\id 1TH - Kosarek 
\h 1 TESALONIKA 
\toc1 1 TESALONIKA 
\toc2 1 TESALONIKA 
\toc3 1Tes. 
\mt1 1 TESALONIKA  
\c 1  
\s1 Paulusti Mome samenagne Tesalonika nimi Allah Elmabo Yesus yubu ka'erop nimi sembe mome toro pibogha (1:1)  
\p
\v 1 Nare yabo nangkabo! Nuni Allah Elmabo taom nimi a'un as kota Tesalonika wamlom nimi Allahri, 'Taulbahimendi, saelbamsululam,' aro wepto poghogne Yesus ponekori taulbahaio. Allahri samenag Yesus webogti, “Mog so'oag nimi agha taulbahaimendi, saelbamsilulam,” aro poghogne Yesus yaogne sembe si Kristus aro engero yabiog. Yesus Kristus poneko mog so'oag yaogti, a'unap nunap taulbahiogpa, nu Paulusap Silasap Timotiusapti Allahag mololamapti, “Allah wana waliri a'un wana aingnilamsilba, wali uro wamlom,” aro Allahag molona mololamap.   
\s1 Tesalonika nimiri seneraglamekti, “Allahri Yesus wepto poghol aog andarina mog so'oag nimi agha taulbahaileri saelbamsilul,” aro Yesusag seneraglameka (1:2-10)  
\p
\v 2-3 Nuri a'un sembe ekon talamap komdi, sop-sop Nuni Allah nuringeag nuri “Wah Naniong” aro Allahag a'un ni sembe molona molbarelamsiap. A'un sembe ekon talamap komdi seneragha ulamsiapnena: A'undi unna ulamlomne sembe kemelamsibongena, a'undi Yesus ponekoag sikne aro seneraglamlom. A'undi Yesusag seneraglamlomneag agha, wali-walia ulamlomdi, a'undi nimi yogne sembe o'ona senelamsilomdi whin seklero yeplamsilomba, kemelamsibo. Apna a'un eraruk uro wamlom aghana seneragha ulamlomne, “Allahri wepto poghogne Yesus Kristus nu saelbamsilne ponekori nu yepsilul,” aro sik senelamlom ane sembe, mikip uro wana paia ulamlom. A'undi Yesusag sik senelamlomdi, wali-walia ulamsilomdi, mikip uro wana paia ulamlomne sembe ekon talamap komdi, a'un sembe molbarelamsiap.   
\p
\v 4 Nangkabo, a'un sembe nu elwamapne, Allahri a'un sembe o'ona senelamsiori wepsio andarina eldamneringe aghabog taom.  
\v 5 Allahri “Taulbahinun,” aro a'un sik uro wepsiogne sembe nu el wamap. Allahri sik uro a'un wepsiogne sembe nu el wamapne tamna ane sembe. Nuri a'unag Allah Yubu Walinge Yesus sembe ambarelamsiapnena pamag yubu aghabog kom. Yesus sembe ambarelamsiapnena, sik uro seneraglamapti, Allah Eldamne Yame Walingeri mikipneag agha haingdi imnepne ulamapti ambarelamsiap. Allah Eldamne Yame Walinge mikipneri nu pere agha haingdi imnepne a'un whingag ulamog ane sembe, Allahri a'un sik uro wepsiog aro el wamap. Nu a'un anabiag wamobori, a'un sembe ulamobonge a'un ni elwamlom.   
\p
\v 6 A'undi babe nuri ulamobonge ipsiomdi, nelepto ulamlom. Nuri ulamobongeap, Yesus nu saelba uhiropne ponekori ulamogneap saog uro a'undi nelepto ulamlom. Yesus Yubu walinge ambarelamsiapba, ka'elamlomba, seklenne a'unag lag talamlaba seklelamlom. Seklelamlom aghana Allah Eldamne Yame Walingeri a'un yeplamsioba, Yesus yubu walinge ambarelamsiapne nene wana yeng uro a'undi salelamlom. Wana yeng sirikne nene Allah Eldamne Yame Walingeri a'unag tarelamsil.  
\v 7 Wana yeng sirikne neneko Allah Eldamne Yame Walinge nenekori tarelamsilba, Yesus sembe ambarelamsiapne seklero salelamlom. Undo ulamlomba, Yesusag seneragtop nimi propinsi Makedonia wamang nimiap, propinsi Akhaya wamang nimiapti a'un ul palamlomne sembe ka'elamsiang. Ka'elamsiangdi sindam nimiri, “As Tesalonika Yesusag seneragtop nimiri ulamangne saog uro nuri babe nelepto ulamukap,” senelamangdi ulamang.  
