\id REV  
\h Wahyu 
\toc1 Wahyu 
\toc2 Wahyu 
\toc3 Wah. 
\mt2 Makromod Yesus nalhari panaeku Yohanis mehen do'on 
\mt1 Wahyu 
\is1 Horok Lirna La'an 
\ip Horok eniyeni na'ono panaeku man Makromod Lalap nalhari Yesus Kristus leke Ai nalhari wali'ur laa Yohanis (1:1). An kukunohi Yohanis inhawe ma namwali Ai kemen lere man mai. 
\ip Dedesne An kukunohi nahenia Ai namwali Ri Mormori Anan ma namriri lolo wadu wo'ikku toro (1:12-16). An kukunohi nahenia Ai namwali Pipdumana ma namririnohi Makromod Lalap Nin naikoronno lolo a'am raram (5:6-14). An kukunohi nahenia An ha'a kuda wawarha namwali uluwakun ara man hi'i ha ma namlolo mamani lolo ara (19:11-16). An kukunohi nahenia Ai namwali Pipdumana ma nodi molollo noro Makromod Lalap lolo kota Yerusalem Worworu man moumou dewdewe (21:22-23; 22:1-5). 
\ip Ler hi'i horok eniyeni ma nodi molollo hair Roma hopon ri na'akeme ra'uli rasa'a rai lalap Kaisar, maa ri Kristen ramhene. Hi ra'aheni kan wa'an ra'uli rasa'a Kaisar ono Yesus mehe namwali rir Makromon, de hir lernala wewerek pananaka la heruwali resnedi. Maa ri Kristen heruwali sopoledi hi akin ma naili'il, de wali kili'urn ono ramka'uk hair Roma. Ende Yohanis na'alap ri Kristen akin lolo horok eniyeni leke hi ramkene akin naili'il Yesus. 
\ip Panaeku ma na'ono lolo horok eni heheni: Lolo noho wawan eniyeni ri man lernohi Yesus lernala wewerek pananaka, maa yon ik lari nano ik akin ma naili'il eni, ono lere man mai Makromod Yesus narehiyedi Nin arwali na'akeme, la Ai penia ma nodi molollo laa ewi-ewi (11:15)! Enla lere man mai ik man lernohi Ai mamani koro Ai kodi molollo wewerre. 
\ip Horok eniyeni wekel kota wo'ikku noro Makromod Lalap Nin Roh wo'ikku (1:4, 11); wekel rere'e haharu wo'ikku (1:3; 14:13; 16:15; 19:9; 20:6; 22:7; 22:14); noro lira u'uli sasa'a laa Makromod Lalap wo'ikku haenhi (5:12; 7:12); wadu onno wo'ikku (1:12), noro ha namehin nammori haenhi (1:16; 5:1, 6; 8:2; 12:3; 15:6-7; 17:9). Nomor wo'ikku onne wekel ha man moumou dewdewe la man kukkuku noknokor wake'e. 
\is1 Horok Ihin 
\io1 1. Yohanis nala wanakunu man hari horok eni (1:1-8). 
\io1 2. Yohanis wakunu panaeku dedesne (1:9-3:22): 
\io2 a. Yesus namwali Rimorimori Anan ma namriri lolo wadu onno wo'ikku toro (1:9-20). 
\io2 b. Yohanis horok Yesus Lirna lolo horok wo'ikku aku laa kerei raramne ma aile kota wo'ikku (pnk. 2-3). 
\io1 3. Yohanis wakunu panaeku rewro'o nine (4:1-16:21): 
\io2 a. Yesus namwali Pipdumana ma namririnohi Makromod Lalap Nin naikoronno lolo a'am raram (pnk. 4-5). 
\io2 b. Pipdumana hari segel wo'ikku (6:1-8:5). 
\io2 c. Kowuri wo'ikku rouwedi (8:6-11:19). 
\io2 d. Tanada wo'ikku kukunohi inhawe ma namwali lere man mai (pnk. 12-16). 
\io1 4. Yohanis wakunu panaeku rewkelu nine (17:1-21:8): 
\io2 a. Yohanis do'on maekyak ma naran Babel (17:1-19:10). 
\io2 b. Yesus naikoro kuda la rehiyedi Nin arwali na'akeme (19:11-21:8). 
\io1 5. Yohanis wakunu panaeku rew'akka nine (21:9-22:5): 
\io2 a. Yohanis do'on maeke ma namwali Pipdumana hono, ai naran Yerusalem Worworu (21:9-21:27). 
\io2 b. Yohanis do'on oir wauwau ma nala or'ori dardari (22:1-5). 
\io1 6. Yohanis nala nounaku man horu (22:6-21). 
\ie  
\c 1  
\p  
\v 1 Horok eniyeni ihin na'ono panaeku man Makromod Lalap nalhari Yesus Kristus, lekpananne Ai nalharile Nina hophopon wahwahan enihe inhawa ma ka nalo'ol namwali me'e. Enpenia Yesus Kristus hopon Nina hophopon a'am raram nodi Lir onne mai konohi ya'u. Ya'u eni, Yohanis ma namwali Nin hophopon wahwahan.  
\v 2 Enla ha wo'ira na'akeme i dodo'on dederne ya'u kukunohi la horok mouwedi. Ha na'akeme eni Makromod Lalap Lirna noro idewe inhawa Yesus Kristus nalhari maya'u. 
\p  
\v 3 Inhoi lese horok ma namwali nabi lirna eni lolo heri kalarna, ai akin nahuwa'anedi. Enla inhoi derne nakanie, ai akin nahuwa'anedi haenhi, ono ka nalo'ol ha eniyenihe na'akeme namwali me'e. 
\s1 Yohanis aku nina tape masi laa kerei wo'ikku 
\p  
\v 4 Konohiyala i wal'uhe, kerei wo'ikku raramne man aile lolo propinsi Asia. Ya apanak Makromod Lalap man aile nonolu, man aile lere eniyeni, la man aile laa ewi-ewi nala Nin rere'e haharu noro Nin wawa'an rara'e ki mi. Na'amoli mim lernala rere'e haharu noro wawa'an rara'e nano Roh wo'ikku man minle Makromod Lalap Nin naikoronno kalarna,  
\v 5 la nano Yesus Kristus man kuku kalla maika. Ai onne namkene kukunohi Makromod Lalap Nina wanakunu ma namlolo mamani maika. Ai penia man mori wali'ur nano makmaki, la An mori noluwedi ri man maki na'akeme, la nodi molollo rai noho wawan na'akeme. 
\q1 Yesus Kristus naramyaka ika, 
\q2 la rarna nakliuwedi 
\q2 leke huri ika nano dohohala nin molollo. 
\q1  
\v 6 An hi'i ik kamwali hair ida, 
\q2 la kamwali imam-imam man ilitolle Aman Makromod Lalap. 
\q2 Ende ka'uli kasa'a Yesus man kulu narehi lap narehi, 
\q2 la ma nodi molollo laa ewi-ewi. Amin! 
\q1  
\v 7 Loi honorok wawa'an! An mai lolo hulik loiloi kakam larlari raram, 
\q2 la ri lolo noho wawan na'akeme do'on Nin mamai eni. 
\q2 Ri man nonolu kadiyesne, do'on haenhi. 
\q2 Enla ri mormori nano hair na'akeme do'on Ai de rahere. 
\q2 Ya, namlolo kokkoo namwali! Amin! 
\p  
\v 8 Makromod Lalap na'aheni, “Ya amwali Alfa noro Omega.\f + \fr 1:8 \ft ‘Alfa noro Omega’ onne nin panaeku Yunani nin huruf dedesne noro huruf man ka'ili'ur nano hirira abjad. Onne nin panaeku Makromod Lalap namwali man dedesne noro man kauli'ur.\f* Ya amwali man aile nano nonolu, man aile lere eniyeni, la man aile laa ewi-ewi. Ya'u peni Makromod Lalap Ma Nodi Molollo Narehi Nalewen Na'akeme.” 
\s1 Yohanis do'on Yesus mai nalhari kemen 
\p  
\v 9 Maya'u, Yohanis, yo oro i wal'uhe kamwali mahaku lolo Yesus Kristus. Ik lernala wewerek pananaka wewerre, maa ik kamkene kerhu ono kamwali Nin ri. Man panulu lolo hair Roma ra'ahan maya'u, ono i loikaruwedi Makromod Lalap Lirna Wawan noro panaeku man Yesus konohiyedi maya'u me'e, de hi rodi ya'u laa sopoledi lolo noho Patmos.  
\v 10 Ler ida, alam domeku, Roh Kudus nodi molollo ya'u, mene i derne Lir ida man lap naise kowuri lirna lolo ya'u kili'urne,  
\v 11 na'aheni, “Horokedi inhawa man om dodo'on, la aku horok onne laa kerei wo'ikku raramne enihe: Epesus, Smirna, Pergamus, Tiatira, Sardis, Piladelpia, noro Laodikia.” 
\p  
\v 12 Enime'ede ya'u po'on laa kili'uru, leke po'on inhoi wakunkunu noro ya'u. Ya'u po'on wadu onno wo'ikku rodi maha hi'ie.\fig Wadu onno wo'ikku|src="BK00154B.tif" size="span" ref="Rev. 1:12-14" \fig* 
\v 13 Lolo wadu onno wo'ikku toro onne, i do'on ri ida naise na'oi Ri Mormori Anan namririri aile. An nair nainair man sorsoru rakan ein kawin, la kornelhe rodi mahe hi'ie ra'akerkerhe irhun makan.  
\v 14 Murukne wawarhe naise awaha lue, la makan siksika naise aiye man mormori.  
\v 15 Ein ad'ada naise pirmere man rala nano aiye raram, la Lirna lapa naise oir rulu lapa.  
\v 16 Liman malanne nasalsala kaliyoro waku wo'ikku, la raa ma namlorno wali-wali namhara nano nuranne, la oin makan siksika naise lere ma na'inuknukue.  
\v 17 Ya'u do'on ri onneni ne, ya alwali yawa ahinononow naise ri man makie, maa Ai nala liman malanna parhu maya'u na'aheni, “Yono mamkauk! Ya'u penia ma nolu, man kauli'ure,  
\v 18 la man mori eni. Po'onala! Lere man laa onne, Ya'u maki, maa lere eni Ya'u mormori laa ewi-ewi. Ya asala konse rodi hari makmaki onno nin nika, leke ri man makiyedi ramhara enne la mori wali'ur. 
\p  
\v 19 Ende horokedi ha wo'ira om dodo'on eni na'akeme, ha ma namwali lere eniyeni noro idewe ma namwali lere man mamai.  
\v 20 Kaliyoro waku wo'ikku Ya asasale i lim'u malanna noro wadu onno wo'ikku onnenihe, ri ka nauroin onne nin panaeku makun, de Ya'u konohi o nin panaeku. Kaliyoro waku wo'ikku onnenihe na'ono Makromod Lalap Nin hophopon wo'ikku ma nadiyaka kerei wo'ikku raramne, la wadu onno wo'ikku onnenihe na'ono kerei wo'ikku raramne haenhi.” 
\c 2  
\s1 Aku horok laa kerei raramne ma aile kota Epesus 
\p  
\v 1 Makromod Lalap Anan hopon ya'u na'ahenia, “Horokedi I Lir'u eni aku laa Makromod Lalap Nin hophopon man leluwai makrana kerei raramne ma aile kota Epesus ma'aheni: 
\pi1 Wanakunu Lirna eniyeni mai nano Makromod Yesus ma nasala kaliyoro waku wo'ikku lolo liman malanna, la ma nala'ala'a lolo wadu onno wo'ikku rodi maha hihi'ie raram onne. Ai na'aheni,  
\v 2 ‘Ya auroin minim hini'ie. Mi mampe'el howok Ainu'u honowok, la mamkene akin naili'il Ya'u mamani, kade lernala apinpinha. Ya auroin mi kam suk ri man ailanna haenhi. Ri man kokpoho ra'aheni hi ramwali hophopon ma nodi Yesus Lirna Wawa'an enihe, mim kenedi me'e, de mauroin mouropo nahenia hi rapoho.  
\v 3 Kade rin hi'i apipinha mi ono mi akim naili'il Ya'u, maa mi kam ren howok Ainu'u honowok.  
\v 4 Enimaa, Ya akin werek ono mi ka maramyak Maya'u, la mi ida ma ka naramyaka ida naise nonolu eni.  
\v 5 Ende yon hamlinu minim hini'i man wa'an nonolu eni. Herre minim morimori ma ka namlolo eni, la maramyaka Ya'u noro ri namehin wali'ur naise nonolu eni, kalo'o Ya'u mai aledi minim wadu onno nano onno onneni.  
\v 6 Enimaa minim hini'i man wa'an aile haenhi. Mi kam suk man lernohi Nikolaus\f + \fr 2:6 \ft ‘Man lernohi Nikolaus’ wekel ri man lernohi ri ida naran Nikolaus nin wanakuku. Ai nala wanakuku man sala nahenia man lernohi Yesus enihe hurinohi ri holi yak leke yak ra'alehe hunukum. 1) Hir wakuku nahenia ri ma akin naili'iledi Yesus rir dohohala ra'ohu rahaledi me'e, de hir huriyedi leke hi'i ha naise holi diwar dawar, la 2) hir pene'ek nahenia lere hir minle noho wawan makun, hi kemen ka namwali ha ma na'ono, ono lere man mai hir lernala kemen worworu.\f* rir hini'i wenewhe. Ka'u suk onne haenhi. 
\pi1  
\v 7 Lo'o mi kilinum aile, dernala! Makani wawa'an inhawa man Roh Kudus na'aheheni laa Nin kerei raram na'akeme: 
\pi1 Inhoi rehi ara noro Hayakyak Makromon, Ya'u hurinohi ai na'an Makromod Lalap Nina au woi ma nala or'ori dardari man aile Makromod Lalap Nin Kirna Firdaus.’ ” 
\s1 Aku horok laa kerei raramne ma aile kota Smirna 
\p  
\v 8 Enime'ede Makromod Lalap Anan hopon ya'u na'ahenia, “Horokedi I Lir'u eni aku laa Makromod Lalap Nin hophopon man leluwai makrana kerei raramne lolo kota Smirna ma'aheni: 
\pi1 Wanakunu Lirna eniyeni nano Makromod Yesus ma namwali ma nolu, la man kauli'ur, man makiyedi, maa mori wali'ur. Ai na'aheni,  
\v 9 ‘Ya auroin minima sus na'akeme, la mi ma'alehe haida-haida haenhi. Maa mim kokaledi Makromod Lalap Nin rere'e haharu nammori me'e, de mim karuwedi me'e! Ya auroin ri nodi wanakunu nano'onyaka mi mamani. Ri eniyenihe ra'aheni hi ramwali ri Yahudi, maa ka, hi eniyenihe lernohi Hayakyak Makromon nina mukue! 
\pi1  
\v 10 Yono mi mamka'uk lerkuku apinpinha wo'operperi. Madiyaka mi memen! Ka nalo'olala Hayakyak Makromon lo'o hi'i minim arwali kele mi heruwali rodi laedi bui raram. Hir ken mi rakan alam idaweli leke yon mi akim naili'il Maya'u. Yono mi akim nahinuri Maya'u, kade hi resne mi. Na'amoli Ya ala mi or'ori dardari ma kan horu ma namwali minim mahmaha kolkoli. 
\pi1  
\v 11 Lo'o mi kilinum aile, dernala! Makani wawa'an inhawa man Roh Kudus na'aheheni laa Nin kerei raramne na'akeme: 
\pi1 Inhoi rehi ara noro Hayakyak Makromon, ai kan lernala apinpinha nano makmaki rewro'o nine.\f + \fr 2:11 \ft ‘Makimaki rewro'o nin’ po'onala lisar 20:6; 20:14; 21:8 haenhi.\f*’ ” 
\s1 Aku horok laa kerei raramne ma aile kota Pergamus 
\p  
\v 12 Enime'ede Makromod Lalap Anan hopon ya'u wali'ur na'ahenia, “Horokedi I Lir'u eni aku laa Makromod Lalap Nin hophopon man leluwai makrana kerei raramne lolo kota Pergamus ma'aheni: 
\pi1 Lira eniyeni nano Makromod Yesus ma namwali ma nasala raa ma namlorno waliwali onneni. Ai na'aheni,  
\v 13 ‘Ya auroiroin nahenia kade i wal'uhe minalle noho man Hayakyak Makromon nodi molollo, maa mi akim ka nahinuri Ya'u. Enla mi akim ka nado'o kade mim po'on hi resne Antipas, Ainu'u man kuku maka, lolo Hayakyak Makromon nina noho miminlole. Antipas onne kan ren konohi Ainu'u panaeku ri. 
