\id 2TI - Kosarek \h 2 TIMOTIUS \toc1 2 TIMOTIUS \toc2 2 TIMOTIUS \toc3 2Tim. \mt1 2 TIMOTIUS \c 1 \p \v 1-2 Timotius, naba name o'ona sembangkenne! Na Paulusti mome ane an sembe palilamna. Nari sembamnange Nuni Allahap, Allahri Yesus wepto “Nimi so'oag nimi taulbahaileri saelhailul,” aro poghogne nenekoapti, “Anag o'ona senero yeplangkirikti, walia ulangkirikti, aingniangkurukang,” aro molona mololamna. Allahri seneropne agha, Yesus nu talulamsildi, saelbamsilne nenekori na sekitneori wepto pogneoba, Yesus yubu walinge ambarelamsinne wamna. Yubu walinge ambarelamsinne, Allahri yubu salag lebogne neneko sunsunum uro Eldi wepto poghogne Yesusti nimi kamag nenehiropne poneko sembe ambarelamsindi, mome ane an sembe palilamna. Nu kamag uro wamapnena, Yesus “Nimi mog so'oag nimi taulbahaileri saelbahailul,” aro Allahri wepto poghogne neneko sembe “Kristus” alamap. \f + \fr 1:1-2 \ft Samenag Yesus anam mog so'oag yan komag agha, Yahudi nimi sembe Allah yubu silimu tiptopnangdi “Allahri wepto poglenge nhon amik yaleri, mog so'oag nimi saelbamsilul,” aro mome toro pibek. Allahri “Saelbamsululam” aro wepto poglenge neneko sembe Ibrani yubuag “Mesias” aro lerop aghana, Yunani yubuag “Kristus,” aro lerop (Sepna 2:1-2 neneag kembanep). Amik Yesus mangaptaog sumeneko Yesus Kristus engero pibog kom. Yesus anam teban koma, nimiri el sembe, “Kristus to, kom to,” aro haildalamek (Matius 16:13-17ap, 26:63ap kembanep). Yesus tebaogti, kamag taogpa, el neleptopne Petrusti el sembe tibin nenero ambarelamsiogne nene agha, “Yesus Kristus” aro nikag engero yabiog (Pogsiognang 2:36ap, 3:6ap, apna 4:26 kembanep).\f* Yesus Kristusap ma'altalamapne nenekori nu kamag nembamsilba, kamag wamap sembamnari, mome ane an sembe palilamna. \s1 Paulusti Timotiusag “Ali semban koma nari yubu tipto ambarelamsululam,” aro ambarogha \p \v 3 Samen nunisa yabo Yahudi nimiri Nuni Allah yepto tolamekti omeklamek saog uro, naba na wanaag “Allahri senenne sunsunum uro ulamna,” aro seneraglamnari, nari babe Allah yepto tolamnari omeklamna. Nuni Allahag molona mololamnari, sinag kweleknag an sembe seneraglangkendi, Allahag “Naniong, Andi naba name yeplulam,” aro Allahag moloro omeklamna. \v 4 Nu koloptanumu sumeneko an engkalumba, hail mag timbaghaeogne seneraglamnange nene sembe “Anap haiptahanemeba, na wana awi sirik uanoho,” senelamna. \v 5 An sembe ekon tan koma seneragamnangena, andi anau Loisap, anin Eunikeapti sam Yesusag “Sikne” aro seneraglamdek saog uro, andi babe Yesusag “Sikne” aro sik tapto seneraglamlam. \v 6-7 Ane sembe nari anag yubu ambarelangkenne ulamlulam. Samen Allahri an Timotius sembe, “Sae yan taleri Nari awe tolamlul,” sembaogpa, nari sae andi usoghag sae pipkeno pere agha Allahri anag mikipne pipkeo. Allahri nunag mikipne palilamsilne, Eldi “Log sembaukang” aro palilamsil kom. Eldi nunag palilamsilnena, “Mikip wamikti, o'ona seneldalamikti, wana hekto wamukang,” aro nunag palilamsil. Allahri mikipne auk pog saog uropne anag pipkeo ane sembe, nimiri “Auk pog nubu talul,” aro yae piro ulamang saog uro, andi babe “Allahri mikipne auk pog saog uropne nanag pipneonge oro niknibaneagti, nubu nembanun,” aro yae piro up tangkamlulam. \p \v 8 Mikipne pipkeo ane sembe, Yesus nu Saelba uahiropne poneko sembe ali semban koma lag phoro ambarelamsululam. Na babe yubu walinge Yesus sembe ambarelamsinoba, nimiri na sae kaupto kop aeag tobongkimneong aghana, wamnange sembe babe ali sembaheng kom. Nari yubu walinge Yesus sembe yubu ambarelamsinne sembe seklelamna\f + \fr 1:8 \ft Paulusti, “Seklelamna” seogne sembe Lukasti mome toro pibogpa, mome toroba Pogsiognangdi Ulameka sembe pibogne pasal 22 agha 28ap kembanep.