\id 1TI - Kosarek 
\h 1 TIMOTIUS 
\toc1 1 TIMOTIUS 
\toc2 1 TIMOTIUS 
\toc3 1Tim. 
\mt1 1 TIMOTIUS  
\c 1  
\p
\v 1-2 Timotius naba name. Nari samen Yesusag sikne aro seneraglamna saog uro andi babe Allahri, “Nimi mog so'oag nimi taulbahaileri, saelbamsilul,” aro wepto poghogne ponekoag seneraglamlam. Ane sembe, naba name taptopne saog wamlamba kiplangken. Samen Allahri Yesus wepto “Taulbahileri, saelbamsilul,” aro poghogne Yesus yaogne sembe Kristus aro engero yabiog. Yesus Kristus ponekori Allahri aruktop yubu sunsunum uro na Paulus wepto pogneogpa, Yesus sembe ambarelamsindi, mome ane an sembe toro palilamna. Allahri nu talulamsilne ponekori nu mog so'oag nimi sembe Yesus poghatsiogpa, “Nunap Allahap nhon wali wamukap,” aro Yesusag sikne aro seneragto nang-nangalamap. Nari an sembe molbarelangkenne, Nuni Allahap Eldi wepto poghogne Yesus Kristus nu saelbamsilne nenekoapti an sembe wana wali sembangkarukang. Wana wali sembangkirikti, yareagti yeplangkirikpa, wana aingniro wamlulam.   
\s1 “Orolena yubu, nimi loba nembahinep yubu ka'ebahiseng kom,” aro ambarogha (1:3-11)  
\p
\v 3 Name Timotius, na Makedonia so'oag palamnori, ambatkenonge sunsunum uro an as kota Efesus ya'ag wamlulam sembamna. An Efesus ya'ag wamlulam sembamnangena, “Nimi etbareri Allah yubu kilbiagha sik komne ambatsiong nimi tanekoag 'Undop yubu ambatsululom kom,' aro pat palirop yubuag wembahilulam,” aro ambatkenori, nen sap sarikto ambarelangkeken.  
\v 4 Sindi kom nepna neptop yubuap, nimi yan ana lelektop yubuap ambarelamsiong yubu ene sembe nimiri saekag lemnep komdi, sop-sop yubu ene sembe leldalamangne nene “Pabukang” aro wenelamsululam. Allahri awe Eldamneringe nuri sa'oag pipsiogti, “Nanag sikne aro seneraglamnemundi, Nari awe tolamlulom,” seog. “Awe tolamlulom,” seog aghana sindi ambarelamsiong yubu eneri nimi wana wag nenelamsiangba, Allahri “Awe tolamlulom,” seogne sunsunum uro ulamang kom.  
\v 5 Nari “Undo ambatsiseng kom,” aro iriklamsinnena tam nene sembe. Nari yeng senelamnarina, “Nimi wanaag sembenga orog nimi wamikti, malia uan koma wana aingniro senelamikti, Yesusag sikne aro seneraglamukang. Undo unulamik tanena, Allah o'ona senelamikti, sin mamun o'ona seneldalamukang,” senelamnari, yepsinep kom yubu ambatsiropnang nene wenero iriklamsin.  
\v 6 “Nia undo-undo wali uro ulamlulom,” aro wenelamsin aghana, nimi etbareri nari wenehirop yubu ene wail ibarelamongdi, Allahap nimiap o'ona seneptangtopne lipsiong. Sin mamun uro yabinep komne sik komne agha lelamang.  
\v 7 Sin nimi taneko, “Musari yubu mome toro piropne sembe ambatsin nimi tahabe,” aro ambarelamsiang. Sindi yubu kiki telekto el uro ambatsiropnang wamloa saog aghana, yubu tam sirikagne ekondi, yubu kiki pamag agha lanalamangne babe lomag wamlange sinna ekon.   
\p
\v 8 El uro wamapnena, Allahri samenag Musa ambarog yubu mome toro pibogne nenena wali. Wali aghana, ot nimiri Musari yubu sik uro saelbamnari, Musari mome toro pibog yubu enekoog ulamna tanena, sik uro wali sembanep.  
\v 9 Nen nhon el wamapnena, Musari iriktop yubu mome toro pibog yubu enena nimi wali uro urop nimi sembe mome toro pibog kom. Musari iriktop yubu mome toro pibog yubu enena irikna phirop nimi sembe, Allah wail ibatop nimi sembe, Allah omektop kom nimi sembe, malia urop nimi sembe, Allahri senenne sunsunum uro seneragtop kom nimi sembe, nimiri tam so'oagne sembe wanaag somoro agha urop nimi sembe Musari iriktop yubu mome toro pibog. Sin undo urop nimiri nimi olamsiangdi, sikini sikinin ohirop nimi sembe iriktop yubu mome toro pibog.  
\v 10 Kelabo nengabo toptan komag agha waleptangto malia urop nimi wamang. Ora nimiri malia uropnena, sin mamun salik-malik uro “Uahaneme” senenneag agha kabuniap-kabuniap, kelaboap-kelaboap babe elkel ela'ange neneptangka wamloa saog uro marop nimi wamang. Nimi sae kaupto kamna tatsin koma yo uro aruksirop nimi wamangdi, nimi sindi saeag wamang nimi pham to, kam to nenelamsiloa saog uro kamna kapto tolamangdi, ora nimiri saeag tarelamsiang. Orolena lerop nimi wamang. Ipsin koma orolena lero, “Eldi undo unuaoba, imno,” arop nimi wamang. Nimi maiknori Allah yubu sikne ambatsirop yubu sunsunum uro uan koma malia ulamang. Ni undop nimi abini sembe Allahri iriktop yubu ambarogne sunsunum uro Musari mome toro pibog.  
\v 11 Allah omeklamapne ponekori Eldamneri yubu sikne neneko nanag ambatneogti, “Yubu walinge Allah nubu sirikne ponekori Yesus tatsiogne sembe ambarelamsululam,” aro nari saeag pibog. Nari saeag pibog, ane sembe Allah yubu sikne sunsunum uro yubu walinge sik uro tipto ambarelamsin.   
\s1 “Allahri wana waliri taulbaneo” aro Paulusti ambatsiogha (1:12-17)  
\p
\v 12 Yesus Kristus nu saelbamsilne ponekori na sembe “Nari arukna sol walinge,” sembamneori, sekitneo. Eldi “Nari awe webatnilul,” aro sekitneori, nari nong mikip nenelamneoba, Eldi awe nari tolamna. Eldi na sembe wali senelamneoa sembe Yesus nu saelbamsilne ponekoag “Naba nani,” aro kiplamna.  
\v 13 Samenag nari Yesus san tilipto “Elag seneragtop nimi seklebaik,” aro ulamsiri, olamsisi. Undo ulamsiri, olamsisi aghana samenag na anam Yesusag “Sikne” aro seneragamsi komdi, nari ulamsinge na babe ekonne agha ulamsi, ane sembe Allahri yareag sembaneog.  