\pi1  
\v 14 Enimaa mim hi'i ha ida woro'o man hi'i Ya akin werek: Nano mi, heruwali lernohi Bileam\f + \fr 2:14 \ft Bileam noro Balak enihe: po'onala Bil. 22:1-6; 25:1-3; 31:16.\f* nina wanakuku. Nonolu eni Bileam wakuku Balak kalla rodi kokwudi ri Israel de hi'i dohohala. An norikama hi ra'an teitei nin laulauhu rodi hohoi kakani lernulu aukerhe, la koko hi leke ida man holi diwar dawar noro ida haenhi.  
\v 15 Naise onneni, mi heruwali lernohi Nikolaus nina wanakuku ma ka namlolo haenhi.  
\v 16 Ende Ya a'aheni, “Herredi minim morimori ma ka namlolo onne here! Lo'o ka, Ya'u mai ki mi, la Yo odi raa ma namhara nano I nuran eniyeni leke Ya a'ara noro ri man ailanne onnenihe.” 
\pi1  
\v 17 Lo'o mi kilinum aile, dernala! Makani wawa'an inhawa man Roh Kudus na'aheheni laa Nin kerei raramne na'akeme: 
\pi1 Inhoi rehi ara noro Hayakyak Makromon, Ya ala leken na'an manna\f + \fr 2:17 \ft Nonolu ‘manna’ onne namwali hanana'an man Makromod Lalap nala kopur nano a'am raram mai Israel enihe lolo noho mamun.\f* man susuwar aile a'am raram, la Ya ala hi dohodoho waku wawarha ida, la rala naran worworu hi horokedi ai lolo waku onne haenhi. Ri man kokala waku onne mehe nauroin naran worworu eniyeni, ri namehin ka.’ ” 
\s1 Aku horok laa kerei raramne ma aile kota Tiatira 
\p  
\v 18 Makromod Lalap Anan hopon ya'u wali'ur na'ahenia, “Horokedi I Lir'u eni aku laa Makromod Lalap Nin hophopon man leluwai makrana kerei raramne lolo kota Tiatira ma'aheni:\fig Kerei wo'ikku man minle kota wo'ikku lolo Asia Tatana|src="Kisar HK00378b.tif" size="col" ref="Why. 2-3" \fig* 
\pi1 Wanakunu eniyeni nano Makromod Lalap Anan. Ai makan siksika naise ailere, la ein naise pirmere man ad'ada ono adi'adie.  
\v 19 Ai na'aheni, ‘Ya auroiroin minima hini'i, de Ya auroin mi maramyaka Ya'u, la mamkene lernohi Ya'u. Mim ilitolle Ainu'u honowok wawa'an, la mi akim ka nado'o lere mim lernala wewerek pananaka. Enla lere eniyeni Ya auroin mim hi'i ha onneni narehiyedi lere dedesne mi akim naili'iledi Ya'u,  
\v 20 maa Ka'u suk minim hini'i ida. Mim hurinohi maekida ma naran Isabel wakuku ri lolo minim kerei raram. Ai na'aheni ai namwali Makromod Lalap Nina nabi, maa ka namlolo. Nano nin wanakuku onne an nori Ainu'u hophopon wahwahan enihe leke hir holi yak leke yak la ra'an teitei nin laulauhu rodi hohoi kakani lernulu aukerhe.  
\v 21 Kade Ya aledi ai leken paharin herre nin morimori ma ka namlolo onne me'e, maa ai namhene.  
\v 22 Ende mahinorok wawa'an! Ya'u lo'o hukum ai ala kini'ir man werek, la lo'o man holi yak leke yaka noro ai kan herre rir morimori onne, Ya ala apinha wo'operi hi.  
\v 23 Ye esne mouwedi nin man lernohi enihe, penia man lernohi Ya'u lolo kerei raramne na'akeme lo'o rauroin mouropo nahenia Ya'u penia man do'on auroin ri na'akeme honorok akin. Ya'u lo'o herre walha mi dohodoho minim hini'i. 
\pi1  
\v 24 Enimaa, mi ri heruwali lolo Tiatira kam lernohi Isabel nin wanakuku ma ka namlolo onne. Mi mamhene lernohi Hayakyak Makromon nina wanakukue man ri heruwali ra'aheni namwali ha man suwsuwar la man rorom. Enpenia ka apanak mi modi ma'uwara yodiwara man werek me'e,  
\v 25 maa ya apanak eni mehe: mi akim namkene lernohi inhawe mi mauroinedi me'e rakan lere Ya'u wali mai. 
\pi1  
\v 26-27 Inhoi rehi ara noro Hayakyak Makromon, la hi'i Ainu'u panaeku rakan lere man horu, Ya ala molollo hi namnenehe molollo man Ya Am'u nala Maya'u eni, leke hi rodi molollo hair-hair. 
\pi1 Hi rodi molollo naisa wonokon mermere,\f + \fr 2:26-27 \ft Wanakunu Yunani: “rodi auke'eke'en rodi pesi hi'ie rodi molollo.”\f* la ra'awoir rir arwali naise ri ma naiye'er rana dale.\f + \fr 2:26-27 \ft Po'onala Mzm. 2:9, Why. 12:5; 19:15.\f* 
\pi1  
\v 28 Enla Ya ala kaliyoro nokimur hi.\f + \fr 2:28 \ft Onne nin panaeku ‘leke namwali tanada nahenia hi rehiyedi ara nano arwali me'e.’\f* 
\pi1  
\v 29 Lo'o mi kilinum aile, dernala! Makani wawa'an inhawa man Roh Kudus na'aheheni laa Nin kerei raramne na'akemeni.’ ” 
\c 3  
\s1 Aku horok laa kerei raramne ma aile kota Sardis 
\p  
\v 1 Makromod Lalap Anan hopon ya'u wali'ur na'ahenia, “Horokedi I Lir'u eni aku laa Makromod Lalap Nin hophopon man leluwai makrana kerei raramne lolo kota Sardis ma'aheni: 
\pi1 Lir eniyeni Makromod Yesus Lirna. Ai onne ma nodi molollo Makromod Lalap Nin Roh Wo'ikku, la ma nasala kaliyoro wo'ikku enihe. Ai na'aheni, ‘Ya auroin minima hini'i. Ri na'aheni mim mori wawa'an, maa mi honorok akin makiyedi me'e.  
\v 2 Ende mahinorokedi here, loi honorok wawa'an! Ma'alap mi akim leke naili'il Ya'u wawa'an, kalo'o mi akim ka naili'il Maya'u me'e, ono Ya'u do'onedi minim hini'i na'akeme me'e, la minim hini'i onne ka namlolo lolo Ya Am'u, Makromod Lalap kalarne.  
\v 3 Ende horhorok wanakuku mim dernedi la kokaledi nonolu me'e. Yon maprehen lernohi wanakuku onne, la herre minim morimori ma ka namlolo onne. Lo'o mi ka madiyakyaka mi akim wawa'an, mamlilinnohi Ya'u mai oro mi pakromo. Ainu'u mamai onne naise ma namna'a, ono mi ka mauroin ma'anana lo'o Ya'u mai.  
\v 4 Enimaa nano mi man minle Sardis, ri heruwali radiyaka hi honorok akin wawa'an naise ri nadiyaka rir nainair leke yon morso. Hi radiyaka kemen leke hirira morimori moumou dewdewe. Ende hi onne rala'a wewerre noro Ya'u, la hir nair nainair wawarha man siksik lerlere, ono hir hi'iyedi ha ma namlolo lolo Makromod Lalap kalarne me'e. 
\pi1  
\v 5 Inhoi rehi ara noro Hayakyak Makromon, Ya ala nainair wawarha an naire haenhi. Ya'u ka esne naran nano \it Horok Or'ori Dardari\it* rakan laa ewi-ewi,\f + \fr 3:5 \ft Lolo Horok eni ri man lernala or'ori dardari naranhe aiyedi me'e. Po'onala Why. 13:8; 17:8; 20:12, 15; 21:27.\f* la Ya'u konohi Ya Am'u noro Nina hophopon a'am raram hi ramwali Ainu'u ri. 
\pi1  
\v 6 Lo'o mi kilinum aile, dernala! Makani wawa'an inhawa man Roh Kudus na'aheheni laa Nin kerei raramne na'akemeni.’ ” 
\s1 Aku horok laa kerei raramne ma aile kota Piladelpia 
\p  
\v 7 Makromod Lalap Anan hopon ya'u wali'ur na'ahenia, “Horokedi I Lir'u eni aku laa Makromod Lalap Nin hophopon man leluwai makrana kerei raramne lolo kota Piladelpia ma'aheni: 
\pi1 Wanakunu eniyeni Makromod Yesus Lirna, Ai penia Man Moumou Dewdewe la Ma Namlolo. Ai nasala konse man nonolu eni rai Daud nasaledi me'e. Lo'o An hari nikida, ri mahaku ka nodi molollo eleke, la lo'o An elekedie, ri mahaku ka nodi molollo harie.  
\v 8 Ai na'aheni, ‘Ya auroin inhawa mim hi'iyedi me'e. Ya auroin minim ruri pe'el ka nammori, maa mim lernohi I Lir'u mamani, la mi ka mamka'uk konohi ri nahenia mi mauroin Ya'u. Po'onala, Ya'u hari nika lolo mi kalarna, la ri mahaku ka nodi molollo eleke.  
\v 9 Dernala! Ri aile ma na'aheni hi ramwali ri Yahudi, maa rapoho ono hi ramwali man lernohi Hayakyak Makromon nin mukue. Na'amoli Ya'u hi'i hi mai kadi ein korno mi kalarne, la anilu manaku ra'aheni, “Kokkoo! Makromod Lalap naramyak mi!”  
\v 10 Mi mamkene lernohi Ainu'u honopon ma na'aheni, “mamkene kerhu wewerek pananaka,” de Yo orole'ule'u orowaliwali mi lere noho wawan na'akeme lernala wewerek pananaka man lapa. Wewerek pananaka man lapa onne mai leke ken ri na'akeme lolo noho wawan eni. 
\pi1  
\v 11 Ka nalo'ol Ya'u mai wali'ur, de masala kerkerhe wanakuku man mi mauroinedi me'e, leke yono ri mahakue nahoro mahmaha kolkoli ennen man ra'akenedi ki mi eni. 
\pi1  
\v 12 Inhoi rehi ara noro Hayakyak Makromon, Ya'u hi'i namkene lolo Makromod Lalap Nina Romleu Lapa lolo a'am raram. Ya'u hi'i ai namkene lolo onne laa ewi-ewi, naise lauriri ma na'ono namkene lolo nakar ida. Enla Ya'u horok Ya Am'u Makromod Lalap Naranne noro Nin Kote naranne lolo ai kemen. Kota onne penia Yerusalem Worworu man kopur mai nano Ya Am'u, Makromod Lalap man minle a'am raram. Ya'u horok I Naranne worworu ai kemen haenhi. 
\pi1  
\v 13 Lo'o mi kilinum aile, dernala. Makani wawa'an inhawa man Roh Kudus na'aheheni laa Nin kerei raramne na'akemeni.’ ” 
\s1 Aku horok laa kerei raramne ma aile kota Laodikia 
\p  
\v 14 Makromod Lalap Anan hopon ya'u wali'ur na'ahenia, “Horokedi I Lir'u eni aku laa Makromod Lalap Nin hophopon man leluwai makrana kerei raramne lolo kota Laodikia ma'aheni: 
\pi1 Eniyeni Makromod Yesus ma Naran ‘Amin’, Lirna. Ai onne man kuku maka ma namkene wakunu panaeku ma namlolo mamani, la lolo Ai mehe Makromod Lalap hi'i hahaa na'akeme.\f + \fr 3:14 \ft ‘Wanakunu...lolo Ai mehe Makromod Lalap hi'i hahaa na'akeme’, tafsiran namehin, ‘...la Ai mehe nodi molollo ha wo'ira na'akeme man Makromod Lalap hi'iyedi me'e.’\f* 
\v 15 Ai na'aheni, ‘Ya auroin minim hini'i wenewhe na'akeme. Ya auroin mi ka ma'okul Ya'u, maa mi ka mamkene lernohi Ya'u haenhi. Mi maise oire ma kan ma'urinna, noro idewe kan manha haenhi. Wa'an rehi mi mamwali oir man ma'urinna wake'e, ee man manha wake'e,  
\v 16 maa mi maise oir man lamlamak ono mi ka ma'okul Ya'u, la mi akim ka namkene naili'il Ya'u haenhi. Enpenia Ya'u lo'o amokedi mi!  
\v 17 Mim wakunu kukulu lalap ma'aheni mi orkanaru, de minim morimori kukuku noknokor me'e. Enimaa mi ka mauroin nahenia mi maise ri ma na'alehe nakar de mehen lalaa mamai, la ri man po'on mi, akin woir ono mi mamwali ri yakyaka halhala. Mi ka mauroin nahenia ma'alehe haida-haida, mi makam tokedi, la mi madlewlewhe. 
\pi1  
\v 18 Enpenia Ya ala mi nounaku eni: Weli maha ihi nano Maya'u man aiye na'amouwedi me'e, leke mim karu kokkoo. Enla weli nainair wawarha nano Ya'u haenhi leke yon mawawa ono minim nainair aile, la weli awa'ar modi ma'uwapin mi makam leke mim do'on wali'ur. 
\pi1  
\v 19 Inhoi Ya aramyake, Ya'u dadiyale, la a'alolo nin morimori man sala. Ende herre minim morimori man saleni, la yon maprehen lernohi Ya'u. 
\pi1  
\v 20 Dernala! Ya amriri minim nike makan disne nika. Inhoi dederne I Lir'u de hari nike, Ya'u laa raram leke ore o'on omun wewerre. 
\pi1  
\v 21 Inhoi rehi ara noro Hayakyak Makromon, Ya ala molollo naikoro Ainu'u naikoronno kodi molollo wewerre, namnenehe Yo oro Ya Am'u maikoro modi molollo wewerre, ono Ya'u rehiyedi ara noro Hayakyak Makromon me'e. 
\pi1  
\v 22 Lo'o mi kilinum aile, makani wawa'an inhawa man Roh Kudus na'aheheni laa Nin kerei raramne na'akemeni.’ ” 
\c 4  
\s1 Ul'uli sa'sa'a lolo a'am raram 
\p  
\v 1 Onne horu ya'u (Yohanis) do'on haida wali'ur. Heih! Ya'u po'on nikida lolo a'am raram nahinariyedi la ya'u derne Lira man lapa dedesne onne wali'ur. Lirna onne naise kowuri lirna la napolu ya'u na'ahenia, “Maiyala wawan nanu! Ya'u kukul ki o inhawe ma namwali lere man mai eni.”  
\v 2 Lere onne me'ede Roh Kudus nodi molollo maya'u de nodi ya'u laa a'am raram. Rakanedi lolo enne, ya'u do'on Rai nin naikoronno ida noro Ma naikokoro eni.  
\v 3 Ma naikokoro onne ad'ada naise deli wakue man wekel yaspis noro sardis. Haimerida aile man pupinala Nin naikoronno onne kakan mokmoko naise waku zamrud.  
\v 4 Naikoronno werro'o wo'akka namehin pepepen naikoronno onne, la ri leleher lalapa werro'o wo'akka raikokoro haenhi. Rir nainair wawarhe mamani, la karpuspus karpusa mahe naise man rehi ara nine.  
\v 5 Naikoronno man aile toro onne, siksika lerlere naise noho lerlere, la lirna naisa noho dildila namhara haenhi. Lolo naikroronno onne kalarna, obor wo'ikku mormori. Onne penia naulinu nawali Makromod Lalap Nin Roh wo'ikku enihe.  
\v 6 Lolo naikoronno man aile toro onne kalarna haida aile naise oir lapa man po'on nahaloredi molmolle kokaka, la ha mormori wo'akka ri kan dodo'onnala makun aile naikoronno onne herne waliwali. Hi kemen kili'ur kalari makan mamani.  
\v 7 Ha mormori dedesne nine naise singe, ha mormori rewro'o nina naise sapi dalu, rewkelu nina oin makan naise ri mormori, la rew'akka nine naise oprau man liwliware.  
\v 8 Ha mormori wo'akka onnenihe doho-doho liwarne woneme, la kemen na'akeme makan penpenu, lolo liwarne waliwali makan aile haenhi. Enla lelere a'alam kar ren rahinara rir ul'uli sasa'a. Hi rahinara ra'aheni, 
\q2 “Moumou dewdewe, O! 
\q2 Moumou dewdewe, O! 
\q2 Moumou dewdewe, O! 
\q2 O penia Makromod Lalap Ma Nodi Molollo 
\q2 Ma Narehi Ma Nalewen Na'akeme, 
\q2 Man aile nonolu, 
\q2 Man aile lere eniyeni, 
\q2 la Man aile laa ewi-ewi.” 
\m  
\v 9 Ha mormori wo'akka onne ra'uli rasa'a, ra'akulu ra'alap Oin Naran, ra'aheni trimkasi laa Ai ma naikokoro lolo Rai Nin naikoronno la Man mori laa ewi-ewi onne.  