\f* aghana, Allahri an seklelapmenag mikip nenelangkeleba, andi babe Yesus yubu walinge ambarelamsululam. \v 9 Nuni Allah ponekori nuri mali-malia ulamubunge sembe ya'ag opsinep aghana, nu mog so'oag nimi sembe “Walia uahinun,” senelamsildi, “Nari mabo taikti, Nari senenne sunsunum uro ulamukang,” aro yoplamsil. Yoplamsilne agha nu Yesusag “Sikne” aro seneragtop nimi talulamsil. Nu yoplamsildi, talulamsilnena, nuri walia ulamapne agha yoplamsil kom aghana, Elba Eldi wana walingeag agha, “Undo uanun,” sembaogti, yoplamsil. Eldi anam imap so'oap sumban komag agha El el uro wamogti, wana waliri, “Nari wepto pognenge Yesus Kristus pere agha Nari mabo nembahinun,” aro karepto pibog. \v 10 Yum-yum samenag karepto pibog aghana, wenena Allahri Yesus Kristus wepto “Mog so'oag nimi taulbahilulam,” aro poghogpa, yaog andarina Allahri wana walingeag agha “Walia uahinun” senelamsilne lag taog. Yesus Kristus “Mog so'oag nimi taulbahinun,” aro yaogne pere agha nimi tepna mikipne neneko kom nembaog. Nimi tepna mikipne kom nembaogpa, nimi etneri yubu walinge Yesus sembe sik seneraglamleri, Yesusag wana piamle tanena ya'ag kamag wamleri, tebalul kom. \v 11 Yesus yubu walinge ambatsinne sembe, Allahri na toro sekitneoba Yesusti na wepto pogneoba, na nimi amohinne tanori, lag phoro ambarelamsin. \v 12 Yesus sembe yubu ambarelamsinba, nimiri “Karong,” aro malia ulamneangba, seklelamna. Seklelamna aghana, na sik uro naringe wana Yesusag paiamnari seneraglamna. Na el wamnangena, “Nari wana Yesusag paiamnaba, Eldi na yae wamnele paghabog nen phendep sum 'Tam karebanun,' aro yalul,” senelamnari seneraglamna. Ane sembe wene seklero wamnange sembe ali seneldalamna kom. \v 13 Nari sik uro an yubu walinge ambatkehinge sunsunum uro sik wali uro seneragto saelbapmendi, tipto ambarelamsululam. Ambarelamsimendi, Yesusag “Sikne” aro seneraglapmenba, Yesus Kristus nenekori nimi o'ona senelamsilne agha o'ona senero ambarelamsululam. \v 14 Nari yubu walinge Yesus sembe sik uro ambarelangkenori, andi saeag nembaghenoba, nu Yesusag seneragtop nimi sembe Allah Eldamne Yame Walinge nu nongag ua ulamla.\x - \xo 1:14 \xt Pogsiognang 2:38; Matius 3:11; Yohanes 14:16-17 \x* Allah Yame Walinge nenekori yeplangkeleba, sik yubu anag ambatkeno yubu eneko yae paiapmendi,sik uro tipto ambarelamsululam. \p \v 15 An elwamlamne Asia so'oag wamang nimiri na laplopneong. Figelusap Hermogenesapti babe laplopnerong. \v 16 Laplopnerong aghana Onesiforusti ik etbare na wana awi sirik nenelamneo. Ora nimiri na sae kaupto kop aeag pimneongbog, wamnoag na sae kaupto wamnonge sembe ali sembao komdi, na wana awi nenelamneo. Unu aneoba nari sembamnange, nu Taluro Salelamsilne ponekori Onesiforus ponekoap el ae lomag nimiap o'ona senero yeplamsilul. \v 17 Roma wamnoag babe Onesiforus poneko piori, na elamneori, na wamnoag imneoba haiptanomo. \v 18 An babe elwamlam, eldi na Efesus wamnoag maikno yeplamneo. Maikno yeplamneoba, nu Taluro Salelamsilne ponekoag molbarelamnange, nia mangkina Saelba Uahiropne ponekori nimi ni sembe tam karebale sumeneko, “Onesiforus sembe yareag sembalulam,” aro