\v 14 Ulamsi aghana nana nu Talulamsildi Salelamsilne ponekori nanag to'opto o'ona sembamneog. O'ona sembaneogti, yepneogpa, Yesusag “Sikne” aro seneraglamna. Elag “Sikne” aro seneraglamnaba, Yesus Kristus ponekori na o'ona senelamnelne agha nari babe nimi o'ona senelamsin.   
\p
\v 15 Yubu kiki otsikne agha lag phoro lemnuan. Nimi nenneri babe malia urop aghana, nanagha yonge mali sirikne ulamsinge poneko na wamna. Malia sirikne ulamsi aghana, Yesus Kristus yaognena, “Nimi malia urop nimi sae kiliro taulbahinun,” aro yaog. Nari otsikne agha ambatsin ane sembe, sik uro to'opto seneraglapmundi, saelbamlulom.  
\v 16 Ora nimiri malia ulamang aghana nari agha mali sirikne maikno ulamsi. Na Paulusti malia ulamsinge sembe Yesus Kristus ponekori samenag seneraglamneogti, “Malia maikno sirikne ulamlange sembe el Paulusag tam pimnep aghana, elag yareag sembanun. Elag yareag sembaneri, wana paiamneba, yog nimiri ibaukang. Ibik nimiri na Yesusti wana paiamnange sembe el taikti, sindi malia ulamangne sembe babe na Yesusag mololamnukang. Na Yesusag mololamnikti, 'Samenag Paulusti malia ulamogne sembe wana paiplum saog uro, nari malia ulamnange babe wailag nembalulam,' aro mololamnukang,” sembaog. Undo seneraglamogti, Yesus ponekori nari malia ulamsinge sembe tam pimnep aghana, el nong ningkiag agha na malia uropne pone sembe wana paiamogti, o'ona sembaneog. Nanag uro yabiogne nene nimi niri ibikti, sindi babe Yesusag “Sikne” aro seneraglamik tanena, sik uro ya'ag kamag uro wamukang.  
\v 17 El ya'ag wamlange ponekori samenag wamek nimiap nu wamap nimiap wamukang nimiap salero paiamsil. Nu mog so'oag nimiri ililamap kom aghana, El nu sembe yubu sia leropne Nuni Allah ot nhonogne wamla. El aghabog papna koma omeklameberi, “Nuni,” aro kiplamukap. Sikne agha saekag lebap. Abenda.   
\s1 Timotiusti awe tomnepne (1:18-20)  
\p
\v 18 Naba name Timotius! Allah yubu silimu tiptopnangdi samenag andi whingag amik anag uro yabinepne sembe ambatkeong yubu sunsunum uro “Ulamlulam,” aro awe nene an saeag palilamna. Anag uro yabinepne sembe samenag ambatkeong yubu enekori mikip nembangkeleba, ekon talulam kom. Yubu ambatkeong yubu eneko sunsunum uro, “Orolena yubu lerop nimi yubu kom taukang,” aro ambarelamsululam. Ambarelamsimenne, yin saleropnangdi sikinkabo pelepto aisanangap maldaropne wamloa saog uro wana nhonog uro sikne aghabog ambarelamsululam.  
\v 19 Ambarelamsimendi, Yesusag “Sikne” aro seneraglapmendi, andi wanaag “Sikne aghabog uanun” seneropne sunsunum uro ulamlulam. Samenag nimi etbare Yesusag seneraghong aghana sindam nimiri wanaag agha seneragtopneri wa'epto poa phio. Wa'epto poa phioba sindi, “Sik uro uropne walinge aghabog uahane” aro seneraglamong komdi, sindi wanaag agha Yesusag seneragnange teba'en nembaong.  
\v 20 Sindi Yesusag seneragna teba'en neneptarong nimi abenekona Aleksanderap Himeneusap. Sin phende abeneko sembe nari tam pelengero “El taukang,” aro phia sikini nubunge saeag pipsino. Phia sikini nubunge saeag pipsinongena, “Sindi Allah san tilibanep kom,” aro el taukang sembanori, phia saeag pipsino.   
\c 2  
\s1 Paulusti “Yesusag 'Sikne' aro seneragtop nimiri undo unuaheng,” aro mome toro pibogha (2:1-15)  
\p
\v 1 Anamag ambarelamsinne o'omnena ane: Allahag molon yubu mololapmundi, teko wamsilea sembe molbarelamsululom. Mololapmundi, nimi ni sembe babe Allahag molona molbarelamsimundi, Allahri tarelamsilne sembe, “Naba Nani, wali tarelamsilam” aro omeklamlulom.  
\v 2 Yubu sia lerop nangap nimi nubu nang a'un sale-sale piamsiang nangap sembe babe molona Allahag molbarelamsululom. Molbarelamsimunne, “Tam yogne-yogne orog wamleba, aingniro wana wali uro wameberi, Allahri seneragna sunsunum uro malia uan koma wamukap,” aro molbarelamsululom.  
\v 3 Undo ulapmunne agha Allah nu taulbahiropne poneko wana wali nenelamukap.  
\v 4 Eldi yeng seneropnena, “Nimi ni sikne Yesus sembe el taheng. El taikti, Yesusag 'Sikne' aro seneraglamik andarina, sindi malia ulamangne agha taulbahinun,” aro yeng senelamla.  
\v 5 Tam nene sembe sik yubu lemnuan. Allah nhonog wamlaba, nunap Allahap sembe anabiag talamlari, nu Allahap ma'abahinepne ot nhonog wamla. El nhonog wamlange poneko Allahri “Nimi so'oag nimi taulbahileri, saelbahilul,” aro poghogne Yesus Kristus wamla.  
\v 6 El neneko “Nimi so'oag nimiri mali-malia uropne sembe kom nembahane,” aro kamna toptaogti, Eldi nimi taluro wali nembahinep. Yesusti undo unuaogne nenena, Allahri “Wene Nari wana kembaukang” senen ko'oag agha Yesusti uaogpa, Allahri “Yesusti uropne pere agha nimi ni Nanag saombanep,” aro yeng sembaogne lag taog.  
\v 7 Undo unuaogne nene sembe Yesusti na pogneog. Poglamneogti, “Yahudi sisa kom nimiag yubu walinge Yesus sembe lag phoro sik uro ambarelamsileba, sik seneraglamukang,” aro Yesusti na pogneog. Nari lemnange nene orolenange agha lemna kom, otsikne agha lemna.   
\p
\v 8 Nari yeng senelamnangena, nimi kabuni tala-tala wamang nimi sindi wanaag, “Allahri senenne sunsunum uro ulamukap,” aro sae towalengero Allahag omekto molona mololamukang. Nari yeng senelamnange, “Allahri senenne sunsunum uro ulamikti, omekto mololamik andarina, nimiap-nimiap waptangkamna koma, nimiap se'el neneptangkamna koma wamukang,” senelamna.  