\v 10 Hi ra'ul'uli rasasa'a ne, ri leleher lalap werro'o wo'akka onnenihe laa rahinonouwedi yawa, la ra'uli rasa'a Ai Man Mori laa ewi-ewi haenhi. Hi rala rira karpuse rodi mahe hihi'ie loile Nin naikoronno kalarna ra'aheni, 
\q1  
\v 11 “Makrom'ee! O penia Makromod Lalap am horhawe! 
\q1 O penia ma namlolo de Num molollo aile kokala ainim ul'uli sasa'a na'akeme. 
\q1 Om hi'i ha naakeme namwali, 
\q2 la nano Num raram nodi penia umupala ha rahu na'akeme.” 
\c 5  
\s1 Pipdumana mehe nodi molollo hari horok lunlunne 
\p  
\v 1 Onne horu ya'u po'on haida wali'ur. Ya'u po'on Ai ma naikokoro lolo naikoronno onne nasasala horok lunlunna ida aile liman malanne. Horok onne horhorok waliwali la rodi segel wo'ikku segsegel.  
\v 2 Enime'ede ya'u po'on hophopon a'am raram ma naruri ida, wakau na'ukani, “Inhoi nin molollo aile hari horok eni nina segele?”  
\v 3 Enimaa nano ri man aile noho wawan, a'am raram, me noho wi'in, ri mahaku ka nodi molollo hari horok onne, lese.  
\v 4 Kame'ede ya'u raram penu, de ahere nammori, ono ri mahaku ka nodi molollo hari horok onne, lese.  
\v 5 Ma namwali leleher lalapida nano ri werro'o wo'akka onnenihe na'aheni maya'u, “Heih! Yon mahere me'e ono Ri ida aile man rehiyedi ara Nin arwali me'e. Ai naran Singa, la Ai nano hair Yehuda, la Daud Upun Anan. Ai penia nodi molollo nohu segel onnenihe la hari horok lunlunna onne, lese.”\fig Singa dalu|src="HK00046.tif" size="span" ref="Why. 5:5" \fig* 
\p  
\v 6 Enime'ede ya'u po'on Pipdumana ida aile namririnohi naikoronno onneni, la ha mormori wo'akka roro ma namwali leleher lalap onnenihe pepepen Ai. Ya'u po'on Ai kemen naise resnedi nonolu me'e. Ai dudalle wo'ikku la makan wo'ikku. Makan wo'ikku onne na'ono Makromod Lalap Nina Roh wo'ikku man An hopon laa lolo noho wawan na'akeme.  
\v 7 Pipdumana onne laa kalari nala horok lunlunne nano Ai ma naikokoro lolo naikoronno onne liman malanna.  
\v 8 Ai naledi horok onneni ne, ha mormori wo'akka roro leleher lalap werro'o wo'akka onnenihe laa yawa rahinononow lolo kalarna. Hi dohodoho rasala haida naise kecapi noro manuk man rodi maha hi'ie. Manuk onnenihe penpenu noro wuru man wola'ula'u ma namwali lir napanak man Makromod Lalap Nin ri mememen na'akeme hi'ie.  
\v 9 Hi rahinara hanarida ra'aheni, 
\q1 “O penia ma namlolo, 
\q2 de Num molollo aile mala horok onneni 
\q2 we'er nina segel enihe, 
\q2 ono resnedi O me'e, 
\q2 la noro Num rara ma nakliu onneni, 
\q1 Om weliyedi ri mormori noho wawan na'akeme me'e, 
\q2 ri nano hair-hair, noho-noho, la nano wanakunu na'akeme, 
\q2 leke ramwali Makromod Lalap Nina ri. 
\q1  
\v 10 Om niliyedi hi leke ramwali hair mahaku, 
\q2 la ramwali imam-imam man ilitolle ik Makromod Lalap, 
\q2 la ramwali rai-rai leke rodi molollo lolo noho wawan na'akeme.” 
\p  
\v 11 Horu ne, ya'u po'on wali'ur la derne hophopon a'am raram nammori lirna, kar akinala hi. Hir pepepen Rai Nin naikoronno, ha mormori wo'akka roro leleher lalap onnenihe. 
\p  
\v 12 Hi rahinara raruri ra'aheni, 
\q1 “Pipdumana man resnedi eni, Num molollo aile, 
\q2 de am horhawa O, 
\q2 ai ma'uli masa'a O, 
\q2 la ai ma'akulu ma'alapa O Oin Naran. 
\q1 Am kukunohi Num molollo, 
\q2 am wakunkunu Num kanaru, 
\q2 am kukunohi Num woroin ma narehi ma nalewen, 
\q2 la am wakunu wali'ur Num ke'eke'el an'anhe!” 
\m  
\v 13 Enime'ede ya'u derne ha man mormori na'akeme lolo a'am raram, a'am lehern, lolo lour ro, la noho wi'in rahinara ra'aheni, 
\q1 “Ai ma naikoro lolo Nin naikoronno noro Pipdumana onneni, 
\q2 ai ma'uli masa'e, 
\q2 am horhawe, 
\q2 ai ma'akulu ma'alapa Hi Oin Naran, 
\q2 la am wakunkunu Rir ke'eke'el an'anha laa ewi-ewi!” 
\p  
\v 14 Ha mormori wo'akka onnenihe walhe ra'aheni, “Amin!” Ri leleher lalap onnenihe laa yawa rahinononow ra'uli rasa'a Hi haenhi. 
\c 6  
\s1 Pipdumana hari segel woneme 
\p  
\v 1 Onne horu ya'u po'on Pipdumana onne hari idewe segel dedesne nine, la ya'u derne ha mormori ida nano wo'akka onnenihe napolu naruri nodi lir naise noho dildila na'aheni, “Mai nanu!”  
\v 2 Enime'ede ya'u po'on kuda wawarha ida. Ma naikoro kuda onne nasalsala ram horne, la An lernaledi mahkota ri man rehi ara nina. Enine ma nadedem rehi ara onne namhara lolo onne leke rehi ara wali'ur. 
\p  
\v 3 Onne horu, Pipdumane hari segel woro'o nine. Ya'u derne ha mormori woro'o nine napolu na'ahenia, “Mai nanu!”  
\v 4 Kan maha ne kuda memere ida namhara wali'ur. Ma naikoro kuda onne lernala raa lalapida, la lernala molollo leke na'amoluloinedi honoli man moiliwi mahuwele lolo noho wawan de hi'i ida ma nesne ida. 
\p  
\v 5 Horu ne, Pipdumane hariyedi segel wokelu nine. Ya'u derne ha mormori wokelu nine napolu na'ahenia, “Mai nanu!” Ya'u po'onala kuda momohon ida. Nin ma naikoro nasalsala kaikaile rodi kail hanana'an.  
\v 6 Kuda onne hari ne, ya'u derne lirida naise ri mormori lirna namhara nano ha mormori wo'akka onnenihe toro ma na'aheni, “Na'iwe'el lerida nine noknokor rodi weli gandum okonne kilu ida mehe, ee kele'uk okonne kilu wokelu mehe,\f + \fr 6:6 \ft Wanakunu lirna ‘kele'uk’ herre Yunani nina wanakunu lirna ‘jelai sedinar.’\f* maa yon mano'onyaka rira zaitun-zaitun ono noro anggur kirne, leke rir anggur aile romun la wuru aile rodi rapali aiye.” 
\p  
\v 7 Onne horu, Pipdumane hariyedi segel wo'akka nine. Ya'u derne ha mormori wo'akka nine napolu na'ahenia, “Mai nanu!”  
\v 8 Ya'u po'on kuda mokmok marmarra ida hariyedi, la nin ma naikoro onne naran ‘Makmaki’. Enla man lernohi Makmaki onne aile ma naran ‘Noho Makmaki’. Man ha'a kuda naran Makmaki noro ma naran Noho Makmaki lernala molollo resnedi ri mormori lolo noho wawan heruwali. Hir lernala molollo resne noho hana'ar ida mehe nano noho hana'ar wo'akka enihe. Hi rodi ara, roulare, apinha wo'operi, noro ha mormori ma nawuhur resne ri na'akeme onne. 
\p  
\v 9 Onne horu, Pipdumane hariyedi segel wolima nine. Ya'u po'on ri hamarane nammori lolo honoi kanani onno arkan. Ri hamaran onnenihe resnedi nonolu ono ramkene loikaru Makromod Lalap Lirna Wawa'an la ka ramka'uk konohi ri ra'aheni Yesus nodi molollo hi.  
\v 10 Ri hamaran onnenihe wakau raruri ra'aheni, 
\q1 “\nd Makromod\nd* Ma Nodi Molollo Ha Wo'ira Na'akeme! 
\q2 O penia Man Moumou Dewdewe la Ma Namlolo! 
\q2 Lere wo'ira makun mene ho'ok kail ri man minle noho wawan ma nesnedi mayai enihe?” 
\p  
\v 11 Makromod Lalap nala hi dohodoho rain wawarhe man sorsoru la na'aheni, “Warnala tarana nanu ono ri man ailanna mahar resne minim man howok wali enihe, naise nonolu hi resnedi mi, la man ailanna onne ka resne mi walinhe nokor makun.” 
\p  
\v 12 Onne horu, ya'u po'on Pipdumane hari segel woneme nine. Ideweni ne rururuwai lape, po'on lere momohon naise makiyedi, la wollo penenu po'on memere naise rare.  
\v 13 Kaliyoro nammori nadiyaur mai noho wawan naise anna lapa ma nado'o ara ono de woin dudu'ul nadiyaur re'er rararie.  
\v 14 Ya'u po'on a'am lunedi naise piki man lunedi, de a'am moluwedi, la wo'or-wo'or noro noho-noho rahineiredi nano rir onno.  
\v 15 Rai-rai lolo noho wawan, man anulu panulu, uluwakun ara, ri orkanaru, ma nodi molollo lalape, la ri namehin ma namwali hophopon wahwahan me ri ma nadedem, na'akeme lari laa wo'or-wo'or suwar lolo ku'il raram noro waku leken.  
\v 16 Hir wakau rapanak, “Wo'or-wo'or noro waku mie, madiyaur uinedi mayai ke'e, leke suwaredi mayai nano Ai ma naikoro lolo Nin naikoronno noro Pipdumana onnenihe Rir ahanne,  
\v 17 ono Hi raledi hunukum man lap maiyedi me'e, la ri mahaku ka naruri kerhu Rir ahan man lap onneni.” 
\c 7  
\s1 Makromod Lalap leluwai makrana Nina ri 
\p  
\v 1 Onne horu, ya'u po'on hophopon a'am raram wo'akka ramriri lolo noho huhun wo'akkenihe. Hi rodi molollo kawala anna man huhuu nano noho huhun wo'akkenihe, leke yono hu lolo ro, lolo lour, de our'ono au'ono mahaku ka nado'o. 
\p  
\v 2 Ya'u po'on hophopon a'am raram ida wali'ur mai nano lere haha'a lole, nodi Makromod Lalap man morimori Nin cap. An komdere hophopon a'am raram wo'akka man lernaledi molollo ra'awoir ro noro lour onnenihe nodi lirna naruri na'aheni,  
\v 3 “Yono huri anna naiye'er ro noro lour me our'ono au'ono nanu! Lapan am tade Makromod Lalap Nin hophopon wahwahan lolo lerenhe.”  
\v 4 Enime'ede ya'u derne Lirida na'aheni, “Ri man lernala tanada onnenihe, riwan rahu weli'akka wo'akka (144.000)!” Ri eniyenihe ramhara nano Israel (Yakup) anan la ramwali luhu idaweli woro'o.  
\v 5 Ri riwan idaweli woro'o nano aki luhu idaweli woro'o onne lernala tanada onne: 
\pi1 nano Yehuda upun anan, riwan idaweli woro'o, 
\pi1 nano Ruben upun anan, riwan idaweli woro'o, 
\pi1 nano Gad upun anan, riwan idaweli woro'o, 
\pi1  
\v 6 nano Asyer upun anan, riwan idaweli woro'o, 
\pi1 nano Naftali upun anan, riwan idaweli woro'o, 
\pi1 nano Manasye upun anan, riwan idaweli woro'o, 
\pi1  
\v 7 nano Simeon upun anan, riwan idaweli woro'o, 
\pi1 nano Lewi upun anan, riwan idaweli woro'o, 
\pi1 nano Isakar upun anan, riwan idaweli woro'o, 
\pi1  
\v 8 nano Zebulon upun anan, riwan idaweli woro'o, 
\pi1 nano Yusup upun anan, riwan idaweli woro'o, 
\pi1 la nano Benyamin upun anan, riwan idaweli woro'o. 
\s1 Sus kame'el lolo a'am raram 
\p  
\v 9 Ya'u po'on wali'ur ne, ri nammori rehi, kar akinalahe. Hi ramhara nano noho wawan na'akeme, nano hair-hair noro noho-noho na'akeme, la nano wanakunu na'akeme. Hi ramriri rakpalipali naikoronno onne noro Pipdumana kalarna. Hir nair nainair wawarha man sorsoru la meririi nasala auhane wewhe leke horhawe Makromod Lalap,  
\v 10 la hir wakau raruri ra'aheni, 
\q1 “Iknika or'ori dardari ma kan horu 
\q1 ik kokale nano ik Makromod Lalap Ma naikoro lolo Nin naikoronno 
\q1 noro Pipdumana onneni!” 
\p  
\v 11 Hophopon a'am raram na'akeme polweweredi naikoronno onneni, roro leleher lalape, roro ha mormori wo'akka enihe. Hir laa yawa rahinononow lolo Nin naikoronno kalarna, ra'uli rasa'a Makromod Lalap rahinara na'ahenia: 
\q1  
\v 12 “Amin! 
\q1 Ai ma'uli masa'a ai Makrommu, Makromod Lalap eni, 
\q1 ai ma'akulu ma'alap O Oin Naran, 
\q1 ai mauroin O penia mauroin ha wo'ira na'akeme. 
\q1 Am horhorok Num ke'eke'el an'anha, 
\q1 noro Num molollo ma narehi ma nalewen! 
\q1 Ai mapanak trimkasi nammori, 
\q1 la am horhoor hawhawa O laa ewi-ewi! 
\q1 Amin!” 
\p  
\v 13 Ri leleher lalapida na'ukani ya'u na'ahenia, “Ri man nair nainair wawarha onnenihe inhoi? Hi rano ewi?” 
\p  
\v 14 Ya'u walha na'ahenia, “Eih! Ka auroin, pape! Lo'o pape mehe nauroin ha onne.” 
\p Ai na'aheni, “Hi onnenihe ramharedi nano lere alam apinpinha wo'operperi man lap me'e. Hi rodi Pipdumane rarna paharedi rira nainair de ra'awarhedi me'e.  
\v 15 Onne penia hi ramriri lolo Makromod Lalap Nina naikoronno kalarna ilitolle Ai lelere a'alam lolo nina Romleu Lape.\f + \fr 7:15 \ft Romleu Lape onne wekel a'am raram.\f* Enla Makromod Lalap ma naikoro Nin naikoronno onne leluwai makrana hi mamani.  
\v 16 Ende ka ramlara me'e, kar marou me'e, la lere manmanha ka nalahe me'e,  
\v 17 ono Pipdumana ma namriri lolo naikoronno onne namwali hirira Man Hurie. Ai norkaru hi laa oir moumou ma nala or'ori dardari hi. Enla Makromod Lalap lo'o na'akisiyedi makan oirne de ka rahere me'e.” 
\c 8  
\s1 Pipdumana hari segel wo'ikku nine 
\p  
\v 1 Pipdumane hariyedi segel wo'ikku nineni ne, ri mahaku lirna kan hari lolo a'am raram na'ikeki jam heruwalie.  
\v 2 Ya'u po'on hophopon a'am raram wo'ikku ma namriri lolo Makromod Lalap kalarna enihe. Hir kokala kowuri lapa\f + \fr 8:2 \ft ‘Kowuri lapa’ onne herre wanakunu Malay: ‘trompet’ me ‘sankakala’.\f* wo'ikku. 
\p  
\v 3 Onne horu, hophopon a'am raram namehin ida mai namriri na'urani honoi kanani onno man rodi maha hihi'ie man minle naikoronno onne kalarna. Hophopon onne nodi manuk man rodi mahe hihi'ie, la an kokala wuru wola'ula'u namansa, leke harne wewerre noro idewe lir napanak nano Makromod Lalap Nina ri mememen na'akeme.  
\v 4 An harnedi wuru onne me'ede, mahun noro rira lir napanak laa wawan lolo Makromod Lalap kalarna.  
\v 5 Kame'ede hophopon a'am raram onne nodi manuk onne, laa nala aiwara man mormori nano honoi kanani onno onne loile manuk raram, nale wakal laa noho wawan. Ideweni ne, noho lerlere, noho dildila, la rururuwai man lapa wake'e. 