molbarelamna. \c 2 \p \v 1-2 Timotius, naba name! Nari yubu samenag sik uro amoro ambatkihiba, Yesus Kristus ponekori anag wana wali senelangkeldi, mikip nembaghelul. Ane sembe, ali semban koma log sembaheng kom. Yesusag seneragto winirop nimi anabiag agha sin kembahimenba, wana hekamikti, sol wali, wali uro nimi ambahinep nimi wamikpa, ipsimen tanena sin anabiag agha kabuni etbare wepsululam. Wepsimendi, amohiro ambatsululamnena, nari samenag nimi maikno whingag agha nari Allah yubu amohirop yubu ambatkihiba, ka'ebalum yubu eneko, nen andi tipto wepsimen nang enekoag amohiro ambatsululam. Ambatto sindi sa'oag paiapmendi leplulamnena, “Nari sik uro sol wali uro a'un ambarelamsinne sunsunum uro nen tipto sik uro nimi ambarelamsululom,” aro sindi saeag nembalulam. \v 3-4 Nu wene seklelamap saog uro andi babe “Yesus sembe nelepto seklebanun,” sembamendi, kahepto wamlulam. Likiptop yubu agha yin saleropnang sembe sunumna nhon sumbanun. Yin saleropnang “Mal tabaukang” aro pogna pogsiropba, sa'a nia mangkina eldamneringe sembe seneragna koma “Na saelbamnelne poneko wana awi nembanun,” senelamla. Andi babe yin saleropnangdi seneragtopne saog uro sunsunum uro, “Na saelbamnelne Yesus poneko wana awi nembanun,” aro seneraglapmendi, seklenne lag talamlea babe kahepto wamlulam. \v 5 Sunumna nhon nen sumbanun. Nimiri lelamnari, “Mipsukaptina a'un merero pimunne etne samenag talul,” aro wene senep. Wene senepti sinag yubu ambarelamsindi, “Inaag merero palapmunna ina wa'aghag sekel pululom,” sendi ambatsinep. Aghana nimi nhondi ina wa'ag lahabandi, nhonnag sip tan tanena, samenag talenge babe, nimi eneko sembe mikipne senep kom. Samenag yubu karepto pimnange nelebandi, sam sekel pin nimi eneko sembe el agha mikipne senep. El sam sekel pile nimi eneko sembe kwiria elektoba walinge nhon eldi usoghagag elekirukang. \p \v 6 Nen sunumna nhon ambatkenun. Awe sae mikip uro wero meltorop nimi eneko eldamne saeri samenag yongoro aleri, teleba, nimi orange amik tukang. \v 7 Nari ni lero palilamnange nene sembe imag agha nu Saelbamsilne ponekori elnenelangkeleba, an eltalamlulam. Ane sembe, nari ambatkenne sembe seneraghal pina eltalulam. \p \v 8 Ekon tan koma el uro wamlulamne ane: Yubu Walinge nari ambatto poa tongolamsinnena Allahri samenag salag pibognena, “'Mog so'oag nimi taulbahimendi, saelbamsululam,' aro Nari weptopne nhon pogneba, Daudti liksiog nimi anabiag agha lag talul,” seog. Wene seog nimi eneko sembe “Kristus” alamap. Seogpa Yesus Daudti liksiog nimi anabiag agha lag taogti, tebaogti, kamag taog. Undo uro yabiogpa, yubu walinge Yesus Kristus sembe ambatto poa tongolamsin. \v 9 Yesus yubu walinge ambatto poa tongolamsinne neneko sembe na seklelamnangena, na nimi yonge agha ulo saog uro nimiri saelbaneongdi, besi agha sunurop haingdi na sae kaupneong. Sae kaupto wamna aghana Allah yubu nimiri haing sae kaupnep kom. \v 10 Ane sembe ni ane seklelamnange wana paiamnari, ulamna. Seneraglamnangena “Allahri samenag agha wepsiog nimi ni Yesus Kristus sembe ka'ebaikti, Yesusap ma'aptangto sik senelamikpa, sin babe taulbahilul. Taulbahileba, Allah Eldamne imang warero ya'ag ua uropne nenekoag nhon wamukap,” aro seneraglamnari, Yesus sembe ambarelamsin. \v 11 Yubu kiki nene Yesus sembe sikne agha lebog, \q1 “Nun agha Elap tebabe pagha tanena, \q2 Elap babe nhon kamag wamukap. \q1 \v 12 Nun seklelamebenge wana paiameberi ulamebe tanena, \q2 El umag nhon wameberi, Elap nhon yubu sia lelamukap. \q1 Nuri El sembe ekonne alamebe tanena, \q2 Eldi babe nu sembe ekon sihilul. \q1 \v 13 Yesus Eldamne wanaag agha “Undo unuanun,” seogne sembe nimi haing Eldi kunulamsil kom. \q2 Ane sembe, nuri El sikne aro lelamebenge kom nembabe tanena, \q2 Eldamneri nunag lebogne sik uro yabilul.” \p Yubu kiki Yesus sembe samenag pibogne nene sikne andagha lebog.