋe-ticnere erâ uŋdâŋ ši mupe mananiŋ: Ŋoŋe dâŋ fuŋne fuŋne â fâfâuc mi bâfuanšepieŋ, aricne. Maŋ mamanasu-ŋeŋic bâturepie mocjaha eha junšepieŋ.  
\v 11 Âgo bureŋ, no ŋondeŋ-ŋeŋicko dâŋ fuawec fokac i Koloe ere wiacfâc mupie manapo.  
\v 12 Dâŋ kecšiŋucte mukopac: Ŋoŋeraonec moczi muekac `no Paulore ŋic', â moczi muekac “no Apolore ŋic”, â moczi muekac “no Kefare ŋic”, â moczi muekac “no Kristore ŋic.”  
\v 13 Hâc, i weniŋuc, Kristozi fâuckewec me? Me Paulo noni ŋoŋere erâ, maripoŋko hâmopo? Me Paulo nore šâŋezi hucŋopaha Miti Opâ ruambiŋ?  
\v 14 Sowine no nahac Miti Opâ mi rua-ŋarepo, Krisipo â Gaio jahe sawa rua-jactepo.  
\v 15 Ŋoŋe šiŋuc munšipiŋte: “Ere šâŋezi hucnâpoha Miti Opâ ruambeŋ.”  
\v 16 Mâcne, ši moc manasukopac, Stefana ere wiacfâc jaŋe wâc rua-jarepo, gâcne jaŋere ine mi manakopac.  
\v 17 Kristozi ŋic Miti Opâ rua-jarepemurâ mâcne, Biŋebiaŋ jaza qazuc epemurâ munarewec. Erâ Kristo maripoŋ-ticnere dâŋ tâpirimâc ezacte maŋɋârâŋ dâŋ ericke bâpiaŋ ehuc mi muekopac.   
\s1 Miti tâmiriczi Jesu dâŋticnere manapie racne eekac  
\p
\v 18 Maripoŋte dâŋ i sisipiric hata âteeŋgopieŋzi manapie racne eekac, â bâbâpiaŋ hatao jueŋgopeneŋzi ine manapene Anuturaonec tâpirihec eekac.  
\v 19 Dâŋqâreŋ moc šiŋuc hâcne fokac:  
\q1 “No maŋɋârâŋhec jaŋere dâŋ qape wahaocmu  
\q1 â mamana-jeŋichec jaŋere mamana batackepemu.”   
\m
\v 20 Eme maŋɋârâŋhec jaŋe weni? Á mana gufu koparic ŋic jaŋe weni? Á dameŋ širec fuŋne mamana jaŋe weni? Anutu e maŋ mamana-jeŋic bahameŋkewec hâcne.  
\v 21 Eme Anuture maŋɋârâŋ dâŋbiri fua-bipieha ŋic jaŋe jaŋacne mamanazi Anuture fuŋne šâŋitaniŋte emâmâŋkembiŋ, irec Anutuzi maname sâckeme mitidâŋ mutucne i manarâ biaŋkenaŋte muwec.  
\v 22 Judaŋic jaŋe fuŋne qaqa mâsire qizec qaeŋgopieŋ â Grikŋic jaŋe maŋɋârâŋhec eniŋte fotarieeŋqopieŋ,  
\v 23 nâŋe ine Kristo maripoŋko qakicne irec dâŋ mupene Judaŋic jaŋe manapie quŋke sâqoreekac â qâpuc jaŋe manapie dâŋ mutucne eekac,  
\v 24 ehame hefârec-jopakicne, Judaŋic mecne Grikŋic mecne, jaŋe ine Kristore manapie Anutu tâpiri-ticnere â maŋɋârâŋ-ticnere hozine eekac.  
\v 25 Ŋic jaŋe Anuture mutucne muhapie mutuc-ticnezi ŋic jaŋere mamana jâuruekac â Anuture dodocne muhapie dodocne-ticnezi ŋic jaŋere tâpiri sirickeekac.   
\s1 Fekicne afecne, omane bocjaha hefârec-jopakicne  
\p
\v 26 Âgofâc-nane. ŋic weniŋucne hefârec-ŋopakicne i mana honeniŋ: Sahackopec wiacte maŋɋârâŋhec bocjaha mâcne, tâpirihec bocjaha mâcne, ŋicbomboŋ guruonec bocjaha mâcne.  
\v 27 Ŋic maio mutucne jueŋgopieŋ jaŋe Anutuzi hefârec-jopahuc maŋɋârâŋhec mimi qaqa ejareekac, â ŋic maio gegec dodocne jueŋgopieŋ jaŋe Anutuzi hefârec-jopahuc tâpirihec mimi qaqa ejareekac,  
\v 28 â ŋic maio omane â hujukicne jueŋgopieŋ jaŋe Anutuzi hefârec-jopaekac, â ŋic maio bebekâne jueŋgopieŋ jaŋe Anutuzi hefârec-jopahuc šai šonšoŋ-jeŋichec jaŋe siŋ qatara-jareekac.  
\v 29 Mâreŋŋic moczi Anuture maio sahac-ticne bafezacte iŋuc hâcne ewec.  
\v 30 E mitio juju-ŋeŋicte bâbâfua i Kristo Jesu râe-nârewec. Kristo e hâcne Anutuzi maŋɋârâŋ dâŋte rowaŋ-nâŋec â kiŋroro-nâŋec â maŋɋaɋac bâbâfua-nâŋec â kikitâc-nâŋec râe-nârewec.  
\v 31 Irec dâŋqâreŋ šiŋuc fokac i sanaŋkezejec: “Moc e mumuteŋ dâŋ muzo murâ Wofuŋtao muzejec.”   
\c 2  
\s1 Paulozi mu bâpiaŋ dâŋ mi muwec  
\p
\v 1 Âgo bureŋ, no ŋoŋerao fisipo ine Anuture mumutaniŋ dâŋ ŋazapemurâ dâŋ ericke bâpiaŋ ehuc me maŋɋârâŋ dâŋ moc muhuc mi ŋazapo.  
\v 2 No šiŋuc mana sanaŋkehuc fâpo: Dâŋ gâcne aricne, Jesu Kristo maripoŋko qakicne ere dâŋ jâmbâŋ jaha muzepac.  
\v 3 Erâ ŋoŋerao dodocne enarehame hâhâwic â memezac faio boc jupo.  
\v 4 Ehuc miti mumu i maŋɋârâŋ dâŋ mu bâpiaŋ ekicne irec sâcko mi mupo, aricne, tâpiri â Mâro ŋoŋerao fuaocte irec sâcko mupo.  
\v 5 I mamanasiŋ-ŋeŋiczi ŋic maŋɋârâŋ dâŋko mâcne, Anuture tâpirio fosiŋneocte iŋuc epo.   
\s1 Anuture dâŋsoŋ mufuakicne  
\p
\v 6 Maŋɋârâŋ dâŋ hukicne ine maŋjeŋic ɋârâŋkekicne jaŋe jazaeŋgopeneŋ, erâ i mâreŋ kecširec maŋɋârâŋ dâŋ me mâreŋ ŋicbomboŋ sisirowenezi dâŋ hukicne mueŋgopieŋ irec sâc mi eekac, aricne.  
\v 7 Nâŋe Anuture dâŋsoŋ hukicne mufuaeŋgopeneŋ. Dâŋ i ŋic nâŋâc taniŋke ɋaɋac enaŋte Anutuzi mârâc jaha dameŋmâc juwecko mu bâmoc ewec.  
\v 8 Mâreŋ ŋicbomboŋ jaŋeraonec moczi moc dâŋ hukicne i hâcne mi mana tarambiŋ, mana tararâ muzac eri tatamac Wofuŋ maripoŋko mi qanšapiŋ.  
\v 9 Irec dâŋqâreŋ fokac ine šiŋuc:  
\q1 “Ʒâŋezi mi honekicne â hazeczi mi manakicne,  
\q1 â ŋicmaŋ moczi moc mi manasukicne,  
\q1 Anutuzi maŋjauŋ ecneeŋgopieŋ  
\q1 jaŋere biŋe bâmockewec i hâcne.”   
\s1 Ŋic Mâroheczi miti manapie fârinehec eekac  
\p
\v 10 Nâŋe ine Anutuzi Mâro-ticne ecneme dâŋ i mufua-nârewec. Mâro e wiac sasawa irec fuŋne mana gufuc efâreekac. Anutu e jahacne fuŋne bâutuckekicne i mâmâc manaekac.  
\v 11 Mo ŋiczi âgo-ticnere maŋte fuŋne manaocmu? Maŋ rune eki sawa manaocmu. Eme Anutu maŋticnere fuŋne iŋuc jaha ŋic moczi mi manaocmu, Anutu Mâro-ticnezi buc manaocmu.  
\v 12 Eme nâŋe ŋickonec mâro i mi rombeŋ, nâŋe Anuturaonec miti kâdoc hone mana tarac enaŋte Anuturaonec Mâro i rombeŋ.  
\v 13 Nâŋe miti kâdoc irec hâcne mu binaŋ eeŋgopeneŋ. I ŋic maŋɋârâŋheczi mi qazu-nârembiŋ, i Mârozi qazu-nârewec. Eme Mârore dâŋ i Mârore dâŋmaracko mueŋgopeneŋ.  
\v 14 Ŋic Mâro tâmiric moczi ine Anutu Mâro-ticnere dâŋ mi manaocmu. E wemo-ticnezi manaocmu, aricne, e maname dâŋ fârimâc eocmu. I Mâroheczi mamanane sawa eekac.  
\v 15 Ŋic Mâroheczi wiac sasawa sâcne mana wosâeocmu, ŋic Mâro tâmiriczi ine ere fuŋne kâuc baocmu.  
\v 16 Wofuŋ maŋticnere dâŋ i mozi manaweczi sâcne âzâcne mutâc eocmu? Nâŋe ine Kristo maŋbuc-ticnere dâŋ bajuŋgopeneŋ.   
\c 3  
\s1 Korinti ŋic jaŋe Jesure ɋiefâc jumbiŋ  
\p
\v 1 Âgofâc-nane, no ŋoŋerao fisirâ ŋic Mârohec dâŋ jajazane i wemocko ŋazazapo? Aricne, ŋic Mâro tâmiric jajazane i Kristore ɋiefâc ŋoŋe ŋazapo.  
\v 2 No nânâ sanaŋne mi ŋarehuc susu sawa gumec-ŋopapo, nânâ sanaŋne wemocko nanšapiŋ. Erâ šiŋuczia nânâ sanaŋne nâniŋte sâc wâc mi eŋgopieŋ.  
\v 3 Ŋoŋe Mârohec sâcne mi embiŋ. E tâmiric juhuc hâcne iiriac â kikisâ bâfuahuc ŋic omane jaŋe iŋucne jueŋgopieŋ.  
\v 4 Ŋoŋe “no Paulore ŋic”, “no Apolore ŋic” mueŋgopieŋte ŋic iŋucne ŋoŋe ŋic omane hâcne muŋarezo.   
\s1 Jambuŋkeme fârine fufua ere sawa muzo  
\p
\v 5 Apolo e mo? Á Paulo no mo? Nâhe kiŋaŋ qaqa sawazi miti ŋazapere manambiŋ. Erâ Wofuŋzi gie munâctewec sâc bapec.  
\v 6 No he sarac epo, Apolo e hofâ gie bawec, â Wofuŋzi ine jambuŋkeme fârine fuawec.  
\v 7 Irec he sarac eekac ere mi muzo, â hofâ gie baekac ere mi muzo, jambuŋkeme fârine fuaekac, Anutu hâcne ere mocjaha muzo.  
\v 8 He sarac eekac â hofâ gie baekac jahe sâcjekic mocjaha, furine ine gie-jekicte sâc bârâwiŋ ronicmu.  
\v 9 Nâŋe Anuture babafic, ŋoŋe ine Anuture gie â Anuture fic.   
\s1 Ʒoczi giere fuŋne bataniŋkeocmu  
\p
\v 10 Anutuzi gie tahacnuwec sâc no ficbapa fârinezi simeŋ wâtuŋ râepe huwec. Eme irec fainao ŋic moczi fic šuhuckerâ baekac. Iŋucnezi mana manahuc bazejec.  
\v 11 Wâtuŋ huwec domakac, Jesu Kristo hâcne, e unucke behec erâ moc râepene huhune mi fokac.  
\v 12 Eme wâtuŋ irec fainao moczi goì siliwa me qânâ sanaŋzi, me pipisac sopâc bacrehaczi šuhuckerâ baocmu, ine juku fic bapa-ticnere fuŋne taniŋkeocmu.  
\v 13 Juku dameŋ sâkoo hâcne fuŋne taniŋkeocmu. Ira šocsâko bâruŋkeocmu, eme šoc izi hâcne ficgiere fuŋne bataniŋkeocmu.  