\v 8 Akhaya nimiap Makedonia nimiapti a'un sembe ka'elamangdi, “Nuri babe nelepto ulamukap,” aro ulamangba, a'undi unulamlomne yubu eneko Makedoniaap Akhayaap sabo tangto palamoa wene babe palamla. Sabo tangto palamla yubu eneko abene aghabog kom. A'undi wana paia seklero ulamlomneag agha yubu lilim lonceng oleanne saog uro yubu nu saelba uhiropne poneko Yesus sembe yubu sabo tangto piog. Sabo tangto piogpa, nimiri ka'elamangdi, “Tesalonika nimiri Allahag sik uro seneraglamang,” alamangba, yubu eneko nen tipto tala-tala sabo tangto piog. Sabo tangto piogpa, nuri tala-tala Yesus sembe ambarelamsiboag nimi wamang nimiri ka'ebong. Nuri nimiag “Tesalonika nimiri ulamangne sembe ambatsukap,” aro ambarelamsibo aghana, “Ka'ebabo,” alamong.  
\v 9 El wamang ane sembe nuri a'undi ulamlomne sembe nen yubu tipto ambatsisebe koma babe hae sembamap. Nimiri a'un sembe el wamangdi lelamsiangne, nu a'unag yabuba, nu a'undi topsilumne sembe, “Wali kipsiek” aro a'un sembe nimiri lelamang. Nimiri a'un sembe yubu lelamangnena, “Tesalonika nimiri mem phalamekne laplobi agha samoro Allah ot nhonog kamagne ponekoag samoro yaekti, nimi yepsiro Allah omeklamang,” alamang.  
\v 10 Sindi babe yubu lelamangnena, a'un Tesalonika nimiri seneraglamlomdi, “Allahri Elme Yesus nimi teptobag agha kamag nembaogti, imag agha kiliro tobogpa, imag agha Yesus amik samoro yalul,” aro a'undi nang-nangaro ulamlomne sembe babe nimiri yubu lelamang. Yesus Allahri kamag nembaogne poneko, nu mog so'oag nimiri mali-malia ulamapne sembe Allahri, “Opsinun,” sembaog aghana, nu mog so'oag nimi pelebahainun aro Yesus nu lunuro tebaogti, kamag taogti, nu peleplamsil.   
\c 2  
\s1 Paulus as kota Tesalonika awe tobogne (2:1-12)  
\p
\v 1 Nangkabo, nuri Yesus sembe a'unag ambarel ahibunge, teba'en uro amberal ahibu kom. A'undam nimi elwamlom.\x - \xo 2:1  \xt Pogsiognang 17:4\x*  
\v 2 Nu anam Tesalonika a'unag yan komag as Filipi wamububa, nun san tiliplamsiekpa seklero wamubunge sembe a'un elwamlom.\x - \xo 2:2  \xt Pogsiognang 16:11-24\x* Nimi maiknori san tiliplamsiekti iriklamsiek aghana, Nuni Allahri nu wanaag log kom nembahiog. Log kom nembahiogpa, Allah Eldamne Yubu Walinge Yesusti nimi talulamsilne sembe a'unag ambarelahibu.\x - \xo 2:2  \xt Pogsiognang 16:40—17:3\x*  
\v 3 Nuri a'un ambarelamsibungena, ogtopne agha kom. Apna liptop yubu mane yubu agha ambatto, “Nimiri saeag agha walinge topsukap,” aro orolena yubu ambarelamsibu kom.  
\v 4 Nuri ambarelamsibunge nimiri, “Nun dam nimi sembe wana wali sembaukang,” aro ambarelamsibu kom. Nuri ambarelamsibungena, “Allah nu wanaag miplamsilne wana wali yeng sembalul,” aro ambarelamsibu. Nunag Allahri sembamsiognena, “Wali. Hae Yesus yubu walinge sembe ambatto sol wali uro sik uro sabo nembaukang,” sembamogpa ambarelamsibu.  
\v 5 A'un babe elwamlom. Nuri pamag agha “Nimiri wana topsukap,” aro emem arop yubu lerop kom. Apna nuri aboaba sembe tognoro nhon lenne babe orog. Allah nun ipsiogne wamla.  
\v 6 Nuri ulamubungena, a'undi babe, nimi orangeri babe, “Nu kibiang towalengkipsiseng,” aro ero ulamubu kom. Allahri samenag Yesus wepto “Nimi so'oag nimi taulbahimendi saelbamsululam,” aro poghogpa, El yaogne ponekori nu wepto pogsiogti, nunag mikipne tatsiog. Mikipne nunag tatsiog ane sembe nunag kwema ulamsoba, “Tatsiseng,” aro nuri a'unag molbahinep. Aghana a'unag molbahibu komne a'un elwamlom.  
\v 7 Mikipne nunag tatsiogneag agha a'unag molbahainep aghana, nu a'un anabiag wamubunge ilindi elme win-winna pia uropne saog uro piamsibu.  