\x - \xo 2:13 \xt Markus 8:34-38; Matius 16:24-27\x* \s1 “Allah sembe awe torop nimi undo wamleba, Allahri el sembe walinge sembalul,” aro ambarogha \p \v 14 Ni lelamnange nene sembe nimi ni ambarelamsilulam. Allah whingag agha sin wembamsimenba, sin mamun yubu kiki lelekto waptangtop yubu loba neneptaheng kom. Undo unulamikne neneri nimi yepsinep komdi, waptangtop yubu ka'erop nimi babe loba neneptaukang. \v 15 Anna, andi nia mangkina ul palapmendi, “Nari Allah yubu sik urop yubu eneko wali uro seneragto kareplamnari, sik uro ambarelamsinba, Allahri kemelamnel,” aro tolamlulam. Undo tolapmen tanena Allahri andi ul palapmenne ililangkeleri, Eldi an sembe, “Nari awe wali uro tolamla,” sembangkelul. Undo sembangkeleba, andi ali semban koma tolapmendi, Allah whingag wali wamlulam. \v 16 Nimiri yubu kamolange lero Allahri yubu sunsunum urop kom yubu lelamik tanena undop yubu lelamangne agha koloptangkamlulam. Yubu undo lelamikpa, nimiri nelepto ka'elamikpa, Allahri senenne wailag nembi agha yo maikno tangto ulamukang. \v 17 Nimi taneri undop yubu nimi ambarelamsiangne meneng nimiag singina singihinne saog talul. Sin neraneko lelamang nimi anabiagna Himeneusap Filetusap wamdang. \v 18 Sin abenekori ina sikne laplobi agha lerekarongdi, orolena yubu ambarelamsirangdi, yubu sik uro seneragtop nimiri seneragna loba nenelamsirang. Nimi teptopne nen kamag tanepne sembe ambarelamsirangne, “Yesusti Elag seneragtop nimi teptopne kamag nembahiori, wimbahiobog, tane wamap,” aro ambarelamsirang.\x - \xo 2:18 \xt 2 Tesalonika 2:2\x* Undo ambarelamsirangne sembe Yesusag seneragtop nimi wana ophag alolamsiangba, nimi etbare, “Tebaberi, kamag taukap kom,” aro Yesusag seneraglamongne laplopsiong. \v 19 Undo wene aro ambarelamsiang aghana, Allah yubu yangan kirik meptangtop kirik lebe senep komne saog wamla. Mebog kirik eneko alibag yubu sikne mome toro pibogne lilimna ane: “Nuni nu Saelba Uahiropne ponekori Eldi mabo elwamsildi wamla,” ane sembe, “Nimi etneri, 'Nana, nu Saelba Uahiropne ponekoringe wamna,' alamle tanena, nimi eneko malia uropne sae lililamlul,” aro mome toro pibog. \p \v 20 Ae walinge nubu uro sorop ae eneko lomag mag ma'i tero tena emas agha to, perak agha to sunuropne babe urop. Mag ma'i tena kal agha to, so'o agha to sunuropne babe urop. Aghana mag ma'i kal agha to, so'o agha to sunuropne neneko songag pil piropne aeag nen samoro pailanep komne babe urop. Emas agha to, perak agha to sunurop mag ma'i eneko nimi nubu nimi tebatsinepba, tenep mag ma'i, “Na omekto sembe tebatneang,” senen mag ma'i solabaleag aro maupto paia urop. \v 21 Allahri ae lomag urop nimi babe nhon sao nhon sao wamang. Yesusag seneragtop nimiri wanaag mali-malia senelamlari, ulamla tanena, el Saelbamlange ponekori nimi eneko sembe mali sembalul. Aghana mali-malia ulamla nimi enekori Yesusag seneraglamleri, malinge eldi wanaag wamlange sae liliro a'eleptaleba, el Saelbamlange ponekori nimi eneko sembe “Naringe tal,” sembalul. El