\v 14 Ŋic moczi wâtuŋ faio fic baocmu, i šoczi šâipieme furine roocmu.  
\v 15 Á ŋic mocte fic šoczi šafâreme furine tâmiric juocmu, e jahacne ine akickezo, akickehuc šockonec batarazo.   
\s1 Ŋic mi mumbiaŋ-jopazo  
\p
\v 16 Ŋoŋe Anuture miti ufuŋ, â Anuture Mârozi maŋŋeŋicko ŋeŋe juju eekac, i mi manaŋgopieŋ me?  
\v 17 Ŋic moc e Anuture ufuŋ ima baocmu e Anutuzi wâc ima baocmu. Anuture miti ufuŋ i furu mukicne, eme ufuŋ-ticne i ŋoŋe hâcne.  
\v 18 Ŋoŋe maŋŋeŋic mi eatuckenšepieŋ. ŋoŋeraonec moc e ŋicdâŋ mana maŋ ehuc mamana-ticnere maname fefene eocmu, iŋucnezi mamana i qikiŋnehuc mutucne erâ mamana fârine bâfuazejec.  
\v 19 Mâreŋte maŋɋârâŋ dâŋ i Anutuzi maname fârimâc eekac. Dâŋqâreŋ šiŋuc hâcne fokac: “E ŋic maŋɋârâŋhec jaŋe maŋsioc gie bahapie somâc-jopame somâmaŋ-ticnao hueŋgopieŋ.”  
\v 20 Erâ moc šiŋuc: “Wofuŋ e ŋic maŋɋârâŋhec jaŋere dâŋ maname racne eekac.”  
\v 21 Irec ŋoŋe mâreŋŋic nâŋere muhuc maŋfefe mi enšepieŋ. Wiac sasawa i ŋoŋere biŋe.  
\v 22 Paulo â Apolo â Kefa nâŋe ŋoŋere biŋe. Erâ mâreŋko wiac sasawa, juju me hâhâmo, šiŋuczia fofone â juku fufuane, i ŋoŋere biŋe sasawa.  
\v 23 Ŋoŋe ine Kristore biŋe â Kristo eki ine Anuture biŋe.   
\c 4  
\s1 Wofuŋ e jahac miti gie bapa jaŋere fuŋne bataniŋkeocmu  
\p
\v 1 Ŋoŋe nâŋere manapie Kristore kiŋaŋ qaqa â Anutu boreŋ šeŋaŋ-ticnere soŋaŋ ezejec.  
\v 2 Eme soŋaŋ e ine metâne juocte mucnekicne.  
\v 3 Erâ no nahacnere mupe: Ŋoŋe me ŋic tutumaŋ moczi nore dâŋ muniŋmu i manape fârine mi eocmu. Erâ no nahac wâc fuŋne-nane sâcne mi mupemu.  
\v 4 No bahac-nane moc mi manakopac, erâ irec bahacmâc jukopac mi muzo. Nore fuŋne babataniŋ mocjaha jukac, Wofuŋ hâcne.  
\v 5 Irec ŋoŋe fuŋne babataniŋte fâro mi enšepieŋ. Wofuŋ e jahac fisirâ wiac soŋsoŋ fokac i wâc hewirickeocmu, â ŋicmaŋko wiac fokac i mâmâc bâfua-fâreocmu. Eme Anutuzi ŋic sasawa sâcjeŋic manahuc mumbiaŋ-jopaocmu.   
\s1 Korinti ŋic jaŋe fefene boc embiŋ  
\p
\v 6 Âgofâc, dâŋ mukopac i Apolo â no nâhe nâhâcnao iticnehuc mukopac. Eme ŋoŋe nâherao fuŋne kecšiŋuc honehuc mana taranšepieŋ: Mitidâŋko sâc mukicne i mi jâuruhuc wiac efezo â mâreŋŋic bafec bawahac enârehuc maŋfefe mi ezo.  
\v 7 Me go ŋiczi wiac hezu hegareniŋte mozi mugarewec? Me go wiac fogarekac i wenimoi gare tahac mi ekicne? Aricne, i gare tahac efârekicne, eme go wemocte manatec mi garekicne tinac eme sahacge bafeekic?  
\v 8 Ŋoŋe ine biac gapec-ŋopakicne, biac mâriri sâkohec embiŋ juŋgopieŋ, nâŋe tâmiric ŋicwofuŋ embiŋ juŋgopieŋ. Jâmbomac ŋicwofuŋ enšapiŋ me, ehuc hefârec- nâpopie ŋoŋerao šuhuckehuc ŋicwofuŋ jaha enšapeŋ.  
\v 9 No manape Anutuzi aposolo nâŋe ŋic jawane jaŋere guruo râec-nâpowec ekac, šikare biŋe ekicne tinac. Mâmâc sâko, aŋelo mecne ŋic mecne, honec-nâpopie mamakucne eeŋgopeneŋ hâcne.  
\v 10 Nâŋe Kristore erâ ŋic mutucne embeŋ, ŋoŋe ine Kristorao šuhuckerâ mamana sâkohec embiŋ, nâŋe gegec dodocne, ŋoŋe ine sasanaŋhec, ŋoŋe fekicne, nâŋe ine waha qaqane.  
\v 11 Nâŋe nânâ opâre hâmo sipiric embeŋzi eeŋgopeneŋ, erâ ŋaqi tâmiric â šika faio â fic hae tâmiric jumbeŋzi juŋgopeneŋ.  
\v 12 Á wiac piticne hotâckenaŋte nâŋe nâŋâcne mezi gie baeŋgopeneŋ. Musoriŋ-nâpohapie jambuŋ-jopaeŋgopeneŋ, fific guguriŋ enârehapie mana urueeŋgopeneŋ.  
\v 13 Musâqorec-nâpohapie mu bâmiriŋ ejareeŋgopeneŋ, nâŋe ŋic mâmâc sâko jaŋere jawa sânšâŋ tinac jumbeŋzi juŋgopeneŋ hâcne.   
\s1 Paulo e Korinti ŋic jaŋere mamac ewec  
\p
\v 14 No mimi qaqa eŋarepere mâcne, no naru motecfâc-mae ŋoŋe uŋ sawaŋ eŋarehuc dâŋ ši qâreŋkekopac.  
\v 15 Kristoo wišecfâc-ŋeŋic guruhec juŋareŋgopieŋ mecne, â mamac ine wemocko bocjaha juŋarenšapiŋ, Kristo Jesure erâ Biŋebiaŋ ŋazahuc no mocjahazi mamac-ŋeŋic epo jukopac.  
\v 16 Eme irec nore kike hata bâjâpehuc juniŋte hazec qâuŋ ŋazape mananšepieŋ.   
\s1 Mitire fuŋne dâŋko mi fokac  
\p
\v 17 No irec erâ hâcne Timoteo, Wofuŋko motec biaŋ-mae junarekac, e ŋoŋerao sorepe fakac, fârâ no Kristore miti hata kikefuŋ hae sâc jaza jowatuc eekopac i manasu-ŋareme mananšepieŋ.  
\v 18 Ŋoŋeraonec gâcnezi e mi wareocmu, nore iŋuc muhuc mukac mupe embiŋ.  
\v 19 No ine Wofuŋzi maname sâckeme mi šoraha ŋoŋerao fâpemu, fârâ mukac mupe eeŋgopieŋ jaŋe dâŋjeŋicte mi muhuc tâpiri-jeŋicte fuŋne bataniŋkepemu.  
\v 20 Anuture miti hata i dâŋko mâcne, sasanaŋko fua taniŋkeekac.  
\v 21 Eme ŋoŋe nore weniŋuc muŋgopieŋ? Kâcbiŋhec fâpemurâ muŋgopieŋ, me maŋjauŋ â buuruchec fâpemurâ muŋgopieŋ?   
\c 5  
\s1 Mamakâc sâko fuarâ fowec  
\p
\v 1 No šiŋuc ine jâmbomac mupie manaekopac: Ŋoŋerao mamakâc hâhâwicne, qâpuc jaŋerao mi fufuane, iŋucne fuawec fokac. Ŋic moczi mamac-ticnere ŋonâŋhec juekac, irec mukopac.  
\v 2 Eme ŋoŋe wemocte wiac iŋucne fuarâ fohame pepecne eeŋgopieŋ? Ŋoŋe busâqoc manahuc ŋic wiac ewec e behenšapiŋ me¡  
\v 3 No sahac-nanezi wiwicko juhuc maŋnanezi iqic-ŋoparâ ŋic wiac ewec ere dâŋ ŋondeŋ-ŋeŋicko juhuc tinac kecšiŋuc mutarapo:  
\v 4 Ŋoŋe Wofuŋ Jesu ere šâŋeo tumaŋnehapie no ere tâpirio ŋesiŋnehuc maŋnanezi iqic-ŋopape  
\v 5 ŋic e Sataŋ qikiŋnecnepene maŋ sahac raŋɋa-ticne sipirickezejec, eme Wofuŋ Jesure dameŋ maickeme mâro-ticnezi aakic bâfuazejec.   
\s1 Wiac hâhâtâne qikiŋnehuc nocne bajuzo  
\p
\v 6 Wiac iŋucne foipiehame sahac-ŋeŋic bafeeŋgopieŋte manape sâqorekac. Bec hâhâtâne i wiac piticnezi fârine ruacneme rikepie isirickeme hâtâne efâreocmu, i mi manaeŋgopieŋ me?  
\v 7 Irec hâhâtâne wosâerâ behepie rahame fârine nocne enšepieŋ. Ŋoŋe hâhâtâ-ŋeŋic ŋowac rofârekicne. Nâŋâcne aakic lama okac-nâŋec qakicne wâc, Kristo hâcne.  
\v 8 Irec hombaŋ-ticne ŋenaŋte wiac hâhâtâne behenšepeneŋ. Mamakâc â sindaŋ irec hâhâtâne qikiŋnerâ wiac ɋaɋacne â tiŋne irec fârine nocne bajuhuc hombaŋ-ticne ŋezo.   
\s1 Sâqocne bapa behec-jopazo  
\p
\v 9 No mârâc papia moc šiŋuc qâreŋke-ŋarepo: “Ŋoŋe sasecŋic jaŋehec wiac nâ nareŋ gareŋ â iiqic mi enšepieŋ”,  
\v 10 i ŋic qâpuczi sasecŋic me bâkiri bapa â fiuc serereŋhec me bawe qaŋgec wiac babaju jueŋgopieŋ jaŋere mi mupo. Jaŋe mâreŋ behehuc behec-jopazo i sawa fokac.  
\v 11 No kecšiŋucte qâreŋke-ŋarepo: Miti mamana âgo-ŋeŋic moczi sasecko sâqoreocmu me bâkiri baocmu, me bawe qaŋgec wiac bajuocmu, me fiuc serereŋ eocmu, ŋic iŋucne behehuc ehec nâ nareŋ gareŋ moc mi enšepieŋ.  
\v 12 No ŋic râpene jueŋgopieŋ jaŋere dâŋ mumure wemocko qâreŋkezapo. ŋaŋacne ŋondeŋko miti mamana jaŋere bahacdâŋ mupie sâckeocmu.  
\v 13 Á râpene jueŋgopieŋ jaŋere bahacdâŋ i Anutuzi muocmu. Sâqocne bapa e behepie ŋondeŋ-ŋeŋicko mi juzejec.   
\c 6  
\s1 Dâŋ bahac-jeŋic fuame jaŋac mi mutarambiŋ  
\p
\v 1 Ŋoŋeraonec moczi âgo-ticnere bahacdâŋ bajuocmu, e dâŋ i mitiŋic jaŋerao mi rârâe ŋic miti tâmiric jaŋerao râeme sâckeocmu me?  
\v 2 Mitiŋic nâŋâc juku miti tâmiric jaŋere dâŋ mutaranaŋmu, i mi manaŋgopieŋ me? Me juku gie iŋucne baniŋte muŋarekicnezi ŋaŋacne dâŋ jawane fuame sâcne mi mutaraniŋmu me?  
\v 3 Nâŋâc aŋelo jaŋere dâŋ wâc mutaranšoŋgopeneŋzi wiac omanere dâŋ fuame wemocko bititienaŋmu.  
\v 4 Wiac omanere dâŋ fuame ŋoŋe wemocte kikefuŋzi mana-jareme wawahane eekac ŋic iŋucne jaŋerao barapie mutara-ŋareeŋgopieŋ?  
\v 5 Ŋoŋe dâŋ i manapie miminehec eocte ŋazakopac. Ŋoŋerao ŋic maŋɋârâŋhec moc mi jukac me? Eme dâŋŋeŋic fuame erao barapie mutiŋne-ŋarezac.  