\s1 Kowuri wo'akka ma nolu 
\p  
\v 6 Onne horu, hophopon a'am raram wo'ikku man rasalsala kowuri lap wo'ikku onnenihe, ramkenedi leke rou me'e. 
\p  
\v 7 Hophopon a'am raram dedesne nouwedi nin kowuri ne, aiye noro okon es nawa'ha rare nadiyaur naise okon waku lape. Lo'o noho wawan ha'ar namwali hana'arne wokelu, aiye na'anedi hana'ar ida nano wokelu onne, la aiye na'anedi our'ono, au'ono, noro penek monornoro na'akeme lolo hana'arne onneni. 
\p  
\v 8 Hophopon a'am raram woro'o nine nouwedi nin kowuri ne, haida ma naise wo'or man kulu sopoledi laa kahi raram me'e. Lolo wo'or onne, aiye morimori. Lo'o kahi nahina'ar namwali wokelu, hana'arn ida herredi namwali rare.  
\v 9 I'in noro ha mormori man minle kahi raram hana'arne onne makiyedi, la lo'o kapal kahi na'akeme ha'ar namwali wokelu, hana'arne ida keperedi. 
\p  
\v 10 Hophopon a'am raram wokelu nine nouwedi nin kowuri ne, kaliyoro waku lapa wake'e ida man mormori naise obor lape, nadiyaur nano a'am laa oir wauwau noro oir makan heruwali raram. Lo'o oir wauwau noro oir makan na'akeme ha'ar namwali wokelu, kaliyoro onne na'amorsedi hana'arn ida nano wokelu onne.  
\v 11 Kaliyoro onne naranne Meru. An hi'i oir wauwau noro oir makan hana'arn onne meru la ri nammori maki ono hi romun oir man meru onne. 
\p  
\v 12 Hophopon a'am raram wo'akka nine nouwedi nin kowuri ne, haida nukur lere, wollo, noro kaliyoro-kaliyoro. Lo'o lere, wollo, noro kaliyoro enihe ha'ar namwali wokelu, lere nina hana'arne ida momohon, wollo nin hana'arne ida momohon, la kaliyoro enihe rira hana'arne ida momohon haenhi. Ende lelere heruwali noho momohon, la a'alam heruwali noho eren momohon haenhi. 
\p  
\v 13 Ya'u po'on laa wawan, la derne oprau ida man liwliwar aile wawan wake'e wakaukau, “Mayo'o! Mayo'o! Ri mormori na'akeme man min ki noho wawan, mim mayo'o, ono hophopon a'am raram wokelu namehin aile makun ma namkene rou rira kowuri eni.” 
\c 9  
\s1 Hophopon wolima nine nou nina kowuri 
\p  
\v 1 Hophopon a'am raram wolima nine nouwedi nina kowuri ne, ya'u do'on hophopon a'am raram ida man po'on naisa kaliyoro ma nadiyauredi nano a'am laa noho wawan. Makromod Lalap nala hophopon onne konse man hari Lo'o Lalapa nin nike. Lo'o Lalap onne roromne kar ho'oknala.  
\v 2 Hophopon onne hariyedi Lo'o Lalap onne nin nikeni ne, aimahu namansa namhara naise man osno nor'ome. Ai mahu onne me'ede hi'i noho wawan metekedi.  
\v 3 Poreke namhara nano aimahu onne mai noho wawan mamani. Makromod Lalap nala molollo ni'i ri naise sayorne nini'ie.  
\v 4 Poreke onnenihe kar hurinohi ro'onyaka au or'oriyana, maa hurinohi ni'i ri mormori ma kan lernala Makromod Lalap Nina tanade lolo leren makun.  
\v 5 Kar hurinohi hi resne ri onnenihe, maa hurinohi hi'i apinpinha hi wollo wolima raram. Ri man poreke nini'i onnenihe kemen apinha naise sayorne nini'ie.  
\v 6 Heih! Wollo wolima raram apinha wake'e, de hi ranoin kalla leke maki, maa kar lernale. Hi raram nodi pelek maki, maa makmaki ko'u hi. 
\p  
\v 7 Poreke onnenihe molmolo kude ma namkenedi rodi laa ra'ara. Lolo uluwakunhe hir nair haida po'on molmolo karpusa mahe la oin makan naise ri mormori.  
\v 8 Murukne naru naise maeke nina muruke, nihinhe naise singe nihini.  
\v 9 Lolo irun makanhe hir nair nainair rodi pesi hihi'ie. Hi liwarnhe neknekir naise kerete rahu man neknekir lere kude soru laa ra'ara.  
\v 10 I'urne naise sayorne i'urne, la hi rodi molollo ri'i ri mormori hi'i apinpinha wollo wolima raram.  
\v 11 Rira rai ma nodi molollo hi namwali hophopon a'am raram ma nodi molollo Lo'o Lalap man rorom wake'e onne. Ai naran rodi wanakunu Ibrani rapolu “Abadon,” la rodi wanakunu Yunani rapolu “Apolion” (napa'ahne, ‘ma nano'onyaka’.) 
\p  
\v 12 Lere alam mayo'o dedesne horuwedi me'e, maa woro'o aile makun. 
\p  
\v 13 Enine hophopon a'am raram woneme nine nouwedi nina kowuri. Ya'u derne Lira namhara nano honoi kanani onno nin huhun wo'akkenihe. Honoi kanani onno onne aile Makromod Lalap kalarna.  
\v 14 Lira onne hopon hophopon woneme nine na'ahenia, “Huriyedi hophopon a'am raram wo'akka man or'orok aile lolo oir wauwau Efrat eni.” 
\p  
\v 15 Kame'ede ai lan huriyedi hophopon wo'akka man Makromod Lalap na'akenedi nano nonolu me'e, leke rakan anna, wollo, lere, noro jam Ai mehe nilie, hi resne ri mormori lolo noho wawan heruwali. Lo'o ri mormori noho wawan ha'ar namwali wokelu, hi resnedi hana'arn ida.  
\v 16 Hophopon wo'akka onne rodi molollo ri juta rahu woro'o ma nasala ke'urauk ma naikoro kude. Ya'u derne Lirida man wekel hi na'akeme lawanhe. 
\p  
\v 17 Lolo haida Makromod Lalap nalhariyedi maya'u mehe do'on, ya'u po'on ma naikoro kudenihe rir nainair rodi pesi hi'ie. Rir nainair onne po'on memere naise aie, au'au naise ai mahue, la mamarra naise lalie. Kude onnenihe uluwakunhe po'on naisa singa uluwakun, la aiye, noro ai mahu, noro lali namhara nano nuranhe.  
\v 18 Lo'o ri mormori noho wawan ha'ar namwali wokelu, hana'arne ida maki horu, ono aiye, ai mahu, noro lalie ma namhara kude nuranne resnedi hi.  
\v 19 Kuda enihe rira ruri melle nuran noro i'urne haenhi, ono hi i'urnhe naise nee uluwakun. Hir naire rodi hi'i apinpinha ri mormori. 
\p  
\v 20 Enimaa ri mormori man mormori makun kar herre rira morimori ma ka namloleni, penia kar ren hoikani hayakyak noro lernulu aukerhe man hir hi'ie rodi mahe, pere, pirmere, waku, noro au. Hir hoikani lernulu aukerhe ma kan do'on, kan derne, la ka nala'a.  
\v 21 Hi kar herre rir morimori ma ka namlolo naise: resne ri, ramna'a, hi'i u'ur leher, ramwali nediyomon, la holi yak leke yak. 
\c 10  
\s1 Yohanis po'on hophopon a'am raram ida nasasala horok lunlunnanida 
\p  
\v 1 Enime'ede ya'u po'on hophopon a'am raram namehin ma naruri wake'e kopur nano a'am raram. Kakam pupupine, la haimere wewwewer uluwakun. Oin makan siksik naise lere hikanne, la ein naise lauriri man aiye na'na'an.  
\v 2 Ein wali malanna an loile kahi, la ein wali mariri loile ro. Horok lunlunnanida nadiwerwerre aile liman wali.  
\v 3 An wakau naruri naise singe lirna. Wakau horu, noho nu'nu'ur wo'ikku walha lira onne.  
\v 4 Noho nu'nu'ur horu, manlo'o ya'u horok wanakunu i dederne onne, maa Lirida nano a'am raram kawala'u na'ahenia, “Yom horok onne! Suwaredi inhawe om dederne nano noho nu'nu'ur wo'ikku onnenihe.” 
\p  
\v 5 Onne horu, hophopon a'am raram man idedi eni ya'u po'on namriri kahi noro ro onne kikan liman malanna laa wawan,  
\v 6 la kikan nou nodi Makromod Lalap Naran, ono Ai penia man mori laa ewi-ewi, la ma nakuku noho ma naleu a'am noro ne'en raram na'akeme. An nou na'ahenia, “Eih! Makromod Lalap kan lapan me'e!  
\v 7 Lere hophopon a'am raram wo'ikku nine nou nin kowuri eni, Makromod Lalap lo'o na'akuku na'anokor Nin panaeku man suwsuwar nano nonolu eni. Nonolu An loikaruwedi panaeku onne lolo Nina nabi-nabi ma namwali Nin hophopon wahwahan me'e.” 
\p  
\v 8 Onne horu, Lira nano a'am raram man idedi ya'u derne onne, hopon ya'u wali'ur na'ahenia, “Laa mala horok ma nadiwerwerre onne nano hophopon a'am raram ma namriri lolo kahi noro ro onne limane.” 
\p  
\v 9 Ende ya'u laa apanak ai nala horok lunlunna onne maya'u. Ai na'aheni, “Kokale, la mo'on here. O mo'one, lo'o rase namina naise wani oir, maa keper laa konoum lo'o meru.”  
\v 10 Enime'ede ya ala horok lunlunnana onne nano liman, yo o'one. Lolo i nurane rase naise wani oir, maa keperedi laa kono'u ne, meru me'e.  
\v 11 Horu, an hopon ya'u wali'ur na'ahenia, “Maderre madaul wali'ur Makromod Lalap Nin panaeku ma namwali lere man mai noro ri na'akeme man minle noho wawan, lolo hair-hair, noho-noho, rai-rai, noro wanakunu na'akeme.” 
\c 11  
\s1 Makromod Lalap Nina ri woro'o man kuku maka 
\p  
\v 1 Onne horu, Makromod Lalap nala maya'u au deul ida naise au ke'eke'en rodi ho'ok, la hopon ya'u na'ahenia, “Lam ho'ok Ainu'u Romleu Lape noro nin honoi kanani onno lolo Yerusalem. Lam akiyedi ri ma na'uli nasa'a Ya'u lolo onne na'akeme haenhi.  
\v 2 Maa yom ho'ok Romleu onne nina nikoin, ono onneni raledi ri ma ka nauroin Ya'u. Hi rodi rurilai kerne dalha kote man moumou dewdewe onne wollo weli'akka woro'o.  
\v 3 Lere onne Ya ala molollo Ainu'u man kuku maka woro'o leke loikaru Ainu'u nounaku. Hir nair nainair kaduk leke namwali tanada nahenia hi akin woiredi la hi ra'ahan ono ri mormori rir dohohale. Hir konohi Ainu'u nou lolo noho wawan lere alam riwan ida rahu woro'o welineme (1.260) raramne.” 
\p  
\v 4 Naho'ok woro'ohe naise zaitun hana woro'o la wadu onno woro'o ma namriri lolo Makromod Lalap kalarna, \nd Makromod\nd* ma nodi molollo noho wawan na'akeme.\f + \fr 11:4 \ft Zak. 4:3, 11-14.\f* 
\v 5 Hirira molollo aile hi'i aiye namhara nuran harnesnedi ri man kene hi'i apinpinha hi. Ende inhoi ken hi'i sus hi, lere onne me'ede maki.  
\v 6 Rir molollo aile elekedi a'am leke lere alam hir loikaru Lirna Wawan eni yon okon mai. Rira molollo aile hi'i oir wauwau noro oir makan na'akeme namwali rare, la hi'i wewerek pananaka rahu rodi duni ta'al noho wawan, lernohi rir suk aimehi. 
\p  
\v 7 Hirira lere alam loikaru Makromod Lalap Lirna horu, ha mormori man ailanna ida namhara nano Lo'o Lalap man roromne kar ho'oknala onneni. Ha mormori onne noro hi ra'ara, la rehiyedi woro'ohe de nesnedi hi.  
\v 8 Resnedi horu, hoikaruwedi ihin kemenhe lolo kota ma na'ono onne nin kalla lapa wawan. Kota onne penia namwali kota man wairesnedi woro'ohe rir Makromon nonolu eni. Kota onne naho'ok naise kota Sodom noro Mesir, ono ne'en raramne ailanna wake'e naise Sodom noro Mesir nonolu eni.  
\v 9 Ri lolo noho wawan na'akeme, nano hair na'akeme, nano luhu na'akeme, la nano wanakunu na'akeme po'on man maki onnenihe ihin kemen minle kalla wawan lere alam wokelu rehi ono ka rala leken rawilo'e.  
\v 10 Ri man ailanna na'akeme lolo noho wawan do'one, la rase akin nahuwa'an wake'e ono ri woro'o man kuku maka onne makiyedi me'e. Hir hi'i yapi lalapa, la ida ma nala ida hahaa, ono nabi woro'o onne kar hi'i hi sus me'e. 
\p  
\v 11 Alam wokelu rehi horu, Makromod Lalap nala aran hi wali'ur, de wuku wawan la ramririri penia ri man do'on hi ramka'uk wake'e.  
\v 12 Woro'ohe derne Lirida nano a'am raram napolu naruri na'ahenia, “Ha'a mai eni here!” Rir arwali mahar popo'on ne, hir ha'a laa a'am raram la kakam pupupin hi.  
\v 13 Lere onne me'ede rururuwai lape, de lolo kota onne nakar persen idaweli yakedi, la ri riwan wo'ikku maki horu. Ri ma kan maki enihe ramka'uk rehi ra'aheni, “Idei! Makromod Lalap man aile a'am raram Nin ke'eke'el an'anha narehi nalewen na'akeme.” 
\p  
\v 14 Lere alam mayo'o rewro'o nine horuwedi me'e. Mahinorok memen! Kan maha mayo'o rewkelu nine lo'o mai ho'o me'e. 
\s1 Rouwedi kowuri wo'ikku nine 
\p  
\v 15 Hophopon a'am raram wo'ikku nine nouwedi nin kowuri ne, ya'u derne lira nammori wakaukau raruri lolo a'am raram ra'aheni, 
\q1 “Lere eniyeni, Ik Makromod Lalap noro idewe Nin Rai man An kikanedi nano nonolu eni, 
\q1 rodi molollo noho wawan na'akeme me'e. 
\q1 Enla Ai nodi molollo noho pa'i'ik rai pakakar na'akeme mamani laa ewi-ewi.” 
\m  
\v 16 Enime'ede ri leleher lalap werro'o wo'akka ma naikoro rir naikoronno lolo Makromod Lalap herne kalarna onnenihe wali laa yawa rahinononow ra'uli rasa'a Makromod Lalap.  
\v 17 Hi ra'aheni, 
\q1 “Makromod Lalap ma Nin ke'ke'el an'anha narehi nalewen na'akeme, 
\q1 O mamwali man aile nano nonolu eni, 
\q2 la man aile lere eniyeni. 
\q1 Trimkasi Makromod, 
\q2 ono O modi Num molollo ma narehi ma nalewen, 
\q2 leke modi molollo noho wawan na'akeme. 
\q1  
\v 18 Ri ma akin ka naili'il O na'akeme ra'ahan wake'e, 
\q1 la ra'okuledi O, 
\q2 de lere alam malhari Num ahan hi rakanedi me'e. 
\q1 Lere alam hukumesne ri ma nesne ri lolo noho wawan rakanedi me'e! 
\q1 Lere alam maho'ok makail ri man makiyedi na'akeme rakanedi me'e. 
\q1 Lere alam mala Num hophopon wahwahan rira mahmaha kolkoli ennen rakanedi me'e. 
\q1 Hi onne nabi-nabi, Num ri mememen, roro ri na'akeme ma namka'uk O, 
\q2 ma na'ono roro idewe man lolo yawenihe.” 
\p  
\v 19 Enime'ede Makromod Lalap Nin Romleu Lape man aile a'am raram nin nike nahinariyedi, la ya'u do'on Oplaha rodi manaku Nin nou man horok lolo waku nonolu eni. Noho lerlere, la noho dildile mamani, na'uwali rururuwai lalap noro okon es waku lape mai. 
\c 12  
\s1 Maeke noro nee memere lalapa man ailanna 
\p  
\v 1 Onne horu, tanada worworu man lewlewen ida hari lolo a'am. Maeke ida aile ma nodi lere ho'iho'ire, la namriririle wolle wawan. Lolo uluwakun wawanne karpuspusa karpusa maha rodi kaliyoro waku idaweli woro'o ra'akekekie.  
