\id ACT - Kosarek 
\h POGSIOGNANG 
\toc1 Yesusti Wepsiogti, Pogsiognangdi Ulameka Sembe Lukasti Mome Toro Pibog Yubu Yesusti Wepsiogti, Pogsiognangdi Ulameka Sembe 
\toc2 POGSIOGNANG 
\toc3 Pog. 
\mt2 Lukasti Mome Toro Pibog Yubu  
\c 1  
\s1 “Allahri Eldamne Yame Walinge tatsilul,” aro Yesusti salag lebogha (1:1-5)  
\p
\v 1-2 Teofilus nani, samenag mome pipsinge ane. Yesusti alnibaogti, ulamogti ambarelamsiogti, imag yingkiogpa, ni ulamogne sembe mome toro pipsi.\x - \xo 1:1-2  \xt Lukas 1:1-4\x* El neneko anam imag yingkin komag Allah Eldamne Yame Walinge Elag wamogpa, Yesusti nimi a'obare wepsiogti, pogsiog. Yesusti wepto pogsiognang tanekoag “A'undi nia mangkina undo-undo ulamlulom,” aro ambatsiogpa\x - \xo 1:1-2  \xt Lukas 24:46-49\x*, Allah imagneri kiliro tobogha sembe mome topsi.   
\p
\v 3 El obekpa, seklero tebaogti, kamag taogne, “Na kamag tanonge imniikti, 'Sik, kamag tao,' sembaukang,” aro kekneba maikno sin haingag ulamog. Ulamogti, “Allahri Eldamne yubu ka'erop nimi wali uro saelbahilulne,” sembe ambarelamsiogti, “Naipsabori imnukang,” aro lag tangom tognop tangom alamogha inipna teng nhon epto naualbare taog.  
\v 4-5 Ik nhon sum Yesusti wepsiogti, pogsiogneap kwaneng nhon telamekti ambarelamsiogti, iriklamsiogti, “Yohanesti samenag nimi maghag pelengelamsiogne mag moag pelengkipsiog aghana, olog wapmunba, Allahri Eldamne Yame Walinge a'unag pelengkipsilul.\x - \xo 1:4-5  \xt Matius 3:11; Markus 1:8; Lukas 3:16; Yohanes 1:33\x* Ane sembe, as Yerusalem anea lamba pheng kom. Na Naniri, 'Nandamne Yame tatsinun,' aro salag lebogne Nari ambatsinonge neneko nang-nang aro wamlulom,” aro ambatsiog.\x - \xo 1:4-5  \xt Lukas 24:49\x*   
\s1 Yesus imag yingkiogha (1:6-11)  
\p
\v 6 Yesusti wepto pogsiog nimi taneko ik nhon sum Yesusap winiro wamekti hailamekti, “Nai, samenag Roma nimiri nu Israel nimi saelbamsiek komag wamubu saog uro nu 'Israel nimi mog so'o nuringe ngai taukap aro paliag nembahinun,' aro leplam, te?” aro haibaek.   
\p
\v 7 Wene aro haibaekpa Yesusti, “Allahri Israel nen samoro paliag nembahilulne etsum anena a'unna eltanep kom. Nani Allah el mo el wamlari saelbamlari, karebalul aghana,  
\v 8 Allah Eldamne Yame Walinge a'unag kulukul aleri, mikip nembahileba, Na wamnori ulamnoba imneomneap, Nanag uro yabilneap, amik uro yabilulneap sembe as Yerusalem, mog so'o Yudea, mog so'o Samaria, as tala-tala im tiptobag so'o tiptobag wamangneag pimundi, ambarelamsululom,” seog.\x - \xo 1:8  \xt Matius 28:19; Markus 16:15; Lukas 24:46-48\x*   
\p
\v 9 Wene aro ambarelamsiog abeneko imag agha Allahri Yesus kiliro tolamogpa, toari niknilamogpa, Eldi wepto pogsiognangdi tiwalengkamek.\x - \xo 1:9  \xt Markus 16:19; Lukas 24:50-51\x* \fig Imag agha Allahri Yesus kiliro tolamog|alt="Dari langit, Allah mengangkat Yesus" src="ascension_CN01883C.TIF" size="col" copy="David C. Cook" ref="Pogsiognang 1:9" \fig*   
\p
\v 10-11 El imag yangkalamogpa, Ilipsabori tiwalengkamekti, hain ebom alamekag agha nimi phende ag solomne enektopne sin peramag sekamdekne abenekori sin yubu ambarelamsirekti, “A'un mog so'o Galilea nimi. A'un sa'a sembe imag tiwalengkamlom? Yesus neneko a'un laplobiagha Allahri imag agha kiliro tolamlaba, tiwalengkamlomne nene saog uro amik kulukul alulne babe yangkalamlaba tiwalengkalomne saog uro kulukul alul,” aro ambatsirek.   
\s1 Yesusti Wepto Pogsiognang, “Allah Yame walinge kulukul alul,” aro nang-nang aro wameka (1:12-14)  
\p
\v 12-13 Ambatsirekpa Yesusti Wepto Pogsiog nimi taneko yim Zaitun anekoa samoro as Yerusalem yaek. Zaitun yimag aneko Yerusalem ana we koma\f + \fr 1:12-13  \ft Yunani yubuag toropnena, “Sabat sum paiag ina panna,” mome torobana, samenag Allahri Yahudi nimiag, “Sabat sum awe tolamlulom kom,” aro pibogne sunsunum uro sembiagha, “Kilometer nhon ina hae pina mamnep,” seek. Sum eneko pin aneko nen pinep, nen yanep kom.\f* samoro Yerusalem yingkina nimiri ae agha sesog wamekag aneko ae tika alikinagneag waelbaekti, wamek. Sin wameknena: Petrus, Yohanes, Yakobus, Andreas, Filipus, Tomas, Bartolomeus, Matius, Alfeus elme Yakobus, Simon ponena “Roma nimi luknubahibeberi, mo sekukap,” aro yin saelbamogneap, Yakobus elme Yudasap sin wamek.\x - \xo 1:12-13  \xt Matius 10:2-4; Markus 3:16-19; Lukas 6:14-16\x*  
\v 14 Sin ma'aptangto wamekti, sol wali,wali uro Allahag yubu moloro longoptangto wamek. Longoptangto wamekne taneko kelabo etbareap, Yesus Ilin Mariaap, Yesus ilipsabo taptopneapna, yogne agha Yesus sareneleplamek nimiap wamek.   
\s1 Yudas lunumna Matias webeka (1:15-26)  
\p
\v 15 Ik nhon sum Yesusag “Sikne” aro seneragtop nimi teng tombare eptopneap saog uro (120) longoro wamek sumeneko Petrus neneko, “Yubu lemnun,” aro sekog.  
\v 16 Sekogti yubu lelamogti, “Nangkabo, Allah Eldamne Yame Walinge nenekori samenag nunisang Daud pere agha lebog. Lebogne, Daudti Allah yubuag mome toroba buku nhonag mome toro pibog. 'Mome toro pibognena Yesus saleropnang poa yahionge sembe mome toro pibog,' aro el taap. Allahri samenag seneraghogti, 'Undo uro yabilul,' sembaogne toro pibogne kom tanep kom. Toro pibogne sunsunum uro Yudasti nimi topsiori, poa yahioba, Yesus saelbaong.  
\v 17 Samenag Yudas poneko babe nu nimi a'ilin wamobori, Yesus sembe nimi ambatto yeplamsibo,” seog.   
\p
\v 18 Yudas neneko malia uaogne sembe kamna tarekpa, kamna anekoag agha so'o tobogti, so'o enekoag tinilamogti, mon serero tisirik langtukto tebaog.\x - \xo 1:18  \xt Matius 27:3-8\x*  
\v 19 Undo obogne neneko Yerusalem nimi niri el taekti, obog so'o eneko “Nimi eneng so'o,” alamekti, sindi yubuag si “Hakal Dama,” aro engkaek.   
\p
\v 20 Petrusti lelamogti, “Allahri 'Undo uro yabilul,' sembaogne ane sembe nunisang Daud pere agha Allah yubu sepna wamlangena:  
\q2 'El ua urobag langkop tale  
\q2 nimi nhon babe aneko wamukang kom.'  
\p Nen siplamogti:  
\q2 'Wenehiropne nenekori awe toro saelbamonge nimi yog nimiag tale,'  
\p aro mome toro pibog.\x - \xo 1:20  \xt Sepna 69:25; 109:8\x*  
\v 21-22 Ane sembe Yudas lunumna nhon ebeberi, webukap. Webebeba, nimi nhon aneri, 'Yesus kamag taoba, ibo,' nunap nimi ambatsukap. Ambatsiropne webukapnena, samenag Yohanesti nu Salehiropne Yesus maghag pelengkiboghag agha, wamogti sop-sop nunap wamoba, Yesus nu nusamag ua ulamogha iboba, Allahri imag agha Yesus kiliro toboa babe ibori, nimi ane webukap. Webeberi, nunap ambarelamsukapti, 'Yesus kamag taoba, haingdi ibobo,' aro nimi ambatsukap,” seog.\x - \xo 1:21-22  \xt Matius 3:16; Markus 1:9; 16:19; Lukas 3:21; 24:51\x*   
\p
\v 23 Wene seogpa, nimi wamekne tanekori, “Nimi phende wepsukap,” aro Yusubap Matiasap towalengkaek. Yusup poneko si wilindi wamog. Si nhon Barsabas alamek, si nhon Yustus alamek.  
\v 24-25 “Sin phende abeneko wepsukap,” aro Allahag mololamekti, “Nai, Andi ni nimi wanaag kembamsilam. Samenag Yudas, 'Nari yubu ambarelamsululam,' aro webomdi, poghomne neneko eldamne sae pere agha apto aori, laplobi agha malia uaonge sunsunum urobag wamla. Naro, Andi, 'Nimi phende abene, Andi yubu pibomne wamsori, ambarelamsiso saog uro lunuro pukamlulne nene,' aro webatsi,” aro molbaek.   
\p
\v 26 Wene aro Allahag molbaekti, “Kekneba ibukap,” aro kirik toboglamekpa, Matiasag po'obaogpa, Yesusti wepto pogsiogne ko'olombareog wamek aghana Matias aonge taog.   
\c 2  
\s1 Allah Yame Walinge kulukul aogha (2:1-13)  
\b  
\p
\v 1 Yahudi nimiri ik nubu sum si Pentakosta\f + \fr 2:1  \ft Yahudi nimiri, “Allahri nunisagyabo talulamsiogti, Mesir mog so’oag agha enero poa lambahiog” aro seneragtop sum taogpa, inipna teng nhon eptopne lamdara bare sumeneko si Pentakosta sum engerop. Pentakosta sumenekona, “Roti wana mauroba yo’o karepto palilamap,” aro sani yolamek.\f* taogpa, “Yesus otsik uro lebo” aro seneragtop nimi taneko ot nhonoghag poloro winiptangto wamek.\x - \xo 2:1  \xt Imamat - Memnang 23:15-21; Ulangan - Sariktoba 16:9-11\x*  
\v 2 Poloro winiptangto wamekpa, imag agha khao yubu mu ana saog uro lelamogpa, lo'om alamekag agha, ae sin wamek ae anekoag mu aro tobonglamog.  
\v 3 Tobonglamogpa, nimi taneko toman a'ero-a'ero auk pog libang-libang arop saogne sinag pulamsiog.  
\v 4 Sinag pulamsiogti, Allah Eldamne Yame Walingeri sin nongag to'opto wa'isiogti, mikipne pipsiog. Mikipne pipsiogpa, sin ekon yubu ka'eptanep kom yubuag alnibaekti, a'erop-a'erop yubuag Allah Yame Walingeri tatsiogha sunsunum uro lelamek. \fig Allah Eldamne Yame Walingeri Yesusag seneragtop nimi nongag to'opto wa'isiog.|alt="Roh Allah masuk memenuhi tubuh orang yang percaya pada Yesus" src="tongues_fire_CN01890C.TIF" size="col" copy="David C. Cook" ref="Pogsiognang 2:4" \fig*   
\p
\v 5 Wene aro lelamekti, as Yerusalem wamekpa, nimi sisa Yahudi nimi engeropnang Allahag yubu moloropne wamekpa, nimi sisa a'ero-a'ero nimi Allahag yubu moloropnang babe wamek. Allahag yubu moloropnang taneko wameknena, “Pentakosta sum uaukap,” aro anamag, mog so'o sirikag-sirikag agha yalamekti, yubu mo-mo lerop nimi Pentakosta sumeneko as Yerusalem wamek.  
\v 6 Yingkina wamekpa, Allah Eldamne Yame Walingeri tatsiogha sunsunum uro a'erop-a'erop yubuag lelameka yingkirop nimiri ka'ebaekti, Yahudi nimi maikno wamek nimi taneko longol alamek. Longol alamekti ka'elamsiekpa, “Yesusti otsik uro lebo” aro seneragtop nimiri yubu a'erop-a'erop yubuag lelamekpa, ka'elamsiek nimi tanekori, “Welaro lelamang? Nundam nimiri yubu ka'elamapti,” senelamek.   
\p
\v 7 Ka'elamsiek nimi tanekori, “Welaro lelamang,” sembaekti, yubu lelamekti, “Sin nimi taneag mane agha uro yabil. Sin Yahudinang mog so'o Galilea nimi taneko kom te?  
\v 8 Ka'elamsiaba nununge yubuag lelamangba, welaro lelamang. Nununge as babe yubu babe a'ero lero urop nimi aghari.  
\v 9-11 Nunna mog so'o Partia agha, Media agha, Elam agha, Mesopotamia agha, Yudea agha, Kapadokia agha, Pontus agha, Asia agha, Frigia agha, Pamfilia agha, Mesir agha, Kirene peramag Libia agha, Kreta agha, Arab agha, Roma agha Yerusalem yingkiropnang Yahudi nimi wamap. Roma agha Yerusalem yingkirop nimi, nhon wamapne yangkan nimi aghana Roma nimi nhon-nhon Yahudi nimi saog uro taburi, sindi omeklamangneag omeklamap nimi aghari. Tam nubunge Allahri ualne sembe lelamangba, nu mog so'o sirikag-sirikag yingkiropnangdi ka'elamsiap,” alamek.   
\p
\v 12 Sin wene alamek nimi tanekori, “Logti, mane agha sindi nun yubuag lelamang. Amik uro yabilulne welaro uro yabilul?” aro wene alamek.  
\v 13 Aghana sin nenneri lelamekti, “Mag yonge teangdi nenek saelbahilba lelamang,” aro og solamsiekti, pam kwereklamsiek.   
\s1 Petrusti yubu ambatsiogha (2:14-36)  
\p
\v 14 Wene alamsiekti, pam kwereklamsiekpa, Petrus neneko elkabo ko'olombare nang eneko babe sekekpa, Petrusti yubu nubu uro ambarelamsiogti, “A'un Yahudi nimi nangkabo, Yerusalem wamlom nimi nangkabo, nari ambatsinunne nene a'un niri ka'eamsuri seneragsu.  
\v 15 Wene heng ot weneog tingil alba\f + \fr 2:15  \ft Yunani yubuag mome torobana, “Weneog kwelekalba heng supnangeag wamap,” seog.\f* wamap ane sembe, mag yonge teang koma agha lelamang. A'undi lelamlomne nene saog uro nimi tane mag teangba, nenek saelbahilba, lelamang kom.  
\v 16 Sindi lelamangne nenena samenag Allahri ambarelamogpa, Allahri yubu silimu tiplamogne Yoel nenekori mome toro pibogha sunsunum uro lelamang,” seog.   
\p
\v 17 Wene seogti, Petrusti nen tipto lelamogti, “Allahri lebogne Yoeldi mome toro pibogne ane:  
\q2 'Ik komopnag li wamikag Nari Nandamne Yame Walinge nimi mog so'oag maiknoro pelengel anun.  
\q2 A'undi mabo kelmaboag Nari ambatsininge sindi a'un ambatsukang.  
\q2 A'undi mabo Nari, “Uro yabinepne ibukang,” sembaneri, uanea sunsunum uro ibukang.  
\q2 Nong nimi Nari, “Lenda mabukang,” sembaneri, el nembahinenge lenda mabukang.\x - \xo 2:17  \xt Yoel 2:28-32\x*   
\q2
\v 18 Sumeneko li enekoag Na arukna kabuni babe, kelabo babe,  
\q2 Nandamne Yame Walinge sinag maiknoro pelengkahinun.  
\q2 Pelengkahineba Nari ambatsininge sunsunum uro ambarelamsukang.   
\q2
\v 19 Imag 'Undo uro yabilul,' senena kekneba uaneri,  
\q2 so'oag agha babe, 'Im So'o Ngainge yan ual,' aro el nenehinna kekneba pimnun.  
\q2 Amik enengap, auk apna, auk mhong luma kuktopneap wamlul.   
\q2
\v 20 Im So'o Ngainge yale sum eneko elel molel arop sum talul. Aghana, ik nubu sum eneko uro yabin komag, heng inibin sog mondo seleba, wal imag wamlange eneng saog taleba,   
\q2
\v 21 nimi etneri Im So'o Ngainge ponekoag molbale tanena Allahri nimi ane taulbalul,' aro Yoel pere agha ambarog.   
\p
\v 22 Israel nimi nangkabo, a'unag yubu lemnunne nene ka'eamsu: Yesus Nasaretne poneko sembe, 'Yaghe, Allahri el pere agha ual' senenne kekneba nimiri uanep komne, Allah Eldamneri uanepne Yesus pere agha ulamo. Unulamoa a'undi babe ibom. Eldi ulamonge kekneba mikipne a'un haingag agha ulamo. Allahri El pere agha ulamori, Yesus Nasaretne sembe a'unag tibin nembahio.   
\p
\v 23 Allah Eldamneri sembaogne sunsunum uro, 'Tebalea pere agha nimi mog so'oagne taulbahilul,' aro a'undi saeag Yesus tatsiogpa, Allah yubu ingisapsirop nimi saeag nembaom. Nimi saeag nembaomdi, kalag siplobomdi, obom.\x - \xo 2:23  \xt Matius 27:35; Markus 15:24; Lukas 23:33; Yohanes 19:18\x*  
\v 24 Obom aghana 'El teptobag aneko ya'ag ua una sunsunum kom,' sembaogti, Allahri seklerobag nimi teptobag agha kamag nembaog.\x - \xo 2:24  \xt Matius 28:5-6; Markus 16:6; Lukas 24:5\x*  
\v 25 Daud ponekori Yesusag uro yabinepne sembe lelamogti, mome toro pibogne ane,  
\q1 'Im So'o Ngainge sinag kweleknag na whingag ua ulamla.  
\q1 Nari sae sirik sip ua ulamlaba,  
\q1 kemelamnari, na lagmag senep kom.\x - \xo 2:25  \xt Sepna 16:8-11\x*   
\q1
\v 26-27 Im So'o Ngaingeri piamnelba, wana awi uro wamnari, pamag agha El omeklamna.  
\q1 Anenge Arukna Sol Wali Walinge neneko so'oag agha polbalul kom.  
\q1 Nanenge yame nimi teptobag limnululam komne, na el.  
\q1 Ane sembe nong aneag 'Salag lebomne kembanun,' aro tibogto wamnun.   
\q1
\v 28 Andi ina walinge ibatnulumba, kamag wamnundi,  
\q1 na An saramag wamneba, na awi yeng maikno teknebarelamnululam,' aro Daudti siplamog.”   
\p
\v 29 Nen tipto Petrusti ambarelamsiogti, “Nangkabo, nunisag nubunge Daud neneko sembe nari lag phoro ambatsunun. Nunisag tebaogpa, el arameag sikekag aneko wene nuri babe ililamap.  
\v 30 Daud neneko Allahri yubu silimu tiptopne wamogti, ambarelamsiogne wamogpa, Allahri elag sik uro salag lelamogti, 'An anmabo mangarobari mangaroba mangkahyikne nhon an lunumna nimi salehiropne sunsunum urobag pukamlul,' aro ambarogne el wamog.\x - \xo 2:30  \xt Sepna 132:11; 2 Samuel 7:12-13\x*   
\p
\v 31 Wene aro ambarogpa, Daudti amik uro yabinepne sembe el wamogti, lebogne ane, 'Na nong so'oag agha polbaneag, “Nimi teptobag babe wamle,” aro limneheng kom,' seogne nene lunumna Allahri wepleri, alikinag nembalulne neneko Allahri kamag nembanepne sembe eldi lebog.  
\v 32 Yesus neneko Allahri kamag nembaonge nuri haingdi babe ibobo.  
\v 33 Kamag nembaori, Allahri kiliro tobori, Eldi sae sirik sip alikinag nembaori, Allah Eldamne Yame Walinge salag lebogne neneko Elag pibo. Elag piboba, Eldi maiknoro pelengel alba, aoag agha ka'ebalomdi, wene haingdi babe iplom ane.  
\v 34 Ane sembe, Daud poneko imag yingkiog kom aghana, Daudti lebogne ane:  
\q1 “Na Nani Allahri na ua urop mog so'oag nimi salehiropneag yubu lelamogti,\x - \xo 2:34  \xt Sepna 110:1\x*   
\q1
\v 35 'An Nari sae sirik sip pulingkiapmendi, wapmenba,  
\q1 An aisa nemba uagherop nimi ingkisapsinun',” seog.   
\p
\v 36 Nangkabo, ni ambatsinne ka'ebamundi, a'un ekon uro wamseng kom. Yesus a'undi kalag sipto olopsiomne poneko 'Mog so'oag nimi taulbahilul,' aro Allahri webogti, 'Saelbamsululam,' aro paliag pukirogne sembe a'un Israel nimi ni el uro wapmundi, seneraglamlulom,” aro ambatsiog.   
\s1 Nimi maikno maghag pelengkahieka (2:37-42)  
\p
\v 37 Wene aro Petrusti ambatsiogpa, Yahudi nimi tanekori ka'ebaekti, wana ikin tahiogpa, Petrusap elkabo sin Yesusti wepto pogsiognang tanekoabag hailamsiekti, “Nangkabo, nuri hulamukap,” aro haibahiek.   
\p
\v 38 Wene aro haibahiekpa, Petrustina, “'Allahri malia ulamlomne tam orog nembalul,' aro malia ulamlomne lipsululom. Lipsimundi, 'Mog so'oag nimi taulbahilul,' aro Allahri Webogne si Yesus engeropneag seneraglapmunne maghag pelengkipsibeba, Allahri Eldamne Yame Walinge tatsilul.  
\v 39 Allahri, 'Nandamne Yame Walinge tatsinun,' aro samenag salag pibogne nenena a'unap, a'un maboap, nimi weag wamangne babe Nuni Allahri yopsileba, yaukangneap sembe babe salag nene pibog,” aro ambatsiog.   
\p
\v 40 Yubu yogne maikno haingdi ipsiogne sembe ambarelamsiogti, yubu yangaro yopto wana tolamsiogti, “Wene malia ulamang nimi taneko anabiag wamlomba, wail ibongkia yamunba, Allahri sin nusamag agha taulbahilulba, yahut,” aro ambatsiog.  
\v 41 Petrusti yubu ambarelamsiogpa, ka'ebaekne taneko “Maghag pelengkipsululom,” aro yaekne nimi teng-tengne (3000) yaekpa, maghag pelengelamsiek. Pelengkipsiekpa, Yesusag “sikne” aro seneragtop nimiap ma'al talamek.  
\v 42 Ma'al talamekti, Yesusti wepto pogsiognangdi yubu ambarelamsiekpa, sinag kweleknag sol wali uro yubu ka'elamsiekti, seneraglamekti, wana nhonog uro wamekti, Allahag molona lero kwaneng kheptangto tero wamek.   
\s1 Yesusag “sikne” aro seneragtop nimi sin wameka (2:43-47)  
\p
\v 43 Yesusti wepto pogsiognang tanekori, 'Allahri sin pere agha ual' senenne kekneba maikno ulamekti, nimiri uanep komne, Allah Eldamneri uanepne ulamekpa, kemelamsiekti, “Nimiri uanep komne ulamang” aro nimi ni “Yaghe, logtie” alamek.   
\p
\v 44 Nimi ni Yesusag “sikne” aro seneraglamek nimi taneko wana nhonog uro wamekti, “Andinge, naringe,” sen koma ot “Nuringeog,” senelamek.\x - \xo 2:44  \xt Pogsiognang 4:32-35\x*  
\v 45 Sae agha sikininge uropne tanekori kamna kapto tolamekti, tolameka taneko teko wamsiogha sunsunum uro tarelamsiek.  
\v 46 Sinag kweleknag ma'aptangto sol wali, wali uro Allah yubu sembe Allahri Ae aramag poloro winildal wa'alamekti, sikininge “Ae a'ero kwaneng khepto tukap,” aro nhon aeag tea, nhon aeag tea wana wali uro yeng uro wamekti,  
\v 47 Allah omeklamek. “Sin wana wali ulamang,” aro nimi niri yeng awi uro tilamsiek. Nuni Allahri, “Malia ulamangne sembe opsineag aro taulbahinun,” aro seneraghogti, nimi maikno tanekoag wana heklamsiogpa, “Yesus otsik uro lebo,” aro seneraglamek. Sik seneraglamekpa, sinag kweleknag Yesusag “sikne” aro seneragtop nimiap ma'al tan anag, ma'al talamekpa, maikno talamsiog.   
\c 3  
\s1 Petrusti nimi yan malinge whebaogha (3:1-10)  
\b  
\p
\v 1 Ik nhon sum heng sin tanep peram\f + \fr 3:1  \ft Yunani yubuag tobognena, “Heng wilindiag wa'albarek,” aro mome tobog.\f* Yahudi nimiri sop-sop Allahag mololamek heng enekoag Allahri Ae aramag “Molona yubu lemnunam,” aro Petrusap Yohanesap palamdek.  
\v 2 Palamdekpa nimi nhon yan malia mangkaekpa, elkabori sop-sop keyapto pil pang yang pang ulamek saog uro sumene babe pil piek. Nimi yan malinge neneko, “'Allahri Ae aramag yubu lebukap,' aro wa'alamik nimiri saeag wamlea molbahilul,” aro leka Allahri Ae aramag kanero toropne ina siramag ina siram si “Ina siram Walinge” aro engeropne nenekoag elkabori pil palamek.  
\v 3-4 Petrusap Yohanesap, “Allahri Ae aramag wa'inunam,” aro yalamdeka yan malinge ponekori ipsiogti, “Kal ma'al nhon tatnururom,” aro molbahiog. Molbahiogpa, kembarekti, Petrusti, “Nangkae, nunag kembahi,” seog.  
\v 5 “Nunag kembahi,” seogpa nimi yan malinge ponekori, “Nanag olog tatnurukanga wamla,” aro kembamsiog.  
\v 6 Kembamsiogpa Petrustina, “Kal ma'al an tatkenne orog wamla. Ot an tatkununne wamlangena, Allahri 'Nia Mangkina Saelbamsululam,' aro webogne\f + \fr 3:6  \ft Yunani yubuag Allahri “Saelbamsululam” aro webogne neneko “Kristus” aro lerop.\f* si Yesus Nasaretne engeropne ponekori wali nembaghelul. Wene anag ambarelangkennena, 'Sekmendi palame',” seog.   
\p
\v 7 Wene seogti, Petrusti el neneko sae sirikneag agha toro sekirog. Toro sekirog abeneko pere el neneko yan nginikom agha pinep saog wamogpa, yan no'op mikip taog.  
\v 8 Mikip taogpa, lopnagha sekelingkiogti, yang pang ulamogti, sin phendeap Allahri Ae aramag wa'alamekti, awi yengdi sunukto Allah omeklamog.  
\v 9 El yan wali taogti, palamogti Allah omek-omek palamogpa, nimi ni tanekori el ibek.  
\v 10 Ibekti, “El yan maliri Allahri Ae aramag 'Ina Siram Walinge' peramag ua ulamlari, nimiag kal ma'al mololamsilba, ia ulamap nimi eneko,” aro kemelamekti, “Welaro yan wali tal,” aro, “Yaghe” senena wanaag lolbahiog.   
\s1 Nimi yan malinge poneko wali taogha sembe Petrusti yubu ambatsiogha (3:11-16)  
\p
\v 11 Nimi yan malinge agha wali taogne ponekori Petrusap Yohanesap salelamsiogti, nhon palameka ipsiekti, nimi maikno tanekori, “Yaghe logtie” alamekti, Allahri Ae aramag “Salomo” engerobag sip imag agha solorobag aneko Petrusap Yohanesap wa'iekag aneko el babe wa'iogpa, “Yaghe logti mane agha ual,” aro teknel wa'alamek.  
\v 12 Teknel wa'alamekpa, Petrusti nimi maikno tanekoag yubu lelamogti, “Nangkabo a'un Israel nimi, sa'a sembe 'Mane agha uro yabil' aro log senelamlom? Sa'a sembe nunag kemelamsilom? A'undi senelamlomnena, 'Sin Allah yubu sunsunum uro sol wali uro walia aghabog urop nimiri, nimi ane wali nembarang,' senelamlom aghana, Allah Eldamneri seneragnari agha nimi ane wali nembal. A'undi sembamlomne, nimi yabalamlange sembe, 'Sindinge mikip monge, wamlaba,' sembamlom te?  
\v 13 Nunisag yabo Abraham, Ishak, Yakub Sikini Allah sindi omeklamekne ponekori Elme\f + \fr 3:13  \ft Yunani yubuag tobognena, “Yesus Allah Arukna nunisag yabori paliag nembaek,” aro mome tobog. Aghana nun yubuagna, Yesus sembe “Allah arukna” senepne babe sunsunum kom.\f* Yesus neneko Eldi paliag nembaog. Aghana El neneko Pilatus tarel piomba, eldi 'Sae lobitnun,' seo aghana Pilatus whaingag a'undi, 'Sae lobitlulam kom. Nu karong,' seom.\x - \xo 3:13  \xt Keluaran - Lambaeka 3:15\x*  
\v 14 Allahri wepto aogne walinge sik uro lero uropne poneko sembe Pilatusti, 'Sae lopnun,' aro ulamo aghana 'Karong,' alamomdi, nimi ohiropne poneko sembe 'Sae lobatsululam,' seom.\x - \xo 3:14  \xt Matius 27:15-23; Markus 15:6-14; Lukas 23:13-23; Yohanes 19:12-15\x*  
\v 15 Ya'ag kamag uro unne tam saleropne poneko a'undi olobomba, Allahri nimi teptopne nusamag agha El neneko kamag nembao. Undo unuaonge nuri ibobonge ambarelamsiap.  
\v 16 Nimi a'undi ililamlomne nene 'Mikipne si Yesus engeropneri wali nembahinep,' aro seneraglaba, nimi ane yan wali nembal. 'El sik uro mikipne' aro seneraglange neneri nimi ane a'un whingag agha wali tal,” seog.   
\s1 Allahri, “Nimi taulbahilul,” aro webogne Yesus sembe Petrusti ambatsiogha (3:17-26)  
\p
\v 17 Petrusti wene aro ambarelamsiogti, “Nangkabo, a'un saelbamsiang nangap, a'undi ulamlomneap, Allahri samenag, 'Undo uro yabilul,' aro seneraghogne sembe a'un ekondi, Yesus olobomne nene na el.  
\v 18 A'un ekon aghana ulamomne pere agha Allahri samenag el wamogti, 'Undo yabilul,' aro ambatsiogne sunsunum nembaog. Allahri 'Wepneri, Poghol anun,' seogne neneko 'Seklebalul,' aro Allahri samen Eldi yubu silimu tiplamek nang ni pere agha ambatsiogpa, 'Mome toro pibekne sunsunum tale' aro Allahri wanaag agha wene sembaogti, uaog.  
\v 19 Ane sembe 'Allahri malia ulamlomne kom nembalul,' aro malia ulamlomne lipsimundi, Allah yubu ka'ero wanaag piapmunba, a'undi malia uroba lupsilulba, wali uro seneraglamsu.  
\v 20 Wali uro seneragmunba, Nuni Allahri amik wana keakman nembahileri, Yesus samenag 'Taulbahimendi, saelbamsululam,' aro wero pibogne neneko a'unag nen poglul.\x - \xo 3:20  \xt Pogsiognang 1:10-11\x*  
\v 21 El neneko imag wamle pog Allahri nen poglul. Samenag Allahri Eldamneri yubu silimu tiptopnang sol walingeag ambatsiogpa, mome toro pibekne sunsunum uro, 'Nia mangkina Allahri wendog nembalul,' aro mome toro pibek. Allahri, 'Wene nia mangkina wendog nembanun,' sembale tanena Yesus samenag wero pibogne neneko nen poglul.  
\v 22 Samenag Musari ambarelamsiogti, 'Nuni Allahri a'un Israel nimi nusamag agha Allahri yubu silimu tiplamlulne na saog uro nhon sekitlul. Eldi ni yubu lelamlea a'undi wali uro ka'eamlulom.\x - \xo 3:22  \xt Ulangan - Sariktoba 18:15,18-19\x*  
\v 23 Uro yabilulnena, nimi etneri Allahri yubu silimu tiptopne ponekori yubu lelamlea ka'eamle kom tanena, kom nembahinep,' aro ambatsiog.  
\v 24 Samenag Allahri yubu silimu tiplamek nang Samuelag agha, eldi lero amik wamek nangag agha, ni nangdi uro yabinepne sembe lebek. Yabinepne sembe lebekne anena, wene og Yesusag uro yabionge sembe lebek.  
\v 25 Samenag Allahri Eldamneri yubu silimu tiplamek nangag yubu salag nikne lero ambarelamsiogne a'un sembe. Samen a'unisangag agha salag pibogne Allahri Abrahamag pibognena: 'Andi mangarobari mangkahyikne pere agha Nari nimi sisa ni tala-tala wamikne walingena tatsinun,' seog.\x - \xo 3:25  \xt Sumbaogha 22:18\x* Salag nene a'un sembe lebog.  
\v 26 Ane sembe Elme\f + \fr 3:26  \ft Yunani yubuag “Allahri arukna” aro mome tobog.\f* nhon sekirogti, nu Yahudinangag poghogpa, nunag samenag yaognena 'Walia ulamsinun,' aro yaog. Eldi wali uahinepnena, samenag yoaba ulamlomne lipsululom aro mikip nembahinep,” aro Petrusti ambatsiog.   
\c 4  
\s1 Yahudi nimi sembe tam kareptopnangdi Petrusap Yohanesap kop aeag tobongkipsieka (4:1-12)  
\b  
\p
\v 1 Petrusap Yohanesapti nimi maikno yubu ambarelamsirekpa, Yahudi nimiri sae agha memnang saeag neneropba, Allah sembe pairopnangap\f + \fr 4:1  \ft Memnang Allah sembe pairopnang Allahri aeag Allah yeplamek. Nimiri “Allah sembe tarel anun,” aro wali-waliaba payalamsiekpa, memnang Allah sembe pairopnangdi Allah sembe aukag talamek. Yahudi nimi pham-domba, pham-sapi, pham-kambing, mem winang, tena babe Allah sembe aukag taro tarelamsiek.\f*, Allahri Ae yae ua uropnang yin saleropnang sikindoap, Saduki nimiap\f + \fr 4:1  \ft Saduki nang enena nimi sisa kom. Sindi seneragtopne nimi teptopne kamag tanep kom aro seneragtop nimi.\f* sin phendeag yaek.  
\v 2 Yaekti ka'elamsiekpa, Petrusap Yohanesapti, “Nimi etneri, Yesusag 'sikne,' senelamleri, tebale tanena Yesus kamag tao saog uro kamag tanep,” aro nimi maikno ambarelamsirek. Ambarelamsirekpa, ka'ebaekti memnang Allah sembe pairopnangap, Allahri Ae yae ua uropnang yin saleropnang sikindoap, Saduki nimi tanekoap yo sembaek.  
\v 3 Yo sembaekti, “Sin phende abeneko tam kareptopnang whingag pabhukap,” sembaek aghana, imbaogpa, “Ambhum samoro yaberi, tam kareptopnang whingag pabhukap,” aro sae kaupto kop aeag tobongkipsiek.  
\v 4 Tobongkipsiek aghana, Yesus sembe ambarelamsirekne nimi maikno tanekori ka'elamek. Ka'elamekti seneraglamekti, “Sin phenderi ambarelamsirangne sembe sik uro ambarelamsirang,” aro seneraglamek. “Sik uro ambarelamsirang,” aro seneragtop nimi taneko wamekne, kabuni aghabog a'iliro agha teng-tengne (5.000) wamek.   
\p
\v 5-6 Mabeka kwelekaogne memnang Yahudi nimi saelba uahiropnangap, Yahudi nong nimi nubunangap, Musari samenag mome tobogne ambatsiropnangap, memne Allah sembe pairopnang sikini nubunge\f + \fr 4:5-6  \ft Memnang Allah sembe pairopnang babe Allahri samenag Musaag yubu ambarelamogne sembe ambarelamsiek. Memnang Allah sembe pairopnang sikini nubunge nimi nhonog wamog, apna memnang Allah sembe pairopnang sikindo yabo el umag wamek. Sikin umag wamekne, memnang Allah sembe pairopnang babe wamek.\f* Hanasap, eldi nimi sisa nhonne, Kayafas, Yohanes, Aleksander, ora nimiap, “Petrusap Yohanesap sembe tam karebaukap,” aro as Yerusalem winiptaek.  
\v 7 Winiptaekti Petrusap Yohanesap abeneko enero poa yahiekpa, nimi poloro winiptangkamek nang tanekori sinag hailamsiekti, “Nimi etne mikibag agha? Nimi etne siag agha ulamdomdi, nimi wali nenelamsirom?” aro haibahiek.   
\p
\v 8 Wene aro haibahiekpa, Allah Eldamne Yame Walingeri Petrus wana salero el nongag wa'alamogti, mikipne piamogpa, haibahiekne sembe Petrus sekogti ambarelamsiogti, “Nani yabo nimi nubunangap, nani yabo nimi saelbamsilom nangap, wene na yubu lemnunne ka'eamlulom!  
\v 9 Sumene nimi yan malinge nhon yepnamne nene wali uanam aghana, 'Ambatsisereng,' aro hailamsilomdi, 'Nimi etne mikibag nimi nene yan wali nembarom?' aro nunag hailamsilom,” seog.   
\p
\v 10 Wene seogti, “A'un Israel nimiap, a'un nimi ni wamlom nimi tane el tahile. Allahri 'Mog so'oag nimi taulbahilulam,' aro webogne Nasaretne poneko si Yesus engeropneag moloro ul tongolamnam. Yesus neneko a'undi kalag sipto olobom aghana, Allahri nimi teptobag agha nen kamag nembao. Kamag nembaonge ponekoag molbanamba, nimi nene wali nembalba, yan wali talne a'un whingag sekamlari wamla,” seog.   
\p
\v 11-12 Nen ambarelamsiogti, “Samenag Yesus anam mangkaek komag Allahri yubuag Yesus sembe mome tobogne ane:  
\q1 'A'un ae sorop nimiri, “Yangan kirik nubunge nene mali,” aro toboghailum,  
\q1 aghana yangan kirik katne nhonog sunuropne tao,' aro mome tobog.  
\m Israel nimi nubunang, ae sorop nimiri yangan kirik katne samenag toboghaiek saog uro Yesus wa'epto toboghaom aghana Yesus neneko Allahri, 'El mori nimi mog so'oag nimi taulbahinep,' aro Yesus yangan kirik katne saog uro wepto sekirog.\x - \xo 4:11-12  \xt Sepna 118:22\x* Nimi mog so'oag nimi malia uroba sembe 'Allahri opsileag,' aro Yesusti taulbahinep. Im tamag mog so'o sirikag-sirikag nimi taulbahinepne ot nhonog si Yesus engeropne wamla. Elag mololamnaba, Eldi nu taulbahinep. Elap sunsunumne nhon wamla kom,” seog.   
\s1 Petrusap Yohanesap sembe welaro uaukap aro yubu lebeka (4:13-22)  
\p
\v 13 Wene seogpa, nimi yubu tam kareptopnang poloro winiptaek nimi tanekori Petrusap Yohanesap sembe, “Sin mome lerop kom nimi apna, kembiag agha el urop kom nimi sao wamdang. Nubunang ambarelamsirang aghana sin log kom uro lero ulamdang,” sembaekti, “Yaghe, mane agha ulamdang,” alamek. “Yesusap nhon yabalamdongne sin phende,” aro el wamsiog.  
\v 14 Nimi yan wali taogne neneko sin Petrusap Yohanesap peramag sekamogpa, ibekti, “Nuri sinag sa'a sukap kom,” aro yubu koma wamek.   
\p
\v 15 Wameka, “A'un asag lambalulom,” aro wene seekpa, lambaekpa Yahudi nimi sembe yubu tam kareptopnang Mahkamah Agama nimi mo yubu lelamekti,  
\v 16 “Nimi phende abeneri Allah Eldamneri uanepne nimiri uanep komne uarongba, Yerusalem nimi ni el taongba, nuri, 'Sindi lelamdangne orolenange lelamdang,' aro orolenange nuri lemnep kom saog wamla. Ane sembe, nimi abeneag nuri sa'ange agha ambatsukap?  
\v 17 Sindi alnibarongne nene nimi maiknori ka'ebaikpa, nubu taleag, nimi abeneag walamsiberi, '”Allahri nia mangkina si Yesus poneko saeag nembao,” aro ambatsiseng kom,' aro yubu mikip uro wembahukap,” seek.   
\p
\v 18 Wene seekti, sin abenekoag “Wa'al alulom,” aro yopsiekti, “Yesus sembe ambarelamsiromne sik komne ambarelamsirom. Nimiag yubu lelamtumundi, 'Allahri nia mangkina si Yesus poneko saeag nembao,' aro ambatsiseng kom,” aro wembahiek. \fig Yubu tam kareptopnang Mahkamah Agama nimiri Petrusap Yohanesap “Ambatsiseng kom,” aro wembahiek.|alt="Anggota Mahkamah Agama menyuruh Yohanes dan Petrus jangan bicara lagi." src="CN01901C.TIF" size="col" copy="David C. Cook" ref="Pogsiognang 4:18" \fig*   
\p
\v 19 Wembahiek aghana Petrusap Yohanesapti, “A'undam nimiri wanaag agha senaragsu. Nelagha Allah whingag wali: A'un yubu mombolag wamukap to, Allah yubu mombolag wamukap to? Allah whingag uaukap sembalomne nelagha wali sembamlom?  
\v 20 Allahri uaonge sembe nimiag ambatsibe tanena Allah whingag wali. Ane sembe aoag agha ka'ebabori, haingdi babe ibobonge nene sembe nimi ambatsin koma wamnep kom,” serek.   
\p
\v 21 Wene serekpa, tam kareptopnang taneko yubu lenne orog. Yubu mikip uro sin phende abeneko wembahiekti, “Pururom,” aro yag lambahiek. Nimi wali nembarekne neneko ibekti, nimi maiknori Allah omeklamek. Tam kareptopnangdi Allah omeklameka ipsiekti, sindi, “Sin phendeag huaukap,” alamek. Allah omeklameka ipsiekti, tam kareptopnangdi “Logti tam lolohinne orogti,” lipsiek.  
\v 22 Lipsieknena, nimi yan malinge wali nembarek nimi eneko mangkaekne heng kun yag tangom kom tangom alamogha teng nhon eptopne naualbare (40) taogpa, Allah Eldamneri uanepne saog uro wali nembarekpa, tam kareptopnangdi “Uaukap” sembaekne, “Tam lolohinne orogti,” lipsiek.   
\s1 Yesusag “Sikne” aro seneragtop nimiri Allahag molona molbaeka (4:23-31)  
\p
\v 23 Petrusap Yohanesap “Pururom,” aro sae lipsiekpa, sikinkaboag pirekti, memnang Allah sembe pairopnang sikindo yaboap, Yahudi nimi sikini yaboapti lebekne “Nunag undo-undo wene seangdi, wembahiang,” aro sikinkaboag ambatsirek.  
\v 24 Ambatsirekpa sikinkabori ka'ebaekti, sin ma'aptangto Allah omekto mololamekti, “Nuni Allah nia mangkina saelbamlamne, Andi imap, so'oap, magap nia mangkina ni Andi sumbalum.\x - \xo 4:24  \xt Keluaran - Lambaeka 20:11; Nehemia 9:6; Sepna 146:6\x*  
\v 25 Andi Andamne Yame Walinge neneko Andi arukna nuni Daud pere agha elag piplumne ambatsiogne ane,  
\q1 'Yahudi sisa kom nimi Allah omektop kom nimi tala-tala wamangneri sa'ambe yanghang alamsiang?  
\q1 Sa'a sembe as tala-tala wamangneri, “Undo-undo uaukap,” senelamangdi lelamang aghana, uro yabilul kom?\x - \xo 4:25  \xt Sepna 2:1-2\x*   
\q1
\v 26 Nuni Allahri “Taulbahimendi, saelbamsululam,” aro wepto aogne ot nhon.  
\q1 Allahri wepto aog aghana mog so'oag yubu sia leropnang tanekoap, sikin tamag salehiropnangapti, “Karong,” aro poloro winilamang.  
\q1 Poloro winilamangdi, Nuni Allahap, Eldamneri wepto aogneap “Mal tabaukap,” aro yin singilamsiangdi, wamang,'  
\p aro Daudti samenag ambatsiog.   
\p
\v 27 Samenag ambatsiogne sunsunum uro sik uro yabiog. Anme\f + \fr 4:27  \ft Yunani yubuag “arukna” aro mome tobog.\f* sol walinge Andi “Taulbahilulam” aro wepto alumne Yesus neneko 'Obukap,' aro Herodesap, Pontius Pilatusap, Yahudi sisa kom nimiri Allah omektop komnangap, Israel nimiap, as eneag poloro winiptaong.\x - \xo 4:27  \xt Matius 27:1-2; Markus 15:1; Lukas 23:1,7-11; Yohanes 18:28-29\x*  
\v 28 Sin winiptaong nimi tanekori 'Uaukap,' sembaongdi, ulamongne, An Sae Mikipne nenekori samenag agha 'Wali undo uaukang,' sembalumne saog uro ulamong.  
\v 29 Wene Nuni Allah, Yahudi nimi tam kareptopnang taneri nu Yesusag 'Sikne' aro seneragtop nimi sembe 'A'un opsukap' alamang. 'Opsukap,' alamangdi, walamsiangba nu Andi kembahi. Nuri 'Anenge yubu log kom uro ambarelamsukap,' aro An arukna wamapne tane mikip nembahi.  
\v 30 Anme \f + \fr 4:30  \ft Yunani yubuag “arukna” aro mome tobog\f* sol walinge si Yesus nenekoag mololamebeba, 'Yesus Allah Elmeag mololamangba, Allahri sin pere agha ual,' senenne kekneba nunag piplulam. An sae pelengkamendi yepsimenba, nimi niktopne wali nenelamseberi, nimiri uanep komne, Allah Eldamneri uanepne yogne ulamukap,” seek.   
\p
\v 31 Wene aro Allahag omekto mololamekpa, sin poloro wamekag aneko sa'uma saog uro Allah Eldamne Yame Walingeri sindi wana salero nongag wa'isiogti, mikipne pipsiog. Mikipne pipsiogpa, Allah yubu log kom uro ambarelamsiek.   
\s1 “Andinge naringe,” sen koma, “Nuringe aghabog,” senelameka (4:32-37)  
\p
\v 32 Yesusag “sikne” aro seneraglamek nimi taneko wana ot nhonog uro sin ma'aptangto wamek. Ma'aptangto wamekti, nimi nhondinge saeag agha ua ulamogha, “Andinge naringe” sen koma, “Nuringe aghabog” senelamek.\x - \xo 4:32  \xt Pogsiognang 2:44-45\x*  
\v 33 Allahri, “Nimiag lag pho'oro ambatsululom,” aro mikip nenelamsiogpa, Yesusti wepto pogsiognangdi, “Nu salehiropne, Nuro Yesus Allahri kamag nembaonge ibobo,” aro sol wali uro ambarelamsiek. Sin ni tanekori, “Allahri to'opto o'ona sembamsil,” senelamekti, o'ona senel talamek.  
\v 34-35 Senel talamekti, sin ni taneko nhon babe sae agha elenge orog uro wamek kom. Yesusag “Sikne” aro seneragtop nimi taneko anabiag awe ae ngai nimi wamek. Sikinenge awe ae ngai nimi tanekori nimi yogneag awe ae tarelamsiekti, kal ma'al tolamek. Kal ma'al tolamekne Yesusti wepto pogsiognangdi saeag aghabog nenelamsiek. Yesusti wepto pogsiognangdi saeag aghabog nenelamsiekpa, sindi nimi tipto kwema ua ulamsiogha uro tarelamsiek.  
\v 36 Nimi nhon si Yusup, Yesusti wepto pogsiognangdi Barnabas engkaekne, “Wana aingnihinne,” aro engkaek. Elna sisa Lewinge mog so'o Siprusne wamog.  
\v 37 El nenekori so'o eldamneringe nimiag kamna tobogti, so'o kamna kal ma'al tareka aneko Yesusti wepto pogsiognangdi saeag nenel aog.   