\v 6 Ŋoŋe ine iŋuc mi eeŋgopieŋ, aricne, miti mamana moczi âgo-ticnehec dâŋbahac-jekic fuame miti tâmiric jaŋerao barame mutara-jacteniŋmu.   
\s1 Sâqocne bapazi sambâŋko fefene i mi fokac  
\p
\v 7 Ŋoŋerao dâŋgie fuaekac izi miti-ŋeŋic bawahaekac. Gâcnezi wiac hehesicne me bâbâsifucne eŋarezo murâ eŋarepie ŋifecpeaŋ fozac me¡  
\v 8 Ŋoŋe ine ŋaŋac wiac hehesicne â fiuc serereŋ eeŋgopieŋ, ehuc mitio qomâfâc-ŋeŋic mâmâc ejareeŋgopieŋ.  
\v 9 Sâqocne bapazi Anuture uucmaŋko rarašine mi fokac, i mi manaŋgopieŋ me? Ŋoŋe maŋŋeŋic mi eatuckeniŋ, sau bapa, me  bawe qaŋgec babaju, me ŋokac ba behecne, me sasecŋic, me ŋiczia mamakâc eec eene,  
\v 10 me fiuc roro, me bâkiri bapa, me maŋsifuc opâ nâ areŋ eene, me dâŋ bâbâiŋ, me kâŋgâc rohuc šika qaqa, iŋucnezi Anuture uucmaŋko mi rašiniŋmu.  
\v 11 Eme gâcne ŋoŋe mârâc sâc iŋuc hâcne jujumbieŋ ši ine šurec-ŋopakicne â maŋfuru bacŋopakicne â kiŋfâsâc bacŋopakicne. I Wofuŋ-nâŋec Jesu Kristore šâŋe bajueŋgopieŋte â Anutu-nâŋecte Mârohec jueŋgopieŋte iŋuc eŋarekicne.   
\s1 Sasecte uŋdâŋ  
\p
\v 12 Wiac sasawa eene fonarekac, erâ wiac sasawa epe izi sâcne mi baficnuocmu. Wiac sasawa eene fonarekac, erâ wiac moczi ŋicbomboŋ enareme irec kiŋaŋ qaqa juju ine misac.  
\v 13 Nânâ qowizi hobure biŋe â hobuzi nânâ qowire biŋe. Juku Anutuzi e â e mâmâc imac-jofame arictac enicmu. Sahaczi ine sasecte biŋe mâcne, i Wofuŋte biŋe, Wofuŋ e sahacte ru.  
\v 14 Eme Anutuzi Wofuŋ bâɋârewec iŋuc jaha tâpiri-ticnezi nâŋâc bâɋârec-nâpozokac.   
\p
\v 15 Sahac-ŋeŋic Kristore kiŋaŋ qaqa, i mi manaŋgopieŋ me? Eme Kristore kiŋaŋ qaqa e weniŋuc qârisiepene sasecte kiŋaŋ qaqa eocmu? Iŋuc aricne.  
\v 16 Me ŋoŋe šiŋuc mi manaŋgopieŋ, ŋic moczi ŋokac sâqocne moctao qohotame jahe maŋ sahac mocjaha enicmu. Dâŋqâreŋ šiŋuc hâcne fokac: “Jahe jajaheczi mocjaha erâ junicmu.”  
\v 17 Á moc e Wofuŋtao qohotame ehec maŋ qâqâtâc mocjaha enicmu.   
\p
\v 18 Ŋoŋe sasec boe sau dic bacnenšepieŋ. Ŋic moczi wiac hehesicne gâcne eocmu izi sahac-ticne mi heuaocmu, â boe sau eocmuzi ine e jahacne sahac bâbieocmu.  
\v 19 Me ŋoŋe šiŋuc mi manaŋgopieŋ, sahac-ŋeŋic i Tiri Mârore ufuŋ, e ŋoŋere sahacmaŋko ŋeŋe juju eocte Anutuzi râe-ŋarewec. Ŋoŋe maŋ sahac rune aricne.  
\v 20 Ŋoŋe furi-ŋeŋic rokicne. Irec sahac-ŋeŋiczi Anuture šâŋe biŋe dopeckezejec.   
\c 7  
\s1 Ŋowe ŋonâŋ jaŋere dâŋ  
\p
\v 1 Ŋoŋe papia râe-narehuc dâŋ wio-narembiŋ, irec šiŋuc mufuape mananiŋ: Ŋic moczi ŋokac tâmiric juzo mume sâckeocmu.  
\v 2 Erâ sasecte eesâic fokacte ŋiczi ŋokac rorâ ehec paŋšâic juzejec, â ŋokaczi iŋuc jaha ŋic rorâ ehec paŋšâic juzejec.  
\v 3 Eme ŋiczi sahac-ticne i ŋonâŋ-ticne mi sakarecnezejec, â ŋonâŋzi sahac-ticne ŋowe-ticne mi sakarecnezejec.  
\v 4 Ŋonâŋ e sahac-ticnere dâŋ mumu i jahacne mâcne, ŋowe qikiŋnecnekicne, â ŋowe e iŋuc jaha sahac-ticnere dâŋ mumu i jahacne mâcne, ŋonâŋ qikiŋnecnekicne.  
\v 5 Ŋowe ŋonâŋ ŋoŋe sahac sasakarec kosa mi enšepieŋ. Mâc nunumure afeckeniŋte qanaŋ muc manac erâ dameŋ bahuc iŋuc epie sâckeocmu. Dameŋ tâmiric mâc jufepie Sataŋzi esâic-ŋopazacte iŋuc mukopac.  
\v 6 Ŋic â ŋokac roroc eniŋte mukopac i mana urue-ŋarehuc mukopac, mupaŋke-ŋarehuc mâcne.  
\v 7 Nahacne maŋzi šiŋuc mukac: Ŋic sasawa no jukopac iŋuc jufârenšapiŋ me. Anutu e ine tâpiri buc buc tahac-nâpoekac i hatane bârâwiŋ, moc iŋuc â moc iŋuc.   
\s1 Ŋicšeŋoŋ â hozec â ŋowe ŋonâŋ jaŋere dâŋ  
\p
\v 8 Ŋic ŋokac šeŋoŋ â hozec jaŋere ine šiŋuc mukopac: Jaŋe no iŋucne jufepie sâckeocmu.  
\v 9 Me sasec tâmiric sâcne jujune mi fojarekacko ine sasecte šoczi sipiric-jopazacte ŋowe ŋonâŋ erâ junšepieŋ.   
\p
\v 10 Ŋowe ŋonâŋ ŋoŋere dâŋ mupe mananiŋ, erâ i nore dâŋ mâcne, i Wofuŋte micdâŋ: Ŋokac moczi ŋowe-ticne mi behezejec.  
\v 11 Á ŋowe-ticne biac behewecko ŋic tâmiric juzejec, me ŋowe-ticnehec mocwâc âgo babac ezepirec. Erâ ŋic moczi iŋuc jaha ŋonâŋ-ticne mi behezejec.   
\s1 Ŋowe ŋonâŋ ocŋondeŋ juju  
\p
\v 12 Gâcne jaŋere dâŋ ši mupe manapie Wofuŋte mâcne, no nahacne ezejec: Opâ ruac ŋic moc ere ŋonâŋ qâpuc juocmu, eme ŋokac izi ehec juocte ecneocmuo mi behezejec.  
\v 13 Me opâ ruac ŋokac moc ere ŋowe qâpuc juocmu, eme ŋic izi ehec juocte ecneocmuo mi behezejec.  
\v 14 Ŋic qâpuc erao ŋonâŋ-ticnere jambuŋzi fotâcnewec, â ŋokac qâpuc erao ŋowe-ticnere jambuŋzi fotâcnewec. Eme irec hâcne naru motecfâc-ŋeŋic jambuŋhec embiŋ juŋgopieŋ, I tâmiric muzac qâpuc junšapiŋ.  
\v 15 Oapuc ŋiczi me qâpuc ŋokaczi ine âgo-ticne miti mamana beheocte qizec qame mi sakarezejec. Irec niŋgiŋne mi fokac. Anutu e wamao ââgo erâ juniŋte hefârec-ŋopawec.  
\v 16 Ŋokac go ŋowege miti hatao fâretec wareocmu me mâcne, i moc manakic me? Me ŋic go ŋonâŋge miti hatao fâretec wareocmu me mâcne, i moc manakic me?   
\s1 Moc e mârâc domawec, dodoma ijaha mitio domazejec  
\p
\v 17 Moc e Wofuŋzi ju ju bâfuacnewec, â moc e Anutuzi gie mucnewec, sâc ijaha mitio juzejec wâc. No dâŋ iŋuc kikefuŋ hae sâc jaza mutâc eekopac.  
\v 18 Moc e mahec juhame Wofuŋzi hefârewecko ma i mi behezejec. Á moc e ma tâmiric juhame Wofuŋzi hefârewecko mare mi muzejec.  
\v 19 Mahec juju me ma tâmiric juju izi fârine mâcne, Anuture sâcmutâc dâŋ rereŋ izi fârine ekac.  
\v 20 Moc e dodoma ira me ira domahame Wofuŋzi hefârewecko dodoma ijaha domazejec.  
\v 21 Go kiŋaŋ qaqa juhaŋtec hefârecguwecko manabâc tâmiric Juzemec. Mâc firuecguzo mupie mi qikiŋnezemec.  
\v 22 Moc e kiŋaŋ qaqa juhame Wofuŋzi hefâreme Wofuŋte ŋicfâri ewec Jukac. Á moc e ŋicfâri juhame Wofuŋzi hefâreme Kristore kiŋaŋ qaqa ewec jukac.  
\v 23 Ŋoŋe furi-ŋeŋic rokicnere ŋic jaŋere kiŋaŋ qaqa mi enšepieŋ.  
\v 24 Âgo bureŋ, moc e mârâc domahuc miti manawec, biri ijaha dameŋ šiŋuczia domahuc Anuturao qohotazejec.   
\s1 Motec šeŋoŋ â naru šeŋoŋ jaŋere dâŋ  
\p
\v 25 Naru šeŋoŋ jaŋere Wofuŋte micdâŋ mi bajukopac. Erâ Wofuŋzi roroŋ fâre-nareme mitihec epore nahacne dâŋ ŋazape mananiŋ:  
\v 26 Dameŋ šiŋuczia šârâ hâriŋ boc fuaekacte ŋic moc ŋonâŋ tâmiric juzo mume manape biaŋkeocmu.  
\v 27 Á ŋokac biŋe biac mugarekicko ine mi qikiŋnezemec, me go mesawane jukicko ine ŋokacte mi muzemec.  
\v 28 Me ŋokac rozo murâ rotec wâc mi sâqoreocmu, â naru šeŋoŋ moczi ŋic rome wâc mi sâqoreocmu. Erâ iŋucnezi sahackopec wiacte hume serereŋ juniŋmu. No ine i tâmiric mac juniŋte enareha mukopac.   
\s1 Dameŋ bembeŋkekacte ira me ira mi qohotazo  
\p
\v 29 Âgofâc-nane, dâŋ ši mupe mananiŋ: Dameŋ rifirekac. Eme dameŋ bembeŋne fokacte ŋonâŋhec jueŋgopieŋzi jupie ŋonâŋ tâmiric juju tinac ezejec,  
\v 30 â kioeŋgopieŋzi jupie ki tâmiric tinac ezejec, â šeri eeŋgopieŋzi jupie šeri tâmiric tinac ezejec, â wiac furi baeŋgopieŋzi jupie mafa tâmiric tinac ezejec,  
\v 31 â wiac nâ bac eeŋgopieŋzi jupie i tâmiric tinac ezejec. Mâreŋ hawari qâreŋne ši hone manac eeŋgopeneŋ i siroweocmu ekac, irec hâcne dâŋ i mukopac.  
\v 32 Ŋoŋe ine wiac omanere mana mezac tâmiric erâ juniŋte manasuhuc mukopac. Ŋonâŋ tâmiriczi Wofuŋte giere mana mezac eocmu, ehuc Wofuŋzi manacneme biaŋkeocte muocmu.  
\v 33 Ŋonâŋheczi ine sahackopec wiacte mana mezac eocmu, ehuc ŋonâŋ-ticnezi manacneme biaŋkeocte muocmu.  
\v 34 Iŋuc erâ maŋguru eocmu. Eme ŋokac šeŋoŋ â naru šeŋoŋ jaŋe iŋuc jaha Wofuŋte giere mana mezac eniŋmu, ehuc maŋ sahac-jeŋic Wofuŋte biŋe eocte manasuniŋmu. Á ŋokac ŋoweheczi ine sahackopec wiacte mana mezac eocmu, ehuc ŋowe-ticnezi manacneme biaŋkeocte muocmu.  
