\id JUD - Tagakaulo Finished texts
\ide UTF-8
\toc2 Judas
\toc1 Ya Muna Pagpa-ede'
\mt Ya sulat ni Judas adti manga mangintu-uway kan Kristu
\is Ya Muna Pagpa-ede'
\ip Ya Judas na migsulat sa sulat ini, yan ya mangud sa kadég na manga inulug ni Jisu-Kristu. Ka-ede-an tadun adti Matiyo 13:55.
\ip Madugay na wala' si Judas pangintu-u na si Jisus ya Ise' na Tyumanem, manang pagkatigkas na pagkataw ni Jisus, nyangintu-u la sakanan. Aw nya-imo' sakanan sambuk na migdumala sa manga mangintu-uway. Pigsulatan ni Judas ya manga mangintu-uway kan Jisus na adti eped na manga banwa. Aw ya tud na sulat nan yeiy, yan ya pagpa-inap kanilan sa manga magpalna-uway sa galu' pada dili' silan makasuway lekat adti kanilan pangpangintu-u.
\c 1
\p
\v 1 Aku si Judas na sugu-anen ni Jisu-Kristu, aw mangud uman ni Santiago.
\p Migsulat aku adti kadég mayu na pigtawag na Tyumanem na Ama aw pigginawa͡an nan aw dayaw pigtamengan menda' sa pagliku' ni Jisu-Kristu.
\p
\v 2 To-o pa galu kadugangan adti kamayu ya kanan kallat aw kalinaw aw ya pagginawa na Tyumanem.
\s Ya pagpakatanaw sa manga magpalna-uway sa galu'
\p
\v 3 Kay manga inulug na kanak pigginawa͡an, ya palpa ku asini sulat ku na pa-anenganeng kamayu ya pagpaluwa' na Tyumanem sa kadég tadun na nyangintu-u la. Manang nya-uman ya anenganeng ku na ini baling ya ka-ilangan ku sulaten kamayu: Tibagsegi mayu na tamengan ya kamayu pagpangintu-u aw ya matinaw na palna-u na pigtaligu na Tyumanem adti kadég na mangintu-uway. 
\v 4 Kay dyengeg ku na awūn manga utaw na mig-imo' sa malatay na nyakaseled adti katipun mayu na wala' kasalinapi. Pigbaluk nilan ya palna-u sa kallat na Tyumanem aw miglong baling silan na pigtumbay kunu adti utaw ya pag-imo' sa to-o malatay. Manang ya manga utaw yeiy, pigsulat da dadan na manga propita na pa-emel-emelen silan na Tyumanem. Kay pigbalyaw nilan uman si Jisu-Kristu na kanaten Pangulu na migdumala sa kadég.
\p
\v 5 Na, pigpa-ede' da kamayu alag na pigpaluwa' na Tyumanem ya kadég na buwadbuwad ni Isra-él asini muna adti pagdumala na Ihiptu. Manang kaliman ku pa-anenganeng kamayu na madég kanilan ya nyatay magi sa pagamak na Tyumanem kanilan asuntu na wala' silan pangintu-u.
\p
\v 6 Aw anenganenga mayu uman ya manga anghil asini muna. Ya eped kanilan wala' tingen dun ni pigbetangan kanilan na Tyumanem aw nyatu silan baling kanan.\f * 1:6 Mabasa ta adti Génésis 6:1-4.\f* Yanagaw pig-eketan nan silan na sangkali' na dili' magkabugtu' aw pigkalabusu la silan dun ni banwa na to-o mangitngit menda' sa allaw na pag-ukum.
\p
\v 7 Aw dili' mayu pagkalingawan ya kyagamakan na manga utaw dun ni Sodoma aw Gomora aw manga lunsud na nyakapalibed dun. Nyakasala' silan kay kaliman nilan magkasala-enen adti beke' na kanilan ka͡ubayan aw pangkay adti eped nilan na eseg. Ya atulun na pigpa-emel-emel na Tyumanem kanilan, yan ya pagpa-anenganeng sa utaw na mag-imo' sa malatay, kay ya datengan nilan ya atulun na dili' pagkapatayan.