\c 5  
\s1 Ananias elkel Safiraapti malia uarekne sembe Allahri opsiogha (5:1-11)  
\p
\v 1 Nimi kabuni nhon si Ananias, elkel Safiraap wamdek. Wamdekti so'o sindinge nhon nimiag tatsirek. So'o tatsirekne sembe kamna tatsiekpa, kal ma'al toptek.  
\v 2 Toptekti kal ma'al so'o kamna tatsiekne taneko sembe Ananias elkel Safiraag ambarelamogti, “Kal ma'al ane luluro piro anun,” aro ambarog. “Luluro piro anun,” aro ambarogpa, elkel sae saekag agha Ananiasti nenne luluro pil tolamogti, nenne pogto, “Yesusti wepto pogsiognangdi saeag nenel anun,” aro pil piog.  
\v 3 Pil piogpa, Petrus nenekori Ananiasag, “Ananias, phiari wana sao kauplangkelba, Allah Eldamne Yame Walinge whingag orolena sa'ambe ualam? Orolena lelamlamdi, so'o sembe tatkeangne pogto sa'a sembe tognoro pairo alam?  
\v 4 So'o anena anenge, anam kamna kapto tomna komagna. Kal ma'al babe anenge kamna kaplamdi, toplamag babe. Tam ane anba andi saeag wamla. Aghana sa'ambe an wanaag orolenange seneraglam? Nimiag orolenange ua alam kom, anena Allahag ua alam,” seog.   
\p
\v 5 Wene alamogpa, Ananias ka'elamogti abeneko pere, so'oag malingkina Ananias tebaog. Tebaogne sembe nimi ni ka'ebaekti, log maikno senelamek.  
\v 6 Tebaogpa kabuni mabo etbarero yingkina nimi teptoba aneko kaupto poa lambaekti, so'oag sikil piek.  
\v 7 Sikil pina yalamek abeneko Ananias elkel ela'ange tebaogne ekon uro yaogti, wa'al aog.  
\v 8 Wa'al aogpa, Petrusti elag hailamogti, “So'o aneko sembe kamna kapto toptoma ana'angeri kal ma'al payalnena abene te? Andi babe ambatne,” seog. Seogpa kelenekori, “Otsik uro ni so'o kamna kal ma'al tatsiongne payal abene,” seog.   
\p
\v 9 Wene seogpa, Petrusti, “A'un phende sa'a sembe 'Nuni Allah Yame Walingeag orolenange ambatnemeri, mipnunam,' aro yubu nikne leptom? Nimi ana'ange sikil piang nang taneko ina siramag yaangdi, an keyapto 'Poa lambaukap,' aro wamangba kembahi,” seog.   
\p
\v 10 Wene alamog abeneko Petrus whingag malingkina tebaog. Nimi kabuni taneko aeag wa'iekti, keleneko teptoba kembaekti, keyapto poa lambaekti, ela'ange sikeka peramag aneko elkel babe sikek.  
\v 11 Undo unu aogne sembe nimi Yesus yubu ka'ero winiptangtop nimi ni log maikno senelamek. Tebarekne sembe ka'ebaek nimi yogne babe ni log maikno senelamek.   
\s1 Yesusti wepto pogsiognangdi ulameka (5:12-16)  
\p
\v 12 Yesusti wepto pogsiognang tanekori Allah Eldamneri uanepne nimiri uanep komne ulamekti, “Yaghe, Allahri sin pere agha ual” senenne kekneba maikno nimi maikno whingag ulamek. Undo unulamekpa, nimi Yesusag “Sikne” aro seneraglamekne taneko sin ma'aptangto wamekti, Allahri Ae aramag “Salomo” engerobag sip imag agha solorobag aneko haibil talamek.  
\v 13 Haibil talamekpa, nimi orange maiknori Yesusag “sikne” aro seneraglamek nimi sembe, “Wali,” aro maiplamsiek. “Wali,” aro maiplamsiek aghana, log uro seneraglamekne sembe, maiplamsiek nimi taneko agha, nhon babe Allahri Ae aramag ma'al tan anag yalamek kom.  
\v 14 Log uro seneraglamekti, yalamek kom aghana, kaubuniap kelaboap Yesus sembe el talamekti, Yesusag “Sikne” aro seneraglamekti, Elag “Saelbamsululam,” alamek. “Saelbamsululam,” alamekti, samen Yesusag “sikne” aro seneraglamek nimiap ma'al talamekpa, maikno talamek.   
\p
\v 15 Yesusti wepto pogsiognangdi nimi maikno wali nenelamsiekne taneko sembe nimi tanekori nimi niklamekne Petrus ina palamoghag nimi niktopne ae usa yangal pina pia ulamsiek. “Petrus yabalogleri eldi yameri olog po'obahileba, wali taukang,” aro manal pina ulamsiek.  
\v 16 Manal pina ulamsiekpa, as Yerusalem kanero wamek nimiri niklamekneap, phiari loba nenelamsiog nimiap enero payalamsiekpa, sin ni Yesusti wepto pogsiognangdi whelamsiekpa, wali talamek.   
\s1 Yesusti wepto pogsiognang sae kaupto saelbahieka (5:17-25)  
\p
\v 17 Kemelamsiekpa Yesusti wepto pogsiognangdi “Yaghe” senenne maikno ulameka sembe memne Allah sembe pairopnang sikini nubungeap, el neleptop nang Saduki nangap, “Nubunang talamang,” aro sin wana yo senelamek.  
\v 18 Sin yo senelamekti, Yesusti wepto pogsiog nimi taneko salero kop aeag tobongkahiek.  
\v 19-20 Aghana inipnag Nuni Allahri Eldamneri arukna malaikat poghogpa, kulukul aogti, kop ae ina siram taneko kupto lanalamsiogti, “Pimundi, Allahri Ae aramag sekapmundi, Allah yubu nimi maiknoag ambarelamsimundi, 'Yesusag “sikne,” aro seneragtop nimi tebale tanena kamag tanep,' aro ambarelamsululom,” aro ambatsiog.\x - \xo 5:19-20  \xt Pogsiognang 4:1-3\x*   
\p
\v 21 Sin wene aro ambatsiog yubu eneko ka'ebaekti, lukunap Allahri Ae aramag wa'iekti, Yesus sembe yubu ambarelamsiek. Ambarelamsiekti wamekpa, memne Allah sembe pairopnang sikini nubungeap, el neleptop nangapti Yahudi nimi sembe yubu tam kareptopnang Mahkamah Agama nong nimi nubunang poloro wimbahiek. Poloro wimbahieknang tanekona ni Israel nang sikini yabo poloro wimbahiek. Wimbahiekti, “Yesusti wepto pogsiognang abeneko kop aeag tol phululom,” aro arukahiek.   
\p
\v 22 Wene aro arukahiekpa, Allahri Ae yae ua urop nang “Nimi tol phukap,” aro piek aghana, nimi tanekori kop aeag aneko kemelamsiekag agha sin orog wamek. Orog wamekpa, kembahiekti nen samoro Yahudi nimi sembe yubu tam kareptop nangag ambarel phiek.  
\v 23 Ambarelamsiekti, “Nu piapti, kop aeag pina kemelamabag agha ina serekna wali maupto serektop, nimi babe kop ae yae ua unnang ina siramag yae wamang. Wamangba ina serekna kubiagha wa'alamabag agha nimi nhon babe ae lomag una wamang kom,” seek.   
\p
\v 24 Wene aro ambatsieka ka'ebaekti, Allahri Ae yae ua urop nang yin saleropnang sikindoap, memnang Allah sembe pairopnang sikindo yaboap wana sao kaupsiogpa, amik tanepne sembe log senelamek.  
\v 25 Amik tanepne sembe senelamekti wamekpa, nimi yubu poa yaogti ambarelamsiogti, “Nani yabo, Nimi a'undi kop aeag tobongkipsiom nimi abeneko wene Allahri Ae aramag nimi yubu ambarelamsiang,” aro ambatsiog.   
\s1 Yesusti wepto pogsiog nimi Yahudi nimi sembe yubu tam kareptopnangag poa phieka (5:26-33)  
\p
\v 26 Wene aro yubu poa piogne neneko ka'ebaekti, Allahri Ae yae ua uropnang sikindoap, el sembe yae ua urop nang yin saleropnangap piekti, Yesusti wepto pogsiognang abeneko Allahri Aeag aneko oro kom-kom wali uro tol phiek. Oro kom-kom wali uro tol phieknena, “Yesusti wepto pogsiognang olamsibe tanena, nimi wamang nimi taneri kirikti nu opsiikag,” aro log sembaekti, wali uro tol phiek.  
\v 27 Tol phiekti, Yahudi nimi sembe yubu tam kareptop nang Mahkamah Agama wimbahiekag poa wa'isiek. Wa'isiekpa memne Allah sembe pairopnang sikini nubunge ponekori tam sinag palilamsiogti, wenelamsiogti,  
\v 28 “'Yesus siag nimi yubu ambatsiseng kom,' aro mikip uro a'unag ambatsibo. Aghana wenena sa'a agha ulamlom? Wene, 'A'undi ambatsiseng kom,' sebo aghana Yesus poneko sembe ambarelamsilomdi, yubu eneko nubu nenero Yerusalem sabo tao. Wene a'un Yesusti wepto pogsiog nangdi nu Yahudi nimi nubunang sembe lelamlomne, 'A'undi ulamomba, Yesus eneko tebao,' alamlom,” seog.\x - \xo 5:28  \xt Matius 27:25\x*   
\p
\v 29 Wene seogpa, Petrusap elkabo Yesusti wepto pogsiognangapti, “Allahri leropne agha sik sembanepti sarenelebel pinep. A'un Yahudi nimi nubunangdi leplomne nuri sarenelebanep kom.  
\v 30 Yesus a'undi kalag siplobomdi, ya'ag olobomba, tebaonge neneko Allah nunisangdi omeklamekne ponekori nimi teptopne urobag agha kamag nembao.  
\v 31 El neneko Allahri “Israel nimiri malia ulamangne lipsiikpa, tam orog nembanun,” aro Yesus paliag nembao. “Nandamne sae sirik sip nimi nubunge sunsunum urobag wamlulam,” aro paliag nembao. Allahri Yesus paliag nembaoba, Allah sae sirik sip wamla. Allahri, “Israel nimi salehiropne talulam,” aro Yesus toro sekiro. Toro sekiroba, 'Israel nimiri malia uroba sembe Allahri opsileag,' aro Yesus taulbahiropne tao.  
\v 32 Allahri uaonge sembe el tabori, nuri nimi ambarelamsiap. Allah Eldamne Yame Walinge neneko El yubu ka'ero ua urop nimiag tarelamsilne nenekori babe nimi ambarelamsil,” seek.   
\p
\v 33 Wene aro Petrus elkaboapti ambarelamsieka ka'ebaekti, sin wanaag aluklamsiogpa, “Yesusti wepsiog nimi taneko opsukap,” aro ulamek.   
\s1 Gamalieldi wembahiogha (5:34-42)  
\p
\v 34 Wanaag agha “Opsukap,” senelamekpa, Farisinge\f + \fr 5:34  \ft Farisi nang enena nimi sisa kom. Sindi seneragtopne nimi teptopne kamag tanep aro seneragtop nimi.\f* nhon si Gamaliel wamog. Gamaliel poneko Musari samenag mome tobogne sembe ambarelamsiog. Musari samenag mome tobognena, Allahri “Undo-undo tam kareplamlulom,” aro Musa ambatsiogpa, Gamaliel el wamogti, ambarelamsiog. Wamogti ambarelamsiogpa, nimi ni tanekori maiplamek. El neneko Yahudi nimi sembe yubu tam kareptopnang Mahkamah Agama anabiag wamogha sekogti, “Yesusti wepto pogsiognang poa lambahilulom,” seog.   
\p
\v 35 Wene seogti, Gamalieldi, “Sae lobitsukap,” aro Yahudi nimi sembe yubu tam kareptop nimi wameka tanekoag ambarelamsiogti, “Israel nimi nangkabo, 'Nimi tane obsukap,' sembaloma wali uro tam o'obiagha ualulom.  
\v 36 Nimi phende samenag wamdekne sembe seneragsumundi, el talulom. Nimi nhon Teudas neneko, 'Na nubunge paliag wamna,' aro sekogne seneragsu. 'Na paliagne wamna,' alamogpa, nimi elag sare neleptopne teng-tengne (400) tanekori el yubu ka'elamek. El neneko nimiri obekpa, Teudas yubu ka'elamek nimi taneko tala-tala taekti, unulamekne neneko lipsiek.  
\v 37 Teudas neneko obekpa, tebaogpa, wamek. Wamekpa, nimi si tolamsiek liag Yudas Galileange poneko babe walel ingkiog. Yudas wamog liag babe nimi maikno elag sare neleptop nimi wamekne elag sip taekti, “Roma nimi mombolag wamukap komdi, sae lipsukang,” aro yin salelamek. Yin salelamek aghana, nimiri Yudas ya'ag ologhekpa, elag neleptop nimi taneko oro nelepto tala-tala nembahiek.  
\v 38-39 Ane sembe nari a'unag lelamnange, nimi taneag sa'a-sa'a ualulom kom. Teudasap Yudasap tebarekne sembe ambatsin. Sin abeneko saog uro, Yesus yubu ka'ero sareneleptop nimi mo seneragtopneag agha, 'Uaukap' sembamangdi, ulamang tanena, sa'a-sa'a ulamangne kom tanep. Aghana, sindi ulamangne nene agha Allahri seneropneag agha ulamang tanena a'undi nimi, tanena kom nembahilulom kom. Ane sembe sae lobitsululom. A'undi ulamlomne nene agha 'Allah luknubaukap,' aro ulapmunag wali uro kembiagha seneragmundi,” aro ambatsiog.  
\p “Gamalieldi wene seogne sik,” aro el yubu ka'ebaek.   
\p
\v 40 Wene aro ambatsiogpa, “Yesusti wepto pogsiog nimi taneko wa'al aukang,” seekpa, wa'al aekpa, sae kaupto taeplam-taeplam lopsiekti, “A'undi, 'Allahri nia mangkina si Yesus poneko saeag nembao,' aro nimi ambatsiseng kom,” aro ambatsiekti, sae lipsiek.   
\p
\v 41 Wene aro sae lipsiekpa, Yesusti wepto pogsiog nimi taneko yubu tam kareptobag anekoa lambaek. Lambaekti, Yesusti wepto pogsiognangdi seneraglamekti, “Yesusti nunag arukahiori, 'Pimundi, Nanag uro yabiogne sembe ambarelamsululom,' aro arukahiog. Nunag arukahionge sunsunum uro “Yesus si nubu talul,” aro sol wali, wali uro ambarelamsiapne sembe nimiri nu sae kaupto taeplam-taeplam lopsiangba, ali nembahiang. Ali nembahiangba, seklelamap aghana, Yesusti nunag arukahionge sunsunum uro sol wali, wali uro sik uro ambarelamsiapne sembe Allah nu sembe yeng senelamla. Ane sembe ali nembahiang aghana, Allahri nu kembamsilne sembe, nu babe yeng senelamap,” aro seneraglamek. Undo seneraglamekti, sin awi yeng uro lambaek.  
\v 42 Lambaekti sop-sop Allahri Ae aramag yubu ambatto, nimiri aeag ambatto, Allahri, “Mog so'oag nimi taulbahimendi, saelbamsululam,” aro Wepto Poghol aogne Yesus sembe Yubu Walinge ambarelamsiek.   
\c 6  
\s1 Yesusag “Sikne” aro seneragtop nimiri nimi saekpare wepsiekti, “Kwaneng pogto kelabo yauog taekne tarelamsululom,” aro wepsieka (6:1-7)  
\b  
\p
\v 1 Wamekti Yesus yubu ka'elamekne sunsunum uro ulamek nimi, nimi maikno talamek. Maikno talamekti, Yahudi nimi wamek aghana sin nusamag agha Yunani yubu lerop nimi babe wamek, Ibrani yubu lerop nimi babe wamek. Yahudi nimi Yunani yubu lerop nimi wamekneri Yahudi nimi Ibrani yubu lerop nimiag wana mali palilamsiek. Yunani yubu lerop nimi tanekori lelamekti, “Ibrani yubu lerop kelabo yauog taekne babe, Yunani yubu lerop kelabo yauog taekne babe kwaneng tatsinep. Aghana, kal ma'al yepna sop-sop yeplamsiloma kelabo kaldam kelabo nu Yunani yubu lerop nimiringe olog tarelamsilom kom,” alamek.   
\p
\v 2 Wene aro Yunani yubu lerop nimiri lelamekne sembe, Yesusti wepto pogsiog nimi aobare nang enekori Yesus yubu ka'ero ulamek nimi poloro wimbahiek. Poloro wimbahiekti, yubu ambarelamsiekti, “Nu kwaneng tenaba sembe nimi o'olamsiberi, Allah yubu nimi ambatsin koma libeberi, tenaba sembe ulamebenge nenena mali.  
\v 3 Ane sembe nangkabo, nimi saekpare wepsululom. Wepsululomnena, Allah Eldamne Yameri seneragna sunsunum uro wanaag seneraglamangdi, wana maro hekto seneraglamangdi, walia ulamangba ililamsilomne, sin nusamag agha nimi saekpare wepsululom. Wepsimunba, 'Sol wali, wali uro kwanengap, kal ma'alap kelabo yauog taekne nika-nika uro tarelamsululom,' aro nimi saekpare abenekoag ambatsiberi wepsukap. Wepsibeba, sindi saelbamikti, nimi yeplamsukang.  
\v 4 Nimi saekpare wepsimunne tanekori nimi tenaba saelbamikpa, nu Yesusti wepto pogsiognangdi sop-sop Allahag molona lelameberi, Allah yubu tibin nenero ambarelamsukap,” seek.   
\p
\v 5 Wene seekpa, nimi wamek nimi tanekori “Wali” seekti, nimi weplamsiek. Weplamsiekpa, nimi nhon sina Stefanus webek. Stefanus ponekona, Allah Eldamne Yame Walingeri Stefanus nongag mikipne to'opto piamogpa, Stefanusti wanaag seneraglamogti, “Yesus sik uro Allahri 'Taulbahilulam,' aro wepto poghogne,” aro mikip uro seneraglamog. Yesusag “sikne,” aro seneraglamogne Stefanus webekti, nen weplamsiekti, Filipusap, Prokhorusap, Nikanorap, Timonap, Parmenasapna, Nikolausap wepsiek. Nikolaus poneko samenag Allah omeklamog kom aghana Yahudi nimi saog uro taogti, Allah omeklamekne saog uro el babe Allah omeklamogne taog. Elna as Antiokhia agha, “Na babe Yahudi nimiri omeklamangne Allah omeklamnun,” aro yingkina wamog.  
\v 6 Nimi Yesusag “Sikne” aro seneragtop nimi taneko ni wamekneri nimi saekpare abeneko wepsiek. Wepsiekti, Yesusti wepto pogsiognang enekoag pil phiekpa, Yesusti wepto pogsiognang enekori “Allahri mikip nembahileba, kwaneng pogto kelabo yauog taekne yeplamsumuna sol wali, wali uro saelbamlulom,” aro Allahag molona lero usoghag sae pipsiek.   
\p
\v 7 Wene aro tenaba sembe awe tona sin saekpare nangag pibekti, Yesusti wepto pogsiognangdi Allah yubuag agha Yesus sembe tibin nenero ambarelamsiek. Tibin nenero ambarelamsiekpa, yubu eneko tala-tala nubu talamogpa, Yesus yubu ka'ero ulamek nimi as Yerusalem maikno talamek. Memnang Allah sembe pairopnang babe maiknori Yesus sembe el talamek. El talamekti, “Yesus ponekona, Allahri 'Malia ulamangne sembe “Opsineag,” aro taubahilulam,' aro wepto poghogne,” aro seneraglamekti, ma'al talamekti.   
\s1 Stefanus saelbaeka (6:8-15)  
\b  
\p
\v 8 Stefanus neneko Allahri mikipne elag to'opto palilamogpa, nimiag walia ulamsiogti, “Yaghe, Allahri el pere agha ual” senenne kekneba nimiri uanep komne, Allah Eldamneri uanepne nimi maikno whingag Stefanusti ulamog.  
\v 9 Stefanusti undo unulamogpa, Yahudi nimi nusamag agha Libertini aldalamek nimi babe wamek. Libertini aldalamek nimiri Allah yubu lerop ae nhonag ma'al dalamekti, sina Libertini Allah yubu lero omektop ae engel dalamek. (Libertini aldalamek nimi anena, “'Nu samenag nimi arukna wamubu aghana sae lobitsiekpa, wamap,' aro urop nimi,” aro engel dalamek. Sin tanekona, mog so'o Kirene nimiap, as Aleksandria nimiap, mog so'o Kilikia nimiap, mog so'o Asia nimiap babe wamek.) Libertini nimi tanekori, “Stefanusti Yesus sembe nimiag ambarelamsilul kom,” aro Stefanusap yubu yo uro lel talamek.  
\v 10 Stefanusap yubu yo uro lel talamek aghana, Stefanusag Allah Yameri mikipne piamogpa, wana hekto yubu lelamogti, tibin uro ambarelamsiogpa, sindi samoro elag yubu lemnep kom wamog.  
\v 11 Sindi samoro elag yubu lemnep kom wamogpa, Libertini nimi tanekori haing kunuro nimi orangeag wana tolamsiekti, “Stefanusti ambarelamsilne nu karong. Ane sembe, nimi ambarelamsululomne, 'Stefanusti Musa san tiliptop yubu lebori, Allah babe san tiliptop yubu lebo,' aro orolena yubu ambarelamsululom,” aro wana toro ambatsiek.  
\p Libertini nimiri wene aro wana toro ambatsiekpa, nimi orange tanekori, “Wali, ambarelamsukap,” seekti, “Nu aori ka'ebabongena, Stefanusti Musa san tiliptop yubu lebori, Allah babe san tiliptop yubu lebo,” aro orolena yubu lero ambarelamsiek.   
\p
\v 12 Wene aro orolena yubu lerop nimi tanekori ambatsiekpa, nimi maiknori ambatsiekne ka'ebaekti, “Stefanusti mali ulamlaba, saelbaukap,” aro wanaag meso yalikahiog. Wanaag meso yalikahiogti, as Yerusalem wameknangap, Yahudi nimi nong nimi nubunangap, Musari samenag mome tobogne ambatsiropnang tanekoap piekti, Stefanus salel pina Yahudi nimi sembe yubu tam kareptop nimi Mahkamah Agama haiptangtobag payaek.  
\v 13 Yubu tam kareptop nangag payaekti, Libertini aldalamek nimi enekori yubu loloro lerop nimi babe pabiek. Libertini nimiri yubu loloro lerop nimiag ambarelamsiekti, “Ambatsululomne, 'Stefanus eneri nu haingag wene alamo,' sululom,” seek.  
\p Wene seekpa, yubu loloro lerop nimi tanekori orolena ambarelamsiekti, “Stefanus eneri sop-sop sinag kweleknag lelamori, 'Allah Eldamne Mem Ae loba tao,' seo. Apna, Stefanusti lelamori, 'Musari samenag Allahri “Undo ualulom,” aro ambarogne sembe mome tobogne babe loba tao,' seoba, aori ka'ebabo.  
\v 14 Stefanusti yubu lebonge nu ka'ebabongena, 'Yesus Nasaretne ponekori Allahri Ae ene kwerek alul. Tanena, Musari samenag ambatsiogpa, saelba ulamapne orog nembaleri, wendogne nhon lag nembalul' seo,” aro wene seek. \fig Allahri Ae ot nhonog kota Yerusalem wamog. Sunumna pibapne anena, Allahri Ae sobaekti, leka Allahri Ae kanero leka babe solingkiek. Allahri Ae paiag sip babe kota Yerusalem kembanep.|alt="Hanya ada satu rumah Allah di kota Yerusalem. Orang-orang membuat rumah itu dan membuat pagar di sekelilingnya. Ada juga kelihatan kota Yerusalem di luar pagar." src="temple.jpg" size="col" ref="Pogsiognang 6:14" \fig*   
\p
\v 15 Wene aro orolena yubu lebekne sembe Yahudi nimi sembe yubu tam kareptop nimi Mahkamah Agama haiptangtobag wamek nimi tanekori Stefanusti whingag tilamek. Whingag tilamekpa, kembiag agha Stefanusti whing Allah arukna malaikatti whing saog taog\x - \xo 6:15  \xt Keluaran - Lambaeka 34:29-35\x*.   
\c 7  
\s1 Allahri Israel nimiap ma'al taekne ukuma sembe Stefanusti ambatsiogha  
\s2 Israel nimi sikinisa samenag wamekne sembe Stefanusti ambatsiogha (7:1-16)  
\b  
\p
\v 1 Memne Allah sembe pairopnang sikini nubunge ponekori hailamogti, “Sindi lebangne sik te?” aro haibaog.  
\v 2 Haibaogpa Stefanusti, “Nangkabo, nani yabo ka'eamsu! Anam nunisang Abraham Kharan pin komag Mesopotamia wamogpa, Allah warero libango aropne Abraham wamoghag lag taog.\x - \xo 7:2  \xt Sumbaogha 11:27—17:14\x*  
\v 3 Lag taogti, Allahri yubu lelamogti, 'Anenge mog so'o asag agha lambamendi, ankabo laploa Nari mog so'o nhon ambatkenenge nhonag pululam,' seog.  
\v 4 Allahri Abrahamag wene seogpa, Kasdim nimi mog so'o laplobi agha as Kharan piogti wamog. As Kharan aneko wamogpa, Abraham ili tebaogpa, Allahri lebogha sunsunum uro nu Yahudinang wamap so'o eneag Allahri Abraham payaogpa, Abraham wamog.  
\v 5 'Pululam,' seogpa, yaoghag ane, 'So'o ologha babe an ngai talulam,' ana babe kom. 'Ot anap andi mangarobari mangaroba mangkahyikneap amik ngai talulom,' aro Allahri Abrahamag salag lero ambarog. Abene li elmabo babe nhon wamna komag, oroghag agha ambarog.\x - \xo 7:5  \xt Sumbaogha 12:7; 13:15; 15:18; 17:8\x*  
\v 6 Ambarogti nen Allahri Abrahamag yubu lelamogti, 'Andi mangorabari mangaroba mangkahyikne nimiri so'oag nimi sekelanan nang saog uro nimiri so'oag wamukang. Wamikpa so'o eneko nimiri sinag heng tai buka tau buka ulamlea teng-tengne (400) wamikpa, so'o eneko nimiri olamsiikti, aruklamsiikpa, ikinaba maghan og uro polamukang.\x - \xo 7:6  \xt Sumbaogha 15:13-14\x*  
\v 7 Nimiri so'oag aneko arukna nembamsiikpa, “Olamsiik nimi taneko sindi ulamikne mali,” kembaneri, Nari tam karebiagha lunuro obahinun. Obahineba, anisag yabo lambaikti, mog so'o Yerusalem\x - \xo 7:7  \xt Sumbaogha 14:18\x* ane Na omekanukang,' aro Abrahamag Allahri ambarog.  
\v 8 Ambarogti, Allahri Abrahamap yubu nikne lero salag palilamogti, 'Nari salag palilamnange nene ekon tan koma el uro wamlulom aro anap, anmaboap nengabo niap nengabo kon karebel dalamlulom,'\f + \fr 7:8  \ft Yahudi nimi sembe nengabo kon tepnange ul palamekne anena, sikin mabo mangaptaekpa, ik linbare wamekpa, mabo kere sirikag kon kareplamek. Allahri Abrahamag ambarekne sunsunum uro sindi senelamekti, Nu Yahudi nimiap Allahap ma'aptangto wamap aro kere kon sirikag kareplamek (Sumbaogha 17:10-14). Kon kareplamekti, kere sirikag kon tepto sanuklamekpa, Yahudi nengabo sembe Allahringe wamna aro kekneba ya'ag taog.\f* aro yubu nikne lero salag pibog.\x - \xo 7:8  \xt Sumbaogha 17:10\x* Abrahamdi elme Ishak mangaro aogti, 'Allahap nari mangarobari mangaroba mangkahyikneap ma'aptanumunge ekon taikag,' aro ae ik lin sum Allah ambarogne sunsunum uro elme Ishak nengabo kon karebaog. Abrahamdi Ishak mangkaogpa, Ishakti Yakub mangkaogpa, Yakubti kongap nang a'obare mangkahiogpa, sindi nimi sisa a'obare likto piekti, nunisa yabo nubunang taek,”\x - \xo 7:8  \xt Sumbaogha 21:2-4; 25:26; 29:31—30:24; 35:16-18\x* Stefanusti ambarelamsiog.   
\p
\v 9 Stefanusti nen tipto ambarelamsiogti, “Nunisa yabo a'obare nubunang enekori sikinipsae Yusup sembe, 'Nuni Yakubti nu sembe olog uro o'ona senelamsildi, elme Yusup sembe agha maikno o'ona senelamla,' aro wana mali senelamek. Wana mali senelamekti, 'Mesir nimi arukna talul,' aro eldoyabori kamna kapto tobek aghana, Allahri sikinipsae Yusup yepto piamog.\x - \xo 7:9  \xt Sumbaogha 37:1—50:14\x*  
\v 10 Yepto piamogti, tam malinge elag uaekne orog nembaogpa, Mesir nimi sembe yubu sia leropne Firaunag yaog. Elag yaogpa, Allahri Yusup yeplamogpa, wana seneragna heklamogpa, Firaundi Yusup sembe 'Wali uro awe tolamla,' aro awi senelamog. Yusup sembe awi senelamogti, Firaundi 'Mesir so'o saelbamlulam,' aro towalengkaogpa, Yusupti Mesir so'o saelbamog. Mesir so'o saelbamogpa, Firaundi aeag uropne babe, Firaun el tamag awe toro ulamekne babe, 'Pia ulamlulam,' aro Yusup saeag nembaog.  
\v 11 Towalengkaogpa wamekpa, Mesir so'oag babe, Kanaan so'oag babe, kwaneng yo nubunge waelbaogpa, kwaneng yo seklelamek. Kwaneng yo seklelamekpa, nunisa yabo Kanaan wamekne babe kwaneng telamek kom.  
\v 12 Unu amogpa, 'Mog so'o Mesir kwaneng telamang,' ana Yakubti ka'ebaogti, nunisa yabo nubunangag 'Mesir kwaneng tol pululom,' aro pogsiog. Pogsiogpa, sin sumene alnirop sum 'Kwaneng tobukap,' aro piekti, kwaneng samoro payaekti, olog wamek.  
\v 13 Nen ik phendep sum babe piekpa, Yusupti, 'Na a'unipsae wamna,' aro eldo yabo ambatsiogpa, Firaun babe Yusup ili eldo yabo wamekne sembe el taog.  
\v 14 El taogpa Yusupti iliap, eldo yabori maboap kelaboap, 'Na ya'aghag yalulom,' aro yopsiogpa, ili Yakubap nhon yaek nimi taneko teng phende eptopne saektara bare (75) yaek.  
\v 15 Mog so'o Mesir piekti wamekpa, Yakub tebaogpa, nunisa yabo nubunang babe wamekti tebaek.  
\v 16 Nunisa yabo nubunang teplameka Sikhem poa pina sikil palamsiek. Sikil palamsiekag samen Abrahamdi kamna kapto Hemor elmabo saeag agha kal ma'al kirik wana solomneap ag agha toboghag aneko Sikhem mog so'oag kirik arameag sikil palamsiek,” aro Stefanusti ambatsiog.\x - \xo 7:16  \xt Sumbaogha 23:16; 33:19; 49:29-32; Yosua 24:32\x*   
\s2 Israel nimi Mesir so'o wamekne sembe Stefanusti ambatsiogha (7:17-29)  
\b  
\p
\v 17 Stefanusti nen tipto ambarelamsiogti, “Allahri Abrahamag salag lebogne neneko, Israel nimi Mesir wamekne maikno tangto palamogpa, Allahri salag lebogne sunsunum uro pinepne peram talamog.\x - \xo 7:17  \xt Keluaran - Lambaeka 1:7—3:10; Pogsiognang 7:6-7\x*  
\v 18 Peram talamogpa, Mesir nimi yubu sia leropne Yusupti uaogne ekonne nhon mog so'o Mesir saelbamsinepne waelbaog.  
\v 19 Waelbaogne ponekori nunisa yaboag orolenange lero unulamsiogti, 'Maikno taikag,' aro sin aruklamsiogti, 'A'undi mabo maghag tobogsiro sin ohiro ulamlulom,' aro aruklamsiog.  
\v 20 Undo unulamog li eneag Musa mangaptaogpa, Allahri Musa sembe 'Wali,' senelamog. Ili ilindi aeag wal wilindi tognoro mo'oro piamdek.  
\v 21 Wal wilindi taogpa, mag abolag pabiogti, pibog. Pibogpa, Firaun elmangkeldi me aneko ibogti, tobogti, eltangkeldi me saog uro mo'ol tolamog.  
\v 22 Musa neneko Mesir nimiri nia mangkina uropne ambarelamekpa, sindi uropne leropne el talamogti, wana heklamsiog. Musa nenekori yubu lenne babe, nia ua unne babe mikip uro ulamsiog.  
\v 23 El mangkaekne heng tai buka tau buka ulamogha teng nhon epto naual bare wamogpa, 'Nangkabo Israel nimi kemel phinun,' aro wanaag seneraghog.  
\v 24 Kemel phinun,' aro palamoghag agha Mesirne nhondi elkae Israelne nhon tam oroghag agha olamogha ibog. Ibogti, Musari elkae pelepto elkae Israelne ponekoag sip taogti, Mesirne poneko ya'ag obog.  
\v 25 Musa eldamne wanaag agha seneragamognena, 'Nangkabo Israel nimiri na sembe wali sembaukang. “Mesir nimiri Israel nimi olamsiangba, Allahri, 'Taulbahilulam,' aro poglange Musa ane,” sembaukang,' sembaog aghana, el sembe undo seneraglamek kom.  
\v 26 Mabogha kwelekaogpa, lukunap Israelnang phende talamdeka kembahiogti, 'Nari ma'abahinun,' aro piog. Sinag piogti, 'Nangkabo, a'unna sa'ambe ol talamdom? A'unna eldo ilipsae saog uro wamdom kom te?' seog.  
\v 27 Seogpa, talamdekti, elkae obogne ponekori Musa wepto pil piogti, yubu lelamogti, 'Etneri, “Nu saelbamsulul,” aro etneri towalengkakeo? Etneri, “tam kareplamlulam,” seori, etneri towalengkakeo?  
\v 28 Ambhum Mesirne obomne neneko saog uro wene na babe omnululam te?' aro haibaog.   
\p
\v 29 Wene seogpa, Musa ka'ebaogti, log lelem laplobi agha mog so'o Midian piogti, nimi sekelingkiropne saog uro wamog. Aneko pina wamogti, me nengabo me phende mangkahiog.\x - \xo 7:29  \xt Keluaran - Lambaeka 18:3-4\x*   
\s2 Israel nimi pai aldesag wamekne sembe ambatsiogha (7:30-43)  
\b  
\p
\v 30 “Mog so'o Midian wamogpa, hengkun tai buka tau buka ulamogha teng nhon epto naual bare taogpa, ik nhon sum Musa poneko Yim Sinai tamag yabalamogti, pai aldes saog urobag wamog. Yim Sinai tamag yabalamogti, kemelamogpa, Allahri El arukna malaikat poghogne yingkina kal werengkel alog saog kal anekoag auk pog tag-tag alamog.  
\v 31 Musari ibogti, 'Map, maneagha ulamla. Kembanun,' sembaogti, peramag piog. Peramag piogti, 'Kembanun,' aro ulamoghag agha Nuni Allah yubu lilim ka'ebaog. \fig Allahri werengkel alog saog kalag agha Musaag kulukaogti, yubu lelamog.|alt="Allah turun dan berbicara kepada Musa lewat semak duri." src="burningbush_cn01919c.TIF" size="col" copy="David C. Cook" ref="Pogsiognang 7:31" \fig*   
\p
\v 32 Allahri Musaag yubu lelamogti, 'Na Allah, anisang yabori Allah omeklamekne Wamna. Abrahamap, Ishakap, Yakubapti omeklamekne Allah sikini Na wamna,' seogpa, Musa log lelem pet-pet alamogti, whing ebom agha kal werengkel alog kalag auk pog tag-tag alamogha anekoag tibog anep kom wamog.  
\v 33 Unuaogpa Nuni Allahri nen yubu lelamogti, 'Na whingag ane memag sekamlam. Memag sekamlam ane sembe yan wangana tobongkamlama ane olobalulam,' seog.  
\v 34 'Na Namabo Israel nimi mog so'o Mesir wamangne tiplengelamsinba, whin maikno seklelamangti, “Yaghe” alamangne Na ka'eamna. Na kulukulanne “Sin haing sae lopsinun,” aro kulukulan. Wene Nari an pogkeneba, samoro Mesir pululam,' seog.  
\v 35 Samenag Israel nimiri Musa sembe 'Nu karong,' aro wa'epto tobogaekne neneko, 'Etneri, “Nu saelbamsulul,” aro etneri towalengkakeo? Etneri, “Tam kareplamlulam,” seori, etneri towalengkakeo?' seek.  
\p Wene seek aghana Allahri El arukna malaikat poglamogti, 'Musaag pimendi, Nari yubu elag tiplulam,' aro poghogpa, Allah arukna malaikat neneko werengkel auk pog tag-tag alamoghag aneko lag taogti, 'Israel nimi saelbamsimendi, haing sae lopsululam' aro Musa poghog.  
\v 36 Musari ulamognena 'Yaghe, Allahri el pere agha ual,' senenne kekneba nimiri uanep komne Allah Eldamneri uanepne ulamog. Mesira, mag longorop mag Uwong Mag Sin agha, pai aldes saog urobag aneko babe ulamogpa, heng kun tai buka tau buka ulamogha teng nhon epto naual bare taog.\x - \xo 7:36  \xt Keluaran - Lambaeka 7:3; 14:21; Bilangan - A'iliroba 14:33\x*  
\v 37 Musa nenekori Israel nimiag yubu lelamogti, 'Nimi nhon na saog uro Allahri yubu silimu tiplamlulne a'un Israel nimi anabiag agha Allahri sekitlul,' seog.\x - \xo 7:37  \xt Ulangan - Sariktoba 18:15,18\x*   
\p
\v 38 Wene seogti, Musa nenekoap nu Israel nimi nunisag yaboap pai aldes saog urobag nhon wamekpa, nunisag yabo poloro winilamekne yim tamag laplobi agha Musa Sinai Yimag waelbaog. Sinai Yimag waelbaogpa, Musa pere agha Allahri El arukna malaikat poghogne nenekori, “Yubu ambatsinne sunsunum uro unulapmundi, Allahap ma'aptangto kamag wamnep,” aro yubu ambarogpa, Musa nenekori nunisag yabo nen tipto ambarelamsiog.\x - \xo 7:38  \xt Keluaran - Lambaeka 20:18-21\x*  
\v 39 Ambarogne ambatsiog aghana, nunisa yabo eldi lebogne sare nelebaek komdi, wanaag agha 'Karong' aro 'Mesir samoro pukap,' sembaek.   
\p
\v 40 Wene senelamekti, Harunag yubu lelamekti, '”Musari nu saelbamsioba, Mesira lambabo aghana wela uaori, tala pio,” senelamap. Ane sembe an Harundi saeri sumbatsululama, Nuri phalamsibenge samenag menangal palamikti, nu yeplamsukanga saeri sumbatsululam,' alamek.\x - \xo 7:40  \xt Keluaran - Lambaeka 32:1-6\x*   
\p
\v 41 Wene alamekti, pham sapi me saog uro sunumna Harunapti sumbaekti, 'Nuni nundam nimiri sumbaba aneri nu piamsilul,' aro awi uro seplamekti, sani yoro telamek. Sani yoro telamekti, sumbaek mema anekoag pham oro aukag taro phalamek. \fig Israel nimiri pham sapi me saog urop mema pharoba sumbaekti, phalamek.|alt="Orang Israel membentuk berhala seperti anak sapi dan menyembahnya." src="golden_calf_cn01920c.TIF" size="col" copy="David C. Cook" ref="Pogsiognang 7:41" \fig*   
\p
\v 42 Undo mema phalamekpa, Allahri sinag wail ibatsiogti, lipsiogti, 'Sinba, tibin nenenne imag wareropneag phalamik,' aro lipsiog. Imag wareropneag phalamekne sembe babe, Allahri sin wail ibatsiogne sembe babe, Allahri yubu silimu tiptop nimiri mome tobognena:  
\q1 'A'un Israel nimi hengkun teng nhon epto naual bare pai aldes saog urobag wamlumdi,  
\q1 “Allahag pham oro aukag taro Allah sembe tarelamap,” senelamlum.\x - \xo 7:42  \xt Amos 5:25-27\x*   
\q1
\v 43 “Allah sembe tarelamap,” senelamlum, aghana “Mema si Molokh omeklamukap,” aro mema pia urop ae kalun ae kwerekto poa pang-yang ulamlum.  
\q1 Apna “Mema Refan omeklamukap,” aro el kekneba imbrea saogne nimi saeri sunuropne babe poa pang-yang ulamlum.  
\q1 Ane sembe nari popsineri, toboghol pihinebag Babel kauro nimi saeag nenel phinun,' aro mome tobog,” aro Stefanusti ambatsiog.   
\s2 Allahri Ae sobaeka ukuma sembe ambatsiogha (7:44-50)  
\b  
\p
\v 44-45 Stefanusti nen tipto ambarelamsiogti, “Nunisag yabori anam mema Refanap Molokhap poa pang-yang ulamek komag agha, Mesira lambaekti, pai aldes saog urobag wamek. Wamekpa, Allahri Musaag ambarelamogti, '”A'un nusamag wamneri, piamsineba, omeklamnululom,” aro Allah omektop ae kalun ae nhon sobalulom. Sunumna ambatkenba, kembalam saog uro sunsunum uro sobalulom,' aro Allahri ambarogne sunsunum uro nunisa yabori pai aldesag saog urobag sobaekti, kwerekto poa kwaneng ero pang-yang ulamek. \fig Sunumna pibapne anena, Allahri Ae sobaek komag agha, Israel nimiri Allah omektop ae kalun ae sobaekti, kwerekto poa kwaneng ero pang-yang ulamek.|alt="Gambar yang kami pasang ini, sebelum orang membangun Rumah Allah di kota Yerusalem, orang Israel membuat rumah sementara untuk menyembah Allah, dan mereka membawanya kelililing sementara mencari makanan/nafkah." src="tabernacle_cn01921c.tif" size="col" copy="David C. Cook" ref="Pogsiognang 7:44-45" \fig*  
\p Israel nimiri Allah omektop ae kalun ae eneko kembiag agha, “Allahri Israel nimiap ma'al tanan yubu Musaag ambarogne saekag pibubu mome tobogne kalun ae eneag piameberi, Allahag 'Sikne' aro seneraglameberi, ulamebeba, piamsilul,” aro el taek. Allah omektop ae kalun ae eneko sobaekti, kwerekto poa kwaneng ero pang-yang ulamek. Israel nimi salehiropne Musa tebanep liag, Yosua Musa lunuro waelbaog. Yosuari saelbamsiog li eneko mog so'o wene wamabag payaekpa\f + \fr 7:44-45  \ft Stefanusti, “mog so'o wene wamabag” seognena, samenag Israel nimiri mog so'o lelnero wa'iekti, tobekne eneko si Kanaan engerop, aghana Stefanus wamog li mog so'o Israel engerop.\f*, mog so'o eneko nimi Allahri talup lambahiogpa, nunisa yabo lelnero wa'iek. Lelnero wa'iekti, sisa nhondi nhon, nhondi nhon pogto mog so'o tobekti, wamek paghabog Daud waelbaog.\x - \xo 7:44-45  \xt Keluaran - Lambaeka 25:40\x*   
\p
\v 46 Nunisa Daud poneko sembe Allahri sembaogne ane, “El wana lag phoropne,” aro awi sembaog. Daudti Allahag mololamogti, 'Ae nhon Yakubti omeklangkeogne poneko ua unag sembe sobaghenun,' aro molbaog.\x - \xo 7:46  \xt 2 Samuel 7:2\x*  
\v 47 Molbaogpa Allahrina, 'Molbanelam aghana andi sobalulam kom. Anme Salomori Nari ae sobalul,' seogpa, sobaog.\x - \xo 7:47  \xt 1 Raja - Yubu Sia Lennang 6:1-38\x*   
\p
\v 48 Sobaog aghana, nimiri saeag agha 'Allah tane wamlul,' aro sorop ae enekoag aghabog Mikip Phelektopne Imag wamlange wamnep kom.\f + \fr 7:48  \ft 2 Tawarikh 2:6 (Israel Nimiri Ukuma Mome) - Yubu Sia Leropne Solomori lelamogti, “Etneri, 'Allah tane wamlul,' aro ae nhon sobanep? Imag babe, imag alibagne babe, to'op wamlaba, 'Allahringe kelengteptobag tane aghabog wamlul,' senep kom. Ane sembe, nari babe, 'Allah tane wamlul,' aro ae sobanep kom. Ot ae sobanunne Allah sembe mhong walelingkiptop ae Allah pharop ae sobanun,” seog.\f* Samenag babe Allah Eldamneri yubu silimu tiptopneag ambarogpa, ambarogne sunsunum uro mome tobogne ane:   
\q1
\v 49 Nuni Allahri lelamognena,  
\q1 'Na pukamneri, nimi ni saelbahinuna sunsunumag aneko im tiwalengka ulamlomne saog wamla.  
\q1 Imag pukamnari, Na yan pelengka unag aneko sao mog so'o ni wamla.  
\q1 Na ua ulamnaba, imap so'oap to'op tal ane sembe, a'undi, “'Allah wamlulaag,' aro ae soro pibukap,” sembamunne, welaro ae sobalulom?  
\q1 “Allah tane wamnebag,” sunsunum urobag tala wamlul sembamlom?\x - \xo 7:49  \xt Yesaya 66:1-2\x*   
\q1
\v 50 Na nadamne saeri nia sumbahi,' aro Allahri Eldi yubu silimu tiptopne pere agha ambatsiog,” Stefanusti wene aro ambatsiog.   
\s2 Stefanusti yubu tam kareptopnangag, “Allahri aruksirop yubu ingisaplamlom” aro ambatsiogha (7:51-53)  
\b  
\p
\v 51 Wene seogti, Stefanusti eldamne yubu agha nen tipto tam kareptopnangag ambarelamsiogti, “A'un usog mikip nimi. A'undi nengabo kon kareptop nimi aghana Allahri, “Ma'ap taukap,” aro lebogne ingkisaplamlom. Allahri samenag, “'Na Allahri Israel nimiap ma'ap tabunge ekon taikag,' aro nengabo kon kareplamlulom,” aro lebogne a'ori ka'ebalum aghana wanaag seneraglamlom komdi ekon talamlom. A'undi Allah Eldamne Yame Walinge sop wailag nenero wa'eplamlom. Nu Israel nimi nunisa yabori ulamek saog uro wene a'undi babe ulamlom.\x - \xo 7:51  \xt Yesaya 63:10\x*   
\p
\v 52 Nunisa yabori Allahri yubu silimu tiptop nimi ni mali-malia nenero 'Seklebaik,' aro ulamsiek. Unulamsiekti, nimi sikne\f + \fr 7:52  \ft Yahudi nimiri “Nimi Sikne” alameknena, “Allahri 'Nimi taulbahimendi, saelbamsululam,' aro wepto poghogne,” seneraglamekti, “Nimi sikne” aro lelamek.\f* yanepne sembe ambarelamsiekne ya'ag olamsiek. Samen abonogho wene a'undi babe nimi sikne yaonge eldamne Yesusag wabe kolaglo saog uaomdi, obom.   
\p
\v 53 Allahri el arukna malaikat pogsiogpa, nunisa Musaag yubu ambarekpa, el pere agha Allahri lebogne, 'Undo ulamlulom,' aro arukahiogne ka'ebaom aghana yubu arukto ambatsiogne ingisaplamlom.   
\s1 Stefanus kirikti olopsieka (7:54-7:60)  
\p
\v 54 Stefanusti wene aro ambatsiogpa, nimi nubunang wamek nang tanekori ka'ebaekti, wanaag yo maikno walelamsiogpa, si keleng tebongkia yo uro seneraglamek.  
\v 55 Wanaag yo uro seneraglamekpa, Allah Eldamne Yame Walingeri seneragna sunsunum uro Stefanusti wanaag seneraglamogti, imag tiwalengelamogpa, Allah ua urobag Allah warero libango aropne sae sirik sip, nimi nubunge sunsunum urobag sip Yesus sekamogha tiwalengkaog.  
\v 56 Tiwalengkaogti, “Nangkabo, im phoamlaba, El nimi so'oagne taogne neneko Allah sae sirikneag sekamlaba tiwalengkan,' seog.   
\p
\v 57 Wene alamog abeneko sin ao leptangom agha sin yo lelem yanghang alamekti, Stefanusag merero niri saelbaek.  