\v 35 Ŋoŋe sâcne juhâmoniŋte dâŋ ši ŋazakopac, qaisoc-ŋopahuc mâcne, ŋoŋe kosa mi juhuc maŋ mamanasu-ŋeŋic qâzuckepie Wofuŋtea hâcbuc domaocte mukopac hâcne.   
\p
\v 36 Me ŋic moc e otâ-ticne ŋic roronere sâc bâfuaha sakareocte maname mi sâckeme ŋicko râezo murâ râezejec, i mi sâqoreocmu.  
\v 37 Ŋic moc e ine maŋticnezi šiŋuc mana sanaŋkeocmu, otâ-nane mâc juzejec, iŋuc murâ maname mi quŋkeocmu, ehuc afeckerâ iŋuc mupaŋkeme sâckeocmu.  
\v 38 Irec ŋic moc e otâ-ticne ŋicne ŋicko râeme sâsâckecne eocmu, â moc e otâ-ticne sakareme ine sâcke-hâmoocmu.   
\s1 Hozec jaŋere dâŋ  
\p
\v 39 Ŋokac moc e ŋowe-ticne juocmu sâc gâjoŋnao bohotarâ domazejec. Ŋowe-ticne hâmome ine ŋic moc me moc rozo murâ rozejec, erâ kosa ehuc mâcne, Wofuŋtao roweckehuc ezejec.  
\v 40 Ŋowe tâmiric mâc juocmu irec ine manape sâcke-hâmoocmu. I nahacne dâŋ, erâ i Anuture Mâro wâc fonarekacte mukopac.   
\c 8  
\s1 Nemure tiwâ šepec  
\p
\v 1 Ʒi nemure tiwâ šepecte mupe. Nâŋâc fuŋne mamana jufâreŋgopeneŋ i manaŋgopeneŋ. Erâ fuŋne mamana saware sahac fefe fuaocmu, maŋjauŋhec juhuc ine hehešakiec erâ sâcne juzo.  
\v 2 Moc e mamana-ticne mana sokame ere muzo, mamana fârine mi focnekac.  
\v 3 Moc e Anutu maŋjauŋ ecneocmu, e ine Anutuzi manariŋkewec.  
\v 4 Nemure tiwâ šepecte ine šiŋuc manaŋgopeneŋ: Nemu e wiac fârine mâcne, Anutu e mocjaha fârine.  
\v 5 Nemu sambâŋko me mâreŋko juŋgopieŋ, dâŋ iŋuc mupie nemu â wofuŋ burec burec wemo afecne foraŋgopieŋ ekac.  
\v 6 Á nâŋâc ine Anutu Mamac-nâŋec mocjaha junârekac, eraonec hâcne wiac sasawa fua-fârewec â nâŋâc erea juŋgopeneŋ. Erâ Wofuŋ mocjaha, Jesu Kristo, ere meo wiac sasawa â nâŋâc jufâreŋgopeneŋ.  
\v 7 Ŋic gâcne jaŋe ine fuŋne iŋuc sâcne mi mana-hâmoŋgopieŋ. Eme iŋucnezi nemu e wiac fârine muwarehuc juku maŋjeŋic ewecte tiwâ šepec e araŋ bacnehuc manabâcko nâpie maŋjeŋic hegâpâreekac.   
\s1 Âgofâc-nâŋec enšaŋauc mi ejarezo  
\p
\v 8 Anutu e nânâre erâ mi mana-nâreme biaŋkeocmu. Tiwâ šepec qikiŋnepene mi mana wahac-nâpoocmu, me nâpene mi mana-nâreme feocmu.  
\v 9 Mâc gâcne ŋoŋe mana jaŋgeŋkehuc nâeŋgopieŋzi âgofâc-ŋeŋic miti afecne fojareekac jaŋe maŋ bâsifuc ejarenšipiŋte manabâc enšepieŋ.  
\v 10 Go qarâ sanaŋgere nemu ufuŋko šepecne nâhuc ŋehaŋtec âgoge moc manabâcheczi honecgurâ, nakacte nâpe muhuc mi ijaha nâocmu me?  
\v 11 Eme âgoge miti afecne focnekac e Kristore soczia wâc kitâcneweczi gore qarâ sanaŋte mi docke sâqorec eocmu me?  
\v 12 Ŋoŋe iŋuc ehuc âgofâc-ŋeŋic wâwânâŋ ejarehuc maŋ bâsifuc ejareniŋmu, ine Kristo wâwânâŋ ecneniŋmu.  
\v 13 Irec no tiwâ šepec nâpe âgo-nanezi irec erâ docke sâqorec ezacte ere manabâc ehuc tiwâ šepec qikiŋnehuc mâc juku hâmozepac.   
\c 9  
\s1 Gie bapa ŋic jaŋe giefâc-jeŋiczi dopec-jopapie sâckeocmu  
\p
\v 1 No niŋgiŋhec juekopac me? No aposolo aricne me? No Wofuŋ-nâŋec Jesu mi honepo me? Gie-nanere fârine Wofuŋte jambuŋko fuakicne i ŋoŋe mi eŋgopieŋ me?  
\v 2 No gâcne jaŋere aposolo mi mecne juekopac, â ŋoŋere ine jâmbomac juekopac. Aposolo gie-nanere ma Wofuŋte jambuŋko fuakicne i ŋoŋe hâcne.   
\p
\v 3 Fuŋne-nanere mueŋgopieŋ jaŋe ine dâŋ šiŋuc bâtikie-jarekopac.  
\v 4 Gâcne nâŋe ŋoŋeraonec nânâ opâ mi ronaŋte muac-nâpokicne me?  
\v 5 Aposolo tucne â Wofuŋte ɋafâc â Petoro jaŋe ŋonâŋfâc-jeŋic jaŋehec miti kiŋaŋ raeŋgopieŋ, ehame gâcne nâŋe sâc ijaha enaŋte mi mana-nârekicne me?  
\v 6 Me no â Banaba nâhe sawa mezi gie bapa behenacte mi mana-nâctekicne me?  
\v 7 Me mo momori ŋiczi šikare wiac e jahacne moneŋzi furine baocmu? Me mozi gie he sarac eme fârine fuame mi ro nâc eocmu? Me mozi noniŋ bulimakao gie bahuc jaŋere susu ba nâc mi eocmu?  
\v 8 Ʒi ŋicdâŋ sawa mukopac me? Sâcmutâc dâŋzi ijaha mi mufuakac me?  
\v 9 Mosere sâcmutâc dâŋ moc šiŋuc qâreŋkekicne fokac: “Bulimakaozi gie bagarehuc sopâc kecɋaŋ nâzo mume mi sakarecnezemec. Eme Anutuzi dâŋ i bulimakao jaŋere sawa manasuhuc muwec me?  
\v 10 Ŋic nâŋâcne mâmâc mi muwec me? I nâŋâcne hâcne mukicne. Gie he rikec eekaczi mâc mi eekac, fârine fuame nâocte manasuhuc eekac, â sara mamac eekac e iŋuc jaha fârine fuacneocte manasuhuc eekac.  
\v 11 Nâŋe ŋoŋerao maŋte wiac sara mamac embeŋko okacne ŋoŋeraonec sahacte wiac ronaŋte manapie ŋemâckekac me?  
\v 12 Gâcne jaŋe ŋoŋeraonec nânâ mafa rohapie nâŋe gie fuŋkembeŋzi rorone mi fokac me? Erâ ine Kristo Biŋebiaŋ-ticne aka hecnenšipeŋte ŋoŋeraonec nânâ mafa rorore mukicne i qikiŋnehuc mâc hume serereŋ jueŋgopeneŋ.   
\s1 Paulo e miti gie furimâc bawec, izi šeridâŋ-ticne ewec  
\p
\v 13 Taha ufuŋko gie baeŋgopieŋ jaŋe taha ufuŋkonec nânâ nâeŋgopieŋ, â alatao bâzi ririke gie baeŋgopieŋ jaŋe alatare wiac nâ bac eeŋgopieŋ, i ŋoŋe mi manaeŋgopieŋ me?  
\v 14 Eme Wofuŋ e Biŋebiaŋ mumu ŋic nâŋe iŋuc jaha Biŋebiaŋzi sahacte dope wiac kifua-nâreocte muwec.  
\v 15 No ine hata i mi âteekopac. Erâ ŋoŋe irec sâcko enareniŋte manasuhuc mi qâreŋkekopac, aricne. Hâmoczi rocnuzac irec manape afeckezac, â šeridâŋ-nane i babawaha-nare irec ine manape ŋic moczi mi enare-jâmbâŋkezejec ekac.  
\v 16 Biŋebiaŋ muromackeekopac irec mumumbiaŋ dâŋ mupe wemocko sâckeocmu, gie i hâcne nore faio râekicne i¡ Eme hetarepe, jei, Wofuŋzi weniŋuc enareocmu¡  
\v 17 Gie i no nahacne maŋte fuarâ bazapo muzac juku furine rozapo. Nahacne maŋte mi ropore šiŋuc ekac: Micne gie fai-naneo fewec.  
\v 18 Hâc, eme wemo furi roekopac? Furine šiŋuc: No miti kiŋaŋ rahuc ŋic Biŋebiaŋ furimâc jazaekopac, ehuc Biŋebiaŋ mumure furi sahackopec wiac rorore mukicne i qikiŋneekopac.   
\s1 Paulo e ŋic fuŋne fuŋne jaŋere kiŋaŋ qaqa ewec  
\p
\v 19 No ŋic sasawa jaŋere kiŋaŋ qaqa mi jukopaczi sifu kiŋaŋ qaqa-jeŋic epo jukopac. I ŋic bocjahazi miti manarâ biaŋkeniŋte manasuhuc epo hâcne.  
\v 20 Judaŋic jaŋerao juhuc Judaŋic hawari epo, i Judaŋiczi biaŋkeniŋte. Sâcmutâc dâŋte kiŋaŋ qaeŋgopieŋ jaŋerao juhuc sâcmutâc dâŋte kiŋaŋ qaqa hawari epo, i no nahac sâcmutâc dâŋte kiŋaŋ qahuc mâcne, i kiŋaŋne qaeŋgopieŋzi biaŋkeniŋte epo.  
\v 21 Qâpuc sâcmutâc dâŋ tâmiric jaŋerao juhuc sâcmutâc dâŋ tâmiric hawari epo, i Anuture maio sâcmutâc dâŋ tâmiric juhuc mâcne, no Kristore sâcmutâc dâŋ bajuekopac, erâ qâpuc jaŋe biaŋkeniŋte iŋuc epo.  
\v 22 Ŋic dodocne jaŋerao juhuc dodocne hawari epo, i dodocnezi biaŋkeniŋte epo. Ŋic fuŋne fuŋne jaŋerao juhuc hawari fuŋne fuŋne epo, i gâcnezi sipirickehapie sifu gâcnezi biaŋkeniŋte.  
\v 23 Wiac sasawa i mâc mâcne, Biŋebiaŋzi fua raocte eekopac, erâ no nahac wâc irec kâdoc ropemurâ eekopac.   
\s1 Sasanaŋhec juhuc eri bâfuazo  
\p
\v 24 Ŋoŋe kecšiŋuc mi manaŋgopieŋ me? Sâsâc eere hofao ira motec jaŋe gagasa i mâmâc gasacke-fâreniŋmu, â eri roro ine mocsâkoazi mao bâbâni fisirâ roocmu. Eme ŋoŋe iŋuc jaha eri-ŋeŋic roniŋte gasackenšepieŋ  
\v 25 Motec jaŋe sasanaŋte sâsâc ehuc sowa fuŋne fuŋne jueŋgopieŋ, jaŋe eri sisirowenere iŋuc eeŋgopieŋ, nâŋâc ine eri fofo sanaŋte iŋuc enšepeneŋ.  
\v 26 No nahac wâc gasackeekopac, i ma hone dendeŋnehuc gasackeekopac. No sându-nane sawao kosa mi wickeekopac.  
\v 27 No ŋic miti muromacke-jarehuc juku nahacne rârâricne ezipore sahac-nane ro waha âte ecnehuc ŋicbomboŋ-ticne juekopac.   
\c 10  
\s1 Mârozi Israe ŋic mâreŋ sawao mâsi bajareha jumbiŋ  
\p
\v 1 Âgofâc-nane, no mimiŋnefâc-nâŋec wiac embiŋ irec manasu-ŋarepe mananiŋ Jaŋe mâmâc sasawa karoraczi sâoc-jopaha rahuc hâwec fotâcnembiŋ.  
\v 2 Ehuc Mosere ŋicfâc eniŋte karorac â hâweczi miti opâ-jeŋic eme ruambiŋ.  
\v 3 Erâ Mârozi nânâ bâfua-jarewec i jaŋe mâmâc sasawa nârambiŋ,  
\v 4 â Mârozi opâ bâfua-jarewec i wâc mâmâc sasawa nârambiŋ. Mârore qânâzi bâjâpec-jopawec, eraonec hâcne opâ wahame nâmbiŋ, qânâ šâŋene Kristo.   