\v 8 Nu a'unap nhon wamuburi, ulamubunge Allahringe Yubu Walinge pamag aghabog ambarelamsibu kom. Pamag agha ambarelamsibu kom aghana, a'un sembe o'ona senehinne loloro wamogpa, nia nuri nong mikipneag agha “Yepsukap” aro a'un sembe ulamuburi, ambarelamsibu.  
\v 9 Nu whin seklero ulamubunge nene sembe a'un ni elwamlom.\f + \fr 2:9  \ft Paulusti pham kon mektopne agha kalun ae sona ag wetnero soropne wamogti, awe tolamog aghana, Yahudi nimiri Allah yubu lerop sum yalamog tanena Paulus nenekori sop-sop Allah yubu lerop aeag wa'alamogti ambarelamsiog. (Pogsiognangdi Ulameka 18:3-4)\f* Allahringe Yubu walinge a'un ambarelamsibunge, “A'un nimi nhonag babe nu sembe saeagha seneragsukang kom,” aro sinag kweleknag whin seklero ulamubunge a'un elwamlom.  
\v 10 A'un Yesusag seneraglamlom nimi anabiag wamububa, a'undi haingdi babe iamsilumba, Allahri babe nu iamsiogpa ulamubu. A'un anabiag wamuburi, “Allahri uaukang senenne sunsunum uro uaukap,” senelamuburi sikne aghabog a'unag ulamsibu. Ane sembe nimi nhondi babe nuri a'un anabiag wamuburi, ulamubunge sembe “Malia-malia undo-undo ulamek,” senep kom.  
\v 11-12 Me ologne agha iliri yubu wenerop saog uro nuri a'un nimi nhon-nhon a'ero wenelamsiburi, a'un wana aingnilamsibu. Ane sembe nari “Sikne aghabog a'unag ulamsibu,” aro sik uro lelamnange sembe a'undi babe el wamlom. Eraruk uro wamlumba, yubu ambatto yeplamsibu. A'un wana ikin uro senelamlumba, wana aingnilamsibu. Sik komne salelamlumba, wenelamsiburi, “Nuri 'Unulamlulom,' aro ambarelamsibunge sunsunum uro ulapmundi, Allah wana yeng nembamlulom,” aro yubu mikip uro ambarelamsibu. Allahri a'un yoplamsildi, “Na Allahri yubu ka'ebamundi, Nandamne Yesus wepto pogsinge ponekoag sikne aro seneraglapmun tanena, Nari a'un wali uro saelbamsunun. Saelbamsineri, Nandamne imang wareropne ua urobag ya'ag nhon wamukap,” aro Allahri a'un yoplamsil. Ane sembe a'undi, “Allah wana yeng nenelamukap,” aro ulamlulom.   
\s1 “A'un sembe na awi uro wamna,” aro Paulusti ambatsiogha (2:13-16)  
\p
\v 13 Tam nhon wamlange uro yabionge nenda sembe Allahag “Nuniong, wah” aro sop-sop molona lero kiplamap. Tam neneko uro yabiongena, nuri Allah Yubu a'unag ambarelamsiboba, yubu ambarelamsibonge neneko sembe “Nimiri yubu mo,” semban koma lipsiom kom. Nuri yubu ambarelamsibunge neneko sembe a'undi “Sik uro Allahri yubu ambarelamsiang,” aro ka'ebaomdi saelbaom. A'undi Yesusag “Nimi so'oag nimi taluro saelbahainepne,” aro seneraglamlomba, Allahri yubu enekori a'un nongag awe tolamla.  
\v 14 Nangkabo, Yahudi nimi mog so'o Yudea wameknang agha Yesus Kristus ponekoag seneraglamekpa, Yesus Eldamneringe taek. Eldamneringe taek nimi tanekoag samenag Yahudi nimi agha Yesusag seneragtop kom nimiri sinag malia ulamsiek. Yudea mog so'oag agha babe Yesus Eldamneringe taek nimi tanekoag Yahudi nimiri malia ulamsiek saog uro a'un Tesalonika nimiag babe Tesalonika nimiri malia ulamsiong. A'un seklena seklelamomnena, a'un sisa nimiri ulamsiongba, seklelamom saog uro sin Yudea Allah Elmabo taek nimi babe sin sisa nimi Yahudi nimiri “Seklebaik” aro ulamsiek.  
\v 15 Undo unulamsiek nimi tanekori nu Saelba uahiropne Yesus babe obekti Allah silimu tiptop nang babe olamsiekti nu babe seklelamukang aro olamsiek. Sindi nimi ni sembe aisa nembamsiekpa sin sembe Allahri babe karong sembahaiog.  
\v 16 Unulamsiekti nimi tala-tala uropne Yahudi sisa kom nimiag Yesus yubu ambatto taluro sae kilihin yubu ambatsinepne neneko iriklamsiek. Sindi undo ununa aghabog ulamsiekti Yesus yubu ambatsinne iriklamsiek ane sembe sin Yahudi nimiri malia ulamsiekne neneko leng-lenga langaro walelaori teknebaoba, wene Allahri sinag tam ikinne pelengenne aghabog wamla.   