\v 58 Niri saelbaekti, kiliro asag agha pabiekti, paiag simbik toboghol piekti, kirikti olamek. Kirikti olameka ipsiek nimiri, “Nu babe ag pibeberi, Stefanus kirikti ol pukap,” aro nongag enektop ag kwiriplamek. Ag kwiriplamekti, kabuni me nhon sina Saulusti yan umag, “Piamsululam,” aro pibek.  
\v 59 Stefanus kirikti olamek abeneko Stefanusti Yesusag yoplamogti, “Yesus Nia Mangkina Saelbamsilamne, nari yame anag yale tanena, 'Nanap wamnunam,' sululam!” aro mololamog.  
\v 60 Mololamogti, yabu sanukto pulingkiogti, nen yubu mikip uro mololamogti, “Yesus Nia Mangkina Salehiropne, 'Sindi undo malia ulamangba,' aro wailag nembamendi, lumbaheng kom!” seogti, tebaog.   
\c 8  
\s1 “Yesusag 'Sikne,' aro seneragtop nimi seklebaik” aro olamsieka (8:1-3)  
\p
\v 1-2 Stefanus obekpa, tebaogne sembe Saulus awi sembaog. Awi sembaog aghana yog nimi Allah yubu ka'elamekti, ulamek nimi taneko wamekti, Stefanus obeka aneko keyapto so'oag sikekti, o'ona lelem engero wamek.  
\p Stefanus obek sum eneko Stefanus obek nimiri “Seklebaik” aro alnibaekti, Yesusag “Sikne” aro seneragtop nimi taneko maiknoro malia ulamsiek. Malia ulamsiekpa, Yesusag seneragtop nimi as Yerusalem laplobiagha mog so'o Yudeaap Samariaap tala-tala nimi wamekag piekti, a'ero-a'ero wamek. Yesusti wepto pogsiognang a'o bare abenekoog Yerusalem wamek.  
\v 3 Yerusalem wamekpa, Saulusti “Yesusag 'Sikne' aro seneragtop nimi opsunun,” aro ae taneko sen-senna elamsiog. Ae taneko sen-senna elamsiogti, kabuni kelabo aeag agha kiliro-kiliro kop aeag tobonglamsiog.   
\s1 Yesus yubu walinge mog so'o Samaria nimi ambatsieka (8:4-25)  
\p
\v 4 Yesusag “Sikne” aro seneragtop nimi kop aeag tobonglamsiekpa, “Nu Yesusag seneragtop nimi opsiikag,” aro as Yerusalema lambaekti, piekag anekoa nimi tala-tala nimiag yubu walinge Yesus sembe ambarelamsiek.  
\v 5 Ambarelamsiekti, Yerusalema lambaekne nhon Filipus neneko babe mog so'o Samaria as nubunge nhon wamogne nenekoag piog. Nubu as nenekoag piogti, Allahri “Taulbahimendi, saelbamsululam,” aro wepto poghol aogne Yesus sembe mog so'o Samaria nimiag ambarelamsiog.  
\v 6-7 Yubu ambarelamsiogti, Filipusti nimi whingag ulamognena, “Allah Eldamne mikipneri el pere agha ulamla” senenne kekneba ulamog. Phia nimi kulomag ulamsiogne yag lanalamsiogpa, haum alamekti lanalamek. Nimi yan malinge babe, nimi lebe arop kom nimi babe Filipusti wali nenelamsiog. Undo unulamogne kembiagha Samaria nimiri sol wali,wali uro ma'aptangto ambarelamsiogne ka'elamek.  
\v 8 Filipusti nimi maikno wali nenelamsiogti, yubu walinge Yesus sembe ambarelamsiogpa, nimi as eneko wamek nimiri awi maikno senelamek.   
\p
\v 9-11 As eneko nimi nhon sina Simon mema mili lero phalamogne wamog. Samenag agha as enekoag mema phalamogne wamogpa, as enekoag wamek nimi niri, “Yaghe, mane agha ual,” senelamek. Undo senelamekpa, Simon ponekori, “Na maneagne pone nubunge wamna,” aro ambarelamsiogti, mema mili lero phalamog. Phalamogha sembe Samaria nimi ologne nubunge ni tanekori seneraglameknena, “Allah Eldamne mikipne Simon pone kulomag piamlaba, Simon pone 'Mikip Sirikne',” aro si lelamek. Simondi samenag agha heng kun taibuka taubuka ulamogha mema ulamogne kembiag agha Samaria nimi niri, “Yaghe, mane agha ulamla,” senelamek. “Mane agha ulamla” senena ulamogne sembe eldi yubu ka'elamekti, sindi babe ulamek.  
\v 12 Simondi yubu ka'elamek aghana Filipus mog so'o Samaria yaogti, yubu walinge Yesus sembe ambarelamsiogti, “Allahri 'Mog so'oag nimi taulbahimendi, saelbamsululam,' aro wepto poghol aogne si Yesus wamla. Mog so'oag nimiri Yesusag 'Sikne' aro seneraghikpa, Elag seneragtop nimi Allahri saelbamsilul,” aro Filipusti ambarelamsiog. Ambarelamsiogpa, Simondi yubu samen ka'elamek nimi mog so'o Samaria wamek nimi taneko Filipusti ambarelamsiogne ka'elamekti, “Sik uro ambarelamsil” aro seneraglamek. Nengabo kelabo Samaria wamek nimi “Sik” aro seneraglamekti, “Filipusti ambarelamsilne saelbamukap,” aro elag yalamekpa, maghag pelengelamsiog.  
\v 13 Simon poneko babe, “Yesus sembe ambarelamsilne sik,” aro seneraglamogpa, Filipusti maghag pelengkaog. Simon babe Filipus nelepto elap pang-yang ulamdek. Pang-yang ulamdekpa, Filipusti nimiri uanep komne, Allah Eldamneri uanepne, “Allah Eldamne mikipneri el pere agha ulamla” senenne kekneba mikip uro ulamogpa, Simondi, “Yaghe, mane agha ulamla,” alamog.   
\p
\v 14 Yesusti wepto pogsiognang as Yerusalema ka'elamekpa, “Mog so'o Samaria wamang nimiri Allah yubu ka'elamangdi, Yesusag 'Sikne' aro seneraglamang,” ana ka'ebaekti, Petrusap, Yohanesap wepto pogsiek.  
\v 15-17 Petrusap Yohanesap anam yan komag agha, Filipusti ambarelamsiogti, “Si Yesus engeropneag 'Sikne' aro seneragmunba, Yesusti saelbamsilul,” aro Samaria nimi maghag pelengkipsiog. Maghag pelengkipsiog aghana Allah Eldamne Yame Walinge Samaria nimi nhonag babe pelengel aog kom. Ane sembe Petrusap, Yohanesap pogsiekpa, Samaria pirekti, Samaria nimi usoghag sae saelbamsirekti, Allahag mololamdekti, “Andamne Yame Walinge sin Samaria nimi taneag tatsululam,” aro molona molbarek.  
\p Wene aro molbarekpa, Allahri Eldamne Yame Walinge sin nongag palilamsiog.  
\v 18-19 Yesusti wepto pogsiognangdi nimi usoghag sae pipsiekpa, Allahri Eldamne Yame Walinge sin nongag palilamsiogpa, Simon ponekori kembahiog. Kembahiogti Yesusti wepto pogsiognangag kal ma'al payaogti, Simon ponekori yubu lelamogti, “A'undi nimi usoghag sae palilamsiromba, Allahri Eldamne Yame Walinge nimi tane nongag palilamsil. A'undi ulamdomne saog uro nari babe uanun. Kal ma'al ane tatsineba, mikipne ane tatnurumunba, nimi usoghag nari sae palilamsineba, Allahri Eldamne Yame Walinge nimi nongag palilamsilul,” seog.   
\p
\v 20 Wene seogpa Petrusti, “Allahri, 'Mo tatsinun,' senelamlange nene andina 'Kamna kal ma'alag kapto tomnep,' senelamlam, te? Senelamlamne ane sembe anap anenge kal ma'al eneap tebalulam!  
\v 21 Andi wanaag Allahri seneragna sunsunum uro seneraglamlam kom. Ane sembe nuri sae nimi usoghag palilamsiapne, olog babe tam andinge tanep kom.  
\v 22 Allahri anap, andinge kal ma'alap kom nembaghenep ane sembe, malia ualamne nene wali uro seneragmendi lipsululam. Lipsimendi, 'Malia uanne tam orog nembalulam,' aro Nuni Allahag mololapmenba, 'Malia wanaag seneraglamlamne nene Allahri tam orog nembalul to, kom to?' aro mololame.  
\v 23 Andi wanaag seneraglamlamne sembe na el tan. Andi wanaag yonge meso pungkulamlaba, andi mali-malia ulamlamneri wana sao kauplangkelba, ulamlam,” seog.   
\p
\v 24 Wene seogpa Simondi sin phendeag yubu lelamogti, “A'undi leptomne nanag taleagti, a'undi na sembe yepto A'uni Allahag molbarurom,” seog.   
\p
\v 25 Seogpa, wameka, Petrusap Yohanesapti, “Allahri nimi el uro ua unne kekneba Yesus sembe maikno ulamogpa, ibubu,” aro Nuni Allah yubu ambarelamsirekti, as Yerusalem samoro yalamdek. Yalamdekti mog so'o Samaria as maikno wa'iro yubu walinge Yesus sembe ambare-ambare Yerusalem yarek.   
\s1 Filipusti Yesus sembe tibin nenero Etiopiange nimi nubunge nhon ambarogha (8:26-40)  
\b  
\p
\v 26 Petrusap Yohanesap as Yerusalem yarekti, wamdekpa, sikinkae Filipus Samaria mog so'oag wamog. Wamogpa, Nuni Allahri Eldamneri arukna malaikat nhon poghol aogne Filipus Samaria mog so'oag wamoghag piog. Piogti, Filipusag yubu lelamogti, “Sekmendi, Yerusalem simbik pimendi, ina as Yerusalema as Gaza kuluptop ina waghag pululam. As Yerusalem anabi as Gaza anabiag ina pai aldes saoghag wamlange nene toman pululam,” seog.   
\p
\v 27 Wene seogpa Filipus sekom agha piog. Piogti tilamogpa, Etiopiange nhon nimi nubunge yalamog. Mog so'o Etiopia nimi yubu sia lerop kel si Kandake arukna wamogti, Kandake kel eneringe sae agha piamogne yalamog. El neneko as Yerusalem Allah omekel piogti, samoro yalamog.  
\v 28 Samoro yalamogti, kereta alibag pukamogpa, pham kudari kiliro payalamog. Kereta alibag pukamogti, mome Yesaya Allahri yubu silimu tiptopneri mome tobogne Etiopiangeri eldi saeag saelbamogti, keme-keme yalamog.  
\v 29 Keme-keme yalamogpa, Allah Yame Walinge nenekori Filipusag, “Elem-elem pimendi, pham kudari kereta kiliro payalamla peramag ane pululam,” seog.   
\p
\v 30 Wene seogpa, Filipus elem-elem kereta yalamogha peramag piogti, ka'elamogpa Allahri yubu silimu tiptopne Yesayari mome toro pibogne Etopiangeri kemero lelamogha Filipusti ka'ebaog. Ka'ebaogti, “Nani, yubu leple yalamlam yubu ene wanaag olog el talam te?” aro haibaog.   
\p
\v 31 Haibaogpa nimi nubunge ponekori, “Nimi amoro el nenehin nang orog wamnaba, welaro el tanep?” seog.  
\p Wene seogti Filipusag, “Walel amenba, nhon pununam,” aro molbaogpa, Filipus neneko kereta alibag waelbaogti, Etopiange peramag pulingkiog. \fig Filipus kereta alibag waelbaogti, Etiopiange poneko peramag pulingkiog.|alt="Filipus naik di atas “kereta” dan duduk dekat orang Etiopia." src="CN01932C.TIF" size="col" copy="David C. Cook" ref="Pogsiognang 8:31" \fig*   
\p
\v 32 Yesayari mome toro pibogne leple yalamogne lilimna ane:  
\q1 “'Pham domba obukap,' aro pabirop saog uro  
\q1 El babe pabiek.  
\q1 Nimiri pham domba hong kareplamangba, pham domba yubu lemna kom ua urop saog uro,  
\q1 El babe yubu koma wamogpa obek.   
\q1
\v 33 El nimiri ali nenero yubu lero loloroba lelamekpa, tam Elag taog.  
\q1 Elag tam pibekne wali uro kemban koma El ya'ag obekpa, tebaog. Tebaogne sembe,  
\q1 Nimi nhondi babe 'Eldi mabo tane wamang,' aro lemnep kom,”  
\p aro mome toroba leple yalamog.   
\p
\v 34 Etiopiange ponekori Filipusag hailamogti, “Nari anag hailangkenne, Allahri yubu silimu tiplamogne poneri etne sembe mome toro pibogti lebog? Eldamne sembero, nimi orange sembero?” seog.   
\p
\v 35 Wene aro haibaogpa, Filipusti leple yalamogne neneko Yesayari mome toro pibog yubu aneko sirik kiliro yubu walinge Yesus sembe tibin nenero ambare-ambare palamog.   
\p
\v 36 Wene aro ambare-ambare palamogpa, inaag mag sinag wamoghag pirekti, nimi nubunge Etiopiange ponekori Filipusag, “Ane mag wamla ane. Tibogae. Tam olog wamla, te? Na andi maghag pelengkanei,” seog.   
\p
\v 37 Wene seogpa Filipusti, “Andi Yesusag 'Sikne' aro wanaag seneraglamlam tanena, maghag pelengkaghenun,” seog.  
\p Wene seogpa Etiopiange ponekori, “Seneraglamnange, 'Allahri, “Mog so'oag nimi taulbahimendi, saelbamsululam,” aro Elme Yesus wepto poghog' aro sik uro seneraglamna,” seog.  
\v 38 Etiopiange poneko eldi arukna kereta pham kudari kiliro payalamogne ponekoag “Babitlulam,” seogpa, babogpa, “An ane wamlulam,” seog. Seogti sin mag sinag nhon yingkirekti, Filipusti Etiopiange poneko mag sinag pelengkibog.  
\v 39 Maghag pelengkibogpa, walel alamoghag agha Nuni Allah Yame Walingeri Filipus poa piogpa, Etiopiange ponekori Filipus ibog kom. Ibog komdi Etiopiange poneko awi yeng sene-sene elengeag sip palamog.  
\v 40 Allahri Filipus pabiogpa, as Asdod yaog. As enekoag agha, “Yesus sembe ambarelamsinun,” aro as Kaisarea anabi Asdod anabiag as ni wamekne yubu walinge ambare-ambare palamsiogti, Kaisarea piog.   
\c 9  
\s1 Saulusti nimi olamsiogne “Malia ulamna,” aro lipsiogti, Yesusag “Sikne” aro seneraglamogha (9:1-19a)  
\p
\v 1 Filipusti Yesus yubu walinge ambare-ambare palamsiog abeneko, Nia Mangkina Salehiropne Yesus yubu ka'ero ulamek nimi sembe Saulus nenekori karongdi, yo senelamog. “Ya'ag olamsinun,” aro yo senelamogti, Saulus nenekori memne Allah sembe pairopnang sikini nubungeag piogti,  
\v 2 “Na mome toatnemenba, na as Damsyik Yahudi nimiri Allah yubu lerop ae sale-sale pilamang nimiag tatsinun. Tatsineri, as Damsyik nimi anabiag agha Yesusti Ina pa'abaog Ina nelepto palamang nimi\f + \fr 9:2  \ft Yunani yubuag Lukasti mome toro pibogne, “Ina uropne,” aro mome toro pibog aghana, “Yesusti ambatsiogne sunsunum uro ulamang nimi,” aro mome tobog. (Yohanes 14:6)\f* ipsine tanena haing kaupto saelbahineri, as Yerusalem payahinun,” aro Saulusti molbaog.   
\p
\v 3 Mome molbaogpa, memne Allah sembe pairopnang sikini nubungeri el saeag mome tarogpa, Saulus as Damsyik inaag palamog. As Damsyik peramag palamogpa, imag agha libango aropne haing omomne elag warelobog.  
\v 4 Imag agha libango aropne haing omomne warelobogpa, so'oag malingkiogti ka'elamogpa, “Saulus! Saulus! Sa'a sembe 'Seklebale' aro ulamnelam?” seog.   
\p
\v 5 Wene seogpa Saulusti, “Nani, anna etne?” seog.  
\p “Etne,” seogpa, nen lebog yubu enekori, “Na Yesus, andi 'Seklebale,' aro ulamnelamne ponekori lelamna.  
\v 6 Andi Na malia ulamnelam aghana, wenena sekmendi, as Damsyik pululam. Pimendi wapmenba, andi ulamlulamne nimiri ambatkukang,” seog.   
\p
\v 7 Wene aro ambarelamogpa, Saulusap nhon palamek nimi taneko el peramag sekamekti, sindi babe yubu ka'ebaek. Yubu ka'ebaek aghana, nimi nong ibek komdi lo'om paibon seekti, yubu kom taek.  
\v 8 Yubu kom taekti wamekpa, Saulus neneko pulingkina sekogti, “Haing kwelekanun,” aro ulamoghag agha, haing kwelekna eraruk taogti, ya'ag taog. Haing aneko ya'ag ubaogpa, nimiri sae salero as Damsyik pabiek.  
\v 9 As Damsyik pabiekpa, ik wilindi haing uroba wamogti, kwaneng mag tero koma wamog.   
\p
\v 10 As Damsyik Yesus yubu ka'ero ulamogne nhon si Ananias wamog. Wamogti haing uamna kwelekamna senenag agha kemelamogpa, Nia Mangkina Salehiropne Yesusti, “Ananias,” aro yoplamogha ka'ebaogti, “Nia Mangkina Salehiropne, na ane wamna,” seog.   
\p
\v 11-12 Ananiasti, “Na wamna,” seogpa, Nia Mangkina Salehiropne Yesusti, “Tarsusne nhon si Saulusti haing uamna kwelekamna senenag agha amik uro yabinepne kembal. Kembalnena, nimi nhon si Ananias Saulus wamlaag wa'ildi, sae usoghag palilamlaba, haing ubaonge kwelekal. Haing uamna kwelekamna senenag agha kembaldi, wene Nanag mololamnel. Ane sembe, sekmendi ina piroba si Ina Peket pululam. Pimendi, Yudasti ae anekoag agha, 'Tarsusne si Saulus engeropne tala wamla,' aro nimi wamangneag haibahilulam,” seog.   
\p
\v 13 Yesusti wene seogpa, Ananiasti, “Nia Mangkina Salehiropne, nimi ene sembe nimi maiknori yubu lelamangba ka'elamna. 'An Yesusag “Sikne” aro seneragtop nimi wepsilumne as Yerusalem wamangne Saulusti, “Seklebaik” aro olamsil,' alamangba ka'elamna.   
\p
\v 14 Wene ane yingkina wamlangena, 'Nimi Yesusag “Sikne” aro seneragtop nimi sae kaupto saelbamsilul,' aro Yahudi nimi sembe memnang Allah sembe pairopnang sikindo yabori Saulusag yubu pibong. 'El nuri sae wamlari, undo unualul,' aro yubu pibongba, wene tane yaori wamla,” aro Ananiasti wene seog.   
\p
\v 15 Ananiasti wene seogpa, Nia Mangkina Salehiropne Yesusti, “Pimenag anekoa, el Saulusna, 'Nari yubu nimi tala-tala wamangne ambatsulul,' aro webamnange wamla. Webamnangena, 'Nimi sisa Yahudi nimi komneap, mog so'o saelba urop nimi nubunangap, nimi sisa Yahudi nimi Israel nimi babe pileri, Na Yesus sembe yubu walinge sinag ambatsulul,' aro webamna,” aro Yesusti wene seog.  
\v 16 Seogti, nen tipto ambarelamogti, “Nari el ambatnunnena, Na yubu nimiag ambarelamsilenge sembe seklena seklelamlul. 'Na Yesus si nubu talul,' aro Saulus maiknoro seklelamlulne sembe elag ambatnun,” seog.   
\p
\v 17 Wene seogpa, Ananias piogti, ae enekoag wa'al piog. Wa'al piogti Saulus usoghag sae palilamogti, “Saulus nangkae, Nia Mangkina Saelbamsilne Yesus, an inaag yalamomba, lag taonge ponekori nanag yubu ambatnel. Ambarelamneldi, 'Saulusag pimenba, an sae pere agha Saulusti haing kwelekaleba, Allah Eldamne Yame Walinge el kulomag teknero wa'ileri, mikip nembalul,' aro anag pognelba, yan,” seog.   
\p
\v 18 Wene seog abeneko pere haing sikna lilbamlo agha eldi haingag agha seknagha timbaogpa, haing kwelekaog. Haing kwelekaogti, tibanep saog wamogpa, Ananiasti maghag pelengkaog.  
\v 19 Maghag pelengkaogpa, kwaneng teogti, nong mikip taogpa, wamog.  
\s1 Saulusti Yesus sembe as Damsyik nimi ambarelamsiogha (9:19b-25)  
\b  
\p Saulus poneko mikip taogti, Yesus yubu ka'ero ulamek nimiap ik etbare Damsyik wamog.  
\v 20 Wamogti, ta'ap sen koma Saulus nenekori Yahudi nimiri Allah yubu lerop aeag winil talamekag wa'ilamogti, “Yesus neneko Allah Elme,” aro lag phoro nimi ambarelamsiog.  
\v 21 Saulusti ambarelamsiogne sembe “Map, yaghe! Nimi eneko kom, te?” alamekti, “Saulus kom te! Eldi samenag, 'Yesusag “Sikne” aro seneragtop nimi Yerusalem wamangne orog nembahinun,' aro maiknoro olamsiori, wene babe tane yao. Tane yaongena, 'Yesusag sikne aro seneragtop nimi Damsyik wamangne babe oro saelbahineri, haing sae kaupto memnang Allah sembe pairopnang sikindo yaboag pabihinun,' aro yingkilamla aghari,” alamek.   
\p
\v 22 Wene alamek aghana, Allahri Saulus mikip nenelamogpa, Yahudi nimi agha Damsyik wamek nimiag Yesus sembe tibin nenero ambarelamsiog. Ambarelamsiogti, “Yesus neneko Allahri, 'Nimi taulbahimendi, saelbamsululam,' aro wepto poghol aogne wamla,” aro kekneba maikno Yesus sembe tibin nenero ambarelamsiog. “Yesus Allahri wepto poghol aogne” aro ambarelamsiogne sembe nimi nhondi babe, “Orolena ambarelamsil,” senep kom wamog.   
\p
\v 23 Wene aro ambarelamsiogti, ik maikno wamogpa, Yahudi nimiri, “Saulus obukap,” aro yubu nikne saekag lelamek.  
\v 24 “Obukap,” aro yubu nikne saekag lelamekne Saulus babe ka'ebaog. Yahudi nimiri, “Saulus obukap,” aro sinag kweleknag as leka kanero solingkirobag ina siram wa'albang yang pang uanebag taneko welamek.  
\v 25 “Obukap,” aro welameka sembe ik nhon sum ae inipnag Saulus kau saog uro haingdi piri wiroba lomag wa'iog. Lomag wa'iogpa, eldi yubu ka'erop nimiri kau saog uro wiropne nenekoag agha as kanero leka solingkiropne nenekoag Saulus paiag sip pelengkaek. \fig As kanero leka solingkiropneag Saulus paiag sip pelengkaek|alt="Orang-orang menurunkan Saulus di luar dari pagar yang mengelilingi desa" src="CN01937c.TIF" size="col" copy="David C. Cook" ref="Pogsiognang 9:25" \fig*   
\s1 Saulus Damsyika Yerusalem piogha (9:26-31)  
\b  
\p
\v 26 Saulus Yerusalem piogti, “Yesus yubu ka'ero ulamang nimiap ma'aptaukap,” sembaog aghana, Yesus yubu ka'erop nimi tanekori, “Paulus sik uro Yesusag wana seneraglamla kom. Yesus yubu ka'erop komne wamlari, maneri lelamla,” aro el sembe log senelamek.   
\p
\v 27-28 Wene aro log senelamek aghana nimi nhon si Barnabasti, “Saulus yepnun” aro Saulus poa Yesusti wepto pogsiog nimi tanekoag payaog. Payaogti ambarelamsiogti, “Nimi ene 'Damsyik punun,' aro inaag palamoag agha Yesus el whingag lag taori, yubu lebo. Elag yubu leboba, Saulus as Damsyik wamoa Yesus sembe log kom uro Damsyik nimiag ambarelamsio,” seog. Saulus babe Yesusti wepto pogsiog nimi tanekoap nhon wamek. Wamekti, Saulus as Yerusalem nimi wamekne nusamag agha sop-sop pang yang ulamogti, log kom uro “Nia Mangkina Saelbamsilne si Yesusti pognel,” aro ambarelamsiog.   
\p
\v 29 As Yerusalem Yahudi nimi wameknena, Yahudi nimiri ul palamekne sunsunum uro saelba ulamekpa, Yahudi nimi agha Yunani nimiri ul palamekne sunsunum uro saelba ulamek nimi babe wamek.\f + \fr 9:29  \ft Yahudi nimi niri Allah omeklamek aghana, Yahudi yubu lerop nimiri ul palamekne nhon, Yunani yubu lerop nimiri ul palamekne babe nhon.\f* Yahudi nimi agha Yunani yubu lelamek nimi tanekoap Saulusap Yesus sembe yubu lel talamek. Yubu lel talameka sembe Yunani yubu lelamek nimi tanekori, “Saulus obukap,” senelamek.  
\v 30 “Obukap,” senelameka elkabo Yesusag “Sikne” aro seneragtop nimi el taekti, sindi el poa Kaisarea pabiekti, “Tarsus pululam,” aro poghek.  
\v 31 Poghekti wamekpa, Yesusag “Sikne” aro seneragtop nimi mog so'o Yudeaap, Samariaap, Galileaap wamek nimi ni wana aingniro wamek. Nia Mangkina Salehiropne ponekori yubu sunsunum uro ul palamekpa, Allah Eldamne Yame Walingeri sin yeplamsiogpa, sin mikip talamekti, Yesusag “sikne” aro seneragtop nimi maikno talamek.   
\s1 Petrusti Eneas wali nembaogti, Tabita kamag nembaogha (9:32-43)  
\b  
\p
\v 32 Wamekpa Petrus neneko as kanero wamekne kemero poa palamsiogti, Allahri wepsiog nimi Yesusag “Sikne” aro seneragtop nimi as Lida wamekag piog.  
\v 33 As Lida aneko palamogpa, nimi nhon si Eneas nong kikiplobogpa, heng kun tai buka tau buka ulamogha heng kun lin bare aeag taogti malamog.  
\v 34 Aeag taogti malamogpa, Petrusti Eneasag yubu lelamogti, “Eneas, nangkae. Allahri, 'Taulbahimendi, saelbamsululam,' aro wepto poghogne Yesus ponekori wali nemban uaghel. Pukmendi ae kolo togtoae,” seog.  
\p Wene seog abeneko pere wali taogti, pukogti, sekamog.  
\v 35 Wali taogpa, nimi as Lida wamekneap, as Saron wamekneap kembaekti, mali-malia ulamekne libekti, Nia Mangkina Saelbamsilne Yesus agha “Sikne” aro nimi niri seneraglamek.   
\p
\v 36 Mog so'o eneag as nhon sina Yope babe wamog. As Yope kelabo nhon sina Tabita Yesus yubu ka'ero ulamog kel nhon wamog. Kel ene Yahudi yubuag sina Tabita, aghana Yunani yubuag sina Dorkas alamek.\f + \fr 9:36  \ft Yunani yubuag Tabita sina Dorkas, pham rusa aro engerop.\f* Eldi wali-walia nimiag ulamogti, nimi sae agha orogne yeplamsiog.  
\v 37 Yeplamsiog aghana, nikna niklamogti tebaog. Tebaogpa nimi teptoba aneko mag a'elero ae tika alikinagneag palingkiek.  
\v 38 Ae tika alikinagneag palingkiekti ka'elamekpa, “As Lida Yope peramag Petrus neneko yaldi wamla,” ana ka'ebaek. Ka'ebaekti Yesus yubu ka'ero ulamek nimi tanekori nimi phende pogsiekpa, Petrus wamoghag yarekti, “Elem-elem as Yope yalulam,” aro molbarek.  
\v 39 Petrus yubu ambattekne ka'ebaogti, elemag sekom agha nelebahiog. Nelebahiogpa, piekti Petrus enero ae tika alikinagneag poa waelbaek. Waelbaekpa yingkina kemelamoghag agha kelabo kaldam kelabo nimi teptoba kanero sekamek. Sekamekti, nongag enektop ag Dorkas kamag wamogti wibatsiog ag toro Petrusag pebarekti engelamek.  
\v 40 Engelamekpa Petrusti, “A'un ni lambalulom,” seogti, yabu sanukto pulingkina Allahag molona molbaog. Molbaogti nimi teptoba anekoag kembiagha, “Tabita, puke!” seogpa, haing kwelekaogti, Petrus kembaogti, pukog.  
\v 41 Pukogpa, Petrusti kel eneko sae saelbamogti, yepto toro sekirog. Sekirogti Allahri wepsiog nimi Yesusag “Sikne” aro seneragtop nimiap, kaldam kelabo tanekoap yopsiogti, Dorkas kamag taog kel eneko sin saeag tatsiog.  
\v 42 Sin saeag tatsiogpa, Dorkas kamag taog yubu eneko as Yope sabo taogpa, nimi maikno tanekori, “Yesus sik uro Nia Mangkina Saelbamsilne,” aro seneraglamek.  
\v 43 Petrus neneko as Yope wamogti, nimi nhon si Simon pham sapi kon logto mektopneap ik etbare undo wamdek.   
\c 10  
\s1 Allah arukna Malaikat nhon Kornelius wamoghag kulukulaogha (10:1-8)  
\b  
\p
\v 1 As Kaisarea nimi nhon sina Kornelius wamog. Kornelius ponena, Roma nimi yin saleropnang kong-kongne wamek aghana, teng tombare yin saleropnang sembe sikindo wamog. Elap, elkaboap, el umag wamek nimiap sembe “Italia Nimi Yin Saleropnang” aro engelamsiek.  
\v 2 Elap eldi aeag wamek nimiap Allah yubu sunsunum uro ulamekti, Allah omeklamek. Eldi nimi sae agha orogne yeplamsiogti, sop-sop Allahag molona mololamog.  
\v 3 Ik nhon sum heng taolbaogti, sin tanep peram haing uamna kwelekamna senenag agha tibin uro kemelamogpa, Allahri Eldamneri arukna malaikat nhon poghol aogne yaogti, yubu lelamogti, “Kornelius, nangkae!” seog.  
\v 4 “Kornelius, nangkae!” seogpa, Allah arukna malaikat Korneliusti ibogti, logti, “Nani, anna tane sa'a sembe yalamdi,” seog.  
\p Wene seogpa, Allah arukna malaikat anekori, “Andi Allahag molona mololamlamne Allahri ka'elamlaba, andi nimi sae agha orogne yeplamsilamne babe Allahri iyangkeldi tiplengkangkel. Ni ulamlamne sembe Allahri kembangkeldi, 'Walia aghabog na sembe ulamla,' senelamla.  
\v 5 Wene nimi etbare undo pogsimenba, as Yope piikti, nimi si Simon, si nhon Petrus, pone enel pukang.  
\v 6 Simon Petrus poneko elkae Simon pham sapi kon logto mektopne poneri aeag mag longorop mag nubunge laut libunag sorop ae eneag wamla,” seog.  
\v 7 Ambarogti, Allah arukna malaikat aneko piogpa, Kornelius poneko arukna phendeap, yin saleropne el yae ua uropne Allah yubu sunsunum uro ulamogneap yopsiog.  
\v 8 Yopsiogti, “Allah arukna malaikat yaldi, yubu wene ane ambatnelne sunsunum uro, as Yope Simon si nhon Petrus wamlange enel pululom,” aro pogsiog.   
\s1 Petrus haing uamna kwelekamna senenag agha Allahri yubu ambarogha (10:9-23a)  
\b  
\p
\v 9 Korneliusti pogsiogpa, sin wilindi abeneko as Yope peramag inaag palamek abeneko Petrus ae siro heng ik mol-mol aloghogpa, “Ae imaghag molona molbanun,” aro waelbaog. \fig Petrusti “Allahag molona molbanun,” aro ae imaghag waelbaog.|alt="Petrus naik ke atap rumah dengan maksud, “Saya akan meminta permohonan kepada Allah”" src="cn01944C.tif" size="col" copy="David C. Cook" ref="Pogsiognang 10:9" \fig*  
\v 10 Waelbaogti Allahag molona mololamoghag agha kwaneng yo uaogpa, “Kwaneng tehene,” sembaog. “Kwaneng tehene,” sembaogpa, kwaneng el sembe togto yoroba ingilamekpa, “Haing uamnaro, kwelekamnaro,” senenag agha kemelamoghag agha kekneba uaog.  
\v 11 Kekneba uaogpa, imag sip tiwalengelamoghag agha im phoro ag sangaroba ag ingkisag-ingkisag haing tombare kerekto saog urop ag pelengel alamog.  
\v 12 Pelengel alamogpa, lomag tao wamekpa, ipsiog ana lebe aroba yan tombareri yabiropneap, mon magti yabiropneap, winang im toman yabiropneap ipsiog.  
\v 13 Pelengel alamog pere ka'elamoghag agha yubu lelamogti, “Petrus pukmendi, lebe aroba tane oro yobamendi telamlulam,” alamog.   
\p
\v 14 Wene alamogpa, ka'ebaogti, Petrusti, “Nani, samenag Allahri nunisa Musaag yubu ambarelamogti, 'Lebe aroba undop-undoba saogha a'un Yahudi nimiri oro tululom kom,' aro ambarog.\f + \fr 10:14  \ft Allahri samen Musaag, “Allah whingag sembenga pabimunagti, lebe aroba undo-undoba tululom kom,” aro ambarog. Ambarogpa, Musari nen tipto mome toro pibogpa, Yahudi nimiri salelamekti, ul palamek.\f* Ane sembe, na ik nhon babe sop undoba saogha telamna komdi, wene babe mali sembandi, tunun kom,” seog.   
\p
\v 15 Wene seogpa, yubu kaebaog yubu enekori nen lelamogti, “Allahri yubu, 'Wali nembandina, wene tululam,' sel ane sembe, 'Lebe aroba sop tane mali, nimiri tenep kom,' aro andi sap wene seheng kom,” seog.   
\p
\v 16 Ag sangaro kekneba ulamogha ot sumeneko agha ik wilindi elag el nembaogti, imag nen waelbaog.  
\v 17 Undo unuaogpa, kembaogne ane sembe Petrusti, “Sa'a sembe ual?” aro seneragto pulamog abeneko, nimi Korneliusti, “As Yope pululom,” aro pogsiog nimi abeneko ae Simondi ae ibekti, ae leka kanero solingkirobag ina siramag sekamek.   
\p
\v 18 Ina siramag sekel pina nimi nhon yobekti hailamekti, “Nimi asag nimi nhon sina Simon Petrus ae eneag yingkina ua unne no?” aro haibaek.   
\p
\v 19 Wene aro hailamek abeneko pere Petrusag kekneba uaogpa, kembaogne ane sembe “Sa'a sembe ual?” aro seneraglamog. Seneraglamog pere Allah Yame Walingeri Petrusag yubu lelamogti, “Petrus nangkae, an nimi wilindiri an elangkeang.  
\v 20 Sekom agha kulukamendi, ta'ap sen koma sinap nhon pululam. Nari arukahinba, sinna yang,” seog.   
\p
\v 21 Wene seogpa Petrus kulukaogti, nimi tanekoag yubu lelamogti, “Na a'undi elamnelomne nana ane. Sa'a sembe yalomdi elamnelom?” seog.   
\p
\v 22 Wene seogpa sindina, “Nu nuni yin saleropnang teng tombare saelbamsilne sina Korneliusti nu pogsio. Elna Allah omektopne, Allah yubu sunsunum uro walia aghabog uropne wamla. Yahudi nimi niri el sembe 'walinge' sembamang. Allahri Eldamneri arukna malaikat nhon poghol aogne ponekori ambaroa sunsunum uro pogsioba, yabongena an enelaghukap aro yaap. Andi nunap nhon piberi, nuni Koreneliusti aeag wa'iberi, lepmenne nu nuni ka'ebalul,” aro ambarek.   
\p
\v 23 Wene aro ambarekpa, Petrusti yubu lelamogti, “Wali, na wamna aeag mabukap,” aro ambatsiogpa, aeag wa'iek.  
\b  
\s1 Simon Petrus poneko Kornelius wamoghag piogha (10:23b-33)  
\b  
\p Mabeka lukunap Petrusap el enel pieknangap nhon palamekpa, as Yope nimi Yesusag “Sikne” aro seneragtop nimi babe Petrusap nhon piek.  
\v 24 Sin inaag mabekti, palamekpa Kornelius ponekori eldi kelmabo meap, elkaboap, eldo yabo, ilipsabo yopsiogti, Petrus tibogto wamekag as Kaisarea Petrus piog.  
\v 25 Tibogto wamekag Petrus piogpa, Kornelius ponekori Petrus yanag amupto malingkina kibog.  
\v 26 Kornelius ponekori Petrus yanag amupto malingkina kiplamog aghana, Petrusti sae kiliro toro sekirogti ambarelamogti, “Nangkae sekelingki! Na babe an saog uro nimi agha yan,” seog.   
\p
\v 27 Wene seogpa, Petrusap yubu leple aeag wa'alamdekpa, nimi maikno tekne amek.  
\v 28 Tekne amekpa, kembahiogti, Petrusti yubu ambarelamsiogti, “Nangkabo a'un el wamlom, na Yahudinge wamna aghana Yahudi nimi nubunangdi, 'Yahudi sisa kom nimiap hale nenep tangto, nimi pali nenep tangkamseng kom,' aro ambarelamsiek. Aghana Allahri seneropne na whingag lag taongena, Allahri seneropne, 'Nanag yaukang,' senelamlange nimi etneri karebanep kom,” seog.  
\v 29 “Ane sembe Nai andi moloro 'Yalulam,' seomba, na kom sen koma yan. Nai andi 'Yalulam,' seomne sa'a sembe?” seog.   
\p
\v 30 Petrusti wene seogpa Korneliusti, “Ne sum eneko heng taolbaori, sin tanep peram, wene saog, na aeag agha Allahag molona mololamno. Mololamnori kemelamnoag agha kabuni nhon ag heng-henga tingiropne enekamori, na whingag sekamo.  
\v 31 Sekamori nanag yubu lelamori, 'Kornelius, andi nimi saeag agha orogne yeplamsilamdi, molona mololamlamne Allahri ka'elamlari, wamla.  
\v 32 Ane sembe nimi arukahimenba, Yope piikti, nimi si Simon Petrus enel pukang. El wamla aena pham sapi kon logtoba mektopne poneko sina Simondi aeag mag longorop mag libunag wamla,' aro Allah arukna malaikatti ambatneo.  
\v 33 Ane sembe nari elemag nimi pogsinoba, nai an tol pikeongba, an wana waliapti, an nanag yalam. Wene wali yalamba, nu babe Allah whingag longoro wamapti, Nuni Allahri 'Yubu ambatsululam,' aro pogkeonge nu babe ka'ebaukapti, nu babe lelero ambatsi,” aro Korneliusti Petrusag molbaog.   
\s1 Petrusti Yesus yubu ambatsiogha (10:34-48)  
\b  
\p
\v 34 Wene seogpa Petrus nenekori, “Allahrina 'Nimi ane Yahudi sisa nimi to, kom to,' semban koma nimi ni sembe o'ona sembamsildi wamlange, sumeneog el tandi, sik semban.  
\v 35 Nimi ni sikininge as mog so'o a'ero-a'ero urop nimi Yahudi nimi sisa kom nimi aghana, Allah yubu sunsunum uro walia ulamnari wamnaba, Allahri o'ona sembamsildi wamla,” seog.  
\v 36-38 Petrusti nen tipto ambarelamsiogti, “Nangkabo, Yesus Nia Mangkina Saelbamsilne nu Israel nimiap nhon palamububa, Allahri el pere agha yubu ambarelamsiogpa, elag uro yabiogne sembe a'un ni el wamlom. Yubu walinge ambatsiognena, Allahri 'Nanap nimiap ma'ap taukap,' aro Yesus wepto poghog. Wepto poghogpa, Yohanesti 'Allahri, “Saelbamsululam,” aro wepto poghogne yan ual, ane sembe mali-malia ulamlomne lipsimundi, Allahag samoro yalulom,' aro nimi maghag pelengelamsiog. Yohanes ponekori, 'Allahri wepto poghogne yan ual,' aro maghag pelengelamsiogti, Yesus babe maghag pelengkaog abeneko pere Allahri 'Taulbahimendi, saelbamsululam,' aro Yesus Nasaretne poneko Allah Eldamne Yame Walingeap Eldamne mikipneap elag pibog. Elag pibogpa, Galilea so'oag agha Yudea so'oag tala-tala palamogti, wali-walia aghabog ulamog. Unulamogpa, Allahri el yeplamogpa, phiari saelba ulamsiogne wali nenelamsiog. Yesusti unulamogne nene sembe nu ni el wamsil.  
\v 39 Mog so'o Yudeap as Yerusalemap Eldi ulamogneap, ulamongeap Nu nang eneri haingdi ibobori, ambarelamsiap. Walinge aghabog ulamo aghana, nimiri kalag siplobongdi, ya'ag olobong.  
\v 40 Olobong aghana, ik wilindip sum teptobag agha Allahri kamag nembao. Kamag nembaoba, Allahri, 'Nimiag lag nenep talul,' sembaogne sunsunum uro lag nenel talamo.  
\v 41 El Allahri kamag nembaonge lag nenel talamoa nimi niag kom. Ot nu Allahri samenag wepsiog nimi abenekoriog haingdi babe ibobo, kwanengap magap babe nhon tebori, ambarelamsiap.  
\v 42 El nunap nhon wamoboa, nunag yubu lelamori, 'Nimiag ambarelamsumundi, “Yesus poneko Allahri wepto sekirog. Wepto sekirogpa, amik ualulne, nimi teptopneap, kamagneap, Yesusti nimi poloro wepsileri, tam karebalul,” aro ambarelamsululom,' aro Yesusti nu pogsio.   
\p
\v 43 Pogsioba, wene yubu ambarelamsiapnena, samenag Allahri yubu silimu tiplamek nang ni wamekneri Yesus sembe ambarelamsiek. Yesus sembe ambarelamsieknena, 'Nimi etneri Elag “Sikne” aro seneraghikpa, Allahri kembahileri, “Nari wepto poghol ahinge ponekoag wali senelamang,” aro malia uroba tam orog nembalul,' aro yubu tiplamek,” aro Petrusti ambarelamsiog.   
\p
\v 44 Wene aro Petrusti ambarelamsiogpa, Petrusti yubu ka'elamek nimi tanekoag Allah Eldamne Yame Walinge sin nongag kulukul aog.  
\v 45-46 Allah Yame sinag kulukul alamogpa, a'erop-aerop yubu Allah Eldamne Yame Walingeri tarelamsiog yubuag lero Allah omeklamek. Omeklamekpa, Yahudi nimi agha Yesusag “Sikne” aro seneragtop nimi Petrusap nhon yaeknang tanekori babe Allahri Eldamne Yame Walinge tarelamsiogha ibek. Ibek nang taneko Yahudi nimi nengabo kon karebel dalamek nang Yesusag “Sikne” aro seneragtop nang wamek. Wamekti ibekti, as Yope agha Petrusap nhon yaek nang tanekori, “Yahudi nimi kom aghana, sinag babe Allahri Eldamne Yame Walinge tarelamsil,” aro logti, “Yaghe,” alamek.\f + \fr 10:45-46  \ft Yahudi nimiri samenag seneraglameknena, “Allahri nu Yahudi nimi aghabog o'ona sembamsildi, Allahri nunag agha Eldamne Yame Walinge tatsinep,” aro seneraglamek.\f* Yahudi nimiri kemelamsiekpa, Yahudi sisa kom nimiri a'erop-a'erop yubu Allah Eldamne Yame Walinge tarelamsiog yubuag lelamekpa, Petrusti,  
\v 47 “Kembahimun. Nun saog uro nimi tane babe Allah Eldamne Yame Walinge sinag tahil. Ane sembe nimi tane Yesusag 'Sikne' aro seneraghik tanena, maghag pelengehinne etneri kom senep?” seog.  
\v 48 “Etneri kom senep?” seogti, Petrusti nen lelamogti, “Nimi tanekori Yesusag 'Sikne,' aro seneraglamekne sembe maghag pelengkipsululom,” seogpa, maghag pelengkahiek. Pelengkipsiekpa nimi tanekori Petrusag “Ik etbare nhon wamukap,” aro molbaekpa, Petrus wamog.   
\c 11  
\s1 Petrusti Korneliusap haiptarekne sembe elkabo yogne Yerusalem wamekne ambatsiogha (11:1-18)  
\b  
\p
\v 1 Petrus as Kaisarea wamogpa, Yesusti wepto pogsiog nimi Petrus elkabo yogne babe mog so'o Yudea wamek. Wamekpa, “Yahudi sisa kom nimi babe wene Allah yubu ka'elamangdi, Yesusag 'Sikne' aro seneraglamang,” alameka Yesusti wepto pogsiog nimi yogneap Yesusag “Sikne” aro seneragtop nimi mog so'o Yudea wamek nimi tanekoapti ka'ebaek.  
\v 2 Ka'ebaek aghana Yahudi nimiri senelamekne, “Allahri samenag ambatsiogha sunsunum uro nimi nengabo kon karebel talamik tanena, Allahap ma'ap tangtop nimi\x - \xo 11:2  \xt Sumbaogha 17:9-14\x*,” senelamek. Ane sembe, Petrus mog so'o Kaisarea laplobi agha as Yerusalem yingkiogpa, Yahudi nimi as Yerusalem wamekne Petrusag piekti, yubu lelamekti,  
\v 3 “An Yahudinge, Allahri samen arukahiogne sunsunum uro kon andinge karebaghaek aghana, Yahudi nimiri uaheng kom seneropne uaom. Sin Yahudi sisa kom nimi tanena nengabo aneko 'Nunap Allahap ma'ap taukap,' aro kon karep tangtop kom. Kon karep tangtop kom aghana, sindi aeag piomdi, kwaneng nikag teom. Sa'a sembe Yahudi nimiri uaheng kom seneropne nene uaom?” alamek.\f + \fr 11:3  \ft Yahudi nimiri kon kareptangtopne samenag uropne noropto no'obag saelbamekti, nengabo me kere kon kareplamsiek. Kon kareplamsiek kom nimi sembe “Allahap ma'aptangtop urop kom nimi,” senelamek. Yahudi sisa kom nimiap nimi pali neneptangto ulamek kom. (Pogsiognang 10:28)\f*   
\p
\v 4 Wene alamekpa, Petrusti, anam alniro yabioghag agha uro yabiogne ni ambarelamsiogti,  
\v 5 “Na as Yope Allahag molona lelamnori, 'Haing uamna kwelekamna' senenag agha kemelamnoag agha kekneba nanag uao. Nari kemelamnoag agha ag sangaroba ag ingkisag-ingkisag haing tombare kerekto saog urop ag imag agha na saramag pelengel alamoa imno.\x - \xo 11:5  \xt Pogsiognang 10:11\x*  
\v 6 Pelengel alamoba, lomag kemelamnoag agha lebe aroba yan tombareri yabiropneap, lebe aroba nimiri pia urop komneap, lebe aroba mon magti yabiropneap, winang sin im toman yabiropneap imno. \fig Petrusti, “Kemelamnoag agha ag saogha sangaroba na saramag pelengel alamoa imno,” seog.|alt="Petrus berkata, “Sementara saya melihat saya melihat yang seperti kain terbuka sedang turun di depan saya.”" src="cn01945C.tif" size="col" copy="David C. Cook" ref="Pogsiognang 11:5-6" \fig*  
\v 7 Kemelamnoag agha imag agha nanag yubu lelamori, 'Petrus sekmendi, wamlange tane oro yobamendi, telame,' alamoa ka'ebano.   
\p
\v 8 Wene alamoa ka'ebanori, narina, 'A, Nani, lebe aroba taneko sembe samen Allahri, “Tululom kom,” seogpa, samenag babe nari pamdi tihi komdi, sumene babe 'Mali,' sembandi, tunun kom,' seno.   
\p
\v 9 Wene senoba, nen ik phendepne imag agha yubu ka'ebano yubu enekori lelamori, 'Allahri yubu, “Wali nembandi, wene tululam,” alamla ane sembe, “Lebe aroba sop tane mali, nimiri tenep kom,” aro andi sap wene seheng kom,' seo.  
\v 10 Undo unuaonge nene ik wilindi unuaori, nen ag sangaroba ni lomag wamonge imag agha kiliro tobo,” aro Petrusti Yahudi nimiag ambatsiog.   
\p
\v 11 Petrusti nen tipto yubu ambarelamsiogti, “Kiliro toboba, wamnoag agha nimi wilindi as Kaisarea agha na wamnoag pogsioba, yaongdi, na wamno aeag ina siramag sekamong.  