Saelbamlange ponekori nimi eneko sembe, “Nimi eneko Naringe taori, wali-walia ulamlaba, nimiri kembaikti, Na sembe omekto wali sembanukang. Nari awe tomnepne sembe Nari arukna enekori 'Tomnun,' aro wea ulamla ane sembe, nimi eneko sembe na yeng sirik,” sembalul. \p \v 22 Name Timotius, kabuni mabori seneragna sunsunum uro “Kelene naringe kom aghana saelbahane,” aro andi seneragna ene andi wanaag waelbale tanena, elem uro togtangto koloptaongom sululam. Togtangto koloptaongom sululamba, nimi nu Saelba Uahiropneri seneragna sunsunum uro seneragtop nimi, Yesusag wana paia urop nimi enekoap nhon ma'al dalamlulom. Ma'al dalapmundi, seneraglapmundi, “Yesus poneko sikne wamla. Eldi wana yeng neneropne eldalameberi, sunsunum uro ulamukap,” aro o'ona seneldalamlulom. O'ona seneldalapmundi, nimiap aingniro wamlulom. \v 23 Ekon urop nimiri, “Yubu nembahabe,” aro yubu soro kware aro lelamik nimiag nelebahaiseng kom. An el wamlamne, ekon urop nimiri yubu soro kware aro lelamikneag agha nimiap-nimiap waptangtopne maikno waelbanep. \v 24 Yesus nu Saelba Uhiropne sembe awe torop nimina nimiap waptangto yubu neneptanep kom. El neneko tam samenne wanaag paia urop komne wamleri, nimi ni sembe “Nangkae,” aro ulamsileri, nimiag wali uro amoro el nenelamsilul. \v 25 El nenekori eldi yubu ambarelamsilba, nimiri eldi yubu ka'eban koma yubu leptangto ulamangne sembe sinag yo pimna koma, wana mamnaba ambatto el nenelamsilul. Sinag ambatto el nenelamsilenge, “Allahri sin sembe lag nenelamsileba, mali uropne lilobi agha Allahri seneragna sunsunum uro seneraglamikti, sikne el taukang,” aro el nenelamsilul. \v 26 Eldi ambatto el nenelamsileba, eldi yubu ka'eban koma yubu leptangto ulamang nimi sembe, phia sikini nubungeri wana toro sae kiliro sae kaubamsin nimi wamnep. Sindi unulamangne anena phia sikini nubungeri, “Undo-undo ulamukang,” senenne sunsunum uro ulamang. Phia sikini nubungeri wana torop nimi sembe nu Saelba Uhiropneri awe torop nimi enekori, “El nenelamsineba, el taikpa, phia sikini nubunge nenekori selbel weamsinag agha sae loptangka wamukang,” senelamsiso. Undo senelamsisori, waptangto koma ambatto el nenelamsilul. \c 3 \s1 Imap so'oap komoptanep peramag uro yabilulne sembe ambarogha \p \v 1 Yesus nen samoro yalul sum eneko peram tale tanena, tam eraruk sirikne nhon saog nhon saog lag talul anekona an el uro wamlulam. \v 2 Undo uro yabinep sumeneko nimi wamikne tanekori sindam nimi sembe agha seneragtangkamukang. \li1 Kal ma'aldi haing surubahilul. \li1 “Na paliag wamna,” aro metmereng alamukang. \li1 Pamag agha minimna yubu minilamukang. \li1 Nimiag san tiliplamsukang. \li1 Sikini sikininag yubu ngelde arop yubu agha lelamukang. \li1 Nimiri sinag mo tarelamsiikne sembe babe teba'en aro ingkisaplobukang. \li1 Allahri senenne sunsunum uro seneraglamukang kom. \li1 \v 3 Nimi orange sembe o'ona senelamsukang kom. \li1 Nimiri sinag malia uahiikti, yaikti, malia uandi tam orog nembaukap aro uaikpa, kom nembaukang kom. \li1 Nimiag minirop yubu loloro ambarelamsukang. \li1 Sindamneri wana aignibanep koma wamukang. \li1 Yonge aghabog ulamukang. \li1 Walinge sembe karong sembamukang. \li1 \v 4 Sikinkabo sembe wanaag agha aisanang nenelamsukang. \li1 We uro seneragna koma ulamukang. \li1 Sindam nimi omektangtopneri nenek salehirop nimi saog neneldalamsukang. \li1 Allah sembe yeng semban koma “Uahabe,” senenne agha ulamukang. \p \v 5 Nimiri sindi ulpalamikne kembiag agha “'Allah yeng nembaukap,' aro unulamang,” sembanep aghana, sin nimi tanekori Allahri senenne sunsunum uro ulamang kom. Allahri senelamlange, “Undo unulamikpa, mikip nembahinun” senenne sunsunum uropne neneko saelba ulamang kom. Nimi undop nimiap nikag ma'al dalamseng kom. \v 6 Sin neneko anabiag agha ambatto poa tongolamsiangdi, nimi ni ae lomag wamang nimi haing kunulamsiangdi, ae lom-lom wa'ina ae lomag kelabori wana tolamsiang. Wana tolamsiangba, kelabo tanekona, limituka urop kelaborina, “Na mon sek nenelamnelne nari wanaag walelalne nene salero uahane,” senelamang. Wene senelamangdi, ulamangne sembe kelabo tanekori “Malia maikno ulamna,” aro sindi seneragnep aghana, sindi seneragnaap wanaap loba talamsil. \v 7 Kelabo tanekori sop-sop “El tahane,” aro ulamang aghana, yubu sikne sembe ililamang kom. Undop saog ae lomag wa'ina kelabori wana tolamsiang, ane sembe haing kunuro ambatto poa tongolamsiang nang nenekoap ma'al dalamseng kom. \p \v 8 Sindi wene ulamangne sembe, samenag babe Allahri yubu sikne Musaag ambarogpa, Musari yubu tipto nimi ambarelamsiog. Allah yubu ambarelamsiog li ko'o nenekoag, Yanesap Yambresapti “Musari yubu ka'ebaukap kom,” senelamdekti, yubu sikne wa'eplamdek. Yanesap Yambresapti yubu sikne wa'eplamdek saog uro, sin wene undo unulamang nimi taneko babe sindi usog seneragna ya'ag maliri, Allah sembe sikne aro seneragnep kom. Ane sembe, sindi Yesusag sikne aro seneraglamang komne kekneldalamla. \v 9 Sindi haing kunuro ambatto poa tongolamsiangba, nimiri sesogne sembe sik senelamsiang aghana, amik sum el taukang. Sindi haing kunuro ambarelamsiangne sembe amik sum eneko lag taleba, nimiri el taikti, “Sinna ekon aghana, el uro wamlori ambatsiloa saog uro amolamsiang aneko sinna ekon bog ambarelamsiang,” aro el taukang. Samenag Yanesap Yambresapti Musa yubu wa'eplamdekne sembe, “Limituk uro ulamdek,” aro el wamap. Wene babe sin ekon bog nimi ambatto poa tongolamsiang nang neneko sembe babe nimi niri el taukang. \s1 Paulusti Timotiusag “Seklelapmennag Yesusag seneratopne sae limna koma Allah yubu ambarelamsululam,” aro wenerop yubu ambarogha \p \v 10-11 Sinna unulamang aghana anna nari ambarelangkenneag nelepto ul palamlam. Nari ul palamnori palamnangeap, nari wanaag seneraglamnangeap imneomdi, nelepto ulamlam. Nari Yesusag “Sikne” aro seneraglamnori, nimi yogne sembe o'ona senelamsinori ulamnonge andi haingdi imneomdi, nelepto ulamlam. Nari sa'a-sa'a yubu seklenne yubu yalamoba, nari wana paiamnori, ta'ap sen koma ulamnonge babe imneom. Yesus sembe nimi ambarelamsinoba, nimiri as kota Antiokhia agha, as kota Ikonium agha, as kota Listra agha “Seklebale,” aro ulamneongba, seklelamnonge ni anena andi haingdi imneom. Seklelamno aghana, nu Saelba uhiropne ponekori sindi saeag agha taulbaneo. \v 12 Seklelamno aghana, na mo seklelamna kom. Nimi etneri Allahri weptopne Yesus Kristusap ma'aptangto, Allahri senenne sunsunum uro “Uahane,” aro seneraglamik tanena, mog so'oag nimiri sin sembe karongdi “Seklebaik,” aro ulamsukang. \v 13 Aghana nimi haing kunuro ambatsirop nimiap, yonge urop nimiap nen ma'aro yo taikti, mali-malia aghabog ulamukang. Undo unulamik nimi tanekori nimiag haing kunuro orolenange ambareamsukang aghana, nen sap tangoro nimiri sinag orolenange ambarelamsiikpa, sik senelamukang. \v 14 Haing kunuro ambarel dalamukang aghana, an