\s1 Israe ŋic jaŋerao wiac tuawec i uŋsawaŋ-nâŋec ekac  
\p
\v 5 Eme sifu Anutuzi gâcne sâko mana sâqore-jareme mâreŋ sawao hâmo sipiric efârembiŋ.  
\v 6 Jaŋerao wiac fuawec i uŋsawaŋ-nâŋec ekac, jaŋe sâqocnere andac embiŋ iŋuc jaha enšipeŋte.  
\v 7 Jaŋeraonec gâcnezi nemu qaŋgec wiacte kiŋaŋ qaqa embiŋ, iŋuc wâc mi enšepeneŋ. Dâŋqâreŋ šiŋuc hâcne fokac: “Ŋic jaŋe waha ŋehuc tiwâ šepec nâku faharerâ gae wohuc domambiŋ.  
\v 8 Erâ sasec boe sau wâc mi enšepeneŋ. Jaŋeraonec gâcnezi sasec boe sau embiŋ, ehuc šoaŋ gie bapa ijaha ŋic 23 tauseŋ hâmombiŋ.  
\v 9 Erâ Wofuŋ maŋbâiŋ wâc mi ecnenšepeneŋ. Jaŋeraonec gâcnezi maŋbâiŋ ecnepie homazi kicjopame hâmo sipiric embiŋ.  
\v 10 Erâ kâroŋ wâc mi qanšepeneŋ. Jaŋeraonec gâcnezi kâroŋ qapie sisipiric runezi sipiric-jopawec.  
\v 11 Jaŋerao wiac fuawec izi ma âkendâŋnekicne ekac. Eme mâreŋte dameŋ qândâŋkeha juŋgopeneŋ nâŋâcnere uŋsawaŋ muhuc dâŋbinaŋ i hâcne qâreŋkekicne.  
\v 12 Irec hâcne moc e jahacnere maname sasanaŋ eekaczi dockezacte rumehuc juzejec.  
\v 13 Ŋoŋerao eesâic fua warewec i ŋic tâpiri-ŋeŋicte sâcko fuawec. Erâ Anutu e mume sasanaŋzi eesâic baafeckeme tâpiri-ŋeŋicte sâc mi jâuruocmu. Erâ eesâic fuaocmu sâc âte sâoc-ŋopame sâcne sanaŋkeniŋmu.   
\s1 Wofuŋte nânâ nâhuc demoŋte mâmâc nâzo i mi eene  
\p
\v 14 Irec hâcne, âgofâc-nane, ŋoŋe nemu qaŋgec wiacte geŋkerâ junšepieŋ.  
\v 15 Ŋoŋe maŋ mamanasuhec juŋgopieŋ, irec dâŋ ši mupe ŋaŋac mana honeniŋ.  
\v 16 Râqâcko waiŋ jambuŋkewecte jambuŋkerâ nâhuc Kristore sochec šušuhuc mi eeŋgopeneŋ me? Á poroŋ nâhuc Kristore sahachec šušuhuc mi eeŋgopeneŋ me?  
\v 17 Nânâzi mocjaha, i gugumec ehuc ŋic bocjahazi âgo guru mocjaha eeŋgopeneŋ.  
\v 18 Ŋoŋe sahackopec Israe ŋic juŋgopieŋ jaŋere manasuniŋ. Ŋic taha bâzi nâeŋgopieŋ jaŋe alatahec šušuhuc mi eeŋgopieŋ me?  
\v 19 Dâŋ i weniŋucte mukopac? Nemure tiwâ šepec i wiac fârine me? Á nemu e jahacne wâc fârine me?  
\v 20 Iŋuc aricne. Qâpuc jaŋe tiwâ šepec rikeeŋgopieŋ i Anuture biŋe mâcne, i demoŋ jaŋere biŋe eekac. Eme no ŋoŋere šiŋuc mukopac: Ŋoŋe demoŋ jaŋehec šušuhuc mi enšepieŋ.  
\v 21 Wofuŋte râqâckonec nâhuc demoŋ jaŋere râqâckonec mâmâc nânâ i sâcne mi eniŋmu. Á Wofuŋte teboonec nâhuc demoŋ jaŋere teboonec mâmâc nânâ i wâc sâcne mi eniŋmu.  
\v 22 Me nâŋâc Wofuŋ maŋbâiŋ ecnenaŋ me? Nâŋâcne tâpirizi ere sirickekac me?   
\s1 Moc e jahacnere sawa manasuhuc jume mi sâckeocmu  
\p
\v 23 Wiac sasawa eene fokac, erâ wiac sasawa epene izi sâcne mi bafic-nâpoocmu. Wiac sasawa eene fokac, erâ wiac sasawa ehuc mitio dodopec eene ine mi fokac.  
\v 24 Moc e jahacnere mi manasuhuc, âgo-ticnere manasuzejec.  
\v 25 Ŋoŋe buŋko bec qowi furine bazo murâ kosa banšepieŋ, ehuc keci omane me nemure ufuŋkonec, iŋuc muhuc mu manabâc mi enšepieŋ.  
\v 26 Mâreŋ â wiac sasawa mâreŋ fusucmarâ fokac i Wofuŋzi rune Jukac.  
\v 27 Qâpuc moczi hezu hewâneŋ eŋareme ficticnao fezo murâ fenšepieŋ, erâ nânâ qowi gumec-ŋopame manabâc tâmiric kosa nâhuc mu wioc mi enšepieŋ.  
\v 28 Á nahapie ŋic moczi šiŋuc moc ŋazaocmu: “Bec ši nemu ufuŋkonec”, eme mi nânšepieŋ. I mufua-ŋareocmu ŋic ere manabâc ehuc qikiŋnenšepieŋ.  
\v 29 I nâpie ŋaŋacne maŋ sâqorezacte mâcne, âgo-ŋeŋicte maŋ sâqorezacte mukopac. No nahacne maŋ manabâc tâmiric fome wemocte moczi e jahacne maŋte sâc norao âke hotaocmu?  
\v 30 No Anutu daŋge âzâcnehuc nunumu faio nâpe moczi wemocte mana sâqore-nareocmu?   
\s1 Bahacmâc juzo  
\p
\v 31 Irec ŋoŋe nânâ qowi nâniŋte, me i me i eniŋte Anutu mumbiaŋkehuc enšepieŋ.  
\v 32 Ŋoŋe Judaŋic â Grikŋic â Anuture kikefuŋ jaŋere maio bahacmâc jupie moc mi mana sâqore-ŋarenšepieŋ.  
\v 33 No iŋuc jaha ŋic fuŋne fuŋne jaŋe honecnupie sâckeocte juhuc no nahacne wiac biaŋkeocte mâcne, ŋic bocjaha miti manarâ biaŋkeniŋte giene baekopac.   
\c 11  
\s1 Ŋic â ŋokac fuŋne-nâŋec  
\p
\v 1 No Kristore hata âtehuc bâjâpeekopac, eme ŋoŋe iŋuc jaha nore hata âtehuc bâjâpecnunšepieŋ.  
\v 2 Ŋoŋe wiac ebac epo Irec manasu-fârehuc mumutâc dâŋnanere sâcko jueŋgopieŋ, irec manape biaŋkekac.  
\v 3 Eme ši moc mupe mananiŋ, Kristo e ŋicte kâcɋene, ŋic e ŋokacte kâcɋene, Anutu e Kristore kâcɋene.  
\v 4 Ŋic moc e qârufac rojuhuc numuocmu me Anuture micdâŋ mufuaocmu, e kâcɋene-ticne mimi qaqa ecneocmu.  
\v 5 Á ŋokac moczi qârufac tâmiric juhuc numuocmu me Anuture micdâŋ mufuaocmu, e iŋuc jaha kâcɋene-ticne mimi qaqa ecneocmu, erâ ŋokac kosa jujune qizec-jeŋic rokicne jaŋehec sâc mocjaha eocmu.  
\v 6 Irec ŋokac moc qârufac tâmiric jume qizec rocnezo. Me ŋokac moc e irec mimierâ qizec susuc-ticne sakareocmuzi qârufac rojuzejec.  
\v 7 Ŋic e ine qizectuc juzejec. E Anuture hawari â Anuture eri tofa bakicne irec. Ŋokac e ine ŋicte eri tofa bakicne.  
\v 8 Ŋic e ŋokactaonec mi rokicne, ŋokaczi ŋictaonec rokicne.  
\v 9 Ŋic e ŋokacte erâ mi bâfuakicne, ŋokac e ine ŋicte erâ bâfuakicne.  
\v 10 Ŋokac e ŋicte wahamicne jukacte irec ma moc qârufac hâcne rojuzejec, mâc jume aŋelo jaŋe honepie sâqorezacte.   
\s1 Ŋic â ŋokac mitire tutumaŋko pectâc fisizo  
\p
\v 11 Erâ sifu ŋic e mocbuc-ticne juju â ŋokac e mocbuc-ticne juju i Wofuŋte maio mi fokac.  
\v 12 Ŋokac e ŋictaonec rokicne, iŋuc wâc ŋiczi ŋokackonec fua sawec eeŋgopeneŋ. Erâ wiac i sasawa Anuturaonec.  
\v 13 Ŋoŋe ŋaŋac mana honeniŋ, ŋokac moc qârufac tâmiric juhuc Anutu numucneme sâckeocmu me?  
\v 14 Á ŋic moc e qizec susuc šoricne rojume iŋuc jaha honepie mi sâckeocmu, irec fuŋne mârâc miti tâmiric juhuc wâc manambiŋ.  
\v 15 Á ŋokac moc qizec susuc šoricne rojume e ine honepie biaŋkeocmu. Qizec susuc šoricnezi qârufac-ticne eekac.  
\v 16 Moc e dâŋ ši qâsuazo murâ šiŋuc manazejec: Mâsi i nâŋe â Anuture kikefuŋ gâcne mi bajueŋgopeneŋ.   
\s1 Mitire tumaŋnehuc nânâ nowanâŋ gowanâŋ embiŋ  
\p
\v 17 Wiac moc ši ine mana-ŋarepe bahacnehec eha uŋ sawaŋ eŋarehuc mupe: Ŋoŋe tumaŋnehuc maŋ biaŋ qaqac mi ehuc maŋ bâbâsâqorec eeŋgopieŋ.  
\v 18 Erâ mitire tumaŋnepie ŋondeŋ-ŋeŋicko fâfâuc fuaekac, iŋuc nazapie manape jâmbomac tinac ekac.  
\v 19 Erâ fâfâuc i mâc mâcne, ŋoŋeraonec wenizi mitio sanaŋkeŋgopieŋ jaŋe fua tâcneniŋte hâcne fuakac.  
\v 20 Eme ŋoŋe Wofuŋte Tiwâ nâniŋte tumaŋnerâ hesifuckeeŋgopieŋ.  
\v 21 Ŋaŋacne nânâ bafisirâ boki mi bahuc fâro erâ buc buc nâpie moc e hâmoekac â moc e gapecmâc nâekac.  
\v 22 Hâc, ŋaŋacne fic basahuc iŋuc eeŋgopieŋ me? Ŋoŋe nânâ opâ nâzo murâ ira nanšapiŋ¡ Wemocte Anuture gurufâc jaŋere manapie wawahane eme hapetac busâqoc ejareeŋgopieŋ? Wemo ŋazape? Mumbiaŋ-ŋopape? Wiac kecirec mi mumbiaŋ-ŋopazo.   
\s1 Ŋafe Tiwâre dâŋ  
\p
\v 23 No Wofuŋtaonec hâcne ropo i ŋarepo wâc. Ine šiŋuc: Wofuŋ Jesu e Judazi doc bawec ŋafe ira poroŋ rorâ  
\v 24 daŋge murâ bazurâ muwec: “Kecši fâri-nane, ŋoŋere due bahuc qikiŋnekicne. Nore manasuhuc iŋuc nâhuc junšepieŋ.”  
\v 25 Poroŋ nâpie waiŋ râqâc iŋuc jaha rorâ šiŋuc muwec: “Râqâc kecšira šâšâfic ɋâricnere socnane ŋekac. Nâniŋmu sâc nore manasuhuc iŋuc nâhuc junšepieŋ.  
\v 26 Ŋoŋe poroŋ â waiŋ i nâniŋmu sâc Wofuŋ hâmoc biŋe-ticne mutaniŋkehuc juhapie risieocmu.  
\v 27 Irec moc e poroŋ â Wofuŋte waiŋ i enšaŋauc ecnehuc nâocmu, e Wofuŋ fâri â socticne nâsifuckeme kiŋnehec eocmu.  
\v 28 Irec moc e poroŋ â waiŋ nâzo murâ qanaŋ maŋticnere fuŋne hone manac ehuc bajaŋgeŋkerâ nâzejec.  