\v 12 Sin sekamongba, Allah Yame Walinge nenekori na ambarelamneori, '”Yahudi nimi to kom to,” semban koma, sinap nhon pululom,' seoba, nangkabo no'opbare tane wamang nangap nhon pibo. Nu nhon as Kaisarea pibori, nimi wilindi pogsionge ponekori aeag wa'ibo.  
\v 13 Wa'iboba, Kaisarea nimi enekori nunag ambarelamsiori, 'Allah arukna malaikat nari aeag wa'al aori, nanag yubu lelamori, “As Yope nimi nhon Petrus, nen si nhon Simon wamla. 'Simon Petrus poneko enel pukang,' aro nimi pogsululam.  
\v 14 Pogsimenba, enero poa yaikpa, Simon Petrusti a'unag yubu ambatsilul. Yubu ambatsilenge wali uro ka'eapmundi, 'Sik' aro seneragmunba, 'Mali-malia ulamlomne sembe opsileag,' aro Allahri wepto poghol aogne ponekori taulbahilul,” aro Allah arukna malaikatti nanag ambatneo,' aro Kaisarea nimi enekori nebatneo,” aro Petrusti ambatsiog.   
\p
\v 15 Nen tipto Petrusti Yahudi nimi mog so'o Yudea wamek nimi ambarelamsiogti, “Kaisarea nimi enekori nebatneoba, nari yubu ambarelamsinoag agha Allah Eldamne Yame Walinge neneko samenag nunag kulukulaog saog uro, sinag babe kulukulao.  
\v 16 Kulukulaoba, Yesus Nia Mangkina Salehiropneri samenag lebogne ane, 'Yohanesti samenag nimi maghag pelengelamsiogne mag moag pelengkipsiog aghana, Allahri Eldamne Yame Walinge a'unag pelengkatsilul,'\x - \xo 11:16  \xt Pogsiognang 1:4-5\x* seogne nene el wamnori, wamno.  
\v 17 Nangkabo, nuri sik uro seneraglamapne, '”Mog so'oag nimi taulbahimendi, saelbamsululam,” aro Allahri wepto poghol aogne Yesus,' aro seneragoboba, Allahri Eldamne Yame Walinge nunag tatsiog. Nunag tatsiogne saog uro sin nimi taneko babe tatsio aghana nari welaro Allahag, 'Tatsiseng kom,' sehene?” aro Petrusti elkabo Yahudi sisa nimiag ambatsiog.   
\p
\v 18 Ambatsiogpa, ka'ebaekpa, wana wali tahiogpa, Allah omeklamekti, “Yaghe! Allahri Yahudi sisa kom nimi babe yeplamsildi, 'Allahri opsileag,' aro sin Yahudi sisa kom nimiri malia ulamangne lililamsiang. Allahri yeplamsilba, malia ulamangne lililamsiangdi, Elag omeklamangba, Allahri opsulul kom. Ya'ag kamag wamukang,” alamek.   
\s1 As Anthiokia nimi Allah yubu ka'ebaeka (11:19-30)  
\b  
\p
\v 19-20 Petrusti “Yesus sembe ambarel phinun,” aro as Kaisarea anam pin komag, samenag Stefanusti Yesusag sikne aro seneraglamogne sembe Yahudi nimiri Stefanus ya'ag obek.  
\p Stefanus obekti, Yesusag “Sikne” aro senaragtop nimi yogne babe Yahudi nimiri sare nelepto olamsiek. Olamsiekpa, Yesusag “Sikne” aro seneragtop nimi taneko nimi anabi tang-tang piek. Nimi anabi tang-tang piekagna, nhon-nhon a'el talamekti, mog so'o Fenisia palamekpa, as Antiokhia inagha tang-tang piek. Nimi orange mag alip toman heng pulingkirobag sip palamekti, mag longo kanektop mog so'o Siprus piek. Piek abeneko pere yubu walinge Yesus sembe ambarelamsiek. Yesus yubu ambarelamsiek, aghana ot Yahudi nimiag aghabog yubu walinge ambarelamsiekti, Yahudi sisa kom nimiag ambarelamsiek kom. Undo unuaekpa, yog nimina, mog so'o Siprus nimiap, mog so'o Kirene nimiapti yubu walinge Yesus sembe ka'ebaekti, as Antiokhia piekti, Yahudi nimi agha Yunani nimiri saelba uropne ul palamek nimiag\x - \xo 11:19-20  \xt Pogsiognang 9:29\x* yubu walinge ane tipto ambarelamsiek. Yubu walinge ambarelamsiekne, “Allahri, 'Mog so'oag nimi taulbahimendi, saelbamsululam,' aro wepto poghol aogne Yesus nunag yaog,” aro ambarelamsiek.  
\v 21 Nia Mangkina Salehiropne ponekori sin yeplamsiogpa, nimi maikno Yesus sembe yubu ambarelamsiek. Ambarelamsiekpa, ka'elamek nimi tanekori mali-malia ulamekne lililamsiekti, Nia Mangkina Salehiropne Yesusag “Sikne,” aro wanaag seneraglamek.   
\p
\v 22 As Yerusalem Yesusag “Sikne” aro seneraglemek nimiri ka'elamekti, “As Antiokhia Yahudi nimi agha Yunani nimiri saelba ulamangne sunsunum uro ul palamang nimi maiknori Yesusag wana seneraglamang,” alameka ka'ebaek. Ka'ebaekti, Yahudi nimi Yesusag “Sikne” aro seneragtop nimi Yerusalem wamekne tanekori, “As Antiokhia nimiag uro yabalamlange kemel phululam,” aro nimi si Barnabas poghek.  
\v 23-24 Barnabas neneko kulomag Allah Eldamne Yame Walingeri wa'iogti, teknero ua ulamogpa, Barnabasti wanaag Yesusag “Sikne” aro to'opto seneraglamogti, walia aghabog ulamog. As Yerusalem nimiri Barnabas poghekpa, as Antiokhia piogti, kemelamsiogpa, “Allahri sin sembe wali sembamsildi, Eldamne seneragna sunsunum uro walia tarelamsil,” aro Barnabas awi sembaog. Awi sembaogti, wenelamsiogti, “Wene Yesusag wana seneraglamlomne nene wali. Wana phende seneragseng kom. 'Yesusti ya'ag saelbamsilul,' aro a'ero-a'ero wanaag seneraglamlulom,” aro wembahiog. Barnabasti Antiokhia nimi wana wali uro wenelamsiogpa, nimi maiknori malia ulamekne lipsiekti, Nia Mangkina Salehiropne Yesusag “Sikne” aro seneraglamek nimi maikno tangto palamog.   
\p
\v 25 Wameka Barnabas neneko, “Saulus ebanun,” aro as Tarsus piogti,  
\v 26 Saulus ibogti, samoro as Antiokhia enero payaog. Enero payaogti, as Antiokhia Yesusag “Sikne” aro seneragtop nimiap wamekpa, Saulusap Barnabasapti Allah yubu samenag ambatsiogne pere agha Yesus sembe tibin nenero nimi maikno ambarelamsirekpa, heng kun nhon taog. Yesus yubu ka'ero ulamek nimi sembe samenag yum-yum as Antiokhia asag anea sisa Kristen aro engelamsiek.\f + \fr 11:26  \ft Yesusag sikne aro seneragtop nimi Yesus sembe, “Allahri samenag salag lebogti, 'Mog so'oag nimi mali-malia uahiropne sembe “Opsineag,” aro Na Allahri nimi nhon pogneba, nimi taneri mog so'oag nimi taulbahileri, saelbamsilul,' aro pognun,” aro seneraglamogne sembe “Kristus” alamek. As Antiokhia nimi maiknori Yesus sembe maiknoro “Kristus” alameka, yog nimiri sin sembe “Kristus nimi” aro “Kristen” aro engelamsiek.\f*  
\v 27 Wamekpa, Yerusalema Allahri yubu silimu tiptop nimi as Antiokhia yaek.  
\v 28 Yaek nimi taneko nhon sina Agabus Allah Yame Walingeri el pere agha yubu lelamogti, “Mog so'o Roma nimi saelbamsiek mog so'o niag\f + \fr 11:28  \ft Yunani yubuag “mog so'o niag” aro mome torop aghana, Roma nimiri saelbamsiek li enekoag, Roma nimiri peramag mog so'o ni saelbamsiek. Weag mog so'o nhon Roma nimiri saelbamsiek kom tanena, Yunani yubu lerop nimi mog so'o ane sembe ekon.\f* kwaneng yo nubunge waelbalul,” aro ambatsiog. Ambatsiogne nene yubu sia leropne nubunge Kaisar\f + \fr 11:28  \ft Kaisar enena nimi si kom. Ene nimi sisag. Yubu sia leropne nubunge Kaisar samenne teban tanena nimi nubunge nhon lunuro el si lunumna Kaisar waelbanep.\f* sina Klaudius nimi saelbamsiog li kwaneng yo neneko waelbaog.  
\v 29 Kwaneng yo neneko waelbaogpa, Yesus yubu ka'ero ulamek nimiri, “Nungkabo Yesusag 'Sikne' aro seneragtop nimi Yudea wamangne kwaneng yo maiknori, nuri yepsukap,” aro yubu saekag lebek. Yubu saekag lebekti, Yesus yubu ka'ero ulamek nimi ni as Antiokhia wamekneri saeag phelekto wamogha sunsunum uro, “Yudea nimi tatsinun,” aro kal ma'al poloro palilamsiek.  
\v 30 Poloro palilamsiekpa, “Sikindoyabo wenehiropnang\f + \fr 11:30  \ft Indonesia yubuag “penatua” alamang aghana samenag Allah yubu mome tolamek nimiri Yunani yubuag agha yubu kiki ane mome tolamekti, seneragna phende wamla. Seneragna nhon, “nong nimi,” aro “penatua” alamek. Seneragna nhon, “Sikindo wenehiropne,” aro, el babe “penatua” aro engelamek.\f* Yudea wamangneag tarel phululom,” aro Barnabasap Saulusap pogsiekpa, pabalamdek.   
\c 12  
\s1 Herodesti Yesusti yubu ka'erop nimi olamsiogha (12:1-5)  
\b  
\p
\v 1 Kwaneng yo nubunge waelbaog li enekoag Roma nimi saelbamsiogne Kaisar Klaudius umag Yahudi nimi sembe yubu sia leropne nhon babe sina Herodes wamog. Yubu sia leropne Herodes nenekori “Yesusag 'Sikne' aro seneragtop nimi seklebaukang,” aro ilipsabo yin saleropnang pogsiro “Haing sae kaupto poa yalamsululom,” aro ambarelamsiogpa, elag poa yalamsiek.  
\v 2 Nimi elag poa yalamsiekne anabiag agha nimi nhon sina Yakobus, Yohanes eldo wamog. Herodesti el umag nimiag, “Yakobus neneko karoghag agha karepto oplulom,” aro arukahiogpa, ya'ag obek.  
\v 3-4 Obeka sembe Yahudi nimiri “Wali,” aro awi senelamekpa, Herodesti ipsiogti, “Petrus babe saelbalulom,” aro arukahiog. Herodes ilipsabori Petrus saelbaek sumenena, Yahudi nimiri kwaneng roti walerop komne tero ik etpare Allah omekto wameka,\f + \fr 12:3-4  \ft Allahri Israel nimi ambatsiogne, Memnang 23:5-6 ag agha mome tolamogne ane, “Wal selekne, tanggal 14 sumeneko heng purukanebag alnilamlulomnena, Allahri Israel nimi opsin koma Mesir nimi opsiogha sembe seneraglapmundi, Allah omeklamlulom. Kwelekalea, tanggal 15 sumeneko kwaneng roti walerop komne teropne alnibamunna, ik saekpare tero wapmuna, tanggal 21 sumeneko tero komoplamlulom,” aro mome toro pibog. Wal selekne tanggal 14 sumeneko, Indonesia yubuag “Paskah” alamang. Yahudi nimiri “wal selekne” alamangneap, nuri “wal selekne” alamapneap, nika-nika kom. Yahudi nimiri “wal selekne sina Nisan” alamangba, wilindip wal Maret anabi tom wal April anabiag uro yabalamla.\f* ik nhon sum eneko Petrus sae kaupto saelbaek. Petrus saelbaekti, kop aeag tolongolamekpa, Herodesti el umag yin saleropnang ao tara bare nangag ambarelamsiogti, “A'un ina siram sunuro nimi tombare-tombare yae wamlulom,” aro ambatsiog.  
\p Wene aro ambatsiogti, “Allah omekto kwaneng roti walerop komne terop li liogha Petrus tam ane nimi maikno whingag karebanun,” aro Petrus kop aeag tobongkibog.   
\p
\v 5 Petrus neneko kop aeag aneko wamogpa, Yesusag “Sikne” aro seneragtop nimi tanekori sol wali, wali uro, “Petrus yeplulam,” aro Allahag molona mololamek.   
\s1 Allahri Petrus kop aeag agha lambirogha (12:6-19)  
\b  
\p
\v 6 Herodesti, “Ambuhum nimi maikno wamika haingag agha tam karebaukap,” aro wamogpa, Petrus neneko sae tara-tara yin salerop nangdi saeap a'amsuro kaubirekpa, Petrus malamog. Sindi sae a'amsuro kaubirek haing aneko besi agha sorop haingag agha kaubirek. Petrus malamog ae lom ina siramag yin salerop nang nenne babe yae wamek.  
\v 7 Yae wamekti, wamekpa, Nuni Allahri Eldamneri arukna malaikat poghogne neneko Petrus malamoghag wa'iogpa, Petrus wamog ae lom eneko warelobog. Allah arukna malaikat anekori Petrus malamogha kaombaogti, “Nangkae, elemag puke,” alamog abeneko besi agha sorop haing sae kaubamek haing eneko loptangka timbaog.  
\v 8 Loptangka timbaogpa, Allah arukna malaikat anekori Petrusag yubu lelamogti, “Anenge uoghag nopna noptoba nopto amendi, yan wangana wangaro alulam,” seogpa wangkaog. Wangkaogpa nen lelamogti, “Ag nongagne enekto amendi, nanag sarenelebanululam.” seog.   
\p
\v 9 Wene seogpa, Petrus kop aeag anekoa lanaro Allah arukna malaikat nelepto lanalamogti, Petrustina, “Ot sik uro Allah arukna malaikati lobolanel,” semban koma, “Lenda malamna to,” senero Allah arukna malaikat nelepto lambaog.  
\v 10 Allah arukna malaikat nelepto palamogti, yin salerop nang ina siram tenap lomag tao weamekne phibom agha, nen tenap phendepne yae wamekne phioro asag lambanebag besiri soro lingnil oropneag palamdekpa, ina siram aneko mo kuptaog. Mo kuptaogpa, lanaro palamdekti, ina ingkisag anekoa palamdekti, Allah arukna malaikat anekori Petrus laploa piog.  
\v 11 Ina ingkisag aneko pirekti, Allah arukna malaikat anekori Petrus laploa piogpa, wana hegkaogti, “Yahudi nimiri na 'Obukap,' sembamangdi wamang, aghana Allahri eldi arukna malaikat arukalba, Herodes saeag agha Nani Allahri taulbanelba, wene sik uro el tanel,” seog.   
\p
\v 12 Undo wene seogti, seneraglamogti, Yohanes si nhon Markus ilin Mariari aeag piog. Ae neneko nimi maikno poloro tekne amekti, Petrus sembe Allahag molona mololamek.\x - \xo 12:12  \xt Pogsiognang 12:5\x*  
\v 13 Ae enekoag piogti, leka toroba ina siramag kaungkaogpa, “Etneri kaungulamla,” aro Maria arukna kelabo sina Rode nenekori kemel aog.  
\v 14 Kemel aogti Petrus yubu lelamogha ka'ebaogti, awi lelem ina kupna koma, “Nimi ambatsunun,” aro ae lomag piogti, “Petrus asag wamla,” aro nimi longoro tekne amekne ambatsiog.   
\p
\v 15 Ambatsiogpa sindina, “Anna serem saelbamlamdi, lelamlam,” aro wene alamekpa, eldina, “Ot sik,” seogpa sindina, “Allah arukna malaikatti Petrus piamlange\f + \fr 12:15  \ft Yahudi nimiri samenag seneraglameknena, “Allahri El arukna malaikat 'Mog so'oag nimi ni nhondi nhon, nhondi nhon piamsululom,' aro pogsiog,” aro seneraglamek. Undo seneraglamekti, “Allah arukna malaikatap, eldi nimi pia urop nimiap whing nhonog sao,” senelamek. Undo senelamekti, kelenekori yubu ka'elamekti, “Allah arukna malaikatti Petrus piamlange,” alameknena, “Petrus tebalne sembe Allah arukna malaikatti Petrus pia uropne neneko yalba, lelamla,” aro yubu lelamek.\f* yalba lelamla,” alamek.  
\v 16 Yubu undo lelamekpa, Petrusti ina kaungu-kaungu palamogha sembe ina kupto kemelamekpa, Petrus ina siramag wamogha ibekti, “Logti, mane agha yal,” sembaek.  
\v 17 “Logti, mane agha yal,” sembaekpa, Petrusti, “Yubu kom talulom,” aro sae maubitsiogti, “Nuni Allahri eldi arukna malaikat poglaba, kop aeag agha enero poa lambitnelba yan,” aro ambatsiog. “Ambatsinne nene Yakobusap\f + \fr 12:17  \ft Petrusti, “Yakobus ambatsululom,” seogne neneko Yakobus, Yohanes elkae kom. “Yakobus,” Petrus seogne nene Yesus ilipsae taptopne, Petrus yubu eptopne sao wamog. Yakobus, Yohanes elkae Herodesti nimiri obek (Pogsiognang 12:2).\f*, nungkabo Yesusag 'Sikne' aro seneraglamang nimi yogneap ambatsululom,” seogti, lamba as oraag piog.   
\p
\v 18 Lukunap yin salerop nang Petrus yae ulamekne tanekori, “Petrusag sa'a agha ualba, welaro lambal?” aro logti, sin mamun maikno haum aro lelamek.  
\v 19 Yin saleropnang taneko logti, sin mamun maikno haum aro lelamekti, wamekpa, Herodes nenekori, “Petrus ebalulom,” seogpa, sen-senna ebaek. Ebaekpa, orogti, Herodesti, “Yin salerop nang Petrus yae wamek nang payahilulom,” seogpa, payahiekpa, Herodesti hailamsiog. Hailamsiogti, “'Sindi saeag agha lambal,' aro opsululom,” seogpa, yin saleropnang orangeri, “Opsukap,” aro pabahiek.  
\p Undo Herodesti saeag agha Petrus Allahri lambirogpa, Herodes neneko mog so'o Yudea laplobi agha as Kaisarea piogti, wamog.   
\s1 Herodes Tebaogha (12:20-25)  
\b  
\p
\v 20 Herodesap mog so'o Tirus nimiap mog so'o Sidon nimiap sin iriktangto saog uro wamekti, Herodesti sin sembe yo senelamog. Yo senelamog aghana Herodesti mog so'oag agha sindi tisirik wamogpa, Tirus nimiap Sidon nimiap ma'aptaekti, “'Nimi nubunge Herodesap nunap tam wamlul kom,' aro elag yubu lel pukap,” aro piek. Elag piekti, nimi nhon si Blastus, yubu sia leropne Herodesti yubu eptopne ae lomag o'olamsiogne ponekoag, “Herodesap nunap ma'aptaukap,” aro samenag yubu yangaro lebekpa, Blastus sinag sip taog. Blastus sinag sip taogti, Herodesag yubu tipto ambarogpa,  
\v 21 Herodesti, “Sinag yubu lemnun,” aro yubu pibog. “Yubu lebukap,” seog sumeneko yaogpa, nimi nubu nimiri enektop ag enekaogti, elel molel aroba towalengkaogti, nimi nubunang salehiropnang purobag pulingkiogti, sinag yubu lebog. \fig Herodesti nimi nubu nimiri enektop ag enekaogti, el umag nimiag yubu lebog.|alt="Herodes mengenakan pakaian yang orang-orang besar pakai-[ss], (dan) dia berbicara kepada orang di bawahnya" src="cn01956C.tif" size="col" copy="David C. Cook" ref="Pogsiognang 12:21" \fig*  
\v 22 Yubu lelamogpa, ka'eamek nimi tanekori “Nunag wali sembahilul,” aro kibiang towalengelamekti, “Nimiri yubu lelamla kom, phia phalamapne imag wamlange nimi saog taldi, lelamla,” alamek.   
\p
\v 23 Wene alamekpa, Nuni Allahri “Mog so'oag nimiri Na mo omekaneheng aghana, Herodes omeklamang. Omeklamangba, Herodesti, 'Na omekaneheng kom. Allahag agha omekalulom,' senep aghana, 'Wali omeklamneang,' sembaldi wamla,” aro Allahri Eldamneri arukna malaikat, “Herodes oplulam,” aro poghog. Poghogpa, Herodes obogpa, kolagti tero tebaog.   
\p
\v 24 Herodes tebaogpa, yubu kom taog aghana, Allah yubu nubu taogpa, nimi maiknori, “Allah yubu wali,” aro ka'elamek.   
\p
\v 25 Barnabasap Saulusapti as Antiokhia nimiri sae agha pabireka taneko tatsirekti,\x - \xo 12:25  \xt Pogsiognang 11:30\x* Yerusalem laplobi agha samoro yalamdekti, Yohanes si nhon Markus neneko\x - \xo 12:25  \xt Pogsiognang 12:12\x* enero poa yarek.   
\c 13  
\s1 Barnabasap Saulusap wepsiekti pogsieka (13:1-3)  
\b  
\p
\v 1 Saulasap Barnabasap samoro yarek li as Antiokhia Yesusag “Sikne” aro seneragtop nimi haibil talamek nimi anabiag Allahri yubu silimu tiptop nimi\f + \fr 13:1  \ft Allahri yubu silimu tiptop nimi ene Allah Eldamne Yame Walingeri peket yubu palilamogpa, ka'elamogti, nimiag ambarelamsiog. Ane sembe Indonesia yubuag “nabi” alamang.\f* Allah yubu tibin nenero ambatsirop nimi wamek. Allahri yubu tipto tibin nenero ambatsirop nimi taneko sina: Barnabasap, Simeon si nhon Nigerap\f + \fr 13:1  \ft Kosarek yubuag “piringe” aro alamek.\f*, mog so'o Kirene nimi nhon si Lukiusap, Saulusap, Menahenap wamek. Menahen ponekona yubu sia leropne Herodesap nhon mo'obhaiekpa, Herodes elkae Menahen wamog. Sin Allahri yubu silimu tiptop nimi wamekti, as Antiokhia nimi Yesusag “Sikne” aro seneragtop nimiap nhon haibil talamek.  
\v 2 Ik nhon sum kwaneng ten koma Nuni Allahag omekto molona mololamekti, wamekpa, Allah Eldamne Yame Walinge nenekori sinag yubu lelamogti, “Nari samenag, 'Uanun,' sembanori, Barnabasap Saulusap, 'Nari sae tarikti, nari awe tolamtukang,' aro karepto wepto pipsinori, yoplamsin. Yoplamsinnena, a'un Antiokhia nimiri sinag ambatsumundi, 'Ot Allahri, “Undo-undo tolamturom,” selenge aghabog tolamturom,' aro sin phende wepsimundi pogsululom,” aro ambatsiog.   
\p
\v 3 Wene aro Allahri ambatsiogpa, nen kwaneng tero koma Allahag molona yubu moloro wameka Saulusap Baranabasap usoghag sae pipsiekti, “Allahri 'Awe undo-undo tolamturom,' selenge tol pururom,” aro pogsiek.   
\s1 Barnabasap Saulusap mag alip toman agha Seleukia agha Siprus pireka (13:4-12)  
\b  
\p
\v 4 Allah Eldamne Yame Walinge nenekori Barnabasap Saulusap pogsiogpa, pirekti, as Seleukia pin togha kabongag agha mag alip toman pirekti, mag laut longo kanektop mog so'o Siprus pirek. \fig Saulusap Barnabasap kabongag agha mag alip toman pirek.|alt="Saulus dan Barnabas pergi di atas permukaan air dengan perahu" src="cn01958c.tif" size="col" copy="David C. Cook" ref="Pogsiognang 13:4" \fig*  
\v 5 Pirekti as Salamis anekoa Yahudi nimiri Allah yubu lerop aeag agha Allah yubu ambarelamsirek. Allah yubu ambarelamsirekti, wamdekpa, nimi nhon sina Yohanes Markus nenekori sin phende yeplamsiog.  
\v 6 As Salamisa heng walelingkirobag sip mag abolag wamdeka lambaekti, Siprus so'o inagha heng pulingkirobag simbik palamekti, as nhon mag abolag heng pulingkirobag sip si Pafos piek. As Pafos piekag aneko nimi nhon sina Baryesus\f + \fr 13:6  \ft Yahudi yubuag “Yesua elme” aro “Baryesus” aro si engelamek.\f* Yahudinge haiptaek.  
\p Baryesus Yahudinge ponekori, “Allahri yubu ambatneonge tipto ambarelamsin,” aro orolena yubu lero mema mili lero phalamog.  
\v 7 Baryesus poneko elkae Siprus so'o saelbamogne nimi nubunge sina Sergius poneko wamog. Nimi nubunge mog so'o eneko saelbamogne sina Sergius, si nhon Paulus, neneko wana hekto wamogti, “Barnabasap Saulusapti Allah yubu tibin nenero ambarelamsirangne ka'ebanun. Enero payahilulom” aro nimi pogsiogba, Sergius Paulus wamoghag Barnabasap Saulusap payahiek.  
\v 8 Payahiekpa, Allah yubu ambarelamsirek aghana mema mili lero pharopne Baryesus, si nhon Elimas\f + \fr 13:8  \ft Si Elimas “Mema ulamla,” aro si engelamek.\f* ponekori, “Sin phenderi ambarelamsirangne sembe karong,” senelamog. “Karong,” senelamogti, “Nimi nubunge mog so'o saelbamogne ponekori wana Yesusag seneraglul kom,” aro mema ulamogne ponekori Sergiusti seneragna sao kauplolamog.  
\v 9 Sao kauplolamogpa, Allahri Eldamne Yame Mikipne Saulus nongag to'opto piamogpa, mema ulamogne Elimas poneko yop-yoba kembaog. Yop-yoba kembaogti, Saulus, el babe si nhon Paulus nenekori, yubu lelamogti,  
\v 10 “Phia yonge saog uro wamlam. Wanaag malingeog seneraglamlamdi, yubu orolenangeog lelamlam. Nimi nhondi sik uro yubu leropne babe, porog uro toropne babe, 'Karong,' alamlamdi, 'Nari aisa,' aro iriklamlam. Nia Mangkina Salehiropne poneko sembe porog uro ambarelamsin aghana, sengkwanekto nenelamlam. Undo ulamlamne libe!  
\v 11 Nia Mangkina Salehiropne poneko saeri wene 'An opkunun,' aro yalamlange wene tiboghae, haing uroba wapmendi, heng olog imna koma wapmen paghabog ik etbare talul,” aro wabaog.  
\p Wene aro Paulusti walamog abeneko pere nimi eneko haing uro toa saogne marukul aogpa, “Nimiri sae saelbanukang,” aro sale wihi-wihi palamog.  
\v 12 Undo unuaogne sembe Siprus so'o wamekag saelbamogne nimi nubunge poneko kembaogti, “Barnabasap Paulusapti, 'Yesusti nia mangkina saelbamsil,' aro mane agha sik uro ambarelamsirang,” aro Yesusag “Sikne” aro seneraglamog.   
\s1 As Antiokhia Pisidia so'oag yingkiekti, Paulusti Allah yubu ambatsiogha (13:13-41)  
\p
\v 13 Wameka Paulus elkaboap as Pafos laplobiagha mag alip toman agha piek. Mag alip toman agha piekne, ag kabongag kerekaekpa, “Phoanari ko'oro pabalamlul,” aro kerektop ag\f + \fr 13:13  \ft Kabongag kerektop ag enena mag alip toman palamikpa, phoana phoalamlengeri, mikip nenelamleba, “Pukap,” aro ag ane kabongag kereklamek. Wene babe undo unulamang.\f* towalengkaekti, mag alip toman agha piekti, as si nhon Perga Pamfilia so'oag piek. Piekti, Yohanes Markus neneko sin Perga laplobiagha as Yerusalem samoro yaog.  
\v 14 Samoro yaogpa, sin taneko Perga phibom agha piekti, as Antiokhia Pisidia so'oag yingkiek.\f + \fr 13:14  \ft As si Antiokhia phende wamdek aghana, as Antiokhia Pisidia so'oag wamogne a'ero, as Antiokhia samenag Yesus yubu ka'ero sunsunum uro ulamek nimi alniro “Kristen nimi” alamekag Siria so'oag wamogne babe a'ero (Ulameka 11:26).\f* Yingiekti, wamekpa, Yahudi nimiri Allah yubu lerop sum taogpa, Allah yubu lerop aeag wa'iekti, pukamek.  
\v 15 Wa'iekti, pukamekpa, Allahri samenag Musa ambarog yubu mome toro pibekneap, Allahri yubu silimu tiptopnangdi yubu mome toro pibekneap sangkaekti, ambarelamsiek. Mome sangkaekti, ambatsiekti, wa'amogto pibekti, Allah yubu lerop ae saleropnang tanekori nimi nhon poghekpa, Paulusap Barnabasap hailamsiogti, “Nangkabo, a'undi nimi tane sembe 'Wana aingnibahununam,' senenne wamla tanena sektumundi yubu ambatsururom,” seog.   
\p
\v 16 Wene seogpa, Paulus sekogti, sae la'abatsiogti, yubu lelamogti, “Israel nimi nangkabo, yog nimiri Allah yubu sunsunum uro ul palamlom nimi babe nangkabo, nari lemnunne nene ka'eamlulom.  
\v 17 Allahri samenag agha nu Israel nimi pia ulamsiogne ponekori nu Israel nimi nunisa yabo samenag wepsiogpa, mog so'o Mesira nimi yangkan nang saog uro wamek aghana, 'Maikno taukang,' aro nubu nembahiog. Maikno nembahiogti, El sae mikipne nenekori saelbamsiogti, mog so'o Mesira enero poa lambahaiog.\x - \xo 13:17  \xt Keluaran - Lambaeka 1:7; 12:51\x*  
\v 18 Poa lambahaiogpa, pai aldesag saog urobag wamogti, sindi malinge aghabog ulamek. Malinge ulamekpa, 'Opsinun,' sembaog aghana wana palingkiogti, wamog pahabog heng tai buka tau buka ulamogha heng kun selek ta'om agha epto naual bare (40) taog.  
\v 19 Selek ta'om agha epto naual bare taogpa, Allahri, 'Kanaan so'o Israel nimi sisa nimiag tatsinun,' aro Kanaan so'oag wamekne nimi sisa saekbare ene Allahri oro luknubahiog. Oro luknubahiogpa, Israel nimi lelnero ngai talamek.  
\v 20 Israel nimi sikinisag Israel poneko el maboap samenag Mesir yaekti, wamekti, Israeldi mangaroba mangarobari mangkahiekne Mesir so'o laplobiagha Kanaan so'o ngai taekne ni ane hengkun teng ao tarabare eptopneap (450) palamogpa\f + \fr 13:20  \ft Hengkun teng ao tarabare eptopne sa'o tarabare palamogne eneko nimi likna naual tarabare saog uro likto yabalamog.\f*, wamekti, Israel nimi Kanaan so'o lelnero ngai taek.  
\p Ngai taekti, nimi nubu nang tam lelekto kemero kareptop nimi Allahri sekililamsiogti poglamsiog. Israel nimi sembe tam lelekto kemero kareptop nimi komoptobagnena Samuel sekirog. Samuel ponekona Allahri yubu silimu tiptopne wamog.  
\v 21 Samuel wamog li enekoag Israel nimiri, 'Yubu sia leropne nubunge saelbamsilulne nhon\f + \fr 13:21  \ft Israel nimiri, “Yubu sia leropne nhonog,” sekitsululam alamekpa, Allahri Saul wepto sekirog. Allahri yubu sia leropne sekirog aghana, nimi nubunge ane Allahri yubu silimu tiptopne wamog kom.\f* sekitsimenba, towalengkibukapti,' alamek.  
\p Israel nimiri wene alameka ka'ebaogti, Israel elme Benyamin mangarobari mangaroba mangkahiek nimi agha nimi nhon Allahri webogti, Kis elme Saul poneko sekirogpa, towalengkibek. Towalengkibekpa, Israel nimi saelbamsiogti, hengkun tai buka tau buka ulamogha teng nhon epto naual bare taogpa, Saul tebaog.  
\v 22 Saul tebaogpa, el lunumna Daud Allahri sekirogpa, Israel nimiri, 'Nu saelbamsileri, yubu sia lelamlul,' aro towalengkibek. Daud sembe Allahri samenag lebogne ane, 'Na Allahri wanaag seneragna sunsunum uro Isai elme Daudti babe seneraglamla. Nari yeng senenne ni sunsunum uro ulamlulne, Na el,' aro Allahri wene seog.  
\v 23 Daud poneko sembe Allahri, 'Daudti mangaroba pere agha Israel nimi taulbahinepne nhon mangaptalul,' aro Allahri salag pibog. Salag pibogne neneko Yesus sembe lebog.  
\v 24 El anam yanep peramag Yohanesti Israel nimi, nimi ni ambarelamsiogti, 'A'un malia ulamlomne wali uro seneragmundi, lililamsimun tanena maghag pelengkipsinun,' alamog.  
\v 25 Yohanes nenekori Israel nimi komopto ambarelamsiogne peram taogpa, eldi yubu ambarelamsiogti, 'A'undi, “El yalul” senelamlomne poneko na kom. Na sam yano aghana El nenekona, olog amik yalul. El nubunge ponekori yan wangana nari haing lopna babe sunsunum kom,' aro Yohanesti samenag ambatsiog,” aro Paulusti ambarelamsiog.   
\p
\v 26 Wene aro Paulusti ambarelamsiogti, “Nangkabo, Abrahamdi mangaroba wamapneap, Allah yubu sunsunum uro ul palamlom nimi yogne tane wamlomneap, samenag 'Nimi taulbahinepne yalul,' aro wene seogne poneko yaogpa, Allahri nunag salag pibogne sunsunum uro, uro yabiog.  
\v 27 Allahri salag lebogne nunag taogne uro yabiogne ambatsinun. Allahri 'Nimi taulbahinepne yalul' seogne poneko, 'Na Yesus. Na Allahri wepto pogholaneo,' seog aghana Yerusalem nimiap, sikini yabo saelbamsiek nang tanekori babe Yesus el nong babe yubu babe wa'eplamek. El neneko tam karebaekti, 'Tebalul,' seekne neneko samen Allahri, 'Sik uro yabilul,' aro el uro wamog. El uro wamogpa, Allahri yubu silimu tiplamek nangdi samenag Elag amik uro yabilulne sembe samenag mome toro palilamek. Mome toro palilamekpa, samenag agha wene babe Allah yubu lerop sum talamlaba, nu Yahudi nimi niri mome palilamekne sop-sop lelamapti, ka'elamap. Allahri yubu silimu tiptopnangdi mome toro palilamekne Yerusalem wameknangdi babe ka'elamek aghana, yubu tolamek komdi, Allah yubuag 'Uaukang,' aro ambatsiekne neneko sunsunum uro 'Tebalul,' aro karebaek.  
\v 28 'Tebalul,' aro karebaekpa, nimiri El sembe 'Sik eldi ane malia uao,' senep kom aghana, Roma nimi nubunge Yahudi nimi wamekag mog so'o salehiropne Pilatusag, 'Ya'ag oplulom,' aro molbaek.  
\v 29 Samenag El sembe Allahri yubu ambatsiogne mome toro pibeka sunsunum uro Elag uaekpa, kalag agha pelengkaekti, kirik arameag wirikil wa'iek.  
\v 30 Wirikil wa'iekti, piekpa, nimi teptobag wamog aghana, Allahri nimi teptopne nusamag agha El neneko kamag nembaog.  
\v 31 Kamag nembaogpa, Elap nhon Galilea agha Yerusalem palamek nimi taneko sae a'iliro wamekpa, sin haingag lag tangom tognop tangom alamogne sembe, 'Nuri haingdi ibubu,' aro nimi tane wene ane ambarelamsiang.  
\v 32-33 Wene ane nen tipto ambarelamsiapnena, 'Samenag nunisa yaboag Allahri salag pibogne neneko wene uro palamla,' aro yubu walinge neneko wene ane a'unag ambarelamsiap. Sindi mangarobari mangaroba mangkahiekne wene wamapne nuri haingag agha Allahri Yesus kamag nembaog. Undo kamag nembaogti, Allahri samenag, 'Uanun,' aro salag pibogne sunsunum uro wene nuri haingag agha uaog. Nunisagyabori samenag Allah omekto sepna siplamekti, sepna phendepneag Allahri yubu lebogne agha mome toro pibognena ane,  
\q1 'Anna Na Name,  
\q1 Na sumene andi nai tan,'\x - \xo 13:32-33  \xt Sepna 2:7\x*  
\p aro mome toro pibog.  
\v 34 Allahri Yesus nimi teptopne wameka anabiag agha kamag nembaogpa, 'So'oag agha ya'ag nong polbalul kom,' aro Allah yubu lemnunne nene mome toro pibogne ane:  
\q1 '”Nandamne wanaag agha Daud sembe walia uanun,” aro  
\q1 salag pipsinge sik uro uanun.  
\q1 Daud sembe salag lero pipsinge  
\q1 a'unag tipto tatsinun.'\x - \xo 13:34  \xt Yesaya 55:3\x*  
\p aro mome toro pibog.   
\p
\v 35 Sepna nhon babe siplamogti, mome toro pibognena,  
\q1 'Anenge Arukna Sol Wali Walinge neneko so'oag agha polbalul kom,'\x - \xo 13:35  \xt Sepna 16:10\x*  
\p aro mome toro pibog.  
\v 36 'Polbalul kom,' aro mome toro pibog aghana, Daud poneko el uro wamogti, Allahri seneropne wali uro ulamogti, sabal taogti, tebaog. Tebaogpa, iliyabo teptoba pibekag aneko tobongol piekpa, polbaog.  
\v 37 Undo unuaog aghana Yesus neneko Allahri kamag nembaog. Daud polbaog saog uro polbaog kom,” aro ambarelamsiog.   
\p
\v 38-39 Paulusti wene aro ambarelamsiogti, “Nangkabo, 'El Yesus neneko wamogti, ulamogha pere agha Allahri a'undi malia ulamlomne tam orog nembalul,' aro ambarelamsinne a'un ekon uro wamnep kom. Samenag Allahri 'Undo-undo ulamlulom,' aro Musaag yubu ambarelamogpa, mome toro pibog. Musa yubu mome toro pibogne salelamap aghana malia ulamap tanena Allahri nu sembe 'Porog urop nimi,' sembalul kom. Nu sembe 'Porog urop nimi,' sembalul kom aghana, nimi etneri Yesusag 'Sikne' aro seneraglamleba, sembenga uropne tam orog nembi agha, Allahri nimi ane sembe 'Porog urop nimi' sembalul alamna.   
\p
\v 40 Ane sembe, samenag Allahri yubu silimu tiptopneri mome toro pibekne neneko saog uro a'unag uro yabileagti, wanaag el uro wamsuri, wamsut:  
\v 41 Allahri yubu silimu tiptopne nhondi mome tobogne ane,  
\q1 'Wene wamlom ko'o ene, “Nari uanun,” sembanea uanun.  
\q1 A'unag tibin nenero ambatsiika babe a'undi sik sembalulom komne webanun.  
\q1 Allahri yubu seneragtop kom nimi, wali uro tibogamsut!  
\q1 “Yaghe! Mane agha ual,” sembamundi, Nari yubu ka'eapmun kom tanena tebalulom!'\x - \xo 13:41  \xt Habakuk 1:5\x*  
\p aro mome tobog,” aro Paulusti komopto ambatsiog.   
\s1 Yahudi nimiri, “Paulusti yubu ambarelamsilne karong,” seeka (13:42-49)  
\b  
\p
\v 42 Paulusti yubu ni ambatsiogti, Barnabasap lanalamdekpa, nimi tanekori, “Sumene yubu ambatsilamne nen tipto Allah yubu amik lebukap sumono babe yingkina ambarel ahirurom,” aro molbahiek.  
\v 43 Allah yubu lerop aeag haibil talamek nimi lambaekti, Yahudi sisa nimi maiknoap, Yahudi sisa kom nimi Allah omektop nimi taek nimiapti Paulusap Barnabasap nelepto palamek. Sin amik palamekpa, sin phenderi nimi taneko wenelamsirekti, “Allahri nimi so'oag nimi Yesusti uaogne pere agha talulamsilne ponekoag sinag kweleknag seneraglamlulom,” aro ambarelamsirek.   
\p
\v 44 Wene aro ambarelamsirekti, wamdekpa, Allah yubu lerop sumeneko peram taogpa, as eneko nimi ni wa'al aloa saog uro, nimi maikno, “Nia Mangkina Salehiropne Yesus sembe Allah yubu pere agha ambatsurukangne ka'ebaukap,” aro yalamek.  
\v 45 Nimi maikno yalameka Yahudi nimiri ipsiekti, “Nimi maikno ambarelamsireka ka'el wa'alamang,” aro wana sek tahiogpa, u kwa'en pa'alamsiekti, “A'undi lelamdomne orolenange lelamdom,” aro Paulus san tiliplamek.   
\p
\v 46 Wene aro san tiliplamekpa, Paulusap Barnabasapti log kom uro ambarelamsirekti, “Nangkabo, a'un Yahudi sisa nimiag samen Yesus sembe Allah yubu pere agha ambatsinomonge\f + \fr 13:46  \ft Paulusap Barnabasapti, “Yog nimiag samen ambatsinep kom,” serekne Yahudi sisa nimi pere agha Yesus yalulne sembe Allahri samenag sarikto ambarelamsiogpa, “Yahudi nimi maiknori El yalulne sembe el wamsengdi, tibogamseng,” aro lebog.\f*, ora sisa nimiag samen ambatsinep kom wamo. A'un samen yubu walinge ene ambatsinomo aghana a'undam nimiri, 'Karong,' aro lililamsilom. A'undi, 'Kamag nenehirop yubu ambarelamsilne nu seneraglamukap komdi, ya'ag kamag wamukap kom,' aro kareplamlom. A'un Yahudi nimi tane wamlomne yubu ene tolamlom kom ane sembe, nuri Yahudi sisa kom nimiag yubu walinge nene ambarel phukap.  
\v 47 'Undo ulamlulom,' aro Nuni Allahri nunag samenag yubu pibogne ane,  
\p \qt '”Allah yubu ekon nang Yahudi sisa kom nimi sembe an whea walinge saog uro wamlulam,” aro sekitkehiba, \qt*  
\p \qt andi nimi so'oag sirikag-sirikag wamangneag pimenba, el taikpa, sin taulbahinep,' \qt*  
\p aro mome toro pibog.\x - \xo 13:47  \xt Yesaya 49:6\x* Mome ane undo toro pibogne ane sembe, Yahudi sisa kom nimiag yubu walinge nene ambarel phukap,” aro Paulusti ambatsiog.   
\p
\v 48 Wene aro ambatsiogpa, Yahudi sisa kom nimi tanekori ka'ebaekti, “Nia Mangkina Salehiropne Yesus sembe yubu ambarelamsirekne walinge” senelamekti, awi yeng senelamek. Allahri samenag “Ya'ag kamag wamlulom,” aro wepsiog nimi tanekori “Sik uro ambarelamsirang” aro Yesusag “Sikne” aro seneraglamek.  
\v 49 Nimi ni as kanero wamekne taneko Nia Mangkina Salehiropne Yesus sembe ambatsirop yubu nubu taogpa, ka'elamek.   
\s1 Paulus elkaboap as Ikonium pieka (13:50-14:7)  
\b  
\p
\v 50 Nimi taneko Yesus yubu ka'elamekpa, Yahudi nimiri “Paulusap, Barnabasap nu karongdi, nuri asag agha yag lambitsukap,” aro ulamek. As tanekoag kelabo sikininyabo saog uro wamek kelabo taneko Allah omeklamek kelabo Yahudi nimi tanekori yubu yangaro wana tolamsiekti, nimi nubu nang as tanekoag babe wana tolamsiek. Wana tolamsiekti, nimi maikno sikin sip tangto, “Paulusap, Barnabasap opsukap,” aro malia ulamsiekti, as enekoag agha yag lambahiek.  
\v 51-52 Yag lambahiekpa, Paulusap Barnabasap lanalamdekti, sindi yanag so'o ubun wamogne “As aneko Allahri opsinepne sembe el uro wamukang,” aro so'o ubun kepto pelengkia\x - \xo 13:51-52  \xt Matius 10:14; Markus 6:11; Lukas 9:5; Lukas 10:11\x* pirek. As Antiokhia laplobi agha pirek aghana, ambarelamsirekne ka'elamekti, sunsunum uro ulamek nimi, samenag Yesusag “Sikne” aro seneraglamek nimi taneko sin wana awi yeng uro wamek. Wamekpa Allahri Eldamne Yame Walinge sin nongag to'opto palilamsiogpa, wamek. Wamekpa, Barnabasap Paulusap as Ikonium pirek.   
\c 14  
\p
\v 1 Paulusap Barnabasap as Ikonium pirekti, Yahudi nimiri Allah yubu lerop aeag wa'irekti, Yesus sembe Allah yubu pere agha tibin nenero wali uro ambarelamsirek. Ambarelamsirekpa, Yahudi nimiap Yunani nimiap nimi maiknori, “Sik uro ambarelamsirang,” aro wanaag seneraglamek.  
\v 2 Yahudi nimi nenneri, “Paulusap Barnabasapti yubu orolena ambarelamsirang,” senelamek nimi tanekori, “Yesusag 'Sikne' aro seneraglamang nimi ene mali,” aro wana aluktop yubu yangaro Yahudi sisa kom nimi taneko wana tolamsiek.  
\v 3 Wana tolamsiek aghana Paulusap Barnabasap ik maiknoro as Ikonium wamdekti, “Nuni Allahri Yesusti uaogne pere agha mog so'oag nimi talulamsil,” aro log kom uro ambarelamsirek. “Sindi yubu ambarelamsirangne nimiri sik sembaukang,” aro nia mangkina Saelbamsilne ponekori sinag mikip nenelamsiogpa, Allah Eldamneri uanepne nimiri uanep komne ulamdekti, “Yaghe, Allahri sin pere agha ual” senenne kekneba ulamdek.   
\p
\v 4 Kekneba ulamdekpa, as eneko wamek nimi taneko as pogto nenne Yahudi nimiag sip talamekpa, nenne “Yesus sembe sik uro ambarelamsirang,” aro Barnabasap Saulusap sinag\f + \fr 14:4  \ft Yunani yubu mome tobogne “Wepto pogsiognangag sip taek” aro mome tobog. Paulusap Barnabasap Allah Eldamne Yame Walingeri wepto pogsiogpa, ambarel palamsirek. (Pogsiognang 13:2, 14:14)\f* sip talamek.  
\v 5 Sin pogtaekti, Yahudi sisa komnangap, Yahudi nangap sin sikindo yaboap winiptaekti, “Paulusap Barnabasap oro saelbahiberi, kirikti ya'ag opsukap,” aro ulamek.  
\v 6-7 “Sin opsukap,” alamekne eltarekti, Paulusap Barnabasap as enekoag agha lambarekti, Likaonia so'oag pirekti, Likaonia so'o enekoag as Listraap Derbeap pirek. Pirekti, as eneko kanero wamek nimi wamekne yubu walinge Yesus sembe ambarelamsirek.   
\s1 As Listraap Derbeap Yesus yubu walinge ambatsireka (14:8-20)  
\b  
\p
\v 8 As Listra aneko nimi kabuni nhon mangaptangto yangkaoghag agha yan malia mangap taogha seka pana babe erarukne nhon wamog.  
\v 9 Pukamogha Paulusti Yesus sembe tibin nenero yubu ambarelamsiogne yan mali nimi enekori ka'ebaogpa, Paulusti whing ebom agha til talamdekti, Paulusti, “Nimi eneri 'Yesusti Nia Mangkina Saelbamsil' aro ambarelamsinne sik sembal. Ane sembe na sae pere agha Yesusti el yan wali nembalul,” sembaog.   
\p
\v 10 Paulusti wene sembaogti, nimi enekoag yubu mikip uro lelamogti, “Yan mikip uro sekelabi,” seogpa, nimi eneko lopnagha sekelabiogti, pang yang ulamog.  