\v 2 Maeke onne nornoro raramne la nina lere alam me'ede nelhenne apinha la na'adididi mamani. 
\p  
\v 3 Enla tanada man lewlewen namehin hari lolo a'am wali'ur, po'on naise nee memere lalapa ida, uluwakun wo'ikku la dudal idaweli. Uluwakun wo'ikku onnenihe dohodoho nair rai nina karpuse.  
\v 4 Nee lalap onne nodi i'urne wewhe kaliyoro manin a'am. Lo'o kaliyoro na'akeme ha'ar namwali wokelu, an wewhedi hana'ar ida nadiyauredi mai noho wawan. Nee lalapa onne namriri lolo maeke ma na'ikeki karuwana kalarna. An lapan karuwana leke nawal anan.  
\v 5 Maeke onne mori mo'oniyanida. Tatana onne penia ma nodi molollo ri mormori noho wawan na'akeme. Tatana onne lo'o nodi molollo naisa wonokon mermere leke na'awoiredi nina arwali enihe. Nee lalap onne manlo'o nawal Tatan onne, maa hophopon a'am raram ida nahoredie nodi laa Makromod Lalap Nina naikoronno kalarna.  
\v 6 Maeke onne lari laedi noho mamun la an minle onnida man Makromod Lalap na'akenedi nano nonolu me'e. Min lolo onne Makromod Lalap ilitolle ai alam riwan ida rahu woro'o welineme (1.260). 
\p  
\v 7 Lere onne ara lape namwali lolo a'am raram haenhi. Uluwakun ara ida ma naran Mikhael noro nin hophopon wali enihe ra'ara roro nee lalapa onne noro nina hophopon wali enihe.  
\v 8 Maa, nee lalapa onne kan rehi ara, de noro nina hophopon enihe kar hurinohi minle a'am raram me'e.  
\v 9 Ende hir wakaledi nee lalapa onne nano a'am raram me'e. Nee onne naran ‘Nee Nonolu eni,’ me ‘Hayakyak Makromon,’ me ‘Setan’ haenhi. Ai penia wukupoho ri na'akeme lolo noho wawan. Hir sopoledi ai noro idewe nin hophopon a'am raram enihe nano a'am raram laa noho wawan. 
\p  
\v 10 Enime'ede ya'u derne lir man lapida nano a'am raram na'aheni, 
\q1 “Lere eniyeni ik Makromod Lalap nala or'ori dardari Nin ri me'e. 
\q1 Lere eniyeni An kukul Nin ke'eke'el an'anha nodi molollo noho wawan na'akeme me'e! 
\q1 Enla Nin Rai Kristus ma nodi molollo laa ewi-ewi, 
\q1 kukul Nin molollo me'e, 
\q1 ono Hayakyak Makromon man lelere a'alam tumdesne ik walinhe lolo Makromod Lalap kalarna, 
\q1 hir sopoledi nano a'am raram me'e. 
\q1  
\v 11 Ik walinhe rehiyedi ara roro Hayakyak Makromon onne me'e, 
\q1 ono Pipdumane makiyedi la rarna nakliuwedi 
\q1 leke na'ohu nahaledi rir dohohalenihe, 
\q1 la hir rehiyedi ara roro Hayakyak Makromon ono ka ramka'uk maki, 
\q1 maa ramkene konohi ri na'aheni Pipdumana namwali hi Makromon mamani. 
\q1 Kade rin hi'i sus hi, ee resne hi, maa kar lari nano Ai. 
\q1  
\v 12 Ende mi man minle a'am raram na'akeme, mi akim nahuwa'anedi here! 
\q1 Maa mi man minle noho wawan la lolo lour na'akeme mayo'o, 
\q1 ono Hayakyak Makromon kopuredi mai lolo mi herne kalarne me'e, 
\q1 la ai na'ahan wake'e 
\q1 ono nauroinedi nina lere alam ka nammori me'e.” 
\p  
\v 13 Lere nee lalapa onne nauroin nahenia sopoledi laa noho wawan ne, ai lan holo maeke man karuwana mo'oniyana onneni.  
\v 14 Maa maeke onne lernala oprau man lapa liwarne woro'o herne waliwali leke nahaledi kemen nano nee lalapa onne. An liwar laedi noho mamun ma na'akenedi leke yon nee hi'i sus ai. Lolo onne Makromod Lalap ilitolle ai anna wokelu rehi.  
\v 15 Onne horu, nee lalapa onne salowor oir namhara nuranne leke wau nodiyedie,  
\v 16 maa noho pakuwedi maeke onne me'e, de hariyedi nuranne nawaledi oir salolowor onne.  
\v 17 Enime'ede nee lalapa onne na'ahan wake'e maeke onneni, de laa noro maeke onne upun ananhe ra'ara. Ai upun ananhe onne ri man lernohi Makromod Lalap Nina keneri hono'ok, la ka ramka'uk ra'aheni Yesus namwali hi Makromon.  
\v 18 Nee lalapa onne namriri lolo herraram. 
\c 13  
\s1 Ha mormori man ailanna wake'e ida woku nano kahi raram 
\p  
\v 1 Ya'u po'on ha mormori man ailanna ida woku nano kahi raram, uluwakun wo'ikku la dudalle idaweli. Dudal onnenihe dohodoho nair rai nin karpuse, la lolo uluwakun wo'ikku onnenihe horok naran ma na'ihoru na'idaru Makromod Lalap.  
\v 2 Ha mormori ya'u dodo'on onne po'on naise pusi lape, maa ein naise beruang ein, la nuran naise singa nuran. Enime'ede nee lalapa onne nala nin ke'eke'el an'anha noro nin molollo man lapa laa ha mormori onne leke namwali rai.  
\v 3 Enla lolo uluwakun wo'ikku onne, ya'u do'on dilahe lalap ida aile uluwakun man po'on naise ri nodi raa dadare, maa pasuwedi me'e. Ri lolo noho wawan akinhe nale, la na'akeme polletilu de lernohie.  
\v 4 Hi ra'uli rasa'a nee lalapa onne ono ai nala nin molollo ha mormori onne, la hi ra'uli rasa'a ha mormori onne haenhi ra'aheni, “Ri mahaku kaale ma narehi ma nalewen ha mormori eniyeni. Ri mahaku ka naruri na'ara noro ai ono nin molollo ma narehi ma nalewen aile.” 
\p  
\v 5 Makromod Lalap hurinohi ha mormori man ailanna onne wakunu kukulu lalap la na'ihoru na'idaru Ai Naran. Makromod Lalap hurinohi ai nodi molollo ri mormori na'akeme wollo weli'akka woro'o raramne.  
\v 6 Ai na'ihoru na'idaru Makromod Lalap Naranne noro Nin miminlole, la wakunu nano'onyak ri man minle a'am raram.  
\v 7 Rala leken ai haenhi haul ara noro Makromod Lalap Nin ri leke rehi ara. Rala molollo ai leke nodi molollo ri nano hair-hair, noho-noho, luhu-luhu, noro wanakunu na'akeme.  
\v 8 Ri man minle noho wawan nammori rehi ra'uli rasa'a ha mormori onne, maa ri man lernohi Pipdumana man resnedi onne ka ra'uli rasa'e. Hi onne naran horokedi lolo Nin \it Horok Or'ori Dardari\it* me'e. Noho ka namwali makun, ri man lernala or'ori dardari ma kan horu enihe, naranhe aiyedi Nin horok onne raram me'e. 
\p  
\v 9 Ende inhoi man derderne, loi honorok wawa'an!  
\v 10 Makromod Lalap naledi kenekrohu nahenia hir kele man lernohi Yesus heruwali rodi laa bui raram, la kele heruwali rodi raa daresne.\f + \fr 13:10 \ft Panaeku namehin: Inhoi nodi raa nesne ri, resne ai rodi raa haenhi.\f* 
\p Ende mi man lernohi Makromod Lalap mamkene kerhu lolo ha man apinha, la yono mi akim nado'o, maa na'amoli mi akim namkene naili'il Yesus mamani. 
\s1 Ha mormori ida woku nano noho wi'in 
\p  
\v 11 Ya'u po'on wali'ur ha mormori namehin woku nano noho wi'in, dudal woro'o naise pipdume dudalle, maa lirna naise nee lalapa lirna.  
\v 12 Ha mormori man kauli'ur onne namwali ha mormori dedesne nin man hemen. An lernala ha mormori dedesne onne nin molollo hi'i ri mormori noho wawan na'akeme ra'uli rasa'a ha mormori ma nina dilahe lapa aile uluwakun onneni. 
\p  
\v 13 Ha mormori woro'o nine onne hi'i tanada lewlewen man hi'i ri polletilu. Lolo ri na'akeme kalarna, an hi'i aiye nadiyaur nano a'am mai noho wawan.  
\v 14 An hi'i tanada man lewlewen onne nodi ha mormori dedesne nin molollo. Ai nodi tanada man lewlewen onne kokwudi ri mormori noho wawan, la hopon hi na'akeme ra'ariri aukerhida man po'on naise ha mormori dedesne man mormori makun kade rodi raa ra'ano'edi.  
\v 15 Makromod Lalap hurinohi ha mormori man woku nano noho wi'in onne nala aran aukerhida man po'on naise ha mormori dedesne onne, de aukerhe onne nauroin wakunu la nodi molollo hopon resne ri ma ka na'uli nasa'a ai.  
\v 16 An hopon nahenia ri mormori noho wawan na'akeme kokala ha mormori dedesne onne nin tanada. Tanada onne rala cap loile hi liman malanna me hi leren. Ende ri mormori na'akeme, tatana noro lalapa, man karu noro ma na'alehe haida-haida, la hophopon noro ri ma nadedem, kokala tanada onne.  
\v 17 Lo'o tanada onne kan minle ri liman me leren, kar huri ai na'iwali, ee na'olu hahaa ida, ono tanada onne ha mormori dedesne naranne me nin nomor. 
\p  
\v 18 Loi honorok wawa'an leke mauroin tanada onne nin panaeku! Inhoi nin woroin aile, ai akinala honorok onne la nauroinnala ha mormori dedesne onne nin nomor nin panaeku. Nomor onne penia namwali tanada ma na'ono ‘ri mormori’. Nomor onne rahu woneme welneme woneme (666). 
\c 14  
\s1 Pipdumane noro Nin ri 
\p  
\v 1 Onne horu, ya'u do'on haida wali'ur. Ya'u po'on Pipdumana namririri lolo wo'or Sion, noro wewerre Nin ri riwan rahu weli'akka wo'akka (144.000). Lolo hi leren horhorok Pipdumane Naranne noro Aman Naranne.  
\v 2 Ya'u derne lira ida nano a'am raram naise oir rulu lapa wauwau noro noho dildila lape. Lira i dederne onne naise ri nammori maha ra'aromo kecapi.  
\v 3 Ya'u po'on ri riwan rahu weli'akka wo'akka (144.000) onne ramririri rahinanara hanara worworu lolo Makromod Lalap Nin naikoronno kalarna la lolo ha mormori wo'akka roro ri leleher lalapa onnenihe kalarna haenhi. Heri riwan rahu weli'akka wo'akka onnenihe mehe rauroin wakuku hanara onne, ri namehin ka. Nano ri na'akeme lolo noho wawan, hi penia Pipdumaneni pairedi rir okon de huri we'eredi hi nano makmaki nin hunukum me'e.  
\v 4 Hi kar lerwa'u hailai wake'e ono hi radiyaka kemen leke rira morimori moumou dewdewe. Hir lernohi Pipdumaneni laa ewi-ewi. Nano ri noho wawan na'akeme, An hi'iyedi hi ramwali Nin ri ono An pairedi rir okon me'e, leke hi ramwali honoi kanani man ma'aruru rodi rala Makromod Lalap noro Pipdumaneni.  
\v 5 Hi ka rapoho wake'e, la kar hi'i yaksala ida. 
\s1 Hophopon a'am raram wokelu man loikaru Makromod Lalap Lirna 
\p  
\v 6 Ya'u po'on hophopon a'am raram ida wali'ur liwar laa wawan wake'e. Ai nodi Makromod Lalap Lirna Wawa'an ma kan herre laa ewi-ewi eni. Ai naderre nadaul Lira Wawa'an onne laa ri man mori lolo noho wawan na'akeme: hair-hair, noho-noho, luhu-luhu, la wanakunu na'akeme.  
\v 7 An wakau naruri na'ahenia, “Mamka'uk Makromod Lalap la ma'uli masa'a Oin Naran man kulu narehi man lap narehi, ono Nina lere alam ho'ok kail ri na'akeme rakanedi me'e. Hoikani Ai ono Ai penia ma nakuku noho la ma naleu a'am noro idewe lour la oir makan na'akeme!” 
\p  
\v 8 Onne horu, hophopon a'am raram rewro'o nine man lernohi hophopon dedesne onne na'aheni, “Babel nadiporedi me'e! Kote man lalap wake'e onne nadiporedi la ri kan min lolo onne me'e, ono hi rakoko hair-hair yon peinohi Makromod Lalap. Manin Babel onne nori ri holi yaka leke yaka naise maekyak man nori ri nomun arak manha de holi diwar dawar!” 
\p  
\v 9 Enime'ede hophopon a'am raram rewkelu nine lernohi hophopon woro'o onnenihe nodi lirna naruri na'aheni, “Inhoi man hoikani ha mormori man ailanna onne noro nina aukerhe, la man lernaledi ha mormori onne nina tanada lolo ai leren me liman malanna,  
\v 10 na'amoli ai nomun Makromod Lalap Nina arak nini'i ma naulinu nawali Nina ahan man werek wake'e. Nin ahan ma ka namdaru, naisa arak man ni'i ono kar wa'aha noro oire. Ende Ai nodi aiye noro lali hi'i apinpinha ri na'akeme man lernohi ha mormori woro'o onne lolo hophopon a'am raram man moumou dewdewe noro Pipdumane kalarna.  
\v 11 Aiye ma na'an hi onne mahun ha'a la wawan mamani. Lelere a'alam rira apinpinha kan ren laa ewi-ewi, ono hir hoikaniyedi ha mormori noro nin aukerhe, la hir kokaledi nin tanada lolo hi leren me liman malanne me'e.” 
\p  
\v 12 Enpenia mi man lernohi Makromod Lalap yom mi akim nado'o. Lere mim lernala wewerek pananaka, ma'alap mi akim leke mamkene lernohi Makromod Lalap Nin keneri hono'ok la mi akim namkene naili'il Yesus. 
\p  
\v 13 Onne horu i derne Lirida nano a'am raram na'ahenia, “Horokedi ha eniyeni: Nano lere eniyeni, ri man maki ono ramkene lernohi Makromod, hi akin nahuwa'anedi!” 
\p Roh Kudus walha na'ahenia, “Namlolo! Hir warnedi nano rir honowok man werek onne me'e, la Makromod Lalap nauroinedi hi'ihehewi hi ramkene howok Nin honowok nair de naledi hi ma'urinrinna mauwarwara me'e.” 
\s1 Ra'ili radai noho wawan ihin ennen 
\p  
\v 14 Onne horu, ya'u po'on wali'ur kakam wawarhida, la Ri ida naikokoro kakam onne po'on naise Ri Mormori Anan. \x * \xo 14:14 \xt Dan. 7:13\x* An nair karpuse mahe man rehi ara nine, la nasalsala sabit mololornida. Sabit onne nair rodi ra'ili radai.  
\v 15 Kan mahala hophopon namehin ida namhara nano Makromod Lalap Nina Romleu Lape wakau naruri na'ahenia, “Modi Num sabit onne ma'ili madai here, ono lere alam na'ili nadai noho ihin ennen rakanedi me'e!”  
\v 16 Kame'ede An wewhe nina sabit laa yawa idewe noho wawan ihin ennen ra'ili radaiyedi. 
\p  
\v 17 Enime'ede ya'u po'on hophopon a'am raram namehin namhara nano Romleu Lape man aile a'am raram onne. Ai onne nasalsala sabite mololornida haenhi.  
\v 18 Enla hophopon namehin ma nadedem hunuku aiye man aile honoi kanani onno namhara lolo onne. Ai napolu hophopon a'am raram ma nasala sabit onne naruri na'ahenia, “Wewhe numa sabite onne rosu anggur woi manina noho wawan here, ono woin aw'awar me'e!”  
\v 19 Kame'ede hophopon onne wewhedi nina sabite laa noho wawan leke rosu anggur woin nano hananne, la ra'uk loile bak raram leke hamar. Bak rodi hamar anggur onne naulinu nawali ‘Makromod Lalap Nin ahane!’  