Timotiusag Yesus sembe yubu sikne ambatkeek nimi sembe ekon tan koma el uro wamlulam. El nene langkeekti, yubu sikne ambatkeek ane sembe, sik sembalumne neneko sae mikip uro saelbamlulam. \v 15 An me olog wamlumag agha Allah yubu mome toro piropne eltalum. Allah yubu mome toro piropne nenekoag agha Allahri weptopne “Taulbahimendi, Saelbamsululam,” aro poghogne sembe ka'ebalum. Ka'ebalumdi, andi wana hekto yabalangkeogpa, Yesus poneko sembe “Allahri weptopne Kristus neneko wamla,” aro el talum. El talumba, nimi etneri Yesusag “Sikne” aro seneraglamikne sembe eldi mali-malia uropne agha talulangkel. Malia uropne agha taulbahiropne sembe Allah yubuag lag taog. \v 16 Allahri yubuag mome toro pairopne ni wamlange nenena, Allah Eldamneri haindi lag phoro ambatsiloa saog uro sikne wamlaba, nimi yeplamsil. Allah yubu sik yubu eneag agha orolenange wa'epto sikne ambatsinep; nimi wenero ambatsinep; tam wamnange nene “Sikne to, kom to,” aro yubu mibilpina karebanep; Allahri senenne sunsunum uro “Undo-undo ulamlulom,” aro nimi ambatsinep. \v 17 Allah yubu mome toro pairop mome eneri nu yepsileri, mikip nenelamsilul. Mikip nenelamsileba, nu Allah Elmabori sa'a-sa'a walinge “Unuahane,” sembabeba, el nenero yepsileba, Allahri senenne sunsunum uro ulamukap. \c 4 \p \v 1 Allahri weptopne Yesus Kristus poneko nen amik mog so'oag El yalulnena, nimi saelba uahiropne yubu sia leropnang nubunge saog uro yaleri, nimi kamagneap teptopneap poloro wimbahaileri, “Tam karebanun,” aro yalul. Ane sembe nari Allah whingag agha, Yesus nu Talulamsildi, Saelbamsilne poneko whingag agha anag wenero ambarelangkennena: \v 2 “Andi Allahri Yubu walinge Yesus sembe nimiag ambarelamsululam,” aro ambarelangken. Andi yubu ambarelamsimenne sembe, nimiri “Ka'ebaukap,” sembaik babe, “Karong,” sembaik babe, andi “Allah yubu amoro ambarelamsinun,” aro wea ulamlulam. Allah yubu ambarelamsimenba, nimiri ulamangne sik kom tanena, lag phoro ambatto wenelamsululam. Wenelamsimen abeneko pere andi wana paiapmendi, “Sindi wana sesog urop nimi wana aingnibahinun,” aro yubu kiki telekto ambarelamsululam. \v 3-4 Amik sum andi yubu sikne Yesus sembe ambarelamsimenne sembe nimiri “Ka'ebaukap kom,” aro wa'epto ulangkukang. Yubu sikne ambarelamsimenne sembe ao leptaukang aghana, kom nepna malinge saogne sembe ao taongkaukang. Ambarelamsimenne neneko libikti, sinba sindi wanaag “Uaukap,” senenne sunsunum urop yubu sembe “Ka'ebaukap,” aro, ekel ina amohiropnang maikno sirik poloro wimbahukang. Ane sembe, “Wana paia uro yubu sikne Yesus sembe ambarelamsinun,” aro wea ulamlulam. \v 5 Sa'a-sa'a uro yabileba, wana whi uro wapmendi, seklelapmenag wana paiapmendi, wamlulam. Yubu Walinge Yesus sembe ambatto poa tongolamsimendi, Allah arukna wamlamne sunsunum uro sol wali uro awe tolamlulam. \p \v 6 Na sembe an ambatkennena na tepnange peram wamna ane sembe, Allah sembe awe sol wali uro tolamlulam. Yahudi nimiri “Allah sembe pham domba aukag tabukap,” aro pham domba oropne nong alibag mag iklamang saog uro, “Nari eneng babe Allah sembe iknun,” aro ulamna. Olog wamnea nun wamap mog so'o eneag agha laploa pinepne peram wamna. \v 7 Allahri samenag nanag ambatneogti, “Ina aneag merero ambarel phululam,” aro ambatneogne sunsunum uro seklero kilim weang alamnori, ambarel palamsinori, uitno. Allahri awe nari saeag pipneogne neneko tolamnori, yin saleropnangdi sikinkabo pelepto