\v 11 Sekogti, pang yang ulamogha nimi maikno tanekori Paulus sae pere agha nimi taneko wali taogha ibekti, “Nimiri uanep komne uarang,” alamek. Alamekti ibek nimi tanekori Likaonia yubuag haum aro nimi ambarelamsiekti, “Phia phalamsiapne imag wamanga nimi saog tarangdi, so'oag yingkina ulamdang,” alamek.\f + \fr 14:11  \ft Paulusap Barnabasap Likaonia yubu ka'ebenap kom ane sembe “Phia phalamsiaba imag agha nunag yarang” alameka ka'ebarek komdi, sin ekon wamdek.\f*  
\v 12 “So'oag yingkina ulamdang,” alamekti, Barnabas sembe “Nuri phalamap phia,” aro si Zeus\f + \fr 14:12  \ft Yunani nimiri samenag phalameka sunsunum uro mema sikini nhon wamogne si Zeus aro englamek.\f* engkaekti, Paulus babe, “Yubu maiknoro ambarelamsildi, yubu tiplamla phia,” aro si Hermes\f + \fr 14:12  \ft Yunani nimiri samenag phalameka sunsunum uro mema sikindi yubu tipto pogtopne nhon wamogne mema si Hermes aro engelamek.\f* engkaek.   
\p
\v 13 Wene aro engkahiekpa, as Lystra leka kanero solingkirobag paiag sip ina peramag, Zeus pharobag mem ae soroba soropne wamog. Zeus pharobag mem ae wamoghag memne Zeus sembe pairopne ponekori as Likaonia nimiri wene alameka ka'ebaog. Ka'ebaogti, pham sapi yemneog tobogti, uwong-uwonga kal es agha lomoro pham sapi tanekoag kwiria elekahiogti, “Zeusap Hermesap pham sapi oro phalamsukap,” aro nimi maiknoapti as leka solingkirobag ina siram peramag yagto payalamsiek. \fig As Listra nimiri, “Pham oro phalamsukap,” aro Paulusap Barnabasap sembe pham yagto payalamsiek.|alt="Orang-orang Listra membawa ternak untuk Paulus dan Barnabas dengan maksud, “Kita akan menyembah mereka secara membunuh ternak.”" src="cn01964C.tif" size="col" copy="David C. Cook" ref="Pogsiognang 14:13" \fig*   
\p
\v 14 Undo unulameka Allah Eldamne Yame Walingeri wepto pogsiognang Barnabasap Paulusapti ka'ebarekti\f + \fr 14:14  \ft Samen Paulusap Barnabasap Likhonia yubu ka'ebarek koma, “Sin phende phalamsukap,” alameka ekon. Pham payalameka kembarekti, haibarekpa, nimiri Yunani yubuag tibin nembatsiek.\f*, eltarek. Eltarekti, “Sindi mema phalamangne nene uanep komne ulamang,” aro Barnabasap Paulusapti ag enekto amdekne taepto epsirekti, nimi maikno nusamag lopnagha wa'irek. Nimi nusamag wa'irekti, yubu lelamdekti,  
\v 15 “Nangkabo, nene sa'a agha ulamlom? Nu nimi a'un saog uro so'oag nimi wamnam. A'unag yanomonge, '”A'undi teba'en uroba lebe arop komne phalamlomne lipsumundi, wailag nembamundi, Allah ya'ag kamag wamlange im, so'o, mag nia mangkina wamlange sumbaogne ponekoag wanaag seneraglamlulom,” aro yubu walinge ambarel ahanunam,' aro yanomo.  
\v 16 Samen a'unisagyabo wamek ko'oag Nuni Allahri, 'Nimi niri mem pharoba a'ero ubu pilamlange mem phalamsik,' aro lipsiog.  
\v 17 Lipsiog aghana, mog so'o sukupnange imag agha mag pelengkarelamsildi, so'oag wamlange mauroba li tarelamsildi, a'un kwaneng tenaba tarelamsildi, wana yeng wali nenelamsildi, El wamlange tognop tan koma walia aghabog ulamla,” aro ambatsirek.   
\p
\v 18 Wene aro ambatsirek aghana yubu ambatsirekne ingisaplobekti, “Sin phendeag mem phaphaukap,” aro ulamekpa, nen sap sarikto-sarikto “Karong,” alamdek.   
\p
\v 19 Wamekpa, as Antiokhia nimiap as Ikonium nimiap Yahudi nimi wamekne as Listra yaekti, as eneko wamek nimi yubu yangaro wana tolamsiekti, limilamsiek. Limilamsiekpa, as enekoag wamek nimi sinag sip talamekti, Paulus kirikti obek. Obekti, “Ya'ag tebal,” aro kiliro asag poa lambaekti, paiag sip toltoghol piek.  
\v 20 Toltoghol piek aghana elkabo Yesus yubu ka'ero ulamek nimi taneko longoro kanekto sekamekpa, Paulus pukogti, sekogti, nen as enekoag samoro wa'iog. Wa'iogti, mabogha kwelekaogne elkae Barnabasap nhon Derbe pirek.   
\s1 Paulusap Barnabasap samoro Antiokhia yareka (14:21-28)  
\b  
\p
\v 21-23 As Derbe pirekti, Paulusap Barnabasapti nimiag yubu walinge Yesus sembe ambarelamsirekpa, nimi maiknori sik uro seneraglamekti, Yesus yubu ka'ero ulamek nimi as Derbe wamekne maikno talamek. Maikno talamekpa, nen samoro as Listra inagha, as Ikonium phibom agha, Pisidia so'oag as Antiokhia palamdekag agha, Yesusag “Sikne” aro seneragtop nimi winil talamekag wa'alamdek. As a'ero-a'ero winil talamekag wa'alamdekag agha Paulusap Barnabasapti winil talamek nimi anabiag agha sikindoyabo wenehiropnang\f + \fr 14:21-23  \ft Indonesia yubuag “penatua” alamang.\f* weplamsirekti, “Nimi taneko o'olamsululom,” aro sekililamsirek. Sekililamsirekti, kwaneng tero koma molona Yesusag mololamdekti, “Nuro Yesus, nu nimi ni saelbamsilam. Nimi wenehiropnang tanekori anag 'Sikne' aro seneraglamangba, andi arukna wamukangne, 'Wali sembamlulam,' aro ambatto mololangkeap” aro molbarek.  
\p Wenehiropnang weplamsirekne tanekoap Yesus yubu ka'ero ulamek nimiap wenelamsirekti, “Wene Yesusag 'Sikne' aro wanaag seneraglamlomne nene wali. Wana phende seneragseng kom,” aro nimi Yesus yubu ka'ero ulamek nimi wenelamsirek. Wenelamsirekti, “Maiknoro seklelameberi, wana nhonog uro wamebe tanena Allah Eldamneri wali uro paia saelbamsilul,” aro ambatsirek.  
\v 24 Undo unuarekti, palamdeka Pisidia so'o inagha mog so'o Pamfilia yarek.  
\v 25 Pamfilia yarekti, so'o eneko as Perga wamek nimiag Yesus yubu ambatsirekti, as Atalia mag laut longoropne abolag yarekti,  
\v 26 kabong nhonag wa'albarek. Wa'albarekpa, kabong pabiropnang tanekori ag kabongag kerekaekpa, “Phoanari ko'oro pabalamlul,” aro kerektop ag towalengkaekti, mag alip toman agha as Antiokhia Siria so'oag yarek. As Antiokhia nimiri, “Allah Wana Waliri piamsileba, Yesus yubu ambarelamsururom,” aro aneko samenag pogsiekpa\x - \xo 14:26  \xt Pogsiognang 13:1-3\x*, alnibarekti, ambatoba tongkahirek. Ambatoba tongkahirekti, Paulusap Barnabasapti, “Nunag 'Ambarel phururom,' aro pogsiongne neneko komopto uitnam,” aro nen sap alnibarekag aneko samoro yarek.  
\v 27 Yarekti Yesusag “Sikne” aro seneragtop nimi poloro winiptaekpa, ambarelamsirekti, “Allahri yeplamsiori, uabongena Yahudi sisa komnang sembe babe Allahri ina kupsioba, sin babe Yesusag sik uro seneraglamang,” aro ambarelamsirek.  
\v 28 Ambarelamsirekti wamdekpa, Yesus yubu ka'ero ulamek nimiap ma'aro wamekti, ik ko'o maiknoro wamek.   
\c 15  
\s1 Yahudi nimi agha Yesusag “Sikne” aro seneraglamek nimiri as Yerusalem winip taekti, Yahudi sisa kom nimi sembe yubu lebeka (15:1-21)  
\p
\v 1 As Antiokhia Siria so'oag wamekpa, mog so'o Yudea nimi as Antiokhia piek. Piekti, sin Antiokhia nimi Yesusag “Sikne” aro seneragtop nimi taneko ambarelamsiekti, “Allahri samenag, 'Nengabo ni, “Allahap ma'ap taukap,” aro kon kareplamukang,' aro Allahri Musaag ambarogpa, yubu tipto mome toro pibog. Musari mome toro pibogpa, nu Yahudi nimiri salero ul palamapne sunsunum uro nengabo kon kareplamukang. Kon karebaik kom tanena Yesusti kon kareptop kom nimi taulbahilul kom,” aro ambarelamsiek.   
\p
\v 2 Wene aro ambatsiekpa, Paulusap Barnabasapti, “A'undi lelamlomne nene orolena lelamlom,” aro Yudea so'o agha yaek nimiap yubu maiknoro leldalamek. “Nelagha sikne,” aro yubu maiknoro leldalamekpa, Yesusag seneragtop nimi as Antiokhia winil dalamek nimiri Paulusap Barnabasap Yesusag “Sikne” aro seneragtop nimi etpareap wepsiek. Wepsiekti, “A'un as Yerusalem pululom. Pimundi ualulomne ane, a'unap, Yesusti samen wepto pogsiognangap, Yesusag seneragtop nimi as Yerusalem winil talamang nimi sikindoyabo wenehiropnangap haiptamundi, 'Nengabo kon kareptanep tam ene karebaukap,' aro as Yerusalem pululom,” aro pogsiek.   
\p
\v 3 Wene aro pogsiekpa, Paulusap, Barnabasap, sikin kabo nhon palamek nang tanekoapti as Antiokhia agha lambaekti, Fenisia so'o inagha Samaria so'o inagha palamek. Sin palamek abeneko pere nimi so'o eneag wamekne wana heklamsirekti, “Yahudi sisa kom nimi Allah yubu ekon aghana Yesus sembe ka'elamangdi, Elag 'Sikne' aro seneraglamang,” aro uro yabiogne sembe ambare-ambare palamsiek. Ambare-ambare palamsiekpa, Yesusag “Sikne” aro seneragtop nimi ina palamekag wamekne ka'ebaekti, “Sin Yahudi sisa kom nimi Allah yubu ekon nang wali Yesusag seneraglamang,” aro awi yeng maikno senelamek.  
\v 4 As Yerusalem piekpa, Yesusti samenag wepto pogsiognangap, Yesusag “Sikne” aro seneragtop nimi winil talamek nimiap, sikindoyabo wenehiropnangap, wamekne tanekori sin piekne enero poa wa'isiekti, kipsiek. Kipsiekpa, sindi ambarelamsirekti, “Allahri nu pere awe welamoboba, Yahudi sisa kom nimi Allah yubu ekon nimiri Yesusag 'Sikne' aro seneraglamang,” aro ambatsirek.   
\p
\v 5 Wene aro ambatsirekpa, Yesusag sikne aro seneragtop nimi taneko ka'ebaek. Ambatsireka ka'ebaek nimi anabiag wameknena, seneragna nhon uro seneragtop nimi kong nhon ma'aptangtop nimi Yahudi Farisi nimi\f + \fr 15:5  \ft Farisi nang enena nimi sisa kom. Sindi seneragtopne nimi teptopne kamag tanep aro seneragtop nimi. Musari mome toro paibogne sembe mikip uro saelba ua urop nang sembe Yahudi Farisi alamang.\f* alameknang wamek. Farisi nimi taneko agha nimi etpare sekekti, yubu lelamekti, “Yahudi sisa kom nimi Allah yubu wali ka'ebaek aghana, Yesusag seneraglamang tanena, sindi babe nengabo kon karebel talamukang. Kon karebel talamikpa, aruklamsibenge, 'Samenag Allahri “Ualulom,” aro ambarogne Musari yubu tipto mome tobogne ni sunsunum uro ul palamsut,' aro ambatsukap,” seek.   
\p
\v 6 Wene seekne sembe Yesusti samenag wepto pogsiognangap, wenehiropnang tanekoap winiptaekti, “Yahudi sisa kom nimiri nengabo kon karebel talamukang to, kom to? Musari Allah yubu tipto mome tobogne ni sunsunum uro ul palamukang to, kom to?” aro tam nene sembe yubu lelamek.  
\v 7 Yubu tam neneko sembe ko'o olog maiknoro sin mamun lero libekti, Petrus sekogti, ambarelamsiogti, “Nangkabo, Yesusag 'Sikne' aro seneragtop nimi wamap. Samenag wamububa, Allahri seneraghogti, 'Yahudi sisa kom nimiri yubu walinge Yesus sembe ka'ebaikti, Yesusag “Sikne” aro seneraglamukang,' aro Allahri a'un anabiag agha na wepneog. Wepneogpa, yubu walinge ane Yahudi sisa kom nimi tipto ambarelahisi. Samenag uro yabiogne ane sembe ni el wamlom.\x - \xo 15:7  \xt Pogsiognang 10:5\x*  
\v 8 Allahri nimi wana kemelamsilne ponekori Eldamne Yame Walinge nu tatsiog. Nu Yahudi nimi agha Yesusag seneragtop nimi tatsiog saog uro sin Yahudi sisa kom nimi babe tarelamsiogti, 'Namabo taukang,' sembaogne kembatsiogpa, nu eltabu.  
\v 9 Allahri 'Nimi tane Yahudi sisa nimi to, kom to?' semban koma, Yahudi sisa kom nimiri wanaag agha Yesusag “Sikne” aro seneraglameka Allahri kemelamsiog. Kemelamsiogti, sembenga sindi wanaag wamogne Allahri lupsiogpa, wanaag sik urop nimi taek.  
\v 10 Allah Eldamneri undo unuaogne sembe a'un ni el wamlom aghana, sa'a sembe a'undi, 'Allahri uaogne wali to, kom to?' aro miplamlom? Tam ikinne sin Yahudi sisa kom nimi Yesus yubu ka'ero ulamang nimi taneag palilamsilom.\x - \xo 15:10  \xt Pogsiognang 15:5\x* Nunisa yabori babe nuri babe wali uro ulbinep kom bog, sa'a sembe sin sa'oag ikinne palilamsilom?  
\v 11 Undo unuaheng kom. Nuri wanaag seneraglamapnena, 'Yesusti Nia Mangkina Saelbamsilne ponekori nu Yahudi sisa nimi wana waliri piamsildi, nu taulbahiog saog uro, sin Yahudi sisa kom nimi babe wana waliri piamsildi, talulamsil,' aro wanaag seneraglamap,” aro ambatsiog.   
\p
\v 12 Wene aro ambatsiogpa, winil talamek nimi taneko yubu koma wamek. Wamekti, ka'eamekpa, Barnabasap Paulusapti, “Samenag Yahudi sisa kom nimi yog asag nimiap nhon wamoboba, Allahri nu yeplamsioba, 'Allahri sin pere agha ual,' senenne kekneba nimiri uanep komne Allah Eldamneri uanepne, undo-undo uanomo,” aro ambatsirek.  
\v 13 Abeneko komopto ambatsirekpa, Yakobusti sin winil talamek nimi anabiag sekogti, yubu lelamogti, “Nangkabo yubu lemnunne ka'eamlulom.  
\v 14 Yahudi sisa kom nimi Allah yubu ekon nimi o'ona sembamsiogti, 'Namabo taukang,' aro samenag Allahri wepsiogne sembe wene abeneko Simondi ambatsil.  
\v 15 Leplange nene samenag Allahri yubu silimu tiptopnang tanekori mome toro pibekne sunsunum uro ambatsil. Samenag Allahri yubu silimu tiptop nimiri mome toro pibekne pere agha, 'Allahrina,   
\q1
\v 16 “Na samoro yaneri, Daudti ae kalun ae kwerek taog ae eneko  
\q1 meneng ae ene agha ae soro ae walinge wendogne saog urop ae soro sekitnun.\f + \fr 15:16  \ft Allahri Daud poneko sembe lebogne ane “Yesus ilisag wamlul,” aro Allahri yubu silimu titopne Amosti mome toro pibog.\f*   
\q1
\v 17-18 Sekitneba, 'Yahudi nimi pogto wamikneap, Yahudi sisa kom nimiapti Na Im So'o Ngainge wamnange elamniikti, Nari si lero seneraglamnikpa, Naringe taukang,' aro  
\q1 Daudti ae kalun ae kwerek taogne nen ae soro sekitnun,” aro Allahri ambatsiog,'\x - \xo 15:17-18  \xt Amos 9:11-12\x*  
\p aro mome toro pibog. Undo mome toro pibogpa, samenag agha 'Undo uro yabilul,' aro nimiri ka'ebaekti, el taek.   
\p
\v 19 Undo Allahri, 'Daudti ae kalun ae wendogne saog urop ae soro sekitnun,' aro ambatsiogne ane sembe, nari mo kareplamnange lemnuan. Yahudi sisa kom nimiri Allah yubu ka'elamekti, samenag Allahag seneraglamek kom aghana, wene Yesusag seneraglamang. Wene Yesusag seneraglamang nimi taneag tam ikinne pibukap kom sembamna.  
\v 20-21 Tam ikinne Yahudi sisa kom nimiag pibukap kom aghana, samenag agha nimi as ni wamek nimiri Musari mome toro pibogne sembe ambarelamsiekpa, ka'elamek. Wene babe Allah yubu lerop sum talamlaba, Yahudi nimiri sop-sop Allah yubu lerop aeag wa'alamangdi, Musari mome toro pibogne lelamang. Ane sembe, Yahudi sisa kom nimi Yesusag 'Sikne' aro seneragtop nimiag ambatsukapnena ane:  
\pi1 '”Lebe aroba eneng la'imbaleag,” aro homamanga lepto oroba sopap, enengap telamlulom kom. Eneng lambaleba, sop agha telamlulom.\f + \fr 15:20-21  \ft Yahudi nimiri eneng telamang kom ane sembe Yahudi nimi tanekori “Nimiri a'unag tam pipsiikag,” senelamekti, “A'undi babe, sopap, enengap tululom kom,” aro mome toro pibek.\f*  
\pi1 Ora nimiri, “Phia sembe phabaukap,” aro lebe aroba sop palilamikti, mektop sop babe yoro tarelamsiikpa, telamlulom kom.  
\pi1 Apna, nengaboap kelaboapti, “Yog nimiri kelabo nengabo sembe naringe og wamso,” aro wanaag seneragmundi, saelbahiseng kom,' aro mome toro pibeberi, yubu ambatsukap,”  
\p aro Yakobusti ambatsiog.   
\s1 Yahudi nimiri mome tobekti, Yesusag seneragtop nimi Yahudi sisa kom nimi sembe pibeka (15:22-35)  
\b  
\p
\v 22 Yakobusti wene aro ambatsiogpa, Yesusti wepto pogsiognangap, Yesusag 'Sikne' aro seneragtop nimi as Yerusalem winil talamek nimiap, sikindoyabo wenehiropnangapti, “Yakobusti leplange wali,” sembaek. Wali sembaekti, “Paulusap Barnabasap nhon as Antiokhia piik nimi ebahukap,” aro yubu lebekti, Yudas si nhon Barsabasap, Silasap wepsiekti, pogsiek. Sin phende wepsiekne abeneko sembe Yesusag seneragtop nimi tanekori, “Nimi nubunge wamdang,” senelamek.  
\v 23 Sin phende abeneko poglamsiekti, mome toro sin saeag pibeknena ane:  
\pi1 “Nun Yesusti wepto pogsiognangap, a'un kabo Yesusag seneragtop nimi Yerusalem wamapneap, sikindoyabo wenehiropnangapti, a'un kiplamsiap. Yahudi sisa kom nimi aghana Yesusag 'Sikne' aro seneraglamlomne as Antiokhia wamlomneap, mog so'o Siria wamlomneap, mog so'o Kilikia wamlomne sembe nuri a'un kiplamsiap.   
\pi1
\v 24 Nun yubu ka'ebabongena, nu nungkabo anabiag agha samenag, nuri babe sin pogsin koma samenag a'unag yaongneri ambarelamsiongdi, a'un wana samsamolopsiongdi, tam ikinne pibong.\x - \xo 15:24  \xt Pogsiognang 15:1\x*  
\v 25 Ikinne pibongne ane sembe nuri ka'ebabori, nu ma'aro wamobori, yubu nikne lebobori, 'Nungkabo walinge Barnabasap Paulusap nhon pululom,' aro nimi phende ero wepsibori, poghol alamsiap.  
\v 26 Paulusap Barnabasap abeneri 'Allahri, “Saelbamsululam,” aro wepto poghol aogne poneko Yesus si nubu talul,' aro Yesus sembe ambarelamsirang. Ambarelamsirangne sembe ora nimiri, 'Ya'ag opsukap,' aro ulamsiong aghana, ta'ap sen koma Yesus sembe ambarelamsirang.  
\v 27 Samenag nimiri a'un wana samsamolopsiongne ane sembe, nuri nimi phende 'Barnabasap Paulusap nhon palamukang,' aro wepto poglamsiap nimina, Yudasap Silasap a'unag yarikpa, mome ane palilamapne kembamunne sunsunum uro sindi pamag agha babe yubu nikne ambatsurukang.  
\v 28-29 Ambatsurukangnena Allahri, 'Tam ikinne Yahudi sisa kom nimiag piplulom kom. Ot nimiri unuaukang kom senenne sembe ambatsululom,' aro Allahri Eldamne Yame Walingeri senelamlange nunag taoba, el tabori, yubu lelbang-bang mome ane palilamap.  
\pi2 “Lebe aroba eneng la'imbaleag,” aro homamanga lepto oroba sopap, enengap telamlulom kom. Eneng lambaleba, sop ane telamlulom.  
\pi2 Ora nimiri, 'Phia sembe phabaukap,' aro lebe aroba sop palilamikti, mektop sop babe yoro tarelamsiikpa, telamlulom kom.  
\pi2 Apna, nengaboap kelaboapti, 'Yog nimiri kelabo nengabo sembe naringe og wamso,' aro wanaag seneragmundi, saelbahiseng kom.  
\pi1 'Teheng kom uaheng kom,' aro palilamapne nene saelba wapmunba, a'un wali wamlulom. Nangkabo ot abenda ambatsiap,”  
\p aro mome tobek.   
\p
\v 30 Wene aro mome tobekti, “Wali pululom,” aro kipsiekpa, sin pogsiekne abeneko as Antiokhia piekti, Yesusag “Sikne” aro seneragtop nimi poloro wimbahiekti, mome aneko tatsiek.  
\v 31 Mome aneko tatsiekpa, kembaekti, “Wana aingnirop yubu nu sembe pipsiong,” aro as Antiokhia nimi taneko sin awi yeng sembaek.  
\v 32 Yudasap Silasap abeneko Allahri yubu silimu tiptop nang wamdekti, Yesusag “Sikne” aro seneragtop nimi taneko yubu ambatto wana aingniro poa tongolamsirek.  
\v 33 Sin phende abeneko Allah yubu ambarelamsiekti, as Antiokhia sae a'iliro wamekpa, as Antiokhia Yesusag “Sikne” aro seneragtop nimi tanekori wana wali uro lelamekti, “A'unkabo poghol ahiong nangag nen samoro pimundi, nuri sin sembe 'Nungkabo,' aro kiplamsiapne ambatsululom,” seek.  
\v 34 “Pululom,” seek aghana, Silas nenekori, “Na a'unap wamukap,” seogti, ta'ap seog.  
\v 35 Ta'ap seogpa, Paulusap Barnabasap abeneko babe as Antiokhia olog maiknoro wamdeka sinap nimi maikno orangeapti, yubu walinge Nia Mangkina Salehiropne Yesus sembe tibin nenero ambarelamsiek.   
\s1 Paulusap Barnabasap waldalamdekti, a'eptareka (15:36-41)  
\b  
\p
\v 36 Ambatto wameka Paulusti, Barnabasag yubu lelamogti, “Nuri samenag Nia Mangkina Salehiropne Yesus yubu ambarelamsinumu asag nungkabo Yesusag 'Sikne' aro seneragtop nimi 'Wali wamang to, kom to?' aro kemeroa yabuhununam,” seog.   
\p
\v 37 Wene seogpa, Barnabasti, “Nun kae Yohanes, si nhon Markus babe nhon pukap,” seog.\f + \fr 15:37  \ft Markus ponekona Barnabasti sisa nimiri mangaroba wamog (Kolosi 4:10).\f*  
\v 38 “Nhon pukap,” seogpa, Paulusti, “Yohanes Markus nimi enena samenag nunap nhon pibo aghana, as Pamfilia wamoboba, elna awe lilobi agha nu laplobi agha samoro yao. Ane sembe, nen elap nhon pukap kom,” seog.   
\p
\v 39 Wene seogpa, Paulusap Barnabasap su'ahel yo uro leptekti, a'eptarekti, Barnabas nenekori Markus enero agha kabong mag alip toman inagha mog so'o Siprus pirek.\f + \fr 15:39  \ft Barnabas poneko Siprusne wamog (Pogsiognang 4:36).\f*  
\v 40 Paulus nenekori babe Silas enero agha “Pununam,” seogpa, elkabo Yesusag “Sikne” aro seneragtop nimi tanekori Nia Mangkina Saelbamsilne ponekoag mololamekti, “Wana wali uro piamsululam,” aro molbaek.   
\p
\v 41 Wene aro molbaekpa, Paulusap Silasap lambarekti, mog so'o Siria inagha mog so'o Kilikia palamdekti, Yesusag “Sikne” aro seneragtop nimi winil talamek nimi mikip nenero poa palamsirek.   
\c 16  
\s1 Paulusap Silasap palamdekpa, Timotius sare kerebahiogha (16:1-3)  
\b  
\p
\v 1 Paulus palamogha as Derbea nen as Listra piog. Ae Listra anekoa palamogpa, nimi nhon Yesus yubu ka'ero ulamog nimi nhon si Timotius wamog. Timotius ilinna Yahudi kel, Yesusag seneraglamog kel wamogpa, Timotius ili ponekona Yunaninge wamog.  
\v 2 Yesusag “Sikne” aro seneragtop nimi as Listra wamek nimiap as Ikonium wamek nimiapti, “Timotius wana wali” alamek.   
\p
\v 3 Wene alameka Paulusti ka'ebaogti, “Timotius enero poa nhon pukap,” sembaog aghana, Yahudi nimi as enekoag wamek nimi tanekori, “Timotius neneko ili Yahudi sisa nimi komdi, Yunaninge wamla,” aro ni el wamek. Timotius ili Yunaninge wamogne sembe, Paulusti, “Timotius kon karebaikpa, nhon pukap,” seogpa, Timotius kon karebaek.\f + \fr 16:3  \ft Yunaninangdi sikin mabo kon kareplamek kom. Timotius ili Yunaninge, tanena Yahudi nimiri, “Kon kareptop kom nimiri Allah yubu ambarelamsiika sunsunum kom,” senelamek. Senelamekne ane sembe, Paulusti, “Tam elag waelbaleag,” aro, “Kon karebaikpa, elap nhon ambatto poa palamsukap,” seog.\f*   
\s1 Paulusti haing uamna kwelekamna senenag agha Makedonia nimi sembe lenda mabogha (16:4-12)  
\b  
\p
\v 4 Paulus elkaboap as taneko ni kanero palamekti, Yerusalema Yesusti wepto pogsiognangap Yerusalem wamek nimi Yesusag seneragtop nimi wenehiropnangapti yubu tam karepto pibekne as taneko ambatto poa tongolamsiekti, “Undo ul palamlulom,”\x - \xo 16:4  \xt Pogsiognang 15:28-29\x* aro ambarelamsiek.  
\v 5 Ambatto poa tongolamsiekpa, Yesusag seneragtop nimi winil talamek nimi ka'elamekti, mikip uro Yesusag “Sikne” aro seneraglamekti, nimi maikno talamek.  
\v 6 Paulusap elkaboap palamekpa, Allah Eldamne Yame Walinge nenekori, “Asia so'oag wamang nimiag Yesus yubu ambatsiseng kom,” aro pat pibogpa, ina palamekne mog so'o Frigia Galatia so'oag piek.  
\v 7-8 Mog so'o Misia simbik palameka, “Mog so'o Bitinia pukap,” aro ulamek aghana, Yesus Eldamne Yame Walinge nenekori, “Bitinia peheng kom,” aro irikahiogpa, Misia so'o phiro as Troas piek.  
\v 9 Troas piekti, Paulus ae inipnag malamogti, haing uamna kwelekamna senenag agha lenda malamog abeneko pere nimi mog so'o Makedonia nimi nhon sekamogha tibog aog. Tibog aogpa, Makedoniange ponekori, “Mag alip toman kauro yamendi, nu Makedonia nimi yepsululam,” aro mololamogpa, lenda mabog.  
\v 10 Paulusti lenda undo mabogne sembe nu ambatsiogpa, tam kareplamuburi, “'Makedonia nimiag pimundi, yubu walinge Yesus sembe ambarel phululom,' aro Allahri ambatto nu yoplamsil,” sembabu. “Allahri nun yoplamsil,” aro seneraglamuburi, “Elem-elem mog so'o Makedonia pukap,” aro togna toglamubu.\f + \fr 16:10  \ft Lukasti mome toro pibogne kembi agha, Paulus elkaboap palamekti, Lukasap sinap ma'aptaekti, as Troas laplobi agha nhon palamek.\f*  
\v 11-12 Togna togto aburi, Troas laplobi agha kabong lomag agha palamubunge peket aro as sina Samotrake pina mabubu. Mabubua kwelekaogpa, Neapolis inagha as Filipi pibu. As Filipi as nubunge neneko Makedonia so'oag agha Roma nimiri samenag nimi taneko luknubahiekti, Roma nimiri ul palamekne sunsunum uro saelbamsiek.\f + \fr 16:11-12  \ft As Filipi mog so'o ngainang yubu lerop nang oro luknubahaiekti, Roma nimiri saelbamsiek.\f* As Filipi anekoa sae a'iliro wamubu.   
\s1 Paulusti Filipi nimi Allah yubu ambatsiogha (16:13-15)  
\b  
\p
\v 13-14 As Filipi wamuburi, Yahudi nimiri Allahag yubu lerop sum taogpa, “Yahudi nimiri mag abolag winil dalamangdi, Allahag molona mololamang, to,” aro\f + \fr 16:13-14  \ft Yahudi nimiri senelameknena, “Yahudi nang sa'obare wamik tanena Allah yubu lerop ae sobaukang aghana, nengabo sa'obare wamik kom tanena Allah yubu lerop ae sobaukang kom,” senelamek. As Filipi Yahudi nengabo maikno koma Yahudi nimiri Allah yubu lerop ae orog ane sembe, Yahudi kelabo tanekori mag abolag winil talamekti, “Allah whingag sembenga babibeag,” aro sindi sae alelamekti, Allahag yubu lero mololamek.\f* el pukap sembabu. El pukap sembaburi, as Filipi leka kanero solingkirobag ina siram lambaburi, mag abolag palamububa, kelabo longoro wamekag piburi, pukubu. Pukamububa, kel nhon si Lidia as Tiatira kel wamog. Wamog kel enekori ag walinge nimi nubunge tupne sembe\f + \fr 16:13-14  \ft Kel enekori ag nimi nubunge tupne sembe wirop ag liklamogpa, nimiri kamna alikinag uro kapto tolamek.\f* wirop ag uwong-uwonga likto ulamogti, kel eneko Yahudi kel kom aghana Allah omektop kel wamog. Elap kelabo tanekoap yubu saro wamubu. Yubu saro wamububa, Lidia kelenekori babe yubu ambatsibunge ka'eamsiog. Paulusti Yesus sembe yubu ambarelamsiog abeneko Nuni Allahri keleneko wana heklamogpa, Yesusag “Sikne,” aro seneraghogti, yubu ene saelbamog.  
\v 15 “Yubu ene sik,” sembaogti, saelbamogpa, kelenekoap eldi aeag wamek nimiap ni maghag pelengkahibu. Maghag pelengkahibuba, Lydia kelenekori nunag ambarelamsiogti, “Nia Mangkina Salehiropne Yesusag 'Sikne' aro seneraglamna. A'undi na sembe, 'Kel eneri sik uro Yesusag seneraglamla,' sembamun, tanena nanap nhon wamukap,” aro yubu mikip uro enero eldi aeag tobongkipsiog.   
\s1 Kop ae sembe usog wamogne Filipinge Allah yubu ka'ebaogha (16:16-40)  
\b  
\p
\v 16-17 As Filipi wamubuag agha kel nhon el kulomag phia wamog kel wamog. Kel enekona, amik uro yabinepne ililamog kel, ili yabo arukna saog uro wamog. Wamogpa, nimiri kel enekoag yalamekpa, kel enekori, “Anag undo uro yabilul,” aro ambarelamsiogpa, el talamekti, kamna ili yabo tarelamsiekpa, ili yabo tup talamek. Ik nhon sum, “Yahudi nimiri mag abolag Allahag molona molorobag pukap,” aro palamububa, keleneko haiptaburi, nu Paulusap amik sare nelepto yalamogti, haum aro lelamogti, “Nimi tane Allah Mikip Phelektopne arukna wamang ane sembe, sindi yubu ambarelamsiangne ka'elapmunba, Allahri a'un taulbahilul,” aro yubu leple yalamog.  
\v 18 Undo yubu wene alamogha ane, nu pang-yang ulamububa, yubu wene alamog aneko sae a'ilin talamog. Ik nhon sum, yubu wene alamogha aneko sembe Paulusti wanaag yo uaogpa, samoro keleneko kembaogti, phia keleneko kulomag wamogha anekoag yubu lelamogti, “Allahri 'Saelbamsululam,' aro wepto poghol aogne Yesusti el mikipne nunag pipsiogpa, lemnuan. Phia kelene kulomag wamlama ane lambae!” seog.  
\p Wene seogpa, phia keleneko kulomag wamogha aneko lambaog.  
\v 19 Phia aneko kelenekoag wamogne neneko lambaogpa, ili yabo tanekori, “Phia aneko el kulomag ulamlari, 'Undo-undo uro yabilul,' alamlaba, kal ma'al maikno tarelamsiang aneko wene nen saelbaukap kom,” aro Paulusap Silasap sae salero, tam lelekto kemero kareptobag saelba uahirop nangag poa phiek.  
\v 20-21 Keleneko ili yabori tam lelekto kemero kareptobag poa phiekti, saelba uahirop nangag lolorop yubu ambarelamsiekti, “Sin Yahudi nimi taneri ambarelamsirangne nene, 'Ulamlulom,' alamdang aghana, nu mog so'o Roma nimi wamapti, ambarelamsirangne sunsunum uro uanep kom wamap. Nu as Filipi nimi Roma nimi umag wamapne wana mali nenelamsirangba, nimi taneri yanghang alamsiang,” aro lolorop yubu ambatsiek.\f + \fr 16:20-21  \ft Tam nenelamsieknena, kel enekori uro yabilul aropne neplamogpa, kal ma'al tarelamekpa, iliyabo tup talamek neneko Paulusti kareplobogha sembe lemnep yubu wamog aghana sin phendeag minirop yubu lolbahiek.\f*   
\p
\v 22 Wene aro ambatsiekpa, nimi maikno tanekori Paulusap Silasap sembe “Karong” alamsiekpa, nimi nubunang tanekori sikinipsabo saeag nembahiekti, “Sikininge ag enekto amtangne taepto epsimundi, nimi abene kameri opsululom,” aro ambatsiek.   
\p
\v 23 Wene aro ambatsiekpa, kameri maiknoro taeplam-taeplam lopsiekti, kop aeag tolongkahiekti, kop ae yae uropne ponekoag, “Lambarikagtina, wali uro yae wamsululam,” aro ambarek.   
\p
\v 24 Wene aro ambarekpa, kop ae yae ua uropne ponekori sin phende abeneko ae kolo lom nusamagneag nembahiogti, sindi yan kalag a'aruro kauplopsiog. \fig Paulusap Silasap kop aeag tobongkahiekpa, sin phende abenekori yanap kalap a'aruro kauplopsiog.|alt="Setelah orang memasukkan Paulus dan Silas ke dalam penjara, dia mengikat kaki mereka pada kayu" src="cn01988b.tif" size="col" copy="David C. Cook" ref="Pogsiognang 16:25" \fig*  
\v 25 Yan kalag a'aruro kauplopsiogpa, wamekpa, ae inipna tomnusam taogpa, Paulusap Silasap abenekori Allahag molona mololamdek. Allahag molona mololamdekti, Allah omektop sepna seplamdekne nimi yogne kop aeag aneko wamekneri babe ka'eamsiek.  
\v 26 Allah omektop sepna seplamdekpa, ka'ebaekti, wamekpa, ae sa'uma nubunge nhon ulamog. Ae sa'uma ulamogti, ae eneko solamekti, yangkaek kirik maptopne pot-porolamog. Yangan kirik maptopne pot-porolamogpa, ina siram kuptangto palamogpa, kop aeag tobongkamsiek nimi yan sae haing kaubamsiekne loptangto palamog.  
\v 27 Ae sa'uma aneko ulamog abeneko kop ae yae ua uropne poneko malamogha pukog. Pukogti, kemelamogpa, ina serekna serekahiogne taneko ni kupto wamogha kembaogti, “Nimi ni tobongkahiongne lambang,” aro log sembaog. Log sembaogti, karog kilbaogti, “Ya'ag optanun,” aro ulamog.\f + \fr 16:27  \ft Kop ae yae ua uropne ponekori, “Nimi nari saeag agha lambang ane sembe, saelbamneang nimiri na omniikpa, seklebaneagti, na optanun,” aro ulamog.\f*  
\v 28 “Optanun,” aro ulamogpa, Paulusti, yubu nubu uro lelamogti, “Optaheng kom. Nuna ni ae lomag ane wamap,” seog.   
\p
\v 29 Undo wene seogpa, kop ae yae ua uropne ponekori, “Whea tarelanuhu,” aro ilipsabo arukahiogti, ae lom enekoag wa'iogti, pet-pet aro Paulusap Silasap sin whingag yabu sanukto pulingkiog.  
\v 30 Yabu sanukto sin whingag pulingkiogti, sekom agha Paulusap Silasap enero poa asag lambahiogti, hailamsiogti, “Nani yabo, malia ulamnange sembe, 'Allahri lunuro opneleag,' aro na huaneba taulbanelul?” aro haibahiog.  
\v 31 “Na huaneba, taulbanelul,” aro haibahiogpa, sindi samoro elag lelamdekti, “Nia mangkina Salehiropne Yesus ponekoag 'Sikne' aro seneraglapmunba, anap ankabo andi aeag wamangneap taulbahilul,” aro ambatek.   
\p
\v 32 Wene aro ambatekti, elap ilipsabo eldi aeag wamekneap Nia Mangkina Salehiropne Yesus sembe yubu ambarelamsirek.  
\v 33 Ambarelamsirekpa, kop ae yae wamogne ponekori inipnag abeneko sin phende opsiek ina taneko mag a'elbahiog. Mag a'elbahiogpa, eldi kelabo me wamekneap eldi aeag wamekneapti Yesusag seneraglamekne sembe maghag pelengkipsirek.  
\v 34 Maghag pelengkipsirekpa, Paulusap Silasap abeneko enero poa kop ae yae wamogne ponekori aeag poa phiogti, kwaneng yobatsiog. Yobatsiogpa, teekti, wamekti, elap ilipsabo aeag wamekneapti, “Allah yubu ambatsirangba, sik senelamapti, salelamap,” aro awi yeng senelamek.   
\p
\v 35 Kweleknag aneko as Filipi aneko nimi saelba uahiropnangdi sikinipsabo poglamsiekti, “Kop aeag nimi yae ua uropne ponekoag pimundi, ambarelapmundi, 'Nimi phende nang abeneko sae lopsululam,' aro ambatlulom,” aro pogsiek.  
\v 36 Pogsiekpa piekti, ambarekpa, kop ae yae wamogne ponekori nen sap tipto Paulus ambarelamogti, “Nangkabo, nimi saelba uahirop nimi tanekori nanag, 'Sae lopsimenba, yubu lepseng koma lambarukang,' seangba, wali lambarurom,” aro ambatsiog.   
\p
\v 37 Wene aro ambatsiogpa, Paulus nenekori saelba uahirop nang sikinipsabo yaek nimi tanekoag, “Nu babe Roma nimi wamnam aghana, tam oroghag agha sa'a sembe tam lelekto kemero kareptop nimiri nunag haibahin koma nimi maikno haingag agha opsiongdi, kop aeag tolongkipsiong? Opsiongdi, tolongkipsiong aghana, wene sa'a sembe tognoro saog uro 'Pururom,' seang? Nu tognoro saog uro lambanunam kom. Sindam nimi yaikti, nu enero poa lambitsukang,” seog.\f + \fr 16:37  \ft “Roma nimi wamnam,” seogne ane sin mog so'o sembe lebog kom. “Roma nimi wamnam,” seognena, mog so'o Roma nimi ni saelba uahiropnang nubungeri, “Nimiri Roma nimiag tam paibikpa, saelba uahiropnangdi tam lelekto kemero kareplamikti, 'Malia ual,' seikpa, Roma nimi opsukang,” aro yubu sia karepto pibek. Tam lelekto kemero kareban koma Roma nimi opsiik tanena, Roma nimi saelba uahirop nimi nubungeri opsiik nimiag tam nubunge palilamsiek.\f*  
\v 38 Paulusti, wene aro ambatsiogne sindi yubu poro agha sikini yaboag piekti, yubu tipto ambatsiek. Ambatsiekpa, ka'ebaekti, as taneko nimi saelba uahiropnangdi, “Paulusap Silasap, sin babe Roma nimi wamdang, aghana tam lelekto kemban koma sin opsibo,” aro el taekti, log sembaek.  
\v 39 Log sembaekti, as Filipi saelba uahirop nimi nubu nang taneko Paulusap Silasap sin wamdekag piekti, “Wana aingniro lambarukang,” aro yubu wali uro lelamekti, ae kop aeag anekoa enero poa lambahiekti, “Nangkabo, as eneag laplobi agha lambarurom,” seek.   
\p
\v 40 Wene aro ambatsiekpa, sin phende kop aeag agha lambarekti, kel Lidia kelenekori aeag pirek. Pirekti, sikin kabo Yesusag “Sikne” aro seneragtop nimi wana aingnibahirekti, Paulus elkabo abenekoap as Filipi aneko laplobi agha palamek.   
\c 17  
\s1 As Tesalonika nimiri Paulusap Silasap sembe yanghang alamsieka (17:1-9)  
\b  
\p
\v 1 As Filipi laplobi agha Paulusap elkaboap as Amfipolis inagha as Apolonia inagha palamekti, as Tesalonika piek. As enekoag Yahudi nimiri Allahag yubu lerop ae nhon wamog.  
\v 2-3 Allah yubu lerop sum taogpa, Paulus nenekori ora asag ulamog saog uro as Tesalonika anekoa babe Yahudi nimiri Allah yubu lerop ae enekoag wa'alamog. Wa'alamogti, Allah yubu lerop sum ik wilindi tibin nenero ambarelamsiogti, “Allah yubu samenag toro pirop mome kembi agha Allahri, 'Mog so'oag nimi taulbahimendi, saelbamsululam,' aro wepto poghol aogne poneko sembe nu el taap. Samenag mome toro pibek nimiri saeag agha undo uro yabilulne sembe Allahri ambarelamsiogne, 'Na Allahri wepto poghol anunne poneko mog so'oag yaleba, nimiri ya'ag obikpa, seklero tebaleri, nimi ya'ag teptopne nusamag agha kamag talul,' aro Allahri ambatsiog. Allahri, 'Mog so'oag nimi taulbahimendi, saelbamsululam,' aro wepto poghol aogne Yesus ponekoag uro yabiogne sembe ambarelamsin,” aro Paulusti ambatto wana heklamsiogpa, sindi “El tahabe,” aro hailamekne eldi tibin nenero ambarelamsiog.   
\p
\v 4 Paulusti wene aro ambarelamsiogpa, Yahudi nimi etbareri “Paulusti ambarelamsilne sik,” senelamekti, Paulusap Silasap sae tiptangto ma'altalamek. Ma'altalamek nimi ane Yunani nimi Allah omektop nimi maikno babe, kelabo as Tesalonika kelabo sikinin yabo saog uro wamek kelabo maikno babe sindi, “Sik” senelamekti, Paulus elkaboap ma'altalamek.  
\v 5 Sin ma'altalameka kembi agha, Yahudi nimiri, “Nimi maiknori sin phende maiplamsiang,” aro wana yo senelamsiek. Wana yo senelamsiekti, Yahudi nimi tanekori ulamekti, malia ulamek nimi awe weroan koma ambengka uro urop nimi etbare sae kiliro topsiekti, “Put-put ana ulamukang,” aro Yahudi nimiri “Unulamlulom,” aro arukahiek.  
\p Wene aro arukahiekpa, put-put alameknang anekori as aneko nimi wana bobo nenelamsiek. Wana bobo nenelamsiekpa, as taneko nimiri “Yanghang alamsiberi, yag lambahukap” aro poloro winiptaek. Poloro winiptaekpa, Yahudi nimiap put-put arop nimiap tanekori, “Paulusap Silasap ero saelbahiberi, poloro winiptaang nimi saeag nembahukap,” aro sikinkae Yasondi ae kwerekto wa'iek.  
\v 6 Kwerekto wa'iekti kemelamsiekpa, Paulusap Silasap orog wamdekpa, sikinkae Yasonap Yesusag “Sikne” aro seneragtop nimi etbareap saelbahiekti, kiliro so'oag lelepto poa palamsiekti, nimi nubu nang as eneko saelbamsiek nang saeag tarel phiek. Yubu haum aro poa palamsiekti, “Mog so'o as tala-tala tam palilamdangba, yubu talamla nimi taneko wene nuri asag yingkilamdang,” alamekti kiliro pabalamsiek.  
\v 7 “Yasondi Silasap Paulusap kiliro nuri asag palilamsil. Roma nimi sembe yubu sia leropne nubunge Kaisardi yubu tam karepto pibog aghana, yarek nimi anekoap, sikinkabo tanekoapti philamang. Roma nimiri mog so'o wamap ane sembe, yubu sia leropne nhonog Kaisar wamla aghana, sindi ambarelamsirangne, 'Yubu sia leropne nubunge nhon Yesus wamla,' aro ambarelamsirang,” alamek.   
\p
\v 8 Wene alamekpa, nimi maikno tanekoap nimi nubu nang tanekoapti ka'ebaekti, wana samsamolopsiogpa wamek.  
\v 9 Wana samsamolopsiogpa, wamekti, nimi nubu nang tanekori Yasonap Yesusag seneraglamek nimi tanekoabag lelamekti, “Kal ma'al nunag tatsumundi, aghabogna pululom. A'unkabori Yesus poneko yubu ambarelamsirangne ane sembe, 'Nunkabori nen yubu ane ambatsin koma nuri asag agha lambarukang,' aro salag pipmundi, kal ma'al tatsululom,”\f + \fr 17:9  \ft “Kal ma'al nunag tatsululom,” seekne ane “Yubu orolena ambatsiseng kom,” aro lebek. Tam ane nen waelbale kom tanena, “Kal ma'al ane nen samoro tatsukap,” aro tobek. Aghana tam ane nen waelbale tanena kal ma'al tatsiekne ane “Nimi nubunge saeag wamlul,” seek.\f* aro nimi nubu nang tanekori wene seekpa, kal ma'al tatsiek. Tatsiekpa, tobekti, “A'unungeag pululom,” seekpa, lambaek.   
\s1 Paulusap Silasapti Berea nimi Allah yubu ambatsireka (17:10-15)  
\b  
\p
\v 10 Lambaek sumeneko inipnag Yesusag “Sikne” aro seneragtopnang tanekori “Nangkabo, pururom,” seekpa Paulusap Silasap as Berea pirek. Aneko pirekti Yahudi nimiri Allah yubu lerop aeag aneko wa'irek.  
\v 11 Yahudi nimi agha as Tesalonika wamek nimi taneko wana yo nimi wamek aghana, Yahudi nimi agha as Berea wamek nimi wana aingnirop nimi wamekti, wanaag sol wali, wali uro Allah yubu ka'elamek. Ka'elamekti, “Paulusti Allah yubu ambarelamsilne nene sik to, kom to,” aro seneraglamekti, Allah yubu samenag toro pirop mome sop-sop lelekto kemelamek.  
\v 12 Berea nimiri, “Sik to, kom to?” aro Allah yubu lelekto kemelamekti, Yahudi nimi agha as Berea wamek nimi maiknori Yesusag “Sikne” aro seneraglamekpa, Yunani nimi sikinin yabo saog uro wamek nimi taneko babe, Yunani nimi kelaboap nengaboap sin maiknori Yesusag “Sikne” aro seneraglamek.  
\v 13 As Berea nimi maiknori Yesusag seneraglamek aghana, “Paulusti as Berea nimi Allah yubu ambarelamsil,” ana Yahudi nimi agha Tesalonika wamek nimi tanekori ka'ebaekti, “Paulusti yubu ka'ebaukang kom,” aro as Berea aneko piek. Piekti, put-put aro wana aluktop yubu ambarelamsiekpa, ka'elamekti nimi maikno sikin sip tangto “Paulusti ambarelamsilne karong,” senelamek.   