\s1 Paulusti wanaag agha nen Tesalonika nimi kemel phinun sembaogha (2:17-3:5)  
\p
\v 17 Nangkabo, a'un sembe “Nundam mabo,” senelamsiap pog, nimiri nunag malia ulamsiekne sembe nu sesog saog uro a'un laplobiagha yahiburi, haingdi ipsinep kom saog wamla. Haingdi ipsinep kom aghana, a'un sembe ekon tan koma wana to'opto o'ona senelamsiap. “Nu a'un wamlomag yaberi kemelahukap,” senelamobonge nu wanaag nubu uro lololtalamori, ngenohom alamsioba, otsik sol wali uro sunulamobo.  
\v 18 Nuri a'un kemelahukap sembabori, ik phende wilindi na yanun sembanori sumbano aghana, phia sikini nubunge ponekori nu ina irikahio.  
\v 19 A'un sik uro a'un nuri nimi wanaagne wamlomdi, nuri wana yeng sirikne nubu nembahaiomba, nuri wana a'unag wamla. Yesus nu saelba uahiropne poneko yalamle sumeneko a'un Yesus yubu mikip uro salelapmunne sembe wana yeng uro wamukap. El whingag nhon wameberi, a'un kembiagha, “Sol wali, wali uro ambatto tolamobonge wali uro tobirobo,” sembaukap. Ane sembe otsik uro a'un kemelahukap senelamobori sol wali uro sunulamobo.  
\v 20 A'undi nu wana yeng sirikne nubu nembahaiomba nuri wana a'unag wamlaba, a'un sembe seneraghi agha wali tolamobo senelamap.   
\c 3  
\p
\v 1 Nuri wene sembabonge neneko ta'apsenep kom uao. Ane sembe nuri seneraghabori na Paulusap Silasap, “As Atena mo wamnemeri,  
\v 2 nunkae Timotius mo pognunam,” sembanomo. Nunkae Timotius nunap Allahringe awe tolamubunge poglamnomori, “Yesus Allahri wepto poghogne poneko sembe yubu walinge Timotiusti ambarel philul,” sembanomori pognomo. “A'un Tesalonika nimiag ambarelamsileri, a'undi wanaag Yesus sembe seneragnange wembahileri, mikip nembahailul,” sembanomori pogholanomo.  
\v 3 Nuri poghol anomongena a'un Tesalonika nimiri Yesusag wana seneraglamlomne sembe seklenna a'unag lag taoba, “Yesus sembe ambarelamsiapne libukang kom,” aro Timotius a'unag pogholanomo. Yesusag sikne aro seneragtop nimiag seklenne lag talamlenge sembe a'undam nimi el wamlom.  
\v 4 Nu a'unap nhon wamuburi, samen anamag, “Nuri Yesusag sikne aro seneraglamapne sembe ora nimiri malia ulamsiikpa, seklelamukap,” aro ambatsibunge neneko sik uro wene a'unag uro yabalamlaba a'undi haingdi babe ililamlom.\x - \xo 3:4  \xt Pogsiognang 17:3\x*   
\p
\v 5 Ane sembe nari a'un sembe “Welaro wamang” senelamnori, ta'ap senep komdi, Timotius poghol anongena, “A'undi Yesusag wana seneragna kembahainun,” aro pogholano. Na log ulamneongena Yesus yubu saelbamlomne sembe nimiri a'un “Seklebaik,” aro ulamsiangba, phia sikini nubunge ponekori a'un sae kililamsileba, a'unag ambatsibunge “Libikag,” senelamnonge sembe Timotius pogholano.   
\s1 Paulus samen wamoghag Timotiusti samoro Tesalonika nimi sembe wana yeng nenehirop yubu ambatsiogha (3:6-13)  
\p
\v 6 Timotius pogholano aghana wene Timotius samoro yaori yubu walinge yeng sirikne a'undi Yesusag seneraglamlomdi nimi o'ona senero yepsinne ulamlomne sembe ambatsioba yeng senelamap. Wene senelamlomdi nu sembe wanaag uro seneraglamsilomba, “Nuri sinag pheberi, sinap nhon haiptahabe,” senelamap saog uro a'undi babe, “Sin nunag yahengba, haiptahabe,” senelamlom.  
\v 7 Ane sembe nangkabo, nimiri nunag malia ulamsiangba, nu ua unag erarukag seklena seklelamabag yubu a'undinge Yesusag seneraglamlomne neneri wana aingnilamsil.  
\v 8 A'undi Yesus nu Saelbamsilne ponekoag seneragna wamlaba, “Nuri ambatsibu yubu eneko ka'ero ulamangdi, Yesusap sae tiptangto seklamang,” aro nu babe wana aingniro kamag wamap senelamap. Ane sembe a'un otsik uro Yesusap sae tiptangto sekamlulom.  