\v 9-10 Kelabo sembe babe nari yeng senelamnangena ane: Allah omektop nimiri ulamukangne sunsunum uro sindi nongag enektangkamukang. Ora nimiri a'un anabiag kelabori nongag enektoamikne kembahiikti, “Ot sunsunum uro enektoamla,” senelamukang. A'un anabiag kelabo kembahiik nimiri, “Yesusag seneragto wana marop kelabo wamangdi, sunsunum uro enektoamang” senelamikti, kiplamsiikne sembe na yeng. Allah omektop kelabori sindi hongag leng-leng aroba emas kamna maikno toropne agha kauplamikti, ag babe kamna maiknoro torop ag agha enektangkamikpa, nimiri haing phende wilindi tiboghahiikne nene mali. Allah omektop kelabori sindi wali-walia towalengeptanep saogne uanepnena, sa'a-sa'a walia ulapmunba, nimiri kembahiikti, “Walia maikno ulamangdi, wali kelabo wamang,” sembaukang.  
\v 11-12 A'un Yesusag seneragtop nimiap winiltalapmundi, kelabori Allah yubu sembe nengabo ambarelamsiseng kom. Kelabo yubu koma wamikti, ka'eamikpa, kaubuniri yubu ambarelamsiikne kelabori wana mamleba, ka'elamik tanena, el talamukang. Allah yubu lero winirobag nengabori Allah yubu ambarelamsiikpa, kelabori “Poneri yubu lelamlange ka'emnun kom,” aro ulamikne nene sunsunum kom.  
\v 13 “Kelabori nengabo amoro ambarelamsiseng kom,” aro ambatsinne nenena tam nene sembe. Allahri nimi sunulamsiogti, Adam samenag sumbaogti, Hawa amik sumbaog.  
\v 14 Allahri nimi sumbahiogpa, Adam poneko phaeri yubu orolena yubu sik sembaog kom. Sik sembaog kom aghana, Hawa keleneko phaeri yubu orolena yubu sik sembaogti, Allah yubu lebogne irikna phibaog. Adam poneko babe irikna phibaog aghana, phaeri yubu orolena yubu sik sembaog koma phibaog. Ane sembe Allahri kelabo sembe tam pipsiogne sunsunum uro nengabo umag wamukang.\x - \xo 2:14  \xt Sumbaogha 3:16\x*  
\v 15 Kelabo sembe “Nengabo umag wamukang,” alamna aghana, kelabori me mangalamsiangneri kelabo sembe wali nenelamsil. Me mangalamsiikti, Yesusag sikne aro seneraglamikti, nimi o'ona senelamsiikti, Allahri senenne sunsunum uro ulamikti, wana mamleba wamik tanena kelabo wali wamukang.   
\c 3  
\s1 Yesusag seneragtop nimi pia uhiropnang tanepne sembe lebogha (3:1-7)  
\p
\v 1 Yubu kiki nene sikne andagha ambarelangken. Nimi etneri, “Yesusag seneragtop nimi pia uhirop nimi tanun,” senerop nimi enekori “Awe saelbahane,” aro seneragtopnena, awe toro welbana wali sirikne “Saelbahane,” senerop.  
\v 2 Ane sembe nimiri yubu sikne agha “Malia ulamla” aro elag tam pimnep tanena, Yesusag seneragtop nimi pia uhirop nimi wamnep kom. Yesusag seneragtop nimi piamsinep nimi eneko kelabo ot nhonog toamnep. Yesusag seneragtop nimi pia uhiropne tanep nimina, undop nimi agha tanep.  
\li1 Eldi wana mamleba, “Malia uanun” senelamlenge lirop  
\li1 Eldi wana hekto seneragha urop  
\li1 Nimi orangeri el sembe “Wali nimi” aro kiptop  
\li1 Eldi aeag nimi wa'al ananne sembe ina kuptop  
\li1 Eldi wali uro el nenero ambatsinep   
\li1
\v 3 Mag yongeri wana torop kom  
\li1 Nimiap kame tarop koma “Nimiap-nimiap aigniro wamukap,” senerop  
\li1 Nimiap waptangtop yubu agha leptangtop kom  
\li1 Kal ma'aldi wana torop kom  
\p Undop saog nimi wamle tanena, “Yesusag seneragtopne pia uahirop nimi taho,” sembanep.  
\v 4-5 Yesusag seneragtopne pia uhiropne tanep nimiri eldi kel, eldi mabo kelmabo wali uro o'oamsilul. Wali uro o'oamsileba, eldi mabo kelmabori sikini yubu ka'eamikti, sikini sembe “Nuniong,” senero sunsunum uro ulamukang. Nimi nhondi eldi kel, eldi mabo kelmabo wali uro o'obahinep kom agha elag “Yesusag seneragtopne pia ulamsululam,” aro eldi saeag piamna tanena, welaro Allah Elmabo o'obahinep? Ane sembe eldi kelabo meap wali uro o'oamsile kom tanena, Allah Elmabo pia uahiropne wamlul kom.  
\v 6 Allah Elmabo pia uhinne tanep nimina, weneog Yesusag “Sikne” aro alniro seneraglamna nimi agha pia uhirop nimi tanep kom. Weneog Yesusag seneraglamna nimi agha Allah Elmabo pia uhiropne tan pagha tanena, el nenekori, “Na Allah Elmabo pia uhinne wamna,” aro metmereng senep. Samenag babe phia sikini nubungeri “Na nubunge wamna,” aro metmereng seogpa, Allahri phia sikini nubunge nenekoag tam ikinne pibog.\f + \fr 3:6  \ft Phia mog so'oag wamangnena samenag Allahri “Nari arukna taukang,” aro sumbahiog. Wali sumbahiog aghana, sindi (irikna phiro ulamekti) phingno-phingno alamekti, Allah yubu ingisaplobekneag agha Allah aisa nembaek. Ane sembe Allah ua urobag agha pelengkahiog. Yudasti yubu ayat 6 nene kembanep.\f* Allahri samenag phia sikini nubungeag tam ikinne pibog saog uro, Allah Elmabo pia uhirop nimiri “Nubunge wamna,” aro metmereng seleba, Allahri elag babe tam ikinne pimnep.  
\v 7 Allah Elmabo pia uhinne tanepnena, Yesusag seneragtop kom nimiri babe eldi ul palamlange sembe “Nimi walinge,” senelamik tanena, el wali Allah Elmabo pia uhinne wamnep. Aghana Yesusag seneragtop kom nimiri Allah Elmabo pia uhin nimi sembe san tilipnange na karong. Ane sembe Yesusag seneragtop kom nimiri eldi ulamlange sembe mali alamik tanena, nimi eneko Allah Elmabo pia uhinne wamnep kom. Nimi undo urop saog nimi eneko “Phia sikiniri selbel werobag wa'ileag,” aro Allah Elmabo pia uhinne wamlul kom.   