\v 29 Moc e Wofuŋte fâri hone šâŋitac mi ehuc nâocmuzi kiŋticne nâfuaocmu.  
\v 30 Ŋoŋe iŋuc hâcne eeŋgopieŋte huc dodoc â huc šâic boc eŋareekac, â gâcnezi biac hâmocko foŋgopieŋ.  
\v 31 Nâŋâc nâŋâc fuŋne-nâŋec bataniŋkenšapeŋ muzac, Wofuŋzi mi bataniŋkezac.  
\v 32 Qâoma epene ine Wofuŋzi fuŋne-nâŋec bataniŋkehuc bâtiŋ-nâpoocmu, miti tâmiric jaŋehec juku behec-nâpome sipirickenšipeŋte iŋuc hâcne enâreocmu.   
\p
\v 33 Âgofâc-nane, ŋoŋe tiwâ wirec nâniŋte tumaŋnerâ woŋec ŋehapie fisi-fârepie fuŋkenšepieŋ.  
\v 34 Moc e nânâre boc ecneme qanaŋ e jahacne ficko nâzejec, tutumaŋ bâbâsifucne epie okacne fua-ŋarezacte. Dâŋ gâcne i no nahac fârâ mutâcne-ŋarepemu.   
\c 12  
\s1 Mârozi gie baekac  
\p
\v 1 Âgo bureŋ, Mâroraonec miti kadahe irec fuŋne kâuc banšipiŋte ŋazape mananiŋ.  
\v 2 Ŋoŋe mârâc jaha qâpuc juhapie maŋšoc fua-ŋarewec sâc nemuɋâŋ kâpâne jaŋerao ra qohota jumbieŋ.  
\v 3 Eme irec ŋifecne mupe mananiŋ: Moc e Anuture Mârozi bufahac qacnehame wemocko muocmu “Jesu go sâwecgukopac”, â moc e Tiri Mârozi bufahac mi qacnehame wemocko muocmu “Jesu e Wofuŋ”.   
\p
\v 4 Mitire kadahe fuŋne fuŋne fokac, Mâro ine mocjaha,  
\v 5 mitire kiŋaŋ gie fuŋne fuŋne fokac, gie rune ine Wofuŋ mocjaha,  
\v 6 mitire tâpiri fuŋne fuŋne fokac, tâpiri rune ine Anutu mocjaha. Eki hâcne bâfua-nâre-fâreekac.  
\v 7 Mâro e mitio juhâmonaŋte ŋic ru sâc tâpiri-ticne kâdoc qanâreekac.  
\v 8 Moc e Mârozi ecneme miti maŋɋârâŋhec muocmu, moc e Mâro izia ecneme sâc mitire fuŋne hukicne muocmu,  
\v 9 moc e Mâro izia ecneme mamanasiŋ sâkohec juocmu, moc e Mâro izia ecneme ŋic huc šâichec ɋiɋicne bacjopaocmu,  
\v 10 erâ moc mâsi baocte tâpiri bâfuacneocmu, moc findaŋdâŋ muocte maŋne bâuŋtoocmu, moc e mâro fuŋne fuŋne šâŋitaocte maŋne batamaeocmu, moc e miti marac furuo muocte micne baafeckeocmu, moc e miti marac furu manarâ ŋic dâjeŋicko bâtikieocte bafickeocmu.  
\v 11 Wiac i sasawa Mâro izia bafâreekac, ehuc maŋticnere ŋic ru sâc wiac bârâwiŋne-nâreekac.   
\s1 Sahac-nâŋeczi mocjaha â kiŋaŋ qaqafâcne ine bocjaha  
\p
\v 12 Ŋic nâŋâc sahac-nâŋeczi mocjaha â sahacte kiŋaŋ qaqafâc ine bocjaha, eme jaŋe bocjahazi qâturepie sahac mocjaha ekac” eme Kristorao sâc ijaha fokac.  
\v 13 Mâro mocjahazi nâŋâc Miti Opâo bâturec-nâpome sahac-nâŋecte sâc erâ mocjaha embeŋ. Judaŋic â Grikŋic, kiŋaŋ qaqa â ŋicbomboŋ, nâŋâc Mâro i jaha sasawa ro maŋ efârekicnere mocjaha embeŋ.  
\v 14 Eme sahacte kiŋaŋ qaqa iŋuc jaha mocjaha mâcne, bocjaha.  
\v 15 Eme kike e wemocko šiŋuc muzac: `No me aricne, irec  sahacte tofa mi ekopac”, iŋuc murâ wemocko sahac beherâ buc juocmu?  
\v 16 Me hazeczi wemocko šiŋuc muzac: “No šâŋe aricne, irec sahacte tofa mi ekopac”, iŋuc murâ wemocko sahac beherâ buc juocmu?  
\v 17 Sahacko šâŋe sasawa fome muzac sahaczi hazec basazac. Me hazec sasawa fome muzac sâke basazac.  
\v 18 Anutu e ine mana tarahuc sahacte kiŋaŋ qaqa gie fuŋne fuŋne mujarewec.  
\v 19 Sahacte kiŋaŋ qaqa fuŋne-jeŋic mocjaha efâreme muzac sahac e sâqorerâ arictac ezac.  
\v 20 Ʒi ine kiŋaŋ qaqazi bocjaha â sahaczi mocjaha.  
\v 21 Eme šâŋezi wemocko me âzâcneocmu, “No go tâmiric sâcne jupemu.” Me qizeczi wemocko kike jasaocmu, “No ŋohe tâmiric sâcne jupemu.”  
\v 22 Aricne, sahac-nâŋecte tofafâc dodocne jaŋe tâmiric hâcne sâcne mi juzo.  
\v 23 Á sahac-nâŋecte tofafâc wawahane jaŋe hâcne hone jauŋ ejareeŋgopeneŋ, â miminehec jaŋe foŋjopapene biaŋne hawari eeŋgopieŋ.  
\v 24 Hawari biaŋ jaŋe ine tâtâc foeŋgopieŋ. Anutu e sahac bâfuahuc tofafâcne gâcne wahakicne jaŋe gie fekicne mujarewec.  
\v 25 I sahac-nâŋecte tofafâc fâfâuc mi ehuc kiŋaŋ qaqac sâckoa eniŋte iŋuc hâcne ewec.  
\v 26 Irec tofane moczi šâic maname gâcne jaŋe mâmâc mana-fâreniŋmu, me moczi šeri eme gâcne mâmâc šeri efâreniŋmu.   
\s1 Mitire gie bapa ŋic fuŋne fuŋne juŋgopeneŋ  
\p
\v 27 Ŋoŋe mâmâc sâko qâturerâ Kristore sahac eŋgopieŋ â buc buc sahac-ticnere kiŋaŋ qaqafâc eŋgopieŋ.  
\v 28 Anutu e kikefuŋfâc-ticne nâŋâcnao ŋic šiŋuc râec-jopawec: Qanaŋ aposolo, izi porofete, izi qaqazu, erâ ŋic mâsi bapare tâpirihec â ŋic huc šâic bâbâpiaŋ irec tâpirihec, erâ jauŋ bapa, erâ soŋaŋ, erâ dâŋ marac furuo mumu, iŋuc hâcne râec-jopawec.  
\v 29 Nâŋâc aposolo sasawa râec-nâpowec me? Me porofete me qaqazu sasawa râec-nâpowec me? Me mâsi bapare tâpiri  
\v 30 me huc šâic bâbâpiaŋ irec tâpiri fonâre-fârekac me? Me dâŋ marac furuo mumu me ŋic dâŋjeŋicko bac bâtikic eene jufâreŋgopeneŋ me?   
\p
\v 31 Ŋoŋe mitire kadahe fekicne bâfuaniŋte šoɋac enšepieŋ. Eme noni irec hata biaŋne jâmbâŋ ši ŋowatupe honeniŋ.   
\c 13  
\s1 Maŋjauŋ tâmiricko wiac epene racne eocmu  
\p
\v 1 No ŋicmaracko me aŋelo maracko miti muzapo, ehuc maŋjauŋ tâmiric juzapo, ine qeŋ goŋgoŋ iŋucne erâ dâŋ fânâŋ sawa ezapo.  
\v 2 Me no porofete juhuc dâŋ soŋne mana-fârezapo â mitire šuhucne mana utucke-fârezapo â tiki mupe rârieocte irec sâc mamanasiŋ fonarezac, ehuc maŋjauŋ tâmiric juzapo, ine ŋic jawane ezapo.  
\v 3 Me wiac-nane sasawa hapetac bâmec bajarezapo â sahac-nane qikiŋnepe šocte nânâ ezac, ehuc maŋjauŋ tâmiricko ezapo, ine racne efârezac.   
\s1 Maŋjauŋheczi miti hatao sâcne âteocmu  
\p
\v 4 Maŋjauŋheczi wama ruaine juocmu, maŋjauŋheczi iiŋguuŋ mi eocmu, maŋjauŋheczi penaroŋ mi eocmu, e jahacnere maname fefene mi eocmu  
\v 5 e šaubac tâmiric, iiriac tâmiric, aaric tâmiric, kiŋ babaju tâmiric juocmu”  
\v 6 sâqocnezi haŋ bame busâqoc manaocmu, â mitizi haŋ bame bubiaŋ manaocmu”  
\v 7 maŋjauŋhec e dede ââsic-ticne ɋârâŋne, mamanasiŋ-ticne ɋârâŋne, maŋzi woworic-ticne ɋârâŋne, maŋuruc-ticne ɋârâŋne.   
\s1 Maŋjauŋzi tatarane tâmiric  
\p
\v 8 Maŋjauŋ i tatarane tâmiric. Findaŋdâŋ mumu i tataranehec, erâ dâŋ marac furuo mumu i wâc tataranehec, â fuŋne mamana i wâc tataranehec.  
\v 9 I šiŋucte: Fuŋne mamana-nâŋec i faisuc â findaŋdâŋ mumu-nâŋec i faisuc jaha wâc.  
\v 10 Juku ine wiac fofo dunduŋne fuame wiac faisuc eenezi omaezokac.  
\v 11 No ɋiene juhuc ɋiedâŋ mujupac â ɋiemaŋhec jujupac â ɋie mamana mana jupac. Izi juku ŋic erâ ɋie wiac hetarapo.  
\v 12 Dameŋ šiŋuczia wiac honeeŋgopeneŋ i turuŋzi hawari bâtikie-nâreme sisifucne honeeŋgopeneŋ irec sâc, juku ine fârine šâŋeo hehec erâ hone mana tarac ezokopac, i Wofuŋzi no hone mana tarac enarewec irec sâc.  
\v 13 Eme fofo sanaŋ foniŋmu ine mamanasiŋ, woworic â maŋjauŋ, jaŋe jahec â moczi. Maŋjauŋzi ine micne ekac.   
\c 14  
\s1 Anuture micdâŋ mumufuazi miti gie fekicne ekac  
\p
\v 1 Ŋoŋe maŋjauŋhec juniŋte ɋicwânšâŋ enšepieŋ. Erâ miti kadahe gâcne roniŋte irec wâc šoɋac enšepieŋ, ehuc Anuture micdâŋ mumufuare manapie fefene ezejec.  
\v 2 Moc e dâŋ marac furuo muekac e ŋic mi jazahuc Anutu âzâcneekac. E Mârozi ecneme dâŋ marac furuo mume ŋic jaŋe kâuc baeŋgopieŋ.  
\v 3 Á Anuture micdâŋ mufuaekaczi ine ŋic faŋ qajareekac â âkesiŋ-jopaekac â buuruc qajareekac.  
\v 4 Marac furuo dâŋ muekaczi e jahacne maŋ âkesiŋkeekac, â Anuture micdâŋ mufuaekaczi ine kikefuŋ guru âkesiŋ-jopaekac.  
\v 5 Ŋoŋe dâŋ marac furuo mufârepie manape sâckeocmu, Anuture micdâŋ mufuapie ine manape sâcke-hâmoocmu. Anuture micdâŋ mufuaekac ŋic e marac furuo dâŋ mumuŋic ere sâc sirickekac. Mocjaha, marac furuo dâŋ muku kikefuŋ guru bâtikie-jareme manarâ fârine bajupie ine sâcjeŋic mocjaha eocmu.  
\v 6 Âgofâc, no ŋoŋerao fârâ marac furuo dâŋ ŋazape wemocko âkesiŋ-ŋopaocmu? No muraruŋ dâŋ me miti hukicne me findaŋdâŋ me mu qaqazuc dâŋ muratie-ŋarepe ine sâcne maŋfâri-ŋeŋic eocmu.   
\s1 Miti foŋnehec mi muzo  
\p
\v 7 Wiac omane, woŋgâŋ mimi ŋokac wiac, i qapie dâŋ hawarine tâtâc mi fuame wemocko šâŋitazo?  