\v 9 A'un Yesusap sae tiptangto wamlomne sembe nuri wana yeng along wamapti, nuri nongag mikipne ni wamlangeag agha a'un sembe Allah omeklamap aghana sunurop kom sembamap.   
\p
\v 10 Sinag kweleknag a'un sembe nu nong ningkiri Allahag molona mololamap nena, “Yesusag wana to'opto seneraglamangne sembe ekon uro wamikagti, nen haiptangto ma'aro wamseberi, Yesusag wana seneragna sembe nen ma'aro ambatsisebe,” senelamap.  
\v 11 Nuni Allah Eldamneap Elme Yesus nu Saelbamsilne ponekoapti nu ina pa'abatsurukang aro mololamsiapti, wali sembarikpa, a'un kemelahukap.  
\v 12 Nari yeng senelamnangena, Yesus nu Saelba uahiropne ponekori a'unag nimi o'ona senehinne ma'aro sirilamleri tarelamsileba, nuri a'un sembe o'ona senelamsiap saog uro a'undi babe a'un-a'un wana piptangka o'ona seneldalapmundi, nimi orange babe wanaag o'ona sembamsululom.  
\v 13 A'un sembe molbarelamsiapnena, “Yesus nu taluro saelba uahiropneri a'undi seneragna wana mikip nenelamsileri, Yesusti 'Tam karebanun,' aro yalamle sumeneko Yesus Elag seneragtop nimiap nhon yaikpa, Nuni Allah whingag malia uan koma wali uro wamlulom. Nuni Allah whingag wapmunba, a'un sembe 'Namabo' sembahilulba, nimi nhondi babe a'un sembe malinge uaong aro tam pimnep kom,” aro a'un sembe molbarelamsiap.   
\c 4  
\s1 Allahri wali senenne aghabog ulamlulom aro ambatsiogha (4:1-12)  
\p
\v 1 Nangkabo, nuri ambarelamsibunge, “Allahri uaheng senenne sunsunum uro otsik uro ulamlulom” aro ambarelamsibu. Nuri ambarelamsibunge sunsunum uro ul palamik kom nimi Allah wana wali nembanep kom. A'un wene nuri ambatto ulamobonge sunsunum uro ul palamlomne wali. Nuri a'unag Yesus nu saelbamsilne mikibag agha a'unag mololamsiapnena nen ma'aro wali uro ulbalamlulom.  
\v 2 Yesus nu saelbamsilne mikibag agha a'un haingag agha “Ualulom-ualulom,” aro ambarelamsibonge ka'ebaomdi, el wamlom ane sembe nen sol wali uro ul palamlulom.  
\v 3 Allahri seneropne ane: “Na Namabori Na wana yeng neneropne aghabog ulamukang,” senenne a'undi ulamlulom. Unulapmundi, a'undi salik-malik kelaboap nengaboap mapseng kom. Nengabo eldamneri kelap aghabog nhon ma'al talamtukangba, kel eneko ela'angeap aghabog nhon ma'al talamtukang.  
\v 4 Kabuniri kelabo toamle tanena ela'angeriba elkeldiba kelabo nengabo orange sembe “Topsisene, saelbahaisene,” aro wana sesog uro seneragna koma Allah wana wali nenenneap sik uropne nimi wana wali nenehinneap agha seneraglamlulom. Undo seneraglapmundi, ela'angeap elkelap nikag wamturom aro ma'amsika uro wali uro wamlulom.  
\v 5 Allah sembe ekon uro urop nimiri kelabo nengabo sembe Allah senenne semban koma “Saelbahisene” aro sindi wana yorolamsilba salik-malik kelabo nengabo tolamsiang aghana a'un Allah elmabo wamlom. Ane sembe Allah ekon uro urop nimiri ulamangne saog uro ulamseng kom.  
\v 6 A'un Yesusag wana seneragtop nimi wamlom ane sembe a'un kabo nimi haing pesah iogha lepsimundi a'un kabo ingisapsilo saog uro a'un kabori kelaboro sa'a-sa'a topsiseng kom. A'un kaboag otsikne agha ualulom. Tam nene sembe otsikne agha uamun kom tanena, a'un kaboag malinge uamunne sembe amik Yesus tam karepto nu saelba uahiropne ponekori a'unag tam ikinne piplul aro wenero ambatsibunge a'un elwamlom.  
\v 7 Allahri nun nimi yopsiogne, “Mali-malia ulamukang,” aro nun yopsiog kom. Nun yopsiognena Allahri “Nadamneri seneropne sunsunum uro ulamikti, yeng nembanukang,” aro yopsiog. Ane sembe, Allahri seneropne sunsunum uro ulapmun komdi, a'unkabo ingisapsilo saog uro ulapmunba, Allahri a'unag tam ikinne piplul.  