\s1 Allah Elmabo agha nimi yepto tongohirop nimi sekitsinepne sembe ambarogha  
\p
\v 8 Allah Elmabo pia uhiropne tanep nimi sembe ambatsindi, nen tipto ambarelamsinnena, Yesusag seneragtop nimi longoro winiroba anabiag agha “Teko ulamsileag,” aro yepto tongohiropne tanep nimi sembe ambatsinuan. A'un Allah Elmabo anabiag agha nimi yepto tongohiropne tanep nimina, undop nimi agha tanep.  
\li1 Sindi lero ul palamangne agha ora nimiri maipsinep  
\li1 Sindi sikne andagha lero urop nimi  
\li1 Mag yongeri wana tohirop kom nimi  
\li1 Kal ma'aldi babe haing suruhirop kom nimi  
\p Undop nimi wamseng tanena, a'undi sin sembe, “Yesusag seneragtop winirop nimiri sae tahengdi, yepto tongohirop nimi taheng,” sembanep.   
\p
\v 9 Sin yepto tongohirop nimi tanep nimina, “Walinge agha ulamnari, uanun,” aro yubu sikne Yesus sembe seneraglamangdi, salelamang nimi agha wepsiro sekitsinep. Yubu sikne Yesus sembe samenag tognoro saog wamog aghana wene el tabu. El taburi, Allah Elmabo yepto tongohinep nimiri yubu sikne wali uro seneraglamikti, kas mi agha saelbamik pagha tanena, “Nuri sae tahengdi, yepto tongohiropne taheng,” aro seneragnep.  
\v 10 Sin Allah Elmabo yepsin nimi anam wepsin komag sin mipsinba, nimiri sin sembe se'el nembahinep kom tanena, sin hae Allah Elmabo yepto tongohirop nimi wamnep.   
\p
\v 11 Kelabo sikindinge babe sindi wana mamleba, “Malia uaukap,” senelamikne libikti, ora nimi sembe san tilipto lemna koma ulamukang. Undo ulamikpa, ora nimiri ililamsiikti, yepto tongohirop nimi sikin kelabo aneko sembe “Sikneog lero urop kelabo wamang,” aro maiplamsukang.  
\v 12 Allah Elmabo yepto tongohiropne eldi kel ot nhonog toamnari, eldi kelap kelmabo meap wali uro o'obahinepne agha wamlul.  
\v 13 Nimi etneri Yesusag seneragtop nimi sol wali, wali uro yeplamsiikpa, ora nimiri sin wali uro yeptop nimi sembe “Nimi walinge, nani,” aro maiplamsukang. Nimi wali uro yeplamsiikti, sindam nimiri wanaag Yesusag seneragnange nen ma'aro maikno talamlul. Yesusag seneragnange maikno talamleri, wana nong ningkiri Yesusag “Allahri wepto poghogne Kristus sik uro wamla,” aro seneraglamukang.   
\p
\v 14-15 Nari an kemelaghenunne nen olog tane wamneri, an kota Efesus wamlamag men yanun. “Men yanun,” sembamna aghana men yane kom tanena, “A'un ekon wamnep kom,” sembamnari mome ane “El talulom,” aro palilamna. A'un Allah Elmabo saog uropne wamlom, ane sembe Allahri Eldamneri mabo sembe, “'Undo-undo ua ulamukang,' senenne el wamlulom,” sembamnari, mome ane toro palilamna. Allah ya'ag kamag uropne ponekori “Eldi yubu sikne mikip uro saelbamlulom,” aro a'un Yesusag seneragtop nimi poloro winilamsilba, wamlom. “Eldi yubu sikne salelapmundi, ambarelamsimunba, ora nimiri Yesus sembe 'Allahri wepto poghogne sikne wamla,' sembaukang,” aro Allahri a'un poloro winilamsildi, sekelilamsil.  
\v 16 Sikne Yesus sembe samenag tognoro wamog aghana wene lag taogpa, nu Yesusag seneragtop nimi niri El sembe saekag lelamapne wali nubu sirik wamla. Nuri Yesus sembe sikne aro seneraglamapne undo.  
\q1 El neneko nimi saog uro lag taogpa,  
\q2 Allah Yame Walingeri “El sikne,” aro lag nenelamogpa,  
\q1 Allah arukna malaikatti babe ibek.  
\q2 Nimiri yubu El sembe ambarel phiekpa, nimi sisa Yahudi kom nimi babe ka'elamek.  
\q1 Nimi mog so'oag nimi tala-tala wamangne agha El neneko sembe “Sikne” aro seneraglamang.  
\q2 Samenag nimi saog uro mog so'oag wamog aghana, Allahri El neneko sembe “Nimiri omeklamukang” aro imag agha kiliro tobogpa, wamla.   
\c 4  
\s1 Nimiri orolena yubu ambarelamsianga  
\p
\v 1 Allah Yame Walingeri tibin uro yubu lelamlangena, Yesus samoro yanep sum peram wamebeag, nimi Yesusag “Sikne” aro seneragtop nimi agha Yesus yubu lilobukang. Yesus yubu lilobikti, phia yubu orolena yubu agha “sikne” aro ka'elamikti, ina ka'eseptanep ina nelebaukang.  
\v 2 Phia yubu aneko orolena lerop nimi pere agha ambarelamsiang. Orolena yubu ambatsirop nimina sindi wana seneragnaag sikne ka'eban koma phia yubu ambarelamsiang.  
\v 3-5 Orolena yubu ambatsiropnang tanekori “Nengabo kelabo topsin koma mo-mo wamlulom,” aro ambarelamsiang. Tenaba sembe babe “Salik-malik ten koma, kwaneng neneap, neneap tululom,” alamang. “Nengabo kelabo toptaheng kom. Kwaneng teheng kom,” alamang aghana Nuni Allahri nia mangkina sumbaogne wali sumbaog. Nengabo kelabo sumbahiogti, kwaneng babe sumbaog. Nia mangkina Allahri sumbongkia seneraghogti, “Wali-walia sumbandi, tarelamsinne ibikti, el taukang. El taikti, seneraglamneikti, 'Naniong, walia tarelamsilam,' aro tolamukang,” sembaogti, nia mangkina sumbaog. Allahri nia mangkina sumbaogti, nimi sumbahiogti, “Mog so'oag nimiag tarelamsin,” aro ambatsiog. Ane sembe, Allahri sik uro walia tarelamsilne sembe el uro wameberi, nu Yesusag seneragtop nimiri tolameberi, “Nuba, Naniong,” aro kiplamebe tanena Allahri wali sembalul.   