\v 20 Ende anggur woi rorosu onnenihe hamar lolo bak man aile kote paharne onne. Rara ma namhara lolo onne wau naise oir wauwau man roromne na'ikeki meter woro'o\f + \fr 14:20 \ft ‘Na'ikeki meter woro'o’ onne wanakunu Yunani na'aheni ‘rakan kude nin tome.\f* la ko'unne na'ikeki kilu rahu wokelu. 
\c 15  
\s1 Hunukum wo'ikku man horu 
\p  
\v 1 Ya'u po'on tanada namehin lolo a'am raram man lewlewen wake'e man hi'i ya'u polletilu. Hophopon a'am raram wo'ikku rodi molollo leke hi'i ri mormori noho wawan lernala hunukum wo'ikku man horu enihe. Hunukum wo'ikku man kauli'ur onne horuwedi, Makromod Lalap ka na'ahan me'e. 
\p  
\v 2 Enine ya'u po'on ha ida naise kahi lapa rodi kokaka hi'ie ma nawa'aha aiye aile raramne. Lolo kahi ma naise kokaka onne arkanne, ya'u po'on ri nammori ramririri. Ri onnenihe rehiyedi ara noro ha mormori man ailanna onne, ono hi ramhene hoikani ai noro nin aukerhe, la hi ramhene kokala nin tanada ma namwali nomor man herre ai naran onne. Man rehi ara onnenihe rasalsala kecapi man Makromod Lalap nanala hi eni.  
\v 3 Hi rahinanara Musa, ma namwali Makromod Lalap Nin hophopon wahwahan, nin hanara noro Pipdumana Nin hanara. Hanara onne lirna na'aheni, 
\q1 “Makromod Lalap, 
\q1 O penia ma nodi molollo ma narehi la ma nalewen! 
\q1 Om hi'i ha man lewlewen wake'e man hi'i mayai polletilu! 
\q1 O mamwali Rai ma nodi molollo ri mormori noho wawan na'akeme! 
\q1 Num hini'i na'akeme penia ha ma namdudu la ma namlolo. 
\q1  
\v 4 Makromod! Ri na'akeme lo'o ramka'uk O! 
\q1 Ri na'akeme lo'o wakunu Num ke'eke'el an'anha ma narehi la ma nalewen! 
\q1 O mehe mamwali Makromod man Moumou Dewdewe. 
\q1 Na'amoli ri mormori noho wawan na'akeme mai ra'uli rasa'a O, 
\q1 ono hir do'onedi Numa hini'i wenewhe rahu ma namlolo me'e.”\x * \xo 15:4 \xt Kel. 15:1\x* 
\p  
\v 5 Hi rahinara horu, ya'u po'on Makromod Nina Romleu Lape man aile a'am raram nin nike nahinariyedi. Rom onne wekel Makromod Lalap Nin Tenda haenhi.  
\v 6 Hophopon a'am raram wo'ikku onnenihe rodi hunukum wo'ikku ramhara Nin Tenda mai paharne. Rira nainair wawarha ad'ada la irhun makan rodi kornelhe mahe pakpake.  
\v 7 Hophopon a'am raram wo'ikku onne maiyedi paharn ne, ha mormori ida nano wo'akka onnenihe nala hi manuk mahe wo'ikku man penpenu noro Makromod Lalap Nin ahan. Makromod Lalap onne ik Makromod man mori laa ewi-ewi,  
\v 8 la aiye mahu nano Makromod Lalap Nin siksika lerlere noro Nin ke'eke'el an'anha na'apenuwedi Nin Romleu Lapa onne. Kar huri ri mahaku laa Romleu onne raram hehen nanumene hunukum wo'ikku man hophopon a'am raram rorodi onne horu. 
\c 16  
\s1 Hophopon a'am raram kolo manuk man ihin naulinu nawali hunukum wo'ikku 
\p  
\v 1 Ya'u derne Lira lapida nano Makromod Lalap Nina Romleu Lapa na'aheni, “Lam koledi manuk wo'ikku onne ihin ma naulinu nawali Makromod Lalap Nina ahane laedi noho wawan!” 
\p  
\v 2 Enine hophopon a'am raram dedesne lan koledi nin manuk ihin laa noho wawan. Ri man lernaledi ha mormori man ailanna onne nina tanada noro man hoikani nina aukerhe, na'akeme lernala wihul pohipohi man hi'i mahalarlarna ri. 
\p  
\v 3 Hophopon a'am raram rewro'o nine koledi nin manuk ihin lolo kahi. Enime'ede kahi namwali rare ma naise ri man makiyedi rarna. Ha man mormori manina kahi raram enihe na'akeme maki horu. 
\p  
\v 4 Hophopon a'am raram rewkelu nine koledi nin manuk ihin lolo oir wauwau noro oir makan na'akeme. Enime'ede na'akeme namwali rara.  
\v 5 Kame'ede ya'u derne hophopon a'am raram ma nodi molollo oir na'akeme na'uli nasa'a Makromod Lalap na'ahenia, 
\q1 “O mehe mamwali Makromod Lalap Man Moumou Dewdewe, 
\q2 man aile nano nonolu, 
\q2 la man Aile lere eni. 
\q1 Hunukum man O mala laa noho wawan onne penia ma namlolo la ma namdudu, 
\q1  
\v 6 ono ri lolo noho wawan onnenihe resnedi Num ri, 
\q2 la hir koledi Num nabi-nabi rarne! 
\q1 Eni penia lere eni mala rara hi romun. 
\q2 Num panaeku onne wa'an la namlolo.” 
\p  
\v 7 Ya'u derne wali'ur lira nano honoi kanani onno onneni na'ahenia, 
\q1 “Namlolo! Makromod Lalap! Num ke'ke'el an'anha ma narehi la ma nalewen na'akeme! 
\q2 Onum hunukum namlolo la namdudu!” 
\p  
\v 8 Onne horu, hophopon a'am raram rew'akka nine koledi nin manuk ihin laa lere wawan, de nala molollo lere leke nodi hikanne harnedi ri mormori.  
\v 9 Lere hikanne hi'i ri mormori na'akeme ramno'o horu la kemen apinpinha mamani, de hi ra'ihoru ra'idaru Makromod Lalap Oin Naranne. Hi rauroin Ai nodi molollo apinpinha onne, maa hi kar herre rir morimori ma ka namlolo la ramhene ra'uli rasa'a Makromod Lalap ma nodi molollo ma narehi nalewen na'akeme. 
\p  
\v 10 Onne horu, hophopon a'am raram rewlima nina koledi nin manuk ihin lolo noho man ha mormori man ailanna onne nodi molollo. Idewe ri na'akeme man derne rakani ai minedi noho momohon, hi na'akeme ra'unihi namal ono kemen apinha wake'e.  
\v 11 Enime'ede hir lokor hauk Makromod Lalap man aile a'am raram, ono hi kemen eren apipinha, maa ramhene herre rira morimori man ailanna onneni. 
\p  
\v 12 Onne horu hophopon rewneme nine koledi nin manuk ihin laa oir wauwau ma naran Efrat eni. Idewe oir wauwau lalap onne namkisiyedi de ra'akenedi namwali kalla leke rai-rai roro rira ke'urauk nano noho-noho wali kimur mai lole.  
\v 13 Enla ya'u po'on hayakyaka wokelu naise na'oi dil'or'ore. Dedesne nine namhara nano nee lalapa onne nuranne, rewro'o nine namhara nano ha mormori dedesne man ailanna onne nuranne, la ida wali'ur namhara nano nin henemen\f + \fr 16:13 \ft Ha mormori man ailanna nin henemen ma napoho onne namnenehe ha mormori man ailanna ma namhara elimo'o onne. Po'on 13:11-17, 19:20, noro 20:10.\f* ma napoho nurane haenhi.  
\v 14 Hayakyaka wokelu onne hi'i ha man ri kan dodo'onnale makun. Hir laa rapolu rai-rai lolo noho wawan na'akeme maiwuku leke haul ara lapa. Hir hi'i ara rakan Lere Alam Lalap man Makromod Lalap Ma Nodi Molollo Narehi Nalewen Na'akeme niliyedi leke na'ahoruwedi Nin arwali na'akeme. 
\p  
\v 15 Makromod Yesus na'aheni, “Loi honorok wawa'an, ono mamlilinnohi Ya'u mai naise ri ma namna'a de mamlilinnohi mai! Rakan lere Ya'u mai eni, ri ma nadiyaka nin morimori wawa'an, ai akin nahuwa'anedi. Ende madiyaka wawa'an naise ri ma ka namkuru mahal, maa nair nin nainair mamani leke lo'o pelek nala'a, yon nawawa ono nadlewlewhe!” 
\p  
\v 16 Hayakyak onnenihe poluwuku rai-rai de hir maiwuku onnida man rodi wanakunu Ibrani rapolu ‘Harmagedon’. 
\p  
\v 17 Onne horu, hophopon rew'ikku nine koledi nin manuk ihin laa hulik loiloi kakam larlari. Enla ya'u derne Lir lapida namhara nano Makromod Lalap Nina naikoronno man aile nina Romleu Lap raramne na'ahenia, “Ha rahu na'akeme kukkuku noknokor me'e!”  
\v 18 Idewe noho lerlere noro noho dildile mamani, la rururuwai man lapa wake'e. Nano noho namwali me'ede rakan lere onne ri kan dodo'onala rururuwai man lap heheni makun!  
\v 19 Lere onne Makromod Lalap kan hamlinu nahenia manin kota Babel onne hi'i dohohala nammori me'e. Ende An hi'i hi romun arak nini'i nano Nin manuk ma naulinu nawali Nin ahan man werek wake'e. Ende kota lapa onne napye'eredi namwali wokelu la kota-kota lolo noho wawan na'akeme woir horu.  
\v 20 Lere onne me'ede noho-noho keper mouwedi laa kahi raram, la wo'or-wo'or na'akeme kame'el.  
\v 21 Okon es waku lapa man werek lo'o kilu wellima nadiyaur nano a'am mai nalwalile ri mormori. Enpenia ri mormori lokor hauk Makromod Lalap ono nala hunukum man werek wake'e. 
\c 17  
\s1 Kote Babel naho'ok naise maekyak 
\p  
\v 1 Hophopon a'am raram ida nano wo'ikku ma nasala manuk wo'ikku onnenihe, kopur mai ya'u na'aheni, “I wal'u, mai nanu! Ya'u kukul ki o hi'ihehewi Makromod Lalap lo'o hukum maekyake ma naran pe'eredi. Ai onne namwali kota lapa man aile lolo oir wauwau nammori wawan.  
\v 2 Rai-rai lolo noho wawan na'akeme lernohi kota onne holi yak leke yak la hoikani aukerhe. Kote onne nori ri mormori na'akeme holi yak leke yak la hoikani aukerhe naise maekyak ma nori mo'oni romun arak leke manha de holi diwar dawar.” 
\p  
\v 3 Enime'ede Roh Kudus nodi molollo maya'u, la hophopon a'am raram onne nodi ya'u laa noho mamun ma napro'uk. Min lolo enne ya'u do'on maeke ida naikokoro ha mormori man mere mohmohon ida. Ha mormori onne kemen horhorok naran mamani. Naran onnenihe ra'ihoru ra'idaru Makromod Lalap Naran. Ha mormori onne uluwakun wo'ikku la dudalle idaweli.  
\v 4 Maeke i dodo'on onne nair nainair au'au noro mere mohmohon la rodi mahe, mutiyare, noro waku man wella ai wawan ra'akeki kemen na'akeme, la ai nasalsala manuk mahe man penpenu noro nonomun man luli la man hi'i rin mahalarna. Nonomun onne naulinu nawali nin hini'i wenewhe man diwar dawar wake'e noro hini'i man morso man hi'i ri mahalarna.  
\v 5 Lolo maeke onne leren horhorok panaeku ma nasinuwar na'ahenia, 
\qc \sc Kote Lalap, Babel\sc*! 
\qc \sc Ri Man Holi Yak Leke Yak Na'akeme Inna\sc* 
\qc \sc La Noho Wawan Nin Diniwar Danawar Onno\sc*. 
\m  
\v 6 I do'on maeke onne manhedi ono ai nomunedi rara nano Makromod Lalap Nin ri mememen nammori ma nodi Yesus Lirnenihe. Do'on maeke onne, ya'u polletilu la mehe kakaiyedi ya'u. 
\p  
\v 7 Enime'ede hophopon a'am raram onne na'aheni maya'u, “Alhi'ihepe om polletilu la mehe kakaiyedi oe? Na'amolia ya'u konohi rir panaeku ma nasinuwar ki o. Panaeku onne na'ono maeke noro ha mormori man uluwakun wo'ikku la dudal idaweli onne. 
\p  
\v 8 Nonolu eni ha mormori onne mori, maa ors eni moluwedi me'e. Ka nalo'ol me'e ai namhara nano Lo'o Lalap man roromne kar ho'oknala, mene lernala hunukum laa ewi-ewi. Ri mormori lolo noho wawan ma naranhe kaale lolo \it Horok Or'ori Dardari\it*\f + \fr 17:8 \ft Lolo \+it Horok Or'ori Dardari\+it* eni raram ri naran man lernaledi or'ori dardari ma kan horu horokedi me'e nano noho eni ka namwali makun. Po'onala 13:8.\f* man aiyedi nano noho eni ka namwali makun, lo'o polletilu po'on ha mormori onneni, ono nonolu eni an mori, maa ors eni kaale me'e, la lo'o hari wali'ur. 
\p  
\v 9 Inhoi loi honorok wawa'an, ai lo'o nauroin ha ma nasinuwar eniyeni nin panaeku. Ha mormori uluwakun wo'ikku onne naulinu nawali wo'or wo'ikku man maeke onne naikorle. Uluwakun wo'ikku onne namwali rai wo'ikku haenhi, maa  
\v 10 wolima makiyedi me'e, la ida mormori, la ida kan mai makun. Rakan lere an mai, ai nodi molollo, maa ka nalo'ol.  
\v 11 Ha mormori man nonolu mori, maa ors eni moluwedi me'e onne namwali rai wo'aa nine. Maa ai onne namwali rai ida nano rai wo'ikku idedi onnenihe. Enla lere man horu eni an lernala hunukum laa ewi-ewi. 
\p  
\v 12 Ha mormori dudal idaweli onne namwali rai idaweli, maa kar komdere makun. Lere hir kokala molollo leke ramwali rai, hi rodi molollo wewerre noro ha mormori onne, maa ka nalo'olo, lo'o jam ida mehe.  
\v 13 Rai idaweli onnenihe rala kenekrohu wewerre nahenia rala rira molollo noro rira ruri ha mormori onneni.  
\v 14 Hi ra'ara roro Pipdumane, maa Pipdumaneni rehiyedi ara, ono Ai penia Makromon ma nodi molollo makromon na'akeme, la Rai ma nodi molollo rai na'akeme. Enla lere onne ri ma nornoro Pipdumaneni, hi ramwali Nin ri ma napoluwedi, la man niliyedi, la ma akin ramkene lernohi Ai haenhi.” 
\p  
\v 15 Hophopon a'am raram onne haul lira wali'ur na'ahenia, “Oir wauwau nammori man maekyake naikokoro onnenihe, naulinu nawali ri mormori noho wawan na'akeme: ma nano hair-hair, noho-noho, luhu-luhu, la ma nano wanakunu na'akeme.  
\v 16 Rakan ler ida ha mormori noro idewe rai idaweli onnenihe kar suk maekyaka onne me'e, de rore ra'ara. Hi rahoredi nin nainair, ra'anedi ihin heruwali, la harnedi kemen rehin. 
\p  
\v 17 Hir hi'i heheni ono Makromod Lalap hi'i hi lernohi Nin raram nodi me'e. Onneni penia rai onnenihe rala rira molollo ha mormori onneni. Hir derne rakani ha mormori onne hehen nanumene Makromod Lalap Nin panaeku na'akeme kuku nokoredi. 
\p  
\v 18 Maekyak man om dodo'on onne naulinu nawali kota lalape ma nodi molollo komdere rai noho wawan na'akeme.” 
\c 18  
\s1 Kote Babel lernala hunukum 
\p  
\v 1 Horu ne ya'u po'on hohopon a'am raram namehin ida kopur nano a'am raram. An mai ne, nodi molollo man rehrehi lewlewen la Nin siksik lerlere na'aropedi noho wawan.  
\v 2 An wakau naruri na'ahenia, 
\p “Babel nadiporedi me'e! Kote lape onne nadiporedi me'e! Ri mahaku kan min lolo onne me'e, la lere eni nediyomon ahuwain noro hayakyak-hayakyak man ailanna mamani suwsuwar lolo onne. Manu liwliwar man hi'i mahalarlarna ri suwsuwar lolo onne haenhi.  