\v 8 Nengaboap kelaboap salik-malik ma'aptaheng kom aro ambatsinne nene sik uro lemna. Nimi etneri yubu ene sembe karong sembaleri liple tanena nimi agha karong sembaikti wa'epto libukang kom, aghana Eldamne Yame Walinge a'un tarelamsilne neneko Allah waepto ebukang. Ane sembe wali uro ka'eapmundi, yubu ene saelbamlulom. Nengaboap kelaboap ma'aptanepne sembe komopto ambatsin.   
\p
\v 9 Wene, a'undi o'ona seneltalamlomne sembe olog ambatsinun. A'undi a'un kabo Yesusag seneragtop nimi sembe wanaag agha o'ona seneptangka un yubu ene sembe Allahri a'un samenag elnembahaioba, wali uro ka'ebaomdi, yubu ene sunsunum uro ulamlom. Ane sembe o'ona seneptangka un yubu ene sembe a'unag nen sap mome toro pibukap kom.  
\v 10 Nimi wanaag agha o'ona senehinne yubu ene sembe a'un kabo Yesusag seneragtop nimi tala-tala mog so'o propinsi Makadonia wamang nimi sembe o'ona senelamsilomdi, uaom. Aghana nangkabo, nuri a'unag nen mololamsiapnena, “Nen tipto nimi o'ona senelamsumundi, walinge unne aghabog a'unag loloro wamleba ulamsululom,” aro mololamsiap.  
\v 11-12 A'undi “Uahabe,” ulomlulomnena, undo-undo ulamlulom. A'un aingniro wapmundi tam yogne ora nimiag uro yabalamlenge sembe salel wa'in koma, tam a'undinge ul palamlulom. Samenag nuri a'un ambatsibu saog uro, nimiri tisirikag agha a'un wamlulom kom aro ambatsibu. Ane sembe teko a'unag uahileagti, a'un dam nimi saeri ul piro wero mero tero wamlulom. Undo-undo unulapmunba, Yesus yubu ekon nimiri kembahikti a'un sembe sindi wali sembahaukang.   
\s1 Yesus, “Nimi so'oagne taulbahainun,” aro yaogne neneko nen yalulne sembe ambatsiogha (4:13-18)  
\p
\v 13 Nangkabo, nuri seneraglamapne nimi samenag tebaekne sembe a'un babe eltahom sembamap. Yesusag sikne aro seneragtop kom nimiri, “Teptop nimi nen kamag taukang kom,” aro amang ul palamang. “Kamag taukang kom,” aro amang ul palamang aghana a'un Yesus kamag taogne ponekoag seneragtop nimi wamlom. Ane sembe mog so'oag nimiri wene amang ul palamang saog uro ulamlulom kom. Sin samenag tebaekne sembe eltahom aro sik uro ambarelamsukap.  
\v 14 Nuri sik uro seneraglamapne Yesus tebaog aghana kamag taog aro seneraglamap. Ane sembe nuri seneraglamapnena Yesusag sikne aro seneragtop nimi tebaiik aghana nen amik Allahri kamag nembahaileba, Yesus nen samoro yalamle sumeneko Allahri embahaileba, Yesusap nhon yaukang.  
\v 15 Nimi nen amik kamag nembahailulne nene sembe Yesusti ambatsiogne nuri a'un ambarelamsiap. Nene sembe Yesus nu saelba uahiropne poneko amik nen yalamle sumeneko nu nimi kamag wamebengeri nimi teptopne amik nenelobiagha nun samenag Yesus whingag taukap kom.  
\v 16 Yesusti samenag yubu ambatsiogpa nen tipto ambarelamsinnena, Allah arukna malaikat sikindori Yesus yanepne sembe wene yalul anne el taukang aro yubu nubu uro yopsilul. Yopsileri, wa'en yubu lilim nubu uro ma'i saog uropne terompet phoalamlul. Terompet phoalamleba, mog so'o leksuluplamleba, Yesus nu taluro saelba uahiropne poneko Elmo imag agha kuluka yalul. Kuluka yalamleri, Yesusag seneragtop nimi samenag tebaek nimi samenag kamag nembahailul. \fig Malaikat sikindori Yesus yanepne sembe yubu lilim nubu uro ma'i saog uropne trompet phoalamlul.|alt="Trompet" src="co01082c.jpg" size="col" copy="David C. Cook" ref="1 Tesalonika 4:16" \fig*   
\p
\v 17 Tebaek nimi samenag kamag nembahileri, sinap nu li ko'o enekoag nu kamag wamebengeap toa nusam toman agha Allahri nu kiliro topsilul. Kiliro topsileba nu Saelba Uahiropne ponekoap imag haiptaberi, ya'ag elap wamukap.  