\s1 Yesus nu Talulamsildi Saelbamsilneri awe torop nang sembe Paulusti lebogha  
\p
\v 6 Ni ambatkenne nini, nunkabo Yesusag seneragtop nimiag ambarelamsimen tanena, anna Yesus Kristus ponekori awe wali uro toro ulpiro yeptopne wamlulam. Yesusap Allahap sembe yubu sikne samenag ambatkebonge sunsunum uro wene ulpalamlamdi, nen tipto yubu sikne wali uro toro ambarelamsululam. Yubu sikne ambatkebonge sunsunum uro ambarelamsimen tanena, yubu eneko andamne wanaag meptaleri, mikip nenelangkelul.  
\v 7 Yubu sik komne nuri seneragna inibin nembahinep yubu sembe babe, sabal kelabo nenek salehirop kelabori neplamloa saog yubu kamolange sembe babe ka'eamlulam kom. Yubu sik komne ka'ebahin koma koloptangkapmendi, “Andi wana seneragna Allahri seneragna sunsunum uro talul,” aro eltangkapmendi, seneraglapmendi, ulamlulam.  
\v 8 Nimiri seneraglamangne, “'Mikip nembamsilul,' aro topseng kom, teheng kom,” alamanga sunsunum uro ulamangneri nimi nong olog yepsinep. Nimi nong olog yepsinep aghana, Allahri senenne sunsunum uro ulpiropnena, wene ko'oag wamapne sembe babe, amik ko'oag sembe babe, nia mangkina ulpalamapne sembe babe, Allahri senenne sunsunum uro ulpalamebe tanena, wali wamukap. Allahri nunag salag lero ambatsiogti, “Nari seneragna sunsunum uro seneragto ulapmun tanena wali wamlulom,” aro salag lero pipsiog. Ane sembe amik Elap nhon ya'ag kamag uro wamebeag, nuri Eldi salag lero pibogne salero sunsunum uro ulamapne sembe teba'en sembaukap kom.  
\v 9 Yubu kiki otsikne agha lag phoro lemnuan, ane sembe wali uro ka'eapmundi, mikip uro saelbamlulom.  
\v 10 Nuri Allah ya'ag kamag uropne ponekoag seneraglamapnena, “Nimi ni mog so'oag nimiri malia ulamapne sembe Allahri opsinep. Allahri nu opsinep aghana Yesusag seneragto Elag wana saingnia piamebengeag agha Allahri nu taulbahilul,” aro nang-nangaro seneraglamap. Nimi etneri Allahri wepto poghogne ponekoag “Sikne” aro seneraglamleba, Allahri nimi eneko taulbalul. Ane sembe, nuri mikip uro whin seklero awe tolamap.   
\p
\v 11 Nia ane ambarelamsimenne nene, “Ni Paulusti ambatsiropne saelbapmundi, sunsunum uro ulamlulom,” aro ambarelamsululam.  
\v 12 Ambarelamsimenba, nimi nhondi babe an sembe, “Me ane kabuni weneog me, el ekon bog lelamla,” aro an sembe teba'en sembaheng kom. Anna, “Sindi nari lelamnange sembe teba'en sapsabi na kembaneikag,” aro anna agha, “Sindi kembaniikti, sindi babe na ulamnange nelepto ulamukang,” senelapmendi, Yesusag seneragtop nimi whingag andi ulpalamlulam. Andi ulamlulamnena, yubu hekto lelapmendi, andi wanaag seneragto ulpalamlulam. Andi nimi ni sembe o'ona senelamsimendi, Yesusag “Nu Saelbamsilne sikne,” aro seneraglamlulam. Nia mangkina undo andi wanaag seneragtopne lag phoro ulpalapmendi, “Imnikti, nari ulamnange sindi babe nelepto ulpalamukang,” aro ulpalamlulam.  
\v 13 Undo ulpalapmendi, andi sol wali uro Allah yubu mome toro pairopneag agha kemero nimi whingag ambarelamsululam. Lero ambarelamsimendi, “Sindi babe saelbahengdi uaheng,” aro nimi elnenero wenelamsilulam. Undo Allah yubu ambarelamsimen paghabog na amik anag yanun.  
\v 14 “El nenehinne ambatto wenelamsululam,” aro ambatkennena, samenag Yesusag seneragtop nimi wenehinnangdi andi usoghag sae pipkeongdi, Allah yubu silimu tiptop yubu ambatkeong. Sindi Allah yubu silimu tipto ambatkeong pere agha Allah Yame Walingeri mikipne an nongag pipkeo. Mikipne an nongag pipkeonge salik-malik uro pipkeo kom ane sembe, anag tatkeonge sembe teba'en sembaheng kom.  
\v 15 Nia ane wana nhonog uro saelbapmendi, solwali wali uro sik uro tolapmenba, nimiri kembaghiikti, an sembe “Wana hekto el talamlari, wali uro ambarelamsil,” sembaukang.  
\v 16 Andamneri ulpalamlamne babe yae weptangkapmendi, andi pamag agha amolamsilamne nene babe “Sengkwanektop yubu ambatsineag” aro yae weapmendi amolamsilulam. Papna koma sik uro ulpalapmendi, solwali wali uro yubu sikne ambarelamsululam. Undo ambarelamsimen tanena andi yubu ka'erop nimi wali nenelamsimendi, andamneri wali neneptangkamlulam.   
\c 5  
\p
\v 1 Andi nimi sabal saog nimi yubu mikip uro wembahin koma, yubu yangaro “Nani yabo,” aro wenehirop yubu lelamlulam. Kabuni maboag babe “Nangkabo” sembapmendi wembamsululam.  
\v 2 Kelabo sabal kelaboag “Nanin yabo,” sembapmendi, wembamsululam. Kelmaboap saren kelaboap “Naipsa'el yabo,” sembapmendi, “Saelbahane,” semban koma walinge aghabog ulamsimendi, wembamsululam.   
\s1 Kaldam kelabo sembe mome toro piroba  
\p
\v 3 Kelabo kaldam kelabo sin mo urop kelabo “Nanin yabo,” aro paliag nembamsilulam.  
\v 4 Aghana kaldam kelabo sikin maboro, sikinau yaboro wamik tanena sikin maboag samenag wembamsululam. Sikinin kaldam kel taonge sembe wenelamsimendi, “A'undi ae lomag nimi 'Teko wamikag,' aro o'ona senero kembamsimunne agha Allah wana yeng nembamlulom. A'uni a'unindi samenag sindi wana wali uro mo'olamsiong ane sembe, a'uni a'uninap tangoro walia ulamsimundi, yeplamsululom” aro wenelamsululam. Undo unulamikne nene agha Allah yeng sirik neneropne wamla.  
\v 5 Kelabo kaldam kelabo otsik uro kaldam kel elmo urop kelenekori, eldi seneragna wana Allahag paia uropti, teko elag ualne sembe sinag kweleknag “Allah yepnelul,” aro molona moloro ua urop.  