\p
\v 8 Maynan uman ya manga utaw na mig-imo' sa malatay na syumambuk dun ni manga katipun mayu. Awūn kunu pigkita' nilan na kasiling na tagaynep, aw yan ya migdegdeg kanilan adti pagpakasala' dun ni kanilan pagka-utawun. Pigkele͡an nilan ya awun katundanan. Aw miglong silan sa malatay adti manga anghil.
\p
\v 9 Manang pangkay ya kapitan sa manga anghil na si Migél, wala' sakanan pag-imo' sa maynan. Asini muna sa pagkamatay ni Moysis, mig-ayil si Migél aw si Satanas kun singalan ya makatagtun sa lawas nan. Manang wala' si Migél pag-ukum kanan aw piglongan nan olo', “Ya Tyumanem, yan ya magsagda kanmu!”
\p
\v 10 Manang ya manga utaw yeiy, pig-odoy-odoy nilan ya pangkay unu na wala' nilan kalabeti. Kasiling silan na ayep na malyaw na dili' mag-anenganeng sa un nilan imo-un, kay pigdalug nilan baling ya pagkaliman na kanilan lawas. Aw magi sa pigpan-imo' nilan, dumateng adti kanilan ya pa-emel-emel na Tyumanem adti kamoliyan na allaw.
\p
\v 11 Malatay ya datengan na manga utaw yan! Kay pigdalug nilan ya malat na bet ni Cain.\f * 1:11a Mabasa ta ya bet ni Cain adti Génésis 4. Ya sala' nan beke' olo' na pagpatay nan sa mangud nan manang pigkele͡an nan uman ya Tyumanem aw nyanggagad sakanan sa manga buwadbuwad nan adti malatay.\f* Pigdalug nilan uman ya bet ni Bala-am \f * 1:11b Mabasa tadun adti Numiros kapitulu 22 taman ni kapitulu 24 aw adtu uman ni Déutéronomiyo 23:3-6 kun singalan si Bala-am aw kun unu ya kanan bet.\f* na to-o magkalim sa kuwalta. Aw kasiling silan uman ni Kora na miggagad sa manga eped nan na matu sa Tyumanem, aw nyapnas baling silan, aw maynan uman ya ma-imo' sa manga utaw yeiy. \f * 1:11c Mabasa ya kasampetanen kan Kora dun ni Numiros 16:1-35.\f*
\p
\v 12 Ya manga utaw yeiy na syumambuk adti kamayu katipun aw pangiyambung, kasiling silan na taping. Kay migpa-eyang silan baling kyuman aw nyinem. Aw wala' ya kamulamula nilan! Kanilan pagka-utawun ya pag-olo-un nilan.
\p Kasiling silan uman na labun na pigtambel na mabandes na samet aw wala' paka-ulan.
\p Aw kasiling silan uman na kawuy na wala' pakabunga pangkay timpu na pagpamunga, nyalukat baling aw nyatay.
\p
\v 13 Kasiling silan uman na manga baled adti dagat na to-o masleg na dyumala sa madég na subuk, kay gayed pagkita-en ya imo-unun nilan na makamulamula͡ay.
\p Kasiling silan uman na manga bitun na awun ni langit na gayed magliku-liku' na dili' silan makagagad sa anenganeng na utaw. \f * 1:13 Ya manga dyumala sa barko, bitun ya gayed nilan pagtandawan kun ayin silan pasinan. Manang ya manga planita, asuntu na gayed magliku-liku', dili' makagagad sa panaw nilan manang makapagkalat baling sa barko. \f*
\p Pigtagilanan silan na Tyumanem sa banwa na to-o mangitngit aw adtu nan silan betangan na wala' ya tyamanan.