\v 8 Me qeŋ kosa qapie dâŋ eme manarâ wemocko “wiac mocte kuku qanâreŋgopieŋ” muhuc ra bafic-jopaniŋmu?  
\v 9 Á ŋoŋe iŋuc jaha marac furuo dâŋ foŋnehec mupie gâcnezi wemocko mananiŋmu, i dâŋŋeŋiczi qahameŋkeocmu.  
\v 10 Mâreŋ sâc ŋic dâŋmarac fuŋne fuŋne forakac i mamanane sasawa.  
\v 11 Mâc noni dâŋmarac moc kâuc bapemuo dâŋ irec runezi nore maname mutucne eocmu, â noni ere iŋuc jaha manape mutucne eocmu.  
\v 12 Eme ŋoŋerao fuŋne ijaha fokac. Mârore tâpiri ŋoŋerao fuaocte mueŋgopieŋ i sâcne, erâ i hâcne mitizi kikefuŋ âkesiŋ-jopaocte šoɋac enšepieŋ  
\v 13 Irec marac furuo dâŋ muocmu e fuŋne mana-hâmorâ ŋic ŋokac bâtikie-jareocte Wofuŋ numucneme bafickezejec.  
\v 14 No marac furuo numupemu, ine maŋ qâqâtâc-nanezi sawa epemu, â mamana-nanezi mâc foocmu.  
\v 15 Eme irec weniŋuc ezo? Kecšiŋuc ezo: No maŋ qâqâtâc-nanezi numume mamana-nanezi mana tararâ miczi mutaniŋkezejec.  
\v 16 Me go maŋ qâqâtâcgezi Wofuŋ muteŋketec ŋic omane moczi dâŋge kâuc bahuc wemocko baficgurâ “Jâmbomac” muocmu?  
\v 17 Go mumuteŋ dâŋ fârinehec mucmu mecne, erâ âgogezi kâuc baha wemocko maŋne âkesiŋkeocmu?  
\v 18 Anutu daŋge âzâcnekopac, marac furuo dâŋ mumu i no ŋoŋere sâc mâcne, sâc fekicne fonarekac.  
\v 19 Eme irec manape fârine eme muzac, tutumaŋko marac furuo dâŋ šoricne šora muzo murâ muzapo. Erâ no irec manape wahakac, â mitidâŋ jahec mac sawa mutaniŋkehuc ŋic ŋokac jaza qazuc ee, irec ine manape fekac.   
\s1 Miti muc manac ezore ɋiene jaŋere sâc mi ezo  
\p
\v 20 Âgofâc, dâŋ mana wosâc eere mamana-ŋeŋiczi ɋie jaŋere sâc mi ezejec, sâqocnere i ɋiene jaŋere sâc enšepieŋ, â mana wosâcte ine maŋ mamana-ŋeŋiczi sokakicne jaŋere sâc ezejec.  
\v 21 Sâcmutâc dâŋqâhâcko dâŋ moc šiŋuc qâreŋkekicne fokac: “Wofuŋ e mukac, `No ŋic furune ejarepe jaŋe ŋicguru ši dâŋmarac furunao micdâŋ-nane jazapie i wâc sifu mi mananiŋmu. Ž `à  
\v 22 Eme irec ŋifecne mupe: Marac furuo dâŋ mumu i fuŋne qaqa mâsi moc, erâ i opâ ruac jaŋere biŋe mi ekac, i qâpuc jaŋere biŋe, â Anuture micdâŋ mumufua ine qâpuc jaŋere biŋe mâcne, i opâ ruac jaŋere biŋe.  
\v 23 Irec kikefuŋ guru tumaŋne-fârehuc mâmâc sasawa marac furuo dâŋ muhapie ŋic omane me qâpuc moczi hefârâ honec-ŋoparâ muocmu: “Maŋsifuc ejarekac.”  
\v 24 Á Anuture micdâŋ mufuahuc ŋehapie ŋic qâpuc me omane moczi ŋoŋerao hefârâ miti i manaocmu, ine mâmâc sasawa maŋticnere fuŋne bataniŋkeniŋmu â mumu hehec ecneniŋmu.  
\v 25 Eme maŋticnao wiac hesoŋkeme foekac i fua taniŋkeme šâŋe maine mâreŋko hetutuckerâ Anutu muafeckehuc muocmu, Anutu e jâmbomac ŋoŋehec jukac.   
\s1 Mitire tumaŋnezo murâ maŋ metariŋ mi fisizo  
\p
\v 26 Âgo bureŋ, irec weniŋuc? Ŋoŋe tumaŋneniŋte murâ maŋ metariŋ mi fisieŋgopieŋ. Moc e miti gae bafisiekac, moc e mu qaqazuc dâŋ, moc e Anuture micdâŋ furune, moc e marac furu dâŋ, â moc e marac furu dâŋ irec fuŋne. Wiac i sasawa miti fua sawec eŋareocte enšepieŋ.  
\v 27 Marac furuo dâŋ muzo murâ boczi mâcne, jajahec me jahec â moc sawazi munšepieŋ. Erâ buc buc mupie sâc moczi fuŋne bâtikierâ ŋazazejec.  
\v 28 Bâbâtikie ŋic basaniŋmuo tutumaŋko marac furu dâŋ mi muzo. Moc e muzo murâ bucticne â Anuturao muzejec.  
\v 29 Anuture micdâŋ mumufua ine iŋuc jaha ŋic jajahec me jahec â moc munšepieŋ, eme gâcne mana wosâerâ ŋifecne munšepieŋ.  
\v 30 Moc e ŋehame Mârozi maŋticnao miti râeme muzo mume mârâc fuŋkejeczi behezejec.  
\v 31 Anuture micdâŋ mumufua i ezo murâ sâcne efârenšepieŋ, ehuc buc buc mupie gâcne sasawa jaŋe mitihec erâ maŋafec bâfuanšepieŋ.  
\v 32 Anuture micdâŋ mumufua ŋic mârofâc-jeŋic jaŋe porofete âgofâc-jeŋic jaŋere dâŋ reŋkenšepieŋ.  
\v 33 Anutu e hesi qâsifuc Anutu mâcne, e wama Anutu.   
\s1 Ŋokac jaŋe tutumaŋko dâŋemâc ŋenšepieŋ  
\p
\v 34 Kikefuŋ gâcnao mitire tumaŋnehuc ŋokac jaŋe dâŋemâc ŋeeŋgopieŋ, ŋoŋerao iŋuc jaha enšepieŋ. Ŋokac jaŋe iŋuc ehuc wahamicne juniŋte i sâcmutâc dâŋqâhâcko mukicne wâc.  
\v 35 Wiac moc manazo ejareme ficjeŋicko ŋowefâc-jeŋic mu wioc ejarenšepieŋ. Ŋokac moczi kikefuŋ tutumaŋko dâŋ mume mimi qaqanehec eocmu.  
\v 36 Me Anuture dâŋzi ŋoŋeraonec fuawec? Me ŋoŋe buc manambiŋ?   
\p
\v 37 Ŋoŋeraonec moczi e jahacnere maname porofete me ŋic Mârohec eocmu, e dâŋ qâreŋke-ŋarekopac i Wofuŋte mumupaŋ, iŋuc mana tarazejec.  
\v 38 Moc e dâŋ ši maname fârine mi eme e mana suazo.   
\p
\v 39 Irec, âgofâc, šiŋuc mananiŋ: Ŋoŋe Anuture micdâŋ mumufua irec šoɋac enšepieŋ, â marac furuo dâŋ mumure aka wâc mi henšepieŋ.  
\v 40 Wiac sasawa epie pec sererec â tiŋbenoŋ fozejec.   
\c 15  
\s1 Jesu fafahare-ticnere dâŋ  
\p
\v 1 Âgofâc-nane, Biŋebiaŋ ŋazape manambiŋ, erâ wâc bajueŋgopieŋ, irecteaŋ manasu-ŋarepe.  
\v 2 Qazu-ŋarepo irec sâckoa bajuŋgopieŋko sâcne bâpiaŋ-ŋopaocmu. Me bajuhapie biac sifucke-ŋare wiac moc ewec?  
\v 3 Miti qizecne no narekicne ijaha ŋoŋe ŋarehuc kecšiŋuc muhuc fuŋke-ŋarepo: Kristo e miti papiao mucnekicne irec sâcko erâ sâqocne-nâŋecte okacne hâmowec.  
\v 4 Erâ miti papiao mucnekicne irec sâckoa šâŋeruŋko hurâ šoaŋ jahec â moc eha ɋârerâ faharewec.  
\v 5 Faharerâ qanaŋ Kefa fuacnewec, izi motecfâcne 12 fua-jarewec.  
\v 6 Izi mitiŋic šare-jeŋic 500 jâuruwec jaŋe tumaŋnehapie fua-jareme hone-fârembiŋ. Jaŋeraonec bocjahazi ɋâricne juŋgopieŋ, â gâcnezi hâmombiŋ.  
\v 7 Izi Jakobo fuacnewec, izi aposolo mâmâc sasawa fua-jarewec.  
\v 8 Ʒâhecko ine ombâŋtâc no wâc fua-narewec.  
\v 9 No aposolo waha qaqane jâmbâŋ, no Anuture kikefuŋ guru jopa sipiric ejarepore aposolo šâŋe munarepie mi sâckeekac.  
\v 10 No aposolo epo i Anutu aki anonoc-ticnere erâ epo. Erâ aki anonoc-ticnezi norao racne mi ewec. No gie bapo i gâcne jaŋere sâc jâurukac, erâ no nahac wemo-nanezi bazapo, Anuture aki anonoc norao fowec izi bawec.  
\v 11 Eme no mecne jaŋe mecne miti iŋuc hâcne muromackeeŋgopeneŋ, eme ŋoŋe i hâcne manambiŋ bajuŋgopieŋ.   
\s1 Jesu hâmockonec ɋârewecte ɋârenaŋmu  
\p
\v 12 Kristo e hâmockonec ɋârerâ faharewec, miti iŋuc muhuc ŋazapene wemocte ŋoŋeraonec gâcnezi hâmockonec fafahare mi fokac mueŋgopieŋ?  
\v 13 Hâmockonec fafahare-nâŋec i mickehuc Kristo fafahare-ticne mâmâc mickezo.  
\v 14 Kristo mi faharezacko ine miti mumu-nâŋec fârimâc ezac â mamanasiŋ-ŋeŋic iŋuc jaha fârimâc ezac.  
\v 15 Erâ i sawa mâcne. Nâŋe Anuture mumbeŋ, e Kristo hâmockonec bafaharewec. Eme hâmockonec fafahare mi fozacko Anutuzi wemocko Kristo bafaharezac. Irec dâŋ mumbeŋ i Anutu micko itic ecnehuc burecŋicfâc-ticne eŋgopeneŋ ezac.  
\v 16 Ŋic hâmockonec mi fahareniŋmu, iŋuc murâ Kristore iŋuc jaha hâmockonec mi faharewec muzo.  
\v 17 Kristo e hâmockonec mi faharezacko ine mamanasiŋ-ŋeŋic racne ezac â kiŋŋeŋic foŋarezac,  
\v 18 â Kristo manasiŋkehuc hâmombiŋzi sipirickembiŋ ezac.  
\v 19 Nâŋâc mâreŋko šira sawa Kristore mamanac maŋgâŋ junšapeŋko, ine mamakucne fuŋmoc ehuc gâcne siric-jopa-fârenšapeŋ.   
\s1 Hâmockonec fafahare i birio faharezo  
\p
\v 20 Erâ iŋuc mâcne, Kristo e jâmbomac hâmockonec ɋârerâ ŋic hâmokicne jaŋere micne barâ faharewec jukac.  
\v 21 Ʒiŋucte hâcne: Ŋiczi hâmoc fuŋke-nârewec iŋuc jaha ŋiczi hâmockonec fafahare fuŋke-nârewec.  
\v 22 Adamhec šušuhuc-nâŋec fokacte hâmo-fâreeŋgopeneŋ, iŋuc jaha Kristohec šušuhuc-nâŋec fokacte fahare-fârenšoŋgopeneŋ.  
\v 23 Erâ birine mukicne sâc faharezo: Micne bapazi Kristo, izi fifisi-ticnao Kristore bufuŋfâc,  
\v 24 izi dameŋ taraocmu” Kristo e fekicne â tâpirihec â šoɋac sasanaŋhec bawahac-jopame munaŋke-fârehapie Wofuŋ gie-ticne i Anutu Mamac-ticne bârisiecneme dameŋ taraocmu hâcne.  
\v 25 Ʒi ine Wofuŋ gie-ticne bahuc juocmu, juku râsifâc-ticne ro waha âte ejare-fârerâ gie-ticne bataraocmu.  