\v 6 Aghana kelabo kaldam kelabo agha wana sesog uro seneragto nia mangkina sembe “Naringe wamsori, yeng nembaneho,” senerop kelabo babe wamang. Kelabo undop saog kelabo hain epto kon kamag ua urop aghana, wana seneragna loba uro seneragtop.   
\p
\v 7 Kaldam kelabo sembe “Undo-undo ualulom,” aro yubu tam ambarelangkennena, “Ora nimiri Allah Elmaboag tam paipsiikag,” aro ambatkinuanne nene, nen tipto Yesusag seneragtop nimi ambarelamsululam.  
\v 8 Yesusag seneragtop nimiri sindi ae lom nimi yepsin kom tanena, mali sirik urop nimi sembanep. Sunumna nhon ambatkenuan. Nu Yesusag seneragtop nimiri senelamapne, sin Yesusag seneragtop kom nimi sembe “Sindi malia ulamsiang,” senelamap. Aghana, sindi kelabo kelme mabo taptopneap, sikini sikinin yaboap yae paiamsiangdi, o'ona seneltalamangne walinge ulamang. Wali uro paia ulamangne nene Yesusag seneragtop nimiri unuaheng, aghana Yesusag seneragtop nimi nhondi ili ilinap, eldi kel kelmabo maboap wali uro yae piamsile kom tanena, nimi eneko agha sik mali sirik nimi sembanep. Undop saog nimiri pamag agha “Yesusag seneraglamna” lerop aghana, sindi ul piropne neneag agha Yesus wa'eploa saog urop.   
\p
\v 9 “Kaldam kelabo yepsukap,” aro mome si tolapsimun tanena salik-malik uro si topsiseng kom. Kaldam kelabo agha mome siag tobongkipsinep kelabona, ela'ange ot nhonog torop kelabo agha, heng kun-kunne teng phende eptopneap saog (60) phiro wamik kelabo agha mome siag tobongolamsululom.  
\v 10 “Yepsukap,” aro mome siag tobongkiamsimunne, kaldam kelabori walinge maikno ulamikpa, nimiri iamsikti, “Walia ulamla,” aro ambatkiik tanena kaldam kel eneko mome siag tobongolamsululom. Kaldam kelabo agha mome siag tobongkipsinep kelabori wali-walia ulamangnena:  
\li1 elmabo wali uro mo'oamsil kel  
\li1 nimi yalamangne yeplamsildi, “Ae lomag aingniro wamlulom,” aro toro palilamsil kel  
\li1 Yesusag seneragtop nimi sembe wana mamleba yeplamsil kel  
\li1 nimi kwema wamsilne yeplamsil kel  
\li1 sol wali, wali uro nia mangkina walia ulamla kel  
\p Undo urop kaldam kelabo agha mome siag tobongkipsimundi, yepsululom.   
\p
\v 11-12 Kaldam kelabo saren saog wamik kelabo sindi si momeag tobongkipsiseng kom. Saren saog wamik kelabo agha tobongkipsimun tanena, sindi “Nengabo nen nhon tomna koma, Yesustinge wamnun,” seheng. “Nengabo nen nhon toamna koma Yesustinge wamun,” seheng aghana amik sindi kon kemeptaikpa, sin kon eren wamsileri, ulogsilenge sembe “Nu nengabo toro aukap,” sukang. “Nengabo nhon tomnun kom,” selenge phibaleri, Yesus Kristus poneko laplobi agha nengabo tomnep. Salag leropne phibaleri, nengabo topleba, “Allahri elag tam ikinne pipleag,” aro, anamag sin kon eren wamsile kelabori si momeag topsiseng kom.  
\v 13 Apna saren saog wamik kelabo agha tobongkipsimundi, yepsimun tanena sindi saeri sa'a-sa'a uan koma, nimi yepsinep kom yubu agha tipto ambatto tongolamikti, sunsunum urop kom yubu agha lero ae nhonag wa'ang nhonag wa'ang ulamukang. Sindi ae eneag wa'ang, ae eneag wa'ang ulamikpa, ora nimiri tam ua ulamle tanena urukag wa'ina salel wa'alamukang.  
\v 14 Ane sembe nari sembamnangena, “Kaldam kelabo saren saog wamik kelabo agha 'Yepsukap,' aro mome siag tobongkipsiseng kom,” sembamna. Kaldam kelabo sin saren saog wamik kelabo wenelamsimenne, nengabo toro aikti, me mangaro sindi aeag wamikne “O'olamsululom,” aro wembamsilulam. Undo ambareamsimenba wamikti, walinge ulamik andarina nunag aisa nenelamsiang nimiri nu san tilibahinep kom.   
\p
\v 15-16 Kaldam kelabo etpare phia sikini nubunge yubuag nelebaong ane sembe, kaldam kelaboag, “Undo-undo ulamlulom,” aro ambatsilulamne ambatken. Yesusag seneragtop nimiri ae lom nimi agha kaldam kelabo taik tanena, ae lom eneko wamik nimiri kaldam kel eneko yeplamukang. Yesusag seneragtop nimi poloro winiptangtop nimiri awe yogne uanepne wamla ane sembe, kaldam tale kel eneko ae lom eneko Yesusag seneragtop nimi wamik tanena sindi keleneko yeplamukang. Sindi el undo yeplamik tanena Yesusag seneragtop nimi poloro winiptangtop nangna sae laia agha kaldam kelabo sik uro mo urop kelabo yelamsukang.   
\s1 Yesusag seneragtop nimi wenehirop nang sembe mome toro pibogha  
\p
\v 17 Allah Elmabo wenehiropnangdi wali uro saelbamsindi, wali uro o'olamna tanena, “Nu wali uro saelbamsildi wali o'olamsil,” aro kamna kipto tatsimunne nene sunsunum wamla. A'un Allah yubu ambatto wenehiropnangdi a'un wenelamsiangdi, amolamsiang ane sembe, a'undi sin wenehiropnang sembe amik nembahin koma sin nimi whingagne nembamsimundi, tatsululom. Undopne agha sunsunum.  
\v 18 Kamna tatsiikne neneko sembe Allahri Yubu Momeag Musari sae pere agha mome toro pairopne wamla. Mome toro paibognena,  
\q3 “Nimiri awe torop nimiri pham sapi kerekamnari, 'Kwaneng roti sununa gandum wana kolopto yingkileba, poloro anun,' aro pham sapi yagto pabalamna. Pham sapi yagto pabalamnange abeneko pere, 'Yo'oag ingirop pham sapiri roti wana teleag,' aro pham ua'al aroro kauptop saog uro kaupseng kom,” aro mome tobog.\x - \xo 5:18  \xt Ulangan - Sariktoba 25:4\x*  
\p Pham sapi sembe mome tobog aghana, “Nimi awe torop nimi el awe tomnange sembe kamna tatsiikne abenekoog sunsunum,” aro mome toro paibog.   