\v 18 Ane sembe a'un a'unkabo Yesusag seneragtop nimiap yubu nene elneneptangto nang-nang aro wapmundi, wana nubu neneptangkamlulom.   
\c 5  
\s1 Yesus nen amik yalulne sembe nang-nang aro wamukap (5:1-11)  
\p
\v 1-2 Nangkabo, a'un Yesusag senaragtop nimi wamlomne, Yesus nu Saelba Uahiropne poneko nen amik yalulne neneko sembe a'un tibin uro el wamlom. El samoro yan aloglulne neneko sembe hurop sum li ko'oag agha uro yabilul aro nimiri pimnep kom wamla. El yalul sumeneko nimiri, “Haoghaba tobukap,” aro inipnag nimiri aeag tognoro wa'irop saog uro wamlaba nimiri haing whi uro tibogto wamnep kom saog wamla. Haogha nimiri inipnag yingkirop saog uro Yesus samoro yaloglul ane sembe nuri a'unag nen tipto Yesus samoro yaloglulne neneko sembe, “Sumene li ko'oag agha uro yabilul,” aro mome toro pibaukap kom.  
\v 3 Nen amik yalul li ko'o eneko, nimiri lelamikti, “Wenena sa'a-sa'a yubu tananne orog wamlaba aingniro wamap,” alamik abene malia urop nimi kom nembahinep sum waleloglul. El yan aloglulne nenekona, kelabo me monag wamnaba, “Sumene sum mangaroanun,” sembamna komag agha lo'om alognari me mangaltoropne saog uro waleloglul sum Yesus nen yale sum eneko wamla. Yesus nen yale sum malia urop nimi kom nembahinep sum eneko walelogleba, Yesus yubu walinge ka'erop kom nimi el whingag agha la'aniptaukang kom.  
\v 4 Aghana nangkabo, a'unna inibinag urop nimi saog uro wamlom kom. Ane sembe a'un haing whi uro wapmundi, were tibog amlulom. Ae ngainge haogha nimi yalenge neneko sembe ekon uro wamleba, haogha nimi ae kwerekto wa'iro yaleri, ae ngainge yame yagsileba, lo'om sulul. Aghana a'un inibinag urop nimi saog komdi, Yesus yanepne sembe wali uro nang-nang aro tibogapmunba, Yesus nen yanalogleba, lo'om sululom kom.  
\v 5 A'un ni nimi tibinneog wamlomdi, walinge aghabog uro wareropneog ulamlomba, nunna nimi inibinne inipnagtinge kom.  
\v 6 Ane sembe nunna nimi inibinne inipnagne wamap komdi, nimi orange malamang saog uro malamukap kom. Nun mamna koma haing whi uro wamebeberi wero tibogto wamukap.  
\v 7 Nimi yoaba urop nimi taneko Yesus yanepne sembe wero wamna koma inipnag malamang. Ora nimiri inipnag mag yonge tero ulamangne sembe nenek saelbahirop.  
\v 8 Nunna nimi tibin nimi warerop nimi wamap ane sembe nuri seneragna babe tibin uro seneragtop nimi wamukap. Mal tarop nimiri, “Mal tabukap,” aro wero ulamikti, seng enekamikti, “Mal homamangag teklemna wapsikag,” aro ngang kwhena kwhelamang. Mal tarop nimiri wero ulamangne saog uro nuri babe wero tibogto wamebengena, Yesusag sikne aro seneraglameberi, Allahap nimiap o'ona senelamsibenge agha seng enektop nimi saog uro wali uro wero wamukap. Mal tarop nimiri ngang kwhena kwhelamang saog uro nun dam nimiri Yesusag seneraglamebengeag agha pelebel talamukap. Peleptanepne seneraglamukapnena, “Yesus yaleri, nu pelepto taulbahileba, Allahri nu opsilul kom,” aro tiboglamapneag agha nuri usoghag babe mal kaunguro timbaneba kalulamap. Undo seneragto o'ona senelamsiberi, Yesusag seneraglameberi, tibin uro seneragto Yesus yaleri, pelebahilulne sembe tibogto wamukap.  
\v 9 Allah nu wepsiogne ponekori nunag, “Tam ikinne pimnun,” aro nu wepsiog sembaheng kom. Allahri nu wepsiognena, Allahri Yesus wepto poghogpa, nunag yaogti, nu talulamsildi, saelbamsil. Nu saelba uahiropne Yesus pere agha Allahri nu “Yesusag seneragtop nimi taulbahinun,” aro wepsiog. Taulbahinun aro wepsiog nimi wamap, ane sembe Yesus yaleri, pelebahileba, Allahri nunag tam ikinne piplul kom aro tibogto wamukap.  
\v 10 Yesus El tebaogne nu sembe tebaog. El yalamle sum eneko nu kamag wamapneap nu teptopneap Elap nhon wamukap aro samenag tebaog.  