\p
\v 14 Wene alamekne sembe ta'ap sen koma Paulus elkabo Yesusag “Sikne” aro seneragtop nimi tanekori mag longorop mag laut abolag sip poghol piekpa, Silasap Timotiusap agha as Berea aneko wamdek.  
\v 15 Paulus neneko elkabori enero poa as Atena pil piekti, yalamekpa Paulus nenekori, “Silasap Timotiusap menag-menag na amik yarukang,” aro yubu pibog.   
\s1 Paulusti Atena nimi Allah yubu ambatsiogha (17:16-34)  
\b  
\p
\v 16 As Atena aneko piogti, Silasap Timotiusap sembe nang-nangaro tibogto wamsiogti, as enekoag nimi saeri sunurop mema phalamekne maikno wamogha kembaogti, Paulus wana ikin sembaog.  
\v 17 Wana ikin taogne sembe, Yesus sembe ambarelamsiogti, eldi yubu ka'elamek nimiap sop-sop haibildalamekti, “El tahabe,” aro hailamekne tibin nenero ambarelamsiog. Yahudi nimiri Allah yubu lerop aeag wa'alamekti, Yahudi nimiap Yahudi sisa kom nimi Allah omektop nimi tanekoap Yesus sembe ambarelamsiog. As Atena nimiri nia mangkina pail wa'ina tolamekag babe Paulusti sop-sop palamogti, nimi pangyang ulamek nimi taneko wamekne babe ambarelamsiog.  
\v 18 Nimi etbare mome ambatsirop nang Epikurosti seneragtopne saelbamek nangap,\f + \fr 17:18  \ft Epikurosti seneragtopne saelbamek nimiri seneraglameknena, “Nundam nimi nong sembe seneragel talamukap. Nimiri samenag mema phalamekne orogti, sa'a-sa'a phalamukap kom. Sa'a-sa'a 'Nu yeng,' sembaberi saelbamukap,” aro seneraglamek.\f* Stoari seneragtopne saelbameknangap,\f + \fr 17:18  \ft Stoa seneragtopne saelbamek nimiri seneraglameknena, “Wali uro tam lelekto kemero seneraglameberi, nimiri wali uro ul palamukapne sembe el taukap. Nimiri mema phalamapne maikno wamang aghana, nu mog so'oag nimiri nundam nimi agha seneragal talamukapti, nuri saelba uahirop nimiri 'Ulamlulom,' seikne aghabog ulamukap,” aro seneraglamek.\f* Paulusap alniro yubu saro haibil talamek. Haibil talamekti, Paulusti yubu walinge Yesus sembe ambarelamsiogti, “Nimi teptopne kamag tanep,” aro wene seogne sembe, nimi taneko etbareri, “Nimi ene el wamlare? Eldi seneragna olog aghana yubu pam andari lelamla,” alamekpa, nen nimiri, “Nimi eneri mema ora mog so'oag nimiri phalamangne nu ekonne ambarelamsil, te?” alamek.\f + \fr 17:18  \ft Paulusti Yesus kamag taogne sembe ambarelamsiogti, Yunani yubuag “kamag taog” seogne yubu kiki “Anastasis” aro lebog. Wene seogpa, ka'elamekti, nimi nhon-nhondi, “El ambarelamsilnena, mema si Anastasis sembe ambarelamsil,” senelamek.\f*   
\p
\v 19 Wene alamekti, Paulus neneko tam kareptobag Areopagus yimag poa piekti, “Andi yubu tam wendogne lelamlamne nene nu babe ka'ebaukapti, nen ma'aro ambatsi,” alamek.  
\v 20 “Andi lelamlamne nuri aoag olog ka'elamabag agha lelamlamne nene sembe, 'Sa'a agha lelamla,' senelamap. Ane sembe, lag phoro ambatsisom?” alamek.   
\p
\v 21 (As Atena wamek nimiap nimi ora asag agha sekelingkirop nimi tanekoap oraba uan koma yubu tam wendogne sembe ngagto ka'elamekti, wamek.)   
\p
\v 22 Wamekti, “Ambatsisom,” alamekpa, Paulus neneko Areopagus yimag aneko poloro winil talamek nimi whingag sekogti, yubu lelamogti, “Atena nimi nangkabo, a'undi mema phalamlomne sol wali uro ulamlomne kemelamsin.  
\v 23 A'undi mema phalamloma tane sembe ina yabalamnori, mema pharobag nhon kemelamno. Kemelamnoba, mome toro piplumne lilimna ane: “Mema nimiri ekon uropne sembe,” aro mome toplumdi, mema pharobag ane piplum. A'undi mema ekon urop mema phalamlomne poneko sembe wene nari a'unag ambatsinun.\f + \fr 17:23  \ft Paulus tane wana hektopneag agha lelamog. As Atena nimiri, “Eldi mema ora mog so'oag nimiri phalamangne sembe ambarelamsil,” alamekne ane tam lelekto kemero kareptop nangdi ka'ebaikti, alamekne sik sembaik tanena, Paulusag tam ikinne pimnep. Aghana, wene Paulusti sin “Ekon urop mema” aro mome toro pibekne kembiagha, “Sindi seneragna ane pere agha Yesus sembe ambatsinun,” aro ulamog.\f* \fig Paulusti as Atena nimiri mema pharobag nhon kemelamogpa, Atena nimiri mome tobekne, “Mema nimiri ekon uropne sembe,” aro mome toro pibek.|alt="Paulus melihat mesbah untuk dewa yang tidak dikenal orang." src="cn01996c.tif" size="col" copy="David C. Cook" ref="Pogsiognang 17:23" \fig*  
\v 24 Allahri nia mangkina so'oag wamlange sumbaogti, im so'o saelbamsil. Im So'o Saelbamsilne poneko nimi saeri mem ae soropneag ua urop kom.  
\v 25 Imap so'oap sumbaogne ponekori nimi ni kamag nenelamsildi, hain tarelamsildi, ni nuri saeag wamlangena tarelamsilba, nu nimi mog so'oag nimiri, 'Imap so'oap sumbaogne poneko el teko wamla,' sembanep kom. Nuri saeag agha el yepnep kom.  
\v 26 Yum-yum samenag nimi nhon sumbaogneag agha nimi maikno likto palamogpa, nimi mog so'oag nimi likto piek. Nimi likto piekne taneko 'Nimi tala-tala wamikti, mog so'o to'op taukang,' aro Allahri nimi sumbahiog. Sumbahiogti, kareplamogti, 'Nimi mog so'o a'ero-a'ero wamukangne, tane nhon, tane nhon wamukang,' aro karebaogti, pipsiog. Apna, 'Nimi ane ko'o eneag wamlul, nen nimi li ko'o nhon likto pilul,' aro karepto pibog.  
\v 27-28 Allahri karepto pibognena, 'Nimi Na whing ebaneikti, mololamniikti, “Yepsi,” aro Nanag ebanukang to kom to,' aro Allahri undo unuaog. A'uni yabo nimi nubu nangdi sepna siplamekti, 'Nu mog so'oag nimi Eldi mangaro likto pipsiogne wamap. Ot Eldi saeag agha hain eplamapti, senelamapti, lebe alamap,' aro siplamek. Nu mog so'oag wamapne el wamlange weag wamla kom ane sembe, sae nginikto ulamebeba, el nunag lag talul.   
\p
\v 29 Nu mog so'oag nimi Allahri mangaro likto pipsiogne wamap ane sembe, nimiri 'El imag uropne hain tarelamsilne poneko sunumna sumbaukap,' sembaheng kom. Leng-leng arobaap, kororopneap, wali kirikap tobiagha nimi saeri walia sunuroba taneko El imag uropne hain tarelamsilne poneko sunumna sumbanep kom.  
\v 30 Nu mog so'oag nimi limituk uro wamuburi, 'Hain tarelamsiogne poneko sunumna sumbaukap,' aro lebe arop komne agha sunulamubu. Sunulamubunge neneko sembe samenag Allahri, 'Sin ekondi, ulamangba, unulamik,' sembaogti, lipsiog aghana, wene Eldi nimi ni tala-tala wamang nimiag lelamlangena, 'Samenag malia ulamlumne lipsimundi, Nanag yalulom,' aro aruklamsil.  
\v 31 Allahri yubu pibogne, '”Sumeneko uanun,” sembamsinge sunsunum uro, nimi nhon wepto sekitsinge sae pere agha nimi ni mog so'oag uropne tam ua uropne porog uro tam karebanun,' aro yubu pibog. Wene aro yubu pibogne sembe 'Samenag malia ulamlomne lipsimundi, Nanag yalulom,' aro aruklamsil. 'Nimi nhon wepto sekitsinge,' seognena, 'Nimi ni, “Allahri Yesus ane wepto sekirog,” aro el taukang' senenag agha Allahri nimi teptopne nusamag agha Yesus poneko kamag nembaog,” aro ambatsiog.   
\p
\v 32 “Nimi teptopne nen kamag tanep,” aro Paulusti ambatsiogpa, ka'ebaek nimi taneko pogtaek. Nimi nenne tanekori Paulusag og sobaek aghana, nen nimiri, “Nangkae, wene selamne nene sembe nen lepmenba, nu ka'ebaukap,” seek.   
\p
\v 33 Wene seekpa, Paulus yubu tam kareptop nimi winiltalamekag aneko laploa lambaog.   
\p
\v 34 Wene alamekag agha ka'ebaek nimi etpare Paulusag sip talamekti, wene aro ambatsiogne sembe Yesusag “Sikne” aro seneraglamek. Sin Yesusag “Sikne” aro seneraglamek nimina, Areopagus yimag tam kareptopne nhon sina Dionisiusap, kelabo nhon Damarisap, nimi etbareap sin sik senelamek.   
\c 18  
\s1 Paulus as Atena laplobiagha as Korintus piogha (18:1-17)  
\b  
\p
\v 1 Paulusap Atena olog wamekpa, Paulus neneko as Atena laplobiagha as Korintus piog.  
\v 2 Korintus piogti, Yahudinge nhon si Akwila\f + \fr 18:2  \ft Roma nimi yubuag sina Akwila ane, “Winang abeao saog winang” arop.\f* haiptarek. Akwila poneko mog so'o Pontusne wamogti, as Roma sekilingkiog. Aghana Roma nimi salehiropne sina Klaudius yubu sia leropne nubunge ponekori, “Yahudi nimi as Roma tane wamseng kom,” aro as Roma agha yag lambahiog. As Roma agha yag lambahiogpa, Akwila elkel Priskilaap as Roma negara\f + \fr 18:2  \ft Yubu kiki “bangsa” Indonesia yubuag alamangnena, “Mog so'o nubunge mo sektop mog so'o nimi nubunangdi saelbamsiangdi, yin salero pelebel talamang,” aro “bangsa,” alamang.\f* mog so'o Italia laplobi agha as Korintus yarekti, Paulusap haiptaek.  
\v 3 Paulus neneko sin wamdekag piogpa, sin elkel ela'ange abeneko babe, “Nu awe nikne, pham kon mektopne agha kalun ae sona ag wetnero sorop nimi wamap,” aro sin phenderi aeag nhon wamekti, awe nhon tolamek. \fig Paulusti pham kon mektopne agha kalun ae sona ag wetnero soropne wamog.|alt="Paulus adalah seorang tukang penjahit kemah." src="CN01999B.TIF" size="col" copy="David C. Cook" ref="Pogsiognang 18:3" \fig*  
\v 4 Wamekti, awe nhon tolamekti, Yahudi nimiri Allah yubu lerop sum yalamog tanena Paulus nenekori sop-sop Allah yubu lerop aeag wa'alamogti ambarelamsiog. Ambarelamsiogti, Yahudi nimiap Yunani nimiap “Yesusag seneraglamlulom,” aro ambatto wana heklamsiogpa, sindi “El tahabe,” aro hailamekne eldi tibin nenero ambarelamsiog.   
\p
\v 5 Allah yubu lerop sum yalamog sumeneko Paulusti Yesus sembe ambarelamsiogti, wamogpa, Silasap Timotiusap mog so'o Makedonia agha yarek. Makedonia agha Silasap Timotiusap Paulus wamoghag yarekpa, Paulus ponekori ag wetnero tolamogne libogti, “Allah yubu nimi ambatsinunne aghabog uanun,” aro sol wali, wali uro ambarelamsiog. Sop-sop Yahudi nimi ambarelamsiogti, “Allahri 'Mog so'oag nimi taulbahimendi, saelbamsululam,' aro wepto poghol aogne Yesus nunag lag taog,” aro ambarelamsiog.  
\v 6 Paulusti ambarelamsiog aghana Yahudi nimi tanekori, “Yesus sembe ambarelamsilne nimiri ka'ebaheng kom,” aro ulamekti, Paulusap Yesusap san tiliplamsiek. San tiliplamsiekpa, Paulusti ag enektopne leng-lenga wamogne po'oro pelengkaogti, sinag yubu lelamogti, “Allahri opsileba, a'ununge eneng a'ununge usoghag timbale! Allahri awe nari saeag nembaneogne tolamnari, Yesus sembe a'unag samen yubu ambarelamsin ane sembe nanag tam pimnep kom.\x - \xo 18:6  \xt Matius 10:14; Markus 6:11; Lukas 9:5; 10:11\x* Wene anea lambaneri, Yahudi sisa kom nimi mog so'o yog nimiag ambarel phinun,” seog.   
\p
\v 7 Wene seogti, Yahudi nimiri Allah yubu lerop ae anekoa lambaogti, ae anekoap tipto sorobag ae wamogne palamog. Ae ngainge si Titius Yustus wamogne poneko nimi sisa Yahudinge kom aghana Allah omeklamogne wamog. Paulusti Allah yubu lerop aeap tipto sorobag ae aneko alniro wa'alamogti, Yesus sembe nimi ambarelamsiog.  
\v 8 Ambarelamsiogne ka'elamekag agha Allah yubu lerop ae saleropne poneko si Krispus wamogneap, eldi ae lom nimiap Yesusag “Nia Mangkina Saelbamsil,” aro seneraglamek. Paulusti ambarelamsiogne sik senelamekti, wamekpa, Korintus nimi Yahudi sisa kom nimi maikno Paulusti Yesus sembe ambarelamsiogne ka'elamekti, sik senelamek. Yesusag “Sikne” aro seneraglamek nimi maghag pelengkahiek.\f + \fr 18:8  \ft Paulusti nimi nhon-nhon maghag pelengkahiog, aghana eldi yepsirop nimi wamekneri maiknoro nimi maghag pelengkahiek. (1 Korintus 1:14-16)\f*   
\p
\v 9 Ik nhon sum inipnag malamogpa, Paulus lenda saog uro haing uamna kwelekamna senenag agha Nia Mangkina Salehiropne ponekori elag yubu lelamogti, “Log kom uro ambarelamsululam! Yubu kom taheng kom!  
\v 10 Nari an piangken. Nimi naringe as eneag nimi maikno wamang ane sembe, tane wapmenne nimi nhondi babe yo uro saelbaghukang kom. Ona babe opkukang kom,” seog.   
\p
\v 11 Wene seogpa, Paulus neneko as Korintus wamogti, Allah yubu ambarelamsiogpa, heng kun nhon wal no'op bare taog.  
\v 12 Heng kun nhon wal no'op bare taog aghana, nimi nubunge si Galio, “Mog so'o Akhaya saelbamlul,” aro towalengkaek li sin Yahudi nimi taneko ma'aptaekti, “Paulusag tam ikinne pibukap,” aro yubu tam lelekto kemero kareptop nangag poa piek.  
\v 13 Poa piekti, lelamekti, “Nimi eneri ekel ina Allah yubu ambarelamsildi, 'Undo-undo Allah omeklamlulom,' aro ambarelamsil aghana, nu Yahudi nimi nunisag Musari toro pibog momeap sunsunum kom uro ambarelamsil,” alamek.   
\p
\v 14 Wene alamekpa, Paulus yubu lemnun agha ulamoghag agha, Galio ponekori Yahudi nimiag yubu lelamogti, “A'un Yahudi nimi nangkabo. Tam payalomnena, nun saelbamsiang nangdi samenag yubu sia pibekne phibao aro lemnepne wamsoba, ologne to, nubunge to payahom tanena, 'Wali payaangba,' aro karebahane.  
\v 15-16 Aghana tam payalomne nene yubu kiki sembe, nimi si sembe, samenag a'unisag yabori mome tobekne saelba ulamlomne sembe yubu leplomdi, payalomba tam nene nari karebanep komdi, a'un mo karebalulom,” aro Yahudi nimi taneko yubu tam kareptop aeag agha yag lambahiog.  
\v 17 Yag lambahiogpa, nimi tanekori Yahudi nimi nhon sina Sostenes saelbaekti, yubu tam kareptop ae ina siramag agha olamek. Sostenes poneko Yahudi nimiri Allah yubu lerop ae saelba uropne wamog aghana Sostenes olameka ipsiogti, Galio ponekori yubu olog lebog kom.   
\s1 Paulus samoro as Antiokhia Siria so'oag yaogha (18:18-23)  
\b  
\p
\v 18 Paulus ik maiknoro Korintus wamogha Yesusag “Sikne” aro seneragtop nimi tanekoag, “Mog so'o Siria simbik pinun,” seogti, mag alip toman agha palamog. “Mag alip toman punun,” aro as Kengkrea piogti, Yahudi nimiri ulamekne sunsunum uro “'Allah arukna sol wali walinge wamnun' aro keknep uro yabalamne abeneko hong kareptop koma wamnea, wal nenekoag hong karebanukang,” aro salag pibogne sunsunum uro hong karebaek.\f + \fr 18:18  \ft Paulusti salag pibogne anena, “Nazar” salag alameka saog uro pibog (A'iliroba 6:1-21). Paulustina, “Allahri yepneleba, 'Nana Allah Eldamne arukna wamna,' senenne kekneba pimnun,” sembaogti, ik maiknoro hong karebaog kom. “Allahri yepnelul,” sembaogne ane, Pogsiognang 18:10 mome tobogneag, “Allahri Paulusag salag pibogne, 'Opkukang kom,' seogne sunsunum uro sembaogti, ulamog,” senelamang.\f* Hong karebaekpa, palamoghag agha Priskilaap Akwilaap nhon palamekti,  
\v 19 as Efesus piek. Piekti Priskilaap ela'ange Akwilaap abenekori, “Nu tane wamnunam,” serekpa, Paulus nenekori, “Nen tipto palamnun,” seog. “Palamnun,” seog aghana, as Efesus olog wamogpa, Yahudi nimiri Allah yubu lerop aeag aneko piogti, Yahudi nimiap aneko Yesus yubu ambarelamsiogti, sindi “El tahabe,” aro hailamekne eldi tibin nenero ambarelamsiog.  
\v 20 Tibin nenero ambarelamsiogpa, Yahudi nimi tanekori Paulusag mololamekti, “An nunap olog tane wamebea,” aro molbaeka Paulusti “Kom,” seog.  
\v 21 “Kom,” seog aghana, “Pinun,” aro kiplamsiogne, “Amik Allahri nanag, 'Wali saombalulam,' aro ambatnele tanena amik a'unag samoro yanun,” aro kipsiog. Kipsiogti, as Efesus aneko laplobi agha mag alip toman agha as Kaisarea sip piog.  
\v 22 As Kaisarea sip piogti, mag abolag sekel piogti, “Yesusag 'Sikne' aro seneragtop nimi Yerusalem wamangne\f + \fr 18:22  \ft Lukasti mome toro pibogne ane, “As Yerusalem” mome toro pibog kom aghana, “Waelbaogti, kulukul aog,” mome tobognena, “Yerusalem waelbaogti, kulukul aog,” aro mome tobog. Kaisarea agha Antiokhia piog tanena, “Kulukul aog” senep kom.\f* kipsinun,” aro waelbaogti, kipsiogti, as Antiokhia Siria so'oag kulukul aog.  
\v 23 As Antiokhia aneko pina wamogha, lanaro kemeroa yabalamsiogti, mog so'o Galatia inagha mog so'o Frigia inagha ni kemelamsiogti, Yesus yubu ka'ero ulamek nimi wana sindinge mikip nenlamsiog.   
\s1 Apolos as Efesus wamogha (18:24-28)  
\b  
\p
\v 24 Paulus as Antiokhia lambaogti, mog so'o Galatia inagha mog so'o Frigia inagha Yesus yubu ka'ero ulamek nimi kemelamsiogpa, Yahudinge nhon si Apolos as Aleksandria mangkaekne poneko as Efesus yaog. El yubu lenna babe Allah yubu mome toro piroba babe yabo telekto wali uro elne yaog.  
\v 25 Samenag Nuni Allahag samoro pirop Ina Yesusti pa'abaogne sembe nimiri Apolos tipto ambarekpa, wana sol wali, wali uro Yesus sembe yeng uro sik uro ambarelamsiog. Sik uro ambarelamsiog aghana, ot samen Yohanesti maghag pelengelamsioghag agha ambarelamsiogne sembe aghabog Apolos el uro wamog. Amik Yesusag “Sikne,” aro seneraglamog nimi maghag pelengelamsiekne sembe ekon wamog.\f + \fr 18:25  \ft Apolosti Yesus sembe olog el wamognena, Musari mome toro pibogneap, Allahri yubu silimu tiptopnang samenag mome toro pibekneap, Yohanesti maghag pelengelamsiogti, ambarelamsiogneap Apolosti ka'ebaogti, el uro wamog. Ot Yohanes wamog li anabi, Apolos as Efesus yaog li anabiag agha uro yabiogne sembe olog ekon uro wamog.\f*  
\v 26 Yahudi nimiri Allah yubu lerop aeag aneko Apolosti log kom uro alniro nimi ambarelamsiogha Priskilaap Akwilaapti ka'ebarekti, sindi poa sindi aeag pirek. Pirekti, yubu kiki telekto ambarelamdekti, “Allahri Yesus poghol aogneri mog so'oag nimi enero poa Allahag samoro payalamsil Ina pa'abaogne undo,” aro ma'aro ambatek.  
\v 27 Apolos, “Mog so'o Akhaya punun,” aro ulamogpa, elkabo as Efesus wameknang Yesusag “Sikne” aro seneraglamek nangdi, “Wali leplam,” aro mome toro sikinkabo Yesus yubu ka'ero ulamek nimi mog so'o Akhaya wamek nangag, “Nungkae Apolos a'unag yaleba, wali kiplulom,” aro mome toro pibek. Akhaya so'oag pioghag Allah Wana Walingeri wana heklamsioghag agha samenag agha Yesusag “Sikne” aro seneraglamek. Yesusag seneraglamek nimi Akhaya wamekag Apolos yaogti, maiknoro yeplamsiog.  
\v 28 Apolos neneko Akhaya so'oag yaogti, Yesus yubu ambarelamsiog. Ambarelamsiog aghana Yahudi nimiri, “Yesus Allahri poghol aogne kom,” alamekpa, Yahudi nimi tanekoap Apolos ponekoap wana yo uro nimi whingag leldalamek. Sinap leldalamekag agha, Apolosti yubu ambarelamsiogne nimiri wali ka'elamek. Apolos ponekori Allah yubu mome toro pibogne lelekto lag nenero ambarelamsiogti, “Yesus poneko Allahri 'Taulbahimendi, saelbamsululam,' aro wepto poghol aogne yaog,” aro ambarelamsiog.   
\c 19  
\s1 Paulus Efesus wamogha (19:1-10)  
\b  
\p
\v 1 Apolos poneko as Korintus wamogpa, Paulus poneko yim kelero palamogha as Efesus yaog. Efesus aneko nimi etbare “Yesus yubu ka'ero ulamap” senerop nimiap haiptaek.  
\v 2 Sinap haiptaekti, Paulusti sin wamek nimi abenekoag hailamsiogti, “A'undi Yesusag 'Sikne' aro seneraghaomba, Allahri Eldamne Yame Walinge a'unag tatsio, te?” aro haibahiogpa, sindina, “Kom. 'Allah Eldamne Yame Walinge,' selamne nenena ik nhon babe ka'elamap kom yubu agha leplam,” seek.   
\p
\v 3 Wene seekpa Paulusti, “A'un maghag pelengkipsieknena, etneri yubu ambatsiogne sik sembalumneag agha maghag pelengkipsiek,” aro haibahiogpa, sindina, “Yohanesti yubu ambarelamsiogne ka'ebaburi, sik sembabuba, ambarelamsiogne sunsunum uro maghag pelengkahiek,” seek.   
\p
\v 4 Wene seekpa, Paulusti yubu ambarelamsiogti, “Yohanesti mag sinag pelengelamsiognena, '”Malinge ulamlomne lipsimunba, Allahri, 'El amik yalul,' seogne ponekoag 'Sikne' aro seneraglamlulom,” aro nari maghag pelengelamsin,' aro Yohanesti maghag pelengelamsiog. Yohanesti, 'Amik yalul,' seogne poneko Yesus yanepne sembe lebog,” aro Paulusti ambatsiog.   
\p
\v 5 Paulusti wene aro ambarelamsiogti, “Allahri 'Amik yalul,' seogne poneko si Yesus engeropne sembe lebog,” aro ambarelamsiogpa, Yesusti Nia Mangkina Saelbamsilne ponekoag “Sikne” aro seneraglamekne sembe Paulusti maghag pelengkipsiog.  
\v 6-7 Maghag pelengkipsiog nimi taneko nimi kaubuni aobare saog uro wamek. Paulusti aobare wamek nang taneko usoghag sae pipsiogpa, Allah Eldamne Yame Walinge sin nongag tahiog. Allah Eldamne Yame Walinge sin nongag tahiogne ponekori pam keagman nenelamsiogpa, Allahri tarelamsiogti, el nenelamsiog yubuag ambarelamsiek. Ambarelamsiek, aghana yubu ambarelamsieknena, Allah Eldamne Yame Walingeri yeplamsiogpa, yog nimiri yubu el tangom agha sin ekon urop yubuag agha lelamekti, ambarelamsiek.\x - \xo 19:6-7  \xt Pogsiognang 2:4\x*   
\p
\v 8 Wene aro ambatsiekti, wamekpa, Paulus neneko Yahudi nimiri Allah yubu lerop aeag aneko log kom uro wal wilindi wa'alamogti, “Allahri mog so'oag nimi saelbamsilnena, undo-undo saelbamsil,” aro ambarelamsiog. “Ka'ebahut. Sik uro lelamna,” aro ambarelamsiogti, sindi “El tahabe,” aro hailamekne eldi tibin nenero ambarelamsiog.  
\v 9 Aghana nimi etbare usog mikip talamekti, “Sik” senelamek komdi, nimi maikno whingag “Paulusti ambarelamsilne, 'Yesusti Allahag samoro pirop Ina pa'abaog,' aro ambarelamsil aghana, yubu nenena Yesusti orolena ambarelamsiog yubu agha Paulusti lelamla,” alamek.  
\p Wene alamekpa, Paulusti sin Yahudi nimi wene alamek nimi laplobi agha Yesus yubu ka'elamekne sunsunum uro ulamek nimi enero poa pabihiogti, Tiranusti yubu tam lelamog ae lomag sop-sop winil talamek. Winil talamekti, yog nimiag Yesus yubu ambarelamsiogpa, sindi “El tahabe,” aro hailamekne eldi tibin nenero ambarelamsiog.  
\v 10 Undo unulamekne nene heng kun phende yubu ambatto leldalamekpa, Yesusti Nia Mangkina Saelbamsilne poneko sembe ambarelamsiog yubu ane nubu talamogpa, Yahudi nimiap Yunani nimiap mog so'o Asia wamek nimi ni ka'ebaek.   
\s1 Skewa elmabo sembe lebogha (19:11-20)  
\b  
\p
\v 11 Allahri mikipne Paulus nongag nembamogpa, nimiri, “Allahri el pere agha mane agha ulamla,” senenne kekneba Paulusti ulamog.  
\v 12 Allah mikipneri el pere agha ulamogpa, Paulusti nongag enektop ag babe, whin keptop ag babe tolamekti, nimi niktop nimiap, phia nimi kulomag urop nimiabag “Wali nembahilul,” aro pil palamsiek. Sinag pil palamsiekpa, malia nimi kulomag ua ulamsiogne lanalamekpa, wali talamek.  
\v 13 Wali talamekpa, Yahudi nimi mema mili lero nimi whesirop nang wamekne as mog eneko kanelamek. Kanelamekti, “Nimi phia kulomag uropne lambaukang,” aro Nia Mangkina Salehiropne Yesus si lelamekti, “Paulusti Yesus si ambarelamsilne neneko si lelamna. Lambahut!” aro whelamsiek.  
\v 14 Sin undo wheroba tongolamsiekne taneko anabiag agha wameknena, nimi saekpareri ambatto whero poa tongolamsiek. Nimi saekpare enena, memne Allah sembe pairopnang sikindo nhon, Yahudinge si Skewa neneko elmabo saekpareri ambatto whero poa tongolamsiek.   
\p
\v 15 Wene aro whelamsiek aghana, phia nimi kulomag ua ulamsiogne taneko nhondi lelamogti, “Nana, Yesus na el, Paulus sembe babe ka'ebano, aghana a'unna etne?” alamog.   
\p
\v 16 Wene alamogti, phia kulomag lekneamogne poneko wea sekogti, whesiropnang saekbare nang abeneko olamsiogpa, ae lom wamekag aneko lanalamekpa, sindi ag enekto amekne taepto unuahiogpa, kerebenang eneng laptiktoba piek.  
\v 17 Undo uro yabiogne neneko sembe ka'ebaekti, nimi as Efesus wamekne Yahudi nimiap Yunani nimiap sin log senelamekpa, Nia Mangkina Salehiropne Yesus si nubu talamog.  
\v 18 Yesusag “Sikne” aro seneraglamek nimi taneko maikno yaekti, “Samenag nuri malia undo-undo ulamobo,” aro nimi haingag lag phoro lebek.  
\v 19 Mema mili lero pharop nimi taneko maikno yaekti, mema uroba si mome toro piameka togto payaekti, nimi maikno haingag agha aukag talamek. Mema si pharop yubu mome toroba ni aukag talamekne tane samenag kal ma'al kamna kapto tolamekne kal ma'al teng-tengne agha kamna kapto tobek\f + \fr 19:19  \ft Yunani yubuag tobogne, “Leng-leng arop kororop perak kirik wana 50.000 agha nimiri kamna kapto toropne,” aro mome tobog. Sin mog so'o wamekag nimi nhondi ik nhon sum awe tolamogti, leng-leng arop kirik wana nhon tolamog. Kirik wana 50.000 seogne tanena, “Nimi teng nhon nangdi ma'ap taekti, nik sum tektek papna koma ik hengkun lambare sop-sop awe tolamekti, nimi ni tanekori kamna tomnepne saog uro,” aro mome tobog. Mema si pharop yubu mome toroba ni ane kamna nubunge undopne saog uro kapto tobek aghana, Yesusag sikne aro seneraglamekti, aukag tabek.\f* aghana, Yesusag “Sikne” aro seneraglamek nimiri sindinge phia si mome toroba aukag tabek.  
\v 20 Undo uro yabiogneag agha “Yesusti mikip uro Nia Mangkina Saelbamsil,” aro yubu ane nubu tangto sabo talamogpa, Yesusag seneraglamek nimi maikno talamek.   
\s1 Demetriusti yubu “Yanghang alamsululom,” aro suknubaogha (19:21-41)  
\b  
\p
\v 21 Ni unuaekpa, Paulusti el wanaag agha, “Makedonia so'o inagha mog so'o Akhaya pineri, as Yerusalem punun,” aro seneraghog. Seneraghogti, “As Yerusalem pineri, as Roma nimi babe kemel phinun,” seog.  
\v 22 “Na mog so'o Asia ane olog wamnea amik punun,” aro ilipsabo Timotiusap Erastusap “Samenag Makedonia pururom,” aro pogsiog.  
\v 23 Pogsiog abeneko Yesus yubu ka'erop nimi Efesus wamekneri, “Yesusti Allahag samoro yinkirop Ina pa'abaog,” aro ambarelamsieka sembe tam nubunge nembaek.   
\p
\v 24 Nimi nhon si Demetrius wali-walia kirik leng-leng arop kirik perak aroba agha sunuro sorop nimi nhon wamog. Demetrius nenekori sunuro solamognena, Efesus nimiri sikinin phalamek kel Artemis mema pharoba sunuro solamog.\f + \fr 19:24  \ft Demetrius ponekori sunuro solamognena, mem phabaneba ae “Mema si Artemis wamnep,” aro sobaek ae nubunge as Efesus wamogne sunumna sunsunum uro ae lomag paia phalamnepne sunulamog.\f* Demetriusti sunuroba taneko Efesus wamek nimiri maiknoro tol tolamekag agha sunuro sorop nimi yogne as Efesus wamekne babe tup talamek.  
\v 25 Demetrius ponekori elkabo sunulamek nang poloro wimbahaiogti, yubu ambarelamsiogti, “Nangkabo, nuri sunulamapba, taneag kamna maikno tarelamsiangba, nu tup talamapne nangkabo a'un el wamlom.  
\v 26 Tup talamap aghana, a'undi haingdi iamlomdi, aori babe ka'eamlomne, wene ane Paulus pone yaori, ambarelamsildi, 'Nimiri saeri sunuropne nene, “Mikip imag wamangne saog uro wamang,” aro sunumna sunulamangne sikne kom,' alamlari, nimi tane ni ambatsioba ka'ebaong. Ambarelamsilne ka'ebaong nimina as Efesus nimi aghabog kom, aghana as ni Asia so'oag wamang nimi babe ka'ebaongdi, sik senelamang.  
\v 27 Nuri Artemis nunin phalamap kel wamlaba, Asia nimi taneap nimi mog so'oag nimi niapti elag mili lelamap aghana, Paulus ponekori undo ambarelamsilne nene, nuri nunin Artemis mema sunuro phalamap kel nimiri karong alamikti, teba'en nembaukang. Teba'en nembaukangne abeneog komdina, nuri Artemis nunin phalamap kelap eldi mem ae tane soropne nenekoap babe mali sembaukang,” aro ambatsiog.   
\p
\v 28 Wene seogne neneko ka'ebaekti, yo lelem yubu haum aro lelamekti, “Nu Efesus nimi sembe nunin phalamap kel Artemis ya'ag paliag wamlul,” alamek.  
\v 29 As ene nimi wamek nimi tukom taghom agha longkaekti, Makedonia so'o agha Paulusap nhon palamdek nang Gayusap Aristarkhusap sae salero kiliro pabalamsiekti, as Efesus nimiri longorobag aneko poa phiek.  
\v 30 Poa phiekpa, Paulus ponekori, “Poa phiekag aneko punun,” sembaog aghana, Yesus yubu ka'ero ulamek nimi tanekori, “Pululam kom,” seek.  
\v 31 Mog so'o Asia saelbamek nang etpare babe sinap Paulusap nimi pali wamekti, elkabo wamekti, nimiag yubu palilamekti, “As Efesus nimiri longorobag aneko pulul kom,” aro yubu pairo molbaek.  
\v 32 Nimi maikno as Efesus nimiri longorobag longolamek aghana, nimi nhon-nhon aghabog tam nene sembe el uro wamek. As Efesus nimiri longorobag aneko nimi longol wa'alamek nimi tanekori haum aro lelamekti, “Longol wa'iapnena yubu tamna nene sembe lelamap,” alamekpa, ora nimiri, “Tam ene sembe kom, tamna nene sembe longol wa'iap,” alamek.  
\p Wene alamek aghana sinna tamna ekon wamsiog.  
\v 33 “Yubu tam nene sembe lelamap anena,” ekon wamsiogpa, Yahudi nimiri nimi nhon si Aleksander webekti, “Andi yubu tibin nenero ambatsululam,”\f + \fr 19:33  \ft Yahudi nimiri babe mema Artemis phalamek komag agha Yunani nimi as Efesus wamekneri Yahudi nimi sembe karong senelamek. Karong senelamekpa, “Yahudi nimiri logti, 'Opsiikagti, “Tam ane nunag agha kom,” aro ambatsi,' aro Aleksander Yunani nimi whingag nembaek,” senelamang.\f* aro sae kiliro sekirekpa, el nenekori, “Yubu ambatsinundi, yubu kom tahut,” aro sae kwarobatsiog.  
\v 34 Sae kwarobatsiogti, “Yubu ambatsinun,” aro ulamog aghana, nimi tanekori “Elna Yahudinge,” aro nimi maikno taneko sin el tahiogpa, yubu maikno haum aro lelamekti, “Nu Efesus nimi sembe nunin phalamap kel Artemis ya'ag paliag wamlul,” aro haum alamekpa, heng phende piog.  
\v 35 Heng phende piogpa, nimi nubunge Efesus nimi sembe yubu tam kareptop yubu mome toro pibogne poneko wamogti, sin whingag sekogti, “Yubu lemnun,” seog. “Lemnun,” seogpa nimi maikno taneko yubu koma wamekpa, ambarelamsiogti, “A'un Efesus nimi nangkabo. Samenag nu Efesus nimiag kirik imag agha timbalne nunin Artemis yame sunumna saog urop kirik nuri saeag taogpa, nubu kelene mem aeag wali paia ulamap. Nubu kel Artemis phalamap kel eneri kirikap el mem aeap nu Efesus nimiri wali uro paia ulamaba sembe nimi ni mog so'oag wamangne el uro wamang, te?  
\v 36 Ekon wamang komdi, nimi nhondi babe orolena senep kom ane sembe, wana aingnil talapmundi, wali uro seneraghongkia ualulom.  
\v 37 Nimi payahilomne abeneri nuri mem aeag ua uroba haogha tolamdang komdi, nuri phalamap kel nubu kel wamlange san tiliplamdang kom aghana payahilom.  
\v 38 Tam orog agha tane payahilomne sunsunum kom agha payahilom. Tam lelekto kemero kareptobag wamla. Ane sembe, Demetriusap elkabo awe nhon tolamang nimiapti 'Yubu tam nhon nimiag pibukap,' sembaik tanena tam neneko poa tam lelekto kemero kareptop nimiag payalamsinep. Yubu tam lelekto kemero kareptop aeag poa piikpa, nun saelba ulamsiang nimiri sop-sop tam kareplamangne sunsunum uro kareplamukang.  
\v 39 'Tam yogne yubu lebukap,' senelamlomne babe wamle tanena, nu saelba uahiropnangdi ambatsiekne sunsunum uro nimi ni poloro wimbahimunba, wali uro karebaukap.  
\v 40 Ot sumene tam orog aghana yubu haum aro leplomne nene agha nun saelbamsiang nangdi samenag yubu sia pibekne phibalom. Nun saelbamsiang nangdi nunag tam pibik tanena, nurina sinag samoro sa'a senep? 'Tamna nene sembe,' aro lepseberi, uahabe taneogna,” seog.   
\p
\v 41 Wene aro ambatsiogti, nimi tanekoag “Pululom,” aro ambatsiog.   
\c 20  
\s1 Paulus Makedonia agha Troas piogha (20:1-12)  
\b  
\p
\v 1 As Efesus nimiri yanghang alamsieka aneko ta'ap seekpa, olog wameka Paulus elkabo Yesus yubu ka'ero ulamek nimi taneko yopsiogti, wana aingnibahiogti, “Na Makedonia so'oag punun,” aro ambatsiogti piog.  
\v 2 Makedonia inagha palamogti nimi tanekoag yubu maiknoro ambare-ambare wana aingni-aingni palamsiogti, Yunani so'oag piog.  
\v 3 Yunani so'oag piogti, wamogpa wal wilindi taogpa, “Mog so'o Siria mag alip toman punun,” sembaog. “Mag alip toman punun,” sembaog aghana, Yahudi nimiri, “Paulus obukap,” aro saekag lebekne sembe el taogti, “Mog so'o Makedonia inagha samoro punun,” sembaog.  
\v 4 “Punun,” sembaogti palamogpa, elap nhon palamek nangna: Pirus elme Sopater Bereangeap; Tesalonika nimi, nimi phende Aristarkhusap Sekundusap; Derbenge Gayusap; Listrange\x - \xo 20:4  \xt Pogsiognang 16:1\x* Timotiusap; Asia nimi, nimi phende Tikikusap Trofimusap; sin nangene Paulusap nhon palamek.  
\v 5 Paulusap elap nhon palameknang taneko a'ep taekti, sin samenag as Troas piekti, nun sembe tibogamsiekti, as Troas wamek.\f + \fr 20:5  \ft Tane Lukasti “Nun sembe tibogamsiek” seogne, weneog elap Paulusap haiptarekti, nhon palamdekne sembe mome toro pibog.\f*  
\v 6 Allah omekto kwaneng roti walerop komne terop li tero liogha, mag alip toman as Filipi laplobi agha palamububa, ae inipna tombare taog. Ae inipna tombare taogpa, as Troas piburi, sin sam piekti, wameknangap haibtaburi, wamubu pahabog ik saek bare taog.   
\p
\v 7 Sae kaupto ua urop sum\f + \fr 20:7  \ft Sae kaupto ua urop sum tane mome toro palilamapnena, Minggu sum sembe lelamap. Nu Kosarek nimi sembe Minggu sum anena tek-tek papto urop sum aghana, Yahudi nimi sembe “selek sum” aro lelamang. Yahudi nimiri, “Saek sum tek-tek papto uro sum” aro lelamekne anena, Sabtu sum.\f* taogpa, “Kwaneng roti khepto tukap,” aro winiptaburi, Paulusti nunkabo nunap nhon wamekne sinag, “Nu ambuhum pukap,” aro yubu maiknoro ambarelamsiog paghabog ae inipna tomnusam taog.  
\v 8 Ae tika alikinagne nu wamubuag aneko whea maikno tiniro ikik piek.  
\v 9 Paulus yubu kiliro-kiliro lelamog abeneko kabuni me nhon si Eutikus neneko keken phoro soro kuptopne ina siramag pukamogti, kabuni me eneko haing whi uro wamna koma kwhingdi tungum kanem alamogti, eba timbaog. Ae tika wilindipne nenekoag agha eba timbaogpa, nimiri salero kemelamekag agha ya'ag tebaog. \fig Eutikus ae tika wilindipneag agha eba timbaog.|alt="Eutikus jatuh dari lantai ketiga." src="cn02005B.tif" size="col" copy="David C. Cook" ref="Pogsiognang 20:10" \fig*  
\v 10 Ya'ag oroba wamogpa, Paulus poneko kulukaogti, kabuni tebaogha aneko somoro saelbamogti, nimi tanekoag, “Yubu maikno lero engkaheng kom. Me ane kamag wamla,” seog.   
\p
\v 11 Wene seogti, Paulus nen samoro aeag tai waelbaogti, kwaneng khepto teekti, nen yubu lelamog paghabog ae kwelekaog. Kwelekaogpa Paulus neneko lambaogti palamog.  
\v 12 El palamogpa, nimi tanekori me kabuni aneko kamag wamogne elenge aeag pabiekti, sin ni wana aingniro awi yeng uro wamek.   
\s1 Nu Paulusap Troas agha Miletus pibunge sembe na Lukasti mome toro palilamna (20:13-16)  
\b  
\p
\v 13 “Pukap,” sembabuba, Paulustina, “A'un sam kabongag agha as Asos pimundi, wapmunag na yan toman agha ina toman yanun,” seogha sunsunum uro nu samenag kabongag mag alip toman agha as Asos piburi wamubu.  
\v 14 Wamububa, el nunap as Asos haiptaburi, kabongag Paulusap nhon waelbaburi, mag alip toman agha as Metilene pibu.  
\v 15 As Metilene mabubua lukunapne as enekoag agha mag alip tomanog palamuburi, mag longoro kanektop so'o Khios peramag piburi, inipnag nhon mamubu. Aneko mabubua kwelekaogne lukunap mag longoro kanektop mog so'o as Samos piburi, mabubua kwelekaogne as Miletus pibu.  
\v 16 Paulusti, “Nu anam Yerusalem pin komag agha Yahudi nimiri ik nubu sum Pentakosta\x - \xo 20:16  \xt Pogsiognang 2:1\x* uaikag,” sembaogne sembe “Mog so'o Asia ik maikno wamukap kom. As Efesus babe yan ingkan koma pukap,” aro karebaog.\f + \fr 20:16  \ft Yahudi nimiri, “Nuri ik nubu sum tale tanena Allahri weptop as Yerusalem wamukap,” senelamek.\f*   
\s1 Paulusap Efesus nimi wenehiropnang wamek neap a'eptaeka sembe Lukasti mome toro pibog (20:17-38)  
\b  
\p
\v 17 As Miletus pina wamuburi, Paulustina, “As Efesus Yesusag 'Sikne' aro seneragtop nimi sikidoyabo wenelamsiang nang\f + \fr 20:17  \ft Indonesia yubuag “penatua” alamang.\f* na as Miletus wamnaag yaukangba, enel phululom,” aro Miletus nimi pogsiog.  
\v 18 Enel phiekti yaekpa, Paulusti as Efesus nimi piamsiekti, wenehirop nangag yubu lelamogti,  
\pi1 “Nangkabo, samenag Asia so'o eneag yahiri, yana alnina alnilamsiri, ulamsiri, ulamnange a'un elwamlom.  
\v 19 Yahudi nimiri nanag yo palilamneekti, “Obukap,” aro saekag lero ulamneekpa, wana pailangkalamsiri engelamsiri, Nia Mangkina Salehiropne Yesus ponekori awe tolamsinge seklero tolamsi.  
\v 20 Undop aghana ta'ap sen koma, “El uro wamikpa, yepsilul,” sembahi tanena, yubu eneko a'unag ni ambarelamsisiri, ologha babe tognobahi kom. Tognoban koma yubu ni amolamsisinge nimi ni whingag agha ambatsisiri, a'ununge aeag poloro winil talamlumag babe ambatsisi.  
\v 21 Yahudi nimiap Yunani nimiap ambarelamsisiri, 'Malia ulamlomne lipsimundi, Allahag wana seneraglapmundi, Nia Mangkina Saelbamsilne Yesusag “Sikne” aro seneraglamlulom,' aro ambatsisi.  
\v 22 Yerusalem pineba, nanag uaukangne ekon wamnari wamna. Allah Eldamne Yame Walinge nenekori sae kiliro pabalamneleba punun.  
\v 23 Nanag uaukangne ekon wamna aghana, na as nhonag pang nhonag pang ulamnaba, Allah Eldamne Yame Walinge nenekori, 'Nimiri haing sae kaupkikpa, seklebalulam,' aro lag phoro ambarelamnel.  
\v 24 'Seklebalulam,' aro ambarelamnel aghana, nari wana nong ene sembe seneraghal talamna kom. Nari seneraglamnangena, Nia Mangkina Saelbamsilne Yesusti awe na saeag pibogne sol wali, wali uro komopto tolamnun. Awe na saeag pibognena, '”Allahri nimi lunuro opsin koma wana waliri nimi talulamsil,” aro yubu walinge Yesus sembe ambarelamsululam,' aro na saeag pibog.   
\pi1
\v 25 Wene aro na saeag pibogpa, as nhonag pang nhonag pang ulamnori, a'unag babe Allahri mog so'oag nimi saelbamsilne sembe ambarelamsino aghana, a'undi nari whing ene nen olog imnululom komne, na el wamna.  
\v 26-27 Ane sembe sumene ane yubu mikip uro a'unag lelamnangena, Allahri 'Yubu ane ambatsululam,' aro ambarelamneonge ta'ap sen koma a'unag tipto ni ambarelamsino. Ane sembe nimi nhondi nari yubu Yesus sembe ambatsinonge ka'ebaom kom tanena Allahri opsilea tam nanag nembaheng kom.   
\pi1
\v 28-29 Na a'un laplobi agha pineba, pai kam yonge saog urop nimi yingkina saluro kilphaikagti, wali uro a'unkaboap a'un wenehirop nang a'undam nimi wanaapti haing whi uro yae wamsululom. Allah Eldamne Yame Walinge nenekori, 'A'unkabo pham domba saog uro wamang nimi taneko yubu amohiro paiamsululom,' aro sekitsio. Sekitsioba, pai kam yonge saog urop nimiri pham domba Allah Eldamne enengag agha toro topsio nimi taneko o'ona sembahin koma wea oro kilphaikagti, Yesusag 'Sikne' aro seneragtop nimi haing whi uro yae piamsululom.  
\v 30 A'un anabiag agha babe nimi sekelingkukang. Sekelingkikti, Allah yubu lero orolenange agha sikne nembukang. Orolenange agha sikne nembamikti, Yesus yubu ka'ero ulamang nimi wana tolamsikpa, sinag 'Sikne,' aro sare nelebahukang.  
\v 31 Orolenange agha sikne nembamikti, wana tolamsik nimi yaukangne sembe seneragto yae uptangkamlulom! Heng kun wilindi sinag kweleknag na olog ta'apsen koma nari wanaag agha engelamnoriog a'un ni ambarelamsinonge ekon taheng kom.   