\p
\v 14 Aw si Inuk ya migpa-ede' dadan sa ma-imo' adti manga utaw yeiy. Na, si Inuk yan ya kapitu na alintuwad na buwadbuwad ni Adan. Aw miglong si Inuk, “Tanawa! Kyinita' ku ya pagdateng na kanaten Pangulu eped nan ya kanan manga anghil na matag pilammalalan 
\v 15 na un mag-ukum sa kadég na manga utaw. Aw pa-emel-emelen nan ya kadég na wala' pangintu-u kanan, asuntu sa imo-unun nilan na malatay, aw asuntu uman sa tingeg nilan na malat adti kanan.” 
\v 16 Aw ya manga utaw yeiy na syumambuk adti manga katipun mayu, ini ya bet nilan: Gayed silan magdiklamu aw magpaninaw sa ayil. Aw yan ya pagdalugun nilan ya pagkaliman na kanilan pagka-utawun. Magpatastas silan, aw matadeng silan magbulakbulak sa tingeg pada matuman ya kanilan pagkaliman.
\s Ya palna-u adti manga mangintu-uway
\p
\v 17 Kay manga inulug na kanak pigginawa͡an, to-o mayu anenganenga ya piglong na manga apostolés ni Jisu-Kristu na kanaten Pangulu, 
\v 18 law nilan, “Sa kamoliyan na manga allaw, awūn dumateng na manga utaw na mag-odoy-odoy kanaten asuntu sa pagpangintu-u tadun. Aw yan ya dalugun nilan ya malatay na pagkaliman na kanilan lawas.”
\p
\v 19 Aw adun, awun da silan ni manga katipun mayu, aw asuntu kanilan matenga-tenga' kamu. Yan olo' ya kanilan pag-anenganengen ya asini tas na lupa', kay wala' nilan tumbayan na meya' ya Ispiritu Santo dun ni seled nilan.
\p
\v 20 Manang kamu na pigginawa͡an ku, gayed mayu pakasaliga ya pagpangintu-u mayu dun ni kan Kristu. Aw adti pagpanawagtawag mayu adti Tyumanem, pagagadan mayu sa Ispiritu nan ya kamayu anenganeng. 
\v 21 Katingen kamu dun ni pagginawa na Tyumanem, talana mayu pigtagadan ya pigpakang nan na yan ya ginawa na wala' ya katigkasan asuntu sa kallat na kanaten Pangulu na si Jisu-Kristu. 
\v 22 Tabangi mayu ya manga migduwaduwa kun unu ya umba' nilan pangintu-uwan. 
\v 23 Aw tabangi mayu uman ya manga eped pada makaluwa' silan lekat adti pa-emel-emel na Tyumanem dun ni laga na atulun. Kallati mayu ya manga mig-imo' sa malatay eped na pagkallek mayu sa Tyumanem. Pagkele͡an mayu ya malatay, aw magpakatanaw kamu pagaw katapunan kamu na manga sala' nilan.
\s Ya pagdeyen sa Tyumanem
\p
\v 24 Aw adun, deyen tadun ya Tyumanem na mabatug kamu nan tamengan na dili' kamu makasungkul adti pagpakasala'. Kay ya Tyumanem saba olo' ya makapa-indeg kamayu dun ni asdangan nan na wala' ya sala', aw apeten mayu ya kadyawan na Tyumanem. Aw dakula' to-o ya pagleya mayu dun ni allaw yan. 
\v 25 Naten deyen ya kanan ngalan, kay ya Tyumanem da olo' ya kanaten Magpaluwa-ay magi sa Pangulu tadun na si Jisu-Kristu. Awun ni kanan ya matas na dengeg, aw ya kadyawan na pagka Tyumanem, aw ya kabagseg aw katulus na to-o matas. Aw alag yeiy wala' ya maka-unawa pangkay lekat pa adti pagkalekat, aw adun, aw sa manga allaw na dumadateng pa na wala' ya tyamanan! Amén.