\p
\v 19 Allah yubu amoro wenehirop nang kiplamsimunba, nimi nhondi a'un wenehiropnangag tam palilamsiikti, “Eldi malia undo unual,” aro ot nimi nhondi leplenge sembe sik sembaheng kom. Nimi phende wilindiri, “Eldi malia undo unuaoba, ibobo,” aro lebik taneogna “Sik to, kom to,” aro tam lelekto kembamlulom.\x - \xo 5:19  \xt Ulangan - Sariktoba 17:6; 19:15\x*  
\v 20 Nimi malia uropne sembe Allah yubu ka'erop nimi ni whingag agha wembahimenba, nimi orange babe “Malia ulamebeag,” aro log senelamikti, walinge aghabog ulamukang.  
\v 21 Ni tam lepnange sembe ambarelangkenne sunsunum uro sik uro ulpalamlulam. “Na nimi nhonag sip tanun,” semban koma anna agha nimi anabiag sikne agha ulamlulam. Nia “Undo-undo ulamlulam,” aro ambatkenne Allahap Kristus Yesusap Allah arukna malaikat walinge wepsiropneap whingag agha andi sa'oag palilamnaba, nimiag ulpalapmenne kemelangkukang.  
\v 22 “Allah Elmabo saelba uahiropne wamlul,” aro elemag abeneko nimi usoghag sae pipsiseng kom. Ekonne agha elemag nimi usoghag sae pipmendi, sekitmen tanena, nimi enekori malia ulamleba, anap elap sae tiptangto wamtumunne sembe andi babe malia ulamlam. Ane sembe “Eldi malinge ulamlenge na sa'oag taleag,” aro andi, “Allah Elmabo saelba uahiropne talul,” aro nimi elemag sekitsilulam kom.   
\p
\v 23 An sop-sop mon og aghabog telangkelba, niklamlamdi pesa ulangkel ane sembe, mag salingeog tero wamseng kom. Anggur mag olog maghag ikto pelengkia telapmenba, an mon telangkelne nene yepkelul.   
\p
\v 24 Nimi etbareri malinge uroba sembenga saogne paliropne anam tam lelekto kareptobag agha kemban kombog lag wamla. Aghana nimi etbareri malia uropne anam tognorop saog wamlaba, amik lag talul.  
\v 25 Undo saog uro babe nimiri walinge ulpiropne lag wamla. Nimiri walinge tognoro ulpiropne wene wamlaba, iamap kom aghana, walinge ulpiropne neneko tognorobag wamnep komdi, lag ua ulamlul.   
\c 6  
\s1 Nimi umag urop nimiri ul piropne sembe ambarogha  
\p
\v 1 Yesusag seneragtop nimi, nimi arukna sae kauploa saog uro awe ikinne torop nimi\f + \fr 6:1  \ft Samenag ul palameknena, nimi arukna tanekori kamna tomna koma yog nimiringe awe tolamek. Roma nimi nubunangdi yubu sia paibekne sunsunum uro, nimi arukna tanekona, nimi wamek. Nimi wamekpog, ora nimiri nimi arukna nene pham to, kam to nenelamsiloa saog uro sae kaupto kamna kapto torobag palilamsiekpa, “Nari awe tolamukang,” aro arukna nene kamna kapto tolamsiekti, sikini taek. \f* wamik tanena, sikini sikinin yabori aruktop yubu ka'elamsiikti, “Kipsunun,” aro sunsunum uro tolamukang. Tolamik abeneko pere sindi seneraglamikne, “Nimiri na kembaneikti, Yesus sembe ambarelamsiap yubu mali sembaikagti, Allah omeklamap poneko san tiliplamikag,” aro sol wali uro awe tolamukang.  
\v 2 Yesusag seneragtop nimi agha nimiringe awe toropne arukna wamleba, ili poneko babe Yesusag seneragtopne wamle tanena, arukna wamlenge ponekori, “Nu Yesusag seneragtop nimi wamnam,” aro ili poneko luknunne ualul kom. Undo luknuro ualul kombog arukna wamlenge ponekori ili poneko sembe “Naba nani Yesusag seneraglamlaba, Yesusti o'ona seneropne wamlaba, nari babe o'ona senero yepnun,” senelamlul. Undo senelamleri, “Wali uro yepnun,” aro ili poneko sembe awe tolamlul. Ni ambatkenne abene ambareamsimendi wembamsululam.   
\s1 Metmereng arop nimiap, kal ma'aldi haing suruhirop nimiap sembe ambarogha  
\p
\v 3-4 Nuri ambarelamsiap yubu neneko Allah wana wali neneropne sunsunum urop yubu ambarelamsiap. Nuri ambarelamsiap yubu nenekona, Allahri “Taulbahimendi, saelbamsululam,” aro weptopne Yesus Kristus ponekori yubu sikne sunsunum urop yubu ambarelamsiap. Nuri ambarelamsiapne sunsunum urop kom yubu agha nimi nhondi ambarelamsile tanena, nimi eneko metmereng arop nimi sa'a-sa'a ekon nimi wamla. Nimi undop nimi enena, naikna salehirop nimi saog wamlari, nimiap-nimiap loba neneptaheng arop yubu kikiag agha leleng-lelenga lelamla. Leleng-lelenga pan khelamsilba, nimiri ka'elbina sin yubu neneptangka sin waptangto leldalamnari, “Nu luknubahaikag,” aro waptangto loba neneptanep. Sindi yubu pan khero suknulamang yubu sembe waptangto leldalamangdi, “Nu luknubahaikag,” aro wana mali seneldalamang. Sinag yubu pan khelamsiangne yubu suknulamangne sindi ka'ebiagha “A'undi undo-undop,” aro waldalamangdi, wana mali neneldalamang.  
\v 5 Undo unuropne agha nimiri seneragna loba neneldalamangdi, Allah yubu sikne Yesus sembe seneragna koma yubu sik komne sembe nimiap-nimiap sop-sop waptangto yubu leldalamang. Undo unurop nimiri Allah yubu paliag nenero ambarelamsiseng aghana, Allah yubu sikne seneragtopne sinag ekon wamla. Sin elwamsilnena, “Allah yubu ambarelamsineba, ka'erop nimiri kal ma'al maikno tarelamnukang,” aro seneragtopne agha sinag wamla.   
\p
\v 6-7 “Nimiri tarelamnukang,” senelamang aghana, nu mog so'o eneag mangaro yangkabu sum eneko nia mangkina saelba yingkibu kom. Amik mog so'o eneag agha lamba palamebe sumeneko babe sa'a-sa'a salero agha lambaukap kom. Ane sembe nuri saeag wamlange sembe, “Allahri sunuropne tarelamsil,” senelameberi, Allahri senenne sunsunum uro ul palamebe tanena, seneragto ul piropne nenena nu sembe tup tananne nubunge wamla.  