\v 3 Kote Babel onne nadiporedi ono nin ri ken patal ri nano hair-hair na'akeme holi yak leke yak la hoikani aukerhe, naise maekyak ma nala nonomun mo'oni leke romun manha de hailai noro ai. Rai-rai lolo noho wawan lernohi rir hini'i wenewhe haenhi, la ri na'akeme ma na'iwali noro ma na'olu hahaa lolo noho wawan na'akeme karu ono ri man minle Babel raram nodi weli hahaa man wella ai wawan mamani.” 
\p  
\v 4 Onne horu ya'u derne Lir namehin ida nano a'am raram na'aheni, 
\q1 “Eih, mi man lernohi Ya'u! Mamharedi kota onne here, 
\q2 kalo'o lernohi ne'en raramne rira dohohala, 
\q2 la lernala hunukum man werek ma nano'onyak hi, 
\q2  
\v 5 ono hirira dohohala nammori rehi rahupu kulunne rakanedi a'am raram me'e. 
\q1 Enla Makromod Lalap horhorok rir yakyak salsala onne na'akeme, 
\q2 de na'akene nala hunukum hi me'e. 
\q1  
\v 6 Ende na'amoli An herre walhedi kota onne namnenehe kota onne hi'i wewhedi ri namehin me'e. 
\q1 Na'amoli An herre walha kota onne nin hini'i man ailanna onne rewro'o, 
\q2 la na'akenedi nonomun man meru nala kota onne ma naruri rewro'o narehi ai nala ri namehin. 
\q1  
\v 7 Babel ne'en raram onnenihe mori naise maeke ma na'akeki kemen herlei wake'e, 
\q2 la hi'i wewhe inhawa-inhawa man ai raram nodi aimehi. 
\q1 Enpenia hi'iyedi apinha la sus hi me'e, 
\q2 ono hir holi kukulu lalap ra'aheni, ‘Ai modi molollo naise rai maeke, 
\q2 ai ka mamwalum, la kam lernala sus mak oire.’ 
\q1  
\v 8 Ende lolo lerida raram mehe kota Babel ne'en raram onne lernala apinpinha wo'operperi. 
\q1 Ende Makromod Lalap nala kini'ir, sus mak oire, noro roulare hi, 
\q2 noro idewe aiye ma na'an kota onne, 
\q2 ono Ai man ho'ok kail hi nodi molollo ma narehi ma nalewen.” 
\p  
\v 9 Rai lolo noho wawan na'akeme man lernohiyedi kota Babel, de holi diwar dawar la lernohi rir suk aimehi, rakan lere onne hi rahere la akin woir ono hir po'on aimahu nano aiye ma na'an kota onne.  
\v 10 Hi ramka'uk hunukum onne, de ramririyedi ko'ko'u, rahere ra'aheni, 
\q1 “Idei! Kote Babel man lapa onne! Mayo'o wake'e! Lolo jam ida mehe an lernaledi hunukum!” 
\p  
\v 11 Ri ma na'olu hahaa na'akeme sus mak oir rehi la ra'adididi, ono hir po'on kota lapa Babel onne nadiporedi. Hir sus ono kota ne'en raramne kar weli rira hahaa warna-warna me'e, naise:  
\v 12 mahe, pere, waku man wella ai wawan, mutiyare, nainair man ma'aruru rodi tapi man wella ai wawan hihi'ie, tapi memere, noro tapi au'au. Hirira hahaa rodi au wala'ula'u hihi'ie, hahaa rodi leli ihi hihi'ie, au man wella ai wawan, pesi, pirmere, noro waku marmer.  
\v 13 Au ulik ma namina noro rampa-rampa namehin aile, ha man wola'ula'u, naise kemenyan noro mur. Rir anggur noro wuru, gandum noro oke aile. Hirira sapi noro pipdume, kude noro kerete, la hi ra'olu ri ma namwali hophopon, (namlolo, hi ra'olu rimorimori haenhi).  
\v 14 Ma na'olu hahaa enihe, hi akin woiredi ono Babel nadiporedi me'e de rahere ra'aheni, 
\q1 “Hahaa man ma'aruru mi raram nodi onne na'akeme, kame'el. 
\q2 Hahaa ma namwali minim linikir kanaru 
\q2 noro hahaa rodi ra'akeki mi kemenhe molu mouwedi me'e.” 
\p  
\v 15 Ri ma na'oluwedi hahaa namansa lolo kota onne de karuwedi me'ene, ramriri ko'u ono ramka'uk aiye na'an hi haenhi. Hi rahere la sus mak oir mamani,  
\v 16 la ra'aheni, 
\q1 “Idei! Idei! Kote lap eni nadiporedi me'eee! 
\q2 Nonolu ai onne naise rai maeke man nair nainair man ma'aruru rodi tapi man wella ai wawan hihi'ie, 
\q2 la nair nainair rodi tapi memere, tapi au'au hihi'ie, 
\q2 la nodi mahe noro pere, waku man wella ai wawan, noro mutiyara ra'akeki kemen, 
\q1  
\v 17 maa jam ida mehe nina linikir kanaru na'akeme onne, molu mouwedi!” 
\p Ri ma nanoin kelen aran noro rira hehewek nanair lolo lour nine, ma namwali uluwakun kapal, man howok kapal, me man ha'anohi kapal, na'akeme ramriri ko'u.  
\v 18 Hir po'on aiye ma na'an kota onneni mahun ne, wakau ra'aheni, “Eih! Lolo noho wawan kota rahu ka naise kota lape onneni!”  
\v 19 Hir wahair apu uluwakun, sus mak oir mamani, la ra'adidi ra'aheni, “Idei! Idei! Kote lalapa onne mayo'o'edi me'eee! Nonolu man manarna kapal na'akeme karu horu nano ihin ennen rahue! Maa jamida mehe ha rahu na'akeme moluloinedi!” 
\p  
\v 20 Ya'u derne Lir nano a'am raram wali'ur na'aheni, 
\q1 “Manin a'am raram na'ahoru, mi akim nahuwa'anedi here, 
\q2 ono Makromod Lalap na'apo'oredi kota Babel me'e. 
\q1 Ende mi ma namwali Nin ri, roro hophopon ma nodi Lir Wawa'an eni, roro idewe nabi-nabi man loikaru Makromod Lalap Lirna Wawan enihe, mi akim nahuwa'anedi here, 
\q2 ono Makromod Lalap naledi hunukum kota Babel herre walhedi rira hini'i wenewhe man yak ki mi me'e.” 
\p  
\v 21 Onne horu, hophopon a'am raram man lewlewen ida kikan waku lapida wakal laa kahi raram na'aheni, 
\q1 “Kote lap Babel onne, 
\q2 Makromod Lalap nodi rurilai na'akeperedi 
\q2 naise waku onne wakaledi laa kahi raram de kak do'on me'e. 
\q1  
\v 22 Ri ma nauroin na'aromo kecapi, ma nahinara, ma nou poloit, la ma nou kowuri 
\q2 kaale lolo kota onne me'e. 
\q1 Ri ma nauroin howok lewlewen ida naise nayapi nakar kaale lolo onne, 
\q1 la maeke ma nodi waku kuku kele'uk kame'el. 
\q1  
\v 23 Ri kan lokon wadu mori lolo kota Babel me'e. 
\q1 Ri kan hi'i yapi hohoo me'e. 
\q1 Makromod Lalap hukum kota Babel naise onneni 
\q2 ono nin ri ma na'olu hahaa enihe hi naran pe'eredi lolo noho wawan. 
\q1 Hi rodi rir woroin hi'i u'ur leher kokwudi ri mormori na'akeme lolo noho wawan. 
\q1  
\v 24 Babel nin ri penia resnedi Makromod Lalap Nin ri roro man loikaru Makromod Lirna Wawan enihe. 
\q1 Namlolo! Hi mehe resnedi ri na'akeme lolo noho wawan man resnedi nonolu eni.” 
\c 19  
\s1 Manin a'am raram rahinara, “Haleluya,” ono Babel nadiporedi me'e 
\p  
\v 1 Hophopon a'am raram ma naruri onne wakunu horu ne, ya'u derne ri nammori lirna nano a'am raram wakau ra'aheni, 
\q1 “Haleluya! Mai ka'uli kasa'a ik Makromod!, 
\q2 ono Ai penia ma nala or'ori dardari ma kan horu maika, 
\q2 Ai namwali Makromod Lalap man kulu narehi lap narehi, 
\q2 la ma nodi molollo laa ewi-ewi! 
\q1  
\v 2 Ainina hono'ok kanail penia ma namdudu la ma namlolo! 
\q1 Ai naledi hunukum maekyak lalapa onne me'e, 
\q2 ono ai nano'onyaka noho wawan nodi nina honoli diniwar danawar, 
\q2 la nesne Makromod Lalap Nina hophopon wahwahan enihe.” 
\p  
\v 3 Ya'u derne wali'ur lir rahu onne ra'aheni, 
\q1 “Haleluya! 
\q2 Aiye ma na'an kota lalap onne mahun kan ren laa wawan laa ewi-ewi.” 
\p  
\v 4 Enime'ede ri leleher lalap werro'o wo'akka roro ha mormori wo'akka enihe wali yawa rahinononow ra'uli rasa'a Makromod Lalap ma naikoro Nin naikoronno onneni ra'aheni, 
\q1 “Namlolo! Haleluya!” 
\s1 Pipdumana Nina yapi 
\p  
\v 5 Onne horu ya'u derne Lira nano naikoronno onne wakau na'ahenia, 
\q1 “Mi na'akeme ma namwali Nin hophopon wahwahan ma namka'uk Makromod Lalap, 
\q2 Ma'uli masa'a Ai! 
\q1 Mi na'akeme, man anulu panulu noro man lolo yawa, 
\q2 ma'uli masa'a Ai.” 
\p  
\v 6 Horu ne, ya'u derne lirida naise ri nammori wakaukau. Rir wanakau onne naise oir wauwau nammori neknekir, la naise noho dildila lape. I derne hi ra'aheni, 
\q1 “Haleluya! Ka'uli Kasa'a Makromod Lalap 
\q2 ono Ai penia namwali Rai Ma Nodi Molollo Ma Narehi Ma Nalewen! 
\q1  
\v 7 Ik akin nahuwa'anedi here, 
\q1 mai ka'uli kasa'a Ai Oin Naran man kukulu lalap eni!, 
\q2 ono Pipdumana Nina lere alam hohoo rakan dawakedi me'e, 
\q1 la Nina maeke namkenedi leke ho noro Ai me'e, 
\q1  
\v 8 de an nair nainair lenan man mamamal, man mou, la man ad'ada.” 
\q2 (Nainair lenan onne penia naulinu nawali Makromod Lalap Nina ri mememen rira hini'i wenewhe ma namlolo enihe.) 
\p  
\v 9 Enla hophopon a'am raram onne na'aheni maya'u, “Horokedi lira eniyeni: Ri man Pipdumana polu lariyala laa Nina yapi hohoo onneni, akinhe nahuwa'anedi me'e.” 
\p Ai na'uwali lira wali'ur na'ahenia, “Horok eni penia Makromod Lalap Lirna ma namlolo.” 
\p  
\v 10 Kame'ede ya'u laedi yawa lolo hophopon onne kalarna leke hoikani ai, maa ai na'aheni, “Yono! Yom hoikani ya'u! Hoikani Makromod Lalap mehe. Ya'u eni man howok Makromod Nina honowok naise o moro wallumhe man loikaru Makromod Lalap Lirna Wawan man Yesus konohiyedi mi me'eni. Ma'uli masa'a Makromod Lalap mehe, ono ik na'akeme konohi ri Makromod Lalap Lirna Wawan man Yesus konohiyedi maika me'e namnenehe nabi-nabi loikaruwedi nonolu eni.” 
\s1 Ri ma naikoro kuda wawarha rehiyedi ara Nin arwali 
\p  
\v 11 Ka nalo'olala, ya'u po'on a'am raram nahinariyedi. Ya'u do'on kude wawarhida aile. Ma naikoro kuda onne naran ‘Ma Namkene Hi'i Nin Nou’ la ‘Ma Namlolo’ ono Ai nodi aki ma namdudu ho'ok kail ri, la hi'i ha ma namlolo mamani lolo ara.  
\v 12 Makan naise ai lere la lolo uluwakun karpuspus rai nin karpusa nammori. Lolo kemen horhorok Naran ida ai mehe nauroin.  
\v 13 Nainair An nanair onne, rala kounedi rara me'e, la hi rapolu Ai ‘Makromod Lalap Lirna Wawan.’  
\v 14 Ma nasala ke'urauk lolo a'am raram nammori lernohi Ai ha'a kuda wawarha mamani, la na'akeme nair nainair lenan wawarha man mamamal la man moumou.  
\v 15 Raa mololornida namhara nano Ai ma nair nainair rare mamani onne nuranne. Ai nodi raa onne rehiyedi ara noro hair-hair lolo noho wawan, la namwali Rai ma nodi molollo rehiyedi wonokon mermere. An rehiyedi ara la hamaredi Nin arwali naise rin hammar anggur woi lolo bak raram. Nin hini'i onne naulinu nawali Makromod Lalap Ma Nodi Molollo Ma Narehi Ma Nalewen Nin ahan man werek wake'eni!  
\v 16 Horhorok naran aile Nina rain man sorsoru, la aile pahpaharne ma na'aheni: 
\qc \sc Rai Ma Narehi rai na'akeme!\sc* 
\qc \sc Makromod Ma Narehi makromon na'akeme!\sc* 
\p  
\v 17 Onne horu ya'u do'on hophopon a'am raram ida namriri lere wawan. An wakaukau naruri napolu manu liwliwar ma nadedem ra'an ha mormori man maki ihin kemen na'aheni, “Maiwuku leke lernohi yapi lapa man Makromod Lalap hihi'i eni.  
\v 18 Mai mo'on rai-rai roro uluwakun ara ihin kemenhe, mo'on ma nasala ke'urauk man lewlewen ihin kemenhe, mo'on kuda noro ma naikoro kuda ihin kemenhe. Mai mo'on ri mormori na'akeme ma namwali anulu panulu me man lolo yawa, noro ma namwali marna me ma namwali hophopon ihin kemenhe.” 
\p  
\v 19 Ya'u do'on ha mormori man ailanna onne, noro rai-rai lolo noho wawan, roro rira ma nasala ke'urauk enihe lawuku ramkene ra'ara roro Ai ma naikoro kuda wawarha onneni noro Nina ma nasala ke'urauk enihe.  
\v 20 Kame'ede Ai ma naikoro kuda onne keledi ha mormori man ailanna noro nin henemen. Hir mormori makun, maa Ai nodi hi laa sopoledi kahi aiye noro lali ma kan maki laa ewi-ewi raram. (Henemen onne penia ma nodi ha mormori ailanna onne nin molollo hi'i tanada man ri kan dodo'onnala makun. Nonolu ai onne wukupoho ri na'akeme man kokaledi ha mormori onne nin tanade noro man hoikaniyedi nin aukerhe me'e.) 
\p  
\v 21 Horu ne, Ai ma naikoro kuda onne nodi raa ma namhara nuranne nesne mouwedi rir ma nasala ke'urauk enihe, la manu liwliwar na'akeme mai ra'an ihin kemenhe. 
\c 20  
\s1 Kristus nodi molollo lolo noho wawan anna riwan ida 
\p  
\v 1 Onne horu, ya'u po'on hophopon ida kopur nano a'am raram nasalsala dasla lalapida noro konse man hari nike Lo'o Lalap man roromne kar ho'oknala onne.  
\v 2 Hophopon onne kele nee lalapa man hi rapolu ‘Nee Nonolu eni,’ man waki ‘Hayakyak Makromon,’ me ‘Setan’ haenhi. An dasledi ne,  
\v 3 sopoledi laa Lo'o Lalapa onne raram, la konsedi nina nike leke yon wukupoho hair-hair lolo noho wawan hehen nanumene anna riwan ida horu. Makromod Lalap naledi kenekrohu me'e nahenia anna riwan ida horu huriyale tarana wali'ur. 
\p  
\v 4 Ya'u po'on rai-rai rir naikoronno wali'ur la ma naikokoro lolo onno onnenihe rodi molollo ho'ok kail ri. Ya'u po'on ri hamaran man nonolu uluwakunhe pekuwedi ono hi ka ramka'uk konohi ri Yesus Lirna Wawa'an noro Makromod Lalap Lirna Wawan eni. Hi ramhene hoikani ha mormori man ailanna onne noro nin aukerhe, la kar kokala nin tanada lolo hi liman me hi leren. Ende hir moriyedi wali'ur me'e, la roro Kristus rodi molollo wewerre anna riwan ida raram.  
\v 5 Lere onne penia lere dedesne ri man makiyedi ra'amori wali'ur. Maa anna riwan ida horu mene ri namehin man maki ra'amori wali'ur.  