\v 11 Ane sembe wene ulamlom saog uro nen tipto a'un-a'un weneldalapmundi, mikip neneltalamlulom.   
\s1 Mome ene sembe Paulusti Tesalonika nimi wenehirop yubu komoptobag pibogne (5:12-28)  
\p
\v 12 Nangkabo Yesusag seneragtop nimi wamlomne, nuri a'unag molorop yubu a'unag palilamapne ane. Nu saelba uahiropne Yesus ponekori a'un anabiag nimi etpare wamangne sinag mikipne palilamsilba, sin a'uniyabo saog uro wamang. Sinag mikipne palilamsil nimi tanekori a'unag Allah yubu wenehirop yubu ambarelamsiangdi, a'un sembe awe tolamang ane sembe, “Wali uro ka'eamsimundi, kiplamsilulom,” aro mololamsiap.  
\v 13 Sindi Allah yubu a'unag ambatto awe tolamang ane sembe, a'undi sin o'ona senero paliag nenero nimi wanaagne nembamsululom. A'un anabiag wamang nimiap wana aingniro nimi wanaagneog seneldalamlulom.  
\v 14 Nangkabo, nuri a'unag wenehin yubu olog wembahaukapnena ane. A'un anabiag sol mali aro awe torop kom nimi wamikne wenelamsululom. Wana ikin uro urop nimi wamikne wana keagman nenelamsululom. Mikip kom uro urop nimi wamikne yeplamsululom. Nimi niri ulamikne sembe wana palingkina wali uro ulamlulom.  
\v 15 Nimiri a'unag malia ulamsikpa, “Nuri babe taongoro malia uakap,” aro ulamseng kom. A'un-a'un walia aghabog ulapmundi ni nimiag babe walia aghabog ulamlulom.  
\v 16-18 Eraruk uro wapmunag, wali uro wapmunag Allahri a'unag ulamlange sembe, “Walinge aghabog ulamla,” aro awi sembamlulom. Awi sembapmundi, Allahag molona sop-sop sinag kweleknag ta'ap sen koma mololamlulom. A'un undo wapmundi ulapmun tanena Allahri a'un sembe wana awi sembamsilul. Sembamsilengena, “Nari weptopne Yesus mog so'oag pogsingeap sae tiptangtop nimi wamangdi, walia ulamang,” aro a'un sembe wana awi sembamsilul.  
\v 19-20 Allah Yame Walingeri nimi wanaag yubu elnenelamsilba, nen tipto yubu ambarelamsik tanena salero ka'eban koma yubu ene sembe teba'en sembaheng kom. Allah Yame Walingeri tarelamsil yubu eneko auk pok saog uro wamlaba, oro niknibaheng kom.  
\v 21-22 Allah Yame Walinge oro niknibaheng kom aghana, ka'eapmundi, nia ni wali uro seneragto, malinge sik urop komne, “Nunag taleag,” aro weag nembamlulom. Sa'a-sa'a ka'eapmundi, nelagha wali aro kemelbina walinge sik uropne aro seneraglapmun tanena walinge aghabog a'unag wamlul.   
\p
\v 23 Nuri a'un sembe Allahag molbarelamsiapnena, Allah Eldamne nu wana aingnilamsilne ponekori a'un sik uro urop nimi nembahileba, Allah Eldamneri mabo wapmundi Eldi uaheng senenne sunsunum uro ulapmundi, wamlulom. Undo wapmunba Allahri a'un yae piamsileba, a'undi seneragnaap, a'undi wanaap, a'undi nong ningkiap yae piptangkamlulom. Allahri a'un yae piamsileba, yae piptangkapmunba, Allahri wepto poghogne Yesus nu saelbamsilne poneko yalamle sumeneko nimi nhondi babe a'un sembe “Malia uaong,” senep kom. Abene nuri a'un sembe Allahag molbarelamsiap.  
\v 24 Allahri “Naringe taukang” aro a'un yopsiogpa, Eldi salag pibogne neneko angaro yabinep komdi otsik uro ualul.   
\p
\v 25-26 “Nu Yesusag seneragtop nimi wamap,” aro a'un-a'un eldo ilipsae saog neneptangka wapmundi, eldo ilipsae somoro kiptangtop saog uro kibiltalamlulom.  
\p Nangkabo, nu sembe Allahag molona lelamsululom.  
\v 27 Nari a'unag mololamsinnena Yesusti nanag “Ambatsululam,” aro mikipne nanag pimneongeag agha mololamsin. Mome nari palilamnange nene “Yesusag seneragtop nimi niri ka'ebaukang,” aro sin ni whingag agha mome lilim lelapmunba sindi babe ka'elamukang.  
\v 28 A'un sembe molbarelamsiapnena, Allahri wepto poghogne Yesus nu talulamsildi, saelbamsilne poneko wana waliri a'un yepto piamsilul aro molbarelamsiap.  
\p Abenda.