\v 8 Tenaba wamle tanena wamlenge agha telamukap. Ag konag lilinne wamle tanena wamlenge agha wangaroamukap.  
\v 9 Aghana sin “Tup tahabe,” senerop nimiri sin dam nimi loba neneptanep. Nimiri wanaag, “Nanag kal ma'al to'opto wamsoba, na tup tahane,” aro seneragtopne nenekori eldamne selbel weptangtopne wamla. Nimiri “Tup tahane,” aro wanaag seneraglamnange nenekori nimi eneko poa kwerenag eba timbanep. “Tup tahane” senenne nenekori nimi aneko eldamne wana telamlari, wana sao kauplamlaba, nimi aneko eldamne loba neneptanep.  
\v 10 Tam nimiri kal ma'alag wana somoropneri nimi wana tolamsilneag agha nimiri yoaba maikno malia ulamang. Nimi etbare babe sindi samenag Yesusag seneraglamong aghana, kal ma'aldi sin wana tolamsioba, Yesusag seneragtopne ulamongne liloa kal ma'al sembe sarekereplamangdi, wene sin “Yaghe,” senelamangdi, seklero wamang.   
\s1 Paulusti Timotiusag yubu komopto ambarogha  
\p
\v 11 Aghana anna Allahringe wamlam, ane sembe ni malia uropneag agha an togtangkamlulam. An Allah whingag sikne aghabog ulapmendi, Allahri wana wali neneropne sunsunum uro ul palamlulam. Yesus ponekoag seneraglapmendi, Allahap nimiap o'ona sembamsululam. Nia undo papna koma ul palapmendi, seklelapmenag wana paiapmendi, “Nimi whingag arikal uro yubu lemneag,” senero wamlulam.  
\v 12 Andi ulapmenne sik uro Yesusag seneragto ulapmenba, Allahri saeag agha kamna tatkeleba, ya'ag kamag uro wamlulam. Allahap ya'ag kamag uro wamnepne nene sembe an Allahri an yopkeoba, andi nimi maikno whingag agha, “Na Yesus Kristus ponekoag 'Sikne' aro seneraglamnun,” seomba, ipkeong. Ane sembe sik uro Yesusag seneraglapmendi, yin saleropnangdi sikinkabo pelepto aisanangap maldaropne wamloa saog uro wana nhonog uro Allahri awe tolamlulam.  
\v 13 “Yesusag 'Sikne' aro seneraglamnun,” seomba, Yesus Kristus eldamneri samenag nimi nubunge Pontius Pilatus whingag wamogti, yubu sikne agha sik uro, “Na Allahri 'Saelbamsululam,' aro wepto pogneogne wamna,” seog. Wene ane Yesus Kristus poneko whingag agha, Allahri nia nimi hain tarelamsilne poneko whingag agha babe, nari anag “Ulamlulam,” alamnange ane:  
\v 14 “Nimiri an sembe tam pipkikag,” aro nari lemnange ni ane saelbapmendi, Yesus anam samoro yingkilamna komag agha malinge saelban koma ulamlulam. Nari lemnange papna koma sunsunum uro ulapmen paghabog Yesus Kristus nu Talulamsildi Saelbamsilne poneko amik yalul.  
\v 15 Yesus El nen amik yalulne neneko elba, Nia Mangkina Saelbamsilne Walinge poneko El mori “Sumene sum yalul,” seleri, karebale sum eneko yalul. El neneko nia mangkina saelbamlange El ot nhonog wamlaba, El aghabog omeklamap. El nimi nubunge, yubu sia lerop nang mog so'oag tane wamang aghana El ya'ag paliagne yubu sia leropne wamla. Nimi saelba ulamsiang nimi ubu piamang aghana El agha nimi nubunge nimi ni Saelbamsilne wamla.  
\v 16 El agha tepnari babe kaolbanep komne. El ua urobag libango aropne haing omomne warerobag neneko nimi nhondi babe sekel pinep kom. Mog so'oag nimiri haingag agha imnep komdi, nimi nhondi babe El wamlange ilirop kom. “El agha mikipne nia mangkina saelbamlange,” aro El aghabog omekanepne wamla pahabog wamlul! Sikne agha saekag lebap.\f + \fr 6:16  \ft Yahudi nimiri “Amin” aro leropnena, “Sikne agha saekag lebap,” senenneag agha lerop.\f*   
\p
\v 17 Nimi mog so'o eneag wamangdi, tup uro wamang nimiag el nenelamsilulamnena, sin metmereng aro sindi tuba ya'ag wamnep koma sembe metmereng aro wamukang kom. Sindi wana kal ma'alag wana tagto pimna koma, nia mangkina nu maiknoro tarelamsilne poneko Allahag agha wana paiamukang. Allahri nu sembe senelamsildi, “Nari tarelamsinne salelamikti, telamikti, wana awi uro wamukang,” aro nunag maiknoro tarelamsil. Ane sembe tarelamsilne poneko sembe ekon tan koma Elag aghabog saingniamukap.  
\v 18 Sin wene kal ma'al maikno salelamang nimiag “Walia ulamlulom,” aro ambarelamsimenba, sunsunum uro ulamik tanena, sindi nimiag walinge ulbana maikno pairo ulamikneag agha tupne tapto wamukang. Sindi wanaag agha sindi saeag agha “Yepsukap,” aro awi uro pogto tarelamsukang.  
\v 19 Yesusag “Sikne” aro seneragtop nimiri undo unuamikneri sin amik wali uro unne sembe tup tananne yan ana yagto Allah whingag pairo pololamikti, amik ya'ag kamag wamukang. Allah whingag pololamikne neneko wamleba, amik li ko'oag sin tup nimi taptopne wamikti, wana awi uro tapto ya'ag kamag uro wamukang.   
\p
\v 20-21 Timotius mele, anag “Wali uro saelbamlulam,” aro anag ambarelangkebunge nene wali uro yae wapmendi saelbamlulam. Yubu kamolange Allah yubu sunsunum urop kom yubu sembe nimiap yubu lenag babe, yubu “Eltahabe” aro yubu kiliro-kiliro sik komne sembe yubu lenag babe togtangto wamlulam. Nimi etbareri samenag Yesusag “Sikne” aro seneraglamong aghana, yubu sik komne neneko ka'ebaongdi, sik senelamongdi, sindi babe nimi tipto ambatsiong. Undo unulamangneag agha Yesusag samenag seneraghong nimi abeneko nen sap amik ina wag lerekaong. Ane sembe anna, yae togtangkapmendi yubu ambatkebunge saelbamlulam.  
\p A'un sembe molbarelamsinne, “Allahri a'unag walia ulamsileri a'un yepto paiamsilul,” aro molbarelamsin. Abenda.