\v 26 Râsi sâko mimic qa imac ecneocmu šâŋene hâmoc.  
\v 27 Anutuzi ŋic â wiac sasawa Kristore wahamicnao râec-nâpo-fârewec hâcne. Erâ dâŋ šiŋuc fokac, “Ŋic â wiac sasawa bawahac-joparâ ere wahamicnao guruc-jopa-fârewec”, dâŋ i manapene Anuture mâmâc mukicne mi ezejec. E hâcne Kristore wahamicnao guruc-nâpoweczi rurumaŋnao mi huocmu.  
\v 28 Mamac e ŋic â wiac sasawa Ŋokâ rurumaŋnao guruc-nâpo-fâreme Ŋokâ e Mamacte wahamicnao waharâ domaocmu. Eme Anutuzi qâhuc-nâpo-fârerâ juju isiricke-fâreocmu.   
\s1 Hâmockonec fafahare mi fome muzac mamakucne enšapeŋ  
\p
\v 29 Ŋoŋeraonec gâcnezi hâmokicne jaŋere erâ Miti Opâ ruaeŋgopieŋ, i hâmockonec fafahare mi fokacko wemocte iŋuc eeŋgopieŋ?  
\v 30 Erâ wâc nâŋe ine wemocte šârâ hâriŋ faio gâbâmâc qâmâc jumbeŋzi jueŋgopeneŋ?  
\v 31 Âgofâc-nane, Kristo Jesu Wofuŋ-nâŋeczi eri-nane râec-ŋopawec ŋoŋere maio mukopac: No šoaŋ gie bapa sâc hâmoczi bâmbeŋnuha juekopac.  
\v 32 No Efeso haeo qowi mimicne jaŋehec juju gie bapo i ŋicdâŋko siŋkehuc epoo wemo fârine mo fua-nareocmu? Hâmockonec fafahare mi fokacko šiŋuc mupene sâckezac: “Tomâcko moc hâmonšipeŋte miŋecgac jaha nânâ qowi ro nâc qânâc enaŋ.”  
\v 33 Moczi moc ba qâsoric eŋarenšipiŋ ine¡ Kosa jujune jaŋerao qohotaocmu e eebapa biaŋne sifuckecneocmu.  
\v 34 Ŋoŋe maŋŋeŋic ɋâreme pectâc juhuc sâqocne geŋkenšepieŋ. Ŋoŋeraonec gâcnezi Anuture kâuc baŋgopieŋ, i manarâ mimieniŋte mukopac.   
\s1 Fafahare fuŋne fuŋne faharezo  
\p
\v 35 Gâcnezi šiŋuc mecne muniŋmu: Hâmokicne jaŋe weniŋuc erâ fahareniŋmu â sahac hawari-jeŋic weniŋucnehec fuaniŋmu?  
\v 36 I dâŋ mutucne” ŋoŋe wiac saraeŋgopieŋ i mâc mi wefuekac, mimiŋne šaŋkeha bâpâŋne wefuekac.  
\v 37 Á wiac saraeŋgopieŋ, i borâcne mi saraeŋgopieŋ, hândâŋne sawa saraeŋgopieŋ, jacgoŋ me wiac gâcnere hândâŋ, eme borâcne â rehacne šâhec fuaekac.  
\v 38 Eme Anutu e mana tararâ hawari mucnewec ijaha wefurâ fuaekac, hândâŋne sâc hawari fuŋne fuŋne fuaekac.   
\p
\v 39 Sahacte fuŋne iŋuc jaha mocjaha mi fokac, ŋic nâŋâcne sahac i moc â bec qowi jaŋere sahac i moc â wipe jaŋere moc â opâ qowi jaŋere moc.  
\v 40 Sambâŋko wiac fâri ŋerakac â mâreŋko wiac fâri ŋerakac. Erâ sambâŋko ŋerakac i eri-ticne moc, â mâreŋko ŋerakac i eri-ticne moc.  
\v 41 Ʒoaŋ e tatamacne moc, mosa e tatamacne moc, bâpiŋ jaŋe tatamac-jeŋic moc, erâ bâpiŋ tatamac-jeŋic mocjaha mâcne, fuŋne fuŋne fokac.   
\p
\v 42 Hâmockonec fafahare irec fuŋne ijaha fokac. Sarakicnezi sisirowene, fahareocmuzi mi sisirowene”  
\v 43 sarakicnezi joŋtawekicne, fahareocmuzi erinehec” sarakicnezi weweaŋne, fahareocmuzi tâpirinehec”  
\v 44 sarakicnezi mâreŋ sahachec, fahareocmuzi sambâŋ sahachec. Mâreŋ sahac fokac, iŋuc jaha sambâŋ sahac fokac.   
\s1 Mârâc Adam â šâhec Adam  
\p
\v 45 Dâŋ šiŋuc hâcne qâreŋkekicne fokac: “Ŋic mârâc fufua Adam e maŋ qâqâtâchec erâ ɋârewec.” Ʒâhec Adam e ine Mârohec ehuc juju bâbâfua irec rune ewec.  
\v 46 Sambâŋte wiaczi mi bâniewec, mâreŋte wiaczi bânieha sambâŋte wiaczi šâhec ewec.  
\v 47 Mâreŋŋic e mâreŋzi bakicnere mâreŋkonec ŋic ewec â šâhecŋic e ine sambâŋkonec.  
\v 48 Mâreŋkonec ŋic juwec sâc ijaha mâreŋkonec ŋicfâc-ticne jueŋgopeneŋ, â sambâŋkonec juwec sâc ijaha sambâŋte biŋefâc-ticne nâŋâc junaŋmu.  
\v 49 Eme mâreŋkonec ere hawari rombeŋ, iŋuc jaha sambâŋkonec ere hawari ronaŋmu.   
\s1 Jesu fisime sambâŋ sahachec enaŋmu  
\p
\v 50 Âgofâc, dâŋ moc ši mupe mananiŋ: Mâreŋ sahac-nâŋeczi Anuture uucmaŋ sâcne mi rauckeocmu, â wiac gârecke šaŋ eenezi wiac fofo sanaŋ mi wâc rauckeocmu.  
\v 51 Manaŋgopieŋ, ši dâŋ soŋne moc mufua-ŋarepe: Nâŋâc mi hâmo-fârenaŋmu, hetikierâ hawari moc ee ine šeŋgoma efârenaŋmu.  
\v 52 Qeŋ mimic dâŋeme ututuŋ, ɋeŋfâfâc jaha iŋuc hâcne enaŋmu. Qeŋ dâŋeme hâmokicnezi faharerâ gârecke šaŋ tâmiric juniŋmu, â ɋâricne junaŋmuzi wâc hetikierâ hawari moc enaŋmu.  
\v 53 Sahac ši gârecke šaŋ eenezi juju saric i ŋaqi iŋucne  heme huzejec, â hâmocte biŋe ekicnezi juju sanaŋ heme huzejec.   
\p
\v 54 Eme gârecke šaŋ eenezi juju saric heme huocmu, â hâmocte biŋe ekicnezi juju sanaŋ heme huocmu, dameŋ ira dâŋ kecšiŋuc qâreŋkekicne i deŋkeocmu:  
\q1 “Jujuzi hâmoc ɋâckewec.”   
\q1
\v 55 “Hâmoc go tâpirige weni?  
\q1 Hâmoc go šârâge weni?”   
\m
\v 56 Sâqocnezi hâmocte šârâ ekac, â sâcmutâc dâŋte erâ sâqocnezi tâpirinehec ekac.  
\v 57 Anutu e Wofuŋ-nâŋec Jesu Kristo ecneme jujure tâpiri bâfua-nâreekacte muteŋkenšepeneŋ.  
\v 58 Irec âgofâc-mae, ŋoŋe sanaŋkerâ qiŋ herâ domanšepieŋ, ehuc Wofuŋ gie-ticnere dameŋ sâc henširiŋnehuc banšepieŋ. Wofuŋte erâ gie bapie fârimâc mi eocmu, iŋuc manahuc banšepieŋ.   
\c 16  
\s1 Jerusalem haeonec jaŋere moneŋ bâfuaniŋte jazawec  
\p
\v 1 Mitiŋic jaŋere moneŋ râezo murâ ine Galatia mâreŋkonec kikefuŋ guru jaza mutâc epo ijaha enšepieŋ.  
\v 2 Ŋoŋe moneŋ hotâckekicne irec sâc manahuc Sondane Sondane tucne bâtâc barâ buc buc râe guruc ehuc junšepieŋ, mâc juhapie fâ fisipe moneŋ qânusuckeniŋte âecke guruc enšipiŋte.  
\v 3 Ŋoŋerao fâpe ŋic mucjopaniŋmu jaŋe papia jarehuc sorec-jopape bubiaŋte wiac-ŋeŋic Jerusalem haeo baranšepieŋ.  
\v 4 Me moneŋ bocjaha eme nohec mâmâc ranšepeneŋ.   
\s1 Paulo e jaŋerao raocte šâfo bajarewec  
\p
\v 5 No Makedonia mâreŋ fotâcne-fârerâ ŋoŋerao fâpemu, Makedonia mâreŋko boc mi jupemu, i mâc fotâcnepemu.  
\v 6 Ŋoŋerao fârâ piticne jupemu, me jufehape hoemaŋ taraocmu mecne. Eme ŋoŋe hatare baficnupie ira me ira razepac.  
\v 7 No dameŋ šiŋuczia mâc fofotâc fâhuc honec-ŋopape mi sâckeocmu, irec Wofuŋzi manaha ŋoŋerao fârâ piticne jupemurâ mukopac.  
\v 8 No ši Efeso haeo juhape Mâro Hombaŋ maickeocmu.  
\v 9 Ʒira Wofuŋzi mitire hata bâšâweme gie sâko-nane fuakac. Erâ mitire kisâ bocjaha juŋgopieŋ wâc.   
\p
\v 10 Timoteozi ŋoŋerao fâme âgo ecnepie hâwic sahac mi juzejec. E no Wofuŋte gie baekopac iŋuc jaha baekac.  
\v 11 Irec ere manapie wawahane mi ezejec. Erâ aimuŋ ecnerâ bârisiepie norao mocwâc warezejec” no â opâ ruac gâcne woŋec-ticne juŋgopeneŋ.   
\p
\v 12 Âgo-nâŋec Apolo e opâ ruac gâcne jaŋehec ŋoŋerao fâocte âzâcne sorec epe sâcne mi afeckekac” e šiŋuczia mâcne, dameŋ mocte maname sâckeme ŋoŋerao fâocmu.   
\s1 Miti gie bapaŋic sâsec-jopazo  
\p
\v 13 Ŋoŋe rucjaric-ŋeŋic bahuc mamanasiŋko qiŋ henšepieŋ, ehuc hâbi-ŋeŋic rorâ sanaŋkenšepieŋ.  
\v 14 Erâ wiac sasawa maŋjauŋhec enšepieŋ.  
\v 15 Erâ âgofâc-nane, dâŋ moc ŋazape mananiŋ: Ŋoŋe Stefana â wiacfâc-ticne jaŋere manaeŋgopieŋ, jaŋe Akaia mâreŋko micne barâ miti manambiŋ, erâ mitiŋic ŋoŋerao kiŋaŋ qaqa gie baeŋgopieŋ.  
\v 16 Irec ŋoŋe jaŋe mecne â gâcne miti gie bahuc šâic manaeŋgopieŋ honec-jopapie micnefâc-ŋeŋic enšepieŋ.  
\v 17 Stefana â Fotunato â Akaiko jaŋe norao fisipie bunane biaŋkewec. Jaŋe ŋoŋere âkehoc dâŋjauŋ enarembiŋ.  
\v 18 Ehuc no â ŋoŋe mâmâc maŋuruc qanârembiŋ. Ŋoŋe ŋic iŋucne jaŋere manapie biaŋkezejec.   
\p
\v 19 Asia mâreŋ masunao kikefuŋ guru jaŋe ŋoŋere mamanac juŋgopieŋ. Aqila â Prisika â ficjekicko mitire tumaŋneeŋgopieŋ jaŋe Wofuŋte erâ mu šeri boc eŋareeŋgopieŋ.  
\v 20 Opâ ruac mâmâc sasawa mu šeri eŋare-fâreŋgopieŋ. Ŋoŋe ŋaŋac mitio meo babac enšepieŋ.  
\v 21 Ʒi Paulo no nahac mu šeri eŋarehuc šâŋe qâreŋ-nane râekopac.  
\v 22 Moc e Wofuŋte takickeme hârâcte biŋe ezejec. Wofuŋ-nâŋec go warezemec.  
\v 23 Wofuŋ Jesure aki anonoczi ŋoŋerao fozejec.  
\v 24 Maŋjauŋ-nanezi Kristo Jesure erâ ŋoŋerao fofârekac.