\pi1
\v 32 Wene, 'Allahri a'un piamsilul,' aro nari a'un Allah saeag nenelamsin. 'Allahri opsin koma wana waliri talulamsil,' aro Yesus yubu sembe ambarelamsinne salelapmunba, Allahri a'un mikip nenelamsileri, 'Yesusag “Sikne” aro seneraglamik nimi taneko Na namabo,' aro weplamsil nimi niag tatsilul. 'Na mabo,' senelamsildi, eldinge saeag agha tatsileba, ya'ag kamag wamukang.   
\pi1
\v 33 Nari, 'A'undi saeagha leng-leng aroba emasto, perakto, enektop agto a'undi na tatneheng,' aro wanaag seneraglamno kom.  
\v 34 Nanap nangkabo nhon wamubungeap teko nunag wamogne sembe nadamne saeag agha kamna kapto tolamsinge a'un elwamlom.\f + \fr 20:34  \ft Paulusti pham kon mektopne agha imag ae sona ag wetnero soropne wamogti, nimiag si toro wetnelamogne kamna kapto tolamog. (Pogsiognang 18:3)\f*  
\v 35 Nari ulamnonge 'Sindi babe imniikti, ulamukang,' aro sunumna ulamno. Nia mangkina ulamnongena, 'Sol wali, wali uro welapmundi, nimi mikip komne yeplamsululom,' aro ulamnoba, imneom.  
\pi1 Nia ni ulamnonge aneko, Yesusti yubu ambarelamsiogne seneragi agha ulamno. Nia Mangkina Salehiropne Yesusti ambarelamsiogti, \qt 'Nimiri a'unag tatsiikne olog wali sembamlom aghana, nimiag tatsululomne sembe “Wali sirik,” alamna,'\qt* aro ambatsiog. Yesusti ambarelamsiogne seneragi agha nia mangkina a'un anabi agha ulamno,” aro Paulusti ambatsiog.   
\p
\v 36 Ni ane Paulus nenekori ambatsiogti, yabu sanukto pulingkina sin Allahag molona molbaek.  
\v 37 Allahag molona lero molbaekti, sindi Paulus somoro togtog aro kiplamekti, “Wali pululam,” aro maiknoro engkarek.  
\v 38 Paulusti, “Nen amik whing imnululom kom,” seogne sembe, “Nen haiptaukap kom,” aro wana sapsiogpa, “Mag alip toman pulul,” aro kabong wamoghag mag abolag pil piek.   
\c 21  
\s1 Paulus as Yerusalem punun aro as Tirus inagha piogha (21:1-6)  
\b  
\p
\v 1 Nungkabo as Efesus Yesusag “Sikne” aro seneragtop nimi wenehirop nimiap wamuburi, wana ikin uro sae liptaburi, mag alip toman palamubua mag longoro kanektop so'oag as Kos peket pibu. Kos pina mabubua kwelekaogne, mag longoro kanektop so'oag as Rodos pibu. As Rodos pina mabubua kwelekaogne nen mag alip toman palamubua kabong pabalingkirobag aneko haing kerekaek as Patara pabalingkibu.  
\v 2 Patara piburi, kabong Fenisia so'oag piropne nhon ibuburi, phoanari ko'oro pabalamlul arop kabong anekoag waelbaburi pibu.  
\v 3 Palamuburi mag longoro kanektop mog so'o Siprus ibubu aghana, Siprus waneng sip nenelobiagha mog so'o Siria simbik palamubu. Palamuburi as nubunge Tirus pibuag anekoa kabongag nia mangkina pabalamogha taneko as enekoag yognepti, as enekoag saingnil pibu.  
\v 4 Saingnil piburi, as Tirus anekoa Yesus yubu ka'ero ulamek nimi wamekne kemeroa yabihiburi, ik saekbare wamubu. Tirus ane wamububa, Allah Yame Walingeri Yesus yubu ka'erop nimi tanekoag ambatsiogpa, yubu ane nen tipto Paulusag, “Yerusalem pheng kom,” aro ambarek.  
\v 5 Aneko wamubua nun ina panne peram taogpa, anekoa sin laplobi agha lambaburi palamubu. Anekoa lambaburi, “Yerusalem pukap,” aro palamububa, as enekoag nimi Yesus yubu ka'erop nimiap, sindi kelabo meapti nu poa kabong saingnilingkirobag pil phiekpa, mag abolag aneko yan yabu sanukto pukuburi, Allahag molona molbabu.  
\v 6 Aneko sae saleptaburi pogtabu. Nu kabongag walelamububa, sin sikininge asag samoro piek.   
\s1 Agabusti “Yerusalem pheng kom,” aro Paulus ambarogha (21:7-16)  
\b  
\p
\v 7 Tirus nimi sikininge asag piekpa, nu mag alip toman agha as Ptolemais piburi, nungkabo Yesusag “Sikne” aro seneragtop nimi as eneko nimi wamekne kipsiburi, ik nhon sum wamubu.  
\v 8 Mabubua kwelekaogpa, palamubua as Kaisarea pibu. As Kaisarea nimi nhon wamogne, samenag as Yerusalema nimi saekbare “Kwaneng pogto yauog kelabo o'oro tarelamsululom,” aro wepsiekne nhon sina Filipus wamog.\x - \xo 21:8  \xt Pogsiognang 6:5; 8:5\x* Filipus samenag yauog kelabo sembe kwaneng pogto tarelamsiogti, el babe yubu walinge Yesus sembe ambarelamsiogne wamogpa eldi aeag wa'iburi, wamubu.  
\v 9 Filipus ponekori ae wamubuag wameknena, elmangkelabo saren tombare abeneko wamekpa, Allahri sin wanaag yeplamsiogpa, Allahri yubu silimu tipto ambarelamsiek kelabo wamek.   
\p
\v 10 Yingkina aneko Filipus ponekori aeag ik etbare wamububa, Allahri yubu silimu tiptopne nhon sina Agabus mog so'o Yudea agha as Kaisarea wamubuag kulukul aog.  
\v 11 El nun peramag yaogti, Paulustinge enektop ag sembe uwoghag noptop haing lobogti, Agabus eldamneri sae yan kabuldalamogti, nunag yubu lelamogti, “Paulusti uwoghag noptop haing ane el uwoghag agha lopnari, kabuldalamna. Unuanne nene sembe Allah Eldamne Yame Walingeri nanag ambarelamneori, 'Nari unuanne saog uro Yahudi nimi as Yerusalem wamangneri haing ngainge poneko uanne nene saog uro kaubukang. Kaubikti, Allah omektop kom nimi Yahudi sisa kom nimi saeag nembaukang,' aro ambatneo,” seog.   
\p
\v 12 Wene seogha ka'ebaburi, Yesus yubu ka'erop nimi taneko wamek nimiapti Paulusag “Yerusalem pheng kom,” aro yubu mikip uro molbabu.  
\v 13 Paulusag “Yerusalem pheng kom,” aro molbabu aghana, Paulustina, “Sa'a sembe engelamnelomdi, wana ikin nenelamnelom? Na haing sae kaupniikne tamna ikin kom senelamna. Yerusalem nimi Yesus sembe ambarelamsinenge sembe ya'ag omniikpa, tebanunne babe tamna ikin kom senelamna. Na sembamnangena, 'Yahudi nimiri Nia Mangkina Salehiropne Yesus yubu saelbamikpa, Yesus si nubu talul,' aro as Yerusalem palamna,” seog.  
\v 14 Nuri lebubunge ka'eban koma eldi wene seogpa, nurina, “Elba. Nuni Allah seneropne agha elag ualul,” seburi, yubu kom tabu.  
\v 15-16 Kaisarea aneko ik sulu wamubua nuringe togna toguburi, Kaisarea nimi Yesus yubu ka'ero ulamek nimi etbareap as Yerusalem palamubu. Yerusalem palamububa, sindi nu poa nimi nhon si Manasondi aeag poa phiek. Elna mog so'o Siprusne samenag agha Yesus yubu ka'elamogti, Elag seneraglamogne Manasondi aeag wamubu.   
\s1 As Yerusalema Yakubus wamoghag Paulusti kemel piogha (21:17-26)  
\b  
\p
\v 17 As Yerusalem pibuba, nungkabo Yesusag “Sikne” aro seneragtop nimiri sin wana awi yeng uro nu kiplamsiek.  
\v 18 Pina mabubua kwelekaogpa, nu ni Paulusap wamubunge Yakobus\f + \fr 21:18  \ft Yakobus poneko Yesus ilipsae taptopne wamogti, Yesusag “Sikne” aro seneragtop nimi Yerusalem wamekne saelba uahiropne wamog.\f* kemel pibuba, Yesusag seneragtop nimi Yerusalem wamek nimi wenehiropnang ni babe wamek.  
\v 19 Wamekpa Paulusti kipsiogti, yubu ambarelamsiogti, “Allahri na pere agha mikipne na tarelamneoba, Yahudi sisa kom nimi Yesusag 'Sikne' aro seneraglamang,” aro sin wamekne taneko yubu kiki lelekto ambatsiog.\x - \xo 21:19  \xt Pogsiognang 14:27\x*   
\p
\v 20 Wene aro Paulusti ambatsiogne ka'ebaekne sembe sin ni Allah omeklamekti, Paulusag yubu lelamekti,  
\pi1 “Paulus, nangkae! Kembahi, Yahudi nimi teng-tengne wene Yesusag 'Sikne' aro seneraglamangne as Yerusalem tane wamang. Yesusag 'Sikne' aro seneraglamang nimi taneko Yahudi nimi wamang ane sembe sol wali, wali uro Allahri samenag, 'Israel nimi noropto saelbamukang,' aro Musa ambarog yubu mome toro pibogne sunsunum uro ul palamang.  
\v 21 Sol wali, wali uro ul palamang aghana, nimiri an sembe sinag minirop yubu ambarel palamsiong. Minirop yubu ambarelamsiongnena,  
\pi2 'Paulusti Yahudi sisa nimi as tala-tala wamang nimi ambarelamsildi, “Musari samenag yubu pibogne sunsunum uro a'un Yahudi nimiri ul palamlomne lipsululom. Samenag agha a'un mabo kon kareplamsilomne babe lipsululom,” aro wene Paulusti ambarelamsil. Paulusti ambarelamsilne as tala-tala Yahudi sisa kom nimi urobag ambarel palamsil,'  
\pi1 aro ambarelamsiong. Minirop yubu an sembe ambarelamsiongne tane nubu taoba, Yahudi nimi maikno tanekori ka'ebaong.  
\v 22 Ka'ebongdi, el uro wamangag an tane yalamne ka'ebaikti, anag uaukangne sembe huaukap?\f + \fr 21:22  \ft Paulusap elkaboap yog asag samen ambarel palamsiekpa, Yahudi nimi Yesus yubu ka'erop kom nimiri minirop yubu Paulus sembe ambarelamsiek. Minirop yubu ambarelamsiekti, “Paulustina, 'Nu Yahudi nimiri ul palamapne mali,' alamla” aro Yahudi nimiri Yesusag senerlamek kom nimiri ambarelamsiek. Ambarelamsiekpa, Yahudi nimi as Yerusalem wamekneri ka'ebaekpa, Paulus as Yerusalem samoro yaogpa, minirop yubu ka'elamek nimiri senelamekti, “Paulustina, 'Nuri ul palamapne mali,' alamla,” aro Paulus sembe wana yo senelamek.\f*  
\v 23 Nuri lebebenge nene ka'ebamendi, ualulam. Nu anabiag tane nimi tombare samenag salag lebongdi, '”Allah arukna sol wali walinge wamukap,” aro keknep uro yabalameberi, hong karepto koma wamebea, wal nenekoag hong karebahukang,' aro salag pibong.\x - \xo 21:23  \xt Bilangan - A'iliroba 6:1-21; Pogsiognang 18:18\x*  
\v 24 Sin tombare 'Hong karepto koma wamukap,' seong nang abenekoap palapmundi, samenag Musari 'Allah whingag sembenga pabeheng kom,' aro mome toro pibogne sunsunum uro alel talamlulom. Alel talapmundi, Allahri Ae aramag wa'imunba, sin hong karebahikne sembe kamna tatsimendi, Allah sembe pibukangne sembe babe tatsululam. Undo unulapmendi, anap sinap Musari mome toro pibogne sunsunum uro ul palapmunba, nimi taneri ipkikti, an sembe minirop yubu ka'ebaongne neneko, 'Sikne kom,' aro el taukang. Sindi el talamukangne, 'Paulusti babe samen Musari mome toro pibogne neneko sunsunum uro ul palamla,' aro el taikti, Yahudi nimi tanekori tam anag pibongne 'Kom talul,' senelamap.   
\pi1
\v 25 Yahudi sisa nimi tanekori anag tam pibongne lero libapti, wene Yahudi nimi sisa kom nimi agha Yesusag 'Sikne' aro seneraglamang nimi taneko sembe mome toro sinag pibobonge ambatkenun. Sindi ul palamukangne sembe samenag yubu lebobori, karebabonge sunsunum uro mome toro pibobo. Sin sembe karebabongena,  
\pi2 'Lebe aroba eneng la'imbaleag,' aro homamanga lepto oroba sopap, enengap telamukang kom. Eneng lambaleba, sop ane telamukang.  
\pi2 Ora nimiri, “Phia sembe phabaukap,” aro lebe aroba sop palilamikti, mektop sop babe yoro tarelamsiikpa, telamukang kom.  
\pi2 Apna, nengaboap kelaboapti yog nimiri kelabo nengabo sembe, “Naringe og wamso,” aro wanaag seneragikti, saelbahukang kom,'  
\pi1 aro karebabo. Karebobori, mome toro pibobo,” aro sindi Paulusag ambarek.\x - \xo 21:25  \xt Pogsiognang 15:20-21\x*   
\p
\v 26 Wene aro ambarekpa, lukunap Paulusti nimi tombare “Hong karepto koma Allah arukna sol walinge wamukap,” seek nimi taneko enero pabihiogti, samenag Musari “Allah whingag sembenga pabeheng kom,” aro mome toro pibogne sunsunum uro wali uro sin nong mag a'aleptaek. Wali uro sin nong mag a'aleptaekti, Allahri Aeag palamekti, “Allahag salag pibobonge neneko taknep sum peram wamlaba, Musari yubu sunsunum uro ik etpare aleltalameberi wamebea, salag pibobonge taknep sumeneko Allah sembe a'ero-a'ero webabonge payaukap. Payabeba, Allah sembe nuri saeag agha lebe aroba oro paibatsululom,” aro Yahudi nimiri saeag agha Allah sembe pairopnang Paulusap nhon ambarel phiek.   
\s1 Allahri Aeag agha Paulus Saelbaeka (21:27-36)  
\b  
\p
\v 27 “Hong karepto koma wamukap,” seek nimi tanekoap Paulusapti, “Allahag oro tarukapne 'Wali,' sembalul,” aro ik saekpare sum Musari mome toro pibogne sunsunum uro sin nong aleltalamek. Aleltalamekti, wamekpa, salag pibekne taktop sumeneko peram taogpa, Allahri Aeag piekti, wamek. Wamekpa, Yahudi nimi agha Asia so'oag urop nimi agha yaekti, kemelamekpa, Paulus Allahri Ae aramag wamogpa, ibek. Ibekti nimi orangeag wanaag aluktop yubu lebek. Wanaag aluktop yubu lebekpa, nimi maikno tanekoag sikin sip taekti, Paulus saelbaek.  
\v 28 Saelbanebag haum alamekti, “Israel nang yebelahisu! Nimi eneri tala-tala pina, nun Yahudi nimi san tilipto ambarelamsil. Samenag Allahri, 'Undo-undo ulamlulom,' aro Musaag ambarogpa, mome toro pibog. Musari mome toro pibogneap, Allahri Ae eneap babe mombolag nenero ambarelamsil. Wene ane iplulom! Eldi Yunani nimi poa Allah Eldamne Mem Ae aramag payalamsildi, sembenga nenelal,”\f + \fr 21:28  \ft Ot Yahudi sisa nimi aghabog Allahri Ae aramag wa'alamek. Yahudi sisa kom nimi Allahri Ae peagmanag seka ulamek aghana, Yahudi sisa nimiri leka solingkieka Yahudi sisa kom nimi iriklamsiek. Yahudi sisa kom nimiri “Allahri Ae peramag wa'inun,” aro irikna ane philamek tanena, Yahudi nimiri ya'ag olamsiek.\f* alamekti, Paulus saelbaek.   
\p
\v 29 Sindi wene alamekti saelbaeknena, Trofimus Efesusne poneko samenag inaag Paulusap nhon asag palamdeka ibekne sembe, “Allahri Aeag ane poa wa'alal,” senelamekti, yubu haum aro lelamek.   
\p
\v 30 Haum alamekpa, nimi ni wamloa saog uro as enekoag wamekne tagto longolaekti, Paulus salero Allahri Ae aramag agha kiliro poa lanalamekpa, Allahri Ae aram leka ina siramag serekaek.  
\v 31 Ina serekaekpa, sindi “Paulus ya'ag obukap,” aro ulamek abeneko, “Yerusalem nimi niri haum alamang,” aro ka'ebaekti, yubu poa Roma nimi sembe yin saleropnang sikindoag yubu pabiek.   
\p
\v 32 Wene aro ambarel piekpa, yin saleropnang sikindo ponekori el umag yubu eptopnang etbareap, ilipsabo yin saleropnang etbareap poloro winiptaek. Poloro winiptaekpa, topsiogti elemag Paulus olamekag aneko piek. Piekpa, Paulus olamekti, yin saleropnang palameka ililamsiekti, Paulus olameka libek.  
\v 33 Olameka libekpa, yin saleropnang sikindo poneko Paulus peramag sekel piogti, saelbaogti, “Besi agha sorop haing phende topmundi, el sae kauplulom,” aro ilipsabo arukahiog.  
\p Wene aro arukahiogti, Yahudi nimiri Paulus olamek nimi tanekoag hailamsiogti, “Nimi enena etne? Eldi hualba olamlom?” aro haibahiog.   
\p
\v 34 Wene aro haibahiogpa, nimi tanekori yubu maikno lelamekti, nenneri “Undo sembe,” nenneri “Unuaoa sembe,” aro wene alamekne, tam ane sembe senen komdi, yin saleropne sikindo ponekori eldi aruknaag, “Nuri aeag pabululom,” aro arukahiog.  
\v 35-36 “Pabululom,” seogpa, pil palamek abeneko “Paulus obukap” senerop nimi maikno tanekori wanaag yo lelem “Toghitlulom,” alamek. Wanaag yo lelem “Toghitlulom,” alamekpa, yin saleropnangdi sindi ae alongag piekag aneko, “Paulus obukap,” aro maiknoro longolamekti, lingniltalamekpa, yin saleropnang tanekori Paulus keyapto ae alongag tai sip poa waelbaek.   
\s1 Paulusti yubu olog lemnun aro yin saleropne sikindo ponekoag molbaogha (21:37-40)  
\b  
\p
\v 37 Paulus neneko yin saleropnangdi asag poa, wa'inebag “Aeag poa wa'aukap,” aro ulamek abeneko Paulusti, “Na yubu olog ambatkinun!” seogpa, yin saleropnang sikindo ponekori, “Anna Yunani yubu el te?” seog.  
\v 38 “Wene selamba, anna Mesirne poneko kom te? Weneog aneko suknumna suknubaomdi, 'Roma nimi mombolag wamukap kom,' aro mal taropnang teng-tengne (4000) poro agha aldesag piomne poneko kom te?” aro haibaog.   
\p
\v 39 Wene aro haibaogpa, Paulustina, “Nana Yahudinge, nari asna Tarsus, as nubunge Kilikia so'oag wamlange nenekoag wamna. Nimi maikno taneag yubu ambatsinundi, mololangken,” seog.   
\p
\v 40 Wene seogpa, yin saleropne sikindo ponekori, “Wali andi ambatsululam,” aloghog abeneko Paulus ae alongag sekelingkiogti, sae la'abatsiogpa, yubu kom tanaek abeneko Paulusti Ibrani yubuag yubu ambarelamsiog.   
\c 22  
\s1 Yahudi nimiag Paulusti yubu lebogha (22:1-22)  
\b  
\p
\v 1 “Yahudi nimi nangkabo, naniyabo, a'undi lolomnange nanag lolbitneomba, nari tibin nenero peleptangtop yubu ambatsinunne ka'eamlulom,” seog.   
\p
\v 2-3 Undo wene seogpa, nimi maikno tanekori nimi poneri Ibrani yubuag ambarelamsil aro ka'ebaekti, yubu koma wamek. Yubu koma wamekpa, Paulusti, “Nangkabo, a'un Yahudi nimi wamlomne saog uro na babe Yahudinge wamna. Na mangkaneekag as Tarsus Kilikia so'oag wamlange nenekoag agha mangkaneekpa, as Yerusalem ane yahiri, nubu tahi. Nunisa Musa yubu elne Gamalielti, Musa yubu kop-koptagto ao mili kuruk aneogpa, wali uro el tahi. El tahiri, a'un wamlomne Allah sembe wana wali uro ulamlom saog uro, nari babe Allah sembe ta'ap sen koma sol wali uro ulamsi.  
\v 4 “Allah sembe sol wali uro ulamsi aghana Yesusag seneragna komag wamsi. Yesusag 'Sikne' aro seneraglamsi komdi, nari babe Yesusti Allahag samoro yingkirop Ina pa'abaog yubu ka'ero ulamek nimi sare nelepto ya'ag olamsisi. Ya'ag olamsisiri, nenne salero kabuniap kelaboap kop aeag tolongolamsisi.  
\v 5-6 Undo ulamsinge nene memne Allah sembe pairopnang sikini nubungeap, Yahudi nimi wenehirop nang nubunang babe, sindi nari uahinge el wamangdi, 'Sik lepla' aro lemnep. Sindi nanag, 'Yesus yubu ka'erop nimi ebahimendi, haing sae kaupto saelbahimendi, as Yerusalem samoro payahimenba, opsukap,' aro mome nanag pibatneek. Mome ane nanag pibatneekti, pogneekpa, palamsiri, 'Sikinkabo Yahudi nimi as Damsyik wamang nimiag mome ane tarel phineri, Yesus yubu ka'erop nimi saelbahinun,' aro palamsi. 'Saelbahinun,' aro palamsiri, as Damsyik peramag ae siro palamsiag agha heng yame saogne haing omomne imag agha nanag tingil omneog.  
\v 7 Tingil omneogpa, na so'oag malingkihiri ka'elamsiba, yubu nhon lelamogti, 'Saulus, Saulus! Sa'a sembe Na “Seklebale,” aro ulamnelam?' seog.   
\p
\v 8 Wene seogpa, nari hailamsiri, 'Nani, Anna Etneri lelamlam,' sihiba, Eldina, 'Na Yesus Nasaretne andi “Seklebale,” aro ulamnelamne ponekori lemna,' seog.  
\v 9 Heng yame saogne nanag tingkaneogne nimi nanap palamubungeri babe ibekti, aoag agha yubu lilim ka'ebaek, aghana yubu nanag lelamogne sindi ka'ebaek kom.\x - \xo 22:9  \xt Pogsiognang 9:7\x*  
\v 10 Eldi yubu ka'ebaek kom aghana, nari lelamsiri, 'Nani, sa'a agha nari uanun?' sihiba, Eldina, 'Sekmendi Damsyik pululam. Damsyik pimenba andi ulamlulamne Allahri seneropne ambatkenep,' seog.  
\v 11 'Damsyik pimenba, ambatkenep,' seog aghana, na haing omomne warero libango aropne nenekori haing ubaneogpa, pinep komdi nangkabo nhon palamubu nangdi sae salero Damsyik poa pineek.  
\v 12 Poa piniekpa, as Damsyik aneko nimi nhon sina Ananias. Ananias ponekona, Musa yubu sunsunum uro sol wali uro ulamogpa, Yahudi nimiri as Damsyik anekoa el wamogne sembe walinge senelamek.  
\v 13 El neneko na peramag yaogti, yubu lelamogti, 'Saulus, nangkae. Haing kwelekae,' seog abeneko pere na haing kwelekahiri, nari elag kembahi,” seog.  
\v 14 “Elag kembahiba, nanag eldi yubu lelamogti, 'Allah nunisag yabori omeklamekne ponekori weplangkeldi, “Allah Eldamne seneropne walinge el taleri, Nimi Sikne yaogne poneko ipleri, Eldi yubu pamag agha lanaropne ka'ebanulul,” aro wepkel,' aro Ananiasti ambatneog.   
\p
\v 15 Wene aro ambatneogti, nen lelamogti, 'An haing kwelekalamdi iplamne, ka'ebalamne Eldi ualne andi nimi ni ambarelamsululam.  
\v 16 Sa'a sembe wene nang-nangalamlam? Sekmendi Yesusag, “Malia uanonge tam orog nembanululam,” aro Yesusag yubu mololapmenba, maghag pelengkakukang,' aro Ananiasti ambatneog,” seog.   
\s1 Allahri, “Yerusalem nimiri Na yubu ka'ebaukang komba, ora asag samen pimendi, ambarelamsululam,” seogha (22:17-22).  
\b  
\p
\v 17-18 Paulusti nen tipto ambarelamsiogti, “Na samoro Yerusalem yahiri, Allahri Aeag wamsiri, Allahag yubu mololamsi. Allahag yubu mololamsiri, haing uamna kwelekamna senenag agha Nia Mangkina Salehiropne Yesus poneko ipsi. Ipsiri tilamsiag agha Eldi nanag yubu lelamogti, 'Na sembe yubu ambarelamsilamne ka'ebaukang komba, Yerusalem anea elem-elem lambalulam,' seog.  
\v 19 'Lambalulam,' seogpa, nari lelamsiri, 'Nia Mangkina Saelbamsilamne, sin elwamangne, nari Allah yubu lerop aeag agha nhonag wa'ang, nhonag wa'ang ulamsiri, An Yesusag “Sikne” aro seneraglamek nimi salero kop aeag tolongolamsisiri, olamsisinge sin el wamang.  
\v 20 Stefanus poneko, An Yesusti ulamluma ipkeogti, nimi ambarelamsiog. Yesus sembe ambarelamsiogne sembe ya'ag olamekpa, olamek sumeneko, 'Wali ya'ag olamang,' aro na wamsiri, sae saekag sembahi.  
\p Wene sembahiri, Stefanus olamek nimi tanekori sindi enektop ag pibekpa, nari yae piamsisi,' aro Yesusag ambatsi.\x - \xo 22:20  \xt Pogsiognang 7:54—8:2\x*   
\p
\v 21 Wene aro ambatsiba, Nia Mangkina Saelbamsilne ponekori nanag lelamogti, 'Yerusalema lambamendi, pululam. Amik Nari an mog so'o weag wamang nimi Yahudi sisa kom nimiag poglangkenun,' aro ambatneog,” aro Paulusti ambatsiog.   
\p
\v 22 Nimi Paulusti yubu ambarelamsiogne wali ka'elamek aghana, wene aro “Nia Mangkina Saelbamsilne ponekori, 'Mog so'o weag wamang nimi Yahudi sisa kom nimiag poglangkenun,' aro ambatneog,” aro Paulusti ambarelamsiog abeneko, Yahudi nimiri ka'ebaekti, wana yo senelamekti, “Nimi undopne ya'ag oplulom! Undop nimi wamnep kom,” alamek.   
\s1 Yin salerop nimiri “Paulus taeplam-taeplam lobukap,” aro ulameka (22:23-30)  
\b  
\p
\v 23 Wene alamekti, Yahudi nimiri sindinge ag siriro pelengerobag kwiripto tobog ahiekti, hao lopto alikinag towalengelamek.  
\v 24 Undo unulamekpa, yin saleropne sikindo ponekori, “Nimi maikno taneko yubu sa'a sembe lelamang, eltanundi,” aro, “Paulus aeag pabumundi, taeplam-taeplam lobalulom. Taeplam-taeplam lopmundi, wana aluktop yubu ambatsilne el talulom,” aro ilipsabo ambatsiog.  
\v 25 Yin salerop nang tanekori Paulus pabiekti, “Taeplam-taeplam lobukap,” aro yan sae kiliro haing kauplamek abeneko Paulusti, yin saleropnang sikindo nhon Paulus peramag sekamogne ponekoag hailamogti, “A'undi tam wali uro kembitna koma nimi Roma nimi opsinep te?” aro haibaog.\f + \fr 22:25  \ft “Roma nimi opsinep, te?” seogne ane mog so'o sembe lebog kom. “Roma nimi wamna,” seognena, mog so'o Roma nimi ni saelba uahiropnang nubungeri, “Nimiri Roma nimiag tam paibikpa, saelba uahiropnangdi tam lelekto kemero kareplamikti, 'Malia ualne sunsunum uro wenero obaukap,' sembaik tanena Roma nimi opsukang,” aro yubu sia karepto pibek. Tam lelekto kemero kareban koma Roma nimi opsiik tanena, Roma nimi saelba uahirop nimi nubungeri opsiik nimiag tam nubunge palilamsiek.\f* \fig Yin saleropnangdi “Paulus taeplam-taeplam lobukap,” aro haing kaubek|alt="Paulus ditelengtangkan untuk dipukul" src="CN02025B.TIF" size="col" copy="David C. Cook" ref="Pogsiognang 22:26" \fig*  
\v 26 Wene aro haibaogpa, yin saleropne poneko Paulusti lebogne neneko ka'ebaogti, eldo yin saleropne ponekoag piogti, “Paulusti wene sel,” aro ambarelamogti, “Paulus pone babe Roma nimi wamlaba, sa'agha elag ualulam?” aro haibaog.   
\p
\v 27 Wene aro haibaogpa, yin saleropne sikindo poneko Paulusag piogti, “An sik Roma nimi wamlam?” seogpa Paulusti, “Yo, ot andi leplam ane,” seog.   
\p
\v 28 Wene seogpa, yin saleropne sikindo ponekori, “Na babe 'Romange tanun,' aro kal ma'al kamna alikinag Roma nimi sikini yabo tatsisi,” seogpa Paulusti, “Na kal ma'al tatsisi kom. Nani Romangeri mangkaneogpa, Romange wamna,” seog.   
\p
\v 29 Wene seogpa, yin salerop nangdi “Taeplam-taeplam lobebeba, nu eltanepne ambatsilul,” aro haing kaubek nang tanekori babe ka'ebaekti, “Obukap kom,” aro log lelem elemag-elemag piek. Sin log lelem elemag piekpa, yin saleropne sikindo ponekori babe, “Romange agha mane agha, 'Besi agha sorop haing agha kauplulom,' sen,” aro log sembaog.  
\v 30 Yin saleropne sikindo ponekori, “'Yahudi nimiri Paulusag tam pairo ulamangne nene sa'a sembe ulamang?' aro sik wali uro eltahane,” senelamog.  
\p Wene senelamogti, mabogha kwelekaogne memnang Allah sembe pairopnang sikindo yaboap, Yahudi nimi sembe tam lelekto kemero kareptopnang Mahkamah Agama nangap yopsiog. Yopsiogti, poloro wimbahaiogpa, wamekag Paulus haing sae lopto enero poa sin wamekag payaek.   
\c 23  
\s1 Paulus Yahudi nimi sembe tam lelekto kemero kareptobag Mahkamah Agama nimi whingag wamogha (23:1-11)  
\b  
\p
\v 1 Paulusti, Yahudi nimi sembe ua tam lelekto kemero kareptop nimi Mahkamah Agama nimiag yop-yoba kembahiogti, lelamogti, “Nangkabo, samenag babe, wene babe, 'Allahri ililamnel,' aro ul palamnange nene nari wanari babe, tam malia uan kom sembamnari wamna,” seog.  
\v 2 Paulusti wene alamoghag agha memne Allah sembe pairopnang sikini nubunge Ananias ponekori ka'ebaogti, wana yo sembaogti, “Paulus pamag taeplam loplulom,” aro peramag wamek nimiag wene aro arukahiogpa, pamag taeplam lobek.  
\v 3 Pamag taeplam lobekpa, Paulusti memne Allah sembe pairopnang sikini nubunge ponekoag, “Andi, 'Na walinge malia urop komne,' senelamlamdi ulamlam aghana, Allahri an babe opkulul. Andi senelamlamne, 'Musari mome toropneag kembiagha sunsunum uro Paulusti tam ene karebanun,' sembalam aghana, 'Pam taepto oplulom,' selamne agha andi Musari yubu mome torop mome eneko philamlam,” seog.   
\p
\v 4 Wene seogpa, Paulus peramag wamekti, ka'ebaek nimi tanekori, “Andi nimi nubunge memne Allah sembe pairopnang sikini nubunge san tiliplamlam,” seek.   
\p
\v 5 Wene seekpa Paulusti, “Nangkabo, samenag Musari mome toro pibognena, 'A'uni yabo saelbamsiang nangag san tilipto yubu malinge lepseng kom,' aro mome toro pibognena\x - \xo 23:5  \xt Keluaran - Lambaeka 22:28\x* na el wamna aghana, el poneko nimi nubunge memne Allah sembe pairopnang sikini nubunge wamlange na ekondi ogto lemna,” seog.   
\p
\v 6-8 Wene seogti, “Nimi wamek nimi taneko Saduki nimiap Farisi nimiap winiltalamekag nhon wamang,” aro eltaog. Saduki nimiri senelamekti, “Nimi teptopne yame orogti, nimi teptopne kamag tanep kom. Allah arukna malaikat babe orog,” senelamek. Undo senelamekpa, Farisi nimiri, “Nimi yame wamangpa, nimi teptopne kamag tanep. Apna Allah arukna malaikat babe wamang,” senelamek. Sindi senelamekne sembe el uro wamogti, Paulusti tam kareptopnang Mahkamah Agama nimi tanekoag yubu ambarelamsiogti, “Nangkabo, na babe Farisinge wamna, nani babe Farisingeri mangkaneog. 'Nimi teptopne Allahri kamag nembahilul,' senelamnari, nang-nang aro ulamnange ane sembe na enero poa yaneangba, wene tane tam kareptobag wamna ane,” seog.  
\p Eldi wene seogne sembe nimi taneko yubu ka'ebaekti, Farisi nimiap Saduki nimiap sin waltalamekti, winil talamek nimi taneko nenne Farisi nimiag sip talamekpa, nennne Saduki nimiag sip taekti, sin sae saekag lero wamek kom.   
\p
\v 9 Undo wene alamekti, sin maiknoro yo piptangka leldalamek. Nimi etbare Farisi nimi Musari samenag mome tobogne ambatsiropnang sekelabiekti yubu lelamekti, “Nuri kembabag nimi eneag tam nenenne olog ibap kom. Nimi eneri yubu lelamlangena Allah arukna malaikattiro, nimi yameriro ambarogne agha lelamloa saog sembaap,” alamek.  
\v 10 Sin yubu haum hag aro lelamekpa, yin saleropne sikindo ponekori “Paulus kiliro pobikag, logti,” aro yin saleropne sikindo ponekori ilipsaboag, “Kulukamundi tolingkina nu yin saleropnangdi aeag pabululom,” seog.  
\v 11 Pabiekpa, kwelekaogne, inipnag Paulus malamogpa, Nia Mangkina Salehiropne Yesus el peramag yaogti, yubu lelamogti, “Wana keagman uro wamlulam. Na sembe andi Yerusalema lebom saog uro, Roma pimendi babe wene aro ambatsululam,” seog.   
\s1 “Paulus obukap,” aro Yahudi nimiri yubu lelameka (23:12-22)  
\b  
\p
\v 12 Wene seogpa, mabogha ae kwelekaogpa, nimi Yahudi nimi taneko tognorobag longoptaekti, “Paulus obukap,” aro yubu lelamekti, “El ya'ag obebe taneogna kwanengap magap tukap. Kom tanena Allahri nu opsinep,” aro salag yubu karebaek.  
\v 13 “El obeberi, kwaneng tukap,” seek nang taneko teng nhonap epto naual bare nangdi lelamekpa, nen ma'aropne wamekti.  
\v 14 “El obeberi, kwaneng tukap,” seek nang tanekori memnang Allah sembe pairopnang sikindo yaboap, Yahudi nimi sikindoyabo wenehiropnangap ambarel phiekti, “Nuna 'Paulus obebe taneogna kwanengap magap tukap. Kom tanena Allahri nu opsilul,' aro salag yubu karebap.   
\p
\v 15 Wene aro karebap ana, a'unap Yahudi nimi sembe tam lelekto kemero kareptopnang Mahkamah Agama nangap poloro wapmundi, mome toro yin saleropne sikindoag mome pipmunba, 'Nen sap samoro tam wali uro kembaukap ane sembe Paulus payalulam,' aro maneri mome toro piplulom. Pipmunba, yin saleropnang sikindori mololapmunne ka'ebaleri, nuri 'Obaukap,' senelamapne ekondi, 'Paulus sin wamangag payalulom,' aro arukahilul. Arukahileba, payalamikpa, inaag anam a'unag Paulus payan komag nuri inaag webaberi obukap,” aro ambatsiek.   
\p
\v 16 Wene alameka aghana Paulus ilipsa'eldi mangaroba me nhon wamog menekori sindi yubu lelamekne ka'ebahiog. Ka'ebaogti, meneko yin salerop nangdi aeag piogti, “Paulusap haiptanunam,” aro yin salerop nang yae wamek nang tanekoag ambatsiogpa, “Hae haiptarurom,” seekpa wa'iogti, sindi lelamekne ka'ebahiogne Paulusag ambarog.   
\p
\v 17 Wene aro ambarogpa, Paulusti yin saleropne nhon yobogti, “Me ane poa lepmendi, a'undo yin salerop neag poa pululam. El a'undoag yubu olog leplul,” seog.   
\p
\v 18 Wene seogpa yin saleropne ponekori me aneko poa lebogti, sikindo yin saleropneag poa piogti ambarelamogti, “Paulus ae kop aeag wamlange ponekori yopneldi, 'Me ane anag poa pululam,' sel. 'Meneri yubu olog elag ambatlul,' selba payan,” seog.   
\p
\v 19 Wene aro ambarogpa, yin saleropne sikindo ponekori meneko sae kiliro saelba ae paroag sip piog. Ae paroag sip piogti, hailamogti, “Sa'a agha nanag 'Ambatnun,' aro leplam,” seog.   
\p
\v 20 Wene seogpa menekori, “Yahudi nimiri saekag lelamangne ka'ebahinnena, nari nawang Paulus sembe 'Nen sap samoro ambuhum tam wali uro kembaukap. Nuri tam lelekto kemero kareptobag Mahkamah Agama winil talamikag payalulam,' aro anag molbaghukang.   
\p
\v 21 Wene aro molbaghukang aghana, andi sindi yubu ka'ebahiseng kom. Nimi teng nhon epto naual bare phelekto abenekori, 'Paulus obukap,' aro inaag webaikti wamnuang. Sindi lebangnena, 'Nu Paulus ya'ag obebe taneogna kwanengap magap tukap. Kom tanena Allahri nu opsinep,' aro salag pibangdi, yubu karebangdi wamang. Sindi 'Nen payalulam,' aro maneri mome toro toatsinne sembe molbagha nuagheang, wenena andi yubu lenne sembe agha nang-nangaro wamang,” aro ambarog.   
\p
\v 22 Wene aro ambarogpa, yin saleropne sikindo ponekori menekoag, “'Elag yubu undo ambatna,' aro nimiag ambatsiseng kom,” seogti, “Anenge aeag pululam,” seog.   
\s1 Paulus Feliks wamoghag Kaisarea poa pieka (23:23-35)  
\b  
\p
\v 23 Meneko elenge aeag piogpa, yin saleropne sikindo ponekori ilipsabo yin salerop nang phende yopsiogti ambarelamsiogti, “Yin salerop nang teng linbare saog nimiap (200), yin salerop nang pham kuda alibag pan nang teng wilindi saog nimiap (70), yin salerop nang kame lausiki saleropnang teng linbare saog nimiap (200) poloro webitsululam. Webitsimenba, heng purukaleba, olog inibin tanaleba, Paulus as ane agha poa lepmundi, as Kaisarea poa pululom.  
\v 24 Keledai Paulus alibag walenne babe webitmendi, poa mog so'o ane saleropne Feliks ya'aghag wali uro Kaisarea poa pululom,” seog.  
\v 25 Yin saleropne sikindo ponekori, mog so'o saleropne Feliks sembe mome tobogne lilimna ane:   
\pi1
\v 26 “Na Klaudius Lisiasti nani nubunge walinge Feliks aro kiplangken.   
\pi1
\v 27 Nimi ene Yahudi nimiri saelbaongdi, sindi 'Obukap,' aro ulamang. Aghana nimiri, 'Nimi ene Romange,' seongba, ka'ebanori na naipsaboapti Yahudi nimiri saeag agha taluro tomno.  
\v 28 Taluro tobobori, 'Sa'a sembe lelamang tam kembaukap,' aro Yahudi nimi sembe tam lelekto kemero kareptop nimi Mahkamah Agama nimiag poa pibo.  
\v 29 Poa piboba, eldi tam malia unneap sunsunum uro, tam elag 'Tebalul,' aro tininneap, kop aeag tolongonneap sunsunum uptao kom. Sindi elag tam yo'o saog nembaongnena, 'Musa yubu samenag mome toro piropne philamla,' aro undo agha lebong.  
\v 30 Apna na yubu ka'ebanonge, 'Yahudi nimiri, “El obukap,” aro yubu lelamang,' seongba ka'ebano. Ane sembe nari 'Elemag nai anag poa pululom,' sen. Sendina tam elag yubu lelamang nangagna, 'Tam a'undi lelamlomne poa elag poa pululom,' sen anekona an babe el uro,” aro mome pibog.   
\p
\v 31 Mome undo pibogpa, sikindo yin saleropneri ambatsiogha sunsunum uro inipnag Paulus poa as Antipatris poa piek.  
\v 32 Kwelekaogpa lukunapne yin salerop nangap, kame lausiki salerop nangap aeag samoro Yerusalem yaekpa, yin salerop nang agha pham kuda alibag pan nang tanekori Paulus poa sin Kaisarea sip palamek.  
\v 33 As Kaisarea aneko piekti, sikindori mome pibogap, Paulusap mog so'o Kaisarea saelba uropne Feliks ponekoag tarek.  
\v 34 Mome tareka aneko kembaogti, Feliksti Paulusag, “Anna talange,” aro haibaog.  
\p Wene aro haibaogpa, Paulustina, “Na Kilikiange,” seogpa eltaogti,  
\v 35 Feliks ponekori, “Tam anag pibong nimi taneko yaik tanena tam anag pipkeongne kembaukap,” seogti, “Nimi nubunge yubu sia leropne Herodesti samenag sobaog aeag piapmundi, yae wamlulom,” aro ilipsaboag ambatsiog.   
\c 24  
\s1 Paulus saelba uropne Feliks whingag pabiekpa, Tertulusti Paulus sembe ambarelamsiogha (24:1-9)  
\b  
\p
\v 1 Ik lambare wameka memne Allah sembe pairopnang sikini nubunge sina Ananiasap, Yahudi nimi sikindoyabo wenehiropnangapti sindi, “Yubu tam Paulusag pibebenge sembe lelekto mog so'o wamabag saelba uropne ambatsilul,” aro nimi nhon sina Tertulus webekti, sin nhon piek. Piekti, “Paulusag tam wamla,” aro “Mog so'o saelba uropne Feliks ambarukap,” aro as Kaisarea piek.  
\v 2 Sin poloro wamekag Feliks ponekori el umag wameknangag, “Paulus payalulom,” seogpa payaek. Payaekpa, Tertulus neneko sekelabiogti, Yahudi nimiri Paulusag tam palilamekne sembe ambarelamsiogti, “Nani nubunge Feliks, an wamlamagna nununge mog so'o ene aingniamla. An wana hektopne wamlamdi, yubu lelamlamdi, mog so'o nununge tane wali uro o'obarelamsilamba, wali uro palamla.  
\v 3 Nani andi uaomne nu niri sop-sop ililamapti, salelamapti 'Wah, Feliks, Nani,' aro kiplangkeap.  
\v 4 An nimi nubunge tam maikno kemelamlamdi, ulamlamne na el wamna, ane sembe nani, 'Andi wana pailangkalapmendi, nari yubu olog lemnunne nene sembe ka'eame,' aro mololangken.   
\p
\v 5 Nimi ene meneng singina salehiropne saog wamlaba, as mog so'o ni abeneko posaplamlaba, ililamap. Yahudi nimi as tala-tala wamangne eldi aghabog put-put ana tolongolamla. Nimi ene ekel ina ambatto Nasaretne yubu ka'elamang nimi sembe usog talamla.  
\v 6 Abeneog kom, aghana Allahri Mem Ae walinge eldi, 'Yahudi sisa kom nimi pabhineri, Yahudinang aghabog wamnebag tobongkipsineri, Allahri Ae Mem Ae loba nembanun,' aro ulamo. Undo ulamoba, kembabori, nuri 'Musa yubu saelba ulamapne sunsunum uro tam karebaukap,' aro Paulus saelbabo.  
\v 7 Wene sembabori, Paulus saelbabo aghana yin saleropnang sikindo Lisias neneko yaori, nu saeag agha yo uro nimi ene tolao.  
\v 8 Nimi ene pelepto tobori, nunag ambarelamsiori, 'Mog so'o salehiropne Feliksti tam kembalulba, elag pululom,' aro ambatsioba yaap. Nai andi haibamendi, nuri lebapne sembe 'Sik uro lebang,' aro el talulam,” seog.   
\p
\v 9 Wene aro ambarogpa, Yahudi nimi taneko wamek nimiri babe “Sik lepla,” aro wene alamek.   
\s1 Feliks whingag agha Paulusti eldamne sembe lebogha (24:10-23)  
\b  
\p
\v 10 Wene alamekpa, mog so'o Kaisarea saleropne Feliks ponekori Paulusag, “Andi babe yubu leplulam,” aro haing tibu nginikom seog. Haing tibu nginikom seogpa Paulusti, “Nani, na el wamnange, andi Yahudi nimi mog so'o eneag wamapne heng kun-kunne saelbamsilamdi, nuri ul palamapne sembe el ua ulamlamdi, tam kemero kareplamlamne na el wamna. Ane sembe na wana yeng wamnelne nanag tam palilamangne nene, nani, andi 'Kembaho,' sembamna.  
\v 11 Nani, andi nimiag haibahimenba, sindi lebikne agha el talulam. Na as Yerusalem, 'Allah omekel pinun,' aro pinori wamnoba, ik ao bare sum taoba, wene wamap.  
\v 12 Na Yerusalem wamnonge aneko Allahri Aeag babe, Allah yubu lerop aeag babe, inaag nimi ua urobag babe yabalamnari, nimi nhonap babe yubu wabahin koma nimiag 'Yubu talul,' aro suknunne babe orog.  
\v 13 Sindi babe, 'Tamna nene sembe lelamap,' alamang aghana, 'Malia uao,' senenne kekneba uanonge nhon anag lag nembanep kom saog wamla.  
\v 14 Nani, na an whingag agha lag phoro lemnun. Nari omeklamnange nunisari Allah omeklamekne poneko omeklamnari, Yesusti Allahag samoro yingkirop Ina pa'abaogne poneko omeklamna. Ina pa'abaogne poneko omeklamnange, 'Ekel ina ambarelamsilne,' alamang aghana, Musari samenag mome toro pibog yubuap, Allahri yubu silimu tiplamek nimiri mome toro pibek yubuap 'Sik' senelamna.  
\v 15 'Nimi malia uropne walia uropne Allahri kamag nembahilul,' aro nari babe seneraglamnari, wana piamnange nang-nangaro wamna. Nang-nang aro wamna saog uro 'Allahri nimi kamag nembahilul,' aro sindi babe nang-nangaro wana piamang.  
\v 16 Nimi malia uropne walia uropne Allahri kamag nembahilul ane sembe Allah whingag babe, nimi whingag babe wanaag agha nia mangkina ulamnange 'Walinge aghabog uahane,' senelamna. Undo unulamnange sembe 'Malinge ulamna,' seneldalamna kom.  
\v 17 Nangkabo urobag heng kun-kunne uldongolamneldoba, sindi wanari, 'Nungkabo Yahudi nimi sae agha orog nimiag yepsukap,' aro tatneongba, as Yerusalem payano. As Yerusalem yan komag agha, 'Allah sembe mhong towalengerobag wali-walia pimnun,' sembanori, 'Yahudi nimi as Yerusalem wamangne yepsinepne tarel phinun,' aro as Yerusalem samoro yanori payano.  
\v 18-19 Yanori, 'Allah whingag wali neneptanun,' aro Musari samenag mome toro pibogne sunsunum uro aleltalamnori, wamnoa Allahri aeag wa'ino. Wa'inori, unulamnoagna nimi suknubahin koma wamnori, nimi maikno nanap nhon wamobo kom. Nari yubu suknuna nimiag suknunne babe orog aghana, Yahudi nimi mog so'o Asia agha yaong nimi tanekori imneong. Sin Asia nangdi nari samen uldongolamnoag agha yaongdi, imneongdi, tam nembaong. Yahudi nimi Asia so'o agha nimiri tam nembaong nimi eneko yahengdi, nani an whingag lepseng tanena wali.  
\v 20 Yahudi nimi Asia so'o agha nimi taneko yaong komba, yaang nimi taneri samenag nu Yahudi nimi sembe tam lelekto kemero kareptobag Mahkamah Agama enero poa pineong. Mahkamah Agama enero poa pineongba, wene tamna nene sembe payaneang sembano kom aghana nen sap wene ane payaneang. Malinge uanonge sembe sindi wene ambatkukang sembamna.  