aisanangap maldaropne wamloa saog uro wana nhonog uro tobitnori, wamna. \p \v 8 Ane sembe nu Saelba Uahiropne ponekori na sembe, “Nimi nene taluro sikne nembahiba, naringe wamla,” aro ambatsilenge nene agha, kamna kwiria elektoba nari usoghag elekatnilul. Nu Saelba Uahiropne Yesus ponekori “Ni tam peket uro karebanun,” aro yalamle sumeneko kamna nene tatnelul. Yalamle sumeneko kamna nana aghabog tatnelul kom, aghana nimi etneri Yesusag “Sikne” aro seneraglamikti, “El nen samoro yalul,” aro yeng uro nang-nang alamik nimi sembe undop yubu lero kamna kwiria elektoba eneko sindi usoghag babe elekitsilul. \s1 Paulusti elkaboag kipsirop yubu pibogha \p \v 9-10 Demas neneko mog so'oag nimiri salero ua uropne sembe wana telamoba, na laploa lemneori, as kota Tesalonika pio. Kreskes neneko babe Galatia pioba, Titus neneko babe Dalmatia pio. Ane sembe elemag uro na wamnaag yalulam. \v 11 Ot Lukas aghabog nanap nhon wamnam. Markus neneko nari yubu ambarelamsinne sembe, “Wali uro yeplamnelul,” sembamna ane sembe, an yalapmen tanena Markus neneko enero poa yalulam. \v 12 Tikhikus neneko “Efesus pululam,” aro pogno. \v 13 An yalapmen tanena, naringe ag son sembero, mag telamnabaro wangan ag as Troas Karpus nenekori aeag laplopnoa ane payalulam. Nari mome toropne eldi aeag wamlange babe payalapmendi, pham domba kon agha wetnero sorop buku mome eneko ekon tan koma toro payalulam. \p \v 14 Aleksander, besi nhon sao agha sunuropne nenekori nanag yonge maikno ulamneo. “Nu Saelbamsilne ponekori eldi ulamneonge nene sembe lumbalul,” sembamna. \v 15 Eldi nuri ambarelamsiap yubu sembe “Ka'ebaheng kom,” aro iriklamsil. Ane sembe eldi anag ualulne sembe wana whi uro wapmendi, yae uptangkamlulam. \p \v 16 Na tam kareptobag ik alnirop sum eneko poa pineongba, tam kareptop nimi whingag pelebeltanan yubu lelamno aghana, nimi nhondi babe nanag sip tangto yubu lebong komdi, laplopneong.\f + \fr 4:16 \ft Paulusti tam kareptobag pelebel tanan yubu leropne sembe Lukasti mome toro pibog (Pogsiognang pasal 24 kembanep). Lukasti mome toro pibog aghana, nimi nubunge Feliks whingag wamog sumeneko sembe to, amik sum Roma nimi sikini nubunge Kaisar whingag wamog sumeneko sembe to, Paulusti wene Timotiusag ambarogpa, olog ekon wamap. \f* Sindi na pelebaneong komne nene sembe sinag tam pipsiseng kom. \v 17 Aghana nu imag agha Saelba Uhiropne ponekoap sae tiptangto seknomo. El na peramag sekori, mikip nembaneoba, Yubu Walinge ambatsinonge nimi sisa Yahudi kom nimi niri ka'ebaongba, na tebanebag agha pelebaneo. \v 18 Nimi maiknori na “Obukap,” aro ulamneang aghana, nu Saelba Uahiropne ponekori sin saeag agha sae komobi ulamnilul. Ya'ag omnika babe, El ya'ag ua urobag na payaneleba, El aghabog papna koma omeklameberi, wana aingniro Elap nhon ya'ag wamukap. Sikne agha saekag lebap. \s1 Mome komoptobag kipsiogne (4:19-22) \p \v 19 Nari Priskilaap, Akwilaap, Onesiforus eldi kelabo meap kiplamsinne, ambatsululam. \v 20 Eratus as kota Korintus wamlaba, Trofimus naikna wamobog as Miletus liloa yanonge wamla. \v 21 An menag anam son li nene waelban komag yalulam. An sembe “Nangkae,” aro kiplangkeang nimi, Ebulusap, Pudesap, Linusap, Klaudiaap, nungkabo nu nikne Yesusag seneraglamap nimiri babe kiplangkeang. \v 22 “Nu Talulamsildi Saelbamsilne ponekori wana walingeag agha andi hain wana seneragnaap peleplangkelul,” aro an sembe Allahag molbarelangken. Abenda.