\v 6 Ri man Makromod Lalap na'amori wali'ur lere dedesne onnenihe, akinhe nahuwa'anedi la hi mehe ramwali Nina pipi unulu wawi tanma'a man moumou dewdewe. Makmaki rewro'o nine ka nodi molollo hi me'e, maa hi ramwali imam-imam man ilitolle Makromod Lalap noro Kristus, la roro Kristus rodi molollo wewerre anna riwan ida raram haenhi. 
\s1 Hukum Hayakyak Makromon 
\p  
\v 7 Anna riwan ida horu, hophopon a'am raram ida huriyedi Hayakyak Makromon nano dasleni.  
\v 8 Enine ai namhara Lo'o Lalap onne laa noho pa'i'ik rai pakakar wukupoho ri mormori lolo hair-hair na'akeme man rapolu ‘Gog’, noro ‘Magog.’ Hayakyak Makromon wukupoho hi leke lawuku ra'ara. Hi eniyenihe lawukuwedi ne, kar akinalahe.  
\v 9 Hi ramhara noho pa'i'ik rai pakakar maiwuku lupurala kote man Makromod Lalap nararamyakeni. Lolo kota onne Nin ri mai wukuwedi me'e, maa haida ka namwali Nin kota eni ono aiye kopur nano a'am mai na'an mouwedi man mai ra'ara onnenihe.  
\v 10 Enla Hayakyak Makromon man wukupohedi hi onne sopol laedi kahi man aiye noro lali mormori eni. Lolo kahi onne, ha mormori man ailanna onne noro nin henemen ma napohe aiyedi me'e. Wokeluhe lernala apinpinha lelere a'alam rakan laa ewi-ewi. 
\s1 Hunukum man horu 
\p  
\v 11 Onne horu, ya'u po'on naikoronno wawarha lapida, la ya'u po'on Ai ma naikorole, la ya'u po'on a'am noro noho wawan idewe moluloinedi nano Ai kalarne me'e.  
\v 12 Ya'u po'on ri man makiyedi na'akeme, ma na'ono noro man lolo yawa, ramririri aile naikoronno onne kalarna. Horok na'akeme man horokedi ri na'akeme rir hinin'i wenewhe hariyedi, la horok namehin man wekel \it Horok Or'ori Dardari\it* hariyedi haenhi. Makromod Lalap naho'ok nakailedi ri man maki na'akeme enihe namnenehe noro rira hini'i wenewhe man horokedi aile horok raram eni.  
\v 13 Enla ri man maki lolo lour, la man maki lolo ro man aiyedi Makmaki Onno onne, hi na'akeme ramririri naikoronno onne kalarne leke ho'ok kail hi namnenehe noro rira hini'i wenewhe haenhi.  
\v 14 Makmaki noro Makmaki Onno sopol laedi kahi man aiye mormori raram, la Hunukum eni namwali makmaki rewro'o nine.  
\v 15 Enla ri na'akeme ma naran kaale lolo \it Horok Or'ori Dardari\it* onne, hir sopol laedi kahi man aiye mormori raram haenhi. 
\c 21  
\s1 Noho worworu noro a'am worworu 
\p  
\v 1 Onne horu, ya'u po'on wali'ur a'am noro noho wawan man worworu. A'am noro noho wawan dedesneni moluwedi me'e, la ka'u do'on lour me'e haenhi.  
\v 2 Enla ya'u po'on kota Yerusalem Worworu man moumou dewdewe namhara a'am raram kopur nano Makromod Lalap. Kote onne ra'akenedi me'e, de po'on ma'aruru naise maeke man ra'akekeki nair nainair man ma'aruru ono namkenedi noro mo'oni ho,  
\v 3 la ya'u derne Lira naruri nano Nin naikoronno onne ma na'aheni, “Makaniyala! Ler eniyeni me'ede Makromod Lalap namkenedi holi wewerre noro ri morimori. Ai namkene holi wewerre noro hi, la hi ramwali Nin ri. Makromod Lalap mehen minwuku noro hi, la namwali hi Makromon.  
\v 4 Ai na'akisi rir mak oir na'akeme, la ri kan maki, ri akin kan woir, ri ka nahere, la ri ka nakni'ir me'e ono apinha rahu onne noho lo'olo'ol nine de moluloinedi me'e.” 
\p  
\v 5 Ai ma naikoro naikoronno onne na'aheni wali'ur, “Po'onale! Lere eni ha rahu na'akeme Ya'u hi'i worworu.” An hopon maya'u na'ahenia, “Horokedi ha eniyenihe ono wanakunu eni na'akeme namlolo la namwali kokkoo.” 
\p  
\v 6 Kame'ede Ai na'aheni wali'ur, “Ya'u hi'i ha rahu horuwedi me'e! Ya amwali Alfa la Omega,\f + \fr 21:6 \ft Po'onala catatan kaki ma aile 1:8.\f* Man Dedesne la Man Horu. Inhoi man marou, Ya ala oir hi nano oir makan ma nala or'ori dardari ma kan horu eni. Oir onne Ya ala me'e, ka apanak mim pair.  
\v 7 Inhoi man rehiyedi ara noro Hayakyak Makromon ono ramkene lernohi Ya'u, hir kokala ha wo'ira na'akeme man wa'an onne, la Ya amwali rir Makromod Lalap, la hi ramwali Ya an'u.  
\v 8 Maa, ri ma namka'uk lernohi Ya'u, ma akin ka namkene naili'il Ya'u, man hi'i hini'i ma kan lolo ri raram, ma nesne ri, man holi yak leke yak, man hi'i u'ur leher, man hoikani lernulu aukerhe, la ma napoho, hi na'akeme Ya'u sopol laedi kahi man aiye noro lali mormori eni. Onne makmaki rewro'o nine.” 
\s1 Yerusalem Worworu 
\p  
\v 9 Lere onne hophopon a'am raram ida nano wo'ikku ma nasaledi manuk man penpenu noro Makromod Lalap Nin hunukum wo'ikku man horu onne, mai na'aheni, “Mai eni leke ya'u kukul maeke man ho noro Pipdumaneni ki o.”  
\v 10 Enime'ede Roh Kudus nodi molollo maya'u, la hophopon onne nodi ya'u laa wo'or ida man kulu narehi. Min lolo onne an kukul maya'u Kota Yerusalem man moumou dewdeweni kopur nano a'am raram nano Makromod Lalap.  
\v 11 Makromod Lalap Nina siksika lerlere hi'i kota onne siksika lerlere, la ad'ada naise deli waku man ma'aruru, waku yaspis, noro kokake man mou wake'e.  
\v 12 Kota onne nina lukur lapa man kulu eni nina nike idaweli woro'o, la dohodoho nin hophopon a'am raram radiyakyake. Lolo nike enihe horhorok luhu Israel idaweli woro'o enihe naran.  
\v 13 Ende lolo kote waliwali nike idaweli woro'o aile, lolo wali kimur wokelu, wali warak wokelu, wali ra'i wokelu, la wali karanna wokelu.  
\v 14 Lukur lapa man kulu onne ra'ariri lolo waku na'a'ar idaweli woro'o, la lolo waku na'a'ar onnenihe horhorok hophopon ma nodi Pipdumana Lirna Wawa'an idaweli woro'o eni naranhe. 
\p  
\v 15 Hophopon a'am raram man wakunu noro maya'u onne nasalsala au ke'eke'en mahe, leke nodi ho'ok kota onne noro nina nike noro nin lukur lapa man kulu enihe.  
\v 16 Kota onne narunne noro paharin namnenehe. An ho'ok kota onne ne, narunne stadia riwan idaweli woro'o (kilu 2.200), la paharin noro kulunne namnenehe noro narunne.  
\v 17 Mai an ho'ok lukur lapa onneni, hophopon a'am raram onne nodi ri morimori nin hono'okne, la lukur onne kulunne\f + \fr 21:17 \ft ee, ma'awalne\f* limhi'u rahu weli'akka wo'akka (meter 65).  
\v 18 Kota nin lukur lapa onne rodi waku yaspis hihi'ie, la kota onneni rodi maha ihi hihi'ie penia po'on naholoredi waliwali naise kokake. 
\p  
\v 19 Waku na'a'ar idaweli woro'o onnenihe rodi waku man ma'aruru la wella ai wawan ra'akekie. Waku idaweli woro'o enihe ra'akeki heheni: 
\li1 waku na'a'ar dedesne rodi waku mokmoke wekel waku yaspis, 
\li1 woro'o nine rodi waku mokmoke naise oir man rorom wekel waku nilam, 
\li1 wokelu nine rodi waku mokmoko wekel waku mirah, 
\li1 wo'akka nine rodi waku mokmoke naise penek wekel waku zamrud, 
\li1  
\v 20 wolima nine rodi waku memere ma nawa'aha noro wawarhe wekel waku unam, 
\li1 woneme nine rodi waku mere mohmohon wekel waku sardis, 
\li1 wo'ikku nine rodi waku mamarre wekel waku ratna cempaka, 
\li1 wo'aa nine rodi waku mokmoke wekel waku beril, 
\li1 wohii nine rodi waku mamarre ma naise kokaka wekel waku krisolit, 
\li1 idaweli nine rodi waku mokmoke naise mu'u kawin wekel waku krisopras, 
\li1 idaweli ida nine rodi waku mok au'au wekel waku lasuardi, 
\li1 la idaweli woro'o nine rodi waku au'au man mou naise kokaka wekel waku kecubung.\f + \fr 21:20 \ft Horok Lapa, BIS ‘Bahasa Indonesia Seharihari’ wekel waku enihe naran heheni: 1-baiduri pandan, 2-nilam, 3-yakut, 4-zamrud, 5-baiduri sepah, 6-delima, 7-ratna cempaka, 8-pirus, 9-topas, 10-krisopras, 11-lasuardi, 12-kecubung.\f* 
\p  
\v 21 Nike idaweli woro'o onnenihe dohodoho rodi mutiyara lapida hi'ie. Kalla lapa man aile kota onne rodi mahe ihi hi'ie penia ad'ada naholoredi waliwali naise kokake. 
\p  
\v 22 Ka'u do'on Makromod Lalap Nina Romleu lolo kota onne, ono kote raram na'akeme namwali Romleu rodi ra'uli rasa'a Makromod Lalap ma nodi molollo ma narehi ma nalewen noro Pipdumana onneni.  
\v 23 Lolo kota onne lere noro wollo kaale, ono Makromod Lalap Nin siksik lerlere mehe na'aropo kota onne, la Pipdumana onne namwali nin wadu haenhi.  
\v 24 Hair-hair na'akeme lalaa mamai lolo kakan onne, la rai-rai lolo noho wawan rodi rira linikir kanaru laa kota onneni.  
\v 25 Lukur lapa nina nike enihe nahinari mamani, kar elek me'e, ono a'alam kaale me'e.  
\v 26 Hi na'akeme rodi rira honoor hanawe noro rir linikir kanaru laa kota onne.  
\v 27 Ri ma naran horhorok aile Pipdumana Nina \it Horok Or'ori Dardari\it*\f + \fr 21:27 \ft Po'onala 3:5.\f* meher lalaa mamai lolo kote raram onne, maa ri man hi'i ha man morso, hoikani aukerhe, ee wukupoho ri kar laa kota onne raram. 
\c 22  
\s1 Oir wauwau ma nala or'ori dardari 
\p  
\v 1 Onne horu, hophopon a'am raram onne kukul maya'u oir wauwau man mou naise kokake. Oir ma nala or'ori dardari onne wauwau nano Makromod Lalap noro Pipdumana Rira naikoronno onnenihe,  
\v 2 laa wauwau lolo kalla lapa toro man aile Kota onne. Lolo oir waliwali, au'ono man woin ma nala or'ori dardari ri aile. Au'ono onnenihe wollo ida woi raram, de anna ida woi rewen idaweli woro'o, la kawin namwali awa'ar man hair-hair lolo noho wawan nair rodi rala ruri pe'el hi kemen.  
\v 3 Ri mahaku me haida-haida man Makromod Lalap lokoredi, kar huri minle Kota onne raram. 
\p Enla Makromod Lalap noro Pipdumane Rir naikoronno aile kote raram, la Nina hophopon wahwahan enihe ra'uli rasa'a Ai lolo onne.  
\v 4 Hi meher po'on Makromod Lalap oin makan la Ai Naranne horhorok hi leren.  
\v 5 Lolo onne a'alam kame'el, de kar nair wadu noro lere me'e, ono Makromod Lalap mehe na'aropo Kota onne. Makromod Lalap Nin ri enihe rodi molollo laa ewi-ewi. 
\s1 Yesus Nin mamai eni 
\p  
\v 6 Enla hophopon onne na'aheni maya'u, “Wanakunu Lirna na'akeme om dederneni namlolo la na'akeme namwali kokkoo. Makromod Lalap man konohi Nina nabi-nabi inhawa namwali lere man mai, Ai penia hopon Nin hophopon a'am raram mai leke kukul Nin hophopon wahwahan enihe inhawe ma ka nalo'ol me'e namwali.” 
\p  
\v 7 Yesus na'aheni Nin ri na'akeme, “Makaniyala! Ka nalo'ol Ya'u mai me'e, la ri man derne nakani wanakunu Ya alahariyedi lolo Horok raram eniyeni, hi akin nahuwa'an wake'e!” 
\p  
\v 8 Maya'u, Yohanis, mehe do'on la derne ha eniyeni na'akeme horu, la'u kadi i e'u korno hophopon man kukul hahaa onnenihe kalarna leke hoikani,  
\v 9 maa ai namhene la na'aheni, “Yom hoikani ya'u! Ya'u me'ene, ya amwali hophopon haenhi naise o moro wallumhe ma namwali nabi-nabi, la noro ri na'akeme man derne nakani nounaku man aile Horok eni! Hoikani Makromod Lalap mehe!”  
\v 10 Ai na'aheni wali'ur, “Yono suwar Horok eni Lirna man Makromod Lalap nalhariyedi me'eni, ono ka nalo'ol me'e ha eniyenihe namwali.  
\v 11 Ri man ailanna la ma akin morso na'amoli hir hi'i menmelollo rir suk aimehi mamani, maa mi man hi'i ha ma namlolo lolo Makromod Lalap kalarna, na'amoli mamkene hi'i ha ma namlolo mamani. Enla mi ma akin moumou dewdewe, na'amoli mim mori moumou dewdewe mamani.” 
\p  
\v 12 Yesus na'aheni, “Makaniyala! Ka nalo'ol me'e Ya'u mai odi Ainu'u mahmaha kolkoli herre walha ri dohodoho rira hini'i wenewhe.  
\v 13 Ya amwali Alfa noro Omega!\f + \fr 22:13 \ft Po'onala catatan kaki ma aile 1:8.\f* Ya amwali Man Dedesne la Man Horu! Ya amwali Ma Nolu la Man Ka'uli'ur!” 
\p  
\v 14 Ri man pahar rira nainair hehen nanumene mou, hi akinhe nahuwa'anedi ono rira molollo aile lole Kota onne nin nike laa raram, la ra'an au woi nano au'ono ma nala or'ori dardari eni.  
\v 15 Maa ri man hi'i hahaa man morse, man hi'i u'ur leher, man holi diwar dawar, ma nesne ri, man hoikani lernulu aukerhe, roro man raram nodi napoho mamani, hi onne ra'alehe molollo laa kota onne raram. 
\p  
\v 16 “Maya'u eni Yesus! Ya'u hoponedi Ainu'u hophopon a'am raram loikaru ha eniyeni na'akeme ki mi ma namwali kerei raramne. Ya'u eni rai Daud nin Upun Anan! Ya'u penia Kaliyoro ad'ada man ha'a noho roropo.” 
\p  
\v 17 Roh Kudus noro Pipdumana hono ra'aheni, “Mai here!” Lariyala man derne Lir eniyeni na'aheni, “Mai here!” 
\p Enla inhoi man marou, lariyala mai nomun oir ma nala or'ori dardari eni. Oir eniyeni kar pair. 
\s1 Lira man horu 
\p  
\v 18 Maya'u, Yohanis, a'ori honorok mi man dernedi wanakunu ya'u horokedi lolo horok eniyeni ma na'ono hahaa ma namwali lere eni noro lere man mai. Horhorok! Inhoi na'uwali panaeku ida lolo Horok eni Lirna, na'amoli Makromod Lalap na'uwali apinpinha wo'operperi man aile Horok eni ai.  
\v 19 Enla inhoi sopoledi panaeku ida nano Horok eniyeni, Makromod Lalap ka nala molollo ai holi lolo Kota man moumou dewdewe onne, la kan hurinohi ai na'an auwoi nano au'ono ma nala or'ori dardari eni man horokedi lolo horok eniyeni. 
\p  
\v 20 Man loikaru wanakunu na'akeme eniyeni na'aheni, “Namlolo! Ka nalo'ol Ya'u mai me'e!” 
\p Ya! Mai here, Makromod Yesus! 
\p  
\v 21 Na'amoli Makromod Yesus nala Nin rere'e haharu Nin ri na'akeme! Amin!