\v 21 Na Yahudi nimi sembe tam lelekto kemero kareptop nimi whingag Mahkamah Agama pabineongpa, yubu kiki leploa saogne lemnongena: '”Nimi teptopne kamag taukang,” senonge sembe tane pukitnelom,' senonge sembe na yubu tam nembaneong, to?” seog.   
\p
\v 22 Wene aro Paulusti ambarogpa, Feliks poneko Yesusti yubu ina neleptop nimi sembe el uro wamog aghana, “Amik karebanun,” sembamog. Undo sembamogti, “Yin saleropnang sikindo Lisias yaleri, yubu ambatnelenge ka'ebaneri, tam nene karebanun,” aro wene seogti pibog.   
\p
\v 23 Wene seogti, yin salerop nang sikindo ponekoag, “Paulus wali uro piapmendi, elkabori yebel alamikne sembe yag lambahiseng kom,” aro ambarog.   
\s1 Paulusti Feliks elkel Drusilaap wamdekpa ambatsiogha (24:24-27)  
\b  
\p
\v 24 Ik etbare wameka Feliksap elkel Drusila Yahudi kelenekoap yaekpa, Feliksti, “Paulus tol pululom,” seogpa, payaekpa, Paulusti Yesus Allahri wepto poghol aogne ponekoag “Sikne” aro seneragnepne sembe Feliks lelekto ambarelamogpa, Feliksti aoag agha ka'eloamog.  
\v 25 Ka'elobongkia wamogpa, Paulusti Allah yubu tibin nenero porog uro ulpanneap, eldamneri wana pailangkanneap, Allahri amik tam karebelalulneap sembe Feliks ambarogpa, Feliks poneko log sembaogti, “Ot abene ambatnelamba pululam. Nen 'Ambatnelul,' sembane tanena yopkunun,” seog.  
\v 26 Feliks poneko wanaag seneraglamognena, “Kal ma'al tatneleba, sae loplambanun,” sembamogti, ik sulu Paulus yoplamogpa, yubu lelamdek.  
\v 27 Paulus aneko piamogne heng kun phende piogpa, Feliks lunumna sina Perkius Festus waelbaog. Aghana Feliksti “Yahudi nimi wana topsunun,” aro “Paulus kop aeag aneko wamlul,” sembamog.   
\c 25  
\s1 Paulusti, “Roma nimi saelba uahiropne nubunge Kaisarag pinun,” seogha (25:1-12)  
\b  
\p
\v 1 Festus poneko “Yudea so'o saelbamlulam,” aro nimi nubunge towalengkaogpa, as Kaisarea ae inipna ik wilindi wamogha as enekoag agha Yerusalem waelbaog.  
\v 2-3 Yerusalem waelbaogti, wamog. Wamogpa, memnang Allah sembe pairopnang sikindo yaboap, Yahudi nimi sikini yaboapti tognoro saekag lelamekti, “Festus whingag piberi, 'Paulus Yerusalem poa pululom,' aro molbaukap. Molbabeba, Paulus inaag payalamikpa, Paulus obukap,” aro saekag lebek. Undo tognoro saekag lebekti, Festus poneko whingag piekti, “Paulusti undo-undo ulamo. Ane sembe nai Festus, andi nu sembe wali sembahimen tanena, 'Paulus as Yerusalem poa pululom,' sululam,” aro molbaek.   
\p
\v 4 “Obukap,” aro tognoro saekag lebekti, Festus ponekoag, “Paulus as Yerusalem pabululam,” aro molbaek aghana Festus nenekori, “Paulus as Kaisarea kop aeag wamlaag wamlul. Wamleba, na babe olog wamnea as Kaisarea samoro punun sembamna.  
\v 5 A'un a'uni yabo 'Eldi uaonge sembe elag tam pibukap,' sembamun tanena nanap nhon as Kaisarea piberi, elag tam piplulom. Elag tam pimnepne wamle tanena, lelekto kembaberi, 'Malia uao to, kom to?' aro karebanun,” seog.   
\p
\v 6 Undo wene seogti, Festus neneko ik linbarero ik saobarero undo as Yerusalem wamogha samoro Kaisarea kulukulaog. Wamogha lukunapne, “Yubu tam lelekto kembaberi, tam karebanundi, Paulus enel pululom,” aro ilipsabo ambatsiog.  
\v 7 Paulus sin poloro wamekag enero payaekpa, Yahudi nimi Yerusalema yaek nimi taneko el kanero sekek. Paulus kanero sekekti, yubu maikno lelamekti, “Malia undo-undo ulamo,” aro lolorop yubu lelamek aghana, “Malia uaonge undo-undo ulamo,” alamekne tiplamog komdi, nimiri sik sembanep kom saog wamog.   
\p
\v 8 Wene alamekne tiplamog komdi, sik sembanep saog kom wamogpa, Paulusti, “Nandamne sembe peleptangtop yubu lemnun,” aro sekelingkiog. Sekelingkiogti, yubu lelamogti, “Nari ulamnangena, Musari samenag mome toro pibog yubu Yahudi nimiri salero ul palamang yubu phibano kom. Allahri Ae sembe babe, yubu sia leropne nubunge Kaisarag babe, nari tam malia unne babe san lenne babe orog senelamna,” seog.   
\p
\v 9 Wene seogpa, Festus ponekori, “Yahudi nimi wana topsunun,” aro Paulusag hailamogti, “'Tam ane as Yerusalema karebaukapti, pukap,' senne sembe saekag senelamlam, te?” aro haibaog.   
\p
\v 10 Wene aro haibaogpa, Paulusti, “Samenag yubu sia leropne nubunge Kaisardi anag, 'Yudea so'oag pimendi, saelbamsululam,' aro sekitkeo. Sekitkeoba, an whingag tane wamnari, tanea babe andi tam karebanep. Nari ologha babe Yahudi nimiag tam malinge uan komne nai an el wamlam.  
\v 11 Nari sik uro malia uahi tanena, malia uahinge sunsunum uro opnumunba, wali tebanun. Aghana tam nanag palilamangne orolenange lelamangdi, lolorop yubu lelamang tanena, nimi nhondi babe sin Yahudi nimi saeag nembanukang kom. Na Kaisar whingag waelbaneba, Kaisarti tam karebalul,” seog.   
\p
\v 12 Wene seogpa, Festus poneko el yubu eptopnangap yubu nikne lebekti, Paulusag ambarelamogti, “'Kaisarag waelbanun,' selamba, elag pimenba, Kaisarti tam kemero karebalul,” seog.   
\s1 Festusap Agripaap yubu lepteka (25:13-22)  
\b  
\p
\v 13 Ae ik etpare wamekpa, nimi nubunge yubu sia leropne Agripaap,\f + \fr 25:13  \ft Yubu sia leropne Agripa ponekona, samenag yubu sia leropne nubunge Kaisardi elag, “Palestina so'oag mag luag sip as wamogne saelbamsululam,” aro sekirogpa, saelbamsiogne wamog.\f* ilipsa'el Bernikeap abeneko “As Kaisarea Festus poneko kipnunam,” aro yarek.  
\v 14 Aneko sin ik etbare undo wamekti, Festus nenekori Paulusag tam pibekne sembe yubu sia leropne Agripa ambarelamogti,  
\pi1 “Nimi sae kauptopne nhon Feliks saelbamsiog liag agha Yahudi nimiri tam 'Eldi malia ual,' aro salero Feliks whingag pabiekpa, sae kaupto kop aeag tobongkibog. Kop aeag tobongkibogti, tam kareban komdi, wene babe kop aeag wamla.  
\v 15 Kop aeag wamlange ponekona, na Yerusalem pinoba, memnang Allah sembe pairopnang sikindo yaboap, Yahudi nimi sikindoyabo wenehiropnangapti, tam malia uamonge ambatneongdi, 'Malia ualne sembe “Opsut,” sululam,' aro molbaneong.   
\pi1
\v 16 Wene aro molbaneongba, nari ambarelamsinori, 'Yubu sia leropne nubunge Kaisardi ambarelamsiogne sunsunum uro salero ul palamapnena, nimi nhondi nimi nhonag tam palilamle tanena, tam elbina malia uropne poneko haiban koma nimiri tam karebanep saog wamla kom. Tam tangtopneap tam paliropneap nikag wamnaba, tam anabiag wamnari kemeropneri malia uropne poneko haibanep. Haibanba, tam tangtopneri eldamne sembe pelebeltanan yubu tibin talbin tanena, tam lelekto kemero kareptop nimiri, “Ualne sembe undo uaukap,” aro karebaleba, eldi yubu sunsunum uro tam tangtopneag uro yabilul,' aro wene seo.   
\pi1
\v 17 Wene aro ambatsinoba, sinap nu nhon as Kaisarea tane yabori, maboboa kwelekaonge 'Ta'ap sen koma yubu tam lelekto kembaberi karebaukap,' aro 'El neneko enel pululom,' seno.  
\v 18 Elag tam palirop nimi taneko kanero sekamongdi, 'Eldi malia uaonge “Undo-undo uao,” aro lag phoro lebukang,' sembano. '”Undo-undo uao,” aro lebukang,' sembano aghana, nimi nhondi babe, 'Eldi malia uaonge ane,' aro lebongne, nari samenag sembanonge sunsunum uro lebong kom.  
\v 19 '”Tam ikinne ane,” aro lebukang,' sembanonge sunsunum uro lebong kom aghana, ot sindi omeklamongne sembe aghabog tam nembaongdi, yubu lelamong. Apna, nimi nhon samenag tebaogne si Yesus sembe Paulusti, 'El sik uro kamag taogti, wamla,' aro ambatsionge sembe yubu tam saog tao.  
\v 20 Sin undo yubu lelamongba, nari 'Yubu tam ane sembe lelamang,' aro karebelbana, enhaun seo. Ane sembe nari Paulusag hailamnori, 'An Yerusalem pimenba, Yahudi nimi ua urobag tam ane karebanundi, wali sembalam te?' aro haibano.   
\pi1
\v 21 Wene aro haibanoba, Paulustina, '”Kaisarti tamna karebalul,” aro Kaisar nang-nang aro kop aeag ane wamnun,' seo. Ane wene seoba, nari 'Kaisarag pognun,' aro kop aeag piamna,” seog.   
\p
\v 22 Wene seogpa, Agripa nenekori Festusag, “Nari babe, 'Nimi neneko eldamneri yubu lelamsoa ka'ebahane,' sembamna,” seogpa, Festus nenekori, “Ambhum el yubu leplenge ka'ebalulam,” seog.   
\s1 Agripa wamoghag Paulus enero poa pieka (25:23-27)  
\b  
\p
\v 23 Wene seogpa, mabeka lukunapne Agripaap ilipsa'el Bernikeap nimi nubu nimiri towalengeroba towalengkibtekpa, yin salerop nang sikini yaboap, as eneko wamek nimi sikini yaboap wa'alamek. Wa'iekpa, Festus ponekori, “Paulus tol pululom,” aro nimi arukahiog.  
\v 24 Paulus tolpina payaekpa, Festus nenekori yubu lelamogti, “Yubu sia leropne Agripa nuniap, nimi ni tane yalomne nangkabo! Yahudi nimi ni taneko Yerusalem wamangneap, Yahudi nimi kota Kaisarea tane wamangneapti, nimi pone sembe 'Malia ulamo,' aro yubu maikno lelamong. Yahudi nimiri nanag yingkina koloro, 'Nimi ene ik waro wamlul kom, tebalul,' aro haum alamong.  
\v 25 Undo wene alamong aghana, nari kembanori tam uaonge sunsunum uro tam elag palina babe orog uao. Ya'ag onna babe orog uaoba, eldamneri 'Kaisarti tam karebalul,' seoba, nari, 'Kaisar ya'aghag kota Roma pabiikpa, Kaisar whingag pulul,' aro yubu lemno.  
\v 26-27 Yubu lemno aneko agha 'Eldi tam malia uaonge Kaisarti kemero karebalul,' aro mome toro palina tam orog kembano. Na el wamnange, nimi nhondi malia uropne tam kembanba, 'Eldi uaonge tam nene sembe uao,' aro mome toro palinne oroghag agha, 'Kaisarti kembalul,' aro elag pognep kom sembamna. Ane sembe a'un ni wamlomne whingag el pailan. Nuni yubu sia leropne Agripa, an babe Yahudi nimiri omekto ul palamangne elne wamlam. Tam eldi uaonge kembabeba, tam wamleba, ibebe tanena, eldi uaonge sembe nari mome tomneri, Kaisarag pognun,” aro ambatsiog.   
\c 26  
\s1 Agripa whingag agha Paulusti, pelebel tanan yubu lebogha (26:1-11)  
\b  
\p
\v 1 Wene aro ambatsiogpa, Agripa ponekori Paulusag, “Wene andi ulamlamne sembe pelebel tanan yubu leplulam,” seogpa, Paulusti, sae la'abatsiogti, yubu lelamogti,  
\v 2 “Yubu sia leropne Agripa nani, Yahudi nimiri lolorop yubu nanag lolbaneongne sembe sumene an whingag agha pelebel tanan yubu lag phoro lemnunne sembe awi yeng uro wamna.  
\v 3 Yahudi nimiri sikinisari ulamekne saelba ulamangneap, tam sin anabiag lag taongeap ni ane sembe an el wamlam. An el wamlamba, nari ambatkinunne andi wana palingkina wali ka'eamnululamba, mololangken.  
\v 4 Na nari asag agha mangkaneekpa, na kaubuniag agha Yahudi nimiri saelba ulamekti, ulamekne ambaneek. Ambaneekpa, as Yerusalem ane babe yahiba, nen anea ma'aro ambaneek. Ambaneekpa, na yabalamsiri, ulamsia Yahudi nimi as Yerusalem wamekneri imneekne sin el wamang.  
\v 5 Sin samenag agha na sembe sin ni el wamang. Sindi agha, na Farisinge wamsiri, Musari yubu toro pibogne sembe mikip uro saelbamsiri, yubu ane sunsunum uro ul palamsinge 'Hae lebukap,' sembaik, tanena ambarelamsinne sembe 'Sik lepla,' aro lebukang.  
\v 6 Na wene ane sekamnangena, 'Allahri nunisa yaboag “Undo uanun,” aro salag pibogne sunsunum uro sik talul,' senelamnari, nang-nang aro ulamna. 'Allahri, “Uanun,” seogne sik talul,' aro nang-nang aro ulamnange sembe nimiri saelbaneongdi, wene ane tam kareptop nang whingag payaneongba, sekamna.  
\v 7 Nu Yahudinang sisa aobare wamapne nene, 'Allahri samenag salag pibogne sunsunum uro sik talul,' aro nu niri sinag kweleknag sol wali, wali uro Allah omeklamekne saog uro nu babe nang-nang aro omeklamap. Nani Agripa, undo seneraglamekti, ulamekne sunsunum uro ulamnonge sembe Yahudi nimiri nanag, 'Tam malinge ulamlam,' alamangpa, na wene pelebeltanan yubu ambarelangken.  
\v 8 Nangkabo, sa'a sembe a'undina, 'Allahri nimi teptopne kamag nembanep kom,' aro seneraglamlom?   
\p
\v 9 Samenag nari babe '”Yesus Nasaretne si nubu taleag,” aro yo uro ulamsinun,' senelamsi.  
\v 10 Lemnange nene Yerusalema unulamsisi. Memnang Allah sembe pairopnang sikindo yabo tanekori, 'Nuri sae wamla,' aro yubu nanag pibekpa, nimi Yesusag 'Sikne' aro seneragtop nimi maikno haing sae kaupto kop aeag tobonglamsisi. Kop aeag tobongolamsisiri, 'Ya'ag tepnange babe wali tebaik,' aro yubu lepsiri, Yahudi nimi nubunangap saekag lebubuag agha, Yesusag seneraglemek nimi ya'ag opsiek.  
\v 11 Yahudi nimiri Allah yubu lerop ae nhonag pang nhonag pang ulamsisiri, 'Yesusag seneraglamangne sembe opsukap,' aro sen-senna elamsisi. Elamsisiri, ililamsisiri, 'Yesus san tiliplopsisut,' aro ambarelamsisi. Yo maikno senelamsisiri, kota maikno weag wamekag babe el palamsisiri, 'Seklebaukang,' aro ul palamsisi,” aro Paulusti nimi nubunge Agripa whingag ambatsiog.   
\s1 “Na Yesusti yopneog,” aro Paulusti ambatsiogha (26:12-23)  
\b  
\p
\v 12 Paulusti nen tipto ambarelamsiogti, “Undo unulamsiba, memnang Allah sembe pairopnang sikindo yabo tanekori, 'Nuri sae wapmendi, as Damsyik pimendi, undo-undo ualulam,' aro ambatneekpa, 'As Damsyik punun,' aro palamsi.  
\v 13 Nani Agripa, yubu sia lelamlamne, inaag palamsiba ae siro heng ik molmol alamog abene heng tingirop saog komne tibin warerop sirikne imag agha nanap nangkabo palamubu nangag warelopsiog.  
\v 14 Warelamsiog abeneko nangkaboap nu so'oag malingkiburi, ka'elamsiba yubu nhon Ibrani yubuag lelamogti, 'Saulus, Saulus sa'a sembe “Seklebale,” aro Na ulamnelam? Eldi yagto pabalangkelne pheleptangka pululam kom. Pheleptangka palapmen tanena og seklebalulam,' alamogpa ka'ebahi.  
\v 15 Wene alamogpa ka'ebahairi narina, 'Nai, an etneri lelamlam?' sihiba, Eldina, 'Na Yesus andi “Seklebale,” aro ulamnelamne ponekori lelamna,' alamogha ka'ebahi.  
\v 16 Eldina, 'Wene pukmendi, sekelabi. An “Na arukna wapmendi, wene imnelamneap amik Nari 'Ualulam,' sununneap nimi ambarelamsululam,” aro Nari sekitkunundi, an haingag lag tan.  
\v 17 Nari an poglangkenne, “Yahudi nimiap, Yahudi sisa kom nimi as tala-tala wamang nimiap babe sin wamangag pululam,” aro poglangken. Poglangkenne saelbaghiikpa, Yahudi nimiri saeag agha babe, Yahudi sisa kom nimi mog so'o as tala-tala nimiri saeag agha babe, Nari sae lopkenun.  
\v 18 Poglangkenba, sin wamangag pimendi, sin nimi taneko haing uropne haing kwelekel palamsululam. Haing kweleklamsimenba, inibinag lilobiagha samoro tibinag yalamukang. “Haing kwelekamikti, phia sikini nubunge Iblis\f + \fr 26:18  \ft Allah yubuag sikini nubunge poneko sembe Iblis alamang. Allah yubuag wamlangena, phia maikno aghana sikini nubunge ot nhonog wamla.\f* ponekori saeag agha sae loptangom agha Allahag samoro yalamikpa, Allahri saelbamsukang,” aro poglangken. “Sindam nimiri Na Yesusag 'Sikne' aro seneraglamik tanena, Allahri 'Naringe aghabog wamukang,' aro wepsirop nimi sembe sindi malia ulamangne tam orog nembaleba, Allah Eldamne mabo taukang,” aro poglangken,' aro Yesusti ambatneo.  
\v 19 Ane sembe, nani Agripa, yubu sia lelamlamne, Yesus imagne ponekori kekneba nanag uaori, yubu ambatneonge sunsunum uro ul palamno.  
\v 20 As Damsyika nimi Yahudi nimi wamekneag agha alnina alnibahiri, kota Yerusalem nimiap, Yudea so'oag urop nimiap, Yahudi nimiap babe, Yahudi sisa kom nimi babe Allah yubu ambarelamsisi. Sinag ambarelamsisiri, 'Malinge ulamlomne lilobiagha Allahag samoro yamundi, Allah Elag wanaag seneraglapmundi, Allahri “Walinge,” seneropne aghabog ulamlulom. Allahri “Walinge” seneropne aghabog undo unulapmunba, nimiri “Malinge ulamangne lilobiagha Allah Elmabo taang,” aro el tanep,' aro ambarelamsisi.  
\v 21 Undo wene aro ambarelamsisinge sembe Yahudi nimiri Allahri Ae aramag agha saelbaneekti, “Ya'ag obukap,” aro uaneek.  
\v 22 Undo “Obukap,” aro uaneek aghana, Allahri samenag agha yeplamneoa wene babe piamnelba, wamna. Wamnari wene ane sekamnari, nari haingdi ipsinge nimi ologne nubunge ambarelamsin. Nari ambarelamsinnena, samen Allahri yubu silimu tiplamek nangdi lebekne mome toro pibekneapna Musa yubuap agha ambarelamsin. Yogne agha ambarelamsin kom.  
\v 23 Samenag Musaap Allah yubu silimu tiplamek nangapti ambarelamsiekne nenena, 'Allahri “Mog so'oag nimi taulbahilulam,” aro wepto poghol aogne poneko seklero tebaleba, Allahri nimi teptopne ua urobag agha El samenag kamag nembalul. Kamag nembaleba, elkabo Yahudi nimi elap nikag wamangne babe, Yahudi sisa kom nimi babe, “Allahri Na pere agha taulbahilul,” aro wepto poghol aogne ponekori tibin nenero ambarelamsilul,' aro ambarelamsiekpa, nen tipto ambarelamsin,” aro Paulusti ambatsiog.   
\s1 Paulusti Agripaag amberalmogti, “Yesusag sikne aro seneraglame,” aro ambarogha (26:24-32)  
\b  
\p
\v 24 Paulusti, “Undo-undo ulamsi,” aro pelebeltanan yubu ambarelamsiog abeneko, Festus ponekori yubu mikip uro lelamogti, “Paulus, an serem ulangkelba, lelamlam. 'Nia mangkina el tahane,' aro el talamlam aghana senaragna maiknori serem ulamlam,” seog.   
\p
\v 25 Wene seogpa, Paulusti samoro, “Na serem saelbanelba, lelamna kom. Festus nani walinge, na seneragna walinge sikne agha lelamna.  
\v 26 Nani Agripa, yubu sia lelamlamne, lelamnange tane an babe el wamlam. El wamlam ane sembe na log kom uro, nani, an whingag lag phoro lelamna. Na el wamnange ni lemnange tane, nani, an ekonne nhon lemna kom. Lemnange uro yabionge agha lemna. Nen tognorobag agha uro yabiogne agha lemna kom.  
\v 27 Nani Agripa, yubu sia lelamlamne, samen Allahri yubu silimu tiplamek nangdi lebekne sembe sik senelamlam, te? Na elwamnange, nani, andi babe sik senelamlam,” seog.   
\p
\v 28 Wene seogpa Agripari, “Andi senelamlamne, 'Wene abene, nari olog yubu lemnange ka'ebiagha Kristen nimi talul,' senelamlam, te?” seog.   
\p
\v 29 Wene seogpa Paulusti, “Na Allahag molona molbanun, wene babe to, olog wamebeba babe to, an aghabog kom. Anap ane nimi wamang nimiap sembe, 'Nari yubu ka'ebaneang nimi tane na saog taukang. Na saog taikpa, nimi tanena haing sae kaupto pipsiseng kom,' aro Allahag mololamna,” seog. \fig Paulus Festus whingag haing sae kaupto wamogha|alt="Paulus ada di depan Festus dengan tangannya terikat" src="Cn02037B.tif" size="col" copy="David C. Cook" ref="Pogsiognang 26:29" \fig*   
\p
\v 30 Wene aro Paulusti ambatsiogpa, nimi nubunge yubu sia leropne Agripaap, ilipsa'el Bernikeap, wamekag mog so'o saleropne Festusap, nimi ni sinap pukamekne tanekoap sekekti,  
\v 31 lanalamekti sin mo-mo yubu leple palamekti, “Nimi ene uaoa sunsunum uro kop aeag tolongoro babe, ya'ag onne babe, tamna orog wamla,” aba palamek.   
\p
\v 32 Wene aba palamekpa, Agripa ponekori Festusag ambarelamogti, “Nimi eneri 'Kaisarag pinun,' sele kom tanena kop aeag agha sae lopto lambitsebe. Aghana, eldamneri 'Kaisarag punun,' seo ane sembe Kaisarag pabukap,” seog.   
\c 27  
\s1 Paulus sae haing kaupto wamogha mag alip toman agha as nubunge Roma sip pabalameka (27:1-13)  
\b  
\p
\v 1 “Kaisar ya'aghag mog so'o Italia sip pululom,” aro wene Festusti seogti, Paulusap nimi yogne haing sae kaupto wamekne tanekoap Kaisar arukna yin saleropne nhon sina Yulius neneko saeag nembaog. El saeag nembahiogti, “Andi poa phululam,” aro ambarog.  
\v 2 Ambarekpa kabong nhon as Adramitium agha yaogne neneko “As Asia so'oag mag longorop mag laut abolag soropne tanekoag nhonag wa'albang, nhonag wa'albang uanun,” aro ulamogne nenekoag wa'iburi pibu.\f + \fr 27:2  \ft Yubu kiki “pibu” aro wamlange anena, mome anena Lukasti mome toro pibogti, “Nu nhon pibu,” seog.\f* Aristarkhus so'o Makedoniange ponekori aeag as Tesalonika agha yaogne ponekoap nhon pibu.  
\v 3 Mabubua kwelekaogpa, as Sidon saingnilingkibu. Saingnilingkiburi, yin saleropne Yulius ponekori Paulus o'ona sembaogti, “Ankaboag andi kwema sembamlama tatkukang bana kemeroa yabhululam,” seog.  
\v 4 As Sidon aneko laplobiagha mag alip toman agha palamububa, khao nu kabong palamubua whingag siba yalamogha sembe mag longorop mag laut kanero longorobag mog so'o Siprus khao maruktobag sip pibu.  
\v 5 Siprus so'oag anekoa mag alip toman aghabog palamubua, mog so'o Kilikia sirik sip mag longorop mag laut abol toman agha palamubu. Nen tipto palamuburi, mog so'o Pamfilia sirik sip mag longorop mag laut abol toman agha laploplo as Mira Likia so'oag saingnilingkibu.  
\v 6 As enekoag agha yin saleropne poamsiogne ponekori kabong nhon as Aleksandria agha yaog kabong eneko “Mog so'o Italia punun,” aro ulamogha ibog. Ibogti yalamubu kabong enekoag agha laplobiagha “Mog so'o Italia punun,” aro ulamog kabong enekoag enero poa tobongkipsiog.  
\v 7 Tobongkipsiogpa mag alip toman palamububa, khao kabong whingag siba yalamogti, yalamubuag sip ko'oro poa phinep ulamogne nenekori kabong alibag ik etbarero undo mabuburi, eraruk uro as Knidus peramag pibu. Khaori kabongag wamubunge “Pukap” senenag ko'oro pabhinep kom ane sembe Kreta khao maruktobag sip inagha yim Salmone amusogti lilirobag khao aingnirobag sip pibu.  
\v 8 Opsinep saog ulamogpa nemen-nemen eraruk uro yim Salmone amusoghag anekoa mag alip toman palamuburi, kabong nenne babe saingnil pirobag as Lasea peramag “Saingnil Piroba Walinge” si engeropne nenekoag saingnil pibu.   
\p
\v 9 Undo palamububa, “Italia sumene saingnilbukap,” sembabu sum eneko phibaogpa, Israel nimiri nubu sum kwaneng terop kom sum eneko\f + \fr 27:9  \ft Israel nimiri nubu sum kwaneng terop kom sum eneko “Mali-malia ulamapne Allahri kom nembalul,” alamek sum. Israel nimiri ik nubu sumeneko wal supnange anabi sa'onge anabiag khao li ulamogti, magti kabongag palamekne yamoro tapsinep ulamog li agha palamek.\f* uro libek. Undo libekpa, khao li taogne sembe “Magti yamoro tapsileag,” aro Paulusti yubu ambarelamsiogti,  
\v 10 “Nangkabo, nari kembanba, nu ina panne eraruk ulamlaba, iamnarina pukap kom. Kabongag poamaba babe, kabong babe, nu nimi ane babe opsinep iamna,” seog.   
\p
\v 11 Wene seog aghana, yin saleropne ponekori Paulusti lebogne sembe sik sembaog komdi, kabong ngaingeap, kabong u o'oropneapti leptekne agha sik sembaog.  
\v 12 Kabong saingnilingkirobag ane, “Khao li wamnual,” aro kabong saingnia unne eraruk wamog. Mag kanero longorop so'o Kreta so'oag as nhon sina Feniks wamogpa, kabong saingnirobag heng pulingkirobag sip tibogto, waneng sip babe, sirik sip babe tibogtobag wamogpa, “Khaori opsinep komag aingnirobag wamla,” sembaek. Ane sembe kabong porop nang tanekori, “Anea lambaberi, khao li wamlange nene as Feniks pina wamukap,” aro wene seek aghana nen nimi nhon-nhon nimiri saekag lebek kom.  
\v 13 “Lambaukap,” aro wamek abeneko phoana nemenag yangaro-yangaro mag longorop mag laut siba mog so'oag sip yalamog. Mag longorop mag laut sip agha phoana yangaro-yangaro yalamogpa, “Hae phoana aneri Feniks asag pabil philul,” sembaekti, “Kabong saelbamlul,” aro kirik simbuk saogha maghag pelengeroba aneko toro kabongag towalengkaekti, ag kabongag kerekaekpa, “Phoanari kabong ko'oro pabalamlul,” aro kerektop ag towalengkaekti, mog so'o Kreta mag abol peram toman kabongag palamap.   
\s1 Khao nubungeri kabongag agha maghag yamoro tapsinep ulamogha (27:14-44)  
\b  
\p
\v 14 Olog palamekpa, khao nubunge Krete so'oag ople siba mag longorop mag laut simbik pabirop khao yalamog.  
\v 15 Yalamogti nu palamubu kabong enekoag sibil alamog. Khao yalamogne neneko mikipti, “Mog so'o Krete mag abol toman palamukap,” aro ulamubu aghana, kabong aneko panne eraruk wamogpa, kabong aneko babe khao palamoghag sip mikip taog. “Elba eldi ualea,” aro pulobububa, mag longorop mag laut sip pabalamsiog.  
\v 16 Pabalamsiogti mag longo kanektobag as Kauda aneko maruktobag sip aneko pilphiogpa, eraruk uro kabong nubunge pomaghag sip kerektop kabong ologne haing kerekto kiliro toro pibubu.  
\v 17 Kabong ologne neneko kiliro towalengkaburi, nu pabalamsiog kabong aneko magti sibilalamleba, “Taongkaleag,” aro haing mikipne agha nu pabalamsiog kabong aneko wan-wanoro kaubek. Kaubekti, “Khaori mag longorop mag laut ingkisag Sirtis kirik a'angkeag meldal paphileag,” aro log senelamek. Log senelamekti, ag kabongag kerekaekne, “Phoanari ko'oro pabalamlul,” aro kerektop ag wamogne togto pibekpa, kabong aneko khao palamog ina nemen palamog.  
\v 18 Mabubua kwelekaogne neneko khao aneko olog paplamog komdi, opsinep ulamogpa, kabongag ikinne poameka taneko maghag talamsiek.  
\v 19 Mabubua ik wilindip sumeneko kabongag soroba taneko sinba kabong porop nimi tanekori maghag talamek.  
\v 20 Khao anekori unulamogpa, kabongag palamubunge nene heng babe imbrea babe olog ililamubu kom. Undo palamubua ik etpare imbrea babe heng babe ililamubu komdi, khao anekori sibil alamogpa, “Ot tebaukap aneog,” seneragamubu.   
\p
\v 21 Nimi taneko ik maikno kwaneng tero koma wamekpa, Paulus sin anabiag sekogti, yubu ambarelamsiogti, “Nangkabo, Kreta wamoboa nandamneri lemnonge a'undi ka'ebanohomba, nuri poamaba tologlamsibongeap, kabong kwerekto maghag talamobongeap unuahabe kom.  
\v 22 A'un nari wembahino yubu ka'ebaom kom aghana, wene nari wenelamsinne, wana aingniro wamlulom. Nu kabong eneag agha nu ni tebaukap kom, ot kabong aneogna loba talul.  
\v 23 Nari lelamnange nenena undo. Na inipnag lenda mamnaba, Allah naringe omeklamnange poneko Eldamneri arukna malaikat nanag poghol aoba, yaldi na peramag sekamla.  
\v 24 Yaldi, na peramag sekamlari, leplangena, 'Paulus, log sembaheng kom. An Kaisar whingag pululam. Allahri an o'ona sembangkelba, nimi anap kabongag wamlomne tane nhon babe tebalulom kom,' aro wene malaikat nenekori ambatnel.  
\v 25 'Tebalulom kom,' aro ambatnelba, nangkabo, wana aingniro wamsu. Nanag ni ambatnelne nene ni uro yabilulba, na Allahag seneraglamna. Ane sembe nangkabo, wana aingniro wamsu.  
\v 26 Tebaukap kom aghana kabong aneri nu mag longo kanektobag pabalamsileri, meloptaleba, kabong ane kolabalul,” aro Paulusti ambatsiog.   
\p
\v 27 Ik meke sumeneko khao anekori kabong ane pabalamog paghabog mag Adria laut longoropneag pabalamsiog. Pabalamsiogpa, inipna tomnusam talamogpa, inipnag kabong porop nimi tanekori, “Abolag payalamsil, te?” sembaek.  
\v 28 “Abolag payalamsil, te?” sembaekti, kirik haing kerekongkia peleng-peleng yalamekpa,\f + \fr 27:28  \ft Haing peleng-peleng yalameka aneko kekneba wamekti, “'Mag we wamla to, purun wamla to?' el taukap,” aro aneko kemelamekpa, “Abolag tan ual,” senelamek. “Kabong kirikag to'o tibil talamleri, palamleri nu opsileag,” aro ulamek.\f* mag longoroba we aneko haing kongkarekna yan kwagha tariro ingina teng nhon epto naul bare wamog. Nen olog pabalamsiogpa, pelengelamekpa haing kongkarekna yan kwagha tariro ingina teng nhon epto wilindi wamog.  
\v 29 “Kabong aneko kirik sildiag tipleag,” aro sin log lelem kirik simbuk tombare kabong pomaghag sip pelengkaekti, “Elemag kwelekale,” senero wamek.  
\v 30 “Elemag kwelekale,” senero wamekti, kabong porop nimi tanekori, “Magti kabong aneko kolabaleagti, kabong nubunge laplobiagha kabong ologne maghag pelengkaberi, mag alip toman tognoro pukap,” aro saekag lebek. Undo tognoro saekag lebekti, maneri ulamekti, seneraglamekti, “Ora nimi ekon wamukang. Kabong porop kom nimiri sembaukangnena, 'Kabong paiag sip saelba unna kirik simbuk whingag sip wamlange pelengelamang,' senelamikpa, mag alip toman kabong ologneag agha tognoro pukap,” aro kabong ologne kabong nubungeag wamogne neneko maghag pelengkaek.  
\v 31 Undo unulamekpa, Paulusti ipsiogti, el taogti, yin saleropne sikindoap ilipsaboap tibin nenero ambarelamsiogti, “Kabong porop nimi tanekori, 'Tognoro pukap,' aro ulamang aghana, kabongag wamna koma liloa piik tanena, nhon kamag wamlulom kom,” seog.   
\p
\v 32 Wene seogpa, kabong nubunge porop nimiri “Tognoro pukap,” aro ulamekne sembe, yin saleropnang tanekori el taekti, kabong ologne kabong nubungeag haing kerekameka taneko haing karepto maghag talopsiek. Kabong ologne maghag talopsiekpa, kabong nubunge porop nimi tognoro piek kom.   
\p
\v 33 Kwelekanep peram Paulusti “Kwaneng tululom,” aro wenelamsiogti, “'Khao kom taho,' senero wamomdi, ik mek bare kwaneng ten koma wamom.  
\v 34 A'un wali kamag wamlulomba, kwaneng a'un samenag tululom. A'un ni ane wamlomne a'undi usoghag hong pongoropne hong kiki nhon seknagha timbalul kom,” aro ambatsiog.   
\p
\v 35 Wene aro ambatsiogti, Paulusti kwaneng roti tobogti, sin ni wamekne whingag agha Allahag “Nani, wah, walia tatsilam,” aro lelamogti, khepto-khepto tatsiogti, Paulus samenag teog.  
\v 36 Sin wana ikin wamsiogne wana aingnibahiogpa, sin babe awi yeng uro kwaneng telamek.  
\v 37 Nu kabong enekoag nimi yalamubungena, nimi teng sa'obare eptopneap (276) ane yalamubu.  
\v 38 Kwaneng tiburi, mon tahiogpa, kabongag kwaneng roti sumbaneba gandum wana poamekne taneko “Kabong keyagman talul,” aro maghag talolamsiek.   
\p
\v 39 Kweleklamogpa kabong porop nimi tanekori tilamekpa, mog so'o kirik a'angkea ingkis sameptopne nhon tibog aek. Kabong porop nimi taneko mog so'o ene sin babe ekon aghana, kabongag agha tibogaekag aneko “Tibil pukap,” sembaek.  
\v 40 Anekoa “Kabong saelbamlul,” aro kirik simbuk pelengeroba taneko haing kaongoro maghag talopsiek. Haing kaongoro maghag talopsiek abeneko kabong u o'oroba “Nhonag sip pabileag,” aro kerektopne toro pibekti, “Pulul,” senenagne u o'obaek. Phoana mag laut longorop mag siba yalamogpa, “Mog so'o ingkisag tibil pukap,” aro ulamekti, ag kabongag kerekaekpa, “Phoanari ko'oro pabalamlul,” aro kerektop ag kabong whingag sip towalingkibekti, palamek.  
\v 41 Mag ingkisag palamek aghana, kabong eneko kirik a'angkeag malukaogpa, kabong whingag sip kirik a'angkeag wereloptaogpa, lebe senep kom uaog. Lebe senep kom uaogpa, pomaghag sipna mag kola'epto yalamogti, olamogne nenekori kolabaog.  
\v 42 Kolabaogpa, yin salerop nang kabongag wamek nang tanekori nimi sae kaupto pabalamsiek nimi taneko “'Maghag agha ya'aro abolag piikti, merebaikag,' aro opsukap,” aro ulamek.  
\v 43 Undo unulamekpa, yin saleropnang sikindo Paulus pabalamogne ponekori “Paulus obikag,” aro “Pelebanun,” aro irikahiog. Irikahiogti ambarelamsiogti, “Mag alip toman ya'aro pirop nimi samenag maghag taptaikti, ya'aro abolag pukang,” seog.  
\v 44 Mag ya'aro panne ekonnena kal la'asi agharo, kabong kwerektoba agharo salero mag alip toman agha mag abolag undo piburi, nimi nhon babe tebaek kom.   
\c 28  
\s1 Paulus Malta so'oag wamogha (28:1-10)  
\b  
\p
\v 1 Magti opsiog komba, mag alip toman agha mag longo kanektop so'oag abolag piburi, wamububa Malta nimi tanekori, “Malta so'oag yalom,” aro ambatsiekpa, eltabu.  
\v 2 Malta nimi wamek nimi tanekori nu sembe o'ona maikno sembahiekti yeplamsiek. Mag telamogti, sondi habuklamububa, nimi tanekori auk lolbaek.  
\v 3 Auk lolbaekpa, Paulusti kal toro polbaogti, aukag tabogpa, auk ogti phae nhon lambaogti, Paulus saeag si sabog.  
\v 4 Saeag si singkamogpa, Malta nimiri kembaekti, “Nimi ene mag alip toman yalamlaba, magti opla kom aghana, phaeri si saplaba, tebalul. Nimi nhon samen opsiog tiog ane sembe nimi ene wamnep kom. Wene malia uaonge sembe memari lunuro yingkina elba opla,” alamek.   
\p
\v 5 Wene alamekpa, Paulusti phae aneko saeag agha pelebom agha aukag tabog. Phaeri si sabog aneko nona babe olog nobaog kom.  
\v 6 Phaeri si sabog aneko sembe nimi wamek nimi tanekori, “Paulusti sae usa olog sae babe nobalul to, tepna babe tebalul to?” aro kemero wamek. Sindi wene sembamekti, kemero wamek aghana, sindi seneragamekti “Ualul,” sembamekne olog uro yabiog komba, sindi el sembe, “Elna nimi kom. Anena mema,” senelamek.   
\p
\v 7 Malta so'oag wamubua peramag so'o enekoag mog so'o ngainge nubunge mag longo kanektop so'o saelbamogne sina Publius wamog. Publius ponekori nu eldi wana wali uro aeag topsiogpa, ik wilindi wamubu.  
\v 8 Wamububa Publius ili nong boboap, niknaap, ti haoapti niklamogti, aeag malamog. Malamogpa Paulus aeag wa'iogti, sae usoghag pairo Allahag molona lebogpa, Publius ili wali taog.  
\v 9 Neneko wali nembaogpa, nimi orange nikna niklamekne mag longo kanektop so'o enekoag wamekne yalamekpa, wali nenelamsiog.  
\v 10 Wali nenelamsiogpa, awi maiknoro kiplamsiekti, sindi nu sembe wali sembamsiekti, “Mag alip toman kabongag agha palamikti, tukang,” senena sindi nu sembe wero palilamsiek.   
\s1 Paulus as Roma piogha (28:11-16)  
\b  
\p
\v 11 Mag longoro kanektop so'o Malta wamubu so'o tanekoag kabong as Aleksandria agha yaog kabong nhon wamogpa, khao li taogpa, Malta so'o kabong pabalingkirobag aneko haing kerekaekti, ta'ap wamog. Wamogpa, so'o anekoag yabuburi, wal wilindi wamubua khao aingniamogpa, as Aleksandria agha yaog kabong enekoag waelbabu. Kabong waelbabu kabong enekoag mema phende Kastorapna Poluksap\f + \fr 28:11  \ft Yunani nimiri mema phende sina Kastorap Poluksap sembe, “Mag alip toman palamebeag yepsurukang,” aro kabong eneko sobaek.\f* usog yame sunuro kabong whingag sip sobaekpa, kabong enekoag yalamubu.  
\v 12 Yalamuburi, as Sirakusa aneko yingkina ik wilindi wamubu.  
\v 13 Aneko ik wilindi wamubua mag alip toman palamuburi, as Regium yabu. Mabubua kwelekaogne neneko phoana wali uro yalamubuag siba yangaro yalamogpa, ik nhon ningki palamubua, as Putioli yabu.  
\v 14 Putioli aneko pibuba, nungkabo Yesusag “Sikne” aro seneraglamek nimiri, “Nunap nhon wamukap,” aro nunag molbahiekpa, ik saek bare sinap nhon wamubu. Aneko wamubua nen as Roma palamubu.  
\v 15 Nungkabo Roma nimi Yesusag “Sikne” aro seneraglamek nimiri nu yalamubunge sembe yubu ka'ebaekti, nu wamubuag yaek. Roma agha nu wamubuag yalamek nimina, as si Pasar Apius wamubuag yaekpa, nen tipto palamuburi, as si Tres Taberne wamubuag babe nunag yalamek. Sin nunag yalamekne sembe Paulusti kembahiogti, wana aingnibaogpa, “Allah wah, Nani,” alamog.  
\v 16 Nu as Roma aneko piburi, Paulus kop aeag tolongoro koma el mo aeag wamogpa, yin saleropne nhondi yae wamog.   
\p
\v 17 Wamubua ik wilindi wamuburi, Paulusti Yahudi nimi sikini yabo yopsiogpa, poloro winiptaek. Poloro winiptaekpa, Paulusti lelamogti, “Nangkabo, nu Yahudi nimi sembe suknuna suknubano kom. Nu Yahudi nimiri ul palamapne saelba uropne irikna sembe babe phibano kom, aghana na Yerusalem wamnoba saelbaneongdi, Roma nimi saeag nembaneong.  
\v 18 Saeag nembaneongdi, nanag tam pibongne sembe Roma nimiri kembaongba, tam nari unne sunsunum uro tam ikinne na tepnange palinne orogti, 'Sae libukap,' seong.  
\v 19 Undo wene seong aghana, Yahudi nimiri, 'Sae haing sae lopto lambaheng kom,' seongba, nari ambarelamsinori, 'Kaisarag pibeba, Yahudi nimiri tam sumbaneongne sembe Kaisarti karebalul,' seno. Wene senonge nene, 'Yahudi nimiri ulamangne sembe tam Kaisar whingag ambarel pinun,' aro lepno kom.  
\v 20 Ane sembe, 'A'unap haiptaberi, a'unag yubu lemnun,' aro yopsin. Nu Israel nimiri nang-nang alamapne neneko sembe na sae kaupto wamnange nene ililamnelom,” aro ambatsiog.   
\p
\v 21 Wene aro ambatsiogpa, sindi elag yubu lelamekti, “Nun nungkabo Yudea wamangneri mome an sembe pibongne nunag yao kom. Nungkabo Yahudi nimi yogne babe nunag yaongneri andi malia ualumne sembe tam nhon babe ambatsiong kom.  
\v 22 Yahudi nimi tane yaong nimiri an sembe nunag ambatsiong kom aghana, nu ka'elamapne andi ambarelamsilam yubu ene sembe nimi tala-talari, 'Ekel uro seneragtop yubu ina ambatoba,' alamangba, ka'elamap. Ane sembe, andi seneraglamlamdi, ulamlamne nene nuri ka'ebaukapti, ik nhon sum ambatsululam,” seek.   
\p
\v 23 Wene seekti, “Ik nhon longop taberi, yubu tam kembaukap,” aro Paulusap sinap yubu saekag lebek. Sumeneko sum Paulus ua ulamoghag aneko nimi maikno elag yaekpa, lukunap Allah yubu alnibaogti, ambarelamsiog paghabog ae sin taog. Ambarelamsiognena, samen Musari, “Undo-undo ualulom,” aro mome toro pirop yubuap, Allahri yubu silimu tiptop nangdi mome toro pibek yubuap agha kiliro ambarelamsiogti, “Allahri, 'Nimi ni mog so'oag nimi saelbahinun,' seogne Yesus sembe lelamogpa, mome toro pibek,” aro wana heklamsiog.   
\p
\v 24 Wene aro wana heklamsiogpa, nimi nenneri Paulusti ambatsiogne sembe “Sik lepla,” aro seneraglamekpa, nimi nenneri “Orolena lepla,” aro eldi yubu seneraghek kom.   
\p
\v 25 Wene aro seneraghek komne sembe Yahudi nimi taneko yubu leldalamekti, anam lamban komag sindi seneragna wana taongkwahiogne kembahiogti, Paulusti yubu kiki nene ambarelamsiogti, “Samen Allahri yubu silimu tiptopne Yesayaag Allah Eldamne Yame Walingeri sikne aghabog lebog. Sik andagha lebognena, yubu tipto a'unisag yabo Yesayari ambarelamsiogti,   
\pi1
\v 26-27 'Israel nimi taneko usog mikip nimi talamek. Sin ao leptangkamekti, haing babe uptangkamek. Sindi ao leptan koma babe haing uptan koma babe haingdi ipnep, aori ka'ebanep, wanaag babe seneragnep tanena Nadamne Allahag samoro yaukang. Nadamne Allahag samoro yahengpa, wali nembahisene. Aghana usog mikip talamekne sembe Israel nimi eneag pimendi, lelapmendi, “A'undi sop-sop 'Ka'ebahane' aro a'ori ka'elamlulom aghana, wanaag agha ka'ebalulom kom. 'Ipsene' aro haingdi ililamlulom aghana, wanaag agha seneraglulom kom,” aro ambatsululam,'\x - \xo 28:26-27  \xt Yesaya 6:9-10\x* aro Allahri ambarogne Yesayari sik uro mome toro pibog.   
\p
\v 28 Allahri a'un Yahudi nimi sembe 'Ka'ebaukang kom,' aro ambarogne sembe 'El wamlulom,' aro tibin nenero ambarelamsin. Allahri samenag 'Mog so'oag nimi taulbahinun,' aro salag pibognena, 'Yahudi sisa kom nimi ambarel palamsululom,' aro yubu ene poglamsiog. Poglamsiogpa, wene ambarelamsiapba, sin wali ka'elamukang,” seog.  
\p (  
\v 29 Wene aro ambatsiogpa, Yahudi nimi yaek nimi taneko palamekti, sin mo-mo yubu leldalamekti, yubu leple palamek.)   
\s1 Paulusti as Roma Allah yubu ambatsiogha (28:30-31)  
\b  
\p
\v 30 Piekpa Paulus neneko nimiri ae agha kamna toro ua ulamoghag anekoag heng kun phende wamogti, nimi elag yalamekne sembe wana yeng sembamogpa, nimi elag maiknoro yalamekpa, wali uro kiplamsiog.  
\v 31 Wali uro kiplamsiogti, hengkun phende as Roma wamogha log kom uro “Allahri, 'Nimi ni mog so'oag nimi saelbahinun,' seogne anena Eldamneri 'Saelbahimendi, taulbahilulam,' aro wepto poghol aogne Yesus sembe lelamog,” aro ambarelamsiog. Ambarelamsiogne nimiri iriknange orog wamogpa, to'onna kom uro yubu walinge Yesus sembe ambarelamsiog.